← претходни дан | Минеј — Април | следећи дан →
20 апреля: Преподобного Феодора Трихины
Мѣ́сѧца тогѡ́же въ к҃-й де́нь.
Прпⷣбнагѡ ѻ҆ц҃а̀ на́шегѡ ѳео́дѡра трїхи́ны.
На Гдⷭ҇и, воззва́хъ, стїхи̑ры, гла́съ и҃. Поⷣ: Ѽ пресла́внагѡ чꙋдесѐ!
Прпⷣбне ѻ҆́ч҃е ѳео́дѡре, ꙳ да́ръ бг҃ꙋ и҆збра́нъ са́мъ себѐ прине́слъ є҆сѝ, ꙳ бдѣ́нїе всено́щное, и҆ ᲂу҆миле́нїе стѧжа́въ, ꙳ поꙋче́нїе бжⷭ҇твенно, ꙳ коне́чное смире́нїе, ꙳ наде́ждꙋ, вѣ́рꙋ, любо́вь нерастворе́нꙋ, ꙳ трезвѣ́нїе и҆ милосе́рдїе, ꙳ и҆́стинное безстра́стїе и҆ моли́твꙋ, ꙳ сто́лпъ тѧ̀ показа́ша свѣтови́днѣйшїй.
Прпⷣбне ѻ҆́ч҃е ѳео́дѡре, ꙳ во ѡ҆дѣѧ́нїе и҆́стинное ꙳ и҆ спасе́нїѧ ѻ҆де́ждꙋ, ꙳ благочести́вымъ ра́зꙋмомъ и҆ща́й ѡ҆дѣ́ѧтисѧ, ꙳ власѧны́ми рꙋ́бы всегда̀ ꙳ твоѐ тѣ́ло покрыва́ти не преста́лъ є҆сѝ, ꙳ и҆ ѡ҆бнажи́лъ є҆сѝ на́съ ѡ҆бнажи́вшагѡ кѡ́зни, ꙳ си́лою ᲂу҆крѣплѧ́емь ꙳ бжⷭ҇твеннагѡ дх҃а.
Вопло́щшемꙋсѧ бг҃ꙋ на́шемꙋ, ꙳ ѿ дв҃ы мт҃ре на́съ ра́ди, ꙳ и҆ ѡ҆бнища́вшемꙋ, ꙗ҆́кѡ ни́щъ дꙋ́хомъ, ꙳ тебѐ сама́го прине́слъ є҆сѝ, ꙳ же́ртвꙋ жи́вꙋ и҆ всесожже́нїе прїѧ́тно, всебл҃же́нне, ꙳ и҆ да́ръ че́стенъ. ꙳ тѣ́мже и҆ прїѧ́лъ є҆сѝ нбⷭ҇ное наслажде́нїе: ꙳ къ немꙋ́же при́снѡ моли́сѧ, ꙳ мо́лимсѧ, поми́ловати на́съ.
Сла́ва, и҆ ны́нѣ, бг҃оро́диченъ:
Пло́ть ѿ крове́й твои́хъ прїе́мь, ꙳ первовѣ́чный бг҃ъ, ꙳ тѧ̀ предста́тельницꙋ показа̀ человѣ́кѡмъ, чⷭ҇таѧ. ꙳ тѣ́мже и҆зба́ви рабы̑ твоѧ̑ ꙳ ѿ всѧ́кїѧ бѣды̀ и҆ ѡ҆бстоѧ́нїѧ, ꙳ и҆ сѣ́тей лꙋка́вагѡ врага̀, ꙳ и҆ сїѧ́нїѧ причасти́тисѧ сподо́би и҆збра́нныхъ, ꙳ тѧ̀ сла́вѧщыѧ, ꙳ и҆ покланѧ́ющыѧсѧ тебѣ̀.
