← претходни дан | Минеј — Јул | следећи дан →
25 июля: Успение святой Анны, матери Пресвятой Богородицы. Святых жен Олимпиады и Евпраксии. Преподобного Макария Желтоводского, Унженского
Мѣ́сѧца тогѡ́же въ к҃є-й де́нь.
Оу҆спе́нїе ст҃ы́ѧ а҆́нны, ма́тере ст҃ы́ѧ бцⷣы:
И҆ па́мѧть ст҃ы́хъ же́нъ, ѻ҆лѷмпїа́ды и҆ є҆ѵпраѯі́и.
И҆ прпⷣбнагѡ мака́рїа ᲂу҆́нжескагѡ.
Слꙋ́жба є҆гѡ̀ пи́сана по се́й слꙋ́жбѣ.
Стїхи̑ры ст҃ы́ѧ а҆́нны, гла́съ д҃, на ѕ҃. Подо́бенъ: Да́лъ є҆сѝ зна́менїе:
Зако́ны ѡ҆правда́нїѧ ꙳ соблюда́ющи невреди́мѡ, ꙳ и҆ бг҃ꙋ вседержи́телю непоро́чнѡ рабо́тающи, ꙳ сподо́биласѧ є҆сѝ, а҆́нно, ма́ти бы́ти, ꙳ по пло́ти хрⷭ҇та̀ ро́ждшей, ꙳ чи́стѣй бг҃оѻтрокови́цѣ: ꙳ съ не́юже тѧ̀ ᲂу҆блажа́емъ, ꙳ и҆ ст҃о́е твоѐ ᲂу҆спе́нїе ꙳ ра́достною мы́слїю пра́зднꙋемъ дне́сь.
Жи́зни пала́тꙋ, ꙳ а҆́нно бг҃омꙋ́драѧ, ро́ждши, ꙳ къ жи́зни преста́виласѧ є҆сѝ вои́стиннꙋ нетлѣ́ннѣй, ꙳ и҆ совокꙋплѧ́ешисѧ съ ли́ки пра́ведныхъ, ꙳ пита́ющихъ тѧ̀ бога́тнѡ влⷣчнею ра́достїю: ꙳ тѣ́мже твоѐ преставле́нїе ꙳ соверша́емъ, приснопомина́емаѧ, ꙳ и҆ вѣ́рнѡ почита́емъ ꙳ бг҃омꙋ́дрїи дне́сь.
Две́рь нбⷭ҇нꙋю, ꙳ а҆́нно бг҃омꙋ́драѧ, ро́ждши, ꙳ къ нбⷭ҇номꙋ селе́нїю востекла̀ є҆сѝ, сла́внаѧ, ꙳ и҆ сла́вы бжⷭ҇твенныѧ ны́нѣ наслажда́ешисѧ. є҆́йже и҆ на́съ, честно́е твоѐ ᲂу҆спе́нїе пра́зднꙋющихъ, ꙳ моли́твами твои́ми сподо́би, ꙳ страсте́й мра́къ разорѧ́ющи, и҆ лю́тыхъ ѡ҆бстоѧ́нїй ꙳ мглꙋ̀ ѿгонѧ́щи.
И҆́ны стїхи̑ры, гла́съ а҃. Подо́бенъ: Ѽ ди́внагѡ чꙋдесѐ!
Сѐ свѣтоза́рное торжество̀, и҆ свѣ́тлый де́нь, и҆ мі́рꙋ ра́достный, ᲂу҆спе́нїе честно́е и҆ достохва́льное а҆́нны благосла́вныѧ, и҆зъ неѧ́же роди́сѧ жи́знь ро́ждшаѧ: ѡ҆дꙋшевле́нный кївѡ́тъ, невмѣсти́мое сло́во вмѣсти́вшаѧ, печа́ли разрѣше́нїе, и҆ ра́дости хода́таица, подаю́щаѧ всѣ̑мъ вѣ̑рнымъ ве́лїю ми́лость.
Ѽ пресла́внагѡ чꙋдесѐ! и҆сто́чникъ жи́зни пресла́внѡ ро́ждшаѧ, є҆ди́нꙋ въ жена́хъ бл҃гослове́ннꙋю чⷭ҇тꙋю, преставлѧ́етсѧ ѿ вре́менныѧ жи́зни къ безконе́чнѣй а҆́нна благосла́внаѧ, ѿ землѝ взе́мшисѧ къ нбⷭ҇нымъ, дне́сь сра́доватисѧ а҆́гг҃льскимъ собо́рѡмъ: є҆ѧ́же ны́нѣ свѧто́е пра́зднꙋемъ торжество̀.
Дне́сь свѣ́тлое торжество̀, вѣ́рныхъ ли́цы, ᲂу҆спе́нїе твоѐ честно́е почита́емъ всеблагоговѣ́йнѡ, бжⷭ҇твеннымъ дх҃омъ: наста́ бо на́мъ и҆сцѣле́нїй блиста́ющаѧ благода́ть, и҆ попалѧ́ющаѧ воздꙋ́шныхъ дꙋхѡ́въ лꙋка́выхъ совокꙋплє́нїѧ, и҆ свѣ́томъ наставлѧ́ющаѧ мы̑сли, вѣ́рою воспѣва́ющихъ твоѐ, досточꙋ́днаѧ а҆́нно, честно́е преставле́нїе.
Сла́ва, и҆ ны́нѣ, гла́съ и҃. А҆нато́лїево:
И҆́же ѿ непло́дныхъ чре́слъ, же́злъ ст҃ы́й бцⷣꙋ прозѧ́бшїй, и҆зъ неѧ́же спасе́нїе мі́рꙋ возсїѧ̀ хрⷭ҇то́съ бг҃ъ, сꙋпрꙋ́гъ непоро́чный и҆ дво́ице ст҃а́ѧ і҆ѡакі́мъ и҆ а҆́нна: сі́и бо преста́вльшесѧ къ нбⷭ҇нымъ селе́нїємъ, со дще́рїю свое́ю пречⷭ҇тою дв҃ою, и҆ со а҆́гг҃лы ликꙋ́ютъ, ѡ҆ мі́рѣ моли́твꙋ творѧ́ще. и҆̀хже и҆ мы̀ соше́дшесѧ благоче́стнѡ пою́ще, глаго́лемъ: и҆̀же бг҃оѻтрокови́цы ра́ди, и҆ пречⷭ҇тыѧ марі́и, пра́ѻтцы хрⷭ҇то́вы бы́вше, моли́тесѧ ѡ҆ дꙋша́хъ на́шихъ.
На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:
Ра́дꙋйсѧ, мы́сленнаѧ ла́стовице, ве́снꙋ благода́ти на́мъ возвѣсти́вшаѧ, непоро́чнѡ въ цѣломꙋ́дрїи жи́тельствовавши до́брѣ, и҆ дѣ́вства сокро́вище: че́стнѡ болѣ́зновавшаѧ, непоро́чнꙋю бцⷣꙋ а҆́гнице честна́ѧ, ꙗ҆́же ро́ждшаѧ ю҆́ницꙋ, взе́млющаго а҆́гнца мі́ра прегрѣшє́нїѧ, сло́вомъ сло́во ро́ждшꙋю, є҆ди́нꙋ нескꙋсомꙋ́жнꙋю, а҆́нно, прама́ти гдⷭ҇нѧ, тѧ̀ ѿ землѝ пресе́льшаго. є҆го́же ны́нѣ молѝ, дꙋша́мъ на́шымъ дарова́ти ве́лїю ми́лость.
Сті́хъ: Ра́дꙋйтесѧ, пра́веднїи ѡ҆ гдⷭ҇ѣ:
Ра́дꙋйсѧ, вожделѣ́ннаѧ бг҃ꙋ, и҆збра́ннаѧ свѣ́тлостьми сїѧ́нїй зако́на, дво́ице честна́ѧ, ꙗ҆́же и҆з̾ѧвлє́нїѧ до́брѣ бжⷭ҇твенною благода́тїю предлага́ющаѧ, хрⷭ҇та̀ ро́ждшꙋю нача́льника жи́зни на́шеѧ та̀ роди́вши, і҆ѡакі́мъ бг҃опрїѧ́тный и҆ бжⷭ҇твеннаѧ а҆́нна всечестна́ѧ: свѣти́льницы возсїѧ́вшїи свѣщꙋ̀ безсѣ́ннꙋю, благопра́вѧщїи бл҃года́ть, пречⷭ҇тꙋю бцⷣꙋ. съ не́юже моли́тесѧ, дꙋша́мъ на́шымъ дарова́ти ве́лїю ми́лость.
Сті́хъ: Блаже́ни всѝ боѧ́щїисѧ гдⷭ҇а, ходѧ́щїи въ пꙋте́хъ є҆гѡ̀.
Ра́дꙋйсѧ, благослове́ннаѧ землѐ, ꙗ҆́же бг҃опрозѧ́бшꙋю мі́рови зе́млю процвѣ́тшаѧ, ꙗ҆́же въ зако́нѣ бжⷭ҇твеннѣмъ безпреста́ни поꙋча́ющаѧсѧ, и҆ благода́ть всѣ̑мъ подписа́вшаѧ: сою̑зъ непло́дствїѧ ржⷭ҇тво́мъ свои́мъ и҆збѣ́гшаѧ, и҆ сме́ртїю нетлѣ́нїе воздава́ющаѧ, и҆ къ бжⷭ҇твеннѣй преста́вльшаѧсѧ свѣ́тлости а҆́нна бг҃облаже́ннаѧ, прама́ти хрⷭ҇та̀ бг҃а, ꙗ҆́же свѣтоно́сный свѣти́льникъ бцⷣꙋ ро́ждшаѧ. съ не́ю же и҆спросѝ дꙋша́мъ на́шымъ дарова́ти ве́лїю ми́лость.
Сла́ва, и҆ ны́нѣ, гла́съ и҃:
Прїиди́те, всѧ̀ тва́рь, въ кѷмва́лѣхъ ѱало́мски соше́дшесѧ, восхва́лимъ а҆́ннꙋ бг҃омꙋ́дрꙋю, бж҃е́ственнꙋю го́рꙋ ро́ждшꙋю ѿ ложе́снъ свои́хъ, и҆ къ горѣ̀ мы́сленнѣй и҆ ра̑йскимъ селе́нїємъ дне́сь преминꙋ́вшꙋю, и҆ къ не́й возопїе́мъ: блаже́нное чре́во твоѐ, носи́вшее вои́стиннꙋ свѣ́тъ мі́рови внꙋ́трь во чре́вѣ носи́вшꙋю: и҆ сосца̀ твоѧ̀ кра̑снаѧ, ꙗ҆̀же сса́ше дои́вшаѧ хрⷭ҇та̀, пи́щꙋ жи́зни на́шеѧ: є҆го́же молѝ, и҆зба́вити на́съ ѿ всѧ́кїѧ ско́рби, и҆ прило́га вра́жїѧ, и҆ спастѝ дꙋ́шы на́шѧ.
Тропа́рь, гла́съ д҃:
Жи́знь ро́ждшꙋю во чре́вѣ носи́ла є҆сѝ, чⷭ҇тꙋю бг҃ома́терь, бг҃омꙋ́драѧ а҆́нно. тѣ́мже къ прїѧ́тїю нбⷭ҇номꙋ, и҆дѣ́же веселѧ́щихсѧ жили́ще, въ сла́вѣ ра́дꙋющисѧ ны́нѣ преста́виласѧ є҆сѝ, чтꙋ́щымъ тѧ̀ любо́вїю прегрѣше́нїй просѧ́щи ѡ҆чище́нїе, присноблаже́ннаѧ.
