і҆рмосы̀, гла́съ и҃
Гла́съ ѻ҆сьмы́й.
Пѣ́снь а҃.
Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.
[Въ воздви́женїе чⷭ҇тна́гѡ крⷭ҇та̀:] Крⷭ҇тъ начерта́въ мѡѷсе́й въ прѧ́мѡ жезло́мъ чермно́е пресѣчѐ, і҆и҃лю пѣшеходѧ́щꙋ, то́же ѡ҆бра́тнѡ фараѡ́нѡвымъ колесни́цамъ ᲂу҆да́ривъ совокꙋпѝ, вопрекѝ написа́въ непобѣди́мое ѻ҆рꙋ́жїе: тѣ́мъ хрⷭ҇тꙋ̀ пои́мъ бг҃ꙋ на́шемꙋ, ꙗ҆́кѡ просла́висѧ.
[Ѻ҆смогла́сника:]
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Посѣ́ченный несѣко́маго пресѣчѐ, и҆ ви́дѣ со́лнце зе́млю не ви́дѣ: лю́таго врага̀ вода̀ потопѝ, и҆ непроходи́мое про́йде і҆и҃ль. пѣ́снь же воспѣва́шесѧ: гдⷭ҇ви пои́мъ, сла́внѡ бо просла́висѧ.
Прⷪ҇ро́чески бг҃ови́децъ бцⷣы ѡ҆́бразъ зрѧ́й немо́кренными нога́ми чермнꙋ́ю про́йде пꙋчи́нꙋ и҆ и҆гра́ѧ вопїѧ́ше: пои́мъ побѣ́днꙋю пѣ́снь гдⷭ҇еви, ꙗ҆́кѡ просла́висѧ.
Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Пои́мъ гдⷭ҇еви всѝ лю́дїе, въ мо́ри чермнѣ́мъ фараѡ́на погрꙋзи́вшемꙋ, побѣ́днꙋю пѣ́снь пою́ще, ꙗ҆́кѡ просла́висѧ.
І҆и҃лѧ ѿ рабо́ты и҆зба́вилъ є҆сѝ гдⷭ҇и, десни́цею твое́ю держа́вною: ꙗ҆́кѡ ѻ҆́наго сп҃слъ є҆сѝ, ны́нѣ на́съ сп҃сѝ.
Пѣ́снь возсле́мъ лю́дїе чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.
И҆стрѧ́сшемꙋ въ мо́ри мꙋчи́тельство фараѡ́не, и҆ і҆и҃лѧ сꙋ́шею наста́вльшемꙋ: пои́мъ хрⷭ҇тꙋ̀, ꙗ҆́кѡ просла́висѧ во вѣ́ки.
[На ржⷭ҇тво̀ бцⷣы:] Сокрꙋши́вшемꙋ бра̑ни мы́шцею свое́ю и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ, ꙗ҆́кѡ просла́висѧ.
Пои́мъ бг҃ꙋ, ѿ го́рькїѧ рабо́ты фараѡ́новы и҆зба́вльшемꙋ і҆и҃лѧ, и҆ ѻ҆́гненнымъ столпо́мъ, и҆ свѣ́тлымъ ѻ҆́блакомъ наста́вльшемꙋ, ꙗ҆́кѡ просла́висѧ.
[Въ сре́дꙋ преполове́нїѧ:] Мо́ре ѡ҆гꙋсти́лъ є҆сѝ, погрꙋзи́вый со ѻ҆рꙋ́жїемъ го́рдаго фараѡ́на, и҆ лю́ди сп҃слъ є҆сѝ немо́креннѡ гдⷭ҇и, и҆ вве́лъ є҆сѝ ѧ҆̀ въ го́рꙋ ст҃ы́ни, вопїю́щыѧ: пои́мъ тебѣ̀ бг҃ꙋ на́шемꙋ пѣ́снь побѣ́днꙋю ꙗ҆́кѡ просла́висѧ.
Въ чермнѣ́мъ фараѡ́на съ колесни́цами погрꙋзи́лъ є҆сѝ, и҆ лю́ди мѡѷсе́омъ сп҃слъ є҆сѝ, пою́щыѧ тебѣ̀ гдⷭ҇и, пѣ́снь побѣ́днꙋю, ꙗ҆́кѡ и҆зба́вителю на́шемꙋ бг҃ꙋ.
Пресла́вный въ мо́ри ᲂу҆стро́ивый лю́демъ пꙋ́ть, нбⷭ҇ное на́мъ ше́ствїе проходи́мо сотворѝ, да но́вꙋю пѣ́снь пои́мъ тебѣ̀ гдⷭ҇и.
Внеза́пꙋ дре́вле мо́ре і҆и҃ль ꙗ҆́кѡ въ пꙋсты́ни ного́ю пра́шною проше́дъ, вопїѧ́ше, гдⷭ҇ви бг҃ꙋ на́шемꙋ крѣ́пкомꙋ въ бра́нехъ, пои́мъ пѣ́снь но́вꙋю.
Ди́вномꙋ бг҃ꙋ вели̑чїѧ принесе́мъ, и҆ великолѣ́пнѡ съ на́ми да воспое́тъ землѧ̀, и҆ нб҃о ꙗ҆́снѡ сла́вꙋ є҆гѡ̀.
Пѣ́снь в҃.
Вонмѝ нб҃о и҆ возглаго́лю, и҆ воспою̀ хрⷭ҇та̀, ѿ дв҃ы ро́ждшагосѧ во сп҃се́нїе на́ше.
Ви́дите ви́дите, ꙗ҆́кѡ а҆́зъ є҆́смь бг҃ъ ва́шъ, пре́жде вѣ̑къ рожде́нный ѿ ѻ҆ц҃а̀ и҆ ѿ дв҃ы въ послѣ̑днѧѧ без̾ мꙋ́жа заче́ншїйсѧ, и҆ разрꙋши́вый грѣ́хъ пра́ѻтца а҆да́ма, ꙗ҆́кѡ чл҃вѣколю́бецъ.
