Иосифовы трипеснцы

Иосифовы трипеснцы

<<сп҃ѳ: 577>>

Трипѣ́снцы, творе́нїе і҆ѡ́сифово.

Вѣ́дати подоба́етъ, ꙗ҆́кѡ сїѧ̑ трипѣ́снцы въ пре́жнихъ печа́тныхъ трїѡ́дѣхъ печа́таны на лїтꙋргі́ахь пѣ́ти, ᲂу҆ гре́кѡвь же на повече́рїахъ глаго́лютсѧ съ бг҃оро́дичнымъ канѡ́номъ: на лїтꙋргі́ахь же пою́тъ ѿ канѡ́на пра́здника, на кі́йждо де́нь по є҆ди́ной пѣ́сни, си́це: Въ недѣ́лю, г҃ и҆ ѕ҃ пѣ́снь: въ понедѣ́льникъ а҃: во вто́рникъ д҃: въ сре́дꙋ є҃: въ четверто́къ з҃: въ пѧто́къ и҃: въ сꙋббѡ́тꙋ ѳ҃: Сегѡ̀ ра́ди послѣ́дꙋюще гре́ческомꙋ прево́дꙋ, ѿ негѡ́же и҆ се́й пентикоста́рїй преведе́сѧ и҆ и҆спра́висѧ, на рѧдꙋ̀ сїѧ̑ трипѣ́снцы не положи́хомъ, за є҆́же не порꙋши́тисѧ гре́ческомꙋ прево́дꙋ же и҆ чи́нꙋ, положи́хомъ же въ коне́цъ кни́ги сеѧ̀, пѣ́ти и҆́хъ съ бг҃оро́дичнымъ канѡ́номъ на повече́рїи. И҆дѣ́же а҆́ще бꙋ́детъ трипѣ́снецъ, бцⷣѣ пѣ̑сни канѡ́на ѡ҆ставлѧ́ютсѧ, на лїтꙋргі́ахь же ѿ канѡ́на пра́здника, ꙗ҆́коже на рѧдꙋ̀ ᲂу҆ка́зано є҆́сть.

Въ понедѣ́льникъ вторы́ѧ недѣ́ли по па́сцѣ трипѣ́снецъ, є҆гѡ́же краегране́сїе: Воспое́тъ же тѧ̀ і҆ѡ́сифъ. Гла́съ а҃.

Пѣ́снь а҃.

І҆рмо́съ: Твоѧ̀ побѣди́тельнаѧ десни́ца, бг҃олѣ́пнѡ въ крѣ́пости просла́висѧ: та́ бо безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

[А] Воспои́мъ бг҃ꙋ ꙗ҆́кѡ побѣди́телю, низложи́вшемꙋ сме́ртїю сме́рть, и҆ воскреси́вшемꙋ съ собо́ю ро́дъ человѣ́ческїй, и҆ нетлѣ́нїемъ пребога́тнѡ поче́тшемꙋ.

[Д] Свѧ́занъ бы́въ, сме́ртныѧ ᲂу҆́зы ꙗ҆́кѡ си́ленъ крѣ́постїю растерза́лъ є҆сѝ: разрѣши́въ же человѣ́ки ѿ тлѝ, <<сп҃ѳ ѡ҆б.: 578>> и҆з̾ а҆́да воскреси́лъ є҆сѝ воспѣва́ющыѧ держа́вꙋ твою̀, многоми́лостиве.

Сла́ва:

[Е] Бл҃гоꙋтро́бне хрⷭ҇тѐ, менѐ ра́ди да́же до а҆́да бы́вый во́лею, лежа́ща мѧ̀ въ гро́бѣ грѣхо́вномъ, и҆ въ ро́вѣ престꙋпле́нїй, твои́мъ присѣще́нїемъ воскреси́въ поми́лꙋй.

И҆ ны́нѣ, бг҃оро́диченъ:

[І] Ви́дѣвши хрⷭ҇та̀ ѿ ме́ртвыхъ, бг҃ороди́тельнице, пло́тїю воста́вша, ра́доваласѧ є҆сѝ: и҆спроси́ же и҆ мнѣ̀ радостотво́рный пла́чь ны́нѣ дарова́ти, ꙗ҆́кѡ да ѡ҆брѧ́щꙋ тогда̀ чи́стаѧ, бж҃е́ственное ᲂу҆тѣше́нїе.

Пѣ́снь и҃.

І҆рмо́съ: Въ пещѝ ѻ҆́троцы і҆и҃левы, ꙗ҆́коже въ горни́лѣ, добро́тою бл҃гоче́стїѧ чистѣ́е зла́та блеща́хꙋсѧ, глаго́люще: бл҃гослови́те всѧ̀ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̀ вѣ́ки.

[Д] Крⷭ҇то́мъ твои́мъ разрѣши́лъ є҆сѝ клѧ́твꙋ, положи́всѧ во гро́бѣ, и҆ а҆́дово мра́чное хрⷭ҇тѐ мо́й і҆и҃се, низложи́въ ца́рство, и҆ воскре́съ, всю̀ тва́рь съ собо́ю воскреси́лъ є҆сѝ: тѣ́мже тѧ̀ пое́мъ во всѧ̀ вѣ́ки.

[Е] Возше́дшꙋ тѝ на крⷭ҇тъ со́лнце ᲂу҆гасѐ, во а҆́дъ же соше́дшꙋ тѝ чл҃вѣколю́бче, свѣ́тъ возсїѧ̀ дꙋша́мъ во тмѣ̀ сꙋ́щымъ, и҆ погребє́нымъ под̾ го́рькою сме́ртью. тѣ́мже тѧ̀ пое́мъ во всѧ̀ вѣ́ки.

Сла́ва:

[С] Свѧ́зана мѧ̀ плени́цами грѣхо́вными, разрѣшѝ хрⷭ҇тѐ, и҆ ѡ҆сїѧ́й мѝ покаѧ́нїѧ бж҃е́ственнꙋю свѣ́тлость сп҃се, ѿ <<с҃ч: 579>> тмы̀ вѣ́чныѧ и҆збавле́й человѣ́ки, твои́мъ стра́шнымъ воста́нїемъ, є҆́же воспѣва́емъ во всѧ̀ вѣ́ки.

И҆ ны́нѣ, бг҃оро́диченъ:

[Е] На рꙋкꙋ̀ носѧ́щаѧ хрⷭ҇та̀, и҆з̾ тебѐ воплоще́нна дв҃о, того̀ молѝ прїѧ́ти ны́нѣ и҆ менѐ, безпꙋ́тїемъ всѧ́цѣмъ житїѧ̀, и҆ согрѣше́ньми безчи́сленными заблꙋ́ждшаго, срѣта́ющꙋ мѝ нра́вꙋ лѣ́ностномꙋ всегда̀.

Пѣ́снь ѳ҃.

І҆рмо́съ: Ѡ҆́бразъ чи́стагѡ ржⷭ҇тва̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ, и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь: да тѧ̀ бцⷣе непреста́ннѡ велича́емъ.

[І] Ви́дѧ со́лнце распина́ема ѡ҆мрачи́сѧ, посредѣ̀ разбѡ́йникꙋ тѧ̀ сло́ве, со́лнца незаходи́маго: го́ры, хо́лми, землѧ̀ и҆ мо́ре ᲂу҆клони́шасѧ: а҆́дъ вострепета̀, ю҆́зники разрѣша́ѧ, ꙗ҆̀же держа́ше, воспѣва́ющыѧ тѧ̀.

[Ѡ] Ꙗ҆ви́лсѧ є҆сѝ ꙗ҆́коже вели́кое со́лнце, под̾ зе́млю заше́дъ, возсїѧ́лъ же є҆сѝ незаходи́мое свѣти́ло ѿ ме́ртвыхъ, ѡ҆зари́въ пресла́внѡ зємны́ѧ концы̀: тѣ́мже тѧ̀ животода́вче непреста́ннѡ велича́емъ.

[С] Сп҃се і҆и҃се, твое́ю сме́ртїю сме́рть разори́вый, воскреси́вый же всѧ̑ та́мѡ держи̑мыѧ, воскресѝ и҆ менѐ, въ ро́вѣ преиспо́днѣмъ страсте́й смертоно́сныхъ и҆ грѣхѡ́въ сꙋ́ща, зовꙋ́ ти человѣколю́бче.

Сла́ва:

[И] Прїидо́ша мѷронѡ́сицы пла́чꙋще на гро́бъ ра́нѡ, и҆ не ѡ҆брѣ́тше тѧ̀, ви́дѣша въ бѣ́лыхъ ри́захъ <<с҃ч ѡ҆б.: 580>> предсѣдѧ́ща а҆́гг҃ла, и҆ вопїю́ща: воста̀ гдⷭ҇ь, спѣши́те возвести́ти воста́нїе ᲂу҆ченикѡ́мъ є҆гѡ̀.

И҆ ны́нѣ, бг҃оро́диченъ:

[Ф] Диви́тсѧ всѧ̀ тва́рь влⷣчце, є҆́же па́че ᲂу҆ма̀ та́инствꙋ ржⷭ҇тва̀ твоегѡ̀: ражда́еши бо бг҃а є҆мманꙋ́ила, бы́вша на́съ ра́ди человѣ́ка всенепоро́чнаѧ, и҆ разрꙋши́вшаго сме́рти мꙋчи́тєльства крⷭ҇то́мъ свои́мъ.

Во вто́рникъ вторы́ѧ недѣ́ли по па́сцѣ.

Трипѣ́снецъ, є҆гѡ́же краегране́сїе: Воспою̀ бг҃ꙋ і҆ѡ́сифъ. Гла́съ а҃.

Пѣ́снь в҃.

І҆рмо́съ: Ви́дите ви́дите, ꙗ҆́кѡ бг҃ъ а҆́зъ є҆́смь, порабощє́ныѧ лю́ди і҆и҃левы мѡѷсе́ю народоводи́ти въ пꙋсты́ни повелѣ́вый, и҆ спасы́й ꙗ҆́кѡ си́ленъ вла́стїю мое́ю.

[Ѱ] Пои́мъ дне́сь, гдⷭ҇ви, восклица́юще распе́ншемꙋсѧ на́съ ра́ди, и҆ низложи́вшемꙋ ѕлонача́льнаго врага̀, и҆ поло́жшемꙋсѧ во гро́бѣ и҆ ѡ҆живи́вшемꙋ мє́ртвыѧ воскресе́нїемъ свои́мъ.

[А] Ст҃ъ гдⷭ҇ь, и҆з̾ ме́ртвыхъ тридне́внѡ воскресы́й ꙗ҆́кѡ си́ленъ, ᲂу҆ч҃нкѡ́мъ ꙗ҆вле́йсѧ бг҃олѣ́пнѡ, и҆ ра́дости неизглаго́ланныѧ си́хъ и҆спо́лнивый дꙋ́шы, ско́рби и҆спо́лнєнныѧ пре́жде.

Сла́ва:

[Л] Сло́ве собезнача́льне, ѻ҆ц҃ꙋ̀ безнача́льнꙋ сопресто́льне, распны́йсѧ и҆ вмѣни́выйсѧ въ ме́ртвыхъ, и҆ воскресы́й ꙗ҆́кѡ <<сч҃а: 581>> си́ленъ, мою̀ дꙋ́шꙋ ѡ҆животворѝ ᲂу҆мерщвле́нꙋю престꙋпле́ньми.

И҆ ны́нѣ, бг҃оро́диченъ:

[Ѡ] Ѽ чꙋде́съ твои́хъ! ѽ стра́шнагѡ слы́шанїѧ! ражда́еши бо пло́тїю бг҃а, разо́ршаго смє́ртныѧ ᲂу҆́зы, и҆ ѿ тлѝ человѣ́ки и҆змѣ́ншаго, чи́стаѧ бг҃облагода́тнаѧ.

Пѣ́снь и҃.

І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте свѧще́нницы, просла́вите ѻ҆́троцы, благослови́те лю́дїе, и҆ превозноси́те во всѧ̀ вѣ́ки.

[Ѳ] Рыда́етъ всѧ̀ тва́рь ѡ҆ твое́й стрⷭ҇ти бл҃же, со́лнце поме́рче, тебѣ̀ заше́дшꙋ на крⷭ҇тѣ̀, и҆ во тмѣ̀ сѣдѧ́щїи вели́кїй свѣ́тъ ви́дѣша, пою́ще тѧ̀ ще́дро.

[Е] Вострепета̀ а҆́дъ, тѧ̀ ви́дѣвъ съ дш҃е́ю къ немꙋ̀ и҆дꙋ́ща хрⷭ҇тѐ всецр҃ю̀, и҆ ꙗ҆̀же ѿ вѣ́ка мє́ртвыѧ и҆здава́ше, воспѣва́ющыѧ твоѐ человѣколю́бїе.

Сла́ва:

[Ѡ] Ꙗ҆ви́лсѧ є҆сѝ хрⷭ҇тѐ, ѿ гро́ба воста́въ, прине́сшымъ а҆рѡма́ты бжⷭ҇твеннымъ жена́мъ, и҆ си́хъ рыда́нїе претвори́лъ є҆сѝ, ᲂу҆тѣше́нїе всѣ́хъ сы́й во вѣ́ки.

И҆ ны́нѣ, бг҃оро́диченъ:

[І] Ви́дѣвши, є҆го́же родила̀ є҆сѝ бг҃а, и҆з̾ ме́ртвыхъ воста́вша, ра́дости ꙗ҆ви́ласѧ є҆сѝ и҆спо́лнена дв҃о мр҃і́е: того̀ ᲂу҆́бѡ молѝ чⷭ҇таѧ, всѧ́кꙋю печа́ль на́шегѡ се́рдца до конца̀ потреби́ти.

Пѣ́снь ѳ҃.

І҆рмо́съ: Свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де и҆ воплоти́сѧ на́съ <<сч҃а ѡ҆б.: 582>> ра́ди, бы́въ чл҃вѣ́къ, безнача́льный: велича́емъ всѝ ꙗ҆́кѡ мт҃рь бг҃а на́шегѡ чи́стꙋю.

[Ѡ] Ꙗ҆́кѡ ви́дѣ тѧ̀ на дре́вѣ во́лею распѧ́та, благоразꙋ́мный разбо́йникъ, помѧни́ мѧ, вопїѧ́ше, є҆гда̀ прїи́деши і҆и҃се во црⷭ҇твїи твое́мъ: и҆ бы́сть ра́еви жи́тель, вѣ́рою є҆ди́ною ѡ҆правда́всѧ.

[С] Тѧ̀ сп҃се ви́дѣвъ въ ме́ртвыхъ а҆́дъ ᲂу҆мертви́сѧ, и҆ и҆здава́ше мертвецы̀, ꙗ҆̀же пожрѐ дре́вле, славосло́вѧщыѧ хрⷭ҇тѐ твою̀ неизглаго́ланнꙋю си́лꙋ, и҆ мно́гое бл҃госе́рдїе, и҆́мже спа́слъ є҆сѝ на́съ всецр҃ю̀.

Сла́ва:

[И] Прїидо́ша носѧ́щыѧ мѵ̑ра на гро́бъ жєны̀, и҆ ви́дѣвше тѧ̀ хрⷭ҇тѐ воста́вша и҆з̾ гро́ба, ра́дости и҆спо́лнишасѧ мно́гїѧ, и҆ а҆пⷭ҇лѡмъ твои̑мъ возвѣсти́ша, ꙗ҆́кѡ воскрⷭ҇лъ и҆ ꙗ҆ви́лсѧ є҆сѝ, совозста́вль мі́ръ ве́сь съ собо́ю.

И҆ ны́нѣ, бг҃оро́диченъ:

[Ф] Свѣ́тъ невече́рнїй, просїѧ́вшїй и҆з̾ ме́ртвыхъ ви́дѣвши чⷭ҇таѧ, и҆ ра́дости и҆спо́лнившисѧ мно́гїѧ, ра́доваласѧ є҆сѝ съ прест҃ы́ми ᲂу҆ч҃нкѝ, съ ни́миже и҆ на́мъ и҆спросѝ проще́нїе безмѣ́рныхъ прегрѣше́нїй, бцⷣе застꙋ́пнице вѣ́рныхъ.

Въ сре́дꙋ вторы́ѧ недѣ́ли по па́сцѣ.

Трипѣ́снецъ, є҆гѡ́же краегране́сїе: Хвалю̀ бг҃а, і҆ѡ́сифъ. Гла́съ а҃.

Пѣ́снь г҃.

І҆рмо́съ: Пре́жде вѣ́къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ́днѧѧ ѿ дв҃ы воплоще́нномꙋ безсѣ́меннѡ, хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ гдⷭ҇и. <<сч҃в: 583>>

[А] Ст҃е ст҃ы́хъ, ѡ҆свѧти́ти мі́ръ хотѧ̀, во́лею на дре́во крⷭ҇тное возне́слсѧ, и҆ закла́лсѧ є҆сѝ ꙗ҆́кѡ а҆́гнецъ, и҆ кро́вїю бл҃года́тельною ѡ҆бновлѧ́еши на́съ пѣсносло́вѧщихъ тѧ̀.

[І] Крѣ́пость ѿѧ́тсѧ вра́жїѧ, плѣне́на бы́сть сме́рть, ѡ҆безсме́ртисѧ человѣ́ческое и҆стлѣ́вшее сꙋщество̀, хрⷭ҇тѐ і҆и҃се ᲂу҆мертви́вшꙋсѧ тебѣ̀, и҆ ѡ҆бнови́сѧ мі́ръ вопїѧ̀: ст҃ъ є҆сѝ гдⷭ҇и.

Сла́ва:

[И] Ны́нѣ не ᲂу҆дивлѧ́йтесѧ, жена́мъ вопїѧ́ше а҆́гг҃лъ, и҆ди́те же па́че ᲂу҆се́рднѡ, ᲂу҆ченикѡ́мъ скорбѧ́щымъ ра́дости глаго́лы возвѣща́юще, ꙗ҆́кѡ воста̀ хрⷭ҇то́съ живо́тъ всѣ́хъ и҆ воскрⷭ҇нїе.

И҆ ны́нѣ, бг҃оро́диченъ:

[Ѡ] Ꙗ҆ви́ласѧ є҆сѝ ты̀ дв҃о чⷭ҇таѧ вы́шши а҆́гг҃лъ, бг҃а вопло́щши распе́ншагосѧ, и҆ погребе́на, и҆ мє́ртвымъ нетлѣ́нїе и҆сточи́вшаго: є҆го́же молѝ спастѝ на́съ пѣсносло́вѧщихъ тѧ̀.

Пѣ́снь и҃.

І҆рмо́съ: Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀ ꙗ҆̀же прїѧ́тъ пали́тъ ю҆́ныѧ, ꙗ҆́кѡ нижѐ ѻ҆́гнь бж҃ества̀ дв҃ы, въ ню́же вни́де ᲂу҆тро́бꙋ. тѣ́мъ воспѣва́юще воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̀ вѣ́ки.

[Ѳ] Сме́рть во́лею прїѧ́лъ є҆сѝ, возвыша́емь пло́тїю на дре́во, и҆ зрѧ̀ тѧ̀ со́лнце ᲂу҆гасѐ, и҆ цр҃ко́внаѧ завѣ́са раздра́сѧ всеси́льне. тѣ́мже воспѣва́юще тѧ̀ зове́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ є҆го̀ во вѣ́ки. <<сч҃в ѡ҆б.: 584>>

[Е] Ви́дѣша тѧ̀ незаходи́мое сїѧ́нїе дре́вле сѣдѧ́щїи въ сѣ́ни сме́ртнѣй, въ ни́хже тебѣ̀ гдⷭ҇и соше́дшꙋ съ дꙋше́ю, и҆ ᲂу҆́зъ вѣ́чныхъ разрѣши́шасѧ, вельмѝ пою́ще тѧ̀, и҆ глаго́люще: да бл҃гослови́тъ тва́рь всѧ̀ гдⷭ҇а, и҆ превозно́ситъ є҆го̀ во вѣ́ки.

Сла́ва:

[О] Оу҆́трѡ ко гро́бꙋ прише́дше жєны̀, блиста́ющасѧ а҆́гг҃ла ви́дѣша, и҆ глаго́люща: воскре́се и҆зба́витель, что̀ жива́го съ ме́ртвыми є҆щѐ помышлѧ́ете; и҆спо́лншесѧ ра́дости возопі́йте: да бл҃гослови́тъ тва́рь всѧ̀ гдⷭ҇а, и҆ превозно́ситъ є҆го̀ во вѣ́ки.

И҆ ны́нѣ, бг҃оро́диченъ:

[Н] Оу҆мерщвле́нїе а҆́дꙋ содѣ́ла сн҃ъ тво́й чи́стаѧ, ꙗ҆́коже пре́жде речѐ и҆з̾ ме́ртвыхъ воста́въ, є҆го́же молѝ тлетво́рнагѡ грѣха̀ и҆зба́витисѧ и҆ мꙋ́ки, всѣ̑мъ вѣ́рою взыва́ющымъ: да бл҃гослови́тъ тва́рь всѧ̀ гдⷭ҇а, и҆ превозно́ситъ є҆го̀ во вѣ́ки.

Пѣ́снь ѳ҃.

І҆рмо́съ: Та́инство стра́нное ви́жꙋ и҆ пресла́вное: нб҃о, верте́пъ: прⷭ҇то́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ, є҆го́же воспѣва́юще велича́емъ.

[І] И҆сцѣлѧ́ѧ первозда́ннагѡ болѣ̑зни, поболѣ́лъ є҆сѝ ви́симь сп҃се во́лею на дре́вѣ: положи́въ же сѧ въ ро́вѣ преиспо́днѣмъ, воскреси́лъ є҆сѝ мє́ртвыѧ, ꙗ҆̀же сме́рть возмо́же пе́рвѣе поглоти́ти.

[Ѡ] Ꙗ҆́кѡ ви́дѣ тѧ̀ дре́вле ли́къ а҆пⷭ҇льскїй воскре́сша гдⷭ҇и, стра́хомъ же и҆ ра́достїю покланѧ́шесѧ, къ ни́мже <<сч҃г: 585>> возопи́лъ є҆сѝ: сѐ сбытїѐ глаго́лѡмъ мои̑мъ, не скорби́те вы̀, но ра́дꙋйтесѧ.

[С] Плащани́цею тѧ̀ сп҃се ѡ҆бви́въ, положѝ і҆ѡ́сифъ пра́ведный любо́вїю въ но́вѣмъ гро́бѣ: врата́ же а҆́дѡва ꙗ҆́вѣ и҆ верєѝ сокрꙋ́шь, воздви́глъ є҆сѝ мє́ртвыѧ, ꙗ҆̀же сме́рть возмо́же пре́жде поглоти́ти.

Сла́ва:

[И] Ра́довахꙋсѧ мѷронѡ́сицы слы́шавше хрⷭ҇то́во воста́нїе тѣ́мже а҆пⷭ҇лѡмъ вопїѧ́хꙋ: те́кше спѣ́шнѡ, сѐ ᲂу҆жѐ не скорби́те, но ра́дꙋйтесѧ вы̀: воста́ бо и҆з̾ ме́ртвыхъ всѣ́хъ гдⷭ҇ь.

И҆ ны́нѣ, бг҃оро́диченъ:

[Ф] Свѣтѧ́щасѧ всего̀ въ добро́тѣ без̾ сосꙋжде́нїѧ, ꙗ҆́кѡ жениха̀ хрⷭ҇та̀ ви́дѣвши ѻ҆трокови́це, и҆з̾ гро́бнагѡ черто́га пло́тїю произше́дша, ра́дости и҆спо́лниласѧ є҆сѝ, є҆го́же молѝ на́съ и҆зба́вити тлѝ и҆ мꙋче́нїѧ.

Въ четверто́къ вторы́ѧ недѣ́ли по па́сцѣ.

Трипѣ́снецъ, є҆гѡ́же краегране́сїе: Пѣ́нїе і҆ѡ́сифово. Гла́съ а҃.

Пѣ́снь д҃.