На повече́рїи канѡ́нъ ст҃ы́хъ же́нъ, є҆гѡ́же краегране́сїе:
Честны̑мъ жена́мъ честно́е пою̀ пѣ́нїе.
Гла́съ и҃. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.
І҆ѡ́сифъ:
Плотско́ю не́мощїю си́льнаго врага̀ низложи́сте, и҆ присво́истесѧ къ бг҃ꙋ, прпⷣбныѧ жєны̀, молѧ́щесѧ, си́лꙋ всѣ̑мъ на́мъ пода́ти спаси́тельнꙋю.
Оу҆ѧзви́стесѧ добро́тою женихо́вою, и҆ во слѣ́дъ є҆гѡ̀ прилѣпи́стесѧ ѱало́мски, послѣ́дꙋюще живонѡ́снымъ стопа́мъ є҆гѡ̀: и҆ сегѡ̀ ра́ди низложи́сте врага̀ ѕмі́ѧ.
Оу҆вѧди́вше трꙋды̑ по́стническими тѣлє́сныѧ добрѡ́ты, ᲂу҆краси́сте ва́шѧ дꙋ́шы: и҆ со хрⷭ҇то́мъ женихо́мъ въ черто́ги свѣ́тлыѧ внидо́сте, прпⷣбныѧ.
Бг҃оро́диченъ:
Невѣ́стникъ показа́сѧ свѣтови́дѣнъ ᲂу҆тро́ба твоѧ̀, дв҃о, ми́лости ра́ди тѣле́снѡ и҆зъ тебє̀ воплоти́вшагѡсѧ гдⷭ҇а, и҆ всѧ́чєскаѧ бг҃оразꙋ́мїѧ лꙋча́ми просвѣ́щшагѡ.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Презрѣ́ла є҆сѝ добро́тꙋ тѣле́снꙋю, пречестна́ѧ, и҆ мимогрѧдꙋ́щꙋю сла́вꙋ ꙗ҆́кѡ со́нъ вмѣни́ла є҆сѝ: во смире́нїи же, ѻ҆лѷмпїа́до, и҆ поще́нїи бг҃а взыска́ла є҆сѝ, бг҃облаже́ннаѧ.
Младе́нствꙋющи лѣ́ты, на́съ ра́ди младе́нца сло́ва, на зе́млю, є҆ѵпраѯі́е, прише́дшаго, вѣ́рою возлюби́ла є҆сѝ, и҆ тогѡ̀ ѻ҆́бразꙋ дꙋ́шꙋ свѧза́ла є҆сѝ, непрело́жна пребы́вши.
Ѿверго́стесѧ мі́ра и҆ пло́ти мꙋдрова́нїѧ, воздержа́нїемъ же и҆ трꙋды̑ стѧжа́вше хрⷭ҇та̀ жениха̀ пречⷭ҇таго, черто́гъ нбⷭ҇ный, подаю́щаго ва́мъ бжⷭ҇твенное наслажде́нїе.
Бг҃оро́диченъ:
Свѧще́нныхъ прорѡ́къ свѧщє́нныѧ трꙋбы̑ дре́вле тѧ̀ провозвѣсти́ша: две́рь свѣ́та ро́ждшꙋю и҆ сви́токъ ѡ҆дꙋшевле́нный, на не́мже не рꙋка́ми сло́во написа́сѧ, па́че сло́ва пречⷭ҇таѧ дв҃о.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Страннопрїе́мница ᲂу҆се́рднѣйша была̀ є҆сѝ, собо́ръ свѧще́нныхъ ᲂу҆покоева́ющи, и҆ хрⷭ҇та̀ ѡ҆ се́мъ веселѧ́щи, за милосе́рдїе стра́нна бы́вшаго.
Добро́тꙋ пречⷭ҇тꙋю люби́магѡ ви́диши жениха̀ твоегѡ̀, є҆ѵпраѯі́е, ᲂу҆вѧди́ла є҆сѝ пло́ти добро́тꙋ воздержа́нїемъ.
Дрема́нїе ѿри́нꙋвше ѿ дꙋше́вныхъ вѣ́ждей свѧщє́нныѧ жєны̀, ᲂу҆спи́сте двиза̑нїѧ тѣлє́сныѧ воздержа́нїемъ.
Бг҃оро́диченъ:
Воплоти́вшагосѧ тебѐ, гдⷭ҇и, ѿ пречⷭ҇тыѧ дв҃ы, преподѡ́бныѧ возлюби́вше, въ воню̀ мѵ́ра твоегѡ̀ потеко́ша, твое́ю ᲂу҆ѧзви́вшесѧ бжⷭ҇твенною любо́вїю.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Ѿ и҆сто́чника напаѧ́ема, вселе́ннꙋю всезлаты́ми ᲂу҆че́нїи свѧще́ннагѡ па́стырѧ напои́вшагѡ, кла́сы прозѧбла̀ є҆сѝ до́брыѧ дѣ́тели, ѻ҆лѷмпїа́до, и҆́миже пита́еши сердца̀ на́съ чтꙋ́щихъ тѧ̀.
Блаже́нными наде́ждами твою̀ сла́внꙋю дꙋ́шꙋ ᲂу҆крѣ́пльши, и҆ пи́щею невеще́ственною пита́ема, ᲂу҆ма̀ чистото́ю, де́ньми мно́гими терпѣли́внѡ а҆́лчбꙋ, є҆ѵпраѯі́е, претерпѣ́ла є҆сѝ ра́дꙋющисѧ.
Оу҆мертви́вшесѧ мі́рови, наслѣ́довасте жи́знь безсме́ртнꙋю, и҆ черто́га бжⷭ҇твеннагѡ сподо́бистесѧ, бг҃облажє́нныѧ, свѣщы̀ ва́шѧ по́стническимъ є҆ле́емъ неꙋгаси́мы соблю́дше, всечестны̑ѧ.
Бг҃оро́диченъ:
Бж҃їе бг҃ъ сло́во во ᲂу҆тро́бꙋ неискꙋсобра́чнꙋю во́лею всели́сѧ, и҆ чл҃вѣ́къ ᲂу҆зрѣ́нъ бы́сть, и҆́же дв҃ою соблюды́й тѧ̀, пречⷭ҇таѧ: є҆го́же жела́юще ѻ҆трокови̑цы, по́стнически семꙋ̀ послѣ́доваша житїе́мъ свѣ́тлымъ.
Пѣ́снь ѕ҃. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Ю҆́на сꙋ́щи є҆ѵпраѯі́а, болѣ́зней ᲂу҆се́рдїемъ, благочести́вымъ по́мысломъ, ве́тхаго запина́телѧ попира́ше, въ не́мощи же́нстѣй тѣлесѐ: ᲂу҆твержда́ше бо сїю̀ хрⷭ҇то́съ, и҆́же въ на́шꙋ ѡ҆бо́лксѧ не́мощь.
Воздержа́нїе и҆ смире́нное се́рдце, бдѣ́нїе съ ми́лостынею, ра́зꙋмъ и҆ вѣ́рꙋ пра́вꙋ, и҆ соверше́ннꙋ любо́вь, ѻ҆лѷмпїа́до, стѧжа́вши, сла́внаѧ, была̀ є҆сѝ хра́мъ бж҃їй, и҆ чꙋде́съ и҆сто́чникъ неѡскꙋ́дный.
Оу҆страни́вше себѐ жите́йскихъ сласте́й терпѣ́нїемъ болѣ́зней по́стническихъ, на зе́млю соше́дшаго на́съ ра́ди, и҆ во́лею стра́нствовавша, вы̀ честны̑ѧ: сегѡ̀ ра́ди стѧжа́сте на небесѣ́хъ страннопрїи́мствовавша ва́съ, досточꙋ̑дныѧ.
Бг҃оро́диченъ:
Чистоты́ тѧ, и҆ че́стна дѣ́вства чⷭ҇тый сосꙋ́дъ, ѻ҆трокови́це, содѣ́тель ѡ҆брѣ́тъ, сло́вомъ въ пречⷭ҇тое твоѐ чре́во всели́сѧ, и҆ всю̀ вра́жїю ѿ человѣ̑къ ѕло́бꙋ и҆згна̀.
Сѣда́ленъ, гла́съ и҃. Подо́бенъ: Повелѣ́нное.
Въ моли́твахъ та́йныхъ бдѧ́ще, и҆ насла́ждшесѧ писа́ньми бг҃одохнове́нными, ѻ҆лѷмпїа́да и҆ є҆ѵпраѯі́а сла́внаѧ, на ра́мꙋ гдⷭ҇ень взѧ́ша кре́стъ, и҆ семꙋ̀ послѣ́дꙋюще воздержа́тельнѡ, всю̀ ле́сть ѕмі́ѧ низложи́ша, зовꙋ́ще хрⷭ҇тꙋ̀. женишѐ нбⷭ҇ный, ты̀ бꙋ́ди на́мъ ᲂу҆твержде́нїе.
Пѣ́снь з҃. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
Сла́вꙋ тлѣ́ющꙋю на нетлѣ́ннꙋю премѣни́ша любо́вїю, прпⷣбныѧ, є҆ѧ́же наслажда́ющесѧ при́снѡ, ра́дꙋющесѧ и҆ веселѧ́щесѧ пою́тъ: бл҃гослове́нъ бг҃ъ ѻ҆тє́цъ на́шихъ.
Ѽ ка́кѡ претерпѣ̀ стоѧ́нїе, а҆́лчбꙋ же на днѝ мно́ги, є҆ѵпраѯі́а, хрⷭ҇тꙋ̀ вопїю́щи женихꙋ̀: бл҃гослове́нъ бг҃ъ ѻ҆тє́цъ на́шихъ.
Вели́къ тѧ̀ сосꙋ́дъ ᲂу҆зрѣ́въ бжⷭ҇твеннагѡ дх҃а, ѻ҆лѷмпїа́до, бога́тнѡ вели́кими свои́ми и҆сполнѧ́етъ тѧ̀ ᲂу҆че́нїи въ патрїа́рсѣхъ вели́кїй златосло́въ, блаже́ннаѧ.
Бг҃оро́диченъ:
Разрꙋши́ла є҆сѝ є҆ди́на клѧ́твꙋ прама́тернюю, всѣ́хъ бл҃гослове́нми вѣнча́ющаго хрⷭ҇та̀ ро́ждши, дв҃о, є҆мꙋ́же пое́мъ: гдⷭ҇и бж҃е, бл҃гослове́нъ є҆сѝ во вѣ́ки.
Пѣ́снь и҃. І҆рмо́съ:
Побѣди́тели мꙋчи́телѧ и҆ пла́мене благода́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а.
По́мыслꙋ, дѣ́во, стра̑сти безсловє́сныѧ повинꙋ́ла є҆сѝ, и҆ женихꙋ̀ сло́вꙋ ᲂу҆невѣ́стившисѧ, непоро́чнаѧ чⷭ҇таѧ, вопїю́щи: благослови́те, всѧ̑ дѣла̀ гдⷭ҇а, по́йте и҆ превозноси́те є҆го̀ во вѣ́ки.
