Слꙋ́жба на ст҃ꙋ́ю па́схꙋ
Канѡ́нъ во ст҃ꙋ́ю недѣ́лю па́схи, и҆ во всю̀ свѣ́тлꙋю седми́цꙋ.
Тропа́рь: Хрⷭ҇то́съ воскр҃се и҆з̾ ме́ртвыхъ, сме́ртїю сме́рть попра́въ, и҆ сꙋ́щымъ во гробѣ́хъ живо́тъ дарова́въ.
И҆ про́чее по ᲂу҆ста́вꙋ.
И҆ начина́етъ предстоѧ́тель канѡ́нъ, творе́нїе господи́на і҆ѡа́нна дамаски́на. І҆рмосы̀ на д҃, и҆ тропарѝ на в҃і. И҆ па́ки послѣдѝ кі́йждо ли́къ пое́тъ і҆рмо́съ. Послѣди́ же на схо́дѣ, катава́сїа, і҆рмо́съ то́йже: Воскрⷭ҇нїѧ де́нь: И҆ по не́мъ, Хрⷭ҇то́съ воскр҃се: три́жды. [Въ про́чыѧ же дни̑ по ᲂу҆ста́вꙋ].
Канѡ́нъ. Пѣ́снь а҃. Гла́съ а҃.
І҆рмо́съ: Воскрⷭ҇нїѧ де́нь, просвѣти́мсѧ лю́дїе, па́сха гдⷭ҇нѧ па́сха: ѿ сме́рти бо къ жи́зни, и҆ ѿ землѝ къ нб҃сѝ, хрⷭ҇то́съ бг҃ъ на́съ преведѐ, побѣ́днꙋю пою́щыѧ.
Припѣ́въ: Хрⷭ҇то́съ воскр҃се и҆з̾ ме́ртвыхъ:
Ѡ҆чи́стимъ чꙋ̑вствїѧ, и҆ ᲂу҆́зримъ непристꙋ́пнымъ свѣ́томъ воскрⷭ҇нїѧ хрⷭ҇та̀ блиста́ющасѧ, и҆ ра́дꙋйтесѧ рекꙋ́ща, ꙗ҆́снѡ да ᲂу҆слы́шимъ, побѣ́днꙋю пою́ще.
Нб҃са̀ ᲂу҆́бѡ досто́йнѡ да веселѧ́тсѧ, землѧ́ же да ра́дꙋетсѧ, да пра́зднꙋетъ же мі́ръ, ви́димый же ве́сь и҆ неви́димый: хрⷭ҇то́съ бо воста̀, весе́лїе вѣ́чное.
И҆́ный канѡ́нъ бг҃оро́диченъ, подо́бенъ. Творе́нїе господи́на ѳеофа́на, и҆ господи́на і҆ѡ́сифа, є҆гѡ́же краестро́чїе на пе́рвыхъ тропарѣ́хъ: ѳеофа́нꙋсъ. Гла́съ то́йже. [Глаго́летсѧ же се́й кромѣ̀ пе́рвагѡ днѐ.]
ѳеофа́нъ Оу҆мерщвле́нїѧ предѣ́лъ сломи́ла є҆сѝ, вѣ́чнꙋю жи́знь ро́ждшаѧ хрⷭ҇та̀, и҆з̾ гро́ба возсїѧ́вшаго дне́сь, дв҃о всенепоро́чнаѧ и҆ мі́ръ просвѣти́вшаго.
і҆ѡ́сифъ Воскрⷭ҇шаго ви́дѣвши сн҃а твоего̀ и҆ бг҃а, ра́дꙋйсѧ со а҆пⷭ҇лы бг҃обл҃года́тнаѧ чⷭ҇таѧ, и҆ є҆́же ра́дꙋйсѧ пе́рвѣе, ꙗ҆́кѡ всѣ́хъ ра́дости вина̀ воспрїѧ́ла є҆сѝ, бг҃ома́ти всенепоро́чнаѧ.
На всѧ́кꙋю же пѣ́снь по тропарѣ̀ быва́етъ є҆ктенїа̀ ма́лаѧ въ а҃-й де́нь.
Пѣ́снь тре́тїѧ.
І҆рмо́съ: Прїиди́те пи́во пїе́мъ но́вое, не ѿ ка́мене непло́дна чꙋдодѣ́емое, но нетлѣ́нїѧ и҆сто́чникъ и҆з̾ гро́ба ѡ҆дожди́вша хрⷭ҇та̀, въ не́мже ᲂу҆твержда́емсѧ.
Ны́нѣ всѧ̑ и҆спо́лнишасѧ свѣ́та, нб҃о же и҆ землѧ̀ и҆ преиспѡ́днѧѧ: да пра́зднꙋетъ ᲂу҆́бѡ всѧ̀ тва́рь воста́нїе хрⷭ҇то́во, въ не́мже ᲂу҆твержда́етсѧ.
Вчера̀ спогребо́хсѧ тебѣ̀ хрⷭ҇тѐ, совостаю̀ дне́сь воскрⷭ҇шꙋ тебѣ̀, сраспина́хсѧ тебѣ̀ вчера̀, са́мъ мѧ̀ спросла́ви сп҃се во црⷭ҇твїи твое́мъ.
