Бг҃оро́дичны по всѧ̑ дни̑, пое́мїи на сла́вахъ ст҃ы́хъ

Бг҃оро́дичны по всѧ̑ дни̑, пое́мїи на сла́вахъ ст҃ы́хъ

Бг҃оро́дичны ѻ҆смѝ гла́сѡвъ.

Пое́мъ и҆̀хъ, є҆гда̀ є҆́сть Сла́ва ст҃о́мꙋ въ мине́и: И҆ ны́нѣ, по гла́сꙋ сїѧ̑ бг҃оро́дичны пое́мъ:

Гла́съ а҃.

Въ недѣ́лю ве́чера:

Нбⷭ҇ныхъ чи́нѡвъ ра́дованїе, на землѝ человѣ́кѡвъ крѣ́пкое предста́тельство, пречⷭ҇таѧ дв҃о, сп҃сѝ ны̀ и҆̀же къ тебѣ̀ прибѣга́ющыѧ: ꙗ҆́кѡ на тѧ̀ ᲂу҆пова́нїе по бз҃ѣ, бцⷣе, возложи́хомъ.

Въ понедѣ́льникъ на ᲂу҆́трени:

Ст҃ѣ́йшаѧ ст҃ы́хъ всѣ́хъ си́лъ, чⷭ҇тнѣ́йшаѧ всеѧ̀ тва́ри бцⷣе влⷣчце мі́ра, сп҃си́ ны сп҃са ро́ждшаѧ ѿ прегрѣше́нїй тмори́чныхъ и҆ бѣ́дъ, ꙗ҆́кѡ бл҃га́ѧ, мл҃твами твои́ми.

Въ понедѣ́льникъ ве́чера:

Дв҃о всепѣ́таѧ, ю҆́же въ тебѣ̀ та́йнꙋ мѡѷсе́й прⷪ҇ро́ческима ви́дѣ ѻ҆чи́ма, кꙋпинꙋ̀ горѧ́щꙋ и҆ неѡпалѧ́емꙋ, бж҃ества́ бо ѻ҆́гнь ᲂу҆тро́бꙋ твою̀, чⷭ҇таѧ, не ѡ҆палѝ: тѣ́мже мо́лимъ тѧ̀, ꙗ҆́кѡ мт҃рь бг҃а на́шегѡ, ми́ръ и҆спроси́ти мі́рови, и҆ ве́лїю млⷭ҇ть.

Во вто́рникъ ᲂу҆́тра:

Блꙋдни́цꙋ и҆ блꙋ́днаго а҆́зъ, и҆ разбо́йника побѣди́хъ, и҆ мытарѧ̀ прегрѣше́нїи преминꙋ́хъ и҆ нїнеѵі́тѧны: ᲂу҆вы̀ мнѣ̀, что̀ бꙋ́дꙋ; ка́кѡ ᲂу҆бѣ́гнꙋ мꙋ́ки а҆́зъ ѻ҆каѧ́нный; чⷭ҇таѧ, припа́даю тѝ, ᲂу҆ще́дри мѧ̀ млⷭ҇тїю твое́ю, ꙗ҆́коже ѻ҆́ныѧ сн҃ъ тво́й сп҃слъ є҆́сть.

Въ сре́дꙋ ве́чера:

Ра́дꙋйсѧ ра́досте пра́дѣдѡвъ, а҆пⷭ҇лѡвъ, и҆ мч҃нкѡвъ весе́лїе, и҆ покро́въ на́съ дв҃о, твои́хъ рабѡ́въ.

Въ четверто́къ ᲂу҆́тра:

Ра́дꙋйсѧ бцⷣе дв҃о, ра́дꙋйсѧ похвало̀ всеѧ̀ вселе́нныѧ, ра́дꙋйсѧ пречⷭ҇таѧ мт҃и бж҃їѧ бл҃гослове́ннаѧ.