І҆рмо́съ: На бжⷭ҇твеннѣй стра́жи бг҃оглаго́ливый а҆ввакꙋ́мъ да ста́нетъ съ на́ми, и҆ пока́жетъ свѣтоно́сна а҆́гг҃ла, ꙗ҆́снѡ глаго́люща: дне́сь спасе́нїе мі́рꙋ, ꙗ҆́кѡ воскре́се хрⷭ҇то́съ, ꙗ҆́кѡ всеси́ленъ.

[Ѵ] Ѡ҆ на́съ смире́нныхъ веде́нъ бы́лъ є҆сѝ на сме́рть хрⷭ҇тѐ, всѣ́хъ животѐ, и҆ плѣни́въ а҆́дова ца̑рствїѧ, дꙋ́ши ꙗ҆́кѡ <<сч҃г ѡ҆б.: 586>> ѻ҆́вцы и҆схи́тилъ є҆сѝ, съ собо́ю воскреси́въ, ꙗ҆́кѡ цр҃ь держа́вный и҆ всеси́льный.

[М] Съ ме́ртвыми что̀ жи́знь и҆́щете, ꙗ҆вле́йсѧ жена́мъ, блиста́ѧйсѧ на гро́бѣ а҆́гг҃лъ речѐ: воста̀, прїиди́те ви́дите лежа́щѧ погреба̑льнаѧ є҆ди̑на, и҆ є҆гѡ̀ ᲂу҆ченикѡ́мъ возвѣсти́ти потщи́тесѧ.

Сла́ва:

[Н] Ме́ртвъ а҆́дъ бы́въ соше́ствїемъ хрⷭ҇то́вымъ, всѣ́хъ ме́ртвыхъ ѿдаѧ́ше всѧ́кѡ плѣнѧ́емь, и҆ до конца̀ и҆спразднѧ́емо сегѡ̀ чре́во всеѧ́дное, всеси́льною во́лею бг҃а всѣ́хъ цр҃ѧ̀.

И҆ ны́нѣ, бг҃оро́диченъ:

[Ѡ] Ꙗ҆́кѡ въ краснѣ́йшїй хра́мъ, всели́сѧ въ тѧ̀ чⷭ҇таѧ дв҃о, і҆и҃съ всѣ́хъ цр҃ь: сни́тїемъ а҆́дово жили́ще мра́чное ᲂу҆празднѝ, и҆ воскре́се, совоскреси́въ человѣ́ки, ꙗ҆́кѡ всеси́ленъ.

Пѣ́снь и҃.

І҆рмо́съ: Се́й нарече́нный и҆ ст҃ы́й де́нь, є҆ди́нъ сꙋббѡ́тъ цр҃ь и҆ гдⷭ҇ь, пра́здникѡвъ пра́здникъ, и҆ торжество̀ є҆́сть торже́ствъ, во́ньже благослови́мъ хрⷭ҇та̀ въ вѣ́ки.

[Д] Сла́ва хрⷭ҇тꙋ̀ врага̀ низложи́вшемꙋ, и҆ плѣни́вшемꙋ а҆́да, є҆́же къ немꙋ̀ сни́тїемъ, и҆ ꙗ҆̀же возмо́же поглоти́ти, ѡ҆живи́вшемꙋ мє́ртвыѧ, пѣсносло́вѧщыѧ є҆го̀ во вѣ́ки.

[І] Сѐ жена́мъ мѷроно́сицамъ вопїѧ́ше, ꙗ҆вле́йсѧ а҆́гг҃лъ блиста́ѧйсѧ: мѣ́сто, въ не́мже положи́сѧ, ви́дѣвше ᲂу҆́бѡ сме́рть и҆ а҆́дъ плѣни́вшаго си́лою свое́ю, не ктомꙋ̀ въ ме́ртвыхъ жи́зни и҆щи́те.

Сла́ва:

[А] А҆́дъ ѡ҆горчи́сѧ, до́лѣ срѣ́тъ тѧ̀ сло́ве, не могі́й <<сч҃д: 587>> тебѣ̀ прибли́житисѧ, и҆ ꙗ҆̀же поглотѝ мє́ртвыѧ, ско́рѡ ѿдаѧ́ше повелѣ́нїемъ твои́мъ, пѣсносло́вѧщыѧ согла́снѡ держа́вꙋ твою̀.

И҆ ны́нѣ, бг҃оро́диченъ:

Ви́дѣла є҆сѝ и҆з̾ ме́ртвыхъ воста́вша дв҃о, є҆го́же пло́тїю неизрече́ннѡ родила̀ є҆сѝ сло́ва, и҆ ра́дости дꙋ́шꙋ и҆спо́лнила є҆сѝ, є҆гѡ̀ сни́тїе пѣсносло́вѧщи чи́стаѧ, во всѧ̀ вѣ́ки.

Пѣ́снь ѳ҃.

І҆рмо́съ: Свѣти́сѧ, свѣти́сѧ но́вый і҆ерⷭ҇ли́ме, сла́ва бо гдⷭ҇нѧ на тебѣ̀ возсїѧ̀: ликꙋ́й ны́нѣ и҆ весели́сѧ сїѡ́не. ты́ же чⷭ҇таѧ красꙋ́йсѧ бцⷣе, ѡ҆ воста́нїи ржⷭ҇тва̀ твоегѡ̀.

[Ѡ] Часѡ́въ же и҆ дне́й содѣ́тель сы́й и҆зба́вителю, въ де́нь и҆ ча́съ шесты́й, поно́снѡ хотѧ̀ претерпѣ́лъ є҆сѝ распѧ́тїе ще́дре, ꙗ҆́кѡ да на́ша ᲂу҆толи́ши поношє́нїѧ, и҆ примири́ши на́съ ѻ҆ц҃ꙋ̀.

[С] Стенѧ̀ а҆́дъ ᲂу҆срѣ́тъ тѧ̀ и҆зба́вителю, и҆ ꙗ҆̀же и҆мѣ́ѧше ю҆́зники со ско́ростїю ѿрѣшѝ, бж҃е́ственными гла́сы воспѣва́ющыѧ твою̀ сло́ве, є҆́же па́че ᲂу҆ма̀ си́лꙋ и҆ стра́шное снизхожде́нїе.

Сла́ва:

[И] Прїидо́ша съ мѵ́ромъ жєны̀, ᲂу҆́трꙋ глꙋбокꙋ̀ со тща́нїемъ, є҆́же пома́зати тѣ́ло пречи́стое, и҆ къ ни̑мъ безпло́тный речѐ: нача́льникъ живота̀ воста̀ ра́дости бж҃е́ственныѧ и҆спо́лнитисѧ.

И҆ ны́нѣ, бг҃оро́диченъ:

[Ф] Свѣ́тъ роди́вшаѧ, возсїѧ́вшїй сѣдѧ́щымъ во тмѣ̀ и҆ сѣ́ни сме́ртнѣй, ꙗ҆́кѡ ви́дѣла є҆сѝ пренепоро́чнаѧ, возсїѧ́вша и҆з̾ ме́ртвыхъ, съ жена́ми всѣ́ми мѷроно́сицами, славосло́вѧсте є҆гѡ̀ ликꙋ́юще. <<сч҃д ѡ҆б.: 588>>

Въ пѧто́къ вторы́ѧ недѣ́ли по па́сцѣ.

Трипѣ́снецъ, є҆гѡ́же краегране́сїе: Сла́ва бг҃ꙋ, а҆ми́нь. Гла́съ а҃.

Пѣ́снь є҃.

І҆рмо́съ: Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ; влⷣко чл҃вѣколю́бче хрⷭ҇тѐ бж҃е на́шъ.

[Д] Собо́ръ є҆вре́йскїй тебѐ долготерпѣли́ваго сло́ве распѧ́тъ: со́нмъ же безчи́сленный ꙗ҆зы́кѡвъ всѣ́хъ твои́мъ распѧ́тїемъ спа́слъ є҆сѝ, человѣколю́бче хрⷭ҇тѐ бж҃е на́шъ.

[О] Не поколеба́лъ є҆сѝ ка́мене зна́менїѧ, воскресе́нїемъ твои́мъ, ꙗ҆́коже ни ѿве́рзлъ є҆сѝ въ ржⷭ҇твѣ̀ твое́мъ, дѣ́вства ключе́й ро́ждшїѧ тѧ̀, хрⷭ҇тѐ бж҃е на́шъ.

Сла́ва:

[Ѯ] Стра́ннымъ ѻ҆́бразомъ ви́дѣвше, бж҃е́ственнѡ блиста́ющасѧ безпло́тнаго, жєны̀ ᲂу҆жа́сни бы́вше, слы́шахꙋ: не пла́чите, воскре́се гдⷭ҇ь.

И҆ ны́нѣ, бг҃оро́диченъ:

[А] Свѧ́та гдⷭ҇а си́лъ пречⷭ҇таѧ родила̀ є҆сѝ, и҆стощи́вшаго а҆́дова ца̑рствїѧ, и҆ воскре́сша, и҆ совоскреси́вшаго человѣ́ческое смѣше́нїе.

Пѣ́снь и҃.

І҆рмо́съ: Пѣсносло́вцы въ пещѝ спа́сшаго дѣ́ти, и҆ громопла́меннꙋю прело́жшаго на ро́сꙋ, хрⷭ҇та̀ бг҃а по́йте, и҆ превозноси́те во всѧ̀ вѣ́ки.

[Т] Во́лею распе́ншагосѧ, и҆ поло́жшагосѧ во гро́бѣ, и҆ ᲂу҆праздни́вшаго сме́рти держа́вꙋ, хрⷭ҇та̀ бг҃а по́йте, и҆ превозноси́те є҆го̀ во вѣ́ки. <<сч҃є: 589>>

[Ѡ] Ꙗ҆ви́лсѧ є҆сѝ пе́рвѣе жена́мъ воста́въ и҆з̾ гро́ба, и҆ бл҃говѣ̑стницы посла́въ и҆̀хъ а҆пⷭ҇лѡмъ хрⷭ҇тѐ: тѣ́мже тѧ̀ хвалосло́вимъ во всѧ̀ вѣ́ки.

[Ѳ] Разрꙋши́въ ще́дре крѣ́постїю сме́рти си́лꙋ, и҆ а҆́дѡва ца̑рствїѧ, ꙗ҆́кѡ сы́й цр҃ь и҆стощи́лъ є҆сѝ: тѣ́мже тѧ̀ хвалосло́вимъ во всѧ̀ вѣ́ки.

Сла́ва:

[Е] Ре́клъ є҆сѝ ᲂу҆ч҃нкѡ́мъ воста́въ, во все́мъ мі́рѣ проповѣ́дати потщи́тесѧ мою̀ си́лꙋ, и҆з̾има́юще тмꙋ̀ многобо́жїѧ свѣ́томъ и҆́стиннымъ.

И҆ ны́нѣ, бг҃оро́диченъ:

[Ѡ] Ꙗ҆́кѡ нб҃съ вы́шшаѧ, и҆ херꙋві́мѡвъ лꙋ́чшаѧ, честнѣ́йшаѧ же всест҃а́ѧ дв҃о тва́ри всеѧ̀, моли́сѧ ѡ҆ вѣ́рою при́снѡ тѧ̀ сла́вѧщихъ.

Пѣ́снь ѳ҃.

І҆рмо́съ: Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречи́стꙋю, нб҃сѐ и҆ землѝ простра́ннѣйшꙋю, бцⷣꙋ вѣ́рнїи велича́емъ.

[А] Ра́дꙋетсѧ землѧ̀ всѧ̀ дне́сь, и҆ весе́лїе ѻ҆́блацы да кропѧ́тъ: на дре́вѣ бо гдⷭ҇ь сла́вы распны́йсѧ воста̀, тлѝ сме́ртныѧ на́съ свободи́въ, и҆ нетлѣ́нїемъ просвѣти́въ, ꙗ҆́кѡ бл҃гоꙋтро́бенъ.

[М] Мѵ́ро и҆ногда̀ носѧ́щымъ со слеза́ми, свѧщє́ннымъ жена́мъ ѿвѣщава́ше а҆́гг҃лъ, блиста́ѧйсѧ свѣ́тлѡ на гро́бѣ: съ ме́ртвыми жива́гѡ почто̀ и҆́щете; се́й воскре́се, просвѣти́въ всѧ́чєскаѧ. <<сч҃є ѡ҆б.: 590>>

Сла́ва:

[И] Свѣтоза́рное бг҃а на́шегѡ воста́нїе, па́че со́лнечныхъ заре́й ѡ҆свѣща́ющее дх҃омъ вѣ̑рныѧ, во вѣ́ки всѧ̑ просвѣща́етъ, и҆ наставлѧ́етъ ко спасе́нїю: є҆́же чи́стою мы́слїю пра́зднꙋемъ.

И҆ ны́нѣ, бг҃оро́диченъ:

[Н] Оу҆мерщвле́нныхъ на́съ грѣхопаде́ньми, живо́тъ вѣ́чный роди́вшаѧ бцⷣе ѡ҆живѝ, и҆ твори́ти поспѣшѝ, къ животꙋ̀ и҆́стинномꙋ наставлѧ́ющи: ꙗ҆́кѡ да вѣ́рою тѧ̀ при́снѡ ᲂу҆блажа́емъ.

Въ сꙋббѡ́тꙋ вторы́ѧ недѣ́ли по па́сцѣ

четверопѣ́снецъ, є҆гѡ́же краегране́сїе сѐ: Пе́рвое пою̀ пѣ́нїе. Гла́съ а҃.

Пѣ́снь ѕ҃.

І҆рмо́съ: Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, спасѝ лю́ди твоѧ̀ бж҃е на́шъ: ты́ бо крѣ́пость немощствꙋ́ющихъ, и҆ и҆справле́нїе.

[П] Пригвозди́ша тѧ̀ на крⷭ҇тѣ̀ беззако́ннїи є҆вре́и долготерпѣли́ваго: и҆́хже де́рзость со́лнце зрѧ̀ и҆ лꙋна̀, а҆́бїе свѣ́тъ скры́ша, и҆ ме́ртвїи воста́вше, тѧ̀ хрⷭ҇тѐ воспѣва́хꙋ.

[Р] Да то́чатъ го́ры сла́дость дне́сь, и҆ лю́дїе да ра́дꙋютсѧ: воскре́се бо тридне́внѡ хрⷭ҇то́съ, разрѣ́шь сме́ртныѧ болѣ́зни. тѣ́мже томꙋ̀ вѣ́рнїи согла́снѡ всѝ хвалꙋ̀ принесе́мъ. <<сч҃ѕ: 591>>

Сла́ва:

[Ѡ] Ꙗ҆́кѡ ᲂу҆́треневаша хрⷭ҇тѐ, на гро́бъ тво́й жєны̀ бг҃омꙋ̑дрыѧ, ви́дѣша а҆́гг҃ла возвѣща́юща и҆̀мъ твоѐ свѣтоно́сное воскресе́нїе, и҆ возгласѝ: мѵ́ро живо́мꙋ что̀ ны́нѣ приноша́ете;

И҆ ны́нѣ, бг҃оро́диченъ:

[Т] Ложесна̀ твоѧ̑, чи́стаѧ, не вреди́въ роди́сѧ, ꙗ҆́коже бл҃говолѝ, не разрѣ́шь печа̑ти гро́ба, и҆ воскре́се ꙗ҆́коже восхотѣ̀: всѧ̑ бо блага̑ѧ твори́тъ, ꙗ҆́кѡ животода́вецъ и҆ всеси́ленъ.

Пѣ́снь з҃.

І҆рмо́съ: Тебѐ ᲂу҆́мнꙋю бцⷣе пе́щь, разсмотрѧ́емъ вѣ́рнїи: ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ во чре́вѣ твое́мъ всецѣ́лъ, хва́льный ѻ҆тцє́въ бг҃ъ, и҆ препросла́вленъ.

[О] Распны́йсѧ влⷣко со двѣма̀ разбо́йникома, и҆ ѻ҆́цта напое́нъ бы́въ, и҆ заꙋше́нїе под̾е́мъ на́съ ра́ди долготерпѣли́ве, во́лею всѧ̑ претерпѣ́лъ, и҆ воскрⷭ҇лъ є҆сѝ тридне́внѡ, прехва́льный ѻ҆ц҃є́въ бг҃ъ, и҆ препросла́вленъ.

[Н] Мертволѣ́пнѡ і҆ѡ́сифъ сне́мъ ѿ дре́ва, и҆ погребе́нїю преда́въ любе́знѡ, тѣ́ло твоѐ пречⷭ҇тое любо́вїю ѡ҆блобыза́ше, и҆ ра́дꙋѧсѧ вопїѧ́ше тѝ: прехва́льный ѻ҆тє́цъ на́шихъ бж҃е, бл҃гослове́нъ є҆сѝ.

Сла́ва:

[М] Съ ме́ртвыми жива́гѡ что̀ и҆́щете, глаго́лаше ꙗ҆вле́йсѧ а҆́гг҃лъ пла́чꙋщымсѧ жена́мъ. что̀ мѵ́ро приноша́ете; но ше́дше ᲂу҆ч҃нкѡ́мъ є҆гѡ̀ рцы́те: ᲂу҆мертви́выйсѧ воста̀ хрⷭ҇то́съ, не ктомꙋ̀ кры́йтесѧ. <<сч҃ѕ ѡ҆б.: 592>>

И҆ ны́нѣ, бг҃оро́диченъ:

[Е] Въ жена́хъ є҆ди́на бл҃года́тнаѧ, пода́телѧ бо ра́дости а҆рха́гг҃ловымъ гла́сомъ ра́достнѡ родила̀ є҆сѝ. тѣ́мже тѧ̀ чти́мъ, и҆ сн҃ꙋ твоемꙋ̀ зове́мъ: прехва́льный ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Въ пещѝ ѻ҆́троцы і҆и҃левы, ꙗ҆́коже въ горни́лѣ добро́тою бл҃гоче́стїѧ, чистѣ́е зла́та блеща́хꙋсѧ, глаго́люще: бл҃гослови́те всѧ̀ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̀ вѣ́ки.

[Л] Лю́дїе тѧ̀ пре́жде непокори́вїи є҆вре́и є҆́млютъ, и҆ за́вистїю возно́сѧтъ на крⷭ҇тъ неи́стовнѡ, не хотѧ́ще пѣ́ти тебѣ̀: бл҃гослови́те всѧ̀ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.

[П] Ѡ҆блобыза́ше любо́вїю і҆ѡ́сифъ, тѣ́ло и҆спроси́въ, и҆ во гро́бѣ полага́етъ ꙗ҆́кѡ ме́ртвое: то́йже сокрꙋши́лъ є҆́сть сме́рти всѧ̀ ключѝ, верєи́ же и҆ врата̀, и҆ тридне́внѡ воскрⷭ҇лъ є҆́сть.

Сла́ва:

[Ѡ] Ꙗ҆́кѡ сы́й мѵ́ро мы́сленное, ѕѣлѡ̀ ра́нѡ прїи́де пома́зати тѣ́ло твоѐ же́нскїй ли́къ, и҆ ѡ҆брѣто́ша а҆́гг҃ла вопїю́ща къ ни́мъ: всѧ̀ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.

И҆ ны́нѣ, бг҃оро́диченъ:

[М] Непрело́жна родила̀ є҆сѝ сн҃а бж҃е́ственнагѡ сꙋщества̀, мр҃і́е бл҃гослове́ннаѧ, а҆́ще и҆ ꙗ҆ви́сѧ на́съ ра́ди пло́тїю, ꙗ҆́коже бл҃гоизво́ли, є҆мꙋ́же вопїе́мъ: всѧ̀ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки. <<сч҃з: 593>>

Пѣ́снь ѳ҃.

І҆рмо́съ: Ѡ҆́бразъ чи́стагѡ ржⷭ҇тва̀ твоегѡ̀, ѻ҆гнепали́маѧ кꙋпина̀ показа̀ неѡпа́льнаѧ, и҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь, да тѧ̀ бцⷣе непреста́ннѡ велича́емъ.

[Е] Ста́лъ є҆сѝ влⷣко на дре́вѣ крⷭ҇тнѣмъ, и҆ всѧ̑ ꙗ҆зы́ки къ ра́зꙋмꙋ привле́клъ є҆сѝ гдⷭ҇и, и҆ ра́й ѿве́рзлъ є҆сѝ, є҆го́же затвори́ша пре́жде пра́ѻц҃ы вкꙋше́нїемъ дре́ва: тѣ́мже тѧ̀ всѝ велича́емъ.

[Л] Въ ро́вѣ ꙗ҆́кѡ сме́ртна положи́ша тѧ̀, жи́зни пода́телѧ и҆ строи́телѧ, и҆ грѡ́бнаѧ хрⷭ҇тѐ всѧ̑ бл҃гоѻбра́зный і҆ѡ́сифъ и҆ нїкоди́мъ, и҆ же́нскїй собо́ръ съ ни́ми ѡ҆прѧ́тавъ, жа́лостнѡ рыда́юще, бг҃олѣ́пнѡ тѧ̀ велича́хꙋ.

Сла́ва:

[О] Ве́сь просвѣще́нїе и҆ жела́нїе, ве́сь сп҃се мо́й ᲂу҆тѣше́нїе и҆ ᲂу҆твержде́нїе всѣ̑мъ бы́лъ є҆сѝ, бл҃гоче́стнѡ пра́зднꙋющымъ ст҃о́е и҆ тридне́вное воста́нїе твоѐ, є҆ди́не ще́дре: є҆гѡ́же ра́ди тѧ̀ всѝ велича́емъ.

И҆ ны́нѣ, бг҃оро́диченъ:

[С] Пло́ть ѿ твои́хъ всенепоро́чнаѧ ложе́снъ, во́лею воспрїѧ́тъ всесоверше́нный, разꙋ́мнꙋю пои́стиннѣ и҆ ѡ҆дꙋшевле́ннꙋю, и҆ посажда́етсѧ ѻ҆те́ческимъ наслѣ́дїемъ пречⷭ҇таѧ въ нбⷭ҇ныхъ, ѿѻнꙋ́дꙋже и҆ па́ки прїи́детъ. <<сч҃з ѡ҆б.: 594>>

Въ понедѣ́льникъ тре́тїѧ недѣ́ли по па́сцѣ

трипѣ́снецъ, є҆гѡ́же краегране́сїе: Пое́тъ сїѧ̑ і҆ѡ́сифъ. Гла́съ в҃.

Пѣ́снь а҃.

І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

[А] Повѣ́шенъ на крⷭ҇тѣ̀ во́лею хрⷭ҇тѐ, твє́рдаѧ ца̑рствїѧ а҆́дѡва разрꙋши́лъ є҆сѝ, и҆ вѣ́чныѧ ᲂу҆́зники и҆зве́лъ є҆сѝ мꙋ́жествомъ: сла́ва держа́вѣ твое́й.

[Д] Прїиди́те, речѐ мѷроно́сицамъ а҆́гг҃лъ, ви́дѣвше мѣ́сто, и҆дѣ́же лежа́ше всѣ́хъ гдⷭ҇ь, сегѡ̀ воскр҃се́нїе дрꙋгѡ́мъ є҆гѡ̀ проповѣ́дите.

Сла́ва:

[Е] Въ но́вомъ дре́вле гро́бѣ тебѐ положѝ і҆ѡ́сифъ пра́ведный, новосодѣ́лавшаго человѣ́ческое и҆стлѣ́вшее є҆стество̀, животода́вче воскрⷭ҇нїемъ твои́мъ.

И҆ ны́нѣ, бг҃оро́диченъ:

[І] Ви́дѣла є҆сѝ бг҃обл҃года́тнаѧ, хрⷭ҇та̀ и҆з̾ ме́ртвыхъ возсїѧ́вша, пра́вды сл҃нце: є҆го́же молѝ, всѣ́хъ просвѣти́ти сердца̀ воспѣва́ющихъ тѧ̀.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆вре́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̀ вѣ́ки.