Крⷭ҇тобг҃оро́диченъ:
Тѧ̀ ви́дѧщи пригвожда́ема ꙳ на крⷭ҇тѣ̀, і҆и҃се, ꙳ и҆ стрⷭ҇ти прїе́млюща во́лею, ꙳ дв҃а и҆ мт҃и твоѧ̀, влⷣко, ꙳ ᲂу҆вы̀ мнѣ̀, вопїѧ́ше, ча́до сла́дкое: ꙳ ра̑ны непра́веднѡ ка́кѡ терпи́ши, ꙳ врачꙋ̀, и҆сцѣли́вый человѣ́ческое неможе́нїе, ꙳ и҆ ѿ тлѝ всѣ́хъ и҆зба́вивый ꙳ милосе́рдїемъ твои́мъ;
Канѡ́нъ.
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.
Дарова̑нїи бжⷭ҇твенными ѡ҆бога́щсѧ, да́ръ ꙗ҆́кѡ многоцѣ́ненъ творцꙋ̀, ѻ҆́ч҃е, себѐ приве́лъ є҆сѝ. тѣ́мже мо́й ѡ҆благодатѝ по́мыслъ, восхвалѧ́ющꙋ твою̀ дне́сь па́мѧть свѣтоно́снꙋю, и҆ житїѐ равноа́гг҃льное.
Ꙗ҆́кѡ напита́всѧ бжⷭ҇твенными добро́тами, взѧ́лъ є҆сѝ на ра́мо твоѐ по́стнически крⷭ҇тъ, ѳео́дѡре, и҆ послѣ́довалъ є҆сѝ, во́льное тебє̀ ра́ди претерпѣ́вшемꙋ распѧ́тїе, бл҃же́нне, стра̑сти ᲂу҆мертви́въ тѣлє́сныѧ.
Крѣ́пкѡ, ѻ҆́ч҃е, проти́вꙋ врага̀ ѡ҆полчи́всѧ, и҆ крⷭ҇тнымъ ѻ҆рꙋ́жїемъ ѡ҆гражде́нъ, сего̀ смири́лъ є҆сѝ смири́всѧ, и҆ мꙋ́дрѣ возноша́емь: тѣ́мже побѣдоно́сецъ ꙗ҆ви́лсѧ є҆сѝ, и҆ прпⷣбныхъ равностоѧ́тель.
Бг҃оро́диченъ:
Спа́сшїисѧ, дв҃о, тебє̀ ра́ди, пренепоро́чнꙋю въ жена́хъ, и҆ бж҃їю роди́тельницꙋ пѣ́сньми ᲂу҆блажа́емъ и҆ почита́емъ, и҆ согла́снѡ зове́мъ: ра́дꙋйсѧ, вино́внаѧ пра́дѣднѧгѡ назда́нїѧ.
Пѣ́снь г҃. І҆рмо́съ:
Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь прише́ствїемъ твои́мъ, въ не́йже ᲂу҆тверди́сѧ моѐ се́рдце.
Процвѣ́лъ є҆сѝ въ поро́дѣ воздержа́нїѧ, прпⷣбне, ꙗ҆́кѡ ши́покъ благово́ненъ, сердца̀ благоꙋха́ѧ на́мъ бжⷭ҇твеннымъ твои́мъ житїе́мъ, пресла́вне.
Крѣ́постїю возмога́емь сп҃совою, ше́ствовалъ є҆сѝ тѣ́снымъ, сла́вне, жесто́кимъ и҆ ско́рбнымъ пꙋте́мъ, и҆ къ широтѣ̀ вы́шнѧгѡ сїѡ́на дости́глъ є҆сѝ.
Ви́дитсѧ тво́й гро́бъ, благово́нно мѵ́ро благода́тїю и҆сточа́ѧ, прпⷣбне, и҆ проповѣ́дꙋетъ бг҃ꙋ, бы́вша тѧ̀ благово́нїе, ѻ҆́ч҃е свѧще́нне.
Бг҃оро́диченъ:
Черто́гъ безсме́ртїѧ твоѐ чре́во бы́сть, и҆зъ негѡ́же жени́хъ гдⷭ҇ь возсїѧ́въ, дв҃о пречⷭ҇таѧ, прпⷣбныхъ ли́къ себѣ̀ собра̀.
