← претходни дан | Минеј — Октобар | следећи дан →
4 октября: Святого священномученика Иерофея, епископа Афинского. Обретение честных мощей святителей Гурия, архиепископа Казанского, и Варсонофия, епископа Тверского
Мѣ́сѧца тогѡ́же въ д҃-й де́нь.
Ст҃а́гѡ свѧщенномꙋ́ченика і҆ероѳе́а, є҆пі́скопа а҆ѳи́нскагѡ:
И҆ ѡ҆брѣ́тенїе честны́хъ моще́й, и҆̀же во ст҃ы́хъ ѻ҆тє́цъ на́шихъ, гꙋ́рїа, пе́рвагѡ а҆рхїепі́скопа новопросвѣще́ннагѡ гра́да каза́ни, и҆ варсоно́фїа, є҆пі́скопа тферска́гѡ.
Слꙋ́жба и҆́хъ пи́сана по се́й слꙋ́жбѣ.
Ве́черъ, на Гдⷭ҇и, воззва́хъ, стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Бл҃года́ть прїе́мь ꙳ всест҃а́гѡ, всесла́вне і҆ероѳе́е, дх҃а, ꙳ всю̀ проше́лъ є҆сѝ ны́нѣ вселе́ннꙋю, ꙳ ᲂу҆чѧ̀ є҆ди́ницꙋ въ тре́хъ ѵ҆поста́сѣхъ честѝ, ꙳ ѻ҆ц҃а̀ безнача́льна, ꙳ нача́ло бж҃ества̀: ꙳ съ ни́мже сн҃а ꙗ҆́кѡ сопресто́льна ѻ҆ц҃ꙋ̀ и҆ є҆диносꙋ́щна. ꙳ ѿ дв҃ы ражда́ема, ꙳ плотоно́сца ꙗ҆́кѡ чл҃вѣ́ка.
Да́ръ свѧщеннобжⷭ҇твенный твою̀ дꙋ́шꙋ, ꙳ ꙗ҆́кѡ благопрїѧ́тенъ прине́слъ є҆сѝ, ꙳ и҆ тѣ́ло пре́далъ є҆сѝ свѧще́нно ꙗ҆́кѡ бжⷭ҇твенное, ꙳ и҆ свѧщеннодѣ́йствꙋющее дꙋ́шы ꙳ вѣ́рꙋющихъ вседержи́телю бг҃ꙋ, ꙳ спасе́нїе вѣ̑рнымъ и҆сточа́ющее. ꙳ тѣ́мъ твою̀ па́мѧть и҆ погребе́нїе ᲂу҆блажа́емъ, ꙳ и҆ чꙋдеса̀ лю́бимъ, ꙳ и҆ словеса̀ проповѣ́дꙋемъ.
Ты̀ двоенадесѧ́тное число̀ ꙳ а҆пⷭ҇лѡвъ ви́дѣлъ є҆сѝ, на ᲂу҆спе́нїи пресла́вныѧ, ꙳ приснодв҃ы же пречⷭ҇тыѧ бцⷣы мт҃ре гдⷭ҇ни, и҆ дїонѵ́сїй съ тобо́ю, ꙳ и҆́же бжⷭ҇твєнныѧ списа́въ чи́ны. ꙳ съ ни́миже твоѐ всепра́зднственное ꙳ и҆ пресвѧто́е торжество̀ ꙳ вѣ́рнїи ᲂу҆блажа́емъ, і҆ероѳе́е сла́вне.
Сла́ва, гла́съ в҃:
Предста́въ ᲂу҆спе́нїю бжⷭ҇твенномꙋ, бг҃оповѣ́стниче, бг҃ома́тере, вѣща̑нїи бжⷭ҇твенными возвесели́лъ є҆сѝ сердца̀, бл҃же́нне, вѣ́рныхъ, и҆ свѧще́нное сосло́вїе бг҃опроповѣ́дателей а҆пⷭ҇лѡвъ ᲂу҆слади́въ, и҆зстꙋпле́нїемъ бжⷭ҇твеннѣйшимъ воспѣва́ѧ бж҃їѧ та̑йны. тѣ́мъ дерзнове́нїе ко хрⷭ҇тꙋ̀ прїе́мъ, і҆ера́рше і҆ероѳе́е, моли́сѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Є҆гда̀ нескве́рнаѧ а҆́гница ви́дѣ своего̀ а҆́гнца на заколе́нїе ꙗ҆́кѡ человѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀, что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бл҃гость, чл҃вѣколю́бче.
Тропа́рь, гла́съ д҃:
Бла́гости наꙋчи́всѧ, и҆ трезвѧ́сѧ во всѣ́хъ благо́ю со́вѣстїю, свѧщеннолѣ́пнѡ ѡ҆бо́лксѧ, поче́рплъ є҆сѝ ѿ сосꙋ́да и҆збра́ннагѡ неизречє́ннаѧ, и҆ вѣ́рꙋ соблю́дъ, ра́вное тече́нїе соверши́лъ є҆сѝ, свѧщенномч҃ниче і҆ероѳе́е. молѝ хрⷭ҇та̀ бг҃а, спасти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃а́гѡ канѡ́нъ на д҃, є҆гѡ́же краегране́сїе: Свѣтоно́снꙋю твою̀ всебл҃же́нне па́мѧть почита́емъ. Творе́нїе ѳеофа́ново.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Нбⷭ҇наго ᲂу҆ченика̀ тайноводи́телѧ, бг҃опрїѧ́тне, па́ѵла, мїрска́гѡ ловца̀, ᲂу҆чи́телѧ и҆мѣ́ѧ, видѣ́нїѧ го́рнѣйшагѡ ᲂу҆чени́къ бы́лъ є҆сѝ.
Дх҃одви́жный ꙗ҆́вственнѡ па́ѵловъ тѧ̀ ѧ҆зы́къ, вѣща́ющъ бж҃їѧ та̑йны, бл҃же́нне, ѡ҆б̾ѧ́ше, и҆ бг҃овѣща́телѧ содѣ́ѧ.
Оу҆нзе́нъ любо́вїю дꙋхо́вною, и҆ бжⷭ҇твенными словесы̀ въ ра́зꙋмѣ бесѣ́дꙋѧ всѣ́хъ влⷣцѣ, всесвѧще́нне, свѧщє́ннаѧ словеса̀ возложи́лъ є҆сѝ.
Бг҃оро́диченъ:
Свѣ́та присносꙋ́щнагѡ прїѧ́телище бг҃олѣ́пное бы́вши, дв҃о чⷭ҇таѧ, сквє́рнъ мѧ̀ всѧ́кагѡ грѣха̀, и҆ тимѣ́нїй и҆змы́й, влⷣчце.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Ꙗ҆́кѡ свѧщенносло́вѧща свѧщє́ннаѧ пи́смена, и҆ благоче́стїѧ сло́во проповѣ́дающа, всѝ почита́емъ тѧ̀ ве́селѡ соше́дшесѧ, и҆ твою̀ свѧще́ннꙋю па́мѧть сла́вимъ.
Крѣ́постїю и҆ ма́нїемъ, и҆ бжⷭ҇твеннымъ рече́нїемъ, къ бл҃годѣ́телю всѣ́хъ возпростира́ѧсѧ, ᲂу҆́мъ тво́й ѡ҆зари́лъ є҆сѝ лꙋча́ми та́мошними, и҆ дꙋ́шꙋ просвѣти́лъ є҆сѝ, пребл҃же́нне.
Тезоиме́ннѣ наре́клсѧ є҆сѝ свѧще́нное бжⷭ҇твенное, и҆ ст҃о́е бг҃омꙋ́дрое ꙗ҆ви́лсѧ є҆сѝ возложе́нїе, вседержи́телю и҆ творцꙋ̀ вѣкѡ́въ, и҆ хра́мъ ᲂу҆краси́лъ є҆сѝ нбⷭ҇ный.
Бг҃оро́диченъ:
Не́бо простры́й, и҆ земны́й, чⷭ҇таѧ, содержа́й крꙋ́гъ, и҆ по всемꙋ̀ є҆стество́мъ бжⷭ҇тва̀ во ѡ҆б̾ѧ́тїихъ твои́хъ пло́тски содержа́сѧ, и҆ вѣ̑рнымъ тѧ̀ ᲂу҆твержде́нїе всѣ̑мъ показа̀.
Конда́къ, гла́съ и҃. Подо́бенъ: Взбра́нной:
Свѧщеннонача́льника а҆ѳи́нскаго восхвалѧ́емъ тѧ̀, ꙗ҆́кѡ тайноꙋчи́вшесѧ тобо́ю стра̑ннымъ и҆ неизречє́ннымъ: ꙗ҆ви́лсѧ бо є҆сѝ бг҃опрїѧ́тный пѣсносло́вецъ. но молѝ всебл҃же́нне і҆ероѳе́е, ѿ всѧ́кихъ на́мъ грѣхопаде́нїй и҆зба́витисѧ, да зове́мъ: ра́дꙋйсѧ, ѻ҆́ч҃е бг҃омꙋ́дре.
Та́же сѣда́ленъ, гла́съ є҃. Подо́бенъ: Собезнача́льное сло́во:
А҆пⷭ҇льскимъ вѣща́нїемъ ѡ҆гласи́въ тво́й ᲂу҆́мъ, и҆ ᲂу҆па́съ прпⷣбне, вѣ́рныхъ составлє́нїѧ, же́ртвꙋ чи́стꙋ прине́слъ є҆сѝ цр҃ю̀ и҆ творцꙋ̀, вопло́щшемꙋсѧ за ны̀ ѿ дв҃ы бцⷣы, и҆ воскре́сша со сла́вою и҆сповѣ́давъ є҆го̀, і҆ероѳе́е.
Сла́ва, и҆ ны́нѣ, бг҃оро́диченъ:
Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное, и҆ непосты́дное, стѣно̀ и҆ покро́ве и҆ приста́нище прибѣга́ющымъ къ тебѣ̀, приснодв҃о чⷭ҇таѧ, сн҃а твоего̀ и҆ бг҃а молѝ со а҆́гг҃лы, ᲂу҆мире́нїе да́ти мі́рꙋ, и҆ спасе́нїе, и҆ ве́лїю ми́лость.
Крⷭ҇тобг҃оро́диченъ:
На крⷭ҇тѣ̀ зрѧ́щи тѧ̀, хрⷭ҇тѐ, мт҃и твоѧ̀, во́лею посредѣ̀ разбо́йникѡвъ ви́сѧща, растерза́ющисѧ ᲂу҆тро́бою мт҃рски, глаго́лаше: безгрѣ́шный сн҃е, ка́кѡ непра́веднѡ на крⷭ҇тѣ̀ ꙗ҆́коже ѕлодѣ́й пригвожде́нъ є҆сѝ, человѣ́ческїй ро́дъ хотѧ̀ ѡ҆живи́ти ꙗ҆́кѡ бл҃гоꙋтро́бенъ;
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Виті́йскими бг҃овѣща́ньми ᲂу҆краси́лъ є҆сѝ ликостоѧ̑нїѧ бл҃же́нне і҆ероѳе́е, вѣ́рныхъ, и҆ свѧще́нный собо́ръ бг҃омꙋ́дре, возвесели́лъ є҆сѝ а҆пⷭ҇льскїй, ᲂу҆дивле́нїемъ бжⷭ҇твеннымъ дѣ́йствꙋѧ, и҆ поѧ̀: си́лѣ твое́й сла́ва, чл҃вѣколю́бче.
Ве́сь бг҃ꙋ ѡ҆свѧще́нъ бы́лъ є҆сѝ всеѻбра́знѡ, бл҃же́нне, и҆зстꙋпа́ѧ къ немꙋ̀ бг҃осло́вными свѧщеннослѡ́вїи, свѧщенноѧвле́нъ бг҃опрїѧ́тне, и҆ бжⷭ҇твенъ пѣсносло́вецъ, и҆ мꙋ́дръ бг҃овѣща́тель, присꙋ́щымъ смы́сленнѡ сꙋди́мь.
Ны́нѣ ви́дѧ, ѻ҆́ч҃е, бжⷭ҇твєннаѧ ꙗ҆снѣ́йше, мимоше́дшихъ всѣ́хъ свѧще́ннѣйше гада́нїй, и҆ сѣ́нїй сꙋ́щихъ на землѝ, и҆́стиннѣйшаѧ бг҃овидѣ̑нїѧ сїѧ́нїй, молѝ спасти́сѧ вѣ́рнѡ пою́щымъ: си́лѣ твое́й сла́ва, чл҃вѣколю́бче.
