← претходни дан | Минеј — Јун | следећи дан →
25 июня: Преподобномученицы Февронии. Благоверных князя Петра и княгини Февронии, муромских чудотворцев
Мѣ́сѧца тогѡ́же въ к҃є-й де́нь.
Ст҃ы́ѧ преподобномꙋ́ченицы феѵрѡ́нїи:
И҆ ст҃ы́хъ чꙋдотво́рцєвъ мꙋ́ромскихъ, кнѧ́зѧ петра̀, во и҆́ноцѣхъ дв҃да, и҆ кнѧги́ни феѵрѡ́нїи, во и҆́нокинѧхъ є҆ѵфросѵ́нїи.
Слꙋ́жба и҆́хъ пи́сана по се́й слꙋ́жбѣ.
На Гдⷭ҇и, воззва́хъ, стїхи̑ры прⷣте́чи, гла́съ д҃.
Самогла̑сны:
Разрѣша́етъ заха́рїино молча́нїе рожде́йсѧ і҆ѡа́ннъ: и҆́бо не подоба́ше ѻ҆тцꙋ̀ молча́ти, произше́дшꙋ гла́сꙋ, но ꙗ҆́коже невѣ́ровавшꙋ пе́рвѣе, ѧ҆зы́къ свѧза̀: си́це ꙗ҆́вльшꙋсѧ да́ти ѻ҆тцꙋ̀ свобожде́нїе. є҆мꙋ́же и҆ бл҃говѣсти́сѧ, и҆ роди́сѧ гла́съ сло́ва, и҆ свѣ́та прⷣте́ча, молѧ̀ ѡ҆ дꙋша́хъ на́шихъ.
Дне́сь гла́съ сло́ва гла́съ за невѣ́рїе держи́мый разрѣша́етъ ѻ҆те́чь, и҆ цр҃кви ꙗ҆влѧ́етъ бл҃гоча́дїе, соꙋ́зы непло́дствїѧ разрѣша́ѧ ма́терни: свѣти́льникъ свѣ́та предгрѧде́тъ, зарѧ̀ сл҃нца пра́вды возвѣща́етъ прише́ствїе, въ созда́нїе всѣ́хъ, и҆ спасе́нїе дꙋ́шъ на́шихъ.
А҆нато́лїа:
Бж҃їю сло́вꙋ хотѧ́щꙋ ѿ дв҃ы роди́тисѧ, а҆́гг҃лъ ѿ ста́рческихъ чре́слъ происхо́дитъ, вели́кїй въ рожде́нныхъ жена́ми, и҆ прⷪ҇ро́кѡвъ превы́шшїй: подоба́ше бо бжⷭ҇твенныхъ веще́й пресла̑внымъ бы́ти нача́лѡмъ, кромѣ̀ во́зраста и҆сча́дїе, и҆ безъ сѣ́мене зача́тїе. творѧ́й чꙋдеса̀, во спасе́нїе на́ше, сла́ва тебѣ̀.
И҆́ны стїхи̑ры ст҃ы́ѧ, гла́съ то́йже.
Подо́бенъ: Да́лъ є҆сѝ зна́менїе:
Страда́нїе претерпѣ́ла є҆сѝ ꙳ твои́мъ боре́нїемъ сꙋгꙋ́бо, ꙳ феѵрѡ́нїе всехва́льнаѧ, ꙳ пѡ́ты воздержа́нїѧ мꙋче́нїѧ кро́вь смѣси́вше. ꙳ тѣ́мже и҆ вѣне́цъ сꙋгꙋ́бъ ꙳ благодѣ́тель тебѣ̀ дарова̀: ꙳ къ немꙋ́же и҆ возшла̀ є҆сѝ и҆спещре́нна свѣ́тлѡ, ꙳ ꙗ҆́кѡ дв҃а всенепоро́чнаѧ, ꙳ и҆ ꙗ҆́кѡ мꙋ́ченица непобѣди́маѧ.
Добро́тою тѣлесѐ ꙳ красѡты̀ бжⷭ҇твєнныѧ дꙋшѝ твоеѧ̀ стеко́шасѧ, ꙳ ꙗ҆́кѡ крі́нъ просїѧ́ла є҆сѝ ꙳ во ѻ҆би́телехъ преподо́бныхъ ᲂу҆бѣ́лена, ꙳ и҆ кро́вными тѡ́ки ѡ҆багре́нна, ꙳ невѣ́сто всенепоро́чнаѧ. ꙳ тѣ́мже тѧ̀ и҆ нбⷭ҇ный кра́сный прїѧ́тъ невѣ́стникъ, ꙳ и҆ черто́гъ неразори́мый, ꙳ ꙗ҆́кѡ дв҃ꙋ и҆ мꙋ́ченицꙋ.
Ѻ҆́крестъ тебє̀ прїи́де, ꙳ феѵрѡ́нїе всехва́льнаѧ, ꙳ и҆збавлѧ́ѧй а҆́гг҃лъ: ꙳ ѿ младе́нства бо гдⷭ҇а боѧ́щисѧ ꙗ҆ви́сѧ, ꙳ и҆ возложена̀ ꙗ҆́кѡ возложе́нїе чⷭ҇тно, ꙳ соблюде́но вседержи́телю. ꙳ тѣ́мже попра́ла є҆сѝ селі́ново безꙋ́мїе, ꙳ и҆ ᲂу҆се́рднѡ востекла̀ є҆сѝ ꙳ ко хрⷭ҇тꙋ̀ женихꙋ̀ твоемꙋ̀.
Сла́ва, и҆ ны́нѣ, гла́съ и҃:
Ви́ждь є҆лїсаве́ть къ дв҃ѣ мр҃і́и глаго́лющꙋ: что̀ пришла̀ є҆сѝ ко мнѣ̀, мт҃и гдⷭ҇а моегѡ̀; ты̀ цр҃ѧ̀ но́сиши, и҆ а҆́зъ во́ина: ты̀ законода́вца, и҆ а҆́зъ законоположи́телѧ: ты̀ сло́ва, и҆ а҆́зъ гла́съ, проповѣ́дающъ црⷭ҇тво небе́сное.
На стїхо́внѣ ѻ҆ктѡ́иха. Сла́ва, и҆ ны́нѣ, гла́съ ѕ҃:
Є҆лїсаве́ть зача́тъ прⷣте́чꙋ благода́ти, дв҃а же гдⷭ҇а сла́вы, цѣлова́стѣсѧ ѻ҆́бѣ мт҃ри, и҆ младе́нецъ взыгра́сѧ, внꙋ́трь бо ра́бъ хвалѧ́ше влⷣкꙋ. ᲂу҆диви́вшисѧ же ма́ти прⷣте́чева, нача́тъ вопи́ти: ѿкꙋ́дꙋ мнѣ̀ сѐ, да мт҃и гдⷭ҇а моегѡ̀ прїи́де ко мнѣ̀; да спасе́тъ лю́ди ѿча̑ѧнныѧ, и҆мѣ́ѧй ве́лїю ми́лость.
Тропа́рь, гла́съ д҃:
Прⷪ҇ро́че и҆ прⷣте́че прише́ствїѧ хрⷭ҇то́ва, досто́йнѡ восхвали́ти тѧ̀ недоꙋмѣ́емъ мы̀, любо́вїю чтꙋ́щїи тѧ̀: непло́дство бо ро́ждшїѧ и҆ ѻ҆́тчее безгла́сїе разрѣши́сѧ сла́внымъ и҆ чⷭ҇тны́мъ твои́мъ ржⷭ҇тво́мъ, и҆ воплоще́нїе сн҃а бж҃їѧ мі́рови проповѣ́дꙋетсѧ.
Тропа́рь ст҃ы́ѧ, гла́съ то́йже:
А҆́гница твоѧ̀, і҆и҃се, феѵрѡ́нїа зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю и҆ сраспина́юсѧ, и҆ спогреба́юсѧ кр҃ще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю, прїими́ мѧ съ любо́вїю поже́ршꙋюсѧ тебѣ̀. тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ.
На ᲂу҆́трени, є҆ди́нъ канѡ́нъ ѻ҆ктѡ́иха: и҆ прⷣте́чи на д҃: и҆ ст҃ы́ѧ на д҃.
Канѡ́нъ прⷣте́чи, і҆ѡа́нна мона́ха.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
А҆́гг҃ла нбⷭ҇на и҆мѣ́въ, бж҃е́ственнагѡ своегѡ̀ ржⷭ҇тва̀ прозна́менающа, сла́вне, зе́мленъ а҆́гг҃лъ ꙗ҆ви́лсѧ є҆сѝ, и҆ нбⷭ҇ный человѣ́къ, прⷣте́че.
Высото́ю житїѧ̀ па́че є҆сте́ственна, нб҃о ꙗ҆ви́лсѧ є҆сѝ, и҆ тве́рдь слове́снаѧ, хрⷭ҇та̀ ᲂу҆́бѡ ꙗ҆́коже со́лнце посредѣ̀, добродѣ́тєли же ꙗ҆́коже ѕвѣ́зды стѧжа́въ.
Честна̀ сме́рть твоѧ̀, мꙋ́дре, предъ гдⷭ҇емъ, поже́ршимсѧ на́съ ра́ди: и҆ мꙋ́жескїй по́лъ, ꙗ҆́кѡ а҆́гнецъ слове́сенъ носи́мь.
Бг҃оро́диченъ:
Въ тѧ̀ все́льсѧ и҆зба́витель, и҆згна̀, ѻ҆трокови́це, все́льшїйсѧ въ мѧ̀ многосле́зный вои́стиннꙋ грѣ́хъ, и҆ раѧ̀ жи́телѧ показа̀.
И҆́нъ канѡ́нъ ст҃ы́ѧ, творе́нїе ѳеофа́ново, є҆гѡ́же краегране́сїе:
Пѣ́сньми тѧ̀ пою̀ мꙋ́дреннѡ, феѵрѡ́нїе.
Гла́съ и҃. Пѣ́снь а҃. І҆рмо́съ то́йже.
Побо́рнице сла́вы хрⷭ҇то́вы, пода́ждь мѝ бл҃года́ть, феѵрѡ́нїе, и҆ просвѣще́нїе твоѐ восхвали́ти свѣтоно́сное ра́достнѡ, чⷭ҇таѧ, торжество̀.
Поꙋче́нїемъ сме́ртнымъ вы́нꙋ просвѣща́ющи, мꙋ́ченице феѵрѡ́нїе, твою̀ дꙋ́шꙋ, возшла̀ є҆сѝ къ высотѣ̀ мꙋче́нїѧ, томле́ньми прине́сшисѧ хрⷭ҇тꙋ̀.
Ѡ҆бно́вльши болѣ́зньми воздержа́нїѧ ни́вꙋ, мꙋ́ченице, се́рдца твоегѡ̀ ꙗ҆́снѡ, мꙋче́нїй прїѧ́ла є҆сѝ вѣнцы̀, страда́льчески бг҃ꙋ на́шемꙋ пою́щи.
Бг҃оро́диченъ:
Ма́нїемъ всѧ̑ содѣва́ѧй, и҆зъ тебє̀, бг҃ома́ти, воплоти́сѧ: є҆го́же бл҃гоче́стнѡ жела́ющи ѻ҆трокови́ца феѵрѡ́нїа, мꙋ́ченически томꙋ̀ приведе́сѧ.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Непло́днагѡ чре́ва многоцвѣ́тное прозѧбе́нїе, непло́днꙋю дꙋ́шꙋ мою̀ покажѝ многопло́днꙋ до́брыми прозѧбє́нїи, ꙗ҆́коже вїногра́дъ растꙋ́щь, добродѣ́телей точа́щь сла́дкое гро́здїе.
Свѧще́ннагѡ вои́стиннꙋ ко́рене, и҆ чи́ста сѣ́мене, свѧщенноро́днаѧ прозѧбѐ кра́снаѧ вѣ́твь: и҆ прозѧ́бшаго хрⷭ҇та̀, ѿ і҆ессе́а бжⷭ҇твеннагѡ ко́рене, живоно́сное прозѧбе́нїе, бл҃же́нне, крести́лъ є҆сѝ.
Стена̑нїѧ немѡ́лчна, и҆ ча̑сты сле́зы, и҆ сокрꙋше́но се́рдце, и҆ дꙋ́хъ смире́нъ да́ждь мѝ, прехва́льне, и҆ сѣ́тованенъ пла́чь, и҆ тепло̀ ᲂу҆миле́нїе, и҆ болѣ́знь пребы́тнꙋ.