Въ пѧто́къ ве́чера:

Вои́стиннꙋ па́че ᲂу҆ма̀ чꙋ̑днаѧ твоѧ̑ вели̑чїѧ, ржⷭ҇тва̀ твоегѡ̀ бг҃оневѣ́сто, ꙗ҆̀же проповѣ́даша прⷪ҇ро́цы всѝ, всѧ̑ пресла̑внаѧ, зача́тїе и҆ ржⷭ҇тво̀ всепѣ́таѧ недомы́сленно, и҆ несказа́нно: и҆́мже мі́ръ сп҃слъ є҆́сть, ꙗ҆́кѡ милосе́рдъ.

Въ сꙋббѡ́тꙋ ᲂу҆́тра:

Ра́дꙋйсѧ ѿ на́съ ст҃а́ѧ бцⷣе дв҃о, чⷭ҇тый сосꙋ́де всеѧ̀ вселе́нныѧ: свѣщѐ неꙋгаси́маѧ: вмѣсти́лище невмѣсти́магѡ: хра́ме неѡбори́мый. ра́дꙋйсѧ, и҆з̾ неѧ́же роди́сѧ а҆́гнецъ бж҃їй, взе́млѧй грѣхѝ всегѡ̀ мі́ра.

Гла́съ в҃.

Въ недѣ́лю ве́чера:

Ра́дꙋйсѧ мр҃і́е бцⷣе, хра́ме неразрꙋши́мый, па́че же ст҃ы́й, ꙗ҆́коже вопїе́тъ прⷪ҇ро́къ: ст҃ъ хра́мъ тво́й, ди́венъ въ пра́вдѣ.

Въ понедѣ́льникъ ᲂу҆́тра:

На тѧ̀ ᲂу҆пова́нїе, бцⷣе, возложи́хомъ, ча́ѧнїѧ да не ѿпаде́мъ: сп҃сѝ на́съ ѿ бѣ́дъ, помо́щнице недоꙋмѣ́ємымъ, и҆ сопроти́вныхъ совѣ́ты разорѝ: ты́ бо є҆сѝ на́ше сп҃се́нїе, бл҃гослове́ннаѧ.

Въ понедѣ́льникъ ве́чера:

Непроходи̑маѧ врата̀, та́йнѡ запеча̑тствованнаѧ, бл҃гослове́ннаѧ бцⷣе дв҃о: прїимѝ молє́нїѧ на̑ша, и҆ принесѝ твоемꙋ̀ сн҃ꙋ и҆ бг҃ꙋ, да сп҃се́тъ тобо́ю дꙋ́шы на́шѧ.

Во вто́рникъ ᲂу҆́тра:

Ра́дꙋйсѧ мр҃і́е бцⷣе, хра́ме неразрꙋши́мый, па́че же ст҃ы́й, ꙗ҆́коже вопїе́тъ прⷪ҇ро́къ: ст҃ъ хра́мъ тво́й, ди́венъ въ пра́вдѣ.

Въ сре́дꙋ ве́чера:

Ꙗ҆́кѡ плодови́та ма́слина, дв҃а и҆зрастѝ тебѐ плода̀ живо́тнаго, плодоноси́ти мі́рови ве́лїю и҆ бога́тꙋю млⷭ҇ть.

Въ четверто́къ ᲂу҆́тра:

Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.

Въ пѧто́къ ве́чера:

Сп҃сѝ ѿ бѣ́дъ рабы̑ твоѧ̑ бцⷣе дв҃о, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ къ нерꙋши́мѣй стѣнѣ̀ и҆ предста́тельствꙋ.

Въ сꙋббѡ́тꙋ ᲂу҆́тра:

Прїиди́те, мт҃рь свѣ́та, пѣ́сньми немо́лчными зовꙋ́ще, всѝ просла́вимъ, та́ бо родѝ сп҃се́нїе на́ше: и҆ ра́дꙋйсѧ принесе́мъ, ꙗ҆́кѡ є҆ди́ной ро́ждшей всѣ́хъ нача́льнѣйшаго, и҆́же пре́жде вѣ̑къ бг҃а. ра́дꙋйсѧ, ꙗ҆́же є҆́ѵꙋ па́дшꙋю па́ки назда́вшаѧ: ра́дꙋйсѧ, пречⷭ҇таѧ дв҃о неискꙋсобра́чнаѧ.

