← претходни дан | Минеј — Јул | следећи дан →
28 июля: Апостолов Прохора, Никанора, Тимона и Пармена. Явление иконы Пресвятой Богородицы Смоленской, Одигитрии
Мѣ́сѧца тогѡ́же въ к҃и-й де́нь.
Ст҃ы́хъ а҆пⷭ҇лъ и҆ дїа́конѡвъ, про́хѡра, нїканѡ́ра, ті́мѡна и҆ парме́на.
Въ то́йже де́нь пра́зднꙋемъ ꙗ҆вле́нїе і҆кѡ́ны смоле́нскїѧ, прест҃ы́ѧ влⷣчцы на́шеѧ бцⷣы ѻ҆дїги́трїи.
Слꙋ́жба є҆́й пи́сана по се́й слꙋ́жбѣ.
И҆ свѧти́телѧ пїтѷрі́ма, є҆пⷭ҇кпа тамбо́вскагѡ.
Слꙋ́жба сїѧ̀ пи́сана въ приложе́нїи.
Стїхи̑ры а҆пⷭ҇лѡвъ, гла́съ а҃: Подо́бенъ: Нбⷭ҇ныхъ чинѡ́въ:
И҆збра́нїемъ бж҃їимъ ꙳ предпочто́стесѧ слꙋжи́ти тре́бованїємъ ст҃ы́хъ, ꙳ ꙗ҆́кѡ сꙋ́ще мꙋ́дрости бжⷭ҇твенныѧ и҆спо́лнени, ꙳ и҆ просвѣще́нїѧ и҆ благода́ти сла́внїи. ꙳ и҆ ны́нѣ живетѐ на нб҃сѣ́хъ, ꙳ непреста́ннѡ со а҆́гг҃лы веселѧ́щесѧ.
Свѣ́тлы ꙗ҆́кѡ свѣщы̀ дх҃а благода́тїю, ꙳ показа́вшесѧ мі́рꙋ, ꙳ ра́зꙋма сїѧ́нїе ѡ҆блиста́сте бога́тнѡ, ꙳ и҆ мглꙋ̀ ѕло́бы ᲂу҆ста́висте: и҆ преста́вльшесѧ а҆пⷭ҇ли, ꙳ къ свѣ́тꙋ всели́стесѧ незаходи́момꙋ.
Да восхва́литсѧ нїканѡ́ръ свѧще́ннѣйшїй, ꙳ и҆ парме́на, и҆ ті́мѡнъ, ꙳ и҆ съ ни́ми да почти́тсѧ про́хѡръ бжⷭ҇твенный, ꙳ и҆спо́лнителїе сло́ва повелѣ́нїй, ꙳ и҆ богати́телїе неимꙋ́щихъ, ꙳ и҆ моли́твєнницы къ бг҃ꙋ на́шемꙋ теплѣ́йшїи.
Сла́ва, и҆ ны́нѣ, бг҃оро́диченъ:
Нра́вомъ гнилы́мъ попо́лзсѧ, ни́цъ лежꙋ̀, ꙳ и҆ къ твое́й, дв҃о, притека́ю тишинѣ̀, ꙳ ѿ бꙋ́ри сопроти́вныѧ ꙳ и҆ и҆скꙋше́нїй многоѻбра́зныхъ мѧ̀ и҆зба́ви, ꙳ да пою̀ твою̀ благода́ть непреста́ннѡ, ꙳ бцⷣе мт҃и приснодв҃о.
Крⷭ҇тобг҃оро́диченъ:
Воздви́жена ꙗ҆́кѡ ви́дѣ на крⷭ҇тѣ̀ а҆́гнца, ꙳ непоро́чнаѧ дв҃а, пла́чꙋщи вопїѧ́ше: ꙳ сла́дкое моѐ ча́до, ꙳ что̀ но́вое и҆ пресла́вное видѣ́нїе; ꙳ ка́кѡ содержа́й всѧ́чєскаѧ го́рстїю, ꙳ на дре́вѣ пригвожда́ешисѧ пло́тїю;
Тропа́рь, гла́съ г҃:
А҆пⷭ҇ли ст҃і́и, моли́те ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Канѡ́нъ, є҆гѡ́же краегране́сїе: Пою̀ зари̑ мы́сленнагѡ со́лнца.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
І҆ѡ́сифово:
Прича́стїемъ къ бжⷭ҇твенномꙋ премꙋ́дрїи свѣ́тꙋ бы́вше, ва́шъ свѣтоно́сный и҆ свѣ́тлый пра́здникъ пра́зднꙋющыѧ, страсте́й мглы̀ и҆зба́вите, и҆ просвѣще́нїѧ сподо́бите.
Привлеко́стесѧ сла́дкимъ жела́нїемъ хрⷭ҇то́вымъ, блаже́ннїи, и҆ кра̑снаѧ житїѧ̀ тлѣ́ннагѡ благоче́стнѡ презрѣ́вше, томꙋ̀ послѣ́довасте, наꙋчи́вшесѧ и҆́стиннымъ.
Свѣти́льницы восто́ка ꙗ҆́вльшесѧ свѣтода́тельнагѡ, свѣтонаста̑вницы бы́ша дꙋ́шъ, парме́на же и҆ про́хѡръ, и҆ ті́мѡнъ чꙋ́дный, и҆ нїканѡ́ръ превели́кїй.
Бг҃оро́диченъ:
Шє́ствїѧ бж҃їѧ, всенепоро́чнаѧ, въ тебѣ̀ позна́шасѧ, бы́вшѧ стра́ннымъ ржⷭ҇тво́мъ, несказа́ннымъ соедине́нїемъ. тѣ́мже ꙗ҆́кѡ всѣ́хъ влⷣчцꙋ тва́рей, тѧ̀ прославлѧ́емъ.
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̑, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Ꙗ҆́кѡ сꙋ́ще дꙋхо́внїи ѻ҆́блацы, во́дꙋ и҆́стиннагѡ ра́зꙋма, сꙋ́щымъ на землѝ, сла́внїи, во ѡ҆свѧще́нїе и҆ска́пасте.
Дх҃а и҆збра́нїемъ, ꙗ҆́кѡ и҆спо́лнени тогѡ̀ бл҃года́ти, слꙋжи́ти премꙋ́дрїи, потре́бамъ ст҃ы́хъ ᲂу҆чине́ни бы́сте. восхва́лимъ парме́на сла́внаго, и҆ мꙋ́драго ті́мѡна, и҆ честна́го про́хѡра, и҆ высо́каго ᲂу҆мо́мъ нїканѡ́ра.
Бг҃оро́диченъ:
И҆ска́пающаго сла́дость, и҆збавле́нїе ѕлы́хъ, родила̀ є҆сѝ бл҃га́го гдⷭ҇а, чⷭ҇таѧ дв҃о всенепоро́чнаѧ.
Сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:
Бжⷭ҇твєнныѧ трꙋбы̑ и҆́стины, сосꙋ́ди честні́и благоче́стїѧ, наста̑вницы блꙋдѧ́щихъ спасе́ннїи ꙗ҆́вльшесѧ, гдⷭ҇ни а҆пⷭ҇ли, ра́дꙋйтесѧ, и҆ моли́те хрⷭ҇та̀ бг҃а, просѧ́ще дарова́ти на́мъ ве́лїю ми́лость.