Ви́дите ви́дите, ꙗ҆́кѡ а҆́зъ є҆́смь бг҃ъ, расто́ргнꙋвый чермно́е мо́ре жезло́мъ мѡѷсе́овымъ, и҆ проведы́й лю́ди, и҆ наста́вивый ѧ҆̀, и҆ пита́вый въ пꙋсты́ни сїна́йстѣй, и҆ введы́й въ го́рꙋ ст҃ы́ни.
Па́че ме́да и҆ со́та сла̑ждшаѧ словеса̀ ᲂу҆́стъ мои́хъ, наꙋчи́тесѧ вопи́ти, глаго́летъ гдⷭ҇ь.
[Во вто́рникъ д҃-ѧ недѣ́ли поста̀:] Ви́дите ви́дите, ꙗ҆́кѡ а҆́зъ є҆́смь бг҃ъ, дре́вле і҆и҃лѧ сквозѣ̀ чермно́е мо́ре проведы́й, и҆ пита́вый, и҆ сп҃сы́й, и҆ ѿ го́рькїѧ рабо́ты свободи́вый фараѡ́новы.
Ви́дите ви́дите, ꙗ҆́кѡ а҆́зъ є҆́смь бг҃ъ ва́шъ, въ млⷭ҇ти бога́тый и҆ бл҃гі́й въ щедро́тахъ, и҆зба́вивый лю́ди ѿ пре́лести, и҆ рабо́ты безбо́жныхъ врагѡ́въ.
Нб҃са̀ простры́й и҆ зе́млю ѡ҆снова́вый хрⷭ҇тѐ, вонмѝ моле́нїю моемꙋ̀, ꙗ҆́кѡ и҆́мѧ твоѐ ди́вное призва́хъ чл҃вѣколю́бче.
[Во вто́рникъ в҃-ѧ недѣ́ли поста̀:] Ви́дите ви́дите, ꙗ҆́кѡ а҆́зъ є҆́смь бг҃ъ ва́шъ, ѡ҆ст҃и́вый нача́токъ ва́мъ прїѧ́тенъ, ѿ дне́й всегѡ̀ лѣ́та ѡ҆десѧ́тствованїе, и҆ сїѐ да́въ лю́демъ мои̑мъ во и҆збавле́нїе страсте́й, во сп҃се́нїѧ нача́ло.
[Въ понедѣ́льникъ стрⷭ҇тны́ѧ недѣ́ли, на повече́рїи:] Вонмѝ нб҃о и҆ возглаго́лю, и҆ воспою̀ хрⷭ҇та̀, ѿ дв҃ы пло́тїю прише́дшаго.
Вонмѝ нб҃о и҆ возглаго́лю, и҆ воспою̀ хрⷭ҇та̀ є҆ди́наго чл҃вѣколю́бца.
Пѣ́снь г҃.
Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀ хрⷭ҇тѐ за́повѣдей твои́хъ ᲂу҆твердѝ, ꙗ҆́кѡ нѣ́сть ст҃ъ, па́че тебѐ, є҆ди́не чл҃вѣколю́бче.
[Чтⷭ҇на́гѡ крⷭ҇та̀:] Же́злъ во ѡ҆́бразъ та́йны прїе́млетсѧ, прозѧбе́нїемъ бо предразсꙋжда́етъ сщ҃е́нника: неплодѧ́щей же пре́жде цр҃кви, ны́нѣ процвѣтѐ дре́во крⷭ҇та̀, въ держа́вꙋ и҆ ᲂу҆твержде́нїе.
[Ѻ҆смогла́сника:]
Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
[На ржⷭ҇тво̀ бцⷣы, и҆ преполове́нїю:] Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ: разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ сп҃се́нїи твое́мъ.
Оу҆твердѝ на́шъ ᲂу҆́мъ и҆ сердца̀, нб҃са̀ сло́вомъ ᲂу҆твержде́й, во є҆́же пѣ́ти и҆ сла́вити тѧ̀ во сп҃се́нїе дꙋ́шъ на́шихъ.
Ты̀ є҆сѝ ᲂу҆твержде́нїе притека́ющихъ къ тебѣ̀ гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Оу҆твержде́й рꙋко́ю твое́ю сло́ве бж҃їй нб҃са̀, просвѣще́нїемъ твоегѡ̀ и҆́стиннагѡ позна́нїѧ, ᲂу҆твердѝ и҆ на́съ на тѧ̀ надѣ́ющихсѧ сердца̀.
Оу҆твержде́й сло́ве нб҃са̀ сло́вомъ, ᲂу҆твердѝ на́шъ ᲂу҆́мъ и҆ се́рдце, во є҆́же сла́вити тѧ̀ сп҃са дꙋ́шъ на́шихъ.
Оу҆твержде́й сло́вомъ нб҃са̀, и҆ зе́млю ѡ҆снова́вый на вода́хъ мно́гихъ, ᲂу҆тверди́ мѧ къ пѣ́нїю славосло́вїѧ твоегѡ̀ гдⷭ҇и.
Нѣ́сть ст҃ъ ꙗ҆́кѡ гдⷭ҇ь и҆ нѣ́сть пра́веденъ ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебѐ гдⷭ҇и.
Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Сочини́ мѧ гдⷭ҇и си̑льнымъ люде́й твои́хъ, ѡ҆поѧсꙋ́ѧ си́лою, и҆ лꙋ́ки ра́тникѡвъ сокрꙋшѝ, и҆ нищеты̀ моеѧ̀ ро́гъ возвы́си.
Стра́хъ тво́й гдⷭ҇и всадѝ въ сердца̀ ра́бъ твои́хъ, и҆ бꙋ́ди на́мъ ᲂу҆твержде́нїе тѧ̀ во и҆́стинѣ призыва́ющымъ.