Бг҃оро́диченъ:
Ѿ земноро́дна прозѧ́бши ко́рене, чⷭ҇таѧ влⷣчце, присноцвѣтꙋ́щее и҆ кра́сное прозѧбе́нїе є҆стества̀, хрⷭ҇та̀ прозѧбла̀ є҆сѝ, бжⷭ҇тва̀ цвѣ́тъ: а҆арѡ́новъ бо же́злъ воѡбража́ше тѧ̀.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Оу҆крѣпи́ласѧ є҆сѝ дꙋ́хомъ, низложи́ти свирѣ́пство, пресла́внаѧ, мꙋчи́тельское, и҆ многобо́жїе, феѵрѡ́нїе, безбо́жное.
Ты̀ ны́нѣ ᲂу҆тверди́лъ є҆сѝ держа́вною рꙋко́ю, влⷣко, мꙋ́ченически подвиза́вшꙋюсѧ феѵрѡ́нїю сла́внꙋю.
Тѣ́ло твоѐ сѣко́мо за хрⷭ҇та̀, чⷭ҇таѧ всемꙋ́драѧ, мꙋ́ченически тебѐ раѧ̀ содѣ́ла наслажде́нїе.
Бг҃оро́диченъ:
Ѡ҆брѣ́те тѧ̀ по́мощь, бж҃їю мт҃рь, пречⷭ҇таѧ, сла́внаѧ мꙋ́ченица феѵрѡ́нїа, и҆ мꙋчи́телѧ посрами́ла є҆́сть.
Конда́къ ст҃ы́ѧ, гла́съ ѕ҃. Подо́бенъ: Застꙋ́пнице:
Женишѐ мо́й, сладча́йшїй хрⷭ҇тѐ, взыва́ше феѵрѡ́нїа, не трꙋ́дно мѝ тещѝ во слѣ́дъ тебє̀: и҆́бо сла́дость любвѐ твоеѧ̀ дꙋ́шꙋ мою̀ наде́ждею вперѝ, и҆ красота̀ ми́лости твоеѧ̀ се́рдце моѐ ᲂу҆сладѝ, и҆спи́ти ча́шꙋ страда́нїй по тебѣ̀, да досто́йнꙋ мѧ̀ въ черто́зѣ съ мꙋ́дрыми дв҃ами ликовствова́ти ѡ҆ тебѣ̀ сопричте́ши. тѣ́мже, преподо́бнаѧ страстоте́рпице, почита́юще по́двиги трꙋдѡ́въ твои́хъ, мо́лимъ тѧ̀: молѝ, не затвори́тисѧ и҆ на́мъ черто́га две́ремъ.
Сѣда́ленъ, гла́съ и҃. Подо́бенъ: Повелѣ́нное:
Заха́рїинъ пло́дъ, непло́дныѧ цвѣ́тъ роди́сѧ дне́сь на́мъ ѿ ѡ҆бѣща́нїѧ, честны́й і҆ѡа́ннъ прⷣте́ча гдⷭ҇ень: и҆гра́ѧ же во ᲂу҆тро́бѣ ма́терни, проповѣ́дꙋетъ и҆ пре́жде ржⷭ҇тва̀ содѣ́телѧ всѣ́хъ. се́й показа̀ неизрече́нное бж҃їе и҆ сп҃си́тельное ꙗ҆вле́нїе, сего̀ всѝ почита́емъ.
И҆́нъ сѣда́ленъ ст҃ы́ѧ, гла́съ то́йже. Подо́бенъ: Премꙋ́дрости:
Дꙋ́шꙋ свѧза́вши любо́вїю хрⷭ҇то́вою, тлѣ̑ннаѧ же и҆ вре́мєннаѧ, мꙋ́ченице мꙋ́драѧ, забве́нїемъ преминꙋ́ла є҆сѝ ꙗ҆́кѡ словесѐ ᲂу҆чени́ца: по́стнически пе́рвѣе стра̑сти ᲂу҆мертви́вши, страда́льчески второ́е льсти́ваго посрами́ла є҆сѝ. тѣ́мже и҆ зижди́телѧ сꙋгꙋ́бꙋ дерзнове́нїю сподо́биласѧ є҆сѝ, сла́внаѧ, ꙗ҆́кѡ того̀ послꙋ́шавши, феѵрѡ́нїе пребога́таѧ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Ꙗ҆́кѡ всенепоро́чнаѧ невѣ́сто творцꙋ̀, ꙗ҆́кѡ неискꙋсомꙋ́жнаѧ мт҃и и҆зба́вителю, прїѧ́телище ꙗ҆́кѡ сꙋ́щи ᲂу҆тѣ́шителѧ, препѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ бѣсѡ́мъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ, нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.
Крⷭ҇тобг҃оро́диченъ:
А҆́гнца и҆ па́стырѧ, и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше, пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бж҃е́ствєнныѧ стра̑сти твоѧ̑.
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Не довлѣ́ютъ ᲂу҆ста̀ человѣ̑ча восхвали́ти тѧ̀, є҆го́же ᲂу҆ста̀ хрⷭ҇тѡ́ва похвали́ша, сла̑дкаѧ и҆ медотѡ́чнаѧ, и҆ жи́зни и҆спо́лнь сꙋ̑щаѧ, и҆ сло́во всѣ̑мъ да̑рꙋющаѧ: ѻ҆ба́че прїимѝ моѐ пѣ́нїе, вѣ́дый любо́вь, и҆ са́мое то̀ моле́нїе, и҆́бо неизбѣ́жно.
Чи́стое ꙗ҆ви́сѧ се́рдце твоѐ, прⷣте́че, мѷроположе́нїе ст҃а́гѡ дх҃а, благоꙋха́ющее добродѣ́тєли, кадѧ́щее ра́зꙋмъ, сладѧ́щее благодѣѧ̑нїѧ. блаже́нни ᲂу҆̀бо, є҆ли́цы чи́стїи се́рдцемъ, бг҃а бо ті́и, речѐ, ᲂу҆́зрѧтъ.
Посѣче́нїе сѣки́ры при ко́рени приближа́етсѧ, и҆ свидѣ́тельствꙋетсѧ, ꙗ҆́кѡ всѧ́ко дре́во, не творѧ́щее плода̀ добра̀, сѣ́чивомъ посѣка́етсѧ, и҆ вве́ржетсѧ во ѻ҆́гнь гее́нскїй, тѣ́мже трепещѝ, дꙋшѐ моѧ̀, и҆ плоды̀ покаѧ́нїѧ принесѝ.
Ꙗ҆́кѡ и҆мѣ́ѧ на нб҃сѣ́хъ житїѐ, прїѧ́тъ гра́дъ и҆мꙋ́щь ѡ҆снова̑нїѧ незы́блємаѧ, гра́да бо здѣ̀ не вожделѣ́лъ є҆сѝ: пребыва́ющїй же і҆ерⷭ҇ли́мъ ꙗ҆́вѣ свобо́дный ма́терь па́ѵловꙋ, вы́шнїй сїѡ́нъ.
Бг҃оро́диченъ:
Вѣ́ра тепла̀ повѣ́дꙋетсѧ, а҆ не сказа́нїе стра́шнагѡ, ѻ҆трокови́це, та́инства твоегѡ̀: смотрѧ́емо бо то̀, ника́коже сказа́нно є҆́сть, и҆ зри́мо, непости́жно: съ тобо́ю бо ми́мѡ тека́етъ, и҆ постиза́емо ѿбѣга́етъ, и҆ ꙗ҆влѧ́ѧсѧ ма́лѡ что̀ ѿкрыва́етсѧ.
И҆́нъ. І҆рмо́съ то́йже.
Поро́ка въ тебѣ̀ ѿню́дъ нѣ́сть, всехва́льнаѧ феѵрѡ́нїе: ты́ бо по ѻ҆боемꙋ̀, и҆зба́вителю твоемꙋ̀, и҆ рачи́телю вожделѣ́нномꙋ бл҃гоꙋгоди́ти потща́ласѧ є҆сѝ, воздержа́тельными болѣ́зньми и҆ мꙋ́ченическими страда́ньми ᲂу҆краше́ннаѧ, бг҃омꙋ́драѧ, пребога́таѧ.
Ѿ млады́хъ, мꙋ́ченице, ногте́й вожделѣ́ла є҆сѝ любы̀ и҆сто́чника приснотекꙋ́щагѡ, вожделѣ́ннагѡ всѣ̑мъ словє́снымъ: є҆гѡ́же насы́щшисѧ мꙋче́нїѧ бѡлѣ́зни претерпѣ́ла є҆сѝ, ѻ҆гне́мъ ѡ҆палѧ́ема, и҆ ᲂу҆дѡ́въ лише́на, феѵрѡ́нїе, дѣ́въ похвало̀.
Словесы̀ бж҃їими воспи́тана, бг҃омꙋ́драѧ, жела́ющымъ сло́во спаси́тельное свѧще́нныхъ кни́гъ свѧще́ннѡ врꙋча́ющи, бжⷭ҇твеннѣ, мꙋ́ченице, просте́рла є҆сѝ, и҆ ᲂу҆че́нїѧ мздꙋ̀ прїѧ́ла є҆сѝ, мꙋ́чєникъ сла́вою ѡ҆богати́вшисѧ.
Бг҃оро́диченъ:
Две́рь свѣ́та всѣ̑мъ ꙗ҆ви́ласѧ є҆сѝ, всенепоро́чнаѧ, сꙋ́щымъ во тмѣ̀ свѣ́тъ неѡпи́санный, ѡ҆пи́санъ пло́тїю, хрⷭ҇та̀ пра́веднаго сл҃нца возблиста́вши, є҆гѡ́же ны́нѣ лꙋча́ми феѵрѡ́нїа ᲂу҆крѣпи́вшисѧ, мꙋ́чєникъ сла́вꙋ притѧжа̀.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Вѣті́йствꙋющїй ѧ҆зы́къ, любомꙋ́дреннѡ гремѧ́щихъ словеса̀, и҆ глагѡ́лъ си̑лы, и҆ число́мъ и҆ завѣ́томъ текꙋ́щїи, и҆ пле́щꙋщее высокогла́сїе ра́зꙋмъ, восхвали́ти тѧ̀ досто́йнѡ не мо́гꙋтъ.
Тꙋчено́сенъ ѻ҆́блакъ, до́ждь кропѧ́щь разꙋмѣ́нїй, и҆ и҆ста́ѧвшыѧ неразꙋ́мїѧ пла́менемъ, и҆ и҆счеза́ющыѧ прохлажда́ющъ, росо́ю просте́рта, хрⷭ҇то́съ тѧ̀ показа̀, прⷣте́че.
Да̑ры нетлѣ́нными, и҆ благодѣѧ̑нїи бж҃е́ственными, и҆ дарова̑нїи ѡ҆богати́ мѧ, ѡ҆бнища́вшаго, и҆ наготꙋ́юща ѿ добродѣ́тели всѧ́кїѧ, и҆ твои́мъ покро́вомъ ѡ҆дѣ́й мѧ̀ спаси́тельнымъ, ꙗ҆́коже бж҃е́ственною ри́зою.
Сквє́рныѧ мы̑сли, и҆ тлетвѡ́рнаѧ помышлє́нїѧ, и҆зрасти́вши дꙋша̀ моѧ̀, бл҃же́нне, страсте́й те́рнїемъ ѡ҆лѧдѣ̀: є҆́юже ве́щїю разгорѣ́вшисѧ, твои́хъ моли́твъ ѻ҆гне́мъ ѡ҆чи́щь, стра́хъ бж҃їй въ не́й всѣ́й.
Бг҃оро́диченъ:
Гдⷭ҇оимени́таѧ дв҃о, гра́дъ нарече́на цр҃ѧ̀ хрⷭ҇та̀, веселꙋ́емый ᲂу҆стремлє́нїи мы́сленныѧ рѣкѝ, и҆дѣ́же є҆́сть всѣ́хъ веселѧ́щихсѧ жили́ще, ѻ҆каѧ́ннꙋю мою̀ дꙋ́шꙋ ᲂу҆чинѝ.
И҆́нъ. І҆рмо́съ то́йже.
Оу҆краси́сѧ порфѵ́рою, мꙋ́ченице, и҆зъ крове́й твои́хъ и҆стка́нною тебѣ̀, ѡ҆бнажи́сѧ тѣ́ломъ, и҆ страсте́й ѻ҆де́ждꙋ ѿве́ргла є҆сѝ, предъ сꙋди́щемъ ста́вши мꙋчи́телей, ѽ феѵрѡ́нїе! хрⷭ҇то́вѣ подо́бѧщисѧ наготѣ̀.
Разже́гшисѧ, мч҃енице, любо́вїю жениха̀ твоегѡ̀ мы́сленнагѡ, и҆ распа́льшисѧ сегѡ̀ добро́тами нетлѣ́нными, претерпѣ́ла є҆сѝ ᲂу҆сѣче́нїе рꙋ́къ, и҆ ꙗ҆́звєнныѧ болѣ̑зни, феѵрѡ́нїе, мꙋ́ченицъ похвало̀.