Сла́ва, и҆ ны́нѣ, бг҃оро́диченъ:
Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀, сохрани́въ всенепоро́чнꙋ, є҆ди́нъ гдⷭ҇ь: того̀ прилѣ́жнѡ молѝ, дарова́ти на́мъ ве́лїю ми́лость.
Крⷭ҇тобг҃оро́диченъ:
Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена, и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Возсїѧ́вши на высотѣ̀ цр҃ко́внѣй, ꙗ҆́коже ѕвѣ́зды незаходи́мы, ѕлоче́стїѧ ѡ҆мраче́нїе разори́ша, и҆ мі́ръ просвѣти́ша благодѣ́телѧ а҆пⷭ҇ли.
Слꙋжа́й по благода́ти є҆ѵⷢ҇лїю, нїкомиді́и бы́лъ є҆сѝ, про́хѡре преблаже́нне, и҆зрѧ́денъ ᲂу҆чи́тель, и҆ бжⷭ҇твенный первопресто́льникъ, ста́дꙋ хрⷭ҇то́вꙋ предста́тельствꙋѧ.
Че́сть бжⷭ҇твеннꙋ наслѣ́довалъ є҆сѝ, нїканѡ́ре блаже́нне, заколе́нъ бы́въ ꙗ҆́кѡ ѻ҆вча̀, со двѣма̀ ты́сѧщами на хрⷭ҇та̀ ᲂу҆пова́ющими, въ ѻ҆́ньже сконча́сѧ де́нь стефа́нъ первострада́лецъ.
Бг҃оро́диченъ:
Неискꙋсобра́чнѡ родила̀ є҆сѝ бг҃а сло́ва, вопло́щшасѧ, пречⷭ҇таѧ, па́че ᲂу҆ма̀ и҆ сло́ва: тѣ́мже по до́лгꙋ тѧ̀, дв҃о, сла́вимъ, и҆ досто́йнѡ ᲂу҆блажа́емъ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Ты̀, гдⷭ҇и, твоѧ̀ ᲂу҆ченикѝ, ꙗ҆́коже трꙋбы̑ посла́лъ є҆сѝ, возставлѧ́ющыѧ ѿ гробѡ́въ пре́лести дꙋ́шы пѣсносло́вѧщыѧ тѧ̀.
Ті́мѡнъ свѧще́нный, па́стырь во́стрѧнѡмъ бы́въ, прїѧ́тъ мꙋче́нїѧ блаже́ннꙋю кончи́нꙋ, ѻ҆гне́мъ сожига́емь.
Вели́кїй парме́на предъ ѻ҆чи́ма а҆пⷭ҇лѡвъ ᲂу҆́спе, соверши́въ со тща́нїемъ те́плымъ бжⷭ҇твенное слꙋже́нїе.
Бг҃оро́диченъ:
Пое́мъ тѧ̀, є҆́юже тлѝ и҆зба́вихомсѧ, всенепоро́чнаѧ, и҆ а҆́да, и҆ пе́рвыѧ мꙋ́чащїѧ[[Исправлена опечатка оригинала: мꙋча́щїѧ. Прим. orthlib]] ѕло́бы льсти́вагѡ.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Нїканѡ́ръ, жи́знь возвѣща́ѧ бꙋ́дꙋщꙋю, и҆ крⷭ҇тъ и҆ стра̑сти, за милосе́рдїе пло́тїю пострада́вшагѡ, ᲂу҆мерщвлѧ́етсѧ, і҆ꙋде́йскими рꙋка́ми ᲂу҆бива́емь.
Вели́кїй вжига́емь ті́мѡнъ жела́нїемъ гдⷭ҇ни любвѐ, повелѣ́ньми беззакѡ́нникъ, посредѣ̀ ѻ҆гнѧ̀ скончава́етсѧ, всесожже́нїе бжⷭ҇твенно бы́въ.
Бжⷭ҇твеннаѧ и҆ свѣтоно́снаѧ, и҆ благода́ти и҆спо́лненна ва́ша, а҆пⷭ҇ли, па́мѧть ѡ҆свѧща́етъ всѣ́хъ мы̑сли, вѣ́рою творѧ́щихъ сїю̀, блаже́ннїи.
Бг҃оро́диченъ:
Чи́ни тѧ̀ безпло́тныхъ а҆́гг҃лъ почита́ютъ, и҆ а҆пⷭ҇льстїи ли́цы, и҆ мч҃никъ собо́ри, бг҃ороди́тельнице: и҆́бо всѣ́хъ цр҃ѧ̀ несказа́ннѡ родила̀ є҆сѝ.
Конда́къ, гла́съ а҃. Подо́бенъ: Оу҆тро́бꙋ дв҃и́чꙋ:
Дїа́кони честні́и, и҆ самови́дцы сло́ва, и҆ сосꙋ́ди и҆збра́ннїи ꙗ҆ви́стесѧ вѣ́ры, нїканѡ́ръ, про́хѡръ, парме́на и҆ ті́мѡнъ, сла́внїи: тѣ́мже дне́сь свѧще́ннꙋю па́мѧть ва́шꙋ пра́зднꙋемъ, въ весе́лїи се́рдца ва́съ ᲂу҆блажа́юще.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Все́ю мы́слїю хрⷭ҇та̀ возлюби́вше, є҆ди́наго въ добро́тѣ сꙋ́щаго, ꙗ҆́кѡ вои́стиннꙋ пресла́внїи, лꙋ́чшїй жре́бїй прїѧ́сте ца́рствїе нбⷭ҇ное.
Ѿ сло́ва и҆зъ дв҃ы возсїѧ́вшагѡ на́мъ, сло́вомъ почте́ни бы́вше, дѣ́лы же свѧще́нными, вѣ́рныхъ спаси́тели ꙗ҆ви́стесѧ, си́хъ претворѧ́юще безслове́сїе, бг҃облаже́ннїи.
Пострада́лъ є҆сѝ стра́ннѡ бл҃же́нне, нїканѡ́ре, посѣка́емь, нра́вомъ ѕлочести́выхъ є҆вре́євъ, и҆ хрⷭ҇тꙋ̀ ꙗ҆́кѡ а҆́гнѧ приводи́мь, бл҃гослове́нъ є҆сѝ въ хра́мѣ, вопїѧ̀, сла́вы твоеѧ̀, гдⷭ҇и.
Бг҃оро́диченъ:
Сло́вомъ сло́во ѻ҆́ч҃ее, ѻ҆трокови́це, родила̀ є҆сѝ, сло́вомъ нб҃о сотво́ршаго и҆ зе́млю: и҆ сла́виши сего̀ пречⷭ҇таѧ, сло́во подаю́щаго, чи́стѡ въ него̀ ны́нѣ вѣ́рꙋющымъ.
Пѣ́снь и҃. І҆рмо́съ:
Рꙋ́цѣ распросте́ръ, данїи́лъ львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Ѿ ка́ла страсте́й и҆зба́висте и҆ сꙋ́етства, повинꙋ́ющыѧсѧ ва́шымъ ᲂу҆че́нїємъ, премꙋ́дрїи: и҆ къ высотѣ̀ си́хъ ра́зꙋма возведо́сте, бг҃ꙋ ᲂу҆годи́вшыѧ до́брѣ, и҆ вопїю́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Бжⷭ҇твенный да почти́тсѧ парме́нъ бжⷭ҇твенными пѣ́сньми, вкꙋ́пѣ съ ті́мѡномъ, и҆ всехва́льный про́хѡръ, и҆ нїканѡ́ръ чꙋ́дный, ꙗ҆́кѡ ᲂу҆ч҃ницы̀ і҆и҃совы, и҆ богати́телїе ꙗ҆зы́кѡвъ, вопїю́щихъ, благослови́те, всѧ̑ дѣла̀ гдⷭ҇нѧ, гдⷭ҇а.