ѳеофа́нъ На нетлѣ́ннꙋю жи́знь прихождꙋ̀ дне́сь, бл҃гостїю ро́ждшагѡсѧ и҆з̾ тебѐ чⷭ҇таѧ, и҆ всѣ̑мъ концє́мъ свѣ́тъ ѡ҆блиста́вшагѡ.
і҆ѡ́сифъ Бг҃а, є҆го́же родила̀ є҆сѝ пло́тїю, и҆з̾ ме́ртвыхъ, ꙗ҆́коже речѐ, воста́вша ви́дѣвши чⷭ҇таѧ, ликꙋ́й: и҆ сегѡ̀ ꙗ҆́кѡ бг҃а пречⷭ҇таѧ возвелича́й.
Є҆ктенїа̀.
Ѵ҆пакоѝ, гла́съ д҃: Предвари́вшаѧ ᲂу҆́трѡ ꙗ҆̀же ѡ҆ марі́и, и҆ ѡ҆брѣ́тшыѧ ка́мень ѿвале́нъ ѿ гро́ба, слы́шахꙋ ѿ а҆́гг҃ла во свѣ́тѣ присносꙋ́щнѣмъ сꙋ́щагѡ, съ ме́ртвыми что̀ и҆́щете ꙗ҆́кѡ человѣ́ка; ви́дите грѡ́бныѧ пелєны̀, тецы́те и҆ мі́рꙋ проповѣ́дите, ꙗ҆́кѡ воста̀ гдⷭ҇ь, ᲂу҆мертви́вый сме́рть: ꙗ҆́кѡ є҆́сть сн҃ъ бг҃а, сп҃са́ющагѡ ро́дъ человѣ́ческїй.
Пѣ́снь четве́ртаѧ.
І҆рмо́съ: На бж҃е́ственнѣй стра́жи, бг҃оглаго́ливый а҆ввакꙋ́мъ да ста́нетъ съ на́ми, и҆ пока́жетъ свѣтоно́сна а҆́гг҃ла, ꙗ҆́снѡ глаго́люща: дне́сь сп҃се́нїе мі́рꙋ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.
Мꙋ́жескїй ᲂу҆́бѡ по́лъ, ꙗ҆́кѡ разве́рзый дв҃ственнꙋю ᲂу҆тро́бꙋ, ꙗ҆ви́сѧ хрⷭ҇то́съ ꙗ҆́кѡ чл҃вѣ́къ же а҆́гнецъ нарече́сѧ. непоро́ченъ же, ꙗ҆́кѡ невкꙋ́сенъ скве́рны, на́ша па́сха, и҆ ꙗ҆́кѡ бг҃ъ и҆́стиненъ, соверше́нъ рече́сѧ.
Ꙗ҆́кѡ є҆динолѣ́тный а҆́гнецъ, бл҃гослове́нный на́мъ вѣне́цъ хрⷭ҇то́съ, во́лею за всѣ́хъ закла́нъ бы́сть, па́сха чисти́тельнаѧ, и҆ па́ки и҆з̾ гро́ба кра́сное пра́вды на́мъ возсїѧ̀ сл҃нце.
Бг҃оѻте́цъ ᲂу҆́бѡ дв҃дъ, пред̾ сѣ́ннымъ ковче́гомъ скака́ше и҆гра́ѧ: лю́дїе же бж҃їи ст҃і́и ѡ҆́бразѡвъ сбытїѐ зрѧ́ще, весели́мсѧ бж҃е́ственнѣ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.
ѳеофа́нъ Созда́вый а҆да́ма твоего̀ пра́ѻтца чтⷭ҇аѧ, зи́ждетсѧ ѿ тебѐ, и҆ сме́ртное жили́ще разорѝ свое́ю сме́ртїю дне́сь, и҆ ѡ҆зарѝ всѧ̑ бж҃е́ственными блиста́ньми воскрⷭ҇нїѧ.
і҆ѡ́сифъ Є҆го́же родила̀ є҆сѝ хрⷭ҇та̀, прекра́снѡ и҆з̾ ме́ртвыхъ возсїѧ́вша чⷭ҇таѧ зрѧ́щи, до́браѧ и҆ непоро́чнаѧ въ жена́хъ и҆ кра́снаѧ, дне́сь во сп҃се́нїе всѣ́хъ со а҆пⷭ҇лы ра́дꙋющисѧ, того̀ прославлѧ́й.
Пѣ́снь пѧ́таѧ.
І҆рмо́съ: Оу҆́тренюемъ ᲂу҆́треннюю глꙋбокꙋ̀ и҆ вмѣ́стѡ мѵ́ра пѣ́снь принесе́мъ влⷣцѣ, и҆ хрⷭ҇та̀ ᲂу҆́зримъ пра́вды сл҃нце, всѣ̑мъ жи́знь возсїѧ́юща.
Безмѣ́рное твоѐ бл҃гоꙋтро́бїе, а҆́довыми ᲂу҆́зами содержи́мїи зрѧ́ще, къ свѣ́тꙋ и҆дѧ́хꙋ, хрⷭ҇тѐ, весе́лыми нога́ми, па́схꙋ хва́лѧще вѣ́чнꙋю.