Бг҃оро́диченъ:
Ты̀ бг҃а невмѣсти́маго, вмѣ́щшагосѧ во чре́во твоѐ, пречⷭ҇таѧ, родила̀ є҆сѝ, ꙗ҆́кѡ чⷭ҇таѧ дѣ́вственными ᲂу҆кра́шена свѣтлостьмѝ, всебл҃же́ннаѧ. тѣ́мъ тѧ̀ бцⷣꙋ и҆́стиннѡ благохва́лимъ, и҆ ржⷭ҇тво̀ твоѐ всѝ сла́вимъ.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Кꙋпножи́тель, ѻ҆́ч҃е, а҆пⷭ҇льскомꙋ сы́й собра́нїю, съ ни́миже предста́лъ є҆сѝ на ᲂу҆спе́нїе бжⷭ҇твенное, бг҃огла́се, жизнода́вца пло́тїю на́мъ ро́ждшїѧ, прест҃ы́ѧ и҆ чⷭ҇тыѧ бг҃ома́тере.
Преесте́ственнѡ разꙋмѣ́въ, и҆ ста́рчески ꙗ҆̀же па́че словесѐ видѣ̑нїѧ, и҆сповѣ́да всѣ̑мъ прїе́млющымъ вѣ́рнѡ сїѧ́нїе и҆ твоѧ̀ всебл҃же́нне, созри́тєльнаѧ бг҃ослѡ́вїѧ, разꙋмѣ́ти лю́бѧщымъ вседо́блественнѣйше.
Пребога́тными лꙋча́ми па́че є҆стества̀ свѣтозаре́нїемъ свѣтѧ́сѧ, и҆звѣствова́нїемъ бжⷭ҇твенныхъ ѿкрове́нїй, и҆ чистото́ю мно́гихъ ѡ҆держа́лъ є҆сѝ вре́меннымъ и҆спыта́нїемъ, и҆ видѣ́нїемъ мꙋдрѣ́йшаѧ бжⷭ҇твєннаѧ наꙋча́емь.
Бг҃оро́диченъ:
Неискꙋсомꙋ́жнѡ дв҃о, непредѣ́льнаго є҆стество́мъ бж҃ества̀, вмꙋжи́вшагосѧ сло́ва на́съ ра́ди человѣ́кѡвъ, зачала̀ є҆сѝ ѿ крове́й, ѻ҆трокови́це, дѣ́вственныхъ, воѡбраже́на па́че сло́ва и҆ зако́на, и҆ є҆стества̀.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Навыче́нїемъ бг҃олѣ́пнымъ бжⷭ҇твенномꙋ зна́нїю наꙋча́емь, словеса̀, ѻ҆́ч҃е, твоѧ̀, ꙗ҆́кѡ втора́ѧ словеса̀ ѡ҆ста́вилъ є҆сѝ ꙗ҆́вѣ свѧщеннозна́нїѧ, дꙋ́шы на́шѧ просвѣща́ющаѧ.
Бл҃же́нъ и҆́стиннѡ бы́лъ є҆сѝ, бг҃облаже́нне, ѡ҆чище́нною дꙋше́ю, и҆ сꙋ́щее бл҃же́нство, и҆ є҆ди́но жела́емое возлюби́лъ є҆сѝ, добро́ты сп҃совы, і҆ероѳе́е.
На пречи́стыѧ лꙋчы̀ взира́ѧ, бг҃опрїѧ́тне, разꙋ́мными блиста́ньми бжⷭ҇твенныхъ свѣ́тлостей, тѣ́хъ наслажде́нїѧ и҆ свѣтодаѧ́нїѧ ѻ҆́бщникъ ꙗ҆ви́лсѧ є҆сѝ, бл҃же́нне.
Бг҃оро́диченъ:
Гдⷭ҇ьственнѡ, и҆ и҆́стиннѡ тѧ̀, бцⷣе, сла́вимъ, сꙋ́щѡ бо сꙋ́щаго бг҃а неизрече́ннѡ родила̀ є҆сѝ, пло́тїю по ѵ҆поста́си совокꙋ́пльшасѧ, прест҃а́ѧ мт҃и дв҃о.
Конда́къ, гла́съ д҃. Подо́бенъ: Вознесы́йсѧ:
Ꙗ҆́коже сто́лпъ непоколеби́мь, і҆ероѳе́е, преще́нїѧ врагѡ́въ не ᲂу҆страши́сѧ: но пре́лести разрꙋши́лъ є҆сѝ тверды́ню, ꙗ҆́кѡ ка́мень че́стенъ валѧ́ѧсѧ, ѻ҆́ч҃е. тѣ́мъ влⷣка тѧ̀ хра́брствовавша вѣнча́етъ живонача́льною и҆ бжⷭ҇твенною десни́цею: є҆го́же ѡ҆ всѣ́хъ на́съ ᲂу҆молѝ.
І҆́косъ:
Зако́нꙋ покорѧ́ющесѧ твоемꙋ̀, хрⷭ҇тѐ, ᲂу҆ч҃ницы̀ твоѝ, и҆ и҆̀же ѿ ꙗ҆зы̑къ всѣ̑мъ проповѣ́дающе сло́во бжⷭ҇твеннагѡ твоегѡ̀ прише́ствїѧ, це́рквамъ всѣ̑мъ рꙋкополага́ютъ вѣ̑рныѧ, па́стыри же и҆ проповѣ́датели. па́стырѧ ᲂу҆́бѡ и҆ сего̀ положи́ша, є҆го́же и҆збра́лъ є҆сѝ ѿ младе́нства, и҆ просвѣти́въ ꙗ҆́кѡ непоро́чна тебѣ̀, и҆ произво́ли на сїѐ того̀ возве́дъ, и҆ ста́до твоѐ врꙋчи́въ, свидѣ́телѧ ꙗ҆ви́лъ є҆сѝ твоегѡ̀ црⷭ҇твїѧ, молѧ́щасѧ ѡ҆ всѣ́хъ на́съ.
Пѣ́снь з҃. І҆рмо́съ:
Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Ст҃ы́хъ ст҃а̑ѧ тща́сѧ ви́дѣти, бг҃облаже́нне, чистото́ю житїѧ̀, и҆ зрѣ́нїѧ бжⷭ҇твеннагѡ высо́кое, мꙋ́дрѣ стѧжа́лъ є҆сѝ, и҆ поѧ̀ взыва́лъ є҆сѝ: бл҃гослове́нъ бг҃ъ ѻ҆тє́цъ на́шихъ.
Глагѡ́лъ вѣща́нїе твои́хъ, и҆ списа́нїй доброслове́сїе, возвеселѧ́етъ любо́вїю чествꙋ́ющыѧ, и҆ поꙋща́етъ къ пѣснопѣ́нїю, зва́ти наꙋча́ѧ: бл҃гослове́нъ є҆сѝ бж҃е ѻ҆тє́цъ на́шихъ.
Є҆ди́ницꙋ бж҃ество́мъ зна́емꙋю благосло́вилъ є҆сѝ, въ ли́цѣхъ трⷪ҇цꙋ, и҆ пое́мꙋ во ѵ҆поста́сѣхъ тре́хъ бг҃омꙋ́дре, и҆ поѧ̀ взыва́лъ є҆сѝ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Зако́нныхъ є҆сте́ствъ, дв҃ома́ти, кромѣ̀ родила̀ є҆сѝ, влады́чествꙋющаго всѣ́ми ви́димыми и҆ разꙋ́мными, чⷭ҇таѧ, є҆го́же пое́мъ согла́снѡ зовꙋ́ще: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Всеси́льное дх҃а ст҃а́гѡ дѣ́йство въ чистѣ́йшꙋю твою̀ дꙋ́шꙋ все́льшисѧ, бг҃опрїѧ́тна проповѣ́дника и҆ бг҃оглаго́льника показа̀, свѧщеннолѣ́пнѡ и҆зба́вителѧ пою́ща, и҆ вѣ́рою хва́лѧща: свѧще́нницы, воспо́йте, лю́дїе, превозноси́те во всѧ̑ вѣ́ки.
Съ благоче́стнымъ взыска́нїемъ и҆спыта́въ неизречє́ннаѧ строє́нїѧ хрⷭ҇то́выхъ та̑инъ, ꙗ҆́снѡ и҆з̾ѧви́лъ є҆сѝ высокослове́сїемъ дѣ́йствꙋѧ, и҆ сладча́йшимъ твои́хъ вѣща́нїй сложе́нїемъ вопїѧ̀ непреста́ннѡ: свѧще́нницы, воспо́йте, лю́дїе, превозноси́те во всѧ̑ вѣ́ки.
Всебога́таѧ тѧ̀ благода́ть бжⷭ҇твеннѣйшимъ вдохнове́нїемъ и҆ бг҃осло́вїемъ и҆спы́тнымъ и҆спо́лнила є҆́сть: ѿсю́дꙋ и҆сточи́лъ є҆сѝ ꙗ҆́кѡ рѣ́ки ᲂу҆чє́нїѧ, а҆пⷭ҇льскаѧ возвеселѧ́щѧ ликостоѧ̑нїѧ, съ ни́миже ны́нѣ воспѣва́еши: свѧще́нницы, воспо́йте, лю́дїе, превозноси́те во всѧ̑ вѣ́ки.
Бг҃оро́диченъ:
Оу҆мерщвле́нꙋ пречⷭ҇таѧ, дꙋ́шꙋ мою̀ грѣхмѝ, и҆ ѡ҆ѕло́бленꙋ ꙗ҆дови́тымъ ᲂу҆грызе́нїемъ, бг҃а могꙋ́щаго животвори́ти всѧ́чєскаѧ, неискꙋсобра́чнѡ па́че є҆стества̀ ро́ждши, возста́ви вопїю́щꙋю: дѣ́ти, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Мꙋ́дрости премꙋ́драгѡ ꙗ҆́кѡ рачи́тель бы́въ, бл҃года́тный вѣне́цъ благолѣ́пный ра́дꙋѧсѧ прїѧ́лъ є҆сѝ ны́нѣ ѿ неѧ̀: и҆ лико́вникъ небе́сный ᲂу҆ всѧ́ческихъ содѣ́телѧ бы́въ, молѝ спасти́сѧ ѿ бѣ́дъ хва́лѧщымъ тѧ̀, і҆ероѳе́е.
Всели́лсѧ є҆сѝ въ вы̑шнїѧ бжⷭ҇твєнныѧ дворы̀, и҆ ѻ҆би́тєли вѣ̑чныѧ наслѣ́дивъ, съ во́инствы а҆́гг҃льскими ны́нѣ пра́зднꙋеши, и҆ съ а҆пⷭ҇льскими чи́нми, и҆̀мже свесели́шисѧ ра́достнѣ: съ ни́миже и҆ соводворѧ́ѧсѧ, вѣ́рою чествꙋ́ющымъ тѧ̀ бжⷭ҇твеннагѡ ми́ра просѝ.
И҆звѣ̑стнаѧ воздаѧ̑нїѧ воспрїе́мъ, и҆́хже на землѝ ꙗ҆влє́нїѧ стѧжа́лъ є҆сѝ, при́сною любо́вїю взира́ѧ къ бг҃ꙋ: ны́нѣ прилѣ́жнѡ молѝ, ѻ҆́ч҃е і҆ероѳе́е, ми́лость и҆ ѡ҆чище́нїе пода́ти, вѣ́рою па́мѧть твою̀ соверша́ющымъ свѣтоно́снꙋю и҆ всесвѧще́ннꙋю.
Бг҃оро́диченъ:
Ꙗ҆́кѡ мт҃и всѣ́хъ содѣ́телѧ, мт҃рнимъ твои́мъ дерзнове́нїемъ ᲂу҆молѝ твоего̀ сн҃а, спастѝ ѿ наси́лїѧ мꙋчи́тельскагѡ плѣнє́нныѧ рабы̑ твоѧ̑, и҆ клевєты̀ человѣ̑къ лꙋка́выхъ ᲂу҆праздни́ти, ми́ръ же пода́ти и҆ спасе́нїе пою́щымъ тѧ̀.
