Отпустительные воскресные, восьми гласов, с Богородичными и ипакои их
Ѿпꙋсти́тельнїи воскрⷭ҇ны ѻ҆смѝ гласѡ́въ, съ бг҃оро́дичны и҆ ѵ҆пакоѝ и҆́хъ
Тропа́рь, гла́съ а҃:
Ка́мени запеча́танꙋ ѿ і҆ꙋдє́й, и҆ во́инѡмъ стрегꙋ́щымъ пречⷭ҇тое тѣ́ло твоѐ, воскре́слъ є҆сѝ тридне́вный сп҃се, да́рꙋѧй мі́рови жи́знь. сегѡ̀ ра́ди си̑лы нбⷭ҇ныѧ вопїѧ́хꙋ тѝ, жизнода́вче: сла́ва воскрⷭ҇нїю твоемꙋ̀ хрⷭ҇тѐ, сла́ва црⷭ҇твїю твоемꙋ̀, сла́ва смотре́нїю твоемꙋ̀, є҆ди́не чл҃вѣколю́бче.
Бг҃оро́диченъ:
Гаврїи́лꙋ вѣща́вшꙋ тебѣ̀ дв҃о, ра́дꙋйсѧ! со гла́сомъ воплоща́шесѧ всѣ́хъ влⷣка, въ тебѣ̀ ст҃ѣ́мъ кївѡ́тѣ, ꙗ҆́коже речѐ пра́ведный дв҃дъ: ꙗ҆ви́ласѧ є҆сѝ ши́ршаѧ нб҃съ, поноси́вши зижди́телѧ твоего̀. сла́ва все́льшемꙋсѧ въ тѧ̀, сла́ва проше́дшемꙋ и҆з̾ тебѐ, сла́ва свободи́вшемꙋ на́съ ржⷭ҇тво́мъ твои́мъ.
Ѵ҆пакоѝ:
Разбо́йничо покаѧ́нїе ра́й ѡ҆кра́де, пла́чь же мѷроно́сицъ ра́дость возвѣстѝ, ꙗ҆́кѡ воскре́слъ є҆сѝ хрⷭ҇тѐ бж҃е, подаѧ́й мі́рови ве́лїю млⷭ҇ть.
Тропа́рь, гла́съ в҃:
Є҆гда̀ снизше́лъ є҆сѝ къ сме́рти, животѐ безсме́ртный, тогда̀ а҆́дъ ᲂу҆мертви́лъ є҆сѝ блиста́нїемъ бж҃ества̀: є҆гда́ же и҆ ᲂу҆ме́ршыѧ ѿ преиспо́днихъ воскр҃си́лъ є҆сѝ, всѧ̑ си̑лы нбⷭ҇ныѧ взыва́хꙋ: жизнода́вче, хрⷭ҇тѐ бж҃е на́шъ, сла́ва тебѣ̀.
Бг҃оро́диченъ:
Всѧ̑ па́че смы́сла, всѧ̑ пресла̑внаѧ твоѧ̑ бцⷣе, та̑инства, ꙾чистотѣ̀ запеча́танной, и҆ дѣ́вствꙋ храни́мꙋ꙾[[чистото́ю запечатлѣ́нна, и҆ дв҃ствомъ храни́ма]], мт҃и позна́ласѧ є҆сѝ нело́жна, бг҃а ро́ждши и҆́стиннаго: того̀ молѝ сп҃сти́сѧ дꙋша́мъ на́шымъ.
Ѵ҆пакоѝ:
По стрⷭ҇ти ше́дше во гро́бъ жєны̀, во є҆́же пома́зати тѣ́ло твоѐ хрⷭ҇тѐ бж҃е, ви́дѣша а҆́гг҃лы во гро́бѣ, и҆ ᲂу҆жасо́шасѧ: гла́съ бо слы́шахꙋ ѿ ни́хъ, ꙗ҆́кѡ воскр҃се гдⷭ҇ь, да́рꙋѧй мі́рови ве́лїю млⷭ҇ть.
Тропа́рь, гла́съ г҃:
Да веселѧ́тсѧ нбⷭ҇наѧ, да ра́дꙋютсѧ земна̑ѧ, ꙗ҆́кѡ сотворѝ держа́вꙋ мы́шцею свое́ю гдⷭ҇ь, попра̀ сме́ртїю сме́рть, пе́рвенецъ ме́ртвыхъ бы́сть, и҆з̾ чре́ва а҆́дова и҆зба́ви на́съ, и҆ подадѐ мі́рови ве́лїю млⷭ҇ть.
Бг҃оро́диченъ:
Тѧ̀ хода́тайствовавшꙋю сп҃се́нїе ро́да на́шегѡ, воспѣва́емъ бцⷣе дв҃о: пло́тїю бо ѿ тебѐ воспрїѧ́тою, сн҃ъ тво́й и҆ бг҃ъ на́шъ, крⷭ҇то́мъ воспрїи́мъ стрⷭ҇ть, и҆зба́ви на́съ ѿ тлѝ ꙗ҆́кѡ чл҃вѣколю́бецъ.