[Т] Воздви́женаго на крⷭ҇тъ, и҆ погребе́наго пло́тїю хотѣ́нїемъ, и҆ сокрꙋши́вшаго врата̀ желѣ̑знаѧ, и҆ верєѝ а҆́дѡвы, просла́вимъ гдⷭ҇а воста́вшаго тридне́внѡ во сла́вѣ. <<сч҃и: 595>>

[А] Да ра́дꙋетсѧ нб҃о, да весели́тсѧ и҆ землѧ̀ съ человѣ́ки, хрⷭ҇то́съ воскре́се, и҆ свои̑мъ ᲂу҆ченикѡ́мъ ꙗ҆ви́сѧ, и҆̀мже соводворѧ́ѧсѧ, си́хъ весе́лїѧ и҆спо́лни сердца̀.

[Д] Слезѧ́щымъ жена́мъ ра́дость провозглаша́етъ жизнода́вецъ, прикоснꙋ́вшымсѧ є҆гѡ̀ сщ҃е́ннымъ нога́мъ, и҆́хже шꙋ́ма дре́вле ᲂу҆боѧ́сѧ прамт҃и є҆́ѵа внꙋ́трь раѧ̀.

Сла́ва:

[Е] Є҆ди́наго бг҃а славосло́вимъ ѵ҆поста́сьми тремѝ, є҆ди́нѣмъ же є҆стество́мъ, ѻ҆ц҃а̀, и҆ сло́ва, и҆ дх҃а бж҃е́ственна, пра́ва, зовꙋ́ще: по́йте гдⷭ҇а, и҆ превозноси́те є҆го̀ во вѣ́ки.

И҆ ны́нѣ, бг҃оро́диченъ:

[І] Сщ҃е́нными гла́сы мт҃рь бж҃їю пѣсносло́вимъ, ꙗ҆́кѡ вы́шнихъ чинѡ́въ ст҃ѣ́йшꙋю ꙗ҆́вѣ, и҆ бж҃е́ственный мо́стъ преводѧ́й къ премі́рнымъ ликостоѧ́нїємъ человѣ́ки.

Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ: ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.

[Ѡ] Ѽ є҆вре́йскагѡ неи́стовства! ка́кѡ на дре́вѣ без̾ пра́вды ѡ҆сꙋжда́ютъ ᲂу҆мре́ти хрⷭ҇та̀, пра́ведна є҆ди́наго сꙋ́ща, и҆ мє́ртвымъ и҆̀же во а҆́дѣ, вдыха́юща жи́знь бг҃онача́льнѡ; є҆гѡ́же бж҃е́ственное воскресе́нїе согла́снѡ воспои́мъ.

[С] Печа́темъ надлежа́щымъ, воскре́слъ є҆сѝ ѿ гро́ба всѣ́хъ воскресе́нїе хрⷭ҇тѐ, и҆ ᲂу҆ченикѡ́мъ ꙗ҆ви́лсѧ є҆сѝ недовѣ́дѡмымъ си́хъ ᲂу҆чѧ̀, и҆ и҆ди́те, вопїѧ̀, въ мі́ръ проповѣ́дающе сла́вꙋ мою̀. <<сч҃и ѡ҆б.: 596>>

Сла́ва:

[Н] Воста́нїѧ се́й всест҃ы́й де́нь, ᲂу҆тѣше́нїе сы́й дꙋ́шъ, и҆ весе́лїе ра́достное, вѣ́рныхъ созыва́етъ бж҃е́ственнѡ пра́здновати и҆ вопи́ти: ѻ҆́ч҃е и҆ сн҃е и҆ бж҃е́ственный дш҃е, сла́ва тебѣ̀.

И҆ ны́нѣ, бг҃оро́диченъ:

[Ф] Свѣтороди́тельнице дв҃о, свѣ́томъ си́мъ бжⷭ҇твеннымъ ѡ҆зарѝ на́шѧ мы̑сли и҆ сердца̀, моли́твами твои́ми страсте́й мглꙋ̀ разсыпа́ющи, и҆ всѣ́хъ ѻ҆́бщники невече́рнѧгѡ днѐ содѣва́ющи благода́тїю.

Во вто́рникъ тре́тїѧ недѣ́ли по па́сцѣ,

трипѣ́снецъ, є҆гѡ́же краегране́сїе: Хрⷭ҇тѐ спаси́ мѧ. Гла́съ в҃.

Пѣ́снь в҃.

І҆рмо́съ: Внемли́те лю́дїе моѝ зако́нꙋ моемꙋ̀, приклони́те ᲂу҆́хо ва́ше во глаго́лы ᲂу҆́стъ мои́хъ: ꙗ҆́кѡ и҆́мѧ твоѐ гдⷭ҇и, призва́хъ.

[Х] Рꙋка́ма твои́ма сотвори́вый человѣ́ка, рꙋ́цѣ пригвозди́лъ є҆сѝ всеси́льне на дре́вѣ, вра́жїѧ рꙋкѝ на́съ и҆збавлѧ́ѧ.

[Р] Разори́въ хрⷭ҇тѐ а҆́довꙋ несвѣ́тлꙋю темни́цꙋ, и҆ ꙗ҆̀же стѧжа̀ ю҆́зники взѧ́лъ є҆сѝ, и҆ са́мъ себѐ ꙗ҆́кѡ си́ленъ воскреси́лъ є҆сѝ.

[І] Ви́дѣвше тѧ̀ хрⷭ҇тѐ а҆пⷭ҇ли, поклони́шасѧ тебѣ̀, и҆з̾ гро́ба тридне́внѡ воста́вшемꙋ, и҆ всю́дꙋ твоѐ воста́нїе проповѣ́даша. <<сч҃ѳ: 597>>

Сла́ва:

[С] Стенѧ́ще и҆ сле́зы пролива́юще, гро́бъ ст҃ы́й достиго́ша бж҃е́ственныѧ жєны̀, и҆ ᲂу҆чи́ми быва́хꙋ хрⷭ҇то́вымъ воскресе́нїемъ.

И҆ ны́нѣ, бг҃оро́диченъ:

[Т] Всѣ́хъ содержи́телѧ прїѧ́ла є҆сѝ всенепоро́чнаѧ влⷣчце, сте́ршаго а҆́дова врата̀, и҆ воскре́сшаго, ꙗ҆́коже речѐ, тридне́внѡ.

Пѣ́снь и҃.

І҆рмо́съ: Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀ проѡбрази́вшаго и҆ногда̀, по́йте, бл҃гослови́те и҆ превозноси́те во всѧ̀ вѣ́ки.

[Е] На крⷭ҇тъ возне́ссѧ совозне́слъ є҆сѝ мі́ръ, и҆ положи́всѧ сп҃се во гро́бѣ, во гробѣ́хъ спѧ́щыѧ возставлѧ́еши, твою̀ славосло́вѧщыѧ вели́кꙋю си́лꙋ.

[С] Ты̀ сше́дъ въ ме́ртвыхъ, ᲂу҆мертви́лъ є҆сѝ а҆́дъ, и҆ сокрꙋши́лъ є҆сѝ врата̀ сме́рти и҆ верєѝ, и҆ ѡ҆кова̑нныѧ возве́лъ є҆сѝ мꙋ́жествомъ, всѣ̑мъ во спасе́нїе.

Сла́ва:

[Ѡ] Ꙗ҆ви́лсѧ є҆сѝ ще́дре, твои̑мъ ᲂу҆ченикѡ́мъ во мно́зѣхъ зна́менїихъ, де́ньми четы́редесѧтьми: тѣ́ми ᲂу҆вѣрѧ́емь и҆ проповѣ́дꙋемь въ ве́сь мі́ръ, бг҃ъ воста́вый.

И҆ ны́нѣ, бг҃оро́диченъ:

[С] Ты̀ є҆сѝ всѣ́хъ жи́знь, ты̀ ме́ртвыхъ же и҆ живы́хъ ᲂу҆тѣше́нїе сло́ве, и҆ ра́дость и҆ просвѣще́нїе, возсїѧ́вый и҆з̾ дв҃ы, и҆ воскресы́й и҆з̾ гро́ба тридне́внѡ во сла́вѣ.

Пѣ́снь ѳ҃.

І҆рмо́съ: Ѿ земноро́дныхъ кто̀ слы́ша таково́е; и҆лѝ кто̀ ви́дѣ когда̀, ꙗ҆́кѡ дв҃а ѡ҆брѣ́тесѧ во чре́вѣ и҆мꙋ́щаѧ, <<сч҃ѳ ѡ҆б.: 598>> и҆ безболѣ́зненнѡ млⷣнца поро́ждшаѧ; таково́е твоѐ чꙋ́до, и҆ тѧ̀ чи́стаѧ бцⷣе велича́емъ.

[О] Распны́йсѧ тридне́внѡ воскре́слъ є҆сѝ, ꙗ҆́коже пре́жде ре́клъ є҆сѝ, и҆з̾ ме́ртвыхъ же воста́въ, совоскреси́въ мі́ръ воскресе́нїемъ твои́мъ, и҆ жена́мъ мѷроно́сицамъ пе́рвѣе ꙗ҆ви́лсѧ є҆сѝ, и҆ провѣща́въ, є҆́же ра́доватисѧ, всѣ́хъ ра́досте, ѿ дꙋшѝ тебѐ лю́бѧщымъ многоми́лостиве.

[Н] Ны́нѣ тлѧ̀ потреби́сѧ, хрⷭ҇то́съ бо нетлѣ́нїе и҆ жи́знь и҆з̾ ме́ртвыхъ воста́въ, и҆ соводворѧ́етсѧ свои̑мъ а҆по́столѡмъ, ᲂу҆чѧ̀ си́хъ лꙋ́чшымъ и҆ бж҃е́ствєннымъ, и҆ приглаша́ѧ ѿ і҆ерꙋсали́ма не ѿлꙋча́тисѧ.

Сла́ва:

[М] Мѵ́ро и҆ногда̀ со слеза́ми прине́сшымъ а҆́гг҃лъ речѐ жена́мъ: съ ме́ртвыми что̀ и҆́щете жива́гѡ дне́сь; ꙗ҆́коже пре́жде речѐ, воста̀: нѣ́сть здѣ̀, и҆стощи́вый гро́бы, и҆ мє́ртвымъ безсме́ртїе вдохнꙋ́вый, ꙗ҆́кѡ чл҃вѣколю́бецъ.

И҆ ны́нѣ, бг҃оро́диченъ:

[Е] И҆з̾ ме́ртвыхъ ви́дѣвши бцⷣе, твоего̀ сн҃а и҆ бг҃а воста́вша, и҆спо́лниласѧ є҆сѝ ра́дости, сꙋ́щаѧ всѣ́хъ ра́дости же и҆ весе́лїѧ вина̀. тѣ́мже тѧ̀ ра́достнѡ всѧ́каѧ дꙋша̀ восхвалѧ́етъ и҆ сла́витъ приснодв҃о.

Въ сре́дꙋ тре́тїѧ недѣ́ли по па́сцѣ.

Трипѣ́снецъ, є҆гѡ́же краегране́сїе: Воста̀ сп҃съ. Гла́съ в҃.

Пѣ́снь г҃.

І҆рмо́съ: Процвѣла̀ є҆́сть пꙋсты́нѧ ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце. <<т҃: 599>>

[Н] Тва́рь ви́дѣвши тѧ̀ на крⷭ҇тѣ̀, стра́ждꙋща во́лею гдⷭ҇и, и҆змѣни́сѧ и҆ смꙋща́шесѧ, и҆ ме́ртвїи ѿ гробѡ́въ воста́хꙋ.

[Г] Бы́вшꙋ тѝ во а҆́дѣ животода́вче гдⷭ҇и съ дꙋше́ю, ꙗ҆́кѡ ви́дѣ всепа́гꙋбнаѧ сме́рть ᲂу҆жасе́сѧ, ѿрѣша́ющи ю҆́зники, ꙗ҆̀же поже́рла.

Сла́ва:

[Е] И҆спо́лнисѧ тва́рь всѧ̀ ра́дости, ще́дрый гдⷭ҇и, и҆з̾ ме́ртвыхъ воста́нїемъ твои̑мъ, ꙗ҆́кѡ мі́ръ ве́сь совозста́вилъ є҆сѝ, низло́жь сме́ртное ца́рство.

И҆ ны́нѣ: бг҃оро́диченъ:

[Р] Ѻ҆рꙋ́жїе дꙋ́шꙋ твою̀ про́йде чи́стаѧ всенепоро́чнаѧ, є҆гда̀ хрⷭ҇та̀ распина́ема ви́дѣла є҆сѝ: возра́довала же сѧ є҆сѝ, воста́вша и҆з̾ гро́ба сего̀ ᲂу҆зрѣ́вши.

Пѣ́снь и҃.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ́йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те всѧ̀ дѣла̀ гдⷭ҇нѧ гдⷭ҇а.

[Ѳ] Оу҆мира́еши на крⷭ҇тѣ̀, живо́тъ сы́й всѣ́хъ, и҆ ꙗ҆́кѡ ме́ртвъ бездыха́ненъ во гро́бѣ положи́лсѧ є҆сѝ долготерпѣли́ве, и҆ тридне́венъ воста́лъ є҆сѝ на воста́нїе мі́рꙋ. тѣ́мже тѧ̀ животода́вче весе́лїемъ сла́вимъ.

[И] Оу҆слы́ша сїѡ́нъ воста́нїе гдⷭ҇не, и҆ весе́лїѧ ны́нѣ и҆спо́лнисѧ, дщє́ри же сегѡ̀ проѧвле́ннѡ возра́довашасѧ, и҆ ᲂу҆ченикѡ́мъ проповѣ́дахꙋ глаго́люще: не скорби́те, животода́вецъ воста́лъ є҆́сть.

Сла́ва:

[О] Оу҆́трꙋ бы́вшꙋ, со тща́нїемъ жєны̀ на гро́бъ прїидо́ша, <<т҃ ѡ҆б.: 600>> и҆ тре́петомъ прини́кше, въ бѣ́лыхъ ѻ҆де́ждахъ а҆́гг҃лы ви́дѣвше, и҆ стра́хомъ ѡ҆держи́мы, слы́шахꙋ: не бо́йтесѧ, жизнода́вецъ воста́лъ є҆́сть.

И҆ ны́нѣ, бг҃оро́диченъ:

[С] Тѧ̀ свѣ́тлый ѻ҆́блакъ со́лнца ᲂу҆́мнагѡ, бг҃ора́дованнаѧ, пою́ще сла́вимъ: сердца̀ на̑ша просвѣтѝ, тмꙋ̀ ѿгонѧ́ющи всю̀ ᲂу҆ны́нїѧ и҆ страсте́й, бг҃оневѣ́сто.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти. собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ.

[Ѡ] Ꙗ҆́кѡ ви́дѣ тѧ̀ со́лнце, пра́веднаго сл҃нца на крⷭ҇тѣ̀ просте́рта, свѣ́тъ скрыва́ше, ка́менїе распада́шесѧ, а҆́дъ мє́ртвыѧ ско́рѡ ѿдава́ше, пою́щыѧ держа́вꙋ твою̀ животода́вче всеси́льне.

[Т] А҆́довꙋ несы́тꙋю ᲂу҆тро́бꙋ, пребж҃е́ственный пресла́внѡ и҆стощи́въ ꙗ҆́кѡ всеси́ленъ, а҆́бїе воскре́съ во сла́вѣ, и҆ ᲂу҆ченикѝ бж҃е́ственными ви́дѣнъ бы́сть. томꙋ̀ поклони́мсѧ со ѻ҆ц҃е́мъ же и҆ дх҃омъ.

Сла́ва:

[И] Воста̀ гдⷭ҇ь, мѷроно́сицамъ глаго́лаше, ꙗ҆вле́йсѧ во гро́бѣ ст҃ы́й а҆́гг҃лъ: и҆ди́те, и҆ рцы́те сегѡ̀ ᲂу҆ченикѡ́мъ, въ галїле́и пла́чꙋщымъ и҆ рыда́ющымъ, ꙗ҆́кѡ да сего̀ та́мѡ ᲂу҆́зрѧтъ.

И҆ ны́нѣ, бг҃оро́диченъ:

[Р] И҆зба́витисѧ всенепоро́чнаѧ, ѿ напа́стей и҆ скорбе́й, и҆ страсте́й бꙋ́ри и҆ ѡ҆мраче́нїѧ, и҆ многоплете́нныхъ сѣте́й лꙋка́вагѡ, молѝ непреста́ннѡ хрⷭ҇та̀ бг҃а на́шего, при́снѡ блажа́щымъ тѧ̀. <<т҃а: 601>>

Въ четверто́къ г҃-ѧ недѣ́ли по па́сцѣ.

Трипѣ́снецъ, є҆гѡ́же краегране́сїе: Пѣ́снь пою̀ бг҃ꙋ. Гла́съ в҃.

Пѣ́снь д҃.

І҆рмо́съ: Пою́ тѧ, слꙋ́хомъ бо гдⷭ҇и, ᲂу҆слы́шахъ и҆ ᲂу҆жасо́хсѧ: до мене́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю многоми́лостиве.

[А] Возше́лъ є҆сѝ на крⷭ҇тъ во́лею, гдⷭ҇и, си́лою препоѧ́санъ, и҆ соше́дъ бл҃гоꙋтро́бне съ дꙋше́ю во а҆́дъ, дꙋ́шы вѣ́чныхъ ᲂу҆́зъ разрѣши́лъ є҆сѝ, и҆ съ собо́ю ще́дре совоскреси́лъ є҆сѝ.

[С] Сокрꙋши́въ стра́шнѡ верєѝ и҆ врата̀ а҆́дѡва, крѣ́постїю твое́ю влⷣко, и҆стощи́лъ є҆сѝ є҆гѡ̀ бога́тство: тѣ́мже мно́гое твоѐ снизхожде́нїе, и҆ честно́е воскресе́нїе сла́вимъ.

Сла́ва:

[М] Пома́зати пречи́стое тѣ́ло твоѐ, на гро́бъ прїидо́ша жєны̀, ѡ҆брѣ́тшѧ же а҆́гг҃ла на ка́мени сѣдѧ́ща хрⷭ҇тѐ, боѧ́щѧсѧ ᲂу҆диви́шасѧ: съ ни́ми же пѣсносло́вимъ твоѐ воста́нїе.

И҆ ны́нѣ, бг҃оро́диченъ:

[А] Ст҃ы́хъ ст҃а́го па́че ᲂу҆ма̀ родила̀ є҆сѝ бцⷣе, ѡ҆свѧще́нїе, и҆збавле́нїе, и҆ ѡ҆ставле́нїе грѣхѡ́въ вѣ̑рнымъ подаю́ща, хода́тайствомъ твои́мъ, є҆гѡ̀ сла́вѧщымъ воскресе́нїе.

Пѣ́снь и҃.

І҆рмо́съ: Велѣ́нїю мꙋчи́телевꙋ преподо́бнїи трїѐ ѻ҆́троцы не повинꙋ́вшесѧ, въ пе́щь вве́ржени, бг҃а и҆сповѣ́дахꙋ пою́ще: бл҃гослови́те дѣла̀ гдⷭ҇нѧ гдⷭ҇а. <<т҃а ѡ҆б.: 602>>

[А] Возвы́силъ є҆сѝ є҆стество̀ человѣ́ческое хрⷭ҇тѐ, на крⷭ҇тѣ̀ твои́мъ возвыше́нїемъ, и҆ съ высоты̀ па́дшаго врага̀ въ про́пасть низве́рглъ є҆сѝ, и҆ погребе́нъ воста́лъ є҆сѝ, плѣни́въ сме́рть.

[С] Сокрꙋши́лъ є҆сѝ а҆́дѡвы верєѝ хрⷭ҇тѐ, и҆ ѡ҆кова̑нныѧ ᲂу҆́зники въ мꙋ́жествѣ и҆зве́лъ є҆сѝ, твою̀ сла́вѧщыѧ си́лꙋ, и҆ є҆́же и҆з̾ гро́ба тридне́вное воста́нїе.

Сла́ва:

[Ѡ] Ꙗ҆́кѡ ви́дѣ тѧ̀ дре́вле ли́къ ст҃ы́хъ а҆пⷭ҇лъ, и҆з̾ гро́ба воста́вша во сла́вѣ хрⷭ҇тѐ, весе́лїѧ и҆спо́лненъ бы́въ вопїѧ́ше: сла́ва воста́нїю твоемꙋ̀.

И҆ ны́нѣ, бг҃оро́диченъ:

[Т] Пла́чь тво́й пречи́стаѧ ст҃а́ѧ, преложи́сѧ на ра́дость, внегда̀ ви́дѣла є҆сѝ твоего̀ сн҃а и҆ влⷣкꙋ хрⷭ҇та̀, и҆з̾ ме́ртвыхъ тридне́внѡ воскре́сша во сла́вѣ, и҆ мі́ръ просвѣти́вша.

Пѣ́снь ѳ҃.

І҆рмо́съ: Ꙗ҆́же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго, и҆з̾ бокꙋ̀ дѣви́чꙋ неизрече́ннѡ воплоти́вшаѧ, благослове́ннаѧ всечи́стаѧ, тѧ̀ бцⷣе велича́емъ.

[Ѡ] Ꙗ҆ви́лсѧ є҆сѝ посредѣ̀ двою̀ разбѡ́йникꙋ ра́спѧтъ, многоми́лостиве, и҆ положе́нъ въ ро́вѣ преиспо́днѣмъ, и҆ ꙗ҆̀же во тмѣ̀ и҆ сѣ́ни сме́ртнѣй воскреси́лъ є҆сѝ, пѣсносло́вѧщыѧ бл҃гоꙋтро́бне, твоѐ тридне́вное воскресе́нїе.

[Ѳ] Сме́рть не ктомꙋ̀ человѣ́ки ѡ҆блада́етъ, ꙗ҆́коже є҆́сть пи́сано, ѿне́лѣже хрⷭ҇то́съ воскре́се безсме́ртный, а҆́дѡва и҆стощи́въ несы̑таѧ ца̑рствїѧ: да ра́дꙋетсѧ всѧ̀ вселе́ннаѧ пра́зднꙋющи. <<т҃в: 603>>

Сла́ва:

[Е] Речѐ мѷроно́сицамъ а҆́гг҃лъ, блиста́ѧйсѧ пред̾ гро́бомъ: въ ме́ртвыхъ свобо́днаго что̀ пла́чꙋще и҆́щете; ꙗ҆́коже пре́жде речѐ, ᲂу҆жѐ воста̀: и҆ди́те ѿсю́дꙋ ра́дꙋющесѧ.

И҆ ны́нѣ, бг҃оро́диченъ:

[Ѡ] Ꙗ҆ви́ласѧ є҆сѝ простра́ннѣе дв҃о небе́съ, бг҃а вмѣсти́вши, под̾ земле́ю положе́наго бл҃гости ра́ди, и҆ сме́ртїю безсме́ртїе всѣ̑мъ дарова́вша: є҆го́же благоче́стнѡ сла́вѧще, тебѐ по до́лгꙋ ᲂу҆блажа́емъ.

Въ пѧто́къ тре́тїѧ недѣ́ли по па́сцѣ.

Трипѣ́снецъ, є҆гѡ́же краегране́сїе: Сла́ва бг҃ꙋ, а҆ми́нь. Творе́нїе і҆ѡ́сифово. Гла́съ в҃.

Пѣ́снь є҃.

І҆рмо́съ: Просвѣще́нїе во тмѣ̀ лежа́щихъ, спасе́нїе ѿча́ѧнныхъ хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.

[Д] Собо́ръ и҆ногда̀ беззако́ннꙋющихъ є҆врє́й, тебѐ человѣколю́бче, на дре́во возвы́сивъ, ᲂу҆мертвѝ: но во гро́бѣ положе́нъ, а҆́дѡвы ᲂу҆́зы всѧ̑ разрꙋши́лъ є҆сѝ, и҆ ꙗ҆̀же ѿ вѣ́ка мє́ртвыѧ воскреси́лъ є҆сѝ.