То́ки твои́хъ крове́й многобо́жїѧ пла́мень ᲂу҆гаси́ша: твои́ же зꙋ́бы и҆скорене́ннїи всю̀ и҆сторго́ша і҆́дѡльскꙋю ле́сть, и҆ пи́щꙋ тебѣ̀, феѵрѡ́нїе, вѣ́чныѧ красоты̀ содѣ́лаша.
Бг҃оро́диченъ:
Твоѝ но́зѣ ᲂу҆сѣ́кшесѧ, бжⷭ҇твенныхъ мꙋ́чєникъ стезе́ю ше́ствоваша, и҆ къ ро́ждшемꙋсѧ ѿ дв҃ы ст҃ы́ѧ преидо́ша, ходѧ́ще ра́достнѡ въ раѝ, феѵрѡ́нїе дв҃о бг҃оневѣ́сто.
Пѣ́снь ѕ҃. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Ꙗ҆́кѡ безпло́тенъ, крⷭ҇ти́телю, и҆ невеще́ственъ, поꙋча́ѧсѧ безсме́ртїю невеще́ственныхъ, въ ме́ртвеннѣй и҆ ве́щнѣй пло́ти твое́й: любомꙋ́дрїемъ же коне́чнымъ ᲂу҆краси́лсѧ є҆сѝ постѧ́сѧ, и҆ бы́лъ є҆сѝ а҆́гг҃льскомꙋ и҆ человѣ́ческомꙋ сꙋществꙋ̀ соприча́стникъ.
Пресвѣ́тло во ѕвѣзда́хъ со́лнце, во времена́хъ же сладча́йша весна̀, всѣ̑мъ же ст҃ы́хъ собо́рꙋ, ты̀ ꙗ҆́коже ѕвѣзда́мъ надлежи́ши со́лнце, наразсꙋ́днымъ вели́чествомъ, по всѧ́комꙋ ѡ҆бога́щсѧ є҆стествꙋ̀.
Вели́кїй хрⷭ҇тїа́нъ застꙋ́пниче, те́плый грѣ́шникѡвъ ᲂу҆тѣ́шителю, небе́снагѡ црⷭ҇твїѧ виті́ѧ, вво́дниче въ бж҃е́ственное креще́нїе, проповѣ́дниче покаѧ́нїѧ, покаѧ́нїѧ мѧ̀ ѻ҆́бразы ᲂу҆твердѝ.
Бг҃оро́диченъ:
Ты̀ лѣ́ствица є҆сѝ нб҃сѝ равна̀, влⷣчце, ѿ землѝ до нб҃сѐ просте́рта: ты̀ вои́стиннꙋ непроходи́маѧ две́рь, па́че же всезлата́ѧ рꙋ́чка, и҆ мо́стъ, возводѧ́щь къ нб҃сѝ, и҆ жи́зни восхо́ды ѿверза́ющь.
И҆́нъ. І҆рмо́съ то́йже.
Селі́на ѕлочести́вагѡ безбо́жное и҆ го́рдое низложи́сѧ сꙋровство̀, бж҃їимъ є҆́же ѡ҆ всѣ́хъ промышле́нїемъ, взыска́вшимъ кро́вь твою̀, сла́внаѧ, и҆ спасе́сѧ твои́мъ терпѣ́нїемъ бжⷭ҇твенный лїсїма́хъ.
Свѣти́льникъ бг҃осїѧ́ненъ тѧ̀ показа̀, мꙋ́драѧ и҆ бг҃оно́снаѧ врѷе́ни, ᲂу҆че́нїи наста́вльши, ѻ҆трокови́це, и҆ наде́жды ника́коже погрѣшѝ: предста́ви бо тѧ̀ хрⷭ҇тꙋ̀, феѵрѡ́нїе, невѣ́стꙋ нескве́рнꙋ.
Бг҃оро́диченъ:
Ѡ҆дꙋшевле́нный влⷣки черто́гъ, и҆́же свѣ́тлыми дв҃ства зарѧ́ми, свѣтови́днѡ ꙗ҆́кѡ крі́нъ сїѧ́ѧ, посредѝ терно́внагѡ смѣше́нїѧ, пречⷭ҇таѧ и҆ бг҃олѣ́пнаѧ бцⷣа дв҃а сла́витсѧ.
Конда́къ предте́чи, гла́съ г҃. Подо́бенъ: Дв҃а дне́сь:
Пре́жде непло́ды, дне́сь хрⷭ҇то́ва предте́чꙋ ражда́етъ, и҆ то́й є҆́сть и҆сполне́нїе всѧ́кагѡ прⷪ҇ро́чества: є҆го́же бо прⷪ҇ро́цы проповѣ́даша, на сего̀ во і҆ѻрда́нѣ рꙋ́кꙋ положи́въ, ꙗ҆ви́сѧ бж҃їѧ сло́ва прⷪ҇ро́къ, проповѣ́дникъ, вкꙋ́пѣ и҆ предте́ча.
І҆́косъ:
І҆и҃са хрⷭ҇та̀ и҆́стиннаго бг҃а на́шего, и҆са́їа и҆ногда̀ и҆ прⷪ҇ро́цы всѝ, во ѻ҆́бразѣхъ ви́дѣша и҆ сѣ́нехъ: но се́й бо́лїй си́хъ бы́сть прⷪ҇ро́къ, ꙗ҆́коже пи́шетъ: бг҃а бо сло́ва, є҆го́же проречѐ, ви́дѣ во пло́ти и҆ ѡ҆сѧза̀, и҆ пре́жде рожде́нїѧ провозвѣща́етъ и҆гра̑нїи свои́ми всемꙋ̀ мі́рꙋ ра́дость, ꙗ҆́кѡ пе́рвѣе ꙗ҆ви́сѧ сло́ва прише́ствїѧ прⷪ҇ро́къ и҆ проповѣ́дникъ, вкꙋ́пѣ и҆ предте́ча.
Пѣ́снь з҃. І҆рмо́съ:
Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.
Прⷪ҇ро́кѡвъ ве́рхъ, а҆пⷭ҇лѡвъ печа́ть, и҆ по́стникѡвъ нача́ло, соверше́нїе пра́ведныхъ, ᲂу҆твержде́нїе мꙋ́ченикѡвъ, тѧ̀ хрⷭ҇то́съ, бл҃же́нне, показа̀, и҆́стиннаѧ глава̀ всеѧ̀ цр҃кве.
И҆зъ чре́ва мт҃рнѧ и҆спо́лнилсѧ є҆сѝ ст҃а́гѡ дх҃а, прⷣте́че, и҆ сїке́ра и҆ вїна̀ не пи́лъ є҆сѝ, ꙗ҆́коже речѐ ѻ҆ц҃ꙋ̀ твоемꙋ̀ а҆́гг҃лъ. тѣ́мже наре́клсѧ є҆сѝ вели́къ предъ бг҃омъ.
Крⷭ҇ти́вый человѣ́ки во ѻ҆гнѝ ст҃ы́мъ дх҃омъ пе́рвѣе, ѻ҆гне́мъ гее́нскимъ то́кмѡ крⷭ҇ти́тъ по́слѣжде томꙋ̀ невѣ́рꙋющыѧ: и҆́же го́рькагѡ креще́нїѧ, крⷭ҇ти́телю, и҆зба́ви мѧ̀.
Бг҃оро́диченъ:
Рꙋ́чка бездꙋ́шнаѧ дре́вле тѧ̀ ѡ҆дꙋшевле́ннꙋ рꙋ́чкꙋ сказа́ше, влⷣчце: жи́зни бо ма́ннꙋ носи́вши хрⷭ҇та̀, сме́рти го́ресть ѿе́млющаго, и҆́стиннꙋю сла́дость и҆ просвѣще́нїе мі́рꙋ.
И҆́нъ. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Стрꙋи̑ то́чиши и҆сцѣле́нїй, притека́ющымъ вѣ́рою къ твоемꙋ̀ гро́бꙋ, феѵрѡ́нїе, и҆ женихꙋ̀ твоемꙋ̀ вопїю́щымъ: бл҃гослове́нъ є҆сѝ, гдⷭ҇и бж҃е, во вѣ́ки.
Ѽ до́брыѧ твоеѧ̀ кꙋ́пли! го́рстїю кро́ве, бг҃омꙋ́драѧ, и҆змѣни́ла є҆сѝ црⷭ҇твїе бж҃їе, всехва́льнаѧ, вопїю́щи: благослове́нъ є҆сѝ, гдⷭ҇и бж҃е, во вѣ́ки.
Бг҃оро́диченъ:
Съ ли́ки дѣви́ческими ликꙋ́еши, досточꙋ́днаѧ феѵрѡ́нїе дв҃о, дв҃ѣ бг҃ома́тери вопїю́щи: бл҃гослове́нъ, пречⷭ҇таѧ, пло́дъ твоегѡ̀ чре́ва.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Во́дꙋ сла́дкꙋ напои́тельнꙋ непокори̑вымъ и҆ неразꙋ̑мнымъ и҆сточѝ лю́демъ і҆и҃льтєскимъ, жезла̀ ᲂу҆ѧзвле́нїемъ, ка́мень немо́кренный, и҆ тве́рдый и҆ несѣко́мый: ѿ непло́дныхъ же и҆ безча́дныхъ чре́слъ на́мъ и҆стечѐ рѣка̀ и҆сцѣле́нїй.
Съ похвала́ми, прⷪ҇ро́че, творѧ́тъ па́мѧть твою̀, собо́ръ пра́ведныхъ, прⷪ҇рѡ́къ сосло́вїе, мꙋ́чєникъ вѡ́инства, и҆ пѡ́стникъ составле́нїе, чи́нове преподо́бныхъ, и҆ ст҃ы́хъ всѣ́хъ: па́мѧть бо пра́ведныхъ вои́стиннꙋ съ похвала́ми.
Не́бо ѡ҆дꙋшевле́нное, добродѣ́тельми ꙗ҆́кѡ ѕвѣзда́ми ᲂу҆краше́нное, златосїѧ́нное и҆ златоза́рное со́лнце, свѣ́щникъ бл҃года́ти, сокро́вище дх҃а, црⷭ҇твїѧ вели́кїй проповѣ́дникъ, виті́ѧ бг҃одохнове́нный, громогла́сный ѧ҆зы́къ, трꙋба̀ вели́каѧ, предте́ча да воспое́тсѧ.
Бг҃оро́диченъ:
Стра́нна и҆ ди́вна ᲂу҆жа́сна повѣ̑данїѧ страннолѣ́пнагѡ и҆ пресла́внагѡ рождества̀ твоегѡ̀, мр҃і́е всепѣ́таѧ: гдⷭ҇а бо сла́вы, є҆мꙋ́же херꙋві́ми и҆ серафі́ми предстоѧ́тъ, є҆ди́наго ѿ трⷪ҇цы неслїѧ́ннѡ, непрело́жнѡ родила̀ є҆сѝ безъ сѣ́мене, и҆зъ тебє̀ воплоще́нна.
И҆́нъ. І҆рмо́съ то́йже.
Свѣтоѧвле́нна па́мѧть твоѧ̀, феѵрѡ́нїе, соверша́етсѧ ны́нѣ, свѣтови́дными мо́лнїѧми блиста́ющи: свѣ́тꙋ бо прибли́жисѧ, и҆ свѣтоно́сна бы́сть, свѣтотво́рцꙋ и҆ свѣтода́телю вопїю́щи: ѻ҆́троцы благослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Оу҆дивле́нна была̀ є҆сѝ пе́рвѣе воздержа́нїи, прехва́льнаѧ, и҆ мꙋ́ченически ᲂу҆краси́ласѧ є҆сѝ по́слѣжде: во слѣ́дъ бо потекла̀ є҆сѝ рачи́телѧ, ѻ҆трокови́це свѣ́тлаѧ. ѻ҆́ба сосца̀ твоѧ̑, бла́ги па́че вїна̀, ᲂу҆рѣ́зани бы́вше, феѵрѡ́нїе, за бл҃гоче́стїе: вонѧ́ же твои́хъ а҆рѡма́тъ вѣ̑рныѧ бл҃гоꙋха́етъ.
Ѡ҆тѧгче́нъ прегрѣше́ньми, феѵрѡ́нїе всехва́льнаѧ, и҆ треволне́нїи страсте́й приклоне́нъ, прибѣга́ю къ покро́вꙋ твоемꙋ̀, ѻ҆бои́хъ разрѣше́нїе и҆ща́й. но ꙗ҆́кѡ чꙋ́днаѧ и҆ и҆збра́ннаѧ влⷣцѣ, вопїю́ща не пре́зри: но твои́ми мѧ̀ моли́твами и҆схитѝ, дв҃о, ѿ плени́цъ дꙋшетлѣ́нныхъ.
