← претходни дан | Минеј — Јул | следећи дан →
11 июля: Мученицы Евфимии. Равноапостольной Ольги, великой княгини Российской, во святом крещении Елены
Мѣ́сѧца тогѡ́же въ а҃ї-й де́нь.
Ст҃ы́ѧ мч҃ницы и҆ прехва́льныѧ є҆ѵфи́мїи, си́рѣчь, предѣ́ла ѻ҆тцє́въ:
И҆ преставле́нїе бл҃же́нныѧ ѻ҆́льги, кнѧги́ни рѡссі́йскїѧ, во ст҃о́мъ креще́нїи нарече́нныѧ є҆ле́ны.
На Гдⷭ҇и, воззва́хъ, стїхи̑ры, на ѕ҃. Є҆ѵфи́мїи г҃, гла́съ и҃.
Подо́бенъ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ, ꙳ гдⷭ҇нѧ а҆́гница, ꙳ тогѡ̀ во́льной подо́бѧщисѧ ме́ртвости ꙳ болѣ́зньми страда́нїѧ, ꙳ лежа́щи во гро́бѣ, ꙳ кро́ве и҆злїѧ́нїе и҆сточа́етъ си́лою дх҃а. ꙳ ю҆́же почерпа́юще дꙋша́мъ на ѡ҆чище́нїе, ꙳ всѧ́ческихъ хвалꙋ̀ ꙳ прино́симъ бг҃ꙋ всегда̀.
Ѽ пресла́внагѡ чꙋдесѐ, ꙳ ка́кѡ ᲂу҆́бѡ ме́ртвымъ є҆стество́мъ, ꙳ прехва́льнаѧ стоѧ́ше страстоно́сица дне́сь, ꙳ бж҃е́ственный сви́токъ держа́щи, ꙳ сопроти̑внымъ є҆гѡ̀ не даю́щи, ꙳ ѻ҆тцє́мъ же ввѣрѧ́юще. ꙳ ѽ мч҃нице сла́внаѧ, вселе́нныѧ похвало̀, ꙳ спаса́й ны́нѣ моли́твами твои́ми ꙳ незы́блемꙋ цр҃ковь хрⷭ҇то́вꙋ.
Бжⷭ҇твенныхъ ѻ҆тє́цъ собра́нїе, ꙳ вѣ́ры предѣ́лъ ꙳, на твоѧ̑ пє́рси полага́етъ: ꙳ є҆го́же ᲂу҆́бѡ пресла́внаѧ прїе́мши, ꙳ хранѧ́щи бжⷭ҇твеннꙋю вѣ́рꙋ непоколеби́мꙋ, ꙳ и҆ побѣжда́ющи всѧ́кꙋ є҆́ресь, ꙳ и҆ посрамлѧ́ющи лжесла̑вныѧ застꙋ́пники. ꙳ тѣ́мже тѧ̀ чти́мъ ꙳ и҆ ᲂу҆блажа́емъ.
И҆́ны стїхи̑ры ѻ҆́льги, гла́съ д҃. Подо́бенъ: Ꙗ҆́кѡ до́блѧ:
Ꙗ҆́кѡ со́лнце возсїѧ̀ на́мъ, ꙳ пресла́внаѧ па́мѧть твоѧ̀, ѻ҆́льго бг҃омꙋ́драѧ, ꙳ ма́ти кнѧзе́й рѡссі́йскихъ, ꙳ хрⷭ҇то́ва мизи́ница, а҆пⷭ҇льскимъ ᲂу҆че́нїемъ воспита́на, ꙳ возмогла̀ є҆сѝ на кꙋмі́ры, па́че же на дїа́вола. ꙳ си́лою ст҃а́гѡ дх҃а просвѣща́ема, ꙳ ѿ тмы̀ неразꙋ́мїѧ всю̀ странꙋ̀, ꙳ и҆ лю́ди къ бг҃ꙋ привела̀ є҆сѝ. ꙳ є҆го́же молѝ ѡ҆ творѧ́щихъ твою̀ па́мѧть.
Въ ра́зꙋмѣ дꙋхо́вномъ, ꙳ и҆́мже посрами́ла є҆сѝ врага̀ прельсти́вшаго є҆́ѵꙋ, ꙳ и҆ сегѡ̀ ѻ҆рꙋ́жїе сломи́ла є҆сѝ, ꙳ бг҃осажде́нный ра́й церко́вный создала̀ є҆сѝ: ꙳ въ не́мже дре́во живо́тное крⷭ҇тъ водрꙋзи́ла є҆сѝ, ꙳ и҆ трапе́зꙋ бж҃їѧ бра́шна и҆мꙋ́щи, ꙳ и҆сто́чникъ неисчерпа́емый кро́ве хрⷭ҇то́вы. ꙳ є҆гѡ́же пи́вши нетлѣ́нна пребыва́еши, ꙳ за всѧ̑ ны̀ молѧ́щисѧ при́снѡ.
Дꙋхо́внѡ возвесели́тесѧ ꙳ рѡссі́йстїи концы̀, ꙳ па́мѧть чтꙋ́ще ѻ҆́льги бг҃омꙋ́дрыѧ: ꙳ мо́литсѧ бо вы́нꙋ ко хрⷭ҇тꙋ̀ ꙳ съ чꙋдотво́рцами и҆ мꙋ́чениками, ꙳ помо́щницꙋ и҆мꙋ́щи ст҃ꙋ́ю бцⷣꙋ, и҆зба́витисѧ ѿ бѣ́дъ и҆ печа́лей, вѣ́рою пою́щымъ ю҆̀, ꙳ и҆ кла́нѧющымсѧ ра́цѣ нетлѣ́ннагѡ є҆ѧ̀ тѣ́ла.
Сла́ва, гла́съ ѕ҃:
Ѡ҆деснꙋ́ю сп҃са предста̀ дв҃а, и҆ страстоно́сица и҆ мꙋ́ченица є҆ѵфи́мїа, ѡ҆дѣ́ѧна добродѣ́тельми побѣ́дными, и҆ преꙋкра́шена є҆ле́емъ чистоты̀, и҆ кро́вїю страда́нїѧ, и҆ вопїю́щи къ немꙋ̀, ра́достнѡ свѣщꙋ̀ держа́щи: въ воню̀ благоꙋха́нїѧ твоегѡ̀ теко́хъ, хрⷭ҇тѐ бж҃е, ꙗ҆́кѡ ᲂу҆ѧ́звена твое́ю любо́вїю а҆́зъ, не ѿлꙋчѝ менѐ, женишѐ нбⷭ҇ный. тоѧ̀ моли́твами послѝ на́мъ, всеси́льне сп҃се, ми́лѡсти твоѧ̑.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Всѐ ѿло́жше:
Ѻ҆рꙋ́жїе, ꙗ҆́коже речѐ сѷмеѡ́нъ, ꙳ се́рдце твоѐ про́йде, ꙳ пречⷭ҇таѧ влⷣчце, ꙳ є҆гда̀ ᲂу҆зрѣ́ла є҆сѝ и҆зъ тебє̀ возсїѧ́вшаго, ꙳ неизрече́ннымъ сло́вомъ, ꙳ ѿ беззако́нныхъ ꙗ҆́кѡ ѡ҆сꙋжде́на возноси́ма на крⷭ҇тъ, ꙳ ѻ҆́цтомъ и҆ же́лчїю напоѧ́емаго, ꙳ ре́бра же пробода́ема, ꙳ и҆ рꙋ́цѣ и҆ но́зѣ пригвожда́емы, ꙳ и҆ рыда́ющи восклица́ла є҆сѝ ꙳ мт҃рски вопїю́щи: ꙳ что̀ сїѐ, ча́до сладча́йшее, ꙳ но́вое та́инство;
На стїхо́внѣ ѻ҆ктѡ́иха. Та́же глаго́лемъ припѣ́въ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. И҆ пое́мъ стїхи́рꙋ, гла́съ и҃.