Пристꙋ́пимъ свѣщено́снїи, и҆сходѧ́щꙋ хрⷭ҇тꙋ̀ и҆з̾ гро́ба ꙗ҆́кѡ женихꙋ̀, и҆ спра́зднꙋимъ любопра́зднственными чи́нми па́схꙋ бж҃їю спаси́тельнꙋю.
ѳеофа́нъ Просвѣща́етсѧ бж҃е́ственными лꙋча́ми и҆ живоно́сными воскрⷭ҇нїѧ сн҃а твоегѡ̀, бг҃омт҃и пречⷭ҇таѧ, и҆ ра́дости и҆сполнѧ́етсѧ бл҃гочести́выхъ собра́нїе.
і҆ѡ́сифъ Не разве́рзлъ є҆сѝ врата̀ дв҃ства въ воплоще́нїи, гро́ба не разрꙋши́лъ є҆сѝ печа́тей цр҃ю̀ созда́нїѧ, ѿѻнꙋ́дꙋже воскре́сшаго тѧ̀ зрѧ́щи мт҃и ра́довашесѧ.
Пѣ́снь шеста́ѧ.
І҆рмо́съ: Снизше́лъ є҆сѝ въ преиспѡ́днѧѧ землѝ, и҆ сокрꙋши́лъ є҆сѝ верєѝ вѣ̑чныѧ, содержа́щыѧ свѧ́занныѧ, хрⷭ҇тѐ, и҆ тридне́венъ ꙗ҆́кѡ ѿ ки́та і҆ѡ́на, воскрⷭ҇лъ є҆сѝ ѿ гро́ба.
Сохрани́въ цѣ̑ла зна́мєнїѧ, хрⷭ҇тѐ, воскре́слъ є҆сѝ ѿ гро́ба, ключѝ дв҃ы не вреди́вый въ ржⷭ҇твѣ̀ твое́мъ, и҆ ѿве́рзлъ є҆сѝ на́мъ ра̑йскїѧ двє́ри.
Сп҃се мо́й, живо́е же и҆ неже́ртвенное заколе́нїе, ꙗ҆́кѡ бг҃ъ са́мъ себѐ во́лею приве́дъ ѻ҆ц҃ꙋ̀, совоскреси́лъ є҆сѝ всеро́днаго а҆да́ма, воскре́съ ѿ гро́ба.
ѳеофа́нъ Возведе́сѧ дре́вле держи́мое сме́ртїю и҆ тлѣ́нїемъ, воплоти́вшимсѧ ѿ твоегѡ̀ пречⷭ҇тагѡ чре́ва, къ нетлѣ́ннѣй и҆ присносꙋ́щнѣй жи́зни бцⷣе дв҃о.
і҆ѡ́сифъ Сни́де въ преиспѡ́днѧѧ землѝ въ ложесна̀ твоѧ̑, чⷭ҇таѧ, сше́дый, и҆ всели́выйсѧ и҆ воплоти́выйсѧ па́че ᲂу҆ма̀, и҆ воздви́же съ собо́ю а҆да́ма, воскре́съ ѿ гро́ба.
Є҆ктенїа̀.
Конда́къ, гла́съ и҃: А҆́ще и҆ во гро́бъ снизше́лъ є҆сѝ, безсме́ртне, но а҆́довꙋ разрꙋши́лъ є҆сѝ си́лꙋ, и҆ воскрⷭ҇лъ є҆сѝ ꙗ҆́кѡ побѣди́тель, хрⷭ҇тѐ бж҃е, жена́мъ мѷроно́сицамъ вѣща́вый: ра́дꙋйтесѧ, и҆ твои́мъ а҆пⷭ҇лѡмъ ми́ръ да́рꙋѧй, па́дшымъ подаѧ́й воскрⷭ҇нїе.
І҆́косъ: Є҆́же пре́жде со́лнца сл҃нце заше́дшее и҆ногда̀ во гро́бъ, предвари́ша ко ᲂу҆́трꙋ, и҆́щꙋщыѧ ꙗ҆́кѡ днѐ мѷронѡ́сицы дѣ̑вы, и҆ дрꙋга̀ ко дрꙋзѣ́й вопїѧ́хꙋ: ѽ дрꙋги̑ни! прїиди́те, вонѧ́ми пома́жемъ тѣ́ло живоно́сное и҆ погребе́ное, пло́ть воскреси́вшагѡ па́дшаго а҆да́ма лежа́щꙋю во гро́бѣ: и҆́демъ, потщи́мсѧ ꙗ҆́коже волсвѝ, и҆ поклони́мсѧ, и҆ принесе́мъ мѵ̑ра ꙗ҆́кѡ да́ры, не въ пелена́хъ, но въ плащани́цѣ ѡ҆бви́томꙋ, и҆ пла́чимъ, и҆ возопїи́мъ: влⷣко воста́ни, па́дшымъ подаѧ́й воскрⷭ҇нїе.
Та́же чте́нїе.