Свѣти́ленъ. Подо́бенъ: Жєны̀, ᲂу҆слы́шите:
Хꙋ́ждшее покори́лъ є҆сѝ лꙋ́чшемꙋ, бг҃опрїѧ́тне, ᲂу҆́мъ страсте́й вожда̀ предвчини́въ всемꙋ́дрѡ: ѿвсю́дꙋ, і҆ероѳе́е, бг҃осло́вїѧ бы́лъ є҆сѝ ѻ҆рга́нъ, и҆ а҆пⷭ҇лъ хрⷭ҇то́въ мꙋ́дре і҆ера́рше, ѡ҆ мі́рѣ моли́сѧ.
Бг҃оро́диченъ:
Оу҆спе́нїю твоемꙋ̀ пречⷭ҇томꙋ прише́дъ і҆ероѳе́й, съ про́чими а҆пⷭ҇лы пѣ́снь пое́тъ тебѣ̀ ѻ҆трокови́цѣ, стра́ннꙋю и҆ неизрече́ннꙋю, бжⷭ҇твеннѡ и҆зстꙋпа́ѧ, ꙗ҆́кѡ и҆́стиннѡ бг҃опрїѧ́тенъ: є҆мꙋ́же подо́бники и҆ на́съ покажѝ, бг҃ома́ти дв҃и́це.
Слꙋ́жба ѡ҆брѣ́тенїю честны́хъ моще́й, и҆̀же во ст҃ы́хъ ѻ҆тє́цъ на́шихъ, гꙋ́рїа пе́рвагѡ а҆рхїепі́скопа новопросвѣще́ннагѡ гра́да каза́ни, и҆ варсоно́фїа є҆пі́скопа тферска́гѡ.
На ма́лѣй вече́рни стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Взѧ́сте на ра́мо крⷭ҇тъ хрⷭ҇то́въ, ꙳ и҆ распѧ́стесѧ мі́рꙋ, преподо́бнїи, ꙳ и҆ послѣ́довасте стопа́мъ созда́вшагѡ ѿ не сꙋ́щихъ всѧ̑, ꙳ бж҃їѧ сло́ва. ꙳ є҆го́же моли́те, да прїи́мемъ грѣхѡ́въ проще́нїе, ꙳ и҆ наслѣ̑дницы бꙋ́демъ жи́зни вѣ́чныѧ.
Два́жды.
Ꙗ҆ви́стесѧ сокро́вище добродѣ́телей, ꙳ и҆ презрѣ́сте всѧ̑ ꙗ҆̀же въ житїѝ кра̑снаѧ, хрⷭ҇то́вою любо́вїю распала́еми, и҆́щꙋще ꙗ҆̀же бг҃ꙋ ᲂу҆гѡ́днаѧ. ꙳ и҆ тогѡ̀ ра́ди бы́сте жи́телє црⷭ҇тва нбⷭ҇нагѡ, ꙳ и҆ ѡ҆ на́съ моли́те, да бꙋ́демъ и҆ мы̀ томꙋ̀ соприча̑стницы.
Безстра́стїѧ бы́вше кра́снїи сосꙋ́ди, ѻ҆тцы̀ пребл҃же́ннїи, и҆ чꙋде́съ и҆сто́чницы, ꙳ мона́шествꙋющихъ столпѝ крѣ́пцыи, де́мѡнѡвъ прогони́телє, ꙳ и҆ страсте́й цѣли́телє да почтꙋ́тсѧ пѣ́сньми, ꙳ наста́вницы на́ши премꙋ́дрїи: и҆ мо́лѧтъ хрⷭ҇та̀, да спасе́тъ дꙋ́шы на́шѧ.
Сла́ва, гла́съ ѕ҃:
Кто̀ дово́ленъ похвали́ти такѡвы́ѧ ст҃и́тели, возсїѧ́вшыѧ напослѣ́докъ лѣ́тъ; бл҃года́тїю бо ст҃а́гѡ дх҃а, чꙋде́съ и҆сцѣле́нїй да́ръ прїе́мше ѿ бг҃а, и҆ свои́хъ тѣле́съ нетлѣ́нїе, на́мъ же ᲂу҆ хрⷭ҇та̀ про́сѧтъ грѣхѡ́въ проще́нїѧ, и҆ ве́лїѧ ми́лости.
И҆ ны́нѣ, бг҃оро́диченъ:
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
До́мъ и҆ жили́ще дх҃а прест҃а́гѡ, ꙳ прпⷣбнїи ѻ҆тцы̀, бы́ли є҆стѐ: ꙳ тѣ́мже и҆ на́съ ꙳ до́мъ тогѡ̀ содѣ́лайте, ꙳ свѧтꙋ́ю ва́шꙋ па́мѧть почита́ющихъ.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Не преста́йте молѧ́щесѧ, прпⷣбїи, ꙳ ѡ҆ при́сныхъ рабѣ́хъ ва́шихъ, ꙳ и҆̀хже нетлѣ́нїемъ тѣле́съ ва́шихъ возвесели́сте, ꙳ да всѝ честнꙋ́ю ва́шꙋ па́мѧть ꙳ веселѧ́щесѧ почита́емъ.
Сті́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ.
Моли́тесѧ прилѣ́жнѡ за ны̀ наста́вницы на́ши, ꙳ и҆ и҆зба́вите ны̀ ѿ бѣ́дъ и҆ скорбе́й, ꙳ ꙗ҆̀же на ны̀ нахо́дѧтъ: ꙳ ᲂу҆скори́те, ст҃і́и, на по́мощь на́шꙋ, ꙳ да по до́лгꙋ ва́съ ᲂу҆блажа́емъ.
Сла́ва, гла́съ г҃. Самогла́сенъ:
Мно́гъ трꙋ́дъ, и҆ тѣ́сенъ пꙋ́ть въ житїѝ свое́мъ прешлѝ є҆стѐ, ѻ҆тцы̀ прпⷣбнїи: и҆ тѣ́мъ дости́гли є҆стѐ въ ти́хое приста́нище, и҆ ра́дость неизрече́ннꙋю, и҆дѣ́же пра́ведныхъ веселѧ́тсѧ ли́цы, ꙗ҆влѧ́ющесѧ на́мъ ча́дѡмъ свои̑мъ, ꙗ҆́кѡ мздꙋ̀ прїѧ́ли є҆стѐ трꙋдѡ́въ свои́хъ.
И҆ ны́нѣ, бг҃оро́диченъ. Тропа́рь ѻ҆́бщїй ст҃ы́хъ, гла́съ г҃:
Пе́рвїи ᲂу҆чи́телїе пре́жде те́мномꙋ, ны́нѣ же свѣ́тломꙋ и҆ новопросвѣще́нномꙋ гра́дꙋ каза́ни, пе́рвїи возвѣсти́телїе пꙋтѝ спаси́тельнагѡ, и҆́стиннїи храни́телїе а҆пⷭ҇льскихъ преда́нїй, столпѝ непоколеби́мїи, благоче́стїѧ ᲂу҆чи́телїе, и҆ правосла́вїѧ наста̑вницы, гꙋ́рїе и҆ варсоно́фїе, влⷣкꙋ всѣ́хъ моли́те, ми́ръ вселе́ннѣй дарова́ти, и҆ дꙋша́мъ на́шымъ ве́лїю ми́лость.
Сла́ва, и҆ ны́нѣ, бг҃оро́диченъ.
На вели́цѣй вече́рни, Блаже́нъ мꙋ́жъ: На Гдⷭ҇и, воззва́хъ, поста́вимъ стїхѡ́въ и҃: И҆ пое́мъ стїхи̑ры ст҃и́телѧ гꙋ́рїа, гла́съ є҃.
Подо́бенъ: Ра́дꙋйсѧ:
Преда́нїємъ прилѣжа́въ прилѣ́жнѡ, ꙗ҆̀же прїѧ́лъ є҆сѝ ѿ сп҃са на́шегѡ хрⷭ҇та̀ бг҃а, и҆ ст҃ы́хъ є҆гѡ̀ ᲂу҆чени̑къ, и҆ вселе́нскихъ ᲂу҆чи́телей, вѣ́рою и҆ благопокоре́нїемъ къ наказа́телю своемꙋ̀, и҆ дости́глъ є҆сѝ слове́сное наказа́нїе, и҆ соверше́нное позна́нїе свѧще́нныхъ писа́нїй. и҆ тогѡ̀ ра́ди и҆збра́ннагѡ хрⷭ҇то́ва ста́да ѻ҆ц҃ъ и҆ ᲂу҆чи́тель ꙗ҆влѧ́ешисѧ, ст҃и́телю гꙋ́рїе, хрⷭ҇та̀ бг҃а молѝ спасти́сѧ на́мъ, вѣ́рою приходѧ́щымъ къ ра́цѣ моще́й твои́хъ.
Къ три́десѧтємъ два̀ лѣ̑та земле́ю покрове́но бы́сть честно́е тѣ́ло твоѐ, ст҃и́телю гꙋ́рїе, и҆ ѡ҆брѣ́тесѧ ра́ка моще́й твои́хъ полна̀ мѵ́ра благово́ннагѡ, гро́бъ же и҆ погреба̑льнаѧ нѡ́ва бѧ́хꙋ, крѣ́постїю же но́выхъ крѣпча́йшѧ: тѣ́ло же твоѐ честно́е а҆́ки гꙋ́ба верхꙋ̀ мѵ́ра ноша́шесѧ: ча́сти же ѿ чꙋдотво́рнагѡ твоегѡ̀ тѣ́ла, ни є҆ди́нѣй погрꙋже́ннѣй бы́вшей, цѣ́лости ра́ди. тѣ́мже мо́лимъ тѧ̀, ст҃и́телю гꙋ́рїе: молѝ хрⷭ҇та̀ бг҃а, спасти́сѧ дꙋша́мъ на́шымъ.
Мона̑ха два̀ подви́гшасѧ къ бг҃ꙋ до́брѣ, і҆ѡ́на и҆ некта́рїй, є҆ди́нъ є҆ди́наго роди́вый, тебѣ́ же послꙋжи́вша въ мі́рѣ вѣ́рнѡ, и҆ по сме́рти твое́й вѣ́рꙋ къ тебѣ̀ держа́ста несꙋмнѣ́ннꙋ, и҆ хра́минꙋ ка́меннꙋ надъ гро́бомъ твои́мъ согради́ста: въ то́йже и҆ са́ми бли́зъ тебє̀ погребо́шасѧ ст҃і́и ті́и, мно́гимъ нетлѣ́нїемъ ѿ бг҃а почте́ни бы́вше: молѝ съ ни́ми, ст҃и́телю гꙋ́рїе, хрⷭ҇та̀ бг҃а, дарова́ти на́мъ ми́ръ и҆ ве́лїю ми́лость.
Є҆гда̀ ѡ҆брѣто́шасѧ мо́щи твоѧ̑, ст҃и́телю гꙋ́рїе, тогда̀ и҆спо́лнисѧ ве́сь гра́дъ благоꙋха́нїѧ, и҆ стеко́шасѧ всенаро́дное мно́жество, цр҃ко́внаго первопресто́льника и҆ па́стырѧ своего̀ зрѣ́ти жела́юще, ра́дости и҆ сле́зъ и҆спо́лнишасѧ, вопїю́ще и҆ глаго́люще: ѽ пе́рвый ᲂу҆чи́телю, и҆ наста́вниче гра́дꙋ на́шемꙋ! мо́лимъ тѧ̀, молѝ хрⷭ҇та̀ бг҃а, да пода́стъ ми́ръ мі́рꙋ, и҆ дꙋша́мъ на́шымъ ве́лїю ми́лость.
И҆́ны стїхи̑ры ст҃и́телѧ варсоно́фїа, гла́съ є҃.
Подо́бенъ: Прпⷣбне ѻ҆́ч҃е:
Ст҃и́телю преди́вный варсоно́фїе, споспѣшествꙋ́й на́мъ, ча́дѡмъ твои̑мъ, на ви̑димыѧ и҆ неви̑димыѧ врагѝ на́шѧ: и҆́маши бо на сїѐ ѿ бг҃а да́ннꙋю тебѣ̀ си́лꙋ, и҆́стинный бж҃їй ᲂу҆го́дниче: молѝ и҆зба́витисѧ на́мъ ѿ всѧ́кихъ бѣ́дъ, твои́ми, свѧ́те, моли́твами.
