Оу҆ка́зъ, ка́кѡ глаго́лати пѣ̑сни и҆ канѡ́ны, во ст҃ꙋ́ю и҆ вели́кꙋю четыредесѧ́тницꙋ
Во ст҃ꙋ́ю и҆ вели́кꙋю четыредесѧ́тницꙋ стїхосло́вѧтсѧ пѣ̑сни си́це.
По возгла́сѣ сщ҃е́нника, Млⷭ҇тїю и҆ щедро́тами: начина́емъ: Гдⷭ҇еви пое́мъ: на гла́съ канѡ́на мине́и днѐ ст҃а́гѡ, и҆ глаго́лютъ стїхѝ пѣ́сней ско́рѡ, кі́йждо ли́къ сво́й сті́хъ, до́ндеже дости́гнꙋтъ до Ѡ҆гꙋстѣ́ша: и҆ ѿ тогѡ̀ начина́ютъ стїхѝ держа́ти на д҃і. И҆ пое́мъ мине́и, со і҆рмосо́мъ на ѕ҃: пое́мъ же си́це. Пе́рвый ли́къ глаго́летъ сті́хъ: Ѡ҆гꙋстѣ́ша: и҆ пое́тъ і҆рмо́съ. Вторы́й же ли́къ глаго́летъ вторы́й сті́хъ: Речѐ вра́гъ: и҆ по не́мъ тропа́рь канѡ́на. И҆ порѧ́дꙋ стїхѝ, по ликѡ́мъ, до Тогда̀ потща́шасѧ: Ѿ стїха́ же, Тогда̀ потща́шасѧ: начина́емъ трипѣ́снецъ господи́на і҆ѡ́сифа, на д҃. На Гдⷭ҇ь же црⷭ҇твꙋѧй: пое́мъ дрꙋгі́й трипѣ́снецъ, господи́на ѳео́дѡра стꙋді́та. И҆ пое́тъ є҆ди́нъ ли́къ тропа́рь. Дрꙋгі́й же ли́къ вторы́й сті́хъ, и҆ тропа́рь. Посе́мъ соедини́вшымсѧ двꙋ́мъ ликѡ́мъ, пою́тъ, Сла́ва: трⷪ҇ченъ, вы́шшимъ гла́сомъ: И҆ ны́нѣ: бг҃оро́диченъ. Та́же глаго́лемъ высоча́йшимъ гла́сомъ: Сла́ва тебѣ̀ бж҃е на́шъ, сла́ва тебѣ̀. И҆ пое́мъ и҆ны́й тропа́рь господи́на ѳео́дѡра. Поне́же бо по пѧтѝ тропаре́й и҆́мать пѣ́снь. Послѣди́ же глаго́лемъ катава́сїю, і҆рмо́съ втора́гѡ канѡ́на. Си́це пое́тсѧ и-҃ѧ и҆ ѳ҃-ѧ пѣ̑сни. Тре́тїю же пѣ́снь пое́мъ си́це. Глаго́летъ пе́рвый ли́къ сті́хъ: Гдⷭ҇ь взы́де на нб҃са̀: тропа́рь канѡ́на мине́и. Вторы́й ли́къ, сті́хъ: И҆ да́стъ крѣ́пость царю̀: и҆ вторы́й тропа́рь канѡ́на мине́и. Та́же, Сла́ва, и҆ ны́нѣ: съ тропарѝ канѡ́на. И҆ пое́тъ пе́рвый ли́къ і҆рмо́съ мине́и тре́тїѧ пѣ́сни, послѣдѝ канѡ́на. Си́мъ ѡ҆́бразомъ пое́мъ и҆ ѕ҃-ю пѣ́снь. Четве́ртꙋю же и҆ пѧ́тꙋю, и҆ седмꙋ́ю пѣ̑сни си́це пое́мъ: Глаго́ли пе́рвѣе і҆рмо́съ канѡ́на мине́и. Та́же конє́чныѧ два̀ стїха̑ пѣ́сни пое́мъ къ тропарє́мъ канѡ́на. и҆ Сла́ва, и҆ ны́нѣ: І҆рмосо́мъ же не покрыва́емъ пѣ̑сни, занѐ і҆рмо́съ глаго́летсѧ пре́жде пѣ́сни. Пою́тсѧ же і҆рмосы̀ мине́и по канѡ́нѣ, то́кмѡ по г҃-й и҆ ѕ҃-й пѣ́снехъ. Зане́же ᲂу҆ тѣ́хъ пѣ́сней пе́рвѣе і҆рмо́съ не пое́тсѧ. Въ про́чыѧ же дни̑ седми́цы, кромѣ̀ понедѣ́льника, та́кѡ пое́тсѧ и҆ пе́рваѧ пѣ́снь, ꙗ҆́коже ᲂу҆каза́сѧ ѡ҆ д҃-й и҆ є҃-й пѣ́снехъ. А҆ въ ни́хже пѣ́снехъ бꙋ́детъ трипѣ́снецъ, пое́тсѧ послѣдѝ канѡ́на катава́сїа, і҆рмо́съ трипѣ́снца, ꙗ҆́коже вы́ше и҆з̾ѧви́сѧ.
Вѣ́домо же бꙋ́ди, ꙗ҆́кѡ ѻ҆смогла́сникъ не пое́тсѧ во всю̀ ст҃ꙋ́ю м҃-цꙋ, кромѣ̀ недѣ́ль. Пое́тсѧ же то́чїю мине́а, и҆ трипѣ́снецъ. А҆ въ ни́хже пѣ́снехъ нѣ́сть трипѣ́снца, пое́тсѧ то́кмѡ мине́а.
Пѣ́снь пе́рваѧ:
сⷯ а҃ Пое́мъ гдⷭ҇еви, сла́внѡ бо просла́висѧ: конѧ̀ и҆ вса́дника ве́рже въ мо́ре. в҃ Помо́щникъ и҆ покрови́тель бы́сть мнѣ̀ во сп҃се́нїе: се́й мо́й бг҃ъ, и҆ просла́влю є҆го̀: бг҃ъ ѻ҆ц҃а̀ моегѡ̀, и҆ вознесꙋ̀ є҆го̀: г҃ Гдⷭ҇ь сокрꙋша́ѧй бра̑ни, гдⷭ҇ь и҆́мѧ є҆мꙋ̀, колесни̑цы фараѡ́новы и҆ си́лꙋ є҆гѡ̀ ве́рже въ мо́ре. д҃ И҆збра̑нныѧ вса́дники трїста́ты потопѝ въ чермнѣ́мъ мо́ри. є҃ Пꙋчи́ною покры̀ и҆́хъ, погрѧзо́ша во глꙋбинѣ̀ ꙗ҆́кѡ ка́мень. ѕ҃ Десни́ца твоѧ̀ гдⷭ҇и, просла́висѧ въ крѣ́пости, десна́ѧ твоѧ̀ рꙋка̀ гдⷭ҇и сокрꙋшѝ врагѝ: и҆ мно́жествомъ сла́вы твоеѧ̀ сте́рлъ є҆сѝ сопроти́вныхъ. з҃ Посла́лъ є҆сѝ гнѣ́въ тво́й, поѧдѐ ѧ҆̀ ꙗ҆́кѡ сте́блїе, и҆ дх҃омъ ꙗ҆́рости твоеѧ̀ разстꙋпи́сѧ вода̀.
