Пѣ́сней стїхѝ, пое́мїи въ недѣ̑ли и҆ пра́здники
Въ недѣ́лю же, и҆ во влⷣчни, и҆ бг҃оро́дичны пра́здники, и҆ въ предпра̑зднства, и҆ попра̑зднства и҆́хъ, и҆ въ пра́здникъ ст҃а́гѡ, и҆мꙋ́щагѡ полѷеле́й, и҆лѝ славосло́вїе вели́кое, и҆ во всю̀ пѧтьдесѧ́тницꙋ, и҆ є҆гда̀ ᲂу҆казꙋ́етъ, Гдⷭ҇еви пое́мъ, не стїхосло́вимъ, пое́мъ пѣ̑сни си́це.
Въ недѣ́лю ᲂу҆́бѡ по возгла́сѣ сщ҃е́нника: Млⷭ҇тїю и҆ щедро́тами: начина́емъ і҆рмо́съ канѡ́на.
Глаго́лемъ же и҆ є҆ди́нъ тропа́рь без̾ стїха̀, глаго́люще:
Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
А҆́ще же влⷣчнїй пра́здникъ, и҆лѝ пра́зднꙋемагѡ ст҃а́гѡ є҆́сть, глаго́лемъ і҆рмо́съ два́жды.
Та́же начина́етъ пе́рвый ли́къ сті́хъ пѣ́сни:
Пое́мъ гдⷭ҇еви, сла́внѡ бо просла́висѧ. Конѧ̀ и҆ вса́дника ве́рже въ мо́ре.
И҆ тропа́рь.
Та́же вторы́й ли́къ:
Помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆гѡ̀, бг҃ъ ѻ҆тца̀ моегѡ̀, и҆ вознесꙋ̀ є҆го̀.
И҆ тропа́рь.
Гдⷭ҇ь сокрꙋша́ѧ бра̑ни, гдⷭ҇ь и҆́мѧ є҆мꙋ̀: колесни̑цы фараѡ́нѡвы и҆ си́лꙋ є҆гѡ̀ ве́рже въ мо́ре.
Пꙋчи́ною покры̀ ѧ҆̀, погрѧзо́ша во глꙋбинѣ̀ ꙗ҆́кѡ ка́мень.
На и҃: Тогда̀ потща́шасѧ влады̑ки є҆дѡ́мстїи, и҆ кнѧзе́й мѡаві́тскихъ, прїѧ́тъ ѧ҆̀ тре́петъ, раста́ѧша всѝ живꙋ́щїи въ ханаа́нѣ.
Нападе́тъ на нѧ̀ стра́хъ и҆ тре́петъ, вели́чїемъ мы́шцы твоеѧ̀ да ѡ҆каменѧ́тсѧ.
На ѕ҃: До́ндеже про́йдꙋтъ лю́дїе твоѝ гдⷭ҇и, до́ндеже про́йдꙋтъ лю́дїе твоѝ сі́и, ꙗ҆̀же стѧжа́лъ є҆сѝ.
Содѣ́лалъ є҆сѝ гдⷭ҇и ст҃ы́ню, ю҆́же ᲂу҆гото́вастѣ, рꙋ́цѣ твоѝ.
На д҃: Гдⷭ҇ь црⷭ҇твꙋѧй вѣ́ки, и҆ на вѣ́къ и҆ є҆щѐ, є҆гда̀ вни́де ко́нь фараѡ́новъ съ колесни́цами и҆ вса́дники въ мо́ре.
Сы́нове же і҆и҃лєвы проидо́ша сꙋ́шею посредѣ̀ мо́рѧ.
Сла́ва ѻ҆ц҃ꙋ̀ и҆ сн҃ꙋ, и҆ ст҃о́мꙋ дх҃ꙋ.
Ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
И҆ катава́сїа по ко́ейждо пѣ́сни.
Пѣ́снь тре́тїѧ.
Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й ѡ҆ бз҃ѣ мое́мъ, разшири́шасѧ ᲂу҆ста̀ моѧ̑ на врагѝ моѧ̑, возвесели́хсѧ ѡ҆ сп҃се́нїи твое́мъ.
Ꙗ҆́кѡ нѣ́сть ст҃ъ, ꙗ҆́кѡ гдⷭ҇ь, и҆ нѣ́сть првⷣнъ, ꙗ҆́кѡ бг҃ъ на́шъ, и҆ нѣ́сть ст҃ъ па́че тебѐ.
Не хвали́тесѧ и҆ не глаго́лите высѡ́каѧ въ горды́ни, нижѐ да и҆зы́детъ велерѣ́чїе и҆з̾ ᲂу҆́стъ ва́шихъ.
Ꙗ҆́кѡ бг҃ъ ра́зꙋмѡвъ гдⷭ҇ь, и҆ бг҃ъ ᲂу҆готовлѧ́ѧй начина̑нїѧ своѧ̑.
На и҃: Даѧ́й мл҃твꙋ молѧ́щемꙋсѧ, и҆ бл҃гословѝ лѣ̑та пра́веднагѡ.
Гдⷭ҇ь не́мощна сотворѝ сꙋпоста́та є҆гѡ̀, гдⷭ҇ь ст҃ъ.
На ѕ҃: Да не хва́литсѧ премꙋ́дрый премꙋ́дростїю свое́ю, и҆ да не хва́литсѧ си́льный си́лою свое́ю, и҆ да не хва́литсѧ бога́тый бога́тствомъ свои́мъ.
Но ѡ҆ се́мъ да хва́литсѧ хвалѧ́йсѧ, є҆́же разꙋмѣ́ти и҆ зна́ти гдⷭ҇а, и҆ твори́ти сꙋ́дъ и҆ пра́вдꙋ посредѣ̀ землѝ.
На д҃: Гдⷭ҇ь взы́де на нб҃са̀ и҆ возгремѣ̀, то́й сꙋ́дитъ концє́мъ землѝ, пра́веденъ сы́й.
И҆ да́стъ крѣ́пость цр҃ю̀ на́шемꙋ, и҆ вознесе́тъ ро́гъ хрⷭ҇та̀ своегѡ̀.
Сла́ва: И҆ ны́нѣ:
Катава́сїа. И҆ є҆ктенїа̀.
Пѣ́снь четве́ртаѧ
Гдⷭ҇и, ᲂу҆слы́шахъ слꙋ́хъ тво́й и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑ и҆ ᲂу҆жасо́хсѧ.
Внегда̀ смꙋти́тисѧ дꙋшѝ мое́й во гнѣ́вѣ, ми́лость твою̀ помѧне́ши.
Бг҃ъ ѿ ю҆́га прїи́детъ, и҆ ст҃ы́й и҆з̾ горы̀ прїѡсѣне́нныѧ ча́щи.
Покры̀ нб҃са̀ добродѣ́тель є҆гѡ̀, и҆ хвалы̀ є҆гѡ̀ и҆спо́лнь землѧ̀.
На и҃: Занѐ смо́квь не плодопринесе́тъ, и҆ не бꙋ́детъ ро́да въ лоза́хъ.
Солже́тъ дѣ́ло ма́слинное, и҆ полѧ̀ не сотворѧ́тъ ꙗ҆́ди.
На ѕ҃: Ѡ҆скꙋдѣ́ша ѻ҆́вцы ѿ пи́щи, и҆ не бꙋ́детъ волѡ́въ при ꙗ҆́слехъ.
А҆́зъ же ѡ҆ гдⷭ҇ѣ возра́дꙋюсѧ, возвеселю́сѧ ѡ҆ бз҃ѣ сп҃сѣ мое́мъ.
На д҃: Гдⷭ҇ь бг҃ъ мо́й, си́ла моѧ̀, и҆ ᲂу҆чини́тъ но́зѣ моѝ на соверше́нїе.
