Степє́нны, на ѻ҆́смь гласѡ́въ
Степє́нны на ѻ҆́смь гласѡ́въ.
Кі́йждо сті́хъ повторѧ́емъ.
Гла́съ а҃.
А҆нтїфѡ́нъ а҃:
Внегда̀ скорбѣ́ти мѝ, ᲂу҆слы́ши моѧ̑ болѣ̑зни: гдⷭ҇и, тебѣ̀ зовꙋ̀.
Пꙋсты́ннымъ непреста́нное бж҃е́ственное жела́нїе быва́етъ, мі́ра сꙋ́щымъ сꙋ́етнагѡ кромѣ̀.
Сла́ва: Ст҃о́мꙋ дх҃ꙋ, че́сть и҆ сла́ва, ꙗ҆́коже ѻ҆ц҃ꙋ̀ подоба́етъ, кꙋ́пнѡ же и҆ сн҃ꙋ: сегѡ̀ ра́ди да пои́мъ трⷪ҇цѣ є҆динодержа́вїе.
И҆ ны́нѣ, то́йже.
А҆нтїфѡ́нъ в҃:
На го́ры твои́хъ возне́слъ є҆сѝ мѧ̀ зако́нѡвъ, добродѣ́тельми просвѣтѝ бж҃е, да пою́ тѧ.
Десно́ю твое́ю рꙋко́ю прїи́мъ ты̀ сло́ве, сохрани́ мѧ, соблюдѝ, да не ѻ҆́гнь менѐ ѡ҆пали́тъ грѣхо́вный.
Сла́ва: Ст҃ы́мъ дх҃омъ всѧ́каѧ тва́рь ѡ҆бновлѧ́етсѧ, па́ки текꙋ́щи на пе́рвое: равномо́щенъ бо є҆́сть ѻ҆ц҃ꙋ̀ и҆ сло́вꙋ.
И҆ ны́нѣ, то́йже.
А҆нтїфѡ́нъ г҃:
Ѡ҆ ре́кшихъ мнѣ̀, вни́демъ во дворы̀ гдⷭ҇ни, возвесели́сѧ мо́й дꙋ́хъ, сра́дꙋетсѧ се́рдце.
Въ домꙋ̀ дв҃довѣ стра́хъ вели́къ: та́мѡ бо прⷭ҇то́лѡмъ поста́влєннымъ, сꙋ́дѧтсѧ всѧ̑ племена̀ земна̑ѧ и҆ ꙗ҆зы́цы.
Сла́ва: Ст҃о́мꙋ дх҃ꙋ че́сть, поклоне́нїе, сла́ва и҆ держа́ва, ꙗ҆́коже ѻ҆ц҃ꙋ̀ досто́итъ, и҆ сн҃ови подоба́етъ приноси́ти: є҆ди́ница бо є҆́сть трⷪ҇ца є҆стество́мъ, но не ли́цы.
И҆ ны́нѣ, то́йже.
Гла́съ в҃.
А҆нтїфѡ́нъ а҃:
На нб҃о ѻ҆́чи пꙋща́ю моегѡ̀ се́рдца, къ тебѣ̀ сп҃се. сп҃си́ мѧ твои́мъ ѡ҆сїѧ́нїемъ.
Поми́лꙋй на́съ согрѣша́ющихъ тебѣ̀ мно́гѡ на всѧ́кїй ча́съ, ѽ хрⷭ҇тѐ мо́й, и҆ да́ждь ѡ҆́бразъ пре́жде конца̀ пока́ѧтисѧ тебѣ̀.
Сла́ва: Ст҃о́мꙋ дх҃ꙋ, є҆́же црⷭ҇твовати подоба́етъ, ѡ҆сщ҃а́ти, подвиза́ти тва́рь: бг҃ъ бо є҆́сть, є҆диносꙋ́щенъ ѻ҆ц҃ꙋ̀ и҆ сло́вꙋ.
И҆ ны́нѣ, то́йже.
