Час третий
Нача́ло часѡ́въ
Ча́съ тре́тїй
По є҆́же бл҃гослови́ти сщ҃е́нникꙋ, глаго́лемъ: А҆ми́нь.
Сла́ва тебѣ̀ бж҃е на́шъ, сла́ва тебѣ̀.
Цр҃ю̀ нбⷭ҇ный, ᲂу҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище бл҃ги́хъ и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ сп҃сѝ бл҃же, дꙋ́шы на́шѧ.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды.
Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.
Гдⷭ҇и поми́лꙋй, три́жды.
Сла́ва, и҆ ны́нѣ:
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ, да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Сщ҃е́нникъ: Ꙗ҆́кѡ твоѐ є҆́сть црⷭ҇тво:
Та́же, Гдⷭ҇и поми́лꙋй, в҃і.
Сла́ва, и҆ ны́нѣ:
Прїиди́те, поклони́мсѧ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.
Та́же ѱалмы̀:
Оу҆слы́ши[[Ѱ. ѕ҃і]] гдⷭ҇и, пра́вдꙋ мою̀, вонмѝ моле́нїю моемꙋ̀, внꙋшѝ мл҃твꙋ мою̀ не во ᲂу҆стна́хъ льсти́выхъ. Ѿ лица̀ твоегѡ̀ сꙋдьба̀ моѧ̀ и҆зы́детъ, ѻ҆́чи моѝ да ви́дита правоты̑. И҆скꙋси́лъ є҆сѝ се́рдце моѐ, посѣти́лъ є҆сѝ но́щїю, и҆скꙋси́лъ мѧ̀ є҆сѝ, и҆ не ѡ҆брѣ́тесѧ во мнѣ̀ непра́вда. Ꙗ҆́кѡ да не возглаго́лютъ ᲂу҆ста̀ моѧ̑ дѣ́лъ человѣ́ческихъ, за словеса̀ ᲂу҆сте́нъ твои́хъ, а҆́зъ сохрани́хъ пꙋти̑ же́стоки. Совершѝ стѡпы̀ моѧ̑ во стезѧ́хъ твои́хъ, да не подви́жꙋтсѧ стѡпы̀ моѧ̑. а҆́зъ воззва́хъ, ꙗ҆́кѡ ᲂу҆слы́шалъ мѧ̀ є҆сѝ бж҃е, приклонѝ ᲂу҆́хо твоѐ мнѣ̀, и҆ ᲂу҆слы́ши глаго́лы моѧ̑. Оу҆дивѝ млⷭ҇ти твоѧ̑, сп҃са́ѧй ᲂу҆пова́ющыѧ на тѧ̀ ѿ проти́вѧщихсѧ десни́цѣ твое́й. Сохрани́ мѧ гдⷭ҇и, ꙗ҆́кѡ зѣ́ницꙋ ѻ҆́ка: въ кро́вѣ крилꙋ̀ твоє́ю покры́еши мѧ̀, Ѿ лица̀ нечести́выхъ ѡ҆стра́стшихъ мѧ̀. вразѝ моѝ дꙋ́шꙋ мою̀ ѡ҆держа́ша, тꙋ́къ сво́й затвори́ша: ᲂу҆ста̀ и҆́хъ глаго́лаша горды́ню. И҆згонѧ́щїи мѧ̀ ны́нѣ ѡ҆быдо́ша мѧ̀, ѻ҆́чи своѝ возложи́ша ᲂу҆клони́ти на зе́млю. Ѡ҆б̾ѧ́ша мѧ̀ ꙗ҆́кѡ ле́въ гото́въ на ло́въ, и҆ ꙗ҆́кѡ скѵ́менъ ѡ҆бита́ѧй въ та́йныхъ. Воскрⷭ҇нѝ гдⷭ҇и, предварѝ ѧ҆̀, и҆ запнѝ и҆̀мъ: и҆зба́ви дꙋ́шꙋ мою̀ ѿ нечести́вагѡ, ѻ҆рꙋ́жїе твоѐ ѿ вра̑гъ рꙋкѝ твоеѧ̀. Гдⷭ҇и, ѿ ма́лыхъ ѿ землѝ, раздѣлѝ ѧ҆̀ въ животѣ̀ и҆́хъ, и҆ сокрове́нныхъ твои́хъ и҆спо́лнисѧ чре́во и҆́хъ. Насы́тишасѧ сынѡ́въ, и҆ ѡ҆ста́виша ѡ҆ста́нки младе́нцємъ свои̑мъ. А҆́зъ же пра́вдою ꙗ҆влю́сѧ лицꙋ̀ твоемꙋ̀, насы́щꙋсѧ, внегда̀ ꙗ҆ви́ти ми сѧ сла́вѣ твое́й.