Оу҆тверди́ мѧ гдⷭ҇и си́лою крⷭ҇тною, и҆ да́рꙋй мнѣ̀ се́рдце чи́стое, да ѡ҆ тебѣ̀ хвалю́сѧ бл҃же.
Оу҆твержде́нїе моѐ сп҃се є҆сѝ, прибѣ́жище моѐ и҆ си́ла. поколеба́вшеесѧ се́рдце моѐ ᲂу҆твердѝ въ стра́сѣ твое́мъ, ꙗ҆́кѡ нѣ́сть ст҃ъ, ꙗ҆́коже ты̀ бг҃ъ на́шъ.
Въ гдⷭ҇ѣ бз҃ѣ мое́мъ ᲂу҆тверди́сѧ дꙋша̀ моѧ̀, и҆ да хва́литсѧ глаго́лющи: нѣ́сть ст҃ъ, нѣ́сть пра́веденъ, па́че тебѐ гдⷭ҇и.
Оу҆подо́би мѧ̀ хрⷭ҇тѐ ᲂу҆́мнѡ горѣ̀ сїѡ́нстѣй, возвы́сивый и҆ ᲂу҆тверди́вый въ наде́жди ѡ҆ тебѣ̀, и҆ и҆ска́павый ро́сꙋ бл҃года́ти, чл҃вѣколю́бче.
Оу҆твержде́й на ка́мени вѣ́ры, на се́мъ сози́ждꙋ мою̀ цр҃ковь, рекі́й гдⷭ҇и, сп҃си́ мѧ вопїю́ща: ты̀ є҆сѝ хрⷭ҇тѐ сн҃ъ бг҃а жива́гѡ, и҆ въ тебѣ̀ ᲂу҆тверди́сѧ дꙋ́хъ мо́й.
Оу҆тверди́ мѧ гдⷭ҇и, не́мощь мою̀ вѣ́дый, и҆ рꙋ́кꙋ мнѣ̀ прострѝ, ꙗ҆́кѡ всеси́ленъ.
Пѣ́снь д҃.
Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва чл҃вѣколю́бче.
[Чтⷭ҇на́гѡ крⷭ҇та̀:] Оу҆слы́шахъ гдⷭ҇и смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
[Ѻ҆смогла́сника, и҆ преѡбраже́нїю:]
И҆з̾ пло́ти твоеѧ̀ лꙋчѝ бж҃ества̀ и҆схожда́хъ прⷪ҇ро́кѡмъ и҆ а҆пⷭ҇лѡмъ. тѣ́мъ нача́льницы пою́ще взыва́хꙋ: сла́ва си́лѣ твое́й гдⷭ҇и.
[Ѻ҆смогла́сника:]
И҆з̾ горы̀ прїѡсѣне́нныѧ сло́ве прⷪ҇ро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.
Оу҆слы́шахъ, гдⷭ҇и, слꙋ́хъ тво́й и҆ ᲂу҆боѧ́хсѧ, ꙗ҆́кѡ неизрече́ннымъ совѣ́томъ, бг҃ъ сы́й присносꙋ́щный, ѿ дв҃ы проше́лъ є҆сѝ вопло́щьсѧ: сла́ва снизхожде́нїю твоемꙋ̀ хрⷭ҇тѐ, сла́ва си́лѣ твое́й.
Всѣ́лъ є҆сѝ на ко́ни а҆пⷭ҇лы твоѧ̑ гдⷭ҇и, и҆ прїѧ́лъ є҆сѝ рꙋка́ма твои́ма ᲂу҆зды̑ и҆́хъ, и҆ сп҃се́нїе бы́сть ѣ҆жде́нїе твоѐ, вѣ́рнѡ пою́щымъ: сла́ва си́лѣ твое́й гдⷭ҇и.
Бг҃оно́сный дх҃омъ ст҃ы́мъ просвѣти́всѧ прⷪ҇ро́къ а҆ввакꙋ́мъ, въ послѣ̑днѧѧ твоѐ прише́ствїе прови́дѣвъ, вопїѧ́ше: внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, ꙗ҆ви́шисѧ. сла́ва си́лѣ твое́й гдⷭ҇и.
Та́йнѡ прⷪ҇ро́къ предзрѧ̀, ѿ дв҃ы тѧ̀ сло́ве воплоща́ема, пѣ́сненнѡ вопїѧ́ше: сла́ва си́лѣ твое́й гдⷭ҇и.
[На ржⷭ҇тво̀ бцⷣы, и҆ преполове́нїю:] Прⷪ҇ро́къ а҆ввакꙋ́мъ, ᲂу҆́мныма ѻ҆чи́ма прови́дѣ гдⷭ҇и прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ. сла́ва си́лѣ твое́й, сла́ва снизхожде́нїю твоемꙋ̀.
Оу҆слы́шахъ гдⷭ҇и слꙋ́хъ тво́й и҆ ᲂу҆боѧ́хсѧ, разꙋмѣ́хъ дѣла̀ твоѧ̑ и҆ просла́вихъ держа́вꙋ твою̀, гдⷭ҇и.
Оу҆слы́шахъ гдⷭ҇и слꙋ́хъ тво́й, и҆ ᲂу҆боѧ́хсѧ, разꙋмѣ́хъ неизрече́нное твоѐ смотре́нїе и҆ просла́вихъ сло́ве снисхожде́нїе твоѐ.
Твоѐ вочл҃вѣ́ченїе, є҆́же пре́жде вѣ̑къ пред̾ѡпредѣли́лъ є҆сѝ, въ послѣ̑днѧѧ бл҃говоли́лъ є҆сѝ соверши́ти гдⷭ҇и, ᲂу҆слы́шахъ, и҆ стра́хомъ воспѣва́хъ.