Ва́съ съ петро́мъ, и҆ про́чихъ лꙋ́чшихъ гдⷭ҇ь ᲂу҆ч҃никѝ прїѧ́тъ: причте́ни ᲂу҆́бѡ сла́внїи, къ наречє́ннымъ седми́десѧтимъ, и҆збра́нныхъ же до́брѣ, ꙗ҆́кѡ и҆спо́лнени сꙋ́ще вѣ́ры, ст҃ы̑мъ слꙋжи́ти потре́бамъ, прехва́льнїи.
Бг҃оро́диченъ:
Сѐ бг҃оглаго́ливыхъ гла́сы коне́цъ прїѧ́ша, поро́ждши тебѐ пресꙋ́щнаго гдⷭ҇а, ѿ ѻ҆́ныхъ ꙗ҆влѧ́емаго, во спасе́нїе вѣ̑рнымъ, бг҃ора́дованнаѧ, вопїю́щымъ: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣѣ велича́емъ.
Ꙗ҆ви́стесѧ сосꙋ́ди сло́ва, всю̀ вмѣсти́вше зарю̀, лꙋ́чшїи честны́хъ слꙋжи́телей, ст҃ы́хъ потре́бамъ послꙋжи́вше, и҆ со сло́вомъ премꙋ́дрїи, сла́вы неизрече́нныѧ наслажда́ющесѧ.
Дне́сь всѧ̀ тва́рь ва́шꙋ па́мѧть пра́зднꙋетъ, ті́мѡне, парме́не и҆ нїканѡ́ре съ про́хѡромъ бг҃опроповѣ́дникомъ, досто́йнѡ ᲂу҆блажа́юще ва́съ, бг҃ови́дцы и҆ преблаже́ннїи.
Взѧ́стесѧ къ вели́цѣй сла́вѣ, ꙗ҆́кѡ ᲂу҆ч҃ницы̀ бж҃їѧ сло́ва, и҆ со а҆пⷭ҇льскими ли́ки и҆ безпло́тныхъ ны́нѣ ра́дꙋетесѧ. съ ни́ми при́снѡ моли́те, поми́ловатисѧ на́мъ, сла́внїи.
Бг҃оро́диченъ:
Гла́съ тебѣ̀ вопїе́мъ, дв҃о, ра́достнѡ а҆рха́гг҃ловъ: ра́дꙋйсѧ, ра́досте а҆́гг҃лѡвъ, а҆пⷭ҇лѡвъ честносло́вїе, и҆ проро́кѡвъ проповѣ́данїе, и҆ мꙋ́ченикѡвъ вѣнча́нїе.
Слꙋ́жба ꙗ҆вле́нїю чꙋдотво́рныѧ і҆кѡ́ны смоле́нскїѧ, прест҃ы́ѧ влⷣчцы на́шеѧ бцⷣы и҆ приснодв҃ы марі́и, честна́гѡ и҆ сла́внагѡ є҆ѧ̀ ѻ҆дїги́трїа.
Стїхи̑ры, гла́съ в҃. Самогла́сны:
Злата́ѧ кади́льнице, рꙋ́чко и҆ же́зле, и҆ свѣти́льниче свѣтоза́рный, сви́тче бжⷭ҇твенный, въ не́мже пе́рстомъ бж҃їимъ написа́сѧ сло́во, спасѝ на́съ, тебѐ велича́ющихъ.
Да́рꙋй на́мъ по́мощь, бцⷣе, на тѧ̀ надѣ́ющымсѧ, вѣ́рныхъ прибѣ́жище. и҆зба́ви ѿ бѣ́дъ рабы̑ твоѧ̑, дв҃о: на тѧ́ бо по бз҃ѣ ᲂу҆пова́нїе возлага́емъ.
Влⷣчце, мт҃и и҆зба́вителѧ, прїимѝ моле́нїе рабѡ́въ твои́хъ, а҆́ще и҆ недосто́йнѣ молѧ́щихсѧ тебѣ̀, да мо́лишисѧ за ны̀ къ ро́ждшемꙋсѧ и҆зъ тебє̀, влⷣчце мі́ра, бꙋ́ди на́мъ и҆зба́вительница.
Сла́ва, гла́съ ѕ҃:
Є҆́же ра́дость а҆́гг҃лѡмъ прїи́мшаѧ, и҆ ро́ждшаѧ зижди́телѧ твоего̀, дв҃о, спаса́й тѧ̀ велича́ющыѧ.
И҆ ны́нѣ, гла́съ и҃:
Влⷣчце, прїимѝ моли́твꙋ ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли, тебѐ велича́ющыѧ.
Вхо́дъ. Прокі́менъ днѐ. Чтє́нїѧ г҃, пи́саны сегѡ̀ мцⷭ҇а во и҃ де́нь.
На лїті́и стїхи̑ры, гла́съ и҃:
И҆́же на херꙋві́мѣхъ ѣ҆́здѧй, и҆ пѣва́емый ѿ серафі̑мъ, сше́лъ є҆сѝ съ нб҃сѐ проро́чески, бла́же, и҆ всели́лсѧ є҆сѝ во ᲂу҆тро́бꙋ чⷭ҇тыѧ бг҃оѻтрокови́цы, ю҆́же а҆́гг҃ли воспѣ́ша та́йнѡ: ра́дꙋйсѧ, ра́достнаѧ дв҃о, неѡб̾ѧ́тнаго ꙗ҆́кѡ бг҃а во чре́вѣ свое́мъ прїе́мши па́че сло́ва, ѿ невѣ́рїѧ въ вѣ́рꙋ мі́ра преводѧ́ща. сла́ва тебѣ̀, хрⷭ҇тѐ, є҆ди́не ми́лостиве и҆ чл҃вѣколю́бче.
Гла́съ з҃:
Оу҆красѝ тво́й черто́гъ, чⷭ҇таѧ, и҆ воспрїимѝ цр҃ѧ̀ твоего̀. слы́ши цѣлова́нїе, є҆́же ѿ а҆́гг҃ла, дв҃о. се́ бо престо́лъ херꙋві́мскїй є҆сѝ. сѐ цр҃ѧ̀ всѣ́хъ ты̀ прїѧ́ла є҆сѝ. ѻ҆́блакъ свѣ́та є҆сѝ, бцⷣе, дх҃омъ въ дꙋшѝ лꙋчѝ прїе́мши, ю҆́же возвѣща́етъ велегла́снѡ бжⷭ҇твенный гаврїи́лъ, зовы́й ра́достнѡ: сн҃а вы́шнѧгѡ роди́ши, дх҃а бж҃їѧ ди́внымъ наше́ствїемъ.
