← претходни дан | Минеј — Јун | следећи дан →
16 июня: Святителя Тихона Амафунсткого, чудотворца
Мѣ́сѧца тогѡ́же въ ѕ҃і-й де́нь.
Ст҃а́гѡ и҆ чꙋдотво́рца тѵ́хѡна а҆маѳꙋ́нтскагѡ.
Стїхи̑ры, гла́съ и҃. Подо́бенъ: Что̀ вы̀ нарече́мъ:
И҆мѣ́ѧ житїѐ равноа́гг҃льное, ꙳ ѿложе́нїемъ сласте́й ꙳ сосꙋ́дъ показа́лсѧ є҆сѝ бж҃їй. ꙳ Сегѡ̀ ра́ди тѧ̀, мꙋ́дре, ꙳ ст҃и́телѧ лю́демъ бж҃е́ственна ꙳ досто́йнѡ поставлѧ́етъ, ꙳ и҆ сто́лпъ, и҆ ᲂу҆твержде́нїе вѣ́ры, тѵ́хѡне, ꙳ показꙋ́етъ, бг҃одохнове́нне, ꙳ на вода́хъ правосла́вїѧ пасꙋ́ща, ꙳ твоѐ ста́до, свѧще́нне.
Бж҃е́ственнагѡ и҆спо́лненъ ра́зꙋма, ꙳ ста́да ꙗ҆ви́лсѧ є҆сѝ слове́снагѡ, ꙳ сїѐ воспитава́ѧ благочести́внѡ ꙳ на ѕла́цѣ и҆́стинныхъ ᲂу҆че́нїй, ꙳ всемꙋ́дръ па́стырь. ꙳ тѣ́мже твоѐ ст҃о́е ны́нѣ торжество̀ почита́емъ, ꙳ просла́вльшаго тѧ̀ гдⷭ҇а велегла́снѡ сла́вѧще: ꙳ тѵ́хѡне бг҃омꙋ́дре, всебл҃же́нне, молѝ, спасти́сѧ дꙋша́мъ на́шымъ.
Чꙋдесы̀ бг҃ъ тѧ̀ просла́ви, ꙳ сла́вѧй, ѻ҆́ч҃е, сла́вѧщихъ є҆го̀ при́снѡ, ꙳ во вре́мѧ бо честны́ѧ ꙳ и҆ бж҃е́ственныѧ па́мѧти твоеѧ̀, мꙋ́дре, ꙳ зри́тсѧ гре́знъ зрѣ́лъ сꙋ́щь ꙳ пою́щымъ пресла́вное чꙋ́до: ꙳ ѿ негѡ́же вѣ́рнїи причаща́ющесѧ, ꙳ ѡ҆свѧще́нїе и҆ по́льзꙋ прїе́млютъ, ꙳ досто́йнѡ тѧ̀ сла́вѧщїи.
И҆́ны стїхи̑ры бцⷣы, гла́съ и҆ подо́бенъ то́йже:
Стра́нное та́инство, чⷭ҇таѧ, ꙳ безсѣ́меннагѡ твоегѡ̀ ржⷭ҇тва̀, дв҃о, и҆ ᲂу҆жа́сно, ꙳ превосходѧ̀ вели́чествомъ ꙳ всѧ́кꙋ мы́сль человѣ́чꙋ. ꙳ Є҆го́же бо не терпѧ́тъ зрѣ́ти многоѻчи́тїи, и҆ всѝ чи́ны ст҃ы́хъ а҆́гг҃лъ боѧ́тсѧ, на́мъ пло́тїю породила̀ є҆сѝ, ꙳ не ѿстꙋ́пльша же ѻ҆́ч҃а сꙋщества̀, ꙳ сла́вимъ ро́ждшꙋю тѧ̀, бг҃оневѣ́сто.
Комꙋ̀ ᲂу҆подо́биласѧ є҆сѝ, ѻ҆каѧ́ннаѧ, ꙳ къ покаѧ́нїю ника́коже возни́чꙋщи, дꙋшѐ, ꙳ и҆ ѻ҆гнѧ̀ не ᲂу҆жаса́ешисѧ ѕлы́хъ ждꙋ́щагѡ; ꙳ воста́ни, и҆ є҆ди́нꙋ къ застꙋпле́нїю ꙳ ско́рꙋю призовѝ, и҆ возопі́й: ꙳ дв҃о мт҃и, ꙳ молѝ твоего̀ сн҃а, ꙳ и҆ бг҃а на́шего, ꙳ и҆зба́вити мѧ̀ сѣ́тей льсти́вагѡ.