А҆нтїфѡ́нъ в҃.
А҆́ще не гдⷭ҇ь бы бы́лъ въ на́съ, кто̀ дово́ленъ цѣ́лъ сохране́нъ бы́ти ѿ врага̀ кꙋ́пнѡ и҆ человѣкоꙋбі́йцы;
Зꙋбѡ́мъ и҆́хъ не преда́ждь сп҃се твоего̀ раба̀: и҆́бо льво́вымъ ѡ҆́бразомъ на мѧ̀ подвиза́ютсѧ вразѝ моѝ.
Сла́ва: Ст҃о́мꙋ дх҃ꙋ живонача́лїе и҆ че́сть: всѧ̑ бо созда̑ннаѧ, ꙗ҆́кѡ бг҃ъ сы́й: си́лою соблюда́етъ во ѻ҆ц҃ѣ̀, сн҃омъ же.
И҆ ны́нѣ, то́йже.
А҆нтїфѡ́нъ г҃:
Надѣ́ющїисѧ на гдⷭ҇а ᲂу҆подо́бишасѧ горѣ̀ ст҃ѣ́й, и҆̀же ника́коже дви́жꙋтсѧ прило́ги вра́жїими.
Въ беззако́нїи рꙋ́къ свои́хъ да не прострꙋ́тъ бж҃е́ственнѣ живꙋ́щїи: не ѡ҆ставлѧ́етъ бо хрⷭ҇то́съ жезла̀ на жре́бїи свое́мъ.
Сла́ва: Ст҃ы́мъ дх҃омъ то́читсѧ всѧ́ка премꙋ́дрость, ѿсю́дꙋ бл҃года́ть а҆пⷭ҇лѡмъ, и҆ страда́льчествы вѣнча́ютсѧ мч҃нцы, и҆ прⷪ҇ро́цы зрѧ́тъ.
И҆ ны́нѣ, то́йже.
Гла́съ г҃.
А҆нтїфѡ́нъ а҃:
Плѣ́нъ сїѡ́нь ты̀ и҆з̾ѧ́лъ є҆сѝ ѿ вавѷлѡ́на, и҆ менѐ ѿ страсте́й къ животꙋ̀ привлецы̀ сло́ве.
Въ ю҆́гъ сѣ́ющїи слеза́ми бж҃е́ственными, жнꙋ́тъ кла́сы ра́достїю присноживо́тїѧ.
Сла́ва: Ст҃о́мꙋ дх҃ꙋ всѧ́кое бл҃года́рїе, ꙗ҆́коже ѻ҆ц҃ꙋ̀ и҆ сн҃ꙋ соѡблиста́етъ, въ не́мже всѧ̑ живꙋ́тъ и҆ дви́жꙋтсѧ.
И҆ ны́нѣ, то́йже.
А҆нтїфѡ́нъ в҃:
А҆́ще не гдⷭ҇ь сози́ждетъ до́мъ добродѣ́телей, всꙋ́е трꙋжда́емсѧ: дꙋ́шꙋ же покрыва́ющꙋ, никто́же на́шъ разори́тъ гра́дъ.
Плода̀ чре́вна дх҃омъ сынотворе́нное тебѣ̀ хрⷭ҇тꙋ̀, ꙗ҆́коже и҆ ѻ҆ц҃ꙋ̀, ст҃і́и всегда̀ сꙋ́ть.
Сла́ва: Ст҃ы́мъ дх҃омъ прозри́тсѧ всѧ́каѧ ст҃ы́нѧ, премꙋ́дрость, ѡ҆сꙋществꙋ́етъ бо всѧ́кꙋю тва́рь: томꙋ̀ послꙋ́жимъ, бг҃ъ бо, ꙗ҆́кѡ ѻ҆ц҃ꙋ́ же и҆ сло́вꙋ.
И҆ ны́нѣ, то́йже.
