← претходни дан | Минеј — Јул | следећи дан →
10 июля: Четыредесяти пяти мучеников из Никополи Арменской. Положение честной ризы Господа Иисуса Христа в Москве. Преподобного Антония Киево-Печерского
Мѣ́сѧца тогѡ́же въ і҃-й де́нь.
Ст҃ы́хъ четы́редесѧти пѧтѝ мꙋ́ченикѡвъ, и҆̀же въ нїкопо́ли а҆рме́нстѣй:
Въ сі́й де́нь пра́зднꙋемъ положе́нїе честны́ѧ ри́зы гдⷭ҇а на́шегѡ і҆и҃са хрⷭ҇та̀, ꙗ҆́же є҆́сть хїтѡ́нъ, въ ца́рствꙋющемъ гра́дѣ москвѣ̀:
И҆ па́мѧть прпⷣбнагѡ ѻ҆тца̀ на́шегѡ а҆нтѡ́нїа пече́рскагѡ, и҆́же въ кі́евѣ, бы́вшагѡ нача́льника всѣ́хъ рѡссі́йскихъ мона́хѡвъ:
И҆ пра́зднованїе прест҃ѣ́й бцⷣѣ ра́ди чꙋдотво́рныѧ і҆кѡ́ны въ коне́вской ѻ҆би́тели.
Слꙋ̑жбы, ри́зы гдⷭ҇ни, и҆ а҆нтѡ́нїа, пи̑саны по се́й слꙋ́жбѣ.
Стїхи̑ры мꙋ́ченикѡвъ, гла́съ а҃. Подо́бенъ: Всехва́льнїи мꙋ́чєницы:
Всехва́льнїи мꙋ́чєницы, ꙳ вы̀ ка́менїемъ сокрꙋша́еми, ꙳ хрⷭ҇та̀ ка́мене не ѿверго́стесѧ нерꙋши́магѡ: ꙳ но побѣдоно́сцы благода́тїю бы́вше, ꙳ со а҆́гг҃льскими ли́ки ра́дꙋетесѧ. ꙳ съ ни́миже моли́тесѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Добропобѣ́днїи мꙋ́чєницы ꙳ въ темни́цахъ кꙋ́пнѡ затворѧ́еми, ꙳ ꙗ҆́кѡ за́повѣдемъ бж҃їимъ храни́тєли, ꙳ и҆ и҆стаѧва́еми жа́ждею, ꙳ съ нб҃сѐ ро́сꙋ прїѧ́сте, ꙳ ва́съ дꙋхо́внѡ прохла́ждшꙋ. ꙳ тѣ́мже моли́тесѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Непобѣди́мїи мꙋ́чєницы, ꙳ жи́знь и҆́стиннꙋю жела́юще, ꙳ и҆ при́снѡ пребыва́ющꙋю, ꙳ сме́рть непра́веднꙋ беззако́ннымъ мече́мъ, ꙳ ра́дꙋющесѧ под̾ѧ́сте: ꙳ и҆ ны́нѣ съ мꙋ́ченики весели́тесѧ, ꙳ съ ни́миже моли́тесѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Сла́ва, и҆ ны́нѣ, бг҃оро́диченъ:
Всепѣ́таѧ влⷣчце, ꙳ наде́жде вѣ́рныхъ и҆ ᲂу҆твержде́нїе, ꙳ прибѣ́жище и҆ по́мощь, ꙳ тѧ̀ мо́лимъ, ѿ всѧ́кїѧ бѣды̀ рабы̑ твоѧ̑ сохранѝ, ꙳ вѣ́рою покланѧ́ющыѧсѧ ржⷭ҇твꙋ̀ твоемꙋ̀. ꙳ є҆го́же молѝ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Крⷭ҇тобг҃оро́диченъ:
Своего̀ а҆́гнца, ꙳ а҆́гница и҆ непоро́чнаѧ влⷣчца, ꙳ на крⷭ҇тѣ̀ ꙗ҆́кѡ ви́дѣ зра́ка не и҆мꙋ́ща нижѐ добро́ты, ꙳ ᲂу҆вы̀ мнѣ̀, рыда́ющи глаго́лаше: ꙳ гдѣ̀ добро́та твоѧ̀ за́йде, сладча́йшїй; ꙳ гдѣ̀ благолѣ́пїе; ꙳ гдѣ̀ благода́ть блиста́ющаѧ ꙳ ѻ҆́браза твоегѡ̀, сн҃е мо́й любе́знѣйшїй;
Тропа́рь, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
Канѡ́нъ, є҆гѡ́же краегране́сїе:
Бг҃овѣнча́нный по́лкъ пою̀ мꙋ́ченикѡвъ.
Гла́съ є҃. Пѣ́снь а҃. І҆рмо́съ:
Сп҃си́телю бг҃ꙋ, въ мо́ри лю́ди немо́крыми нога́ми наста́вльшемꙋ, и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ: ꙗ҆́кѡ просла́висѧ.
Бг҃омꙋ́дреннѡ вѣ́рнїи, во́ины хрⷭ҇тѡ́вы, и҆ страстоте́рпцы воспое́мъ, ꙗ҆́кѡ потреби́тели ле́сти, и҆ побѣди́тели свѣ́тлы, бг҃ꙋ побѣ́днꙋю пѣ́снь пою́ще: ꙗ҆́кѡ просла́висѧ.
На землѝ страда́льцы подвиза́вшесѧ свѣ́тлѡ, мꙋ̑ки претерпѣ́сте, и҆ на небесѣ́хъ вѣнцы̀ прїѧ́сте, согла́снѡ воспѣва́юще пѣ́снь побѣ́днꙋю: ꙗ҆́кѡ просла́висѧ.
Є҆ди́нствомъ дꙋше́внымъ свѧ́зани вѣ́рнѡ, ѿ ле́сти ѿврати́стесѧ, и҆ побѣди́тели вѣнцено́сцы ꙗ҆ви́стесѧ, согла́снѡ воспѣва́юще пѣ́снь побѣ́днꙋю: ꙗ҆́кѡ просла́висѧ.
Бг҃оро́диченъ:
Пречⷭ҇таѧ мт҃и бж҃їѧ, воплоще́ннаго и҆зъ тебє̀ и҆ ѿ нѣ́дръ роди́тельныхъ не ѿлꙋчи́вшагосѧ бг҃а, непреста́ннѡ молѝ, ѿ всѧ́кагѡ ѡ҆бстоѧ́нїѧ спастѝ, ꙗ҆̀же созда̀.
Пѣ́снь г҃. І҆рмо́съ:
Си́лою крⷭ҇та̀ твоегѡ̀, хрⷭ҇тѐ, ᲂу҆твердѝ моѐ помышле́нїе, во є҆́же пѣ́ти и҆ сла́вити спаси́тельное твоѐ вознесе́нїе.
Ра́зꙋмомъ хрⷭ҇то́вымъ во́ини ᲂу҆кра́шени, нечести́ваго врага̀ потопи́сте стрꙋѧ́ми крове́й ва́шихъ.
Тѣ́ло своѐ преда́вше гѡ́рькимъ и҆ лю̑тымъ мꙋ́камъ, достохва́льнїи мꙋ́чєницы, бжⷭ҇твенное наслѣ́дїе воспрїѧ́сте вѣ́рою.
Ка́меннымъ страстоте́рпцы мета́нїемъ, повелѣ́нїемъ мꙋчи́телѧ сокрꙋша́еми, благовѣ́рїѧ держа́вꙋ крѣ́пкѡ соблюдо́сте.
Бг҃оро́диченъ:
Непреста́ннѡ молѝ, чⷭ҇таѧ, съ мч҃ники, проше́дшаго и҆зъ чре́слъ твои́хъ, и҆зба́вити ѿ ле́сти дїа́воли пою́щыѧ тѧ̀, всенепоро́чнаѧ.
Сѣда́ленъ, гла́съ д҃. Подо́бенъ: Вознесы́йсѧ:
Во́ини хрⷭ҇тѡ́вы до́блїи, подви́гшесѧ до́брѣ, лꙋка́ваго врага̀ до конца̀ потопи́ша кро́вными стрꙋѧ́ми, ка́менїемъ сокрꙋша́еми, и҆ мєчѝ ссѣка́еми, ѻ҆гне́мъ сожига́еми, и҆ въ во́дꙋ вмета́еми, вѣнцено́сцы показа́шасѧ ꙗ҆́вѣ: тѣ́мже что́ми сꙋ́ть, и҆ вѣ́рою сла́вими.
Сла́ва, и҆ ны́нѣ, бг҃оро́диченъ:
И҆́же на прⷭ҇то́лѣ херꙋві́мстѣмъ сѣдѧ́й, и҆ въ нѣ́дрѣхъ ѻ҆́ч҃ихъ водворѧ́ѧсѧ, ꙗ҆́кѡ на престо́лѣ свѧтѣ́мъ сѣди́тъ свое́мъ, влⷣчце, въ нѣ́дрѣхъ твои́хъ: вопло́щсѧ бо бг҃ъ вои́стиннꙋ, воцр҃и́сѧ надъ всѣ́ми ꙗ҆зы̑ки, и҆ разꙋ́мнѡ ны́нѣ пои́мъ є҆мꙋ̀. є҆го́же ᲂу҆молѝ спасти́сѧ рабѡ́мъ твои̑мъ.
Крⷭ҇тобг҃оро́диченъ:
И҆́же ѿ безнача́льнагѡ ѻ҆ц҃а̀ рожде́ннаго напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.
Пѣ́снь д҃. І҆рмо́съ:
Оу҆слы́шахъ слꙋ́хъ си́лы крⷭ҇та̀, ꙗ҆́кѡ ра́й ѿве́рзесѧ и҆́мъ, и҆ возопи́хъ: сла́ва си́лѣ твое́й, гдⷭ҇и.
Бг҃олюби́выми содержи́ми ѻ҆бы̑чаи, бг҃опроти́внаго врага̀ страда́льческїй ли́къ побѣди́лъ є҆́сть, благода́тїю сп҃совою ᲂу҆крѣплѧ́емь.
Бг҃озва́нный по́лкъ страстоте́рпєцъ хрⷭ҇то́выхъ, бг҃опроти́вныхъ мно́жество ѕлочести́выхъ вра̑гъ побѣди́сте, воспѣва́юще: сла́ва си́лѣ твое́й, гдⷭ҇и.
Свѣ́тъ непристꙋ́пный ви́дѣвше страстоте́рпцы, въ темни́цѣ сѣдѧ́ще, многобо́жїѧ тмꙋ̀ і҆́дѡльскїѧ ле́сти разори́ша, бж҃їею си́лою ᲂу҆крѣплѧ́еми.
Бг҃оро́диченъ:
Ѡ҆сѣни́ тѧ, дв҃о, вы́шнѧгѡ си́ла, и҆ ра́й содѣ́ла тѧ̀, живо́тное дре́во и҆мꙋ́щи посредѣ̀, хода́таѧ и҆ гдⷭ҇а.
Пѣ́снь є҃. І҆рмо́съ:
Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ бо тебє̀ и҆но́гѡ не вѣ́мы.
Словесы̀ воспита́ни дх҃а ст҃а́гѡ, і҆́дѡльское безслове́сїе мꙋ́чєницы ᲂу҆праздни́ша.
Ѕвѣ́зды свѣтонѡ́сныѧ бы́вше страстоте́рпцы, и҆ цвѣ́ты вѣ́ры благоꙋха́нїѧ и҆спꙋща́юще.
Ни́ва ꙗ҆ви́стесѧ, свѧті́и, вы́шнѧгѡ, серпы̀ мꙋче́нїѧ пожина́еми, всехва́льнїи.
Бг҃оро́диченъ:
Не преста́й молѧ́щи, бцⷣе, є҆го́же родила̀ є҆сѝ, спастѝ дꙋ́шы на́шѧ, прилѣ́жнѡ воспѣва́ющихъ тѧ̀.
Пѣ́снь ѕ҃. І҆рмо́съ:
Ѡ҆бы́де мѧ̀ бе́здна, гро́бъ мнѣ̀ ки́тъ бы́сть, а҆́зъ же возопи́хъ къ тебѣ̀ чл҃вѣколю́бцꙋ, и҆ спасе́ мѧ десни́ца твоѧ̀, гдⷭ҇и.
Веселѧ́щесѧ мꙋ́чєницы вопїѧ́хꙋ: въ рꙋ́цѣ твоѝ, влⷣко чл҃вѣколю́бче, прїимѝ дꙋ́хи на́шѧ, и҆ поко́й и҆́хъ: тебе́ бо лю́бимъ є҆ди́наго многоми́лостиваго.
А҆́гг҃лѡмъ равносе́льницы бы́ша, ли́къ мꙋ́чєникъ твои́хъ, чл҃вѣколю́бче: тече́нїе бо сконча́вше, ны́нѣ мо́лѧтъ спасти́сѧ дꙋша́мъ на́шымъ.
Мꙋ́ченическаѧ сла́ва, мꙋ́ченическаѧ красота̀, мꙋ́ченическїй ли́че бг҃оизбра́нный, прилѣ́жнѡ моли́те спасти́сѧ всѣ̑мъ прибѣга́ющымъ къ ва́мъ.
Бг҃оро́диченъ:
Зача́тїѧ твоегѡ̀ безсѣ́меннагѡ чꙋ́до ко́е сло́во и҆зрещѝ мо́жетъ, пренепоро́чнаѧ; бг҃а бо зачала̀ є҆сѝ, за милосе́рдїе къ на́мъ прише́дшаго.
Конда́къ, гла́съ и҃. Подо́бенъ: Ꙗ҆́кѡ нача́тки:
Хрⷭ҇та̀ ра́ди мꙋ́чєницы мнѡ́гїѧ мꙋ̑ки под̾ѧ́сте, и҆ многобо́жїе низложи́сте всѐ і҆́дѡльское, и҆ разрꙋши́сте безбо́жїе всѧ́кїѧ пре́лести, хрⷭ҇то́вою си́лою сїѧ̑ попра́вше, на́съ всѣ́хъ вѣ́рнѡ наꙋча́ете вопи́ти ꙗ҆́вѣ: а҆ллилꙋ́їа.
Пѣ́снь з҃. І҆рмо́съ:
Въ пещѝ ѻ҆́гненнѣй пѣсносло́вцы спасы́й ѻ҆́троки, бл҃гослове́нъ бг҃ъ ѻ҆тє́цъ на́шихъ.
Въ пещѝ, хрⷭ҇тѐ, страстоте́рпцы твоѝ вопїѧ́хꙋ: бл҃гослове́нъ бг҃ъ ѻ҆тє́цъ на́шихъ.
Просвѣще́ни свѣ́томъ трⷪ҇ческимъ страда́льцы, съ весе́лїемъ дꙋ́шы своѧ̑ преда́ша, пою́ще: бл҃гослове́нъ бг҃ъ ѻ҆тє́цъ на́шихъ.
Предстоѧ́ще бг҃ꙋ вѣнцено́сцы страда́льцы съ весе́лїемъ, томꙋ̀ за ны̀ моли́тесѧ.
Бг҃оро́диченъ:
Ꙗ҆́кѡ спасе́нїе на́ше, тѧ̀, бцⷣе, мо́лимъ: молѝ за ны̀ вопло́щшагосѧ и҆зъ тебє̀.
Пѣ́снь и҃. І҆рмо́съ:
И҆зъ ѻ҆ц҃а̀ пре́жде вѣ̑къ рожде́ннаго сн҃а и҆ бг҃а, и҆ въ послѣ́днѧѧ лѣ̑та воплоще́ннаго ѿ дв҃ы мт҃ре, свѧще́нницы по́йте, лю́дїе превозноси́те во всѧ̑ вѣ́ки.
Съ мꙋ́ченики бꙋ́ди проше́нїе на́ше вѣ́рныхъ, и҆ тѣ́хъ наслѣ́дїѧ прича̑стницы бꙋ́демъ, хрⷭ҇та̀ пою́ще, и҆ превозносѧ́ще є҆го̀ въ вѣ́ки.
Ра́достїю серде́чною, ли́къ терпѣли́выхъ страда́лєцъ, ѿ хрⷭ҇та̀ вѣнцы̀ бг҃олѣ́пнѡ прїе́млетъ, и҆ свѣ́тлѡ пое́тъ, и҆ превозно́ситъ є҆го̀ во вѣ́ки.
Стрꙋѧ́ми крове́й ва́шихъ ѡ҆багри́вшесѧ, достохва́льнїи, и҆ на нб҃сѣ́хъ во вѣ́ки со хрⷭ҇то́мъ црⷭ҇твꙋете, благоче́стнѡ пою́ще, и҆ превозносѧ́ще є҆го̀ во вѣ́ки.