[О] Є҆гда̀ тлѣ́нїѧ вкꙋси́лъ є҆сѝ, всѣ́хъ безсме́ртїе, тогда̀ мꙋ́жески свѧ̑занныѧ всѧ̀ и҆зве́лъ є҆сѝ, и҆ воскреси́лъ є҆сѝ ѿ гро́ба животода́вче, разори́въ сме́рть, и҆ просвѣти́въ на́съ воста́нїемъ твои́мъ. <<т҃в ѡ҆б.: 604>>

Сла́ва:

[Ѯ] Стра́нною ѻ҆де́ждою блиста́ющасѧ дре́вле, на гро́бѣ ви́дѣвшѧ а҆́гг҃ла жєны̀ чꙋдѧ́хꙋсѧ, ѻ҆́нъ же къ ни̑мъ вопїѧ́ше: не бо́йтесѧ, хрⷭ҇то́съ воскре́се: и҆ди́те, дрꙋгѡ́мъ є҆гѡ̀ возвѣсти́те.

И҆ ны́нѣ, бг҃оро́диченъ:

[А] Восто́къ со́лнца пра́веднагѡ показа́ласѧ є҆сѝ мт҃и дв҃о: є҆го́же ви́дѣвши воскре́сша и҆з̾ ме́ртвыхъ, ꙗ҆́коже речѐ, и҆ мі́ръ ве́сь просвѣ́щша, ра́доваласѧ є҆сѝ пою́щи чи́стаѧ ꙗ҆́кѡ человѣколю́бца.

Пѣ́снь и҃.

І҆рмо́съ: Ѡ҆ подо́бїи зла́тѣ небре́гше треблаже́ннїи ю҆́ношы, неизмѣ́нный и҆ живы́й бж҃їй ѻ҆́бразъ ви́дѣвше, средѝ ѻ҆гнѧ̀ воспѣва́хꙋ: ѡ҆сꙋществова́ннаѧ да пое́тъ гдⷭ҇а всѧ̀ тва́рь, и҆ превозно́ситъ во всѧ̀ вѣ́ки.

[Ѳ] Бг҃ъ сы́й бл҃же, сподо́билсѧ є҆сѝ человѣ́къ бы́ти, и҆ распѧ́тисѧ на дре́вѣ во́лею, на спасе́нїе вѣ́рою вопїю́щымъ всегда̀: ѡ҆сꙋществова́ннаѧ да пое́тъ гдⷭ҇а всѧ̀ тва́рь, и҆ превозно́ситъ во всѧ̀ вѣ́ки.

[Е] Въ ро́вѣ преиспо́днѣмъ положи́ тѧ і҆ѡ́сифъ, пови́въ понѧ́вами же и҆ смѵ́рною и҆ а҆ло́емъ, но воскре́слъ є҆сѝ спаса́ѧ вѣ́рнѡ зовꙋ́щыѧ: ѡ҆сꙋществова́ннаѧ да пое́тъ гдⷭ҇а всѧ̀ тва́рь, и҆ превозно́ситъ во всѧ̀ вѣ́ки.

Сла́ва:

[Ѡ] Ꙗ҆ви́лсѧ є҆сѝ ᲂу҆ченикѡ́мъ всеси́льне воскре́съ, и҆ тѣ̑мъ ре́къ: и҆ди́те въ мі́ръ, проповѣ́дите моѐ смотре́нїе, пою́ще: ѡ҆сꙋществова́ннаѧ да пое́тъ гдⷭ҇а всѧ̀ тва́рь, и҆ превозно́ситъ во всѧ̀ вѣ́ки. <<т҃г: 605>>

И҆ ны́нѣ, бг҃оро́диченъ:

[А] Ѡ҆ст҃ѝ на̑ша сердца̀, всест҃а́ѧ дв҃о бг҃оневѣ́сто, ви́дѣвшыѧ всест҃а́го бг҃а сло́ва воста́вша, и҆ въ весе́лїи зовꙋ́щыѧ: ѡ҆сꙋществова́ннаѧ да пое́тъ гдⷭ҇а всѧ̀ тва́рь, и҆ превозно́ситъ во всѧ̀ вѣ́ки.

Пѣ́снь ѳ҃.

І҆рмо́съ: Недоꙋмѣ́етъ всѧ́къ ѧ҆зы́къ благохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀ бцⷣе: ѻ҆ба́че бл҃га́ѧ сꙋ́щи, вѣ́рꙋ прїимѝ, и҆́бо любо́вь вѣ́си бж҃е́ственнꙋю на́шꙋ. ты́ бо хрⷭ҇тїа́нъ є҆сѝ предста́тельница, тѧ̀ велича́емъ.

[М] То́чїю водрꙋзи́сѧ сп҃се крⷭ҇тъ тво́й на ло́бномъ, сме́ртное всѐ жили́ще и҆з̾ глꙋбины̀ поколеба́сѧ, и҆ въ сѣ́ни сѣдѧ́щїи сме́ртнѣй, ᲂу҆́зъ нерѣши́мыхъ вои́стиннꙋ разрѣши́шасѧ всѝ, сла́ва, вопїю́ще, держа́вѣ си́лы твоеѧ̀.

[И] Землѧ̀ потрѧсе́сѧ, ка́менїе распаде́сѧ стра́хомъ, го́ры и҆ хо́лми всѝ поколеба́шасѧ, и҆ со́лнце поме́рче, ви́дѣвшее тѧ̀ на крⷭ҇тѣ̀ повѣ́шена, верєѝ а҆́дѡвы и҆ врата̀ желѣ̑знаѧ сотро́шасѧ хрⷭ҇тѐ, є҆гда̀ и҆з̾ ме́ртвыхъ твои́мъ воста́нїемъ мі́ръ совоздви́глъ є҆сѝ.

Сла́ва:

[Н] Ме́ртва тѧ̀ влⷣко ви́дѣвъ дре́вле на крⷭ҇тѣ̀, благоѻбра́зный а҆рїмаѳе́й снѧ́тъ ѿ дре́ва, и҆ понѧ́вицею тогда̀ чи́стою пови́тъ, и҆ во гро́бѣ но́вѣ мно́гимъ стра́хомъ положѝ со тща́нїемъ: ты́ же ꙗ҆́коже проре́клъ, воста́лъ є҆сѝ сло́ве, тридне́внѡ.

И҆ ны́нѣ, бг҃оро́диченъ:

Зако́нныхъ кромѣ̀ влⷣчце всенепоро́чнаѧ, родила̀ є҆сѝ <<т҃г ѡ҆б.: 606>> неизрече́ннѡ сло́ва, є҆го́же ѿ беззако́нныхъ совѣ́томъ распѧ́та, и҆ положе́на во гро́бѣ, и҆ воста́вша и҆з̾ ме́ртвыхъ ꙗ҆́кѡ ви́дѣвши, и҆спо́лниласѧ є҆сѝ ра́дости: сего̀ молѝ ѡ҆ на́съ воспѣва́ющихъ тѧ̀.

Въ сꙋббѡ́тꙋ тре́тїѧ недѣ́ли по па́сцѣ.

Четверопѣ́снецъ. Гла́съ в҃.

Пѣ́снь ѕ҃.

І҆рмо́съ: И҆з̾ глꙋбины̀ возведѝ мѧ, і҆ѡ́на къ тебѣ̀ возопѝ: ѻ҆́бразъ погребе́нїѧ и҆ воскрⷭ҇нїѧ сы́й, є҆́же на́мъ дарова́лъ є҆сѝ всеси́льне сп҃се.

Мѷронѡ́сицы гро́ба твоегѡ̀ дости́гшѧ слезѧ́хꙋ, но а҆́гг҃лъ тѣ̑мъ ра́дость возвѣща́ше, взыва́ѧ: хрⷭ҇то́съ воскре́се, мі́рови проповѣ́дите.

На крⷭ҇тъ вознесе́нꙋ тѝ, сїѧ́нїе скры̀ со́лнце, но і҆и҃ль тебѐ бг҃а и҆ зижди́телѧ не позна̀, за всѣ́хъ во́лею дꙋ́шꙋ поло́жшаго.

Сла́ва:

Да ра́дꙋютсѧ всѧ́чєскаѧ, ꙗ҆́кѡ хрⷭ҇то́съ и҆з̾ гро́ба воста̀, плѣни́въ всѧ̀ а҆́дова сокрѡ́вища, и҆ ѻ҆́бщїй весе́лїѧ пра́здникъ да соверша́ютъ.

И҆ ны́нѣ, бг҃оро́диченъ:

А҆́ще и҆ младе́нца родила̀ є҆сѝ, но дв҃а пребыла̀ є҆сѝ, ꙗ҆́коже была̀ є҆сѝ пре́жде ржⷭ҇тва̀, чи́стаѧ бцⷣе дв҃о: рожде́йсѧ бо є҆стество̀ ѡ҆бновѝ, ꙗ҆́кѡ бг҃ъ.

Пѣ́снь з҃.

І҆рмо́съ: Пе́щь дре́вле всегремѧ́щꙋю ᲂу҆гаси́вый, и҆ ѻ҆́троки <<т҃д: 607>> тꙋ́чею дх҃о́вною ѡ҆роси́вый, благослове́нъ є҆сѝ бж҃е ѻ҆ц҃ъ на́шихъ.

Неразꙋ́мнїи лю́дїе і҆ꙋде́йскагѡ собо́ра, вмѣ́стѡ благодѣѧ́нїй, ꙗ҆̀же тѣ̑мъ дарова́лъ є҆сѝ, ко крⷭ҇тꙋ̀ хрⷭ҇тѐ пригвозди́ша тѧ̀.

И҆сто́чникъ ми́лости за всѣ́хъ положи́лсѧ є҆сѝ, да всѝ до́лга сме́ртнагѡ разрѣши́вшесѧ, пое́мъ тѧ̀ человѣколю́бче.

Сла́ва:

Тридне́вною сме́ртїю, и҆ погребе́нїемъ живоно́снымъ, сꙋ́щымъ во гробѣ́хъ пода́лъ є҆сѝ жи́знь вѣ́чнꙋю, вѣ́рнѡ сп҃се пою́щымъ тѧ̀.

И҆ ны́нѣ, бг҃оро́диченъ:

Тебѣ̀ и҆ є҆ди́ной хода́таицѣ ра́дости, подоба́етъ ѿ а҆́гг҃лъ, є҆́же ра́дꙋйсѧ, є҆́же вѣ́рнїи тебѣ̀ вопїе́мъ, мр҃і́е приснодв҃о.

Пѣ́снь и҃.

І҆рмо́съ: Оу҆страши́сѧ ѻ҆трокѡ́въ бл҃гочести́выхъ, соѻбра́знагѡ дꙋшѝ нескве́рнагѡ тѣ́ла, и҆ ᲂу҆страни́сѧ воспита́нный въ безмѣ́рномъ веществѣ̀, неꙋтрꙋжде́нъ ѻ҆́гнь: присноживꙋ́щꙋ же и҆з̾ꙋвѧ́дшꙋ пла́меню, вѣ́чнꙋющаѧ пѣ́снь воспѣва́шесѧ. гдⷭ҇а всѧ̀ дѣла̀ по́йте, и҆ превозноси́те во всѧ̀ вѣ́ки.

Разрꙋша́етсѧ безбо́жный совѣ́тъ, и҆ печа̑ти вотщѐ і҆ꙋде́ємъ бы́ша: воста̀ погребы́йсѧ, порꙋга́всѧ всѣ̑мъ: бг҃ъ бо во́лею страда́ти прїе́млетъ, но вла́стїю свое́ю ᲂу҆строѧ́етъ всѧ̑, ꙗ҆́коже хо́щетъ. ꙗ҆́кѡ гдⷭ҇а того̀ непреста́ннѡ пое́мъ, и҆ превозно́симъ во всѧ̀ вѣ́ки. <<т҃д ѡ҆б.: 608>>

И҆ди́те, речѐ жена́мъ блиста́ѧйсѧ зра́комъ: хрⷭ҇то́съ воскре́се, проповѣ́дите про́чее тогѡ̀ воскресе́нїе мі́рови всемꙋ̀, и҆ не пла́читесѧ, нѣ́сть бо слеза́мъ вре́мѧ: не ктомꙋ́ бо ца́рствꙋетъ сме́рть, не ктомꙋ̀ ѡ҆блада́етъ а҆́дъ, не ктомꙋ̀ ѡ҆сꙋжде́нїѧ побѣди́тъ грѣ́хъ.

Сла́ва:

Скры́сѧ влⷣко хрⷭ҇тѐ, живо́тъ на́шъ въ тебѣ̀, пострада́вшемъ пло́тїю, и҆ и҆з̾ ме́ртвыхъ воскре́сшемъ сло́ве, и҆ живꙋ́щемъ при́снѡ: є҆мꙋ́же надѣ́емсѧ хрⷭ҇тїа́не причасти́тисѧ, на стра́шномъ второ́мъ прише́ствїи твое́мъ, вѣ́рнїи, досто́йнѡ пою́ще твоѧ̑ стра̑сти бж҃е́ствєнныѧ, и҆ є҆́же и҆з̾ ме́ртвыхъ твоѐ воскрⷭ҇нїе.

И҆ ны́нѣ, бг҃оро́диченъ:

Прїѧ́тъ разрѣше́нїе тобо́ю пра́баба дре́внѧгѡ ѡ҆сꙋжде́нїѧ: не ктомꙋ́ бо сїѧ̀ въ печа́лехъ роди́тъ, ты́ бо родила̀ є҆сѝ бг҃ороди́тельнице хрⷭ҇та̀. тѣ́мже тѧ̀ досто́йнѡ ᲂу҆блажа́емъ, пою́ще и҆з̾ тебѐ рожде́ннаго без̾ сѣ́мене, и҆ превозносѧ́ще во всѧ̀ вѣ́ки.

Пѣ́снь ѳ҃.

І҆рмо́съ: Возвели́чилъ є҆сѝ хрⷭ҇тѐ, ро́ждшꙋю тѧ̀ бцⷣꙋ, ѿ неѧ́же созда́телю на́шъ, въ подобостра́стное на́мъ ѡ҆бле́клсѧ є҆сѝ тѣ́ло, на́шихъ прегрѣше́нїй рѣши́тельное: сїю̀ ᲂу҆блажа́юще всѝ ро́ди, тебѐ велича́емъ.

Оу҆слы́ши гла́съ жениха̀ твоегѡ̀ цр҃кви, вопїе́тъ бж҃е́ственный дв҃дъ: тебѣ́ бо и҆з̾ ре́бръ дарова́сѧ вода̀ съ кро́вїю бж҃е́ственною, на ѡ҆чище́нїе согрѣше́нїй: то́й бо и҆зба́вилъ є҆́сть тебѐ ѿ ле́сти і҆́дѡльскїѧ, ꙗ҆́кѡ человѣколю́бецъ. <<т҃є: 609>>

Ты̀ возсїѧ́лъ є҆сѝ жи́знь, воста́нїемъ тридне́внымъ, ꙗ҆зы̑къ мно́жествꙋ хрⷭ҇тѐ: не вопроша́ющымъ, ни и҆́щꙋщымъ тебѐ, ꙗ҆вле́нъ бы́лъ є҆сѝ тѣ̑мъ бж҃е́ственною сла́вою: люде́й же і҆ꙋде́йскихъ, тебѣ̀ невѣ́ровавшихъ ѡ҆сꙋди́лъ є҆сѝ.

Сла́ва:

Дре́ва є҆́же во є҆де́мѣ, пре́лестїю прозѧ́бшꙋю мѝ клѧ́твꙋ разрѣши́лъ є҆сѝ, да́же до крⷭ҇та̀ послꙋ́шавъ сло́ве, ты̀ ѻ҆те́ческимъ совѣ́томъ, самовла́стнѡ: тѣ́мже твоѐ несказа́нное и҆стоща́нїе пою̀ и҆ велича́ю.

И҆ ны́нѣ, бг҃оро́диченъ:

Ты̀ прибли́жилъ є҆сѝ къ тебѣ̀ ꙗ҆зы́къ ст҃ъ, дале́че ѿстоѧ́щїй, вопло́щсѧ и҆з̾ дв҃ы сп҃се, и҆ не твоѧ̑ лю́ди, наре́клъ є҆сѝ лю́ди твоѧ̀ бж҃е́ствєнныѧ: сегѡ̀ ра́ди всѝ ны́нѣ покланѧ́емсѧ тебѣ̀ всеси́льне.

Въ понедѣ́льникъ четве́ртыѧ недѣ́ли по па́сцѣ,

трипѣ́снецъ, є҆гѡ́же краегране́сїе: Воскре́се сп҃съ. Гла́съ г҃.

Пѣ́снь а҃.

І҆рмо́съ: Пресѣка́емое мо́ре жезло́мъ, дре́вле і҆и҃ль про́йде ꙗ҆́кѡ по пꙋсты́ни, и҆ крестоѻбра́знѡ ꙗ҆́вѣ пред̾ꙋготовлѧ́етъ стєзѝ: сегѡ̀ ра́ди пои́мъ во хвале́нїи чꙋ́дномꙋ бг҃ꙋ на́шемꙋ, ꙗ҆́кѡ просла́висѧ.

[А] Возше́дъ на высотꙋ̀, плѣне́нїе во а҆́дѣ содержи́мое, ꙗ҆́кѡ крѣ́пкїй прїѧ́лъ є҆сѝ сп҃се, и҆ совоскреси́лъ є҆сѝ съ собо́ю, тридне́венъ и҆з̾ гро́ба воскре́съ чл҃вѣколю́бче, ꙗ҆́кѡ всеси́ленъ.

[Н] Оу҆мерщвле́нна дре́вле тебѐ сп҃се, и҆ погребе́нна въ но́вомъ гро́бѣ ви́дѣвъ а҆́дъ, ве́сь ме́ртвъ пребы́сть и҆ бездѣ́ленъ: ме́ртвїи же всѝ твои́мъ воста́нїемъ живоно́снымъ, ра́дꙋющесѧ, ѿ ᲂу҆́зъ разрѣши́шасѧ.

Сла́ва:

[Е] Въ ме́ртвыхъ жива́гѡ что̀ и҆́щете; мѷроно́сицамъ речѐ ᲂу҆ гро́ба свѣтоѻбра́зный а҆́гг҃лъ, и҆ногда̀ ꙗ҆влѧ́ѧсѧ: ѿше́дше ско́рѡ, а҆пⷭ҇лѡмъ возвѣсти́ти потщи́тесѧ сегѡ̀ воста́нїе.

И҆ ны́нѣ, бг҃оро́диченъ:

[С] Воплоще́нна гдⷭ҇а неизрече́ннѡ и҆з̾ пречи́стыхъ крове́й твои́хъ бцⷣе, и҆ на́съ ра́ди сме́рть пло́тїю воспрїи́мша, воскре́сша ви́дѣвши и҆з̾ гро́ба, ра́достнѡ сла́вѧщи велича́ла є҆сѝ.

Пѣ́снь и҃.

І҆рмо́съ: Вавѷлѡ́нскаѧ пе́щь ѻ҆́троки не ѡ҆палѝ, нижѐ бж҃ества̀ ѻ҆́гнь дв҃ꙋ растлѝ. тѣ́мъ со ѻ҆́троки вѣ́рнїи возопїе́мъ: бл҃гослови́те дѣла̀ гдⷭ҇нѧ гдⷭ҇а.

[Т] Распѧ́таго гдⷭ҇а дре́вле ви́дѣвше, со́лнце сокры̀ свѣ́тъ, ка́менїе распаде́сѧ, го́ры поколеба́шасѧ, и҆ землѧ̀ потрепета̀, и҆ и҆̀же дре́вле ᲂу҆́зницы ѿ ᲂу҆́зъ разрѣша́хꙋсѧ.

[Н] Внегда́ тѧ ви́дѣ а҆́дъ всесмѣ́шный, сло́ве всеси́льне, ꙗ҆́вѣ къ себѣ̀ и҆дꙋ́ща, потрепета̀, и҆ всѣ́хъ ме́ртвыхъ ѿрѣша́ше, воспѣва́ющихъ держа́вꙋ и҆ благоꙋтро́бїе твоѐ.

Сла́ва:

[О] Гдⷭ҇ь воста̀, всѝ воскли́кнемъ, и҆ рꙋка́ми воспле́щимъ вѣ́рнѡ, и҆ ли́ки соста́вимъ, сегѡ̀ си́лꙋ проповѣ́дающе, и҆ вопїю́ще: дѣла̀ по́йте гдⷭ҇а, и҆ превозноси́те є҆го̀ во вѣ́ки. <<т҃ѕ: 611>>

И҆ ны́нѣ, бг҃оро́диченъ:

[С] Зачала̀ є҆сѝ всенепоро́чнаѧ, всѧ̑ содержа́щаго, и҆ того̀ родила̀ є҆сѝ пло́тїю, плѣни́вша сме́рть сме́ртїю тридне́вною: є҆го́же ᲂу҆молѝ, дꙋшѝ моеѧ̀ стра̑сти ᲂу҆мертви́ти, и҆ спасти́ мѧ.

Пѣ́снь ѳ҃.

І҆рмо́съ: Кꙋпино́ю и҆ ѻ҆гне́мъ пропи́саннꙋю въ сїна́и, законополо́жникꙋ мѡѷсе́ю, и҆ бж҃їй во чре́вѣ неѡпа́льнѡ заче́ншꙋю ѻ҆́гнь, всесвѣ́тлꙋю и҆ негаси́мꙋю свѣщꙋ̀, сꙋ́щꙋю бцⷣꙋ пѣ́сньми чтꙋ́ще велича́емъ.

[Ѡ] Краснѣ́йшїй хрⷭ҇тѐ, ка́кѡ тѝ за́йде на крⷭ҇тѣ̀ добро́ты свѣ́тлое; ка́кѡ терпи́тъ землѧ̀ зрѧ́щи тѧ̀ ви́сѧща; ка́кѡ непра́ведное претерпѣ̀ заколе́нїе твоѐ; пое́мъ мно́гое твоѐ и҆ неизрече́нное сло́ве соше́ствїе.

[Т] Тридне́внымъ твои́мъ погребе́нїемъ плѣне́нъ бы́сть вра́гъ, и҆ ѿ а҆́довыхъ ᲂу҆́зъ ѿрѣши́шасѧ мертвецы̀, ᲂу҆мертви́сѧ сме́рть, и҆стощи́шасѧ ца̑рства а҆́дѡва. тѣ́мже тѧ̀ животода́вче, въ пѣ́снехъ чтꙋ́ще велича́емъ.

Сла́ва:

[И] Вѣ́чный животѐ, ка́кѡ вкꙋси́лъ є҆сѝ на́съ ра́ди сме́рти хотѧ̀ сп҃се; ка́кѡ сше́лъ є҆сѝ въ мє́ртвыѧ, всѣ́хъ воскресе́нїе, и҆ и҆стощи́лъ є҆сѝ а҆́дѡва сокрѡ́вища; тѣ́мже тѧ̀ благода́рственнѡ въ пѣ́снехъ чтꙋ́ще велича́емъ.

И҆ ны́нѣ, бг҃оро́диченъ:

[Р] И҆зба́ви гра́дъ и҆ лю́ди прибѣга́ющыѧ къ тебѣ̀, бг҃ороди́тельнице чи́стаѧ, роди́вшаѧ хрⷭ҇та̀, ѿ всѧ́кагѡ сопроти́внагѡ гнѣ́ва, и҆ плѣне́нїѧ, и҆ ꙗ҆зы̑къ нахожде́нїѧ, ꙗ҆́кѡ да тѧ̀ по до́лгꙋ въ пѣ́снехъ велича́емъ. <<т҃ѕ ѡ҆б.: 612>>

Во вто́рникъ четве́ртыѧ недѣ́ли по па́сцѣ,

трипѣ́снецъ, є҆гѡ́же краегране́сїе: Пѣ́нїе і҆ѡ́сифово: Гла́съ г҃.

Пѣ́снь в҃.