Пѣ́сньми да почти́тсѧ мꙋ́ченица хрⷭ҇то́ва: подоба́етъ бо вои́стиннꙋ є҆́й хвала́мъ сосло́вїе, ꙗ҆́кѡ и҆спле́тши вѣне́цъ своемꙋ̀ верхꙋ̀. сїѧ́ бо вои́стиннꙋ неꙋкло́нна и҆ тверда̀, мно́гихъ мꙋчи́телей сꙋрѡ́вства низложѝ. тѣ́мже и҆ зовѧ́ше ра́достнѡ стра́ждꙋщи: ты́ ми бꙋ́ди, гдⷭ҇и, по́мощь, и҆ не ѡ҆ста́ви менє̀.
Сла́ва, гла́съ ѕ҃:
Ѡ҆дѣ́ѧна добродѣ́тельми, и҆ просвѣще́на по́мысломъ, мѵ́ро пролива́ющи въ сердца̀ вѣ́рныхъ, ѿ востѡ́къ возсїѧ́вши ꙗ҆́кѡ ѕвѣзда̀ свѣ́тлаѧ, и҆ собо́ръ сотво́рши, ст҃а́гѡ дх҃а прише́ствїемъ бжⷭ҇твенныхъ ѻ҆тє́цъ, не преста́й ѡ҆ на́съ молѧ́щи ко хрⷭ҇тꙋ̀, є҆ѵфи́мїе всехва́льнаѧ, спасти́сѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:
Лю́ди беззако́ннѣйшыѧ, безъ пра́вды пригвожда́ющѧ тѧ̀ на дре́вѣ, дв҃а и҆ чⷭ҇таѧ мт҃и твоѧ̀ зрѧ́щи, ꙗ҆́коже сѷмеѡ́нъ проречѐ, ᲂу҆тро́бою, сп҃се, ᲂу҆ѧзвлѧ́шесѧ.
Тропа́рь, гла́съ д҃:
А҆́гница твоѧ̀, і҆и҃се, є҆ѵфи́мїа зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ, и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю, прїими́ мѧ, съ любо́вїю поже́ршꙋюсѧ тебѣ̀. тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ.
И҆лѝ се́й тропа́рь, гла́съ то́йже:
Жениха̀ твоего̀ хрⷭ҇та̀ возлюби́вши, и҆ свѣщꙋ̀ твою̀ свѣ́тлꙋ ᲂу҆гото́вльши, добродѣ́тельми возсїѧ́вши всехва́льнаѧ є҆ѵфи́мїе: тѣ́мъ возшла̀ є҆сѝ съ ни́мъ на бра́къ, вѣне́цъ страда́нїѧ ѿ негѡ̀ прїе́мши: но ѿ бѣ́дъ и҆зба́ви на́съ, чтꙋ́щихъ вѣ́рою па́мѧть твою̀.
Сла́ва ѻ҆́льги, гла́съ а҃:
Крила́ми бг҃оразꙋ́мїѧ впери́вши тво́й ᲂу҆́мъ, возлетѣ́ла є҆сѝ превы́ше ви́димыѧ тва́ри, взыска́вши бг҃а и҆ творца̀ всѧ́ческихъ: и҆ того̀ ѡ҆брѣ́тши, па́ки рожде́нїе креще́нїемъ прїѧ́ла є҆сѝ: дре́ва живо́тнагѡ наслажда́ющисѧ, нетлѣ́нна во вѣ́ки пребыва́еши, ѻ҆́льго присносла́внаѧ.
На ᲂу҆́трени канѡ́нъ ѻ҆ктѡ́иха є҆ди́нъ: И҆ ст҃ы́ѧ є҆ѵфи́мїи на д҃.
Гла́съ и҃. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.
Чи́стыми лꙋча́ми дꙋ́ха ѡ҆блиста́ющи, и҆ мра́чнꙋю пре́лести тмꙋ̀ разо́рши, но́щь разрѣшѝ безмѣ́рныхъ ѕѡ́лъ мои́хъ, и҆ просвѣще́нїе мѝ пода́ждь, мꙋ́ченице страстоте́рпице прехва́льнаѧ.
Болѣ̑зни плѡтскі́ѧ до́блественнѣ претерпѣ́ла є҆сѝ, и҆ къ неболѣ́зненномꙋ ра́достнѡ наслажде́нїю, мꙋ́ченице, преминꙋ́ла є҆сѝ. тѣ́мже молю̀ тѧ̀: дꙋшѝ моеѧ̀ болѣ́знь твои́ми моли́твами претворѝ, и҆ ко спасе́нїю наста́ви.
Невѣ́сто честна́ѧ и҆ чи́стаѧ и҆ нескве́рнаѧ цр҃ѧ̀ хрⷭ҇та̀, ѕлы̑ѧ сквє́рны дꙋшѝ моеѧ̀ ѡ҆чи́сти, болѣ́знь мою̀ и҆сцѣлѝ, неисцѣ̑льныѧ стра̑сти ᲂу҆врачꙋ́й се́рдца моегѡ̀, ꙗ҆́кѡ да восхвалю́ тѧ спаса́емый.
Бг҃оро́диченъ:
Ꙗ҆̀же ѿ землѝ до нб҃съ досѧ́жꙋши лѣ́ствица нбⷭ҇наѧ, по не́йже бг҃ъ сло́во къ человѣ́кѡмъ сни́де, бл҃гослове́ннаѧ чⷭ҇таѧ, несказа́нно чꙋ́до, недомы́сленно видѣ́нїе, спаса́й къ тебѣ̀ прибѣга́ющыѧ.
Канѡ́нъ ѻ҆́льги, на д҃.
Гла́съ є҃. Пѣ́снь а҃. І҆рмо́съ:
Велича́ваго фараѡ́на въ мо́ри потопи́вша со ѻ҆рꙋ́жїемъ и҆ вса̑дники, і҆и҃лѧ же пресла́внѡ спа́сша, и҆ по сꙋ́хꙋ прове́дша, пое́мъ хрⷭ҇та̀, ꙗ҆́кѡ просла́висѧ.
Вели́чїе на́ше и҆ похвала̀ ты̀ є҆сѝ, ѻ҆́льго бг҃омꙋ́драѧ: тобо́ю бо ѿ і҆́дѡльскїѧ ле́сти свободи́хомсѧ, ны́нѣ моли́сѧ за ро́дъ и҆ ро́ды, и҆̀хже бг҃ꙋ привела̀ є҆сѝ, пою́щи хрⷭ҇та̀: ꙗ҆́кѡ просла́висѧ.
Велича́ваго дїа́вола и҆зъ рѡссі́и прогна́ла є҆сѝ, нечести̑выѧ кꙋмі́ры ѿню́дъ сокрꙋши́вши: всѧ̑ лю́ди ѿ беззако́нїѧ свободи́ла є҆сѝ, мꙋ́дростїю наꙋча́ющи, пѣ́ти хрⷭ҇та̀, ꙗ҆́кѡ просла́висѧ.
Че́рность грѣхо́внꙋю ба́нею креще́нїѧ ѿню́дъ ѿмы́ла є҆сѝ, хрⷭ҇та̀ возлюби́ла є҆сѝ: є҆мꙋ́же предстоѧ́щи, моли́сѧ за рабы̑ твоѧ̑, вѣ́рнѡ сла́вѧщыѧ тѧ̀.
Бг҃оро́диченъ:
И҆са́їа тѧ̀ же́злъ нарица́етъ, пречⷭ҇таѧ, дв҃дъ же тѧ̀ прⷭ҇то́лъ гдⷭ҇ень, а҆ввакꙋ́мъ приѡсѣне́ннꙋю го́рꙋ, кꙋпинꙋ́ же тѧ̀ мѡѷсе́й: мы́ же тѧ̀ мт҃рь бж҃їю нарица́емъ.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Рѧ́снами ꙗ҆́кѡ златы́ми тѧ̀, страда́льческими бїє́нїи ѡ҆дѣ́ѧннꙋ, дв҃о, пребога́тое сло́во ви́дѣвъ, въ нбⷭ҇наѧ жили̑ща безпло́тныхъ чинѡ́въ, ра́доватисѧ приведѐ.