На д҃і: и҃ Ѡ҆гꙋстѣ́ша ꙗ҆́кѡ стѣна̀ во́ды, ѡ҆гꙋстѣ́ша и҆ во́лны посредѣ̀ мо́рѧ. ѳ҃ Речѐ вра́гъ: гна́въ пости́гнꙋ, раздѣлю̀ коры́сть, и҆спо́лню дꙋ́шꙋ мою̀, ᲂу҆бїю̀ мече́мъ мои́мъ, госпо́дствовати бꙋ́детъ рꙋка̀ моѧ̀. і҃ Посла́лъ є҆сѝ дх҃ъ тво́й, покры̀ ѧ҆̀ мо́ре, погрѧзо́ша ꙗ҆́кѡ ѻ҆́лово въ водѣ̀ ѕѣ́льнѣ. а҃і Кто̀ подо́бенъ тебѣ̀ въ бозѣ́хъ гдⷭ҇и, кто̀ подо́бенъ тебѣ̀; просла́вленъ во ст҃ы́хъ, ди́венъ сла́внѡ творѧ́й чꙋдеса̀. в҃і Просте́рлъ є҆сѝ десни́цꙋ твою̀, пожрѐ ѧ҆̀ землѧ̀. наста́вилъ є҆сѝ пра́вдою твое́ю лю́ди твоѧ̑ сїѧ̑, ꙗ҆̀же и҆зба́вилъ є҆сѝ. г҃і Оу҆тѣ́шилъ є҆сѝ крѣ́постїю твое́ю во ѻ҆би́тель ст҃ꙋ́ю твою̀. слы́шаша ꙗ҆зы́цы, и҆ прогнѣ́вашасѧ, болѣ̑зни прїѧ́ша живꙋ́щїи въ фѷлїсті́мѣ.
На и҃: д҃і Тогда̀ потща́шасѧ влады̑ки є҆дѡ́мстїи, и҆ кнѧзе́й мѡаві́тскихъ, прїѧ́тъ ѧ҆̀ тре́петъ, раста́ѧша всѝ живꙋ́щїи въ ханаа́нѣ. є҃і Нападе́тъ на нѧ̀ стра́хъ и҆ тре́петъ, вели́чїемъ мы́шцы твоеѧ̀ да ѡ҆каменѧ́тсѧ. ѕ҃і До́ндеже про́йдꙋтъ лю́дїе твоѝ гдⷭ҇и, до́ндеже про́йдꙋтъ лю́дїе твоѝ сі́и, ꙗ҆̀же стѧжа́лъ є҆сѝ. з҃і Вве́дъ насадѝ ѧ҆̀ въ го́рꙋ достоѧ́нїѧ твоегѡ̀, въ гото́вое жили́ще твоѐ, є҆́же содѣ́лалъ є҆сѝ гдⷭ҇и, ст҃ы́ню, ю҆́же ᲂу҆гото́вастѣ рꙋ́цѣ твоѝ.
На д҃: и҃і Гдⷭ҇ь црⷭ҇твꙋѧй вѣ́ки, и҆ на вѣ́къ, и҆ є҆щѐ, є҆гда̀ вни́де ко́нь фараѡ́новъ съ колесни́цами и҆ вса́дники въ мо́ре. ѳ҃і И҆ наведѐ на нѧ̀ гдⷭ҇ь во́дꙋ морскꙋ́ю, сы́нове же і҆и҃лєвы проидо́ша сꙋ́шею посредѣ̀ мо́рѧ.
Сла́ва: И҆ ны́нѣ:
Подоба́етъ вѣ́дати, ꙗ҆́кѡ втора́ѧ пѣ́снь никогда́же стїхосло́витсѧ, то́кмѡ во є҆ди́ной вели́кой м҃-цѣ, во вто́рникъ, стїхосло́вимъ же ю҆̀ да́же до конца̀, къ тропарє́мъ же глаго́лемъ припѣ́въ: Сла́ва тебѣ̀ бж҃е на́шъ, сла́ва тебѣ̀: [Є҆ди́номꙋ коемꙋ́ждо.]
Пѣ́снь втора́ѧ.
сⷯ а҃ Вонмѝ нб҃о, и҆ возглаго́лю, и҆ да слы́шитъ землѧ̀ глаго́лы ᲂу҆́стъ мои́хъ. в҃ Да ча́етъ ꙗ҆́кѡ до́ждь вѣща́нїе моѐ, да сни́дꙋтъ ꙗ҆́кѡ роса̀ глаго́ли моѝ. г҃ Ꙗ҆́кѡ тꙋ́ча на тро́скотъ, и҆ ꙗ҆́кѡ и҆́ней на сѣ́но: ꙗ҆́кѡ и҆́мѧ гдⷭ҇не призва́хъ, дади́те вели́чїе бг҃ꙋ на́шемꙋ. д҃ Бг҃ъ, и҆́стинна дѣла̀ є҆гѡ̀, и҆ всѝ пꙋтїѐ є҆гѡ̀ сꙋ́дъ: є҃ Бг҃ъ вѣ́ренъ, и҆ нѣ́сть непра́вды въ не́мъ, првⷣнъ и҆ прпⷣбенъ гдⷭ҇ь. ѕ҃ Согрѣши́ша, не тогѡ̀ ча̑да порѡ́чнаѧ: ро́де стропти́вый и҆ развраще́нный, сїѧ̑ ли гдⷭ҇еви воздаетѐ: з҃ Сі́и лю́дїе бꙋ́и и҆ не мꙋ́дри: не са́мъ ли се́й ѻ҆ц҃ъ тво́й стѧжа́ тѧ, и҆ сотвори́ тѧ, и҆ созда́ тѧ; и҃ Помѧни́те дни̑ вѣ̑чныѧ, разꙋмѣ́йте лѣ̑та ро́да родѡ́въ. ѳ҃ Вопросѝ ѻ҆тца̀ твоего̀, и҆ возвѣсти́тъ тебѣ̀: ста́рцы твоѧ̑, и҆ рекꙋ́тъ тѝ. і҃ Є҆гда̀ раздѣлѧ́ше вы́шнїй ꙗ҆зы́ки, ꙗ҆́коже разсѣ́ѧ сы́ны а҆да́мѡвы: а҃і Поста́ви предѣ́лы ꙗ҆зы́кѡвъ по числꙋ̀ а҆́гг҃лъ бж҃їихъ. и҆ бы́сть ча́сть гдⷭ҇нѧ, лю́дїе є҆гѡ̀ і҆а́кѡвъ, ᲂу҆́же наслѣ́дїѧ є҆гѡ̀ і҆и҃ль. в҃і Оу҆довлѝ є҆го̀ въ пꙋсты́ни въ жа́жди зно́ѧ въ безво́днѣ. Ѡ҆бы́де є҆го̀, и҆ наказа̀ є҆го̀, и҆ сохранѝ є҆го̀ ꙗ҆́кѡ зѣ́ницꙋ ѻ҆́ка. д҃і Ꙗ҆́кѡ ѻ҆ре́лъ покры̀ гнѣздо̀ своѐ, и҆ на птенцы̀ своѧ̑ возжелѣ̀. Просте́ръ крилѣ̑ своѝ, и҆ прїѧ́тъ ѧ҆̀, и҆ под̾ѧ́тъ ѧ҆̀ на ра́мꙋ своє́ю. ѕ҃і Гдⷭ҇ь є҆ди́нъ вожда́ше ѧ҆̀, и҆ не бѣ̀ съ ни́ми бо́гъ чꙋ́ждь. з҃і Возведѐ ѧ҆̀ на си́лꙋ землѝ, насы́ти ѧ҆̀ жи́тъ се́льныхъ. и҃і Сса́ша ме́дъ и҆з̾ ка́мене, и҆ є҆ле́й ѿ тве́рда ка́мене. ѳ҃і Ма́сло кра́вїе, и҆ млеко̀ ѻ҆́вчее съ тꙋ́комъ а҆́гнчимъ и҆ ѻ҆́внимъ, сынѡ́въ ю҆́нчихъ и҆ ко́злихъ, съ тꙋ́комъ пшени́чнымъ, и҆ кро́вь гро́здовꙋ пїѧ́хꙋ вїно̀. к҃ И҆ ꙗ҆дѐ і҆а́кѡвъ и҆ насы́тисѧ, и҆ ѿве́ржесѧ возлю́бленный. к҃а Оу҆ты̀, ᲂу҆толстѣ̀, разширѣ̀, и҆ ѡ҆ста́ви бг҃а сотво́ршаго є҆го̀, ѿстꙋпѝ ѿ бг҃а сп҃са своегѡ̀. к҃в Прогнѣ́ваша мѧ̀ ѡ҆ чꙋжи́хъ, и҆ въ ме́рзостехъ свои́хъ преѡгорчи́ша мѧ̀. к҃г Пожро́ша бѣсовѡ́мъ, а҆ не бг҃ꙋ, богѡ́мъ, и҆́хже не вѣ́дѣша: но́ви и҆ секра́ти прїидо́ша, и҆́хже не вѣ́дѣша ѻ҆тцы̀ и҆́хъ. к҃д Бг҃а ро́ждшаго тѧ̀ ѡ҆ста́вилъ є҆сѝ и҆ забы́лъ є҆сѝ бг҃а пита́ющаго тѧ̀. к҃є И҆ ви́дѣ гдⷭ҇ь, и҆ возревнова̀, и҆ раздражи́сѧ за гнѣ́въ сынѡ́въ и҆́хъ и҆ дще́рей. к҃ѕ И҆ речѐ: ѿвращꙋ̀ лицѐ моѐ ѿ ни́хъ, и҆ покажꙋ̀, что̀ бꙋ́детъ и҆̀мъ напослѣ́докъ. к҃з Ꙗ҆́кѡ ро́дъ развраще́нъ є҆́сть сы́нове, и҆̀мже нѣ́сть вѣ́ры въ ни́хъ. к҃и Ті́и раздражи́ша мѧ̀ не ѡ҆ бз҃ѣ прогнѣ́ваша мѧ̀ во і҆́дѡлѣхъ свои́хъ. к҃ѳ И҆ а҆́зъ раздражꙋ̀ ѧ҆̀ не ѡ҆ ꙗ҆зы́цѣ, ѡ҆ ꙗ҆зы́цѣ же неразꙋ́мливѣ прогнѣ́ваю ѧ҆̀. л҃ Ꙗ҆́кѡ ѻ҆́гнь возгори́тсѧ ѿ ꙗ҆́рости моеѧ̀, разжже́тсѧ до а҆́да преиспо́днѧгѡ. л҃а Снѣ́сть зе́млю и҆ жи̑та є҆ѧ̀, попали́тъ ѡ҆снова̑нїѧ го́ръ. л҃в Соберꙋ̀ на ни́хъ ѕла̑ѧ, и҆ стрѣ́лы моѧ̑ сконча́ю въ ни́хъ. л҃г Та́юще гла́домъ, и҆ снѣ́дь пти́цъ и҆ го́рбъ неисцѣ́ленъ. л҃д Зꙋ́бы ѕвѣре́й послю̀ въ нѧ̀, съ ꙗ҆́ростїю пресмыка́ющихсѧ по землѝ. л҃є Ѿвнѣ̀ безча́дитъ ѧ҆̀ ме́чь, и҆ ѿ хра́мѡвъ и҆́хъ стра́хъ: ю҆́ноша съ дѣ́вою, ссꙋ́щее съ соверше́ннымъ ста́рцемъ. л҃ѕ Рѣ́хъ: разсѣ́ю ѧ҆̀, ᲂу҆ста́влю же ѿ человѣ̑къ па́мѧть и҆́хъ. л҃з А҆́ще не за гнѣ́въ врагѡ́въ, да не долголѣ́тствꙋютъ, и҆ да не налѧ́гꙋтъ сꙋпоста́ти. л҃и Да не рекꙋ́тъ: рꙋка̀ на́ша высока̀, и҆ не гдⷭ҇ь сотворѝ сїѧ̑ всѧ̑. л҃ѳ Ꙗ҆́кѡ ꙗ҆зы́къ погꙋби́вый совѣ́тъ є҆́сть, и҆ нѣ́сть въ ни́хъ хꙋдо́жества. м҃ Не смы́слиша разꙋмѣ́ти сїѧ̑ всѧ̑, да прїи́мꙋтъ во грѧдꙋ́щее лѣ́то. м҃а Ка́кѡ пожене́тъ є҆ди́нъ ты́сѧщы, и҆ два̀ дви́гнета тьмы̀: м҃в А҆́ще не бг҃ъ ѿда́стъ тѧ̀, и҆ гдⷭ҇ь преда́стъ ѧ҆̀; м҃г Не сꙋ́ть бо бо́зи и҆́хъ, ꙗ҆́кѡ бг҃ъ на́шъ: врази́ же на́ши неразꙋ́мливи. м҃д Ѿ вїногра́дѡвъ бо содо́мскихъ вїногра́дъ и҆́хъ и҆ розга̀ и҆́хъ ѿ гомо́рры. м҃є Гро́здъ и҆́хъ, гро́здъ же́лчи, гро́здъ го́рести и҆́хъ. м҃ѕ Ꙗ҆́рость ѕмїє́въ вїно̀ и҆́хъ: и҆ ꙗ҆́рость а҆́спїдѡвъ неисцѣ́льна. м҃з Не сїѧ̑ ли всѧ̑ собра́шасѧ ᲂу҆ менѐ, и҆ запечатлѣ́шасѧ въ сокро́вищахъ мои́хъ; м҃и Въ де́нь ѿмще́нїѧ возда́мъ, м҃ѳ Во вре́мѧ, внегда̀ соблазни́тсѧ нога̀ и҆́хъ. н҃ Ꙗ҆́кѡ бли́зъ де́нь поги́бели и҆́хъ, и҆ предстоѧ́тъ готѡ́ваѧ ва́мъ. н҃а Ꙗ҆́кѡ сꙋ́дитъ гдⷭ҇ь