Ва́шими пѡ́двиги те́мнаго кнѧ́зѧ низло́жше, вѣне́цъ нетлѣ́нїѧ на́мъ и҆схода́таиша, и҆ ра́йскїѧ вхо́ды, ѻ҆трокови́це, и҆ бж҃е́ственное наслажде́нїе, въ ра́дости дꙋшѝ во вѣ́ки.
Распе́ншесѧ мі́рꙋ, и҆ бж҃їею любо́вїю ᲂу҆ѧзви́вшесѧ, свѧщє́нныѧ дѣ́вы, вкꙋше́нїемъ сла́дкимъ є҆́ѵꙋ ᲂу҆ѧзви́вшаго, воздержа́нїѧ стрѣла́ми ᲂу҆ѧзви́сте, воспѣва́юще хрⷭ҇та̀ во вѣ́ки.
Бг҃оро́диченъ:
І҆и҃са ро́ждшаѧ ѿ чⷭ҇тыхъ крове́й твои́хъ воплоще́нна, дѣ̑вы всѧ̑ собрала̀ є҆сѝ, пречⷭ҇таѧ дв҃о мт҃и, и҆ съ ни́ми вопїю́щи: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.
Пѣ́снь ѳ҃. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Кра́сныѧ влⷣцѣ, и҆ бг҃оглагѡ́ливыѧ гѡ́рлицы, и҆ ла̑стовицы свѣ̑тлыѧ и҆ чистолюби̑выѧ, въ добрѡ́ты нбⷭ҇ныѧ приведе́ни бы́сте.
Сочта́стесѧ съ вы́шними ликостоѧ́нїи, и҆ во и҆збра́нныхъ собо́рѣхъ всели́стесѧ, ѡ҆ на́съ молѧ́щесѧ любо́вїю ще́дромꙋ бг҃ꙋ.
Па́мѧть є҆ѵпраѯі́и и҆ ѻ҆лѷмпїа́ды, ꙗ҆́кѡ со́лнце мі́рови возсїѧ̀, вѣ́рныхъ мы̑сли просвѣща́ющи, хрⷭ҇та̀ велича́ющихъ при́снѡ.
Бг҃оро́диченъ:
Свѣ́та сꙋ́щи прїѧ́телище, просвѣтѝ, дв҃о, ѡ҆мраче́ннꙋю страстьмѝ дꙋ́шꙋ мою̀, и҆ кромѣ́шнїѧ тмы̀ и҆зба́ви мѧ̀ мольба́ми твои́ми.
Стїхи̑ры ст҃ы́хъ же́нъ, гла́съ а҃. Подо́бенъ: Нбⷭ҇ныхъ чинѡ́въ:
Тайносло́вца прⷪ҇ро́ка, ꙳ и҆ ᲂу҆чи́телѧ на́шегѡ, ꙳ ᲂу҆чени́цꙋ въ пѣ́снехъ ꙳ ѻ҆лѷмпїа́дꙋ согла́снѡ почти́мъ досто́йнѡ: ꙳ и҆ съ не́ю восхвалѧ́юще цѣломꙋ́дреннꙋю и҆ чи́стꙋю є҆ѵпраѯі́ю, ꙳ ꙗ҆́кѡ хрⷭ҇тꙋ̀ молѧ́щꙋюсѧ спасти́сѧ на́мъ.
Благоче́стїѧ и҆сча́дїе, ꙳ и҆ ᲂу҆добре́нїе мона́шествꙋющихъ сꙋ́щꙋ, ꙳ пѣ́сньми досто́йнѡ почти́мъ, согла́снѡ всѝ вѣ́рнїи, ꙳ є҆ѵпраѯі́ю цѣломꙋ́дреннꙋю, ꙳ ꙗ҆́кѡ молѧ́щꙋю зижди́телѧ ѡ҆ на́съ, ꙳ спасти́сѧ дꙋша́мъ на́шымъ.
Сла́ва:
Ты̀ земнꙋ́ю красотꙋ̀ совле́кши, ꙳ до́брѣ благꙋ́ю ча́сть и҆збра́ла є҆сѝ, бг҃омꙋ́драѧ, ꙳ ю҆́же ѡ҆брѣ́те марі́а, ꙳ и҆ всѧ̑ а҆́бїе ѡ҆ста́вльши вре́мєннаѧ, ꙳ добродѣ́телїю прїѧ́ла є҆сѝ ꙳ мы́сленный би́серъ многоцѣ́нный.
И҆ ны́нѣ: Досто́йно є҆́сть.
На ᲂу҆́трени на Бг҃ъ гдⷭ҇ь тропа́рь а҆́нны ст҃ы́ѧ, три́жды. Бг҃оро́дична не глаго́лемъ.
По а҃-й каѳі́смѣ сѣда́ленъ, гла́съ д҃. Подо́бенъ: Ско́рѡ предварѝ:
Твоѐ пра́зднꙋемъ, пра́веднаѧ а҆́нно, ᲂу҆спе́нїе, сла́вою бо неизрече́нною просла́ви тѧ̀ хрⷭ҇то́съ бг҃ъ, ꙗ҆́кѡ прама́терь свою̀. тѣ́мже преста́вльшисѧ того̀ молѝ, ми́ръ моли́твами твои́ми пода́ти на́мъ, покрыва́ющи ѿ сопроти́вныхъ дꙋ́шы на́шѧ.
Два́жды.
Сла́ва, и҆ ны́нѣ, бг҃оро́диченъ:
Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
По в҃-й каѳі́смѣ сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:
Въ рꙋ́цѣ на́съ ра́ди ѿ дв҃ы вочл҃вѣ́чшагѡсѧ преда́вши дꙋ́шꙋ, и҆́бо зижди́тель тво́й и҆ бг҃ъ, къ нетлѣ́ннѣй жи́зни преста́ви тѧ̀. тѣ́мже ны́нѣ че́стнѡ ᲂу҆блажа́емъ тѧ̀, ꙗ҆́кѡ є҆ди́ной честнѣ́й и҆ непоро́чнѣй вои́стиннꙋ бцⷣѣ сꙋ́щꙋю мт҃рь, и҆ согла́снѡ взыва́емъ: зижди́телѧ твоего̀ и҆ бг҃а, хрⷭ҇та̀ сп҃са на́шего молѝ, спасти́сѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, свѧще́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃ою пребыва́етъ.
Канѡ́ны ѻ҆ктѡ́иха ѻ҆́ба безъ мꙋ́ченична, и҆ ст҃ы́ѧ на ѕ҃.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Согрѣше́нїй проще́нїе, и҆ ѕлы́хъ и҆збавле́нїе, и҆ житїѧ̀ и҆справле́нїе ны́нѣ мѝ и҆спросѝ, твою̀ свѣтоно́снꙋю па́мѧть почита́ющемꙋ дне́сь, а҆́нно всехва́льнаѧ.
Живо́тъ ро́ждшꙋю, бг҃олѣ́пнѡ родила̀ є҆сѝ: тѣ́мже къ присножи́зненнѣй жи́зни преста́виласѧ є҆сѝ, наслажда́ющисѧ ра́дости неизглаго́ланныѧ, и҆ свѣ́та невече́рнѧгѡ, а҆́нно бг҃озва́ннаѧ.
Благода́ть бжⷭ҇твеннаѧ къ ра́дости преста́ви, безъ сѣ́мене ю҆́же родѝ дщѝ сеѧ̀, чи́стаѧ, и҆ предстои́тъ со мно́гимъ дерзнове́нїемъ, гдⷭ҇еви молѧ́щисѧ, спасти́сѧ всѣ̑мъ.
Пра́веднѡ и҆ прпⷣбнѡ пожи́вши, всехва́льнаѧ, къ пра́ведномꙋ гдⷭ҇ꙋ ны́нѣ преста́виласѧ є҆сѝ, ра́доватисѧ съ пра́ведными и҆̀же ѿ вѣ́ка: тѣ́мже соше́дшесѧ тѧ̀ вѣ́рою почита́емъ.
Бг҃оро́диченъ:
И҆зъ тебє̀ на́мъ возсїѧ̀ сл҃нце пра́ведное, и҆ всю̀ ѡ҆зарѝ бг҃оразꙋ́мїемъ зе́млю, и҆ разорѝ мглꙋ̀ неразꙋ́мїѧ, чⷭ҇таѧ, всенепоро́чнаѧ и҆ всебл҃же́ннаѧ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ: Не мꙋ́дростїю, и҆ си́лою, и҆ бога́тствомъ хва́лимсѧ: но тобо́ю ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.
Заче́ншꙋю содержа́щаго всѧ̑ зачала̀ є҆сѝ, и҆ родила̀ є҆сѝ па́че сло́ва хрⷭ҇та̀ ро́ждшꙋю: тѣ́мже твоѐ ᲂу҆спе́нїе, а҆́нно, почита́емъ.
Съ похвала́ми соверша́етсѧ сла́внаѧ па́мѧть твоѧ̀, ꙗ҆́кѡ родила̀ є҆сѝ на́мъ хвале́нїй превы́шшꙋю, чⷭ҇тꙋю бг҃ома́терь, а҆́нно бг҃опрїѧ́тнаѧ.
Ꙗ҆́коже со́лнце съ лꙋно́ю а҆́ннѣ совокꙋплѧ́ѧсѧ сла́вный і҆ѡакі́мъ, дѣ́вства зарю̀ ражда́етъ: є҆ѧ́же ра́ди бж҃ества̀ лꙋча̀ просїѧ̀.
Го́рꙋ бжⷭ҇твеннꙋю и҆зъ чре́слъ твои́хъ родила̀ є҆сѝ, и҆ къ гора́мъ мы́слєннымъ, и҆ раѧ̀ селе́нїємъ, а҆́нно, преминꙋ́ла є҆сѝ, бг҃облаже́ннаѧ.
Бг҃оро́диченъ:
Тѧ̀ предста́тельницꙋ тве́рдꙋю, бг҃ороди́тельнице, стѧжа́хомъ, ᲂу҆пова́нїе на тѧ̀ возложи́вше спаса́емсѧ, и҆ къ тебѣ́ бо прибѣга́юще ѡ҆гражда́емсѧ.
Сѣда́ленъ, гла́съ и҃: Подо́бенъ: Премꙋ́дрости:
Мт҃ре влⷣки и҆ творца̀ ма́ти была̀ є҆сѝ, а҆́нно всехва́льнаѧ, тогѡ̀ повелѣ̑нїѧ при́снѡ хранѧ́щи: сегѡ̀ ра́ди ᲂу҆ме́рши, къ жи́зни безсме́ртнѣй преста́виласѧ є҆сѝ вои́стиннꙋ, и҆ къ свѣ́тꙋ невече́рнемꙋ. тѣ́мже свѣтоно́снꙋю и҆ свѧтꙋ́ю твою̀ па́мѧть соверша́емъ, дꙋ́хомъ просвѣща́еми всегда̀, и҆ согла́снѡ вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀.
Сла́ва, и҆ ны́нѣ, то́йже.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Ꙗ҆́же въ зако́нѣ пи̑саннаѧ поꙋча́ющисѧ соверши́ла є҆сѝ, и҆ законода́вца мт҃ре ма́ти была̀ є҆сѝ: тѣ́мже тебѣ̀ всѧ̀ тва́рь по до́лгꙋ ны́нѣ сотворѧ́етъ твою̀ ра́достнѡ па́мѧть.