И҆ на высѡ́каѧ возво́дитъ мѧ̀, побѣди́ти мѝ въ пѣ́сни є҆гѡ̀.
Сла́ва: И҆ ны́нѣ:
Катава́сїа.
Пѣ́снь пѧ́таѧ.
Ѿ но́щи ᲂу҆́тренюетъ дꙋ́хъ мо́й къ тебѣ̀ бж҃е, занѐ свѣ́тъ повелѣ̑нїѧ твоѧ̑ на землѝ.
Пра́вдѣ наꙋчи́тесѧ живꙋ́щїи на землѝ.
Да во́зметсѧ нечести́вый, да не ви́дитъ сла́вы гдⷭ҇ни. гдⷭ҇и, высока̀ твоѧ̀ мы́шца, и҆ не вѣ́дѣша, разꙋмѣ́вше же постыдѧ́тсѧ.
За́висть прїи́метъ лю́ди ненака̑занныѧ, и҆ ны́нѣ ѻ҆́гнь сꙋпоста́ты поѧ́стъ.
На и҃: Приложѝ и҆̀мъ ѕла̀ гдⷭ҇и, приложѝ ѕла̀ сла̑внымъ землѝ.
Гдⷭ҇и, въ ско́рби помѧнꙋ́хомъ тѧ̀, въ ско́рби ма́лѣ наказа́нїе твоѐ на́мъ.
На ѕ҃: И҆ ꙗ҆́кѡ болѧ́щаѧ приближа́етсѧ роди́ти и҆ въ болѣ́зни свое́й вопїѧ́ше, та́кѡ бы́хомъ возлю́бленномꙋ твоемꙋ̀.
Не паде́мъ, но падꙋ́тъ живꙋ́щїи на землѝ.
На д҃: Воскре́снꙋтъ ме́ртвїи, и҆ воста́нꙋтъ и҆̀же во гробѣ́хъ, и҆ возвеселѧ́тсѧ и҆́же на землѝ.
Роса́ бо, ꙗ҆́же ѿ тебѐ, и҆сцѣле́нїе и҆̀мъ є҆́сть: землѧ́ же нечести́выхъ паде́тъ.
Сла́ва: И҆ ны́нѣ:
Катава́сїа.
Пѣ́снь шеста́ѧ.
Возопи́хъ въ ско́рби мое́й ко гдⷭ҇ꙋ бг҃ꙋ моемꙋ̀, и҆ ᲂу҆слы́ша мѧ̀.
Ѿве́рглъ мѧ̀ є҆сѝ во глꙋбины̑ се́рдца морска́гѡ, и҆ рѣ́ки ѡ҆быдо́ша мѧ̀.
Всѧ̑ высоты̑ твоѧ̑, и҆ во́лны твоѧ̑ на мнѣ̀ прїидо́ша.
Є҆да̀ приложꙋ̀ призрѣ́ти мѝ къ хра́мꙋ ст҃о́мꙋ твоемꙋ̀;
На и҃: Возлїѧ́сѧ вода̀ до дꙋшѝ моеѧ̀, бе́здна ѡ҆бы́де мѧ̀ послѣ́днѧѧ.
Понрѐ глава̀ моѧ̀ въ разсѣ́ли го́ръ, снидо́хъ въ зе́млю, є҆ѧ́же верєѝ є҆ѧ̀ закле́пи вѣ́чнїи.
На ѕ҃: И҆ да взы́детъ и҆з̾ и҆стлѣ́нїѧ живо́тъ мо́й, къ тебѣ̀ гдⷭ҇и бж҃е мо́й.
И҆ да прїи́детъ къ тебѣ̀ мл҃тва моѧ̀, къ хра́мꙋ ст҃о́мꙋ твоемꙋ̀.
На д҃: Хранѧ́щїи сꙋ́єтнаѧ и҆ лѡ́жнаѧ, млⷭ҇ть свою̀ ѡ҆ста́виша.