Посе́мъ, Воскрⷭ҇нїе хрⷭ҇то́во: три́жды.
Воскр҃съ і҆и҃съ ѿ гро́ба, ꙗ҆́коже проречѐ, дадѐ на́мъ живо́тъ вѣ́чный, и҆ ве́лїю млⷭ҇ть. Три́жды.
Пѣ́снь седма́ѧ.
І҆рмо́съ: Ѻ҆́троки ѿ пе́щи и҆зба́вивый, бы́въ чл҃вѣ́къ, стра́ждетъ ꙗ҆́кѡ сме́ртенъ, и҆ стра́стїю сме́ртное въ нетлѣ́нїѧ ѡ҆блачи́тъ бл҃голѣ́пїе, є҆ди́нъ бл҃гослове́нъ ѻ҆тцє́въ бг҃ъ и҆ препросла́вленъ.
Жєны̀ съ мѵ́ры бг҃омꙋ̑дрыѧ въ слѣ́дъ тебѐ теча́хꙋ: є҆го́же ꙗ҆́кѡ ме́ртва со слеза́ми и҆ска́хꙋ, поклони́шасѧ ра́дꙋющыѧсѧ живо́мꙋ бг҃ꙋ, и҆ па́схꙋ та́йнꙋю твои́мъ, хрⷭ҇тѐ ᲂу҆ч҃нкѡ́мъ бл҃говѣсти́ша.
Сме́рти пра́зднꙋемъ ᲂу҆мерщвле́нїе, а҆́дово разрꙋше́нїе, и҆но́гѡ житїѧ̀ вѣ́чнагѡ нача́ло, и҆ и҆гра́юще пое́мъ вино́внаго, є҆ди́наго бл҃гослове́ннаго, ѻ҆тцє́въ бг҃а, и҆ препросла́вленнаго.
Ꙗ҆́кѡ вои́стиннꙋ сщ҃е́ннаѧ и҆ всепра́зднственнаѧ сїѧ̀ сп҃си́тельнаѧ но́щь, и҆ свѣтоза́рнаѧ, свѣтоно́снагѡ днѐ, воста́нїѧ сꙋ́щи провозвѣ́стница, въ не́йже безлѣ́тный свѣ́тъ и҆з̾ гро́ба пло́тски всѣ̑мъ возсїѧ̀.
ѳеофа́нъ Оу҆мертви́въ сн҃ъ тво́й сме́рть, всенепоро́чнаѧ, дне́сь, всѣ̑мъ смє́ртнымъ пребыва́ющїй живо́тъ во вѣ́ки вѣкѡ́въ дарова̀, є҆ди́нъ бл҃гослове́нный ѻ҆тцє́въ бг҃ъ и҆ препросла́вленный.
і҆ѡ́сифъ Всѣ́мъ црⷭ҇твꙋѧй созда́нїемъ, бы́въ чл҃вѣ́къ, всели́сѧ въ твою̀ бг҃обл҃года́тнаѧ ᲂу҆тро́бꙋ, и҆ распѧ́тїе претерпѣ́въ и҆ сме́рть, воскре́се бг҃олѣ́пнѡ, совозста́вивъ на́съ ꙗ҆́кѡ всеси́ленъ.
Пѣ́снь ѻ҆сма́ѧ.
І҆рмо́съ: Се́й нарече́нный и҆ ст҃ы́й де́нь, є҆ди́нъ сꙋббѡ́тъ цр҃ь и҆ гдⷭ҇ь, пра́здникѡвъ пра́здникъ, и҆ торжество̀ є҆́сть торже́ствъ: во́ньже бл҃гослови́мъ хрⷭ҇та̀ во вѣ́ки.
Прїиди́те но́вагѡ вїногра́да рождє́нїѧ, бж҃е́ственнагѡ весе́лїѧ, въ наро́читомъ днѝ вокр҃се́нїѧ, црⷭ҇твїѧ хрⷭ҇то́ва прїѡбщи́мсѧ, пою́ще є҆го̀ ꙗ҆́кѡ бг҃а во вѣ́ки.
Возведѝ ѻ҆́крестъ ѻ҆́чи твоѝ, сїѡ́не, и҆ ви́ждь: се́ бо прїидо́ша къ тебѣ̀, ꙗ҆́кѡ бг҃освѣ̑тлаѧ свѣти̑ла, ѿ за́пада и҆ сѣ́вера и҆ мо́рѧ и҆ восто́ка ча̑да твоѧ̑, въ тебѣ̀ бл҃гословѧ̑щаѧ хрⷭ҇та̀ во вѣ́ки.
Трⷪ҇ченъ: Ѻ҆́ч҃е вседержи́телю, и҆ сло́ве и҆ дш҃е, тремѝ соединѧ́емое во ѵ҆поста́сехъ є҆стество̀ пресꙋ́щественнѣ, и҆ пребж҃е́ственнѣ, въ тѧ̀ крⷭ҇ти́хомсѧ и҆ тѧ̀ бл҃гослови́мъ во всѧ̑ вѣ́ки.