Къ[[Ѱ к҃д]] тебѣ̀ гдⷭ҇и, воздвиго́хъ дꙋ́шꙋ мою̀. бж҃е мо́й, на тѧ̀ ᲂу҆пова́хъ, да не постыжꙋ́сѧ во вѣ́къ, нижѐ да посмѣю́тъ ми сѧ вразѝ моѝ: И҆́бо всѝ терпѧ́щїи тѧ̀ не постыдѧ́тсѧ. Да постыдѧ́тсѧ беззако́ннꙋющїи вотщѐ. Пꙋти̑ твоѧ̑ гдⷭ҇и, скажи́ ми, и҆ стезѧ́мъ твои̑мъ наꙋчи́ мѧ. Наста́ви мѧ̀ на и҆́стинꙋ твою̀, и҆ наꙋчи́ мѧ: ꙗ҆́кѡ ты̀ є҆сѝ бг҃ъ сп҃съ мо́й, и҆ тебѐ терпѣ́хъ ве́сь де́нь. Помѧнѝ щедрѡ́ты твоѧ̑ гдⷭ҇и, и҆ млⷭ҇ти твоѧ̑, ꙗ҆́кѡ ѿ вѣ́ка сꙋ́ть. Грѣ̑хъ ю҆́ности моеѧ̀, и҆ невѣ́дѣнїѧ моегѡ̀ не помѧнѝ: по млⷭ҇ти твое́й помѧни́ мѧ ты̀, ра́ди бл҃гости твоеѧ̀, гдⷭ҇и. Бл҃гъ и҆ пра́въ гдⷭ҇ь, сегѡ̀ ра́ди законоположи́тъ согрѣша́ющымъ на пꙋтѝ. Наста́витъ крѡ́ткїѧ на сꙋ́дъ, наꙋчи́тъ крѡ́ткїѧ пꙋтє́мъ свои̑мъ. Всѝ пꙋтїѐ гдⷭ҇ни млⷭ҇ть и҆ и҆́стина, взыска́ющымъ завѣ́та є҆гѡ̀ и҆ свидѣ́нїѧ є҆гѡ̀. Ра́ди и҆́мене твоегѡ̀ гдⷭ҇и, и҆ ѡ҆чи́сти грѣ́хъ мо́й: мно́гъ бо є҆́сть. Кто̀ є҆́сть человѣ́къ боѧ́йсѧ гдⷭ҇а; законоположи́тъ є҆мꙋ̀ на пꙋтѝ, є҆го́же и҆зво́ли. Дꙋша̀ є҆гѡ̀ во бл҃ги́хъ водвори́тсѧ, и҆ сѣ́мѧ є҆гѡ̀ наслѣ́дитъ зе́млю. Держа́ва гдⷭ҇ь боѧ́щихсѧ є҆гѡ̀, и҆ завѣ́тъ є҆гѡ̀ ꙗ҆ви́тъ и҆̀мъ. Ѻ҆́чи моѝ вы́нꙋ ко гдⷭ҇ꙋ, ꙗ҆́кѡ то́й и҆сто́ргнетъ ѿ сѣ́ти но́зѣ моѝ. При́зри на мѧ̀, и҆ поми́лꙋй мѧ̀, ꙗ҆́кѡ є҆диноро́дъ и҆ ни́щь є҆́смь а҆́зъ. Скѡ́рби се́рдца моегѡ̀ ᲂу҆мно́жишасѧ, ѿ нꙋ́ждъ мои́хъ и҆зведи́ мѧ. Ви́ждь смире́нїе моѐ и҆ трꙋ́дъ мо́й, и҆ ѡ҆ста́ви всѧ̑ грѣхѝ моѧ̑. Ви́ждь врагѝ моѧ̑, ꙗ҆́кѡ ᲂу҆мно́жишасѧ, и҆ ненавидѣ́нїемъ непра́веднымъ возненави́дѣша мѧ̀. Сохранѝ дꙋ́шꙋ мою̀, и҆ и҆зба́ви мѧ̀, да не постыжꙋ́сѧ, ꙗ҆́кѡ ᲂу҆пова́хъ на тѧ̀. Неѕло́бивїи и҆ пра́вїи прилѣплѧ́хꙋсѧ мнѣ̀, ꙗ҆́кѡ потерпѣ́хъ тѧ̀ гдⷭ҇и. И҆зба́ви бж҃е, і҆и҃лѧ ѿ всѣ́хъ скорбе́й є҆гѡ̀.
