[глⷡ҇а в҃] Мл҃тва ст҃ы́хъ седмѝ ѻ҆трокѡ́въ на немощна́го и҆ не спѧ́щаго.
[глⷡ҇а в҃] Мл҃тва ст҃ы́хъ седмѝ ѻ҆трокѡ́въ на немощна́го и҆ не спѧ́щаго.
Гдⷭ҇ꙋ помо́лимсѧ.Гдⷭ҇и поми́лꙋй.
Бж҃е вели́кїй, хва́льный, и҆ непостижи́мый, и҆ неисповѣди́мый, созда́вый человѣ́ка рꙋко́ю твое́ю, пе́рсть взе́мъ ѿ землѝ и҆ ѡ҆́бразомъ твои́мъ почти́вый є҆го̀, і҆и҃се хрⷭ҇тѐ, прежела́емое и҆́мѧ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ꙗ҆ви́сѧ на рабѣ̀ твое́мъ [и҆лѝ рабѣ̀ твое́й] и҆́мⷬ҇къ, и҆ посѣтѝ є҆го̀ [и҆лѝ ю҆̀] дꙋше́ю и҆ тѣ́ломъ, ᲂу҆молѧ́емь ѿ пресла́вныѧ влⷣчцы на́шеѧ бцⷣы, и҆ приснодв҃ы мр҃і́и: ст҃ы́хъ нбⷭ҇ныхъ си́лъ безпло́тныхъ: и҆ чⷭ҇тна́гѡ сла́внагѡ прⷪ҇ро́ка, прⷣте́чи и҆ крⷭ҇ти́телѧ і҆ѡа́нна: ст҃ы́хъ сла́вныхъ и҆ всехва́льныхъ а҆пⷭ҇лѡвъ: и҆̀же во ст҃ы́хъ ѻ҆тє́цъ на́шихъ, и҆ вселе́нскихъ ᲂу҆чи́телей, васі́лїа вели́кагѡ, григо́рїа бг҃осло́ва, і҆ѡа́нна златоꙋ́стаго: а҆ѳана́сїа и҆ кѷрі́лла, нїкола́а и҆́же въ мѵ́рѣхъ, спѷрїдѡ́на чꙋдотво́рца, и҆ всѣ́хъ ст҃ы́хъ сщ҃еннонача́льникѡвъ: ст҃а́гѡ а҆пⷭ҇ла первомч҃нка и҆ а҆рхїдїа́кона стефа́на: ст҃ы́хъ сла́вныхъ и҆ великомч҃нкѡвъ, геѡ́ргїа побѣдоно́сца, дими́трїа мѷрото́чца, ѳео́дѡра стратила́та, и҆ всѣ́хъ ст҃ы́хъ мч҃нкѡвъ: прпⷣбныхъ и҆ бг҃оно́сныхъ ѻ҆тє́цъ на́шихъ, а҆нтѡ́нїа, є҆ѵѳѵ́мїа, са́ввы ѡ҆свѧще́ннагѡ, ѳеодо́сїа ѻ҆́бщагѡ житїѧ̀ нача́льника, ѻ҆нꙋ́фрїа, а҆рсе́нїа, а҆ѳана́сїа а҆ѳѡ́нскагѡ, и҆ всѣ́хъ прпⷣбныхъ: ст҃ы́хъ и҆ и҆сцѣли́телей, безсре́бренникѡвъ космы̀ и҆ дамїа́на, кѵ́ра и҆ і҆ѡа́нна, пантелеи́мона и҆ є҆рмола́а, самѱѡ́на и҆ дїоми́да, ѳалале́а и҆ трѵ́фѡна, и҆ про́чихъ: ст҃а́гѡ и҆́мⷬ҇къ, и҆ всѣ́хъ твои́хъ ст҃ы́хъ. и҆ да́ждь є҆мꙋ̀ со́нъ ᲂу҆покое́нїѧ, со́нъ тѣле́сный здра́вїѧ и҆ сп҃се́нїѧ и҆ живота̀, и҆ крѣ́пость дꙋше́внꙋю и҆ тѣле́снꙋю: ꙗ҆́коже посѣти́лъ є҆сѝ и҆ногда̀ а҆вїмеле́ха ᲂу҆го́дника твоего̀, во хра́мѣ а҆грі́пповѣ, и҆ да́лъ є҆сѝ є҆мꙋ̀ со́нъ ᲂу҆тѣше́нїѧ, є҆́же не ви́дѣти паде́нїѧ і҆ерⷭ҇ли́мова: и҆ сего̀ ᲂу҆спи́вый сно́мъ пита́тельнымъ, и҆ па́ки сего̀ воскр҃си́вый во є҆ди́номъ мгнове́нїи вре́мени, въ сла́вꙋ твоеѧ̀ бл҃гости. но и҆ ст҃ы̑ѧ твоѧ̑ сла̑вныѧ се́дмь ѻ҆́троки, и҆сповѣ́дники и҆ свидѣ́тели твоегѡ̀ ꙗ҆вле́нїѧ показа́вый, во дни̑ декі́а царѧ̀ и҆ ѿстꙋ́пника: и҆ сїѧ̑ ᲂу҆спи́вый въ верте́пѣ на лѣ̑та тѻ҃в, ꙗ҆́кѡ младе́нцы согрѣва́ємыѧ въ ложесна́хъ ма́тере своеѧ̀, и҆ ника́коже претерпѣ́вшыѧ тлѣ́нїѧ, въ похвалꙋ̀ и҆ сла́вꙋ человѣколю́бїѧ твоегѡ̀, и҆ въ показа́нїе и҆ и҆звѣще́нїе на́шегѡ пакибытїѧ̀, и҆ воскр҃се́нїѧ всѣ́хъ. са́мъ ᲂу҆́бѡ чл҃вѣколю́бче цр҃ю̀, предста́ни и҆ ны́нѣ наи́тїемъ ст҃а́гѡ твоегѡ̀ дх҃а, и҆ посѣтѝ раба̀ твоего̀ [и҆лѝ рабꙋ̀ твою̀] и҆́мⷬ҇къ, да́рꙋй є҆мꙋ̀ [и҆лѝ є҆́й] здра́вїе, крѣ́пость и҆ бл҃гомо́щїе, твое́ю бл҃гостїю: ꙗ҆́кѡ ѿ тебѐ є҆́сть всѧ́ко даѧ́нїе бл҃го, и҆ всѧ́къ да́ръ соверше́нъ. ты́ бо є҆сѝ вра́чь дꙋ́шъ на́шихъ, и҆ тебѣ̀ сла́вꙋ, и҆ бл҃годаре́нїе, и҆ поклоне́нїе возсыла́емъ со безнача́льнымъ твои́мъ ѻ҆ц҃е́мъ и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.