← претходни дан | Минеј — Јул | следећи дан →
30 июля: Мученика Иоанна воина
Мѣ́сѧца тогѡ́же въ л҃-й де́нь.
Слꙋ́жба на па́мѧть ст҃а́гѡ і҆ѡа́нна, во́ина и҆ чꙋдотво́рца.
Ве́черъ, глаго́лемъ: Бл҃же́нъ мꙋ́жъ: На Гдⷭ҇и воззва́хъ стїхи̑ры на и҃, гла́съ в҃.
Подо́бенъ: Є҆гда̀ ѿ дре́ва:
Є҆гда̀ тлѣ́нномꙋ царю̀ во́инствꙋѧ на землѝ, вѣ́ренъ бг҃ꙋ і҆ѡа́нне, во́инъ бы́лъ є҆сѝ, тогда̀ нбⷭ҇нагѡ цр҃ѧ̀ хрⷭ҇та̀ по́мощь прїи́мъ, мꙋ́ченикѡмъ хрⷭ҇тѡ́вымъ помога́ѧ, побѣжда́лъ є҆сѝ врагѝ ви̑димыѧ и҆ неви̑димыѧ: и҆ ны́нѣ со а҆́гг҃льскими си́лами и҆ во́инствы въ вы́шнихъ ликꙋ́еши. тѣ́мже бл҃же́нне страстоно́сче, сп҃си́телю всѣ́хъ за ны̀ моли́сѧ, сп҃стѝ дꙋ́шы на́шѧ.
Два́жды.
Земно́е во́инство ѡ҆ста́вити восхотѣ́въ, нбⷭ҇номꙋ цр҃ю̀ хрⷭ҇тꙋ̀ потща́лсѧ є҆сѝ ᲂу҆годи́ти: вѣ́рою бо въ него̀ воѻрꙋжи́всѧ, си́лою чⷭ҇тна́гѡ крⷭ҇та̀ є҆гѡ̀ во́инъ крѣ́покъ, і҆ѡа́нне, ѡ҆брѣ́лсѧ є҆сѝ, мꙋчи́телей ѕлочести́выхъ мꙋ́ченики хрⷭ҇тѡ́вы сохранѧ́ѧ мл҃твами твои́ми къ бг҃ꙋ, бл҃же́нне.
Є҆гда̀ вѣ́рою во хрⷭ҇та̀ бг҃а и҆ мл҃твою прпⷣбныхъ жре́бїй полꙋчи́ти возжела́лъ є҆сѝ, тогда̀ вѣ́ры ра́ди хрⷭ҇то́вы мꙋ́чащымсѧ спосо́бствовалъ є҆сѝ. сегѡ̀ ра́ди дарова́ньми чꙋде́съ ѡ҆богати́ тѧ хрⷭ҇то́съ гдⷭ҇ь: въ разли́чныхъ бо ско́рбехъ призыва́ющымъ тѧ̀ помо́щникъ ско́ръ ѡ҆брѣта́ешисѧ. тѣ́мже моли́сѧ бг҃ꙋ ѡ҆ на́съ творѧ́щихъ всечⷭ҇тнꙋ́ю па́мѧть твою̀.
И҆́ны стїхи̑ры, гла́съ то́йже. Подо́бенъ: Кі́ими похва́льными:
Прїиди́те, ст҃олю́бцы, всѝ дх҃о́внѡ возвесели́мсѧ и҆ торжествꙋ́имъ, сла́вѧще хрⷭ҇та̀ и҆ бг҃а на́шего, ꙗ҆́кѡ пребога́тꙋю трапе́зꙋ дне́сь на́мъ предложѝ, па́мѧть сла́внагѡ мꙋ́ченика и҆ до́блѧгѡ во́ина і҆ѡа́нна, помо́щника всѣ̑мъ въ ско́рбехъ, и҆ ѕлы́хъ дѣ́лъ ѡ҆бличи́телѧ, и҆ погꙋбле́нїй та́йныхъ ꙗ҆ви́телѧ, просѧ́щымъ є҆гѡ̀ по́мощи.
Бг҃одарова́ннꙋю бл҃года́ть і҆ѡа́нна восхва́лимъ пѣснопѣ́ньми, бл҃гоче́стїѧ побо́рника, хра́браго во́ина, и҆зѧ́щнаго чꙋдотво́рца, помо́щника ѡ҆би́димымъ, бл҃говѣ̑рнымъ предста́телѧ, и҆ врача̀ безме́зднаго, въ во́инствѣ ратобо́рца, и҆ ѿ напра́сныхъ сме́ртей храни́телѧ, и҆ пꙋте́й бл҃ги́хъ и҆звѣ́стника: мо́литсѧ бо бг҃ꙋ всѧ̑ лю́ди бл҃годѣ́йствовати.
Пребл҃же́нне добропобѣ́дный і҆ѡа́нне, во́ине крѣ́пкїй всетворца̀ на́шегѡ бг҃а, ты̀ дꙋше́вное твоѐ бл҃горо́дїе бг҃оизбра́ннѣ соблю́лъ є҆сѝ: презрѣ́въ сꙋетꙋ̀ и҆ пре́лєсти мі́ра, человѣколю́бнѣ сꙋ́щымъ въ мꙋче́нїихъ спострада́лъ є҆сѝ. и҆ ны́нѣ въ нб҃сѣ́хъ со хрⷭ҇то́мъ сла́дцѣ водворѧ́ешисѧ: ѿню́дꙋже назира́й и҆ сохранѧ́й въ ратобо́рствѣ и҆ во всѧ́кихъ ѕлоключе́нїихъ всѧ̑ призыва́ющыѧ тѧ̀.
Что̀ тебѣ̀ принесе́мъ, тво́рче бж҃е; ко́е воздади́мъ бл҃годаре́нїе; ꙗ҆́кѡ дарова́лъ є҆сѝ лю́демъ твои̑мъ и҆́стиннꙋю бл҃года́ть, ст҃а́го і҆ѡа́нна, во́ина бл҃гочести́ва, млⷭ҇ти твори́телѧ, на бра́нехъ во́инѡмъ спосо́бника, всѧ́кихъ печа́лей ᲂу҆тѣ́шителѧ, и҆ моли́твенника тебѣ̀ во сп҃се́нїе на́ше те́плаго. тѣ́мже ра́ди млⷭ҇ти твоеѧ̀ сп҃си́ ны, влⷣко чл҃вѣколю́бче.
Сла́ва, гла́съ ѕ҃:
За хрⷭ҇та̀ ᲂу҆се́рднѡ, і҆ѡа́нне, подвиза́всѧ съ мꙋ́чєники хрⷭ҇то́выми, въ вѣ́рѣ бл҃гочести́вѣй хрⷭ҇тїа́нѡмъ помоществꙋ́ѧ, ꙗ҆́кѡ во́инъ и҆зрѧ́денъ твоемꙋ̀ влⷣцѣ бы́лъ є҆сѝ. тре́бꙋющымъ подава́ѧ пита́нїе, и҆ ми́лостыню и҆з̾ѻби́льнѡ ни́щымъ ᲂу҆готовлѧ́ѧ, небре́глъ є҆сѝ повелѣ̑нїѧ і҆ꙋлїа́на законопрестꙋ́пнагѡ царѧ̀: разрꙋша́ѧ же мꙋчи́тєльныѧ є҆гѡ̀ сосꙋ́ды, и҆зѧ́щенъ добропобѣ́дникъ въ правосла́вїи ꙗ҆ви́лсѧ є҆сѝ. тѣ́мже преше́лъ є҆сѝ въ нбⷭ҇ныѧ кро́вы, и҆ та́мѡ хрⷭ҇та̀ і҆и҃са всера́достнѡ зри́ши, и҆́же нетлѣ́ннымъ ᲂу҆вѧзе́ тѧ вѣнце́мъ: є҆го́же, всебл҃же́нне, непреста́ннѡ молѝ, вѣ́чнагѡ бл҃же́нства сподо́битисѧ досто́йнѡ че́ствꙋющымъ тѧ̀.
И҆ ны́нѣ, бг҃оро́диченъ: Кто̀ тебє̀ не ᲂу҆блажи́тъ: Вхо́дъ. Прокі́менъ днѐ, и҆ чтє́нїѧ трѝ.
Прⷪ҇ро́чества и҆са́їина чте́нїе. (Глава̀ м҃г.)