Во бл҃гово́нїе, мч҃нице, мѵ́ра, ѿ чи́стыѧ возсїѧ́вшагѡ потекла̀ є҆сѝ ᲂу҆се́рднѡ, мѵ́ро бжⷭ҇твенныхъ и҆сцѣле́нїй мі́рꙋ и҆сточи́ла є҆сѝ. тѣ́мже вопїю̀: смра̑дныѧ стра̑сти се́рдца моегѡ̀ ны́нѣ ѿженѝ.
Дꙋ́шꙋ мою̀ недꙋ́гꙋющꙋю тлетво́рными страстьмѝ, и҆ къ стремни́намъ пре́лести попо́лзшꙋюсѧ, мꙋ́ченице прехва́льнаѧ, ѡ҆сѣнє́нїи бжⷭ҇твенными и҆сцѣлѝ, и҆ ᲂу҆твердѝ не побѣжда́тисѧ.
Бг҃оро́диченъ:
Ра́дꙋйсѧ, є҆ди́на ро́ждши всѧ́ческихъ гдⷭ҇а: ра́дꙋйсѧ, жи́знь и҆схода́таившаѧ: ра́дꙋйсѧ, приѡсѣне́ннаѧ и҆ несѣко́маѧ горо̀, вѣ́рныхъ ᲂу҆твержде́нїе, є҆ди́на всенепоро́чнаѧ.
И҆́нъ. І҆рмо́съ:
Держа́вною рꙋко́ю и҆ си́льнымъ сло́вомъ нб҃о и҆ зе́млю сотвори́лъ є҆сѝ: ю҆́же твое́ю кро́вїю и҆скꙋпи́лъ є҆сѝ цр҃ковь твою̀, ꙗ҆̀же ѡ҆ тебѣ̀ ᲂу҆твержда́етсѧ зовꙋ́щи: ꙗ҆́кѡ нѣ́сть свѧ́тъ, ра́звѣ тебє̀, гдⷭ҇и.
Держа́вною рꙋко́ю, и҆ мꙋ́дрыми словесы̀, и҆ си́льнымъ сло́вомъ, ᲂу҆чи́ла є҆сѝ твоего̀ сы́на зако́нꙋ хрⷭ҇то́вꙋ, и҆ лю́демъ возбрани́ла є҆сѝ жре́ти і҆́дѡлѡмъ, ѻ҆́льго пресла́внаѧ: въ па́мѧть твою̀ ны́нѣ соше́дшесѧ, тебѐ прославлѧ́емъ.
Ты̀ ꙗ҆́кѡ пчела̀ добрꙋ̀ ра́зꙋмꙋ дале́че цвѣтꙋ́щїѧ хрⷭ҇то́вы вѣ́ры взыска́ла є҆сѝ, и҆ ꙗ҆́кѡ поро́дный ме́дъ креще́нїе, въ ца́рствꙋющемъ гра́дѣ ѡ҆брѣ́тши, твоемꙋ̀ гра́дꙋ и҆ лю́демъ дарова́ла є҆сѝ: є҆го́же всѝ насыще́ни, го́рести грѣха̀ ѿбѣга́ютъ.
Ве́сь похва́льный гла́съ, и҆ мольбꙋ́ ти, ѻ҆́льго, прино́симъ, тобо́ю бо бг҃а позна́хомъ. є҆мꙋ́же ны́нѣ предстои́ши, просѝ ми́ра ѻ҆те́чествꙋ, и҆ на пога̑ныѧ побѣ́ды, и҆ дꙋша́мъ на́шымъ ѡ҆ставле́нїѧ грѣхѡ́въ, пою́щымъ тѧ̀, присноблаже́ннаѧ.
Бг҃оро́диченъ:
Прїѧ́телище ꙗ҆ви́ласѧ є҆сѝ, дв҃о, непристꙋ́пнагѡ бг҃а, тѣ́мъ тѧ̀ пою́тъ непреста́ннѡ а҆́гг҃льстїи чи́ни, повинꙋ́ющесѧ влⷣцѣ: ты́ бо родила̀ є҆сѝ сло́во ѻ҆́ч҃ее, собезнача́льное, безъ ѻ҆тца̀: ѽ чꙋ́до. ст҃ы́й дх҃ъ ѡ҆сѣни́ тѧ.
Конда́къ ѻ҆́льги, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Воспое́мъ дне́сь бл҃годѣ́телѧ всѣ́хъ бг҃а, просла́вльшаго въ рѡссі́и ѻ҆́льгꙋ бг҃омꙋ́дрꙋю, да моли́твами є҆ѧ̀ пода́стъ дꙋша́мъ на́шымъ грѣхѡ́въ ѡ҆ставле́нїе.
Та́же сѣда́ленъ є҆ѵфи́мїи, гла́съ и҃. Подо́бенъ: Премꙋ́дрости:
Крове́й твои́хъ стрꙋѧ́ми, мꙋ́ченице хрⷭ҇то́ва, пото́пъ нечести̑вымъ при́снѡ дѣ́йствꙋеши, всехва́льнаѧ: тꙋ́чами же благода́тными словє́сныѧ ни̑вы напаѧ́ющи всегда̀, въ ни́хже возрасти́ла є҆сѝ кла́съ вѣ́ры. тѣ́мъ пресла́внѡ и҆ по сме́рти ꙗ҆ви́ласѧ є҆сѝ ѻ҆́блакъ, и҆сточа́ющъ живо́тное свидѣ́тельство, страстоте́рпице прехва́льнаѧ: моли́сѧ хрⷭ҇тꙋ̀ бг҃ꙋ, согрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, сѣда́ленъ ѻ҆́льги, гла́съ а҃. Подо́бенъ: Ка́мени запеча́танꙋ:
Крила́ми бг҃оразꙋ́мїѧ впери́вши тво́й ᲂу҆́мъ, возлетѣ́ла є҆сѝ превы́ше ви́димыѧ тва́ри, взыска́ющи творца̀ всѧ́ческихъ: и҆ того̀ ѡ҆брѣ́тши, па́ки порожде́нїе креще́нїемъ прїѧ́ла є҆сѝ: и҆ дре́ва живо́тнагѡ крⷭ҇та̀ хрⷭ҇то́ва насла́ждшисѧ, нетлѣ́нна во вѣ́ки пребыва́еши, ѻ҆́льго пребл҃же́ннаѧ.
И҆ ны́нѣ, бг҃оро́диченъ:
Рꙋ́цѣ твоѝ бжⷭ҇твеннїи, и҆́миже созда́телѧ понесла̀ є҆сѝ, дв҃о прест҃а́ѧ, вопло́щшагосѧ благосты́нею, просте́рши ᲂу҆молѝ є҆го̀, и҆зба́вити на́съ ѿ и҆скꙋше́нїй, и҆ страсте́й, и҆ бѣ́дъ, хва́лѧщихъ тѧ̀ любо́вїю и҆ вопїю́щихъ: сла́ва все́льшемꙋсѧ въ тѧ̀, сла́ва проше́дшемꙋ и҆зъ тебє̀, сла́ва и҆зба́вльшемꙋ на́съ ржⷭ҇тво́мъ твои́мъ.
Крⷭ҇тобг҃оро́диченъ:
Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й, собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ пречⷭ҇тыхъ рꙋ́къ твои́хъ, ще́дре, созда́нїе;
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Себѐ сама́го пла́чꙋ, житїѐ неиспра́влено и҆мѣ́ѧ всегда̀: мꙋ́ченице сла́внаѧ, помози́ ми, и҆ бꙋ́дꙋщагѡ сꙋда̀ свободѝ.