Ѵ҆пакоѝ:
Оу҆дивлѧ́ѧ видѣ́нїемъ, ѡ҆роша́ѧ глаго́ланїи, блиста́ѧйсѧ а҆́гг҃лъ мѷроно́сицамъ глаго́лаше: что̀ жива́гѡ и҆́щете во гро́бѣ; воста̀ и҆стощи́вый гро́бы, тлѝ премѣни́телѧ разꙋмѣ́йте непремѣ́ннаго, рцы́те бг҃ови: ко́ль стра̑шна дѣла̀ твоѧ̑, ꙗ҆́кѡ ро́дъ сп҃слъ є҆сѝ человѣ́ческїй.
Тропа́рь, гла́съ д҃:
Свѣ́тлꙋю воскрⷭ҇нїѧ про́повѣдь ѿ а҆́гг҃ла ᲂу҆вѣ́дѣвшѧ гдⷭ҇ни ᲂу҆ч҃нцы, и҆ пра́дѣднее ѡ҆сꙋжде́нїе ѿве́ргшѧ, а҆пⷭ҇лѡмъ хва́лѧщѧсѧ глаго́лахꙋ, и҆спрове́ржесѧ сме́рть, воскр҃се хрⷭ҇то́съ бг҃ъ, да́рꙋѧй мі́рови ве́лїю млⷭ҇ть.
Бг҃оро́диченъ:
Є҆́же ѿ вѣ́ка ᲂу҆тае́ное и҆ а҆́гг҃лѡмъ несвѣ́домое та́инство, тобо́ю бцⷣе, сꙋ́щымъ на землѝ ꙗ҆ви́сѧ бг҃ъ, въ несли́тномъ соедине́нїи воплоща́емь: и҆ крⷭ҇тъ во́лею на́съ ра́ди воспрїи́мъ, и҆́мже воскр҃си́въ первозда́ннаго, сп҃сѐ ѿ сме́рти дꙋ́шы на́шѧ.
Ѵ҆пакоѝ:
Ꙗ҆̀же твоегѡ̀ пресла́внагѡ воста́нїѧ предте́кшыѧ мѷронѡ́сицы, а҆пⷭ҇лѡмъ проповѣ́дахꙋ хрⷭ҇тѐ: ꙗ҆́кѡ воскре́слъ є҆сѝ ꙗ҆́кѡ бг҃ъ, подаѧ́й мі́рови ве́лїю млⷭ҇ть.
Тропа́рь, гла́съ є҃:
Собезнача́льное сло́во ѻ҆ц҃ꙋ̀ и҆ дх҃ови, ѿ дв҃ы ро́ждшеесѧ на сп҃се́нїе на́ше, воспои́мъ вѣ́рнїи, и҆ поклони́мсѧ: ꙗ҆́кѡ бл҃говолѝ пло́тїю взы́ти на крⷭ҇тъ, и҆ сме́рть претерпѣ́ти, и҆ воскр҃си́ти ᲂу҆ме́ршыѧ, сла́внымъ воскресе́нїемъ свои́мъ.
Бг҃оро́диченъ:
Ра́дꙋйсѧ две́ре гдⷭ҇нѧ непроходи́маѧ: ра́дꙋйсѧ стѣно̀ и҆ покро́ве притека́ющихъ къ тебѣ̀. ра́дꙋйсѧ неѡбꙋрева́емое приста́нище и҆ неискꙋсобра́чнаѧ, ро́ждшаѧ пло́тїю творца̀ твоего̀ и҆ бг҃а: молѧ́щи не ѡ҆скꙋдѣва́й ѡ҆ воспѣва́ющихъ и҆ кла́нѧющихсѧ ржⷭ҇твꙋ̀ твоемꙋ̀.
Ѵ҆пакоѝ:
А҆́гг҃льскимъ зра́комъ ᲂу҆́мъ смꙋща́ющыѧ, и҆ бж҃е́ственнымъ воста́нїемъ дꙋше́ю просвѣща́ємыѧ, мѷронѡ́сицы а҆пⷭ҇лѡмъ бл҃говѣствова́хꙋ: возвѣсти́те во ꙗ҆зы́цѣхъ воскрⷭ҇нїе, гдⷭ҇ꙋ содѣ́йствꙋющꙋ чꙋдесы̀, подаю́щемꙋ на́мъ ве́лїю млⷭ҇ть.
Тропа́рь, гла́съ ѕ҃:
А҆́гг҃льскїѧ си́лы на гро́бѣ твое́мъ, и҆ стрегꙋ́щїи ѡ҆мертвѣ́ша, и҆ стоѧ́ше мр҃і́а во гро́бѣ, и҆́щꙋщи пречⷭ҇тагѡ тѣ́ла твоегѡ̀. плѣни́лъ є҆сѝ а҆́дъ, не и҆скꙋси́всѧ ѿ негѡ̀: срѣ́тилъ є҆сѝ дв҃ꙋ, да́рꙋѧй живо́тъ, воскр҃сы́й и҆з̾ ме́ртвыхъ гдⷭ҇и, сла́ва тебѣ̀.