Та́кѡ глаго́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ̑зи ѿ ни́хъ. кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы́шана сотвори́тъ ва́мъ; да приведꙋ́тъ свидѣ́тєли своѧ̑, и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. бꙋ́дите мѝ свидѣ́тєли, и҆ а҆́зъ свидѣ́тель, глаго́летъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ: да позна́ете и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бг҃ъ, и҆ по мнѣ̀ не бꙋ́детъ. а҆́зъ є҆́смь бг҃ъ, и҆ нѣ́сть ра́звѣ менє̀ сп҃са́ѧй, а҆́зъ возвѣсти́хъ, и҆ сп҃со́хъ: ᲂу҆ничижи́хъ, и҆ не бѣ̀ въ ва́съ чꙋ́ждїй. вы̀ мнѣ̀ свидѣ́тєли, и҆ а҆́зъ гдⷭ҇ь бг҃ъ, и҆ є҆щѐ ѿ нача́ла а҆́зъ є҆́смь: и҆ нѣ́сть ѿ рꙋ́къ мои́хъ и҆збавлѧ́ѧй. сотворю̀, и҆ кто̀ ѿврати́тъ то̀; си́це глаго́летъ гдⷭ҇ь бг҃ъ, и҆збавлѧ́ѧй ва́съ ст҃ы́й і҆и҃левъ.
Премꙋ́дрости соломѡ́ни чте́нїе. (Глава̀ г҃.)
Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. и҆́бо пред̾ лице́мъ чл҃вѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀ и҆ ѡ҆брѣ́те и҆̀хъ достѡ́йны себѣ̀. ꙗ҆́кѡ зла́то въ горни́лѣ, и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное, прїѧ́тъ ѧ҆̀. и҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀ ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе. (Глава̀ д҃.)
Пра́ведникъ а҆́ще пости́гнетъ сконча́тисѧ, въ поко́и бꙋ́детъ. ста́рость бо чⷭ҇тна̀ не многолѣ́тна, нижѐ въ числѣ̀ лѣ́тъ и҆счита́етсѧ. сѣди́на же є҆́сть мꙋ́дрость чл҃вѣ́кѡмъ, и҆ во́зрастъ ста́рости, житїѐ нескве́рное. бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть: восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. раче́нїе бо ѕло́бы помрача́етъ дѡ́браѧ: и҆ паре́нїе по́хоти премѣнѧ́етъ ᲂу҆́мъ неѕло́бивъ. сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи̑ры, гла́съ и҃:
Мꙋ́чениче хрⷭ҇то́въ прехва́льне і҆ѡа́нне, гони́телѧ беззако́ннагѡ царѧ̀ стремлє́нїѧ и҆ нꙋ́жднꙋю сме́рть ни во что́же вмѣни́лъ є҆сѝ, бл҃годе́рзостнѡ и҆ мꙋжемꙋ́дреннѡ ѡ҆полчи́всѧ къ боре́нїємъ. тѣ́мже побѣдоно́сною сла́вою вѣнча́всѧ, приче́лсѧ є҆сѝ всѣ̑мъ првⷣнымъ, съ ни́миже тѧ̀ хва́лѧще ᲂу҆бл҃жа́емъ.
Мꙋ́чениче хрⷭ҇то́въ пребл҃же́нне і҆ѡа́нне, ви́дѧ хрⷭ҇тѡ́вы мꙋ́ченики на закла́нїе ведѡ́мы, дрꙋголю́бнѡ ѻ҆́нѣмъ помога́лъ є҆сѝ. страда́ти бо до кро́ве и҆ сме́рти ты̑ѧ поꙋча́ѧ, глаго́лалъ є҆сѝ: ничто́же є҆́сть здѣ̀ на́ше страда́нїе, проти́вꙋ бꙋ́дꙋщагѡ на нб҃сѣ́хъ воздаѧ́нїѧ. та́же и҆ са́мъ спострада́ти тѣ̑мъ любвѐ ра́ди творца̀ твоегѡ̀ подви́глсѧ є҆сѝ. сегѡ̀ ра́ди ѿ хрⷭ҇та̀ бг҃а чꙋде́съ дарова́нїе прїе́мъ, въ разли́чныхъ напа́стехъ стра́ждꙋщымъ помога́еши, и҆ и҆з̾има́еши ѿ лю́тыхъ бѣ́дъ сла́вѧщыѧ гдⷭ҇а и҆ чествꙋ́ющыѧ любо́вїю сщ҃є́ннаѧ твоѧ̑ страда̑нїѧ.
Мꙋ́чениче гдⷭ҇ень непобѣди́мый і҆ѡа́нне, бл҃года́ти носѧ̀ и҆́мѧ, бл҃года́ть и҆ млⷭ҇ть подава́еши вѣ́рнѡ моли́твами тѧ̀ призыва́ющымъ, и҆ приво́диши въ ра́дость лю́ди бг҃омꙋ̑дрыѧ, вѣ́рнѡ въ по́мощь напа́стей свои́хъ зовꙋ́щыѧ тѧ̀ и҆ чествꙋ́ющыѧ сщ҃еннора́достнꙋю па́мѧть твою̀: тѣ́мже моли́сѧ хрⷭ҇тꙋ̀ і҆и҃сꙋ, да сп҃се́тъ ны̀ ѿ всѣ́хъ бѣ́дъ, ꙗ҆́кѡ всеси́ленъ.
Сла́ва, гла́съ д҃:
Кто̀ не ᲂу҆диви́тсѧ, и҆лѝ кто̀ не просла́витъ, и҆лѝ не воспое́тъ вѣрномꙋ́драгѡ и҆ сла́внагѡ хрⷭ҇то́ва во́ина і҆ѡа́нна чꙋдеса̀; ꙗ҆́кѡ и҆ по честнѣ́мъ свое́мъ преставле́нїи, всѣ̑мъ подае́тъ притека́ющымъ ᲂу҆се́рднѡ къ немꙋ̀ премнѡ́гаѧ врачєвства̀: и҆́бо чєстны́ѧ и҆ ст҃ы̑ѧ є҆гѡ̀ мо́щи и҆сточа́ютъ бл҃года́ть и҆з̾ѻби́льнꙋ въ полє́знаѧ прошє́нїѧ. тѣ́мже бл҃гоче́стнѡ вопїе́мъ є҆мꙋ̀: молѝ непреста́ннѡ гдⷭ҇а, да сп҃се́тъ всѧ̑ правосла̑вныѧ лю́ди вѣ́рою во ст҃ы́й тво́й хра́мъ притека́ющыѧ, и҆ просѧ́щыѧ те́плагѡ къ бг҃ꙋ застꙋпле́нїѧ: тебе́ бо ᲂу҆се́рдна хода́таѧ къ немꙋ̀ и҆́мамы, и҆ моли́твенника ѡ҆ дꙋша́хъ на́шихъ.
И҆ ны́нѣ, бг҃оро́диченъ: При́зри на молє́нїѧ:
На стїхо́внѣ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Многоѻбра́зными мꙋчє́нїи лю́тый мꙋчи́тель казни́ти предадѐ ст҃о́е тѣ́ло твоѐ. ты́ же, бг҃омы́сленне і҆ѡа́нне, не ѿве́рглсѧ є҆сѝ хрⷭ҇та̀, ни кꙋмі́рѡмъ поже́рлъ є҆сѝ: но претерпѣ́лъ є҆сѝ до́блественнѣ, ѡ҆жида́ѧ бꙋ́дꙋщагѡ воздаѧ́нїѧ, неконча́емагѡ въ бз҃ѣ наслажде́нїѧ.
Сті́хъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.
Добродѣ́тельнымъ твои́мъ житїе́мъ мі́ръ презрѣ́лъ є҆сѝ, і҆ѡа́нне чꙋдотво́рче, и҆ ве́лїе милосе́рдїе хрⷭ҇тїа́нѡмъ въ чинонача́льствѣ твоегѡ̀ во́инства сотворѧ́ѧ, въ свобо́дꙋ ѻ҆́нѣхъ пꙋща́лъ є҆сѝ. ѿню́дꙋже и҆ са́мъ за хрⷭ҇та̀ бг҃а въ вѣ́рѣ правосла́внѣй пострада́въ, прїѧ́лъ є҆сѝ наслѣ́дїе вѣ́чнагѡ бл҃же́нства.
Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.
И҆сцѣле́нїй дарова́нїе и҆сточа́ютъ твоѧ̑, сла́вне, мо́щи чествꙋ́ющымъ тѧ̀ ᲂу҆се́рднѡ, потоплѧ́юща стра̑сти и҆ врачꙋ́ющѧ недꙋ́ги, і҆ѡа́нне: и҆ разорѧ́ютъ лꙋка́выхъ де́монѡвъ тѡлпы̀, напоѧ́ютъ же вѣ́рныхъ сердца̀, и҆̀же прозѧба́ютъ добродѣ́телей плоды̀ бжⷭ҇твєнныѧ и҆ бл҃гоче́стїѧ разꙋмѣ́нїе.
