[глⷡ҇а м҃и] Чи́нъ бл҃гослове́нїѧ и҆ ѡ҆сщ҃е́нїѧ разноли́чныхъ і҆кѡ́нъ, предложе́нныхъ вкꙋ́пѣ.
[глⷡ҇а м҃и] Чи́нъ бл҃гослове́нїѧ и҆ ѡ҆сщ҃е́нїѧ разноли́чныхъ і҆кѡ́нъ, предложе́нныхъ вкꙋ́пѣ.
Нача́ло ѻ҆бы́чное, ꙗ҆́коже ᲂу҆каза́сѧ вы́ше. По Прїиди́те, поклони́мсѧ: Ѱало́мъ п҃и:
Млⷭ҇ти твоѧ̑ гдⷭ҇и во вѣ́къ воспою̀, ро́дъ и҆ ро́дъ возвѣщꙋ̀ и҆́стинꙋ твою̀ ᲂу҆сты̀ мои́ми. Занѐ ре́клъ є҆сѝ: въ вѣ́къ млⷭ҇ть сози́ждетсѧ, на нб҃сѣ́хъ ᲂу҆гото́витсѧ и҆́стина твоѧ̀. Завѣща́хъ завѣ́тъ и҆збра̑ннымъ мои̑мъ, клѧ́хсѧ дв҃дꙋ рабꙋ̀ моемꙋ̀: До вѣ́ка ᲂу҆гото́ваю сѣ́мѧ твоѐ, и҆ сози́ждꙋ въ ро́дъ и҆ ро́дъ прⷭ҇то́лъ тво́й. И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и, и҆́бо и҆́стинꙋ твою̀ въ цр҃кви ст҃ы́хъ. Ꙗ҆́кѡ кто̀ во ѻ҆́блацѣхъ ᲂу҆равни́тсѧ гдⷭ҇еви, ᲂу҆подо́битсѧ гдⷭ҇еви въ сынѣ́хъ бж҃їихъ; Бг҃ъ прославлѧ́емь въ совѣ́тѣ ст҃ы́хъ, ве́лїй и҆ стра́шенъ є҆́сть над̾ всѣ́ми ѻ҆кре́стными є҆гѡ̀. Гдⷭ҇и бж҃е си́лъ, кто̀ подо́бенъ тебѣ̀; си́ленъ є҆сѝ гдⷭ҇и, и҆ и҆́стина твоѧ̀ ѻ҆́крестъ тебѐ. Ты̀ влⷣчествꙋеши держа́вою морско́ю, возмꙋще́нїе же во́лнъ є҆гѡ̀ ты̀ ᲂу҆кроча́еши. Ты̀ смири́лъ є҆сѝ, ꙗ҆́кѡ ꙗ҆́звена го́рдаго, мы́шцею си́лы твоеѧ̀ расточи́лъ є҆сѝ врагѝ твоѧ̑. Твоѧ̑ сꙋ́ть нб҃са̀, и҆ твоѧ̀ є҆́сть землѧ̀, вселе́ннꙋю и҆ и҆сполне́нїе є҆ѧ̀ ты̀ ѡ҆снова́лъ є҆сѝ. Сѣ́веръ и҆ мо́ре ты̀ созда́лъ є҆сѝ: ѳавѡ́ръ и҆ є҆рмѡ́нъ ѡ҆ и҆́мени твое́мъ возра́дꙋетасѧ. Твоѧ̀ мы́шца съ си́лою: да ᲂу҆крѣпи́тсѧ рꙋка̀ твоѧ̀, и҆ вознесе́тсѧ десни́ца твоѧ̀. Пра́вда и҆ сꙋдьба̀ ᲂу҆гото́ванїе прⷭ҇то́ла твоегѡ̀: млⷭ҇ть и҆ и҆́стина пред̾и́детѣ пред̾ лице́мъ твои́мъ. Бл҃же́ни лю́дїе вѣ́дꙋщїи воскликнове́нїе: гдⷭ҇и во свѣ́тѣ лица̀ твоегѡ̀ по́йдꙋтъ, И҆ ѡ҆ и҆́мени твое́мъ возра́дꙋютсѧ ве́сь де́нь, и҆ пра́вдою твое́ю вознесꙋ́тсѧ. Ꙗ҆́кѡ похвала̀ си́лы и҆́хъ ты̀ є҆сѝ, и҆ во бл҃говоле́нїи твое́мъ вознесе́тсѧ ро́гъ на́шъ.