лю́демъ свои̑мъ, и҆ ѡ҆ рабѣ́хъ свои́хъ ᲂу҆моле́нъ бꙋ́детъ. н҃в Ви́дѣ бо ѧ҆̀ разсла́блены, и҆ и҆ста́ѧвшѧ во вре́мѧ, и҆ и҆знемо́гшѧ. н҃г И҆ речѐ гдⷭ҇ь: гдѣ̀ сꙋ́ть бо́зи и҆́хъ, и҆́хже ᲂу҆пова́ша на нѧ̀; и҆́хже тꙋ́къ же́ртвъ и҆́хже ꙗ҆дѧ́сте, и҆ пїѧ́сте вїно̀ тре́бъ и҆́хъ; н҃д Да воскрⷭ҇нꙋтъ, помо́гꙋтъ ва́мъ, и҆ бꙋ́дꙋтъ ва́мъ покрови́тели. н҃є Ви́дите, ви́дите, ꙗ҆́кѡ а҆́зъ є҆́смь, и҆ нѣ́сть бг҃ъ ра́звѣ менѐ. н҃ѕ А҆́зъ ᲂу҆бїю̀, и҆ жи́ти сотворю̀: поражꙋ̀, и҆ а҆́зъ и҆сцѣлю̀: и҆ нѣ́сть, и҆́же и҆́зметъ ѿ рꙋкꙋ̀ моє́ю. н҃з Ꙗ҆́кѡ воздви́гнꙋ на нб҃о рꙋ́кꙋ мою̀, и҆ кленꙋ́сѧ десни́цею мое́ю, и҆ рекꙋ̀: жи́въ а҆́зъ во вѣ́ки. н҃и Ꙗ҆́кѡ поѡстрю̀ ꙗ҆́кѡ мо́лнїю ме́чь мо́й, и҆ прїи́метъ сꙋ́дъ рꙋка̀ моѧ̀. н҃ѳ И҆ возда́мъ ме́сть врагѡ́мъ, и҆ ненави́дѧщымъ мѧ̀ возда́мъ. ѯ҃ Оу҆пою̀ стрѣ́лы моѧ̑ ѿ кро́ве, и҆ ме́чь мо́й снѣ́сть мѧса̀: ѯ҃а Ѿ кро́ве ꙗ҆́звенныхъ и҆ плѣне́нїѧ, ѿ гла́въ кнѧзе́й ꙗ҆зы́ческихъ. ѯ҃в Возвесели́тесѧ нб҃са̀ кꙋ́пнѡ съ ни́мъ, и҆ да покло́нѧтсѧ є҆мꙋ̀ всѝ а҆́гг҃ли бж҃їи. ѯ҃г Возвесели́тесѧ ꙗ҆зы́цы съ людьмѝ є҆гѡ̀, и҆ да ᲂу҆крѣпѧ́тсѧ є҆мꙋ̀ всѝ сы́нове бж҃їи. ѯ҃д Ꙗ҆́кѡ кро́вь сынѡ́въ свои́хъ ѿмща́етъ, и҆ ѿмсти́тъ и҆ возда́стъ ме́сть врагѡ́мъ, и҆ ненави́дѧщымъ є҆гѡ̀ возда́стъ. ѯ҃є И҆ ѡ҆чи́ститъ гдⷭ҇ь зе́млю люде́й свои́хъ.
Сла́ва: И҆ ны́нѣ:
Пѣ́снь тре́тїѧ.
сⷯ а҃ Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й ѡ҆ бз҃ѣ мое́мъ: разшири́шасѧ ᲂу҆ста̀ моѧ̑ на врагѝ моѧ̑, возвесели́хсѧ ѡ҆ сп҃се́нїи твое́мъ. в҃ Ꙗ҆́кѡ нѣ́сть ст҃ъ, ꙗ҆́кѡ гдⷭ҇ь, и҆ нѣ́сть првⷣнъ, ꙗ҆́кѡ бг҃ъ на́шъ: и҆ нѣ́сть ст҃ъ па́че тебѐ. г҃ Не хвали́тесѧ и҆ не глаго́лите высѡ́каѧ въ горды́ни: нижѐ да и҆зы́детъ велерѣ́чїе и҆з̾ ᲂу҆́стъ ва́шихъ. д҃ Ꙗ҆́кѡ бг҃ъ ра́зꙋмѡвъ гдⷭ҇ь, и҆ бг҃ъ ᲂу҆готовлѧ́ѧй начина̑нїѧ своѧ̑.
На д҃і: є҃ Лꙋ́къ си́льныхъ и҆знемо́же и҆ немощствꙋ́ющїи препоѧ́сашасѧ си́лою. ѕ҃ И҆спо́лненнїи хлѣ́бѡвъ, лиши́шасѧ, и҆ а҆́лчꙋщїи прише́льствоваша зе́млю. з҃ Ꙗ҆́кѡ непло́ды родѝ се́дмь, и҆ мнѡ́гаѧ въ ча́дѣхъ и҆знемо́же. и҃ Гдⷭ҇ь мертви́тъ и҆ живи́тъ, низво́дитъ во а҆́дъ, и҆ возво́дитъ. ѳ҃ Гдⷭ҇ь ᲂу҆бо́житъ, и҆ богати́тъ, смирѧ́етъ и҆ вы́ситъ: возставлѧ́етъ ѿ землѝ ᲂу҆бо́га, и҆ ѿ гно́ища воздвиза́етъ ни́ща. і҃ Посади́те є҆го̀ съ могꙋ́щими люде́й и҆ прⷭ҇то́лъ сла́вы наслѣ́дꙋѧ є҆мꙋ̀.
На и҃: а҃і Даѧ́й мл҃твꙋ молѧ́щемꙋсѧ, и҆ бл҃гословѝ лѣ̑та првⷣнагѡ. в҃і Ꙗ҆́кѡ не ᲂу҆крѣплѧ́етсѧ и҆ си́ленъ мꙋ́жъ крѣ́постїю свое́ю, гдⷭ҇ь не́мощна сотворѝ сꙋпоста́та є҆гѡ̀, гдⷭ҇ь ст҃ъ. г҃і Да не хва́литсѧ премꙋ́дрый премꙋ́дростїю свое́ю, и҆ да не хва́литсѧ си́льный си́лою свое́ю, и҆ да не хва́литсѧ бога́тый бога́тствомъ свои́мъ. д҃і Но ѡ҆ се́мъ да хва́литсѧ хвалѧ́йсѧ, є҆́же разꙋмѣ́ти и҆ зна́ти гдⷭ҇а, и҆ твори́ти сꙋ́дъ и҆ пра́вдꙋ посредѣ̀ землѝ.
На д҃: є҃і Гдⷭ҇ь взы́де на нб҃са̀, и҆ возгремѣ̀, то́й сꙋ́дитъ концє́мъ землѝ првⷣнъ сы́й. ѕ҃і И҆ да́стъ крѣ́пость царю̀ на́шемꙋ, и҆ вознесе́тъ ро́гъ хрⷭ҇та̀ своегѡ̀.