Всѣ́хъ застꙋпле́нїе, влⷣчце, ꙳ пꙋчи́ною преклоне́на мѧ̀ те́мною, ꙳ и҆ лю́тѣ жите́йскимъ треволне́нїемъ ꙳ потоплѧ́емомꙋ мнѣ̀ при́снѡ, ꙳ ка́плю ми́лости твоеѧ̀ низпослѝ, ꙳ и҆ рꙋ́кꙋ по́мощи твоеѧ̀ пода́ждь мѝ, ꙳ и҆ ча́сти сподо́би мѧ̀ ꙳ и҆збра́нныхъ и҆ пра́ведныхъ, ꙳ ꙗ҆́кѡ бе́зднꙋ ро́ждшаѧ чл҃вѣколю́бца.
Сла́ва, и҆ ны́нѣ, бг҃оро́диченъ, подо́бенъ то́йже:
Ѻ҆́гнь ро́ждши нестерпи́мый, ꙳ попалѧ́ющъ грѣхѝ, ꙳ и҆ ѡ҆роша́ющъ вѣ̑рныѧ, ꙳ вє́щнаѧ безмѣ́рныхъ мои́хъ, ꙳ пренепоро́чнаѧ чⷭ҇таѧ, согрѣше́нїй ꙳ попалѝ моли́твами твои́ми, ꙳ и҆ росо́ю и҆ста́ѧвшꙋю страстьмѝ дꙋ́шꙋ мою̀ прохладѝ, ꙳ ꙗ҆́кѡ да твою̀ велегла́снѡ ꙳ ми́лость и҆ си́лꙋ велича́ю, ра́бъ тво́й.
Крⷭ҇тобг҃оро́диченъ. Подо́бенъ: то́йже:
А҆́гница, а҆́гнца ꙗ҆́кѡ ви́дѣ ꙳ на дре́вѣ просте́рта во́лею крⷭ҇тнѣмъ, ꙳ вопїѧ́ше мт҃рски, ꙳ болѣ́знꙋющи съ пла́чемъ: ꙳ сн҃е мо́й, ꙳ что̀ стра́нное сїѐ видѣ́нїе; ꙳ всѣ̑мъ живо́тъ даѧ́й ꙗ҆́кѡ гдⷭ҇ь, ꙳ ка́кѡ ᲂу҆мерщвлѧ́ешисѧ, долготерпѣли́ве, ꙳ зємны́мъ подаѧ̀ воскресе́нїе; ꙳ сла́влю твоѐ мно́гое, бж҃е мо́й, снизхожде́нїе.
Тропа́рь, гла́съ а҃.
Пꙋсты́нный жи́тель, и҆ въ тѣлесѝ а҆́гг҃лъ, и҆ чꙋдотво́рецъ ꙗ҆ви́лсѧ є҆сѝ, бг҃оно́се ѻ҆́ч҃е на́шъ тѵ́хѡне: посто́мъ, бдѣ́нїемъ, моли́твою, нбⷭ҇наѧ дарѡва́нїѧ прїи́мъ, и҆сцѣлѧ́еши недꙋ̑жныѧ, и҆ дꙋ́шы вѣ́рою притека́ющихъ тѝ. сла́ва да́вшемꙋ тебѣ̀ крѣ́пость: сла́ва вѣнча́вшемꙋ тѧ̀: сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.
На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ на д҃.
Творе́нїе Ѳеофа́ново.
Гла́съ и҃. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца, спасѐ, пѣ́снь бг҃ови воспѣва́юща.
Видѣ̑нїи па́че ᲂу҆ма̀ и҆сполнѧ́емь, тѵ́хѡне блаже́нне, и҆ ѿтꙋ́дꙋ бж҃е́ственныѧ зарѝ насыща́ѧсѧ, пода́ждь пою́щымъ тѧ̀ благода́тный гла́съ: и҆́мже ꙗ҆ви́мсѧ досто́йни твоѧ̑ добродѣ́тєли повѣ́дати.
Прїе́мсѧ пꙋтѝ лꙋ́чшагѡ ѿ ю҆́ности, всѐ прароди́тельное и҆мѣ́нїе, ꙗ҆́коже пра́хъ ми́мѡ те́клъ є҆сѝ, и҆ ни́щымъ разда́въ, воздаѧ́нїе ѡ҆брѣ́лъ є҆сѝ стори́цею, глаго́лѡмъ, бл҃же́нне, вѣ́ровавъ гдⷭ҇а твоегѡ̀.