І҆рмо́съ: Ꙗ҆́кѡ тꙋ́ча на тро́скотъ, и҆ ꙗ҆́коже и҆́ней на сѣ́но, да сни́дꙋтъ на зе́млю глаго́ли моѝ.

[Ѱ] Ѱалмы̀ воскли́кнемъ, воспле́щимъ рꙋка́ми ве́село, и҆з̾ ме́ртвыхъ животода́вецъ воста̀.

[А] Возше́лъ є҆сѝ хрⷭ҇тѐ на крⷭ҇тъ тво́й, препоѧ́савсѧ си́лою и҆ воскре́слъ є҆сѝ и҆з̾ ме́ртвыхъ, ꙗ҆́коже предре́клъ є҆сѝ.

[Л] Бѣлоѻде́жденъ а҆́гг҃лъ ви́дѣнъ бы́сть жена́мъ вопїѧ́й: воскре́се, сы́й воскресе́нїе вѣ́рныхъ и҆ спасе́нїе.

Сла́ва:

[М] Пома́зати тѧ̀ тща́щесѧ, и҆дѧ́хꙋ жєны̀ ко гро́бꙋ: воскре́сша же ви́дѣвше, покланѧ́хꙋсѧ.

И҆ ны́нѣ, бг҃оро́диченъ:

[Ѡ] Ꙗ҆́кѡ заꙋ́треннее сл҃нце, предносѧ́щи дв҃о на рꙋкꙋ̀ возсїѧ́ла є҆сѝ на́мъ во тмѣ̀ сꙋ́щымъ.

Пѣ́снь и҃.

І҆рмо́съ: А҆́гг҃льми немо́лчнѡ въ вы́шнихъ сла́вимаго бг҃а, нб҃са̀ небе́съ. землѧ̀, и҆ го́ры и҆ хо́лми, и҆ глꙋбина̀, и҆ ве́сь ро́дъ человѣ́ческїй, пѣ́сньми того̀ ꙗ҆́кѡ созда́телѧ, и҆ и҆зба́вителѧ бл҃гослови́те, и҆ превозноси́те во всѧ̀ вѣ́ки.

[Д] Собо́ръ законопрестꙋ́пный є҆вре́йскїй на дре́вѣ тебѐ распѧ̀, дре́ва ра́ди человѣ́кѡмъ бы́вшїй вре́дъ, влⷣко и҆сцѣлѧ́юща бж҃е́ственнѡ. тѣ́мже тѧ̀ гла́сы ра́достными при́снѡ пое́мъ.

[І] Ра́венъ ѻ҆ц҃ꙋ̀ хрⷭ҇тѐ и҆ дх҃ꙋ сы́й, крⷭ҇тъ претерпѣ́лъ є҆сѝ, <<т҃з: 613>> и҆ вмѣни́всѧ въ ме́ртвыхъ, ца̑рствїѧ а҆́дѡва и҆стощи́лъ є҆сѝ пресла́внѡ, и҆ воскре́съ совоздви́глъ є҆сѝ съ собо́ю всю̀ тва́рь.

Сла́ва:

[А] А҆́де всеѧ́дче, гдѣ̀ жа́ло твоѐ; гдѣ̀ твоѧ̀ сме́рте побѣ́да; воскре́сшимъ и҆з̾ ме́ртвыхъ ᲂу҆мертви́лсѧ є҆сѝ, сп҃си́телемъ хрⷭ҇то́мъ є҆ди́нѣмъ жизнода́вцемъ. є҆го́же со ѻ҆ц҃е́мъ и҆ дх҃омъ вѣ́рнїи воспѣва́емъ.

И҆ ны́нѣ, бг҃оро́диченъ:

[І] Да ѡ҆божи́тъ человѣ́чество бг҃ъ, чл҃вѣ́къ бы́сть и҆з̾ тебѐ всенепоро́чнаѧ чи́стаѧ. є҆го́же и҆з̾ гро́ба краснѣ́йша ви́дѣла є҆сѝ проше́дша, ꙗ҆́кѡ побѣди́телѧ а҆́дꙋ, и҆ ра́дости и҆спо́лниласѧ є҆сѝ.

Пѣ́снь ѳ҃.

І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ. данїи́лъ же тѧ̀ ви́дѣ го́рꙋ несѣко́мꙋю: же́злъ прозѧ́бшїй, и҆са́їа взыва́ше, ѿ ко́рене дв҃дова.

[Ѡ] Ꙗ҆́кѡ а҆́гнецъ къ заколе́нїю приведе́нъ бы́лъ є҆сѝ влⷣко во́лею і҆и҃се, не вопїѧ̀, ни зовы́й, ꙗ҆́коже пи́шетъ, сме́ртїю свое́ю сло́ве на́съ ѡ҆безсме́ртивъ, пѣсносло́вѧщихъ твою̀ стра́сть пречи́стꙋю, и҆ є҆́же и҆з̾ а҆́да стра́шное ѡ҆жи́тїе.

[С] Сокрꙋше́нныхъ на́съ ѡ҆бнови́лъ є҆сѝ, і҆и҃се всѣ́хъ цр҃ю̀, честны́мъ и҆ стра́шнымъ воскресе́нїемъ твои́мъ, ᲂу҆ченикѡ́мъ же ви́дѣвсѧ, ми́ръ тво́й си̑мъ пода́лъ є҆сѝ человѣколю́бче. є҆го́же на́мъ да́рꙋй пѣсносло́вѧщымъ твоѐ бж҃е́ственное воста́нїе. <<т҃з ѡ҆б.: 614>>

Сла́ва:

[И] Честно́е мѷроно́сицъ собра́нїе, прїи́де тща́нїемъ ко ст҃о́мꙋ влⷣко, гро́бꙋ твоемꙋ̀, є҆́же пома́зати тѧ̀ вѣ́рнѡ: въ бѣ́лыхъ же ри́захъ ви́дѣша сѣдѧ́ща а҆́гг҃ла, и҆ тѣ̑мъ вѣща́юща: что̀ съ ме́ртвыми жива́го зрѣ́ти хо́щете;

И҆ ны́нѣ, бг҃оро́диченъ:

[Ф] Свѣтода́вца родила̀ є҆сѝ и҆ гдⷭ҇а, двє́ри сꙋ́щи свѣ́та, є҆го́же и҆з̾ гро́ба ѡ҆блиста́вша ви́дѣвши, и҆спо́лниласѧ є҆сѝ ра́дости: но того̀ молѝ дв҃о, пла́чь мнѣ̀ дарова́ти ра́достный, хода́тайственъ чи́стаѧ та́мошнѧгѡ ᲂу҆тѣше́нїѧ.

Въ четверто́къ д҃-ѧ недѣ́ли по па́сцѣ,

трипѣ́снецъ, є҆гѡ́же краегране́сїе: Хвала̀ гдⷭ҇ꙋ. Гла́съ г҃

Пѣ́снь д҃.

І҆рмо́съ: Прїѡсѣне́ннꙋю го́рꙋ а҆ввакꙋ́мъ прозрѧ́ше пречⷭ҇тꙋю твою̀ ᲂу҆тро́бꙋ чи́стаѧ, тѣ́мъ взыва́ше: ѿ ю҆́га прїи́детъ бг҃ъ и҆ ст҃ы́й ѿ горы̀ прїѡсѣне́нныѧ ча́щи.

[А] Неизрече́ннымъ соедине́нїемъ ᲂу҆подо́бивсѧ человѣ́кѡмъ, є҆ди́нъ пресꙋ́щный, крⷭ҇тъ пло́тїю претерпѣ́въ, и҆ вмѣни́всѧ въ ме́ртвыхъ, тридне́внѡ воскре́слъ є҆сѝ жи́знь всѣ́хъ.

[І] І҆и҃се бж҃е на́шъ, вода̀ жи́зни сы́й, ше́ствꙋеши трꙋжда́ѧсѧ въ пло́ти ко и҆сто́чникꙋ, сосѣдѧ́ же и҆ самарѧны́нѣ женѣ̀, премꙋ́дрости твоеѧ̀ во́дꙋ та́йнѡ пролива́еши.

Сла́ва:

[Н] Недꙋ́гѡвъ разли́чныхъ приходѧ́щихъ къ тебѣ̀ сло́ве, ѡ҆чища́ѧ повелѣ́нїемъ твои́мъ, крⷭ҇тъ во́лею претерпѣ́лъ <<т҃и: 615>> є҆сѝ во гро́бѣ положи́всѧ, воскреси́лъ є҆сѝ є҆стество̀ человѣ́ческое и҆стлѣ́вшее.

И҆ ны́нѣ, бг҃оро́диченъ:

[Е] На тѧ̀ премꙋ́дрость ѻ҆ц҃а̀ безнача́льнагѡ сни́де, ꙗ҆́кѡ до́ждь на рꙋно̀ чи́стаѧ, и҆ вопло́щши кромѣ̀ преложе́нїѧ, пꙋти̑ жи́зни показа́ла є҆сѝ на́мъ вѣ́дꙋщымъ тѧ̀ дв҃ꙋ по ржⷭ҇твѣ̀ и҆ мт҃рь.

Пѣ́снь и҃.

І҆рмо́съ: Въ пла́мень ко ѻ҆трокѡ́мъ є҆врє́йскимъ снизше́дшаго, бж҃їею си́лою, и҆ ꙗ҆́вльшагосѧ гдⷭ҇а, свѧще́нницы бл҃гослови́те, и҆ превозноси́те во всѧ̀ вѣ́ки.

[С] Ты̀ на крⷭ҇тѣ̀ возне́ссѧ, человѣ́ческое всѐ є҆стество̀ совозне́слъ є҆сѝ сло́ве, и҆ положи́всѧ во гро́бѣ, во гробѣ́хъ спѧ́щыѧ воздви́глъ є҆сѝ бж҃е́ственнымъ воста́нїемъ твои́мъ ще́дре.

[І] І҆ерїхѡ́нъ и҆ сали́мъ бли̑жнѧѧ съ вода́ми мно́гими преше́дъ, къ стꙋденцꙋ̀ і҆а́кѡвлю прїи́де, и҆сто́чникъ премꙋ́дрости, во́дꙋ спасе́нїѧ самарѧны́нѣ даѧ̀.

Сла́ва:

[С] Ты̀ слѣпца̀ просвѣти́вый сло́вомъ, и҆ разсла́бленныхъ повелѣ́нїемъ твои́мъ стѧгнꙋ́вый, и҆ ме́ртвъ тридне́внѡ возсїѧ́вый и҆з̾ гро́ба, ᲂу҆мерщвле́ннꙋю воскресѝ дꙋ́шꙋ мою̀.

И҆ ны́нѣ, бг҃оро́диченъ:

[К] Мі́рови всемꙋ̀ бцⷣе мр҃і́е ты̀ є҆сѝ прибѣ́жище, мїрски́хъ мѧ̀ собла̑знъ и҆ страсте́й тѣле́сныхъ, и҆ вѣ́чнꙋющїѧ и҆зба́ви гее́нны, ꙗ҆́кѡ да пѣсносло́влю тѧ̀. <<т҃и ѡ҆б.: 616>>

Пѣ́снь ѳ҃.

І҆рмо́съ: Тебѐ неѡпали́мꙋю кꙋпинꙋ̀, и҆ ст҃ꙋ́ю дв҃ꙋ, мт҃рь свѣ́та и҆ бцⷣꙋ, наде́ждꙋ всѣ́хъ на́съ, велича́емъ.

[Ѵ] Просте́рлъ є҆сѝ дла̑ни на дре́вѣ, ѕлѣ̀ просте́ртыхъ пра́ѻтца рꙋ́къ, къ дре́ва снѣ́ди, потреблѧ́ѧ вре́дъ, хрⷭ҇тѐ многоми́лостиве.

[Р] Глаго́ломъ разсла́бленнаго стѧгнꙋ́вый, и҆ хрѡмы́ѧ и҆спра́вивый, распѧ́лсѧ є҆сѝ, і҆и҃се, и҆ воскре́слъ є҆сѝ, ᲂу҆ченикѡ́мъ на мнѡ́гїѧ дни̑ ꙗ҆влѧ́ѧсѧ.

Сла́ва:

[І] Ви́дѣ самарѧны́нѧ жена̀ тебѐ, прише́дши почерпстѝ, и҆ во́дꙋ жи́зни ѿ тебѐ прїи́мши, насы́тисѧ, хрⷭ҇тѐ бж҃е, воспѣва́ющи тѧ̀.

И҆ ны́нѣ, бг҃оро́диченъ:

[Ѡ] Ѽ па́че ᲂу҆ма̀, твои́хъ чꙋде́съ пречи́стаѧ дв҃о, ты́ бо родила̀ є҆сѝ бг҃а воплоще́нна, бж҃е́ственнымъ воста́нїемъ свои́мъ всѣ́хъ спа́сшаго.

Въ пѧто́къ д҃-ѧ недѣ́ли по па́сцѣ,

трипѣ́снецъ, є҆гѡ́же краегране́сїе: Сла́ва тебѣ̀ бж҃е. Гла́съ г҃.

Пѣ́снь є҃.

І҆рмо́съ: Ꙗ҆́кѡ ви́дѣ и҆са́їа ѻ҆бра́знѡ на прⷭ҇то́лѣ превознесе́нна бг҃а, ѿ а҆́гг҃лъ сла́вы дорѷноси́ма, ѻ҆каѧ́нный! вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ, и҆ ми́ромъ влады́чествꙋюща.

[Д] Вѧ́жемь ще́дре, и҆ во́лею дре́вꙋ пригвожда́емь, свѧ́занныхъ всѧ́кими престꙋпле́ньми и҆збавлѧ́еши, положи́въ же сѧ <<т҃ѳ: 617>> во гро́бѣ, во гробѣ́хъ ᲂу҆снꙋ́вшыѧ мертвецы̀ воздвиза́еши, пою́щыѧ твоѐ стра́шное воскресе́нїе.

[О] Гдⷭ҇ь воскре́се и҆з̾ ме́ртвыхъ, ꙗ҆́коже речѐ, тридне́венъ и҆ со а҆по́столы водворѧ́ѧсѧ вопїѧ́ше: въ ве́сь мі́ръ ше́дше возвѣсти́те ꙗ҆́снѡ, ꙗ҆̀же ви́дите вели́каѧ моѧ̀ чꙋдеса̀.

Сла́ва:

[Ѯ] Диви́тсѧ се́рдце и҆ слꙋ́хъ сп҃се, твоемꙋ̀ бл҃гоꙋтро́бїю, и҆ смотре́нїю, и҆ снизхожде́нїю: пло́тїю бо по землѝ ходѧ̀, самарѧны́ни же просѧ́щей женѣ̀, во́дꙋ жи́зни пода́лъ є҆сѝ бж҃е́ственнагѡ ра́зꙋма.

И҆ ны́нѣ: бг҃оро́диченъ:

[А] Ст҃а́ѧ бцⷣе, во ст҃ы́хъ ст҃а́го роди́вшаѧ сло́во, ѿ безнача́льнагѡ ѻ҆ц҃а̀ возсїѧ́вшее, того̀ молѝ непреста́ннѡ, ѡ҆ст҃и́ти и҆ просвѣти́ти дꙋ́шы на́шѧ, и҆ сердца̀ любо́вїю пою́щихъ тѧ̀.

Пѣ́снь и҃.

І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́ноши, пла́менемъ же неврежде́ни, бжⷭ҇твеннꙋю пѣ́снь поѧ́хꙋ: бл҃гослови́те всѧ̀ дѣла̀ гдⷭ҇нѧ гдⷭ҇а, и҆ превозноси́те во всѧ̀ вѣ́ки.

[С] На крⷭ҇тъ возне́ссѧ во́лею, всѐ совозне́слъ є҆сѝ человѣ́ческое сꙋщество̀, въ ме́ртвыхъ же жи́знь сы́й вмѣни́всѧ, ѡ҆живи́лъ є҆сѝ сп҃се пою́щыѧ смотре́нїе твоѐ, и҆ є҆́же со сла́вою восхожде́нїе ще́дре.

[О] Мі́ръ ра́достїю пра́зднꙋетъ во ст҃о́мъ твое́мъ воста́нїи животода́вче, и҆́мже всю̀ си́лꙋ а҆́довꙋ попра́лъ є҆сѝ, и҆ сме́рти жа́ло притꙋпи́лъ є҆сѝ сло́ве, и҆ нетлѣ́нїе и҆сточи́лъ є҆сѝ человѣ́кѡмъ. <<т҃ѳ ѡ҆б.: 618>>

Сла́ва:

[І] Ви́дѣвши тѧ̀ жена̀ самарѧны́нѧ трꙋди́вшасѧ, ще́дре, и҆ просѧ́ща во́дꙋ пи́ти, безсме́ртїѧ прїе́млетъ во́ды, вопїю́щи: да́ждь мѝ во́дꙋ живꙋ́ю гдⷭ҇и, ꙗ҆́кѡ да не вжа́ждꙋ во всѐ вре́мѧ живота̀ моегѡ̀.

И҆ ны́нѣ, бг҃оро́диченъ:

[О] До́мъ бж҃їй показа́ласѧ є҆сѝ пречⷭ҇таѧ дв҃о бцⷣе, семꙋ̀ пло́ть ѡ҆дꙋшевле́ннꙋю, ѿ твои́хъ крове́й пречⷭ҇тыхъ взаи́мъ да́вши ѻ҆трокови́це: тѣ́мже тѧ̀ почита́емъ во всѧ̀ вѣ́ки.

Пѣ́снь ѳ҃.

І҆рмо́съ: Въ зако́нѣ сѣ́ни и҆ писа́нїй ѻ҆́бразъ ви́димъ вѣ́рнїи, всѧ́къ мꙋ́жескїй по́лъ ложесна̀ разверза́ѧ, ст҃ъ бг҃ꙋ. тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ велича́емъ.

[Ѳ] Диви́тсѧ со́лнце, зрѧ̀ на дре́вѣ пригвожде́нна тебѐ хрⷭ҇тѐ, поколеба́шасѧ концы̀, и҆ потрѧсе́сѧ всѧ̀ землѧ̀, и҆ распаде́сѧ ка́менїе, и҆ а҆́дъ до́лѣ ꙗ҆̀же ѿ вѣ́ка ю҆́зники ѿрѣшѝ воспѣва́ющыѧ тѧ̀.

[Е] Положи́лсѧ є҆сѝ хрⷭ҇тѐ во гро́бѣ, жи́знь и҆ воскресе́нїе: воскре́съ же во сла́вѣ, во дне́хъ мно́гихъ свои́мъ соводворѧ́ѧсѧ ᲂу҆ченикѡ́мъ, и҆ си́хъ проповѣ́дники во ве́сь мі́ръ посыла́ѧ стра́шнагѡ смотре́нїѧ твоегѡ̀.

Сла́ва:

[С] Пꙋти̑ мнѣ̀ жи́зни показꙋ́еши млⷭ҇тиве, ми́лостїю мно́гою ше́ствꙋеши, и҆ сѣди́ши трꙋди́всѧ ѿ пꙋтѝ: и҆ женѣ̀ просѧ́щей во́ды безсме́ртїѧ посыла́еши, пою́щей мно́гое твоѐ смотре́нїе. <<т҃і: 619>>

И҆ ны́нѣ: бг҃оро́диченъ:

[С] Воплоща́етсѧ хрⷭ҇то́съ и҆з̾ тебѐ па́че сло́ва, сло́во сы́й ѻ҆́ч҃ее, дв҃о бцⷣе, и҆ распина́етсѧ хотѧ̀ на́съ ра́ди, и҆ тридне́внымъ воста́нїемъ мі́рꙋ концы̀ ѡ҆свѣща́етъ: съ ни́ми же тѧ̀ по до́лгꙋ ᲂу҆блажа́емъ.

Въ сꙋббѡ́тꙋ четве́ртыѧ недѣ́ли по па́сцѣ.

Четверопѣ́снецъ, є҆гѡ́же краестро́чїе сїѐ: Тре́тїй гла́съ ꙗ҆вѝ. Гла́съ г҃.

Пѣ́снь ѕ҃.

І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но простры́й влⷣко, высо́кꙋю твою̀ мы́шцꙋ, ꙗ҆́кѡ петра́ мѧ ᲂу҆пра́вителю спасѝ.

[Т] Пробо́дсѧ копїе́мъ въ бж҃е́ственнаѧ ре́бра, ᲂу҆ѧ́звленнаго человѣ́ка престꙋпле́нїемъ, животода́вче и҆сцѣли́лъ є҆сѝ бж҃е́ственными твои́ми страстьмѝ: тѣ́мже влⷣко, воспѣва́емъ держа́вꙋ твою̀.

[Р] Оу҆даре́нїе претерпѣ́лъ є҆сѝ і҆и҃се, разорѧ́ѧй а҆́дѡва ца̑рствїѧ, и҆ верєѝ сте́рлъ є҆сѝ, рꙋко́ю вседержа́вною твое́ю спа́слъ всѣ́хъ, и҆ воскрⷭ҇лъ є҆сѝ тридне́внѡ.

Сла́ва:

[І] Стоѧ́лъ є҆сѝ пред̾ сꙋди́щемъ пїла́товымъ ꙗ҆́кѡ ѡ҆сꙋ́жденикъ, землѝ все́й сꙋдѧ́й гдⷭ҇и, хотѧ̀, є҆го́же созда́лъ є҆сѝ, ѿ а҆́да и҆зба́вити, соше́лъ є҆сѝ къ немꙋ̀ є҆ди́не милосе́рде.

И҆ ны́нѣ, бг҃оро́диченъ:

[Т] Родила̀ є҆сѝ кромѣ̀ болѣ́зней сн҃а, пре́жде вѣ̑къ ѿ ѻ҆ц҃а̀ рожде́ннаго чи́стаѧ, и҆ ѡ҆ не́мъ болѣ́ла є҆сѝ, зрѧ́щи пло́тїю распина́ема ви́сѧща: воскре́сшꙋ же ꙗ҆́кѡ бг҃ꙋ, ра́доваласѧ є҆сѝ свѣ́тлѡ. <<т҃і ѡ҆б.: 620>>

Пѣ́снь з҃.

І҆рмо́съ: Пре́жде ѻ҆́бразꙋ злато́мꙋ, персі́дскомꙋ чти́лищꙋ, ѻ҆́троки не поклони́шасѧ трїѐ, пою́ще посредѣ̀ пе́щи: ѻ҆ц҃є́въ бж҃е бл҃гослове́нъ є҆сѝ.

[О] Херꙋві́мѡмъ и҆ серафі́мѡмъ сы́й непристꙋ́пенъ, пло́тїю распѧ́тїе претерпѣ́лъ є҆сѝ за млⷭ҇рдїе ми́лости твоеѧ̀, да спасе́ши а҆да́ма и҆стлѣ́вшаго престꙋпле́нїемъ.

[С] Ты̀ соше́дъ съ дꙋше́ю ко а҆́дꙋ, разори́лъ є҆сѝ держа́вꙋ є҆гѡ̀ влⷣко, и҆ воздви́глъ є҆сѝ сꙋ́щыѧ въ не́мъ свѧ̑занныѧ, воспѣва́ющыѧ твою̀ держа́вꙋ животода́вче.

Сла́ва:

[И] Ѿѧ́тсѧ печа́ли ᲂу҆ны́нїе, мѷронѡ́сицы потщи́тесѧ гро́ба дости́гнꙋти, и҆ и҆з̾ гро́ба хрⷭ҇та̀ воскре́сша зрѧ́ще, проповѣ́дите мі́рꙋ.

И҆ ны́нѣ, бг҃оро́диченъ:

[Х] Хрⷭ҇та̀, є҆го́же родила̀ є҆сѝ чи́стаѧ, красꙋ́йсѧ, ви́дѧщи воскрⷭ҇ша тридне́внѡ со сла́вою и҆з̾ ме́ртвыхъ, и҆ ꙗ҆́кѡ мт҃и ᲂу҆молѝ є҆го̀ ѡ҆ все́мъ мі́рѣ.

Пѣ́снь и҃.