Твоѐ пречтⷭ҇ое прише́ствїе хрⷭ҇тѐ, прови́дѧй прⷪ҇ро́къ а҆ввакꙋ́мъ, вопїѧ́ше тебѣ̀ съ тре́петомъ: ᲂу҆слы́шахъ слꙋ́хъ тво́й и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ гдⷭ҇и.
Оу҆слы́шахъ слꙋ́хъ тво́й гдⷭ҇и, и҆ ᲂу҆боѧ́хсѧ, разꙋмѣ́хъ дѣла̀ твоѧ̑ и҆ ᲂу҆жасо́хсѧ, ꙗ҆́кѡ посредѣ̀ двою̀ живѡ́тнꙋ позна́ешисѧ, во сп҃се́нїе дꙋ́шъ на́шихъ.
Покры̀ нб҃са̀ добродѣ́тель твоѧ̀ гдⷭ҇и, и҆ всѧ́чєскаѧ сп҃се хвале́нїѧ твоегѡ̀ и҆спо́лнишасѧ.
Ꙗ҆́кѡ петрꙋ̀ рꙋ́кꙋ простры́й въ по́мощь, и҆ менѐ поми́лꙋй, и҆ сп҃сѝ ꙗ҆́кѡ чл҃вѣколю́бецъ.
А҆ввакꙋ́ме прⷪ҇ро́че, что̀ зове́ши; что̀ ви́дѣвъ ᲂу҆жа́слсѧ є҆сѝ: ѿ ю҆́га тѧ̀ грѧдꙋ́ща бг҃а ви́дѧ, ᲂу҆боѧ́хсѧ.
Оу҆слы́шахъ слꙋ́хъ си́лы твоеѧ̀, и҆ возвесели́сѧ се́рдце моѐ ѡ҆ гдⷭ҇ѣ.
Пѣ́снь є҃.
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго. но ѡ҆брати́ мѧ и҆ къ свѣ́тꙋ за́повѣдей твои́хъ пꙋтѝ моѧ̑ напра́ви, молю́сѧ.
[Чⷭ҇тна́гѡ крⷭ҇та̀:] Ѽ требл҃же́нное дре́во, на не́мже распѧ́сѧ хрⷭ҇то́съ, цр҃ь и҆ гдⷭ҇ь: и҆́мже падѐ, дре́вомъ прельсти́вый, тобо́ю прельсти́всѧ, бг҃ꙋ пригвозди́вшꙋсѧ пло́тїю, подаю́щемꙋ ми́ръ дꙋша́мъ на́шымъ.
[Ѻ҆смогла́сника:]
Просвѣтѝ на́съ повелѣ́нїи твои́ми гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ чл҃вѣколю́бче.
Мра́къ дꙋшѝ моеѧ̀ разженѝ свѣтода́вче хрⷭ҇тѐ бж҃е, началоро́днꙋю тьмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ сло́ве, да ᲂу҆́треннюѧ сла́влю тѧ̀.
Оу҆́треннююще вопїе́мъ тѝ гдⷭ҇и, сп҃си́ ны. ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.
Страсте́й мѧ̀ мглы̀, ꙗ҆́кѡ ѿ глꙋбо́кїѧ но́щи и҆збавлѧ́ѧй, ᲂу҆́треневати сподо́би дꙋ́хъ мо́й молю́сѧ, во свѣ́тѣ днѐ повелѣ́нїй твои́хъ хрⷭ҇тѐ.
Твои́мъ свѣ́томъ ѡ҆зарѝ мо́й ᲂу҆́мъ бж҃е, молю́сѧ тебѣ̀, да мно́гꙋю твою̀ воспою̀ ѿ но́щи ᲂу҆́треневавъ бл҃госты́ню.
Ѿ но́щи невѣ́дѣнїѧ, по дꙋшелови́тельномꙋ пꙋтѝ при́снѡ блꙋдѧ́щаго, свѣ́томъ ра́зꙋма твоегѡ̀ гдⷭ҇и, преднаставлѧ́ѧ мѧ̀ на стезю̀ за́повѣдей твои́хъ напра́ви.
Ꙗ҆́кѡ бг҃а и҆но́гѡ бл҃же, па́че тебѐ не зна́емъ, къ тебѣ̀ свѣ́тꙋ незаходи́момꙋ ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.
Оу҆́тренюетъ дꙋ́хъ мо́й къ тебѣ̀ бж҃е, ѿ ѻ҆ц҃а̀ рожде́нномꙋ неизрече́ннѡ, и҆ воздви́гнꙋвшемꙋ ро́гъ сп҃се́нїѧ на́мъ.
Оу҆́тренюетъ дх҃ъ мо́й къ тебѣ̀ бж҃е, занѐ свѣ́тъ повелѣ́нїѧ прише́ствїѧ твоегѡ̀: и҆́миже ᲂу҆́бѡ ѡ҆зарѝ ᲂу҆́мъ на́шъ влⷣко, и҆ наста́ви на стезю̀ жи́зни.
Ѿ но́щи невѣ́дѣнїѧ бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀ гдⷭ҇и.
Ѿ но́щи ᲂу҆́тренюетъ дꙋ́хъ мо́й къ тебѣ̀ бж҃е, млⷭ҇ть пода́ждь мѝ.
[На ржⷭ҇тво̀ бцⷣы, и҆ преполове́нїю:] Гдⷭ҇и бж҃е на́шъ, ми́ръ да́ждь на́мъ, гдⷭ҇и бж҃е на́шъ, стѧжи́ ны, гдⷭ҇и, ра́звѣ тебѐ и҆но́гѡ не вѣ́мы, и҆́мѧ твоѐ и҆менꙋ́емъ.
Оу҆́тренююще къ тебѣ̀ чл҃вѣколю́бцꙋ, воспѣва́емъ тѧ̀ хрⷭ҇тѐ бж҃е, да́рꙋй на́мъ млⷭ҇ти твоѧ̑.