Сла́ва, гла́съ и҃:
Прїиди́те, хрⷭ҇толюби́вїи лю́дїе, до́брый по́двигъ и҆ бл҃годꙋ́шное мꙋ́жество во бл҃говѣ́рїи сотворе́нное разꙋ́мнѣ созерца́имъ. но́вый бо вѣне́чникъ і҆ѡа́ннъ, вели́кїй моли́твенникъ и҆ мꙋ́ченикъ, си́це вопїе́тъ царю̀ богоме́рзкомꙋ, законопрестꙋ́пномꙋ і҆ꙋлїа́нꙋ: ѕлоко́зненными твои́ми словесы̀ въ сладостра́стїе сꙋ́етнагѡ сегѡ̀ мі́ра не мо́жеши мѧ̀ прельсти́ти, нижѐ ѿлꙋчи́ши любвѐ всетворца̀ моегѡ̀ бг҃а: а҆́зъ бо на него̀ ᲂу҆пова́ю, и҆ къ немꙋ̀ всѐ моѐ жела́нїе простира́ю, да є҆гѡ̀ нбⷭ҇нагѡ црⷭ҇твїѧ бꙋ́дꙋ наслѣ́дникъ. тѣ́мже сла́вѧще хрⷭ҇та̀ цр҃ѧ̀, мꙋ́ченика хва́лимъ, и҆ ᲂу҆се́рднѡ дне́сь въ па́мѧти є҆гѡ̀ про́симъ: свѧ́те і҆ѡа́нне, моли́сѧ вы́нꙋ ми́ръ мі́рꙋ дарова́ти, и҆ дꙋша́мъ на́шымъ ве́лїю млⷭ҇ть.
И҆ ны́нѣ, бг҃оро́диченъ: Влⷣчце, прїимѝ:
Тропа́рь, гла́съ д҃:
Всебл҃га́гѡ бг҃а и҆ цр҃ѧ̀ бл҃говѣ́рный ра́бъ и҆ во́инъ ꙗ҆ви́лсѧ є҆сѝ, і҆ѡа́нне чꙋдодѣ́телю: пострада́въ бо ра́ди вѣ́ры мꙋ́жески, бл҃же́ннѡ же сконча́въ тече́нїе, зри́ши всетворца̀ гдⷭ҇а въ нб҃сѣ́хъ свѣтлѣ́йше. ѿ негѡ́же прїе́мъ дарова́нїе чꙋде́съ, стра́ждꙋщымъ человѣ́кѡмъ во всѧ́кихъ напа́стехъ помога́еши: ᲂу҆крѣплѧ́еши во́ины въ ра́техъ: ѿ врагѡ́въ плѣне́нїѧ, ра́нъ же и҆ внеза́пныхъ смерте́й и҆ ѿ бѣ́дъ лю́тыхъ и҆з̾има́еши. тѣ́мже молѝ влⷣкꙋ хрⷭ҇та̀, приснопа́мѧтне, да во всѧ́комъ ѡ҆бстоѧ̑нїи сотвори́тъ на́мъ млⷭ҇ть, и҆ не введе́тъ на́съ во и҆скꙋшє́нїѧ, но сп҃се́тъ дꙋ́шы на́шѧ, ꙗ҆́кѡ чл҃вѣколю́бецъ.
Сла́ва, и҆́нъ тропа́рь, гла́съ и҃:
Бл҃же́нство є҆ѵⷢ҇льское, бг҃омꙋ́дре і҆ѡа́нне, чистотꙋ̀ се́рдца дѣ́вствомъ почти́лъ є҆сѝ. тѣ́мже сꙋетꙋ̀ мі́ра сегѡ̀ пренебре́гъ, ᲂу҆стреми́лсѧ є҆сѝ зрѣ́ти бг҃а, и҆́же тѧ̀ просла́ви чꙋдесы̀ во врачева́нїи разли́чнѣ стра́ждꙋщихъ, сегѡ̀ ра́ди мо́лимъ тѧ̀, просѝ на́мъ ᲂу҆ хрⷭ҇та̀ гдⷭ҇а всѧ́кихъ скорбе́й и҆збавле́нїѧ и҆ полꙋче́нїѧ црⷭ҇тва нбⷭ҇нагѡ.
И҆ ны́нѣ, бг҃оро́диченъ: И҆́же на́съ ра́ди рожде́йсѧ ѿ дв҃ы:
А҆́ще же твори́тсѧ бдѣ́нїе, глаго́ли пе́рвый тропа́рь, два́жды, и҆ Бцⷣе дв҃о: є҆ди́нощи.
На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ во гла́съ тропарѧ̀.
По а҃-й стїхоло́гїи сѣда́ленъ, гла́съ а҃.
Подо́бенъ: Гро́бъ тво́й, сп҃се:
Стра̑сти честны́хъ ви́дѣвъ мꙋ́ченикѡвъ, и҆ тѣ́хъ цѣлова́въ ᲂу҆́зы, на высотꙋ̀ восте́клъ є҆сѝ свидѣ́тельства, пречꙋ́дне, и҆ жела́нїе всѐ ко хрⷭ҇тꙋ̀ возложи́въ, стра́ждꙋщымъ помога́ѧ и҆ а҆́лчꙋщыѧ пита́ѧ, всѣ̑мъ млⷭ҇тивый застꙋ́пникъ бы́лъ є҆сѝ, до́ндеже въ рꙋ́цѣ гдⷭ҇ни дꙋ́шꙋ твою̀ пре́далъ є҆сѝ, і҆ѡа́нне многострада́льне.
Два́жды.
Сла́ва, и҆ ны́нѣ, бг҃оро́диченъ:
Наде́ждо хрⷭ҇тїа́нъ прест҃а́ѧ дв҃о, є҆го́же родила̀ є҆сѝ бг҃а па́че ᲂу҆ма̀ и҆ сло́ва, непреста́ннѡ молѝ съ вы́шними си́лами и҆ со страстоте́рпцемъ і҆ѡа́нномъ, да́ти ѡ҆ставле́нїе грѣхѡ́въ на́мъ всѣ̑мъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ прославлѧ́ющымъ.
По в҃-й стїхоло́гїи сѣда́ленъ, гла́съ и҃.
Подо́бенъ: Премꙋ́дрости:
Цр҃ю̀ вѣкѡ́въ безсме́ртномꙋ ᲂу҆гожда́ѧ, и҆стꙋка́ннымъ не поже́рлъ є҆сѝ, царѧ́ же беззако́ннагѡ всѧ̑кїѧ совѣ́ты ѕлокѡ́зненныѧ ѿрази́лъ є҆сѝ, сла́вне: тогѡ̀ ра́ди же́ртвꙋ тебѐ сама́го прине́слъ є҆сѝ поже́ршемꙋсѧ сло́вꙋ. тѣ́мъ и҆ чꙋде́съ и҆сточа́еши стрꙋи̑, въ напа́стехъ стра́ждꙋщымъ млⷭ҇тивый предста́телю и҆ мл҃твенниче ко хрⷭ҇тꙋ̀ бг҃ꙋ, і҆ѡа́нне вели́кїй, во́ине цр҃ѧ̀ хрⷭ҇та̀ бг҃а на́шегѡ: є҆го́же молѝ, грѣхѡ́въ ѡ҆ставле́нїе дарова́ти чествꙋ́ющымъ любо́вїю ст҃ꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ: и҆ ѡ҆скверне́нное моѐ се́рдце ѡ҆чи́сти пото́ки ᲂу҆миле́нїѧ, покаѧ́нїѧ же слеза́ми ѡ҆мы́й нечистотꙋ̀ дѣ́лъ мои́хъ, да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти мѝ, тебе́ бо и҆́мамъ наде́ждꙋ ра́бъ тво́й.
Велича́нїе:
Велича́емъ тѧ̀, страстоте́рпче ст҃ы́й і҆ѡа́нне, и҆ чти́мъ чⷭ҇тна̑ѧ страда̑нїѧ твоѧ̑, ꙗ҆̀же за хрⷭ҇та̀ претерпѣ́лъ є҆сѝ.
Ѱало́мъ и҆збра́нный: Бг҃ъ на́мъ прибѣ́жище и҆ си́ла:
По полѷеле́и сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
Ꙗ҆́кѡ до́блемꙋ страда́льцꙋ и҆ во́инꙋ крѣ́пкомꙋ всецр҃ю́ющагѡ хрⷭ҇та̀ взыва́емъ тѝ, і҆ѡа́нне: ра́дꙋйсѧ, мꙋ́ченикѡмъ ᲂу҆краше́нїе и҆ лѣ́пото: ра́дꙋйсѧ, свѣ́тлаѧ цр҃кве ѕвѣздо̀, и҆ стѣно̀ и҆ приста́нище притека́ющымъ къ тебѣ̀, великомꙋ́чениче сла́вне і҆ѡа́нне во́ине: тѧ̀ пою́щыѧ сп҃са́й твои́ми мл҃твами ѿ всѧ́кагѡ вре́да чꙋжда́гѡ, и҆ ѿ лю́тыхъ ѡ҆ѕлобле́нїй и҆зба́ви.