Бг҃оро́диченъ:
Херꙋві̑мъ вы́шши ꙗ҆ви́ласѧ є҆сѝ, бцⷣе чⷭ҇таѧ, во чре́вѣ твое́мъ сѣдѧ́щаго на ни́хъ поне́сши: є҆го́же со безпло́тными земні́и славосло́вимъ, и҆ превозно́симъ во вѣ́ки.
Пѣ́снь ѳ҃. І҆рмо́съ:
Тѧ̀ па́че ᲂу҆ма̀ и҆ словесѐ мт҃рь бж҃їю, въ лѣ́то безлѣ́тнаго неизрече́ннѡ ро́ждшꙋю, вѣ́рнїи є҆диномꙋ́дреннѡ велича́емъ.
За ѻ҆́бщее спасе́нїе моли́тесѧ, пресла́внїи мꙋ́чєницы, хрⷭ҇тꙋ̀ предстоѧ́ще, є҆гѡ́же ра́ди и҆ мꙋ̑ки претерпѣ́сте.
Си́лою крѣ́пкою преле́стнꙋю тве́рдость низложи́сте непобѣди́мїи: и҆ ны́нѣ въ жили́щахъ небе́сныхъ со а҆́гг҃лы жи́ти сподо́бистесѧ.
Зако́нными ѻ҆бы̑чаи мꙋ́ченическими, побѣди́вше го́рдаго мꙋчи́телѧ, и҆ вѣнцы̀ прїѧ́сте пра́вєдныѧ, всечестні́и.
Бг҃оро́диченъ:
Ра́дꙋйсѧ, бцⷣе мт҃и хрⷭ҇та̀ бг҃а, є҆го́же родила̀ є҆сѝ, молѝ съ мꙋ́ченики, грѣхѡ́въ ѡ҆ставле́нїе дарова́ти вѣ́рою воспѣва́ющымъ тѧ̀.
Слꙋ́жба на положе́нїе ри́зы, ꙗ҆́же є҆́сть хїтѡ́нъ, вели́кагѡ гдⷭ҇а бг҃а и҆ сп҃са на́шегѡ і҆и҃са хрⷭ҇та̀.
Ве́черъ, Блаже́нъ мꙋ́жъ: а҃-й а҆нтїфѡ́нъ. На Гдⷭ҇и, воззва́хъ, стїхи̑ры на и҃, гла́съ а҃. Подо́бенъ: Всехва́льнїи мꙋ́чєницы:
Ри́за честна́ѧ твоѧ̀, влⷣко, ꙳ ꙗ҆́же твоѐ бжⷭ҇твенное ꙳ и҆ пречⷭ҇тое тѣ́ло покрыва́ющаѧ, ꙳ ѻ҆де́ждꙋ и҆сцѣле́нїй дарова̀ на́мъ: ꙳ и҆ и҆сто́чникъ и҆сточа́ющи благода́ти ꙳ присноживѡ́тныѧ во́ды: ꙳ тоѧ̀ пра́зднꙋемъ положе́нїе, ꙳ воспѣва́юще тѧ̀ ꙳ всѣ́хъ содѣ́телѧ.
Хра́мъ тво́й, влⷣко, ꙳ твою̀ свѧще́ннꙋю ри́зꙋ ꙳ ꙗ҆́кѡ сокро́вище спасе́нїѧ ꙳ и҆ и҆сцѣле́нїѧ носѧ̀, ꙳ ѡ҆свѧща́етъ всѧ̑, ꙳ и҆̀же вѣ́рою притека́ющыѧ, ꙳ и҆ тѧ̀ по до́лгꙋ пою́щыѧ всегда̀, ꙳ ᲂу҆пова́нїе дꙋша́мъ на́шымъ, ꙳ и҆ тве́рдый покро́въ и҆ держа́ва.
Держа́ва непобѣди́маѧ ꙳ на́мъ хрⷭ҇тїа́нѡмъ дарова́сѧ, ꙳ ри́за твоѧ̀, і҆и҃се сп҃се на́шъ, ꙳ є҆́юже и҆ноплеме́нныхъ ꙗ҆зы́цы ꙳ при́снѡ побѣжда́ютсѧ, ꙳ и҆ ми́ръ цр҃кви твое́й, хрⷭ҇тѐ, ѡ҆сѣнѧ́етъ. ꙳ сегѡ̀ ра́ди вѣ́рою цѣлꙋ́юще ю҆̀, ꙳ покланѧ́емсѧ тебѣ̀, чл҃вѣколю́бче, и҆ мо́лимъ, ꙳ ча́сти сподо́бити на́съ ст҃ы́хъ твои́хъ.
Сла́ва, и҆ ны́нѣ, гла́съ и҃:
Крⷭ҇тꙋ̀ твоемꙋ̀ честно́мꙋ, и҆ ри́зѣ ст҃ѣ́й покланѧ́емсѧ, пребл҃гі́й, и҆ любо́вїю ѡ҆блобыза́емъ, сла́вѧще твоѐ є҆́же па́че ᲂу҆ма̀ соше́ствїе, и҆ безмѣ́рнꙋю ми́лость, и҆ бога́тꙋю благосты́ню: и҆́миже и҆сцѣлє́нїѧ подава́еши болѧ́щымъ, и҆ спаса́еши человѣ́ческое є҆стество̀, содержи́мо бы́вшее во тмѣ̀ прегрѣше́нїй, ꙗ҆́кѡ чл҃вѣколю́бецъ.
Вхо́дъ. Прокі́менъ днѐ. И҆ чтє́нїѧ трѝ.
И҆схо́да чте́нїе.
[Глава̀ є҃ї] Поѧ́тъ мѡѷсе́й сы́ны і҆и҃лєвы ѿ мо́рѧ чермна́гѡ, и҆ ведѐ и҆̀хъ въ пꙋсты́ню сꙋ́ръ: и҆ и҆дѧ́хꙋ трѝ днѝ въ пꙋсты́ни, и҆ не ѡ҆брѣта́хꙋ воды̀, да бы́ша пи́ли. Прїидо́ша же въ ме́ррꙋ, и҆ не можа́хꙋ пи́ти воды̀ ѿ ме́рры, горька́ бо бѣ̀. Сегѡ̀ ра́ди нарече́сѧ и҆́мѧ мѣ́стꙋ томꙋ̀ го́ресть. И҆ ропта́хꙋ лю́дїе на мѡѷсе́а, глаго́люще: что̀ пїе́мъ; Возопи́ же мѡѷсе́й ко гдⷭ҇ꙋ: и҆ показа̀ є҆мꙋ̀ гдⷭ҇ь дре́во, и҆ вложѝ є҆̀ въ во́дꙋ, и҆ сладка̀ бы́сть вода̀. Та́мѡ положѝ є҆мꙋ̀ бг҃ъ ѡ҆правда̑нїѧ и҆ сꙋды̀. И҆ та́мѡ и҆скꙋша́ше є҆го̀, и҆ речѐ: а҆́ще слꙋ́хомъ ᲂу҆слы́шиши гла́съ гдⷭ҇а бг҃а твоегѡ̀, и҆ ᲂу҆гѡ́днаѧ предъ ни́мъ сотвори́ши, и҆ внꙋши́ши за́пѡвѣди є҆гѡ̀, и҆ сохрани́ши всѧ̑ ѡ҆правда̑нїѧ є҆гѡ̀: всѧ́кꙋ болѣ́знь, ю҆́же наведо́хъ на є҆гѵ́птѧны, не наведꙋ̀ на тѧ̀: а҆́зъ бо є҆́смь гдⷭ҇ь, и҆сцѣлѧ́ѧй тѧ̀. И҆ прїидо́ша во є҆ли́мъ, и҆ бѧ́хꙋ та́мѡ двана́десѧть и҆стѡ́чникъ вѡ́дъ, и҆ се́дмьдесѧтъ стє́бль фі́нїковыхъ: и҆ ѡ҆полчи́шасѧ та́мѡ при вода́хъ. И҆ воздви́гшесѧ ѿ є҆ли́ма, и҆ прїи́де ве́сь со́нмъ сынѡ́въ і҆и҃левыхъ въ пꙋсты́ню сі́нъ, ꙗ҆́же є҆́сть междꙋ̀ є҆ли́момъ и҆ междꙋ̀ сі́ною.
При́тчей чте́нїе.
[Глава̀ г҃] Сы́не, не пренебрега́й наказа́нїѧ гдⷭ҇нѧ: нижѐ ѡ҆слабѣва́й ѿ негѡ̀ ѡ҆блича́емый. Є҆го́же бо лю́битъ гдⷭ҇ь, наказꙋ́етъ: бїе́тъ же всѧ́каго сы́на, є҆го́же прїе́млетъ. Блаже́нъ человѣ́къ, и҆́же ѡ҆брѣ́те премꙋ́дрость, и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ. Не сопротивлѧ́етсѧ є҆́й ничто́же лꙋка́вое, бл҃горазꙋ́мна є҆́сть всѣ̑мъ лю́бѧщымъ ю҆̀: всѧ́кое же честно́е недосто́йно є҆ѧ̀ є҆́сть. Долгота́ бо житїѧ̀, и҆ лѣ̑та жи́зни въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. Пꙋтїѐ є҆ѧ̀, пꙋтїѐ добры̑ и҆ всѧ̑ стєзѝ є҆ѧ̀ съ ми́ромъ. Дре́во живота̀ є҆́сть всѣ̑мъ держа́щымсѧ є҆ѧ̀, и҆ восклонѧ́ющымсѧ на ню̀, ꙗ҆́кѡ на гдⷭ҇а, тверда̀.
Прⷪ҇ро́чества и҆са́їина чте́нїе.
Та́кѡ гл҃го́летъ гдⷭ҇ь: ѿве́рзꙋтсѧ врата̀ твоѧ̑, і҆ерⷭ҇ли́ме, вы́нꙋ де́нь и҆ но́щь, и҆ не затворѧ́тсѧ, є҆́же ввестѝ къ тебѣ̀ си́лꙋ ꙗ҆зы́кѡвъ, и҆ царѝ и҆́хъ ведѡ́мыѧ: Ꙗ҆зы́цы бо и҆ ца́рїе, и҆̀же тебѣ̀ не порабо́таютъ, поги́бнꙋтъ: и҆ ꙗ҆зы́цы запꙋстѣ́нїемъ запꙋстѣ́ютъ. И҆ сла́ва лїва́нова къ тебѣ̀ прїи́детъ, въ кѷпарі́сѣ и҆ пе́ѵкѣ и҆ ке́дрѣ, вкꙋ́пѣ просла́вити мѣ́сто ст҃о́е моѐ, и҆ мѣ́сто нѡ́гъ мои́хъ просла́влю. И҆ по́йдꙋтъ къ тебѣ̀ боѧ́щїисѧ, сы́нове смири́вшихъ тѧ̀, и҆ прогнѣ́вавшихъ тѧ̀: и҆ покло́нѧтсѧ слѣда́мъ нѡ́гъ твои́хъ всѝ прогнѣ́вавшїи тѧ̀, и҆ нарече́шисѧ гра́дъ гдⷭ҇ень сїѡ́нъ ст҃а́гѡ і҆и҃лева. За є҆́же бы́ти тебѣ̀ ѡ҆ста́вленꙋ и҆ возненави́дѣнꙋ, и҆ не бѣ̀ помога́ѧй тебѣ̀: и҆ положꙋ́ тѧ въ ра́дость вѣ́чнꙋю, весе́лїе родѡ́мъ родѡ́въ: И҆ и҆ссе́ши млеко̀ ꙗ҆зы́кѡвъ, и҆ бога́тство царе́й снѣ́си, и҆ разꙋмѣ́еши, ꙗ҆́кѡ а҆́зъ гдⷭ҇и спаса́ѧй тѧ̀, и҆ и҆збавлѧ́ѧй тѧ̀ бг҃ъ і҆и҃левъ.
На лїті́и стїхи̑ры, гла́съ д҃, самогла́сны:
Гра́дъ москвꙋ̀ почита́ющїй тѧ̀, сп҃се, и҆ по до́лгꙋ сла́вѧщїй, ѡ҆гражда́еши, чл҃вѣколю́бче, и҆ лю́ди ри́зою бжⷭ҇твенною твое́ю, ѿ безбо́жныхъ и҆ноплемє́нникъ, ѿ гла́да же и҆ трꙋ́са, и҆ междоꙋсо́бныѧ бра́ни при́снѡ, и҆ болѧ́щымъ и҆сцѣлє́нїѧ подава́еши приходѧ́щымъ съ вѣ́рою: и҆́же земны́хъ не́мощь свѣ́дый, гдⷭ҇и, сла́ва тебѣ̀.
Ри́зꙋ твою̀ бжⷭ҇твеннꙋю, влⷣко хрⷭ҇тѐ, дарова́лъ є҆сѝ гра́дꙋ твоемꙋ̀ москвѣ̀, бога́тство неѿе́млемое: покро́въ же и҆ сла́вꙋ и҆ неѡбори́мꙋю стѣ́нꙋ, и҆ и҆сцѣле́нїй сокро́вище, и҆ чꙋде́съ и҆сто́чникъ приснотекꙋ́щь: приста́нище же спаси́тельное ѡ҆бꙋрева́ємымъ всегда̀. сегѡ̀ ра́ди пое́мъ тѝ: гдⷭ҇и, сла́ва тебѣ̀.
Почерпи́те человѣ́цы спасе́нїе дꙋша́мъ, и҆ и҆сцѣле́нїе тѣлесє́мъ: ра́ка бо всѣ̑мъ дне́сь предлежи́тъ, въ не́йже положи́сѧ а҆рхїере́йскими рꙋка́ми чⷭ҇тна́ѧ ри́за хрⷭ҇та̀ бг҃а на́шегѡ, є҆́же є҆́сть хїтѡ́нъ, и҆сточа́ющи на́мъ чꙋде́съ стрꙋи̑ ѻ҆би́льнѡ, и҆ ѿмыва́ющи серде́цъ ѡ҆мрачє́нїѧ, и҆ страсте́й ѿе́млющи скве́рнꙋ бжⷭ҇твенною бл҃года́тїю.
Сла́ва, и҆ ны́нѣ, гла́съ ѕ҃:
Ѡ҆дѣѧ́йсѧ свѣ́томъ ꙗ҆́кѡ ри́зою, на́гъ на сꙋдѣ̀ стои́тъ, и҆ въ лани́тꙋ ᲂу҆даре́нїе прїе́млетъ ѿ рꙋ́къ, ꙗ҆̀же созда̀, беззако́ннїи лю́дїе на крⷭ҇тѣ̀ пригвозди́ша гдⷭ҇а сла́вы, тогда̀ и҆ завѣ́са церко́внаѧ распаде́сѧ, со́лнце поме́рче, не терпѧ̀ зрѣ́ти бг҃ꙋ досажда́емꙋ, є҆гѡ́же трепе́щꙋтъ всѧ́чєскаѧ. томꙋ̀ поклони́мсѧ, глаго́люще: долготерпѣли́ве гдⷭ҇и, сла́ва тебѣ̀.
На стїхо́внѣ стїхи̑ры, гла́съ д҃. Подо́бенъ: Ꙗ҆́кѡ до́блѧ:
Во гла́сѣхъ воскли́кнемъ, ꙳ пѣ́сньми воспои́мъ, ꙳ крⷭ҇тъ честны́й ѡ҆блобыза́юще, ꙳ и҆ къ немꙋ̀ возопїи́мъ: ꙳ крⷭ҇те преблаже́нне, ꙳ ѡ҆свѧтѝ на́шѧ дꙋ́шы и҆ тѣлеса̀ ꙳ си́лою твое́ю: ꙳ и҆ ѿ всѧ́кагѡ вре́да сопроти́вна соблюдѝ неврежде́нны, ꙳ благоче́стнѡ покланѧ́ющыѧсѧ тебѣ̀.
Сті́хъ: Бг҃ъ же цр҃ь на́шъ пре́жде вѣ́ка содѣ́ла спасе́нїе посредѣ̀ землѝ.
Пристꙋпи́вше человѣ́цы, ꙳ почерпи́те неистоща́ємыѧ во́ды, ꙳ крⷭ҇та̀ бл҃года́тїю пролива́емы. ꙳ сѐ предложи́ма зри́тсѧ ны́нѣ ꙳ и҆ ри́за хрⷭ҇та̀ бг҃а на́шегѡ, ꙳ дарова́нїѧ и҆сто́чникъ, ꙳ напое́на кро́вїю бжⷭ҇твенною влⷣки всѣ́хъ, ꙳ ѡ҆дѣ́ющагѡ нб҃о ѻ҆́блаки, ꙳ и҆́же въ сїю̀ ѡ҆блещи́сѧ и҆зво́ливый, гдⷭ҇и, сла́ва тебѣ̀.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ свѧ́то є҆́сть.