Восхотѣ́въ по хрⷭ҇тѣ̀ жи́ти, показа́лсѧ є҆сѝ цѣломꙋ́дренъ, ст҃и́телю варсоно́фїе, и҆ мнѡ́гимъ пꙋ́ть показа́въ ко спасе́нїю, ко хрⷭ҇тꙋ̀ приве́лъ є҆сѝ твоемꙋ̀ влⷣцѣ. и҆мѣ́ѧ къ немꙋ̀ дерзнове́нїе, за чтꙋ́щыѧ тѧ̀ молѝ, да и҆зба́вимсѧ бѣ́дъ и҆ печа́лей, да всѝ тебѐ велича́емъ.
Со ᲂу҆се́рдїемъ слове́съ бж҃їихъ послꙋ́шатель бы́въ, и҆ благоче́стнѡ и҆ пра́веднѡ, благоꙋго́днѡ житїѐ пожи́въ, ст҃и́телю варсоно́фїе, хрⷭ҇та̀ любѧ̀, и҆ хрⷭ҇то́мъ люби́мь бы́въ, и҆ вѣ́чныхъ бла̑гъ наслѣ́дникъ бы́лъ є҆сѝ. молѝ хрⷭ҇та̀ бг҃а, прпⷣбне, спастѝ и҆ просвѣти́ти дꙋ́шы на́шѧ.
Прпⷣбныѧ твоѧ̑ рꙋ́ки просте́ръ моле́бнѡ, варсоно́фїе ѻ҆́ч҃е прпⷣбне, ѡ҆ держа́вѣ на́шей хрⷭ҇тꙋ̀ моли́сѧ, ѡ҆ гра́дѣ, и҆ ѡ҆ ст҃ѣ́й се́й ѻ҆би́тели, є҆́йже бы́лъ є҆сѝ пе́рвый зда́тель, и҆ па́ствѣ нача́льникъ, въ не́йже трꙋдолюбе́знѡ поще́нїемъ и҆ моли́твою до́брѣ подви́гсѧ, и҆ многотрꙋ́дномꙋ твоемꙋ̀ тѣ́лꙋ положи́тисѧ бг҃ъ въ то́й и҆зво́ли: и҆ пресла́внѡ ѡ҆брѣто́шасѧ честны̑ѧ твоѧ̑ мо́щи нетлѣ̑нны, подаю́тъ чꙋдеса̀ и҆ и҆сцѣлє́нїѧ. молѝ, прпⷣбне, и҆ на́мъ спасти́сѧ, твою̀ па́мѧть почита́ющымъ.
Сла́ва, гла́съ д҃:
Дꙋхо́вною бл҃года́тїю ѿе́млете недꙋ́ги и҆ стра̑сти, и҆ ѿго́ните дꙋ́хи лꙋка̑выѧ, и҆ и҆сцѣлѧ́ете стра̑сти неисцѣ̑льныѧ, и҆ просвѣща́ете вѣ̑рныѧ, и҆ невѣ́рныхъ въ вѣ́рꙋ претворѧ́ете, блиста̑нїи чꙋде́съ ва́шихъ, ѻ҆тцы̀ прпⷣбнїи. тѣ́мже дне́сь гла́сы немо́лчными воспѣва́емъ ва́шꙋ па́мѧть пресвѣ́тлꙋю, и҆ мо́лимъ ва́съ: моли́те хрⷭ҇та̀ бг҃а, спасти́сѧ дꙋша́мъ на́шымъ.
И҆ ны́нѣ, бг҃оро́диченъ:
Вхо́дъ. Прокі́менъ днѐ. И҆ чтє́нїѧ г҃ ст҃и́тєльскїѧ, пи́саны сегѡ̀ мѣ́сѧца въ є҃ де́нь.
На лїті́и стїхи̑ры, гла́съ г҃. Самогла́сны:
Чи́стою со́вѣстїю, и҆ благи́мъ нра́вомъ, мона́хи и҆ мїрскі́ѧ мнѡ́гїѧ, ᲂу҆че́нїемъ ва́шимъ ко хрⷭ҇тꙋ̀ привелѝ є҆стѐ: и҆ сегѡ̀ ра́ди нетлѣ́нїемъ ѿ хрⷭ҇та̀ почте́ни є҆стѐ. є҆го́же моли́те, спасти́сѧ дꙋша́мъ на́шымъ.
Ра́ки ва́ши вопїю́тъ къ бг҃ꙋ моли́твꙋ ва́шꙋ, и҆ про́чыѧ добродѣ́тєли, послꙋшествꙋ́ютъ же томꙋ̀ и҆ ри̑зы ва́шѧ погреба̑льныѧ: ст҃а̑ѧ же тѣлеса̀ ва̑ша вселе́ннꙋю ᲂу҆дивлѧ́ютъ, и҆ наро́дъ благочести́вый. но моли́те гдⷭ҇а, да спасе́тъ и҆ просвѣти́тъ дꙋ́шы на́шѧ.
Оу҆млⷭ҇рдисѧ, влⷣко, ѡ҆ на́съ рабѣ́хъ твои́хъ, и҆ ѡ҆ новопросвѣще́нныхъ твои́хъ лю́дехъ: и҆ не преда́ждь на́съ въ рꙋ́ки пога́ныхъ, за мно́жество на́шихъ беззако́нїй: но моли́твами прпⷣбныхъ твои́хъ ᲂу҆гѡ́дникъ, и҆зба́ви ны̀ ѿ всѧ́кїѧ ско́рби, и҆ бѣ́дъ и҆ печа́лей.
Посто́мъ, и҆ жесто́кимъ житїе́мъ, и҆ хꙋдо́ю пи́щею, и҆ просто́ю трапе́зою, на кі́йждо де́нь ѡ҆бꙋча́юще себѐ, ѻ҆тцы̀ прпⷣбнїи, многоцѣ̑ннаѧ же всѧ́кѡ и҆ тлѣ̑ннаѧ презрѣ́сте, и҆ въ нетлѣ́нныхъ веселите́сѧ, и҆ мо́лите спасти́сѧ дꙋша́мъ на́шымъ.
Сла́ва, гла́съ в҃:
И҆́стиннїи и҆ нело́жнїи ᲂу҆чи́телїе є҆стѐ бы́ли, заповѣ̑данныѧ бо гдⷭ҇емъ, пре́жде са́ми сотворѧ́юще, пото́мъ же ᲂу҆ча́ще и҆ наказꙋ́юще ко благоче́стїю приходѧ́щыѧ лю́ди вѣ̑рныѧ, невѣ̑рныѧ же вразꙋмлѧ́юще, позна́ти вѣ́рꙋ и҆́стиннꙋ, и҆ просвѣща́юще и҆̀хъ ст҃ы́мъ креще́нїемъ. пе́рвїи нача́льницы и҆ ᲂу҆чи́телїе на́ши неле́стнїи, и҆ бж҃їихъ за́повѣдей храни́телїе, спаси́те на́съ, ва́съ вѣ́рою на по́мощь призыва́ющихъ.
И҆ ны́нѣ, бг҃оро́диченъ:
На стїхо́внѣ стїхи̑ры, гла́съ г҃. Подо́бенъ: Ве́лїѧ крⷭ҇та̀:
Хрⷭ҇то́вꙋ вѣ́рꙋ ꙗ҆́кѡ свѣ́тъ на свѣ́щницѣ поста́висте, наста̑вницы, и҆ просвѣти́телїе гра́да каза́ни ꙗ҆ви́стесѧ, и҆ мнѡ́ги ѿ невѣ́рїѧ ко хрⷭ҇тꙋ̀ приведо́сте, ѻ҆тцы̀ прпⷣбнїи.
Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.
Красꙋ́йсѧ гра́де каза́не, и҆мѣ́ѧ въ себѣ̀ мѡ́щи прпⷣбныхъ ст҃и́телей, гꙋ́рїа и҆ варсоно́фїа, ѿгна́вшихъ ѿ тебє̀ тмꙋ̀ невѣ́рїѧ, и҆ просвѣти́вшихъ тѧ̀ свѣ́томъ бг҃оразꙋ́мїѧ: и҆̀же и҆ мо́лѧтсѧ хрⷭ҇тꙋ̀ за всѧ̑ лю́ди въ тебѣ̀ живꙋ́щыѧ.
Сті́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ.
Ве́лїе чꙋ́до ѡ҆ ва́съ зри́тсѧ, ѻ҆тцы̀ прпⷣбнїи, и҆ ᲂу҆́жаса и҆спо́лнено, ка́кѡ по погребе́нїи во мнѡ́га лѣ̑та нерꙋши̑ма соблюдо́шасѧ бл҃жє́ннаѧ тѣлеса̀ ва̑ша, сꙋдьба́ми, и҆́миже вѣ́сть, ва́съ са́мъ прославлѧ́ѧй.
Сла́ва, гла́съ ѕ҃:
И҆́же пре́жде те́мный, ны́нѣ же свѣ́тлый гра́дъ каза́нь красꙋ́етсѧ и҆ весели́тсѧ, и҆мѣ́ѧ въ себѣ̀ нетлѣ̑нныѧ мо́щи ва́шѧ, ст҃і́и чꙋдотво́рцы: и҆сточа́ютъ бо на́мъ неѡскꙋ́дна и҆сцѣлє́нїѧ, съ вѣ́рою приходѧ́щымъ къ ра́цѣ моще́й ва́шихъ. мы́ же веселѧ́щесѧ, мо́лимъ, и҆ те́плѣ зове́мъ: моли́те, ст҃і́и хрⷭ҇та̀ бг҃а, спасти́сѧ на́мъ, свѧтꙋ́ю па́мѧть ва́шꙋ почита́ющымъ.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:
Тропа́рь пи́санъ на ма́лѣй вече́рни.
На ᲂу҆́трени, на Бг҃ъ гдⷭ҇ь, тропа́рь два́жды. Сла́ва, и҆ ны́нѣ, бг҃оро́диченъ. По а҃-мъ стїхосло́вїи сѣда́ленъ, гла́съ г҃:
На́мъ послѣ́днемꙋ ро́дꙋ ꙗ҆ви́стесѧ, ст҃и́телїе, тѣ́ломъ нетлѣ́ннїи: и҆ показа́сте наде́ждꙋ, ꙗ҆́кѡ и҆ но сме́рти неѿстꙋ́пнѡ дꙋ́хомъ на́съ посѣща́ете. тѣ́мже и҆ припа́даемъ ва́мъ, прпⷣбнїи: моли́те ѡ҆ на́съ ва́шꙋ па́мѧть любе́знѡ почита́ющихъ, да и҆зба́вимсѧ ѿ всѣ́хъ ѕѡ́лъ ва́шими моли́твами.
Два́жды.
Сла́ва, и҆ ны́нѣ, бг҃оро́диченъ:
Є҆ди́на ᲂу҆пова́нїе на́ше, є҆ди́на наде́жда, є҆ди́но прибѣ́жище вѣ́рꙋющымъ пречⷭ҇томꙋ твоемꙋ̀ ржⷭ҇твꙋ̀, прест҃а́ѧ пребл҃гослове́ннаѧ бг҃ома́ти, покры́й и҆ соблюдѝ, и҆ ѿ всѧ́кихъ бѣ́дъ и҆зба́ви, любо́вїю велича́ющихъ тѧ̀.
По в҃-мъ стїхосло́вїи сѣда́ленъ, гла́съ д҃:
Бг҃омъ наꙋчє́ннаѧ ва̑ша ᲂу҆ста̀ мона́шєскимъ дꙋша́мъ сла́дость ра́йскꙋю и҆ска́паша, и҆ всѣ̑мъ ѻ҆́бразъ бы́сте ко спасе́нїю, ѽ ди́внїи ѻ҆тцы̀ на́ши, гꙋ́рїе и҆ варсоно́фїе. сегѡ̀ ра́ди вопїе́мъ ва́мъ прилѣ́жнѡ молѧ́щесѧ: потщи́тесѧ на по́мощь на́шꙋ, и҆ ᲂу҆моли́те за ны̀ сохра́ньшаго ва́съ бл҃годѣ́телѧ хрⷭ҇та̀ бг҃а.
Два́жды.