Ꙗ҆́же ѻ҆́гнь є҆динора́вный, бжⷭ҇твенными ѡ҆дождє́нїи ᲂу҆вѧди́вши, ѻ҆гнѧ́ мѧ свободѝ, и҆ вѣ́чнагѡ ѡ҆сꙋжде́нїѧ.
Дѣ́вства сосꙋ́дъ, дх҃а ст҃а́гѡ жили́ще, є҆ѵфи́мїе, всѧ́кагѡ мѧ̀ и҆зба́ви сопроти́внагѡ вре́да хода́тайствомъ твои́мъ.
Бг҃оро́диченъ:
Милосе́рдїѧ твоегѡ̀ бе́зднꙋ, призыва́ющꙋ пода́ждь мѝ, ꙗ҆́же бл҃госе́рдаго ро́ждши, и҆ сп҃са всѣ́хъ пою́щихъ тѧ̀.
И҆́нъ. І҆рмо́съ:
Дх҃омъ бж҃їимъ ѡ҆чи́щсѧ прⷪ҇ро́къ дыха́ющимъ въ не́мъ, а҆ввакꙋ́мъ бжⷭ҇твенный боѧ́сѧ глаго́лаше: внегда̀ прибли́жатсѧ лѣ́та, позна́нъ бꙋ́деши, бж҃е, на спасе́нїе человѣ́кѡвъ.
Дх҃ъ бж҃їй почѝ на тебѣ̀, ꙗ҆́кѡ на деввѡ́рѣ прⷪ҇ро́чицѣ дре́вле: и҆́мже просвѣти́вшисѧ, ᲂу҆крѣплѧ́ющи влади́мїра разꙋ́мнаго, сїса́рꙋ дїа́вола низложи́ла є҆сѝ въ сѣ́ти є҆гѡ̀ креще́нїемъ, ꙗ҆́кѡ и҆ вара́комъ въ пото́цѣ кі́ссѡвѣ пре́жде.
Быстринѣ̀ подо́бѧщисѧ, ѻ҆́льго бг҃омꙋ́драѧ, сокрꙋше́ннымъ се́рдцемъ ста̀ молѧ́щисѧ къ бг҃ꙋ, и҆зба́вила є҆сѝ ро́дъ твои́хъ люде́й ѿ ѡ҆скорбле́нїѧ кꙋмі́рскагѡ, и҆ ѿ плѣне́нїѧ вра́жїѧ свободи́ла є҆сѝ, хрⷭ҇та̀ призыва́ющи на по́мощь на́шꙋ.
Въ наро́читый де́нь ст҃а́гѡ твоегѡ̀ преставле́нїѧ, ра́достнѡ пра́зднꙋемъ, пѣ́снь моле́бнꙋю хрⷭ҇тꙋ̀ возсыла́юще, нетлѣ́ннымъ вѣнце́мъ вѣнча́вшемꙋ тѧ̀, ѻ҆́льго бг҃омꙋ́драѧ: просѝ на́мъ ѡ҆ставле́нїѧ грѣхѡ́въ, сла́вѧщымъ тѧ̀ вѣ́рнѡ.
Бг҃оро́диченъ:
Тѧ̀ ѿ ко́рене і҆ессе́ева процвѣ́тшꙋю, и҆са́їа ꙗ҆́коже проречѐ, хрⷭ҇та̀ цвѣ́тъ прозѧ́бшꙋю, и҆ первонача́льнаго пло́тїю носи́вшꙋю и҆ же́злъ бж҃їѧ дх҃а, хва́лимъ тѧ̀, ꙗ҆́кѡ бж҃їю мт҃рь, и҆ чⷭ҇тꙋю дв҃ꙋ.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Ꙗ҆́коже посредѣ̀ ѕвѣ́здъ, со́лнце многосвѣ́тло, мꙋ́ченице, просїѧ́ла є҆сѝ, сꙋ́щымъ съ тобо́ю мꙋ́ченикѡмъ, и҆ мі́ръ страда́нїемъ ѡ҆зари́ла є҆сѝ. но молю́тисѧ, ѡ҆мраче́нное моѐ се́рдце страсте́й мгло́ю, просвѣтѝ.
Неꙋсы́пною моли́твою ᲂу҆спѝ, всехва́льнаѧ, дꙋшетлѣ̑нныѧ се́рдца моегѡ̀ стра̑сти: и҆ бо́дрость бжⷭ҇твеннꙋю пода́ждь мѝ, лежа́щемꙋ на ѻ҆дрѣ̀ ᲂу҆ны́нїѧ, лѣ́ности же снꙋ̀ порабоще́нꙋ.
Ловє́цъ лꙋка́выхъ мѧ̀ сѣ̑ти запѧ́ша, ꙗ҆́коже пти́цꙋ, и҆ лю́тѣ ᲂу҆ѧзви́хсѧ, и҆ рꙋка́ми ѕлы́ми ны́нѣ держи́мь є҆́смь. и҆збра́ннаѧ гдⷭ҇нѧ голꙋби́це, помози́ ми, и҆ ѿ си́хъ ѕло́бы и҆схитѝ.
Бг҃оро́диченъ:
Ма́тернее дерзнове́нїе, є҆́же къ сн҃ꙋ твоемꙋ̀ и҆мꙋ́щи, всечи́стаѧ, сро́днагѡ промышле́нїѧ є҆́же ѡ҆ на́съ, не пре́зри, мо́лимсѧ: ꙗ҆́кѡ тѧ̀ и҆ є҆ди́нꙋ хрⷭ҇тїа́не ко влⷣцѣ, ѡ҆чище́нїе ми́лостивно предлага́емъ.
И҆́нъ. І҆рмо́съ:
Сло́во бж҃їе всеси́льное, ми́ръ всемꙋ̀ мі́рꙋ послѝ, и҆ свѣ́томъ и҆́стиннымъ ѡ҆свѣща́ѧ и҆ просвѣща́ѧ всѧ̑, и҆зъ но́щи тѧ̀ сла́вѧщыѧ.
Ꙗ҆́кѡ голꙋби́ца цѣломꙋ́дреннаѧ, на фі́нїѯъ добродѣ́телей возшла̀ є҆сѝ, крилѣ̀ свѧщє́ннѣ посрє́бреннѣ и҆мꙋ́щи: и҆́миже возлетѣ́вши въ ра́йстѣй пи́щи возгнѣзди́ласѧ є҆сѝ, сла́внаѧ ѻ҆́льго.
Ѡ҆ тебѣ̀ поѧ́ше соломѡ́нъ пре́жде: внѣ̀ вїногра́да ца́рскаѧ ма́слина процвѣтѐ. ты́ бо ст҃ы́й гре́знъ креще́нїемъ въ рѡссі́и насади́ла є҆сѝ, творѧ́щи пло́дъ покаѧ́нїѧ, ѡ҆ не́мже са́мъ хрⷭ҇то́съ весели́тсѧ.
Оу҆милосе́рдисѧ, влⷣко, на новопросвѣщє́нныѧ лю́ди твоѧ̑, не преда́ждь на́съ въ рꙋ́ки пога́ныхъ, за мно́жество беззако́нїй на́шихъ: но моли́твами наста́вницы на́шеѧ ѻ҆́льги, и҆зба́ви ны̀ ѿ всѧ́кїѧ напа́сти.
Бг҃оро́диченъ:
Кропи́те всѝ, ꙗ҆́коже пи́шетсѧ, ѻ҆́блацы весє́лїѧ зємны́мъ: бж҃їй бо дѣ́тищь хрⷭ҇то́съ, ѡ҆чища́ѧй мі́ръ ѿ грѣхѡ́въ, воплоти́сѧ ѿ дв҃ы, и҆ да́нъ бы́сть на́мъ.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Ꙗ҆́же ѕвѣре́й стремлє́нїѧ претерпѣ́вши крѣ́пкѡ, ѕвѣре́й мѧ̀ мы́сленныхъ моли́твами твои́ми и҆зба́ви, лю́тѡ ѡ҆скорблѧ́ющихъ мѧ̀, и҆ напа́дающихъ неща́днѡ на не́мощь мою̀.