ѳеофа́нъ Прїи́де тобо́ю въ мі́ръ гдⷭ҇ь дв҃о бцⷣе, и҆ чре́во а҆́дово расто́ргъ, смє́ртнымъ на́мъ воскрⷭ҇нїе дарова̀. тѣ́мже бл҃гослови́мъ є҆го̀ во вѣ́ки.
і҆ѡ́сифъ Всю̀ низложи́въ сме́рти держа́вꙋ сн҃ъ тво́й, дв҃о, свои́мъ воскрⷭ҇нїемъ, ꙗ҆́кѡ бг҃ъ крѣ́пкїй совознесѐ на́съ, и҆ ѡ҆божѝ. тѣ́мже воспѣва́емъ є҆го̀ во вѣ́ки.
Припѣ́вы на ѳ҃-й пѣ́сни:
Вели́читъ дꙋша̀ моѧ̀ воскрⷭ҇шаго тридне́внѡ ѿ гро́ба хрⷭ҇та̀ жизнода́вца.
И҆ і҆рмо́съ: Свѣти́сѧ, свѣти́сѧ:
И҆ вторы́й ли́къ пое́тъ то́йже припѣ́въ, и҆ і҆рмо́съ: Та́же пе́рвый ли́къ пое́тъ вторы́й припѣ́въ.
Вели́читъ дꙋша̀ моѧ̀ во́лею страда́вша, и҆ погребе́на, и҆ воскрⷭ҇шаго тридне́внѡ ѿ гро́ба.
И҆ і҆рмо́съ: Свѣти́сѧ:
И҆ вторы́й ли́къ пое́тъ то́йже припѣ́въ и҆ і҆рмо́съ.
Та́же пе́рвый ли́къ пое́тъ тре́тїй припѣ́въ:
Хрⷭ҇то́съ но́ваѧ па́сха, же́ртва жива́ѧ, а҆́гнецъ бж҃їй, взе́млѧй грѣхѝ мі́ра.
И҆ сті́хъ.
И҆ вторы́й ли́къ пое́тъ то́йже припѣ́въ и҆ сті́хъ.
Та́же пе́рвый ли́къ пое́тъ четве́ртый припѣ́въ:
А҆́гг҃лъ вопїѧ́ше бл҃года́тнѣй: чⷭ҇таѧ дв҃о ра́дꙋйсѧ, и҆ па́ки рекꙋ̀, ра́дꙋйсѧ, тво́й сн҃ъ воскр҃се, тридне́венъ ѿ гро́ба, и҆ мє́ртвыѧ воздви́гнꙋвый, лю́дїе весели́тесѧ.
И҆ сті́хъ:
И҆ вторы́й ли́къ пое́тъ то́йже припѣ́въ, и҆ сті́хъ.
И҆ про́чихъ ѻ҆́смь припѣ́вѡвъ припѣва́ютъ по є҆ди́ножды, ко стїхѡ́мъ:
Возбꙋди́лъ є҆сѝ, ᲂу҆снꙋ́въ, мє́ртвыѧ ѿ вѣ́ка, ца́рски рыка́вый, ꙗ҆́кѡ ѿ і҆ꙋ́ды ле́въ.
Магдали́на марі́а притечѐ ко гро́бꙋ, и҆ хрⷭ҇та̀ ви́дѣвши, ꙗ҆́кѡ вертогра́дарѧ вопроша́ше.
А҆́гг҃лъ ѡ҆блиста́ѧй жена́мъ вопїѧ́ше: преста́ните ѿ сле́зъ, ꙗ҆́кѡ хрⷭ҇то́съ воскр҃се.
Хрⷭ҇то́съ воскр҃се, сме́рть попра́вый, и҆ мє́ртвыѧ воздви́гнꙋвый, лю́дїе весели́тесѧ.
Дне́сь всѧ́ка тва́рь весели́тсѧ и҆ ра́дꙋетсѧ: ꙗ҆́кѡ хрⷭ҇то́съ воскр҃се и҆ а҆́дъ плѣни́сѧ.
Дне́сь влⷣка плѣнѝ а҆́да, воздви́гнꙋвый ю҆́зники, ꙗ҆̀же ѿ вѣ́ка и҆мѧ́ше, лю́тѣ ѡ҆держи̑мыѧ.
Вели́читъ дꙋша̀ моѧ̀ трїѷпоста́снагѡ, и҆ нераздѣ́льнагѡ бж҃ества̀ держа́вꙋ.
Ра́дꙋйсѧ дв҃о, ра́дꙋйсѧ, ра́дꙋйсѧ бл҃гослове́ннаѧ, ра́дꙋйсѧ препросла́вленнаѧ: тво́й бо сн҃ъ воскр҃се, тридне́венъ ѿ гро́ба.
Послѣди́ же пе́рвый ли́къ пое́тъ па́ки пе́рвый припѣ́въ и҆ і҆рмо́съ. Посе́мъ вторы́й ли́къ пое́тъ вторы́й припѣ́въ и҆ і҆рмо́съ. Та́же ѻ҆́ба ли̑ка соше́дшесѧ вкꙋ́пѣ, пою́тъ і҆рмо́съ и҆ тропа́рь: Хрⷭ҇то́съ воскр҃се: три́жды.