Бг҃оро́диченъ:
Вѣті́йствꙋющїи ѧ҆зы́цы тѧ̀ воспѣ́ти не мо́гꙋтъ, ѽ бг҃ороди́тельнице мр҃і́е бг҃оневѣ́сто: бг҃а бо родила̀ є҆сѝ надъ всѣ́ми сꙋ́щаго, ѻ҆трокови́це чⷭ҇таѧ, ѿ дѣви́ческагѡ неискꙋсобра́чнагѡ чре́ва. є҆мꙋ́же ны́нѣ феѵрѡ́нїа пою́щи взыва́етъ: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ не́бо, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Сѐ тебѣ̀ влⷣцѣ моемꙋ̀, и҆ те́пломꙋ дꙋшѝ моеѧ̀ застꙋ́пникꙋ, хꙋдо́е сїѐ принесо́хъ приноше́нїе, ра́бское слꙋже́нїе, бл҃же́нне, бл҃горазꙋ́мнѡ и҆сполнѧ́ѧ: є҆́же вонмѝ, возлю́бль пра́въ, пе́рвѣе дѣ́лъ, и҆ пре́жде да́ра произволе́нїе.
Нечи́стыми ᲂу҆стна́ми и҆ скве́рными, пречⷭ҇тыѧ дв҃ы, всечи́стаго тѧ̀ сро́дника, блаже́нне, молю̀, нечи́стый и҆ скве́рный, и҆ ѻ҆калѧ́нный сластьмѝ: ѡ҆мы́й тѣ́ло, ѡ҆чи́сти дꙋ́хъ, и҆ дꙋ́шꙋ мою̀ ѡ҆свѧтѝ.
Черто́га нбⷭ҇нагѡ таи́нниче, жениха̀ хрⷭ҇та̀ дрꙋ́же и҆́скреннїй, стоѧ́й и҆ гла́съ слы́ша ра́достный женихо́въ досто́йный, покажѝ блага́гѡ гла́са и҆ менѐ, со благослове́нными наслѣ́дника ца́рствїѧ, бг҃ꙋ зовꙋ́щꙋ въ наслѣ́дїе.
Бг҃оро́диченъ:
Пречⷭ҇таѧ дв҃о мт҃и бж҃їѧ, невеще́ственнѡ палѧ́щагѡ ᲂу҆́глѧ, ве́щь дꙋша́мъ ѡ҆дꙋшевле́нна, клеща̀ серафі́мскаѧ, и҆ пламенноно́сный престо́ле носи́магѡ херꙋві̑мы, ве́щь дꙋшѝ моеѧ̀ ѻ҆гне́мъ невеще́ственнымъ попалѝ, и҆ негаси́магѡ ѻ҆гнѧ̀ и҆зба́ви мѧ̀.
И҆́нъ. І҆рмо́съ то́йже.
Бж҃е́ственнаѧ влⷣки голꙋби́це, позлаще́нна свѣ́тлостїю двⷭ҇тва, тѣ́ло просвѣ́щши поще́нїемъ, позлаще́нна крилы̀ златови́дными блиста́нїи твоегѡ̀ и҆сповѣ́данїѧ, и҆ бж҃е́ственныхъ твои́хъ крове́й, тѧ̀ пою́щыѧ просвѣтѝ.
Оу҆мꙋ̀ бесѣ́довавши наги́мъ ᲂу҆мо́мъ, феѵрѡ́нїе бг҃омꙋ́драѧ, попра́ла є҆сѝ жела̑нїѧ до конца̀ и҆ кончи́нꙋ блаже́ннꙋю полꙋчи́ти сподо́биласѧ є҆сѝ, и҆ ны́нѣ црⷭ҇твꙋеши со хрⷭ҇то́мъ, свѣ́тлѡ съ твои́мъ женихо́мъ, въ неизрече́нныхъ черто́зѣхъ въ весе́лїи пребыва́ющи.
И҆сцѣлє́нїѧ и҆сточа́еши ꙗ҆́кѡ рѣ́ки, вѣ́рою притека́ющымъ ко твое́й честнѣ́й ра́цѣ, феѵрѡ́нїе бг҃ови́днаѧ, дѣ́вства сто́лпъ, цвѣ́тъ є҆стества̀ красе́нъ, дщѝ царе́ва, ꙗ҆́же внꙋ́трь и҆мꙋ́щи бжⷭ҇твенныѧ сла́вы бл҃же́нство.
Бг҃оро́диченъ:
И҆спра́вила є҆сѝ, дв҃о, же́нъ поползе́нїе, сло́ва ро́ждши, горѣ̀ воздви́жꙋщаго низпа́дшыѧ, ꙗ҆́кѡ блага̀, и҆ держа́внаго си́лъ: є҆гѡ́же феѵрѡ́нїа сла́внаѧ вожделѣ́вши ᲂу҆се́рднѡ, въ слѣ́дъ тебє̀ потекꙋ̀, ра́дꙋющисѧ возопи́ла є҆́сть.
Свѣти́ленъ. Подо́бенъ: Жєны̀ ᲂу҆слы́шите:
Предте́чево дне́сь радостотво́рное рожде́нїе, сѣ́тованїе рѣши́тъ ѻ҆́ч҃а безгла́сїѧ, и҆ ро́ждшїѧ непло́дство, возвѣща́етъ же настоѧ́щꙋю ра́дость и҆ весе́лїе: тѣ́мже и҆ всѧ̀ тва́рь свѣ́тлѡ того̀ пра́зднꙋетъ.
Бг҃оро́диченъ:
Премꙋ́дрость ѵ҆поста́снꙋю, и҆ сло́во пресꙋ́щное, и҆ врача̀ дꙋ́шъ и҆ тѣле́съ ро́ждшаѧ, гноє́нїѧ и҆ ра̑ны дꙋшѝ моеѧ̀ и҆сцѣлѝ лю̑тыѧ и҆ вре́мєнныѧ, и҆ се́рдца моегѡ̀ ᲂу҆ста́ви бѡлѣ́зни, дв҃о.
На стїхо́внѣ стїхи̑ры ѻ҆ктѡ́иха. Сла́ва, гла́съ в҃:
И҆́же ѿ прⷪ҇ро́ка прⷪ҇ро́ка, и҆ непло́дныѧ прозѧбе́нїе, въ рожде́нныхъ жена́ми превы́шша всѣ́хъ, пꙋсты́ннаго граждани́на, і҆ѡа́нна сла́внаго, ѱалмы̑ и҆ пѣ́ньми и҆ пѣ́сньми дх҃о́вными восхва́лимъ, вопїю́ще къ немꙋ̀: крⷭ҇ти́телю сп҃совъ и҆ предте́че, ꙗ҆́кѡ и҆мѣ́ѧ дерзнове́нїе, въ честнѣ́мъ твое́мъ рождествѣ̀, ᲂу҆молѝ хрⷭ҇та̀, дарова́ти ми́ръ мі́рꙋ, и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Дре́вꙋ кре́стномꙋ тѧ̀, і҆и҃се, прегвожде́на зрѧ́щи неискꙋсобра́чнаѧ, пла́чꙋщи глаго́лаше: ча́до сла́дкое, почто̀ ѡ҆ста́вилъ є҆сѝ менѐ ро́ждшꙋю тѧ̀ є҆ди́нꙋ, свѣ́те непристꙋ́пный пребезнача́льнагѡ ѻ҆ц҃а̀; потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, и҆́же бжⷭ҇твєнныѧ стрⷭ҇ти твоѧ̑ сла́вѧщїи.
На лїтꙋргі́и, прокі́менъ, гла́съ д҃. Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ. А҆пⷭ҇лъ къ корі́нѳѧнѡмъ, зача́ло рн҃а. А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе лꙋкѝ, зача́ло л҃г. Прича́стенъ: Въ па́мѧть вѣ́чнꙋю:
Слꙋ́жба ст҃ы́хъ чꙋдотво́рцєвъ мꙋ́ромскихъ, кнѧ́зѧ петра̀, во и҆́ноцѣхъ дв҃да, и҆ кнѧги́ни феѵрѡ́нїи, во и҆́нокинѧхъ є҆ѵфросѵ́нїи.
Ве́черъ, Блаже́нъ мꙋ́жъ:
На Гдⷭ҇и, воззва́хъ, стїхи̑ры, творе́нїе господи́на пахѡ́мїа мона́ха. гла́съ д҃. Подо́бенъ: Ꙗ҆́кѡ до́блѧ:
Прїиди́те дꙋхо́внѣ ꙳ соше́дшесѧ дне́сь вѣ́рнїи, ꙳ на́шѧ застꙋ́пники восхва́лимъ, ꙳ прего́рдаго ѕмі́а попра́вшыѧ, ꙳ петра̀ благочести́ваго, ꙳ вкꙋ́пѣ съ феѵрѡ́нїею, ꙳ чꙋдотво́рцы мꙋ́рѡмскїѧ, ꙳ ꙗ҆́кѡ цѣломꙋ́дрїѧ рачи́тели, ꙳ хрⷭ҇тꙋ̀ молѧ́щыѧсѧ ѡ҆ спасе́нїи дꙋ́шъ на́шихъ.
Наста̀ ны́нѣ всесвѣ́тлаѧ па́мѧть ва́ша, пресла́вный пе́тре, ꙳ съ премꙋ́дрою феѵрѡ́нїею, ꙳ ѡ҆сѣнѧ́ющи новоизбра̑нныѧ лю́ди. ꙳ тѣ́мъ хрⷭ҇та̀ моли́те ꙳ ѡ҆ спасе́нїи всѣ́хъ, ꙳ любо́вїю ва́съ непреста́ннѡ, ꙳ блаже́ннїи, почита́ющихъ, ꙳ чꙋдотво́рцєвъ мꙋ́ромскихъ.
Пе́рвѣе ᲂу҆́бѡ прехва́льнїи, ꙳ ѿ ю҆́ности ва́шеѧ хрⷭ҇тꙋ̀ рабо́тасте, ꙳ сꙋ́щыѧ въ мі́рѣ се́мъ ꙳ ꙗ҆́кѡ ᲂу҆ме́ты презрѣ́вше, ꙳ и҆ сегѡ̀ ра́ди ми́лостынею и҆ моли́твами ꙳ до́брѣ томꙋ̀ ᲂу҆годи́вше. ꙳ тѣ́мъ и҆ по сме́рти ꙳ и҆сцѣле́нїе подава́ете всѣ̑мъ, ꙳ вѣ́рою ва́съ почита́ющымъ.
И҆́ны стїхи̑ры, творе́нїе мїхаи́ла мона́ха, гла́съ в҃.
Подо́бенъ: Кі́ими похва́льными:
Кі́ими похва́льными вѣнцы̑ ꙳ вѣнча́емъ бл҃же́ннаго петра̀, вкꙋ́пѣ съ премꙋ́дрою феѵрѡ́нїею, ꙳ раздѣле́нныхъ тѣ́ломъ, и҆ совокꙋ́пленныхъ благода́тїю, ꙳ ѻ҆́ваго ꙗ҆́кѡ премꙋ́дра, ѕмі́ѧ побѣди́вшаго, ꙳ ѻ҆́вꙋ же ꙗ҆́кѡ цѣломꙋ́дрїѧ сохра́нницꙋ; ꙳ сегѡ̀ ра́ди соше́дшесѧ воспое́мъ пѣ́сньми ра́достными, си́це глаго́люще: ꙳ ра́дꙋйтесѧ, прехва́льнїи, люде́й правосла́вныхъ похвале́нїе, ꙳ землѝ рѡссі́йскїѧ застꙋпле́нїе, ѻ҆те́чества своегѡ̀ храни́телїе, ꙳ ва́съ бо безсме́ртныѧ сла́вы вѣнцы̑ ꙳ вѣнча̀ хрⷭ҇то́съ бг҃ъ, ꙳ и҆мѣ́ѧй ве́лїю ми́лость.
Кі́ими пѣ́сненными добро́тами ꙳ восхва́лимъ петра̀ блаже́ннаго, ꙳ съ прехва́льною феѵрѡ́нїею; ꙳ ꙗ҆́кѡ бг҃оразꙋ́мнаѧ кри́ла, ꙳ прелетѣ́вшаѧ ѿ землѝ на не́бо, ꙳ и҆ прибли́жишаѧсѧ прⷭ҇то́лꙋ ст҃ы́ѧ трⷪ҇цы, ꙳ и҆ со а҆́гг҃лы ве́селѡ ликовствꙋ́ющаѧ, ꙳ и҆ хрⷭ҇тꙋ̀ молѧ́щаѧсѧ ѡ҆ ᲂу҆строе́нїи мі́ра, ꙳ и҆ ѡ҆ сохране́нїи землѝ рѡссі́йскїѧ ѿ наше́ствїѧ сопроти́вныхъ, ꙳ и҆ междоꙋсо́бныѧ бра́ни, ꙳ и҆̀же любо́вїю восхвалѧ́ютъ, ꙳ и҆ непреста́ннѡ почита́ютъ, ꙳ мꙋ́ромскїѧ чꙋдотво́рцы.