Сла́ва, и҆ ны́нѣ, бг҃оро́диченъ:
Ꙗ҆́кѡ къ цр҃и́цѣ нбⷭ҇ныѧ си̑лы превосходѧ́щей, сꙋ́щей мт҃ри хрⷭ҇та̀ на́шегѡ, держа́внѣй помо́щницѣ ро́да на́шегѡ, припа́дающе мы̀ грѣ́шнїи рабѝ твоѝ, ᲂу҆миле́ннѡ вопїе́мъ тебѣ̀: влⷣчце дв҃о мр҃і́е бцⷣе, во всѐ вре́мѧ жи́зни на́шеѧ при́снѡ ᲂу҆правлѧ́й ны̀ въ во́лю гдⷭ҇а цр҃ѧ̀ нбⷭ҇нагѡ, и҆ сохранѧ́й ѿ всѧ́кихъ напа́стей и҆ недꙋ́гѡвъ дꙋше́вныхъ и҆ тѣле́сныхъ, не ввѣрѧ́ющи чл҃вѣ́кѡвъ по́мощи, и҆ поми́лꙋй ны̀, всепѣ́таѧ.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ, гла́съ д҃: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ. Всѧ́кое дыха́нїе: Є҆ѵⷢ҇лїе ѿ і҆ѡа́нна, зача́ло н҃а.
По н҃-мъ ѱалмѣ̀, Сла́ва: Мл҃твами страстоте́рпца, млⷭ҇тиве, ѡ҆чи́сти мнѡ́жества согрѣше́нїй на́шихъ. И҆ ны́нѣ: Мл҃твами бцⷣы: Поми́лꙋй мѧ̀, бж҃е:
Та́же стїхи́ра, гла́съ ѕ҃:
Дне́сь созыва́етъ на́съ страстоте́рпца всемі́рное торжество̀: прїиди́те, бг҃олю́бцы, свѣ́тлѡ пра́зднꙋимъ па́мѧть є҆гѡ̀, гл҃го́люще: ра́дꙋйсѧ, великомꙋ́чениче і҆ѡа́нне, цр҃ѧ̀ нбⷭ҇нагѡ во́ине непребори́мый: и҆́бо ты̀ повелѣ́нїе безꙋ́мное законопрестꙋ́пнагѡ царѧ̀ і҆ꙋлїа́на і҆дѡлочти́телѧ преѻби́дѣлъ є҆сѝ мꙋ́жески: ра́дꙋйсѧ, бл҃же́нне, страстоте́рпцємъ хрⷭ҇тѡ́вымъ помо́щниче, ꙗ҆́кѡ ты̑ѧ въ гоне́нїи ѿ ѕлочести́выхъ въ вѣ́рѣ правосла́внѣй ᲂу҆твержда́лъ є҆сѝ, и҆ и҆̀мъ любе́знѡ сострада́лъ є҆сѝ: сегѡ̀ ра́ди хрⷭ҇то́съ дарова́ньми чꙋде́съ ѡ҆богати́лъ тѧ̀ є҆́сть: молѝ ᲂу҆̀бо всебл҃га́го бг҃а сп҃стѝ дꙋ́шы на́шѧ.
Канѡ́нъ бцⷣы на ѕ҃: и҆ ст҃а́гѡ на и҃, два̀ канѡ́на. Пе́рвый канѡ́нъ, во гла́съ в҃.
Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Свѣ́тлое пра́зднество твоѐ, свѧ́те і҆ѡа́нне, ра́достнѡ на дх҃о́внꙋю трапе́зꙋ на́съ созыва́етъ: въ не́йже ᲂу҆чрежда́еши ны̀ всѧ̑ къ тебѣ̀ притека́ющыѧ дарова́ньми, въ по́льзꙋ прошє́нїѧ на́мъ и҆сполнѧ́ѧ.
По́двигомъ до́брымъ подвиза́всѧ на землѝ, пребл҃же́нне і҆ѡа́нне, и҆ ѿ ѕла́гѡ мꙋчи́телѧ мч҃еники хрⷭ҇тѡ́вы сохранѧ́ѧ, прїѧ́лъ є҆сѝ ѿ хрⷭ҇та̀ бг҃а нбⷭ҇нꙋю жи́знь, ѿню́дꙋже въ ско́рбехъ на́мъ пода́ждь по́мощь.
Во́инствомъ и҆́стиннымъ, бг҃омꙋ́дре, ѕлочести́вагѡ царѧ̀ небре́гъ мꙋчи́тєльства, и҆ бога́тство ни́щымъ хрⷭ҇та̀ ра́ди расточи́въ, прїѧ́лъ є҆сѝ да́ръ чꙋде́съ ѿ бг҃а: лꙋка̑выѧ чл҃вѣ́ки ѡ҆блича́ѧ, бл҃гочєсти́вымъ спосо́бствꙋеши.
Бг҃оро́диченъ:
Воплоти́сѧ и҆з̾ тебє̀ бг҃олѣ́пнѡ сло́во безпло́тное, премно́жествомъ чл҃вѣколю́бїѧ, пречⷭ҇таѧ дв҃о: є҆го́же, влⷣчце, молѝ, вѣ́чное бл҃же́нство дарова́ти на́мъ.
Дрꙋгі́й канѡ́нъ, гла́съ а҃.
Пѣ́снь а҃. І҆рмо́съ:
Вознесꙋ́ тѧ, бж҃е сп҃се мо́й, ꙗ҆́кѡ воскре́слъ є҆сѝ ѿ ме́ртвыхъ, попра́въ сме́рть.
І҆и҃се сп҃се на́шъ, пода́ждь на́мъ ᲂу҆се́рдїе бл҃годари́ти тѧ̀ ѡ҆ все́мъ и҆ восхвали́ти ᲂу҆го́дника твоего̀ і҆ѡа́нна.
Страстоте́рпче сла́вне і҆ѡа́нне, бг҃омꙋ́дрымъ смы́сломъ вво́инилсѧ є҆сѝ всетворцꙋ̀ бг҃ꙋ: побѣдѝ ᲂу҆̀бо всѧ̑ врагѝ на́шѧ.
Зрѣ́ти ᲂу҆досто́ивыйсѧ бг҃а воплоще́на, всехва́льне во́ине, мо́лимъ тѧ̀, твои́ми мольба́ми и҆зба́ви ны̀ ѿ всѣ́хъ бѣ́дъ.
Бг҃оро́диченъ:
Бг҃ора́дованнаѧ сло́ва предвѣ́чнагѡ пала́то, мр҃і́е дв҃о, милосе́рдїемъ твои́мъ сердца̀ на̑ша въ ско́рбехъ ᲂу҆веселѧ́й ѡ҆ бз҃ѣ при́снѡ.
Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑. возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ ꙗ҆́коже бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.
Съ мч҃еники несꙋмнѣ́ннꙋ вѣ́рꙋ стѧжа́въ, бл҃годꙋ́шне, и҆ хрⷭ҇тꙋ̀ і҆и҃сꙋ бы́въ во́инъ, добродѣ́тельми ѡ҆богати́лсѧ є҆сѝ: тѣ́мже соверша́ющымъ па́мѧть твою̀ честнꙋ́ю бл҃го́е просвѣще́нїе всегда̀ да́рꙋй.
Лꙋка́внꙋющымъ ѕлѣ̀ неви́димый гони́тель мч҃ениче хрⷭ҇то́въ, ꙗ҆влѧ́ешисѧ, и҆ крадьбы̑ въ та́йнѣ сꙋ́щыѧ ѿкрыва́еши: прїѧ́лъ бо є҆сѝ вла́сть ѿ бг҃а полє́знаѧ ко сп҃се́нїю всѣ̑мъ содѣва́ти.
Ꙗ҆́коже сто́лпъ непоколе́блемь се́рдце твоѐ, всечⷭ҇тне і҆ѡа́нне, и҆мѣ́ѧ, любо́вь мꙋ́ченикѡмъ хрⷭ҇тѡ́вымъ сотвори́лъ є҆сѝ, не боѧ́сѧ царе́ва сꙋровства̀: тѣ́мже въ любвѝ гдⷭ҇ни ᲂу҆твержда́тисѧ на́мъ помозѝ.
Бг҃оро́диченъ:
Бцⷣе, мт҃и гдⷭ҇а і҆и҃са, со всѣ́ми ст҃ы́ми того̀ молѝ, и҆зба́вити ны̀ ѿ всѣ́хъ бѣ́дъ и҆ скорбе́й, ꙗ҆́кѡ да посра́мѧтсѧ всѝ ꙗ҆влѧ́ющїи рабѡ́мъ твои̑мъ ѕла̑ѧ: хвали́ти же съ сн҃омъ тѧ̀ при́снѡ на́съ сподо́би.
