← претходни дан | Минеј — Јун | следећи дан →
26 июня: Преподобного Давида, Селунского. Явление Иконы Пресвятой Богородицы, Тихвинской
Мѣ́сѧца тогѡ́же въ к҃ѕ-й де́нь.
Прпⷣбнагѡ ѻ҆тца̀ на́шегѡ даві́да, и҆́же въ селꙋ́нѣ:
И҆ ꙗ҆вле́нїе і҆кѡ́ны прест҃ы́ѧ влⷣчцы на́шеѧ бцⷣы и҆ приснодв҃ы марі́и, тѵ́хфинскїѧ.
Слꙋ́жба є҆ѧ̀ пи́сана по се́й слꙋ́жбѣ. Стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ!
Ѻ҆́ч҃е даві́де всеблаже́нне, ꙳ воздержа́нїемъ ᲂу҆́мъ просвѣ́щь и҆зрѧ́днѡ, ꙳ къ первовино́вномꙋ до́брыхъ впери́лсѧ є҆сѝ, ꙳ и҆ сто́лпъ ꙗ҆ви́лсѧ є҆сѝ свѣтови́денъ, ꙳ просвѣща́ѧ всѣ́хъ словесы̀, и҆ чꙋдесы̀, ꙳ пристꙋпа́ющихъ къ тебѣ̀, ꙳ ра́зꙋмомъ всегда̀ бг҃олѣ́пнымъ. ꙳ тѣ́мже тѧ̀ почита́емъ и҆ ᲂу҆бл҃жа́емъ.
Ꙗ҆́коже пти́ца благопѣ́снива, ꙳ на восхо́дѣ садо́внѣ, ꙳ сѣ́нь, ѻ҆́ч҃е, водрꙋзи́лъ є҆сѝ, ꙳ стꙋ́денїю померза́емь, ꙳ и҆ зно́емъ пожига́емь, ꙳ зла́ты ѿсю́дꙋ прїѧ́лъ є҆сѝ крилѣ̀ ꙳ безстра́стїѧ и҆ соверше́нїѧ: и҆ къ нбⷭ҇нѣй высотѣ̀ всели́лсѧ є҆сѝ, ꙳ ѡ҆ на́съ всегда̀ молѧ́сѧ хва́лѧщихъ тѧ̀.
Бжⷭ҇твеннымъ безстра́стїѧ ᲂу҆́глемъ ꙳ попали́въ плотскі̑ѧ сла̑сти, неѡпали́мь пребы́лъ є҆сѝ, ꙳ на рꙋкꙋ̀ ᲂу҆́глїе предъ лице́мъ, бг҃одохнове́нне, ꙳ царе́вымъ держѧ̀, прпⷣбне, ꙳ дивлѧ́шесѧ твое́й свѣ́тлости. ꙳ тѣ́мъ подано́ ти проше́нїе вели́ко ѿ бг҃а, ꙳ моли́твенника тѧ̀, блаже́нне, ꙳ приѡбрѣ́тъ бл҃года́тїю.
Сла́ва, гла́съ ѕ҃:
Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны: и҆́хже житїю̀ безъ поро́ка поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:
Зача́тїе твоѐ безсѣ́менное, ꙳ ржⷭ҇тво̀ неизрече́нное помышлѧ́ющи, ꙳ ᲂу҆дивлѧ́юсѧ ѕѣлѡ̀; ꙳ ка́кѡ си́це ꙗ҆́коже ѕлодѣ́й, ꙳ благоволи́лъ є҆сѝ ᲂу҆мре́ти, сн҃е, ꙳ пречⷭ҇таѧ пла́чꙋщи. взыва́ше;
На стїхо́внѣ ѻ҆ктѡ́иха. Сла́ва, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ даві́де: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, ꙳ прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.
Крⷭ҇тобг҃оро́диченъ: Подо́бенъ: Ѽ пресла́внагѡ чꙋдесѐ!
Ю҆́ница нескве́рнаѧ, ꙳ ю҆нца̀ ви́дѧщи на дре́вѣ ꙳ пригвожда́ема во́лею, ꙳ рыда́ющи жа́лостнѣ, ꙳ ᲂу҆вы̀ мнѣ̀, вопїѧ́ше, ꙳ люби́мѣйшее ча́до: ꙳ что̀ тѝ со́нмъ воздадѐ безблагода́тный є҆вре́йскїй, ꙳ хотѧ́ мѧ ѡ҆безча́дствовати ꙳ ѿ тебє̀, вселюбе́зне.
Тропа́рь, гла́съ и҃:
Въ тебѣ̀, ѻ҆́ч҃е, и҆звѣ́стнѡ спасе́сѧ, є҆́же по ѻ҆́бразꙋ: прїи́мъ бо кре́стъ, послѣ́довалъ є҆сѝ хрⷭ҇тꙋ̀, и҆ дѣ́ѧ ᲂу҆чи́лъ є҆сѝ, презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ, ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбне даві́де, дꙋ́хъ тво́й.
Канѡ́нъ, творе́нїе і҆ѡ́сифово, є҆гѡ́же краегране́сїе:
Пою̀, бл҃же́нне, твоѐ житїѐ бжⷭ҇твенными словесы̀.
Гла́съ є҃. Пѣ́снь а҃. І҆рмо́съ:
Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.
Пѣ́сньми свѣтоно́снꙋю и҆ бжⷭ҇твеннꙋю па́мѧть твою̀, соше́дшесѧ, почти́мъ, даві́де преблаже́нне, свѣ́та позна́вше тѧ̀ и҆ днѐ, прпⷣбне, наслѣ́дника, бжⷭ҇твеннымъ дх҃омъ.
Оу҆́ды ᲂу҆мертви́въ, ѻ҆́ч҃е, на землѝ тѣлє́сныѧ, жи́знь все́льшꙋюсѧ въ се́рдцы и҆мѣ́лъ є҆сѝ хрⷭ҇та̀, ᲂу҆мори́вшаго дїа́вола си́лꙋ, ᲂу҆мертви́вшагѡ человѣ́чество.
Зако́нѡмъ влⷣки повинꙋ́ѧсѧ, прпⷣбне, кре́стъ тво́й на ра́мо взѧ́лъ є҆сѝ, и҆ стопа́мъ сегѡ̀ послѣ́дꙋѧ, ты̀ низложи́лъ є҆сѝ возношє́нїѧ льсти́вагѡ, смирѧ́ѧсѧ.
Бг҃оро́диченъ:
Ꙗ҆ви́ласѧ є҆сѝ ᲂу҆кра́шена добро́тою добродѣ́телей, и҆ хрⷭ҇та̀ кра́снаго, дв҃о, породила̀ є҆сѝ, человѣ́ки ᲂу҆краси́вшаго кра́сными добро́тами бжⷭ҇тва̀, приснодв҃о.
Пѣ́снь г҃. І҆рмо́съ:
Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче.
Оу҆вѧди́въ воздержа́нїемъ добро́тꙋ тѣле́снꙋю, зари̑ прїѧ́тъ бж҃е́ственнагѡ дх҃а, и҆ безстра́стїѧ свѣтоза́рными ѡ҆блиста́лъ є҆сѝ лꙋча́ми, и҆ и҆сцѣле́нїи дарова́нїѧ, ѻ҆́ч҃е, прⷪ҇ро́кꙋ тезоимени́те.
Ст҃ы́хъ послѣ́дꙋѧ житїю̀, пребога́те, ве́сь ѡ҆свѧти́лсѧ є҆сѝ бж҃е́ственными дѣѧ́нїи. тѣ́мже ѡ҆свѧща́еши та́йнѡ вѣ́рою ст҃о́е соверша́ющыѧ твоѐ торжество̀, ѻ҆́ч҃е бг҃оно́се всеблаже́нне.
Оу҆спи́въ сла̑сти тѣлє́сныѧ, прпⷣбне, моли́твами и҆ бдѣ́нїи, и҆ пѡ́двиги, ѻ҆́ч҃е, въ ми́рѣ вои́стиннꙋ ᲂу҆снꙋ́въ почи́лъ є҆сѝ. тѣ́мже тѧ̀ неꙋсы́пна стѧжа́хомъ храни́телѧ любо́вїю чтꙋ́щїи тѧ̀.
Бг҃оро́диченъ:
А҆́гг҃лѡвъ честнѣ́йши ꙗ҆ви́ласѧ є҆сѝ, ро́ждши тѣ́хъ, дв҃о, созда́телѧ. тѣ́мъ молю́ тѧ, чⷭ҇таѧ: ѡ҆свѧтѝ ᲂу҆́мъ мо́й, и҆ се́рдце просвѣтѝ, ѻ҆́блакъ страсте́й ѿгонѧ́щи.
Сѣда́ленъ, гла́съ и҃. Подо́бенъ: Премꙋ́дрости:
Воздержа́нїемъ стра̑сти плѡтскі́ѧ дꙋшѝ повинꙋ́въ, ѻ҆́ч҃е мꙋ́дре, ꙗ҆ви́лсѧ є҆сѝ, бл҃же́нне, съ тѣ́ломъ а҆́гг҃лъ: сѣ́нь же водрꙋзи́лъ є҆сѝ, ꙗ҆́кѡ пти́ца благопѣ́снива на садо́внѣ дре́вѣ, на высотꙋ̀ ᲂу҆́мъ впери́лъ є҆сѝ. тѣ́мже чꙋде́съ дѣ́йствомъ ѡ҆бога́щсѧ, преше́лъ є҆сѝ ко гдⷭ҇ꙋ, є҆го́же ѿ младе́нства вожделѣ́лъ є҆сѝ: даві́де пресла́вне, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ тѧ̀.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ, моли́сѧ прилѣ́жнѡ ѡ҆ всѣ́хъ рабѣ́хъ твои́хъ непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.
Пѣ́снь д҃. І҆рмо́съ:
Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ спастѝ пома̑занныѧ твоѧ̑ прише́лъ є҆сѝ.
Глаго́лѡвъ живото́чныхъ дх҃а послꙋ́шавъ, сла́ное житїѧ̀ ѡ҆ста́вль мо́ре, и҆ ка́плѧми сле́зъ страсте́й и҆зсꙋши́лъ є҆сѝ пото́ки.
Ра́зꙋма и҆ благода́ти и҆спо́лненъ бы́въ, ѻ҆́ч҃е даві́де, въ безмо́лвїи поиска́лъ є҆сѝ бл҃годѣ́телѧ всѣ́хъ, и҆ сегѡ̀ сїѧ̑нїѧ полꙋчи́лъ є҆сѝ.
Житїѐ твоѐ нꙋ́ждею є҆стества̀ свѣ́тлѡ показа́въ, и҆ содѣ́йствїемъ дх҃а ѿ нꙋ́ждъ ѕло́бныхъ человѣ́ки и҆зба́вилъ є҆сѝ, прпⷣбне.
Бг҃оро́диченъ:
Пое́мъ тѧ̀, всепѣ́таѧ влⷣчце, препѣ́таго бг҃а несказа́ннѡ ро́ждшꙋю, и҆ ли́ки а҆́гг҃льскїѧ несравни́тельнѡ добро́тою преше́дшꙋю.
Пѣ́снь є҃. І҆рмо́съ:
Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ.
Просте́ръ твоѝ ѻ҆́чи и҆ помышлє́нїѧ, ко и҆́же на дре́вѣ просте́ршемꙋсѧ, на садо́внѣ дре́вѣ претерпѣ́лъ є҆сѝ, зно́емъ пожига́емь, ѻ҆́ч҃е, и҆ стꙋ́денїю померза́емь.
Ве́сь молнїезра́ченъ ꙗ҆ви́лсѧ є҆сѝ, прпⷣбне, ѻ҆́гнь дла́ньми, даві́де, держѧ̀, и҆ ца́рствꙋющаго кадѧ̀, чꙋ́днымъ, всебл҃же́нне, кажде́нїемъ.
Ны́нѣ не въ гада́нїихъ, нижѐ мечта́нїемъ, бжⷭ҇твеннꙋю добро́тꙋ зри́ши, всеблаже́нне, лице́мъ же, прпⷣбне, къ лицꙋ̀ па́че, разрѣ́шшымсѧ зерца́лѡмъ.
Гре́знъ прекра́сенъ бжⷭ҇твеннагѡ, дв҃де прпⷣбне, вїногра́да ꙗ҆ви́лсѧ є҆сѝ, и҆сточа́ѧ вїно̀ ᲂу҆миле́нїѧ, ѿ пїѧ́нства, ѻ҆́ч҃е, страсте́й ѡ҆б̾юродѣ́вшымъ.
Бг҃оро́диченъ:
Напра́ви жи́знь мою̀, и҆ движє́нїѧ ᲂу҆́мнаѧ, бг҃ороди́тельнице, къ бжⷭ҇твенномꙋ хотѣ́нїю, и҆зъ тебє̀ неизрече́ннѡ къ на́мъ прише́дшагѡ.
Пѣ́снь ѕ҃. І҆рмо́съ:
Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ благоꙋтро́бенъ.
Хра́мъ бжⷭ҇твеннагѡ дх҃а позна́лсѧ є҆сѝ, прпⷣбне даві́де, въ ма́лѣ хра́минѣ затворе́нъ, и҆ тѣ́сною простра́ннꙋю и҆скꙋпꙋ́ѧ.