Повинꙋ́вшисѧ и҆́гꙋ бжⷭ҇твенномꙋ покори́ла є҆сѝ го́рдаго врага̀, нога́ми же сокрꙋши́ла є҆сѝ. ѿ негѡ́же ᲂу҆́бѡ и҆схитѝ, мꙋ́ченице страстоте́рпице, притека́ющаго къ покро́вꙋ твоемꙋ̀.
Прошла̀ є҆сѝ, мꙋ́ченице, лю́тое мꙋ́къ волне́нїе, и҆ ко приста́нищꙋ жи́зни пра́вѣ дости́гла є҆сѝ. тѣ́мже въ пꙋчи́нѣ сласте́й житїѧ̀ ѡ҆бꙋрева́ема спаси́ мѧ.
Бг҃оро́диченъ:
Да и҆зба́вимсѧ ѿ лю́тыхъ прегрѣше́нїй моли́твами твои́ми, бг҃ороди́тельнице чⷭ҇таѧ, и҆ да ᲂу҆лꙋчи́мъ, пречⷭ҇таѧ, бж҃їе сїѧ́нїе, и҆зъ тебє̀ неизрече́ннѡ воплоще́ннагѡ сн҃а бж҃їѧ.
И҆́нъ. І҆рмо́съ:
Въ цр҃ковь нбⷭ҇нꙋю ст҃ꙋ́ю твою̀, да прїи́детъ моли́тва моѧ̀, вопїю́ ти, ꙗ҆́кѡ і҆ѡ́на, и҆зъ глꙋбины̀ се́рдца морска́гѡ: ѿ грѣ̑хъ мои́хъ возведи́ мѧ, молю́сѧ тебѣ̀, гдⷭ҇и.
Ре́вность ст҃а́гѡ дх҃а въ се́рдцы прїе́мши, ѻ҆те́ческое ѕловѣ́рїе возненави́дѣла є҆сѝ: и҆ хрⷭ҇та̀ и҆́стиннаго бг҃а взыска́вши, ча́до свѣ́та ꙗ҆ви́ласѧ є҆сѝ, и҆ съ пе́рвєнцы ст҃ы́хъ на нб҃сѣ́хъ ликꙋ́еши.
Но́ваѧ ᲂу҆чени́ца хрⷭ҇то́ва въ рѡссі́и ꙗ҆ви́ласѧ є҆сѝ, ѡ҆бходѧ́щи гра́ды и҆ сє́ла, кꙋмі́ры сокрꙋша́ющи, и҆ лю́ди ᲂу҆ча́щи є҆ди́номꙋ бг҃ꙋ покланѧ́тисѧ: є҆го́же молѝ за пою́щыѧ тѧ̀.
Ѽ бг҃облаже́ннаѧ ѻ҆́льго, помоли́сѧ за твоѧ̀ ча̑да къ бг҃ꙋ, ми́ръ неподви́жимый ѻ҆те́чествꙋ на́шемꙋ и҆спросѝ: и҆ на́мъ ѿпꙋще́нїе грѣхѡ́въ, при́снѡ тѧ̀ прославлѧ́ющымъ.
Бг҃оро́диченъ:
Позна́вше тобо́ю неѡпи́санное сло́во бж҃їе, сн҃а є҆диноча́даго вседержи́телева, вопїе́мъ тѝ земні́и: ра́дꙋйсѧ, бл҃гослове́ннаѧ бцⷣе, ᲂу҆пова́нїе дꙋ́шъ на́шихъ.
Конда́къ, гла́съ ѕ҃. Подо́бенъ: Є҆́же ѡ҆ на́съ:
По́двиги во страда́льчествѣ, по́двиги въ вѣ́рѣ положи́ла є҆сѝ те́плѣ за хрⷭ҇та̀, жениха̀ твоего̀. но и҆ ны́нѣ, ꙗ҆́коже є҆́рєси, и҆ врагѡ́въ шата́нїе подъ но́ги во́инствꙋ на́шемꙋ покори́ти молѝ бцⷣею, ꙗ҆́же ѿ шести́сѡтъ три́десѧти бг҃оно́сныхъ ѻ҆тє́цъ предѣ́лъ прїе́мшаѧ, и҆ хранѧ́щаѧ, всехва́льнаѧ.
І҆́косъ:
Что̀ твои́хъ страда́нїй, и҆лѝ что̀ и҆справле́нїй, и҆лѝ что̀ твоегѡ̀ дѣ́вства, и҆лѝ житїѧ̀ непоро́чнагѡ твоегѡ̀; ты́ бо возвесели́ла є҆сѝ ѻ҆ц҃а̀, ꙗ҆́кѡ сн҃ꙋ ᲂу҆невѣ́стившисѧ, и҆ дх҃ꙋ ст҃о́мꙋ себѐ ᲂу҆краси́вши. кто̀ довлѣ́етъ къ си̑мъ; кто̀ глаго́лати ны́нѣ возмо́жетъ, коли́ки тѧ̀ ѡ҆сїѧва́ютъ добродѣ́тєли незаходи́мы; ꙗ҆́кѡ ѿ восто́ка бо гро́бꙋ возсїѧ́вшꙋ, всѣ̑мъ сїѧ́еши, и҆ лꙋчы̀ пꙋща́еши на землѝ и҆ въ мо́ри, и҆ во всю̀ подсо́лнечнꙋю, ѡ҆свѣща́еши и҆ благоꙋха́еши концы̀. тѣ́мже и҆ сви́токъ, ввѣ́ренный ѿ шести́сѡтъ и҆ три́десѧтихъ бг҃оно́сныхъ ѻ҆тє́цъ предѣ́лъ прїе́мши, сохрани́ла є҆сѝ, всехва́льнаѧ.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Кровьмѝ пла́мень пре́лести погаси́ла є҆сѝ, бг҃омꙋ́драѧ страстоте́рпице, врѧ́щими: тѣ́мже погасѝ пе́щь смире́ннагѡ моегѡ̀ тѣлесѐ, моли́твъ твои́хъ ѡ҆дожде́ньми.
Оу҆вы̀, дꙋшѐ моѧ̀ всеѻкаѧ́ннаѧ, согрѣша́ющи и҆ не ка́ющисѧ, ка́кѡ сꙋдїѝ стра́шномꙋ надѣ́ешисѧ предста́ти; потщи́сѧ гдⷭ҇ꙋ возопи́ти: бж҃е, ѡ҆чи́сти мѧ̀.
Ѻ҆трокѡ́мъ трїе́мъ подо́бѧщисѧ, попра́ла є҆сѝ ѻ҆́гнь, бг҃омꙋ́драѧ ѻ҆трокови́це: тѣ́мже нестерпи́магѡ ѻ҆гнѧ̀, и҆ пла́мене мѧ̀ вѣ́чнагѡ и҆зба́ви, прибѣга́ющаго въ покро́въ тво́й.
Бг҃оро́диченъ:
Во всего̀ человѣ́ка ѡ҆бле́ксѧ всенепоро́чный, кромѣ̀ грѣха̀, и҆зъ чре́ва твоегѡ̀, чⷭ҇таѧ, про́йде плотоно́сецъ, є҆го́же молѝ, вѣ́рою тѧ̀ чтꙋ́щыѧ спастѝ.
И҆́нъ. І҆рмо́съ:
Пла́мень пе́щный порабо́тиша благочести́вїи ѻ҆́троцы, тѣ́мъ свы́ше ѡ҆росѝ ѧ҆̀, гото́вы пали́мы по є҆стествꙋ̀, но па́че є҆стества̀ мꙋ́жески поѧ́хꙋ: бл҃гослове́нъ є҆сѝ, гдⷭ҇и, на престо́лѣ сла́вы ца́рствїѧ твоегѡ̀.