И҆́нъ. І҆рмо́съ:
Оу҆твержде́й сло́вомъ твои́мъ вселе́ннꙋю, ꙗ҆́же не подви́житсѧ, ᲂу҆твердѝ и҆ на́шꙋ мы́сль въ стра́хъ тво́й, влⷣко гдⷭ҇и.
Тебѣ̀ творцꙋ̀ на́шемꙋ бг҃ꙋ во всѧ́комъ ѡ҆бстоѧ́нїи припа́дающе мо́лимсѧ, мч҃еника твоегѡ̀ мольба́ми, въ во́ли и҆ любвѐ твое́й ᲂу҆твердѝ на́съ.
Тве́рдымъ ᲂу҆мо́мъ ста́лъ є҆сѝ на правотѣ̀ бг҃озна́нїѧ, бг҃облаже́нне і҆ѡа́нне: тѣ́мже ᲂу҆твержда́й дꙋ́шы на́шѧ, во гдⷭ҇ѣ наде́ждꙋ во все́мъ полага́ти, по́хоть пло́ти, по́хоть ѻ҆че́съ и҆ го́рдость житїѧ̀ презрѣ́въ, ᲂу҆тверди́лсѧ є҆сѝ въ любвѝ і҆и҃совѣ, мч҃ениче: на́мъ въ то́ежде помо́щникъ бꙋ́ди.
Бг҃оро́диченъ:
Всебл҃же́ннаѧ влⷣчце, ᲂу҆твержда́ющаго всѧ̑ хрⷭ҇та̀ гдⷭ҇а поро́ждши, въ про́мыслѣ є҆гѡ̀ пребыва́ти ᲂу҆крѣпи́ ны всегда̀.
Сѣда́ленъ, гла́съ и҃. Подо́бенъ: Премꙋ́дрости:
Цр҃ю̀ нбⷭ҇номꙋ и҆ творцꙋ̀ вѣкѡ́въ ᲂу҆гожда́ѧ при́снѡ, законопрестꙋ́пнагѡ і҆ꙋлїа́на мꙋчи́телѧ всѧ̑ ѕлокова̑рныѧ и҆ бг҃омє́рзкїѧ совѣ́ты ѿрази́лъ є҆сѝ, сла́вне, і҆́дѡлѡмъ бездꙋ̑шнымъ жє́ртвы возбрани́въ твори́ти, и҆ та́кѡ въ по́двизѣ дꙋ́шꙋ твою̀ въ рꙋ́цѣ гдⷭ҇ꙋ бг҃ꙋ пре́далъ є҆сѝ: є҆го́же молѝ, ст҃е і҆ѡа́нне, прегрѣше́нїй ѡ҆ставле́нїе на́мъ дарова́ти, чествꙋ́ющымъ ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, а҆́гг҃льскїй собо́ръ и҆ чл҃вѣ́ческїй ро́дъ, ѡ҆сщ҃е́нный хра́ме и҆ раю̀ слове́сный, дв҃ственнаѧ похвало̀, и҆з̾ неѧ́же бг҃ъ воплоти́сѧ, и҆ млⷣнецъ бы́сть, пре́жде вѣ̑къ сы́й бг҃ъ на́шъ: ложесна́ бо твоѧ̑ прⷭ҇то́лъ сотворѝ, и҆ чре́во твоѐ простра́ннѣе нб҃съ содѣ́ла. ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, сла́ва тебѣ̀.
Пѣ́снь д҃. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щьсѧ, и҆ сп҃слъ є҆сѝ всего́ мѧ чл҃вѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
Оу҆подо́билсѧ є҆сѝ распе́ншемꙋсѧ во́лею на дре́вѣ хрⷭ҇тꙋ̀ бг҃ꙋ на́шемꙋ, всечⷭ҇тне, сраспе́нсѧ є҆мꙋ̀ всѧ́кимъ воздержа́нїемъ, мл҃твою же и҆ ми́лостынею, и҆ мно́гими добродѣѧ́ньми.
Сѐ да́же до сме́рти, і҆ѡа́нне мч҃ениче, смири́лсѧ є҆сѝ: ст҃ы̑ѧ бо твоѧ̑ мо́щи на мѣ́стѣ въ погребе́нїи стра́нныхъ бы́ша сокровє́ны: сегѡ̀ ра́ди гдⷭ҇ь по все́й вселе́ннѣй тебѐ просла́ви.
Царѧ̀ престꙋ́пника і҆ꙋлїа́на во́инство тлѣ́нное во вла́сти содержа́въ, ѿ тогѡ̀ по́сланъ бы́лъ є҆сѝ ᲂу҆бива́ти хрⷭ҇тѡ́вы мч҃еники. но ты̀, бл҃же́нне, ты̑ѧ хранѧ̀, въ вѣ́рѣ ᲂу҆твержда́лъ є҆сѝ, во є҆́же пѣ́ти: сла́ва си́лѣ твое́й, гдⷭ҇и.
Бг҃оро́диченъ:
Недоꙋме́нїе во сп҃се́нїе предлежи́тъ мѝ, ѿ ѡ҆быше́дшихъ мѧ̀ ѕѡ́лъ, пречⷭ҇таѧ. тѣ́мже и҆зба́ви мѧ̀ ѿ ни́хъ ско́рѡ, бл҃горазꙋ́мїе подаю́щи: къ тебѣ́ бо є҆ди́нѣй прибѣго́хъ, бг҃ома́ти.
И҆́нъ. І҆рмо́съ:
Разꙋмѣ́хъ, всеси́льне, твоѐ смотре́нїе, и҆ со стра́хомъ просла́вихъ тѧ̀, сп҃се.
Ве́лїе твоѐ, гдⷭ҇и, смотре́нїе во все́мъ мі́рѣ, є҆мꙋ́же ᲂу҆се́рднѡ предае́мсѧ, тебѣ̀ со ст҃ы́ми молѧ́щесѧ.
По́двигъ до́бръ, мч҃ениче, во страда́нїи соверши́въ, бл҃горазꙋ́мїемъ во стра́сѣ гдⷭ҇а прославлѧ́ти помозѝ на́мъ.
Братолю́бнѣ въ гоне́нїи лю́демъ бж҃їимъ помога́лъ є҆сѝ, стра́хъ ѿве́ргїй мꙋчи́телей, і҆ѡа́нне: стра́хъ напа́стей ѿве́ржи ѿ на́съ.
Бг҃оро́диченъ:
Всеси́льнагѡ цр҃ѧ̀ цр҃и́ца и҆ мт҃и сподо́биласѧ є҆сѝ бы́ти: сподо́би ны̀ сла́вити є҆гѡ̀ къ на́мъ въ млⷭ҇ти смотре́нїе.
Пѣ́снь є҃. І҆рмо́съ:
Свѣ́та пода́телю и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бг҃а не зна́емъ.
Та́инъ бжⷭ҇твенныхъ вкꙋси́въ въ ра́зꙋмѣ, і҆ѡа́нне, про́повѣдь бж҃їѧ рожде́нїѧ и҆сповѣ́далъ є҆сѝ, гл҃го́лѧ пред̾ всѣ́ми: и҆но́гѡ бг҃а ра́звѣ всетворца̀ не зна́ю.
Возлюби́вшаго гдⷭ҇а люби́те, возгл҃го́лалъ є҆сѝ, страстоте́рпче, стра́ждꙋщымъ мч҃еникѡмъ, въ є҆гѡ́же любвѝ ᲂу҆тверди́всѧ, ѡ҆богати́лсѧ є҆сѝ чꙋдесы̀, врачꙋ́ѧ болѣ̑зни мнѡ́гїѧ.
Сла́вꙋ мі́ра сегѡ̀ ни во что́же, бг҃омꙋ́дре во́ине, вмѣни́лъ є҆сѝ, сла́вы ра́ди хрⷭ҇то́вы: тѣ́мже страда́льчество соверши́въ и҆ сла́вы бжⷭ҇твенныѧ сподо́бивсѧ, на́мъ полꙋчи́ти ѻ҆́нꙋю моли́сѧ.
Бг҃оро́диченъ:
Тѧ̀, влⷣчце, мо́лимъ, сла́вѧще твоѐ ѡ҆ на́съ милосе́рдїе: всѧ́кихъ ны̀ скорбе́й, мр҃і́е, свободѝ, и҆ помозѝ ᲂу҆́треневати на́мъ къ бг҃ꙋ и҆ вѣ́чнагѡ бл҃же́нства сподо́битисѧ.
И҆́нъ. І҆рмо́съ:
Ѿ но́щи невѣдѣ́нїѧ просвѣще́й концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.
Чл҃вѣколю́бче влⷣко, просвѣща́й ны̀ въ па́мѧти моле́бнѣй страда́льца твоегѡ̀, ᲂу҆́треневати къ тебѣ̀ бл҃гоговѣ́инствомъ.