Та́же дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й же чте́тъ мл҃твꙋ сїю̀:
Гдⷭ҇и вседержи́телю бж҃е ѻ҆тє́цъ на́шихъ, въ трⷪ҇цѣ ст҃ѣ́й сла́вимый и҆ покланѧ́емый, є҆гѡ́же ни ᲂу҆́мъ пости́гнꙋти мо́жетъ, ни сло́во сказа́ти возмога́етъ, є҆гѡ́же никто́же ѿ человѣ̑къ нигдѣ́же ви́дѣ, то́чїю ꙗ҆́коже ѿ ст҃ы́хъ писа́нїй наꙋчи́хомсѧ, си́це вѣ́рꙋемъ и҆ си́це тебѐ бг҃а ѻ҆ц҃а̀ безнача́льнаго, и҆ сн҃а твоего̀ є҆диносꙋ́щнаго, и҆ дх҃а твоего̀ сопресто́льнаго бы́ти и҆сповѣ́дꙋемъ. и҆́же въ ве́тсѣмъ завѣ́тѣ, въ ꙗ҆вле́нїи твое́мъ патрїа́рхꙋ а҆враа́мꙋ во ѡ҆́бразѣ трїе́хъ а҆́гг҃лъ, на послѣ́докъ же дне́й по воплоще́нїи є҆диноро́днагѡ сн҃а бж҃їѧ, гдⷭ҇а на́шегѡ і҆и҃са хрⷭ҇та̀ ѿ приснодв҃ы мр҃і́и, въ креще́нїи ѿ і҆ѡа́нна на і҆ѻрда́нѣ, въ пресвѣ́тломъ преѡбраже́нїи на ѳавѡ́рѣ, и҆ въ пресла́вномъ вознесе́нїи на є҆леѡ́нѣ ꙗ҆ви́выйсѧ, ѡ҆́бразъ прест҃ы́ѧ трⷪ҇цы на́мъ показа́лъ є҆сѝ: є҆ще́ же и҆ нерꙋкотворе́нный ѡ҆́бразъ гдⷭ҇а на́шегѡ і҆и҃са хрⷭ҇та̀ чꙋдодѣ́йственнѣ и҆́мъ на ᲂу҆брꙋ́сѣ и҆з̾ѡбраже́нный, и҆ є҆де́сскомꙋ кнѧ́зю а҆́ѵгарю по́сланной и҆ тѣ́мъ того̀ и҆ и҆́ны мнѡ́ги болѧ́щыѧ ра́зными недꙋ́ги и҆сцѣли́вый, на́съ же чти́ти се́й наꙋчи́вый: та́кожде и҆ ѡ҆́бразы и҆ подѡ́бїѧ ст҃ы́хъ твои́хъ ᲂу҆го́дникѡвъ не ѿмета́ѧй, но прїе́млѧй: са́мъ и҆ ны́нѣ при́зри на і҆кѡ̑ны сїѧ̑, ꙗ҆̀же рабѝ твоѝ въ че́сть и҆ сла́вꙋ тебѐ є҆ди́нагѡ въ трⷪ҇цѣ ст҃ѣ́й сла́вимагѡ бг҃а, и҆ є҆диноро́днагѡ сн҃а твоегѡ̀ гдⷭ҇а на́шегѡ і҆и҃са хрⷭ҇та̀, пречⷭ҇тыѧ и҆ пребл҃гослове́нныѧ мт҃ре є҆гѡ̀, влⷣчцы на́шеѧ прест҃ы́ѧ бцⷣы и҆ приснодв҃ы мр҃і́и, и҆ въ па́мѧть ст҃ы́хъ твои́хъ и҆́мⷬ҇къ соѡрꙋди́ша, бл҃гословѝ ѧ҆̀ и҆ ѡ҆ст҃ѝ, и҆ пода́ждь и҆̀мъ си́лꙋ цѣле́бнꙋ, всѣ́хъ ко́зней дїа́вольскихъ прогони́тельнꙋ, и҆ во є҆́же всѣ̑мъ прилѣ́жнѡ пред̾ ни́ми молѧ́щымсѧ ᲂу҆слы̑шаннымъ бы́ти, и҆ млⷭ҇ть твоегѡ̀ чл҃вѣколю́бїѧ привлещѝ, и҆ бл҃года́ть полꙋчи́ти сотворѝ. Ты́ бо є҆сѝ ѡ҆сщ҃е́нїе на́ше, и҆ тебѣ̀ сла́вꙋ возсыла́емъ ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
І҆ере́й же, прекло́нь главꙋ̀, та́йнѡ чте́тъ мл҃твꙋ сїю̀:
Безнача́льне, неви́диме и҆ непостижи́ме гдⷭ҇и, и҆́же дре́вле въ ве́тсѣмъ завѣ́тѣ подѡ́бїѧ херꙋві́мѡвъ ѿ дре́ва и҆ зла́та и҆ шве́ннагѡ дѣ́ла, въ ски́нїи свидѣ́нїѧ. и҆ въ хра́мѣ соломѡ́новѣ сотвори́ти повелѣ́вый, и҆ ны́нѣ ѡ҆́бразы не то́чїю въ воспомина́нїе твои́хъ сп҃си́тельныхъ бл҃годѣѧ́нїй и҆ бж҃е́ственныхъ ꙗ҆вле́нїй ро́дꙋ человѣ́ческомꙋ, въ че́сть же и҆ сла́вꙋ твоегѡ̀ прест҃а́гѡ и҆́мене твори̑мыѧ прїе́млѧй, но и҆ въ па́мѧть и҆ подража́нїе ст҃ы́хъ твои́хъ ᲂу҆го́дникѡвъ ᲂу҆строѧ̑емыѧ не ѿмета́ѧй, ᲂу҆слы́ши смире́ннꙋю мл҃твꙋ на́шꙋ: бл҃гословѝ і҆кѡ̑ны сїѧ̑ и҆ ѡ҆ст҃ѝ, и҆ пода́ждь и҆̀мъ бл҃года́ть и҆ си́лꙋ бѣ́сы ѿгонѧ́ти, и҆ всѧ̑ недꙋ́ги и҆сцѣлѧ́ти.
Ꙗ҆́кѡ ты̀ є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
И҆ а҆́бїе кропи́тъ і҆ере́й предложє́нныѧ і҆кѡ̑ны по три́жды, глаго́лѧ:
Ѡ҆сщ҃а́ютсѧ і҆кѡ̑ны сїѧ̑ бл҃года́тїю прест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.
И҆ покропи́въ, і҆ере́й кади́тъ ѧ҆̀: и҆ покланѧ́ютсѧ пред̾ ни́ми, и҆ лобыза́етъ ѧ҆̀.
Ли́къ же пое́тъ тропарѝ пра̑здничныѧ, и҆ посе́мъ ѿпꙋ́стъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.