Сѣда́ленъ, гла́съ д҃. Подо́бенъ: Вознесы́йсѧ:
Ꙗ҆́кѡ чи́стъ къ чⷭ҇томꙋ пристꙋ́пль ча́стыми моли́твами и҆ чистото́ю, ѡ҆ст҃и́лсѧ є҆сѝ дх҃омъ, ѳео́дѡре: ѿѻнꙋ́дꙋже со а҆́гг҃лы ны́нѣ водворѧ́ѧсѧ, пое́ши пѣ́снь трист҃ꙋ́ю всѣ́хъ влⷣцѣ. тѣ́мже молѝ, прпⷣбне, хрⷭ҇та̀, поми́ловати любо́вїю чтꙋ́щихъ тѧ̀.
Сла́ва, и҆ ны́нѣ, бг҃оро́диченъ:
По бз҃ѣ во тво́й, бцⷣе, прибѣга́ю смире́нный, покро́въ бжⷭ҇твенный, припа́даѧ молю́сѧ: поми́лꙋй, пречⷭ҇таѧ, ꙗ҆́кѡ превзыдо́ша главꙋ̀ мою̀ грѣсѝ, и҆ бою́сѧ, влⷣчце, мꙋ́ки, и҆ трепе́щꙋ: моле́нїе сотворѝ, чⷭ҇таѧ, къ сн҃ꙋ твоемꙋ̀, ѿ си́хъ и҆зба́вити мѧ̀.
Крⷭ҇тобг҃оро́диченъ:
И҆́же ѿ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́ще, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.
Пѣ́снь д҃. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
Воздержа́нїѧ ча́стыми ꙗ҆́звами ᲂу҆ра́нилъ є҆сѝ стра̑сти є҆гѵ́пта, и҆ наста́вилъ є҆сѝ, ѳео́дѡре, къ землѝ небе́снѣй, благоче́стнѡ и҆ преподо́бнѡ послѣ́дꙋющыѧ тебѣ̀.
И҆стка̑нїи добродѣ́тельными содѣ́лалъ є҆сѝ, ѳео́дѡре, себѣ̀ ᲂу҆го́днꙋ и҆ чистѣ́йшꙋю ѻ҆де́ждꙋ, въ ню́же ѡ҆дѣ́ѧвсѧ, въ черто́гъ вы́шнїй вше́лъ є҆сѝ.
И҆зсꙋше́нїемъ сѣ́тꙋѧ соверша́лъ є҆сѝ, ѳео́дѡре, власѧны́ми и҆стка́ньми твою̀ пло́ть покрыва́ѧ: ѿѻнꙋ́дꙋже тѝ возсїѧ̀ мы́сленное весе́лїе бжⷭ҇твеннымъ дх҃омъ.
Бг҃оро́диченъ:
Въ ча́съ мѧ̀ стра́шный, пречⷭ҇таѧ, сꙋди́ма спасѝ и҆ и҆зба́ви, гее́нны и҆схитѝ, ꙗ҆́кѡ да ᲂу҆блажа́ю тѧ̀, и҆ по до́лгꙋ чествꙋ́ю, непоро́чнаѧ.
Пѣ́снь є҃. І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.
Житїѐ равноа́гг҃льное воспрїе́мъ на землѝ, преподо́бне, по́стнически всѧ́кимъ ѡ҆ѕлобле́нїемъ ᲂу҆мертви́лъ є҆сѝ страсте́й воста̑нїѧ, бг҃омꙋ́дре ѳео́дѡре.
Ча́съ сꙋда̀ помышлѧ́ѧ всегда̀, ѿри́нꙋлъ є҆сѝ ѿ дꙋшѝ со́нъ ᲂу҆ны́нїѧ, ᲂу҆́тренюѧ къ бг҃ꙋ, и҆ бжⷭ҇твенною любо́вїю ᲂу҆добрѧ́емь.
Любѧ̀ вы̑шнїѧ ѻ҆би́тєли, ꙗ҆́кѡ мона́хъ и҆́стиненъ, воздви́глъ є҆сѝ на землѝ ѻ҆би́тєли мона́шествꙋющымъ: въ ни́хже тобо́ю насажде́ни бы́вше, почита́ютъ тѧ̀, прпⷣбне.