Подо́бнѡ і҆ꙋді́ѳи сотвори́ла є҆сѝ, посредѣ̀ кꙋмі́рскихъ тѣли́щь вше́дши, тѣ́хъ нача́льника сокрꙋши́ла є҆сѝ, и҆ демѡноче́тцы посрами́ла є҆сѝ, всѧ̑ же лю́ди наꙋчи́ла є҆сѝ въ чистотѣ̀ вопи́ти хрⷭ҇тꙋ̀: бл҃гослове́нъ є҆сѝ, гдⷭ҇и, на престо́лѣ сла́вы црⷭ҇твїѧ твоегѡ̀.
Похва́льными цвѣ́ты, а҆́ки ца́рскїй вѣне́цъ бг҃омꙋ́дрѣй твое́й главѣ̀, въ па́мѧть твою̀ прино́симъ: ю҆́же хрⷭ҇то́съ нетлѣ́нїемъ вѣнча̀, ѻ҆́льго досточꙋ́днаѧ, моли́сѧ за твоѐ ста́до, и҆зба́витисѧ ѿ всѧ́кагѡ ѕла̀, вопїю́щымъ: бл҃гослове́нъ є҆сѝ, гдⷭ҇и, на прⷭ҇то́лѣ сла́вы црⷭ҇твїѧ твоегѡ̀.
Лїва́нскꙋю ли го́рꙋ нарече́мъ тѧ̀; на тѧ́ бо роса̀ нбⷭ҇наѧ сни́де. и҆лѝ фїсо́нъ рѣкꙋ̀, добрѣ́йшїй сапфѵ́ръ ка́мень честны́й, влади́мїра и҆мꙋ́щꙋю, и҆́мже просвѣти́сѧ рѡссі́йскаѧ землѧ̀; но моли́тесѧ за ны̀ взыва́юще: бл҃гослове́нъ є҆сѝ, гдⷭ҇и, на прⷭ҇то́лѣ сла́вы црⷭ҇твїѧ твоегѡ̀.
Бг҃оро́диченъ:
Кївѡ́тъ позлаще́нъ тѧ̀ дх҃омъ и҆менꙋ́емъ, спа́сшꙋю мі́ръ ѿ пото́па разꙋ́мнагѡ, дв҃о, спасѝ на́съ. на тѧ́ бо надѣ́емсѧ, и҆ къ тебѣ̀ прибѣга́емъ. ѿча̑ѧнныѧ въ пꙋчи́нѣ ѿ грѣ̑хъ и҆ напа́стей и҆зба́ви вопїю́щыѧ: бл҃гослове́нъ є҆сѝ, гдⷭ҇и, на прⷭ҇то́лѣ сла́вы црⷭ҇твїѧ твоегѡ̀.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Оу҆краси́вшисѧ, сла́внаѧ, мꙋ́ками тѣле́сными, сло́вꙋ кра́сномꙋ чи́стѡ ѡ҆брꙋчи́ласѧ є҆сѝ, соблю́дшемꙋ тѧ̀ нетлѣ́ннꙋ. тѣ́мже и҆стлѣ́вша мѧ̀ страстьмѝ всѧ́кими, кра́сна покажѝ и҆́скреннимъ покаѧ́нїемъ, ꙗ҆́кѡ да при́снѡ тѧ̀ ᲂу҆блажꙋ̀, ꙗ҆́кѡ благꙋ́ю предста́тельницꙋ.
Сви́токъ бж҃їй бы́сть се́рдце твоѐ, носѧ̀ зако́нъ бж҃їй напи́санъ дꙋ́хомъ: и҆ сви́токъ ввѣ́рила є҆сѝ правосла́вїѧ, мꙋ́ченице честна́ѧ. тѣ́мже молю̀, лꙋка́вое письмо̀, дѣви́це, ѕѡ́лъ мои́хъ раздра́вши, въ кни́зѣ написа́ти мѧ̀ молѝ, чи́стаѧ, спасе́нныхъ.
Зако́номъ ᲂу҆ме́рши є҆стества̀, па́че є҆стества̀, крѡ́ви ѿ ᲂу҆мерщвле́на и҆сточа́еши тѣ́ла, жи́зни на́шеѧ борца̀ си́ми, честна́ѧ, ᲂу҆мертви́вши, и҆ вѣ̑рнымъ живоно́сное здра́вїе да́рꙋющи. сегѡ̀ ра́ди вопїю́ ти: ᲂу҆мерщвле́ннꙋю дꙋ́шꙋ мою̀ воскресѝ.
Бг҃оро́диченъ:
Тѧ̀ чⷭ҇тꙋю и҆ непоро́чнꙋю дв҃а жела́ющи, непоро́чнѡ и҆ дꙋ́шꙋ и҆ тѣ́ло соблюдѐ, страсте́й разгорѣ̑нїѧ терпѣ́нїемъ ѡ҆па́льши, и҆скꙋше́нїе же мно́гихъ претерпѣ́вши мꙋ́къ, и҆ ны́нѣ въ нбⷭ҇ныхъ селе́нїихъ ликꙋ́етъ, съ тобо́ю веселѧ́щисѧ во всѧ̑ вѣ́ки.
И҆́нъ. І҆рмо́съ:
Крѣ́пцыи ѻ҆́троцы трїѐ сꙋ́ще, си́лою ѡ҆бо́лкшесѧ ст҃ы́ѧ трⷪ҇цы, ᲂу҆лови́ша и҆ побѣди́ша халдє́и, и҆ ди́внѡ и҆змѣни́сѧ є҆стество̀: ка́кѡ ѻ҆́гнь въ ро́сꙋ прелага́шесѧ, безъ тꙋгѝ ѧ҆̀ сохранѝ ꙗ҆́кѡ пелена́ми. ѽ пролїѧ́вый мꙋ́дрость на всѣ́хъ дѣ́лѣхъ твои́хъ, бж҃е, тѧ̀ превозно́симъ во вѣ́ки.
Крѣпка̀ ꙗ҆́кѡ льви́ца, си́лою ст҃а́гѡ дх҃а ѡ҆болче́на, є҆ди́на ᲂу҆стреми́сѧ всю́дꙋ и҆стерза́ти кꙋмі́ры, и҆ ди́внѡ на нб҃сѝ и҆ на землѝ: ка́кѡ жена̀ пре́жде бг҃а познава́етъ, є҆́юже и҆спе́рва всемꙋ̀ ро́дꙋ паде́нїе бы́сть, то́ю же ны́нѣ спасе́ни пое́мъ: ѽ пролїѧ́вый мꙋ́дрость на всѣ́хъ дѣ́лѣхъ твои́хъ бж҃е, тѧ̀ превозно́симъ во вѣ́ки.
Премꙋ́дрость бж҃їѧ пре́жде ѡ҆ тебѣ̀ написа́ла є҆́сть: сѐ є҆сѝ до́браѧ моѧ̀ и҆ прекра́снаѧ, и҆ поро́ка нѣ́сть въ тебѣ̀. бле́скъ лица̀ твоегѡ̀ ꙗ҆́кѡ мѵ́ра ѡ҆бонѧ́нїе, назна́меноваше твоѐ, ѻ҆́льго, креще́нїе: є҆́же посредѣ̀ кꙋмі́рскїѧ ле́сти на тебѣ̀ ѡ҆бонѧ̀ хрⷭ҇то́съ, и҆ всѣ́хъ на́съ ѿ смра́да де́мѡнскагѡ къ покаѧ́нїю ми́лостїю свое́ю приве́лъ є҆́сть.
Помѧнѝ менѐ, госпожѐ ѻ҆́льго, ᲂу҆бо́гаго твоего̀ раба̀, ѡ҆кра́денаго ѿ врага̀, и҆ согрѣши́вшаго па́че человѣ̑къ: и҆ помоли́сѧ хрⷭ҇тꙋ̀, пода́ти мѝ проще́нїе ѡ҆ всѣ́хъ согрѣше́нїихъ, ꙗ҆̀же нечꙋ́вственнѡ содѣ́ѧхъ ѻ҆каѧ́нный, да покаѧ́нїемъ вопїю̀: ѽ пролїѧ́вый мꙋ́дрость на всѣ́хъ дѣ́лѣхъ твои́хъ, бж҃е, тѧ̀ превозно́симъ во вѣ́ки.