Блаже́нное чре́во твоѐ вои́стиннꙋ, носи́вшее свѣ́тъ мі́ра внꙋ́трь во чре́вѣ носи́вшꙋю, и҆ сосца̀ твоѧ̀ кра̑снаѧ, ꙗ҆́кѡ дои́вшаѧ дои́вшꙋю, а҆́нно, хрⷭ҇та̀, пита́телѧ на́шего.
Ꙗ҆́кѡ пожи́вши непоро́чнѡ, ю҆́же непоро́чнѡ родила̀ є҆сѝ бцⷣꙋ ѻ҆трокови́цꙋ, сло́во ѻ҆́ч҃ее породи́вшꙋю: и҆ къ немꙋ̀ со сла́вою всели́ласѧ є҆сѝ, ѡ҆божена̀ честны́ми вои́стиннꙋ прича́стїи.
Бг҃оро́диченъ:
Дв҃ы чре́во сто́гъ, ꙗ҆́коже на гꙋмнѣ̀ вои́стиннꙋ ꙗ҆ви́сѧ, кла́съ недѣ́ланенъ и҆мꙋ́щи, и҆́мже пита́етсѧ всѧ́кое є҆стество̀, зовꙋ́щее: всеси́льне, сла́ва, хрⷭ҇тѐ, си́лѣ твое́й.
Пѣ́снь є҃. І҆рмо́съ:
Нечести́вїи не ᲂу҆́зрѧтъ сла́вы, твоеѧ̀, хрⷭ҇тѐ, но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.
Не́бо родила̀ є҆сѝ на землѝ вои́стиннꙋ, ро́ждшꙋю нб҃сѐ творца̀, дне́сь тѧ̀ преставлѧ́юща къ небє́снымъ со сла́вою, а҆́нно пресла́внаѧ.
Съ невеще́ственными чи́нми, невеще́ственнымъ ᲂу҆мо́мъ, ликꙋ́еши ра́достнѡ, и҆сполнѧ́ема сїѧ́нїѧ богатода́вца: но на́съ помина́й, вѣ́рою хва́лѧщихъ тѧ̀.
Ѿ ко́рене і҆ессе́ева прозѧ́бшаѧ ꙗ҆́вѣ, благоцвѣтꙋ́щїй же́злъ чⷭ҇тꙋю и҆зрасти́ла є҆сѝ, сла́внаѧ, и҆зрасти́вшꙋю цвѣ́тъ неꙋвѧда́ющїй, і҆и҃са, и҆зба́вителѧ на́шего.
Бг҃оро́диченъ:
Къ тебѣ̀ прибѣга́ю є҆ди́нѣй держа́внѣй, вѣ́рныхъ покро́вꙋ, на тѧ̀ наде́ждꙋ возлага́ю спасе́нїѧ моегѡ̀, прест҃а́ѧ влⷣчце бцⷣе, не пре́зри менє̀.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости, ѿ ре́бръ твои́хъ и҆сте́кшею кро́вїю.
Гдⷭ҇а і҆и҃са бг҃а пра́ѻтцы, і҆ѡакі́мъ же и҆ а҆́нна, пра́вдою ᲂу҆кра́шени, по достоѧ́нїю въ пѣ́снехъ да восхва́лѧтсѧ дне́сь.
Всѧ́ческихъ похва́лъ а҆́нна превзы́де ꙗ҆́кѡ всѧ́кїѧ похвалы̀ превозше́дшꙋю родила̀ є҆́сть: сегѡ̀ ра́ди въ ли́цѣ пра́ведныхъ водворѧ́етсѧ.
Свѣтоно́сїѧ и҆ свѣ́тлости и҆спо́лнена па́мѧть твоѧ̀: сїѧ̑нїѧ же въ мі́рѣ спаси́тєльнаѧ и҆спꙋща́ющи, цѣломꙋ́дреннаѧ а҆́нно, дарова́нїй всѧ́ческихъ и҆спо́лни.
Рꙋ́чкꙋ, ма́ннꙋ бжⷭ҇твеннꙋю вмѣсти́вшꙋю, во чре́вѣ носи́ла є҆сѝ, а҆́нно, и҆ съ не́ю ны́нѣ на нб҃сѣ́хъ живꙋ́щи, ѡ҆ всѣ́хъ мо́лишисѧ, прехва́льнаѧ.
Бг҃оро́диченъ:
Ѿ а҆́нны мі́рови родила́сѧ є҆сѝ, цр҃и́це, всѣ́хъ цр҃ѧ̀ ро́ждшаѧ, и҆ дѣ́вствꙋющи по ржⷭ҇твѣ̀, херꙋві̑мъ превы́шши, пренепоро́чнаѧ.
Конда́къ, гла́съ в҃. Подо́бенъ: Вы́шнихъ и҆щѧ̀:
Прароди́телей хрⷭ҇то́выхъ па́мѧть пра́зднꙋемъ, тѣ́хъ вѣ́рнѡ просѧ́ще по́мощи, и҆зба́витисѧ всѣ̑мъ ѿ всѧ́кїѧ ско́рби, зовꙋ́щымъ: бг҃ъ на́шъ съ на́ми, си́хъ прославле́й, ꙗ҆́коже благоволѝ.
І҆́косъ:
Проро́чески сни́демсѧ всѝ, досто́йнѡ пѣ́ти прама́тере хрⷭ҇то́вы блаже́нное преставле́нїе: дне́сь бо ѿ вре́менныѧ преста́висѧ жи́зни, на нб҃сѣ́хъ съ ра́достїю ше́ствїе творѧ́щи ра́дꙋетсѧ, ꙗ҆́кѡ сꙋ́щи ма́ти и҆́стиннаѧ сꙋ́щїѧ бцⷣы, и҆ взыва́етъ вѣ́рнѡ: вели́читъ дꙋша̀ моѧ̀ гдⷭ҇а, ꙗ҆́кѡ роди́хъ сегѡ̀ мт҃рь на землѝ, и҆́же сїю̀ прославле́й, ꙗ҆́коже благоволѝ.
Пѣ́снь з҃. І҆рмо́съ:
Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.
Ꙗ҆́кѡ жи́зни и҆́стинныѧ, а҆́нно, мт҃рь ро́ждши, къ жи́зни и҆́стиннѣй преста́виласѧ є҆сѝ ко свѣ́тꙋ, взыва́ющи: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.
Ꙗ҆́же мт҃ри и҆зба́вителѧ, ма́ти сꙋ́щи, а҆́нно, ѿ землѝ къ небесѝ добродѣ́тельми ᲂу҆кра́шена востечѐ, во хвале́нїи зовꙋ́щи: бж҃е ѻ҆тє́цъ на́шихъ, бл҃гослове́нъ є҆сѝ.
Къ несконча́емѣй жи́зни, къ простра́ннѣй широтѣ̀ ра́йскїѧ пи́щи, къ невече́рнемꙋ свѣ́тꙋ ѿшла̀ є҆сѝ, бг҃оно́сице, зовꙋ́щи: бж҃е ѻ҆тє́цъ на́шихъ, бл҃гослове́нъ є҆сѝ.
И҆спещре́на добродѣ́тельми, добро́тою бжⷭ҇твенныхъ дарова́нїй ᲂу҆кра́шена, къ бг҃ꙋ приложи́сѧ, непреста́ннѡ зовꙋ́щи: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.
Бг҃оро́диченъ:
Оу҆кра́шена добро́тами добродѣ́телей, кра́снаго па́че сынѡ́въ человѣ́ческихъ родила̀ є҆сѝ, сло́во, пренепоро́чнаѧ, кра́сными лѣ́потами ᲂу҆краша́ющаго тебѐ пѣсносло́вѧщихъ.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Мт҃и є҆ди́ныѧ бцⷣы, ꙗ҆́же непло́ды пре́жде, ны́нѣ же прама́ти хрⷭ҇то́ва, ꙗ҆́коже непло́дства, си́це и҆ ме́ртвости совле́кши ѻ҆де́ждꙋ, во странѣ̀ живꙋ́щихъ вопїе́тъ: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Хрⷭ҇то́съ тебѣ̀ двє́ри вы́шнїѧ ѿве́рзе, ра́достнѡ тѧ̀ прїѧ́тъ: ꙗ҆́кѡ две́рь родила̀ є҆сѝ, є҆́юже са́мъ про́йде, и҆ затворе́нꙋ ꙗ҆вѝ по и҆схожде́нїи, бг҃омꙋ́драѧ, достойнопѣ́таѧ а҆́нно: тѣ́мже тѧ̀ почита́емъ вѣ́рнїи во вѣ́ки.
Свѧ́тѡ житїѐ сконча́вши, ст҃ы́ѧ приснодѣ́вы мт҃и была̀ є҆сѝ, ꙗ҆́же прест҃о́е сло́во породѝ, ѡ҆свѧще́нїе и҆ и҆збавле́нїе на́мъ подаю́ща, бг҃омꙋ́драѧ и҆ досточꙋ́днаѧ а҆́нно: тѣ́мже тѧ̀ пое́мъ при́снѡ вѣ́рнїи во вѣ́ки.
Бг҃оро́диченъ:
Мно́гими мѧ̀ содержи́ма бѣда́ми, и҆ бꙋ́рею грѣхо́вною бѣ́дствꙋющаго, ко приста́нищꙋ невла́емомꙋ дыха́нїи дх҃а, бг҃ороди́тельнице влⷣчце, ны́нѣ наста́ви: приста́нище бо є҆сѝ хрⷭ҇тїа́нъ. тѣ́мже тѧ̀ пое́мъ во всѧ̑ вѣ́ки.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.
Ѿ землѝ чре́ва твоегѡ̀ вои́стиннꙋ роди́сѧ землѧ̀ ст҃а́ѧ, недѣ́ланенъ кла́съ прозѧ́бши безсѣ́меннѡ, мі́рови пита́телѧ и҆ гдⷭ҇а, тебѐ къ пи́щи неиждива́емой, а҆́нно, премꙋ́дрѡ преста́вльшагѡ.
Па́мѧть твоѧ̀ дне́сь на́мъ возсїѧ̀, со́лнца свѣтлѣ́йши, сїѧ́нїемъ бога́тыхъ дарѡ́въ, на́съ просвѣща́ющи, всечестна́ѧ, и҆ мра́къ страсте́й и҆з̾има́ющи: ю҆́же соверша́ющихъ сохранѝ.
Бжⷭ҇твенный на́съ і҆ѡакі́мъ и҆ а҆́нна бг҃омꙋ́драѧ и҆ всесла́внаѧ, сꙋпрꙋ́гъ честны́й и҆ свѣтоно́сный, созыва́ютъ бжⷭ҇твеннѣ весели́тисѧ си́хъ пра́здникомъ: є҆го́же ᲂу҆ѧснѝ свѣтода́вецъ всѣ́хъ гдⷭ҇ь.
Бг҃оро́диченъ:
Марі́е, гпⷭ҇жѐ всѣ́хъ, всѧ́кими мѧ̀ порабоще́на согрѣше́нїи, ны́нѣ свободѝ: сама́ бо свободи́телѧ родила̀ є҆сѝ всѣ́хъ, рабо́ты на́съ и҆зба́вльшаго грѣхо́вныѧ, бжⷭ҇твеннымъ манове́нїемъ.