Поми́лꙋй[[Ѱ. н҃]] мѧ̀ бж҃е, по вели́цѣй ми́лости твое́й и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. Наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. Ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. Тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ, ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши, внегда̀ сꙋди́ти тѝ. Се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. Се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ᲂу҆бѣлю́сѧ. Слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. Се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й. Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ. Возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожже́нїѧ не бл҃говоли́ши. Же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ. Оу҆бл҃жѝ гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. Тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.
Сла́ва, и҆ ны́нѣ:
А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды.
Гдⷭ҇и поми́лꙋй, три́жды.
И҆ а҆́ще ᲂу҆́бѡ Бг҃ъ гдⷭ҇ь пое́тсѧ, глаго́ли: Сла́ва, днѐ тропа́рь. И҆ ны́нѣ:
Бцⷣе, ты̀ є҆сѝ лоза̀ и҆́стиннаѧ:
А҆́ще же а҆ллилꙋ́їа, глаго́ли настоѧ́щїй тропа́рь, во гла́съ ѕ҃:
Гдⷭ҇и, и҆́же прест҃а́го твоего̀ дх҃а, въ тре́тїй ча́съ а҆пⷭ҇лѡмъ твои̑мъ низпосла́вый: тогѡ̀ бл҃гі́й, не ѿимѝ ѿ на́съ, но ѡ҆бновѝ на́съ молѧ́щихъ ти сѧ.
Сті́хъ а҃: Се́рдце чи́сто сози́жди во мнѣ̀ бж҃е, и҆ дх҃ъ пра́въ ѡ҆бновѝ во ᲂу҆тро́бѣ мое́й.
Сті́хъ в҃: Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ.
Къ си̑мъ же стїхѡ́мъ припѣва́емъ:
Гдⷭ҇и, и҆́же прест҃а́го твоего̀ дх҃а: ве́сь до конца̀, и҆ покланѧ́емсѧ по є҆ди́ножды. Та́же, Сла́ва, и҆ ны́нѣ, бг҃оро́диченъ:
Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ, моли́сѧ влⷣчце со ст҃ы́ми а҆пⷭ҇лы, поми́ловати дꙋ́шы на́шѧ.
Гдⷭ҇ь бг҃ъ бл҃гослове́нъ, бл҃гослове́нъ гдⷭ҇ь де́нь днѐ, поспѣши́тъ на́мъ бг҃ъ сп҃се́нїй на́шихъ: бг҃ъ на́шъ, бг҃ъ сп҃са́ти.
Трист҃о́е. По Ѻ҆́ч҃е на́шъ:
Конда́къ днѐ ст҃а́гѡ, и҆лѝ пра́здника. А҆́ще же по́стъ, сїѧ̑ глаго́лемъ тропарѝ, гла́съ и҃:
Бл҃гослове́нъ є҆сѝ хрⷭ҇тѐ бж҃е на́шъ, и҆́же премꙋ́дры ловцы̀ ꙗ҆вле́й, низпосла́въ и҆̀мъ дх҃а ст҃а́го, и҆ тѣ́ми ᲂу҆ловле́й вселе́ннꙋю, чл҃вѣколю́бче, сла́ва тебѣ̀.