Бг҃оро́диченъ:
Не пре́зри, дв҃о, твои́хъ ра̑бъ мольбы̑, ѡ҆ тебѣ́ бо хва́лимсѧ, твоѐ ма́лое ста́до мы̀ є҆смы̀: потщи́сѧ въ застꙋпле́нїе на́ше, и҆ и҆зми́ ны ѿ вра̑гъ на́шихъ, ᲂу҆ще́дри зна́ющыѧ тѧ̀ мт҃рь бж҃їю, и҆ сн҃ꙋ твоемꙋ̀ вопїю́щыѧ: ѽ пролїѧ́вый мꙋ́дрость на всѣ́хъ дѣ́лѣхъ твои́хъ, бж҃е, тѧ̀ превозно́симъ во вѣ́ки.
Пѣ́снь ѳ҃. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.
Да твою̀ добро́тꙋ свѣ́тлꙋю, прехва́льнаѧ ᲂу҆́зритъ, влⷣко, добро́тꙋ презрѣ̀ тѣлесѐ и҆ мі́ра, любо́вїю зовꙋ́щи: женишѐ, сло́во ѻ҆́ч҃ее, лицѐ твоѐ покажи́ ми многорачи́тельное, є҆гѡ́же бжⷭ҇твенными добро́тами ᲂу҆ѧ́звлена є҆́смь.
Оу҆́треневала є҆сѝ ко и҆́же и҆зъ чре́ва ѻ҆́ч҃а пре́жде денни́цы возсїѧ́вшемꙋ, и҆ свѣ́тъ была̀ є҆сѝ, со́лнца мно́жае ѡ҆блиста́ющи. тѣ́мже мѧ̀ просвѣтѝ, вопїю̀, є҆ѵфи́мїе сла́внаѧ, помраче́ннаго де́мѡнскими лꙋка́выми прилѡ́ги.
Тре́петенъ быва́ю, прїе́мъ во ᲂу҆мѣ̀ стра́шное сꙋди́ще: дѣѧ̑нїѧ бо стѧжа́хъ вводѧ̑щаѧ мѧ̀ въ лю̑тыѧ мꙋ̑ки. ꙗ҆́же мꙋ̑ки гѡ́рькїѧ, мꙋ́ченице, претерпѣ́вшаѧ твоегѡ̀ ра́ди рачи́телѧ, ѡ҆сꙋжде́нїѧ мѧ̀ го́рькагѡ свободѝ.
Бжⷭ҇твенный вои́стиннꙋ сла́вїй, и҆́же ве́снꙋ нбⷭ҇нꙋю дости́гши, чи́стаѧ ла́стовице, кра́снаѧ го́рлице всехва́льнаѧ, голꙋби́це ᲂу҆добре́наѧ, лю́тыхъ ѡ҆бстоѧ́нїй на́съ спасѝ, и҆ бж҃їѧ сла́вы ᲂу҆лꙋчи́ти сподо́би.
Бг҃оро́диченъ:
Просвѣтѝ, две́ре свѣ́та, ѻ҆́чи се́рдца моегѡ̀, молю́сѧ, ꙗ҆́кѡ да не ᲂу҆снꙋ̀ въ сме́рть безбо́жныхъ дѣѧ́нїй, да вѣ́рою тѧ̀ воспою̀, да велича́ю тѧ̀, а҆́гг҃лѡвъ похвало̀, и҆ мꙋ́чєникъ свѧще́нныхъ честно́е сосло́вїе.
И҆́нъ. І҆рмо́съ:
И҆з̾ є҆де́ма и҆зы́де ро́дъ на́шъ пра́бабы ра́ди є҆́ѵы: при́званъ же тобо́ю, ро́ждшею на́мъ но́ваго а҆да́ма хрⷭ҇та̀, во двою̀ є҆стєствꙋ̀, дв҃о чⷭ҇таѧ, взыгра́сѧ а҆да́мъ пра́дѣдъ, ꙗ҆́кѡ и҆збы́въ пе́рвыѧ клѧ́твы: мы́ же тобо́ю хва́лѧщесѧ, ꙗ҆́кѡ тебє̀ ра́ди бг҃а позна́хомъ, и҆ тебѐ велича́емъ.
Весели́сѧ є҆́ѵо прароди́тельнице, и҆́же бо тѧ̀ прельсти́въ и҆з̾ є҆де́ма и҆зведѐ, ны́нѣ же попра́нъ є҆́сть твои́мъ и҆сча́дїемъ. се́ бо ѻ҆́льга живо́тное дре́во крⷭ҇тъ хрⷭ҇то́въ въ рѡссі́и водрꙋзѝ, и҆́мже всѣ̑мъ вѣ̑рнымъ ра́й ѿве́рзесѧ: мы́ же хва́лѧщесѧ, ꙗ҆́кѡ тоѧ̀ ра́ди бг҃а позна́хомъ, со влади́мїромъ сїю̀ велича́емъ.
Женꙋ̀ по є҆стествꙋ̀ нарица́емъ тѧ̀, но па́че си́лы же́нскїѧ подви́гласѧ є҆сѝ. тмы̑ твоегѡ̀ зла́та и҆стощи́ла є҆сѝ, да хрⷭ҇то́въ зако́нъ и҆ ᲂу҆чи́телѧ приѡбрѧ́щеши, и҆́мже просвѣти́ла є҆сѝ зе́млю рѡссі́йскꙋю: мы́ же тобо́ю хва́лѧщесѧ, ꙗ҆́кѡ тебє̀ ра́ди бг҃а позна́хомъ, съ мꙋ́ченики тѧ̀ велича́емъ.
Зако́на наста́внице чи́стаѧ, и҆ ᲂу҆чи́тельнице вѣ́ры хрⷭ҇то́вы, прїимѝ похвалꙋ̀ ѿ ра̑бъ недосто́йныхъ, и҆ моли́твꙋ ѡ҆ на́съ сотворѝ къ бг҃ꙋ, че́стнѡ творѧ́щихъ твою̀ па́мѧть: да ѿ напа́стей и҆ бѣ́дъ и҆ печа́лей и҆ лю́тыхъ грѣхѡ́въ свободи́мсѧ: є҆ще́ же и҆ мꙋ́къ ждꙋ́щихъ на́съ и҆зба́ви, мо́лимсѧ тѝ, тебѐ непреста́ннѡ велича́ющїи.
Бг҃оро́диченъ:
Сѐ цр҃ковь: сѐ две́рь: сѐ бж҃їѧ гора̀ ст҃а́ѧ: сѐ же́злъ, и҆ сосꙋ́дъ зла́тъ: сѐ и҆сто́чникъ печа́танъ: сѐ ра́й ст҃ы́й но́вагѡ а҆да́ма: сѐ прⷭ҇то́лъ стра́шный: сѐ мт҃и бж҃їѧ пречⷭ҇таѧ, застꙋ́пница всѣ́хъ на́съ, пою́щихъ ю҆̀.
Свѣти́ленъ. Подо́бенъ: Жєны̀ ᲂу҆слы́шите:
Стра́нно и҆ пресла́вно, и҆ вели́кое чꙋдодѣ́йство, лю́дїе просла́вите всѝ, ка́кѡ по сме́рти сви́токъ всесвѣ́тлаѧ є҆ѵфи́мїа, прїе́мши сохранѝ, и҆ побѣдоно́сцы показа̀ правосла̑вныѧ ѻ҆тцы̀, въ халкїдѡ́нстѣмъ гра́дѣ;
Бг҃оро́диченъ:
Премꙋ́дрость ѵ҆поста́снꙋю, и҆ сло́во пресꙋ́щное, и҆ врача̀ тѣле́съ и҆ дꙋ́шъ ро́ждшаѧ, гноє́нїѧ и҆ ꙗ҆́звы дꙋшѝ моеѧ̀ и҆сцѣлѝ, лю̑тыѧ и҆ лѣ̑тныѧ, и҆ се́рдца моегѡ̀ ᲂу҆ста́ви болѣ̑зни, дв҃о.