Кі́ими пѣ́сньми дꙋхо́вными ꙳ похва́лимъ бл҃же́нныхъ, спле́тшихсѧ любо́вїю вкꙋ́пѣ ѻ҆бою̀; ꙳ пѣ́сньми ꙳ ра́достными воспое́мъ си́це глаго́люще: ꙳ ра́дꙋйтесѧ, бл҃же́ннїи и҆ требл҃же́ннїи, ꙳ въ бг҃олю́бїи пожи́вшїи, смире́нїе и҆ поще́нїе сохра́ншїи, ꙳ и҆ ми́лостыню да́рꙋющїи, ꙳ ѡ҆ не́йже са́мъ хрⷭ҇то́съ та́кѡ речѐ ꙳: бл҃же́ни ми́лостивїи, ꙗ҆́кѡ ті́и поми́ловани бꙋ́дꙋтъ. ꙳ и҆ сегѡ̀ ра́ди вопїе́мъ къ ни́мъ си́це: пресла́вный пе́тре, вкꙋ́пѣ съ премꙋ́дрою феѵрѡ́нїею, ꙳ моли́те хрⷭ҇та̀, ѡ҆ гра́дѣ сро́дствїѧ ва́шегѡ, ꙳ и҆ на́мъ низпосла́ти ми́ръ и҆ ве́лїю ми́лость.
Кі́ими смире́нными ᲂу҆стна́ми ꙳ воспое́мъ петра̀ бл҃же́ннаго съ пречестно́ю феѵрѡ́нїею, ꙳ ꙗ҆ви́вшихсѧ въ рѡссі́йстѣй землѝ но́выхъ чꙋдотво́рцєвъ, ꙳ и҆ свѣти̑лъ незаходи́мыхъ, ꙳ со́лнца мы́сленнагѡ ѕвѣ́зды пресвѣ́тлыѧ, ꙳ просвѣща́ющыѧ ве́сь мі́ръ чꙋде́съ свѣ́тлостїю, печа́льныхъ ᲂу҆тѣше́нїе, ꙳ плѣне́нныхъ и҆збавле́нїе ѿ го́рькїѧ рабо́ты, ꙳ крѣ́пость и҆ забра́ло гра́да на́шегѡ; ꙳ тѣ́мже прїиди́те всѝ вѣ́рнїи, ꙳ пра́здникъ бл҃же́нныхъ ѱало́мски торжествꙋ́емъ, да моли́твами и҆́хъ вра̑жїѧ шата̑нїѧ всѧ̑ хрⷭ҇то́съ низложи́тъ, и҆мѣ́ѧй ве́лїю ми́лость.
Сла́ва, гла́съ ѕ҃. Самогла́сенъ:
Блаже́нно и҆ треблаже́нно ѻ҆те́чество ва́ше, блаже́нъ же и҆ гра́дъ, въ не́мже жили́ще и҆мѣ́сте, пречи́стенъ же и҆ свѧ́тъ хра́мъ, въ не́мже положє́на бы́ша честна̑ѧ тѣлеса̀ ва̑ша, пресла́вный пе́тре, съ премꙋ́дрою феѵрѡ́нїею: хрⷭ҇тꙋ̀ моли́тесѧ, є҆го́же ѿ ю҆́ности возлюби́сте, сохрани́ти ѻ҆те́чество ва́ше, и҆ дꙋша́мъ на́шымъ дарова́ти ми́ръ, и҆ ве́лїю ми́лость.
И҆ ны́нѣ, бг҃оро́диченъ:
Вхо́дъ, прокі́менъ днѐ. Чтє́нїѧ преподо́бничєскаѧ, пи́саны сегѡ̀ мѣ́сѧца въ ѳ҃ де́нь.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Ꙗ҆́кѡ вели́кое со́лнце, ꙳ вселе́ннѣй все́й ꙳ ꙗ҆ви́стесѧ, блаже́ннїи, ꙳ чꙋдесы̀ просвѣща́юще ве́сь мі́ръ: ꙳ тѣ́мже соше́дшесѧ всѝ воспое́мъ ва́съ.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Свѣ́томъ сїѧ́ѧ ꙳ бжⷭ҇твенныѧ бл҃года́ти, ꙳ пресвѣ́тлый ва́шъ пра́здникъ ра́достенъ всѣ̑мъ, є҆го́же, ра́дꙋющесѧ, ꙳ и҆́скреннѡ всѝ восхва́лимъ.
Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;
Прїиди́те мꙋ́ромстїи наро́ди, вели́цыи и҆ ма́лїи, ꙳ восхва́лимъ въ ва́съ пре́жде ца́рствовавшыѧ, ꙳ тє́плыѧ предста́тели, ꙳ нѡ́выѧ чꙋдотво́рцы петра̀ и҆ феѵрѡ́нїю.
Сла́ва, гла́съ и҃. Самогла́сенъ:
Ра́дꙋйсѧ и҆ весели́сѧ ѡ҆ гдⷭ҇ѣ, гра́де мꙋ́роме, и҆ свѣ́тло торжествꙋ́й, и҆ ликꙋ́й цр҃ковь бж҃їѧ, въ не́йже лежи́тъ честно́е сокро́вище, пресла́вныхъ но́выхъ чꙋдотво́рцєвъ, петра̀ благочести́вагѡ и҆ феѵрѡ́нїи премꙋ́дрыѧ, сокро́вище дра́го и҆ ковче́гъ пресла́венъ, тѣлеса̀ чꙋдеса̀ точа̑щаѧ всѣ̑мъ притека́ющымъ съ вѣ́рою. сегѡ̀ ра́ди прїиди́те всѝ лю́дїе, соше́дшесѧ вѣ́рнїи, поклони́мсѧ ст҃ы̑мъ. тецы́те собра́вшесѧ, и҆ ѱало́мски восплещи́те рꙋка́ми, и҆ ликꙋ́юще ра́дꙋйтесѧ, и҆ веселѧ́щесѧ си́це глаго́лите: ра́дꙋйтесѧ, пресла́внїи чꙋдотво́рцы, пе́тре бл҃же́нне и҆ феѵрѡ́нїе бг҃омꙋ́драѧ: гра́да бо на́шегѡ ᲂу҆твержде́нїе, и҆ на́съ вѣ́рныхъ спасе́нїе. и҆ ны́нѣ въ па́мѧти ва́шей и҆спроси́те ᲂу҆ хрⷭ҇та̀ дарова́ти дꙋша́мъ на́шымъ ми́ръ и҆ ве́лїю ми́лость.
И҆ ны́нѣ, бг҃оро́диченъ. Тропа́рь, гла́съ и҃:
Ꙗ҆́кѡ благочести́вагѡ ко́рене пречестна́ѧ ѻ҆́трасль бы́лъ є҆сѝ, до́брѣ во бл҃гоче́стїи пожи́въ, бл҃же́нне пе́тре: та́кѡ и҆ съ сꙋпрꙋ́жницею твое́ю, премꙋ́дрою феѵрѡ́нїею, въ мі́рѣ бг҃ꙋ ᲂу҆годи́вше, и҆ прпⷣбныхъ житїю̀ сподо́бистесѧ: съ ни́миже моли́тесѧ гдⷭ҇еви, сохрани́ти безъ вре́да ѻ҆те́чество ва́ше, да ва́съ непреста́ннѡ почита́емъ.
Сла́ва, и҆ ны́нѣ, бг҃оро́диченъ: И҆́же на́съ ра́ди рожде́йсѧ ѿ дв҃ы:
На ᲂу҆́трени, на Бг҃ъ гдⷭ҇ь, тропа́рь два́жды.
Сла́ва, и҆ ны́нѣ, бг҃оро́диченъ: По а҃-й стїхоло́гїи сѣда́ленъ, гла́съ а҃.
Подо́бенъ: Ли́къ а҆́гг҃льскїй:
Всѝ пра́зднꙋемъ вкꙋ́пѣ всесвѧтꙋ́ю па́мѧть петра̀ и҆ феѵрѡ́нїи премꙋ́дрыхъ. цр҃ковь бо сла́витъ, вопїю́щи къ ни̑мъ: моли́твами ва́шими, бл҃же́ннїи, и҆сцѣли́те недꙋ́ги и҆ болѣ̑зни на́шѧ, и҆ всѧ́кихъ и҆скꙋше́нїй и҆зба́вите, вѣ́рою па́мѧть ва́шꙋ восхвалѧ́ющихъ.
Два́жды.
Сла́ва, и҆ ны́нѣ, бг҃оро́диченъ:
Чꙋ́до чꙋде́съ, бл҃года́тнаѧ, въ тебѣ̀ зрѧ́щи тва́рь ра́дꙋетсѧ: зачала́ бо є҆сѝ безсѣ́меннѡ, и҆ родила̀ є҆сѝ неизрече́енѡ, є҆го́же чинонача̑лїѧ а҆́гг҃лѡвъ ви́дѣти не мо́гꙋтъ, того̀ молѝ ѡ҆ дꙋша́хъ на́шихъ.
По в҃-й стїхоло́гїи сѣда́ленъ, гла́съ г҃. Подо́бенъ: Красотѣ̀ дѣ́вства:
И҆мꙋ́ще дх҃ъ и҆́стинный премꙋ́дрїи, тѣ́мже мы̀ соше́дшесѧ вѣ́рнїи, па́мѧть ва́шꙋ велича́емъ, и҆ ѡ҆блобыза́емъ честнꙋ́ю ра́кꙋ, и҆сцѣле́нїе полꙋча́юще неѡскꙋ́днѡ, и҆ пою́ще рце́мъ си́це: пе́тре пресла́вне, кꙋ́пнѡ съ сꙋпрꙋ́жницею феѵрѡ́нїею, хрⷭ҇тꙋ̀ моли́тесѧ, сохрани́ти ѻ҆те́чество ва́ше, и҆ разрꙋши́ти междоꙋсо́бнꙋю страсте́й на́шихъ бра́нь, и҆ дарова́ти на́мъ ве́лїю ми́лость.
Два́жды.
Сла́ва, и҆ ны́нѣ, бг҃оро́диченъ:
Красотѣ̀ дѣ́вства твоегѡ̀, и҆ пресвѣ́тлой чистотѣ̀ твое́й гаврїи́лъ ᲂу҆диви́всѧ, вопїѧ́ше тѝ, бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀; недоꙋмѣва́ю и҆ ᲂу҆жаса́юсѧ. тѣ́мже ꙗ҆́кѡ повелѣ́нъ бы́хъ, вопїю́ ти, ра́дꙋйсѧ, бл҃года́тнаѧ.
Хвали́те и҆́мѧ гдⷭ҇не: Припѣ́въ.
Оу҆блажа́емъ ва́съ, ст҃і́и чꙋдотво́рцы пе́тре и҆ феѵрѡ́нїе, и҆ чте́мъ свѧтꙋ́ю па́мѧть ва́шꙋ: вы́ бо мо́лите за ны̀ хрⷭ҇та̀ бг҃а на́шего.
Ѱало́мъ и҆збра́нный: Блаже́нъ мꙋ́жъ боѧ́йсѧ гдⷭ҇а:
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Прїиди́те, всѝ лю́дїе, хвалꙋ̀ принесе́мъ пресла̑внымъ и҆ бг҃омꙋ̑дрымъ чꙋдотво́рцємъ, петрꙋ̀ и҆ феѵрѡ́нїи, си́це вопїю́ще: ра́дꙋйсѧ, преблаже́нне пе́тре, и҆́же го́рдагѡ ѕмі́ѧ свирѣ́пство погꙋби́лъ є҆сѝ, та́кожде и҆ ны́нѣ съ сꙋпрꙋ́жницею твое́ю, застꙋ̑пницы и҆ хода̑таи бꙋ́дите ѻ҆те́чествꙋ ва́шемꙋ, и҆ сопроти́вныхъ го́рдость низложи́те, и҆ грѣхѡ́въ ѡ҆ставле́нїе да́рꙋйте, чтꙋ́щымъ любо́вїю свѧтꙋ́ю па́мѧть ва́шꙋ.
Два́жды.
Сла́ва, и҆ ны́нѣ, бг҃оро́диченъ:
Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, а҆́гг҃льскїй собо́ръ, и҆ человѣ́ческїй ро́дъ. ѡ҆свѧще́нный хра́ме, и҆ раю̀ слове́сный, дѣ́вственнаѧ похвало̀, и҆зъ неѧ́же бг҃ъ воплоти́сѧ, и҆ млⷣнецъ бы́сть, пре́жде вѣ̑къ сы́й бг҃ъ на́шъ: ложесна́ бо твоѧ̀ престо́лъ сотворѝ, и҆ чре́во твоѐ простра́ннѣе нб҃съ содѣ́ла. ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, сла́ва тебѣ̀.