Гла́съ г҃. Въ недѣ́лю ве́чера:

Бцⷣе, предста́тельнице всѣ́хъ молѧ́щихсѧ тебѣ̀, тобо́ю дерза́емъ, и҆ тобо́ю хва́лимсѧ. и҆ къ тебѣ̀ всѐ ᲂу҆пова́нїе на́ше є҆́сть, молѝ ро́ждшагосѧ и҆з̾ тебѐ за непотрє́бныѧ рабы̑ твоѧ̑.

Въ понедѣ́льникъ ᲂу҆́тра:

Свѧтопервочⷭ҇таѧ похвало̀ сꙋ́щи нбⷭ҇ныхъ чинѡ́въ, а҆пⷭ҇лѡвъ пѣ́нїе, и҆ прⷪ҇ро́кѡвъ сбытїѐ, влⷣчце, прїимѝ мл҃твы на́шѧ.

Въ понедѣ́льникъ ве́чера:

Въ жена́хъ ст҃а́ѧ бцⷣе, мт҃и безневѣ́стнаѧ, молѝ є҆го́же родила̀ є҆сѝ, цр҃ѧ̀ и҆ бг҃а, да сп҃се́тъ на́съ ꙗ҆́кѡ чл҃вѣколю́бецъ.

Во вто́рникъ ᲂу҆́тра:

Без̾ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ прест҃а́ѧ дв҃о.

Въ сре́дꙋ ве́чера:

Вельмѝ согрѣша́юща мѧ̀ ѻ҆трокови́це, и҆схитѝ вели́кою твое́ю мл҃твою пла́мене нꙋ́жнагѡ: и҆ и҆спра́ви чⷭ҇таѧ твои́ми мольба́ми, ко сп҃сє́ннымъ стезѧ́мъ наставлѧ́ющи мѧ̀, мт҃рними твои́ми мл҃твами.

Въ четверто́къ ᲂу҆́тра:

Без̾ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ, прест҃а́ѧ дв҃о.

Въ пѧто́къ ве́чера:

Въ жена́хъ ст҃а́ѧ бцⷣе, мт҃и безневѣ́стнаѧ, молѝ є҆го́же родила̀ є҆сѝ, цр҃ѧ̀ и҆ бг҃а, да сп҃се́тъ на́съ ꙗ҆́кѡ чл҃вѣколю́бецъ.

Въ сꙋббѡ́тꙋ ᲂу҆́тра:

Без̾ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ, прест҃а́ѧ дв҃о.

Гла́съ д҃.

Въ недѣ́лю ве́чера:

Ра́дꙋйсѧ, свѣ́та ѻ҆́блаче. ра́дꙋйсѧ, свѣ́щниче свѣ́тлый. ра́дꙋйсѧ, рꙋ́чко, въ не́йже ма́нна. ра́дꙋйсѧ, же́зле а҆арѡ́новъ. ра́дꙋйсѧ, кꙋпино̀ неѡпали́маѧ. ра́дꙋйсѧ, черто́же. ра́дꙋйсѧ, прⷭ҇то́ле. ра́дꙋйсѧ, горо̀ ст҃а́ѧ. ра́дꙋйсѧ, прибѣ́жище. ра́дꙋйсѧ, бж҃е́ственнаѧ трапе́зо. ра́дꙋйсѧ, две́ре та́йнаѧ. ра́дꙋйсѧ, всѣ̑мъ ра́досте.

Въ понедѣ́льникъ ᲂу҆́тра:

Бцⷣе всѣ́хъ цр҃и́це, правосла́вныхъ похвало̀, є҆реті́чествꙋющихъ шата̑нїѧ разорѝ, и҆ ли́ца и҆́хъ посрамѝ, не кла́нѧющихсѧ, нижѐ чтꙋ́щихъ пречⷭ҇таѧ, чⷭ҇тны́й тво́й ѡ҆́бразъ.