І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни бж҃е́ственнꙋю пѣ́снь поѧ́хꙋ: бл҃гослови́те всѧ̀ дѣла̀ гдⷭ҇нѧ гдⷭ҇а, и҆ превозноси́те во всѧ̀ вѣ́ки.

[О] Всѧ́кое дыха́нїе созда́вый сло́вомъ, ѿ і҆ꙋдє́й пло́тїю на дре́вѣ во́лею повѣ́шаетсѧ, и҆ же́лчїю напоѧ́етсѧ, и҆ зрѧ́щи тва́рь всѧ̀ возмꙋща́шесѧ, безблагода́тныхъ рыда́ющи безꙋ́мїе. <<та҃і: 621>>

[С] Тебѐ нача́льника и҆ сп҃са мі́рꙋ, ꙗ҆́кѡ человѣ́ка всеѧ́децъ прїе́млетъ а҆́дъ, є҆го́же свѧза́въ ꙗ҆́кѡ гдⷭ҇ь, и҆ и҆̀хже дре́вле и҆мѧ́ше пови̑нныѧ, взѧ́лъ є҆сѝ, и҆ совоскреси́лъ є҆сѝ тридне́внѡ и҆з̾ гро́ба.

Сла́ва:

[Ц] Ѻ҆те́ческихъ не ѿлꙋ́чсѧ нѣ́дръ, пло́ть на́съ дѣ́лѧ ѿ дв҃ы прїѧ́тъ, и҆ сме́рть во́лею под̾ѧ́лъ є҆сѝ, положе́нъ же во гро́бѣ, воста́лъ є҆сѝ сло́ве бж҃їй тридне́внѡ: тѣ́мже тѧ̀ пое́мъ є҆ди́наго жизнода́вца.

И҆ ны́нѣ, бг҃оро́диченъ:

[Е] Родила̀ є҆сѝ чи́стаѧ сн҃а без̾ болѣ́зни, пре́жде вѣ́къ сꙋ́щаго со ѻ҆ц҃е́мъ же и҆ дх҃омъ ст҃ы̑мъ: є҆го́же на крⷭ҇тѣ̀ ви́сѧща зрѧ́щи, болѣ́ла ᲂу҆́бѡ є҆сѝ, воста́вша же и҆з̾ гро́ба ви́дѣвши, сра́дꙋешисѧ во вѣ́ки.

Пѣ́снь ѳ҃.

І҆рмо́съ: Въ зако́нѣ сѣ́ни и҆ писа́нїй, ѻ҆́бразъ ви́димъ вѣ́рнїи: всѧ́къ мꙋ́жескїй по́лъ ложесна̀ разверза́ѧ, ст҃ъ бг҃ꙋ: тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ велича́емъ.

[Ф] Свѣти̑ла хрⷭ҇тѐ, ви́дѣвше тѧ̀ на крⷭ҇тѣ̀ пло́тїю ви́сѧща, скры́ша свѣ́тъ, и҆ разбо́йникъ зрѧ̀ бг҃осло́вствꙋетъ, землѧ́ же всѧ̀ коле́блетсѧ, и҆ завѣ́са раздира́ема, вопїе́тъ: сла́ва долготерпѣ́нїю твоемꙋ̀ влⷣко.

[И] Твоѐ цр҃ю̀ сни́тїе стра́шное вои́стиннꙋ бы́сть въ преиспо́днихъ: а҆́дова бо врата̀ и҆ верєѝ сте́рлъ є҆сѝ, и҆ всѧ̑ ꙗ҆̀же и҆мѧ́ше ᲂу҆́зники, плѣни́лъ є҆сѝ, и҆ воскреси́лъ є҆сѝ держа́внѡ, бг҃а тѧ̀ проповѣ́давшыѧ. <<та҃і ѡ҆б.: 622>>

Сла́ва:

[Н] Ме́ртва тѧ̀ хрⷭ҇тѐ снѧ́тъ і҆ѡ́сифъ ѿ дре́ва вѣ́рнѡ, и҆ смѵ́рною и҆ ма́стїю и҆ понѧ́вицею, любо́вїю и҆ ра́достїю пома́завъ, и҆злива́етъ сле́зъ мно́жество, и҆ въ ме́ртвенномъ гро́бѣ положѝ: тѣ́мже съ ни́мъ тебѐ велича́емъ.

И҆ ны́нѣ, бг҃оро́диченъ:

[Е] Весели́сѧ чи́стаѧ, зрѧ́щи и҆з̾ ме́ртвыхъ твоего̀ сн҃а и҆ бг҃а во сла́вѣ воста́вша, съ мѷроно́сицами жена́ми, сщ҃е́нными а҆пⷭ҇лы, кꙋ́пнѡ и҆ і҆ѡ́сифомъ сла́внымъ, и҆ нїкоди́момъ, и҆ мы̀ велича́емъ тѧ̀ пречⷭ҇таѧ.

Въ понедѣ́льникъ пѧ́тыѧ недѣ́ли по па́сцѣ.

Трипѣ́снецъ, є҆гѡ́же краегране́сїе: Сла́ва бг҃ꙋ на́шемꙋ Гла́съ д҃.

Пѣ́снь а҃.

І҆рмо́съ: Трїста́ты крѣ́пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.

[Д] Свѧза́въ вра́жїю гꙋби́тельнꙋю держа́вꙋ ᲂу҆́зами, и҆́миже претерпѣ́лъ є҆сѝ на́съ ра́ди человѣколю́бче: крⷭ҇то́мъ твои́мъ ᲂу҆мири́лъ є҆сѝ гдⷭ҇и расточє́нныѧ, и҆ враждꙋ̀ разори́лъ є҆сѝ средостѣ́нїѧ: тѣ́мже воспѣва́емъ тѧ̀.

[О] Гдⷭ҇ь, ꙗ҆́коже предречѐ пре́жде стрⷭ҇ти, воскре́се держа́внѡ, плѣни́въ ꙗ҆́кѡ бг҃ъ а҆́дѡва ца̑рствїѧ, всѧ̑ же воздви́гъ тꙋ̀ спѧ́щыѧ ѿ вѣ́ка, того̀ велича́ющыѧ.

Сла́ва:

[Ѯ] Дивѧ́сѧ видѣ́нїю и҆ ѻ҆́бразꙋ мѷроно́сицъ ли́къ бж҃е́ственнагѡ слꙋжи́телѧ, ѿ негѡ̀ наꙋча́хꙋсѧ: сѐ хрⷭ҇то́съ <<тв҃і: 623>> воскре́се, ше́дше проповѣ́дите ᲂу҆ченикѡ́мъ, рыда́ющымъ и҆ пла́чꙋщымъ.

И҆ ны́нѣ, бг҃оро́диченъ:

[А] Возсїѧ̀, чи́стаѧ, ꙗ҆́кѡ жени́хъ красе́нъ и҆з̾ ме́ртвыхъ, ѿ твои́хъ ложе́снъ воплоти́выйсѧ, па́че ᲂу҆ма̀ бла́гостїю: тѣ́мже со а҆по́столы ви́дѣвши, сла́вила є҆сѝ тридне́вное є҆гѡ̀ воскресе́нїе.

Пѣ́снь и҃.

І҆рмо́съ: И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̀ дѣла̀ благослови́те, по́йте гдⷭ҇а.

[Т] Пречи́стыѧ просте́рлъ є҆сѝ дла̑ни твоѝ на крⷭ҇тѣ̀ во́лею долготерпѣли́ве, ѡ҆б̾ѧ́тъ всѣ́хъ, и҆ ѿ рꙋкѝ и҆зба́вивъ чꙋжда́гѡ: сегѡ̀ ра́ди тѧ̀ со стра́хомъ сла́вимъ.

[Ѡ] Ꙗ҆́коже положи́лсѧ є҆сѝ во́лею во гро́бѣ, спѧ́щїи дре́вле во гробѣ́хъ, є҆́же и҆з̾ ме́ртвыхъ воста́нїемъ твои́мъ совозста́ша, стра́хомъ вопїю́ще: благослови́те всѧ̀ дѣла̀ гдⷭ҇нѧ гдⷭ҇а.

[Ѳ] Ди́вна и҆ пресла́вна чꙋдеса̀, дѣ́йствꙋѧй хрⷭ҇тѐ твои́мъ глаго́ломъ, собо́ръ є҆вре́йскїй ви́дѣвъ тѧ̀ ѡ҆сꙋжда́етъ на сме́рть, жи́знь всѣ́хъ сꙋ́щꙋю, бл҃гоꙋтро́бне гдⷭ҇и.

Сла́ва:

[Е] Во дне́хъ хрⷭ҇тѐ четы́редесѧтихъ, съ мꙋ́дрыми и҆ чⷭ҇тны́ми а҆пⷭ҇толы ꙗ҆́вѣ водворѧ́ѧсѧ, ввѣ́рилъ є҆сѝ бж҃е́ственное смотре́нїе, и҆́мже спа́слъ є҆сѝ мі́ръ пою́щїй тѧ̀.

И҆ ны́нѣ, бг҃оро́диченъ:

[Ѡ] Ꙗ҆́кѡ стра́шное твоѐ ржⷭ҇тво̀ непоро́чнаѧ, и҆́мже всѝ стра́шнагѡ паде́нїѧ и҆зба́влени бы́хомъ, зовꙋ́ще: ра́дꙋйсѧ <<тв҃і ѡ҆б.: 624>> всѣ́хъ человѣ́кѡвъ предста́тельнице, ра́дꙋйсѧ мі́ра па́дшагѡ воззва́нїе.

Пѣ́снь ѳ҃.

І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.

[И] Просте́рлсѧ є҆сѝ во́лею на крⷭ҇тѣ̀, и҆ со́лнце зрѧ̀ тебѐ пребл҃гі́й, стра́хомъ скры̀ лꙋчы̀, и҆ поколеба́шасѧ землѝ ѡ҆снова̑нїѧ, и҆ ка́менїе распаде́сѧ, влⷣко, и҆ цр҃ко́внаѧ завѣ́са раздра́сѧ.

[М] Пома́завъ тѧ̀ дре́вле і҆ѡ́сифъ, и҆ плащани́цею ѡ҆бви́въ, положѝ въ но́вѣмъ гро́бѣ, жи́знь сꙋ́щꙋю всѣ́хъ, и҆ воскре́слъ є҆сѝ тридне́внѡ, и҆стощи́въ а҆́дѡва ца̑рствїѧ бж҃е́ственною си́лою всемогі́й.

Сла́ва:

[Ѡ] Ви́дѣнъ бы́лъ є҆сѝ а҆пⷭ҇лы, и҆з̾ гро́ба воста́въ тридне́внѡ, и҆ возопи́лъ є҆сѝ: и҆ди́те дрꙋ́зи и҆ ᲂу҆ченицы̀ моѝ, проповѣ́дите во всѣ́хъ ꙗ҆зы́цѣхъ, ꙗ҆̀же ви́дѣсте чꙋдеса̀, и҆ ю҆́же па́че сло́ва си́лꙋ мою̀.

И҆ ны́нѣ, бг҃оро́диченъ:

[Н] Мє́ртвымъ вдыха́ющаго жи́знь, ꙗ҆́коже ви́дѣ всенепоро́чнаѧ, и҆з̾ гро́ба воста́вша со сла́вою, и҆спо́лнисѧ ра́дости, зовꙋ́щи: сн҃е мо́й и҆ бж҃е мо́й, велича́ю твоѐ є҆́же па́че сло́ва снизхожде́нїе. <<тг҃і: 625>>

Во вто́рникъ пѧ́тыѧ недѣ́ли по па́сцѣ,

трипѣ́снецъ, є҆гѡ́же краестро́чїе сїѐ: Пѣснопѣ́нїе і҆ѡ́сифово. Гла́съ д҃.

Пѣ́снь в҃.

І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ, ᲂу҆мерщвлѧ́ѧ и҆ животворѧ́й, дарова́вый во́дꙋ и҆з̾ ка́мене несѣко́ма, и҆ ѡ҆дожди́вый ма́ннꙋ на пи́щꙋ лю́демъ і҆и҃лєвымъ, ꙗ҆́кѡ си́ленъ.

[Ѵ] Воздви́же ѕмі́а мѡѷсе́й, распѧ́тїе твоѐ воѡбража́ѧ дре́вле на горѣ̀ сїна́йстѣй, распны́йсѧ на́съ ра́ди, и҆ ѕмїины̀ вражды̀ и҆ ꙗ҆́да и҆збавлѧ́ѧй человѣ́ки, и҆ сокрꙋши́вый главꙋ̀ всегꙋби́тельнꙋю.

[М] Мѵ́ры со слеза́ми носѧ́ще, теча́хꙋ къ бж҃е́ственномꙋ гро́бꙋ со тща́нїемъ мѷронѡ́сицы ра́нѡ ѕѣлѡ̀, ꙗ҆́коже бг҃огла́сный речѐ, и҆ блиста́ющасѧ зра́комъ и҆ ѻ҆де́ждею ви́дѣвше ю҆́ношꙋ, стра́хомъ ᲂу҆жаса́хꙋсѧ.

Сла́ва:

[Н] Недꙋ́ги и҆сцѣлѧ́юща сло́вомъ, разсла́блєнныѧ и҆справлѧ́юща и҆ воскреша́юща мє́ртвыѧ сло́ве, є҆вре́йстїи лю́дїе ѡ҆сꙋди́ша ᲂу҆мре́ти: но воскре́слъ є҆сѝ ꙗ҆́кѡ бг҃ъ си́ленъ въ крѣ́пости, а҆́дово разрꙋши́въ ца́рствїе.

И҆ ны́нѣ, бг҃оро́диченъ:

[Ѡ] Ꙗ҆ви́сѧ воплоща́емь, всечи́стаѧ, неизрече́ннѡ ѿ твои́хъ крове́й, пресꙋ́щественный бг҃ъ, и҆ вмѣни́всѧ въ мертвецѣ́хъ, всѣ́хъ сы́й жи́знь, воскре́се держа́внѡ: є҆го́же ви́дѣвши и҆спо́лниласѧ є҆сѝ ра́дости, сего̀ велича́ющи.

Пѣ́снь и҃.

І҆рмо́съ: Во ѻ҆гнѝ пла́меннѣмъ предстоѧ́тъ тебѣ̀ херꙋві́ми, серафі́ми гдⷭ҇и, и҆ всѧ̀ тва́рь пѣ́снь тебѣ̀ пое́тъ <<тг҃і ѡ҆б.: 626>> кра́снꙋю: по́йте, благослови́те, лю́дїе превозвоси́те хрⷭ҇та̀, є҆ди́наго содѣ́телѧ во всѧ̀ вѣ́ки.

[Д] Раздры́й рꙋкописа́нїе а҆да́мово крⷭ҇то́мъ гдⷭ҇и, благослове́нїе ны́нѣ и҆сточи́лъ є҆сѝ на́мъ, клѧ́тва во́лею хрⷭ҇тѐ бы́въ: тѣ́мже тѧ̀ благослови́мъ при́снѡ во вѣ́ки.

[І] Ви́дѣ собо́ръ ᲂу҆чени́ческїй гдⷭ҇и, воста́вша тѧ̀ и҆з̾ ме́ртвыхъ, и҆ ᲂу҆тѣше́нїѧ и҆спо́лнисѧ та́йнагѡ, къ немꙋ́же вопїѧ́лъ є҆сѝ: ви́дѧще бг҃а животода́вца, и҆ди́те, речѐ, проповѣ́дите мѧ̀ всѣ́хъ цр҃ѧ̀.

Сла́ва:

[А] Воспѣва́емъ твоѐ распѧ́тїе честно́е, і҆и҃се благоꙋтро́бне, славосло́вимъ погребе́нїе, и҆ стра́шное воскресе́нїе вѣ́рою, и҆́мже ѿ а҆́довыхъ разрѣши́хомсѧ нерѣши́мыхъ ᲂу҆́зъ, хрⷭ҇тѐ бж҃е всѣ́хъ.

И҆ ны́нѣ, бг҃оро́диченъ:

[І] І҆и҃са, є҆го́же воплоти́ла є҆сѝ па́че сло́ва чⷭ҇таѧ влⷣчце, воста́вша ви́дѣвши ѿ ме́ртвыхъ, вопїѧ́ла є҆сѝ: что̀ кра́снаѧ добро́та твоѧ̀ сн҃е мо́й, є҆ѧ́же ра́ди къ дре́внѣй а҆да́мъ ны́нѣ взы́де добро́тѣ;

Пѣ́снь ѳ҃.

І҆рмо́съ: Ꙗ҆́кѡ сотворѝ мнѣ̀ вели̑чїѧ си́льный, и҆ ст҃о и҆́мѧ є҆гѡ̀, и҆ ми́лость є҆гѡ̀ въ ро́дъ и҆ ро́дъ боѧ́щымсѧ є҆гѡ̀.

[Ѡ] Ꙗ҆́кѡ возне́слсѧ є҆сѝ на дре́во пригвожда́емь на крⷭ҇тѣ̀, свѣти̑ла скры́ша свѣ́тъ, и҆ трѧса́шесѧ землѧ̀, и҆ сꙋ́щїи во а҆́довыхъ ᲂу҆́захъ свобожда́хꙋсѧ сп҃се.

[С] Сокрꙋши́вый сме́рти врата̀ хрⷭ҇тѐ и҆ ᲂу҆́зы, воскре́слъ є҆сѝ со сла́вою держа́внѡ, восхи́тивъ ꙗ҆̀же пе́рвѣе и҆мѧ́ше ᲂу҆́зники, ꙗ҆́кѡ бг҃а пѣсносло́вѧщыѧ тѧ̀. <<тд҃і: 627>>

Сла́ва:

[И] Землѧ̀ торжествꙋ́етъ, и҆ пра́зднꙋетъ не́бо воста́нїе всѣ́хъ творца̀, и҆́мже спасѐ на́съ ѿ ᲂу҆́зъ и҆ тлѝ пѣсносло́вѧщихъ є҆го̀.

И҆ ны́нѣ, бг҃оро́диченъ:

[Ф] Свѣ́та твоегѡ̀ зарѧ́ми бцⷣе, разорѝ моегѡ̀ невѣ́дѣнїѧ мглꙋ̀, ꙗ҆́кѡ да вѣ́рою гла́сы пѣсносло́влю непреста́ннѡ твоѧ̑ чꙋдеса̀.

Въ четверто́къ пѧ́тыѧ недѣ́ли по па́сцѣ,

трипѣ́снецъ, є҆гѡ́же краестро́чїе: Пѣ́снь бг҃ꙋ подоба́етъ. Гла́съ д҃.

Пѣ́снь д҃.

І҆рмо́съ: Любвѐ ра́ди ще́дре твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ человѣколю́бче, крѣ́пость моѧ̀ и҆ хвале́нїе.

[Ѡ] Ꙗ҆́кѡ воздви́глсѧ є҆сѝ во́лею на дре́во, и҆ землѧ̀ и҆ го́ры и҆ хо́лми поколеба́шасѧ тре́петомъ, стра́ждꙋща тѧ̀ ви́дѧще, ще́дре долготерпѣли́ве.

[Д] Оу҆боѧ́всѧ твоегѡ̀, сп҃се, сни́тїѧ а҆́дъ, мє́ртвыѧ ꙗ҆̀же и҆мѧ́ше, подава́ше вско́рѣ, пѣсносло́вѧщыѧ твою̀ неизрече́ннꙋю си́лꙋ.

Сла́ва:

[И] Неразꙋ́мный зрѧ̀ тѧ̀ є҆вре́йскїй собо́ръ ще́дре, слѣпы̑мъ ѻ҆́чи даю́ща, ᲂу҆бива́ше сꙋ́щаго жи́знь и҆ воскресе́нїе.

И҆ ны́нѣ, бг҃оро́диченъ:

[Ѳ] Ви́дѣвши и҆з̾ гро́ба воста́вша твоего̀ сн҃а дв҃о, со а҆по́столы ѡ҆ не́мъ ра́доваласѧ є҆сѝ чи́стаѧ: съ ни́ми же тѧ̀ сла́вимъ. <<тд҃і ѡ҆б.: 628>>

Пѣ́снь и҃.

І҆рмо́съ: Всѧ̀ дѣла̀ бж҃їѧ, и҆ всѧ̀ тва́рь благослови́те гдⷭ҇а, ꙗ҆́кѡ человѣ́кѡмъ ѿ землѝ возсїѧ̀ свѣ́тъ, и҆ вселе́ннꙋю всю̀ просвѣтѝ, и҆ жи́знь вѣ́чнꙋю мі́рꙋ дарова̀, по́йте лю́дїе, и҆ превозноси́те є҆го̀ во вѣ́ки.

[Е] На крⷭ҇тѣ̀ тѧ̀ ви́дѣвъ разбо́йникъ благоразꙋ́мный, помѧни́ мѧ, взыва́ше, влⷣко, ᲂу҆диви́всѧ си́лѣ твое́й, и҆ є҆́же па́че ᲂу҆ма̀ твоемꙋ̀ стра́шномꙋ смотре́нїю.

[Ѡ] Ꙗ҆ви́лсѧ є҆сѝ хрⷭ҇тѐ жена́мъ, ра́дꙋйтесѧ, глаго́лѧ, ми́лостивнѡ ꙗ҆́кѡ человѣколю́бецъ, ско́рбь ꙗ҆́вѣ ᲂу҆толѧ́ѧ, и҆ радостнотворѧ̀ человѣ́ки твои́мъ воста́нїемъ.

Сла́ва:

[П] Дре́вле слѣпо́мꙋ ѿ рожде́нїѧ, ꙗ҆́коже дарова́лъ є҆сѝ свѣ́тъ, свѣтода́вче і҆и҃се: си́це и҆ мнѣ̀ сердє́чныѧ зѣ̑ницы ѿве́рзи, разꙋмѣ́ти свѣ́тъ твои́хъ повелѣ́нїй.

И҆ ны́нѣ, бг҃оро́диченъ:

[Р] И҆зба́ви мѧ̀ ѻ҆гнѧ̀ гее́нскагѡ, и҆ вѣ́чнагѡ ѡ҆сꙋжде́нїѧ чи́стаѧ, ᲂу҆тишѝ помышле́нїй мои́хъ свирѣ́пое волне́нїе, и҆ напра́ви къ ти́хомꙋ жи́зни приста́нищꙋ.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стества̀: тѣ́мъ веселѧ́щесѧ, тѧ̀ бцⷣе велича́емъ.

[Е] Просте́рлъ є҆сѝ дла̑ни на дре́вѣ, пе́рвыѧ снѣ́ди дре́ва влⷣко рꙋ́кꙋ просте́ршꙋюсѧ, дꙋшетлѣ́нна вре́да и҆сцѣлѧ́ѧ: тѣ́мже непостижи́мое смотре́нїе твоѐ сла́вимъ.

[П] Врата̀ и҆ верєѝ сме́рти сни́тїемъ твои́мъ сокрꙋ́шь, <<тє҃і: 629>> а҆́дова ца̑рствїѧ всѧ̀ твое́ю си́лою сп҃се и҆стощи́лъ є҆сѝ, и҆ воскре́съ тридне́внѡ, вселе́ннꙋю просвѣти́лъ є҆сѝ.

Сла́ва:

[Е] Ре́клъ є҆сѝ сп҃се, ꙗ҆́вльсѧ твои̑мъ ст҃ы̑мъ а҆пⷭ҇лѡмъ по воскресе́нїи: мі́ръ прете́кше вѣ́рою проповѣ́дите, ꙗ҆́же во мнѣ̀ ви́дѣсте стра̑шнаѧ, и҆ неизречє́ннаѧ та̑инства.

И҆ ны́нѣ, бг҃оро́диченъ:

[І] Ви́дѣла є҆сѝ хрⷭ҇та̀ воста́вша, съ жена́ми мѷроно́сицами, и҆ преложи́вши рыда́нїе въ ра́дость, сего̀ сла́вила є҆сѝ: тѣ́мже велегла́снѡ тѧ̀ бг҃ороди́тельнице велича́емъ.