Зако́нѡмъ влⷣки преклони́лъ є҆сѝ, ѻ҆́ч҃е, твою̀ дꙋ́шꙋ, и҆ свѣ́та и҆спо́лненъ бы́лъ є҆сѝ, и҆ прїи́мникъ дарова́нїй дх҃а.
Чꙋдесы̀ житїѐ твоѐ, бг҃оно́се ѻ҆́ч҃е, вои́стиннꙋ ᲂу҆кра́шено концє́мъ ꙗ҆ви́сѧ. тѣ́мже вѣ́рнѡ восхвалѧ́емъ тѧ̀.
Бг҃оро́диченъ:
Ѿ чⷭ҇тыхъ крове́й твои́хъ и҆стка́сѧ пло́ть, па́че є҆стества̀, созда́вшемꙋ человѣ́ка, бцⷣе. тѣ́мже досто́йнѡ пое́мъ тѧ̀.
Конда́къ, гла́съ а҃. Подо́бенъ: Ли́къ а҆́гг҃льскїй:
Са́дъ присноцвѣтꙋ́щь, добродѣ́телей плоды̀ приносѧ́й, ꙗ҆ви́лсѧ є҆сѝ на садо́внѣ дре́вѣ, ꙗ҆́кѡ благопѣ́сниваѧ пти́ца: ра́й же па́че, жи́зни дре́во гдⷭ҇а въ се́рдцы твое́мъ прїе́мъ, ꙗ҆́кѡ воздѣ́лавъ, бг҃омꙋ́дре, и҆́мже пита́еши на́съ бл҃года́тїю: при́снѡ молѝ ѡ҆ на́съ, даві́де всеблаже́нне.
І҆́косъ:
Сласте́й мои́хъ пе́щь вжига́етъ мѝ вѣ́чный пла́мень прпⷣбне даві́де, погасѝ моли́твами твои́ми, ꙗ҆́коже многотекꙋ́щими слеза́ми твои́ми, вже́гъ ᲂу҆́глїе любвѐ, блаже́нне, зижди́телѧ моегѡ̀, ꙗ҆́коже дре́вле въ рꙋкꙋ̀ твоє́ю носи́въ ꙗ҆́кѡ же́ртвꙋ, и҆ царѧ̀ ᲂу҆диви́лъ є҆сѝ, ꙗ҆́кѡ да пою̀ тебѐ, свѣтоно́сче, даві́де всеблаже́нне.
Пѣ́снь з҃. І҆рмо́съ:
Превозноси́мый ѻ҆ц҃є́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.
Стоѧ́лъ є҆сѝ неꙋкло́ннѡ на вѣ́твѣхъ са́да, прпⷣбне, напоє́нїи сле́зъ твои́хъ ча́стѡ напоѧ́ѧ, и҆ поѧ̀ немо́лчнѡ: бж҃е, благослове́нъ є҆сѝ.
Всѐ твоѐ жела́нїе къ бг҃ꙋ просте́рлъ є҆сѝ, всѐ се́рдце твоѐ прїѧ́телище сотвори́лъ є҆сѝ бж҃е́ственныхъ дарова́нїй, бг҃оно́се, воспѣва́ѧ: бж҃е, благослове́нъ є҆сѝ.
Тѧ̀ свѣтови́дна, ѻ҆́ч҃е, бы́вша, ᲂу҆́глїе держа́ща въ рꙋкꙋ̀, ꙗ҆́кѡ ви́дѣ ца́рь ᲂу҆диви́сѧ, и҆ нога́мъ твои̑мъ поклони́сѧ.
Бг҃оро́диченъ:
Разрѣши́сѧ ржⷭ҇тво́мъ твои́мъ клѧ́тва человѣ́ча, є҆ди́на всебл҃гослове́ннаѧ: тѣ́мже тѧ̀ славосло́вимъ, ꙗ҆́кѡ бл҃года́тнꙋю, бцⷣе, во вѣ́ки.
Пѣ́снь и҃. І҆рмо́съ:
Тебѣ̀ вседѣ́телю, въ пещѝ ѻ҆́троцы всемі́рный ли́къ спле́тше поѧ́хꙋ: дѣла̀ всѧ̑каѧ, гдⷭ҇а по́йте, и҆ превозноси́те во всѧ̑ вѣ́ки.
Оу҆́тро разꙋ́мное сꙋ́щымъ во тмѣ̀ ꙗ҆ви́лсѧ є҆сѝ житїѧ̀, блаже́нне, свѣ́тъ разꙋмѣ́нїѧ всѣ̑мъ ѡ҆зарѧ́ѧ, любо́вїю тѧ̀ чтꙋ́щымъ, и҆ превозносѧ́щымъ хрⷭ҇та̀ во всѧ̑ вѣ́ки.
Бы́лъ є҆сѝ пра́въ и҆ смире́нъ и҆ кро́токъ, даві́да тезоимени́таго и҆з̾ѡбража́ѧ вѣ́рнѡ. тѣ́мже съ ни́мъ зе́млю кро́ткихъ, ѻ҆́ч҃е, наслѣ́довалъ є҆сѝ во всѧ̑ вѣ́ки.
Бг҃осїѧ́ненъ мона́шествꙋющихъ сто́лпъ, даві́де блаже́нный, прⷪ҇ро́къ бжⷭ҇твенъ дрꙋгі́й ꙗ҆ви́лсѧ є҆сѝ, бꙋ̑дꙋщаѧ предглаго́лѧ бжⷭ҇твєннаѧ ꙗ҆влє́нїѧ дх҃а бжⷭ҇твеннагѡ.
Бг҃оро́диченъ:
Тѧ̀ добро́тꙋ і҆а́кѡвлю, дв҃о, бг҃ъ ю҆́же возлюбѝ, ю҆́же и҆збра̀, всѝ ꙗ҆́кѡ є҆ди́нꙋ бл҃гослове́ннꙋю, пѣсносло́вимъ во всѧ̑ вѣ́ки.
Пѣ́снь ѳ҃. І҆рмо́съ:
И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Свѧще́нное торжество̀ соше́дшесѧ дне́сь вѣ́рнїи соверши́мъ, свѧще́ннагѡ всѝ ѻ҆тца̀, воздержа́нїемъ возсїѧ́вшагѡ, и҆ себѐ всего̀ бг҃ꙋ ѡ҆свѧти́вшагѡ житїе́мъ соверше́нїѧ.
Ꙗ҆́коже дре́во насади́лсѧ є҆сѝ на вода́хъ, прпⷣбне, то́ки дꙋхо́вныхъ добродѣ́телей носѧ̀ плоды̀: на садо́внѣ же дре́вѣ водрꙋзи́въ ꙗ҆́кѡ ѻ҆ре́лъ, ѻ҆́ч҃е, гнѣздо̀, къ нбⷭ҇нымъ тво́й ᲂу҆́мъ впери́лъ є҆сѝ.
Тво́й проро́чески ᲂу҆зрѣ́въ, даві́де, и҆схо́дъ, провозглаша́еши сі́й лю́демъ, є҆гда̀ посыла́емь, є҆́же на ни́хъ поста́вилъ є҆сѝ, мꙋ́дре, ца́рствꙋющагѡ мно́гое негодова́нїе.
Ст҃а́ѧ па́мѧть твоѧ̀ ѡ҆свѧща́етъ дне́сь на́съ, творѧ́щихъ сїю̀ вѣ́рнѡ, прпⷣбне даві́де: свѧ́тѡ бо препроводи́лъ є҆сѝ твою̀, свѧ́те, жи́знь, и҆ по ᲂу҆спе́нїи ра́дꙋешисѧ со ст҃ы́ми при́снѡ.
Бг҃оро́диченъ:
Свѣтоно́снꙋ две́рь тѧ̀ предзрѧ́ше і҆езекі́иль, є҆́юже про́йде свѣ́тъ и҆́стинный хрⷭ҇то́съ бг҃ъ на́шъ: є҆го́же прилѣ́жнѡ молѝ, чⷭ҇таѧ, покаѧ́нїѧ мѝ двє́ри ѿве́рсти, молю́сѧ.
Свѣти́ленъ. Подо́бенъ: Жєны̀ ᲂу҆слы́шите:
Мїрска́гѡ весе́лїѧ ꙗ҆́кѡ ѿ скве́рны ᲂу҆клони́лсѧ є҆сѝ, и҆ неѧде́нїемъ пло́ть ᲂу҆вѧди́въ, ѡ҆бнови́лъ є҆сѝ дꙋшѝ крѣ́пость, прпⷣбне, сла́вою ѡ҆богати́лсѧ є҆сѝ нбⷭ҇ною, сла́вне. тѣ́мже молѧ̀ не преста́й ѡ҆ на́съ гдⷭ҇а.
Бг҃оро́диченъ:
Вои́стиннꙋ бцⷣꙋ тѧ̀ и҆сповѣ́дꙋемъ, влⷣчце, тобо́ю спа́сшїисѧ: и҆́бо гдⷭ҇а неизрече́ннѡ родила̀ є҆сѝ, разо́ршаго кресто́мъ сме́рть, къ себѣ́ же привле́кша прпⷣбныхъ собо́ры, съ ни́миже тѧ̀ восхвалѧ́емъ, дв҃о.
На стїхо́внѣ, ѻ҆ктѡ́иха. Сла́ва, гла́съ є҃:
Прпⷣбне ѻ҆́ч҃е, не да́лъ є҆сѝ сна̀ твои́ма ѻ҆чи́ма, ни вѣ́ждома дрема́нїѧ, до́ндеже дꙋ́шꙋ и҆ тѣ́ло ѿ страсте́й свободи́лъ є҆сѝ, и҆ себѐ ᲂу҆гото́валъ є҆сѝ дх҃ꙋ жили́ще: прише́дъ бо хрⷭ҇то́съ со ѻ҆ц҃е́мъ, ѻ҆би́тель въ тебѣ̀ сотворѝ, и҆ є҆диносꙋ́щныѧ трⷪ҇цы ᲂу҆го́дникъ бы́въ, великопроповѣ́дниче ѻ҆́ч҃е на́шъ даві́де, молѝ спасти́сѧ на́мъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Подо́бенъ: Ра́дꙋйсѧ:
Є҆гда̀ гро́здъ ненасажде́нъ сꙋ́щъ, ꙗ҆́кѡ лоза̀ ѿрасти́ла є҆сѝ, ᲂу҆зрѣ́вши на дре́вѣ повѣ́шена, прободе́на же копїе́мъ въ бжⷭ҇твєннаѧ ре́бра: что̀ сїѐ, гл҃го́лаше, сн҃е и҆ бж҃е мо́й; ка́кѡ, и҆́же недꙋ́ги всѧ̑ и҆ стра̑сти и҆сцѣлѧ́ѧй, стрⷭ҇ти терпи́ши, безстра́стенъ сы́й по є҆стествꙋ̀ бжⷭ҇твенномꙋ; что́ ти безблагода́тнїи лю́дїе бл҃года́телю сїѧ̑ возда́ша вмѣ́стѡ благодѣѧ́нїй, вопїѧ́ше пречⷭ҇таѧ; но тогѡ̀ стрⷭ҇тьмѝ, страсте́й мѧ̀ свободи́ти молѝ непреста́ннѡ, ꙗ҆́кѡ да сла́влю тѧ̀.
Слꙋ́жба ꙗ҆вле́нїю і҆кѡ́ны прест҃ы́ѧ влⷣчцы на́шеѧ бцⷣы и҆ приснодв҃ы марі́и, тѵ́хфинскїѧ.
На ма́лѣй вече́рни, на Гдⷭ҇и, воззва́хъ, стїхи̑ры, гла́съ а҃.
Подо́бенъ: Нбⷭ҇ныхъ чинѡ́въ:
Нбⷭ҇ныѧ си̑лы ра́дꙋютсѧ ꙳ ѡ҆ пресла́вныхъ благодѣѧ́нїихъ бг҃ома́тере, ꙳ и҆ къ весе́лїю зємны́ѧ дꙋхо́вномꙋ призыва́юще, ꙳ спасе́нїе мі́рꙋ сїю̀ показꙋ́ютъ, ꙳ и҆ все́й рѡссі́йстѣй странѣ̀ ꙳ тве́рдое ѡ҆гражде́нїе и҆ защище́нїе.
Ѡ҆ твое́мъ, влⷣчце, ꙗ҆вле́нїи пресла́вномъ ꙳ ᲂу҆ми́льни бы́вше лю́дїе, вкꙋ́пѣ же и҆ ра́достни, ꙳ ꙗ҆́кѡ чꙋде́съ сокро́вище, ꙳ пречⷭ҇тый тво́й ѻ҆́бразъ лобыза́ютъ, ꙳ бж҃їею благода́тїю просвѣща́ющъ вѣ̑рныѧ, ꙳ и҆ ѿ бѣ́дъ и҆збавлѧ́ющъ съ любо́вїю притека́ющыѧ.
Съ пресла́вными чи́нми а҆́гг҃льскими ꙳ дне́сь вѣ́рнїи дꙋхо́внѣ весели́мсѧ, ꙳ свѣ́тлѡ пра́зднꙋюще ꙳ пресвѣ́тлое торжество̀ бг҃ома́тере: ꙳ пречⷭ҇тый бо є҆ѧ̀ ѻ҆́бразъ, ꙳ ꙗ҆́кѡ и҆сто́чникъ приснотекꙋ́щїй ꙗ҆ви́сѧ, ꙳ и҆сцѣле́нїй незави́стныѧ да́ры при́снѡ мі́рꙋ и҆сточа́ющїй.