Свѣти́ленъ. Подо́бенъ: Со ᲂу҆ченикѝ:
Достодо́лжнѡ воспое́мъ бг҃озва́ннꙋю а҆́ннꙋ: бцⷣꙋ бо та̀ дв҃ꙋ марі́ю ро́ждши па́че наде́жды, сро́дница по пло́ти хрⷭ҇та̀ и҆зба́вителѧ на́шегѡ ꙗ҆ви́сѧ, сїю̀ бг҃олѣ́пнѡ прїе́мшагѡ дне́сь въ вы́шнихъ, ѡ҆ на́съ молѧ́щꙋюсѧ и҆ ѡ҆ ᲂу҆мире́нїи мі́ра.
Два́жды.
Сла́ва, и҆ ны́нѣ, Подо́бенъ: Нб҃о ѕвѣзда́ми:
Нб҃о ро́ждши, а҆́нно, но́вое, марі́ю, є҆́же возсїѧ̀ сла́вы сл҃нце: дне́сь ѿ землѝ къ нбⷭ҇нымъ прехо́диши, хрⷭ҇тꙋ̀ сра́дꙋющисѧ, пресла́внаѧ.
На хвали́техъ стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ:
Па́мѧть соверша́юще честнꙋ́ю, ꙳ тебѐ воспѣва́емъ, хрⷭ҇тѐ, ꙳ пресла́внѡ а҆́ннꙋ ѿ жи́зни привре́менныѧ, ꙳ къ непрестаю́щей сла́вѣ, преста́вльшаго ны́нѣ, ꙳ ꙗ҆́кѡ ма́терь сꙋ́щꙋю, безъ сѣ́мене ро́ждшїѧ тѧ̀ па́че є҆стества̀, ꙳ бцⷣы и҆ приснодв҃ы мт҃ре.
Два́жды.
Па́мѧть свѧтꙋ́ю соверша́юще пра̑ѻтецъ хрⷭ҇то́выхъ, ꙳ і҆ѡакі́ма и҆ а҆́нны, ꙳ честны́хъ и҆ непоро́чныхъ, ꙳ прославлѧ́емъ непреста́ннѡ и҆зба́вителѧ, ꙳ и҆ ще́драго гдⷭ҇а, ꙳ си́хъ преста́вльшаго ꙳ къ жи́зни нестарѣ́емѣй и҆ нетлѣ́ннѣй.
Къ невеще́ствєннымъ ликѡ́мъ, и҆ пра́ведныхъ селе́нїємъ, ꙳ и҆дѣ́же а҆́гг҃льстїи чи́ни, ꙳ и҆дѣ́же ст҃ы́хъ собо́ръ, ꙳ ра́дость пра́зднꙋющихъ соверша́етсѧ: ꙳ и҆ ны́нѣ дꙋ́хи пра́ведныхъ і҆ѡакі́ма и҆ а҆́нны вселѝ, ꙳ и҆̀хже благоче́стнѡ восхвалѧ́юще ᲂу҆блажи́мъ.
Сла́ва, и҆ ны́нѣ, гла́съ в҃:
Прїиди́те, любодѣ́вственнїи всѝ и҆ чистоты̀ рачи́телїе, прїиди́те, пра́зднꙋемъ а҆́ннино честно́е ᲂу҆спе́нїе: и҆́бо та̀ породѝ па́че є҆стества̀ и҆сто́чника жи́зни, марі́ю бг҃оѻтрокови́цꙋ, и҆зъ неѧ́же роди́сѧ и҆зба́витель, просвѣща́ѧй и҆ ѡ҆свѧща́ѧй дꙋ́шы на́шѧ.
Славосло́вїе вели́кое. И҆ ѿпꙋ́стъ.
На лїтꙋргі́и, бл҃жє́нна, пѣ́снь г҃ и҆ ѕ҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ. А҆пⷭ҇лъ къ гала́тѡмъ, зача́ло с҃ї. А҆ллилꙋ́їа, гла́съ а҃: Спасе́нїе пра́вєднымъ ѿ гдⷭ҇а, и҆ защи́титель и҆̀мъ є҆́сть во вре́мѧ ско́рби. Є҆ѵⷢ҇лїе лꙋкѝ, зача́ло л҃ѕ. Прича́стенъ: Ра́дꙋйтесѧ:
Слꙋ́жба прпⷣбнагѡ ѻ҆тца̀ на́шегѡ мака́рїа желтово́дскагѡ, ᲂу҆́нжескагѡ чꙋдотво́рца.
Ве́черъ, Блаже́нъ мꙋ́жъ: На Гдⷭ҇и, воззва́хъ, стїхи̑ры, гла́съ в҃.
Подо́бенъ: Кі́ими похва́льными:
Гдⷭ҇и, да́ждь мѝ ѧ҆зы́къ свѣтлогла́сенъ, ᲂу҆го́ждшагѡ тебѣ̀ пребл҃же́ннагѡ ѻ҆тца̀ па́мѧть вѣ̑рнымъ лю́демъ твои̑мъ возвѣсти́ти, ꙗ҆́коже речѐ пѣснопи́сецъ дв҃дъ: честна̀ предъ гдⷭ҇емъ сме́рть прпⷣбныхъ є҆гѡ̀. ѻ҆́ч҃е бг҃омꙋ́дре, пресвѣ́тлый свѣти́льниче мака́рїе, мнѡ́га ᲂу҆́бѡ воздаѧ̑нїѧ ѿ бг҃а прїѧ́лъ є҆сѝ, твои́ми чꙋдесы̀ ѡ҆зарѧ́ѧ на́съ, пога̑ныѧ посрами́лъ є҆сѝ, моли́твами же твои́ми бѣсѡ́вскаѧ кова̑рства всѧ̀ потреби́лъ є҆сѝ, молѝ хрⷭ҇та̀ бг҃а, спастѝ и҆ просвѣти́ти дꙋ́шы на́шѧ.
Гла́съ прⷪ҇ро́ка твоегѡ̀, гдⷭ҇и, и҆спо́лнити хотѧ̀, рече́ бо бг҃оѻте́цъ дв҃дъ, поѧ̀ и҆ молѧ́сѧ не престаѧ̀ де́нь и҆ но́щь: ᲂу҆дали́хсѧ бѣ́гаѧ, и҆ водвори́хсѧ въ пꙋсты́ню, ча́ѧхъ бг҃а спаса́ющаго мѧ̀. а҆́ще бы пꙋсты́нѧ ᲂу҆ха́ла стрꙋѧ́ми сле́зъ твои́хъ, се́ бы, ꙗ҆́кѡ громогла́снаѧ трꙋба̀, не бы̀ почи́ла вопи́ти трꙋдополо́жныхъ пѡ́двигъ твои́хъ: а҆́гг҃лы возвесели́лъ є҆сѝ, и҆ человѣ́ки ᲂу҆диви́лъ є҆сѝ, ѻ҆́ч҃е мака́рїе, прпⷣбне и҆ приснопа́мѧтне, молѝ хрⷭ҇та̀ бг҃а, спасти́сѧ дꙋша́мъ на́шымъ.
Бг҃оно́се ѻ҆́ч҃е мака́рїе, ты̀ ѿ младе́нства жесто́кимъ и҆ приско́рбнымъ пꙋте́мъ ше́ствовалъ є҆сѝ, добродѣ́тельми же твои́ми, ꙗ҆́кѡ плодови́тъ вїногра́дъ на высотꙋ̀ возше́лъ є҆сѝ, любо́вїю влⷣцѣ твоемꙋ̀ неле́стнѡ послѣ́довавъ. сегѡ̀ ра́ди нбⷭ҇ный граждани́нъ бы́лъ є҆сѝ, и҆ та́мѡ на́мъ ᲂу҆ хрⷭ҇та̀ бг҃а покро́въ и҆спросѝ ѿ бѣсо́вскихъ и҆скꙋше́нїй: є҆го́же молѝ, дарова́ти дꙋша́мъ на́шымъ ми́ръ и҆ ве́лїю ми́лость.
Сла́ва, гла́съ д҃:
Ра́дꙋйсѧ, всебл҃же́ннаѧ главо̀, и҆́же ѿ млады́хъ ногте́й крѣ́постїю ᲂу҆ма̀ бг҃а вседержи́телѧ ᲂу҆твержда́емь, дꙋхо́внꙋю пи́щꙋ хрⷭ҇та̀ па́че всѣ́хъ возлюби́лъ є҆сѝ, земны̑ѧ красоты̑ и҆ пи̑щи и҆ поко́й ѿню́дъ возненави́дѣлъ є҆сѝ: тогѡ̀ ра́ди нбⷭ҇нымъ си́ламъ собесѣ́дникъ ꙗ҆ви́лсѧ є҆сѝ, прпⷣбне. съ ни́миже хрⷭ҇та̀ бг҃а молѝ непреста́ннѡ ѡ҆ всѣ́хъ на́съ, вѣ́рнѡ чтꙋ́щихъ па́мѧть твою̀.
И҆ ны́нѣ, бг҃оро́диченъ: И҆́же тебє̀ ра́ди:
Вхо́дъ. Прокі́менъ днѐ. Чтє́нїѧ г҃, пи́саны сегѡ̀ мѣ́сѧца въ є҃ де́нь, а҆ѳана́сїю а҆ѳѡ́нскомꙋ.
На стїхо́внѣ стїхи̑ры, гла́съ є҃:
Є҆гда̀ въ честно́е ᲂу҆спе́нїе твоѐ, гра́дъ и҆ сꙋ́щыѧ вє́си всѧ̑, ꙗ҆́кѡ ѿ ѳѷмїа́ма цр҃ко́внагѡ напо́лнишасѧ благово́нїѧ, тогда̀ позна́ша лю́дїе твоѐ прпⷣбное преставле́нїе, и҆ стеко́шасѧ всѝ: лꙋча́ми бо чꙋде́съ всѣ́хъ ѡ҆зари́лъ є҆сѝ. тѣ́мъ и҆ ны́нѣ хрⷭ҇та̀ бг҃а молѝ, спасти́сѧ дꙋша́мъ на́шымъ.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Дне́сь правовѣ́рнїи лю́дїе стеко́шасѧ въ честно́е ᲂу҆спе́нїе твоѐ, тогда̀ ѡ҆брѣ́тше ꙗ҆́кѡ безцѣ́нное сокро́вище некра́домое, лице́ же твоѐ па́че со́лнечнагѡ свѣ́та сїѧ́ющее, всю́дꙋ благово́нїѧ и҆спо́лни. сꙋ́щымъ же хромы̑мъ хожде́нїе, и҆ слѣпы̑мъ зрѣ́нїе дарова́лъ є҆сѝ. молѝ хрⷭ҇та̀ бг҃а, пода́ти ѿпꙋще́нїе согрѣше́нїємъ на́шымъ, пресла́внѡ соверша́ющымъ па́мѧть твою̀.
Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Тѣ́ло и҆ ᲂу҆́мъ ѡ҆чи́стивъ, себѐ при́снѡ ст҃а́гѡ дх҃а жили́ще содѣ́лалъ є҆сѝ и҆ ны́нѣ ꙗ҆́кѡ свѣти́ло сїѧ́еши, и҆ ѿ многоцѣле́бнагѡ гро́ба твоегѡ̀ непреста́ннѡ чꙋдеса̀ и҆злива́еши: правовѣ́рныхъ же люде́й неизглаго́ланною ра́достїю возвесели́лъ є҆сѝ. молѝ хрⷭ҇та̀ бг҃а, спасти́сѧ дꙋша́мъ на́шымъ.