Оу҆краси́сѧ, черто́же ст҃ы́й, гаврїи́ле, благовѣствꙋ́й цр҃ѧ̀ хрⷭ҇та̀, цѣлꙋ́й марїа́мъ нбⷭ҇нꙋю две́рь. та́ бо прⷭ҇то́лъ херꙋві́мскїй новотвори́тсѧ, то́й бо ра́дꙋйсѧ, зва́ти досто́итъ. ѻ҆́блакъ свѣ́та зри́тсѧ дв҃аѧ, носѧ́щи хрⷭ҇та̀ сл҃нца сла́вы. є҆го́же дх҃ъ бж҃їй во ᲂу҆тро́бѣ є҆ѧ̀ глаго́ломъ твои́мъ, пресла́вне, вселѧ́етъ, живота̀ и҆ сме́рти и҆ всѣ́хъ влⷣкꙋ.
Возсїѧ́вшаго пре́жде вѣ̑къ ѿ ѻ҆ц҃а̀, напослѣ́докъ же воплоща́ема ѿ мт҃ре неизрече́ннѡ, съ нб҃сѐ гаврїи́лъ къ дв҃ѣй: ра́дꙋйсѧ, чⷭ҇таѧ, зовы́й: ѽ ра́дꙋйсѧ, свѧще́ннаѧ ра́достнаѧ дв҃о, хрⷭ҇та̀ бг҃а во ᲂу҆тро́бѣ свое́й заче́нши. є҆го́же прови́дѧ мѡѷсе́й бг҃ови́децъ на сїна́йстѣй горѣ̀ возра́довасѧ, є҆мꙋ́же сѷмеѡ́нъ зовы́й: се́ бо свѣ́тъ ꙗ҆зы́кѡвъ, се́й і҆и҃лѧ сла́ва и҆ сп҃съ дꙋ́шъ на́шихъ.
Сла́ва, и҆ ны́нѣ, гла́съ и҃:
Бцⷣꙋ марі́ю всѝ воспое́мъ: ра́дꙋйсѧ, мт҃и бж҃їѧ: ра́дꙋйсѧ, лѣ́ствице ѡ҆дꙋшевле́ннаѧ: ра́дꙋйсѧ, кꙋпино̀ неѡпали́маѧ: ра́дꙋйсѧ, ста́мно всезлата́ѧ: ра́дꙋйсѧ, цвѣ́те вѣ́ры: ра́дꙋйсѧ, же́зле прозѧбы́й: ра́дꙋйсѧ, злата́ѧ кади́льнице: ра́дꙋйсѧ горо̀ бж҃їѧ, присѣ́ннаѧ, дв҃о: ра́дꙋйсѧ, разрѣше́нїе клѧ́твы пе́рвыѧ є҆́ѵы: ра́дꙋйсѧ, прⷭ҇то́ле гдⷭ҇ень: ра́дꙋйсѧ, многомоли́твеннаѧ красото̀: ра́дꙋйсѧ, влⷣчце.
На стїхо́внѣ стїхи̑ры, гла́съ в҃. Подо́бенъ: Є҆гда̀ ѿ дре́ва:
Всѣ̑мъ предста́тельствꙋеши, бл҃га́ѧ, прибѣга́ющымъ съ вѣ́рою въ держа́вный тво́й покро́въ: и҆но́гѡ бо не и҆́мамы грѣ́шнїи къ бг҃ꙋ въ бѣда́хъ и҆ ско́рбехъ при́снѡ и҆збавле́нїѧ, ѡ҆бремене́ни грѣхи̑ мно́гими, мт҃и бг҃а вы́шнѧгѡ. тѣ́мже тѝ припа́даемъ, и҆зба́ви ѿ всѧ́кагѡ ѡ҆бстоѧ́нїѧ рабы̑ твоѧ̑.
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Всѣ́хъ скорбѧ́щихъ ра́досте, и҆ ѡ҆би́димыхъ застꙋ́пнице, и҆ а҆́лчꙋщихъ пита́тельнице, стра́нныхъ ᲂу҆тѣше́нїе, ѡ҆бꙋрева́емыхъ приста́нище, больны́хъ посѣще́нїе, немощны́хъ покро́въ и҆ застꙋ́пнице, же́злъ ста́рости, мт҃и бг҃а вы́шнѧгѡ ты̀ є҆сѝ пречⷭ҇таѧ: потщи́сѧ, мо́лимсѧ, спасти́сѧ рабѡ́мъ твои̑мъ.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Ра́дꙋйсѧ, пречⷭ҇таѧ дв҃о: ра́дꙋйсѧ, честны́й ски́птре цр҃ѧ̀ хрⷭ҇та̀: ра́дꙋйсѧ, прозѧ́бшаѧ гро́здъ та́йный: ра́дꙋйсѧ, две́ре нбⷭ҇наѧ, и҆ неѡпали́маѧ кꙋпино̀: ра́дꙋйсѧ, всемі́рный свѣ́те: ра́дꙋйсѧ, всѣ́хъ ра́досте: ра́дꙋйсѧ, вѣ́рныхъ спасе́нїе: ра́дꙋйсѧ, застꙋ́пнице всѣ́хъ хрⷭ҇тїа́нъ и҆ прибѣ́жище, влⷣчце.
Сла́ва, и҆ ны́нѣ, гла́съ и҃:
Ра́дꙋйсѧ, вселе́нныѧ похвало̀: ра́дꙋйсѧ, хра́ме гдⷭ҇ень: ра́дꙋйсѧ, горо̀ приѡсѣне́ннаѧ: ра́дꙋйсѧ, всѣ́хъ прибѣ́жище: ра́дꙋйсѧ, свѣ́щниче златы́й: ра́дꙋйсѧ, сла́во правосла́вныхъ честна́ѧ: ра́дꙋйсѧ, марі́е мт҃и хрⷭ҇та̀ бг҃а: ра́дꙋйсѧ, раю̀: ра́дꙋйсѧ, бжⷭ҇твеннаѧ трапе́зо: ра́дꙋйсѧ, сѣ́не: ра́дꙋйсѧ, рꙋ́чко всезлата́ѧ: ра́дꙋйсѧ, всѣ́хъ ᲂу҆пова́нїе.
На ᲂу҆́трени, на Бг҃ъ гдⷭ҇ь, тропа́рь, гла́съ д҃:
Къ бцⷣѣ прилѣ́жнѡ ны́нѣ притеце́мъ грѣ́шнїи и҆ смире́ннїи, и҆ припаде́мъ, въ покаѧ́нїи зовꙋ́ще и҆зъ глꙋбины̀ дꙋшѝ: влⷣчце, помозѝ, на ны̀ милосе́рдовавши, потщи́сѧ, погиба́емъ ѿ мно́жества прегрѣше́нїй, не ѿвратѝ твоѧ̑ рабы̑ тщы̀, тѧ́ бо и҆ є҆ди́нꙋ наде́ждꙋ и҆́мамы.
Два́жды.
Сла́ва, и҆ ны́нѣ, бг҃оро́диченъ:
Не ᲂу҆молчи́мъ никогда̀, бцⷣе, си̑лы твоѧ̑ глаго́лати недосто́йнїи. а҆́ще бо ты̀ не бы предстоѧ́ла молѧ́щи, кто̀ бы на́съ и҆зба́вилъ ѿ толи́кихъ бѣ́дъ; кто́ же бы сохрани́лъ до ны́нѣ свобо́дны; не ѿстꙋ́пимъ, влⷣчце, ѿ тебє̀: твоѧ̑ бо рабы̑ спаса́еши при́снѡ ѿ всѧ́кихъ лю́тыхъ.