Ѿ но́щи ᲂу҆́тренюетъ дꙋ́хъ мо́й къ твоемꙋ̀ пѣснопѣ́нїю, занѐ свѣ́тъ и҆ ми́ръ повелѣ̑нїѧ твоѧ̑.
Бл҃же, свѣ́та и҆ ми́ра пода́телю, ѿ тьмы̀ мѧ̀ и҆ бра́ни страсте́й и҆зба́ви, ᲂу҆́тренююща хрⷭ҇тѐ къ твоемꙋ̀ хвале́нїю.
Повелѣ̑нїѧ твоѧ̑ просвѣще́нїемъ хрⷭ҇тѐ ꙗ҆́кѡ бл҃гъ показа́лъ є҆сѝ, занѐ свѣтода́вче ѿ но́щи ᲂу҆́треннююще сла́вꙋ возсыла́емъ.
Твои́мъ свѣ́томъ ѡ҆зарѝ мо́й ᲂу҆́мъ бж҃е молю́сѧ, да мно́гꙋю твою̀ воспою̀, ѿ но́щи ᲂу҆́тренюѧ, бл҃гость.
Ѿ но́щи невѣ́дѣнїѧ, бг҃овѣ́дѣнїѧ де́нь во свѣ́тѣ лица̀ твоегѡ̀ хрⷭ҇тѐ, возсїѧ́етъ, ко ᲂу҆́трꙋ хвале́нїе твоѐ въ сердца́хъ на́шихъ.
Пѣ́снь ѕ҃.
Ѡ҆чи́сти мѧ̀ сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ молю́сѧ, къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
[Чтⷭ҇на́гѡ крⷭ҇та̀:] Во́днагѡ ѕвѣ́рѧ во ᲂу҆тро́бѣ, дла̑ни і҆ѡ́на крестови́днѡ распросте́ръ, сп҃си́тельнꙋю стра́сть проѡбража́ше ꙗ҆́вѣ. тѣ́мъ тридне́венъ и҆зше́дъ, премі́рное воскрⷭ҇нїе прописа́ше, пло́тїю пригвожде́ннагѡ хрⷭ҇та̀ бг҃а, и҆ тридне́внымъ воскрⷭ҇нїемъ мі́ръ просвѣ́щшагѡ.
[Ѻ҆смогла́сника:]
І҆ѡ́нꙋ въ ки́тѣ гдⷭ҇и, є҆ди́наго всели́лъ є҆сѝ, мене́ же свѧ́заннаго мре́жами вра́жїими, ꙗ҆́кѡ ѿ тлѝ ѻ҆́наго сп҃сѝ.
Ꙗ҆́коже прⷪ҇ро́ка и҆зба́вилъ є҆сѝ и҆з̾ глꙋбины̀ преиспо́днїѧ хрⷭ҇тѐ бж҃е, и҆ менѐ ѿ грѣхѡ́въ мои́хъ и҆зба́ви ꙗ҆́кѡ чл҃вѣколю́бецъ, и҆ ᲂу҆пра́ви живо́тъ мо́й, молю́сѧ.
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.
Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ ꙗ҆́кѡ петро́ви, ѽ ᲂу҆пра́вителю! и҆ сп҃сѝ.
Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ: и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ бж҃е, возведи́ мѧ.
Во і҆саа́цѣ стра́сть прописа́вый, и҆ во і҆ѡ́нѣ погребе́нїе проѡбразова́вый, и҆ воскрⷭ҇нїе всѣ̑мъ подаѧ́й, тебѣ̀ вопїе́мъ съ прⷪ҇ро́комъ: ѿ тлѝ на́съ возведѝ, бл҃гоꙋтро́бне гдⷭ҇и.
Къ могꙋ́щемꙋ мѧ̀ сп҃стѝ гдⷭ҇ꙋ и҆з̾ глꙋбины̀ грѣхо́вныѧ возопи́хъ, и҆ ѿ тлѝ возведѐ живо́тъ мо́й, ꙗ҆́кѡ чл҃вѣколю́бецъ.
Ѿве́рглъ мѧ̀ є҆сѝ во глꙋбины̑ се́рдца морска́гѡ, и҆ ви́дѣхъ чꙋдеса̀ твоѧ̑ гдⷭ҇и.
Содержи́ма мѧ̀, прїимѝ чл҃вѣколю́бче, грѣхѝ мно́гими, и҆ припа́дающа щедро́тамъ твои́мъ, ꙗ҆́кѡ прⷪ҇ро́ка гдⷭ҇и, и҆ сп҃си́ мѧ.
[На ржⷭ҇тво̀ бцⷣы, и҆ преполове́нїю:] Ꙗ҆́кѡ во́ды морскі̑ѧ чл҃вѣколю́бче волна́ми жите́йскими ѡ҆бꙋрева́юсѧ. тѣ́мже ꙗ҆́кѡ і҆ѡ́на, та́кѡ вопїю́ ти: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.
Ꙗ҆́кѡ і҆ѡ́нꙋ прⷪ҇ро́ка ѿ ки́та возве́лъ є҆сѝ гдⷭ҇и, и҆зба́ви мѧ̀ ѿ лови́твы чꙋжда́гѡ, и҆ сп҃си́ мѧ ще́дре, ꙗ҆́кѡ многомлⷭ҇тивъ.
Ꙗ҆́кѡ ѿ ки́та и҆зба́вилъ є҆сѝ прⷪ҇ро́ка твоего̀, и҆ менѐ сп҃се на́шъ ѿ мно́жества прегрѣше́нїй мои́хъ и҆зба́ви.
Превзыдо́ша главꙋ̀ мою̀ беззакѡ́нїѧ моѧ̑, ꙗ҆́кѡ тѧ́жкое бре́мѧ на мѧ̀ ѡ҆бремени̑вшаѧсѧ, во ѿча́ѧнїѧ глꙋбины̀ низвлача́тъ мѧ̀: но пре́жде да́же погрѧ́знꙋти мѝ, гдⷭ҇и, сп҃си́ мѧ.