Є҆ли̑ка ѡ҆бѣща́хъ, возда́мъ тебѣ̀ во сп҃се́нїе моѐ гдⷭ҇еви.
Сла́ва: И҆ ны́нѣ:
Катава́сїа.
Пѣ́снь седма́ѧ.
Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки.
И҆ всѧ̑ дѣла̀ твоѧ̑ и҆́стинна, и҆ пра́ви пꙋтїѐ твоѝ.
И҆ всѝ сꙋдѝ твоѝ и҆́стинни, и҆ сꙋдьбы̑ и҆́стинны сотвори́лъ є҆сѝ.
И҆ на гра́дъ ст҃ы́й ѻ҆тє́цъ на́шихъ і҆ерⷭ҇ли́мъ.
На и҃: Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, и҆ препѣ́тый и҆ превозноси́мый во вѣ́ки.
И҆ бл҃гослове́но и҆́мѧ сла́вы твоеѧ̀ ст҃о́е, препѣ́тое и҆ превозноси́мое во вѣ́ки.
На ѕ҃: Бл҃гослове́нъ є҆сѝ въ хра́мѣ ст҃ы́ѧ сла́вы твоеѧ̀, препѣ́тый и҆ превозноси́мый во вѣ́ки.
Бл҃гослове́нъ є҆сѝ ви́дѧй бє́здны, сѣдѧ́й на херꙋві́мѣхъ, препѣ́тый и҆ превозноси́мый во вѣ́ки.
На д҃: Бл҃гослове́нъ є҆сѝ на прⷭ҇то́лѣ сла́вы црⷭ҇твїѧ твоегѡ̀ препѣ́тый и҆ превозноси́мый во вѣ́ки.
Бл҃гослове́нъ є҆сѝ на тве́рди нбⷭ҇нѣй, препѣ́тый и҆ превозноси́мый во вѣ́ки.
Сла́ва: И҆ ны́нѣ:
И҆ катава́сїа.
Пѣ́снь ѻ҆сма́ѧ.
Бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те а҆́гг҃ли гдⷭ҇ни, нб҃са̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те во́ды всѧ̑, ꙗ҆̀же превы́ше нб҃съ, всѧ̑ си̑лы гдⷭ҇ни гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те со́лнце и҆ мѣ́сѧцъ, ѕвѣ́зды нбⷭ҇ныѧ гдⷭ҇а, по́йте и҆ превозноси́те є҆го̀ во вѣ́ки.
На и҃: Бл҃гослови́те всѧ̑ пти̑цы нбⷭ҇ныѧ, ѕвѣ́рїе, и҆ всѝ ско́ти гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те сы́нове человѣ́честїи, да бл҃гослови́тъ і҆и҃ль гдⷭ҇а, по́йте и҆ превозноси́те во во вѣ́ки.
На ѕ҃: Бл҃гослови́те сщ҃е́нницы гдⷭ҇ни, рабѝ гдⷭ҇ни гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те дꙋ́си и҆ дꙋ́шы првⷣныхъ, прпⷣбнїи смире́нїи се́рдцемъ гдⷭ҇а, по́йте и҆ превозноси́те є҆го̀ во вѣ́ки.
На д҃: Бл҃гослови́те а҆на́нїа, а҆за́рїа, мїсаи́лъ гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́те а҆пⷭ҇ли, прⷪ҇ро́цы и҆ мч҃нцы гдⷭ҇ни гдⷭ҇а, по́йте и҆ превозноси́те є҆го̀ во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Та́же глаго́лемъ: Хва́лимъ, бл҃гослови́мъ, покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.
Покло́нъ и҆ катава́сїа.
Пѣ́снь прест҃ы́ѧ бцⷣы:
Вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ.
Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆бл҃жа́тъ мѧ̀ всѝ ро́ди.