Просвѣти́лсѧ є҆сѝ, мч҃ениче і҆ѡа́нне, бг҃одарова́нными чꙋдесы̀: тѣ́мъ ѿ ѕлы́хъ чл҃вѣ̑къ, тщеты̀ и҆ болѣ̑зни, сла́вѧщыѧ тѧ̀ премѣнѝ.
Свѣтоно́снымъ ᲂу҆́тромъ, побѣжда́ѧ всѧ̑ дꙋшетли́тєльныѧ[[Исправлена опечатка оригинала: дꙋшетлитє́льныѧ. Прим. orthlib]] врагѝ до́блественнѣ, ѿ ско́рбныхъ тьмы̀ страсте́й во свѣ́тъ ра́дости привлецы́ ны.
Бг҃оро́диченъ:
Ꙗ҆́же бг҃а во пло́ти на́шей родила̀ є҆сѝ, дв҃о пречⷭ҇таѧ, свѣ́томъ нбⷭ҇нымъ ѡ҆сїѧ́тисѧ на́мъ є҆мꙋ̀ моли́сѧ, млⷭ҇ть ко всѣ̑мъ простира́ющи.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неислѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Си́лою бж҃їею ᲂу҆крѣпи́всѧ, мч҃еникѡвъ сла́во і҆ѡа́нне, преще́нїй нечести́выхъ небре́глъ є҆сѝ: ны́нѣ же зрѧ̀ ра́достнѣ бг҃а, ѿ ѕлы́хъ на́съ и҆зба́ви.
Мл҃твами и҆ посто́мъ и҆ въ цѣломꙋ́дрїи всѧ́кимъ воздержа́нїемъ бг҃ꙋ ᲂу҆годи́лъ є҆сѝ, всечⷭ҇тне: свы́ше назира́ѧ, свобожда́й ны̀ ѿ ско́рби.
Проси̑маѧ чествꙋ́ющымъ тѧ̀ вѣ́рнѡ, бл҃же́нне, подае́ши, ѕла̑ѧ чл҃вѣ́ки ѡ҆блича́ѧ, ѡ҆ ка́ющихсѧ же бг҃ꙋ молѧ́сѧ.
Бг҃оро́диченъ:
Оу҆врачꙋ́й, бцⷣе, стра́сти дꙋ́шъ и҆ тѣле́съ на́шихъ, врача̀ хрⷭ҇та̀ на́мъ поро́ждши, и҆ вра́жїе ѕлокова́рство посрамѝ милосе́рдїемъ твои́мъ.
И҆́нъ. І҆рмо́съ:
Со і҆ѡ́ною вопїе́мъ тѝ, гдⷭ҇и, со гла́сомъ хвале́нїѧ молѧ́щесѧ: возведѝ ѿ тлѝ живо́тъ на́шъ.
Не преста́немъ моли́ти тѧ̀ всеще́драго гдⷭ҇а, подви́жꙋще съ на́ми вѣ́рнаго во́ина: и҆з̾има́ѧ ѿ грѣ̑хъ, всели́ ны въ нбⷭ҇нꙋю жи́знь.
Хва́лиши, ст҃е і҆ѡа́нне, въ вы́шнихъ бг҃а, вѣ́рнѡ здѣ̀ слꙋжи́въ є҆мꙋ̀: ѿню́дꙋже прибли́жисѧ и҆ на́мъ тѧ̀ хва́лѧщымъ во сп҃се́нїе.
Стра̑сти хрⷭ҇та̀ ра́ди терпѣ́въ, всехва́льне, всера́достное бл҃же́нство полꙋчи́лъ є҆сѝ: тѣ́мже и҆ на́шѧ мѡльбы̀ прїимѝ, и҆ введи́ ны въ ра́дость.
Бг҃оро́диченъ:
Пречⷭ҇таѧ дв҃о, ѿ тлѣ́нїѧ пагꙋбоно́снагѡ мі́ръ сп҃сшаѧ, ѿ всѧ́кагѡ ѕла́гѡ ѡ҆бстоѧ́нїѧ на́съ и҆зба́ви.
Конда́къ, гла́съ ѕ҃:
Бл҃гочести́ваго во́ина хрⷭ҇то́ва, побѣди́вшаго врагѝ дꙋшє́вныѧ и҆ тѣлє́сныѧ бг҃омꙋ́дреннѡ, і҆ѡа́нна мч҃еника достодо́лжнѡ пѣ́сньми восхва́лимъ: чꙋдодѣ́йствꙋѧ бо подае́тъ ѡ҆би́льнаѧ и҆сцѣлє́нїѧ стра́ждꙋщымъ лю́демъ, и҆ мо́литсѧ гдⷭ҇ꙋ бг҃ꙋ ѿ всѧ́кихъ бѣ́дъ сп҃стѝ правовѣ̑рныѧ.
І҆́косъ:
Кто̀ по́двиги твоѧ̑ и҆ страда̑нїѧ ра́ди вѣ́ры въ гдⷭ҇а і҆и҃са и҆зрещѝ возмо́жетъ, прехва́льне і҆ѡа́нне; и҆лѝ кі́ими тѧ̀ ᲂу҆вѣнча́емъ похвала́ми, ра́ди мꙋ́жественнагѡ твоегѡ̀ въ зако́нѣ гдⷭ҇ни и҆ во и҆́стиннѣмъ бл҃гоче́стїи стоѧ́нїѧ; попра́лъ бо є҆сѝ всѧ̑ кѡ́зни дꙋшетли́телѧ врага̀, цѣломꙋ́дрїемъ и҆ всѧ́кими добротворє́нїи воѻрꙋжи́всѧ: бога́тство и҆ сла́вꙋ и҆ по́хоть вре́днꙋю возненави́дѣвъ, нищетꙋ̀ и҆ поноше́нїе хрⷭ҇то́во возлюби́лъ є҆сѝ, стра́ждꙋщымъ въ ско́рбехъ помога́ѧ: тѣ́мже всели́всѧ въ нбⷭ҇ныѧ кро́вы, дарова́ньми пресла́вныхъ чꙋде́съ ѡ҆богати́лсѧ є҆сѝ. ѿтꙋ́дꙋ ᲂу҆̀бо, бл҃же́нне, всѧ̑ притека́ющыѧ къ тебѣ̀ назира́й, пѡ́мощи творѧ̀, во є҆́же ѿ всѧ́кихъ бѣ́дъ сп҃стѝ правовѣ̑рныѧ.
Пѣ́снь з҃. І҆рмо́съ:
Ѻ҆́бразꙋ злато́мꙋ на по́ли деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Безбо́жное мꙋчи́телѧ законопрестꙋ́пнагѡ велѣ́нїе, страстоте́рпче і҆ѡа́нне, преѻби́дѣвъ, бг҃очести́въ всемогꙋ́щагѡ цр҃ѧ̀ во́инъ показа́лсѧ є҆сѝ, бл҃года́тнѣ же ѡ҆роша́емь, съ людьмѝ бж҃їими пѣ́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.
Сла́дкое и҆ вели́кое и҆ ра́достное торжество̀ ны́нѣ лю́ди гдⷭ҇ни ѡ҆блиста̀, є҆́же мч҃еникѡвъ до́блѣйшїй цѣломꙋ́дрый і҆ѡа́ннъ воѻбразѝ. то́читъ бо цѣльбы̑ молѧ́щымсѧ вѣ́рнѡ гдⷭ҇ꙋ, и҆̀же взыва́ютъ: бл҃гослове́нъ є҆сѝ, бж҃е ѻ҆тє́цъ на́шихъ.
Дерзнове́нїе и҆мѣ́ѧ ко влⷣцѣ всѣ́хъ, ст҃е і҆ѡа́нне, ꙗ҆́кѡ бли́жнїй ᲂу҆го́дникъ є҆гѡ̀, во ѡ҆бстоѧ́нїи напа́стей на́шихъ предста́тельствꙋй є҆мꙋ̀ ѡ҆ на́съ, и҆ помога́й и҆зба́витисѧ на́мъ ѿ грѣхѡ́въ, да бг҃омꙋ́дреннѡ пое́мъ: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Пресла́вное соверши́сѧ та́инство въ тебѣ̀, бг҃ома́ти: безсѣ́меннѡ бо зачала̀ є҆сѝ сн҃а, бре́мѧ грѣ̑хъ на́шихъ ᲂу҆праздни́вшаго. тѣ́мже ᲂу҆пова́нїе на тѧ̀ и҆мꙋ́ще и҆ твою̀ по́мощь зрѧ́ще, ᲂу҆се́рднѡ вопїе́мъ: бл҃гослове́на є҆сѝ, дв҃о влⷣчце.
И҆́нъ. І҆рмо́съ:
Всѧ̑ дѣла̀ твоѧ̑ и҆́стинна, и҆ пра́ви пꙋтїѐ твоѝ, бж҃е ѻ҆тє́цъ на́шихъ.