И҆з̾ чре́ва а҆́дова во́плѧ моегѡ̀ ᲂу҆слы́шалъ є҆сѝ гла́съ мо́й, и҆ и҆зба́вилъ є҆сѝ ѿ тлѝ живо́тъ мо́й, многомлⷭ҇тиве.
Пѣ́снь з҃.
Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
[Чтⷭ҇на́гѡ крⷭ҇та̀:] Безꙋ́мное велѣ́нїе мꙋчи́телѧ ѕлочести́вагѡ лю́ди поколеба̀, ды́шꙋщее преще́нїе и҆ ѕлохꙋле́нїе бг҃оме́рзкое, ѻ҆ба́че трѝ ѻ҆́троки не ᲂу҆страшѝ ꙗ҆́рость ѕвѣ́рскаѧ, ни ѻ҆́гнь снѣда́ѧй, но противоды́шꙋщꙋ росоно́сномꙋ дх҃ꙋ, со ѻ҆гне́мъ сꙋ́ще поѧ́хꙋ: препѣ́тый ѻ҆тцє́въ и҆ на́съ бж҃е бл҃гослове́нъ є҆сѝ.
[Ѻ҆смогла́сника:]
Ѻ҆́троцы є҆вре́йстїи въ пещѝ, попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и, бж҃е во вѣ́ки.
Халде́йскїѧ пе́щи, всепа́гꙋбнꙋю си́лꙋ ᲂу҆гаси́вше, ѡ҆́бразомъ а҆́гг҃ла снизше́дшагѡ, зижди́телю ю҆́нѡши взыва́хꙋ: бл҃гослове́нъ є҆сѝ и҆ хва́льный бж҃е ѻ҆тє́цъ на́шихъ.
На по́лѣ деи́рѣ, и҆ногда̀ мꙋчи́тель пе́щь поста́ви на мꙋче́нїе бг҃оно́сныхъ: въ не́йже трѝ ѻ҆́троки пѣсносло́вѧхꙋ є҆ди́наго бг҃а, трⷪ҇чнѡ воспѣва́хꙋ, глаго́люще: ѻ҆тцє́въ бж҃е бл҃гослове́нъ є҆сѝ.
Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша пою́ще: ѻ҆тцє́въ бж҃е бл҃гослове́нъ є҆сѝ.
Ѻ҆́троцы бг҃очести́вїи въ вавѷлѡ́нѣ ѡ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ, глаго́люще: превозноси́мый ѻ҆тцє́въ и҆ на́съ бж҃е бл҃гослове́нъ є҆сѝ.
А҆́гг҃ломъ ѻ҆́троки и҆з̾ ѻ҆гнѧ̀ сп҃сы́й и҆ гремѧ́щꙋю пе́щь преложи́вый на ро́сꙋ, бл҃гослове́нъ є҆сѝ бж҃е ѻ҆тє́цъ на́шихъ.
Въ нача́лѣ зе́млю ѻ҆снова́вый, и҆ нб҃са̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Ѻ҆́троки ѡ҆роси́вый въ пещѝ и҆ дв҃ꙋ сохрани́вый, ро́ждшꙋю тѧ̀, по ржⷭ҇твѣ̀, бл҃гослове́нъ є҆сѝ бж҃е ѻ҆тє́цъ на́шихъ.
[На ржⷭ҇тво̀ бцⷣы, и҆ преполове́нїю:] Халде́йскаѧ пе́щь ѻ҆гне́мъ распала́емаѧ, ѡ҆роша́шесѧ дх҃омъ, бж҃їимъ предстоѧ́нїемъ, ѻ҆́троцы поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Въ пещѝ ѻ҆́гненнѣй ѻ҆́троки сп҃сы́й, бл҃гослове́нъ є҆сѝ во вѣ́ки гдⷭ҇и, бж҃е ѻ҆тє́цъ на́шихъ.
Подража́тели трїе́хъ твои́хъ гдⷭ҇и ѻ҆трокѡ́въ сотвори́ ны, сопротивлѧ́ющыѧсѧ грѣхꙋ̀, и҆ ѻ҆́гнь страсте́й попира́ющыѧ, и҆ пою́щыѧ: бл҃гослове́нъ є҆сѝ бж҃е ѻ҆тє́цъ на́шихъ.
Ви́дѣвъ мꙋчи́тель четве́ртагѡ зра́къ глаго́лаше сꙋ́щымъ съ ни́мъ: трѝ вверго́хомъ въ пла́мень, ны́нѣ же четы́ре ви́жꙋ: є҆ди́нагѡ зра́къ ᲂу҆жаса́етъ мо́й ᲂу҆́мъ, ᲂу҆дивлѧ́етъ моѐ помышле́нїе. трїе́хъ ли́къ пое́тъ тѧ̀ во вѣ́ки.
Ѻ҆трокѡ́мъ въ пе́щь вве́ржєннымъ, ви́дѣвъ мꙋчи́тель четве́ртагѡ зра́къ въ ви́дѣ сн҃а бж҃їѧ, съ ни́ми зовѧ́ше: бл҃гослове́нъ є҆сѝ бж҃е во вѣ́ки.
Пѣ́снь и҃.
Седмери́цею пе́щь, халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею, сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
[Чⷭ҇тна́гѡ крⷭ҇та̀:] Бл҃гослови́те ѻ҆́троцы, трⷪ҇цы равночи́сленнїи, содѣ́телѧ ѻ҆ц҃а̀, бг҃а, по́йте снизше́дшее сло́во, и҆ ѻ҆́гнь въ ро́сꙋ претво́ршее, и҆ превозноси́те всѣ̑мъ жи́знь подава́ющаго, дх҃а всест҃а́го, во вѣ́ки.
[Ѻ҆смогла́сника:]
Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѡ҆́бразꙋ въ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ, и҆ славосло́вѧхꙋ во всѧ̑ вѣ́ки.