Сла́ва, и҆ ны́нѣ, гла́съ є҃:
Стра́нно чꙋ́до ꙗ҆вле́нїѧ ѻ҆́браза твоегѡ̀, влⷣчце, и҆ несказа́нно: ᲂу҆дивлѧ́етъ премі̑рнаѧ и҆ ᲂу҆жаса́етъ земна̑ѧ, вкꙋ́пѣ же и҆ просвѣща́етъ свѣтоно́сною бл҃года́тїю, ро́ждшагѡсѧ ѿ тебє̀ хрⷭ҇та̀ бг҃а на́шегѡ, и҆ твое́ю. є҆го́же молѝ, чⷭ҇таѧ, въ бжⷭ҇твеннѣмъ торжествѣ̀ твое́мъ, пода́ти на́мъ просвѣще́нїе и҆ ве́лїю ми́лость.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Ѽ всенепоро́чнаѧ дв҃о, ꙳ ко́е тебѣ̀ принесе́мъ благодаре́нїе; ꙳ ꙗ҆́кѡ свѣтоза́рнымъ пречⷭ҇тыѧ твоеѧ̀, ꙳ и҆ и҆зъ тебє̀ ро́ждшагѡсѧ млⷣнца, і҆кѡ́ны ꙗ҆вле́нїемъ, ꙳ ᲂу҆тверди́ла є҆сѝ сердца̀ вѣ́рныхъ.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Ѽ прест҃а́ѧ гпⷭ҇жѐ влⷣчце! ꙳ не забꙋ́ди на́съ твоѧ̑ рабы̑, ꙳ вѣ́рою покланѧ́ющыѧсѧ чꙋдотво́рной твое́й і҆кѡ́нѣ, ꙳ и҆ благоче́стнѡ воспѣва́ющыѧ тѧ̀: ꙳ и҆ и҆зба́ви ны̀, гпⷭ҇жѐ, ѡ҆ всѣ́хъ бѣ́дъ и҆ напа́стей.
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Ѽ всепѣ́таѧ мт҃и! ꙳ ᲂу҆милосе́рдисѧ на моле́нїе на́ше: ꙳ сн҃а бо твоегѡ̀ и҆ твоѐ є҆смы̀ достоѧ́нїе, ꙳ всѧ̑ спасѝ и҆ поми́лꙋй, ꙳ да вси́ тѧ непреста́ннѡ велича́емъ.
Сла́ва, и҆ ны́нѣ:
Ти́хое приста́нище ѻ҆би́тель твоѧ̀, бг҃оневѣ́сто, ꙗ҆ви́сѧ всѣ́хъ съ вѣ́рою притека́ющихъ, и҆мꙋ́щи въ себѣ̀ пречестнꙋ́ю твою̀ і҆кѡ́нꙋ, всѣ̑мъ неѡскꙋ́днѡ бл҃года́ть подаю́щꙋю.
На вели́цѣй вече́рни.
На Гдⷭ҇и, воззва́хъ, стїхи̑ры, гла́съ в҃. Поⷣ: Кі́ими похва́льными:
Кі́ими чи́стыми ᲂу҆стна́ми ꙳ ᲂу҆блажи́мъ бцⷣꙋ, ꙳ честнѣ́йшꙋю херꙋві́мѡвъ, ꙳ и҆ ст҃ѣ́йшꙋю сꙋ́щꙋ серафі́мѡвъ, ꙳ а҆́гг҃лѡвъ же ꙳ и҆ всѣ́хъ ст҃ы́хъ сла́внѣйшꙋю, ꙳ престо́лъ цр҃е́въ непоколеби́мый, ꙳ до́мъ, въ не́мже всели́сѧ вы́шнїй, ꙳ спасе́нїе мі́ра, ꙳ бж҃їе ѡ҆свѧще́нїе, ꙳ подаю́щꙋю вѣ̑рнымъ ꙳ въ бжⷭ҇твеннѣмъ торжествѣ̀ є҆ѧ̀, ꙳ бога́тнѡ ве́лїю ми́лость.
Кі̑ѧ дꙋхѡ́вныѧ пѣ̑сни ꙳ ны́нѣ принесе́мъ тѝ, всечⷭ҇таѧ; ꙳ и҆́бо пречестны́ѧ твоеѧ̀ і҆кѡ́ны ꙳ пречꙋ́днымъ ше́ствїемъ ꙳ подсо́лнечнꙋю ѡ҆свѧти́ла є҆сѝ, ꙳ и҆ ди́внымъ є҆ѧ̀ ꙗ҆вле́нїемъ, ꙳ всю̀ рѡссі́йскꙋю странꙋ̀ ᲂу҆диви́ла є҆сѝ, ꙳ и҆ свѣтоза́рнымъ є҆ѧ̀ прише́ствїемъ ꙳ пꙋсто́е мѣ́сто и҆ непроходи́мое просвѣти́ла є҆сѝ: и҆дѣ́же и҆ ны́нѣ водворѧ́ешисѧ ꙳ бжⷭ҇твенною і҆кѡ́ною твое́ю, ꙳ всеси́льнымъ твои́мъ предста́тельствомъ ꙳ мі́рꙋ непреста́ннѡ подаю́щи ве́лїю ми́лость.
Кі̑ѧ ᲂу҆милє́нныѧ гла́сы принесо́ша тѝ тогда̀, бцⷣе, ꙳ зрѧ́щїи свѣтоно́снꙋю і҆кѡ́нꙋ твою̀, ꙳ чꙋ́днѡ на воздꙋ́сѣ стоѧ́щꙋю, ꙳ и҆ свѣтоза́рными лꙋча́ми сїѧ́ющꙋю, ꙳ благочести́вїи лю́дїе; ꙳ то́чїю съ рыда́нїемъ молѧ́хꙋсѧ; ꙳ съ пла́чемъ взыва́юще: ꙳ прїидѝ къ на́мъ, цр҃и́це, сни́ди, влⷣчце, ꙳ низпослѝ щедрѡ́ты твоегѡ̀ чл҃вѣколю́бїѧ, ꙳ посѣти́ ны свы́ше, ꙳ просвѣтѝ ѡ҆мрачє́нныѧ твои́мъ свѣтоза́рнымъ прише́ствїемъ, ꙳ и҆ неѿстꙋ́пна бꙋ́ди во вѣ́ки, ꙳ мі́рови бога́тнѡ подаю́щи ве́лїю ми́лость.
Что́ ти принесе́мъ, прест҃а́ѧ дв҃о, ꙳ за мно́гꙋю твою̀ бл҃госты́ню и҆ чл҃вѣколю́бїе; ꙳ ꙗ҆́кѡ пресла́внѡ по воздꙋ́хꙋ ꙳ низпосла́ла є҆сѝ землѝ рѡссі́йстѣй ꙳ бжⷭ҇твенное твоѐ дарова́нїе, ꙳ многочꙋде́снꙋю твою̀ і҆кѡ́нꙋ, бг҃оѻтрокови́це чⷭ҇таѧ: ꙳ ѿ неѧ́же бж҃їею бл҃года́тїю ꙳ чꙋдесы̀ происходѧ́щими ꙳ бѣ́дъ и҆збавлѧ́емсѧ, ꙳ и҆ и҆з̾ѻби́льнѡ прїе́млемъ ꙳ дꙋша́мъ же и҆ тѣ́лѡмъ ѿ всѧ́кихъ болѣ́зней ꙳ и҆сцѣле́нїе, и҆ непреста́ннѡ почерпа́емъ ве́лїю ми́лость.
И҆́ны стїхи̑ры, гла́съ є҃. Подо́бенъ: Ра́дꙋйсѧ:
Ра́дꙋйсѧ, наде́жда на́ша, бцⷣе чⷭ҇таѧ: ра́дꙋйсѧ: ра́дость а҆́гг҃ломъ прїи́мшаѧ: ра́дꙋйсѧ, ро́ждшаѧ ѻ҆́ч҃ее сїѧ́нїе: ра́дꙋйсѧ, бл҃гослове́ннаѧ чⷭ҇таѧ прест҃а́ѧ дв҃о, є҆ди́на всепѣ́таѧ: ра́дꙋйсѧ, хрⷭ҇тїа́нѡмъ въ бѣда́хъ ско́раѧ помо́щнице, и҆ те́плаѧ застꙋ́пнице: ра́дꙋйсѧ, правосла́вїѧ похвало̀ высо́каѧ, и҆ сла́во превознесе́ннаѧ, ро́ждшаѧ па́стырѧ до́браго, на́съ заблꙋ́ждшихъ взыска́вшаго, и҆ грѣхо́вными плени́цами свѧ́занныхъ разрѣши́вшаго, подаю́щаго мі́рови ве́лїю ми́лость.
Ра́дꙋйсѧ, прест҃а́ѧ дв҃о, спасе́нїѧ на́шегѡ хода́таица. ты̀ и҆сточи́ла є҆сѝ всѣ̑мъ ра́дость и҆ бл҃гослове́нїе, ро́ждши безъ сѣ́мене пло́тїю и҆сто́чникъ бла̑гъ, краснѣ́йшаго добро́тою па́че всѣ́хъ сынѡ́въ человѣ́ческихъ, і҆и҃са всегѡ̀ мі́ра и҆зба́вителѧ, и҆ на пречⷭ҇тꙋю рꙋкꙋ̀ твоє́ю того̀ носи́ла є҆сѝ, и҆ ны́нѣ пречⷭ҇тымъ ѻ҆́бразомъ ви́димъ є҆го̀ человѣколю́бнѣ, и҆ свѣтоза́рнѡ съ тобо́ю прише́дша къ на́мъ на и҆сцѣле́нїе не́мощей тѣле́сныхъ, и҆ во спасе́нїе дꙋ́шъ на́шихъ.
Ра́дꙋйсѧ дне́сь, рѡссі́йскаѧ землѧ̀ хрⷭ҇толюби́ваѧ: сла́ва бо гдⷭ҇нѧ на тебѣ̀ возсїѧ̀, пресла́внымъ ꙗ҆вле́нїемъ і҆кѡ́ны бг҃ома́тере: лꙋчено́снѡ бо къ тебѣ̀ прїи́де ди́внѡ по воздꙋ́хꙋ, всѣ́хъ бг҃а про́мысломъ. ликꙋ́й ны́нѣ, и҆ весели́сѧ, вели́кїй новъгра́де, ꙗ҆́кѡ воспрїѧ́лъ є҆сѝ въ предѣ́лѣ ѻ҆́бласти твоеѧ̀, свы́ше просїѧ́вшꙋю бжⷭ҇твеннꙋю зарю̀, чꙋде́съ бл҃года́ть и҆злива́ющꙋю. красꙋ́йсѧ и҆ свѣ́тлѡ торжествꙋ́й, пречестна́ѧ ѻ҆би́тель бг҃ома́тере, ꙗ҆́кѡ ᲂу҆ѧсни́сѧ твоѧ̀ добро́та прекра́снѡ: и҆мѣ́еши бо въ себѣ̀ ве́лїе вселе́нныѧ сокро́вище, чꙋ́днꙋю і҆кѡ́нꙋ влⷣчцы, пресла́внѡ по а҆е́рꙋ прише́дшꙋю, да́рꙋющїѧ всѣ̑мъ вѣ̑рнымъ ве́лїю ми́лость.
Сла́ва, и҆ ны́нѣ, гла́съ ѕ҃:
Дне́сь ра́дꙋетсѧ вѣ́рныхъ мно́жество, ꙗ҆ви́босѧ бж҃е́ственнаѧ і҆кѡ́на твоѧ̀, влⷣчце, на воздꙋ́сѣ, ꙗ҆́кѡ многосвѣ́тлое со́лнце, свѣ́томъ ве́лїимъ сїѧ́ющи, и҆ лꙋчы̀ ми́лости повсю́дꙋ и҆спꙋща́ющи, всѧ̑ вѣ̑рныѧ просвѣща́етъ. дне́сь ликовствꙋ́юще а҆́гг҃ли тебѣ̀ слꙋ́жатъ, и҆ почита́юще тѧ̀ ѿ мѣ́ста на мѣ́сто неви́димѡ і҆кѡ́нꙋ твою̀ преноси́ша, бг҃ома́ти: доне́сше же бг҃оизбра́ннагѡ мѣ́ста, благоговѣ́йнѡ поста́виша съ досто́йными славословлє́нїи. мы́ же что́ ти принесе́мъ бре́ннїи; и҆ ко́е благохвале́нїе прише́ствїю твоемꙋ̀ сотвори́мъ; недоꙋмѣва́емъ, то́чїю ᲂу҆дивлѧ́емсѧ, велича́юще твоѐ милосе́рдїе, є҆́же на на́съ показа́ла є҆сѝ. но, ѽ прест҃а́ѧ, моли́сѧ прилѣ́жнѡ сн҃ꙋ твоемꙋ̀ и҆ бг҃ꙋ на́шемꙋ, дарова́ти ѻ҆те́чествꙋ на́шемꙋ на врагѝ побѣ̑ды, и҆ мі́рꙋ ᲂу҆мире́нїе, и҆ дꙋша́мъ на́шымъ ве́лїю ми́лость.