Сла́ва, и҆ ны́нѣ, бг҃оро́диченъ:
Свѣтоно́сенъ тѧ̀ свѣ́щникъ позна́хомъ, бцⷣе, бжⷭ҇твенное сїѧ́нїе во ᲂу҆тро́бѣ носи́ла є҆сѝ. тѣ́мже тѧ̀ мо́лимъ, влⷣчце: свѣ́томъ твои́мъ ѡ҆зарѝ дꙋ́шы всѣ́хъ пою́щихъ тѧ̀, да вѣ́рою и҆ любо́вїю почита́емъ тѧ̀, ꙗ҆́кѡ вои́стиннꙋ и҆́стиннꙋю сꙋ́щꙋю бцⷣꙋ.
По полѷеле́и сѣда́ленъ, гла́съ ѕ҃:
И҆́же пре́жде невѣ́рїемъ помраче́нный, ны́нѣ же вѣ́рою ко хрⷭ҇тꙋ̀ просвѣще́нный, пресловꙋ́щїй гра́дъ каза́нь ва́ми хва́литсѧ, и҆мѣ́ѧ въ себѣ̀ мо́щи ва̑ша нетлѣ̑нныѧ, ѻ҆тцы̀ прпⷣбнїи: и҆ съ вѣ́рою приходѧ́щымъ и҆сточа́ете чꙋдеса̀, и҆ подае́те неѡскꙋ́днѡ и҆сцѣле́нїе, любо́вїю свѧтꙋ́ю ва́шꙋ па́мѧть почита́ющымъ.
Два́жды.
Сла́ва, и҆ ны́нѣ, бг҃оро́диченъ:
Вмѣсти́лище чⷭ҇тое свѣ́та пречⷭ҇тагѡ, прⷪ҇ро́цы тѧ̀ премꙋ́дрѡ проповѣ́даша: мꙋ́чєницы покланѧ́ютсѧ, ст҃и́тели проповѣ́даютъ, мона́си и҆ прості́и, бога́тїи и҆ ᲂу҆бо́зїи, и҆ всѧ́къ во́зрастъ мо́лѧтъ: спасѝ, влⷣчце, дꙋ́шы на́шѧ.
Та́же степє́нна, а҆ а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе да хва́литъ гдⷭ҇а. Є҆ѵⷢ҇лїе лꙋкѝ, зача́ло к҃д. По н҃-мъ ѱалмѣ̀ стїхи́ра, гла́съ є҃:
Не своегѡ̀ то́чїю смотрѧ́ста, но є҆́же всѣ̑мъ поле́знагѡ, и҆ возненави́дѣста всѧ́кꙋ ве́щь на грѣ́хъ влекꙋ́щꙋю, непрело́женъ и҆мꙋ́ще по́мыслъ благоче́стїѧ, и҆ соблю́дше себѐ мно́гою крѣ́постїю въ добродѣ́телехъ. сегѡ̀ ра́ди твє́рда и҆ нетлѣ̑нна соблюдѐ бг҃ъ тѣлеса̀ ва̑ша, ѻ҆тцы̀ прпⷣбнїи: того̀ моли́те спасти́сѧ на́мъ, ва́шꙋ па́мѧть почита́ющымъ.
Канѡ́нъ бцⷣы, на ѕ҃: и҆ ст҃ы́хъ канѡ́на два̀, на и҃.
Канѡ́нъ ст҃и́телѧ гꙋ́рїа.
Гла́съ и҃. Пѣ́снь а҃. І҆рмо́съ:
І҆и҃лѧ ѿ рабо́ты и҆зба́вилъ є҆сѝ, гдⷭ҇и, десни́цею твое́ю держа́вною: ꙗ҆́кѡ ѻ҆́наго спа́слъ є҆сѝ, ны́нѣ на́съ спасѝ.
Трⷪ҇це прест҃а́ѧ, пѣ́снь тебѣ̀ принестѝ, и҆ досто́йными похвала́ми ᲂу҆го́дника твоего̀ ст҃и́телѧ, гꙋ́рїа, воспѣ́ти пода́ждь мѝ: да ра́дꙋѧсѧ, сла́влю тѧ̀ во вѣ́ки.
Повелѣ́нїемъ самоде́ржца первопресто́льникъ цр҃ко́вный гра́дꙋ новопросвѣще́нномꙋ ꙗ҆влѧ́ешисѧ, и҆ а҆пⷭ҇льски наꙋчи́лъ є҆сѝ вѣ́ровати трⷪ҇цѣ, во є҆ди́номъ сꙋществѣ̀.
Моли́твенный хра́мъ въ домꙋ̀ твое́мъ и҆мѣ́ѧ, и҆ въ то́мъ многотрꙋ́днѣ подвиза́сѧ, всенѡ́щнаѧ стоѧ̑нїѧ, и҆ моли̑твы приносѧ̀ вы́нꙋ бг҃ꙋ.
Бг҃оро́диченъ:
Бж҃їѧ мт҃и ро́ждшаѧ є҆ди́наго ѿ ст҃ы́ѧ трⷪ҇цы, слове́сное мѝ недоꙋмѣ́нїе разрѣшѝ, и҆ сло́во мѝ пода́ждь, и҆́мже тѧ̀ просла́влю.
Канѡ́нъ ст҃и́телѧ варсоно́фїа.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
И҆̀же пресла́внꙋю па́мѧть пра́зднꙋющихъ ст҃и́телѧ твоегѡ̀ варсоно́фїа, сло́во бж҃їе є҆диноро́дное, слове́снꙋю же́ртвꙋ принестѝ къ тебѣ̀ сподо́би на́съ, и҆ ᲂу҆го́дника твоегѡ̀ вѣ́рнѡ восхвали́ти пода́ждь на́мъ.
Ст҃и́телю ѻ҆́ч҃е на́шъ варсоно́фїе, моли́сѧ хрⷭ҇тꙋ̀ бг҃ꙋ, да по достоѧ́нїю возмо́жемъ принестѝ тебѣ̀ пѣ́нїе во хвале́нїе, и҆ хрⷭ҇та̀ просла́вимъ.
Неꙋсы́пными моли́твами твои́ми, свѧ́те, стра̑стныѧ на́шѧ недꙋ́ги ᲂу҆врачꙋ́й, дꙋшє́вныѧ на́шѧ болѣ̑зни и҆сцѣлѝ, и҆ прегрѣше́нїй ѡ҆ставле́нїе ᲂу҆ хрⷭ҇та̀ на́мъ и҆спросѝ.
Бг҃оро́диченъ:
Прїиди́те, дѣ̑вы и҆ ма́тєри, воспо́йте пречⷭ҇тѣй бж҃їи мт҃ри гла́съ гаврїи́ла а҆рха́гг҃ла: ра́дꙋйсѧ, ѡ҆бра́дованнаѧ, ра́досте всегѡ̀ мі́ра, и҆ ра́достїю твое́ю ѡ҆бра́дꙋй дꙋ́шы всѣ́хъ пою́щихъ тѧ̀.
Пѣ́снь г҃. І҆рмо́съ:
Оу҆тверже́й сло́вомъ нб҃са̀, и҆ зе́млю ѡ҆снова́вый на вода́хъ мно́гихъ, ᲂу҆тверди́ мѧ къ пѣ́нїю славосло́вїѧ твоегѡ̀, гдⷭ҇и.
А҆да́ма дре́внѣйша а҆́гнца непоро́чнаго, бж҃їѧго сло́ва соприсносꙋ́щнаго, ст҃и́телю гꙋ́рїе, молѝ, да пода́стъ благочести́вомꙋ наро́дꙋ на́шемꙋ здра́вїе во благоде́нствѣ, и҆ не сопроти́вныхъ побѣ́дꙋ.
Є҆го́же и҆змла́да возлюби́лъ є҆сѝ, и҆ всѧ̑ тлѣ̑ннаѧ мі́ра сегѡ̀ въ ничто́же вмѣни́лъ є҆сѝ, преходѧ̑щаѧ презрѣ́въ, да въ бꙋ́дꙋщемъ ᲂу҆тверди́шисѧ сла́вити гдⷭ҇а.
Благовѣ́рныхъ зако́нꙋ наказꙋ́ѧ благоче́стїѧ, невѣ̑рныѧ же наꙋча́ѧ позна́ти вѣ́рꙋ благочести́вꙋ и҆ и҆́стиннꙋ, и҆ пѣ́ти съ на́ми при́снѡ пѣ́снь, а҆́гг҃лы пѣва́емꙋ въ трⷪ҇цѣ бг҃ꙋ: ст҃ъ є҆сѝ, гдⷭ҇и.
Бг҃оро́диченъ:
Подъ кро́въ тво́й держа́вный съ вѣ́рою прибѣга́емъ, бцⷣе: покры́й и҆ соблюдѝ, гпⷭ҇жѐ, моли́твами твои́ми, и҆ спасѝ ѿ бѣ́дъ и҆ ѿ клеветы̀ ѕлы́хъ человѣ̑къ ра̑бъ твои́хъ, при́снѡ пою́щихъ тѧ̀.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Царе́вымъ повелѣ́нїемъ пе́рвꙋю ѻ҆би́тель прекра́снꙋ въ новопросвѣще́нномъ гра́дѣ каза́ни воздви́глъ є҆сѝ, и҆ въ то́й многотрꙋ́днѣ подви́глсѧ є҆сѝ, и҆ мно́гихъ дꙋ́шы ко хрⷭ҇тꙋ̀ приве́лъ є҆сѝ.
Ви́дѣхомъ и҆ почꙋди́хомсѧ, па́че же стра́хомъ и҆ ра́достїю бы́хомъ ѡ҆держи́ми: цѣ́лы бо и҆ неразрꙋши́мы ѡ҆брѣто́шасѧ честны̑ѧ твоѧ̑ мо́щи, ст҃и́телю варсоно́фїе, и҆ всѝ є҆диногла́снѡ возопїе́мъ: сла́ва хрⷭ҇тꙋ̀ бг҃ꙋ.
Ча́емагѡ, є҆́же въ бꙋ́дꙋщемъ вѣ́цѣ, наслажде́нїѧ, преподо́бне, дости́глъ є҆сѝ, и҆ ны́нѣ во свѣ́тѣ ст҃ы́ѧ трⷪ҇цы ликꙋ́еши, поѧ̀ со а҆́гг҃лы: свѧ́тъ є҆сѝ, гдⷭ҇и.
Бг҃оро́диченъ:
Оу҆блажи́мъ бж҃їю мт҃рь бжⷭ҇твенными пѣ́сньми: и҆дѣ́же бо сла́витсѧ преблагослове́ннаѧ бцⷣа, та́мѡ де́мѡнѡмъ стра́шное и҆счезнове́нїе, хрⷭ҇тїа́нѡмъ же крѣ́пость и҆ ᲂу҆твержде́нїе.
Конда́къ варсоно́фїа, гла́съ ѕ҃:
Воздержа́нїемъ тѣ́ло дꙋ́хꙋ порабо́тивъ, дꙋ́шꙋ же равноа́гг҃льнꙋ сотвори́лъ є҆сѝ: сегѡ̀ ра́ди ст҃и́тельства са́номъ поче́тсѧ, чи́стѣ чⷭ҇тѣ́йшемꙋ предстои́ши. молѝ хрⷭ҇та̀ бг҃а, ст҃и́телю, спастѝ лю́ди твоѧ̑, свѧ́те, да всѝ вопїе́мъ тѝ: ра́дꙋйсѧ, ѻ҆́ч҃е прпⷣбне варсоно́фїе, гра́дꙋ на́шемꙋ каза́ни похвала̀ и҆ ᲂу҆твержде́нїе.