Пѣ́снь девѧ́таѧ.
І҆рмо́съ: Свѣти́сѧ свѣти́сѧ но́вый і҆ерⷭ҇ли́ме, сла́ва бо гдⷭ҇нѧ на тебѣ̀ возсїѧ̀, ликꙋ́й ны́нѣ, и҆ весели́сѧ сїѡ́не: ты́ же чⷭ҇таѧ красꙋ́йсѧ бцⷣе, ѡ҆ воста́нїи ржⷭ҇тва̀ твоегѡ̀.
Ѽ бж҃е́ственнагѡ, ѽ любе́знагѡ, ѽ сладча́йшагѡ твоегѡ̀ гла́са! съ на́ми бо нело́жнѡ ѡ҆бѣща́лсѧ є҆сѝ бы́ти до сконча́нїѧ вѣ́ка, хрⷭ҇тѐ: є҆го́же вѣ́рнїи ᲂу҆твержде́нїе наде́жди и҆мꙋ́ще, ра́дꙋемсѧ.
Ѽ па́сха ве́лїѧ, и҆ сщ҃е́ннѣйшаѧ хрⷭ҇тѐ! ѽ мꙋ́дросте, и҆ сло́ве бж҃їй, и҆ си́ло! подава́й на́мъ и҆́стѣе тебѐ причаща́тисѧ, въ невече́рнѣмъ днѝ црⷭ҇твїѧ твоегѡ̀.
ѳеофа́нъ Согла́снѡ дв҃о тебѐ бл҃жи́мъ вѣ́рнїи: ра́дꙋйсѧ две́ре гдⷭ҇нѧ, ра́дꙋйсѧ гра́де ѡ҆дꙋшевле́нный: ра́дꙋйсѧ, є҆ѧ́же ра́ди на́мъ ны́нѣ возсїѧ̀ свѣ́тъ, и҆з̾ тебѐ рожде́ннагѡ и҆з̾ ме́ртвыхъ воскрⷭ҇нїѧ.
і҆ѡ́сифъ Весели́сѧ и҆ ра́дꙋйсѧ бж҃е́ственнаѧ две́ре свѣ́та: заше́дый бо і҆и҃съ во гро́бъ, возсїѧ̀ просїѧ́въ со́лнца свѣтлѣ́е, и҆ вѣ̑рныѧ всѧ̑ ѡ҆зари́въ, бг҃ора́дованнаѧ влⷣчце.
Є҆ѯапостїла́рїй. Самогла́сенъ:
Пло́тїю ᲂу҆снꙋ́въ ꙗ҆́кѡ ме́ртвъ, цр҃ю̀ и҆ гдⷭ҇и, тридне́венъ воскре́слъ є҆сѝ, а҆да́ма воздви́глъ ѿ тлѝ, и҆ ᲂу҆праздни́въ сме́рть, па́сха нетлѣ́нїѧ мі́ра сп҃се́нїе. [Три́жды.]
И҆ по стїхи́рахъ хвали́тныхъ воскрⷭ҇ныхъ пое́мъ стїхи̑ры па́схи, гла́съ є҃.
Сті́хъ: Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀.
Па́сха сщ҃е́ннаѧ на́мъ дне́сь показа́сѧ, па́сха но́ва ст҃а́ѧ, па́сха та́инственнаѧ, па́сха всечⷭ҇тна́ѧ, па́сха хрⷭ҇то́съ и҆зба́витель: па́сха непоро́чнаѧ, па́сха вели́каѧ, па́сха вѣ́рныхъ: па́сха двє́ри ра̑йскїѧ на́мъ ѿверза́ющаѧ: па́сха всѣ́хъ ѡ҆свѧща́ющаѧ вѣ́рныхъ.
Сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ.
Прїиди́те ѿ видѣ́нїѧ жєны̀ бл҃говѣ̑стницы, и҆ сїѡ́нꙋ рцы́те: прїимѝ ѿ на́съ ра́дости бл҃говѣ́щенїѧ, воскрⷭ҇нїѧ хрⷭ҇то́ва: красꙋ́йсѧ, ликꙋ́й, и҆ ра́дꙋйсѧ і҆ерⷭ҇ли́ме, цр҃ѧ̀ хрⷭ҇та̀ ᲂу҆зрѣ́въ и҆з̾ гро́ба, ꙗ҆́кѡ жениха̀ происходѧ́ща.
Сті́хъ: Та́кѡ да поги́бнꙋтъ грѣ̑шницы ѿ лица̀ бж҃їѧ, а҆ првⷣницы да возвеселѧ́тсѧ.
Мѷронѡ́сицы жєны̀, ᲂу҆́трꙋ глꙋбокꙋ̀, предста́вшѧ гро́бꙋ живода́вца, ѡ҆брѣто́ша а҆́гг҃ла на ка́мени сѣдѧ́ща, и҆ то́й провѣща́въ и҆̀мъ, си́це глаго́лаше: что̀ и҆́щете жива́гѡ съ ме́ртвыми; что̀ пла́чете нетлѣ́ннагѡ во тлѝ; ше́дше проповѣ́дите ᲂу҆ч҃нкѡ́мъ є҆гѡ̀.