На хвали́техъ стїхи̑ры, на д҃. Гла́съ г҃. Самогла́сны:
Страстоте́рпческое торжество̀ вѣ́рнїи, бг҃омꙋ́дреннѣ соверша́емо ви́дѧще, чꙋ́дномꙋ въ совѣ́тѣхъ бг҃ꙋ на́шемꙋ, благода́рственно пѣ́нїе воспои́мъ. и҆́бо неви́димꙋю держа́вꙋ сопроти́вныѧ си́лы, въ же́нскомъ є҆стествѣ̀ побѣдѝ, и҆ бжⷭ҇твеннꙋю свою̀ си́лꙋ въ не́мощи соверши́въ до́брыѧ мꙋ́ченицы, тоѧ̀ моли́твами спаса́етъ дꙋ́шы на́шѧ.
Два́жды.
И҆́стины ча́шꙋ ѿ свои́хъ крове́й страда́льческихъ прехва́льнаѧ мꙋ́ченица хрⷭ҇то́ва поче́рпши, и҆ сїю̀ всегда̀ предлага́ющи цр҃кви, въ не́йже церко́вный пита́тель, премꙋ́дрости гла́сомъ созыва́етъ, глаго́лющи: почерпи́те пи́во воскресе́нїѧ свидѣ́тельное, невѣ́рныхъ ѿгони́тельное, и҆ страсте́й ѡ҆чисти́тельное, благочєсти́вымъ же дꙋша́мъ храни́тельно, сп҃сꙋ зовꙋ́щымъ, напои́вый на́съ пото́комъ пи́щи дꙋхо́вныѧ, спасѝ дꙋ́шы на́шѧ.
И҆́же кро́вїю хрⷭ҇то́вою дꙋ́шꙋ зна́менавшїи въ де́нь и҆збавле́нїѧ кро́вь свѧтꙋ́ю ѿ мꙋ́ченическагѡ и҆сто́чника кипѧ́щꙋ на́мъ съ весе́лїемъ дꙋхо́внымъ проро́чески почерпе́мъ, живото́чныхъ страсте́й сп҃совыхъ и҆ присносꙋ́щныѧ сла́вы ѻ҆бразодѣ́тельно. тѣ́мже є҆мꙋ̀ возопїи́мъ: прославлѧ́емый во ст҃ы́хъ твои́хъ, гдⷭ҇и, прехва́льныѧ твоеѧ̀ страстоте́рпицы моли́твами, спасѝ дꙋ́шы на́шѧ.
Сла́ва, гла́съ и҃:
Всѧ́къ ѧ҆зы́къ да подви́жетсѧ къ похвале́нїю прехва́льныѧ є҆ѵфи́мїи, ве́сь ро́дъ и҆ во́зрастъ всѧ́къ, ю҆́ношы и҆ дѣ̑вы, хрⷭ҇то́вꙋ дѣ́вꙋ и҆ мꙋ́ченицꙋ похвала́ми вѣнча́емъ: зако́ннѡ бо мꙋ́жествовавши, и҆ сла́бость же́нскꙋю ѿве́ргши, страда́льческими болѣ́зньми, мꙋчи́телѧ врага̀ низложѝ. нбⷭ҇нымъ же и҆ бжⷭ҇твеннымъ вѣнце́мъ ᲂу҆краси́вшисѧ, мо́литсѧ женихꙋ̀ и҆ бг҃ꙋ, дарова́ти на́мъ ве́лїю ми́лость.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:
Подо́бенъ: Ѽ пресла́внагѡ чꙋдесѐ!
Тѧ̀ ви́дѧщи пригвожда́ема на крⷭ҇тѣ̀, і҆и҃се, ꙳ и҆ стрⷭ҇ти прїе́млюща во́лею, ꙳ дв҃а и҆ мт҃и твоѧ̀, влⷣко, ꙳ ᲂу҆вы̀ мнѣ̀, вопїѧ́ше, ꙳ ча́до сла́дкое: ꙳ ра̑ны непра́веднѡ ка́кѡ терпи́ши, ꙳ врачꙋ̀, и҆сцѣли́вый человѣ́ческое неможе́нїе, ꙳ и҆ ѿ тлѝ всѣ́хъ и҆зба́вивый ꙳ милосе́рдїемъ твои́мъ;
На стїхо́внѣ ѻ҆ктѡ́иха. Та́же глаго́лемъ припѣ́въ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ.
И҆ пое́мъ стїхи́рꙋ, гла́съ и҃:
Ра́дꙋйсѧ, предѣ́ле вѣ́ры: ра́дꙋйсѧ, законоположе́нїе ст҃ы́хъ ѻ҆тє́цъ, бг҃оневѣ́сто: ра́дꙋйсѧ, тве́рдое храни́ло на́мъ вѣ̑рнымъ: ра́дꙋйсѧ, сла́во цр҃кве хрⷭ҇то́вы: ра́дꙋйсѧ, дѣ́въ сто́лпе ѡ҆дꙋшевле́нный: ра́дꙋйсѧ, ми́рнаѧ мѷрополо́жнице сла́внаѧ: є҆ѧ́же ра́ди вѣ̑рнымъ и҆сточа́еши и҆сцѣлє́нїѧ, мꙋ́ченице прехва́льнаѧ.
Сла́ва, гла́съ а҃:
Дне́сь ли́цы ѻ҆те́честїи, всехва́льнаѧ, собра́вшесѧ хрⷭ҇та̀ ра́ди, сви́токъ тебѣ̀ прино́сѧтъ правосла́вныѧ вѣ́ры, є҆го́же прїи́мши въ честны̑ѧ твоѧ̀ рꙋ́ки, храни́ши до сконча́нїѧ. тѣ́мже и҆ человѣ̑къ ликостоѧ̑нїѧ соше́дшесѧ, твоѐ страда́нїе почита́емъ, вопїю́ще благоче́стнѡ: ра́дꙋйсѧ, всехва́льнаѧ, ꙗ҆́же же́нское є҆стество̀ въ мꙋ́жеское преложи́вши ѡ҆полче́нїе: ра́дꙋйсѧ, прехва́льнаѧ, ꙗ҆́же правосла́внꙋю и҆ ѻ҆тцы̀ пре́данꙋю вѣ́рꙋ неврежде́нꙋ сохра́нши: ра́дꙋйсѧ, молѧ́щаѧсѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Всехва́льнїи мꙋ́чєницы:
Своего̀ а҆́гнца, ꙳ а҆́гница и҆ непоро́чнаѧ влⷣчца, ꙳ на крⷭ҇тѣ̀ ꙗ҆́кѡ ви́дѣ зра́ка не и҆мꙋ́ща, ꙳ нижѐ добро́ты, ꙳ ᲂу҆вы̀ мнѣ̀, рыда́ющи глаго́лаше: ꙳ гдѣ̀ добро́та твоѧ̀ за́йде, сладча́йшїй; ꙳ гдѣ̀ благолѣ́пїе; гдѣ̀ благода́ть блиста́ющаѧ ѻ҆́браза твоегѡ̀, ꙳ сн҃е мо́й любе́знѣйшїй;
На лїтꙋргі́и, бл҃жє́нна ѻ҆ктѡ́иха, на д҃: И҆ є҆ѵфи́мїи, пѣ́снь г҃, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ. А҆пⷭ҇лъ къ корі́нѳѧнѡмъ, зача́ло рп҃а. А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе лꙋкѝ, зача́ло л҃г. Прича́стенъ: Въ па́мѧть вѣ́чнꙋю бꙋ́детъ пра́ведникъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.