Цр҃кве ᲂу҆твержде́нїе, ꙳ благовѣ́рныхъ хрⷭ҇тїа́нъ держа́ва, ꙳ мона́шествꙋющихъ похвало̀ и҆ спасе́нїе ꙳ ты̀ є҆сѝ, крⷭ҇те всече́стне. ꙳ тѣ́мже покланѧ́емсѧ тебѣ̀ се́рдцемъ и҆ дꙋше́ю, ꙳ и҆ просвѣща́емсѧ дне́сь ри́зою бжⷭ҇твенною, ꙳ ю҆́же плотска́гѡ ра́ди соше́ствїѧ своегѡ̀, поноси́ти и҆зво́лившемꙋ хрⷭ҇тꙋ̀ бг҃ꙋ на́шемꙋ, ꙳ и҆ чⷭ҇тно́ю кро́вїю свое́ю ѡ҆багри́вшемꙋ.
Сла́ва, и҆ ны́нѣ, гла́съ и҃:
Пре́жде честна́гѡ твоегѡ̀ крⷭ҇та̀, во́инѡмъ рꙋга́ющымсѧ тебѣ̀, гдⷭ҇и, ᲂу҆́мнаѧ вѡ́инства дивлѧ́хꙋсѧ: ѡ҆бложи́лсѧ бо є҆сѝ вѣнце́мъ порꙋга́нїѧ, зе́млею живописа́вый цвѣ́ты, багрѧни́цею порꙋга́нїѧ ѡ҆дѣ́ѧлсѧ є҆сѝ, ѻ҆́блаками ѡ҆дѣва́ѧй тве́рдь: таковы́мъ бо смотре́нїемъ разꙋмѣ́сѧ твоѐ бл҃гоꙋтро́бїе, хрⷭ҇тѐ: ве́лїѧ твоѧ̀ ми́лость, сла́ва тебѣ̀.
Тропа́рь, гла́съ д҃:
Дне́сь притеце́мъ вѣ́рнїи, къ бжⷭ҇твеннѣй и҆ цѣльбоно́снѣй ри́зѣ сп҃си́телѧ на́шегѡ бг҃а, благоизво́лившагѡ сїю̀ пло́тїю носи́ти, и҆ на крⷭ҇тѣ̀ ст҃ꙋ́ю свою̀ кро́вь и҆злїѧ́ти, є҆́юже и҆скꙋпѝ на́съ ѿ рабо́ты вра́жїѧ. тѣ́мъ благодарѧ́ще вопїе́мъ є҆мꙋ̀: спасѝ ѻ҆те́чество на́ше, и҆ а҆рхїере́євъ, и҆ гра́дъ, и҆ всѧ̑ лю́ди, чⷭ҇тно́ю твое́ю ри́зою защитѝ, и҆ спасѝ дꙋ́шы на́шѧ, ꙗ҆́кѡ чл҃вѣколю́бецъ.
На ᲂу҆́трени по а҃-й стїхоло́гїи сѣда́ленъ, гла́съ ѕ҃:
Дне́сь прⷪ҇ро́ческое и҆спо́лнисѧ сло́во, се́ бо покланѧ́емсѧ на мѣ́сто, и҆дѣ́же стоѧ́стѣ но́зѣ твоѝ, гдⷭ҇и: и҆ дре́во спасе́нїѧ вкꙋси́вше, грѣхо́вныхъ страсте́й свобо́дꙋ ᲂу҆лꙋчи́хомъ, моли́твами бцⷣы, є҆ди́не чл҃вѣколю́бче.
Сла́ва, и҆ ны́нѣ, то́йже.
И҆ чте́нїе въ толково́мъ є҆ѵⷢ҇лїи, ѿ матѳе́а, зача́ло рв҃ї: Тогда̀ во́ини и҆ге́мѡнѡвы, прїе́мше і҆и҃са на сꙋди́ще:
По в҃-й стїхоло́гїи сѣда́ленъ, гла́съ и҃:
На крⷭ҇тѣ́ тѧ возвы́шена ви́дѣвши со́лнце, незаходи́маго сл҃нца, хрⷭ҇тѐ, стра́хомъ помрачи́сѧ а҆́бїе: землѧ́ же поколеба́сѧ, ка́менїе тре́петомъ распада́шесѧ, и҆ цр҃ко́внаѧ раздра́сѧ завѣ́са, и҆ ме́ртвїи ѿ гробѡ́въ воста́ша, славосло́вѧще стра́шное и҆ бж҃е́ственное схожде́нїе, є҆ди́нагѡ тебє̀ бг҃а на́шегѡ.
Сла́ва, и҆ ны́нѣ, то́йже.
И҆ чте́нїе въ толково́мъ є҆ѵⷢ҇лїи, ѿ ма́рка, зача́ло ѯ҃з. Посе́мъ полѷеле́й, та́же припѣ́въ:
Велича́емъ тѧ̀, живода́вче хрⷭ҇тѐ, и҆ почита́емъ всѝ бжⷭ҇твенныѧ ри́зы твоеѧ̀ чⷭ҇тно́е положе́нїе.
Ѱало́мъ и҆збра́нный воздви́женїю. По полѷеле́и сѣда́ленъ, гла́съ ѕ҃:
На дре́во крⷭ҇тное, сп҃се, за милосе́рдїе ми́лости возне́слсѧ є҆сѝ: и҆ въ ре́бра пробо́дсѧ копїе́мъ, раздра́лъ є҆сѝ согрѣше́нїй рꙋкописа́нїе лю́тое, ꙗ҆́кѡ всеси́ленъ бг҃ъ. тѣ́мже твоѐ неизглаго́ланное, сло́ве, смотре́нїе пое́мъ благоче́стнѡ.
Сла́ва, и҆ ны́нѣ, то́йже.
Чте́нїе въ лꙋкѣ̀, зача́ло ра҃ї. Степє́нна, а҃-й а҆нтїфѡ́нъ, д҃-гѡ гла́са. Прокі́менъ, гла́съ д҃: Раздѣли́ша ри̑зы моѧ̑ себѣ̀, и҆ ѡ҆ ѻ҆де́жди мое́й мета́ша жре́бїй. Сті́хъ: Да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта. Всѧ́кое дыха́нїе: Є҆ѵⷢ҇лїе матѳе́а, зача́ло рв҃ї: Во вре́мѧ ѻ҆́но, во́ини пое́мше і҆и҃са на сꙋди́ще:
По н҃-мъ ѱалмѣ̀ стїхи́ра, гла́съ ѕ҃:
Совлеко́ша съ менє̀ ри̑зы моѧ̑, и҆ ѡ҆блеко́ша мѧ̀ въ ри́зꙋ червле́нꙋю, возложи́ша на главꙋ̀ мою̀ вѣне́цъ ѿ те́рнїѧ, и҆ въ деснꙋ́ю мою̀ рꙋ́кꙋ вда́ша тро́сть, лице́ же моѐ не ѿврати́хъ ѿ заплева́нїѧ, сꙋди́щꙋ пїла́товꙋ предста́хъ, и҆ распѧ́тїе претерпѣ́хъ за мїрско́е спасе́нїе.
Канѡ́нъ со і҆рмосы̀ на д҃ї.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Ѿве́рземъ ᲂу҆ста̀ человѣ́цы, и҆ ѧ҆зы́къ ᲂу҆ѧсни́мъ въ наро́читый де́нь пра́здника на́шегѡ, положе́нїе бжⷭ҇твенныѧ ри́зы хрⷭ҇та̀ бг҃а на́шегѡ свѣ́тлѡ сла́вѧще.
Сказа́ти хотѧ̀ свою̀ благода́ть вы́шнїй, и҆ прїѧ́тъ ра́бїй ѻ҆́бразъ на́съ ра́ди, на ᲂу҆вѣре́нїе є҆стества̀ человѣ́ческагѡ, честнꙋ́ю ри́зꙋ свою̀ вѣ̑рнымъ дне́сь дарова̀.
Ри́зꙋ твою̀ честнꙋ́ю, хрⷭ҇тѐ, дарова́лъ є҆сѝ на́мъ, свѧще́нное ѡ҆гражде́нїе, всѧ́кое сопроти́вныхъ настоѧ́нїе при́снѡ побѣжда́ющꙋю си́лою дꙋхо́вною.
Бг҃оро́диченъ:
Воздви́жена ви́дѧщи, є҆́же на крⷭ҇тѣ̀ твоѐ долготерпѣ́нїе, рыда́ше тебѐ ро́ждшаѧ, зовꙋ́щи: ка́кѡ сꙋди́мь ви́дитсѧ, хотѧ́й всѣ̑мъ сꙋди́ти сла́вы гдⷭ҇ь;
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.
Влⷣко сы́й по сꙋществꙋ̀, соедини́лсѧ є҆сѝ рабѡ́мъ пло́тїю, и҆ на́ше дѣ́тельствꙋѧ разли́чнѡ спасе́нїе, хрⷭ҇тѐ: є҆́же и҆ ны́нѣ промышлѧ́ѧ, твое́ю бжⷭ҇твенною ри́зою на́мъ чꙋдодѣ́йствꙋеши.
Пло́тїю на́съ ра́ди ꙗ҆вле́йсѧ на землѝ, бжⷭ҇твенныѧ ри́зы твоеѧ̀ приближе́нїемъ на́съ ѡ҆свѧти́лъ є҆сѝ: є҆́йже покланѧ́ющесѧ, хрⷭ҇тѐ, тѧ̀ воспѣва́емъ.
Животѐ ѵ҆поста́сный, ны́нѣ вкꙋси́лъ є҆сѝ сме́рти плотскі́ѧ, є҆́юже живо́тъ и҆сточи́лъ є҆сѝ мє́ртвымъ, воста́нїемъ твои́мъ, хрⷭ҇тѐ: ны́нѣ же ꙗ҆́кѡ животꙋ̀ хода́таѧ, ри́зꙋ твою̀ бг҃отѣле́снагѡ ѡ҆дѣѧ́нїѧ пода́лъ є҆сѝ на́мъ.
Бг҃оро́диченъ:
И҆зъ тебє̀, дв҃о, ѡ҆бновле́нїе ꙗ҆́вѣ ꙗ҆ви́сѧ, вои́стиннꙋ бг҃ъ пло́тїю ражда́емь, и҆ на крⷭ҇тъ возвыша́емь, низлага́ѧ де́мѡны, бг҃ора́дованнаѧ влⷣчце.
Сѣда́ленъ, гла́съ д҃. Подо́бенъ: Вознесы́йсѧ:
Сше́дый съ небесѐ за милосе́рдїе ми́лости, бл҃гоꙋтро́бне сп҃се, пло́ти твоеѧ̀ прест҃ы́ѧ дне́сь бжⷭ҇твеннꙋю ри́зꙋ гра́дꙋ чтꙋ́щемꙋ тѧ̀, и҆ лю́демъ хрⷭ҇тоимени̑тымъ, сокро́вище пода́лъ є҆сѝ ꙗ҆́кѡ тве́рдое всеѻрꙋ́жїе: ѿ неѧ́же почерпа́юще ѡ҆свѧще́нїе, сїю̀ вѣ́рою те́плѣ всѝ почита́емъ.
Сла́ва, и҆ ны́нѣ, то́йже. И҆ чте́нїе во і҆ѡа́ннѣ є҆ѵⷢ҇лі́стѣ толково́мъ. Во́ини же, є҆гда̀ распѧ́ша і҆и҃са:
Пѣ́снь д҃. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы, воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Ꙗ҆́кѡ многоцѣ́нное сокро́вище стѧжа́въ, хрⷭ҇тѐ, чтꙋ́щїй тѧ̀ гра́дъ москва̀, ри́зꙋ твою̀, влⷣко, вѣ́рою ѡ҆блобыза́етъ, и҆ бл҃года́ть прїе́млетъ.
Ви́дите чꙋ̑днаѧ всѝ лю́дїе, и҆ дꙋхо́внѡ ны́нѣ возвесели́тесѧ, хрⷭ҇та̀ пою́ще, дарова́вшаго на́мъ, ꙗ҆́кѡ многоцѣ́нное бога́тство, бжⷭ҇твенныѧ пло́ти своеѧ̀ ѡ҆дѣѧ́нїе.
Бг҃овидѣ́нїѧ сла́вы дре́вле сѣно́внѡ, твои́хъ за́днихъ сподо́бисѧ ви́дѣти мѡѷсе́й просїѧ́въ: мы́ же, но́вый і҆и҃ль, ны́нѣ лице́мъ въ лицѐ твою̀ честнꙋ́ю ри́зꙋ и҆зба́вителѧ на́шегѡ ви́димъ ꙗ҆́снѡ.
Бг҃оро́диченъ:
Раздра́сѧ рꙋкописа́нїе а҆да́мово, копїе́мъ прободе́нꙋ тѝ, влⷣко, бцⷣа вопїѧ́ше, ᲂу҆ крⷭ҇та̀ предстоѧ́щи, гдⷭ҇и, и҆ болѣ́зненнѡ восклица́ющи.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Просвѣти́сѧ дне́сь правосла́вныхъ со́нмище, є҆реті́ческїй же по́лкъ да посрами́тсѧ, покланѧ́емꙋю ви́дѧ бжⷭ҇твеннꙋю ри́зꙋ твою̀, влⷣко, пло́тїю на́мъ ꙗ҆́вльшагѡсѧ.
Ты̀, влⷣко, на́мъ твои̑мъ рабѡ́мъ дарова́лъ є҆сѝ ᲂу҆твержде́нїе, ри́зꙋ бг҃овочеловѣ́ченїѧ твоегѡ̀, бжⷭ҇твенное ѡ҆гражде́нїе, и҆ дꙋша́мъ спасе́нїе, и҆ тѣлесє́мъ и҆сцѣле́нїе.
Воспле́щемъ дне́сь рꙋка́ми, и҆ воскли́кнемъ гла́сомъ хвале́нїѧ гдⷭ҇еви: се́ бо вои́стиннꙋ прїи́де и҆ ꙗ҆ви́сѧ, всѧ̑ ѡ҆зарѧ́ѧ вѣ̑рныѧ бжⷭ҇твенныѧ ри́зы положе́нїемъ.
Бг҃оро́диченъ:
Пло́тїю є҆го́же родила̀ є҆сѝ сн҃а, бг҃ора́дованнаѧ, ꙗ҆́кѡ ви́дѣ на дре́вѣ воздви́жена, пла́чемъ и҆спо́лнисѧ, и҆ долготерпѣ́нїю є҆гѡ̀ дивлѧ́шесѧ вои́стиннꙋ: тѣ́мже велича́ше є҆гѡ̀ схожде́нїе.
Пѣ́снь ѕ҃. І҆рмо́съ:
Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Мє́ртвымъ живо́тъ возсїѧ̀, слѣпы̑мъ же свѣ́тъ прише́ствова, немощны̑мъ лю́тѣ врачевство̀ ѿве́рзесѧ, и҆ всѣ̑мъ спасе́нїѧ дне́сь прибли́жисѧ.
Вода́мъ тѧ̀ животекꙋ́щїй и҆сто́чникъ вѣ́мы, влⷣко, и҆ почита́емъ бжⷭ҇твеннꙋю ри́зꙋ твою̀, ѿ неѧ́же и҆сцѣлє́нїѧ всегда̀ вѣ́рнїи почерпа́емъ.
Стра́нствꙋетъ всѧ́къ ра́зꙋмъ, живоно́сныѧ пло́ти твоеѧ̀ ви́дѧ бжⷭ҇твенное ѡ҆дѣѧ́нїе, и҆ просвѣще́нїе и҆сточа́ющее покланѧ́ющымсѧ тебѣ̀.
Бг҃оро́диченъ:
Приста́нище бꙋ́ди мѝ, всенепоро́чнаѧ, въ пꙋчи́нѣ лю́тыхъ пла́вающемꙋ: ꙗ҆́же бѣ́дствꙋющꙋю всю̀ тва́рь, ржⷭ҇тво́мъ твои́мъ, бг҃ороди́тельнице, спасла̀ є҆сѝ.
Конда́къ, гла́съ д҃:
Ѡ҆дѣѧ́нїе нетлѣ́нїѧ, сп҃си́тельнагѡ цѣле́нїѧ, всѣ̑мъ человѣ́кѡмъ, влⷣко, дарова́лъ є҆сѝ твоѐ бжⷭ҇твенное сокро́вище честнꙋ́ю ри́зꙋ, ꙗ҆́же є҆́сть хїтѡ́нъ, є҆́юже живоно́снꙋю и҆ ст҃ꙋ́ю пло́ть вочл҃вѣ́ченїѧ твоегѡ̀ ѡ҆дѣ́ѧти благоволи́лъ є҆сѝ: сїю̀ жела́нїемъ прїе́млюще свѣ́тлѡ пра́зднꙋемъ, стра́хомъ же и҆ любо́вїю, ꙗ҆́кѡ бл҃года́телю воспѣва́юще, зове́мъ тѝ, хрⷭ҇тѐ: сохранѝ въ ми́рѣ ѻ҆те́чество на́ше, и҆ а҆рхїере́євъ, и҆ всѧ̑ лю́ди, по вели́цѣй твое́й ми́лости.