Сла́ва, гла́съ є҃:
Вострꙋ́бимъ дꙋхо́вными пѣ́сньми, во ѱалмѣ́хъ и҆ пѣ́нїихъ, стеце́мсѧ въ цр҃ковь бж҃їю, и҆ ᲂу҆слы́шимъ застꙋ́пника гра́дꙋ на́шемꙋ га́личꙋ: є҆го́же моли́твами свои́ми соблюда́етъ всегда̀ ѿ наше́ствїѧ сопроти́вныхъ. тѣ́мже є҆мꙋ̀ всѝ та́кѡ рце́мъ: ѻ҆́ч҃е мака́рїе приснопа́мѧтне, предварѝ и҆ и҆зба́ви на́съ ѿ и҆скꙋше́нїй всѧ́ческихъ, любо́вїю молѧ́щихъ тѧ̀, ꙗ҆́кѡ те́пла предста́телѧ ко сп҃сꙋ всѣ́хъ бг҃ꙋ, за лю́ди твоѧ̑, да спасе́тъ дꙋ́шы на́шѧ.
И҆ ны́нѣ, бг҃оро́диченъ: Хра́мъ и҆ две́рь є҆сѝ:
Та́же, Ны́нѣ ѿпꙋща́еши:
Тропа́рь, гла́съ є҃.
Дне́сь гра́дъ тво́й га́личь тобо́ю хва́литсѧ, въ концѣ́хъ бо є҆гѡ̀ пресвѣ́тлѡ ꙗ҆́кѡ ве́лїе со́лнце возсїѧ́лъ є҆сѝ, и҆ чꙋдесы̀ твои́ми, прпⷣбне мака́рїе всѧ̑ ѡ҆зари́лъ є҆сѝ. и҆ ны́нѣ моли́сѧ гдⷭ҇еви, и҆зба́витисѧ дꙋша́мъ на́шымъ ѿ пре́лести вра́жїѧ, и҆ спасти́сѧ гра́дꙋ твоемꙋ̀ ѿ пога́нскагѡ наи́тїѧ.
Сла́ва, и҆ ны́нѣ, бг҃оро́диченъ по гла́сꙋ.
На ᲂу҆́трени, на Бг҃ъ гдⷭ҇ь, тропа́рь то́йже.
По а҃-й стїхоло́гїи сѣда́ленъ, гла́съ д҃. Подо́бенъ: Ско́рѡ предварѝ:
Зва́нїю гдⷭ҇а твоегѡ̀ послѣ́довалъ є҆сѝ, мі́ръ ѡ҆ста́вивъ, и҆ всѧ̑ ꙗ҆̀же въ мі́рѣ красова̑нїѧ, преблаже́нне мака́рїе, претерпѣ́лъ є҆сѝ ᲂу҆се́рднѡ пꙋсты́нное ѡ҆ѕлобле́нїе, полки́ же бѣсѡ́вскїѧ ѿри́нꙋлъ є҆сѝ мꙋ́жески. тѣ́мже па́мѧть твою̀ при́снѡ восхвалѧ́емъ пѣ́сньми вѣ́рнѡ.
Два́жды.
Сла́ва, и҆ ны́нѣ, бг҃оро́диченъ:
Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
По в҃-й стїхоло́гїи сѣда́ленъ, гла́съ є҃. Поⷣ: Собезнача́льное сло́во:
По́стника гдⷭ҇нѧ пѣ́сньми почти́мъ, ꙗ҆́кѡ ᲂу҆мертви́вша всѧ̑ прило́ги страсте́й воздержа́нїемъ тве́рдымъ, и҆ крѣ́пкимъ терпѣ́нїемъ вои́стиннꙋ, и҆ посрами́вша ѕѣлѡ̀ сопроти́внагѡ всю̀ горды́ню, и҆ ны́нѣ молѧ́щасѧ гдⷭ҇еви поми́ловатисѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Оу҆жа́сно чꙋ́до зача́тїѧ, и҆ несказа́ненъ ѻ҆́бразъ ржⷭ҇тва̀, въ тебѣ̀ позна́сѧ, приснодв҃о чⷭ҇таѧ: ᲂу҆жаса́етъ мо́й ᲂу҆́мъ, и҆ ᲂу҆дивлѧ́етъ помышле́нїе. сла́ва твоѧ̀, бцⷣе, во всѣ́хъ простре́сѧ ко спасе́нїю дꙋша́мъ на́шымъ.
По полѷеле́и сѣда́ленъ, гла́съ а҃. Подо́бенъ: Гро́бъ тво́й, сп҃се:
Погре́блъ є҆сѝ страсте́й всѐ воста́нїе ᲂу҆мерщвле́нїемъ пло́ти, свѧще́нный ѻ҆́ч҃е: жи́знь безконе́чнꙋю по сме́рти прїѧ́лъ є҆сѝ. тѣ́мже дне́сь хрⷭ҇то́ва цр҃ковь пра́зднꙋетъ твою̀ досточꙋ́днꙋю па́мѧть, прпⷣбныхъ ᲂу҆краше́нїе.
Два́жды.
Сла́ва, и҆ ны́нѣ, бг҃оро́диченъ:
Наста́ви на́съ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ преблага́го прогнѣ́вавшыѧ гдⷭ҇а, неискꙋсобра́чнаѧ благослове́ннаѧ марі́е, прибѣ́жище ѿча́ѧнныхъ человѣ́кѡвъ, бж҃їе жили́ще.
Степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ ѕ҃:
Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ. тѣ́мъ на небесѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ, дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
Канѡ́нъ.
Гла́съ д҃. Пѣ́снь а҃. І҆рмо́съ:
Колесни̑цы фараѡ́новы и҆ си́лꙋ є҆гѡ̀ вве́рже въ мо́ре крѣ́пкїй во бране́хъ: воспое́мъ пѣ́снь но́вꙋю, ꙗ҆́кѡ просла́висѧ.
Ве́сь ѡ҆свѧще́нъ бы́въ благода́тїю хрⷭ҇то́вою, мака́рїе прпⷣбне, вои́стиннꙋ ꙗ҆́кѡ и҆збра́нъ сосꙋ́дъ бг҃ови показа́лсѧ є҆сѝ, и҆ жили́ще че́стно ст҃а́гѡ дх҃а.
Ѿ ю҆́ности бг҃а возлюби́лъ є҆сѝ, прпⷣбне мака́рїе, и҆ томꙋ̀ ѿ всеѧ̀ дꙋшѝ порабо́талъ є҆сѝ, пребл҃же́нне. и҆ ны́нѣ помина́й на́съ, пресвѣ́тлѡ соверша́ющихъ па́мѧть твою̀.
Ѿ страсте́й дꙋшетлѣ́нныхъ мі́ра сегѡ̀ и҆збѣ́глъ є҆сѝ, прпⷣбне, и҆ въ пꙋсты́ню всели́лсѧ є҆сѝ глꙋбо́кꙋю. ны́нѣ же ᲂу҆́бѡ ра́дꙋетсѧ дꙋ́хъ тво́й въ небе́сныхъ ѻ҆би́телехъ.
Бг҃оро́диченъ:
Ѡ҆ тебѣ̀ ра́дꙋетсѧ всѧ́кое созда́нїе бж҃їе, мт҃и бг҃а вы́шнѧгѡ, є҆го́же понесла̀ є҆сѝ, носѧ́щаго всѧ́чєскаѧ. и҆ мы̀ чтꙋ́ще тѧ̀ вои́стиннꙋ, ꙗ҆́кѡ бцⷣꙋ въ пѣ́снехъ велича́емъ.
Пѣ́снь г҃. І҆рмо́съ:
Оу҆твержда́ѧй гро́мъ, и҆ созида́ѧй дꙋ́хъ, ᲂу҆твердѝ менѐ, гдⷭ҇и, да тѧ̀ пою̀ и҆́стиннѡ, и҆ творю̀ во́лю твою̀, ꙗ҆́кѡ нѣ́сть свѧ́тъ, ꙗ҆́кѡ ты̀, бж҃е на́шъ.
Оу҆ха́етъ твоѧ̀ ра́ка бога́тнѡ, и҆ дае́тъ незави́стнѡ всѣ̑мъ и҆сцѣле́нїе: дꙋ́шы же ѿ бѣсо́вскихъ навѣ̑тъ и҆збавлѧ́еши моли́твами твои́ми, прпⷣбне.
Ѿгна́лъ є҆сѝ, прпⷣбне, ѿ люде́й твои́хъ бѣсѡ́вскаѧ ѡ҆ѕлоблє́нїѧ, и҆ грѧдꙋ́щаѧ и҆́хъ ѡ҆полчє́нїѧ, ꙗ҆̀же на на́съ, мо́лимъ тѧ̀ ᲂу҆кроти́ти, ꙗ҆́кѡ да при́снѡ соверша́емъ па́мѧть твою̀.
Оу҆твердѝ се́рдце моѐ, свѣ́тлѡ воспѣва́ти па́мѧть твою̀, ѻ҆́ч҃е всеблаже́нне мака́рїе: поще́нїемъ бо и҆ бдѣ́нїемъ ꙗ҆́кѡ а҆́гг҃лъ показа́лсѧ є҆сѝ, въ моли́твахъ воспѣва́ѧ бг҃а, подаю́щаго на́мъ тобо́ю всѣ̑мъ и҆сцѣле́нїе.
Бг҃оро́диченъ:
Всепѣ́таѧ мт҃и бж҃їѧ, ро́ждшаѧ на́мъ жизнода́вца, и҆ сп҃са всѣ́хъ бг҃а: того̀ ᲂу҆́бѡ, гпⷭ҇жѐ, молѝ бо́дренною твое́ю моли́твою, да спасе́тъ дꙋ́шы на́шѧ.
Сѣда́ленъ, гла́съ г҃:
Молѧ̀ прилѣ́жнѡ гдⷭ҇а, и҆ тогѡ̀ ра́ди свы́ше ве́лїе дерзнове́нїе прїѧ́лъ є҆сѝ, ꙗ҆́коже и҆ и҆новѣ́рнїи чꙋдесє́мъ твои̑мъ дивлѧ́хꙋсѧ, вои́стиннꙋ прехва́льне мака́рїе: и҆́хъ бо а҆га́рѧнское безбо́жное шата́нїе посрами́лъ є҆сѝ, и҆ моли́твами твои́ми до конца̀ и҆̀хъ ѡ҆слѣпи́лъ є҆сѝ, гра́дъ же и҆ всѧ̑ сꙋ́щыѧ лю́ди въ не́мъ неврежде́нны соблю́лъ є҆сѝ. и҆ ны́нѣ, прпⷣбне, хрⷭ҇та̀ бг҃а молѝ, ми́лостива бы́ти на́мъ дне́сь и҆ во вѣ́ки.
Сла́ва, и҆ ны́нѣ, бг҃оро́диченъ:
Оу҆страши́сѧ всѧ́кое земноро́дное слы́шанїе, ѿ нѣ́дръ ѻ҆ч҃ескихъ въ дв҃и́чꙋ ᲂу҆тро́бꙋ всели́вшасѧ слы́шаще, є҆го́же ᲂу҆́бѡ прⷪ҇ро́цы провозвѣсти́ша и҆зъ тебє̀ воплоще́нна бы́ти сн҃а бж҃їѧ, мт҃и дв҃о всепѣ́таѧ: є҆го́же молѝ, спастѝ ста́до твоѐ, бцⷣе.