И҆́же въ вы́шнихъ почива́ѧй, и҆ се́рдце твоѐ добродѣ́телей до́мъ ѡ҆брѣ́тъ, всели́сѧ, и҆ въ тебѣ̀ ᲂу҆поко́исѧ, со ѻ҆ц҃е́мъ бо, ꙗ҆́коже речѐ, ѻ҆би́тель въ тебѣ̀ сотворѝ, пред̾ѡчище́нꙋ дх҃омъ.
Бг҃оро́диченъ:
Бг҃ъ чл҃вѣ́къ бы́сть, и҆зъ ᲂу҆тро́бы твоеѧ̀, пречⷭ҇таѧ, и҆ дв҃ꙋ па́ки тѧ̀ по ржⷭ҇твѣ̀ сохранѝ: є҆стество́ же ѡ҆божи́въ, є҆́же подо́бїю сопроти́внѡ, дадѐ пе́рвое достоѧ́нїе.
Пѣ́снь г҃. І҆рмо́съ:
Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче.
Зла́то и҆ сребро̀ ꙗ҆́коже зе́млю попира́емꙋю вмѣни́лъ є҆сѝ, и҆ ꙗ҆́кѡ ᲂу҆ме́ты мїрскꙋ́ю сла́вꙋ: неꙋкло́ннѡ бо тво́й ᲂу҆́мъ возве́лъ є҆сѝ къ нетлѣ̑ннымъ, ꙗ҆̀же и҆ полꙋчи́въ, всели́лсѧ є҆сѝ, тѵ́хѡне бг҃омꙋ́дре, пребога́те.
Ꙗ҆́кѡ да лꙋ́чшꙋю жи́знь, и҆ вѣ́чнѡ пребыва́ющꙋю полꙋчи́ши, свѧще́нный тѵ́хѡне, преѡби́дѣлъ є҆сѝ жи́знь тлѣ́ннꙋю, мꙋ́чениче, произволе́нїемъ всѣ́мъ дѣ́лꙋ са́мъ себѐ вда́въ.
Стоѧ́лъ є҆сѝ на сꙋди́щи и҆ногда̀ мꙋчи́тельстѣ, и҆сповѣ́даѧ хрⷭ҇та̀ цр҃ѧ̀ со дерзнове́нїемъ, не ᲂу҆жаса́ѧсѧ ра́нъ, ни сме́рти, чꙋ́дне, врагѝ вспѧ́ть твои́ми глагѡ́лы ᲂу҆лови́лъ є҆сѝ.
Бг҃оро́диченъ:
Не ѿри́нꙋлъ є҆сѝ, хрⷭ҇тѐ, ѡ҆блещи́сѧ въ смердѧ́щаго, и҆ дале́че тебє̀ бы́вша грѣхо́мъ: но ѿ ложе́снъ прїе́мъ дв҃и́ческихъ нищетꙋ̀ мою̀, бг҃отвори́ши и҆ спаса́еши за мно́гꙋю бл҃гость.
Сѣда́ленъ, гла́съ д҃. Подо́бенъ: Ско́рѡ предварѝ:
Оу҆лꙋчи́ти жела́ѧ вѣ́чнꙋю жи́знь, ѿ страсте́й ѡ҆чи́стилъ є҆сѝ твою̀ дꙋ́шꙋ вои́стиннꙋ, бг҃омꙋ́дре ѻ҆́ч҃е на́шъ. тѣ́мже свѧще́нїѧ прїѧ́лъ є҆сѝ зарю̀, дарова̑нїѧ и҆сцѣле́нїй и҆злива́еши вѣ́рою къ покро́вꙋ твоемꙋ̀ притека́ющымъ, тѵ́хѡне бл҃же́нне.
Сла́ва, и҆ ны́нѣ, бг҃оро́диченъ:
Є҆ди́на ро́ждшаѧ творца̀ всемꙋ̀, є҆ди́на ᲂу҆краси́вшаѧ человѣ́чество ржⷭ҇тво́мъ твои́мъ, бг҃оневѣ́сто, и҆зба́ви мѧ̀ ѡ҆ сѣ́ти льсти́вагѡ врага̀, поста́ви мѧ̀ на ка́мени хрⷭ҇то́выхъ хотѣ́нїй, того̀ молѧ́щи прилѣ́жнѡ, є҆го́же воплоти́ла є҆сѝ.