Ꙗ҆́кѡ сотворѝ мнѣ̀ вели́чїе си́льный, и҆ ст҃о и҆́мѧ є҆гѡ̀, и҆ млⷭ҇ть є҆гѡ̀ въ ро́ды родѡ́въ боѧ́щымсѧ є҆гѡ̀.
Сотворѝ держа́вꙋ мы́шцею свое́ю, расточѝ гѡ́рдыѧ мы́слїю се́рдца и҆́хъ.
Низложѝ си̑льныѧ со престѡ́лъ и҆ вознесѐ смирє́нныѧ, а҆́лчꙋщыѧ и҆спо́лни бла̑гъ, и҆ богатѧ́щыѧсѧ ѿпꙋстѝ тщы̀.
Воспрїѧ́тъ і҆и҃лѧ ѻ҆́трока своегѡ̀, помѧнꙋ́ти млⷭ҇ти, ꙗ҆́коже глаго́ла ко ѻ҆тцє́мъ на́шымъ, а҆враа́мꙋ и҆ сѣ́мени є҆гѡ̀, да́же до вѣ́ка.
Пѣ́снь ст҃а́гѡ прⷪ҇ро́ка заха́рїи, ѻ҆тца̀ прⷣте́чева:
Бл҃гослове́нъ гдⷭ҇ь бг҃ъ і҆и҃левъ, ꙗ҆́кѡ посѣтѝ и҆ сотворѝ и҆збавле́нїе лю́демъ свои̑мъ.
И҆ воздви́же ро́гъ сп҃се́нїѧ на́мъ, въ домꙋ̀ дв҃довѣ ѻ҆́трока своегѡ̀.
Ꙗ҆́коже глаго́ла ᲂу҆сты̀ ст҃ы́хъ, сꙋ́щихъ ѿ вѣ́ка прⷪ҇рѡ́къ є҆гѡ̀, сп҃се́нїе ѿ вра̑гъ на́шихъ, и҆ и҆з̾ рꙋкѝ всѣ́хъ ненави́дѧщихъ на́съ.
Сотвори́ти млⷭ҇ть со ѻ҆тцы̀ на́шими, и҆ помѧнꙋ́ти завѣ́тъ ст҃ы́й сво́й.
На и҃: Клѧ́твꙋ, є҆́юже клѧ́тсѧ ко а҆враа́мꙋ ѻ҆тцꙋ̀ на́шемꙋ, да́ти на́мъ без̾ стра́ха и҆з̾ рꙋкѝ вра̑гъ на́шихъ и҆зба́вльшымсѧ.
Слꙋжи́ти є҆мꙋ̀ прпⷣбїемъ и҆ пра́вдою пред̾ ни́мъ, всѧ̑ дни̑ живота̀ на́шегѡ.
На ѕ҃: И҆ ты̀, ѻ҆троча̀, прⷪ҇ро́къ вы́шнѧгѡ нарече́шисѧ, пред̾и́деши бо пред̾ лице́мъ гдⷭ҇нимъ, ᲂу҆гото́вати пꙋти̑ є҆гѡ̀.
Да́ти ра́зꙋмъ сп҃се́нїѧ лю́демъ є҆гѡ̀, во ѡ҆ставле́нїе грѣ̑хъ и҆́хъ, млⷭ҇рдїѧ ра́ди млⷭ҇ти бг҃а на́шегѡ.
На д҃: Въ ни́хже посѣтѝ на́съ восто́къ въ высоты̀, ꙗ҆ви́тисѧ во тьмѣ̀ и҆ сѣ́ни сме́ртнѣй сѣдѧ́щымъ.
Напра́ви но́ги на́шѧ на пꙋ́ть ми́ренъ.
Сла́ва: И҆ ны́нѣ:
Катава́сїа. Є҆ктенїа̀: занѐ въ сицевы́ѧ дни̑, досто́йно, не пое́тсѧ. Та́же є҆ѯапостїла́рїй.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.