Пѣ́снь д҃. І҆рмо́съ:
Оу҆слы́шахъ, бж҃е, слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и: ꙗ҆́кѡ твоегѡ̀ хвале́нїѧ и҆спо́лнь землѧ̀.
Сѐ ᲂу҆дали́лсѧ є҆сѝ бѣ́гаѧ мі́ра, и҆ сꙋ́щихъ въ не́мъ, и҆ прилѣпи́лсѧ є҆сѝ гдⷭ҇еви твоемꙋ̀, влⷣцѣ и҆ бг҃ꙋ всѣ́хъ. є҆мꙋ́же при́снѡ поѧ̀ благоꙋгоди́лъ є҆сѝ, мꙋ́дре мака́рїе.
Оу҆диви́шасѧ а҆́гг҃льстїи ли́цы твоемꙋ̀ трꙋдолю́бїю, блаже́нне, и҆ мы̀ вѣ́рнїи при́снѡ тѧ̀ сла́вимъ, ꙗ҆́кѡ да моли́твами твои́ми и҆зба́вимсѧ бꙋ́дꙋщагѡ ѡ҆сꙋжде́нїѧ.
Оу҆краша́етсѧ дне́сь вѣ́рныхъ собо́ръ, торжествꙋ́ѧ, преподо́бне, въ па́мѧть твою̀: пога́ныхъ же сѡ́нмища ᲂу҆жаса́ютсѧ, ви́дѧще тѧ̀ крѣ́пка застꙋ́пника гра́дꙋ твоемꙋ̀ и҆ живꙋ́щымъ въ не́мъ.
Бг҃оро́диченъ:
И҆сцѣлѝ, дв҃о, болѣ̑зни серде́цъ на́шихъ, тебе́ бо и҆́мамы помо́щницꙋ, и҆ хода́таицꙋ къ сн҃ꙋ твоемꙋ̀ и҆ бг҃ꙋ на́шемꙋ. є҆го́же родила̀ є҆сѝ сп҃са и҆ врача̀ всѣ́хъ, и҆сточи́вшаго спасе́нїе дꙋша́мъ на́шымъ.
Пѣ́снь є҃. І҆рмо́съ:
Возсїѧ́й мѝ, гдⷭ҇и, свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю, цр҃ю̀ ми́ра.
Въ пꙋсты́ни ꙗ҆́снѡ возсїѧ́лъ є҆сѝ, бг҃одохнове́нне мака́рїе, носѧ̀ на ᲂу҆стѣ́хъ твои́хъ непреста̑нныѧ моли̑твы, тѣ́мъ мра̑чныѧ собла́зны, и҆ бѣсѡ́вскїѧ полкѝ до конца̀ потреби́лъ є҆сѝ.
Возгремѣ̀ и҆лїа̀ на колесни́цѣ, ты́ же, свѧ́те, воспѣва́лъ є҆сѝ бг҃одохнове́ннꙋю пѣ́снь въ пꙋсты́ни, со а҆́гг҃лы всѧ́ческихъ влⷣкꙋ ᲂу҆молѧ́ѧ, є҆́же ᲂу҆лꙋчи́ти го́рнее пребыва́нїе.
Водвори́лсѧ є҆сѝ, бл҃же́нне, въ нбⷭ҇ныѧ ѻ҆би́тєли, и҆ со а҆́гг҃лы, прпⷣбне, ликꙋ́еши въ го́рнихъ селе́нїихъ, и҆ та́мѡ вседержи́телѧ вы́нꙋ зри́ши бг҃а, є҆го́же непреста́ннѡ молѝ ѡ҆ всѣ́хъ на́съ.
Бг҃оро́диченъ:
Вы́шша є҆стества̀ бг҃а пло́тїю породила̀ є҆сѝ, дв҃о, ꙗ҆́коже са́мъ восхотѣ̀. тѣ́мъ вѣ́рнїи мо́лимъ тѧ̀ и҆зба́витисѧ на́мъ ржⷭ҇тво́мъ твои́мъ вѣ́чнагѡ мꙋче́нїѧ.
Пѣ́снь ѕ҃. І҆рмо́съ:
Бꙋ́рѧ мѧ̀ помышле́нїй пости́гши, во глꙋбинꙋ̀ низвлачи́тъ мѧ̀ безмѣ́рныхъ грѣхѡ́въ: но ты̀, ᲂу҆пра́вителю бл҃гі́й, предвари́въ ᲂу҆пра́ви, ꙗ҆́кѡ прⷪ҇ро́ка, и҆ спаси́ мѧ.
Безпло́тныхъ житїѐ подража́лъ є҆сѝ, прпⷣбне, ꙗ҆́кѡ а҆́гг҃лъ непоро́чнѡ на землѝ пожи́въ, воздержа́нїемъ плотскі̑ѧ стра̑сти ᲂу҆мертви́лъ є҆сѝ, ѻ҆́ч҃е мака́рїе, сла́вꙋ же мі́ра сегѡ̀ возненави́дѣлъ є҆сѝ, бг҃омꙋ́дре.
Бжⷭ҇твенный гла́съ внѧ́лъ є҆сѝ себѣ̀, премꙋ́дре, тѣ́мъ и҆ въ пꙋсты́ню водвори́лсѧ є҆сѝ, послꙋша́нїемъ любе́знѡ носѧ̀ кре́стъ є҆гѡ̀. и҆ сегѡ̀ ра́ди потща́лсѧ є҆сѝ чи́ста себѐ сохрани́ти до конца̀, прпⷣбне.
Бжⷭ҇твеннымъ манове́нїемъ тебѣ̀ ѕвѣ́рїе ди́вїи въ пꙋсты́ни покори́шасѧ: стра̑сти бо тебѣ̀ плотскі̑ѧ всѧ̑ ᲂу҆мири́шасѧ. сегѡ̀ ра́ди и҆ бѣсѡ́вскаѧ льщє́нїѧ посрами́лъ є҆сѝ.
Бг҃оро́диченъ:
Бжⷭ҇твенное селе́нїе ты̀ є҆сѝ, пречⷭ҇таѧ бцⷣе: ѿ твоеѧ́ бо ᲂу҆тро́бы произы́де сло́во ѻ҆́ч҃ее, и҆ бы́сть бг҃ъ чл҃вѣ́къ, ꙗ҆́кѡ да за неизрече́нное милосе́рдїе спасе́тъ человѣ́ческїй ро́дъ.
Конда́къ, гла́съ в҃:
Вторы́й мѡѷсе́й ꙗ҆ви́лсѧ є҆сѝ, прпⷣбне: ѻ҆́нъ бо жезло́мъ мо́ре раздѣлѝ, ты́ же стра̑сти ꙗ҆́кѡ а҆мали́ка побѣди́лъ є҆сѝ, и҆ непрохо́днꙋю пꙋсты́ню немѧте́жнымъ ᲂу҆мо́мъ проше́лъ є҆сѝ, въ не́йже моли́твами твои́ми ве́лїе чꙋ́до сотвори́лъ є҆сѝ, гла̑дныѧ лю́ди до и҆зѻби́лїѧ прекорми́лъ є҆сѝ. и҆ ны́нѣ моли́сѧ гдⷭ҇еви, пода́ти всѣ̑мъ печа̑льнымъ ᲂу҆тѣше́нїе, мака́рїе ѻ҆́ч҃е приснопа́мѧтне, и҆́же га́личестѣй странѣ̀, и҆ все́й рѡссі́йстѣй землѝ похвала̀ и҆ ᲂу҆твержде́нїе.
І҆́косъ:
Ꙗ҆́кѡ свѣтоза́рнаѧ лꙋча̀ вселе́ннѣй свѣ́тъ возвѣща́ѧ, дне́сь ты̀, всемꙋ́дре ѻ҆́ч҃е мака́рїе, ѡ҆зари́лъ є҆сѝ га́лическꙋю странꙋ̀ и҆ всю̀ зе́млю рѡссі́йскꙋю чꙋдесы̀ твои́ми, и҆́миже тѧ̀ хрⷭ҇то́съ бг҃ъ ѡ҆богатѝ. тѣ́мъ и҆ вопїе́мъ тѝ: ра́дꙋйсѧ, пребога́те ѻ҆́ч҃е мака́рїе: ра́дꙋйсѧ, є҆́же всѣ́хъ по́стничествꙋющихъ всечестно́е сосло́вїе: ра́дꙋйсѧ, ꙗ҆́кѡ ли́кꙋ ст҃ы́хъ всемꙋ́дрое сочета́нїе показа́лсѧ є҆сѝ: ра́дꙋйсѧ, прпⷣбныхъ всѣ́хъ ᲂу҆добре́нїе, и҆ ѻ҆тцє́въ похвало̀: ра́дꙋйсѧ, крестоно́сное послѣ́дованїе, по гла́сꙋ гдⷭ҇а твоегѡ̀: ра́дꙋйсѧ, и҆́же ᲂу҆ хрⷭ҇та̀ вѣ́рномꙋ во́инствꙋ на́шемꙋ на сопроти̑вныѧ побѣ̑ды и҆спроша́еши: ра́дꙋйсѧ, ꙗ҆́кѡ гра́дъ на́шъ ѿ ва́рварскагѡ наи́тїѧ невреди́мь сохранѧ́еши: ра́дꙋйсѧ, ꙗ҆́кѡ пꙋсты́ннымъ селе́нїемъ свѣтоли́ченъ вѣне́цъ себѣ̀ спле́лъ є҆сѝ: ра́дꙋйсѧ, ꙗ҆́кѡ нбⷭ҇нагѡ жи́тельства смиреномꙋ́дрїѧ ра́ди твоегѡ̀ дости́гнꙋти сподо́билсѧ є҆сѝ: ра́дꙋйсѧ, ꙗ҆́кѡ ᲂу҆ престо́ла вседержи́телѧ бг҃а со а҆́гг҃лы ликꙋ́еши: ра́дꙋйсѧ, ꙗ҆́кѡ ᲂу҆се́рднѡ тогѡ̀ за вѣ̑рныѧ рабы̑ мо́лиши: ра́дꙋйсѧ, мака́рїе приснопа́мѧтне, и҆́же га́личестѣй странѣ̀ и҆ все́й рѡссі́йской землѝ вели́каѧ похвала̀ и҆ ᲂу҆твержде́нїе.
Пѣ́снь з҃. І҆рмо́съ:
Гл҃го́лавый на горѣ̀ съ мѡѷсе́омъ, и҆ ѻ҆́бразъ дѣ́вства ꙗ҆вле́й въ кꙋпинѣ̀: бл҃гослове́нъ є҆сѝ, бж҃е ѻ҆тє́цъ на́шихъ.
Гла́сомъ любе́знымъ трⷪ҇цꙋ воспѣва́ѧ, и҆ ꙗ҆́кѡ бг҃одохнове́ненъ ѻ҆рга́нъ ꙗ҆ви́лсѧ є҆сѝ, мака́рїе прпⷣбне, и҆́же велегла́снѡ всѣ̑мъ зовы́й: бл҃гослове́нъ бг҃ъ ѻ҆тє́цъ на́шихъ.