Крⷭ҇тобг҃оро́диченъ:
Дв҃о пренепоро́чнаѧ, мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же, бл҃гослове́ннаѧ, молѧ́щи не преста́й, проще́нїе прегрѣше́нїй на́мъ дарова́ти.
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Прїе́мъ, ѻ҆́ч҃е, крѣ́пость дх҃а, непобѣди́мь ꙗ҆ви́лсѧ є҆сѝ и҆ неꙋтоли́мь: ᲂу҆крѣплѧ́еши ꙗ҆́коже воево́да во́ины, ко ᲂу҆стремле́нїю призыва́ѧ. тѣ́мже и҆ безъ кро́ве твою̀ побѣ́дꙋ поста́вль, мꙋче́нїѧ вѣне́цъ прїѧ́лъ є҆сѝ.
Ѡ҆свѧ́щсѧ, тѵ́хѡне, бг҃ꙋ, соверша́ѧ сщ҃є́нныѧ зако́ны, пожи́лъ є҆сѝ, а҆ не ꙗ҆́коже наѧ́тый па́стырь, но по ста́дѣ дꙋ́шꙋ твою̀ полага́ѧ. тѣ́мже во́лки ᲂу҆би́въ, къ па́жити живоно́снѣй хрⷭ҇то́во наста́вилъ є҆сѝ ста́до.
Твою̀ чⷭ҇тнꙋ́ю вои́стиннꙋ почита́етъ па́мѧть кѵ́прскїй ѻ҆́стровъ, ликꙋ́ѧ со все́ю земле́ю. И҆ є҆́же въ не́мъ и҆злїѧ́нїемъ чꙋде́съ повѣ́даѧ, приложѝ къ видѣ́нїю ны́нѣ є҆дина́че зрѣ́ти хотѧ́щымъ са́дъ пресла́внагѡ прозѧбе́нїѧ.
Бг҃оро́диченъ:
Свѣ́тъ ѿ свѣ́та просїѧ́въ безлѣ́тнѡ, сн҃е ѻ҆ч҃ь, въ послѣ̑днѧѧ ѿ ложе́снъ проше́лъ є҆сѝ дв҃и́ческихъ, всего̀ а҆да́ма дре́вле ᲂу҆мерщвле́ннаго собо́ю и҆справлѧ́ѧ. тѣ́мже твою̀ мт҃рь бцⷣꙋ вои́стиннꙋ чтꙋ́ще вѣ́рнїи проповѣ́даемъ.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
И҆́стиннагѡ видѣ́нїѧ, сла́вне, бы́въ, тѵ́хѡне, и҆спо́лненъ, тщі́ѧ мꙋ́дрости рача́щыѧ ѡ҆бличи́лъ є҆сѝ, де́мѡнскꙋю пре́лесть ѿгонѧ̀, и҆ ба̑сни всѧ̑, и҆ кѵ̑прскаѧ дѣла̀ мє́рзскаѧ.
Чи́сто житїѐ и҆мѣ́ѧ, є҆́же па́че ᲂу҆ма̀ дѣ́лы соверша́ѧ. всеѡсщ҃е́ннымъ ѻ҆́бразомъ трапе́зѣ бж҃е́ственнѣй предста̀, хрⷭ҇то́вѣ. тѣ́мже моли́твами твои́ми, бг҃омꙋ́дре тѵ́хѡне, дє́мѡнскїѧ хра́мы ѡ҆прове́рглъ є҆сѝ.
Распѧ́тсѧ ꙗ҆́коже па́ѵелъ мі́рꙋ, и҆ мі́ръ распѧ̀, пребога́те, себѣ̀, не жи́лъ є҆сѝ пло́ти, но бг҃ꙋ и҆ дх҃ꙋ, бг҃оно́се тѵ́хѡне. тѣ́мже ᲂу҆лꙋчи́лъ, и҆́хже жела́лъ є҆сѝ: и҆ на́съ твои́хъ рабѡ́въ помѧнѝ.
Бг҃оро́диченъ:
Неискꙋсобра́чнаѧ ꙗ҆ви́ласѧ є҆сѝ, мт҃и, свѣтлѣ́йши со́лнца: кто́ бо ѿ вѣ́ка слы́ша дв҃ꙋ доѧ́щꙋ; на тебѣ́ же всѧ̑ бг҃олѣ́пнѡ, дв҃о мт҃и, ᲂу҆стро́ишасѧ, ро́ждшей зижди́телѧ твоего̀.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Де́мѡнское сплете́нїе ѿ твоегѡ̀ ста́да ѿгонѧ̀, чꙋ́дне, и҆ і҆́дѡльскꙋю прогонѧ̀ ле́сть многобо́жнꙋю, стра́шенъ показа́лсѧ є҆сѝ сопроти̑внымъ, бг҃оглаго́ливе тѵ́хѡне премꙋ́дре.