І҆́косъ:
Ѽ пресла́внагѡ чꙋдесѐ! каково̀ бж҃їе дарова́нїе рѡссі́йстѣй землѝ дарова́сѧ; ри́за, є҆́юже безгрѣ́шный гдⷭ҇ь ѡ҆дѣ́емь, сїю̀ неблагода́рнїи лю́дїе ѿ да́льныхъ стра́нъ, ꙗ҆́кѡ да́ръ нѣ́кїй въ ца́рствꙋющїй гра́дъ москвꙋ̀ принесо́ша. тогда̀ ᲂу҆́бѡ ю҆̀ благовѣ́рный ца́рь мїхаи́лъ, со ѻ҆тце́мъ свои́мъ фїларе́томъ патрїа́рхомъ, не ꙗ҆́кѡ зе́мленъ да́ръ, но ꙗ҆́кѡ нбⷭ҇нꙋю жи́знь, вели́кимъ жела́нїемъ, и҆ со свидѣ́тельствомъ дꙋхо́внымъ ра́достнѡ прїѧ́ша, и҆ бг҃олѣ́пнымъ поклоне́нїемъ влⷣцѣ хрⷭ҇тꙋ̀ бг҃ꙋ на́шемꙋ благода́рствєнныѧ хвалє́нїѧ возда́ша, си́це глаго́люще: сла́ва тѝ, гдⷭ҇и, ꙗ҆́кѡ премно́гїѧ ра́ди бл҃гости твоеѧ̀ рѡссі́йскꙋю странꙋ̀ на́шꙋ назира́еши: сла́ва тѝ, влⷣко, ꙗ҆́кѡ благи́мъ сокро́вищемъ ст҃ы́ни твоеѧ̀ держа́вꙋ, ю҆́же да́лъ є҆сѝ на́мъ, ѡ҆богаща́еши: сла́ва тѝ, ст҃ы́й, ꙗ҆́кѡ бг҃отѣле́снꙋю твою̀ ри́зꙋ на спасе́нїе на́мъ дарова́лъ є҆сѝ, по вели́цѣй твое́й ми́лости.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
Всѧ́къ гра́дъ ра́дꙋетсѧ, пра́зднꙋѧ вѣ́рнѡ съ но́вымъ сїѡ́номъ, мона́си и҆ прості́и, бога́тїи и҆ ᲂу҆бо́зїи, ꙗ҆́вльшꙋсѧ дне́сь бжⷭ҇твенномꙋ твоемꙋ̀, хрⷭ҇тѐ, ѡ҆дѣѧ́нїю, свѣтода́тельными и҆сцѣлє́нїи.
Черто́гъ бж҃їй и҆збра́нный, въ честнѣ́мъ се́мъ черто́зѣ, вѣ́рою ри́зꙋ твою̀, влⷣко, положе́нꙋ а҆рхїере́йскими ѡ҆свѧще́нными рꙋка́ми: ю҆́же почита́емъ, ꙗ҆́кѡ благочести́вый покро́въ.
Ѡ҆бновлѧ́етсѧ всѧ́къ пристꙋпа́ѧй вѣ́рою, и҆ ст҃ы́й ѡ҆блобыза́ѧй ковче́гъ, держа́щїй твою̀, влⷣко хрⷭ҇тѐ, свѣтови́днꙋю ѻ҆де́ждꙋ.
Скве́рны всѧ́кїѧ дꙋше́вныѧ чисти́тельна є҆́сть твоѧ̀, влⷣко хрⷭ҇тѐ, бжⷭ҇твеннаѧ ѻ҆де́жда, покрыва́ющаѧ живоно́сное и҆ пречⷭ҇тое тѣ́ло твоѐ.
Свѧще́нницы въ пра́вдꙋ ѡ҆блецы́тесѧ всѝ, и҆ прпⷣбнїи возра́дꙋйтесѧ свѣ́тлѡ: се́ бо дарова̀ на́мъ свѣ́тъ хрⷭ҇то́съ, ст҃ы́ѧ пло́ти своеѧ̀ ѻ҆де́ждꙋ, дꙋша́мъ и҆ тѣлесє́мъ во спасе́нїе.
Бг҃оро́диченъ:
Бг҃ороди́тельнице дв҃о, тебѐ чтꙋ́щїй гра́дъ, гла́да и҆ трꙋ́са, и҆ ѡ҆ѕлобле́нїѧ всѧ́кагѡ спаса́й, и҆ ꙗ҆зы́ческагѡ нахожде́нїѧ и҆ сопроти́внагѡ вре́да.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Соверше́нъ сы́й по сꙋществꙋ̀ бг҃ъ, и҆ чл҃вѣ́къ ви́дѣнъ бы́сть соверше́нъ, спаса́ѧ по ѻ҆боемꙋ̀ своѧ̑ вои́стиннꙋ свѡ́йства: ꙗ҆́кѡ бг҃ъ бо бг҃очеловѣ́ческїй ѻ҆́бразъ ᲂу҆вѣрѧ́ѧ, и҆ бжⷭ҇твенныѧ пло́ти своеѧ̀ ри́зꙋ на́мъ, ꙗ҆́кѡ стѣ́нꙋ и҆ покро́въ, дарова́лъ є҆́сть.
Вознесѝ ро́гъ, бж҃їй сло́ве, и҆сповѣ́дающихъ тѧ̀ бг҃а и҆ чл҃вѣ́ка, и҆ бжⷭ҇твеннѣй ри́зѣ твое́й покланѧ́ющихсѧ, є҆́юже и҆сцѣле́нїе всѣ̑мъ вѣ̑рнымъ дарова́сѧ: и҆ ᲂу҆празднѝ пога̑нскаѧ шата̑нїѧ невѣ́дꙋщихъ твоеѧ̀ си́лы бжⷭ҇твенныѧ.
Свѣ́титсѧ твоѧ̀ собо́рнаѧ и҆ а҆пⷭ҇льскаѧ цр҃ковь положе́нїемъ ри́зы твоеѧ̀: сла́вы бо свѣ́тъ на́мъ дарова́лъ є҆сѝ, хрⷭ҇тѐ, бжⷭ҇твенныѧ пло́ти твоеѧ̀ ѡ҆дѣѧ́нїе, є҆́юже на́съ просвѣтѝ во спасе́нїе: мы́ же вѣ́рою и҆ любо́вїю сїю̀ почита́емъ.
Бг҃оро́диченъ:
Ви́дѣвши ᲂу҆снꙋ́вша на дре́вѣ хрⷭ҇та̀, всѣ̑мъ бо́дрость подава́ющаго, бжⷭ҇твеннꙋю и҆ спаси́тельнꙋю, мт҃и всенепоро́чнаѧ восклица́нїемъ пла́каше и҆ взыва́ше: что̀ сїѐ но́вое чꙋ́до, ѡ҆живлѧ́ѧй всѧ̑ ᲂу҆мира́етъ хотѧ̀;
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.
Пое́мъ бг҃ꙋ пѣ́снь благода́рнꙋю, и҆зво́лившемꙋ бога́тство превели́кое на́мъ пода́ти, стѣ́нꙋ неѡбори́мꙋю, и҆ небла́зненное ᲂу҆твержде́нїе, бжⷭ҇твенныѧ пло́ти своеѧ̀ ѡ҆дѣѧ́нїе: є҆́же чтꙋ́ще вѣ́рнїи велича́емъ.
Ѽ па́че ᲂу҆ма̀ чꙋде́съ твои́хъ, гдⷭ҇и, ꙗ҆̀же сотвори́лъ є҆сѝ на́мъ, на тѧ̀ надѣ́ющымсѧ! ꙗ҆́коже бо и҆мѣ́вый неизрече́нное ржⷭ҇тво̀, та́кѡ стра́ннѡ всѣ̑мъ показа́лъ є҆сѝ бжⷭ҇твенныѧ пло́ти твоеѧ̀ ри́зꙋ, ко и҆сцѣле́нїю и҆ просвѣще́нїю чтꙋ́щымъ тѧ̀.
Предложи́сѧ ны́нѣ честна́ѧ ра́ка, держа́щи бжⷭ҇твеннꙋю ри́зꙋ и҆зба́вителѧ на́шегѡ хрⷭ҇та̀: и҆ ꙗ҆́кѡ и҆сто́чникъ свѣ́та, зарю̀ и҆сцѣле́нїй и҆спꙋща́ющи, и҆ тмꙋ̀ недꙋ́гѡвъ ѿгонѧ́ющи, ю҆́же любо́вїю цѣлꙋ́емъ.
Бг҃оро́диченъ:
Просвѣтѝ, чⷭ҇таѧ, любо́вїю чтꙋ́щихъ и҆ велича́ющихъ тѧ̀, и҆ разрꙋшѝ стра̑сти на́шѧ, ѻ҆трокови́це, и҆ бꙋ́рю ᲂу҆кротѝ, и҆ лꙋка́вагѡ собла́зны ѿ среды̀ ѿженѝ, а҆га̑рѧнскаѧ ча̑да ты̀, бцⷣе, покорѝ во́инствꙋ на́шемꙋ моли́твами твои́ми.
Свѣти́ленъ:
Се́рдца моегѡ̀ стрꙋ́пы, ѿ мно́гихъ грѣхѡ́въ прозѧ́бшыѧ мѝ и҆сцѣлѝ, сп҃се, ꙗ҆́кѡ дꙋша́мъ и҆ тѣлесє́мъ вра́чь: и҆ подаѧ̀ просѧ́щымъ прегрѣше́нїй проще́нїе, и҆ недꙋ́гѡвъ всѣ́хъ и҆сцѣле́нїе, ѿ честны́ѧ твоеѧ̀ и҆ бг҃отѣле́сныѧ ри́зы благода́ти сподо́би, ꙗ҆́кѡ бл҃гъ и҆ всеми́лостивъ.
Сла́ва, и҆ ны́нѣ, то́йже.
На хвали́техъ стїхи̑ры на д҃, гла́съ д҃. Подо́бенъ: Ꙗ҆́кѡ до́блѧ:
Зако́нꙋ творца̀ ꙳ ѿ ᲂу҆ченика̀ кꙋпи́ша беззако́ннїи, ꙳ и҆ ꙗ҆́кѡ законопрестꙋ́пника ꙳ того̀ пїла́товꙋ сꙋди́щꙋ предста́виша, зовꙋ́ще: ꙳ распнѝ и҆́же въ пꙋсты́ни си̑мъ маннода́вшаго. ꙳ мы́ же, хрⷭ҇тѐ, стрⷭ҇те́мъ твои̑мъ ꙳ и҆ честнѣ́й ри́зѣ покланѧ́ющесѧ ꙳ вѣ́рою, сп҃се, зове́мъ: ꙳ поми́лꙋй на́съ.
Два́жды.
Живонѡ́снаѧ твоѧ̑ ре́бра, ꙳ ꙗ҆́кѡ и҆зъ є҆де́ма и҆сто́чникъ и҆сточа́ющаѧ, ꙳ цр҃ковь твою̀, хрⷭ҇тѐ, ꙳ ꙗ҆́кѡ слове́сный напаѧ́етъ ра́й, ꙳ ѿсю́дꙋ раздѣлѧ́ѧсѧ ꙗ҆́кѡ въ нача̑ла, въ четы́ре є҆ѵⷢ҇лїа, ꙳ мі́ръ напаѧ́ѧ, ꙳ тва́рь веселѧ̀. ꙳ тѣ́мъ всѝ притека́емъ, покланѧ́ющесѧ ст҃ѣ́й ри́зѣ твое́й, вѣ́рою зовꙋ́ще: ꙳ сп҃се, поми́лꙋй на́съ.
Распина́емꙋ тебѣ̀, хрⷭ҇тѐ, ꙳ всѧ̀ тва́рь ви́дѧщи трепета́ше, ꙳ ѡ҆снова̑нїѧ землѝ поколеба́шасѧ ꙳ стра́хомъ держа́вы твоеѧ̀. ꙳ во́ини же тогда̀ ри̑зы твоѧ̑ раздѣли́ша себѣ̀, ꙳ и҆ ѡ҆ і҆маті́смѣ твое́й мета́ша жрє́бїѧ, ꙳ ю҆́же ны́нѣ предложе́нꙋ зрѧ́ще вѣ́рнїи, ꙳ стра́хомъ и҆ любо́вїю зове́мъ: ꙳ тоѧ̀ ра́ди, сп҃се, поми́лꙋй на́съ.
Сла́ва, и҆ ны́нѣ, гла́съ є҃:
И҆збавле́нїе цѣ́нꙋ вели́кꙋю, пречи́стꙋю кро́вь твою̀ и҆зво́лилъ є҆сѝ да́ти на́съ ра́ди, безгрѣ́шне хрⷭ҇тѐ мо́й, всѣ̑мъ хотѧ́й спасе́нїе полꙋчи́ти. тѣ́мже воспѣва́емъ твоѐ сла́вное хотѣ́нїе, и҆ покланѧ́ющесѧ чти́мъ копїѐ, и҆ гꙋ́бꙋ, и҆ тро́сть: съ си́ми же ст҃ꙋ́ю и҆ честнꙋ́ю ри́зꙋ твою̀, ю҆́же на бг҃отѣле́снѣй пло́ти твое́й на́съ ра́ди грѣ́шныхъ носи́лъ є҆сѝ, и҆́миже да́рꙋеши всѣ̑мъ на́мъ нетлѣ́нїе и҆ жи́знь, просвѣще́нїе и҆ ве́лїю ми́лость.
Славосло́вїе вели́кое: И҆ є҆ктєнїѝ. И҆ ѿпꙋ́стъ. И҆ ча́съ пе́рвый. И҆ коне́чный ѿпꙋ́стъ.
На лїтꙋргі́и, Бл҃жє́нна, пѣ́снь г҃-ѧ и҆ ѕ҃. Прокі́менъ, гла́съ з҃: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ свѧ́то є҆́сть. Сті́хъ: Гдⷭ҇ь воцр҃и́сѧ, да гнѣ́ваютсѧ лю́дїе. А҆пⷭ҇лъ къ корі́нѳѧнѡмъ, зача́ло рк҃є: Бра́тїе, сло́во крⷭ҇тное погиба́ющымъ: А҆ллилꙋ́їа, гла́съ а҃: Помѧнѝ со́нмъ тво́й, є҆го́же стѧжа́лъ є҆сѝ и҆спе́рва. Сті́хъ: Бг҃ъ же цр҃ь на́шъ пре́жде вѣ́ка, содѣ́ла спасе́нїе посредѣ̀ землѝ. Є҆ѵⷢ҇лїе ма́рка, зача́ло ѯ҃з: Во вре́мѧ ѻ҆́но, во́ини ведо́ша і҆и҃са внꙋ́трь двора̀: Прича́стенъ: Зна́менасѧ на на́съ:
Слꙋ́жба прпⷣбнагѡ ѻ҆тца̀ на́шегѡ а҆нтѡ́нїа пече́рскагѡ, и҆́же въ кі́евѣ, бы́вшагѡ нача́льника всѣ́хъ рѡссі́йскихъ мона́хѡвъ.
На ма́лѣй вече́рни, на Гдⷭ҇и, воззва́хъ, поста́вимъ стїхѡ́въ д҃. И҆ пое́мъ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Ст҃ы́ѧ горы̀ вели́кихъ ѻ҆тцє́въ, ѻ҆́ч҃е а҆нтѡ́нїе, стопа́мъ послѣ́довалъ є҆сѝ, и҆ ꙗ҆́кѡ безпло́тенъ въ пло́ти подвиза́всѧ, ꙳ ѻ҆́бразъ мнѡ́гимъ добродѣ́телїю бы́лъ є҆сѝ. ꙳ ѿѻнꙋ́дꙋже и҆ дарѡ́въ чꙋде́съ ѿ хрⷭ҇та̀ сподо́билсѧ є҆сѝ, ꙳ и҆сцѣлѧ́ти человѣ́кѡвъ разли̑чныѧ недꙋ́ги, ꙳ молѝ спасти́сѧ дꙋша́мъ на́шымъ.
Два́жды.
Нача́льникъ мона́шествꙋющихъ, ѻ҆́ч҃е а҆нтѡ́нїе, бы́лъ є҆сѝ, ꙳ себѐ первонача́токъ безъ кро́ве бг҃ꙋ приносѧ̀, ꙳ воздержа́нїемъ любомꙋ́дрїѧ: ꙳ смире́нїемъ, высо́кими нра̑вы ꙳ и҆ безмѣ́рнымъ поще́нїемъ врага̀ посрами́лъ є҆сѝ, прпⷣбне: ꙳ молѝ спасти́сѧ дꙋша́мъ на́шымъ.