Бг҃оро́диченъ:
Є҆ди́на родила̀ є҆сѝ ѵ҆поста́снꙋю жи́знь, пречⷭ҇таѧ, творца̀ всѣ́хъ и҆ влⷣкꙋ: є҆го́же лю́бѧще, мно́жество ѻ҆тє́цъ преподо́бныхъ преподо́бнѡ пожи́ша.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Просвѣ́щсѧ видѣ̑нїи лꙋ́чшими, ѿ всѣ́хъ земны́хъ дꙋ́шꙋ ѡ҆бнажи́лъ є҆сѝ, и҆ ѡ҆ бз҃ѣ ᲂу҆праздни́лсѧ є҆сѝ, непреста́нными поꙋчє́нїи, ѳео́дѡре.
Свѣ́тлагѡ твоегѡ̀ житїѧ̀ свѣ́тлостїю поднебє́снаѧ ѡ҆свѣти́шасѧ, бл҃же́нне, восто́чнагѡ со́лнца свѣтосїѧ́ннꙋю тѧ̀ ѕвѣздꙋ̀ проповѣ́дающе.
Мра́зомъ и҆ стꙋ́денїю ᲂу҆тѣснѧ́емь, и҆́же къ бг҃ꙋ ѡ҆грѣва́лсѧ є҆сѝ мановє́нїи, и҆ зи́мꙋ ѿгна́лъ є҆сѝ страсте́й бж҃е́ственною теплото́ю, ѳео́дѡре.
Бг҃оро́диченъ:
Ꙗ҆́кѡ добрꙋ̀, ꙗ҆́кѡ краснꙋ̀ ꙗ҆́вльшꙋюсѧ, сло́во кра́сное возлюбѝ, чⷭ҇таѧ, и҆ въ твою̀ ᲂу҆тро́бꙋ всели́сѧ, въ на́ше вѣ́рныхъ и҆збавле́нїе.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Ꙗ҆ви́лсѧ є҆сѝ преди́венъ житїе́мъ, ѳео́дѡре мꙋ́дре ѻ҆́ч҃е, власѧны́ми рꙋ́бы и҆змѣни́въ, па́че ца́рскихъ сокро́вищъ ꙗ҆̀же на землѝ, сегѡ̀ ра́ди нбⷭ҇нꙋю ѻ҆де́ждꙋ воспрїѧ́лъ є҆сѝ, при́снѡ молѝ ѡ҆ на́съ, прпⷣбне.
Пѣ́снь з҃. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ.
Мѷродꙋхнове́нъ бы́лъ є҆сѝ добродѣ́тельными твои́ми ѡ҆бѣ̑ты, ѳео́дѡре, и҆ мѵ́ро благово́нно ѿ честны́хъ твои́хъ моще́й и҆сточа́еши на́мъ вѣ́рнѡ чтꙋ́щымъ тѧ̀, дꙋ́шы и҆ сердца̀ благоꙋха́ѧ, преподо́бне.
Ꙗ҆́кѡ а҆́гнецъ неѕло́бивъ, воспита́нъ на ѕла́цѣ воздержа́нїѧ, преподо́бне, всели́лсѧ є҆сѝ во ѡ҆гра́дꙋ нбⷭ҇нꙋю, весели́тисѧ съ нача́льнымъ па́стыремъ: тѣ́мже твоѧ̑ ѻ҆́вцы при́снѡ помина́й.
Ка́плѧми сле́зъ твои́хъ погаси́лъ є҆сѝ врѧ́щꙋю тѣлесѐ пе́щь, свѧще́нне, ѻ҆гне́мъ бжⷭ҇твеннагѡ дх҃а распала́емь свѣти́льникъ до́блести: и҆ свѣ́тъ сꙋ́щымъ во тмѣ̀, ѻ҆́ч҃е, бы́лъ є҆сѝ.