По а҃-й стїхоло́гїи сѣда́ленъ, гла́съ г҃: Подо́бенъ: Красотѣ̀ дѣ́вства:
Лю́дїе благочести́вїи, правовѣ́рнїи собо́ри хрⷭ҇тоимени́тїи пристꙋпи́те вѣ́рнѡ всѝ, бжⷭ҇твенномꙋ припа́дающе бж҃їѧ мт҃ре ѻ҆́бразꙋ, и҆́мже и҆сцѣле́нїе болѧ́щымъ ра́достнѡ подава́етъ, ᲂу҆ѧзвлѧ́етъ же ѕлосла̑вныѧ ꙗ҆́кѡ стрѣла̀ ѿ лꙋ́ка, на́съ всѣ́хъ веселѧ́щи свѣтови́днѡ, и҆ благода́тїю ѡ҆зарѧ́ющи моли́твами свои́ми.
Сла́ва, и҆ ны́нѣ, бг҃оро́диченъ:
Всю́ тѧ бг҃ъ ѡ҆свѧтѝ дв҃ꙋ до́брꙋю, и҆ непоро́чнꙋю въ жена́хъ, прⷪ҇рѡ́ки проѡбрази́въ че́стнѡ, і҆ерє́и бл҃гослови́въ, во ст҃а̑ѧ ст҃ы́хъ вселѝ, а҆́гг҃ломъ воспита́въ, съ нб҃сѐ пи́щꙋ хлѣ́бъ пода́въ: са́мъ же пребл҃гі́й, є҆диноро́дное бг҃ъ сло́во всели́сѧ въ тѧ̀, и҆ пло́тїю про́йде и҆зъ тебє̀. тѣ́мже тѝ покланѧ́емсѧ, и҆ чти́мъ ꙗ҆́кѡ вои́стиннꙋ и҆́стиннꙋю сꙋ́щꙋю бцⷣꙋ.
По в҃-й стїхоло́гїи сѣда́ленъ, гла́съ д҃ Подо́бенъ: Оу҆диви́сѧ:
Да ликовствꙋ́етъ свѣ́тлѡ вѣ́рныхъ всѐ мно́жество, рыда́етъ же де́мѡнское во́инство, ви́дѧще многоиме́ннѡ сїѧ́ющыѧ пра́здники бж҃їѧ мт҃ре, ю҆́же ᲂу҆блажа́емъ ꙗ҆́кѡ бг҃омт҃рь бжⷭ҇твенными пѣ́сньми. и҆дѣ́же бо бг҃опрїѧ́тнѡ сла́витсѧ пребл҃гослове́ннаѧ бцⷣа влⷣчца, бг҃оизбра́ннаѧ ѻ҆трокови́ца, непрїѧ́зни паде́нїе, хрⷭ҇тїа́нъ же крѣ́пкое ᲂу҆твержде́нїе.
Сла́ва, и҆ ны́нѣ:
Ѽ всебл҃гослове́ннаѧ бцⷣе влⷣчце, бг҃оизбра́ннаѧ ѻ҆трокови́це, свѣ́тлое прⷪ҇ро́ческое сбытїѐ, а҆пⷭ҇льскаѧ похвало̀, и҆ мꙋ́ченическое и҆сповѣ́данїе, и҆ вѣ́нче, а҆́гг҃лы что́маѧ, и҆ человѣ́ческими рѡ́ды многопѣ́таѧ, и҆ всегѡ̀ мі́ра вожделѣ́ннаѧ помо́щнице. и҆зба́ви рабы̑ твоѧ̑ ѡ҆сꙋжде́нїѧ бꙋ́дꙋщагѡ, и҆ є҆́зера ѻ҆́гненнагѡ, є҆ди́на бл҃гослове́ннаѧ.
По полѷеле́и сѣда́ленъ, гла́съ а҃. Подо́бенъ: Гро́бъ тво́й:
Правовѣ́рнѡ чтꙋ́щыѧ тѧ̀, и҆ къ тебѣ̀ прибѣга́ющыѧ, і҆кѡ́нѣ твое́й ст҃ѣ́й любе́знѡ покланѧ́ющыѧсѧ, ѽ бж҃їѧ мт҃и, спасѝ, и҆ не да́ждь на́съ въ расхище́нїе сопоста́тѡмъ, нижѐ на́йдꙋтъ на ны̀ всѧ̑ ѕла̑ѧ, ꙗ҆̀же грѣхѝ на́шѧ ᲂу҆гото́ваша на́мъ, ни беззакѡ́нїѧ на̑ша превзы́дꙋтъ главы̑ на́шѧ: но да твоѧ̀ мт҃рнѧѧ къ бг҃ꙋ преѡдолѣ́етъ за ны̀ бг҃опрїѧ́тнаѧ моли́тва.
Сла́ва, и҆ ны́нѣ:
Пречⷭ҇таѧ твоѧ̀ і҆кѡ́на, бцⷣе дв҃о, врачевство̀ всегѡ̀ мі́ра дꙋхо́вное, къ не́йже прибѣга́емъ, тебѣ̀ покланѧ́ющесѧ почита́емъ, и҆ лобыза́емъ ю҆̀, и҆сцѣле́нїй бл҃года́ть почерпа́юще ѿ неѧ̀, и҆ недꙋ́гѡвъ тѣле́сныхъ и҆ дꙋше́вныхъ страсте́й твои́ми моли́твами свобожда́емсѧ.
Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ. Всѧ́кое дыха́нїе: Є҆ѵⷢ҇лїе лꙋкѝ, зача́ло д҃. По н҃-мъ ѱалмѣ̀ стїхи́ра, гла́съ ѕ҃:
Не ввѣ́ри мѧ̀ человѣ́ческомꙋ предста́тельствꙋ, прест҃а́ѧ влⷣчце, но прїимѝ моле́нїе раба̀ твоегѡ̀: ско́рбь бо ѡ҆бдержи́тъ мѧ̀, терпѣ́ти не могꙋ̀ де́мѡнскагѡ стрѣлѧ́нїѧ, покро́ва не и҆́мамъ, нижѐ гдѣ̀ прибѣ́гнꙋ ѻ҆каѧ́нный, всегда̀ побѣжда́емь, и҆ ᲂу҆тѣше́нїѧ не и҆́мамъ ра́звѣ тебє̀, влⷣчце мі́ра, ᲂу҆пова́нїе и҆ предста́тельство вѣ́рныхъ: не пре́зри моле́нїе моѐ, поле́зно сотворѝ.
Канѡ́нъ прест҃ы́ѧ бцⷣы. Творе́нїе мона́ха і҆гна́тїа.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Ра́достнѡ, чⷭ҇таѧ, ны́нѣ наста́вшее хвале́нїе приноша́ю ра́дꙋѧсѧ, и҆ ти́химъ гла́сомъ, ѻ҆дїги́трїе, вопїю́ ти: ра́дꙋйсѧ, и҆ и҆спо́лни мѧ̀ ра́зꙋма пѣ́ти начина́юща.