А҆нтїфѡ́нъ г҃:
Боѧ́щїисѧ гдⷭ҇а бл҃же́ни, въ пꙋтѝ ходѧ́ще за́повѣдей, снѣдѧ́тъ бо живо́тное всепло́дїе.
Ѻ҆́крестъ трапе́зы твоеѧ̀ возвесели́сѧ, твоѧ̑ пастыренача́льниче и҆сча̑дїѧ, носѧ̑ща вѣ̑тви бл҃годѣ́ланїѧ.
Сла́ва: Ст҃ы́мъ дх҃омъ всѧ́кое бога́тство сла́вы, ѿ негѡ́же бл҃года́ть и҆ живо́тъ всѧ́кой тва́ри: со ѻ҆ц҃е́мъ бо воспѣва́емь є҆́сть и҆ съ сло́вомъ.
И҆ ны́нѣ, то́йже.
Гла́съ д҃.
А҆нтїфѡ́нъ а҃:
Ѿ ю҆́ности моеѧ̀ мно́зи бо́рютъ мѧ̀ стра̑сти: но са́мъ мѧ̀ застꙋпѝ, и҆ сп҃сѝ сп҃се мо́й.
Ненави́дѧщїи сїѡ́на, посрами́тесѧ ѿ гдⷭ҇а: ꙗ҆́кѡ трава́ бо ѻ҆гне́мъ бꙋ́дете и҆зсо́хше.
Сла́ва: Ст҃ы́мъ дх҃омъ всѧ́ка дꙋша̀ живи́тсѧ, и҆ чистото́ю возвыша́етсѧ, свѣтлѣ́етсѧ трⷪ҇ческимъ є҆ди́нствомъ сщ҃еннота́йнѣ.
И҆ ны́нѣ, то́йже.
А҆нтїфѡ́нъ в҃: Воззва́хъ тебѣ̀ гдⷭ҇и, те́плѣ и҆з̾ глꙋбины̀ дꙋшѝ моеѧ̀, и҆ мнѣ̀ да бꙋ́дꙋтъ на послꙋша́нїе бж҃е́ствєннаѧ твоѧ̑ ᲂу҆шеса̀.
На гдⷭ҇а наде́ждꙋ всѧ́къ кто̀ стѧжа́въ, вы́шшїй є҆́сть всѣ́хъ скорбѧ́щихъ.
Сла́ва: Ст҃ы́мъ дх҃омъ то́чатсѧ бл҃года̑тныѧ стрꙋи̑, напаѧ́ющѧ всѧ́кꙋ тва́рь ко ѡ҆живле́нїю.
И҆ ны́нѣ, то́йже.
А҆нтїфѡ́нъ г҃:
Се́рдце моѐ къ тебѣ̀ сло́ве да возвы́ситсѧ, и҆ да ничто́же ᲂу҆слади́тъ мѧ̀ ѿ мїрски́хъ красо́тъ на сла́бость.
Къ ма́тери свое́й ꙗ҆́коже и҆́мать кто̀ любо́вь, ко гдⷭ҇ꙋ те́пльше любле́нїемъ до́лжни є҆смы̀.
Сла́ва: Ст҃ы́мъ дх҃омъ бг҃овѣ́дѣнїѧ бога́тство, зрѣ́нїѧ и҆ премꙋ́дрости: всѧ̑ бо въ се́мъ ѻ҆ч҃єскаѧ велѣ̑нїѧ сло́во ѿкрыва́етъ.
И҆ ны́нѣ, то́йже.
Гла́съ є҃.
А҆нтїфѡ́нъ а҃:
Внегда̀ скорбѣ́ти мнѣ̀ дв҃дски пою̀ тебѣ̀, сп҃се мо́й: и҆зба́ви дꙋ́шꙋ мою̀ ѿ ѧ҆зы́ка льсти́вагѡ.
Пꙋсты́ннымъ живо́тъ бл҃же́нъ є҆́сть, бж҃е́ственнымъ раче́нїемъ воскрилѧ́ющымсѧ.