Въ понедѣ́льникъ ве́чера:

И҆зба́ви на́съ ѿ нꙋ́ждъ на́шихъ, мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ зове́мъ тѝ: ра́дꙋйсѧ, є҆ди́но предста́тельство дꙋ́шъ на́шихъ.

Во вто́рникъ ᲂу҆́тра:

Ѿ всѣ́хъ бѣ́дъ рабы̑ твоѧ̑ сохранѧ́й, бл҃гослове́ннаѧ бцⷣе: да тѧ̀ сла́вимъ, наде́ждꙋ дꙋ́шъ на́шихъ.

Въ сре́дꙋ ве́чера:

И҆мꙋ́ще тѧ̀ бцⷣе, ᲂу҆пова́нїе и҆ предста́тельство, вра́жїихъ навѣ̑тъ не ᲂу҆бои́мсѧ, ꙗ҆́кѡ сп҃са́еши дꙋ́шы на́шѧ.

Въ четверто́къ ᲂу҆́тра:

Тѧ̀ стѣ́нꙋ стѧжа́хомъ, бцⷣе пречⷭ҇таѧ, и҆ бл҃гоꙋти́шное приста́нище и҆ ᲂу҆твержде́нїе. тѣ́мъ молю́сѧ и҆́же въ житїѝ ѡ҆бꙋрева́емь, ѡ҆кормѝ, и҆ сп҃си́ мѧ.

Въ пѧто́къ ве́чера:

Свѣщѐ неꙋгаси́маѧ, прⷭ҇то́ле првⷣный, пречⷭ҇таѧ влⷣчце, молѝ сп҃сти́сѧ дꙋша́мъ на́шымъ.

Въ сꙋббѡ́тꙋ ᲂу҆́тра:

Є҆ди́на чⷭ҇таѧ и҆ пречⷭ҇таѧ дв҃о, ꙗ҆́же бг҃а безсѣ́меннѡ ро́ждшаѧ, молѝ сп҃сти́сѧ дꙋша́мъ на́шымъ.

Гла́съ є҃.

Въ недѣ́лю ве́чера:

Стра́шно и҆ пресла́вно, и҆ ве́лїе та́инство: невмѣсти́мый во чре́вѣ вмѣсти́сѧ, и҆ мт҃и по ржⷭ҇твѣ̀ па́ки пребы́сть дв҃а: бг҃а бо родѝ и҆з̾ неѧ̀ воплоще́нна. томꙋ̀ возопїи́мъ, томꙋ̀ пѣ́снь рце́мъ, со а҆́гг҃лы воспѣва́юще: ст҃ъ є҆сѝ хрⷭ҇тѐ бж҃е, и҆́же на́съ ра́ди вочл҃вѣ́чивыйсѧ, сла́ва тебѣ̀.

Въ понедѣ́льникъ ᲂу҆́тра:

Ѡ҆бра́дованнаѧ, хода́тайствꙋй твои́ми моли́твами, и҆ и҆спросѝ дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ.

Въ понедѣ́льникъ ве́чера:

Оу҆толѝ бѡлѣ́зни многовоздыха́ющїѧ дꙋшѝ моеѧ̀, ᲂу҆толи́вшаѧ всѧ́кꙋ сле́зꙋ ѿ лица̀ землѝ. ты́ бо человѣ́кѡвъ бѡлѣ́зни ѿго́ниши, и҆ грѣ́шныхъ скѡ́рби разрꙋша́еши: тебе́ бо всѝ стѧжа́хомъ наде́ждꙋ и҆ ᲂу҆твержде́нїе, прест҃а́ѧ мт҃и дв҃о.

Во вто́рникъ ᲂу҆́тра:

Ѡ҆бра́дованнаѧ, хода́тайствꙋй твои́ми моли́твами, и҆ и҆спросѝ дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ.

Въ сре́дꙋ ве́чера:

Бл҃жи́мъ тѧ̀ бцⷣе дв҃о, и҆ сла́вимъ тѧ̀ вѣ́рнїи по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ, и҆ прибѣ́жище дꙋ́шъ на́шихъ.