Сла́ва:
Ско́рое и҆ и҆звѣ́стное да́ждь ᲂу҆тѣше́нїе рабѡ́мъ твои̑мъ і҆и҃се, внегда̀ ᲂу҆ныва́ти дꙋхѡ́мъ на́шымъ, не разлꙋча́йсѧ ѿ дꙋ́шъ на́шихъ въ ско́рбехъ, не ᲂу҆далѧ́йсѧ ѿ мы́слей на́шихъ во ѡ҆бстоѧ́нїихъ: но при́снѡ на́съ предварѝ. прибли́жисѧ на́мъ, прибли́жисѧ вездѣ̀ сы́й, ꙗ҆́коже со а҆пⷭ҇лы твои́ми всегда̀ є҆сѝ: си́це и҆ тебѐ жела́ющымъ соединѝ себѐ ще́дре, да совокꙋ́плени тебѐ пое́мъ и҆ славосло́вимъ всест҃а́го дх҃а твоего̀.
И҆ ны́нѣ:
Наде́жда и҆ предста́тельство и҆ прибѣ́жище хрⷭ҇тїа́нъ, неѡбори́маѧ стѣна̀, и҆знемога́ющымъ приста́нище небꙋ́рное, ты̀ є҆сѝ бцⷣе пречⷭ҇таѧ: но ꙗ҆́кѡ мі́ръ сп҃са́ющаѧ непреста́нною твое́ю мл҃твою, помѧнѝ и҆ на́съ дв҃о всепѣ́таѧ.
Гдⷭ҇и поми́лꙋй, м҃.
И҆́же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ покланѧ́емый и҆ сла́вимый, хрⷭ҇тѐ бж҃е, долготерпѣли́ве, многомлⷭ҇тиве, многобл҃гоꙋтро́бне: и҆́же пра́вєдныѧ любѧ́й и҆ грѣ̑шныѧ ми́лꙋѧй, и҆́же всѧ̑ зовы́й ко сп҃се́нїю, ѡ҆бѣща́нїѧ ра́ди бꙋ́дꙋщихъ бла̑гъ. са́мъ гдⷭ҇и, прїимѝ и҆ на́шѧ въ ча́съ се́й мл҃твы, и҆ и҆спра́ви живо́тъ на́шъ къ за́повѣдемъ твои̑мъ. дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней, ѡ҆градѝ на́съ ст҃ы́ми твои́ми а҆́гг҃лы, да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.
Гдⷭ҇и поми́лꙋй, три́жды.
Сла́ва, и҆ ны́нѣ:
Чⷭ҇тнѣ́йшꙋю херꙋві̑мъ:
И҆́менемъ гдⷭ҇нимъ бл҃гословѝ, ѻ҆́тче.
Сщ҃е́нникъ: Мл҃твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ.
А҆ми́нь.
И҆ а҆́ще є҆́сть четыредесѧ́тница, твори́мъ покло́ны, ꙗ҆́коже предписа́сѧ. По сконча́нїи же покло́нѡвъ, глаго́лемъ мл҃твꙋ сїю̀ ст҃а́гѡ марда́рїа:
Влⷣко бж҃е ѻ҆́ч҃е вседержи́телю, гдⷭ҇и сн҃е є҆диноро́дный і҆и҃се хрⷭ҇тѐ, и҆ ст҃ы́й дш҃е, є҆ди́но бж҃ество̀ є҆ди́на си́ла, поми́лꙋй мѧ̀ грѣ́шнаго, и҆ и҆́миже вѣ́си сꙋдьба́ми, сп҃си́ мѧ недосто́йнаго раба̀ твоего̀: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.
Коне́цъ тре́тїѧгѡ часа̀.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.