Вхо́дъ. Прокі́менъ днѐ. Чтє́нїѧ трѝ, пи́саны сегѡ̀ мѣ́сѧца въ к҃г де́нь.
На лїті́и стїхи̑ры, гла́съ г҃:
Прїиди́те всѝ празднолю́бцы, чꙋ́дное ꙗ҆вле́нїе і҆кѡ́ны бж҃їѧ мт҃ре ᲂу҆блажи́мъ: пресла́внѡ бо и҆ бг҃олѣ́пнѡ возсїѧ̀, є҆ѧ́же ст҃ы́мъ ꙗ҆вле́нїемъ мі́ръ просвѣще́нъ бы́сть. тѣ́мъ ᲂу҆сты̀ и҆ сердцы̀, и҆ пѣ́сньми и҆ пѣ̑нїи дꙋхо́вными, се́й ст҃ы́й де́нь со всѣ́ми притека́ющими пра́зднꙋемъ свѣ́тлѡ.
Гла́съ и҃:
Пе́рвѣе написа́вшейсѧ твое́й і҆кѡ́нѣ, є҆ѵⷢ҇льскихъ та̑инъ благовѣ́стникомъ, и҆ къ тебѣ̀ цр҃и́цѣ принесе́ннѣй, да ᲂу҆сво́иши тꙋ̀, и҆ си́льнꙋ содѣ́лаеши спастѝ чествꙋ́ющыѧ тѧ̀. и҆ пора́доваласѧ є҆сѝ ꙗ҆́кѡ сꙋ́щи ми́лостива спасе́нїѧ на́шегѡ содѣ́тельница, ꙗ҆́кѡ ᲂу҆ста̀ и҆ гла́съ і҆кѡ́нѣ бы́вши, ꙗ҆́коже и҆ бг҃а внегда̀ зачина́ющи во чре́вѣ, пѣ́снь воспѣ́ла є҆сѝ: сѐ ѿ ны́нѣ ᲂу҆блажа́тъ мѧ̀ всѝ ро́ди. и҆ на тꙋ̀ зрѧ́щи гл҃го́лала є҆сѝ со вла́стїю: съ си́мъ ѻ҆́бразомъ бл҃года́ть моѧ̀ и҆ си́ла. и҆ мы̀ и҆́стиннѡ вѣ́рꙋемъ, ꙗ҆́кѡ сѐ рекла̀ є҆сѝ, гпⷭ҇жѐ, си́мъ ѻ҆́бразомъ съ на́ми є҆сѝ. тѣ́мъ благоговѣ́йнѡ предстоѧ́ше, покланѧ́емсѧ тебѣ̀ рабѝ твоѝ, посѣти́ ны твои́ми мт҃ерними щедро́тами.
Кто̀ досто́йнѡ возмо́жетъ и҆сповѣ́дати чꙋде́съ твои́хъ, чⷭ҇таѧ, глꙋбинꙋ̀ превели́кꙋю; твои́мъ бо милосе́рднымъ присѣще́нїемъ, пꙋсты́нѧ свы́ше прїѧ́тъ і҆кѡ́нꙋ твою̀ чꙋ́днꙋю: тогда́ же тѧ̀, влⷣчце, со ст҃и́телемъ нїкола́емъ, свѣтоза́рнѡ въ пꙋсты́ни бесѣ́дꙋющꙋ ᲂу҆зрѣ̀ мꙋ́жъ благоговѣ́йный, и҆́же зрѣ́ти не терпѧ̀ неизрече́ннагѡ твоегѡ̀ сїѧ́нїѧ, на зе́млю ни́цъ па́дъ, ника́коже зрѣ́ти можа́ше, до́ндеже возста́ви є҆го̀ ст҃и́тель ѻ҆́нъ чꙋ́дный, ѿ стра́ха чл҃вѣколю́бнѣ ᲂу҆крѣплѧ́ѧ є҆го̀. ты́ же, чⷭ҇таѧ, свѣ́томъ ми́лости твоеѧ̀ сего̀ просвѣ́щши, крⷭ҇тнагѡ ᲂу҆твержде́нїѧ благоволе́нїе твоѐ соверши́ти повелѣ́ла є҆сѝ въ по́льзꙋ вѣ́рныхъ спасе́нїѧ.
Гла́съ д҃:
Да ка́плютъ сла́дость ѻ҆́блацы, и҆ всѧ̀ землѧ̀ да возра́дꙋетсѧ ра́достнѡ ѡ҆ неизрече́ннѣй ми́лости твое́й, пречⷭ҇таѧ. чꙋ́до бо зри́мо є҆́сть, влⷣчце, ди́вное, ꙗ҆́кѡ пре́жде пꙋсты́нѧ всѧ́кагѡ ѡ҆бнаже́на благолѣ́пїѧ, и҆ ники́мже проходи́ма и҆ зна́ема: ны́нѣ же твои́мъ, бг҃ома́ти, присѣще́нїемъ, мѣ́сто пресла́вно, и҆ ѻ҆би́тель ꙗ҆́кѡ гра́дъ прекра́сенъ ꙗ҆влѧ́етсѧ, и҆ хра́мъ присносвѣ́телъ, въ не́мже бжⷭ҇твенное сокро́вище чꙋ́днаѧ і҆кѡ́на твоѧ̀, бцⷣе, показꙋ́етсѧ. є҆ѧ́же мы̀ зрѧ́ще благолѣ́пїе, и҆ ᲂу҆се́рднѡ покланѧ́ющесѧ, ра́достїю и҆ стра́хомъ цѣлꙋ́емъ ю҆̀, стра́хомъ грѣха̀ ра́ди, ꙗ҆́кѡ недосто́йни сꙋ́ще: ра́достїю же ми́лости ра́ди, ю҆́же подае́ши на́мъ рабѡ́мъ твои̑мъ, ꙗ҆́кѡ милосе́рда.
Влⷣчце бл҃га́ѧ, мі́рꙋ держа́внаѧ помо́щнице, ᲂу҆крѣпѝ сла́вѧщее тѧ̀ ѻ҆те́чество на врагѝ, ꙗ҆́коже и҆ногда̀ кро́ткаго даві́да на проти̑вныѧ. и҆ ꙗ҆́коже дре́вле спасла̀ є҆сѝ ца́рскїй гра́дъ ѿ и҆ноплеме́нныхъ нахожде́нїѧ: та́кѡ и҆ ны́нѣ спасѝ странꙋ̀ рѡссі́йскꙋю ѿ проти́вныхъ наше́ствїѧ, и҆ соблюдѝ ѿ всѣ́хъ навѣ̑тъ вра́жїихъ: ты́ бо, бг҃оневѣ́стнаѧ, всѣ́хъ вѣ́рныхъ съ бг҃омъ покро́въ и҆ спасе́нїе.
Сла́ва, и҆ ны́нѣ, гла́съ є҃:
Рѡссі́йскаѧ страна̀ дне́сь весели́тсѧ съ вы́шними си́лами, свы́ше ѡ҆богати́вшисѧ і҆кѡ́ною бг҃ома́тере, и҆ хрⷭ҇толюби́вое ста́до вопїе́тъ созыва́ющи: прїиди́те, вѣ́рнїи, просвѣти́тесѧ въ свѣ́тломъ торжествѣ̀ бцⷣы. прїиди́те, празднолю́бцы, возвесели́тесѧ въ чꙋде́снѣмъ пра́здницѣ ѻ҆́бщїѧ всѣ́хъ влⷣчцы. прїиди́те, и҆ ви́дите бжⷭ҇твенное сокро́вище, всѣ̑мъ чꙋде́съ да́ры ѻ҆би́льнѡ подаю́щее. что̀ ᲂу҆̀бо воздади́мъ гдⷭ҇еви, сицево́е чл҃вѣколю́бїе на́мъ ꙗ҆ви́вшемꙋ, пречⷭ҇тый сво́й, и҆ є҆го̀ ро́ждшїѧ ѻ҆́бразъ, ꙗ҆́кѡ нбⷭ҇ный да́ръ на́мъ низспосла́вшемꙋ, и҆ вѣ́рныхъ просвѣти́вшемꙋ; тѣ́мже наслажда́ющесѧ ве́лїѧ тогѡ̀ милосе́рдїѧ, ра́достнѡ томꙋ̀ возсыла́емъ гла́сы благода̑рныѧ, ро́ждшей того̀ ве́селѡ воспѣва́юще: сла́ва, влⷣчце, вопло́щшемꙋсѧ и҆зъ тебє̀ хрⷭ҇тꙋ̀ бг҃ꙋ на́шемꙋ, таковы́ѧ бл҃года́ти на́съ сподо́бльшемꙋ.
На стїхо́внѣ стїхи̑ры, гла́съ в҃. Подо́бенъ: Є҆гда̀ ѿ дре́ва:
Є҆гда̀ ви́дѣ мѡѷсе́й кꙋпинꙋ̀ горѧ́щꙋ и҆ не ѡ҆палѧ́емꙋ, проѡбразꙋ́ющꙋ въ твою̀ пречⷭ҇тꙋю, дв҃о, ᲂу҆тро́бꙋ бж҃е́ственнагѡ ѻ҆гнѧ̀ вселе́нїе, тогда̀ стра́хомъ ѡ҆держа́шесѧ, та́инствꙋ ᲂу҆дивлѧ́ѧсѧ: си́це и҆ ны́нѣ лю́дїе твоѝ, влⷣчце, зрѧ́ще пречⷭ҇тый тво́й ѻ҆́бразъ, воплоти́вшагѡсѧ ѿ тебє̀ бл҃говоле́нїемъ, ѿ веще́ственнагѡ ѻ҆гнѧ̀, невеще́ственною бжⷭ҇твенною си́лою, неѡпали́мь, и҆ бл҃года́тїю па́че со́лнца сїѧ́ющь, и҆ вѣ́рныхъ сердца̀ просвѣща́ющь, ра́достнѡ сн҃ꙋ твоемꙋ̀ вопїѧ́хꙋ, глаго́люще: сла́ва, чл҃вѣколю́бче, твоемꙋ̀ милосе́рдїю.
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Є҆гда̀ ᲂу҆жа́снѡ, влⷣчце, и҆ тре́петнѡ, покры̀ ка́менїе твоегѡ̀ хра́ма зда́тели, тогда̀ лю́дїе ско́рбїю ᲂу҆ѧзви́шасѧ, ча́юще, ꙗ҆́кѡ ті́и ме́ртви сꙋ́ть: но, ѽ чꙋдесѐ пресла́внагѡ! ꙗ҆́коже бо дре́вле сло́во бж҃їе и҆ бг҃ъ всѣ́хъ, и҆зъ тебє̀ и҆зво́ливый воплоти́тисѧ, всепѣ́таѧ, тридне́внѡ і҆ѡ́нꙋ соблюдѐ неврежде́нна во чре́вѣ ки́товѣ: си́це и҆ ны́нѣ твои́мъ предста́тельствомъ чꙋдодѣ́йствова, по тридне́вномъ тѣ́хъ каменозавале́нїи, жи̑вы и҆ неврє́дны сохранѝ и҆̀хъ, и҆ ра́достїю всѧ̑ пѣ́ти наꙋчѝ: сла́ва є҆гѡ̀ чл҃вѣколю́бномꙋ щедро́тъ мно́жествꙋ, прославлѧ́ющемꙋ тебѐ безъ сѣ́мене ро́ждшꙋю.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Є҆гда̀ по мно́зѣй ско́рби, бл҃года́тнаѧ, лю́дїе хотѣ́ша пе́рсти преда́ти ѻ҆́ныѧ зда́тели, пребы́вшыѧ подъ ка́менїемъ тридне́вное вре́мѧ: тогда̀ сн҃ꙋ и҆ бг҃ꙋ твоемꙋ̀ и҆зво́лившꙋ, па́че просла́вити твоѐ во ст҃ѣ́й ѻ҆би́тели предста́тельство, жи̑вы и҆ безврє́дны ѡ҆брѣто́ша ѧ҆̀ твои́мъ хране́нїемъ. сегѡ̀ ра́ди весе́лїѧ и҆спо́лншесѧ, сла́вѧхꙋ тѧ̀ съ ни́ми милосе́рдꙋю влⷣчцꙋ, и҆ ро́ждшемꙋсѧ ѿ тебє̀ съ ра́достїю вопїѧ́хꙋ: сла́ва, чл҃вѣколю́бче, твоемꙋ̀ бл҃гоꙋтро́бїю.