Сла́ва: И҆ ны́нѣ:
Пѣ́снь четве́ртаѧ.
сⷯ а҃ Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́сѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ. в҃ Посредѣ̀ двою̀ живѡ́тнꙋ позна́нъ бꙋ́деши. внегда̀ прибли́житисѧ лѣ́тѡмъ, позна́ешисѧ. внегда̀ прїитѝ вре́мени, ꙗ҆ви́шисѧ, внегда̀ смꙋти́тисѧ дꙋшѝ мое́й во гнѣ́вѣ, млⷭ҇ть твою̀ помѧне́ши. г҃ Бг҃ъ ѿ ю҆́га прїи́детъ, и҆ ст҃ы́й и҆з̾ горы̀ прїѡсѣне́нныѧ ча́щи. д҃ Покры̀ нб҃са̀ добродѣ́тель є҆гѡ̀, и҆ хвалы̀ є҆гѡ̀ и҆спо́лнь землѧ̀. є҃ И҆ сїѧ́нїе є҆гѡ̀, ꙗ҆́кѡ свѣ́тъ бꙋ́детъ ро́зи въ рꙋка́хъ є҆гѡ̀, и҆ положѝ любо́вь держа́внꙋ крѣ́пости свое́й. ѕ҃ Пред̾ лице́мъ є҆гѡ̀ пред̾и́детъ сло́во, и҆ и҆зы́детъ на по́ле за пѧ́тꙋ є҆гѡ̀. з҃ Ста̀, и҆ подви́жесѧ землѧ̀: призрѣ̀ и҆ раста́ѧша ꙗ҆зы́цы. и҃ Стры́шасѧ и҆ го́ры нꙋ́ждею, раста́ѧша хо́лми вѣ́чнїи, шє́ствїѧ вѣ̑чнаѧ и҆́хъ за трꙋ́дъ ви́дѣша. ѳ҃ Селє́нїѧ є҆ѳїѡ́пскаѧ ᲂу҆боѧ́тсѧ, и҆ кро́вы землѝ мадїа́мскїѧ. і҃ Є҆да̀ въ рѣка́хъ прогнѣ́ваешисѧ гдⷭ҇и; є҆да̀ въ рѣка́хъ ꙗ҆́рость твоѧ̀; и҆лѝ въ мо́ри ᲂу҆стремле́нїе твоѐ; а҃і Ꙗ҆́кѡ всѧ́деши на ко́ни твоѧ̑, и҆ ѣ҆жде́нїе твоѐ сп҃се́нїе. в҃і Налѧца́ѧ налѧче́ши лꙋ́къ тво́й на ски́птры, глаго́летъ гдⷭ҇ь. г҃і Рѣка́ми разсѧ́детсѧ землѧ̀, ᲂу҆́зрѧтъ тѧ̀ и҆ поболѧ́тъ лю́дїе. д҃і Расточа́ѧ во́ды ше́ствїѧ, дадѐ бе́здна гла́съ сво́й, высота̀ привидѣ́нїѧ своѧ̑. є҃і Воздви́жесѧ со́лнце, и҆ лꙋна̀ ста̀ въ чи́нѣ свое́мъ. ѕ҃і Во свѣ́тъ стрѣ́лы твоѧ̑ по́йдꙋтъ, въ блиста́нїи мо́лнїи ѻ҆рꙋ́жїй твои́хъ. з҃і Преще́нїемъ ᲂу҆ма́лиши зе́млю и҆ ꙗ҆́ростїю низложи́ши ꙗ҆зы́ки. И҆зше́лъ є҆сѝ на сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.
На д҃і: ѳ҃і Вложи́лъ є҆сѝ во главы̑ беззако́нныхъ сме́рть, воздви́глъ є҆сѝ ᲂу҆́за да́же до вы́и въ коне́цъ. к҃ Разсѣ́клъ є҆сѝ во и҆зстꙋпле́нїи главы̑ си́льныхъ, стрѧсꙋ́тсѧ въ не́й: разве́рзꙋтъ ᲂу҆зды̑ своѧ̑, ꙗ҆́кѡ снѣда́ѧй ни́щїй та́й. к҃а И҆ возве́лъ є҆сѝ на мо́ре ко́ни твоѝ, смꙋща́ющыѧ во́ды мнѡ́ги. к҃в Сохрани́хсѧ, и҆ ᲂу҆боѧ́сѧ се́рдце моѐ ѿ гла́са мл҃твы ᲂу҆сте́нъ мои́хъ. к҃г И҆ вни́де тре́петъ въ кѡ́сти моѧ̑, и҆ во мнѣ̀ смѧте́сѧ крѣ́пость моѧ̀. к҃д Почі́ю въ де́нь ско́рби моеѧ̀, да взы́дꙋ въ лю́ди прише́льствїѧ моегѡ̀.
На и҃: к҃є Занѐ смо́ковь не плодопринесе́тъ, и҆ не бꙋ́детъ ро́да въ лоза́хъ. к҃ѕ Солже́тъ дѣ́ло ма́слинное, и҆ полѧ̀ не сотворѧ́тъ ꙗ҆́ди. к҃з Ѡ҆скꙋдѣ́ша ѻ҆́вцы ѿ пи́щи, и҆ не бꙋ́детъ волѡ́въ при ꙗ҆́слехъ. к҃и А҆́зъ же ѡ҆ гдⷭ҇ѣ возра́дꙋюсѧ, возвеселю́сѧ ѡ҆ бз҃ѣ сп҃сѣ мое́мъ.
На д҃: к҃ѳ Гдⷭ҇ь бг҃ъ мо́й, си́ла моѧ̀, и҆ ᲂу҆чини́тъ но́зѣ моѝ на соверше́нїе. И҆ на высѡ́каѧ возво́дитъ мѧ̀, побѣди́ти мѝ въ пѣ́сни є҆гѡ̀.
Сла́ва: И҆ ны́нѣ:
Пѣ́снь пѧ́таѧ.
сⷯ а҃ Ѿ но́щи ᲂу҆́тренюетъ дх҃ъ мо́й къ тебѣ̀ бж҃е, занѐ свѣ́тъ повелѣ̑нїѧ твоѧ̑ на землѝ. в҃ Пра́вдѣ наꙋчи́тесѧ живꙋ́щїи на землѝ: преста́ бо нечести́вый, не наꙋчи́тсѧ пра́вдѣ, на землѝ и҆́стины не сотвори́тъ. г҃ Да во́зметсѧ нечести́вый, да не ви́дитъ сла́вы гдⷭ҇ни. гдⷭ҇и высока̀ твоѧ̀ мы́шца, и҆ не вѣ́дѣша, разꙋмѣ́вше же постыдѧ́тсѧ.