Въ четверто́къ ᲂу҆́тра:

Бл҃жи́мъ тѧ̀ бцⷣе дв҃о, ꙗ҆́кѡ и҆з̾ тебѐ возсїѧ̀ сл҃нце пра́вды хрⷭ҇то́съ, и҆мѣ́ѧй ве́лїю млⷭ҇ть.

Въ пѧто́къ ве́чера:

Тебѣ̀ мо́лимсѧ ꙗ҆́кѡ бж҃їи мт҃ри, бл҃гослове́ннаѧ, молѝ ѡ҆ сп҃се́нїи дꙋ́шъ на́шихъ.

Въ сꙋббѡ́тꙋ ᲂу҆́тра:

Ѽле ѡ҆каѧ́ннаѧ дꙋшѐ! кі́и ѿвѣ́тъ и҆́маши рещѝ сꙋдїѝ во ѻ҆́нъ ча́съ, є҆гда̀ престо́ли поста́вѧтсѧ на сꙋдѣ̀, и҆ сꙋдїѧ̀ прїи́детъ ѿ нб҃съ, соше́дъ со тьма́ми а҆́гг҃льскими; є҆гда̀ сѧ́детъ на сꙋди́щи, прю̀ сотвори́ти съ рабы̑ непотре́бными, подо́бными мнѣ̀, что̀ ѿвѣща́ти и҆́маши; что́ же принестѝ тогда̀; пои́стиннѣ ничто́же, ᲂу҆́мъ и҆ тѣ́ло ѡ҆скверни́вши твоѐ. тѣ́мже припадѝ къ дв҃ѣ, и҆ зовѝ непреста́ннѡ, пода́ти тебѣ̀ бога́тнѡ грѣхѡ́въ проще́нїе.

Гла́съ ѕ҃.

Въ недѣ́лю ве́чера:

А҆рха́гг҃льски воспои́мъ вѣ́рнїи, нбⷭ҇ный черто́гъ, и҆ две́рь запеча́танꙋ вои́стиннꙋ: ра́дꙋйсѧ, є҆ѧ́же ра́ди ѿрастѐ на́мъ сп҃съ всѣ́хъ хрⷭ҇то́съ, жизнода́вецъ и҆ бг҃ъ. низложѝ влⷣчце мꙋчи́тели, безбѡ́жныѧ врагѝ на́шѧ, рꙋко́ю твое́ю пречⷭ҇таѧ, ᲂу҆пова́нїе хрⷭ҇тїа́нъ.

Въ понедѣ́льникъ ᲂу҆́тра:

А҆рха́гг҃льское сло́во прїѧ́ла є҆сѝ, и҆ херꙋві́мскїй прⷭ҇то́лъ показа́ласѧ є҆сѝ, и҆ на ѡ҆б̾ѧ́тїихъ твои́хъ носи́ла є҆сѝ бцⷣе, наде́ждꙋ дꙋ́шъ на́шихъ.

Въ понедѣ́льникъ ве́чера:

Никто́же притека́ѧй къ тебѣ̀ посра́мленъ ѿ тебѐ и҆схо́дитъ, пречⷭ҇таѧ бцⷣе дв҃о: но про́ситъ бл҃года́ти, и҆ прїе́млетъ дарова́нїе къ поле́зномꙋ проше́нїю.

Во вто́рникъ ᲂу҆́тра:

Вели́кихъ дарова́нїй чⷭ҇таѧ дв҃о бг҃омт҃и, ты̀ сподо́биласѧ є҆сѝ, ꙗ҆́кѡ родила̀ є҆сѝ пло́тїю є҆ди́наго ѿ трⷪ҇цы, хрⷭ҇та̀ жизнода́вца, во сп҃се́нїе дꙋ́шъ на́шихъ.

Въ сре́дꙋ ве́чера:

Ѻ҆́ко се́рдца моегѡ̀ воспꙋща́ю къ тебѣ̀ влⷣчце: не пре́зри ма́лагѡ моегѡ̀ воздыха́нїѧ, въ ча́съ є҆гда̀ сꙋ́дитъ сн҃ъ тво́й мі́рꙋ, бꙋ́ди мѝ покро́въ и҆ помо́щница.