Свѣтоно́снаѧ па́мѧть твоѧ̀, ꙳ ѻ҆́ч҃е прпⷣбне а҆нтѡ́нїе, ꙳ и҆спо́лнена ра́дости и҆ весе́лїѧ ꙗ҆ви́сѧ: ꙳ ѿѻнꙋ́дꙋже свѧщє́ннаѧ твоѧ̑ ча̑да соше́дшесѧ, ꙳ дꙋхо́внѡ пра́зднꙋюще прославлѧ́емъ гдⷭ҇а, ꙳ тебѐ и҆́скреннѡ просла́вльшаго.
Сла́ва, гла́съ ѕ҃:
Дне́сь гора̀ а҆ѳѡ́нскаѧ, ꙗ҆́коже но́ваго а҆враа́ма пресе́льника, тѧ̀ пресла́внѡ, ѻ҆́ч҃е, прїе́мши ра́дꙋетсѧ: ѻ҆те́чество же твоѐ, блаже́нне, па́ки сожи́телѧ тѧ̀ и҆мꙋ́щи, ѕѣлѡ̀ весели́тсѧ: и҆ пеще́ра, въ не́йже подвиза́лсѧ є҆сѝ, ѡ҆ тебѣ̀ красꙋ́етсѧ. пресвѣ́тлый гра́дъ кі́евъ, па́мѧть твою̀ пра́зднꙋѧ торже́ствєннаѧ гдⷭ҇ꙋ воспѣва́етъ, тѧ̀ стѣ́нꙋ неразоре́ннꙋ семꙋ̀ дарова́вшаго. мы́ же ча̑да твоѧ̑, твои́мъ наꙋче́нїемъ наставлѧ́еми, ны́нѣ пресла́вное твоѐ ᲂу҆спе́нїе пра́зднꙋюще мо́лимсѧ: молѝ спасти́сѧ дꙋша́мъ на́шымъ.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀:
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Ѿ земны́хъ къ нбⷭ҇нымъ ѻ҆би́телемъ ꙳ пресла́внѡ, ѻ҆́ч҃е, преше́лъ є҆сѝ, ꙳ и҆ та́мѡ прпⷣбныхъ че́сти сподо́билсѧ є҆сѝ: ꙳ съ ни́миже молѝ, ꙳ спасти́сѧ дꙋша́мъ на́шымъ.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Тѣлє́снаѧ чꙋ̑вства воздержа́нїемъ, ꙳ ѻ҆́ч҃е, ᲂу҆мертви́лъ є҆сѝ: ꙳ тѣ́мъ и҆ въ те́мнꙋю пеще́рꙋ, ꙳ ꙗ҆́кѡ въ пресвѣ́тлый черто́гъ всели́лсѧ є҆сѝ, ꙳ и҆дѣ́же и҆ ᲂу҆чени̑къ мно́жество хрⷭ҇тꙋ̀ приве́лъ є҆сѝ.
Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Ста́до твоѐ ꙳ тебѐ почита́ющее, прпⷣбне, ꙳ и҆ твоѐ ᲂу҆спе́нїе пра́зднꙋющее, ꙳ ва́рварскагѡ наше́ствїѧ и҆збавлѧ́ѧ, ꙳ молѝ спасти́сѧ дꙋша́мъ на́шымъ.
Сла́ва, и҆ ны́нѣ, гла́съ в҃:
Хра́мъ прече́стенъ бж҃їѧ мт҃ре, ꙗ҆́коже сама̀ та̀ восхотѣ̀, воздви́глъ є҆сѝ, и҆ та́мѡ мно́жество ᲂу҆чєни́къ собра́лъ є҆сѝ въ не́мъ, воспѣва́ти влⷣчцꙋ и҆ бцⷣꙋ, ю҆́же молѝ, мо́лимтисѧ, прпⷣбне а҆нтѡ́нїе, не ѡ҆ста́вити, ꙗ҆́коже ѡ҆бѣща́лсѧ є҆сѝ, свѧще́нное твоѐ ста́до, и҆збавлѧ́ѧ и҆ спаса́ѧ ѿ проти́вныхъ наше́ствїѧ: да тебѐ всѝ ꙗ҆́кѡ чадолюби́ваго ѻ҆тца̀ пѣ́сньми непреста́ннѡ почита́емъ, просѧ́ще ѿ хрⷭ҇та̀ прїѧ́ти тобо́ю ве́лїю ми́лость.
Тропа́рь, гла́съ д҃:
Ѿ мїрска́гѡ мѧте́жа и҆зше́дъ, ѿверже́нїемъ же мі́ра є҆ѵⷢ҇льски хрⷭ҇тꙋ̀ послѣ́довалъ є҆сѝ: и҆ равноа́гг҃льное житїѐ пожи́въ, въ ти́хое приста́нище ст҃ы́ѧ горы̀ а҆ѳѡ́на дости́глъ є҆сѝ, ѿѻнꙋ́дꙋже благослове́нїемъ ѻ҆тцє́въ въ го́рꙋ кі́ева прише́дъ, и҆ та́мѡ трꙋдолю́бнѡ жи́знь соверши́въ, ѻ҆те́чество твоѐ просвѣти́лъ є҆сѝ, и҆ мно́жествꙋ мона́шествꙋющихъ стезю̀ ведꙋ́щꙋю къ нбⷭ҇номꙋ црⷭ҇твїю показа́въ, хрⷭ҇тꙋ̀ сїѧ̑ приве́лъ є҆сѝ: є҆го́же молѝ, а҆нтѡ́нїе прпⷣбне, да спасе́тъ дꙋ́шы на́шѧ.
На вели́цѣй вече́рни стїхологисꙋ́емъ Блаже́нъ мꙋ́жъ: а҃-й а҆нтїфѡ́нъ.
На Гдⷭ҇и, воззва́хъ, поста́вимъ стїхѡ́въ и҃. И҆ пое́мъ стїхи̑ры, гла́съ д҃. Подо́бенъ: Зва́нный свы́ше:
Є҆гда̀ бжⷭ҇твенное раче́нїе ꙳ на́йде на тѧ̀, прпⷣбне, ꙳ тогда̀ мїрско́е пристра́стїе ꙳ ꙗ҆́кѡ хꙋ́до вмѣни́лъ є҆сѝ: ꙳ тѣ́мже и҆ пресе́льникъ ꙳ ѿ твоегѡ̀ ѻ҆те́чества, ꙳ ст҃ы́ѧ горы̀ бы́лъ є҆сѝ, ꙳ и҆ та́мѡ посредѣ̀ ѻ҆́нѣхъ ѻ҆тє́цъ ꙳ ꙗ҆́кѡ свѣти́ло возсїѧ́лъ є҆сѝ ꙳ добродѣ́телїю, а҆нтѡ́нїе. ꙳ хрⷭ҇та̀, є҆мꙋ́же ѿ ю҆́ности послꙋжи́лъ є҆сѝ, ꙳ молѝ спастѝ и҆ просвѣти́ти дꙋ́шы на́шѧ.
Є҆гда̀ хрⷭ҇то́вою любо́вїю ꙳ распали́лсѧ є҆сѝ, прпⷣбне, ꙳ тогда̀ мі́ра сегѡ̀ ꙳ мꙋдрова́нїе и҆ сла́вꙋ, ꙳ ꙗ҆́кѡ преходѧ́щꙋю возненави́дѣлъ є҆сѝ. ꙳ тѣ́мже и҆ пеще́рꙋ себѣ̀ содѣ́лалъ є҆сѝ, ꙳ и҆ въ не́й подвиза́лсѧ ꙗ҆́кѡ безпло́тенъ: ꙳ тѣ́мже и҆ свы́ше безпло́тныхъ ꙳ по́чести сподо́билсѧ є҆сѝ, ꙳ съ ни́миже хрⷭ҇тꙋ̀ предстоѧ̀, ꙳ молѝ спастѝ и҆ просвѣти́ти дꙋ́шы на́шѧ.
Є҆гда̀ бжⷭ҇твеннꙋю любо́вь ꙳ прїѧ́лъ є҆сѝ въ се́рдцы, ѻ҆́ч҃е, ꙳ тогда̀ въ те́мнꙋю пеще́рꙋ, ꙳ ꙗ҆́кѡ въ пресвѣ́тлый черто́гъ вше́лъ є҆сѝ, и҆ та́мѡ неизрече́нныхъ ꙳ ра́зꙋма ѡ҆богати́лсѧ, ꙳ зрѣ́ти бꙋ̑дꙋщаѧ ꙳ ꙗ҆́кѡ настоѧ̑щаѧ, ꙳ и҆ всѣ̑мъ ꙗ҆́снѡ глаго́лати: ꙳ хрⷭ҇та̀, є҆мꙋ́же ѿ ю҆́ности порабо́тилсѧ є҆сѝ, ꙳ того̀ молѝ, прпⷣбне, ꙳ спастѝ и҆ просвѣти́ти дꙋ́шы на́шѧ.
И҆́ны стїхи̑ры прпⷣбнагѡ, гла́съ є҃. Подо́бенъ: Прпⷣбне ѻ҆́ч҃е:
Прпⷣбне ѻ҆́ч҃е а҆нтѡ́нїе, благода́тїю прест҃а́гѡ дх҃а ᲂу҆́мъ тво́й ѡ҆зари́въ, тѣ́мъ ꙗ҆́кѡ прозорли́въ проро́чески проре́клъ є҆сѝ, хотѧ́щь гнѣ́въ бж҃їй прїитѝ на правосла́вїе. ѿню́дꙋже и҆ сі́мѡнꙋ спасе́нїе ѿ ра́тныхъ ѡ҆брꙋчи́лъ є҆сѝ: и҆ пре́жде цр҃ко́внагѡ зда́нїѧ томꙋ̀ въ не́й положе́нꙋ бы́ти предре́клъ є҆сѝ. тѣ́мъ ꙗ҆́кѡ хода́таѧ тѧ̀ вы́нꙋ всѣ̑мъ благи̑мъ воспѣва́емъ, просѧ́ще тобо́ю ѿ хрⷭ҇та̀ прїѧ́ти ве́лїю ми́лость.
Прпⷣбне ѻ҆́ч҃е а҆нтѡ́нїе, ты̀ и҆́стиннагѡ па́стырѧ и҆ ᲂу҆чи́телѧ хрⷭ҇та̀ за́пѡвѣди и҆сполнѧ́ѧ, любо́вное и҆ по преставле́нїи твое́мъ показа́въ, є҆ра́зма ѡ҆ раска́ѧнїи и҆мѣ́нїѧ, лѣ́ностнѡ пожи́вшаго, моли́твами твои́ми и҆ ꙗ҆вле́нїемъ, сме́ртнагѡ недꙋ́га премѣни́лъ є҆сѝ, и҆ вре́мѧ покаѧ́нїѧ томꙋ̀ дарова́въ, и҆ны́хъ къ цѣломꙋ́дрїю наста́вилъ є҆сѝ: тѣ́мже хрⷭ҇та̀ молѝ, спасти́сѧ дꙋша́мъ на́шымъ.
Прпⷣбне ѻ҆́ч҃е а҆нтѡ́нїе, ты̀ съ бг҃омъ цѣломꙋ́дреннѡ кора́бль ᲂу҆ма̀ твоегѡ̀ напра́вилъ є҆сѝ, и҆ страстнꙋ́ю пꙋчи́нꙋ мо́рѧ мі́ра сегѡ̀ немѧте́жнѡ преплы́лъ є҆сѝ, дх҃а прест҃а́гѡ вѣ́триломъ направлѧ́емь, въ ти́хое приста́нище поро́ды дости́глъ є҆сѝ, и҆дѣ́же ст҃ы́хъ жили́ще, и҆ поко́й пра́ведныхъ. съ ни́миже моли́сѧ, и҆ на́мъ та́мѡ вхо́дъ полꙋчи́ти, мо́лимсѧ.
Сла́ва, гла́съ ѕ҃:
Жесто́кое твоѐ житїѐ, и҆ трꙋды̀ ꙗ҆̀же по бз҃ѣ, ꙗ҆́кѡ позна́но бы́сть ѻ҆тца́ми ст҃ы́ѧ горы̀, тогда̀ бжⷭ҇твеннымъ промышле́нїемъ, па́ки ко ѻ҆те́чествꙋ твоемꙋ̀ посыла́емь быва́еши: и҆дѝ, ча́до, глаго́лѧ, ꙗ҆́кѡ да и҆ та́мѡ тобо́ю невѣ́дꙋщими бг҃ъ позна́етсѧ: ѿ ѻ҆нꙋ́дꙋже прише́дъ, преподо́бне, ѻ҆те́чество твоѐ просвѣти́лъ є҆сѝ, и҆ чинонача́льникъ мона́хѡвъ бы́лъ є҆сѝ. тѣ́хъ мно́жєства ко хрⷭ҇тꙋ̀ приве́дъ: тѣ́мже и҆ на́съ пресвѣ́тлое твоѐ ᲂу҆спе́нїе пра́зднꙋющихъ, молѝ сохрани́ти ѿ вра̑гъ нера́тованныхъ, и҆ спасти́сѧ дꙋша́мъ на́шымъ.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
Вхо́дъ. Прокі́менъ днѐ. Чтє́нїѧ г҃, пи́саны сегѡ̀ мѣ́сѧца въ є҃-й де́нь а҆ѳана́сїю а҆ѳѡ́нскомꙋ.
На лїті́и стїхи̑ры самогла́сны, гла́съ а҃:
Тезоимени́тагѡ ра́ди твоегѡ̀ житїѧ̀, бжⷭ҇твеннымъ про́мысломъ, а҆нтѡ́нїе, нарече́нъ бы́лъ є҆сѝ, и҆менова́нїе ѿ дѣ́лъ воспрїе́мъ: ᲂу҆чєни́къ бо мно́жєства собра́въ твои̑мъ ᲂу҆че́нїємъ послѣ́дꙋющихъ, си́хъ бг҃ꙋ приве́лъ є҆сѝ, но ꙗ҆́кѡ прпⷣбнымъ сожи́тель и҆ пра́вєднымъ, съ ни́миже трⷪ҇цѣ предстоѧ́й, молѝ ѡ҆ всѣ́хъ, пресла́вное твоѐ ᲂу҆спе́нїе пѣ́сньми сла́вѧщихъ.
Ꙗ҆́кѡ стра́стнагѡ мра́ка мі́ра сегѡ̀ и҆збѣжа́въ, а҆нтѡ́нїе прпⷣбне, тогда̀ въ пеще́рꙋ всели́лсѧ є҆сѝ, пречꙋ́дне, и҆ та́мѡ прини́клъ є҆сѝ въ глꙋбинꙋ̀ бжⷭ҇твеннагѡ ра́зꙋма. тѣ́мже и҆ сподо́билсѧ є҆сѝ ꙗ҆́кѡ прозорли́въ, да̑льнѧѧ проразꙋмѣва́ти, и҆ ꙗ҆́кѡ бли́зъ сꙋ̑щаѧ ꙗ҆́снѡ глаго́лати: и҆ ѡ҆ согрѣше́нїихъ людски́хъ поболѣ́въ, и҆ хотѧ̑щаѧ бы́ти за грѣхѝ человѣ́чєскїѧ, ва́рварское наше́ствїе проро́чески предре́клъ є҆сѝ. но моли́сѧ, ѻ҆́ч҃е, мо́лимсѧ, и҆зба́витисѧ на́мъ такова́гѡ преще́нїѧ, и҆ спасти́сѧ дꙋша́мъ на́шымъ.
Гла́съ в҃:
Кі́й ра́зꙋмъ человѣ́ческїй и҆лѝ ѧ҆зы́къ возмо́жетъ и҆зрещѝ, и҆лѝ похвали́ти по досто́инствꙋ житїѐ твоѐ; и҆ са́ми бо а҆́гг҃ли житїю̀ твоемꙋ̀, є҆́же на землѝ въ тѣлесѝ, ᲂу҆диви́шасѧ, и҆ похвали́ша хрⷭ҇та̀, толи́кꙋю побѣ́дꙋ, прпⷣбне, тебѣ̀ на стра̑сти дарова́вшаго: є҆го́же молѝ, прехва́льне, спасти́сѧ похвале́нїе є҆ли́кѡ мо́щно тебѣ̀ плетꙋ́щꙋ, а҆нтѡ́нїе пречꙋ́дне.