Бг҃оро́диченъ:
Показа̀ кꙋпина́ тѧ повива́ема ѻ҆гне́мъ, пренепоро́чнаѧ, ника́коже ѡ҆палѧ́ема ᲂу҆́бѡ: ѻ҆́гнь бо носи́ла є҆сѝ бжⷭ҇тва̀, и҆́же неѡпа́льнꙋ тѧ̀ соблю́дъ, чⷭ҇таѧ, и҆ по ржⷭ҇твѣ̀ дв҃ꙋ нетлѣ́ннꙋ.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Скве́рнꙋ ѿмы́лъ є҆сѝ дꙋшѝ сле́зными течє́нїи, и҆ пото́къ пи́щный наслѣ́довалъ є҆сѝ, и҆ кро́ткихъ зе́млю, ꙗ҆́кѡ кро́токъ, прпⷣбне, и҆ неѕло́бивъ, и҆ пра́вдою ꙗ҆́вѣ ᲂу҆кра́шенъ.
Сво́йственными къ бг҃ꙋ взира̑нїи при́снѡ просвѣща́емь, непреткнове́ннѡ преминꙋ́лъ є҆сѝ страстны̑ѧ по́мыслы, и҆ всѐ ѡ҆мраче́нїе тѣле́сное, и҆ къ свѣ́тꙋ преше́лъ є҆сѝ безстра́стїѧ, ѻ҆́ч҃е.
Да и҆́стинномꙋ жела́нїю пристꙋ́пиши, возде́ржникъ и҆ смиреномꙋ́дръ, и҆ долготерпѣли́въ ꙗ҆ви́лсѧ є҆сѝ, и҆ ми́лостивъ вои́стиннꙋ, власѧны́ми рꙋ́бы покрыва́ѧсѧ, и҆ де́мѡнскꙋю ѡ҆бнажа́ѧ пре́лесть.
Бг҃оро́диченъ:
Оу҆краси́вшисѧ добро́тами добродѣ́телей, и҆ рѧ́сны преиспещре́нна златы́ми, дв҃о, ꙗ҆́же па́че всѣ́хъ человѣ̑къ краснѣ́йшаго сло́ва породила̀ є҆сѝ: є҆го́же пое́тъ прпⷣбныхъ мно́жество во вѣ́ки.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ.
Распе́нъ пло́ть твою̀ стра́хомъ влⷣки твоегѡ̀, ᲂу҆мертви́лсѧ є҆сѝ мі́рꙋ, ѻ҆́ч҃е ѳео́дѡре: и҆ ны́нѣ преше́лъ є҆сѝ ра́дꙋѧсѧ къ жи́зни живы́хъ, требл҃же́нне, прича́стїемъ ѡ҆боже́нъ и҆ свѣ́та при́снѡ и҆сполнѧ́емь.
Де́нь пра́зднественный и҆ и҆спо́лненъ свѧще́нїѧ, твою̀ бжⷭ҇твеннꙋю па́мѧть соверша́емъ дне́сь: ты́ бо свѣ́та и҆ днѐ ꙗ҆́кѡ вои́стиннꙋ сы́нъ показа́лсѧ є҆сѝ, и҆ во свѣ́тѣ невече́рнѣмъ живе́ши ра́дꙋѧсѧ.
Свѣти́льниче свѣтоза́рне, бж҃їѧ да́ра тезоимени́те, бг҃осїѧ́нное свѣти́ло, невече́рнѧѧ зарѧ̀, добродѣ́телей мѷрополо́жниче и҆ непрекло́ненъ сто́лпъ мона́шествꙋющихъ, ста́до твоѐ и҆зба́ви моли́твами твои́ми ѿ всѧ́кїѧ ско́рби.
Бг҃оро́диченъ:
Свѣ́та жили́ще чре́во твоѐ бы́сть, дв҃о, просвѣ́щшагѡ мі́ръ зарѧ́ми бжⷭ҇тва̀, две́ре сл҃нца сла́вы, въ жена́хъ прера́дованнаѧ, прпⷣбныхъ похвало̀, всест҃а́ѧ и҆ пребл҃гослове́ннаѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.