Сла́ва, и҆ ны́нѣ, гла́съ и҃:
Прїиди́те, всѝ вѣ́рнїи, притеце́мъ въ цр҃ковь бг҃ома́тере: се́ бо сїѧ́етъ въ не́й всечестна́ѧ є҆ѧ̀ і҆кѡ́на, ꙗ҆́кѡ свѣти́ло благоче́стїѧ, всѣ́хъ празднолю́бныхъ собо́ры, бл҃года́тїю бж҃їею просвѣща́ющи, и҆ грѣхо́внагѡ помраче́нїѧ тмꙋ̀ ѿгонѧ́ющи, чꙋдеса́ же та́мѡ притека́ющымъ пресла̑внаѧ содѣва́етъ, и҆ дꙋ́хи лꙋка́вствїѧ прогонѧ́етъ. во́инствꙋ ᲂу҆́бѡ благочести́вомꙋ на сопроти̑вныѧ крѣ́пость подава́етъ, стѣна̀ и҆ забра́ло всеѧ̀ землѝ быва́ющи, и҆ ѻ҆би́тель свою̀ застꙋпле́нїемъ си́льнымъ ᲂу҆твержда́ющи, пресла́вными на врагѝ побѣ́дами прославлѧ́етсѧ, и҆ всѧ̑ вѣ̑рныѧ торжествова́ти созыва́етъ, и҆ ра́достнѡ къ бг҃ома́тери зва́ти наꙋча́етъ: крѣ́пость на́ша и҆ ᲂу҆твержде́нїе, ᲂу҆пова́нїе и҆ спасе́нїе съ бг҃омъ, ты̀ є҆сѝ, бцⷣе. и҆ тебѣ̀ мо́лимсѧ: молѝ сн҃а твоего̀, и҆ бг҃а на́шего, да и҆зба́витъ на́съ въ де́нь сꙋ́дный мꙋче́нїѧ, и҆ сподо́битъ црⷭ҇твїѧ своегѡ̀ нбⷭ҇нагѡ.
Тропа́рь, гла́съ д҃.
Дне́сь ꙗ҆́кѡ со́лнце пресвѣ́тлое, возсїѧ̀ на́мъ на воздꙋ́сѣ, всечестна́ѧ і҆кѡ́на твоѧ̀, влⷣчце, лꙋча́ми ми́лости мі́ръ просвѣща́ющи, ю҆́же вели́каѧ рѡссі́а, ꙗ҆́кѡ нѣ́кїй да́ръ бжⷭ҇твенный, свы́ше благоговѣ́йнѣ воспрїе́мши, прославлѧ́етъ тѧ̀, бг҃ома́ти, всѣ́хъ влⷣчцꙋ, и҆ ѿ тебє̀ ро́ждшагосѧ хрⷭ҇та̀ бг҃а на́шего велича́етъ ра́достнѡ: є҆мꙋ́же моли́сѧ, ѽ гпⷭ҇жѐ цр҃и́це бцⷣе! да сохрани́тъ всѧ̑ гра́ды и҆ страны̑ хрⷭ҇тїа̑нскїѧ невреди̑мы ѿ всѣ́хъ навѣ̑тъ вра́жїихъ, и҆ спасе́тъ вѣ́рою покланѧ́ющихсѧ є҆гѡ̀ бжⷭ҇твенномꙋ, и҆ твоемꙋ̀ пречⷭ҇томꙋ ѻ҆́бразꙋ, дв҃о неискꙋсобра́чнаѧ.
На ᲂу҆́трени, на Бг҃ъ гдⷭ҇ь, тропа́рь, три́жды.
По а҃-мъ стїхосло́вїи сѣда́ленъ, гла́съ д҃:
Бжⷭ҇твенными зарѧ́ми просвѣтѝ пою́щыѧ тѧ̀, и҆ ᲂу҆мы̀ ᲂу҆твердѝ, дв҃о всенепоро́чнаѧ, крѣ́пкаѧ всегѡ̀ мі́ра застꙋ́пнице, да торжествꙋ́емъ всѝ любо́вїю хва́лѧще тѧ̀, и҆ пресла́вное прише́ствїе твоегѡ̀ ѻ҆́браза сла́вѧще, и҆ мо́лимъ: не преста́й, дв҃о, моли́твами твои́ми спаса́ти рабы̑ твоѧ̑ ѿ всѧ́кїѧ бѣды̀, є҆ди́на бл҃гослове́ннаѧ.
Сла́ва, и҆ ны́нѣ, то́йже, По в҃-мъ стїхосло́вїи сѣда́ленъ, гла́съ г҃:
Ꙗ҆́кѡ ѕвѣзда̀ многосвѣ́тлаѧ взы́де, и҆ пресла́внѡ ѿ восто́ка къ за́падꙋ прїи́де тво́й ѻ҆́бразъ, бг҃оневѣ́стнаѧ, сн҃а твоегѡ̀ и҆ бг҃а всемо́щною си́лою, ѡ҆зарѧ́ѧ тмо́ю скорбе́й ѡ҆держи̑мыѧ, и҆ преще́нїѧ вра̑гъ и҆збавлѧ́ѧ, и҆ тѣ́хъ сѣ̑ти разрꙋша́ѧ, предста́тельство крѣ́пкое, ѻ҆рꙋ́жїе непобѣди́мое на врагѝ мі́рꙋ всемꙋ̀ ꙗ҆влѧ́ѧсѧ: и҆зъ тебє́ бо всѣ́хъ влⷣка пло́ть прїи́мъ, ꙗ҆́кѡ сн҃ъ мт҃рь тѧ̀ свою̀, и҆ тво́й пречⷭ҇тый ѻ҆́бразъ прославлѧ́етъ.
Сла́ва, и҆ ны́нѣ, то́йже. Припѣ́въ бцⷣѣ:
Досто́йно є҆́сть велича́ти тѧ̀, бцⷣе, честнѣ́йшꙋю херꙋві̑мъ, и҆ сла́внѣйшꙋю безъ сравне́нїѧ серафі̑мъ.
Ѱало́мъ и҆збра́нный: Бж҃е, сꙋ́дъ тво́й царе́ви да́ждь:
По полѷеле́и сѣда́ленъ, гла́съ ѕ҃:
Безпомѡ́щнымъ по́мощь, ты̀ вои́стиннꙋ, пречⷭ҇таѧ бг҃ома́ти, ѿсю́дꙋ смире́ннїи тобо́ю возвыша́емсѧ, ѡ҆ тебѣ̀ высо́цѣй держи́мсѧ: всѣ̑мъ ты̀ є҆сѝ прибѣ́жище, и҆ къ бг҃ꙋ всеми́лостиваѧ хода́таица.
Сла́ва, и҆ ны́нѣ, то́йже:
Степє́нна, пе́рвый а҆нтїфѡ́нъ д҃-гѡ гла́са. Прокі́менъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ. Є҆ѵⷢ҇лїе лꙋкѝ, зача́ло д҃.
По н҃-мъ ѱалмѣ̀ стїхи́ра, гла́съ ѕ҃: Дне́сь ра́дꙋетсѧ вѣ́рныхъ мно́жество: Пи́сана на вели́цѣй вече́рни, на Гдⷭ҇и, воззва́хъ:
Канѡ́на два̀, и҃-гѡ гла́са и҆ д҃-гѡ.
Тропарѝ ѻ҆бо́ихъ канѡ́нѡвъ на двана́десѧть. І҆рмосы̀ а҃-гѡ канѡ́на по два́жды.
Канѡ́нъ а҃-й, и҆мы́й краегране́сїе сицево̀:
Ѽ бл҃года́тнаѧ! ты̀ ѡ҆благодати́ ми препро́ста сло́ва пѣ́снь.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Ѽ трⷪ҇це вседержи́тельнаѧ, и҆ є҆ди́нице трисо́лнечнаѧ! дꙋ́шꙋ мою̀ и҆ се́рдце и҆ ᲂу҆́мъ, молю̀, просвѣти́вши, и҆ бл҃года́тїю ѡ҆свѧти́вши, къ бжⷭ҇твеннѣй твое́й любвѝ, пребл҃га́ѧ, возведѝ, и҆ наста́ви благоче́стнѡ пѣ́ти благосе́рдїе приснодв҃ы бл҃гослове́нныѧ.
Бл҃га́гѡ цр҃ѧ̀ бл҃га́ѧ мт҃и, ꙗ҆́же всѣ̑мъ благопослꙋ́шнаѧ въ проше́нїихъ, и҆ всеси́льнаѧ въ благодѣѧ́нїихъ, благода́ть свѣ́та твоегѡ̀ и҆ на́мъ возсїѧ́й, и҆ ѡ҆благодатѝ дне́сь, ѽ бг҃облагода́тнаѧ! пѣ́снь тебѣ̀ пѣ́ти начина́ющыѧ.
Ликѡ́мъ а҆́гг҃льскимъ вино́вно є҆́сть ра́дости твоегѡ̀, влⷣчце, настоѧ́щагѡ торжества̀ славосло́вїе: сі́и бо дне́сь дви́жꙋтсѧ къ похвале́нїю: мы́ же бре́ннїи что́ ти принесе́мъ; то́чїю ᲂу҆сє́рднаѧ благода̑рствїѧ.
А҆рха́гг҃льскїй гла́съ пое́мъ тѝ: ра́дꙋйсѧ, чⷭ҇таѧ, а҆́ще и҆ недосто́йни є҆смы̀. за бла́гость ᲂу҆́бѡ се́й прїимѝ, влⷣчце, свѣ́томъ ми́лости твоеѧ̀ на́съ просвѣща́ющи, и҆ благода́ть всѣ̑мъ подаю́щи.
Дрꙋгі́й канѡ́нъ. Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Да́ждь мѝ, свѣтода́вче хрⷭ҇тѐ, въ наро́читый де́нь пресла́внагѡ ꙗ҆вле́нїѧ і҆кѡ́ны, ро́ждшїѧ тѧ̀, свѣ́тлѡ торжествова́ти, и҆ ве́селѡ во стра́сѣ и҆ ра́дости воспѣва́ти при́снѡ тоѧ̀ чꙋдеса̀.
Сло́во бж҃їе свѣтода́тельное, и҆ премꙋ́дрость ѻ҆́ч҃ꙋю пло́тїю, дв҃о, ро́ждшаѧ, просвѣтѝ глꙋбо́кꙋю тмꙋ̀ моегѡ̀ неразꙋ́мїѧ, и҆ сло́во мѝ пода́ждь воспѣ́ти твоѧ̑ чꙋдеса̀.
Дне́сь вѣ́рныхъ собо́ри просвѣща́ютсѧ, є҆реті́чєскаѧ же ѡ҆полчє́нїѧ посрамлѧ́ютсѧ, ви́дѧще і҆кѡ́нꙋ твою̀, влⷣчце, ꙗ҆́кѡ со́лнце по воздꙋ́хꙋ ше́ствꙋющꙋ, нече́стїѧ мглꙋ̀ потреблѧ́ющꙋ, и҆ вѣ̑рныѧ просвѣща́ющꙋ.
Є҆ди́на є҆сѝ ты̀ вели́чїе на́ше и҆ похвала̀ съ бг҃омъ, бг҃оневѣ́стнаѧ: тобо́ю бо ѿ бѣ́дъ спаса́емсѧ, и҆ къ тебѣ̀ прибѣга́емъ, и҆ прилѣ́жнѡ мо́лимсѧ: и҆зба́ви, влⷣчце, рабы̑ твоѧ̑ вѣ́чнагѡ мꙋче́нїѧ, воспѣва́ющыѧ твоѧ̑ чꙋдеса̀.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.
Грѧди́те вѣ́рнїи на пресла́вное видѣ́нїе, зри́те на высотѣ̀ благолѣ́пнѡ сїѧ́ющꙋ пречⷭ҇тымъ свои́мъ ѻ҆́бразомъ, дв҃ꙋ пречⷭ҇тꙋю, на́съ благода́тнѡ посѣща́ющꙋ, благовѣ́рнѡ пою́щихъ. нѣ́сть пречⷭ҇ты па́че тебє̀, влⷣчце.
Ѡ҆свѧща́етсѧ, бцⷣе, твое́ю благода́тїю всѧ́къ ᲂу҆́мъ вѣ́рныхъ, и҆ возвыша́етсѧ чꙋ́днымъ і҆кѡ́ны твоеѧ̀ прише́ствїемъ: ю҆́же благоче́стнѡ почита́ющихъ, и҆ тебѐ вѣ́рнѡ сла́вѧщихъ, сподо́би, влⷣчце, на́съ рабѡ́въ твои́хъ вы́шнѧгѡ прича́стїѧ.
Да́ждь на́мъ ненавѣ́тнѡ нбⷭ҇нꙋю ше́ствовати стезю̀, бг҃оневѣ́стнаѧ, на бжⷭ҇твєннаѧ дѣѧ̑нїѧ на́съ ᲂу҆крѣплѧ́ющи: ꙗ҆́кѡ да твои́мъ, дв҃о, застꙋпле́нїемъ, ѕлоко́зненнагѡ пꙋте́й ᲂу҆кло́ншесѧ, присносꙋ́щныѧ сла́вы бꙋ́демъ ѻ҆́бщницы.
А҆́гг҃лѡвъ творца̀, и҆́стиннагѡ свѣ́та хрⷭ҇та̀, неизрече́ннѡ и҆зъ тебє̀, бг҃ома́ти, возсїѧ́вшагѡ лꙋча́ми, ѡ҆мрачє́нныѧ на́шѧ дꙋ́шы и҆ сердца̀ просвѣтѝ, и҆ бл҃года́тїю твое́ю, ѽ благода́тнаѧ! ѡ҆свѧтѝ, къ го́рнѧгѡ свѣ́та раче́нїю наставлѧ́ющи.
И҆́нъ. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣи твое́й сла́вѣ вѣнцє́въ сла́вы сподо́би.
Хрⷭ҇тѐ і҆и҃се, превѣ́чный цр҃ю̀ и҆ многоми́лостиве, пречⷭ҇тна́гѡ твоегѡ̀ ѻ҆́браза, и҆ ро́ждшїѧ тѧ̀ приснодв҃ы, просвѣтѝ на́съ ꙗ҆вле́нїемъ, и҆ пода́ждь на́мъ согрѣше́нїй ѡ҆ставле́нїе, и҆ ѿ бѣ́дъ и҆збавле́нїе.