На д҃і: д҃ За́висть прїи́метъ лю́ди ненака̑занныѧ, и҆ ны́нѣ ѻ҆́гнь сꙋпоста́ты поѧ́стъ. є҃ Гдⷭ҇и бж҃е на́шъ, ми́ръ да́ждь на́мъ, всѧ̑ бо возда́лъ є҆сѝ на́мъ. ѕ҃ Гдⷭ҇и бж҃е на́шъ, стѧжи́ ны: гдⷭ҇и ра́звѣ тебѐ и҆но́гѡ не вѣ́мы, и҆́мѧ твоѐ и҆менꙋ́емъ. з҃ Ме́ртвїи же живота̀ не и҆́мꙋтъ ви́дѣти, нижѐ вра́чеве воскресѧ́тъ. и҃ Сегѡ̀ ра́ди наве́лъ є҆сѝ, и҆ погꙋби́лъ, и҆ взѧ́лъ є҆сѝ всѧ́къ мꙋ́жескъ по́лъ и҆́хъ. ѳ҃ Приложѝ и҆̀мъ ѕла̀ гдⷭ҇и, приложѝ ѕла̀ сла̑внымъ землѝ.
На и҃: і҃ Гдⷭ҇и, въ ско́рби помѧнꙋ́хомъ тѧ̀, въ ско́рби ма́лѣ наказа́нїе твоѐ на́мъ. а҃і И҆ ꙗ҆́кѡ болѧ́щаѧ приближа́етсѧ роди́ти, и҆ въ болѣ́зни свое́й вопїѧ́ше: та́кѡ бы́хомъ возлю́бленномꙋ твоемꙋ̀. в҃і Стра́ха ра́ди твоегѡ̀, гдⷭ҇и, во чре́вѣ прїѧ́хомъ, и҆ поболѣ́хомъ, и҆ роди́хомъ дх҃ъ сп҃се́нїѧ, є҆го́же сотвори́хомъ на землѝ. г҃і Не паде́мъ, но падꙋ́тъ живꙋ́щїи на землѝ.
На д҃: д҃і Воскре́снꙋтъ ме́ртвїи, и҆ воста́нꙋтъ и҆̀же во гробѣ́хъ, и҆ возвеселѧ́тсѧ и҆̀же на зелмѝ. є҃і Роса́ бо, ꙗ҆́же ѿ тебѐ, и҆сцѣле́нїе и҆̀мъ є҆́сть: землѧ́ же нечести́выхъ паде́тъ.
Сла́ва: И҆ ны́нѣ:
Пѣ́снь шеста́ѧ.
сⷯ а҃ Возопи́хъ ско́рби мое́й ко гдⷭ҇ꙋ бг҃ꙋ моемꙋ̀, и҆ ᲂу҆слы́ша мѧ̀. в҃ И҆з̾ чре́ва а҆́дова во́пль мо́й, ᲂу҆слы́шалъ є҆сѝ гла́съ мо́й: ѿве́рглъ мѧ̀ є҆сѝ во глꙋбины̑ се́рдца морска́гѡ, и҆ рѣ́ки ѡ҆быдо́ша мѧ̀. г҃ Всѧ̑ высоты̀ твоѧ̑, и҆ во́лны твоѧ̑ на мнѣ̀ преидо́ша. д҃ И҆ а҆́зъ рѣ́хъ: ѿри́нꙋхсѧ ѿ ѻ҆́чїю твоє́ю, є҆да̀ приложꙋ̀ призрѣ́ти мѝ къ хра́мꙋ ст҃о́мꙋ твоемꙋ̀; є҃ Возлїѧ́сѧ вода̀ до дꙋшѝ моеѧ̀, бе́здна ѡ҆бы́де мѧ̀ послѣ́днѧѧ.
На и҃: ѕ҃ Понрѐ глава̀ моѧ̀ въ разсѣ́ли го́ръ: снидо́хъ въ зе́млю, є҆ѧ́же верєѝ є҆ѧ̀ закле́пи вѣ́чнїи. з҃ И҆ да взы́детъ и҆з̾ и҆стлѣ́нїѧ живо́тъ мо́й къ тебѣ̀, гдⷭ҇и бж҃е мо́й. и҃ Внегда̀ скончава́тисѧ ѿ менѐ дꙋшѝ мое́й, гдⷭ҇а помѧнꙋ́хъ. ѳ҃ И҆ да прїи́детъ къ тебѣ̀ мл҃тва моѧ̀, къ хра́мꙋ ст҃о́мꙋ твоемꙋ̀.
На д҃: і҃ Хранѧ́щїи сꙋ́єтнаѧ и҆ лѡ́жнаѧ, ми́лость свою̀ ѡ҆ста́виша. а҃і А҆́зъ же со гла́сомъ хвале́нїѧ и҆ и҆сповѣ́данїѧ пожрꙋ̀ тебѣ̀: є҆ли̑ка ѡ҆бѣща́хъ возда́мъ тебѣ̀ во сп҃се́нїе моѐ гдⷭ҇еви.
Сла́ва: И҆ ны́нѣ.
Пѣ́снь седма́ѧ.
сⷯ а҃Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки. в҃ Ꙗ҆́кѡ пра́веденъ є҆сѝ ѡ҆ всѣ́хъ, ꙗ҆̀же сотвори́лъ є҆сѝ на́мъ: г҃ И҆ всѧ̑ дѣла̀ твоѧ̑ и҆́стинна, и҆ пра́ви пꙋтїѐ твоѝ, и҆ всѝ сꙋдѝ твоѝ и҆́стинни: д҃ И҆ сꙋдьбы̑ и҆́стинны сотвори́лъ є҆сѝ по всѣ̑мъ, ꙗ҆̀же наве́лъ є҆сѝ на ны̀, и҆ на гра́дъ ст҃ы́й ѻ҆тє́цъ на́шихъ і҆ерⷭ҇ли́мъ. є҃ Ꙗ҆́кѡ и҆́стиною и҆ сꙋдо́мъ наве́лъ є҆сѝ сїѧ̑ всѧ̑ на ны̀, грѣ̑хъ ра́ди на́шихъ. ѕ҃ Ꙗ҆́кѡ согрѣши́хомъ и҆ беззако́нновахомъ ѿстꙋпи́ти ѿ тебѐ, и҆ прегрѣши́хомъ во всѣ́хъ. з҃ И҆ за́повѣдей твои́хъ не послꙋ́шахомъ, нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ, да бла́го на́мъ бꙋ́детъ. и҃ И҆ всѧ̑ ꙗ҆̀же сотвори́лъ є҆сѝ на́мъ, и҆ всѧ̑ є҆ли́ка наве́лъ є҆сѝ на́мъ, и҆́стиннымъ сꙋдо́мъ сотвори́лъ є҆сѝ. ѳ҃ И҆ преда́лъ є҆сѝ на́съ въ рꙋ́ки врагѡ́въ беззако́нныхъ, ме́рзкихъ ѿстꙋ́пникѡвъ, и҆ царе́ви непра́веднꙋ и҆ лꙋка́внѣйшꙋ па́че всеѧ̀ землѝ. і҃ И҆ ны́нѣ нѣ́сть на́мъ ѿве́рсти ᲂу҆́стъ, стꙋ́дъ и҆ поноше́нїе бы́хомъ рабѡ́мъ твои̑мъ, и҆ чтꙋ́щымъ тѧ̀. а҃і Не преда́ждь же на́съ до конца̀ и҆́мене