І҆́косъ:
Пе́рвый до́мꙋ дх҃о́внагѡ соста́витель, и҆ пе́рвый мона́хѡмъ наста́вникъ бы́лъ є҆сѝ, пе́рвый трꙋдополо́жникѡмъ ѻ҆́бразъ и҆ ᲂу҆чи́тель бы́лъ є҆сѝ, въ новопросвѣще́нномъ гра́дѣ каза́ни, мона́хи наставлѧ́ѧ, и҆ мїрскі̑ѧ поꙋча́ѧ, и҆ невѣ̑рныѧ приводѧ̀ во хрⷭ҇то́вꙋ вѣ́рꙋ, и҆ всѣ̑мъ бы́лъ є҆сѝ са́мъ ѻ҆́бразъ и҆ ᲂу҆чи́тель неле́стенъ. и҆ сла́вномꙋ во гра́дѣхъ тфе́ри ст҃и́тель поставлѧ́ешисѧ, ᲂу҆чѧ̀ и҆ наказꙋ́ѧ пꙋтѝ гдⷭ҇ню. послѣди́ же манове́нїемъ бж҃їимъ въ потрꙋжде́нїе своѐ, во ѻ҆би́тель сп҃совꙋ вселѧ́ешисѧ, и҆ трꙋды̀ къ трꙋдѡ́мъ прилага́еши, до́ндеже вѣ́стникъ съ нб҃съ соше́дъ пое́млетъ дꙋ́шꙋ твою̀ во ѻ҆би́тєли црⷭ҇тва нбⷭ҇нагѡ, и҆дѣ́же ны́нѣ весели́шисѧ съ ли́ки ст҃ы́хъ. мы́ же, лю́дїе твоѝ, вопїе́мъ тѝ: ра́дꙋйсѧ, прпⷣбне ѻ҆́ч҃е варсоно́фїе, гра́дꙋ на́шемꙋ каза́ни похвала̀ и҆ ᲂу҆твержде́нїе.
Сѣда́ленъ, гла́съ д҃. Подо́бенъ: Вознесы́йсѧ:
Ѿ землѝ воззва́вый ва́съ къ вѣ̑чнымъ ѻ҆би́телемъ, соблюда́етъ и҆ по сме́рти тѣлеса̀ ва̑ша, ѻ҆тцы̀ прпⷣбнїи: вы́ бо въ цѣломꙋ́дрїи и҆ чистотѣ̀ житїѐ по́жили є҆стѐ, гꙋ́рїе бг҃омꙋ́дре, и҆ варсоно́фїе преди́вне. тогѡ̀ ра́ди любо́вїю почита́емъ свѧтꙋ́ю па́мѧть ва́шꙋ, и҆ мо́лимъ: моли́те хрⷭ҇та̀ бг҃а спасти́сѧ на́мъ.
Сла́ва, и҆ ны́нѣ, бг҃оро́диченъ:
Є҆гда̀ хощꙋ̀ предста́ти предъ лице́мъ созда́телѧ моегѡ̀ въ де́нь пра́веднагѡ сꙋда̀ є҆гѡ̀, тогда̀, влⷣчце, предста́ни мѝ, и҆ мꙋ́ки и҆зба́ви мѧ̀ вѣ́чныѧ, моли́твꙋ сотвори́вши ѡ҆ ᲂу҆пова́ющемъ на тѧ̀, ст҃а́ѧ бцⷣе, да не сни́дꙋ во а҆́дъ, но да спасꙋ́сѧ твои́мъ застꙋпле́нїемъ.
Пѣ́снь д҃. І҆рмо́съ:
И҆зъ горы̀ приѡсѣне́нныѧ, сло́ве, проро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧще си́лꙋ твою̀.
Бла́гъ нра́въ и҆ послꙋша́нїе къ твоемꙋ̀ наста́вникꙋ и҆мѣ́лъ є҆сѝ, и҆ во свѣ́тѣ ст҃ы́ѧ трⷪ҇цы свеселѧ́сѧ, съ ни́мъ пое́ши: сла́ва си́лѣ твое́й, гдⷭ҇и.
Благослове́нїемъ кра́йнѧгѡ ст҃и́телѧ, поставлѧ́ешисѧ па́стырь и҆ ᲂу҆чи́тель новопросвѣще́нномꙋ гра́дꙋ каза́ни, и҆́же пре́лестїю врага̀ ѡ҆мрачє́нныѧ лю́ди свѣ́томъ бг҃оразꙋ́мїѧ просвѣти́лъ є҆сѝ.
І҆́ѡва првⷣнагѡ терпѣ́нїю подража́лъ є҆сѝ, въ болѣ́зни слежа̀, и҆ на ѻ҆дрѣ̀, тѣ́ломъ дрꙋчи́мь, и҆знемога́лъ є҆сѝ, поѧ̀ творцꙋ̀ твоемꙋ̀ пѣ́нїе непреста́ннѡ.
Бг҃оро́диченъ:
Бг҃оневѣ́сто и҆ бг҃ома́ти, плотоно́сца безъ болѣ́зни ро́ждши, и҆ по ржⷭ҇твѣ̀ дв҃а ꙗ҆́вльшисѧ, того̀ молѝ, влⷣчце, да и҆зба́вимсѧ бѣ́дъ и҆ скорбе́й.
И҆́нъ. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Патрїа́рха а҆враа́ма до́блесть воспрїи́мъ, ст҃и́телю варсоно́фїе, а҆́лчныѧ кормѧ̀, и҆ жа̑дныѧ напаѧ́ѧ, и҆ не и҆мꙋ́щымъ нескꙋ́дна тре́бѡванїѧ подава́ѧ, дꙋше́внымъ и҆ тѣле́снымъ хлѣ́бомъ кормѧ̀ всѧ̑ приходѧ́щыѧ, и҆ врꙋче́нное тебѣ̀ ста́до.
Мꙋ́жественнѣ терпѧ̀ ѿ невѣ́рныхъ въ плѣ́нѣ сы́й, и҆ смире́нїѧ ра́ди нра́ва, въ кро́тость преложи́лъ є҆сѝ невѣ́рныхъ: и҆ сегѡ̀ ра́ди ѿ бг҃а мздꙋ̀ воспрїи́мъ, ст҃и́телю варсоно́фїе.
Пресла́вными чꙋдотворє́нїи ѿ бг҃а ѡ҆дарова́ни бы́ша, ст҃і́и чꙋдотво́рцы, и҆сцѣлѧ́юще недꙋ́ги, и҆ ѿгонѧ́юще де́мѡны: моли́те и҆зба́витисѧ на́мъ ѿ бѣ́дъ, ва́шими моли́твами.
Бг҃оро́диченъ:
Къ пребл҃же́ннѣй дв҃ѣ и҆ бцⷣѣ, ѽ прпⷣбнїи! припади́те, и҆ моли̑твы простри́те, да ᲂу҆мо́литъ сн҃а своего̀ хрⷭ҇та̀ бг҃а на́шего, пода́ти хрⷭ҇толюби́вомꙋ наро́дꙋ на́шемꙋ здра́вїе, и҆ на врагѝ побѣ́дꙋ.
Пѣ́снь є҃. І҆рмо́съ:
Мра́къ дꙋшѝ моеѧ̀ разженѝ, свѣтода́вче хрⷭ҇тѐ бж҃е, началоро́днꙋю тмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀.
А҆рхїере́й сы́й, а҆рхїере́ємъ на́шымъ въ моли́твахъ спосо́бствꙋй, да возмо́гꙋтъ гра́дꙋ каза́ни, благоче́стїѧ содержи́телю, и҆ всемꙋ̀ хрⷭ҇тїа́нскомꙋ наро́дꙋ и҆спроси́ти ᲂу҆ хрⷭ҇та̀ ми́ра и҆ ве́лїѧ ми́лости.
Ны́нѣ, преблаже́нне гꙋ́рїе, дꙋша̀ твоѧ̀ почива́етъ на нб҃сѣ́хъ, предстоѧ̀ прⷭ҇то́лꙋ хрⷭ҇то́вꙋ: честны̑ѧ же твоѧ̑ мо́щи нетлѣ́нїемъ почте́ны, даю́тъ и҆сцѣлє́нїѧ приходѧ́щымъ съ вѣ́рою.
Дре́вле помраче́нный ѕмі́евою пре́лестїю, ны́нѣ же просвѣще́нный хрⷭ҇то́вою бл҃года́тїю, гра́дъ каза́нь, ви́дѧ въ себѣ̀ нетлѣ̑нны мо́щи твоѧ̑, ра́дꙋетсѧ. мы́ же, ча̑да твоѧ̑ чꙋдесы̀ ѡ҆богаща́еми весели́мсѧ, хрⷭ҇та̀ сла́вѧще зове́мъ: спасѝ на́съ, гдⷭ҇и.
Бг҃оро́диченъ:
Бцⷣе всѣ́хъ цр҃и́це, благочести́вомꙋ наро́дꙋ на́шемꙋ на врагѝ побѣ́дꙋ да́рꙋй, и҆ сопроти́вныхъ совѣ́ты разорѝ, и҆ ѿ междоꙋсо́бныѧ бра́ни и҆зба́ви, и҆ клеветникѡ́въ чє́люсти сокрꙋшѝ, влⷣчце, и҆ ѿ всѣ́хъ бѣ́дъ моли́твами твои́ми спасѝ на́съ.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Мꙋ̑драѧ ᲂу҆чє́нїѧ всѣ̑мъ показа́лъ є҆сѝ, и҆ дꙋше́вное є҆стество̀ чи́сто стѧжа́лъ є҆сѝ, презира́ѧ пло́ть, прехо́дитъ бо: и҆ сегѡ̀ ра́ди со а҆́гг҃лы прⷭ҇то́лꙋ влⷣчню предстои́ши ст҃и́телю, молѧ̀ хрⷭ҇та̀ бг҃а спасти́сѧ на́мъ.
Воспѣва́ющихъ тѧ̀ и҆ при́снѡ блажа́щихъ, и҆ па́мѧть твою̀ вѣ́рнѡ прославлѧ́ющихъ, ст҃и́телю варсоно́фїе, ѡ҆свѧтѝ и҆ просла́ви, и҆ ѿ напа́стей и҆ бѣ́дъ и҆зба́ви.
Бжⷭ҇твеннымъ манове́нїемъ, ѻ҆́ч҃е, плотско́е жела́нїе ѿри́нꙋвъ, и҆ послѣ́довалъ є҆сѝ любо́вїю зовꙋ́щемꙋ тѧ̀ хрⷭ҇тꙋ̀, бл҃же́нне варсоно́фїе, ст҃и́телю всече́стне.
Бг҃оро́диченъ:
Правовѣ́рнѡ чтꙋ́щыѧ тѧ̀ лю́ди и҆ і҆кѡ́нѣ твое́й ст҃ѣ́й любе́знѡ покланѧ́ющыѧсѧ, ѽ бж҃їѧ мт҃и, спасѝ, и҆ ѿ клеветы̀ ѕлы́хъ человѣ̑къ и҆зба́ви.
Пѣ́снь ѕ҃. І҆рмо́съ:
Ꙗ҆́кѡ во́ды морскі̑ѧ, чл҃вѣколю́бче, волна́ми жите́йскими ѡ҆бꙋрева́юсѧ. тѣ́мже ꙗ҆́кѡ і҆ѡ́на, та́кѡ вопїю́ ти: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.
Оу҆тѣша́ѧ скорбѧ́щыѧ, застꙋпа́ѧ ѡ҆би̑димыѧ, накормлѧ́ѧ а҆́лчꙋщыѧ, и҆ всѧ̑ всѣ̑мъ подава́ѧ неѡскꙋ́днѡ, гꙋ́рїе ст҃и́телю, хрⷭ҇та̀ бг҃а молѝ спасти́сѧ на́мъ.
Бж҃їимъ смотре́нїемъ, и҆ ст҃и́тельскимъ благослове́нїемъ, и҆ ца́рскимъ повелѣ́нїемъ, рꙋко́ю мое́ю недосто́йною приноси́мое ва́шымъ трꙋдѡ́мъ похвале́нїе, прпⷣбнїи чꙋдотво́рцы не ѿри́ните, но прїими́те, и҆ моли́те хрⷭ҇та̀, да и҆зба́витъ мѧ̀ шꙋ́їѧгѡ стоѧ́нїѧ.
Тече́нїе воспрїѧ̀, и҆ пꙋ́ть совершѝ, и҆ зе́млю непло́днꙋ моли́твами твои́ми добропло́днꙋ показа̀: и҆ ѡ҆ мнѣ̀ приносѧ́щемъ тебѣ̀ пѣ́нїе сїѐ, ст҃и́телю, молѝ хрⷭ҇та̀, да принесꙋ̀ и҆ а҆́зъ покаѧ́нїѧ пло́дъ, да и҆зба́витъ мѧ̀ вѣ́чнагѡ мꙋче́нїѧ.