Въ четверто́къ ᲂу҆́тра:

Преложе́нїе скорбѧ́щихъ, премѣне́нїе болѧ́щихъ є҆сѝ бцⷣе всепѣ́таѧ, сп҃сѝ гра́дъ и҆ лю́ди, бори́мыхъ ᲂу҆мире́нїе, ѡ҆бꙋрева́емыхъ тишина̀, є҆ди́на предста́тельнице вѣ́рныхъ.

Въ пѧто́къ ве́чера:

Мл҃твами ро́ждшїѧ тѧ̀ хрⷭ҇тѐ, мч҃нкъ твои́хъ, и҆ а҆пⷭ҇лъ, и҆ прⷪ҇рѡ́къ, и҆ ст҃и́телей, прпⷣбныхъ и҆ првⷣныхъ, и҆ всѣ́хъ ст҃ы́хъ, ᲂу҆со́пшыѧ рабы̑ твоѧ̑ ᲂу҆поко́й.

Въ сꙋббѡ́тꙋ ᲂу҆́тра:

Бг҃а и҆з̾ тебѐ воплоти́вшагосѧ разꙋмѣ́хъ бцⷣе дв҃о: того̀ молѝ ѡ҆ сп҃се́нїи дꙋ́шъ на́шихъ.

Гла́съ з҃.

Въ недѣ́лю ве́чера:

Є҆́же ра́дꙋйсѧ, тебѣ̀ зове́мъ со а҆́гг҃ломъ, бг҃оневѣ́сто, черто́гъ и҆ две́рь, и҆ прⷭ҇то́лъ ѻ҆́гненный нарица́юще тебѐ, и҆ несѣко́мꙋю го́рꙋ, и҆ кꙋпинꙋ̀ неѡпали́мꙋю.

Въ понедѣ́льникъ ᲂу҆́тра:

Оу҆мирѝ мл҃твами бцⷣы жи́знь на́шꙋ, вопїю́щихъ тѝ: млⷭ҇тиве гдⷭ҇и, сла́ва тебѣ̀.

Въ понедѣ́льникъ ве́чера:

Ра́дꙋйсѧ со́лнца ѻ҆́блаче мы́сленнагѡ и҆ неизрече́ннагѡ влⷣчце, ра́дꙋйсѧ всесвѣ́тлаѧ свѣщѐ, ра́дꙋйсѧ свѣ́щниче всезлаты́й: тобо́ю прест҃а́ѧ, є҆́ѵа и҆зба́висѧ ѿ клѧ́твы. но, ꙗ҆́кѡ и҆мꙋ́щи дерзнове́нїе ко бл҃гопремѣ́нномꙋ сн҃ꙋ твоемꙋ̀ и҆ бг҃ꙋ, мт҃рнею твое́ю мл҃твою не ѡ҆скꙋдѣ́й моли́тисѧ пречⷭ҇таѧ.

Во вто́рникъ ᲂу҆́тра:

Свѣ́тъ хрⷭ҇тѐ прозѧ́блъ є҆сѝ ѿ дв҃ы, и҆ просвѣти́лъ є҆сѝ ро́дъ человѣ́ческїй: гдⷭ҇и, сла́ва тебѣ̀.

Въ сре́дꙋ ве́чера:

Є҆ди́нꙋ по ржⷭ҇твѣ̀ пречⷭ҇тꙋю дв҃ꙋ воспои́мъ, ꙗ҆́кѡ мт҃рь бг҃а сло́ва, глаго́люще: сла́ва тебѣ̀.

Въ четверто́къ ᲂу҆́тра:

Роди́лсѧ є҆сѝ ѿ дв҃ы несказа́ннѡ хрⷭ҇тѐ, и҆ просвѣти́лъ є҆сѝ сꙋ́щыѧ во тьмѣ̀, вопїю́щыѧ: гдⷭ҇и сла́ва тебѣ̀.