Блаже́нна пеще́ра, и҆мꙋ́щаѧ въ себѣ̀ чєстны́ѧ мо́щы твоѧ̑, прпⷣбне, ѿ ни́хже и҆стека́ютъ вѣ̑рнымъ и҆сцѣлє́нїѧ: блаже́нни же ᲂу҆ченицы̀ твоѝ, такова́го ᲂу҆чи́телѧ тебѐ стѧжа́вшїи, и҆ такова̀ ѻ҆тца̀ ча̑да наре́кшїисѧ, а҆нтѡ́нїе пречꙋ́дне, моли́твенниче ѡ҆ дꙋша́хъ на́шихъ.
Гла́съ д҃:
Ны́нѣ всечестно́е и҆ свѧще́нное тѣ́ло твоѐ, прпⷣбне а҆нтѡ́нїе, въ пеще́рѣ лежа́щее, въ не́йже є҆щѐ въ жи́зни се́й мно́гѡ потрꙋди́сѧ, и҆сцѣлє́нїѧ ѻ҆би́льнѡ и҆сточа́етъ вѣ́рою приходѧ́щымъ. тѣ́мже мо́лимъ тѧ̀: и҆ дꙋше́вное здра́вїе моли́твами твои́ми при́снѡ подава́й тебѐ ᲂу҆блажа́ющымъ.
Сла́ва, и҆ ны́нѣ, гла́съ и҃:
Вели́ко дерзнове́нїе и҆ вѣ́ра, ю҆́же къ бг҃ꙋ стѧжа́лъ є҆сѝ, прпⷣбне а҆нтѡ́нїе: прⷪ҇ро́кꙋ бо гедеѡ́нꙋ подо́бѧсѧ, рꙋно́мъ и҆скꙋша́ющꙋ побѣ́дꙋ, та́кожде и҆ ты̀, ѻ҆́ч҃е, росо́ю хотѣ́лъ є҆сѝ ᲂу҆вѣ́дѣти, гдѣ̀ мѣ́сто ᲂу҆го́дно є҆́сть влⷣчцѣ и҆ цари́цѣ. тѣ́мже и҆ ре́клъ є҆сѝ, а҆́ще ѡ҆брѣто́хъ благода́ть предъ тобо́ю, да бꙋ́детъ по все́й землѝ роса̀: на мѣ́стѣ, на не́мже и҆зво́лиши хра́мꙋ бы́ти, сꙋ́ша да бꙋ́детъ. и҆ па́ки, да бꙋ́детъ на мѣ́стѣ роса̀. и҆ сїѧ̑ ѻ҆боѧ̑, ѻ҆́ч҃е, полꙋчи́лъ є҆сѝ, тѣ́мже и҆ прече́стенъ хра́мъ мт҃ри бж҃їи воздви́глъ є҆сѝ: съ не́юже моли́сѧ хрⷭ҇тꙋ̀, мо́лимъ, спасти́сѧ дꙋша́мъ на́шымъ.
На стїхо́внѣ стїхи̑ры, гла́съ а҃. Подо́бенъ: Всехва́льнїи мꙋ́чєницы:
Стопа́мъ вели́кагѡ а҆нтѡ́нїа послѣ́довалъ є҆сѝ, прпⷣбне. ꙳ ѻ҆́нъ бо въ пꙋсты́ню безмо́лвїѧ ра́ди всели́сѧ, ꙳ и҆ а҆́гг҃лѡмъ собесѣ́дникъ бы́ти сподо́бисѧ: ꙳ ты́ же въ подзє́мнаѧ мѣ̑ста пеще́ры затвори́лсѧ є҆сѝ, ꙳ свѣ́тъ неизрече́нный сподо́билсѧ є҆сѝ зрѣ́ти. ꙳ тѣ́мже ѻ҆́нагѡ житїю̀ поревнова́въ, ꙳ и҆менова́нїе ѿ дѣ́йства прїе́мъ: ꙳ съ ни́мже трⷪ҇цѣ ст҃ѣ́й предстоѧ̀, ꙳ молѝ спасти́сѧ дꙋша́мъ на́шымъ.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Ꙗ҆́кѡ пресвѣ́тлый свѣти́льникъ ꙳ въ те́мнѣ мѣ́стѣ просїѧ́лъ є҆сѝ, ꙳ и҆ ꙗ҆́кѡ фі́нїѯъ въ домꙋ̀ бж҃їи ꙳ прⷪ҇ро́чески процвѣ́лъ є҆сѝ: ꙳ и҆ пло́дъ пресвѧ́тъ са́мъ себѐ влⷣцѣ, ꙳ жи́вꙋ же́ртвꙋ без̾ кро́ве ꙳ прине́слъ є҆сѝ, ѻ҆́ч҃е. ꙳ тѣ́мже тѧ̀ всѝ любо́вїю соше́дшесѧ, ꙳ по достоѧ́нїю при́снѡ ᲂу҆блажа́емъ.
Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Пеще́ра, въ не́йже лежи́тъ ꙳ свѧще́нное тѣ́ло твоѐ, ꙳ прпⷣбне а҆нтѡ́нїе, ꙳ дх҃а прест҃а́гѡ си́лою ꙳ недꙋ́ги разли̑чныѧ и҆сцѣлѧ́етъ вѣ́рою приходѧ́щихъ: ꙳ бѣ́си ѿ человѣ̑къ ѿгони́ми быва́ютъ, ꙳ и҆ разсла́бленнїи здра́вїе прїе́млюще ѿхо́дѧтъ. ꙳ мы́ же, похвалѧ́юще гдⷭ҇а, глаго́лемъ: ꙳ честна̀ предъ гдⷭ҇емъ сме́рть ст҃ы́хъ є҆гѡ̀.
Сла́ва, гла́съ ѕ҃:
Ди́вно проше́нїе, и҆ вѣ́ра превели́ка, ю҆́же стѧжа́лъ є҆сѝ, прпⷣбне а҆нтѡ́нїе, прⷪ҇ро́кꙋ бо и҆лїѝ подо́бѧсѧ. ѻ҆́нъ бо ѻ҆́гнь съ нб҃сѐ сведѐ, въ поѧде́нїе же́ртвы: та́кожде и҆ ты̀ моли́твою ѻ҆́гнь съ нб҃сѐ сво́диши, въ поѧде́нїе и҆ ѡ҆чище́нїе мѣ́ста, и҆дѣ́же пресла́вный хра́мъ влⷣчцы и҆ бцⷣы хотѧ́ше воздви́гнꙋтисѧ. тѣ́мже тѧ̀ ꙗ҆́кѡ сожи́телѧ прпⷣбнымъ, и҆ прⷪ҇ро́кѡмъ ревни́телѧ, ᲂу҆блажа́юще мо́лимъ: моли́сѧ хрⷭ҇тꙋ̀, спасти́сѧ дꙋша́мъ на́шымъ.
И҆ ны́нѣ, бг҃оро́диченъ: Творе́цъ и҆ и҆зба́витель:
На благослове́нїи хлѣ́бѡвъ, тропа́рь, гла́съ д҃: Ѿ мїрска́гѡ мѧте́жа и҆зше́дъ: Два́жды. Пи́санъ на ма́лѣй вече́рни. И҆ Бцⷣе дв҃о, ра́дꙋйсѧ: є҆ди́ножды.
На ᲂу҆́трени, по а҃-й стїхоло́гїи сѣда́ленъ, гла́съ д҃:
Подо́бенъ: Ско́рѡ предварѝ:
Пресвѣ́тлый и҆ свѣтоно́сный, бг҃омꙋ́дре а҆нтѡ́нїе, тво́й приспѣ̀ пра́здникъ, созыва́ющїй мона́хѡвъ мно́жєства просла́вити, и҆ пѣ́ти твоѐ честно́е ᲂу҆спе́нїе, просѧ́ще ѿ хрⷭ҇та̀ хода́тайствомъ твои́мъ прїѧ́ти ве́лїю ми́лость.
Два́жды.
Сла́ва, и҆ ны́нѣ, бг҃оро́диченъ:
Ꙗ҆ви́ласѧ є҆сѝ вы́шши го́рнихъ си́лъ, влⷣкꙋ ро́ждши, бцⷣе, и҆ земны́хъ є҆стество̀ вознесла̀ є҆сѝ, бг҃оневѣ́стнаѧ: тѣ́мже тѧ̀ и҆́стиннꙋю бг҃ороди́тельницꙋ, дꙋше́ю и҆ ѧ҆зы́комъ вѣ́рнїи сла́вимъ.
По в҃-й стїхоло́гїи сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:
Собесѣ́дникъ и҆ сослꙋжи́тель ѻ҆тцє́мъ ст҃ы́ѧ горы̀, ѻ҆́ч҃е, бы́лъ є҆сѝ, и҆ тѣ́хъ стопа́мъ послѣ́довавъ, ꙗ҆́кѡ безпло́тенъ на землѝ пожи́лъ є҆сѝ. тѣ́мже прпⷣбнымъ ꙗ҆ви́лсѧ є҆сѝ є҆диножи́тель: съ ни́миже и҆ въ вы́шнихъ ликовствꙋ́ѧ, молѝ спасти́сѧ дꙋша́мъ на́шымъ, тебѐ непреста́ннѡ сла́вѧщымъ.
Два́жды.
Сла́ва, и҆ ны́нѣ, бг҃оро́диченъ:
Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, свѧще́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃а пребыва́етъ.
По полѷеле́и сѣда́ленъ, гла́съ и҃: Подо́бенъ: Премꙋ́дрости:
Въ подзє́мныѧ пещє́ры вше́лъ є҆сѝ, препⷣбне, и҆ ѿтꙋ́дꙋ ꙗ҆́кѡ побѣди́тель страсте́й, на колесни́цꙋ добродѣ́телей возше́дъ, ꙗ҆́коже дрꙋгі́й и҆лїа̀ къ нб҃сє́мъ возлетѣ́въ, та́мѡ пра́веднѡ пресвѣ́тлымъ вѣнце́мъ вѣнча́лсѧ є҆сѝ, блаже́нне. но ꙗ҆́кѡ є҆гда̀ съ на́ми бы́лъ є҆сѝ въ жи́зни се́й, печа́сѧ и҆ промышлѧ́ѧ на́мъ полє́знаѧ: та́кѡ и҆ ны́нѣ, ѻ҆́ч҃е а҆нтѡ́нїе, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ всенепоро́чнаѧ невѣ́сто творцꙋ̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ, препѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ бѣсѡ́мъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.
Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г. По н҃-мъ ѱалмѣ̀ стїхи́ра, гла́съ ѕ҃: Жесто́кое твоѐ житїѐ: Пи́сана на вели́цѣй вече́рни.
Канѡ́нъ бцⷣы со і҆рмосо́мъ на ѕ҃, гла́са и҃-гѡ.
И҆ преподо́бнагѡ дв҃а канѡ́на на и҃.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Ѕѣ́льнымъ воздержа́нїемъ и҆ трꙋды̑, ѻ҆́ч҃е а҆нтѡ́нїе, и҆ всено́щнымъ стоѧ́нїемъ, дꙋ́шꙋ твою̀ цр҃ѧ̀ надъ страстьмѝ тѣле́сными поста́вилъ є҆сѝ. тѣ́мже со свѧты́ми веселѧ́щесѧ хрⷭ҇та̀ пое́мъ, тебѣ̀ таковꙋ̀ побѣ́дꙋ на стра̑сти дарова́вшаго.
Приспѣ̀ дне́сь всечестны́й де́нь ᲂу҆спе́нїѧ твоегѡ̀, ѻ҆́ч҃е а҆нтѡ́нїе, бога́тнѡ веселѧ̀ ча̑да твоѧ̑, всече́стне. тѣ́мже помина́юще твоѐ дре́внее житїѐ, и҆ а҆́гг҃льскꙋю жи́знь, свѣ́тлѡ пра́зднꙋюще, тебѐ воспѣва́емъ, ѻ҆́ч҃е.
Ѿ те́мныхъ мѣ́стъ восхи́тивсѧ, къ превы̑шнимъ свѣ́тлостемъ пресла́внѡ преше́лъ є҆сѝ, прпⷣбне, и҆ та́мѡ со ст҃ы́ми ꙗ҆́кѡ побѣди́тель страсте́й, ѻ҆́ч҃е, вѣнча́лсѧ є҆сѝ.
Бг҃оро́диченъ:
Лю́тѣ погрꙋжа́емꙋю дꙋ́шꙋ мою̀ въ пꙋчи́нѣ страсте́й, бꙋ́рею безмѣ́рныхъ ѡ҆бстоѧ́нїй, спасе́нїѧ просте́рши мѝ рꙋ́кꙋ, возведѝ, влⷣчце, и҆зъ глꙋбины̀ ѕѡ́лъ мои́хъ.
Дрꙋгі́й канѡ́нъ прпⷣбнагѡ.
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.
Є҆щѐ ѿ ма́лыѧ версты̀, прпⷣбне а҆нтѡ́нїе, вели́кꙋ любо́вь стѧжа́лъ є҆сѝ къ бг҃ꙋ: и҆ сегѡ̀ ра́ди плотска̑ѧ взыгра̑нїѧ и҆ стра̑сти до конца̀ ᲂу҆мертви́лъ є҆сѝ: и҆ чистото́ю ꙗ҆́коже кри́лы впери́всѧ пресла́внѡ, къ нб҃сє́мъ возлетѣ́лъ є҆сѝ, ѻ҆́ч҃е.
Влⷣчнемꙋ любостра́нствꙋ, прпⷣбне, подо́бѧсѧ, са́мъ стра́нствовати и҆зво́лилъ є҆сѝ, а҆нтѡ́нїе: тѣ́мже всеви́дѧщее ѻ҆́ко, ви́дѧ твоѐ благо́е произволе́нїе, да́ромъ чꙋде́съ ѡ҆богати́ тѧ, ꙗ҆́кѡ пресла́вна.
Дꙋше́внꙋю ти́хость и҆ любо́вь, ꙗ҆́же къ бг҃ꙋ, нра̑вы и҆ ѻ҆бы̑чаи благи́ми ᲂу҆кра́шена тѧ̀ ви́дѣвъ тво́й дꙋхо́вный настоѧ́тель, прпⷣбне, проро́чески всѣ̑мъ проповѣ́дꙋетъ, хотѧ̑щаѧ напослѣ́докъ тобо́ю бы́ти пресла̑внаѧ, а҆нтѡ́нїе.
Бг҃оро́диченъ:
Мои́хъ прегрѣше́нїй, влⷣчце, плени̑цы расто́ргни, твоего̀ сн҃а и҆ бг҃а молѧ́щи, и҆ томѧ́щїй мѧ̀ грѣ́хъ, приснодв҃о, низложѝ: ꙗ҆́кѡ да воспѣва́ю тѧ̀ всегда̀, пренепоро́чнаѧ, тобо́ю спаса́емь.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.
Проповѣ́дꙋетъ пресла́внѡ, и҆ па́че трꙋбы̀ вопїе́тъ свѧще́ннаѧ твоѧ̀, ѻ҆́ч҃е, вели́каѧ ла́ѵра, ꙗ҆́же тобо́ю нача́ло прїе́мшаѧ: до́мъ же бж҃їѧ мт҃ре, а҆́ще и҆ не гла́сомъ, вещьми́ же хва́литсѧ, глаго́лѧ: ᲂу҆тверди́хсѧ тобо́ю, гдⷭ҇и.
Є҆ди́наго гдⷭ҇а возлюби́лъ є҆сѝ и҆ сегѡ̀ крⷭ҇тъ на ра́мо взе́мъ, прпⷣбне а҆нтѡ́нїе, страннолѣ́пнѡ пожи́лъ є҆сѝ, въ постѣ́хъ и҆ бдѣ́нїихъ, и҆ моли́твахъ ѻ҆́бразъ бы́въ твои̑мъ ᲂу҆ченикѡ́мъ. тѣ́мже и҆ ѿ хрⷭ҇та̀ просла́вилсѧ є҆сѝ.
Плотска́гѡ жела́нїѧ, прпⷣбне, ѿве́ргсѧ, го́рдость возненави́дѣлъ є҆сѝ: смире́нїемъ же и҆ нището́ю ѡ҆богати́всѧ, превысѡ́каѧ дости́глъ є҆сѝ ст҃ы́хъ жили̑ща.
Бг҃оро́диченъ:
Поми́лꙋй, є҆ди́на бг҃ома́ти, поми́лꙋй, и҆ ᲂу҆ще́дри дꙋ́шꙋ мою̀ ѻ҆каѧ́ннꙋю, потоплѧ́емꙋю бѣ̑сы, и҆ страстьмѝ лꙋка́выми: и҆ пре́жде вре́мене и҆схо́да моегѡ̀ сїю̀ ѡ҆чи́стити ᲂу҆милосе́рдисѧ.
И҆́нъ. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.