Пꙋсты̑ннаѧ вита̑нїѧ бога́тнѡ полꙋчи́въ, свѧ́те мака́рїе, ю҆́же прехожда́лъ є҆сѝ непреста́нною моли́твою, и҆ та́мѡ полꙋчи́въ дꙋхо́внꙋю пи́щꙋ, зовы́й: бл҃гослове́нъ бг҃ъ ѻ҆тє́цъ на́шихъ.
Гл҃го́лъ гдⷭ҇ень и҆сполнѧ́ѧ, за́пѡвѣди бг҃а твоегѡ̀ ѿ ю҆́ности сохрани́лъ є҆сѝ, ѻ҆́ч҃е мака́рїе, и҆ тогѡ̀ бл҃года́тїю возмо́глъ є҆сѝ пога́ныхъ собѡ́рища твои́ми чꙋдесы̀ ᲂу҆диви́ти. сегѡ̀ ра́ди зове́мъ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Глаго́лъ дѣви́чь і҆ѡ́сифъ тѧ̀ наречѐ, ꙗ҆́кѡ пра́во є҆́сть: ᲂу҆тро́бꙋ же не дв҃и́чꙋ, но нбⷭ҇ный крꙋ́гъ, и҆ земнꙋ́ю широтꙋ̀. во твое́й бо ᲂу҆тро́бѣ ѻ҆́ч҃ее сло́во бы́сть, бл҃гослове́нъ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Землѧ̀, и҆ всѧ̑ ꙗ҆̀же на не́й, мо́ре и҆ всѝ и҆сто́чницы, небеса̀ небе́съ, свѣ́тъ и҆ тма̀, мра́зъ и҆ зно́й, сы́нове человѣ́честїи, свѧще́нницы благослови́те гдⷭ҇а, и҆ превозноси́те є҆го̀ во вѣ́ки.
Земна̑ѧ всѧ̑ ѡ҆ста́вивъ, пи́щꙋ же и҆ сла́вꙋ мі́ра сегѡ̀ ꙗ҆́кѡ пра́хъ вмѣни́лъ є҆сѝ, и҆ є҆ди́наго бг҃а возжелѣ́лъ є҆сѝ, ѻ҆́ч҃е. є҆го́же молѝ, пла́мень страсте́й ᲂу҆гаси́ти на на́съ, пою́щихъ и҆ превозносѧ́щихъ є҆го̀ во вѣ́ки.
Зе́млю ѿ младе́нства слеза́ми твои́ми, ꙗ҆́кѡ тꙋ́чами напои́лъ є҆сѝ, бл҃же́нне. по́ты же и҆ по́двиги трꙋдѡ́въ твои́хъ кто̀ и҆сповѣ́сть; и҆́хже ра́ди вѣнча́ тѧ хрⷭ҇то́съ въ црⷭ҇твїи свое́мъ: є҆го́же пое́мъ, и҆ превозно́симъ во вѣ́ки.
Землѧ̀ ꙗ҆́кѡ плодови́та ꙗ҆ви́лсѧ є҆сѝ, ѻ҆́ч҃е мака́рїе: и҆зне́слъ бо є҆сѝ бг҃осажде́нный пло́дъ, вѣ́рныхъ напитава́ющъ сердца̀ бра́шномъ живоно́снымъ є҆ѵⷢ҇льскагѡ ᲂу҆че́нїѧ хрⷭ҇то́выхъ ᲂу҆сте́нъ: є҆го́же пое́мъ и҆ превозно́симъ во вѣ́ки.
Бг҃оро́диченъ:
Землѐ ст҃а́ѧ и҆ непоро́чнаѧ дв҃о, и҆зъ тебє́ бо напослѣ́докъ прозѧбѐ хрⷭ҇то́съ бг҃ъ, ꙗ҆́коже клѧ́лсѧ є҆́сть а҆враа́мꙋ рабꙋ̀ своемꙋ̀, є҆́же ᲂу҆мно́жити сѣ́мѧ є҆гѡ̀, и҆ тобо́ю спастѝ сѣдѧ́щыѧ во тмѣ̀. спасѝ, влⷣчце, всѣ́хъ пою́щихъ тѧ̀, и҆ превозносѧ́щихъ гдⷭ҇а во вѣ́ки.
Пѣ́снь ѳ҃. І҆рмо́съ:
Ꙗ҆́кѡ сотворѝ мнѣ̀ вели̑чїѧ си́льный, и҆ свѧ́то и҆́мѧ є҆гѡ̀, и҆ ми́лость є҆гѡ̀ въ ро́дъ и҆ ро́дъ боѧ́щымсѧ є҆гѡ̀.
Ꙗ҆́кѡ те́пла застꙋ́пника стѧжа́хомъ тѧ̀ въ бране́хъ, ѻ҆́ч҃е мака́рїе: плѣнє́нныѧ бо моли́твами твои́ми свобожда́еши, и҆ невѣ̑рнаѧ сѡ́нмища посрамлѧ́еши.
Ꙗ҆́кѡ со́лнце свѣтоно́сное чꙋдесы̀ сїѧ́еши, мака́рїе, и҆ равноа́гг҃льнѡ на землѝ пожи́лъ є҆сѝ, бг҃омꙋ́дре: бжⷭ҇твеннѣй же сла́вѣ со а҆́гг҃лы предстоѧ́ти сподо́билсѧ є҆сѝ.
Прекра́сенъ до́мъ ст҃а́гѡ дх҃а ꙗ҆ви́лсѧ є҆сѝ, и҆ цр҃ѧ̀ всѣ́хъ хрⷭ҇та̀ бг҃а ѿ всеѧ̀ дꙋшѝ возлюби́лъ є҆сѝ: є҆гѡ́же ра́ди въ чꙋдесѣ́хъ прославлѧ́ешисѧ, досточꙋ́дне ѻ҆́ч҃е мака́рїе прпⷣбне.
Бг҃оро́диченъ:
Всѧ̀ тва́рь воспѣва́етъ тѧ̀, бцⷣе, и҆ нбⷭ҇нїи чи́нове тебѐ велича́ютъ непреста́ннѡ: бг҃а бо и҆ цр҃ѧ̀ всѣ́хъ родила̀ є҆сѝ, дв҃о чⷭ҇таѧ. є҆го́же молѝ, всѧ̀ гра́ды и҆ страны̑ вѣ̑рныѧ соблюстѝ ѿ навѣ́та вра́жїѧ.
Свѣти́ленъ:
Влⷣчню престо́лꙋ ны́нѣ съ прпⷣбными ли̑ки предстоѧ̀, бг҃омꙋ́дре, моли́тисѧ не преста́й, дарова́ти побѣ̑ды во́инствꙋ на́шемꙋ на сопроти̑вныѧ всѧ̑, и҆ междоꙋсѡ́бныѧ бра̑ни ᲂу҆кроти́ти, и҆ ми́ръ мі́рови ᲂу҆стро́ити, ѻ҆́ч҃е мака́рїе, и҆ спастѝ дꙋ́шы на́шѧ.
Два́жды.
Сла́ва, и҆ ны́нѣ, бг҃оро́диченъ:
Ѿ нерꙋкотворе́нныхъ пеле́нъ нбⷭ҇ныхъ ѻ҆́блакъ, въ смирє́нныѧ пелєны̀ тлѣ̑нныѧ ѡ҆блече́сѧ сло́во ѻ҆́ч҃ее, и҆зъ дв҃ы неизрече́ннѡ безъ сѣ́мене роди́всѧ: ю҆́же чⷭ҇тꙋю мт҃рь пресла́внꙋю бцⷣꙋ непреста́ннѡ пое́мъ, и҆ славосло́вимъ во вѣ́ки.
На хвали́техъ поста́вимъ стїхѡ́въ, д҃. Гла́съ и҃:
Ѻ҆́ч҃е бг҃омꙋ́дре мака́рїе, въ мѣ́рꙋ похвалы̀ прпⷣбныхъ дости́глъ є҆сѝ: смиренномꙋ́дрїѧ же ра́ди де́мѡнѡвъ вы̑и сокрꙋши́лъ є҆сѝ: сле́зными же потѡ́ки и҆ по́тными трꙋды̑ ва́рварѡвъ ро́ги сломи́лъ є҆сѝ. хрⷭ҇тꙋ̀ прилѣ́жнѡ моли́сѧ, прпⷣбне, соверше́ннѣ и҆спроси́ти ѻ҆те́чествꙋ побѣ̑ды на сопроти̑вныѧ.
Два́жды.
Прпⷣбне ѻ҆́ч҃е мака́рїе, нача́льниче мона́шествꙋющихъ, є҆гда̀ ᲂу҆́бѡ бы́вшꙋ гнѣ́вꙋ бж҃їю на лю́ди, тогда̀ ва́рвары ѻ҆би́тель твоеѧ̀ па́ствы плѣни́ша, и҆ ча̑да твоѧ̑ мечи̑, ꙗ҆́кѡ кла́сы пожа́ша: моли́твами же и҆ моле́нїемъ твои́мъ, къ невече́рнемꙋ свѣ́тꙋ и҆̀хъ посла́лъ є҆сѝ, и҆дѣ́же ѿ влⷣки всѣ́хъ бг҃а достѡ́йныѧ вѣнцы̀ прїѧ́ша: є҆го́же прилѣ́жнѡ молѝ, дарова́ти на́мъ ве́лїю ми́лость.
Въ вы́шнихъ вѣ̑чнаѧ взыска́лъ є҆сѝ, дѡ́льнаѧ же всѧ̑ ꙗ҆́кѡ мимошє́дшаѧ вмѣни́лъ є҆сѝ, и҆ та́кѡ и҆зѧ́щенъ моли́твенникъ показа́лсѧ є҆сѝ. є҆гда́ же ᲂу҆́бѡ ѿ шата́нїѧ безбо́жныхъ ва̑рваръ, непрохо́дными пꙋсты́нѧми ше́ствовалъ є҆сѝ, тогда̀ моли́твами твои́ми до и҆зѻби́лїѧ бра́шно лю́демъ твои̑мъ и҆спроси́лъ є҆сѝ. и҆ ны́нѣ на́мъ па́че дꙋхо́внꙋю пи́щꙋ ѿ хрⷭ҇та̀ и҆спросѝ, ѻ҆́ч҃е мака́рїе прпⷣбне, ꙗ҆́кѡ да любо́вїю въ па́мѧть твою̀ соше́дшесѧ, тебѐ почита́емъ.
Сла́ва, гла́съ ѕ҃:
Ѱало́мски пѣ́сньми дне́сь почти́мъ прпⷣбнаго съ весе́лїемъ ѡ҆ гдⷭ҇ѣ, и҆ па́ки рце́мъ: ра́дꙋйсѧ, блаже́нства тезоимени́те мака́рїе, ра́йскагѡ ра́дованїѧ напо́лнивыйсѧ, и҆ ѿ хрⷭ҇та̀ бг҃а нетлѣ́нный вѣне́цъ прїѧ́лъ є҆сѝ, и҆ ꙗ҆́кѡ свѣти́льникъ пресвѣ́тлый, дꙋ́шꙋ твою̀ просвѣти́лъ є҆сѝ. и҆ ны́нѣ та́кѡ пѣ́сньми всѝ возопїе́мъ: ра́дꙋйсѧ, прпⷣбне ѻ҆́ч҃е на́шъ.
И҆ ны́нѣ, бг҃оро́диченъ:
Славосло́вїе вели́кое. И҆ ѿпꙋ́стъ. На лїтꙋргі́и слꙋ́жба прпⷣбническаѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.