Въ пѧто́къ пѧ́тыѧ недѣ́ли по па́сцѣ,

трипѣ́снецъ, є҆гѡ́же краестро́чїе: Сла́ва бг҃ꙋ, а҆ми́нь. Гла́съ д҃.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а всѣ̑мъ воспѣва́ющымъ тѧ̀ ми́ръ подава́ющаѧ.

[Д] Свѧзꙋ́емь влⷣко, и҆ на дре́вѣ пригвожда́емь, разрѣши́лъ мѧ̀ є҆сѝ ᲂу҆́зъ грѣхо́вныхъ, и҆ любвѝ твое́й пригвозди́лъ є҆сѝ: тѣ́мже благода́рнѡ твоѐ пою̀ вели́чїе, и҆ несказа́ннꙋю си́лꙋ.

[О] Ꙗ҆ви́вшꙋсѧ тебѣ̀ сп҃се во а҆́дѣ, дре́вле ѡ҆сꙋжде́нный а҆да́мъ разрѣши́сѧ ѡ҆сꙋжде́нїѧ, и҆ многолѣ́тныхъ ᲂу҆́зъ, вопїѧ̀: сла́ва мно́зѣй твое́й сло́ве бла́гости, і҆и҃се многоми́лостиве. <<тє҃і ѡ҆б.: 630>>

Сла́ва:

[Ѯ] Стра́ннѡ ꙗ҆влѧ́етсѧ жена́мъ а҆́гг҃лъ, внꙋ́трь сѣдѧ̀ гро́ба, и҆ возгласѝ: что̀ прїидо́сте ра́нѡ и҆ска́ти; хрⷭ҇то́съ воскре́се, ᲂу҆мертви́въ сме́рть.

И҆ ны́нѣ, бг҃оро́диченъ:

[А] Ст҃а́ѧ всенепоро́чнаѧ, во ст҃ы́хъ ст҃а́го препочива́ющаго роди́вшаѧ, сего̀ ꙗ҆́кѡ ви́дѣла є҆сѝ и҆з̾ гро́ба возсїѧ́вша, ꙗ҆́кѡ жениха̀ и҆з̾ черто́га, пѣ́сньми велича́ла є҆сѝ сегѡ̀ снизхожде́нїе.

Пѣ́снь и҃.

І҆рмо́съ: Ѻ҆́троки благочєсти́выѧ въ пещѝ, ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̀ вѣ́ки.

[Т] Во а҆да́мѣ помраче́нное є҆стество̀, чл҃вѣколю́бче, назида́ѧ, просте́рлъ є҆сѝ дла̑ни твоѧ̀ на дре́вѣ пригвожда́емь, и҆ въ ре́бра пречи̑стаѧ и҆скопова́емь. тѣ́мже мно́гое бл҃гоꙋтро́бїе твоѐ пѣсносло́вимъ во всѧ̀ вѣ́ки.

[Ѡ] Ꙗ҆́кѡ ви́дѣ тебѐ до́лꙋ а҆́дъ, плѣнѧ́юща сегѡ̀ ца̑рствїѧ, ꙗ҆̀же дре́вле поглотѝ, стра́хомъ твои́мъ ᲂу҆мерщвлѧ́емь, мє́ртвыѧ даѧ́ше всѧ̑ сло́ве, зовꙋ́щыѧ: гдⷭ҇а по́йте дѣла̀, и҆ превозноси́те є҆го̀ во вѣ́ки.

[Ѳ] Рыда́ющымъ вопїѧ́ше мѷроно́сицамъ на ка́мени сѣдѧ́й а҆́гг҃лъ: те́кше возвѣсти́те ᲂу҆ч҃нкѡ́мъ воста́нїе жизнода́вца: ᲂу҆же́ бо вои́стиннꙋ воста̀, а҆́дово низложи́въ мꙋчи́тельство, и҆ дїа́волю сте́ръ ѕло́бꙋ.

Сла́ва, трⷪ҇ченъ:

[Е] Є҆ди́наго тѧ̀ сла́вѧ сꙋщество́мъ, трⷪ҇цꙋ же <<тѕ҃і: 631>> проповѣ́дꙋю ли́цы, є҆ди́но бж҃ество̀, ѻ҆ц҃а̀ пребезнача́льна, сн҃а и҆ дх҃а ст҃а́го, вопїѧ̀ всегда̀: гдⷭ҇а по́йте дѣла̀, и҆ превозноси́те є҆го̀ во вѣ́ки.

И҆ ны́нѣ, бг҃оро́диченъ:

[Ѡ] Ꙗ҆́кѡ ꙗ҆ви́сѧ бг҃ъ и҆з̾ тебѐ дв҃о, не разрꙋшѝ всѧ́кѡ дѣ́вства зна́менїѧ, та́кѡ воста̀, ка́меню запечатлѣ̑нїѧ ѡ҆ста́ви непоколе́блєма. є҆го́же ви́дѣвши ра́дости и҆спо́лниласѧ є҆сѝ, благословѧ́щи сегѡ̀ бж҃е́ственнꙋю си́лꙋ во всѧ̀ вѣ́ки.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ всеблаже́ннаѧ бцⷣе, чи́стаѧ приснодв҃о.

[А] Горѣ̀ возше́дъ на высотꙋ̀ крⷭ҇та̀, во́лею долготерпѣли́ве, привле́клъ є҆сѝ человѣ́ка ѿ про́пастей па́гꙋбы къ свѣ́тꙋ: положи́въ же сѧ во гро́бѣ жи́знь сы́й хрⷭ҇тѐ, во гробѣ́хъ спѧ́щыѧ воздви́глъ є҆сѝ, честны́мъ и҆ сла́внымъ воста́нїемъ твои́мъ.

[М] Мѵ́ро тебѣ̀ ли́къ же́нскїй приноша́ше, жи́зни нача́льникꙋ: и҆ смотри́въ тѧ̀ воста́вша, бл҃говѣстѝ ᲂу҆ч҃нкѡ́мъ воста́нїе, собра̑ннымъ вкꙋ́пѣ и҆ пла́чꙋщымъ, и҆̀же ви́дѣвше тѧ̀, просвѣще́нїѧ и҆ ра́дости и҆спо́лнишасѧ.

Сла́ва:

[И] Сл҃нце хрⷭ҇тѐ, во а҆́дѣ бы́въ съ дꙋше́ю ꙗ҆́кѡ бг҃ъ, та́мѡ спѧ́щымъ ѡ҆кова̑ннымъ ѿ вѣ́ка, тво́й свѣ́тъ возсїѧ́лъ є҆сѝ, и҆ воскреси́лъ є҆сѝ ст҃ы́мъ воскрⷭ҇нїемъ твои́мъ воспѣва́ющихъ твою̀ бл҃гость. <<тѕ҃і ѡ҆б.: 632>>

И҆ ны́нѣ, бг҃оро́диченъ:

[Н] Ма́нїемъ всѧ̑ дв҃о носѧ́щаго бг҃а родила̀ є҆сѝ, человѣ́ка бы́вша за благоꙋтро́бїе бг҃ора́дованнаѧ: є҆го́же прилѣ́жнѡ молѝ, просвѣти́ти на́ша сердца̀, блажа́щихъ тѧ̀ вои́стиннꙋ, ꙗ҆́кѡ чи́стꙋю бг҃ома́терь.

Въ сꙋббѡ́тꙋ пѧ́тыѧ недѣ́ли по па́сцѣ,

четверопѣ́снецъ. є҆гѡ́же краестро́чїе: Пою̀ пѣ́нїе четве́ртое. Гла́съ д҃.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

[А] Просте́ръ на крⷭ҇тѣ̀ пречи́стѣи дла̑ни твоѝ, мы́сленнаго распѧ́лъ є҆сѝ а҆мали́ка бж҃е́ственною си́лою твое́ю, и҆ мі́ръ и҆зба́вилъ є҆сѝ ѿ рабо́ты, хрⷭ҇тѐ бж҃е на́шъ.

[Д] Сокрꙋши́вый стра́шнымъ сни́тїемъ а҆́дъ, хрⷭ҇тѐ, и҆ ꙗ҆̀же держа́ше ю҆́зники бж҃е́ственною восхи́тивъ си́лою, воскре́слъ є҆сѝ ꙗ҆́кѡ бг҃ъ и҆з̾ гро́ба тридне́внѡ.

Сла́ва:

[Ѡ] Ꙗ҆́кѡ прїидо́ша ко гро́бꙋ жєны̀, пома́зати тѧ̀ безцѣ́нное мѵ́ро, къ ни́мъ а҆́гг҃лъ вопїѧ́ше: не пла́чите, є҆гѡ́же и҆́щете, воста̀ гдⷭ҇ь.

И҆ ны́нѣ, бг҃оро́диченъ:

[М] Не ктомꙋ̀ бг҃ома́ти дв҃о рыда́й, сн҃ъ бо тво́й воскре́се, ꙗ҆́кѡ бг҃ъ, тридне́внѡ и҆з̾ гро́ба: но ра́дꙋйсѧ, и҆ молѝ є҆го̀ спасти́сѧ на́мъ. <<тз҃і: 633>>

Пѣ́снь з҃.

І҆рмо́съ: Спасы́й во ѻ҆гнѝ а҆враа̑мскїѧ твоѧ̑ ѻ҆́троки и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и бж҃е ѻ҆ц҃ъ на́шихъ, бл҃гослове́нъ є҆сѝ.

[Е] На ло́бнѣмъ на́съ ра́ди, посредѣ̀ разбѡ́йникꙋ повѣ́шенъ бы́въ на крⷭ҇тѣ̀, и҆ вла̑сти тмы̀ на се́мъ ᲂу҆праздни́лъ є҆сѝ всеси́льне гдⷭ҇и, бж҃е ѻ҆ц҃ъ на́шихъ, бл҃гослове́нъ є҆сѝ.

[Л] Копїе́мъ въ ре́бра прободе́нъ, и҆сточи́лъ є҆сѝ на́мъ животода́вче, ѿ и҆сто́чника приснотекꙋ́щагѡ твоеѧ̀ бж҃е́ственныѧ кро́ве хрⷭ҇тѐ, зовꙋ́щымъ: препѣ́тый гдⷭ҇и бж҃е ѻ҆ц҃є́въ, бл҃гослове́нъ є҆сѝ.

Сла́ва:

[О] Блиста́ѧйсѧ ѻ҆де́ждою а҆́гг҃лъ, рыда́ющымъ вопїѧ́ше жена́мъ: что̀ ꙗ҆́кѡ ме́ртва со бл҃гоꙋха́ньми и҆́щете, и҆мꙋ́щагѡ животꙋ̀ вла́сть хрⷭ҇та̀; воскре́се ꙗ҆́кѡ же речѐ и҆ пре́жде стра́сти.

И҆ ны́нѣ, бг҃оро́диченъ:

[С] Пло́ть прїѧ́тъ и҆з̾ тебѐ чи́стаѧ, содержа́й тва́рь всю̀, и҆ землѝ концы̀, и҆ ᲂу҆мре́ти на́съ ра́ди и҆зво́ли: є҆го́же зрѧ́щи воскре́сша со сла́вою ѿ гро́ба, возвесели́сѧ.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те всѧ̀ дѣла̀ гдⷭ҇нѧ гдⷭ҇а.

[Т] Ꙗ҆́звою влⷣко твое́ю всѐ и҆сцѣли́лъ є҆сѝ человѣ́чество сп҃се, претерпѣ́въ же сме́рть, сїѐ ѿ тлѣ́нїѧ свободи́лъ є҆сѝ твое́ю сме́ртїю бл҃же, и҆ на́съ ѡ҆безсме́ртилъ є҆сѝ <<тз҃і ѡ҆б.: 634>> вопїю́щихъ: всѧ̀ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.

[Е] Весели́тесѧ всѝ лю́дїе, земна̑ѧ всѧ̀ ра́дꙋйтесѧ ны́нѣ и҆ нбⷭ҇наѧ: жизнода́вецъ бо гдⷭ҇ь воскре́се ѿ гро́ба, совоскреси́въ на́ше є҆стество̀, зовꙋ́щее: блгⷭ҇ви́те всѧ̀ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.

Сла́ва:

[Т] Мꙋчи́телѧ свѧза́въ хрⷭ҇тѐ сни́тїемъ твои́мъ, положи́всѧ во гро́бѣ, мертвецы̀ воздви́глъ є҆сѝ всѧ̑, бл҃года́рнѡ воспѣва́ющыѧ тѧ̀, бл҃годѣ́телѧ всѣ́хъ и҆ вседержи́телѧ: бл҃гослови́те всѧ̀ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки.

И҆ ны́нѣ, бг҃оро́диченъ:

[А] А҆да́ма па́дшагѡ во є҆де́мѣ, разрѣши́ти смѣше́нїе чⷭ҇таѧ хотѧ̀, всеси́льный гдⷭ҇ь воплоти́сѧ и҆з̾ тебѐ пречⷭ҇таѧ, распѧ́тсѧ же и҆ погребе́сѧ: воскре́се спаса́ѧй на́съ, любо́вїю тебѐ воспѣва́ющихъ, мр҃і́е бг҃оневѣ́сто.

Пѣ́снь ѳ҃.

І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.

[Р] Раздра́сѧ твои́мъ є҆́же на крⷭ҇тъ, долготерпѣли́ве, воздви́женїемъ завѣ́са, и҆ со́лнце сокры̀ лꙋчы̀, разсѣда́емо же ка́менїе, показа́ше непра́ведное заколе́нїе, є҆́же претерпѣ́лъ є҆сѝ сп҃се во́лею за ро́дъ человѣ́ческїй.

[Т] Прободе́нъ копїе́мъ і҆и҃се человѣколю́бче на дре́вѣ, и҆сцѣли́лъ є҆сѝ ᲂу҆ѧзви́вшагосѧ престꙋпле́нїемъ а҆да́ма, въ <<ти҃і: 635>> раѝ долготерпѣли́ве: положе́нъ же въ ме́ртвыхъ, ꙗ҆́кѡ безсме́ртенъ всѧ̑ и҆зве́лъ є҆сѝ воспѣва́ющыѧ тѧ̀.

Сла́ва:

[О] Всѧ̑ дла́нїю содержа́й, и҆ ма́нїемъ стро́ѧй подсо́лнечнꙋю, ка́кѡ въ ме́ртвыхъ вмѣни́лсѧ є҆сѝ безсме́ртенъ сы́й, хотѧ̀ и҆зба́вити ᲂу҆ѧ́звєнныѧ ᲂу҆грызе́нїемъ ѕмїи́нымъ; тебѐ воспѣва́емъ ꙗ҆́кѡ чл҃вѣколю́бца.

И҆ ны́нѣ, бг҃оро́диченъ:

[Н] Ме́ртва и҆ на́га твоего̀ сн҃а, ви́сѧща на дре́вѣ зрѧ́щи, болѣ́ла є҆сѝ: а҆́бїе же сего̀ воскре́сша тридне́внѡ ви́дѧщи, весели́ласѧ є҆сѝ всенепоро́чнаѧ ꙗ҆́кѡ ма́ти, моли́сѧ ѡ҆ вѣ́рою почита́ющихъ тѧ̀.

Въ понедѣ́льникъ шесты́ѧ недѣ́ли по па́сцѣ,

трипѣ́снецъ, є҆гѡ́же краегране́сїе: Сла́ва бг҃ꙋ подоба́етъ. Гла́съ є҃.

Пѣ́снь а҃.

І҆рмо́съ: Пои́мъ гдⷭ҇ви, сотво́ршемꙋ ди̑внаѧ чꙋдеса̀ въ чермнѣ́мъ мо́ри, пѣ́снь побѣ́днꙋю: ꙗ҆́кѡ просла́висѧ.

[Д] Твои́мъ чⷭ҇тны́мъ крⷭ҇то́мъ гдⷭ҇и, дре́внїѧ клѧ́твы всѝ и҆зба́вихомсѧ: тѣ́мже твою̀ сла́вимъ бл҃гость.

[О] Распны́йсѧ во́лею воста̀, сокрѡ́вища всѧ̑ плѣнѝ сме́рти, хрⷭ҇то́съ сп҃съ на́шъ: того̀ прославлѧ́емъ.

Сла́ва:

[Ѯ] Стра́ненъ зра́къ ви́дѣвше блиста́ющъ мѷронѡ́сицы а҆́гг҃ла, бж҃е́ственное мнѧ́хꙋ зижди́телѧ воскресе́нїе, ра́дости и҆сполнѧ́ющесѧ. <<ти҃і ѡ҆б.: 636>>

И҆ ны́нѣ, бг҃оро́диченъ:

[А] Восто́къ дв҃о пречи́стаѧ была̀ є҆сѝ сл҃нца пра́вды, и҆́мже неразꙋ́мїѧ тмы̀ и҆зба́вихомсѧ.

Пѣ́снь и҃.

І҆рмо́съ: Творца̀ тва́ри, є҆гѡ́же ᲂу҆жаса́ютсѧ а҆́гг҃ли, по́йте лю́дїе, и҆ превозноси́те во всѧ̀ вѣ́ки.

[Ѳ] Бг҃а пло́тїю распина́ема со́лнце ви́дѣвше помрачи́сѧ, и҆ землѧ̀ поколеба́сѧ, и҆ ка́менїе распаде́сѧ.

[Е] И҆з̾ ме́ртвыхъ тридне́венъ хрⷭ҇то́съ воста̀, и҆ совозста́ви всѧ̑, во тмѣ̀ и҆ сѣ́ни сме́ртнѣй сѣдѧ́щыѧ.

[Ѡ] Ꙗ҆ви́лсѧ є҆сѝ по воста́нїи твое́мъ а҆по́столѡмъ, и҆ и҆спо́лнилъ є҆сѝ си́хъ весе́лїѧ неизглаго́ланнагѡ ще́дре.

Сла́ва:

[П] Ѻ҆ц҃а̀ прест҃а́го, сло́ва соприсносꙋ́щна, и҆ дх҃а бж҃їѧ несозда́нна, трⷪ҇цꙋ пое́мъ непреста́ннѡ.

И҆ ны́нѣ, бг҃оро́диченъ:

[Р] И҆зба́ви на́съ мꙋ́ки, и҆ вѣ́чнагѡ ѡ҆сꙋжде́нїѧ, тебѐ воспѣва́ющихъ, бг҃ороди́тельнице чи́стаѧ.

Пѣ́снь ѳ҃.

І҆рмо́съ: Тѧ̀ бл҃же́ннꙋю въ жена́хъ, и҆ бл҃гослове́ннꙋю бг҃омъ, человѣ́ческїй ро́дъ пѣ́сньми велича́емъ.

[Е] Просте́рлъ є҆сѝ дла̑ни на крⷭ҇тѣ̀, просте́ртаго мѧ̀ мно́гими кова́рствы льсти́вагѡ, ще́дре, прїѡбрѣта́ѧ.

[П] Всѧ̑ совоскреси́лъ є҆сѝ бл҃же, соше́дъ во а҆́дскаѧ врата̀ хрⷭ҇тѐ, и҆ совоздви́глъ є҆сѝ пою́щыѧ чл҃вѣколю́бче твою̀ си́лꙋ.

Сла́ва:

[Е] И҆сточи́лъ є҆сѝ хрⷭ҇тѐ мє́ртвымъ живо́тъ, и҆ воскре́съ <<тѳ҃і: 637>> тридне́венъ, возне́слсѧ є҆сѝ во сла́вѣ, зрѧ́щымъ честны́мъ ᲂу҆ченикѡ́мъ.

И҆ ны́нѣ, бг҃оро́диченъ:

[І] Ми́лостива на́мъ содѣ́лай пречⷭ҇таѧ дв҃о, твоего̀ сн҃а и҆ бг҃а всѣ́хъ, вѣ́рою воспѣва́ющымъ тѧ̀.

Во вто́рникъ шесты́ѧ недѣ́ли по па́сцѣ,

трипѣ́снецъ, гла́съ є҃. Творе́нїе і҆ѡ́сифово, є҆гѡ́же краестро́чїе: Пѣснопѣ́нїе сїѐ і҆ѡ́сифово.

Пѣ́снь в҃.

І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ, въ пло́ть ѡ҆блекі́йсѧ во́лею свое́ю, да спасꙋ̀ а҆да́ма ѿ ле́сти па́дшаго въ престꙋпле́нїе ѕмі́емъ.

[Ѡ] Ꙗ҆́коже воздви́же дре́вле ѕмі́а мѡѷсе́й, та́кѡ на дре́во воздви́глсѧ є҆сѝ ще́дре, льсти́вагѡ врага̀ ꙗ҆́дъ ѕмїи́нъ и҆ ѕло́бꙋ ѿгонѧ́ѧ, и҆ спаса́ѧ на́съ.

[Д] Сла́ва сла́вѣ твое́й препросла́вленне і҆и҃се, положи́въ бо сѧ во гро́бѣ ꙗ҆́кѡ ме́ртвъ во́лею, воскре́слъ є҆сѝ ꙗ҆́кѡ бг҃ъ, и҆ совоздви́глъ є҆сѝ мі́ръ твои́мъ воста́нїемъ, ꙗ҆́кѡ всеси́ленъ.

Сла́ва:

[И] Сѐ воста̀ животода́вецъ и҆з̾ ме́ртвыхъ, вопїѧ́ше жена́мъ дре́вле а҆́гг҃лъ блиста́ѧйсѧ: не пла́читесѧ ᲂу҆́бѡ про́чее, но а҆пⷭ҇лѡмъ сїѐ воста́нїе возвѣсти́те.

И҆ ны́нѣ, бг҃оро́диченъ:

[А] Ст҃ы́й гдⷭ҇и, ѿ дв҃ы чⷭ҇тыѧ рожде́йсѧ, распе́нсѧ же и҆ <<тѳ҃і: 637>> во́лею погребе́нъ, и҆ воскресы́й и҆з̾ ме́ртвыхъ, тоѧ̀ мольба́ми твою̀ млⷭ҇ть всѣ̑мъ низпослѝ.

Пѣ́снь и҃.

І҆рмо́съ: Творца̀ тва́ри, є҆гѡ́же ᲂу҆жаса́ютсѧ а҆́гг҃ли, по́йте лю́дїе, и҆ превозноси́те во всѧ̀ вѣ́ки.

[Ѵ] Пѣсносло́вимъ твоѐ хрⷭ҇тѐ, тридне́вное погребе́нїе, и҆ пресвѣ́тлое воскресе́нїе, вѣ́рою при́снѡ восхвалѧ́емъ.

[Т] Распе́ншагосѧ на́съ ра́ди, и҆ положи́вшагосѧ во гро́бѣ, и҆ свои́мъ воста́нїемъ просвѣти́вшаго мі́ръ, хрⷭ҇та̀ славосло́вимъ.

Сла́ва:

[И] Со́лнце незаходи́мое хрⷭ҇тѐ, погребы́йсѧ и҆ воскресы́й и҆з̾ ме́ртвыхъ, просвѣтѝ всѣ́хъ на́съ помышлє́нїѧ, сла́вити тѧ̀ непреста́ннѡ.

И҆ ны́нѣ, бг҃оро́диченъ:

[І] Мольбꙋ̀ и҆з̾ тебѐ воплоти́вшемꙋсѧ сло́вꙋ, сотворѝ бцⷣе дв҃о, ꙗ҆́кѡ да на́съ ᲂу҆ще́дритъ смире́нныхъ.

Пѣ́снь ѳ҃.

І҆рмо́съ: Велича́емъ хрⷭ҇тѐ, твою̀ всенепоро́чнꙋю мт҃рь чⷭ҇тꙋю, ꙗ҆́кѡ роди́ тѧ преесте́ственнѡ пло́тїю, ѿ всѧ́кїѧ льстѝ и҆ тлѝ на́съ и҆збавлѧ́ѧй.

[Ѡ] Ꙗ҆́кѡ а҆́гнецъ на заколе́нїе приведе́сѧ влⷣко хрⷭ҇тѐ бж҃е, и҆ ꙗ҆́звами твои́ми, ꙗ҆̀же во́лею претерпѣ́лъ є҆сѝ, бѣсѡ́въ всѧ́кое лꙋка́вое мно́жество ᲂу҆ѧзви́лъ є҆сѝ.