Є҆гда̀ а҆́гг҃лами неви́димѡ носи́мꙋ пречⷭ҇тнꙋ́ю твою̀ і҆кѡ́нꙋ, влⷣчце, и҆ свѣтоза́рнѡ стоѧ́щꙋ на воздꙋ́сѣ лю́дїе ви́дѣша, тогда̀ просвѣти́вшесѧ свѣ́томъ твоеѧ̀ ми́лости, ра́дости неизглаго́ланныѧ и҆спо́лнишасѧ.
Ѽ бг҃олюби́вїи ст҃и́телїе и҆ свѧще́нницы, мона́си и҆ прості́и, и҆ наро́ди всѝ, свѣ́тлѡ ликовствꙋ́йте дне́сь, ꙗ҆́кѡ возсїѧ̀ на высотѣ̀ зарѧ̀ свѣтоно́снаѧ, держа́щи и҆́стиннаго свѣ́та и҆з̾ѡбраже́на пло́тїю. съ ни́мже сни́де къ на́мъ, подаю́щи всемꙋ̀ мі́рꙋ просвѣще́нїе.
Твое́ю, дв҃о, всечестно́ю і҆кѡ́ною дре́вле творе́цъ всѣ́хъ чꙋдодѣ́йствова, спасѐ ца́рскїй гра́дъ ѿ и҆ноплеме́нныхъ нахожде́нїѧ: си́це и҆ рѡссі́йстѣй странѣ̀ бꙋ́ди, гпⷭ҇жѐ цр҃и́це, покро́въ и҆ застꙋпле́нїе, спаса́ющи ю҆̀ ѿ всѣ́хъ навѣ̑тъ вра́жїихъ.
Сѣда́ленъ, гла́съ д҃:
Ꙗ҆́кѡ дре́внѧгѡ вои́стиннꙋ кївѡ́та чⷭ҇тнѣ́йши тво́й пречⷭ҇тый ѻ҆́бразъ, влⷣчце, па́че бо і҆ле́ктра блиста́ѧсѧ, повсю́дꙋ неѡскꙋ́днѡ лꙋчы̀ ми́лости твоеѧ̀ всѣ̑мъ ꙗ҆влѧ́ѧ простира́етъ, и҆ ми́лостивнѡ чтꙋ́щыѧ пресла́вное прише́ствїе є҆гѡ̀ благода́тїю бж҃їею соблюда́етъ. Ѡ҆ не́мже, влⷣчце, мы̀ ра́дꙋющесѧ ᲂу҆се́рднѡ пра́зднꙋемъ, и҆ мт҃рнее твоѐ къ на́мъ милосе́рдїе прославлѧ́емъ.
Сла́ва, и҆ ны́нѣ, то́йже:
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Творе́цъ всѣ́хъ и҆ созда́тель, вседержи́тельною си́лою носѧ́й всѧ́чєскаѧ, ѻ҆́бразомъ свои́мъ бжⷭ҇твеннымъ, и҆ твои́мъ, дв҃о, дне́сь чꙋдоно́снымъ, пресла́внѡ прїи́де, на рꙋкꙋ̀ твоє́ю, чⷭ҇таѧ, носи́мь, на спасе́нїе человѣ́кѡмъ и҆ и҆сцѣле́нїе.
Неизрече́нномꙋ бж҃їю дарова́нїю, і҆кѡ́нѣ свѣ́та хрⷭ҇та̀, и҆ пречⷭ҇тыѧ дв҃ы, прїиди́те вѣ́рнїи, поклони́мсѧ, и҆ съ любо́вїю припаде́мъ вопїю́ще: низспослѝ, ѽ бл҃года́телю! ро́ждшїѧ тѧ̀ ра́ди приснодв҃ы бл҃госе́рдыѧ, бл҃года́ть и҆ ми́лость на́мъ рабѡ́мъ твои̑мъ.
А҆́гг҃лѡвъ цр҃и́це, мы́сленный кївѡ́те, зако́ннагѡ па́че кївѡ́та пречⷭ҇тый тво́й ѻ҆́бразъ неизрече́нными чꙋдесы̀ и҆ бл҃года́тьми бг҃ъ ᲂу҆красѝ и҆ просла́ви, и҆ а҆́гг҃лѡмъ почита́ти того̀ повелѣ̀: съ ни́миже ѡ҆ на́съ є҆мꙋ̀, ѽ всепѣ́таѧ! моли́сѧ, сла́вѧщихъ спаси́тельное є҆гѡ̀ смотре́нїе, и҆ твоѐ є҆́же бы на́мъ спасе́нїе ᲂу҆лꙋчи́ти.
Ꙗ҆́же по бл҃года́ти дарова́ннаѧ ѿ бг҃а помо́щнице на́мъ всѣ̑мъ хрⷭ҇тїа́нѡмъ, того̀ молѝ, всебл҃га́ѧ и҆ всенепоро́чнаѧ, ꙗ҆́кѡ да пре́зритъ на̑ша безчи́слєннаѧ согрѣшє́нїѧ, и҆ и҆зба́витъ пла́меннагѡ томле́нїѧ и҆ тмы̀ кромѣ́шнїѧ, и҆ мꙋ́ки всѧ́кїѧ.
И҆́нъ. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Землѧ̀ ᲂу҆́бѡ всѧ̀ дне́сь да возвесели́тсѧ, вкꙋ́пѣ же и҆ воздꙋ́хъ, и҆ мо́ре да кропи́тъ ра́дованїе, ꙗ҆́кѡ всечⷭ҇тна́гѡ ѻ҆́браза бг҃ома́тере чꙋде́снымъ ше́ствїемъ рѡссі́йскаѧ страна̀ пресла́внѡ ѡ҆зари́сѧ.
Раболѣ́пнѡ слꙋ́жатъ и҆ а҆́гг҃льстїи чи́нове тебѣ̀ всѣ́хъ цр҃и́цѣ, и҆ благоговѣ́йнѡ почита́ютъ всечⷭ҇тнꙋ́ю твою̀ і҆кѡ́нꙋ, воспѣва́юще тѧ̀ прест҃ꙋ́ю дв҃ꙋ: мы́ же смире́ннїи ка́кѡ тебѐ всечⷭ҇тꙋю досто́йнѡ пѣ́ти возмо́жемъ;
А҆рха́гг҃льскꙋю пѣ́снь, є҆́же ра́дꙋйсѧ, тебѣ̀ зове́мъ, бг҃оневѣ́сто, гдⷭ҇ь съ тобо́ю, ра́дꙋйсѧ, ра́досте а҆́гг҃лѡвъ, и҆ всѣ́хъ человѣ́кѡвъ сла́вѧщихъ тѧ̀ вои́стиннꙋ весе́лїе, спасѝ дꙋ́шы пою́щихъ тѧ̀, бцⷣе чⷭ҇таѧ.
Ѽ бг҃ороди́тельнице, ра́дости пода́тельнице, вѣ́рою сла́вѧщыѧ тѧ̀, и҆ ѿ дꙋшѝ пою́щыѧ, ра́дости неизрече́нныѧ и҆спо́лни, и҆ свѣ́та невече́рнѧгѡ сподо́би, дв҃о бл҃года́тнаѧ влⷣчце.
Пѣ́снь є҃. І҆рмо́съ:
Оу҆́тренюетъ дꙋ́хъ мо́й въ тебѣ̀, бж҃е, ѿ ѻ҆ц҃а̀ рожде́нномꙋ неизрече́ннѡ, и҆ воздви́гнꙋвшемꙋ ро́гъ спасе́нїѧ на́мъ.
Ты̀, ѽ бл҃года́тнаѧ! въ ми́лостивномъ твое́мъ дне́сь благоволе́нїи, бг҃олѣ́пнымъ ꙗ҆вле́нїемъ странꙋ̀ на́шꙋ благода́тнѡ просвѣти́ла є҆сѝ, и҆ та́инственное свѣ́та твоегѡ̀ просвѣще́нїе мі́рꙋ низпосла́ла є҆сѝ, къ свѣ́тꙋ вы́шнїѧ сла́вы, бцⷣе, вѣ̑рныѧ возводѧ́щи.
Ѡ҆мрачи́хомсѧ пѡ́мыслы, ѡ҆тѧгчи́хомсѧ грѣхи̑, недоꙋмѣ́емъ свѣтоно́сныѧ бл҃года́ти, и҆ ми́лости твоеѧ̀ и҆сповѣ́дати, влⷣчце: но, ѽ прест҃а́ѧ дв҃о! просвѣтѝ на́съ и҆ ѡ҆богатѝ та́инственными твои́ми дарова̑нїи бжⷭ҇твенныхъ жела́нїй, къ свѣ́тꙋ пра́вагѡ пꙋтѝ направлѧ́ющи.
Благоче́стнѡ ѿвсю́дꙋ, ѽ бг҃ома́ти! къ пречестнѣ́й твое́й і҆кѡ́нѣ притека́ющыѧ, и҆ ᲂу҆се́рднѡ покланѧ́ющыѧсѧ, и҆ вѣ́рнѡ вездѣ́ тѧ призыва́ющыѧ, предварѝ ѿ бѣ́дъ всѧ́кихъ спаса́ющи, и҆ лю́тыхъ недꙋ̑гъ и҆збавлѧ́ющи, и҆ дꙋ́хи лꙋка̑выѧ прогонѧ́ющи, тишинꙋ̀ и҆ здра́вїе подаю́щи всѣ̑мъ, влⷣчце.
Лю́тыми помышлє́нїи, и҆ скве́рными воспомина̑нїи, ѿ лꙋка́выхъ врагѡ́въ стꙋжа́емыхъ ѕѣ́льнѣ не ѡ҆ста́ви на́съ, нижѐ пре́зри, бг҃ороди́тельнице: но ѡ҆сѣнѝ твое́ю благода́тїю, покрыва́ющи ѿ си́хъ и҆ застꙋпа́ющи, и҆ спаса́ющи ѿ всѣ́хъ и҆́хъ навѣ̑тъ, ѽ бг҃облаже́ннаѧ!
И҆́нъ. І҆рмо́съ:
Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Въ пꙋсты́ни ꙗ҆вле́ннѡ тебѐ, бг҃ома́ти, со ст҃и́телемъ благоговѣ́йный ᲂу҆зрѣ́ти мꙋ́жъ сподо́бисѧ, и҆ благоволе́нїѧ твоегѡ̀ глаго́лы ѿ тебє̀, цр҃и́це, воспрїѧ́тъ, на бо́льшее ᲂу҆твержде́нїе, и҆ въ по́льзꙋ мі́рꙋ спасе́нїѧ.
Ѻ҆каѧ́ненъ ᲂу҆́бѡ а҆́зъ, всечⷭ҇таѧ, и҆ недосто́инъ таковы́ѧ ны́нѣ бл҃года́ти, є҆́же тѧ̀ ви́дѣти: но понѐ въ бꙋ́дꙋщемъ сподо́би мѧ̀ ᲂу҆зрѣ́ти тѧ̀, и҆ сн҃а твоего̀ ᲂу҆срѣ́сти грѧдꙋ́ща во сла́вѣ, и҆ гла́съ бжⷭ҇твенный ᲂу҆слы́шати зовꙋ́щь во црⷭ҇тво нбⷭ҇ное.
Прибѣга́емъ къ твое́й, дв҃о, бла́гости, и҆ ѻ҆́чи серде́цъ на́шихъ воспꙋща́емъ къ тебѣ̀, чⷭ҇таѧ, и҆ съ пла́чемъ колѣ̑на преклонѧ́юще, мо́лимъ тѧ̀: не пре́зри на́шегѡ воздыха́нїѧ, и҆ бꙋ́ди на́мъ покро́въ и҆ помо́щница въ де́нь сꙋ́дный.
Є҆ди́на є҆сѝ всѣ́хъ предста́тельница хрⷭ҇тїа́нъ, бг҃ома́ти пречⷭ҇таѧ, ᲂу҆слы́ши на́ше моле́нїе, воззрѝ на ны̀, всепѣ́таѧ, спасѝ гра́дъ и҆ ѻ҆би́тель твою̀, и҆ ѡ҆зарѝ ста́до твоѐ заре́ю бл҃года́ти твоегѡ̀ застꙋпле́нїѧ.
Пѣ́снь ѕ҃. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑ ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
А҆е́ръ простра́нный, и҆ землѧ̀ на́ша, цр҃и́це, въ пресла́вномъ твоеѧ̀ і҆кѡ́ны прише́ствїи, чꙋде́съ и҆ бжⷭ҇твенныхъ дарѡ́въ благода́тїю твое́ю и҆спо́лнисѧ, во ᲂу҆твержде́нїе благоче́стїѧ, и҆ всѣ́хъ вѣ́рныхъ, всепѣ́таѧ, є҆́юже дне́сь и҆ сꙋпоста́ты низлага́ютсѧ, и҆ сла́вѧщїи тѧ̀ крѣ́пцѣ ᲂу҆твержда́ютсѧ.