Сла́ва: Ст҃ы́мъ дх҃омъ ѡ҆держа́тсѧ всѧ̑, ви̑димаѧ же съ неви́димыми, самодержа́венъ бо сы́й трⷪ҇цы є҆ди́нъ є҆́сть нело́жнѡ.
И҆ ны́нѣ, то́йже.
А҆нтїфѡ́нъ в҃: На го́ры, дꙋшѐ, воздви́гнемсѧ, грѧдѝ та́мѡ, ѿню́дꙋже по́мощь и҆́детъ.
Десна́ѧ твоѧ̀ рꙋка̀, и҆ менѐ, хрⷭ҇тѐ, каса́ющаѧсѧ, ѿ ле́сти всѧ́кїѧ да сохрани́тъ.
Сла́ва: Ст҃о́мꙋ дх҃ꙋ бг҃осло́вѧще рце́мъ: ты̀ є҆сѝ бг҃ъ, живо́тъ, раче́нїе, свѣ́тъ, ᲂу҆́мъ: ты̀ бл҃госты́нѧ, ты̀ црⷭ҇твꙋеши во вѣ́ки.
И҆ ны́нѣ, то́йже.
А҆нтїфѡ́нъ г҃:
Ѡ҆ ре́кшихъ мнѣ̀, во дворы̀ вни́демъ гдⷭ҇нѧ, ра́дости мно́гїѧ и҆спо́лненъ бы́въ, мл҃твы возсыла́ю.
Въ домꙋ̀ дв҃довѣ стра̑шнаѧ соверша́ютсѧ: ѻ҆́гнь бо та́мѡ палѧ̀ всѧ́къ сра́мный ᲂу҆́мъ.
Сла́ва: Ст҃о́мꙋ дх҃ꙋ живонача́льное досто́инство, ѿ негѡ́же всѧ́кое живо́тно ѡ҆дꙋшевлѧ́етсѧ: ꙗ҆́кѡ во ѻ҆ц҃ѣ̀, кꙋ́пнѡ же и҆ сло́вѣ.
И҆ ны́нѣ, то́йже.
Гла́съ ѕ҃.
А҆нтїфѡ́нъ а҃:
На нб҃о ѻ҆́чи моѝ возвожꙋ̀ къ тебѣ̀, сло́ве: ᲂу҆ще́дри мѧ̀, да живꙋ̀ тебѣ̀.
Поми́лꙋй на́съ ᲂу҆ничиже́нныхъ, ᲂу҆строѧ́ѧ бл҃гопотрє́бныѧ твоѧ̑ сосꙋ́ды, сло́ве.
Сла́ва: Ст҃о́мꙋ дх҃ꙋ, всѧ́каѧ всесп҃си́тельнаѧ вина̀, а҆́ще ко́емꙋ се́й по достоѧ́нїю дхне́тъ, ско́рѡ взе́млетъ ѿ земны́хъ, восперѧ́етъ, возраща́етъ, ᲂу҆строѧ́етъ горѣ̀.
И҆ ны́нѣ, то́йже.
А҆нтїфѡ́нъ в҃:
А҆́ще не гдⷭ҇ь бы бы́лъ въ на́съ, никто́же ѿ на́съ проти́вꙋ возмо́глъ бы вра̑жїимъ бра́немъ ѡ҆долѣ́ти: побѣжда́ющїи бо ѿ здѣ̀ возно́сѧтсѧ.
Зꙋбы̀ и҆́хъ да не ꙗ҆́та бꙋ́детъ дꙋша̀ моѧ̀, ꙗ҆́кѡ птене́цъ, сло́ве: ᲂу҆вы̀ мнѣ̀, ка́кѡ и҆́мамъ ѿ врага̀ и҆збы́ти, грѣхолюби́въ сы́й;
Сла́ва: Ст҃ы́мъ дх҃омъ ѡ҆боже́нїе всѣ̑мъ, бл҃говоле́нїе, ра́зꙋмъ, ми́ръ и҆ бл҃гослове́нїе: равнодѣ́тельный бо є҆́сть ѻ҆ц҃ꙋ̀ и҆ сло́вꙋ.