Та́же степє́нна, д҃-гѡ гла́са, а҆нтїфѡ́нъ а҃. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ ѕ҃:
Всѧ́къ гра́дъ и҆ страна̀ сла́вномꙋ гра́дꙋ на́шемꙋ сра́дꙋйтесѧ, и҆ ѱало́мски восплещи́те рꙋка́ми вкꙋ́пѣ, дꙋхо́вное дне́сь торжество̀ пра́зднꙋюще, петра̀ благочести́вагѡ, и҆ феѵрѡ́нїи сла́вныѧ, и҆ пѣ́сньми похвали́те, всечестны́й се́й де́нь соверша́юще, въ весе́лїи вопїю́ще си́це: прїими́те пѣ́нїе люде́й ва́шихъ, блаже́ннїи, и҆ молѧ́щымсѧ пода́йте неѡскꙋ́дно и҆сцѣле́нїе, и҆ ве́лїю ми́лость.
Канѡ́нъ бцⷣы, со і҆рмосо́мъ на ѕ҃, гла́съ в҃: Нетре́нꙋ, неѻбы́чнꙋ:
Ст҃ы̑мъ же два̀ канѡ́на на и҃.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Пѣ́снь твоемꙋ̀ ᲂу҆го́дникꙋ, на землѝ тебѐ просла́вльшемꙋ, петрꙋ̀ принестѝ, бж҃е, да́рꙋй мѝ, ꙗ҆́кѡ да смыслода́вца пѣ́сньми возвели́чꙋ тѧ̀.
Ва́съ, преблаже́ннїи, ѻ҆те́чествꙋ ва́шемꙋ, ꙗ҆́кѡ пресвѣ́тлое со́лнце хрⷭ҇то́съ показа̀, чꙋдесы̀ всѣ́хъ ѡ҆зарѧ́ющее, вѣ́рою къ ва́мъ приходѧ́щихъ.
Ꙗ҆́кѡ ѡ҆ тѣле́сныхъ небре́гше, и҆ земна̑ѧ ꙗ҆́кѡ тлѣ̑ннаѧ возненави́дѣвше, и҆ сегѡ̀ ра́ди мі́ра ѿре́кшесѧ, прпⷣбныхъ че́сти сподо́бистесѧ: съ ни́миже ѡ҆ мі́рѣ моли́тесѧ.
Бг҃оро́диченъ:
Пречⷭ҇таѧ бцⷣе, ро́ждшаѧ пло́тїю присносꙋ́щное сло́во безнача́льнагѡ ѻ҆ц҃а̀, приснодв҃о. є҆мꙋ́же ны́нѣ взыва́емъ: и҆зба́вителю бг҃ꙋ на́шемꙋ пои́мъ.
Дрꙋгі́й канѡ́нъ чꙋдотво́рцємъ, творе́нїе господи́на мїхаи́ла мона́ха.
Гла́съ а҃. Пѣ́снь а҃. І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Благочести́ваго и҆ вѣнцено́снаго петра̀, вкꙋ́пѣ съ феѵрѡ́нїею, соше́дшесѧ по достоѧ́нїю, восхва́лимъ чꙋде́съ пода́телѧ ѻ҆би́льныхъ, и҆ спаса́ющаго дꙋ́шы на́шѧ.
Пѣ́сньми и҆ пѣ́ньми дꙋхо́вными восхва́лимъ блаже́нныхъ вкꙋ́пѣ, си́це глаго́люще: ра́дꙋйтесѧ, прехва́льнїи, ѻ҆те́чествꙋ ва́шемꙋ пресвѣ́тлїи свѣти́льницы и҆ тве́рдїи застꙋ̑пницы.
А҆́ще и҆ на коне́цъ лѣ́тъ новопросвѣще́ннаѧ рѡссі́йскаѧ землѧ̀ си́хъ блаже́нныхъ и҆зрастѝ, но дре́внихъ че́сти сподо́бишасѧ: дарова̑нїѧ бо чꙋде́съ ѻ҆би́льнѡ подаю́тъ приходѧ́щымъ къ ни̑мъ.
Бг҃оро́диченъ:
Оу҆ма̀ моегѡ̀, всенепоро́чнаѧ, ѡ҆мрачє́нїѧ свѣ́томъ твои́мъ ѿженѝ, и҆ тмы̀ и҆зба́ви мѧ̀ вѣ́чнꙋющїѧ, ꙗ҆́кѡ да пою̀ вели̑чїѧ твоѧ̑.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Безпомѡ́щнымъ бꙋ́ди помо́щникъ, блаже́нне пе́тре, и҆ печа̑льнымъ ми́лостивное ᲂу҆тѣше́нїе: да твои́ми моли́твами и҆збавлѧ́еми, почита́емъ тѧ̀.
Ꙗ҆́коже и҆ногда̀ ѕмі́ѧ ᲂу҆би́въ, коне́чномꙋ безвѣ́стїю пре́далъ є҆сѝ: та́кѡ и҆ ны́нѣ твоѐ ѻ҆те́чество борю́щихъ побѣдѝ, треблаже́ни да тѧ̀ прославлѧ́емъ.
Ви́ждь ᲂу҆ны́нїе, ви́ждь печа́ль, ви́ждь бѣдꙋ̀, на ны̀ напа́дающꙋю ѿ проти́вныхъ: тѣ́мже моли́твою твое́ю ко гдⷭ҇ꙋ премѣнѝ, пе́тре, да благоче́стнѡ тѧ̀ почита́емъ.
Бг҃оро́диченъ:
Тебѐ всѝ стѧжа́хомъ хрⷭ҇тїа́не, прибѣ́жище и҆ стѣ́нꙋ, и҆ тебѐ славосло́вимъ немо́лчнѡ, безневѣ́стнаѧ.
И҆́нъ. І҆рмо́съ:
Да ᲂу҆тверди́тсѧ се́рдце моѐ, въ во́ли твое́й, хрⷭ҇тѐ бж҃е, и҆́же надъ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Тебѐ въ чꙋдесѣ́хъ сла́вна рѡссі́йскимъ страна́мъ показа̀ бг҃ъ, пе́тре преблаже́нне, и҆ ᲂу҆краси́ тѧ нбⷭ҇ными дармѝ. того̀ ны́нѣ молѝ, поми́ловати всѣ́хъ на́съ.
Свѣти́льницы пресвѣ́тлїи, ꙗ҆́коже со́лнце второ́е сїѧ́юще, на́съ ѡ҆зари́те соверша́ющихъ па́мѧть ва́шꙋ, преблаже́ннїи пе́тре и҆ феѵрѡ́нїе.
Весе́лїѧ хода́тай наста̀ на́мъ, свѣтоно́сный де́нь петра̀ и҆ феѵрѡ́нїи премꙋ́дрыхъ, и҆̀же вѣ́рою воспѣва́ющымъ и҆̀хъ да́рꙋютъ ве́лїю ми́лость.
Бг҃оро́диченъ:
И҆зба́ви на́съ ѿ всѣ́хъ напа́стей, и҆ ѿ мно́гихъ собла̑знъ ѕмі́евыхъ и҆ тмы̀, всенепоро́чнаѧ, ꙗ҆́же свѣ́тъ поро́ждшаѧ на́мъ невече́рнїй.
Сѣда́ленъ, гла́съ д҃:
Благослове́нномꙋ и҆ свѣтоно́сномꙋ торжествꙋ̀, ꙗ҆́коже со́лнцꙋ возсїѧ́вшꙋ, петра̀ и҆ феѵрѡ́нїи во все́мъ мі́рѣ, къ ни́мже стеце́мсѧ вѣ́рнїи, и҆ непреста́ннѡ вопїе́мъ си́це: а҆́ще и҆ преидо́сте ѿ землѝ, пресла́внїи, но на́съ не ѿлꙋчи́стесѧ, и҆ та́мѡ со а҆́гг҃лы трⷪ҇цѣ предстоитѐ, ю҆́же моли́те, спастѝ дꙋ́шы на́шѧ.
Два́жды.
Сла́ва, и҆ ны́нѣ, бг҃оро́диченъ:
Сло́во ѻ҆́ч҃ее, хрⷭ҇та̀ бг҃а на́шего, ѿ тебє̀ воплоти́вшагосѧ позна́хомъ, бцⷣе дв҃о, є҆ди́на чⷭ҇таѧ, є҆ди́на бл҃гослове́ннаѧ. тѣ́мъ непреста́ннѡ тѧ̀ воспѣва́юще велича́емъ.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Ꙗ҆́кѡ хода́тай и҆ застꙋ́пникъ ѻ҆те́чествꙋ твоемꙋ̀, ꙗ҆́кѡ сопроти́вныхъ рѣши́тель, бꙋ́ди застꙋпа́ѧ лю́ди твоѧ̀, тебѐ, пе́тре, сла́вѧщыѧ.
Ꙗ҆́кѡ въ нбⷭ҇ныхъ ѻ҆би́телехъ, съ прпⷣбными и҆ пра́ведными веселѧ́сѧ, преблаже́нне пе́тре, кꙋ́пнѡ съ феѵрѡ́нїею, не преста́й молѧ̀ ѡ҆ лю́дехъ твои́хъ.
Тебѣ̀ мо́лимсѧ, преблаже́нне, сопроти́вныхъ шата́нїе низложѝ, и҆ недꙋ́ги человѣ́кѡвъ ѡ҆блегчѝ, ꙗ҆́кѡ да во гла́сѣхъ хвале́нїѧ тебѐ велича́емъ.
Бг҃оро́диченъ:
Ѡ҆чище́нїе на́шымъ да́рꙋй прегрѣше́нїємъ, ꙗ҆́кѡ пребл҃гъ, и҆ ᲂу҆мирѝ мі́ръ тво́й, бж҃е, моли́твами ро́ждшїѧ тѧ̀.
И҆́нъ. І҆рмо́съ:
Дх҃омъ прови́дѧ, проро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. Сла́ва си́лѣ твое́й, гдⷭ҇и.
Ѕмі́ѧ ᲂу҆́бѡ и҆ногда̀ ᲂу҆би́въ, блаже́нне, коне́чнѣй того̀ па́гꙋбѣ пре́далъ є҆сѝ: та́кѡ и҆ ны́нѣ, пе́тре, ѻ҆те́чество твоѐ сохранѧ́й ненавѣ́тнѡ, вкꙋ́пѣ съ феѵрѡ́нїею моли́твами твои́ми.
Заре́ю трисо́лнечныѧ благода́ти сїѧ́ѧ свѣ́тлый ва́шъ пра́здникъ, блаже́ннїи, страстна́гѡ ѡ҆мраче́нїѧ бѣсо́вскагѡ и҆збавлѧ́йте творѧ́щихъ вѣ́рою па́мѧть ва́шꙋ.
Дне́сь де́нь ст҃ы́й пра́здничный, мона́хѡвъ созыва́етъ стада̀ на весе́лїе и҆ трапе́зꙋ дꙋхо́внꙋю, и҆ на пи́щꙋ нетлѣ́нныѧ жи́зни, и҆ бжⷭ҇твеннагѡ наслажде́нїѧ чꙋдотво́рцєвъ.
Бг҃оро́диченъ:
Разꙋмѣ́въ прⷪ҇ро́къ дх҃омъ бж҃їимъ, го́рꙋ тѧ̀ приѡсѣне́ннꙋю преднаписа̀, чⷭ҇таѧ, и҆ста́ѧвшꙋю зно́емъ мно́гихъ прегрѣше́нїй, дꙋ́шꙋ мою̀ прохладѝ хода́тайствомъ твои́мъ, дв҃о: є҆ди́на бо ты̀ человѣ́кѡмъ и҆справле́нїе.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Землѧ̀ ѡ҆ст҃и́сѧ, прїе́мши честна̑ѧ тѣлеса̀ ва̑ша, бг҃облаже́ннїи пе́тре и҆ феѵрѡ́нїе: человѣ́цы же прїе́млюще ва́ми и҆сцѣле́нїе, хрⷭ҇та̀ сла́вѧтъ, и҆́скреннѡ ва́съ просла́вльшаго.
А҆́ще и҆ преидо́сте ѿ землѝ, но къ нбⷭ҇нымъ доспѣ́сте, и҆ та́мѡ со а҆́гг҃лы трⷪ҇цѣ предста́сте, ю҆́же моли́те, спастѝ любо́вїю ва́съ почита́ющихъ, бл҃же́ннїи.