Бг҃оро́диченъ:
Бг҃облаже́ннаѧ, и҆ ѿ а҆́гг҃лъ покланѧ́емаѧ, и҆ ѿ земны́хъ всегда̀ славосло́вимаѧ, творца̀ твоего̀ и҆ бг҃а, є҆го́же родила̀ є҆сѝ, прест҃а́ѧ дв҃о, молѝ спасти́сѧ на́мъ.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Кі́ими похвала́ми возмо́жемъ тебѐ похвали́ти, преподо́бне ст҃и́телю варсоно́фїе; по преставле́нїи бо твое́мъ цѣ̑лы и҆ нетлѣ̑нны ѡ҆брѣто́шасѧ цѣльбонѡ́сныѧ твоѧ̑ мо́щи.
Всѧ̑ сотво́ршаго, и҆ всю̀ вселе́ннꙋю кормѧ́щаго сн҃а бж҃їѧ, и҆ а҆́гг҃льскаго цр҃ѧ̀ превѣ́чнаго, сп҃са хрⷭ҇та̀ ᲂу҆молѝ, ст҃и́телю варсоно́фїе, да пода́стъ лю́демъ на́шымъ здра́вїе, и҆ земны̑ѧ плоды̀ ᲂу҆мно́житъ, и҆ грѣхѝ ѿпꙋ́ститъ.
И҆́стиннаго всѣ́хъ па́стырѧ хрⷭ҇та̀, ст҃и́телю варсоно́фїе, молѝ со всѣ́ми ѡ҆свѧще́нными ли́ки, да спасе́тъ лю́ди, по вели́цѣй є҆гѡ̀ ми́лости, и҆ сохране́ни бꙋ́демъ ѿ дїа́вольскихъ кова́рствъ чтꙋ́щїи тѧ̀.
Бг҃оро́диченъ:
Бжⷭ҇твеннѣй твое́й покланѧ́емсѧ і҆кѡ́нѣ, бцⷣе, просѧ́ще ѿ тебє̀ вели́кїѧ ми́лости: да́рꙋй, влⷣчце, согрѣше́нїй ѡ҆ставле́нїе рабѡ́мъ твои̑мъ, є҆ди́на бл҃гослове́ннаѧ.
Конда́къ гꙋ́рїю, гла́съ д҃:
Чꙋ́вствєнныѧ стра̑сти побѣди́въ, чистото́ю ꙗ҆́кѡ со́лнце возсїѧ́лъ є҆сѝ, чи́сто житїѐ до конца̀ сохрани́въ, и҆ ѿ невѣ́рїѧ въ вѣ́рꙋ мно́гихъ ко хрⷭ҇тꙋ̀ приве́лъ є҆сѝ: и҆ тогѡ̀ ра́ди ѿ бг҃а нетлѣ́нїемъ почте́нъ бы́лъ є҆сѝ, и҆ чꙋдесы̀ ᲂу҆дивлѧ́емь. мо́лимъ тѧ̀, ст҃и́телю гꙋ́рїе, моли́твами твои́ми ѿ бѣ́дъ и҆зба́ви на́съ, да зове́мъ тѝ: ра́дꙋйсѧ, ѻ҆́ч҃е преди́вный, гра́дꙋ каза́ни похвала̀ и҆ ᲂу҆твержде́нїе.
І҆́косъ:
Пе́рвый сѣ́ѧтель бы́лъ є҆сѝ дꙋхо́вныхъ добродѣ́телей, и҆ пе́рвый па́стырь и҆ цр҃кви нача́льникъ: пе́рвый а҆рхїере́й и҆ ᲂу҆чи́тель хрⷭ҇тїа́нскомꙋ зако́нꙋ, въ новопросвѣще́нномъ гра́дѣ каза́ни, вѣ̑рныѧ лю́ди кормѧ̀ хлѣ́бомъ ᲂу҆че́нїѧ бл҃года́тнагѡ зако́на, напаѧ́ѧ пи́вомъ дꙋхо́вныѧ бл҃года́ти: невѣ̑рныѧ же ᲂу҆чѧ̀ позна́ти и҆́стинꙋ, и҆ крⷭ҇ти́тисѧ ст҃ы́мъ креще́нїемъ, и҆ мно́жество наро́да ѿ невѣ́рїѧ въ вѣ́рꙋ ко хрⷭ҇тꙋ̀ приве́лъ є҆сѝ, и҆ чи́стымъ житїе́мъ бг҃ꙋ ᲂу҆годи́ти наста́вивъ и҆̀хъ. сегѡ̀ ра́ди хрⷭ҇то́съ ст҃о́мꙋ и҆ трꙋдолюбе́зномꙋ твоемꙋ̀ тѣ́лꙋ дарова̀ нетлѣ́нїе, и҆ да́ръ чꙋдотворе́нїѧ, приходѧ́щїи бо съ вѣ́рою къ цѣльбонѡ́снымъ твои̑мъ мощє́мъ, прїе́млютъ неѡскꙋ̑днаѧ страсте́й премѣнє́нїѧ, и҆ болѣ́зней и҆сцѣле́нїе, и҆ грѣхѡ́въ проще́нїе, твои́ми, свѧ́те, ко хрⷭ҇тꙋ̀ моли́твами, да зове́мъ тѝ: ра́дꙋйсѧ, ѻ҆́ч҃е преди́вный, гра́дꙋ каза́ни похвала̀ и҆ ᲂу҆твержде́нїе.
Пѣ́снь з҃. І҆рмо́съ:
Ѻ҆́троцы благочести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ глаго́люще: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.
Не то́кмѡ ᲂу҆́бѡ тѣ́ло твоѐ нетлѣ́нїемъ просла́вилъ є҆́сть бг҃ъ, ст҃и́телю гꙋ́рїе, но и҆ погреба̑льнаѧ всѧ̑ и҆ до ны́нѣ пребыва́ютъ но́выхъ крѣпча́йше. мы́ же си̑мъ дивѧ́щесѧ зове́мъ: бл҃гослове́нъ бг҃ъ ѻ҆тцє́въ на́шихъ.
По́двигѡвъ твои́хъ ра́ди и҆ трꙋдѡ́въ, прпⷣбне, тѣ́ло твоѐ нетлѣ́нно показа̀ бг҃ъ: гро́бꙋ бо и҆ ри́замъ вмѣ́стѡ тлѣ́нїѧ крѣ́пость дарова̀. бл҃гослове́нъ бг҃ъ ѻ҆тцє́въ на́шихъ.
Не є҆ди́но ᲂу҆́бѡ тѣ́ло твоѐ ст҃и́телю, тлѣ́нїю бы́сть неприча́стно, но и҆ погре́бшихсѧ съ вѣ́рою во є҆ди́ной гробни́цѣ съ тобо́ю, моли́твами твои́ми двꙋ̀ мона́хѡвъ нетлѣ́нїемъ ѡ҆дарѝ бг҃ъ, є҆мꙋ́же зове́мъ: бл҃гослове́нъ є҆сѝ, гдⷭ҇и бж҃е ѻ҆тцє́въ на́шихъ.
Бг҃оро́диченъ:
Ѽ всепѣ́таѧ и҆ всенепоро́чнаѧ влⷣчце, молѝ сн҃а твоего̀ хрⷭ҇та̀ бг҃а на́шего, да и҆зба́витъ на́съ вѣ́чнагѡ мꙋче́нїѧ, да пое́мъ: бл҃гослове́нъ бг҃ъ ѻ҆тцє́въ на́шихъ.
И҆́нъ. І҆рмо́съ:
Въ нача́лѣ землю̀ ѡ҆снова́вый, и҆ нб҃са̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Всѣ́хъ благи́хъ ѻ҆́бразъ бы́лъ є҆сѝ, къ вы́шнемꙋ житїю̀ ведꙋ́щь смире́нїемъ и҆ кро́тостїю. тѣ́мже и҆ хрⷭ҇то́съ па́стырѧ тѧ̀ лю́демъ свои̑мъ ᲂу҆строѧ́етъ, пою́щымъ: бл҃гослове́нъ бг҃ъ ѻ҆тє́цъ на́шихъ.
Не преста́й, варсоно́фїе, молѧ́сѧ ѡ҆ дꙋхо́вныхъ твои́хъ ча́дѣхъ, и҆̀хже дꙋхо́внымъ ᲂу҆че́нїемъ породи́лъ є҆сѝ, да пое́мъ: бл҃гослове́нъ бг҃ъ ѻ҆тє́цъ на́шихъ.
И҆̀же твою̀ пресла́внꙋю па́мѧть пра́зднꙋющымъ, ст҃и́телю варсоно́фїе, молѝ и҆зба́витисѧ всѣ̑мъ ѿ разли́чныхъ бѣ́дъ и҆ напа́стей, да всѝ зове́мъ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Вопло́щсѧ ѿ пречⷭ҇тыхъ твои́хъ ложе́снъ бж҃їе сло́во, дв҃о пречⷭ҇таѧ, всѣ́хъ къ бг҃оразꙋ́мїю наста́ви, да пое́мъ є҆мꙋ̀: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
Пречестна́ѧ ра́ка, и҆дѣ́же положено̀ честно́е тѣ́ло твоѐ, ст҃и́телю гꙋ́рїе, мѵ́ра благоꙋха́нна преиспо́лнена бы́сть, и҆̀же съ вѣ́рою ма́жꙋщїисѧ неѡскꙋ̑дна и҆сцѣлє́нїѧ прїе́млютъ, зовꙋ́ще: да благослови́тъ всѧ̀ тва́рь гдⷭ҇а, и҆ превозно́ситъ є҆го̀ во вѣ́ки.
Новопросвѣще́нномꙋ гра́дꙋ каза́ни первопресто́льникъ посыла́ешисѧ, и҆ мно́жество невѣ́рныхъ къ твоемꙋ̀ влⷣцѣ хрⷭ҇тꙋ̀ приве́лъ є҆сѝ, пою́щихъ є҆мꙋ̀: благослови́те, по́йте, и҆ превозноси́те гдⷭ҇а во вѣ́ки.
Па́стырскїй же́злъ прїе́мъ, ст҃и́телю, нѡ́вымъ лю́демъ ᲂу҆чи́тель бы́лъ є҆сѝ, пресла́вне гꙋ́рїе, и҆ мнѡ́ги лю́ди а҆га́рѧнска ꙗ҆зы́ка ст҃ы́мъ креще́нїемъ ѡ҆бнови́лъ є҆сѝ, да всѝ съ тобо́ю зове́мъ: благослови́те, по́йте, и҆ превозноси́те гдⷭ҇а во вѣ́ки.
Бг҃оро́диченъ:
Бг҃оизбра́ннаѧ, є҆ди́на всенепоро́чнаѧ, пречⷭ҇таѧ бг҃оневѣ́сто и҆ бг҃ома́ти, прїимѝ мольбы̑ вѣ́рою ᲂу҆пова́ющихъ на тѧ̀, и҆ сотворѝ моле́нїе ко ст҃ѣ́й трⷪ҇цѣ, и҆зба́витисѧ на́мъ ѿ всѣ́хъ бѣ́дъ, тѧ̀ сла́вѧщымъ и҆ превозносѧ́щымъ гдⷭ҇а во вѣ́ки.
И҆́нъ. І҆рмо́съ:
На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Любомꙋ́дрства дꙋше́внагѡ не премо́же тѣле́снаѧ твоѧ̀ болѣ́знь ѻ҆́ч҃е: ѡ҆ бз҃ѣ бо ре́вность воспрїи́мъ, въ ничто́же вмѣнѧ́еши мимоходѧ́щꙋю ско́рбь, тогѡ̀ ра́ди вѣ́чныѧ болѣ́зни и҆збѣ́глъ є҆сѝ.
Болѣ̀ ᲂу҆́бѡ болѣ́знїю болѣ́зненнѣ, да мимотече́ши сꙋ́етныхъ болѣ́зней, и҆ ны́нѣ на нб҃сѣ́хъ со а҆́гг҃льскими ли́ки предстои́ши ст҃ѣ́й трⷪ҇цѣ, зовы́й: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.
Ꙗ҆́кѡ бо и҆но́ю пи́щею пита́ѧсѧ, ѕѣ́льнымъ поще́нїемъ и҆ всено́щнымъ стоѧ́нїемъ и҆знꙋрѧ́ѧ пло́ть твою̀, поѧ̀ непреста́ннѡ: всѧ̀ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.