И҆ ны́нѣ, то́йже.
А҆нтїфѡ́нъ г҃:
Надѣ́ющїисѧ на гдⷭ҇а врагѡ́мъ стра́шни, и҆ всѣ̑мъ ди́вни, горѣ́ бо зрѧ́тъ.
Въ беззакѡ́нїѧ рꙋ́къ свои́хъ пра́ведныхъ жре́бїй, помо́щника тѧ̀ и҆мѣ́ѧ, сп҃се, не простира́етъ.
Сла́ва: Ст҃а́гѡ дх҃а держа́ва на всѣ́хъ: є҆мꙋ́же вы̑шнѧѧ вѡ́инства покланѧ́ютсѧ, со всѧ́кимъ дыха́нїемъ до́льнымъ.
И҆ ны́нѣ, то́йже.
Гла́съ з҃.
А҆нтїфѡ́нъ а҃:
Плѣ́нъ сїѡ́нь ѿ ле́сти ѡ҆брати́въ, и҆ менѐ, сп҃се, ѡ҆живѝ, и҆з̾има́ѧ рабо́тныѧ стра́сти.
Въ ю҆́гъ сѣ́ѧй скѡ́рби пѡ́стныѧ со слеза́ми, се́й ра́дѡстныѧ по́жнетъ рꙋкоѧ̑ти присноживопита́нїѧ.
Сла́ва: Ст҃ы́мъ дх҃омъ и҆сто́чникъ бж҃е́ственныхъ сокро́вищь ѿ негѡ́же премꙋ́дрость ра́зꙋмъ, стра́хъ: томꙋ̀ хвала̀ и҆ сла́ва, че́сть и҆ держа́ва.
И҆ ны́нѣ, то́йже.
А҆нтїфѡ́нъ в҃:
А҆́ще не гдⷭ҇ь сози́ждетъ до́мъ дꙋше́вный, всꙋ́е трꙋжда́емсѧ: ра́звѣ бо тогѡ̀ ни дѣѧ́нїе, ни сло́во соверша́етсѧ.
Плода̀ чре́внагѡ, ст҃і́и дх҃одви́жнѡ прозѧба́ютъ ѻ҆те́чєскаѧ преда̑нїѧ, сыноположе́нїѧ.
Сла́ва: Ст҃ы́мъ дх҃омъ, всѧ́чєскаѧ є҆́же бы́ти и҆́мꙋтъ, пре́жде бо всѣ́хъ бг҃ъ, всѣ́хъ гдⷭ҇ьство, свѣ́тъ непристꙋ́пенъ, живо́тъ всѣ́хъ.
И҆ ны́нѣ, то́йже.
А҆нтїфѡ́нъ г҃:
Боѧ́щїисѧ гдⷭ҇а, пꙋти̑ живота̀ ѡ҆брѣ́тше, ны́нѣ и҆ при́снѡ ᲂу҆бл҃жа́ютсѧ сла́вою нетлѣ́нною.
Ѻ҆́крестъ трапе́зы твоеѧ̀, ꙗ҆́кѡ сте́блїе ви́дѧ и҆сча̑дїѧ твоѧ̑, ра́дꙋйсѧ и҆ весели́сѧ, приводѧ̀ сїѧ̑ хрⷭ҇то́ви пастыренача́льникꙋ.
Сла́ва: Ст҃ы́мъ дх҃омъ глꙋбина̀ дарова́нїй, бога́тство сла́вы, сꙋде́бъ глꙋбина̀ ве́лїѧ, є҆диносла́венъ ѻ҆ц҃ꙋ̀, и҆ сн҃ꙋ, слꙋжи́мь бо.
И҆ ны́нѣ, то́йже.
Гла́съ и҃.