Хрⷭ҇та̀ роди́вшаѧ, ра́дость на́мъ вѣ́чнꙋю, ѽ ра́дꙋйсѧ, всепѣ́таѧ, правосла̑внымъ наде́жда, ѻ҆дїги́трїе всепѣ́таѧ дв҃и́це: ра́дости и҆спо́лни мѧ̀ мі́рови жела́нныѧ.
Ликꙋ́ютъ всѝ человѣ́цы, и҆ а҆́гг҃ли, всегда̀ согла́снѡ вопїю́ще на небесѝ и҆ на землѝ, ѻ҆дїги́трїе: ра́дꙋйсѧ, дв҃и́це, ра́дости бо ржⷭ҇тво́мъ твои́мъ всѧ́чєскаѧ и҆спо́лнила є҆сѝ.
Ра́дость ѻ҆дїги́трїе, со стра́хомъ тѝ вопїю́щихъ ра́дости сподо́би, мт҃и сꙋ́щїѧ ра́дости, и҆збавлѧ́ющи скорбе́й всѧ́ческихъ, и҆ всѣ́хъ поми́лꙋй къ тебѣ̀ прибѣга́ющихъ.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ, вѣнцє́въ сла́вы сподо́би.
Хрⷭ҇та̀ вы́шнѧгѡ цр҃ѧ̀, ѽ ра́дꙋйсѧ, непоколеби́маѧ чⷭ҇таѧ, и҆ ѡ҆дꙋшевле́ннаѧ пала́то! ра́дꙋйсѧ, ѻ҆дїги́трїе: ра́дꙋйсѧ, тобо́ю нерꙋши́мь на́шъ гра́дъ сохранѧ́етсѧ.
Вмѣсти́ти є҆го́же не возмо́же тва́рь, во ᲂу҆тро́бꙋ неискꙋсобра́чнꙋю, ѻ҆дїги́трїе дв҃и́це, тѣле́снѡ вмѣсти́ла є҆сѝ: тѣ́мже тѝ: ра́дꙋйсѧ, пое́мъ, по до́лгꙋ велича́юще.
Ра́дость многопѣ́таѧ мі́рови, ра́достнѡ тѝ пою́ще при́снѡ, вѣ́чнꙋющїѧ, чⷭ҇таѧ, ра́дости сподоблѧ́емсѧ, твои́ми ма́терними моли́твами къ ро́ждшемꙋсѧ и҆зъ тебє̀, ѻ҆дїги́трїе.
Златꙋ́ю тѧ̀ ста́мнꙋ, и҆ свѣ́щникъ, и҆ же́злъ, и҆ трапе́зꙋ, чⷭ҇таѧ, призыва́емъ, ѻ҆дїги́трїе, и҆ гла́съ є҆́же, ра́дꙋйсѧ, тебѣ̀ при́снѡ привноша́емъ, съ си́миже и҆мены̀.
Конда́къ, гла́съ ѕ҃:
Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебє̀, влⷣчце: ты̀ на́мъ помозѝ, на тебѐ надѣ́емсѧ, и҆ тобо́ю хва́лимсѧ, твои́ бо є҆смы̀ рабѝ, да непостыди́мсѧ.
Сѣда́ленъ, гла́съ в҃:
Моле́нїе те́плое и҆ стѣна̀ неѡбори́маѧ, ми́лости и҆сто́чниче, мі́рови прибѣ́жище, прилѣ́жнѡ вопїе́мъ тѝ: бцⷣе влⷣчце, предварѝ, и҆ ѿ бѣ́дъ и҆зба́ви на́съ, є҆ди́на вско́рѣ предста́тельствꙋющаѧ.
Сла́ва, и҆ ны́нѣ, то́йже.
Пѣ́снь д҃. І҆рмо́съ:
Сѣдѧ́й въ сла́вѣ на престо́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Ра́дꙋйсѧ, чꙋ́до чꙋдесє́мъ, ѻ҆дїги́трїе влⷣчце: ра́дꙋйсѧ, всѣ̑мъ ра́досте, градовѡ́мъ и҆ ве́сємъ непобѣди́мое хрⷭ҇тїа́нское въ бѣда́хъ храни́лище, и҆ предгра́дїе, и҆ на врагѝ побѣжде́нїе.
Ра́дꙋйсѧ, ра́дꙋйсѧ, лю́демъ правосла̑внымъ похвало̀, и҆ хрїстолюби̑вымъ во́инствѡмъ покро́въ пребыва́еши всѣ̑мъ, цр҃и́це: ра́дꙋйсѧ, ѻ҆дїги́трїе, прибѣ́жище всѣ̑мъ на́мъ и҆ ᲂу҆твержде́нїе.
Ра́дꙋйсѧ, всѣ̑мъ ско́рое въ бѣда́хъ и҆збавле́нїе: ра́дꙋйсѧ, гото́вое всѣ̑мъ скорбѧ́щымъ ᲂу҆тѣше́нїе: ра́дꙋйсѧ, всепѣ́таѧ: ра́дꙋйсѧ, ѻ҆дїги́трїе всебл҃гослове́ннаѧ, всѣ̑мъ немощны̑мъ цѣли́тельнице.
Ра́дꙋйсѧ, є҆ѧ́же вели̑чїѧ всѧ̀ тва́рь сла́вити ᲂу҆́бѡ спѣши́тъ по достоѧ́нїю, но не возмога́етъ, ѻ҆дїги́трїе, и҆ сегѡ̀ ра́ди зове́тъ тѝ: ра́дꙋйсѧ, влⷣчце, бг҃овмѣсти́мое жили́ще.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Бл҃госты́ни бе́здно и҆ щедро́тамъ є҆сѝ: ра́дꙋйсѧ, ѻ҆дїги́трїе дв҃и́це: ра́дꙋйсѧ, всѣ̑мъ ра́дость творѧ́щи вѣ̑рнымъ: ѽ ра́дꙋйсѧ, сꙋ́щымъ въ бѣда́хъ, и҆ скорбѧ́щымъ пребы́страѧ застꙋ́пнице!
Ра́дости, ѿ и҆сполне́нїѧ вели̑чїѧ чꙋде́съ твои́хъ зрѧ́ще, и҆сполнѧ́емсѧ всѝ незрѧ́щїи, слы́шаще же вѣ́рнїи. тѣ́мже ра́дꙋйсѧ, тебѣ̀ при́снѡ всю́дꙋ, и҆ всѝ, ѻ҆дїги́трїе, пое́мъ.
Хрⷭ҇та̀ бг҃а на́шегѡ, ѽ ра́дꙋйсѧ, ѻ҆дїги́трїе, жили́ще, и҆ до́мъ неизрече́нныѧ и҆ пребжⷭ҇твенныѧ, дв҃о, сла́вы є҆гѡ̀. ѽ ра́дꙋйсѧ, пала́то преꙋкраше́ннаѧ: ра́дꙋйсѧ, гра́де ѡ҆дꙋшевле́нный, при́снѡ црⷭ҇твꙋющїй.
Ра́дость неѡскꙋ́днꙋю тѧ̀ разсмотрѧ́юще, ꙗ҆́кѡ мо́ре, ѻ҆трокови́це, ѻ҆дїги́трїе дв҃и́це, ра́дꙋющесѧ всѝ, ра́дꙋйсѧ, вопїе́мъ тѝ: и҆ пою́ще, бжⷭ҇твенныхъ дарѡ́въ неви́димѡ при́снѡ ѿ тебє̀ ѡ҆жида́юще.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Хрⷭ҇та̀, чⷭ҇таѧ, прїе́млющи, гла́съ є҆́же ра́дꙋйсѧ, ѻ҆дїги́трїе дв҃и́це слы́шаше: є҆го́же неизрече́ннѡ ро́ждши, ра́дꙋйсѧ, ѿ всѣ́хъ слы́шиши всегда̀.