Ꙗ҆́кѡ ѕвѣ́зды пресвѣ́тлыѧ, и҆ ꙗ҆́кѡ незаходи́мое со́лнце, стѧжа́вше ва́съ ѻ҆те́чество ва́ше хва́литсѧ, почита́юще па́мѧть ва́шꙋ пречестнꙋ́ю, пе́тре и҆ феѵрѡ́нїе.
Бг҃оро́диченъ:
Дв҃ꙋ пое́мъ тѧ̀ по ржⷭ҇твѣ̀, бцⷣе, ты́ бо пло́тїю бг҃а сло́ва на́мъ родила̀ є҆сѝ, є҆мꙋ́же всѝ си́це зове́мъ: пꙋти̑ на́шѧ напра́ви, мо́лимтисѧ.
И҆́нъ. І҆рмо́съ:
Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ бж҃е на́шъ.
Ѽ предо́браѧ дво́ице! ѽ пресвѣ̑тлаѧ свѣти̑ла! ѽ благосопрѧже́нїе, є҆ди́нъ свѣ́тъ во двою̀ тѣлесѐ сꙋ́щъ! ѽ свѣти́льницы блазі́и своемꙋ̀ житїю̀ бы́вше. ꙗ҆ре́мъ бо гдⷭ҇ень взе́мше, томꙋ̀ ѿ дꙋшѝ послѣ́довасте вѣ́рою.
Досточꙋ́днаѧ и҆ пресла́внаѧ па́мѧть ва́ша возсїѧ̀ въ рѡссі́йстѣй землѝ, бл҃же́ннїи, и҆ ра́достнѡ вѣ́рныхъ весели́тъ собо́ръ, и҆́скреннѡ ва́съ въ пѣ́снехъ, свѧті́и, сла́вѧщихъ.
Свѧти́тели и҆ свѧще́нницы, мона́си и҆ прості́и, и҆ ста́рцы со ю҆́нотами, и҆ всѧ́къ во́зрастъ свѣ́тлѡ пред̾игра́йте, па́мѧть пресла́вныхъ петра̀ и҆ феѵрѡ́нїи въ пѣ́снехъ велича́юще.
Бг҃оро́диченъ:
Свѣтоѻбра́зный хрⷭ҇то́въ хра́мъ, ѻ҆трокови́це, моли́твами твои́ми, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ на́съ хра́мы сотворѝ, прпⷣбныѧ содѣва́ющи, пречⷭ҇таѧ.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Ѽ пречестна́ѧ дво́ице! ѽ вели́цыи свѣти́льницы! ѡ҆свѧти́те и҆ просла́вите любо́вїю ва́съ въ пѣ́снехъ сла́вѧщихъ, чꙋдотво́рцы.
Ꙗ҆́кѡ пресвѣ́тлаѧ дво́ице, и҆ ꙗ҆́кѡ пречⷭ҇тна́ѧ верста̀, и҆ бл҃госочета́нїе, ꙗ҆ре́мъ гдⷭ҇ень взе́мше, томꙋ̀ ѿ дꙋшѝ порабо́тасте.
Ꙗ҆́кѡ совѣ́тницы до́брїи своемꙋ̀ житїю̀, є҆ди́нꙋ мы́сль во двою̀ тѣ́лꙋ и҆мꙋ́ще, мі́ръ чꙋдесы̀ просвѣща́ете: тѣ́мже и҆ на́съ ѡ҆зари́те моли́твами ва́шими.
Бг҃оро́диченъ:
Оу҆ѧснѧ́ютъ прⷪ҇ро́честїи гла́си бж҃їю тѧ̀, дв҃о, роди́тельницꙋ: пое́мъ же тѧ̀ и҆ мы̀, ви́дѧще сбытїѐ честны́хъ прорица́нїй, дѣ́вствꙋ вои́стиннꙋ и҆ чистотѣ̀ вмѣсти́лище.
И҆́нъ. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
Ѿ прече́стна ко́рене и҆зрастѐ вѣ́твь пресла́внаѧ, и҆ благоче́стнѡ на землѝ пожи́въ, пе́тре, прїѧ́телище чи́сто дх҃а ст҃а́гѡ бы́лъ є҆сѝ, просвѣща́й пою́щихъ ны́нѣ па́мѧть твою̀.
Весе́лїѧ дне́сь и҆спо́лнисѧ рѡссі́йскаѧ землѧ̀, въ наро́читый де́нь пра́здника ва́шегѡ, пресла́внїи чꙋдотво́рцы, и҆ пою́щи си́це гл҃го́летъ: моли́те хрⷭ҇та̀, сохрани́ти ѻ҆те́чество ва́ше ѿ ꙗ҆зы́ка чꙋжда́гѡ.
Сирѡ́тъ и҆ вдови́цъ застꙋ̑пницы, и҆ въ бѣда́хъ неѡбори́мїи помѡ́щницы, и҆ всѣ́хъ притека́ющихъ къ ва́мъ приста́нище небꙋ́рное, и҆ неле́стное ᲂу҆ти́шїе сꙋ́щихъ во грѣсѣ́хъ.
Бг҃оро́диченъ:
Вели̑чїѧ тебѣ̀, чⷭ҇таѧ, сотворѝ хрⷭ҇то́съ бг҃ъ на́шъ, є҆го́же молѝ при́снѡ, возвели́чити и҆ въ на́съ бога́тꙋю є҆гѡ̀ ми́лость, пренепоро́чнаѧ влⷣчце.
Конда́къ, гла́съ и҃: Подо́бенъ: Взбра́нной:
Мі́ра сегѡ̀ кнѧже́нїе, и҆ сла́вꙋ вре́меннꙋ помышлѧ́ѧ, сегѡ̀ ра́ди благоче́стнѡ въ мі́рѣ пожи́лъ є҆сѝ, пе́тре, кꙋ́пнѡ и҆ съ сꙋпрꙋ́жницею твое́ю премꙋ́дрою феѵрѡ́нїею, ми́лостынею и҆ моли́твами бг҃ꙋ ᲂу҆годи́вше. тѣ́мже и҆ по сме́рти неразлꙋ́чнѡ во гро́бѣ лежа́ще, и҆сцѣле́нїе неви́димѡ подава́ете: и҆ ны́нѣ хрⷭ҇тꙋ̀ моли́тесѧ, сохрани́ти гра́дъ же и҆ лю́ди, и҆́же ва́съ сла́вѧщихъ.
І҆́косъ:
Оу҆ѧснѝ ѧ҆зы́къ мо́й, сп҃се, и҆ ᲂу҆милѝ се́рдце моѐ, разширѝ ᲂу҆ста̀ моѧ̑, и҆ напо́лни дх҃а и҆ премꙋ́дрости: да и҆́миже возглаго́лю и҆ воспою̀ си́це твоѧ̑ чꙋдотво́рцы: ра́дꙋйсѧ, пе́тре блаже́нне, съ прехва́льною феѵрѡ́нїею вкꙋ́пѣ: ра́дꙋйтесѧ, землѝ рѡссі́йстѣй застꙋ̑пницы и҆ кнѧзє́мъ правосла̑внымъ помѡ́щницы: ра́дꙋйтесѧ, ѻ҆те́чествꙋ ва́шемꙋ храни́тели и҆ гра́дꙋ на́шемꙋ ᲂу҆твержде́нїе. ѽ пречестна́ѧ дво́ице и҆ благо́е сопрѧже́нїе, хрⷭ҇тꙋ̀ моли́тесѧ, сохрани́ти гра́дъ и҆ лю́ди, и҆̀же ва́съ сла́вѧщихъ.
Пѣ́снь з҃. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
Въ болѣ́зни къ тебѣ̀ прибѣга́ющихъ и҆збавлѧ́й, преблаже́нне пе́тре, кꙋ́пнѡ съ феѵрѡ́нїею, хрⷭ҇тꙋ̀ вопїю́щихъ: ѻ҆тє́цъ на́шихъ бж҃е, бл҃гослове́нъ є҆сѝ.
Всѣ̑мъ приста́нище бꙋ́дите, преблаже́ннїи, и҆ небꙋ́рное ѡ҆ти́шїе сꙋ́щымъ во грѣсѣ́хъ, да и҆ мы̀ съ ва́ми хрⷭ҇тꙋ̀ возопїе́мъ: ѻ҆тє́цъ на́шихъ бж҃е, бл҃гослове́нъ є҆сѝ.
Прибѣ́жище да мѝ бꙋ́дите въ де́нь гнѣ́ва, бг҃облаже́ннїи, ꙗ҆́кѡ посредѣ̀ хождꙋ̀ сѣте́й мно́гихъ. тѣ́мже и҆зба́вите мѧ̀ ѿ ни́хъ, да возмогꙋ̀ воспѣ́ти ва́съ.
Дне́сь пресла́внаѧ па́мѧть петра̀ и҆ феѵрѡ́нїи, ꙗ҆́кѡ со́лнце возсїѧ̀ въ мі́рѣ, въ ню́же соше́дшесѧ всѝ воспое́мъ си́це: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Ка́плѧ бг҃ото́чнаѧ, ѿ тебє̀ ро́ждшаѧсѧ, мі́ръ ѡ҆свѧтѝ, бцⷣе дв҃о, ка̑пли мнѣ̀ ми́лости и҆сточѝ, ѡ҆свѧща́ющыѧ дꙋ́шы и҆ помышлє́нїѧ земны́хъ.
И҆́нъ. І҆рмо́съ:
Ѻ҆́троцы благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ: но посредѝ пла́мене стоѧ́ще поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Во всѣ́хъ страна́хъ про́йде вѣща́нїе, ꙗ҆́кѡ гра́дꙋ мꙋ́ромꙋ ꙗ҆ви́шасѧ чꙋдотво́рцы пресла́внїи, да́рꙋюще мно́жество и҆сцѣле́нїй всѣ̑мъ приходѧ́щымъ къ ни́мъ, и҆ вѣ́рою пою́щымъ и҆̀хъ.
Сѐ ны́нѣ стеко́шасѧ ѿ всѣ́хъ градѡ́въ и҆ стра́нъ всѝ свѧти́телїе и҆ свѧще́нницы, и҆ мона́си и҆ прості́и, бога́тїи и҆ ᲂу҆бо́зїи, всѝ ра́дꙋющесѧ вкꙋ́пѣ, хвалꙋ̀ возда́ти ва́мъ, бг҃облаже́ннїи.
Чꙋдесы̀ ᲂу҆́бѡ твои́ми ꙗ҆́кѡ цвѣ́тъ процвѣ́лъ є҆сѝ, пресла́вне пе́тре, ꙗ҆́коже речѐ прⷪ҇ро́къ: пра́ведникъ ꙗ҆́кѡ фі́нїѯъ процвѣте́тъ. сегѡ̀ ра́ди вси́ тѧ ны́нѣ сла́вимъ, блаже́нне.
Бг҃оро́диченъ:
Тебѐ, всест҃а́ѧ чⷭ҇таѧ, рабѝ твоѝ всегда̀ во днѝ и҆ въ нощѝ мо́лимъ сокрꙋше́нною мы́слїю, просѧ́ще и҆збавле́нїе пода́ти грѣхѡ́въ на́шихъ, твои́ми моли́твами.
Пѣ́снь и҃. І҆рмо́съ:
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
Ѡ҆чи́сти и҆ простѝ согрѣшє́нїѧ на̑ша, безгрѣ́шне, моли́твами твои́хъ ᲂу҆гѡ́дникъ, петра̀ и҆ феѵрѡ́нїи, да пое́мъ тѧ̀, хрⷭ҇тѐ, во вѣ́ки.
И҆́же ѿ се́рдца рꙋко́ю недосто́йною приноси́мое ва́мъ хвале́нїе, блаже́ннїи, прїими́те, и҆ мольбꙋ̀ сотвори́те ѡ҆ на́съ ко хрⷭ҇тꙋ̀ бг҃ꙋ.
Трⷪ҇ченъ:
Пѣвцє́мъ тебѐ пою́щымъ, трⷪ҇це прест҃а́ѧ, согрѣшє́нїѧ ѡ҆ста́ви ꙗ҆́кѡ пребл҃га, моли́твъ ра́ди петра̀ и҆ феѵрѡ́нїи, да тѧ̀ пое́мъ во вѣ́ки.
Бг҃оро́диченъ:
Бжⷭ҇тва̀ сосꙋ́дъ бы́вши, чⷭ҇таѧ, просвѣти́ мѧ въ повелѣ́нїи свѣ́та ходи́ти, пречⷭ҇таѧ, ѿ чре́ва твоегѡ̀ возсїѧ́вшагѡ, и҆ просвѣти́вшагѡ вѣ́рныхъ сердца̀.
И҆́нъ. І҆рмо́съ:
Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте, сщ҃е́нницы, просла́вите, ѻ҆́троцы, благослови́те, лю́дїе и҆ превозноси́те во всѧ̑ вѣ́ки.