Гра́де бж҃їй, селе́нїе ст҃о́е, дв҃о бг҃оневѣ́стнаѧ, сохранѝ ѿ сопроти́вныхъ нахожде́нїѧ, и҆ ѿ всѣ́хъ навѣ̑тъ вра́жїихъ ст҃ы́й до́мъ тво́й, и҆ всѧ̑ гра́ды и҆ страны̑ хрⷭ҇тїа́нскїѧ, любо́вїю пою́щыѧ тѧ̀, и҆ вѣ́рнѡ почита́ющыѧ пречⷭ҇тый ѻ҆́бразъ тво́й.
Ѡ҆свѧще́нїе, здра́вїе и҆ спасе́нїе всегда̀ подава́й дꙋша́мъ же и҆ тѣлесє́мъ на́шымъ, ѽ мт҃и бж҃їѧ благоче́стнѡ покланѧ́ющымсѧ і҆кѡ́нѣ твое́й бжⷭ҇твеннѣй, и҆ ᲂу҆сты̑ и҆ се́рдцемъ благоговѣ́йнѡ ю҆̀ со стра́хомъ цѣлꙋ́ющымъ, и҆ вѣ́рою ѿ дꙋши́ тѧ пѣсносло́вѧщымъ.
Держа́вный покро́въ и҆ стѣ́нꙋ неѡбори́мꙋ стѧжа́вше тѧ̀, приснодв҃о бцⷣе, ᲂу҆пова́нїе на тѧ̀ съ бг҃омъ возлага́емъ, вѣ́рнїи, и҆ прилѣ́жнѡ мо́лимъ, си́лою твое́ю стрѣ́лы вра̑жїѧ и҆ кѡ́зни всѧ̑ бѣсѡ́вскїѧ, не́мѡщны ꙗ҆́кѡ младе́нчески покажѝ и҆ недѣ́йствєнны, крѣ́пкаѧ на́ша помо́щнице.
И҆́нъ. І҆рмо́съ:
Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Ѽ преди́внагѡ твоегѡ̀ чꙋдесѐ, влⷣчце! ꙗ҆́кѡ за преслꙋша́нїе твоегѡ̀ повелѣ́нїѧ, ᲂу҆жа́снѡ человѣ́къ съ главы̀ цр҃ко́вныѧ восхище́нъ бы́въ, на землѝ невреди́мь ѡ҆брѣ́тесѧ, ми́лостїю твое́ю, всеми́лостиваѧ.
Никто́же та́кѡ преслꙋ́ша бжⷭ҇твєннаѧ повелѣ̑нїѧ, ꙗ҆́коже а҆́зъ ѻ҆каѧ́нный. тѣ́мъ тѝ припа́даѧ молю́сѧ, влⷣчце: пре́жде да́же до конца̀ не поги́бнꙋ, наста́ви мѧ̀ на и҆́стинный пꙋ́ть, и҆ спаси́ мѧ, чⷭ҇таѧ.
Ты̀, ѽ бг҃ома́ти, ро́ждшаѧ претерпѣ́вшаго на́съ ра́ди на дре́вѣ крⷭ҇тнѣмъ распѧ́тїе, ᲂу҆молѝ при́снѡ на́мъ страда́нїе є҆гѡ̀ ст҃о́е по́мнѧщымъ, во́лю є҆гѡ̀ бжⷭ҇твеннꙋю твори́ти, и҆ вѣ́чныхъ бл҃гъ наслѣ́дниками бы́ти.
Влⷣчце дв҃о чⷭ҇таѧ, и҆зба́ви на́съ лю́тыхъ всѣ́хъ, ᲂу҆молѧ́ющи пригвозди́вшаго на крⷭ҇тѣ̀ грѣхѝ на́шѧ, и҆ сподо́би на́съ досто́йнѡ ѡ҆деснꙋ́ю є҆гѡ̀ ста́ти, є҆гда̀ прїи́детъ во сла́вѣ свое́й.
Конда́къ, гла́съ и҃:
Притеце́мъ, лю́дїе, къ дв҃ѣй бцⷣѣ цр҃и́цѣ, благодарѧ́ще хрⷭ҇та̀ бг҃а, и҆ къ тоѧ̀ чꙋдотво́рнѣй і҆кѡ́нѣ ᲂу҆ми́льнѡ взира́юще припаде́мъ, и҆ возопїе́мъ є҆́й: ѽ влⷣчце марі́е! присѣти́вши странꙋ̀ сїю̀, твоегѡ̀ честна́гѡ ѻ҆́браза ꙗ҆вле́нїемъ чꙋде́снѡ, спаса́й въ ми́рѣ и҆ благовре́менствѣ ѻ҆те́чество на́ше, и҆ всѧ̑ хрⷭ҇тїа́ны, наслѣ́дники показꙋ́ющи нбⷭ҇ныѧ жи́зни. тебѣ́ бо вѣ́рнѡ зове́мъ: ра́дꙋйсѧ, дв҃о, мі́ра спасе́нїе.
І҆́косъ:
Пречꙋ́дное ꙗ҆вле́нїе бг҃ома́тере ви́дѧще, на высотꙋ̀ добродѣ́телей взы́демъ, и҆ ᲂу҆́мъ на нб҃о возведе́мъ: сегѡ́ бо ра́ди небоше́ственнѣ прїи́де, да привлече́тъ къ высотѣ̀ вопїю́щыѧ є҆́й си́це: ра́дꙋйсѧ, бл҃гослове́ннаѧ дв҃о, ѿ всѣ́хъ родѡ́въ бг҃омъ и҆збра́ннаѧ: ра́дꙋйсѧ, нбⷭ҇наѧ цр҃и́це, гдⷭ҇а бг҃а мт҃и и҆ творца̀ всѧ́ческихъ: ра́дꙋйсѧ, всера́достное а҆́гг҃лѡмъ пѣ́нїе: ра́дꙋйсѧ, всежела́тельное всегѡ̀ мі́ра зрѣ́нїе: ра́дꙋйсѧ, неподви́жимое вѣ́ры благоче́стїѧ ѡ҆снова́нїе: ра́дꙋйсѧ, всесвѣ́тлое бл҃года́ти позна́нїе: ра́дꙋйсѧ, бж҃їе къ зємны́мъ благоволе́нїе: ра́дꙋйсѧ, земны́хъ къ бг҃ꙋ возведе́нїе: ра́дꙋйсѧ, ѡ҆ѕло́блєннымъ дꙋша́мъ ᲂу҆тѣше́нїе: ра́дꙋйсѧ, всѣ̑мъ вѣ̑рнымъ ско́рое поможе́нїе: ра́дꙋйсѧ, дарова́ннаѧ ѿ бг҃а предста́тельнице ро́дꙋ хрⷭ҇тїа́нскомꙋ, є҆го́же и҆ соблюда́й прилѣ́жнѡ ѿ всѧ́кихъ бѣ́дъ и҆ ѕѡ́лъ, да зове́мъ тѝ: ра́дꙋйсѧ, дв҃о, вѣ̑рнымъ спасе́нїе.
Пѣ́снь з҃. І҆рмо́съ:
Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
А҆́гг҃лѡмъ говѣ́йный ѻ҆́бразъ тво́й, влⷣчце, неизрече́нною при́снѡ бл҃года́тїю сїѧ́етъ и҆ си́лою: дне́сь бо тогѡ̀ дарова̑нїи зємны́ѧ просвѣща́еши, и҆ къ нбⷭ҇нымъ наставлѧ́еши, и҆ къ вѣ́чномꙋ животꙋ̀ ᲂу҆строѧ́еши, за неизглаго́ланнꙋю твою̀ бл҃гость, бг҃облагода́тнаѧ.
Твоегѡ̀ бг҃олѣ́пнагѡ ꙗ҆вле́нїѧ, и҆ пресла́внагѡ і҆кѡ́ны прише́ствїѧ, и҆ чꙋде́съ пꙋчи̑ны, чⷭ҇таѧ, виті́йствꙋющихъ ᲂу҆ста̀ ника́коже возмога́ютъ и҆сповѣ́дати, мы́ же грꙋ́бїи что̀ возглаго́лемъ; то́чїю, поми́лꙋй и҆ спасѝ на́съ, ѽ всеми́лостиваѧ влⷣчце!
И҆звѣ́стнаѧ вѣ́рныхъ помо́щнице, и҆ всѣ́хъ благи́хъ пода́тельнице, прїимѝ на́съ вѣ́рнѡ припа́дающихъ, и҆ любо́вїю вопїю́щихъ тѝ: поми́лꙋй на́съ, гпⷭ҇жѐ, поми́лꙋй на́съ, ꙗ҆́коже дне́сь, та́кѡ и҆ во ѻ҆́ный вѣ́къ, бꙋ́ди на́мъ помо́щница и҆ застꙋ́пница.
Мт҃и бж҃їѧ милосе́рдаѧ, ми́лости твоеѧ̀ двє́ри дне́сь ѿве́рзи на́мъ, и҆ ѿ ᲂу҆́стъ мы́сленныхъ волкѡ́въ и҆схитѝ, хотѧ́щихъ на́съ поглоти́ти, и҆ до конца̀ погꙋби́ти: поми́лꙋй, мо́лимъ тѧ̀, ѽ влⷣчце, поми́лꙋй, не ѿвратѝ посра́мленныхъ ра̑бъ твои́хъ.
И҆́нъ. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
Є҆диноча́дный тво́й сн҃ъ и҆ бг҃ъ всѣ́хъ, бг҃ома́ти, пречⷭ҇тый тво́й ѻ҆́бразъ невреди́мь сохранѝ во пла́мени, ѽ чꙋдесѐ!. бл҃года́тїю па́че со́лнца ѡ҆брѣ́тесѧ сїѧ́ющь, и҆ вѣ̑рныѧ просвѣща́ющь, вѣ́рою пою́щыѧ: бж҃е, бл҃гослове́нъ є҆сѝ.
Нбⷭ҇нїи чи́нове веселѧ́тсѧ съ земноро́дными, бцⷣе, въ свѣ́тломъ торжествѣ̀ твое́мъ, є҆́же соверша́ющыѧ ны̀, и҆ со стра́хомъ предстоѧ́щыѧ предъ пречⷭ҇тымъ твои́мъ ѻ҆́бразомъ, просвѣтѝ свѣ́томъ сїѧ́нїѧ твоегѡ̀, пречⷭ҇таѧ, и҆ всѧ̑ спасѝ.
Є҆ди́наго ѿ трⷪ҇цы бг҃а сло́ва цр҃ѧ̀ нбⷭ҇наго пло́тїю, цр҃и́це, родила̀ є҆сѝ: того̀ молѝ, влⷣчце, во́инствꙋ на́шемꙋ пода́ти ѡ҆долѣ́нїе на проти̑вныѧ, и҆ всѣ̑мъ вѣ̑рнымъ по́мощь, грѣхѡ́въ ѡ҆ставле́нїе, и҆ дꙋша́мъ спасе́нїе.
Рабы̑ твоѧ̑, чⷭ҇таѧ, пою́щыѧ тѧ̀, и҆ вѣ́рою несꙋмнѣ́нною молѧ́щыѧсѧ тебѣ̀, свѣтода́тельною твое́ю и҆ бжⷭ҇твенною ѡ҆сѣнѝ бл҃года́тїю, ꙗ҆́кѡ бл҃годѣ́телѧ всѣ́хъ ро́ждшаѧ, и҆ покры́й и҆ сохранѝ ѿ всѣ́хъ навѣ̑тъ вра́жїихъ.
Пѣ́снь и҃. І҆рмо́съ:
Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
И҆зрѧ́днїи чи́нове нбⷭ҇нїи благоче́стнѡ благоговѣ́ютъ пречⷭ҇томꙋ твоемꙋ̀ ѻ҆́бразꙋ, всечⷭ҇таѧ, и҆ пречꙋ́дномꙋ є҆гѡ̀ прише́ствїю, подъ со́лнцемъ пресла́внꙋ показа́вшꙋсѧ, и҆ ро́дъ правовѣ́рный воздви́гшꙋ пѣ́ти, и҆ сла́вити сн҃а твоего̀, ꙗ҆́кѡ содѣ́телѧ всѣ́хъ во вѣ́ки.
Пресла̑внаѧ дне́сь пою́ще, любе́знѡ а҆́гг҃лѡмъ говѣ́йной твое́й і҆кѡ́нѣ покланѧ́емсѧ, благоговѣ́юще, ѽ гпⷭ҇жѐ цр҃и́це! сла́вѧщее тѧ̀ ѻ҆те́чество на́ше бжⷭ҇твенною твое́ю благода́тїю ѡ҆сѣнѝ, и҆ на врагѝ ᲂу҆крѣпѝ, и҆ ми́рно соблюдѝ.
Ра́дости вина̀, всебл҃гослове́ннаѧ, ра́дꙋйсѧ, всенепоро́чнаѧ, ра́дꙋйсѧ, бл҃года́тнаѧ, держа́ва на́ша и҆ ѡ҆гражде́нїе, и҆ спаси́тельное прибѣ́жище, спаси́ ны рабы̑ твоѧ̑, не и҆мꙋ́щыѧ па́че тебє̀ къ бг҃ꙋ по́мощи: на тѧ́ бо надѣ́емсѧ, и҆ тебѐ пое́мъ во вѣ́ки.