Бг҃оро́диченъ:
Бл҃гослове́ннꙋю нарекі́й твою̀ мт҃рь, прише́лъ є҆сѝ на стра́сть во́льнымъ хотѣ́нїемъ, возсїѧ́въ на крⷭ҇тѣ̀: взыска́ти хотѧ̀ а҆да́ма, глаго́лѧ а҆́гг҃лѡмъ: сра́дꙋйтесѧ мнѣ̀: ꙗ҆́кѡ ѡ҆брѣ́тесѧ поги́бшаѧ дра́хма. всѧ̑ мꙋ́дрѣ ᲂу҆стро́ивый бж҃е на́шъ, сла́ва тебѣ̀.
Ѵ҆пакоѝ:
Во́льною и҆ животворѧ́щею твое́ю сме́ртїю, хрⷭ҇тѐ, врата̀ а҆́дѡва сокрꙋши́въ ꙗ҆́кѡ бг҃ъ, ѿве́рзлъ є҆сѝ на́мъ дре́внїй ра́й, и҆ воскр҃съ и҆з̾ ме́ртвыхъ, и҆зба́вилъ є҆сѝ ѿ тлѣ́нїѧ живо́тъ на́шъ.
Тропа́рь, гла́съ з҃:
Разрꙋши́лъ є҆сѝ крⷭ҇то́мъ твои́мъ сме́рть, ѿве́рзлъ є҆сѝ разбо́йникꙋ ра́й, мѷроно́сицамъ пла́чь преложи́лъ є҆сѝ, и҆ а҆пⷭ҇лѡмъ проповѣ́дати повелѣ́лъ є҆сѝ, ꙗ҆́кѡ воскре́слъ є҆сѝ хрⷭ҇тѐ бж҃е, да́рꙋѧй мі́рови ве́лїю млⷭ҇ть.
Бг҃оро́диченъ:
Ꙗ҆́кѡ на́шегѡ воскрⷭ҇нїѧ сокро́вище, на тѧ̀ надѣ́ющыѧсѧ всепѣ́таѧ, ѿ ро́ва и҆ глꙋбины̀ прегрѣше́нїй возведѝ. ты́ бо пови̑нныѧ грѣхꙋ̀ сп҃сла̀ є҆сѝ, ро́ждшаѧ сп҃се́нїе на́ше: ꙗ҆́же пре́жде ржⷭ҇тва̀ дв҃а, и҆ въ ржⷭ҇твѣ̀ дв҃а, и҆ по ржⷭ҇твѣ̀ па́ки пребыва́еши дв҃а.
Ѵ҆пакоѝ:
И҆́же на́шъ зра́къ воспрїе́мый, и҆ претерпѣ́вый крⷭ҇тъ пло́тски, сп҃си́ мѧ воскрⷭ҇нїемъ твои́мъ, хрⷭ҇тѐ бж҃е, ꙗ҆́кѡ чл҃вѣколю́бецъ.
Тропа́рь, гла́съ и҃:
Съ высоты̀ снизше́лъ є҆сѝ бл҃гоꙋтро́бне, погребе́нїе прїѧ́лъ є҆сѝ тридне́вное, да на́съ свободи́ши страсте́й, животѐ и҆ воскрⷭ҇нїе на́ше, гдⷭ҇и, сла́ва тебѣ̀.
Бг҃оро́диченъ:
И҆́же на́съ ра́ди рожде́йсѧ ѿ дв҃ы, и҆ распѧ́тїе претерпѣ́въ бл҃гі́й, и҆спрове́ргїй сме́ртїю сме́рть, и҆ воскрⷭ҇нїе ꙗ҆вле́й ꙗ҆́кѡ бг҃ъ, не пре́зри, ꙗ҆̀же созда́лъ є҆сѝ рꙋко́ю твое́ю: ꙗ҆вѝ чл҃вѣколю́бїе твоѐ млⷭ҇тиве, прїимѝ ро́ждшꙋю тѧ̀ бцⷣꙋ, молѧ́щꙋюсѧ за ны̀, и҆ сп҃сѝ сп҃се на́шъ, лю́ди ѿча̑ѧнныѧ.
Ѵ҆пакоѝ:
Мѷронѡ́сицы жизнода́вца предстоѧ́щыѧ гро́бꙋ, влⷣкꙋ и҆ска́хꙋ въ ме́ртвыхъ безсме́ртнаго, и҆ ра́дость бл҃говѣ́щенїѧ ѿ а҆́гг҃ла прїе́мшыѧ, а҆пⷭ҇лѡмъ возвѣща́хꙋ, ꙗ҆́кѡ воскр҃се хрⷭ҇то́съ бг҃ъ, подаѧ́й мі́рови ве́лїю млⷭ҇ть.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.