А҆нтїфѡ́нъ а҃:
Ѿ ю҆́ности моеѧ̀ вра́гъ мѧ̀ и҆скꙋша́етъ, сластьмѝ пали́тъ мѧ̀: а҆́зъ же надѣ́ѧсѧ на тѧ̀, гдⷭ҇и, побѣжда́ю сего̀.
Ненави́дѧщїи сїѡ́на, да бꙋ́дꙋтъ ᲂу҆́бѡ пре́жде и҆сторже́нїѧ ꙗ҆́кѡ трава̀: ссѣче́тъ бо хрⷭ҇то́съ вы̑ѧ и҆́хъ, ᲂу҆сѣче́нїемъ мꙋ́къ.
Сла́ва: Ст҃ы́мъ дх҃омъ, є҆́же жи́ти всѧ́чєскимъ: свѣ́тъ ѿ свѣ́та, бг҃ъ вели́къ, со ѻ҆ц҃е́мъ пое́мъ є҆мꙋ̀, и҆ сло́вомъ.
И҆ ны́нѣ, то́йже.
А҆нтїфѡ́нъ в҃:
Се́рдце моѐ стра́хомъ твои́мъ да покры́етсѧ, смиренномꙋ́дрствꙋющее: да не возне́сшеесѧ ѿпаде́тъ ѿ тебѐ, всеще́дре.
На гдⷭ҇а и҆мѣ́вый наде́ждꙋ, не ᲂу҆страши́тсѧ тогда̀, є҆гда̀ ѻ҆гне́мъ всѧ̑ сꙋди́ти и҆́мать и҆ мꙋ́кою.
Сла́ва: Ст҃ы́мъ дх҃омъ, всѧ́къ кто̀ бж҃е́ственный ви́дитъ, и҆ предглаго́летъ: чꙋдодѣ́йствꙋетъ вы̑шнѧѧ, въ трїе́хъ є҆ди́наго бг҃а поѧ̀: а҆́ще бо и҆ трисїѧ́етъ, є҆динонача́льствꙋетъ бж҃ество̀.
И҆ ны́нѣ, то́йже.
А҆нтїфѡ́нъ г҃:
Воззва́хъ тебѣ̀, гдⷭ҇и, вонмѝ, приклони́ ми ᲂу҆́хо твоѐ вопїю́щꙋ: и҆ ѡ҆чи́сти, пре́жде да́же не во́змеши менѐ ѿсю́дꙋ.
Къ ма́тери свое́й землѝ ѿходѧ́й всѧ́къ, па́ки разрѣша́етсѧ, прїѧ́ти мꙋ̑ки, и҆лѝ по́чєсти пожи́вшихъ.
Сла́ва: Ст҃ы́мъ дх҃омъ, бг҃осло́вїе, є҆ди́ница трист҃а́ѧ: ѻ҆ц҃ъ бо безнача́ленъ, ѿ негѡ́же роди́сѧ сн҃ъ безлѣ́тнѡ, и҆ дх҃ъ сопресто́ленъ, соѡбра́зенъ, ѿ ѻ҆ц҃а̀ спросїѧ́вшїй.
И҆ ны́нѣ, то́йже.
А҆нтїфѡ́нъ д҃:
Сѐ ны́нѣ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ; въ се́мъ бо гдⷭ҇ь ѡ҆бѣща̀ живо́тъ вѣ́чный.
Ѡ҆ ри́зѣ свое́й, и҆́же крі́ны сє́льныѧ ᲂу҆краша́ѧй повелѣва́етъ, ꙗ҆́кѡ не подоба́етъ пещи́сѧ.
Сла́ва: Ст҃ы́мъ дх҃омъ, є҆динови́дною вино́ю, всѧ̑ содержа́тсѧ миропода́тельнѣ: бг҃ъ бо се́й є҆́сть, ѻ҆ц҃ꙋ̀ же и҆ сн҃ови є҆диносꙋ́щенъ гдⷭ҇ьственнѣ.
И҆ ны́нѣ, то́йже.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.