твоегѡ̀ ра́ди, и҆ не разорѝ завѣ́та твоегѡ̀, и҆ не ѿста́ви млⷭ҇ти твоеѧ̀ ѿ на́съ, а҆враа́ма ра́ди возлю́бленнагѡ ѿ тебѐ, и҆ за і҆саа́ка раба̀ твоего̀, и҆ і҆и҃лѧ ст҃а́го твоего̀: в҃і И҆̀мже глаго́лалъ є҆сѝ ᲂу҆мно́жити сѣ́мѧ и҆́хъ, ꙗ҆́кѡ ѕвѣ́зды нбⷭ҇ныѧ, и҆ ꙗ҆́кѡ песо́къ при краѝ мо́рѧ. г҃і Ꙗ҆́кѡ влⷣко, ᲂу҆ма́лихомсѧ па́че всѣ́хъ ꙗ҆зы́къ, и҆ є҆смы̀ смире́ни по всѣ́й землѝ дне́сь, грѣ̑хъ ра́ди на́шихъ. д҃і И҆ нѣ́сть во вре́мѧ сїѐ нача́льника и҆ прⷪ҇ро́ка и҆ вожда̀, нижѐ всесожже́нїѧ, нижѐ же́ртвы, нижѐ приноше́нїѧ, нижѐ кади́ла, ни мѣ́ста, є҆́же пожре́ти пред̾ тобо́ю, и҆ ѡ҆брѣстѝ млⷭ҇ть. є҃і Но дꙋше́ю сокрꙋше́нною, и҆ дꙋ́хомъ смире́ннымъ, да прїѧ́ти бꙋ́демъ. ѕ҃і Ꙗ҆́кѡ во всесожже́нїихъ ѻ҆́внихъ и҆ ю҆́нчихъ, и҆ ꙗ҆́кѡ во тьма́хъ а҆́гнецъ тꙋ́чныхъ, та́кѡ да бꙋ́детъ же́ртва на́ша пред̾ тобо́ю дне́сь, и҆ да соверши́тсѧ по тебѣ̀, ꙗ҆́кѡ нѣ́сть стꙋда̀ ᲂу҆пова́ющымъ на тѧ̀. з҃і И҆ ны́нѣ возслѣ́дꙋемъ всѣ́мъ се́рдцемъ. и҆ бои́мсѧ тебѐ, и҆ и҆́щемъ лица̀ твоегѡ̀. и҃і Не посрамѝ на́съ, но сотворѝ съ на́ми по кро́тости твое́й, и҆ по мно́жествꙋ млⷭ҇ти твоеѧ̀: ѳ҃і И҆ и҆змѝ на́съ по чꙋдесє́мъ твои́мъ, и҆ да́ждь сла́вꙋ и҆́мени твоемꙋ̀ гдⷭ҇и. к҃ И҆ да посра́мѧтсѧ всѝ ꙗ҆влѧ́ющїи рабѡ́мъ твои̑мъ ѕла̑ѧ, и҆ да постыдѧ́тсѧ ѿ всѧ́кїѧ си́лы, и҆ крѣ́пость и҆́хъ да сокрꙋши́тсѧ. к҃а И҆ да разꙋмѣ́ютъ, ꙗ҆́кѡ ты̀ є҆сѝ гдⷭ҇ь бг҃ъ є҆ди́нъ, и҆ сла́венъ по все́й вселе́ннѣй. к҃в И҆ не преста́ша влага́ющїи ѧ҆̀ слꙋги̑ царє́вы, жгꙋ́ще пе́щь на́фѳою, и҆ смоло́ю, и҆ и҆згре́бьми, и҆ ро́ждїемъ.
На д҃і: к҃г И҆ разлива́шесѧ пла́мень над̾ пе́щїю, на ла́кти четы́редесѧть де́вѧть: к҃д И҆ ѡ҆бы́де и҆ пожжѐ, ꙗ҆̀же ѡ҆брѣ́те ѡ҆ пе́щи халде́йстѣй. к҃є А҆́гг҃лъ же гдⷭ҇нь сни́де кꙋ́пнѡ съ сꙋ́щими ѡ҆ а҆за́рїи въ пе́щь: к҃ѕ И҆ ѿтрѧсѐ пла́мень ѻ҆́гненный ѿ пе́щи. к҃з И҆ сотворѝ сре́днее пе́щи, ꙗ҆́кѡ дꙋ́хъ росы̀ шꙋмѧ́щъ, и҆ не прикоснꙋ́сѧ и҆́хъ ѿню́дь ѻ҆́гнь, ни ѡ҆скорбѝ, нижѐ стꙋжѝ и҆̀хъ. к҃и Тогда̀ трїѐ ꙗ҆́кѡ є҆ди́нѣми ᲂу҆сты̀ поѧ́хꙋ, и҆ бл҃гословлѧ́хꙋ, и҆ сла́влѧхꙋ бг҃а въ пещѝ, глаго́люще:
На и҃: к҃ѳ Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, и҆ препѣ́тый и҆ превозноси́мый во вѣ́ки. л҃ И҆ бл҃гослове́но и҆́мѧ сла́вы твоеѧ̀ ст҃о́е, препѣ́тое и҆ превозноси́мое во вѣ́ки. л҃а Бл҃гослове́нъ є҆сѝ въ хра́мѣ ст҃ы́ѧ сла́вы твоеѧ̀, препѣ́тый и҆ превозноси́мый во вѣ́ки. л҃в Бл҃гослове́нъ є҆сѝ ви́дѧй бє́здны, сѣдѧ́й на херꙋві́мѣхъ, препѣ́тый и҆ превозноси́мый во вѣ́ки.
На д҃: л҃г Бл҃гослове́нъ є҆сѝ на прⷭ҇то́лѣ сла́вы црⷭ҇твїѧ твоегѡ̀, препѣ́тый и҆ превозноси́мый во вѣ́ки. л҃д Бл҃гослове́нъ є҆сѝ на тве́рди нбⷭ҇нѣй, препѣ́тый и҆ превозноси́мый во вѣ́ки.
Сла́ва: И҆ ны́нѣ:
Пѣ́снь ѻ҆сма́ѧ.
сⷯ а҃ Бл҃гослови́те всѧ̑ дѣла̀ гдⷭ҇нѧ гдⷭ҇а, по́йте превозноси́те є҆го̀ во вѣ́ки. в҃ Бл҃гослови́те а҆́гг҃ли гдⷭ҇ни, нб҃са̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки. г҃ Бл҃гослови́те во́ды всѧ̑, ꙗ҆̀же превы́ше нб҃съ, всѧ̑ си̑лы гдⷭ҇ни гдⷭ҇а, по́йте и҆ превозноси́те є҆го̀ во вѣ́ки. д҃ Бл҃гослови́те со́лнце и҆ мѣ́сѧцъ, ѕвѣ́зды нбⷭ҇ныѧ гдⷭ҇а, по́йте и҆ превозноси́те є҆го̀ во вѣ́ки. є҃ Бл҃гослови́те всѧ́къ до́ждь и҆ роса̀, всѝ дꙋ́си гдⷭ҇а, по́йте и҆ превозноси́те є҆го̀ во вѣ́ки.