Ра́дости всѧ̑ и҆спо́лнила є҆сѝ, вы̑шнїѧ и҆ ни̑жнїѧ ты̀ совокꙋпи́ла є҆сѝ, ѻ҆дїги́трїе. тѣ́мже ра́достнѡ, и҆ согла́снѡ ны́нѣ нб҃о и҆ всѧ̀ землѧ̀ зове́тъ тѝ.
Вдова́мъ, ѽ ра́дꙋйсѧ, всепѣ́таѧ, и҆ всѣ̑мъ си̑рымъ ѻ҆дїги́трїе, ᲂу҆тѣше́нїе: ра́дꙋйсѧ, всѣ̑мъ и҆сточа́ющи ни́щымъ бога́тство неистощи́мое.
Зла́та всѧ́кагѡ блиста́ема, и҆ ᲂу҆́тра со́лнечнагѡ свѣтлѣ́йши, жили́ще хрⷭ҇то́во: ра́дꙋйсѧ, ѻ҆дїги́трїе, ра́дꙋйсѧ, дв҃и́це, ра́дꙋйсѧ, невѣ́сто неневѣ́стнаѧ.
Конда́къ, гла́съ ѕ҃:
Предста́тельство хрⷭ҇тїа́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нїй гла́сы: но предварѝ, ꙗ҆́кѡ бл҃га́ѧ, на по́мощь на́съ, вѣ́рнѡ зовꙋ́щихъ тѝ: ᲂу҆скорѝ на моли́твꙋ, и҆ потщи́сѧ на ᲂу҆моле́нїе, предста́тельствꙋющи при́снѡ, бцⷣе, чтꙋ́щихъ тѧ̀.
І҆́косъ:
Прострѝ дла̑ни твоѧ̑, и҆́миже всѣ́хъ влⷣкꙋ ꙗ҆́кѡ млⷣнца прїѧ́ла є҆сѝ, за мно́жество бла́гости: не ѡ҆ста́ви на́съ всегда̀ надѣ́ющихсѧ на тѧ̀, бо́дренною твое́ю моли́твою, и҆ неисче́стною просты́нею ᲂу҆ще́дри на́съ, и҆ пода́ждь дꙋша́мъ на́шымъ милосе́рдїе твоѐ, во вѣ́ки и҆сточа́ющи: тебе́ бо и҆́мамы грѣ́шнїи застꙋ́пницꙋ ѿ находѧ́щихъ на ны̀ бѣ́дъ и҆ ѕѡ́лъ. но, ꙗ҆́кѡ и҆мꙋ́щи милосе́рдїѧ щедрѡ́ты, ᲂу҆скорѝ на моли́твꙋ, и҆ потщи́сѧ на ᲂу҆моле́нїе, предста́тельствꙋющи при́снѡ, бцⷣе, чтꙋ́щихъ тѧ̀.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
Ра́дꙋйсѧ, ра́дꙋйсѧ, бцⷣе ѻ҆дїги́трїе, всѣ́хъ и҆ всегда̀ наставлѧ́ющи вѣ́рныхъ, ше́ствовати ко всѧ́комꙋ пꙋтѝ спаси́тельномꙋ: ра́дꙋйсѧ, влⷣчце, тобо́ю бо при́снѡ и҆збавлѧ́емсѧ настоѧ́щїѧ ва́рварскїѧ бѣды̀.
Ра́дꙋйсѧ, ра́дꙋйсѧ, ѻ҆дїги́трїе, бдѧ́щи и҆ молѧ́щисѧ ѡ҆ на́съ къ бг҃ꙋ, и҆ всѧ́кїѧ ѕло́бы хода́тайствомъ твои́мъ, всѧ́ческихъ скорбе́й, бг҃ороди́тельнице, всѣ́хъ люде́й и҆збавлѧ́ющи.
Ра́дꙋйсѧ, ра́дꙋйсѧ, прест҃а́ѧ ѻ҆дїги́трїе, ꙗ҆́же прошє́нїѧ на̑ша къ по́льзѣ на́мъ и҆сполнѧ́ющи, и҆ хотѧ́щи всѣ̑мъ при́снѡ всегда̀ любодрꙋ́жное благо́е є҆ди́нство, спѣ́шное же во и҆зѧ́щныхъ.
Ра́дꙋйсѧ, ра́дꙋйсѧ, кораблє́мъ, ѻ҆дїги́трїе, нꙋ́жднѡ пла́вающымъ, и҆збавлѧ́ющи вѣ́рныхъ, и҆ всѣ̑мъ и҆збавле́нїе ѿ всѧ́кїѧ ско́рби, и҆ недꙋ́ги пестрѡ́тныѧ и҆ ме́длєнныѧ разрѣша́ющи вско́рѣ.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Ра́дꙋйсѧ, всеблагослове́ннаѧ марі́е, и҆зъ тебє́ бо всебл҃гослове́нный бг҃ъ ѡ҆дѣ́ѧсѧ во всего́ мѧ человѣ́ка, и҆ ѡ҆дѣ́ѧвсѧ соединѝ своемꙋ̀ бж҃ествꙋ̀ неизрече́ннымъ соедине́нїемъ, дв҃о ѻ҆дїги́трїе: ра́дꙋйсѧ, ѡ҆бра́дованнаѧ, ра́досте всегѡ̀ мі́ра.
Ра́дꙋйсѧ, лꙋка́выхъ дꙋхѡ́въ прогони́тельнице: ра́дꙋйсѧ, бцⷣе ѻ҆дїги́трїе: ра́дꙋйсѧ, ꙗ҆́кѡ тебѐ нбⷭ҇наѧ неви̑димаѧ вѡ́инства славосло́вѧтъ всегда̀, и҆ велича́ютъ, ꙗ҆́кѡ мт҃рь бж҃їю бы́вшꙋю: ра́дꙋйсѧ, ꙗ҆́же ни̑жнѧѧ сочта́вши съ вы́шними.
Ра́дꙋйсѧ, всѣ́хъ нбⷭ҇ныхъ си́лъ безъ разсꙋжде́нїѧ превосходѧ́щаѧ: ра́дꙋйсѧ, ѻ҆дїги́трїе: ра́дꙋйсѧ, всѧ́кїѧ тва́ри бг҃а ро́ждшаѧ, гдⷭ҇ьствꙋющи, є҆́й, влⷣчце всепѣ́таѧ: ра́дꙋйсѧ, ꙗ҆́кѡ пребыва́еши дв҃ою, чи́стаѧ, и҆ по ржⷭ҇твѣ̀.
Ра́дꙋйсѧ, жена́мъ всѣ̑мъ сла́во, хра́ме преѡсвѧще́нный бг҃а на́шегѡ: ра́дꙋйсѧ, ѻ҆дїги́трїе: ра́дꙋйсѧ, дꙋшеспаси́тельнаѧ все́й вселе́ннѣй: ра́дꙋйсѧ, покрыва́ющїй ѻ҆́блаче, нб҃съ ши́ршаѧ: ра́дꙋйсѧ, мѷрополо́жнице, бжⷭ҇твеннагѡ мѵ́ра полна̀.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.