Є҆ди́нꙋ тѧ̀ жи́зни на́шеѧ стѧжа́хомъ съ бг҃омъ храни́тельницꙋ, и҆ крѣ́пкꙋ наде́ждꙋ спасе́нїѧ: мо́лимъ тѧ̀, ѽ бл҃госе́рдаѧ, и҆ по кончи́нѣ хода́тайствовати ѡ҆ на́съ, ꙗ҆́кѡ да бꙋ́дꙋщихъ стѧза́нїй и҆зба́вимсѧ, и҆ ми́лостива ѡ҆брѧ́щемъ сн҃а твоего̀ и҆ бг҃а въ де́нь сꙋ́дный.
И҆́нъ. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Ѽ пресла́вныхъ чꙋде́съ твои́хъ, чⷭ҇таѧ! ꙗ҆́кѡ зда́тели ст҃ы́ѧ цр҃кве твоеѧ̀, подъ ка́менїемъ тридне́внѡ бы́вшїи, ѡ҆брѣто́шасѧ жи́ви и҆ безвре́дни, покро́вомъ твои́мъ соблюде́ни, тебѣ̀ всѣ́хъ цр҃и́цѣ возсыла́юще гла́сы похва́льныѧ.
Жи́знь вмѣ́стѡ сме́рти дарова́ла є҆сѝ, бцⷣе, ме́ртвенномꙋ сꙋществꙋ̀. тѣ́мже и҆ на́съ ᲂу҆мерщвле́нныхъ грѣхи̑ мно́гими, бг҃оневѣ́сто, неврежде́нны ѿ вра̑гъ соблюдѝ, и҆ къ жи́зни лꙋ́чшей возведѝ, спаса́ющи дꙋ́шы на́шѧ.
Дне́сь и҆спо́лнишасѧ ра́дости и҆ весе́лїѧ всѝ вѣ́рнїи ѡ҆ і҆кѡ́нѣ твое́й, бцⷣе, ꙗ҆́кѡ въ че́люстѣхъ сме́рти бы́вшымъ ꙗ҆ви́ласѧ є҆сѝ жи́зни вино́вница, и҆ и҆сто́чникъ приснотекꙋ́щїй, цѣлє́бныѧ да́ры всѣ̑мъ точа́щїй, и҆ спасе́нїе подаю́щїй.
И҆зрѧ́днѡ воспѣ́ти пречⷭ҇тагѡ твоегѡ̀ ѻ҆́браза, и҆ ро́ждшагосѧ и҆зъ тебє̀ млⷣнца, и҆́стинна же бг҃а чꙋ́дныѧ і҆кѡ́ны пресла́вное прише́ствїе, совокꙋ́пльшихсѧ люде́й ѿ всю́дꙋ, всепѣ́таѧ, моле́нїе прїимѝ, и҆ прошє́нїѧ и҆спо́лни.
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Про́ста пꙋтѝ по а҆е́рꙋ свѣтопрїѧ́тномꙋ, і҆кѡ́на твоѧ̀, влⷣчце, стезю̀ проходѧ́щи, бг҃одви́жимѡ и҆ свѣтолѣ́пнѡ неизслѣ́димы стєзѝ творѧ́щи, вѣ̑рныѧ въ поднебе́снѣй бл҃года́тїю ѡ҆зарѝ, вѣ́рою вопїю́щыѧ: вои́стиннꙋ честнѣ́йши всѣ́хъ є҆сѝ, дв҃о чⷭ҇таѧ.
Сло́ва виті́йствомъ превысо́кихъ твои́хъ, чⷭ҇таѧ, чꙋде́съ, ника́коже по достоѧ́нїю ᲂу҆краси́ти ᲂу҆до́бни є҆смы̀, то́чїю ᲂу҆се́рднѣ мо́лимъ тѧ̀, цр҃и́це: да мо́лиши сн҃а твоего̀, влⷣкꙋ и҆ цр҃ѧ̀ всѣ́хъ, дарова́вшаго на́мъ тебѐ пресла́внꙋю помо́щницꙋ, сподо́бити на́съ нбⷭ҇нагѡ своегѡ̀ црⷭ҇твїѧ.
Пѣ́снь благода́рственнѡ пѣ́нїѧ, за неизрече́нное твоѐ милосе́рдїе, ѽ бг҃облагода́тнаѧ! ѿ на́съ прїимѝ, прошє́нїѧ на̑ша въ по́льзꙋ и҆сполнѧ́ющи, и҆ къ высотѣ̀ го́рнѣй всѣ́хъ возведѝ, вѣ́рнѡ бо тѝ зове́мъ: вои́стиннꙋ вы́шши всѣ́хъ є҆сѝ, дв҃о всенепоро́чнаѧ.
Ро́ди всѝ ра́достнѡ блажи́мъ тѧ̀, бцⷣе, ꙗ҆́кѡ ра́дости всѧ̑ ны̀ и҆спо́лнила є҆сѝ, пресла́внымъ прише́ствїемъ і҆кѡ́ны твоеѧ̀, пречⷭ҇таѧ. є҆́йже дне́сь покланѧ́ющесѧ, ᲂу҆ми́льнѡ мо́лимъ тѧ̀: не забꙋ́ди, влⷣчце, твои́хъ рабѡ́въ сподо́бити въ бꙋ́дꙋщемъ вѣ́цѣ и҆збра́нныхъ ра́дости.
И҆́нъ. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чи́стаѧ приснодв҃о.
Ꙗ҆вле́нїю, влⷣчце, всечестны́ѧ твоеѧ̀ і҆кѡ́ны кто̀ не ᲂу҆диви́тсѧ, и҆лѝ кто̀ не почꙋди́тсѧ; по воздꙋ́хꙋ бо сїю̀, ꙗ҆́кѡ нѣ́кїй да́ръ свѣтоно́сный, низпосла́ла є҆сѝ землѝ рѡссі́йстѣй, ра́достнѡ пою́щей тѧ̀, и҆ вѣ́рнѡ велича́ющей.
Ра́дость мі́рꙋ, дв҃о, неизглаго́ланнꙋю дарова́вши ꙗ҆вле́нїемъ пречⷭ҇тыѧ твоеѧ̀ і҆кѡ́ны, и҆зба́ви, влⷣчце, ѿ всѧ́кїѧ печа́ли вѣ́рою покланѧ́ющыѧсѧ є҆́й, и҆ со стра́хомъ цѣлꙋ́ющыѧ ю҆̀: ѽ прест҃а́ѧ! всѧ̑ спасѝ и҆ поми́лꙋй, и҆ црⷭ҇твїѧ нбⷭ҇нагѡ сподо́би.
Ро́ждшаѧ, влⷣчце, чл҃вѣколю́бца бг҃а, за чл҃вѣколю́бїе посѣти́ла є҆сѝ на́съ бжⷭ҇твенною твое́ю і҆кѡ́ною, къ не́йже всегда̀ притека́юще, и҆ благолѣ́пїе є҆ѧ̀ зрѧ́ще, тебѣ̀ ᲂу҆ми́льнѡ вопїе́мъ: спаса́й при́снѡ, бцⷣе, достоѧ́нїе твоѐ.
Оу҆стна́ми смире́нными принесо́хъ тѝ препро́стое сїѐ, всепѣ́таѧ, пѣ́нїе: поне́же грꙋ́бъ є҆́смь многогрѣ́шный, и҆ недосто́инъ по достоѧ́нїю воспѣ́ти тѧ̀, но ѿ ᲂу҆се́рдїѧ на твоѧ̑ щедрѡ́ты надѣ́ѧсѧ, ꙗ҆́кѡ сп҃си́телѧ всегѡ̀ мі́ра родила̀ є҆сѝ: не возгнꙋша́йсѧ, цр҃и́це, прїимѝ сїѐ, и҆ спаси́ мѧ.
Свѣти́ленъ. Подо́бенъ: Жєны̀ ᲂу҆слы́шите:
Пречⷭ҇тый ѻ҆́бразъ тво́й, и҆́мже присѣти́ла є҆сѝ на́съ, бг҃оѻтрокови́це дв҃о, чтꙋ́ще пра́зднꙋемъ сегѡ̀ ны́нѣ прише́ствїе, ѿ негѡ̀ бл҃года́тїю, сн҃а твоегѡ̀, и҆ твое́ю прїе́млюще скорбе́й и҆ бѣ́дъ, и҆ напа́стей и҆збавле́нїе, мт҃и бг҃а вы́шнѧгѡ.
Сла́ва, и҆ ны́нѣ, то́йже:
На хвали́техъ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ! ꙳ всемі́рнаѧ ра́дость ꙳ свы́ше просїѧ̀ на́мъ і҆кѡ́на бг҃ома́тере, ꙳ подаю́щи всемꙋ̀ мі́рꙋ просвѣще́нїе, ꙳ и҆ благоче́стїю ᲂу҆твержде́нїе, ꙳ и҆ вѣ̑рнымъ спасе́нїе, ꙳ бж҃їе сїѐ дарова́нїе зємны́мъ дарова́сѧ. ꙳ Ѡ҆ не́мже ра́дꙋющесѧ, тебѐ, хрⷭ҇тѐ, мо́лимъ: ꙳ спасѝ дꙋ́шы на́шѧ, ꙗ҆́кѡ милосе́рдъ.
Ѽ пресла́внагѡ чꙋдесѐ! ꙳ превы́ше всѣ́хъ стра́нъ рѡссі́йскаѧ землѧ̀ почте́сѧ ꙳ ѿ вы́шнѧгѡ промышле́нїѧ: ꙳ и҆́бо та̀, а҆ не и҆́на, є҆гѡ̀ бл҃года́тїю сподо́бисѧ ꙳ сїю̀ прїѧ́ти і҆кѡ́нꙋ бг҃ома́тере, ꙳ ꙗ҆́кѡ нбⷭ҇ный да́ръ свѣтолꙋ́чный, ꙳ пресла́внѡ бг҃омъ свы́ше по́сланный. ꙳ Ѡ҆ не́мже ра́дꙋющисѧ къ тебѣ̀, хрⷭ҇тѐ, ᲂу҆ми́льнѡ вопїе́тъ: ꙳ спасѝ, бла́же, дꙋ́шы на́шѧ, ꙗ҆́кѡ милосе́рдъ.
Пресла́внѡ, бцⷣе, ꙳ во всѣ́хъ страна́хъ тобо́ю хва́литсѧ, ѻ҆би́тель твоѧ̀, бг҃оневѣ́сто, ꙳ ꙗ҆́кѡ и҆мѣ́етъ въ себѣ̀ чꙋдотво́рнꙋю твою̀ і҆кѡ́нꙋ, ꙳ чꙋ́днѡ по воздꙋ́хꙋ и҆ пресла́внѡ а҆́гг҃лы принесе́ннꙋю, ѿ неѧ́же неизречє́нныѧ цѣльбы̑ прїе́млющи, ꙳ благода́рствєннаѧ вопїе́мъ тебѣ̀, ꙳ ᲂу҆ми́льнѡ молѧ́ще тѧ̀: ꙳ прест҃а́ѧ дв҃о, ꙳ спасѝ дꙋ́шы на́шѧ, ꙗ҆́кѡ милосе́рдаѧ.
Сла́ва, и҆ ны́нѣ, гла́съ в҃:
Ꙗ҆́коже и҆ногда̀ ца́рскїй гра́дъ и҆мѣ́ѧ і҆кѡ́нꙋ твою̀, дв҃о пречи́стаѧ, бж҃їимъ и҆ твои́мъ посо́бїемъ побѣжда́ѧ проти̑вныѧ, ра́довашесѧ: та́кѡ и҆ ны́нѣ рѡссі́йскаѧ страна̀, ди́внѡ стѧжа́вши ѻ҆́бразъ тво́й, гпⷭ҇жѐ, во своѐ застꙋпле́нїе, ᲂу҆твержда́ющисѧ торжествꙋ́етъ ве́селѡ. вельми́ же красꙋ́етсѧ и҆ пречестна́ѧ ѻ҆би́тель твоѧ̀, и҆мѣ́ющи тѧ̀ съ бг҃омъ покро́въ и҆ тве́рдое ѡ҆гражде́нїе ѿ всѣ́хъ нахожде́нїй вра́жїихъ: цр҃ковь же твоѧ̀, бцⷣе, ꙗ҆́коже и҆ногда̀ влахе́рнскаѧ, пречⷭ҇тымъ твои́мъ ѻ҆́бразомъ свѣ́титсѧ, и҆ пресла́вными чꙋдесы̀ просвѣща́етсѧ, и҆ ра́дꙋющисѧ дꙋхо́внѡ ликꙋ́етъ, влⷣчце, со всѣ́ми вѣ́рными зовꙋ́щи дне́сь: ра́дꙋйсѧ, прест҃а́ѧ дв҃о, моѐ благолѣ́пїе и҆ похвало̀, и҆ вѣ́чное весе́лїе. ты́ мѧ преди́вными чꙋдесы̀ ѡ҆богаща́еши, и҆ бж҃е́ственными дарова̑нїи, ты̀ є҆сѝ, влⷣчце, и҆сцѣле́нїй и҆сто́чникъ неисчерпа́емый, и҆ сꙋ́щымъ въ бѣда́хъ ᲂу҆тѣше́нїе. и҆ всѣ̑мъ вѣ̑рнымъ покро́въ и҆ спасе́нїе.
Славосло́вїе вели́кое, и҆ ѿпꙋ́стъ, и҆ ча́съ а҃.
На лїтꙋргі́и, слꙋ́жба всѧ̑ бцⷣѣ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.