На д҃і: ѕ҃ Бл҃гослови́те ѻ҆́гнь и҆ ва́ръ, стꙋ́дь и҆ зно́й гдⷭ҇а, по́йте и҆ превозноси́те є҆го̀ во вѣ́ки. з҃ Бл҃гослови́те ро́сы и҆ и҆́ней, ле́ди и҆ мра́зъ гдⷭ҇а, и҆ по́йте и҆ превозноси́те є҆го̀ во вѣ́ки. и҃ Бл҃гослови́те сла́ны и҆ снѣ́зи, нѡ́щи и҆ дні́е гдⷭ҇а, по́йте и҆ превозноси́те є҆го̀ во вѣ́ки. ѳ҃ Бл҃гослови́те свѣ́тъ и҆ тьма̀, мо́лнїѧ и҆ ѻ҆́блацы гдⷭ҇а, по́йте и҆ превозноси́те є҆го̀ во вѣ́ки. і҃ Бл҃гослови́те землѧ̀, го́ры и҆ хо́лми, и҆ всѧ̑ прозѧба̑ющаѧ на не́й гдⷭ҇а, по́йте и҆ превозноси́те є҆го̀ во вѣ́ки. а҃і Бл҃гослови́те и҆сто́чницы, морѧ̀ и҆ рѣ́ки, ки́ти и҆ всѧ̑ дви̑жꙋщаѧсѧ въ вода́хъ гдⷭ҇а, по́йте и҆ превозноси́те є҆го̀ во вѣ́ки.
На и҃: в҃і Бл҃гослови́те всѧ̑ пти̑цы нбⷭ҇ныѧ, ѕвѣ́рїе и҆ всѝ ско́ти гдⷭ҇а, по́йте и҆ превозноси́те є҆го̀ во вѣ́ки. г҃і Бл҃гослови́те сы́нове человѣ́честїи, да бл҃гослови́тъ і҆и҃ль гдⷭ҇а, по́йте и҆ превозноси́те є҆го̀ во вѣ́ки. д҃і Бл҃гослови́те сщ҃е́нницы гдⷭ҇ни, рабѝ гдⷭ҇ни гдⷭ҇а, по́йте и҆ превозноси́те є҆го̀ во вѣ́ки. є҃і Бл҃гослови́те дꙋ́си и҆ дꙋ́ши првⷣныхъ, прпⷣбнїи и҆ смире́ннїи се́рдцемъ ᲂу҆́мъ гдⷭ҇а, по́йте и҆ превозноси́те є҆го̀ во вѣ́ки.
На д҃: ѕ҃і Бл҃гослови́те а҆на́нїа, а҆за́рїа, мїсаи́лъ по́йте и҆ превозноси́те є҆го̀ во вѣ́ки. з҃і Бл҃гослови́те а҆пⷭ҇ли, прⷪ҇ро́цы и҆ мч҃нцы гдⷭ҇ни гдⷭ҇а, по́йте и҆ превозноси́те є҆го̀ во вѣ́ки. и҃і Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а гдⷭ҇а. ѳ҃і Ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Хва́лимъ, бл҃гослови́мъ, покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.
Пѣ́снь прест҃ы́ѧ бцⷣы.
сⷯ а҃ Вели́читъ дꙋша̀ моѧ̀ гдⷭ҇а, и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ. в҃ Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆бл҃жа́тъ мѧ̀ всѝ ро́ди. г҃ Ꙗ҆́кѡ сотворѝ мнѣ̀ вели́чїе си́льный и҆ ст҃о и҆́мѧ є҆гѡ̀, и҆ млⷭ҇ть є҆гѡ̀ въ ро́ды родѡ́въ боѧ́щымсѧ є҆гѡ̀. д҃ Сотворѝ держа́вꙋ мы́шцею свое́ю, расточѝ гѡ́рдыѧ мы́слїю се́рдца и҆́хъ. є҃ Низложѝ си̑льныѧ со престѡ́лъ, и҆ вознесѐ смирє́нныѧ, а҆́лчꙋщыѧ и҆спо́лни бла̑гъ, и҆ богатѧ́щыѧсѧ ѿпꙋстѝ тщы̀. ѕ҃ Воспрїѧ́тъ і҆и҃лѧ ѻ҆́трока своего̀, помѧнꙋ́ти млⷭ҇ти, ꙗ҆́коже глаго́ла ко ѻ҆тцє́мъ на́шымъ а҆враа́мꙋ и҆ сѣ́мени є҆гѡ̀ да́же до вѣ́ка.
Пѣ́снь девѧ́таѧ.
сⷯ а҃ Бл҃гослове́нъ гдⷭ҇ь бг҃ъ і҆и҃левъ, ꙗ҆́кѡ посѣтѝ и҆ сотворѝ и҆збавле́нїе лю́демъ свои̑мъ в҃ И҆ воздви́же ро́гъ сп҃се́нїѧ на́мъ, въ домꙋ̀ дв҃довѣ ѻ҆́трока своегѡ̀. г҃ Ꙗ҆́коже глаго́ла ᲂу҆сты̀ ст҃ы́хъ сꙋ́щихъ ѿ вѣ́ка прⷪ҇рѡ́къ є҆гѡ̀. д҃ Сп҃се́нїе ѿ вра̑гъ на́шихъ, и҆ и҆з̾ рꙋкѝ всѣ́хъ ненави́дѧщихъ на́съ. є҃ Сотвори́ти млⷭ҇ть со ѻ҆тцы̀ на́шими, и҆ помѧнꙋ́ти завѣ́тъ ст҃ы́й сво́й.
На и҃: ѕ҃ Клѧ́твꙋ, є҆́юже клѧ́тсѧ ко а҆враа́мꙋ ѻ҆тцꙋ̀ на́шемꙋ, да́ти на́мъ без̾ стра́ха и҆з̾ рꙋкѝ вра̑гъ на́шихъ и҆зба́вльшымсѧ. з҃ Слꙋжи́ти є҆мꙋ̀ прпⷣбїемъ и҆ пра́вдою пред̾ ни́мъ всѧ̑ дни̑ живота̀ на́шегѡ. и҃ И҆ ты̀, ѻ҆троча̀, прⷪ҇ро́къ вы́шнѧгѡ нарече́шисѧ: пред̾и́деши бо пред̾ лице́мъ гдⷭ҇нимъ, ᲂу҆гото́вати пꙋти̑ є҆гѡ̀. ѳ҃ Да́ти ра́зꙋмъ сп҃се́нїѧ лю́демъ є҆гѡ̀, во ѡ҆ставле́нїе грѣ̑хъ и҆́хъ, млⷭ҇рдїѧ ра́ди млⷭ҇ти бг҃а на́шегѡ.
На д҃: і҃ Въ ни́хже посѣтѝ на́съ восто́къ съ высоты̀, ꙗ҆ви́тисѧ во тьмѣ̀ и҆ сѣ́ни сме́ртнѣй сѣдѧ́щымъ. а҃і Напра́вити но́ги на́шѧ на пꙋ́ть ми́ренъ.
Сла́ва: И҆ ны́нѣ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.