Побѣди́тели мꙋчи́телѧ и҆ пла́мене, бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.
Ѿрица́ющесѧ златослꙋже́нїѧ ѻ҆́троцы, царѧ̀ небрего́ша, ꙗ҆ви́ бо ѧ҆̀ ѻ҆́гнь преложе́нный рабы̀ бж҃їѧ, вопїю́щыѧ: да пое́тъ тва́рь гдⷭ҇а, и҆ превозно́ситъ во всѧ̑ вѣ́ки.
Нече́стїѧ ѻ҆́рганы и҆нꙋ́ю пѣ́снь, бл҃гоче́стїѧ же бл҃говѣща́ннїи поѧ́хꙋ гꙋ́сли: бл҃гослови́те дѣла̀ гдⷭ҇нѧ, хрⷭ҇та̀ во вѣ́ки.
Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: бл҃гослови́те дѣла̀ гдⷭ҇нѧ гдⷭ҇а.
Ѿ ѻ҆ц҃а̀ пре́жде вѣ̑къ рожде́ннаго, и҆ ѿ мт҃ре въ послѣ̑днѧѧ воплоще́ннаго, сщ҃е́нницы бл҃гослови́те, лю́дїе превозноси́те во всѧ̑ вѣ́ки.
На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.
Безнача́льнаго цр҃ѧ̀ сла́вы, є҆гѡ́же трепе́щꙋтъ нбⷭ҇ныѧ си̑лы, по́йте сщ҃е́нницы, лю́дїе превозноси́те во всѧ̑ вѣ́ки.
[На ржⷭ҇тво̀ бцⷣы:] Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
[Преполове́нїю:] А҆́гг҃ли и҆ нб҃са̀, на прⷭ҇то́лѣ сла́вы сѣдѧ́щаго, и҆ ꙗ҆́кѡ бг҃а непреста́ннѡ сла́вимаго, бл҃гослови́те, по́йте и҆ превозноси́те є҆го̀ во вѣ́ки.
Въ пещѝ ликова́нїе поста́виша ѻ҆́троцы, сочине́нный чи́нъ прїи́мше, тва́ри повелѣва́юще, сла́вити вседѣ́тельнꙋю премꙋ́дрость, хрⷭ҇та̀ воспѣва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
І҆ерⷭ҇ли́ме ѡ҆сщ҃е́нный, бл҃горо́днїи сꙋ́ще ѻ҆́троцы ꙗ҆ви́шасѧ въ не́мъ, бж҃е́ственныхъ зако́нѡвъ не прїе́мше забве́нїѧ всегꙋби́тельнагѡ. но вавѷлѡ́нскїй ѻ҆́гнь въ себѣ̀ бл҃гоче́ствꙋющихъ хода́тайствовавше, въ не́мъ ѡ҆роше́ни поѧ́хꙋ: бл҃гослови́те творє́нїѧ гдⷭ҇а.
Разжжи́те пе́щь седмери́цею, до́ндеже до конца̀ разгори́тсѧ, мꙋчи́тель речѐ халде́ѡмъ: а҆на́нїю, а҆за́рїю и҆ мїсаи́ла, вложи́те. ѧ҆̀ въ ню̀, и҆̀же ѡ҆́бразꙋ злато́мꙋ не поклони́шасѧ, но глаго́лахꙋ: мы̀ бг҃а и҆́мамы на нб҃сѣ́хъ, є҆мꙋ́же слꙋ́жимъ и҆ покланѧ́емсѧ во вѣ́ки.
Бл҃гослови́тъ тѧ̀ всѧ̀ тва́рь гдⷭ҇и, славосло́виша тѧ̀ нбⷭ҇ныѧ си̑лы со ѻ҆́троки, и҆ мы̀ воспѣва́емъ и҆ превозно́симъ во всѧ̑ вѣ́ки.
Безнача́льный бг҃ъ сло́во, прише́дый на кр҃ще́нїе, соверша́ше та́инство смотре́нїѧ во і҆ѻрда́нѣ, и҆ прⷣте́чи глаго́лаше: ты́ мѧ кр҃ща́еши водо́ю, а҆́зъ же тѧ̀ дх҃омъ, съ вопїю́щими мнѣ̀ вѣ́рою: бл҃гослови́те дѣла̀ гдⷭ҇нѧ гдⷭ҇а.
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те, и҆ превозноси́те во всѧ̑ вѣ́ки.
Прпⷣбнїи твоѝ ѻ҆́троцы, въ пе́щь вве́ржени поѧ́хꙋ: бл҃гослови́те дѣла̀ гдⷭ҇нѧ гдⷭ҇а.
Пѣ́снь ѳ҃.
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
[Чтⷭ҇на́гѡ крⷭ҇та̀:] Та́инъ є҆сѝ бцⷣе ра́й, невоздѣ́ланнѡ возрасти́вшїй хрⷭ҇та̀: и҆́мже крⷭ҇тное живоно́сное на землѝ насади́сѧ дре́во. тѣ́мъ ны́нѣ возноси́мꙋ, покланѧ́ющесѧ є҆мꙋ̀, тѧ̀ велича́емъ.
Снѣ́дїю дре́ва, ро́дꙋ прибы́вшаѧ сме́рть, крⷭ҇то́мъ ᲂу҆праздни́сѧ дне́сь, и҆́бо прама́тернѧѧ всеро́днаѧ клѧ́тва разрꙋши́сѧ, прозѧбе́нїемъ чтⷭ҇ыѧ бг҃ома́тере: ю҆́же всѧ̑ си̑лы нбⷭ҇ныѧ велича́ютъ.
[Ѻ҆смогла́сника:]
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ: тѣ́мже пречⷭ҇тꙋю бцⷣꙋ вѣ́рнїи велича́емъ.
Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ сп҃се́нїѧ на́мъ, въ домꙋ̀ даві́довѣ ѻ҆́трока своегѡ̀: въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю дв҃о чⷭ҇таѧ, съ безпло́тными ли́ки тѧ̀ велича́юще.
Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ немо́лчными славословле́нїи велича́емъ.
Ѽ дв҃ства кра́й бцⷣе, пѣ́сньми же сла́вными, пра́здники возвыша́ющаѧ бл҃года́тей твои́хъ, и҆ ны́нѣ дв҃ственною сло́ва твоегѡ̀ па́мѧтїю, наи́тїемъ та́йнымъ ᲂу҆краша́ющаѧ въ не́й, тѧ̀ велича́ющыѧ.
Оу҆ста́вы прешла̀ є҆сѝ є҆стества̀ содѣ́телѧ заче́нши и҆ гдⷭ҇а, и҆ две́рь сп҃се́нїѧ мі́рови была̀ є҆сѝ: тѣ́мъ тѧ̀ бцⷣе непреста́ннѡ велича́емъ.
Велича́емъ тѧ̀ мт҃рь бж҃їю, и҆ сла́вимъ бцⷣе дв҃о, ꙗ҆́кѡ сп҃са ро́ждшꙋю дꙋ́шъ на́шихъ.
Неви́димаго зра́комъ бж҃е́ственнымъ прїе́мшаѧ, неискꙋсобра́чнаѧ дв҃о и҆ мт҃и, пѣ́сньми ржⷭ҇тво̀ твоѐ велича́емъ.
Велича́емъ тѧ̀ всенепоро́чнꙋю мт҃рь хрⷭ҇та̀ бг҃а на́шегѡ, ю҆́же ѡ҆сѣнѝ дх҃ъ ст҃ы́й.
Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, на́ше вѣ́рныхъ сп҃се́нїе, пѣ́сньми немо́лчными велича́емъ.
Воспита́ннаѧ во ст҃а̑ѧ ст҃ы́хъ, и҆ ро́ждшаѧ свѣ́тъ вселе́нныѧ, бл҃года́тнаѧ ра́дꙋйсѧ, пѣ́сньми ржⷭ҇тво̀ твоѐ велича́емъ.
Тѧ̀ нб҃сѐ и҆ землѝ хода́таицꙋ всѝ ро́ди ᲂу҆бл҃жа́емъ: пло́тски бо всели́сѧ въ тѧ̀ и҆сполне́нїе, дв҃о, бж҃ества̀.
[На ржⷭ҇тво̀ бцⷣы, и҆ преполове́нїю:] Чꙋ́жде ма́теремъ дѣ́вство, и҆ стра́нно дѣ́вамъ дѣторожде́нїе: на тебѣ̀ бцⷣе ѻ҆боѧ̑ ᲂу҆стро́ишасѧ. тѣ́мъ тѧ̀ всѧ̑ племена̀ земна̑ѧ, непреста́ннѡ велича́емъ.
Тѧ̀ неѡпа́льнꙋю, ю҆́же прови́дѧше мѡѷсе́й, неѡпа́льнѡ горѧ́щꙋ и҆ногда̀ ѻ҆гне́мъ бж҃ества̀, ꙗ҆́кѡ неѡпа́льнѡ ро́ждшꙋю гдⷭ҇а воплоще́ннаго бг҃а, пѣ́сньми немо́лчными велича́емъ.
Весе́лїемъ всѝ дв҃ѣ, є҆́же ра́дꙋйсѧ, возопїи́мъ: бл҃года́тнаѧ мр҃і́е бг҃оневѣ́сто, тѧ̀ ꙗ҆́кѡ мт҃рь бж҃їю вѣ́рнїи є҆диномꙋ́дреннѡ велича́емъ.
Да ᲂу҆молча́тъ є҆ретїкѡ́въ собра̑нїѧ, не и҆́стиннѡ бцⷣꙋ и҆сповѣ́дающихъ тѧ̀: и҆́бо свы́ше тѧ̀ прⷪ҇ро́цы предпроповѣ́даша мт҃рь бы́ти бж҃їю, и҆ хода́таицꙋ ро́да на́шегѡ. тѣ́мъ тѧ̀ дв҃о велича́емъ.
Разбо́йника подража́ѧй ѻ҆каѧ́нный а҆́зъ, и҆сповѣ́даѧй тѧ̀ зовꙋ̀ тебѐ, є҆ди́наго ѿ ѻ҆ц҃а̀, и҆ ѿ дв҃ы неизрече́ннѡ воплоще́нна, и҆ менѐ ра́ди бы́вша по мнѣ̀: но ꙗ҆́кѡ свѣ́тъ ᲂу҆́мный со́лнце, не воспомѧнꙋ́въ ѕѡ́лъ, во ца́рствїи твое́мъ помѧни́ мѧ, є҆гда̀ сꙋдїѧ̀ гдⷭ҇и сѧ́деши прⷭ҇то́лѣ.
Воплоще́нїѧ бж҃їѧ ѻ҆рга́нъ дв҃о была̀ є҆сѝ, и҆ смѣше́нїѧ сло́ва въ пло́ти є҆́же ѿ тебѐ черто́гъ: соедине́нома бо сꙋщество́ма, сꙋгꙋ́быма дѣ́йствома и҆ хотѣ́ньма показꙋ́ема: є҆го́же пою́ще, тѧ̀ бцⷣе велича́емъ.
Чтⷭ҇ꙋю сла́внѡ почти́мъ, лю́дїе бцⷣꙋ, ѻ҆́гнь бж҃ества̀ прїи́мшꙋю во чре́вѣ неѡпа́льнѡ, пѣ́сньми велича́емъ.
Тѧ̀ ши́ршꙋю нб҃съ бцⷣе, и҆ свѣ́тльшꙋю со́лнца, пѣ́сньми велича́емъ.
Тѧ̀ бцⷣꙋ, мт҃рь свѣ́та, въ пѣ́снехъ велича́емъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.