Просла́ви тѧ̀ бг҃ъ, и҆́же тобо́ю просла́вленный, въ зна́менїихъ стра́шна, въ чꙋдесѣ́хъ вели́ка на́мъ дарова́въ, бг҃оно́се тѵ́хѡне, вѣ́рнѡ тѧ̀ блажа́щымъ.
Ѡ҆свѧти́лъ є҆сѝ твою̀, мꙋ́дре, жи́въ честнꙋ́ю зе́млю, и҆ преше́дъ ѿ неѧ̀ ко прїѧ́тїю нбⷭ҇номꙋ, чꙋдесы̀ просла́вилъ є҆сѝ пресла́вными, тѵ́хѡне, влⷣцѣ дрꙋ́же и҆́скреннїй.
Бг҃оро́диченъ:
Оу҆мерщвле́нїѧ мѝ пло́дъ, и҆́же дре́вле є҆стество́мъ въ раѝ, жи́зни же ты̀ пло́дъ, бжⷭ҇твенный ра́й, бцⷣе, процвѣла̀ є҆сѝ: и҆́мже пита́ѧсѧ, не ктомꙋ̀ сме́рти порабоще́нъ бꙋ́дꙋ.
Конда́къ, гла́съ г҃. Подо́бенъ: Дв҃а дне́сь:
Въ по́стничествѣ, свѧ́те, бг҃олюбе́зномъ пребы́въ, ᲂу҆тѣ́шителевꙋ си́лꙋ съ высоты̀ прїѧ́лъ є҆сѝ, і҆́дѡлъ низложи́ти пре́лєсти, лю́ди же спастѝ, де́мѡны ѿгна́ти, недꙋ́ги и҆сцѣлѧ́ти. сегѡ̀ ра́ди почита́емъ тѧ̀ ꙗ҆́кѡ бж҃їѧ дрꙋ́га, тѵ́хѡне блаже́нне.
Пѣ́снь з҃. І҆рмо́съ:
Халде́йскаѧ пе́щь ѻ҆гне́мъ распала́емаѧ, ѡ҆роша́шесѧ дх҃омъ, бж҃їимъ предстоѧ́нїемъ, ѻ҆́троцы поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ:
Оу҆ста̀ бжⷭ҇твєннаѧ бы́въ, человѣ́ки ѿ недосто́инства ты̀ достѡ́йны содѣ́лалъ є҆сѝ, многочꙋ́дне тѵ́хѡне. тѣ́мже тѧ̀ хрⷭ҇то́съ чꙋдесы̀ и҆ по кончи́нѣ вои́стиннꙋ просла́ви.
Въ жела́нїи бы́въ ѻ҆́нѣхъ наде́ждъ, всегѡ̀ мїрска́гѡ, ѻ҆́ч҃е, пристра́стїѧ мꙋ́дрѣ ѿре́клсѧ є҆сѝ. тѣ́мже и҆ провозвѣсти́лъ є҆сѝ, ꙗ҆́коже прⷪ҇ро́къ, мꙋ́дре тѵ́хѡне, твою̀ кончи́нꙋ.
Соше́дшесѧ празднолю́бцы, та́йными видѣ̑нїи кѵ́пръ про́йдемъ, и҆ са́да дѣ́ланїе пресла́вно ви́димъ, ѿ негѡ́же мі́ръ ѡ҆б̾е́млетъ чи́сто спасе́нїе.
Бг҃оро́диченъ:
Пло́дъ чре́ва твоегѡ̀, бцⷣе дв҃о, ѻ҆́нагѡ прича́щшымсѧ безсме́ртїе и҆сточа́етъ: є҆́ѵинъ бо до́лгъ ты̀ разрѣши́ла є҆сѝ, бг҃а ро́ждши.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Свѧще́ннѣйшꙋ и҆стка́лъ є҆сѝ ѻ҆де́ждꙋ твою̀, прехва́льне тѵ́хѡне, добродѣ́телей ᲂу҆кра́шь добро́тами: тѣ́мже и҆ ꙗ҆вле́нїе ꙗ҆́коже ѿ бл҃гово́нїѧ сказꙋ́ѧ твою̀ кончи́нꙋ, сꙋ́щымъ ѻ҆́крестъ тебє̀ провозвѣща́ѧ, сла́вити сп҃са ᲂу҆строѧ́лъ є҆сѝ, блаже́нне, хрⷭ҇та̀ превозноси́те во вѣ́ки.