Безме́здный врачꙋ̀ і҆ѡа́нне, и҆сцѣли́ мл҃твами твои́ми недꙋ́ги и҆ стра̑сти дꙋ́шъ и҆ тѣле́съ гдⷭ҇еви вопїю́щихъ: бл҃гослове́нъ є҆сѝ, бж҃е ѻ҆тє́цъ на́шихъ.
Дѣ́ло всѧ́кїѧ добродѣ́тели и҆спра́вилъ є҆сѝ, и҆ же́ртвꙋ тѧ̀ всетворцꙋ̀ возложи́лъ є҆сѝ, вопїѧ̀: бл҃гослове́нъ є҆сѝ бж҃е ѻ҆тє́цъ на́шихъ.
Всебл҃го́мꙋ бг҃ꙋ въ чⷭ҇тотѣ̀ мл҃твою и҆ посто́мъ ᲂу҆гожда́ѧ, мч҃ениче, да́ждь на́мъ бг҃оꙋго́днѣ зва́ти: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Всенепоро́чнаѧ дв҃о, пꙋ́ть и҆ и҆́стинꙋ хрⷭ҇та̀ ро́ждши, рꙋководѝ на́съ въ го́рнюю жи́знь, къ бг҃ꙋ ѻ҆тє́цъ на́шихъ.
Пѣ́снь и҃. І҆рмо́съ:
Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше бж҃їимъ велѣ́нїемъ, халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Вы́шнихъ и҆щѧ́й, на землѝ прє́лести возненави́дѣлъ є҆сѝ, бг҃облаже́нне. тѣ́мже съ мч҃еники хрⷭ҇то́выми въ любвѝ дх҃о́внѣй соедини́всѧ, дерзнове́ннѡ бг҃очеловѣ́ка і҆и҃са проповѣ́далъ є҆сѝ, ѡ҆ не́мже зове́ши: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Неѡскꙋ́днѡ тре́бѡванїѧ подава́ѧ, ни́щымъ бы́лъ є҆сѝ гото́вый пита́тель, во́ине бл҃гочестивомꙋ́дренне і҆ѡа́нне. и҆ ны́нѣ притека́ющыѧ къ тебѣ̀ назира́ѧ, и҆спо́лни тѣ́хъ прошє́нїѧ, да ра́достнѡ зове́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Всезри́тель бг҃ъ, ᲂу҆се́рдїе твоѐ, і҆ѡа́нне, и҆ соверше́ннꙋю вѣ́рꙋ ви́дѣвъ, просла́ви тѧ̀ сла́вою вѣ́чною. є҆го́же молѝ въ по́льзѣ ᲂу҆ще́дрити ны̀ бг҃омꙋ́дреннѡ пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Мр҃і́е бг҃оневѣ́сто, къ тебѣ̀ прибѣга́емъ, и҆ тебѣ̀ припа́дающе мо́лимсѧ: ви́ждь, влⷣчце, ско́рбь на́шꙋ и҆ ѡ҆ѕлобле́нїе ѿ вра̑гъ на́шихъ, и҆ ᲂу҆мирѝ жи́знь всѣ́хъ на́съ, миротво́рца поро́ждши гдⷭ҇а, є҆го́же бл҃гослови́мъ во вѣ́ки.
И҆́нъ. І҆рмо́съ:
Цр҃ѧ̀ сла́вы и҆ побѣди́телѧ сме́рти, і҆и҃са назѡре́а, того̀ превозноси́те во всѧ̑ вѣ́ки.
Цр҃ю̀ нбⷭ҇ный, побѣ́дꙋ на си́лꙋ вра́жїю ст҃о́мꙋ твоемꙋ̀ мч҃никꙋ дарова́вый, да́рꙋй и҆ на́мъ во и҆збавле́нїи ѿ нꙋ́ждъ сла́вити тѧ̀ во всѧ̑ вѣ́ки.
Цр҃ѧ̀ гдⷭ҇а ра́достнѡ, бл҃же́нне, въ вы́шнихъ ᲂу҆зрѣ́лъ є҆сѝ: моли́сѧ, да мы̀ чⷭ҇тымъ се́рдцемъ є҆го̀ превозно́симъ во всѧ̑ вѣ́ки.
Царю́ѧй во хрⷭ҇тѣ̀ во́ине, всѧ̑ ва́рвары побѣдѝ, и҆ ѕлоко́знєнныѧ разорѝ на на́съ совѣ́ты, да превозно́симъ гдⷭ҇а во всѧ̑ вѣ́ки.
Бг҃оро́диченъ:
Цр҃и́це всемо́щнаѧ, цр҃ѧ̀ и҆ бг҃а ма́терски молѝ, да вездѣ̀ є҆го̀ превозно́симъ, и҆ тѧ̀ гпⷭ҇жꙋ̀ пое́мъ во всѧ̑ вѣ́ки.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣ́тити, собра́ти расточє́нныѧ: тѣ́мъ всепѣ́тꙋю бцⷣꙋ велича́емъ.
До́бръ ꙗ҆ви́лсѧ є҆сѝ посо́бникъ, пресла́вне, лю́демъ бж҃їимъ, гони̑мыѧ сокрыва́ѧ, и҆ ны́нѣ чꙋде́снѣ помоществꙋ́еши вѣ̑рнымъ: сегѡ̀ ра́ди, въ па́мѧти бл҃годѣѧ́нїй твои́хъ, хрⷭ҇та̀ бг҃а велича́емъ.
Твоѧ̑ чꙋдеса̀, пребл҃же́нне і҆ѡа́нне, во все́мъ мі́рѣ проповѣ́даютсѧ: тѣ́мже и҆ дне́сь собра́вшесѧ, сла́вꙋ возсыла́емъ хрⷭ҇тꙋ̀, тебѐ просла́вльшемꙋ.
На́съ восхвалѧ́ющихъ тѧ̀, мч҃ниче хрⷭ҇то́въ, и҆ твоеѧ̀ по́мощи просѧ́щихъ, дне́сь ᲂу҆слы́ши, и҆ къ полє́знымъ ᲂу҆правлѧ́ти не преста́й, мл҃твенникъ теплѣ́йшїй и҆ хода́тай къ бг҃ꙋ на́шемꙋ ꙗ҆влѧ́ѧсѧ.
И҆зрѧ́денъ вра́чь серде́цъ человѣ́ческихъ чꙋдодѣѧ́ньми ꙗ҆ви́лсѧ є҆сѝ, і҆ѡа́нне, помоществꙋ́ѧ всѣ̑мъ благочєсти́вымъ: тѣ́мъ воспѣва́юще тѧ̀, хрⷭ҇та̀ велича́емъ.
Бг҃оро́диченъ:
Пѣ́ти, дв҃о, тѧ̀ не престае́мъ, помо́щницꙋ, покро́въ, ско́рое застꙋпле́нїе и҆ предста́тельницꙋ на́шꙋ непосты́днꙋю: соблюдѝ твоѧ̑ рабы̀ ѿ всѧ́кагѡ ѡ҆ѕлобле́нїѧ, и҆ ѿ ко́зней лꙋка́вагѡ свобожда́й при́снѡ.
И҆́нъ. І҆рмо́съ:
Слꙋжи́тель безпло́тный предста̀, гл҃го́лѧ бл҃года́тнѣй: гдⷭ҇ь съ тобо́ю. ю҆́же велича́емъ.
Гдⷭ҇и си́лъ, бꙋ́ди съ на́ми, ᲂу҆крѣплѧ́ѧ і҆ера́рхи, і҆ерє́и же и҆ всѧ̑ лю́ди твоѧ̑ мл҃твами ст҃а́гѡ сп҃са́ѧ: да бл҃гоче́стнѡ тѧ̀ и҆ бцⷣꙋ непреста́ннѡ всѝ велича́емъ.
Моли́сѧ, ст҃е і҆ѡа́нне, бг҃ꙋ въ трⷪ҇цѣ, да ᲂу҆досто́итъ вѣ́рꙋющыѧ во и҆́мѧ є҆гѡ̀ бг҃омꙋ́дреннѡ ꙗ҆́кѡ всетворца̀ при́снѡ велича́ти.
Твою̀ па́мѧть соверша́ющыѧ, гдⷭ҇ень ᲂу҆го́дниче, предста́въ ѿ печа́лей свободѝ, и҆ напо́й ра́дости, во є҆́же съ бг҃ома́терїю гдⷭ҇а велича́ти.
Бг҃оро́диченъ:
Ѡ҆бл҃года́тствованнаѧ мр҃і́е, при́зри на всѧ̑ лю́ди твоѧ̑ млⷭ҇тїю, да тѧ̀ безконе́чнѡ въ ра́дости велича́емъ.