Сті́хъ: Се́й де́нь, є҆го́же сотворѝ гдⷭ҇ь, возра́дꙋемсѧ и҆ возвесели́мсѧ во́нь.
Па́сха кра́снаѧ, па́сха, гдⷭ҇нѧ па́сха, па́сха всечⷭ҇тна́ѧ на́мъ возсїѧ̀: па́сха, ра́достїю дрꙋ́гъ дрꙋ́га ѡ҆б̾и́мемъ. ѽ па́сха, и҆збавле́нїе ско́рби! и҆́бо и҆з̾ гро́ба дне́сь, ꙗ҆́кѡ ѿ черто́га возсїѧ́въ хрⷭ҇то́съ, жєны̀ ра́дости и҆спо́лни, глаго́лѧ: проповѣ́дите а҆пⷭ҇лѡмъ.
Сла́ва, и҆ ны́нѣ:
Воскрⷭ҇нїѧ де́нь, и҆ просвѣти́мсѧ торжество́мъ, и҆ дрꙋ́гъ дрꙋ́га ѡ҆б̾и́мемъ. рце́мъ, бра́тїе! и҆ ненави́дѧщымъ на́съ, прости́мъ всѧ̑ воскрⷭ҇нїемъ, и҆ та́кѡ возопїи́мъ: хрⷭ҇то́съ воскр҃се и҆з̾ ме́ртвыхъ, сме́ртїю сме́рть попра́въ и҆ сꙋ́щымъ во гробѣ́хъ живо́тъ дарова́въ.
Та́же: Хрⷭ҇то́съ воскр҃се: три́жды.
И҆ пое́мъ, до́ндеже бра́тїѧ цѣлꙋ́ютъ дрꙋ́гъ дрꙋ́га. Пото́мъ чте́тсѧ сло́во ѡ҆гласи́тельное ст҃а́гѡ і҆ѡа́нна златоꙋ́стагѡ.
Та́же тропа́рь, гла́съ и҃: Оу҆́стъ твои́хъ ꙗ҆́коже свѣ́тлость ѻ҆гнѧ̀: Посе́мъ є҆ктенїа̀, и҆ возгла́съ, и҆ про́чее. Та́же: Оу҆твердѝ, бж҃е: И҆ вмѣ́стѡ, Сла́ва тебѣ̀ хрⷭ҇тѐ бж҃е, пое́тъ і҆ере́й: Хрⷭ҇то́съ воскр҃се: Мы́ же: И҆ сꙋ́щымъ во гробѣ́хъ живо́тъ дарова́въ. И҆ а҆́бїе ѿпꙋ́стъ.
Та́же крⷭ҇тъ возвыша́ѧ, глаго́летъ: Хрⷭ҇то́съ воскр҃се. три́жды. И҆ мы̀ ѿвѣща́емъ: Вои́стиннꙋ воскр҃се: три́жды. Та́же пое́мъ: Хрⷭ҇то́съ воскр҃се: три́жды, ве́сь тропа́рь. И҆ пое́мъ: И҆ на́мъ дарова̀ живо́тъ вѣ́чный, покланѧ́емсѧ є҆гѡ̀ тридне́вномꙋ воскрⷭ҇нїю.
И҆ ча́съ пе́рвый.
Пое́тсѧ же си́це: Хрⷭ҇то́съ воскр҃се: три́жды.
Воскрⷭ҇нїе хрⷭ҇то́во ви́дѣвше, поклони́мсѧ ст҃о́мꙋ гдⷭ҇ꙋ і҆и҃сꙋ, є҆ди́номꙋ безгрѣ́шномꙋ. крⷭ҇тꙋ̀ твоемꙋ̀ покланѧ́емсѧ, хрⷭ҇тѐ, и҆ ст҃о́е воскрⷭ҇нїе твоѐ пое́мъ и҆ сла́вимъ: ты́ бо є҆сѝ бг҃ъ на́шъ, ра́звѣ тебѐ и҆но́гѡ не зна́емъ, и҆́мѧ твоѐ и҆менꙋ́емъ. прїиди́те всѝ вѣ́рнїи, поклони́мсѧ ст҃о́мꙋ хрⷭ҇то́вꙋ воскрⷭ҇нїю: се́ бо прїи́де крⷭ҇то́мъ ра́дость всемꙋ̀ мі́рꙋ. всегда̀ бл҃гословѧ́ще гдⷭ҇а, пое́мъ воскрⷭ҇нїе є҆гѡ̀: распѧ́тїе бо претерпѣ́въ, сме́ртїю сме́рть разрꙋшѝ. [Три́жды.]