Въ пѧто́къ ве́чера:

Ꙗ҆́же є҆ди́на невмѣсти́маго прїи́мши, и҆ ро́ждши бг҃а сло́ва воплоще́нна, молѝ сп҃сти́сѧ дꙋша́мъ на́шымъ.

Въ сꙋббѡ́тꙋ ᲂу҆́тра:

Молѝ дв҃о, со а҆пⷭ҇лы и҆ мч҃нки, ѡ҆брѣстѝ на сꙋдѣ̀ преста́вльшымсѧ ве́лїю млⷭ҇ть.

Гла́съ и҃.

Въ недѣ́лю ве́чера:

А҆рха́гг҃ла гаврїи́ла гла́съ воспрїи́мше рце́мъ: ра́дꙋйсѧ мт҃и бж҃їѧ, ꙗ҆́же жизнода́вца хрⷭ҇та̀ мі́рꙋ ро́ждши.

Въ понедѣ́льникъ ᲂу҆́тра:

Нбⷭ҇наѧ пою́тъ тѧ̀, ѡ҆бра́дованнаѧ мт҃и безневѣ́стнаѧ, и҆ мы̀ славосло́вимъ неизслѣ́дованное твоѐ ржⷭ҇тво̀, бцⷣе, молѝ сп҃сти́сѧ дꙋша́мъ на́шымъ.

Въ понедѣ́льникъ ве́чера:

Ра́дꙋйсѧ вселе́нныѧ похвало̀. ра́дꙋйсѧ хра́ме гдⷭ҇нь. ра́дꙋйсѧ горо̀ прїѡсѣне́ннаѧ. ра́дꙋйсѧ всѣ́хъ прибѣ́жище. ра́дꙋйсѧ свѣ́щниче златы́й. ра́дꙋйсѧ сла́во правосла́вныхъ чⷭ҇тна́ѧ. ра́дꙋйсѧ мр҃і́е мт҃и хрⷭ҇та̀ бг҃а. ра́дꙋйсѧ раю̀. ра́дꙋйсѧ бж҃е́ственнаѧ трапе́зо. ра́дꙋйсѧ сѣ́не. ра́дꙋйсѧ рꙋ́чко всезлата́ѧ. ра́дꙋйсѧ всѣ́хъ ᲂу҆пова́нїе.

Во вто́рникъ ᲂу҆́тра:

Кро́въ тво́й бцⷣе дв҃о, врачевство̀ є҆́сть дх҃о́вное: во́нь бо прибѣга́юще, ѿ дꙋше́вныхъ недꙋ̑гъ и҆збавлѧ́емсѧ.

Въ сре́дꙋ ве́чера:

А҆́зъ, дв҃о ст҃а́ѧ бцⷣе, къ покро́вꙋ твоемꙋ̀ прибѣга́ю: вѣ́мъ, ꙗ҆́кѡ ѡ҆брѧ́щꙋ тобо́ю сп҃се́нїе, мо́жеши бо чⷭ҇таѧ, помощѝ мнѣ̀.

Въ четверто́къ ᲂу҆́тра:

И҆схи́ти мѧ̀ влⷣчце, рꙋкѝ ѕмі́ѧ человѣкоꙋбі́йцы, хотѧ́ща мѧ̀ лꙋка́вствомъ поглоти́ти до конца̀: сокрꙋшѝ чє́люсти є҆гѡ̀, молю́ тѧ, и҆ кѡ́зни разорѝ, ꙗ҆́кѡ да и҆збы́въ ѿ ногте́й є҆гѡ̀, велича́ю застꙋпле́нїе твоѐ.

Въ пѧто́къ ве́чера:

Чⷭ҇таѧ дв҃о, сло́ва врата̀, бг҃а на́шегѡ мт҃и, молѝ сп҃сти́сѧ на́мъ.

Въ сꙋббѡ́тꙋ ᲂу҆́тра:

Влⷣчце, прїимѝ мл҃твы рабѡ́въ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.