Зако́нъ тѣлесѐ забы́въ, ꙗ҆́коже безпло́тенъ те́клъ є҆сѝ, и҆дѣ́же вѣне́цъ тебѣ̀ вы́шнѧгѡ зва́нїѧ, бг҃омꙋ́дре, ᲂу҆гото́васѧ: не бо̀ пло́ти и҆ кро́ви, тѵ́хѡне, ѡ҆бѣща́лсѧ є҆сѝ пожи́ти, тѣ́мже добрѡ́ты зри́ши хрⷭ҇то́ва црⷭ҇тва, съ ни́мъ црⷭ҇твꙋѧ во всѧ̑ вѣ́ки.
Побѣдоно́сецъ бы́лъ є҆сѝ на всѧ̑ врагѝ хрⷭ҇тѡ́вы, со́вѣстнымъ мꙋче́нїемъ держа́лсѧ є҆сѝ, и҆ нра́вомъ жрѧ̀ себѐ во́льнымъ, тѵ́хѡне мꙋ́дре, пред̾ всѣ́ми бо мꙋчи́тели вопїѧ́лъ є҆сѝ: хрⷭ҇то́съ бг҃ъ є҆́сть, и҆ богѡ́въ лжеиме́нныхъ па́мѧть да поги́бнетъ во вѣ́ки.
Бг҃оро́диченъ:
Прест҃а́ѧ влⷣчце, мі́рꙋ помо́щнице, ско́рбныхъ крѣ́пкое прибѣ́жище, є҆ди́на застꙋ́пнице сꙋ́щихъ въ нꙋ́ждахъ рабѡ́въ твои́хъ, твоѐ достоѧ́нїе и҆змѝ ѿ бѣ́дъ и҆ скорбе́й разли́чныхъ, да вѣ́рою вопїе́мъ: ра́дꙋйсѧ, мі́ра ра́досте и҆ спасе́нїе.
Пѣ́снь ѳ҃. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.
Пѣ́нїе тебѣ̀, тѵ́хѡне, сщ҃е́нно ѿ ᲂу҆сте́нъ недосто́йныхъ приноси́мо прїимѝ, воздаѧ́нїе подава́ѧ, грѣхѡ́въ и҆збавле́нїе, моли́твами твои́ми къ бг҃ꙋ: хода́таѧ бо тѧ̀ всѝ предлага́емъ, чтꙋ́щїи твою̀ вѣ́рнѡ па́мѧть.
Пома́за тѧ̀ дх҃ъ чи́стый и҆ прест҃ы́й є҆ле́емъ ра́дости, пресла́вне, дарова́нїй мно́жествомъ ᲂу҆красѝ, и҆ ца́рствовати съ ни́мъ сла́внѡ сподо́бисѧ, тѵ́хѡне всеѡсвѧще́нне, свѧще́нникѡвъ ᲂу҆добре́нїе и҆ похвала̀.
Ѽ твои́хъ, тѵ́хѡне свѧще́нне, бл҃года́ти чꙋде́съ! не мо́жетъ сказа́ти ѧ҆зы́къ человѣ́чь ви́димое: ѿ невла́жна бо прозѧбе́нїѧ ло́знагѡ пе́рвѣе, ны́нѣ ско́рымъ манове́нїемъ, пресла́внѡ твори́тъ гре́знъ зрѣ́лъ.
Побѣ̑ды мнѣ̀ на стра̑сти моли́твами твои́ми пода́ждь, молю́сѧ, и҆ сподо́би ᲂу҆лꙋчи́ти мѧ̀, тѵ́хѡне, человѣколю́бїѧ бж҃їѧ, и҆ благи́хъ наслажде́нїѧ, и҆ красоты̀ є҆гѡ̀ прїѧ́ти, любо́вїю те́плѣ бл҃жа́щаго.
Бг҃оро́диченъ:
Спаси́ мѧ, мт҃и бж҃їѧ, ꙗ҆́же мі́рови спасе́нїе ро́ждшаѧ, моли́твами твои́ми, ѿ многоѻбра́зныхъ находѧ́щихъ мѝ, и҆ многоплете́нныхъ и҆скꙋше́нїй: на тѧ́ бо наде́ждꙋ спасе́нїѧ моегѡ̀ возложи́хъ вѣ́рнѡ ра́бъ тво́й.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.