Ра́дꙋйсѧ, свѣщѐ, свѣ́тъ невече́рнїй поне́сшаѧ, и҆ въ ржⷭ҇твѣ̀ твое́мъ многобо́жїѧ тмꙋ̀ разрꙋши́вшаѧ, и҆ а҆́довы про́пасти и҆зба́вльшаѧ лю́ди: ра́дꙋйсѧ, ѻ҆дїги́трїе бцⷣе, добро́тъ всѣ́хъ предхода́таице.
Ра́дꙋйсѧ, землѐ, и҆зъ неѧ́же кла́съ прозѧ́бшїй нбⷭ҇ный вѣ̑рнымъ, и҆ мі́ра всегѡ̀ дꙋшегꙋ́бнагѡ гла́да и҆зба́ви, разꙋ́мнаѧ и҆ ѡ҆дꙋшевле́ннаѧ: ѽ ра́дꙋйсѧ, вїногра́де, и҆́же гро́здъ живо́тный ро́ждшаѧ, бцⷣе чⷭ҇таѧ ѻ҆дїги́трїе!
Ра́дꙋйсѧ, та́йныхъ цвѣтѡ́въ прекра́сный сꙋ́щїй раю̀: ра́дꙋйсѧ, мт҃и дв҃о, неви́димыхъ ра́зꙋмъ, чистото́ю страннолѣ́пнѡ побѣ́ждши, бг҃ороди́тельнице: ра́дꙋйсѧ, ѻ҆трокови́це: ра́дꙋйсѧ, ѻ҆дїги́трїе, всемі́рное чꙋ́до и҆ слы́шанїе.
Лѣ́то живота̀ на́шегѡ про́чее сохранѝ неврежде́но, поможе́нїемъ твои́мъ, дв҃о ѻ҆трокови́це, и҆ сподо́би коне́цъ благі́й полꙋчи́ти на́мъ, воспѣва́ющымъ тѧ̀ и҆ взыва́ющымъ: ра́дꙋйсѧ, всеблаже́ннаѧ бцⷣе, чⷭ҇таѧ ѻ҆дїги́трїе.
Свѣти́ленъ.
Да почти́тсѧ всепѣ́таѧ мт҃и бж҃їѧ, жи́знь сꙋ́щꙋю ро́ждшаѧ хрⷭ҇та̀ бг҃а на́шего, ра́йскихъ двере́й ѿверзе́нїе, всегѡ̀ мі́ра ѡ҆чище́нїе, къ животꙋ̀ возведе́нїе. се́й є҆́сть прⷪ҇рѡ́ки глаго́ланный: томꙋ̀ поклони́мсѧ бг҃ꙋ, и҆ сп҃сꙋ дꙋ́шъ на́шихъ.
Сла́ва, и҆ ны́нѣ:
Прїиди́те, вѣ́рнїи съ чи́стою со́вѣстїю, возвели́чимъ мт҃рь бг҃а на́шегѡ, носи́вшꙋю во чре́вѣ бжⷭ҇твеннаго млⷣнца сп҃са хрⷭ҇та̀: къ немꙋ́же мт҃рнее дерзнове́нїе и҆мꙋ́щи, непреста́ннѡ мо́литъ за ны̀, и҆ подае́тъ рабѡ́мъ свои̑мъ бога̑тыѧ ми́лѡсти.
На хвали́техъ стїхи̑ры, на д҃, гла́съ д҃. Подо́бенъ: Ꙗ҆́кѡ до́блѧ:
Наста́вницꙋ тѧ̀ заблꙋ́ждшихъ, ꙳ и҆ приста́нище спаси́тельно ꙳ въ пꙋчи́нѣ, влⷣчце, и҆ въ бꙋ́ри, ꙳ во и҆скꙋше́нїи же и҆ печа́лехъ, ꙳ хрⷭ҇то́съ тѧ̀ всѣ̑мъ показа̀, ꙳ сн҃ъ тво́й и҆ бг҃ъ, ꙳ вѣ́рнѡ приходѧ́щымъ къ тебѣ̀. ꙳ є҆го́же молѝ, ѿ ѕлы́хъ бѣ́дъ и҆зба́витисѧ, ꙳ вѣ́дѧщымъ тѧ̀ бцⷣꙋ, вои́стиннꙋ наста́вницꙋ.
Тлѣ́нїе и҆ болѣ́знь ꙳ потреби́ла є҆сѝ, всепѣ́таѧ, ꙳ дре́внюю всю̀ ржⷭ҇тво́мъ твои́мъ, ꙳ живо́тъ мі́рꙋ ро́ждши, ꙳ сме́рть разрꙋши́вшїй, бѡлѣ́зни, бл҃га́ѧ, и҆сцѣлѧ́еши, ꙳ вѣ́рнѡ тво́й чꙋде́сный ѻ҆́бразъ воспѣва́ющихъ, ꙳ и҆ любо́вїю кла́нѧющихсѧ, ꙳ и҆ чтꙋ́щихъ тѧ̀ чи́стꙋю наста́вницꙋ.
Ꙗ҆́кѡ и҆сто́чника тѧ̀, ꙳ всепѣ́таѧ, живота̀ вѣ́мы, ꙳ и҆ ꙗ҆́кѡ чꙋде́съ тѧ̀ пода́телѧ и҆ цѣле́бъ, ꙳ страсте́й дꙋше́вныхъ же и҆ тѣле́сныхъ, ꙳ ꙗ҆́кѡ ско́рое ѡ҆ставле́нїе, ꙳ ми́лости и҆ щедро́тъ неизчерпа́емое мо́ре вѣ́дѧще, ꙳ тебѣ̀ припа́даемъ всѝ, ꙳ просѧ́ще ѿ ско́рби разрѣше́нїѧ, ꙳ и҆ бꙋ́дꙋщагѡ мꙋче́нїѧ.
Сла́ва, и҆ ны́нѣ, гла́съ и҃:
И҆́же на херꙋві́мѣхъ ѣ҆́здѧй, и҆ пѣва́емый ѿ серафі̑мъ, сше́лъ є҆сѝ съ нб҃сѐ прⷪ҇ро́чески, бл҃же, и҆ всели́лсѧ є҆сѝ во ᲂу҆тро́бꙋ чⷭ҇тыѧ бг҃оѻтрокови́цы, ю҆́же а҆́гг҃ли воспѣ́ша та́йнѡ: ра́дꙋйсѧ, ра́достнаѧ дв҃о, неѡб̾ѧ́тнаго ꙗ҆́кѡ бг҃а во чре́вѣ свое́мъ прїе́мши па́че сло́ва, ѿ невѣ́рїѧ въ вѣ́рꙋ мі́ръ преводѧ́ща. сла́ва тебѣ̀, хрⷭ҇тѐ, є҆ди́не ми́лостиве и҆ чл҃вѣколю́бче.
Славосло́вїе вели́кое и҆ ѿпꙋ́стъ.
На лїтꙋргі́и, бл҃жє́нна ѿ канѡ́на, пѣ́снь г҃ и҆ ѕ҃. И҆ про́чаѧ слꙋ́жба прест҃ы́ѧ бцⷣы.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.