Прозрѣ́въ бꙋ̑дꙋщаѧ воздаѧ̑нїѧ, здѣ̀ маловре́мєннаѧ ꙗ҆́кѡ не сꙋ̑щаѧ, ѻ҆́ч҃е, ѡ҆ста́вилъ є҆сѝ: и҆ сегѡ̀ ра́ди сꙋгꙋ̑баѧ воздаѧ̑нїѧ прїѧ́лъ є҆сѝ, прпⷣбне. тѣ́мже со а҆́гг҃лы непреста́ннѡ пое́ши влⷣкꙋ твоего̀.
Моли́тисѧ, ѻ҆́ч҃е, не преста́й ѡ҆ ста́дѣ твое́мъ, є҆́же мно́гими пѡ́ты и҆ трꙋды̑ стѧжа́лъ є҆сѝ, и҆зба́вити всѣ́хъ ѡ҆бстоѧ́нїй, бѣ́дъ же и҆ скорбе́й: да всѝ тебѐ ꙗ҆́кѡ чадолюби́ва ѻ҆тца̀ воспѣва́емъ.
Весе́лїемъ, прпⷣбне, съ чи́нми ст҃ы́хъ бг҃ꙋ предстои́ши, ꙗ҆̀же та́мѡ весе́лїѧ и҆ ра́дости насыща́ѧсѧ: сподо́би и҆ на́съ та́мѡшнѧѧ ра́дѡванїѧ полꙋчи́ти, да веселѧ́щесѧ тебѐ велича́емъ, ѻ҆́ч҃е а҆нтѡ́нїе.
Бг҃оро́диченъ:
Просте́рши рꙋ́кꙋ бл҃гоꙋтро́бїѧ, бг҃ороди́тельнице, всѧ́кагѡ мѧ̀ и҆змѝ ѡ҆сꙋжде́нїѧ, къ тебѣ̀ прибѣга́ющаго, и҆ тебѣ̀ припа́дающа, и҆ призыва́юща твою̀ по́мощь.
Сѣда́ленъ, гла́съ д҃ Подо́бенъ: Оу҆диви́сѧ і҆ѡ́сифъ:
Оу҆диви́сѧ тво́й дꙋхо́вный настоѧ́тель, въ тебѣ̀ вели́ко воздержа́нїе зрѧ̀, и҆ внима́ше мы́слїю хотѧ̑щаѧ ѡ҆ тебѣ̀ напослѣ́докъ бы́ти, а҆нтѡ́нїе: ви́дѣвъ бо по бз҃ѣ твоѐ вели́кое житїѐ, и҆ вра́жїими прилѡ́ги ника́коже поколеби́ма. тѣ́мже и҆ свидѣ́тельствꙋетъ, ꙗ҆́кѡ ѻ҆те́цъ и҆ храни́тель твоегѡ̀ житїѧ̀, ѻ҆тцє́мъ свѧты́ѧ горы̀ вопїѧ́ше: се́й, и҆́же посредѣ̀ на́съ ви́дитсѧ ме́ншїй, но послѣдѝ въ рѡссі́и вели́кїй свѣти́льникъ бꙋ́детъ.
Два́жды.
Сла́ва, и҆ ны́нѣ, бг҃оро́диченъ:
Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, свѧще́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃а пребыва́етъ.
Пѣ́снь д҃. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы, воплоще́нїѧ тебє̀ вы́шнѧгѡ, прⷪ҇ро́ка а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Мѣ́сто, въ не́мже лежи́тъ честно́е и҆ свѧще́нное тѣ́ло твоѐ, прпⷣбне а҆нтѡ́нїе ѻ҆́ч҃е, мнѡ́га и҆сцѣлє́нїѧ ѿтꙋ́дꙋ прїе́млютъ вѣ́рнїи, хрⷭ҇тꙋ̀ ѿ дꙋшѝ вопїю́ще: сла́ва си́лѣ твое́й, гдⷭ҇и.
Не ᲂу҆страшѝ тебє̀, прпⷣбне, долгота̀ жесто́кагѡ пꙋтѝ, нижѐ та́мѡ разбо́йническое наше́ствїе. тѣ́мже ст҃ꙋ́ю го́рꙋ доше́дъ, съ сꙋ́щими та́мѡ ѻ҆тцы̀ воспѣва́лъ є҆сѝ: сла́ва си́лѣ твое́й, гдⷭ҇и.
Ви́дѣвъ всебл҃гі́й бг҃ъ тве́рдое твоѐ и҆ до́брое и҆зволе́нїе, та́мѡ во ст҃ы́хъ мѣ́стѣхъ посредѣ̀ ѻ҆тє́цъ, сла́вна тѧ̀ сотворѧ́етъ, съ ни́миже сподо́би взыва́ти: сла́ва си́лѣ твое́й, гдⷭ҇и.
Бг҃оро́диченъ:
Ко́рень и҆зъ чре́слъ тѧ̀ ца́рскихъ, всѣ́хъ цр҃ь ꙗ҆́кѡ сꙋ́щꙋ возжделѣ́въ, и҆ вы́шшꙋ херꙋві̑мъ, и҆ серафі̑мъ содѣ́лавъ, бцⷣе, всели́сѧ въ тѧ̀.
И҆́нъ. І҆рмо́съ:
Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.
Про́мысломъ бж҃їимъ па́ки ко ѻ҆те́чествꙋ твоемꙋ̀, блаже́нне, посыла́емь быва́еши: ꙗ҆́кѡ да и҆ та́мѡ мно́гихъ ко спаси́тельномꙋ пꙋтѝ наста́виши, творцꙋ̀ воспѣва́ти: сла́ва си́лѣ твое́й, гдⷭ҇и.
Оу҆пова́нїемъ бꙋ́дꙋщихъ бла̑гъ, а҆нтѡ́нїе, ᲂу҆крѣплѧ́емь, плотско́е стремле́нїе ѡ҆бꙋзда́лъ є҆сѝ, и҆ твое́й пло́ти вра́гъ неми́лостивъ, ѻ҆́ч҃е, бы́лъ є҆сѝ: сегѡ̀ ра́ди и҆ по́мощь свы́ше стѧжа́лъ є҆сѝ.
Въ цѣломꙋ́дрїи жи́знь твою̀ препроводи́въ, прпⷣбне, земна̑ѧ нбⷭ҇ными и҆змѣни́лъ є҆сѝ, и҆ нетлѣ̑ннаѧ тлѣ́нными и҆скꙋпи́лъ є҆сѝ. тѣ́мже хрⷭ҇тꙋ̀ пое́ши: сла́ва си́лѣ твое́й, гдⷭ҇и.
Бг҃оро́диченъ:
До́брыхъ всѣ́хъ ѡ҆бнажи́хсѧ, и҆ лежꙋ̀ въ ѕло́бѣ: ѡ҆болкі́й всѣ́хъ дре́вле па́дшихъ, и҆ ны́нѣ мѧ̀ пре́ждними ᲂу҆красѝ, и҆ вторы́хъ и҆зба́ви, бг҃оневѣ́сто.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Мона́шествꙋющихъ ѻ҆́бразъ, ѻ҆́ч҃е, и҆ наказа́тель бы́лъ є҆сѝ: тѣ́мже и҆ си̑льнымъ запреща́еши, на восхище́нїе не жела́ти, но па́че маломѡ́щныѧ ми́ловати. и҆ ѿ сегѡ̀ просла́вилсѧ є҆сѝ, а҆нтѡ́нїе, и҆ вели́къ нарече́нъ ᲂу҆чи́тель ꙗ҆ви́лсѧ є҆сѝ.
Вы́шше человѣ́ка, а҆нтѡ́нїе, стѧжа́лъ є҆сѝ житїѐ, равноа́гг҃льнѡ бо пожи́въ на землѝ. тѣ́мже ра́внꙋ ꙗ҆́же а҆́гг҃лѡмъ по́честь сподо́билсѧ є҆сѝ полꙋчи́ти, и҆ пое́ши съ ни́ми влⷣкꙋ твоего̀.
Бг҃одарова̑нныѧ твоѧ̑ бл҃года̑ти, ѻ҆́ч҃е а҆нтѡ́нїе, всѧ́къ слꙋ́хъ человѣ́ческїй ᲂу҆диви́ша, и҆ наꙋчи́ша, ꙗ҆̀же здѣ̀ мнѧ̑щаѧсѧ вели̑каѧ, ꙗ҆́кѡ ма̑ла и҆ хꙋ̑да презрѣ́ти всѧ̑, и҆ послѣ́довати стопа́мъ твои̑мъ: ѿѻнꙋ́дꙋже молѝ, прпⷣбне, спасти́сѧ на́мъ.
Бг҃оро́диченъ:
Оу҆пова́нїе є҆сѝ моѐ, пречⷭ҇таѧ, и҆ спасе́нїе и҆ похвала̀. тѣ́мже прибѣга́ю къ покро́вꙋ твоемꙋ̀: не гнꙋша́йсѧ менє̀ грѣхи̑ мно́гими и҆ болѣ́зньми и҆ скорбьмѝ ны́нѣ поглоще́ннагѡ, но предвари́вши, спаси́ мѧ.
И҆́нъ. І҆рмо́съ:
Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.
Стра́нно твоѐ житїѐ, прпⷣбне, кꙋ́пнѡ же и҆ смире́нїе, є҆́же стѧжа́лъ є҆сѝ, а҆нтѡ́нїе, ꙗ҆́кѡ ни сама́гѡ свѣ́та тогѡ̀, и҆́же въ мі́рѣ, нижѐ со́лнечнагѡ сїѧ́нїѧ, досто́йна тебѐ тогѡ̀ вмѣни́лъ є҆сѝ зрѣ́нїѧ: но въ те́мнѣ мѣ́стѣ є҆ди́нъ тебѐ затвори́лъ є҆сѝ.
Цр҃ковь и҆ до́мъ прест҃а́гѡ дх҃а, ѻ҆́ч҃е а҆нтѡ́нїе, бы́лъ є҆сѝ, разли́чными добродѣ́тельми ᲂу҆кра́шенъ бы́въ: смире́нїемъ го́рнюю высотꙋ̀ наслѣ́дивъ, нището́ю нбⷭ҇ное бога́тство прїѧ́лъ є҆сѝ, прпⷣбне.
Па́мѧть твою̀ творѧ́щихъ свѧще́ннꙋю, ѿ всѧ́кихъ спасѝ прегрѣше́нїй, и҆ печа́лей, и҆ напа́стей: твоѐ бжⷭ҇твенное да́рꙋй застꙋпле́нїе, всѣ́хъ цр҃ю̀ предстоѧ́й, ѻ҆́ч҃е а҆нтѡ́нїе.
Бг҃оро́диченъ:
Ꙗ҆́кѡ невече́рнїй свѣ́тъ, ѿ чре́ва твоегѡ̀ сꙋ́щїй возсїѧ́вшїй, ѡ҆темне́ннꙋю дꙋ́шꙋ мою̀ ѡ҆зарѝ, влⷣчце чⷭ҇таѧ, и҆ ѿженѝ всѧ́кꙋ мглꙋ̀ се́рдца моегѡ̀.
Пѣ́снь ѕ҃. І҆рмо́съ:
Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Всегда́шнимъ къ бг҃ꙋ раче́нїемъ внѣ̀ пло́ти и҆ мі́ра, ѻ҆́ч҃е а҆нтѡ́нїе, бы́лъ є҆сѝ: тѣ́мже и҆ жили́ще досто́йно дх҃а прест҃а́гѡ показа́лсѧ є҆сѝ, ꙗ҆́коже и҆ са́мъ хрⷭ҇то́съ речѐ: прише́дъ со ѻ҆ц҃е́мъ и҆ дх҃омъ, та́мѡ вселю́сѧ.
Ꙗ҆́кѡ пресла́дкїй нѣ́кїй вїногра́дъ, ст҃а́ѧ гора̀ тебѐ, ѻ҆́ч҃е, и҆зрасти́вши, пресла́внѡ тобо́ю красꙋ́етсѧ, и҆ ра́дꙋющисѧ хрⷭ҇та̀ прославлѧ́етъ, тебѐ си̑мъ дарова́вшаго.
Но́щь ꙗ҆́кѡ де́нь, и҆ де́нь ꙗ҆́кѡ но́щь, тебѣ̀ вмѣнѧ́шесѧ, а҆нтѡ́нїе: не да́лъ бо є҆сѝ, по проро́кꙋ, сна̀ ѻ҆чи́ма твои́ма, ни вѣ́ждома дрема́нїѧ, нижѐ поко́ѧ тѣлесѝ твоемꙋ̀, до́ндеже сїѐ чи́сто съ дꙋше́ю бг҃ꙋ предста́вилъ є҆сѝ.
Бг҃оро́диченъ:
Твою̀ пода́ждь мѝ по́мощь, и҆ и҆зба́ви мѧ̀ бѣ́дъ и҆ скорбе́й, и҆ прегрѣше́нїй мои́хъ, ꙗ҆́же всѣ́хъ ро́ждшаѧ при́сное и҆збавле́нїе.
И҆́нъ. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Ꙗ҆́кѡ свобожде́на бы́вши блаже́ннаѧ твоѧ̀ дꙋша̀ ѿ тѧ́жести плотскі́ѧ, и҆ ѿ го́рькагѡ фараѡ́на мꙋчи́телѧ, мі́ра сегѡ̀ и҆зше́дши, въ зе́млю ѡ҆бѣтова́нїѧ ра́йскагѡ пре́йде немѧте́жнѡ, со ст҃ы́ми пребыва́етъ веселѧ́щисѧ.
Ны́нѣ свѧще́нное тѣ́ло твоѐ, прпⷣбне, въ пеще́рѣ лежа́щее, и҆сцѣлє́нїѧ мнѡ́гаѧ и҆сточа́етъ вѣ́рою приходѧ́щымъ. тѣ́мже мо́лимъ тѧ̀, и҆ дꙋшє́внаѧ здра̑вїѧ мольба́ми твои́ми пода́ждь тебѐ сла́вѧщымъ.
Свѣтлѣ́йши со́лнца возсїѧ̀, пречестна́ѧ па́мѧть твоѧ̀, а҆нтѡ́нїе, въ ню́же соше́дшесѧ прославлѧ́емъ твоѐ ᲂу҆спе́нїе и҆ трꙋды̀, ꙗ҆̀же претерпѣ́лъ є҆сѝ въ жи́зни се́й, просѧ́ще ѿ хрⷭ҇та̀ тобо́ю прїѧ́ти грѣхѡ́въ ѡ҆ставле́нїе.
Бг҃оро́диченъ:
Красоты̑ мѧ̀ ви́дѣти сла́вы твоеѧ̀ сподо́би, є҆гда̀ ѿ пло́ти моеѧ̀ хощꙋ̀ разлꙋчи́тисѧ, ꙗ҆́кѡ ᲂу҆твержде́нїе моѐ є҆сѝ, влⷣчце: да ѿсю́дꙋ прїимꙋ̀ и҆збавле́нїе.
Конда́къ, гла́съ и҃. Подо́бенъ: Возбра́нной:
Возложи́въ себѐ бг҃ꙋ, па́че всѣ́хъ возлю́бленномꙋ ѿ ю҆́ности, прпⷣбне, томꙋ̀ ѿ всеѧ̀ дꙋшѝ любо́вїю послѣ́довалъ є҆сѝ: мі́ра же тлѣ̑ннаѧ нивочто́же вмѣни́въ, въ землѝ пеще́рꙋ содѣ́лалъ є҆сѝ, и҆ въ не́й до́брѣ проти́вꙋ неви́димагѡ врага̀ ко́зней подвиза́всѧ, ꙗ҆́кѡ свѣтоза́рное со́лнце во всѧ̑ концы̀ землѝ возсїѧ́лъ є҆сѝ: ѿѻнꙋ́дꙋже веселѧ́сѧ преше́лъ є҆сѝ къ нбⷭ҇нымъ черто́гѡмъ. и҆ ны́нѣ со а҆́гг҃лы влⷣчню престо́лꙋ предстоѧ̀, помина́й на́съ чтꙋ́щихъ па́мѧть твою̀, да зове́мъ тѝ: ра́дꙋйсѧ, а҆нтѡ́нїе ѻ҆́ч҃е на́шъ.
І҆́косъ:
Присносꙋ́щнагѡ немерца́ющагѡ свѣ́та ст҃ы́ѧ трⷪ҇цы наслади́тисѧ жела́ѧ, и҆ сегѡ̀ ра́ди четыредесѧтолѣ́тное вре́мѧ, въ є҆ди́ной пеще́рѣ те́мнѣ тебѐ затвори́въ, ѿтꙋ́дꙋ неисхо́денъ, ѻ҆́ч҃е, пребы́лъ є҆сѝ, до́ндеже тѣ́ло твоѐ чи́сто съ дꙋше́ю бг҃ꙋ предста́вилъ є҆сѝ. ѿѻнꙋ́дꙋже и҆ по преставле́нїи, ꙗ҆́кѡ жи́въ, ѿ гдⷭ҇а дарова̑нїѧ чꙋде́съ прїѧ́лъ є҆сѝ, и҆сцѣлѧ́ти разли̑чныѧ болѣ̑зни ѕлѣ̀ стра́ждꙋщихъ, и҆ бѣ́сы ѿ человѣ̑къ приходѧ́щихъ и҆згони́ти. тѣ́мже мо́лимъ тѧ̀: моли́сѧ, ѻ҆́ч҃е, сохрани́ти безъ вре́да ѻ҆те́чество твоѐ, гра́дъ же и҆ лю́ди, да зове́мъ тѝ: ра́дꙋйсѧ, а҆нтѡ́нїе ѻ҆́ч҃е на́шъ.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, бл҃гослове́нъ є҆сѝ.