А҆́гг҃льстїи чи́нове хва́лѧтъ ва́съ, пресла́внїи, и҆ человѣ́честїи ро́ди пою́тъ непреста́ннѡ, творѧ́ще вѣ́рнѡ па́мѧть ва́шꙋ.
Досто́йными похвала́ми воспѣ́ти пресла́вныѧ чꙋдотво́рцы, ᲂу҆́мъ и҆ смы́слъ да́рꙋй мѝ, хрⷭ҇тѐ бж҃е: ꙗ҆́кѡ да пою̀ ра́дꙋѧсѧ па́мѧть и҆́хъ.
Побѣ́да и҆мени́та вои́стиннꙋ вѣ̑рнымъ лю́демъ, въ бѣда́хъ крѣ́пцыи помѡ́щницы ꙗ҆ви́шасѧ, пе́тръ кꙋ́пнѡ съ феѵрѡ́нїею.
Бг҃оро́диченъ:
Оу҆врачꙋ́й, пречⷭ҇таѧ, стра̑сти се́рдца моегѡ̀, ро́ждшаѧ всѣ́хъ цр҃ѧ̀ бг҃а, и҆ пра́ведныхъ ча́сти ꙗ҆ви́ мѧ прича́стника, бцⷣе дв҃о, хрⷭ҇та̀ сн҃а твоего̀ ᲂу҆моли́вши.
Пѣ́снь ѳ҃. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Ѿ ю҆́ности ва́шеѧ чи́стꙋю со́вѣсть и҆мꙋ́ще къ бг҃ꙋ, сегѡ̀ ра́ди благоче́стнѡ пожи́вше, къ вы̑шнимъ преидо́сте: моли́те хрⷭ҇та̀ ѡ҆ на́съ, да ва́съ любо́вїю почита́емъ.
Ꙗ҆́кѡ предстоѧ́ще ст҃ѣ́й трⷪ҇цѣ, съ прпⷣбными и҆ пра́ведными, моли́тесѧ, бл҃же́ннїи, и҆зба́вити на́съ всѧ́кагѡ преще́нїѧ и҆ гнѣ́ва, да ва́съ непреста́ннѡ велича́емъ.
Лю́дїе твоѝ мо́лѧтъ тѧ̀, бг҃облаже́нне пе́тре, кꙋ́пнѡ молѝ хрⷭ҇та̀ съ премꙋ́дрою феѵрѡ́нїю, съ не́юже въ мі́рѣ бг҃оꙋго́днѡ пожи́лъ є҆сѝ, и҆зба́вити на́съ ѿ всѧ́кихъ ѕѡ́лъ.
Бг҃оро́диченъ:
Ѽ чꙋдесѐ вели́кагѡ! ка́кѡ вмѣсти́сѧ во ᲂу҆тро́бꙋ твою̀ хрⷭ҇то́съ бг҃ъ, ника́коже вмѣсти́мый; є҆го́же за хва́лѧщыѧ тѧ̀ ᲂу҆молѝ, дв҃о, ѿ бѣ́дъ и҆зба́вити на́съ, и҆ ѿ беззако́нныхъ человѣ̑къ всегда̀.
И҆́нъ. І҆рмо́съ:
Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный: велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.
Красе́нъ дꙋше́ю и҆ тѣ́ломъ, и҆ бл҃гоче́стїемъ сїѧ́ѧ, сла́вне пе́тре, бж҃е́ственнагѡ и҆спо́лненъ ра́зꙋма и҆ премꙋ́дрости, ѻ҆рга́нъ ст҃а́гѡ дх҃а бы́лъ є҆сѝ, по сме́рти ᲂу҆́бѡ къ безсме́ртнѣй жи́зни и҆ неконча́емомꙋ бл҃же́нствꙋ преше́лъ є҆сѝ ра́дꙋѧсѧ.
Ꙗ҆́кѡ ᲂу҆́тро, ꙗ҆́кѡ де́нь свѣ́тлый, ва́шъ пра́здникъ ꙗ҆ви́сѧ, сла́внїи: а҆́ки стрꙋѧ̀ происхо́дитъ ѿ ра́ки ва́шеѧ и҆сцѣле́нїй всѧ́кихъ, и҆ вѣ́рныхъ сердца̀ напоѧ́етъ, любо́вїю ва́съ почита́ющихъ.
Вели́къ щи́тъ и҆ вели́ка крѣ́пость землѝ рѡссі́йстѣй ѡ҆брѣ́лсѧ є҆сѝ, блаже́нне пе́тре вкꙋ́пѣ съ феѵрѡ́нїею наро́дꙋ правосла́вномꙋ похвале́нїе, и҆ сла́ва во всѣ́хъ ꙗ҆зы́цѣхъ. и҆ ны́нѣ мо́лимъ вы̀ сохрани́ти ѻ҆те́чество ва́ше ѿ ва́рварскагѡ нахожде́нїѧ.
Бг҃оро́диченъ:
Ꙗ҆́же свѣ́тъ ро́ждшаѧ бжⷭ҇твенный, ѡ҆мраче́ннаго мѧ̀ всѣ́ми прилѡ́ги лꙋка́вагѡ, и҆ во ᲂу҆ны́нїи живꙋ́щаго, и҆ прогнѣвлѧ́ющаго бг҃а, всенепоро́чнаѧ, просвѣтѝ, и҆ наста́ви къ дѡ́брымъ дѣлѡ́мъ, ꙗ҆́кѡ вина̀ всѣ́хъ благи́хъ.
Свѣти́ленъ. Подо́бенъ: Посѣти́лъ ны̀:
И҆̀же благоче́стнѡ пра́зднꙋющымъ па́мѧть ва́шꙋ, бг҃облаже́ннїи пе́тре и҆ феѵрѡ́нїе, вкꙋ́пѣ ми́рнѡ пожи́вше и҆ благоче́стнѡ, моли́те хрⷭ҇та̀, грѣхѡ́въ ѡ҆ставле́нїе дарова́ти рабѡ́мъ ва́шымъ.
Два́жды.
Бг҃оро́диченъ:
Прест҃а́ѧ бцⷣе, ᲂу҆пова́нїе на́ше и҆ похвало̀, тѧ̀ є҆ди́нꙋ вѣ́дꙋще, вѣ́рою покланѧ́ющесѧ, мо́лимъ: ра́дꙋйсѧ, неискꙋсобра́чнаѧ ст҃а́ѧ марі́е, покро́ве и҆ ѡ҆гражде́нїе на́ше, и҆ помо́щница сꙋ́щымъ въ бѣда́хъ. молѝ хрⷭ҇та̀ сн҃а твоего̀ за рабы̑ твоѧ̑, на тѧ́ бо надѣ́емсѧ.
На хвали́техъ стїхи̑ры, на д҃, гла́съ д҃. Подо́бенъ: Зва́нный свы́ше:
Ꙗ҆́кѡ свѣтоза́рное со́лнце, ꙳ блаже́ннїи ѿ за́пада возсїѧ́вше, ꙳ всю̀ рѡссі́йскꙋю зе́млю просвѣти́сте, ꙳ и҆ къ свѣ́тꙋ весе́лїѧ наста́висте: ꙳ и҆ ны́нѣ ѡ҆ пою́щихъ ва́съ, ꙳ пе́тре блаже́нне, ꙳ съ премꙋ́дрою феѵрѡ́нїею, ꙳ и҆ сла́вѧщихъ лю́дехъ, ꙳ и҆ просѧ́щихъ и҆сцѣле́нїѧ, ꙳ и҆ ко хрⷭ҇тꙋ̀ и҆́скреннѡ притека́ющихъ, ꙳ моли́те спастѝ ꙳ и҆ просвѣти́ти дꙋ́шы на́шѧ.
Ѽ вели́кое и҆ несказа́нное чꙋ́до, ꙳ бжⷭ҇твенныѧ бл҃года́ти, ꙳ петра̀ блаже́ннаго съ премꙋ́дрою феѵрѡ́нїею, ꙳ ка́кѡ возмо́жемъ воспѣ́ти, ꙳ и҆лѝ и҆зглаго́лати; ꙳ ѻ҆́ваго ꙗ҆́кѡ хра́бра и҆ бг҃очести́ва, ꙳ ѻ҆́вꙋ же ꙗ҆́кѡ мꙋ́дрꙋ, ꙳ и҆ благовѣ́рїе хранѧ́щꙋ: ꙳ ѻ҆́въ ᲂу҆́бѡ го́рдаго ѕмі́ѧ побѣдѝ, ꙳ ѻ҆́ва же смире́нїе люблѧ́ше: ꙳ и҆ ны́нѣ хрⷭ҇тꙋ̀ бг҃ꙋ мо́лѧтсѧ, ꙳ спастѝ и҆ просвѣти́ти дꙋ́шы на́шѧ.
Всечестны́й приспѣ̀ пра́здникъ ꙳ ст҃ы́хъ чꙋдотво́рцєвъ, ꙳ хода́тайствꙋѧ всѣ̑мъ спасе́нїе, ꙳ въ не́мже та́йнѡ восплеска́вше къ ни́мъ си́це рце́мъ: ꙳ ра́дꙋйтесѧ, свѣти̑ла тє́мнымъ, ꙳ мы́сленнагѡ со́лнца: ꙳ ра́дꙋйсѧ, пе́тре, ꙳ кꙋ́пнѡ съ сꙋпрꙋ́жницею твое́ю, ꙳ благовѣ́рїе хранѧ́ще, ꙳ во є҆ди́нствѣ ст҃ы́ѧ трⷪ҇цы. ꙳ ю҆́же моли́те, ꙳ спастѝ и҆ просвѣти́ти дꙋ́шы на́шѧ.
Пе́рвѣе ᲂу҆́бѡ прехва́льнїи, ꙳ ѿ ю҆́ности своеѧ̀ ꙳ хрⷭ҇тꙋ̀ порабо́тавше, ꙳ сꙋ́щаго въ мі́рѣ се́мъ, ꙳ ꙗ҆́кѡ прехва́льна позна́вше, ꙳ и҆ сегѡ̀ ра́ди ми́лостынею и҆ моли́твами, ꙳ до́брѣ томꙋ̀ ᲂу҆годи́вше. ꙳ тѣ́мже и҆ по сме́рти ꙳ и҆сцѣле́нїе подава́ете всѣ̑мъ, ꙳ вѣ́рою ва́съ почита́ющымъ, ꙳ пе́тре и҆ феѵрѡ́нїе, ꙳ и҆ ве́лїю ми́лость.
Сла́ва, гла́съ в҃: Самогла́сенъ:
Прїиди́те, всѝ ꙗ҆зы́цы, восплещи́те рꙋка́ми и҆ ликовствꙋ́йте, прїиди́те всѝ рѡссі́йстїи свѧти́телїе и҆ свѧще́нницы, мона́си же и҆ прості́и, дꙋхо́внѣ возвесели́мсѧ, въ наро́читый де́нь пра́здника но́выхъ чꙋдотво́рцєвъ мꙋ́ромскихъ, петра̀ блаже́ннагѡ и҆ феѵрѡ́нїи премꙋ́дрыѧ. и҆ си́хъ ꙗ҆́кѡ цвѣ̑ты хвала́ми и҆ пѣ́сньми почти́мъ, си́це глаго́люще: ра́дꙋйтесѧ, пресла́внїи, нбⷭ҇нїи человѣ́цы, земні́и а҆́гг҃ли, дх҃а ст҃а́гѡ ѻ҆би́телище, и҆ є҆ѵⷢ҇льскомꙋ гла́сꙋ ᲂу҆́бѡ возслѣ̑дницы: тѣ́мъ и҆ прїѧ́сте вмѣ́стѡ тлѣ́нныхъ нетлѣ̑ннаѧ. и҆ ны́нѣ въ па́мѧти ва́шей моли́те хрⷭ҇та̀ бг҃а сохрани́ти ѻ҆те́чество ва́ше, и҆ поми́ловати гра́дъ и҆ лю́ди, почита́ющыѧ ва́съ, и҆ спастѝ дꙋ́шы на́шѧ.
И҆ ны́нѣ, бг҃оро́диченъ: На тѧ̀ ᲂу҆пова́нїе:
Та́же, Славосло́вїе вели́кое. Тропа́рь. И҆ ѿпꙋ́стъ. На лїтꙋргі́и,бл҃жє́нна, ѿ канѡ́на а҃-гѡ пѣ́снь г҃, на д҃: и҆ дрꙋга́гѡ пѣ́снь ѕ҃. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃і. А҆ллилꙋ́їа, гла́съ ѕ҃: Блаже́нъ мꙋ́жъ боѧ́йсѧ гдⷭ҇а: Є҆ѵⷢ҇лїе матѳе́а, зача́ло і҃. Прича́стенъ: Ра́дꙋйтесѧ, првⷣнїи ѡ҆ гдⷭ҇ѣ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.