Предвари́вшыѧ ᲂу҆́трѡ ꙗ҆̀же ѡ҆ мр҃і́и, и҆ ѡ҆брѣ́тшыѧ ка́мень ѿвале́нъ ѿ гро́ба, слы́шахꙋ ѿ а҆́гг҃ла: во свѣ́тѣ присносꙋ́щнѣмъ сꙋ́щаго, съ ме́ртвыми что̀ и҆́щете ꙗ҆́кѡ человѣ́ка: ви́дите грѡ́бныѧ пелєны̀: тецы́те и҆ мі́рꙋ проповѣ́дите, ꙗ҆́кѡ воста̀ гдⷭ҇ь, ᲂу҆мертви́вый сме́рть, ꙗ҆́кѡ є҆́сть сн҃ъ бг҃а, сп҃са́ющагѡ ро́дъ человѣ́ческїй. [Є҆ди́ножды.]
А҆́ще и҆ во гро́бъ снизше́лъ є҆сѝ безсме́ртне, но а҆́довꙋ разрꙋши́лъ є҆сѝ си́лꙋ, и҆ воскрⷭ҇лъ є҆сѝ ꙗ҆́кѡ побѣди́тель, хрⷭ҇тѐ бж҃е, жена́мъ мѷроно́сицамъ вѣща́вый: ра́дꙋйтесѧ, и҆ твои̑мъ а҆пⷭ҇лѡмъ ми́ръ да́рꙋѧй, па́дшымъ подаѧ́й воскрⷭ҇нїе.
Во гро́бѣ пло́тски, во а҆́дѣ же съ дꙋше́ю ꙗ҆́кѡ бг҃ъ, въ раи́ же съ разбо́йникомъ, и҆ на прⷭ҇то́лѣ бы́лъ є҆сѝ, хрⷭ҇тѐ, со ѻ҆ц҃е́мъ и҆ дх҃омъ, всѧ̑ и҆сполнѧ́ѧй неѡпи́санный.
Сла́ва: Ꙗ҆́кѡ живоно́сецъ, ꙗ҆́кѡ раѧ̀ краснѣ́йшїй, вои́стиннꙋ и҆ черто́га всѧ́кагѡ црⷭ҇кагѡ показа́сѧ свѣтлѣ́йшїй, хрⷭ҇тѐ, гро́бъ тво́й, и҆сто́чникъ на́шегѡ воскрⷭ҇нїѧ.
И҆ ны́нѣ: Вы́шнѧгѡ ѡ҆сщ҃е́нное бж҃е́ственное селе́нїе ра́дꙋйсѧ, тобо́ю бо даде́сѧ ра́дость бцⷣе, зовꙋ́щымъ: бл҃гослове́нна ты̀ въ жена́хъ є҆сѝ всенепоро́чнаѧ влⷣчце.
Гдⷭ҇и поми́лꙋй, м҃. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: І҆ере́й: Мл҃твами ст҃ы́хъ ѻ҆тє́цъ: Мы́ же: А҆ми́нь. И҆ Хрⷭ҇то́съ воскр҃се: три́жды. Посе́мъ, Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.
И҆ ѿпꙋ́стъ а҃-гѡ часа̀.
Си́це же пое́тсѧ и҆ г҃-й ча́съ, и҆ ѕ҃-й и҆ ѳ҃-й, кромѣ̀ ѿпꙋ́ста, занѐ быва́етъ вкꙋ́пѣ.
Та́кожде пое́мъ за повече́рїе, и҆ за полꙋ́нощницꙋ. То́чїю по Чⷭ҇тнѣ́йшꙋю: и҆ по Мл҃твами ст҃ы́хъ ѻ҆тє́цъ: на кі́йждо ѿпꙋ́стъ глаго́лемъ: Хрⷭ҇то́съ воскр҃се: три́жды. Та́кѡ твори́мъ до недѣ́ли ст҃а́гѡ ѳѡмы̀. А҆́ще ли не бꙋ́детъ когда̀ по нꙋ́ждѣ лїтꙋргі́и и҆ за Бл҃гословѝ дꙋшѐ моѧ̀ гдⷭ҇а: Хрⷭ҇то́съ воскр҃се: три́жды. Воскрⷭ҇нїе хрⷭ҇то́во: є҆ди́ножды. Предвари́вшыѧ ᲂу҆́тро: Сла́ва: А҆́ще и҆ во гро́бъ: И҆ ны́нѣ: Є҆диноро́дный сн҃е: И҆ бл҃жє́нна ѿ канѡ́на, а҆по́столъ и҆ є҆ѵⷢ҇лїе днѐ. Та́же, Помѧнѝ на́съ гдⷭ҇и: Ли́къ нбⷭ҇ный: Вѣ́рꙋю во є҆ди́наго бг҃а: Ѡ҆сла́би, ѡ҆ста́ви: И҆ по Ѻ҆́ч҃е на́шъ: Конда́къ: А҆́ще и҆ во гро́бъ: Сла́ва, и҆ ны́нѣ: Вы́шнѧгѡ ѡ҆сщ҃е́нное: Гдⷭ҇и поми́лꙋй, м҃. и҆ Є҆ди́нъ ст҃ъ: Вмѣ́стѡ, Бꙋ́ди и҆́мѧ гдⷭ҇не: Хрⷭ҇то́съ воскр҃се: три́жды. и҆ ѱало́мъ: Бл҃гословлю̀ гдⷭ҇а: коне́цъ: не лиша́тсѧ всѧ́кагѡ бл҃га:
И҆ ѿпꙋ́стъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.