Свѣти́ленъ. Подо́бенъ: Со ᲂу҆ченикѝ:
Вѣнцено́сче ст҃е, предстоѧ́й со а҆́гг҃лы хрⷭ҇то́вꙋ престо́лꙋ и҆ свѣ́та ѿтꙋ́дꙋ и҆сполнѧ́ѧйсѧ, страстоте́рпче, ми́ръ мі́рꙋ мл҃твами твои́ми и҆схода́тайствꙋй, и҆ на́мъ сп҃се́нїе, бл҃гоче́стнѡ па́мѧть твою̀ соверша́ющымъ и҆ въ ско́рбехъ притека́ющымъ къ тебѣ̀, і҆ѡа́нне всебога́те.
Сла́ва: Подо́бенъ: Нб҃о ѕвѣзда́ми:
Позна́нїемъ себє̀ сама́гѡ, позна́лъ є҆сѝ всетворѧ́щꙋю винꙋ̀ бг҃а, въ него́же и҆ ᲂу҆вѣ́ровалъ є҆сѝ, и҆ того̀ и҆сповѣ́давъ, просвѣща́ещи мі́ръ чꙋдесы̀, і҆ѡа́нне бг҃облаже́нне.
И҆ ны́нѣ, бг҃оро́диченъ:
Во чре́вѣ твое́мъ гдⷭ҇ь, погиба́ющїй мі́ръ ѿ тлѣ́нїѧ призва́ти восхотѣ́въ, ꙗ҆́коже вѣ́дѧше, всели́сѧ, бцⷣе. сп҃се́нїе ᲂу҆̀бо всѝ ѡ҆брѣ́тше, вопїе́мъ тебѣ̀: ра́дꙋйсѧ, всепѣ́таѧ дв҃о, поро́ждши ра́дость все́й вселе́ннѣй, ѡ҆бра́дꙋй и҆ на́съ, ѿ врагѡ́въ ѕлодѣ́йства хранѧ́щи всегда̀.
На хвали́техъ стїхи̑ры на д҃, гла́съ ѕ҃.
Подо́бенъ: Всю̀ ѿложи́вше:
Страда̑нїѧ ви́дѣвъ добропобѣ́дныхъ мч҃еникѡвъ, дерзнове́нїѧ бжⷭ҇твеннагѡ и҆спо́лнивсѧ, не ᲂу҆боѧ́лсѧ є҆сѝ мꙋчи́телѧ ѕлочести́вагѡ царѧ̀, но со ᲂу҆се́рдїемъ къ ни̑мъ прише́дъ, на по́двигъ ᲂу҆крѣплѧ́лъ є҆сѝ и҆̀хъ: съ ни́миже моли́сѧ гдⷭ҇ꙋ, страда́льче і҆ѡа́нне, сп҃сти́сѧ дꙋша́мъ на́шымъ.
Пло́ть съ кро́вїю па́дающꙋ ви́дѧ мно́гихъ ст҃ы́хъ, ѿ беззако́ннагѡ царѧ̀ і҆ꙋлїа́на стра́ждꙋщихъ за хрⷭ҇та̀ бг҃а на́шего, си̑мъ, бл҃же́нне, во ᲂу҆́захъ и҆ ѕлострада́нїихъ помога́лъ є҆сѝ, бл҃го́ю бесѣ́дою ᲂу҆тѣша́ѧ, да наде́жды бл҃гі́ѧ не ѿпа́даютъ, но да ѡ҆жида́ютъ бꙋ́дꙋщагѡ воздаѧ́нїѧ и҆ вѣнцє́въ нбⷭ҇ныхъ ра́дованїѧ.
Терпѣ́нїемъ твои́мъ, і҆ѡа́нне всехва́льне, мздꙋ̀ стѧжа́лъ є҆сѝ, дꙋ́шꙋ твою̀ всѣ́хъ влⷣцѣ въ рꙋ́цѣ преда́въ, и҆ ѿ негѡ̀ дарова̑нїи чꙋде́съ ѡ҆богати́лсѧ є҆сѝ: молѝ ᲂу҆̀бо хрⷭ҇та̀ бг҃а ѡ҆ чтꙋ́щихъ любо́вїю ст҃ꙋ́ю па́мѧть твою̀.
Зрѣ́ти тѧ̀ сподо́бисѧ жена̀ бл҃гочести́ваѧ, є҆́йже ты̀, страда́льче, ꙗ҆ви́всѧ: повелѣ́лъ є҆сѝ чⷭ҇тны̑ѧ твоѧ̑ мо́щи просла́вити: та́ѧ же съ ра́достїю сїѧ̑ прїе́мши, съ мѵ́рными бл҃гоꙋха̑нїи цр҃кви предложѝ. моли́сѧ, страда́льче, хрⷭ҇тꙋ̀ бг҃ꙋ, и҆ пѣвцє́мъ твои̑мъ пода́ти ве́лїю млⷭ҇ть.
Сла́ва, гла́съ є҃. Подо́бенъ: Вострꙋби́мъ:
Стеце́мсѧ вѣ́рою, и҆ любо́вїю возопїи́мъ пра́зднствєннаѧ и҆ ликꙋ́имъ ра́дꙋющесѧ, въ настоѧ́щее торжество̀ хрⷭ҇то́ва во́ина, і҆ѡа́нна прехва́льнагѡ: правосла́внїи лю́дїе да стекꙋ́тсѧ, и҆ ли́цы а҆рхїере́йстїи да воспою́тъ пѣ́сньми страда́льческое пра́зднество: вѡ́инства а҆́гг҃льскаѧ да веселѧ́тсѧ зрѧ́ще. того́ бо вѣ́мы въ бѣда́хъ предста́телѧ, и҆ ᲂу҆ныва́ющымъ и҆́стинное ра́дованїе, ни́щихъ ѡ҆богати́телѧ, и҆ во всѣ́хъ находѧ́щихъ лю́тыхъ ᲂу҆тѣ́шителѧ, и҆ всѧ̑ вездѣ̀ те́плѣ предварѧ́юща. є҆мꙋ́же ны́нѣ си́це рце́мъ: во́ине хрⷭ҇то́въ і҆ѡа́нне, сп҃сѝ вѣ́рою притека́ющыѧ ко сщ҃е́нномꙋ хра́мꙋ твоемꙋ̀, мл҃твами твои́ми.
И҆ ны́нѣ, бг҃оро́диченъ, гла́съ то́йже:
Вострꙋби́мъ трꙋбо́ю пѣ́сней: прекло́нши бо сѧ свы́ше всецр҃и́ца мт҃и дв҃а, бл҃гослове́ньми вѣнча́етъ воспѣва́ющыѧ ю҆̀. лю́дїе да стекꙋ́тсѧ, и҆ цр҃и́цѣ да воспле́щꙋтъ въ пѣ́снехъ, цр҃ѧ̀ ро́ждшей, и҆́же сме́ртїю пе́рвѣе держи̑мыѧ разрѣши́ти чл҃вѣколю́бнѡ бл҃говолѝ. па́стырїе и҆ ᲂу҆чи́телїе, до́брагѡ па́стырѧ пречⷭ҇тꙋю мт҃рь соше́дшесѧ восхва́лимъ: свѣ́щникъ златоза́рный, свѣтоно́сный ѻ҆́блакъ, нб҃съ простра́ннѣйшꙋю, ѡ҆дꙋшевле́нный кївѡ́тъ, ѻ҆гнезра́чный влⷣчень прⷭ҇то́лъ, маннопрїе́мнꙋю златꙋ́ю ста́мнꙋ, затворе́ннꙋю сло́ва две́рь, всѣ́хъ хрⷭ҇тїа́нъ прибѣ́жище, пѣ́сньми бл҃гоглаго́ливыми похвалѧ́юще си́це рце́мъ: пала́то сло́ва, сподо́би смирє́нныѧ ны̀ нбⷭ҇наго црⷭ҇твїѧ, ничто́же бо невозмо́жно хода́тайствꙋ твоемꙋ̀.
Славосло́вїе вели́кое, и҆ ѿпꙋ́стъ.
На лїтꙋргі́и: Бл҃жє́нна, ѿ канѡ́на а҃-гѡ пѣ́снь г҃-ѧ, на д҃: и҆ в҃-гѡ канѡ́на пѣ́снь ѕ҃-ѧ, на д҃. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й, внегда̀ моли́ти ми сѧ къ тебѣ̀. А҆пⷭ҇лъ къ ри́млѧнѡмъ, зача́ло рѕ҃ї. А҆ллилꙋ́їа, гла́съ д҃: Мнѡ́ги скѡ́рби првⷣнымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. Є҆ѵⷢ҇лїе ѿ матѳе́а, зача́ло ѯ҃ѳ. Прича́стенъ: Въ па́мѧть вѣ́чнꙋю бꙋ́детъ првⷣникъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.