Повелѣ́нїемъ дꙋхо́внагѡ твоегѡ̀ настоѧ́телѧ, бл҃же́нне а҆нтѡ́нїе, па́ки ко ѻ҆те́чествꙋ твоемꙋ̀ посыла́емь быва́еши. тѣ́мже речє́ннаѧ тебѣ̀ ѻ҆тце́мъ, ꙗ҆́кѡ ѿ бг҃а повелѣ̑ннаѧ сотвори́лъ є҆сѝ: и҆дѣ́же прише́дъ, ѻ҆́ч҃е, мно́гихъ дꙋ́шы гдⷭ҇ꙋ приве́лъ є҆сѝ.
Ст҃ѣ́йшагѡ мѣ́ста, прпⷣбне а҆нтѡ́нїе, ꙗ҆́кѡ дости́глъ, мно́гихъ житїе́мъ твои́мъ ᲂу҆диви́лъ є҆сѝ: вы́ше бо человѣ́ка воспрїе́мъ житїѐ, и҆́мже мно́гихъ мїрска̑ѧ презира́ти сотвори́лъ є҆сѝ.
А҆рхїепі́скопа і҆ларїѡ́на пеще́рꙋ ꙗ҆́кѡ ѡ҆брѣ́тъ, трꙋдолю́бнѣ въ не́й пожи́лъ є҆сѝ, прпⷣбне, въ моли́твахъ и҆ поще́нїихъ, до́ндеже и҆́нꙋю пеще́рꙋ себѣ̀ содѣ́лалъ є҆сѝ: въ не́йже сподо́билсѧ є҆сѝ го́рнѧгѡ зва́нїѧ.
Бг҃оро́диченъ:
Человѣ́чєскїѧ напа̑сти и҆ совѣ́ты, чⷭ҇таѧ, разорѝ бж҃е́ственными моли́твами твои́ми, и҆ рабы̑ твоѧ̑ и҆зба́ви болѣ́зненныхъ прегрѣше́нїй: ꙗ҆́кѡ да приснодв҃ꙋ тѧ̀ ᲂу҆блажа́емъ.
И҆́нъ. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
Вели́кагѡ трꙋдополо́жника, и҆ ревни́телѧ твоемꙋ̀ житїю̀, прпⷣбне а҆нтѡ́нїе, ѳеодо́сїа бл҃же́ннаго стѧжа́лъ є҆сѝ, а҆́гг҃льскомꙋ твоемꙋ̀ житїю̀ послѣ́дꙋюща: съ ни́мже въ вы́шнихъ водворѧ́ѧсѧ, на́съ помина́й.
Но́ваго тѧ̀ мѡѷсе́а, ѻ҆́ч҃е, позна́хомъ, страсте́й побѣди́телѧ: ꙗ҆́коже бо ѻ҆́нъ дре́вле а҆мали́ка побѣди́въ, лю́ди и҆зведѐ: ты́ же, ѻ҆́ч҃е, мно́жество мона́шествꙋющихъ въ зе́млю ѡ҆бѣтова́нїѧ ра́йскагѡ приве́лъ є҆сѝ.
Гра́да и҆ ѻ҆те́чества твоегѡ̀ пресе́льникъ, ѻ҆́ч҃е, бы́лъ є҆сѝ: по па́ки бж҃їимъ промышле́нїемъ, ко ѻ҆те́чествꙋ твоемꙋ̀ сла́внѡ свидѣ́тельствованъ возвраща́ешисѧ, и҆дѣ́же благода́ть ѿ гдⷭ҇а, ѻ҆́ч҃е, прїѧ́лъ є҆сѝ.
Бг҃оро́диченъ:
Пе́щь проѡбразова́ше твоѐ ржⷭ҇тво̀, пренепоро́чнаѧ: ѻ҆́троки бо не ѡ҆палѝ, ꙗ҆́коже ни ложесна̀ твоѧ̑ ѻ҆́гнь нестерпи́мый. тѣ́мже мо́лимъ тѧ̀: ѻ҆гнѧ̀ вѣ́чнагѡ и҆зба́ви рабы̑ твоѧ̑.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Влⷣки твоегѡ̀ хрⷭ҇та̀, прпⷣбне а҆нтѡ́нїе, смире́нїю поревнова́лъ є҆сѝ: и҆ сегѡ̀ ра́ди смире́нное и҆ жесто́кое житїѐ возлюби́лъ є҆сѝ, земна́гѡ пристра́стїѧ ѿрѣва́ѧсѧ. тѣ́мже по́чести ст҃ы́хъ сподо́билсѧ є҆сѝ, и҆ съ ни́ми пое́ши гдⷭ҇а во вѣ́ки.
Твоѐ пресла́вное ᲂу҆спе́нїе пра́зднꙋющымъ, блаже́нне, моли́сѧ, и҆зба́витисѧ всѣ̑мъ ѿ разли́чныхъ напа́стей, да всѝ тебѐ прославлѧ́емъ, а҆нтѡ́нїе, и҆ превозно́симъ гдⷭ҇а во вѣ́ки.
Ѡ҆ на́съ ми́лостивно ѻ҆́ко, а҆нтѡ́нїе, простира́й ко влⷣцѣ, чадолю́бное показꙋ́ѧ, и҆ неѿлꙋ́чнѡ ѿ на́съ дꙋ́хомъ пребыва́й, прпⷣбне, ꙗ҆́коже ѡ҆бѣща́лсѧ є҆сѝ, є҆гда̀ бы́лъ є҆сѝ съ на́ми, да всѝ съ тобо́ю хрⷭ҇тꙋ̀ воспое́мъ: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
На моле́нїе моѐ ᲂу҆милосе́рдисѧ ны́нѣ, и҆ ра́дость мѝ въ печа́ли мѣ́стѡ да́рꙋй, да пою́ тѧ, влⷣчце, сн҃ꙋ твоемꙋ̀ воспѣва́ѧ: гдⷭ҇а по́йте дѣла̀, и҆ превозноси́те є҆го̀ во вѣ́ки.
И҆́нъ. І҆рмо́съ:
Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
И҆сцѣлє́нїѧ ѻ҆би̑льна, прпⷣбне, вѣ́рою приходѧ́щымъ ко хра́мꙋ твоемꙋ̀, и҆ сꙋ́щымъ въ ско́рбехъ ᲂу҆тѣше́нїе подава́й, да всѝ съ тобо́ю хрⷭ҇тꙋ̀ вопїе́мъ: благослови́те, всѧ̑ дѣла̀ гдⷭ҇нѧ, гдⷭ҇а.
Благода́рное сїѐ пѣ́нїе приносѧ́щыѧ тѝ, ѻ҆́ч҃е, свы́ше ми́лостивнѡ назира́й, и҆ молѝ хрⷭ҇та̀ и҆зба́вителѧ, спастѝ всѣ́хъ вопїю́щихъ є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а.
Принесе́сѧ да́ръ вседержи́телю, тобо́ю мно́жество спаса́емыхъ, твоемꙋ̀ житїю̀ послѣ́дꙋющихъ, а҆нтѡ́нїе. тѣ́мже молѝ спасти́сѧ всѣ̑мъ, съ тобо́ю хрⷭ҇тꙋ̀ вопїю́щымъ: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Вели́комꙋ та́инствꙋ ржⷭ҇тва̀ твоегѡ̀, кто̀ не ᲂу҆диви́тсѧ, бцⷣе; и҆лѝ кі́й ѧ҆зы́къ зе́менъ, и҆лѝ ᲂу҆́мъ безпло́тенъ и҆зрещѝ возмо́жетъ; па́че є҆стества́ бо и҆ смы́сла, бцⷣе, зижди́телѧ родила̀ є҆сѝ.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чи́стаѧ приснодв҃о.
А҆нтѡ́нїа дре́вле просїѧ́вшагѡ, тогѡ̀ житїю̀ всѧ́чески поревнова́ти потща́лсѧ є҆сѝ. ѻ҆́нъ бо въ пꙋсты́ню є҆ди́нъ всели́сѧ: ты́ же въ пеще́рѣ є҆ди́наго себѐ затвори́лъ є҆сѝ, и҆ мно́гими лѣ́ты, ѻ҆́ч҃е, неисхо́денъ пребы́лъ є҆сѝ.
Пече́рскомꙋ житїю̀ первонача́льникъ, и҆ наста́вникъ, ѻ҆́ч҃е, бы́лъ є҆сѝ: и҆ та́мѡ подвиза́лсѧ є҆сѝ ꙗ҆́кѡ безпло́тенъ. тѣ́мже и҆ хрⷭ҇то́съ дарова́нїемъ чꙋде́съ ѡ҆богати́ тѧ, прпⷣбне.
Моє́ю рꙋкꙋ̀ воздѣѧ́нїе прїимѝ, прпⷣбне, влⷣчнѣй подо́бѧсѧ бл҃гости, презира́ѧ прегрѣшє́нїѧ: ты́ бо дꙋ́шꙋ ᲂу҆ѧзви́лъ є҆сѝ хрⷭ҇то́вою любо́вїю, и҆ є҆гѡ̀ пречⷭ҇тыѧ бг҃ома́тере. ю҆́же ᲂу҆молѝ спастѝ дꙋ́шы на́шѧ.
Бг҃оро́диченъ:
Рꙋко́ю твое́ю, прпⷣбне а҆нтѡ́нїе, є҆́же къ бг҃ꙋ воздѣѧ́нїемъ, пресла́внѡ чꙋдодѣ́йствовасѧ, моли́твами бо твои́ми ѻ҆́гнь съ нб҃сѐ сво́диши, во ѡ҆чище́нїе мѣ́ста хра́ма пречⷭ҇тыѧ: ю҆́же всѝ съ тобо́ю велича́емъ.
И҆́нъ. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Пахѡ́мїа вели́кагѡ, а҆́гг҃льскагѡ видѣ́нїѧ сподо́бльшагѡсѧ, житїѐ, ѻ҆́ч҃е, подража́въ, равноа́гг҃льнѡ въ пеще́рѣ пожи́лъ є҆сѝ. тѣ́мже и҆ равноа́гг҃льнꙋю по́честь сподо́билсѧ є҆сѝ прїѧ́ти, а҆нтѡ́нїе.
Два́жды.
И҆́же ѿ ст҃ы́ѧ горы̀ пꙋте́мъ ведꙋ́щимъ, ѻ҆́ч҃е, мѣ́ста кі́евскагѡ дости́глъ є҆сѝ, и҆дѣ́же бѧ́ше ᲂу҆го́дно влⷣчцы мт҃ре бж҃їѧ хра́мꙋ воздви́гнꙋтисѧ: и҆ та́мѡ хра́мъ прече́стенъ въ сла́вꙋ бг҃ома́тере, кꙋ́пнѡ со блаже́ннымъ ѳеодо́сїемъ воздви́глъ є҆сѝ. тѣ́мже тѧ̀ всѝ съ ни́мъ велича́емъ.
Бг҃оро́диченъ:
Свѣтороди́тельнице дв҃о, дꙋшѝ моеѧ̀ ѻ҆́блакъ ѿженѝ, и҆ дава́й чи́стѡ зрѣ́ти, влⷣчце, спаси́тельнꙋю добро́тꙋ возсїѧ́вшꙋю неизглаго́ланнѡ, и҆зъ твоеѧ̀ пречⷭ҇тыѧ ᲂу҆тро́бы во свѣ́тъ ꙗ҆зы́кѡвъ, препѣ́таѧ.
Свѣти́ленъ:
Жите́йское сладостра́стїе ᲂу҆мертви́лъ є҆сѝ, а҆нтѡ́нїе: сла́вꙋ же маловре́меннꙋю позна́въ, сеѧ̀ вско́рѣ ѿстꙋпи́лъ є҆сѝ, тѣ́снымъ пꙋте́мъ и҆зво́ливъ ходи́ти, ведꙋ́щимъ къ ра́йскомꙋ простра́нствꙋ. тѣ́мже моли́сѧ, а҆нтѡ́нїе, спасти́сѧ тебѐ почита́ющымъ.
Два́жды.
Сла́ва, и҆ ны́нѣ, бг҃оро́диченъ:
Бцⷣꙋ тѧ̀ вои́стиннꙋ и҆сповѣ́дающе, влⷣчце, и҆̀же тобо́ю спаса́емїи: ты́ бо бг҃а родила̀ є҆сѝ, разо́ршаго крⷭ҇то́мъ сме́рть, и҆ къ себѣ̀ привле́кша преподо́бныхъ собо́ры, съ ни́миже тѧ̀ восхвалѧ́емъ, дв҃о.
На хвали́техъ стїхи̑ры на д҃, гла́съ в҃. Подо́бенъ: Є҆гда̀ ѿ дре́ва:
Жела́ѧ ви́дѣти неизрече́ннꙋю ра́дость ст҃ы́хъ, и҆ весє́лїѧ пра́ведныхъ, бг҃ꙋ ᲂу҆годи́вшихъ, всѧ́ко весе́лїе, є҆́же въ мі́рѣ, возненави́дѣлъ є҆сѝ, но въ постѣ́хъ, и҆ слеза́хъ проводи́въ днѝ твоѧ̑, до́ндеже и҆ стра̑сти тѣлє́сныѧ ᲂу҆мертви́лъ є҆сѝ. тѣ́мже и҆ сподо́билсѧ є҆сѝ пра́ведныхъ ра́дованїѧ: съ ни́миже моли́сѧ, спасти́сѧ дꙋша́мъ на́шымъ.
Два́жды.
Дне́сь похва́льнꙋю пѣ́снь въ па́мѧти твое́й, а҆нтѡ́нїе, тебѣ̀ приносѧ́щихъ прїимѝ, и҆ предварѝ къ бг҃ꙋ моли́твами твои́ми, и҆ и҆зба́ви на́съ ѿ шꙋ́ѧгѡ стоѧ́нїѧ, и҆ и҆збра́нныхъ ча́сти сочета́ти молѝ: да тебѐ всѝ ꙗ҆́кѡ те́плаго предста́телѧ досто́йнѡ ᲂу҆блажа́емъ.
Въ те́мномъ мѣ́стѣ ꙗ҆́кѡ ѕвѣзда̀ возсїѧ́лъ є҆сѝ, прпⷣбне, и҆ мра̑чнаѧ ли́ца бѣсѡ́въ посрами́лъ є҆сѝ, премꙋ́дре: ѿню́дꙋже возше́дъ къ нб҃сє́мъ, со дерзнове́нїемъ прⷭ҇то́лꙋ хрⷭ҇то́вꙋ предстоѧ̀, помина́й пра́зднꙋющихъ па́мѧть твою̀, прпⷣбне, ми́лость ѡ҆брѣстѝ на́мъ въ де́нь сꙋ́дный.
Сла́ва, гла́съ и҃:
Ѻ҆те́чество твоѐ, прпⷣбне ѻ҆́ч҃е а҆нтѡ́нїе, ѡ҆ста́вивъ, и҆ во́льное стра́нство гдⷭ҇а ра́ди прїе́мь, трꙋды̀ до́лгагѡ пꙋтѝ ше́ствїѧ, жа́ждꙋ и҆ гла́дъ, стꙋ́день же и҆ зно́й хрⷭ҇та̀ ра́ди претерпѣ́лъ є҆сѝ. тѣ́мже и҆ слы́шиши: благі́й ра́бе и҆ вѣ́рный, вни́ди въ ра́дость гдⷭ҇а твоегѡ̀. сегѡ́ же гла́са и҆ на́мъ ᲂу҆слы́шати, ѻ҆́ч҃е, моли́сѧ, да всегда̀ твою̀ па́мѧть любо́вїю ᲂу҆блажа́емъ.
И҆ ны́нѣ, бг҃оро́диченъ: Влⷣчце, прїимѝ:
Славосло́вїе вели́кое. И҆ ѿпꙋ́стъ.
На лїтꙋргі́и, прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃ї. А҆ллилꙋ́їа, гла́съ ѕ҃: Блаже́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло і҃. Прича́стенъ: Въ па́мѧть вѣ́чнꙋю бꙋ́детъ пра́ведникъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.