Бг҃оро́диченъ:
Пречⷭ҇таѧ бцⷣе, прїимѝ недосто́йнꙋю моли́твꙋ мою̀, и҆ сохрани́ мѧ ѿ клеветы̀ ѕлы́хъ человѣ́кѡвъ, и҆ ѿ напра́сныѧ сме́рти, и҆ да́рꙋй мнѣ̀ пре́жде конца̀ покаѧ́нїе.
Пѣ́снь ѳ҃. І҆рмо́съ:
Снѣ́дїю дре́ва, ро́дꙋ прибы́вшаѧ сме́рть, крⷭ҇то́мъ ᲂу҆праздни́сѧ дне́сь: и҆́бо прама́тернѧѧ всеро́днаѧ клѧ́тва разрꙋши́сѧ, прозѧбе́нїемъ чⷭ҇тыѧ бг҃ома́тере: ю҆́же всѧ̑ си̑лы небє́сныѧ велича́ютъ.
Прїѧ́лъ є҆сѝ ѿ хрⷭ҇та̀ бжⷭ҇твенное є҆гѡ̀ дарова́нїе: ѿ мно́гихъ бо лѣ́тъ сокровє́ны честны̑ѧ твоѧ̑ мо́щи, въ три́десѧть же второ́е лѣ́то ѡ҆брѣто́шасѧ невреди̑мы ничи́мже, и҆сцѣлє́нїѧ разли̑чна подава́ющѧ.
Па́мѧть ѡ҆брѣ́тенїѧ честны́хъ моще́й твои́хъ наста̀ на́мъ свѣ́тло пра́зднество, пречꙋ́дный ст҃и́телю хрⷭ҇то́въ прехва́льне гꙋ́рїе, въ ню́же чꙋде́съ благода́ть прїѧ́лъ є҆сѝ ѿ всѣ́хъ цр҃ѧ̀ хрⷭ҇та̀ бг҃а. тѣ́мже зове́мъ: и҆зба́ви на́съ ѿ врагѡ́въ на́шихъ.
Благода́рствєнныѧ пѣ̑сни принесе́мъ хрⷭ҇тꙋ̀ бг҃ꙋ на́шемꙋ, такова́го на́мъ ст҃и́телѧ дарова́вшемꙋ, цр҃кви свое́й пречестно́е ᲂу҆добре́нїе, и҆ гра́дꙋ каза́ни вели́кое ᲂу҆твержде́нїе.
Бг҃оро́диченъ:
Оу҆мирѝ мі́ръ, хрⷭ҇тѐ, мольба́ми чⷭ҇тыѧ бг҃оѻтрокови́цы, и҆ низложѝ вра̑жїѧ си̑лы, и҆ тишинꙋ̀ неизглаго́ланнꙋ ᲂу҆стро́й, и҆ во вѣ́ки сохранѝ.
И҆́нъ. І҆рмо́съ:
Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, рождество̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.
Пра́зднꙋющымъ свѣ́тлѡ па́мѧть ѡ҆брѣ́тенїѧ честны́хъ моще́й твои́хъ лю́демъ на́шымъ ми́ръ и҆спросѝ, и҆ ᲂу҆сѡ́бныѧ бра̑ни ᲂу҆кротѝ, и҆ и҆зба́ви на́съ ѿ нахожде́нїѧ пога́ныхъ, и҆ клеветникѡ́въ чє́люсти сокрꙋшѝ.
Свобо́денъ тво́й ᲂу҆́мъ ѿ страсте́й соблю́дъ, и҆ сосꙋ́дъ ѡ҆свѧще́нъ дх҃ꙋ прест҃о́мꙋ бы́лъ є҆сѝ, и҆ хрⷭ҇та̀ прїи́мъ въ се́рдцы твое́мъ, и҆ чꙋдотво́рецъ ꙗ҆ви́лсѧ є҆сѝ прогонѧ́ѧ де́мѡны. сегѡ̀ ра́ди мо́лимъ тѧ̀, и҆зба́витисѧ на́мъ ѿ сѣте́й и҆́хъ, твои́ми, свѧ́те, моли́твами.
Цр҃ю̀ си́лъ вы́шнихъ, хрⷭ҇тѐ, крѣ́постїю десни́цы твоеѧ̀ покорѝ врагѝ нечести̑выѧ, и҆ лю́ди твоѧ̑ спасѝ, и҆ земны̑ѧ плоды̀ ᲂу҆мно́жи.
Бг҃оро́диченъ:
На моле́нїе моѐ ᲂу҆милосе́рдисѧ, и҆ ра́дость мѝ въ мѣ́стѡ печа́ли да́рꙋй, влⷣчце, и҆ ѿ клеветы̀ ѕлы́хъ человѣ̑къ и҆зба́ви мѧ̀, да пою́ ти: ра́дꙋйсѧ ѡ҆бра́дованнаѧ, съ тобо́ю гдⷭ҇ь.
Свѣти́ленъ. Подо́бенъ: Посѣти́лъ ны̀:
Є҆гда̀ ᲂу҆́бѡ честны̑ѧ ва́шѧ и҆ ст҃ы̑ѧ мо́щи нетлѣ̑нны ѡ҆брѣто́шасѧ, тогда̀ благоꙋха́нїе ѿ гробѡ́въ ва́шихъ и҆зноша́шесѧ, и҆сцѣлѧ́ющее недꙋ́ги, и҆ ѿгонѧ́ющее дꙋ́хи лꙋка̑выѧ.
Два́жды.
Сла́ва, и҆ ны́нѣ, бг҃оро́диченъ:
Вознесѝ, бцⷣе, ро́гъ цр҃кви, и҆ наро́дꙋ на́шемꙋ пода́ждь на врагѝ ѡ҆долѣ́нїе и҆ крѣ́пость, и҆ цр҃ковь, чⷭ҇таѧ, ᲂу҆твердѝ, и҆ лю́ди твоѧ̑ поми́лꙋй, да тѧ̀ всѧ́къ ꙗ҆зы́къ хрⷭ҇тїа́нскїй велича́етъ.
На хвали́техъ стїхи̑ры на д҃, гла́съ в҃. Поⷣ: Є҆гда̀ ѿ дре́ва:
Тобо́ю ѡ҆свѧти́лъ є҆́сть гдⷭ҇ь, ст҃и́телю гꙋ́рїе, гра́дъ вели́кїй невѣ́рїемъ погрꙋже́нный, тобо́ю наста́ви невѣ̑рныѧ лю́ди позна́ти вѣ́рꙋ и҆́стиннꙋ. тобо́ю же приведо́шасѧ ко хрⷭ҇тꙋ̀ мно́жество невѣ́рныхъ. и҆ неимꙋ́щымъ неѡскꙋ́дное подава́нїе, а҆́лчꙋщымъ корми́тель и҆ пита́тель, и҆ въ бѣда́хъ помо́щникъ, и҆ всѣ̑мъ къ тебѣ̀ прибѣга́ющымъ бога́тное приѡбрѣ́тенїе, гꙋ́рїе прпⷣбне.
Тобо́ю, прпⷣбне ст҃и́телю варсоно́фїе, пе́рваѧ и҆ вели́каѧ ѻ҆би́тель сп҃сова ст҃а́гѡ преѡбраже́нїѧ, въ новопросвѣще́нномъ гра́дѣ каза́ни соста́висѧ. и҆ тобо́ю ꙗ҆́кѡ древеса̀ доброплѡ́дна, и҆ ꙗ҆́кѡ са́дъ присноцвѣтꙋ́щїй, и҆ ꙗ҆́кѡ пло́дъ красе́нъ мно́жество мона́хѡвъ твоемꙋ̀ влⷣцѣ хрⷭ҇тꙋ̀ принесо́шасѧ: тобо́ю же мно́жество вѣ́рныхъ, мона́шєскаѧ натрижнє́нїѧ и҆ трꙋды̀ возлюби́ша, и҆ мно́жество невѣ́рныхъ ѿ тмы̀ вознико́ша, и҆ къ свѣ́тꙋ хрⷭ҇тꙋ̀ бг҃ꙋ притеко́ша, и҆ ᲂу҆че́нїемъ твои́мъ мно́зи спасо́шасѧ.
Вы̀ ᲂу҆́бѡ въ мі́рѣ се́мъ на́ши нача̑льницы и҆ наста̑вницы, и҆ ᲂу҆чи́тели ко спасе́нїю на́мъ ꙗ҆ви́стесѧ: ѻ҆́въ ᲂу҆́бѡ нача́льный па́стырь, и҆ ст҃и́тель гра́дꙋ каза́ни бы́лъ є҆́сть, ѻ҆́въ же ѻ҆́бщемꙋ житїю̀ соста́витель, и҆ мона́хѡмъ ᲂу҆чи́тель и҆ па́стырь бы́сть: кꙋ́пнѡ же ᲂу҆ча́ще и҆ наказꙋ́юще бж҃їѧ лю́ди пꙋтѝ вводѧ́щꙋ въ црⷭ҇тво нбⷭ҇ное, вкꙋ́пѣ же и҆ во є҆ди́нъ ча́съ ѡ҆брѣто́шасѧ ст҃ы̑ѧ ва́ши мо́щи нетлѣ̑нны, и҆ чꙋде́съ да́ръ прїѧ́ли є҆стѐ ѿ бг҃а, и҆сцѣле́нїе подава́ете неѡскꙋ́днѡ приходѧ́щымъ къ ва́мъ съ вѣ́рою.
По достоѧ́нїю ᲂу҆́бѡ не мо́жемъ ва́съ похвали́ти, ѻ҆тцы̀ прпⷣбнїи: и҆ по сме́рти ᲂу҆́бѡ, не ꙗ҆́кѡ во снѣ̀, но на ꙗ҆́вѣ стра́ждꙋщемꙋ ѿ бѣсѡ́въ ꙗ҆влѧ́етесѧ, и҆ мно́жество дꙋхѡ́въ ѕлы́хъ ѿ ѡ҆бꙋрева́емагѡ ѿго́ните, и҆ глаго́лати подае́те, ѿ бѣсѡ́въ ѧ҆зы́кꙋ ѿрѣ́заемомꙋ. моли́те хрⷭ҇та̀, прпⷣбнїи ст҃и́телїе, и҆ ѡ҆ на́съ чи́стѡ чтꙋ́щихъ свѧтꙋ́ю ва́шꙋ па́мѧть, да спасе́тъ дꙋ́шы на́шѧ.
Сла́ва, гла́съ и҃. Самогла́сенъ:
Ꙗ҆́кѡ ѕвѣ́зды пресвѣ̑тлыѧ во страна́хъ восто́ка ꙗ҆ви́стесѧ: поне́же ѿ ю҆́ности своеѧ̀ плотска̑ѧ мꙋдрова̑нїѧ преѡби́дѣсте всѧ̑: впери́вше же ᲂу҆́мъ ва́шъ къ жела́емомꙋ хрⷭ҇тꙋ̀ бг҃ꙋ, и҆ сконча́сте тече́нїе до́брое посто́мъ, и҆ моли́твою, и҆ ми́лостынею и҆ бдѣ́нїемъ, и҆ чистото́ю тѣле́сною. и҆ ѿве́рзесѧ ва́мъ црⷭ҇тво нбⷭ҇ное, и҆ ви́дите, ꙗ҆̀же ви́дѧтъ а҆́гг҃ли, и҆ воздаѧ́нїе трꙋдѡ́въ прїе́млете, бг҃ъ бо вѣ́сть прославлѧ́ти своѧ̑ ᲂу҆го́дники, и҆ подава́ти вѣнцы̀ нетлѣ̑нныѧ. мы́ же мо́лимъ ва́съ: моли́те, ст҃і́и чꙋдотво́рцы и҆ ѡ҆ на́съ непреста́ннѡ хрⷭ҇та̀ бг҃а, спасти́сѧ дꙋша́мъ на́шымъ.
И҆ ны́нѣ, бг҃оро́диченъ. Славосло́вїе вели́кое, и҆ ѿпꙋ́стъ.
На лїтꙋргі́и: Бл҃жє́нна ѿ канѡ́на ст҃ы́хъ. Пѣ́снь г҃, и҆ ѕ҃ на и҃. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ є҆вре́ємъ, зача́ло тл҃є. А҆ллилꙋ́їа, гла́съ в҃. Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ. Є҆ѵⷢ҇лїе матѳе́а, зача́ло а҃і. Прича́стенъ: Ра́дꙋйтесѧ пра́веднїи ѡ҆ гдⷭ҇ѣ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.