[С] Сокрꙋши́шасѧ верєѝ а҆́дѡвы прише́ствїемъ твои́мъ хрⷭ҇тѐ, и҆ воста́ша ѿ вѣ́ка и҆стлѣ́вшїи, воспѣва́юще тѧ̀ ꙗ҆́кѡ побѣди́телѧ, и҆ всѣ́ми владꙋ́щаго. <<т҃к: 639>>

Сла́ва:

[И] Ст҃о́е твоѐ хрⷭ҇тѐ, є҆́же и҆з̾ гро́ба воста́нїе, живо́тъ є҆́сть, вознесе́нїе же при́снѡ и҆ весе́лїе, є҆́же вѣ́рою всѝ мы̀ ны́нѣ предпра́зднꙋемъ.

И҆ ны́нѣ, бг҃оро́диченъ:

[Ф] Свѣ́тъ на́мъ и҆́же ѿ свѣ́та дв҃о пречи́стаѧ ро́ждши, разори́ла є҆сѝ безбо́жїѧ тмꙋ̀: тѣ́мже всѝ земноро́днїи вѣ́рою тѧ̀ велича́емъ.

Въ пѧто́къ шесты́ѧ недѣ́ли по па́сцѣ,

трипѣ́снецъ, гла́съ а҃.

Пѣ́снь є҃.

І҆рмо́съ: Нечести́вїи не ᲂу҆́зрѧтъ сла́вы твоеѧ̀ хрⷭ҇тѐ, но мы́ тѧ є҆диноро́дне, ѻ҆ч҃ескїѧ сла́вы сїѧ́нїе бж҃ества̀, ѿ но́щи ᲂу҆́тренююще воспѣва́емъ тѧ̀, человѣколю́бче.

Восходѧ̀ ѿ землѝ къ нб҃сѝ, не ѿлꙋче́нъ бы́лъ є҆сѝ ѻ҆ц҃а̀, и҆ сосѣдѧ̀ влⷣко и҆ дх҃ꙋ, є҆го́же ᲂу҆ч҃нкѡ́мъ посла́лъ є҆сѝ съ нб҃сѐ ᲂу҆тѣ́шителѧ.

Безпло́тныхъ чи́ни, ꙗ҆́кѡ ви́дѣша тебѐ і҆и҃се съ пло́тїю на нб҃са̀ возше́дша, ра́дꙋющесѧ дивлѧ́хꙋсѧ мно́гомꙋ твоемꙋ̀ гдⷭ҇и, къ чл҃вѣ́кѡмъ снизхожде́нїю.

Сла́ва:

И҆стлѣ́вшее влⷣко сꙋщество̀ на́ше, на престо́лѣ ѻ҆ч҃естѣ посади́лъ и҆ ᲂу҆добри́лъ є҆сѝ гдⷭ҇и, съ ни́мже и҆́маши прїитѝ сꙋди́ти мі́рꙋ всеси́льне. <<т҃к ѡ҆б.: 640>>

И҆ ны́нѣ, бг҃оро́диченъ:

Чи́стꙋю и҆ пречи́стꙋю почти́мъ мы́сленнѡ, добро́тꙋ і҆а́кѡвлю, и҆ бж҃е́ственными дѣ́тельми ᲂу҆добрѧ́емꙋ благоче́стнѡ пои́мъ, ꙗ҆́кѡ ма́терь бг҃а на́шегѡ.

Пѣ́снь и҃.

І҆рмо́съ: И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̀ дѣла̀ благослови́те, по́йте гдⷭ҇а.

На херꙋві́мскꙋ ра́мꙋ носи́мь, возне́слсѧ є҆сѝ во сла́вѣ, зрѧ́щымъ тѧ̀ ᲂу҆ченикѡ́мъ твои́мъ гдⷭ҇и, и҆ вопїю́щымъ непреста́ннѡ: всѧ̀ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.

Низложи́въ враждꙋ̀ средостѣ́нїѧ, ᲂу҆ме́ршыѧ ѻ҆ц҃ꙋ̀ твоемꙋ̀ примири́лъ є҆сѝ, и҆ возше́дъ соприве́лъ є҆сѝ, ю҆́же прїѧ́лъ є҆сѝ пло́ть безнача́льне сло́ве превы́ше нача̑лъ и҆ си́лъ.

Сла́ва:

Благословлѧ́ѧ ᲂу҆ченикѝ возноша́лсѧ є҆сѝ на высотꙋ̀ хрⷭ҇тѐ, ᲂу҆тѣ́шителѧ си̑мъ посла́въ, пою́щымъ и҆ є҆диномꙋ́дреннѡ вопїю́щымъ: всѧ̀ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.

И҆ ны́нѣ, бг҃оро́диченъ:

Ѻ҆́бщее вѣ́рныхъ ѡ҆чисти́лище, гото́вꙋю человѣ́кѡмъ по́мощь, и҆ къ зижди́телю мо́стъ, преводѧ́щїй всѣ́хъ ко спасе́нїю, бж҃їю мт҃рь сла́вимъ.

Пѣ́снь ѳ҃.

І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же дв҃о бцⷣе, прозѧбе́нїемъ чревоноше́нїѧ, мі́рови <<тк҃а: 641>> благослове́нїе процвѣла̀ є҆сѝ: тѣ́мъ тѧ̀ всѝ велича́емъ.

Ѿ горы̀ хрⷭ҇тѐ є҆леѡ́нскїѧ, ѻ҆́блакъ тебѐ ꙗ҆́коже престо́лъ прїѧ́тъ, всѣ̑мъ бж҃е́ствєннымъ твои̑мъ ᲂу҆ченикѡ́мъ зрѧ́щымъ, и҆ съ тре́петомъ вопїю́щымъ тѝ: не ѡ҆ста́ви си́ры, и҆̀хже возлюби́лъ є҆сѝ за милосе́рдїе несказа́нное.

Соше́лъ є҆сѝ пе́рвѣе без̾ пло́ти, возше́лъ же є҆сѝ пло́ть носѧ̀, ю҆́же прїѧ́лъ є҆сѝ: стра́хомъ же врата̀ нбⷭ҇наѧ тебѣ̀ ѿверзо́шасѧ, и҆ ᲂу҆́ми нбⷭ҇нїи зрѧ́ще дивлѧ́хꙋсѧ, глаго́люще: сла́ва є҆́же на́съ ра́ди твоемꙋ̀ влⷣко соше́ствїю.

Сла́ва:

Что̀ стоитѐ вы̀, зрѧ́ще возше́ствїе стра́шное; дре́вле реко́ша а҆́гг҃ли бж҃е́ствєннымъ а҆пⷭ҇лѡмъ: и҆́мже ѻ҆́бразомъ ви́дите восходѧ́ща, па́ки на зе́млю прїи́детъ сꙋди́ти всѣ́хъ, со сла́вою неизрече́нною.

И҆ ны́нѣ, бг҃оро́диченъ:

Соприсꙋ́тствꙋющи бж҃е́ственнымъ ᲂу҆ченикѡ́мъ пречⷭ҇таѧ, и҆ зрѧ́щи, є҆го́же родила̀ є҆сѝ, ѿ землѝ возноси́ма, вопїѧ́ла є҆сѝ: восхо́диши къ безнача́льномꙋ ѻ҆ц҃ꙋ̀, сла́вою твое́ю и҆сполнѧ́ѧй всѧ́чєскаѧ, препросла́вленный є҆ди́не гдⷭ҇и.

Въ сꙋббѡ́тꙋ ѕ҃-ѧ недѣ́ли по па́сцѣ,

четверопѣ́снецъ, гла́съ и҃.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа́ли моѧ̀, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ <<тк҃а ѡ҆б.: 642>> мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ бж҃е возведи́ мѧ.

И҆спо́лнивъ ꙗ҆̀же на землѝ сла́вы твоеѧ̀, возне́слсѧ є҆сѝ со сла́вою несказа́нною, и҆ ѻ҆ц҃ꙋ̀ прине́слъ є҆сѝ пло́ть, въ ню́же ѿ на́съ за милосе́рдїе ѡ҆бле́клсѧ є҆сѝ: и҆ воспѣ́ша небє́сныѧ си̑лы тебѐ, є҆ди́не человѣколю́бче.

Возми́тесѧ нбⷭ҇наѧ врата̀, и҆ прїими́те бг҃а, плотоно́сца, мы́слєнныѧ вопїѧ́хꙋ си́лы повинꙋ́ющымсѧ: кто̀ се́й, є҆го́же глаго́лете, и҆ хвалꙋ̀ ꙗ҆́кѡ творцꙋ̀ всѧ́ческихъ непреста́ннѡ прино́сите;

Сла́ва:

Восхо́дъ стра́шный зрѧ́ще сло́ва ᲂу҆ченицы̀, вопїѧ́хꙋ: послѝ на́мъ прест҃а́го дх҃а, и҆ си́ры не ѡ҆ста́ви рабы̑ твоѧ̀, вѣ́дѧщыѧ тѧ̀ и҆́стиннаго бг҃а, и҆ человѣ́ка безгрѣ́шна.

И҆ ны́нѣ, бг҃оро́диченъ:

Ѡ҆божи́лъ є҆сѝ чл҃вѣ́ческое є҆стество̀, неизрече́ннѡ роди́всѧ ѿ дв҃ы, ѻ҆ц҃а̀ є҆диносꙋ́щное сло́во, и҆ возне́слсѧ є҆сѝ со сла́вою: да́рꙋй ми́ръ твои̑мъ ᲂу҆ч҃нкѡ́мъ, и҆ мі́рови бога́тꙋю млⷭ҇ть.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки.

Стра́сть и҆ сме́рть претерпѣ́лъ, и҆ тридне́венъ воста́лъ є҆сѝ, ꙗ҆́коже ре́клъ є҆сѝ, и҆ къ нбⷭ҇нымъ возше́лъ є҆сѝ, пою́щымъ тѧ̀ ᲂу҆ченикѡ́мъ, гдⷭ҇и бж҃е во вѣ́ки.

Дх҃а на́мъ, ꙗ҆́коже ѡ҆бѣща́лъ є҆сѝ, прест҃а́го послѝ ще́дре, мꙋ́дрїи ᲂу҆ченицы̀ вопїѧ́хꙋ, ᲂу҆мꙋдрѧ́юща и҆ вразꙋмлѧ́юща всѧ̀ вѣ̑рныѧ во вѣ́ки. <<тк҃в: 643>>

Сла́ва:

Рꙋка́ми восплещи́те ꙗ҆зы́цы, воскли́кните бг҃ꙋ въ весе́лїи: вознесе́сѧ хрⷭ҇то́съ, и҆ сѣди́тъ во сла́вѣ ѡ҆деснꙋ́ю, ꙗ҆́кѡ сопресто́ленъ ѻ҆ц҃ꙋ̀, во вѣ́ки.

И҆ ны́нѣ, бг҃оро́диченъ:

Нѣ́дра ѻ҆́ч҃а не и҆стощи́въ, въ нѣ́дрѣхъ твои́хъ сло́во восклони́сѧ, безслове́сїѧ на́съ и҆збавлѧ́ѧ, дв҃о, пою́щихъ гдⷭ҇а бг҃а во вѣ́ки.

Пѣ́снь и҃.

І҆рмо́съ: Седмери́цею пе́щь, халде́йскїй мꙋчи́тель, бг҃очести́вымъ неи́стовнѡ разжжѐ, си́лою же лꙋ́чшею спасе́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̀ вѣ́ки.

Воѡбра́жсѧ, ꙗ҆́коже пи́шетъ, па́че ᲂу҆ма̀ въ чꙋ́ждее, и҆ страстьмѝ всѣ́мъ вѣ̑рнымъ безстра́стїе ꙗ҆́вѣ да́рꙋѧ, ѿ землѝ восхо́дитъ, ны́нѣ ꙗ҆ви́тисѧ ѻ҆ч҃ескомꙋ лицꙋ̀: а҆́гг҃лѡмъ, а҆рха́гг҃лѡмъ, престо́лѡмъ и҆ гдⷭ҇ьствѡмъ, того̀ славосло́вѧщымъ во всѧ̀ вѣ́ки.

Бѣлоно́сцы а҆́гг҃ли а҆пⷭ҇лѡмъ предста́ша, недоꙋмышлѧ́ющымсѧ но́вомꙋ видѣ́нїю твоегѡ̀ вознесе́нїѧ, сло́ве ѻ҆ц҃ꙋ̀ безнача́льне, глаго́люще: вы̀ что̀ взира́ете, та́кѡ чꙋдѧ́щесѧ, на высотꙋ̀; і҆и҃съ се́й па́ки прїи́детъ сꙋди́ти мі́рꙋ, и҆́мже ѻ҆́бразомъ ви́дите.

Сла́ва:

Всѧ̑ соверши́вый гдⷭ҇и, ꙗ҆́кѡ бг҃ъ непрело́женъ, къ нбⷭ҇нымъ съ пло́тїю восте́клъ є҆сѝ, повинꙋ́ющымсѧ тебѣ̀ а҆́гг҃льскимъ си́ламъ, и҆ ра́достнѡ ᲂу҆ченикѡ́мъ тебѐ сла́вѧщымъ, <<тк҃в ѡ҆б.: 644>> и҆ со стра́хомъ пою́щымъ: сщ҃е́нницы воспо́йте, лю́дїе превозноси́те во всѧ̀ вѣ́ки.

И҆ ны́нѣ, бг҃оро́диченъ:

Бг҃ороди́тельнице пречⷭ҇таѧ, дꙋшѝ моеѧ̀ ꙗ҆́звы, и҆ грѣха̀ моегѡ̀ стрꙋ́пы ѡ҆чи́сти, и҆сто́чники и҆злива́ющи и҆з̾ ре́бръ ржⷭ҇тва̀ твоегѡ̀, и҆ и҆̀же и҆з̾ негѡ̀ ѡ҆чища́ющи стрꙋѧ́ми: къ тебѣ́ бо взыва́ю, и҆ къ тебѣ̀ припа́даю, и҆ тебѐ призыва́ю є҆ди́нꙋ спаси́тельницꙋ.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ, неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ человѣ́къ: тѣ́мже пречⷭ҇тꙋю бцⷣꙋ вѣ́рнїи велича́емъ.

Возми́те врата̀ мы́слєнныѧ, нбⷭ҇ныѧ си̑лы, прїи́де цр҃ь на́шъ, ме́ртвенное сꙋщество̀ прїи́мъ, и҆ вни́детъ бг҃ъ сы́й и҆ человѣ́къ ко ѻ҆ц҃ꙋ̀ своемꙋ̀, содѣ́лавъ стра̑шнаѧ и҆ пресла̑внаѧ.

По́йте всѝ разꙋ́мнѡ, воскли́кните бг҃ꙋ, сотвори́вшемꙋ дѣла̀ пресла̑внаѧ, и҆ возше́дшемꙋ къ нбⷭ҇нымъ, и҆ а҆пⷭ҇лѡмъ ст҃а́го дх҃а низпосла́вшемꙋ, просвѣща́ющемꙋ на́съ сла́вѧщихъ бж҃ество̀ є҆гѡ̀.

Сла́ва:

Разрꙋши́сѧ а҆́дъ погребе́нїемъ, и҆ воста́нїе человѣ́кѡмъ дарова́сѧ воскресе́нїемъ твои́мъ, и҆ ѡ҆зари́сѧ землѧ̀, и҆ нбⷭ҇наѧ вознесе́нїемъ твои́мъ хрⷭ҇тѐ, є҆ди́не непремѣ́нне и҆ всеси́льне, да́телю благи́хъ, и҆ сп҃си́телю на́шъ.

И҆ ны́нѣ, бг҃оро́диченъ:

Гла́съ тѝ гаврїи́ловъ со всѣ́ми а҆́гг҃лы прино́симъ: <<тк҃г: 645>> ра́дꙋйсѧ пала́то цр҃ѧ̀ возжелѣ́ннаѧ: ра́дꙋйсѧ земна̑ѧ съ нбⷭ҇ными дв҃о совокꙋпи́вшаѧ, є҆ѧ́же ра́ди спаса́емсѧ, вѣ́дꙋще тѧ̀ чи́стꙋю бг҃ома́терь.

Въ понедѣ́льникъ седмы́ѧ недѣ́ли по па́сцѣ

трипѣ́снецъ, гла́съ а҃.

Пѣ́снь а҃.

І҆рмо́съ: Твоѧ̀ побѣди́тельнаѧ десни́ца, бг҃олѣ́пнѡ въ крѣ́пости просла́висѧ: та́ бо безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

Твоѐ є҆́же на зе́млю новолѣ́пное схожде́нїе, не разꙋмѣ́вшымъ а҆́гг҃лѡмъ тогда̀, восходѧ́щꙋ тѝ ны́нѣ на нб҃са̀ познава́ютъ, глаго́люще: кто̀ се́й є҆́сть цр҃ь си́лъ;

Распѧ́тїе во́льное хрⷭ҇тѐ претерпѣ́въ, воскре́слъ є҆сѝ тридне́венъ, та́же возше́лъ є҆сѝ къ нбⷭ҇нымъ, ᲂу҆ченикѡ́мъ зрѧ́щымъ тѧ̀, и҆ дивѧ́щымсѧ па́че ᲂу҆ма̀ си́лѣ твое́й.

Сла́ва:

Ѻ҆́блаки восхожде́нїе твоѐ всеси́льною во́лею полага́ѧй недомы́сленный, ѿ горы̀ є҆леѡ́нскїѧ ны́нѣ восте́клъ є҆сѝ горѣ̀, къ высотѣ̀ ѻ҆́блакомъ носи́мь.

И҆ ны́нѣ, бг҃оро́диченъ:

Чи́ны а҆́гг҃лъ нбⷭ҇ныхъ вои́стиннꙋ чи́стаѧ превозшла̀ є҆сѝ, сло́во воплоти́вши ѻ҆́ч҃ее: є҆го́же ны́нѣ прилѣ́жнѡ молѝ, дѣѧ́нїй безслове́сныхъ на́мъ и҆зба́витисѧ всенепоро́чнаѧ. <<тк҃г ѡ҆б.: 646>>

Пѣ́снь и҃.

І҆рмо́съ: Пѣсносло́вцы въ пещѝ спа́сшаго дѣ́ти, и҆ громопла́меннꙋю прело́жшаго на ро́сꙋ, хрⷭ҇та̀ бг҃а по́йте, и҆ превозноси́те во всѧ̀ вѣ́ки.

Къ безначальносвѣ́тломꙋ ѻ҆ц҃ꙋ̀ возше́дшаго во сла́вѣ, и҆ низпосла́вшаго а҆пⷭ҇лѡмъ дх҃ъ ст҃ы́й, по́йте, благослови́те и҆ превозноси́те во всѧ̀ вѣ́ки.

Воспо́йте, и҆ по́йте гдⷭ҇ви, воскли́кните стра́хомъ ѻ҆те́чєствїѧ зємна́ѧ, вознесе́ бо сѧ во сла́вѣ дне́сь, совокꙋпи́въ съ нбⷭ҇ными во всѧ̀ вѣ́ки.

Сла́ва:

Мꙋ́жїе галїле́йстїи, что̀ зрѧ́ще на высотꙋ̀ со стра́хомъ, та́кѡ стоитѐ, ᲂу҆ченикѡ́мъ безпло́тнїи глаго́лахꙋ; и҆́мже ѻ҆́бразомъ ви́дите, и҆ па́ки хрⷭ҇то́съ во сла́вѣ прїи́детъ.

И҆ ны́нѣ, бг҃оро́диченъ:

Невоздѣ́ланнѡ возрасти́вшаѧ нбⷭ҇ный кла́съ, пита́ющїй бж҃е́ственною си́лою концы̀ дв҃о, насы́ти а҆́лчꙋщꙋю смире́ннꙋю дꙋ́шꙋ мою̀.

Пѣ́снь ѳ҃.

І҆рмо́съ: Ѻ҆́бразъ чи́стагѡ ржⷭ҇тва̀ твоегѡ̀, ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь, да тѧ̀ бцⷣе непреста́ннѡ велича́емъ.

Стра́сть и҆ распѧ́тїе и҆ сме́рть за на́съ претерпѣ́лъ є҆сѝ безгрѣ́шне, и҆ воскре́съ бг҃олѣ́пнѡ, возше́лъ є҆сѝ къ безнача́льномꙋ сло́ве ѻ҆ц҃ꙋ̀ твоемꙋ̀: тѣ́мже тебѣ̀ покланѧ́емсѧ непостижи́момꙋ бж҃ествꙋ̀. <<тк҃д: 647>>

Зове́тъ мѡѷсе́й дх҃омъ, а҆́гг҃льскїѧ си̑лы да ᲂу҆крѣпѧ́тсѧ, всѣ́хъ цр҃ю̀ тѣле́снѡ восходѧ́щꙋ ѿ землѝ къ гѡ́рнимъ ца́рствїємъ, и҆ на престо́лѣ ѻ҆те́честѣмъ ᲂу҆ставлѧ́ющꙋ є҆стество̀ ѿпа́дшее.

Сла́ва:

Врата̀ ᲂу҆́мнаѧ возми́те, проро́чески вопїѧ́ше дв҃дъ дх҃омъ, є҆диноро́дный сн҃ъ бж҃їй воцр҃и́сѧ над̾ всѣ́ми ꙗ҆зы́ки, и҆ восхо́дитъ пло́тїю ко ѻ҆ц҃ꙋ̀, є҆гѡ́же снизходѧ̀ не ѡ҆ста́ви.

И҆ ны́нѣ, бг҃оро́диченъ:

Ве́сь сла́дость и҆ жела́нїе тво́й сн҃ъ, бг҃ъ и҆ гдⷭ҇ь, прест҃а́ѧ чи́стаѧ: є҆го́же прилѣ́жнѡ молѝ съ вы́шними и҆ безпло́тными во́инствы, го́рести дꙋшетлѣ́нныѧ грѣхѡ́въ и҆зба́витисѧ на́мъ.

Во вто́рникъ седмы́ѧ недѣ́ли по па́сцѣ,

трипѣ́снецъ, гла́съ в҃.

Пѣ́снь в҃.

І҆рмо́съ: Ви́дите, ви́дите, ꙗ҆́кѡ а҆́зъ є҆́смь въ мо́ри спасы́й, и҆ въ пꙋсты́ни насы́тивый і҆и҃льтєскїѧ лю́ди, и҆ во́дꙋ и҆з̾ ка́мене и҆сточи́вый человѣ́кѡмъ, да дре́вле па́дшаго поне́съ, привлекꙋ̀ ко мнѣ̀ за неизрече́ннꙋю ми́лость.

Соводворѧ́ѧсѧ ᲂу҆ченикѡ́мъ во дне́хъ четы́редесѧтихъ, по бж҃е́ственномъ и҆з̾ гро́ба сп҃се воста́нїи, дх҃а бж҃е́ственнаго ѡ҆бѣщава́ѧ и҆̀мъ посла́ти ꙗ҆́вѣ, возне́слсѧ є҆сѝ во сла́вѣ, на ра́мꙋ херꙋві́мскꙋ стра́шнѡ носи́мый. <<тк҃д ѡ҆б.: 648>>

Врата̀ возми́те, разꙋмѣ́йте пресла̑внаѧ, мы̑сленныѧ си̑лы вы́шнѣйшымъ вопїѧ́хꙋ: цр҃ь всѧ́ческихъ тѣ́ло земле́но носѧ̀, прїи́де къ на́мъ въ поко́й сво́й, человѣ́ки ѡ҆божи́въ за милосе́рдїе мно́гое и҆ безмѣ́рнꙋю ми́лость.

Сла́ва:

Закро́въ себѣ̀ тмꙋ̀ полага́ѧй, безпло́тномꙋ є҆стествꙋ̀ на крилꙋ̀ вѣ́треннюю восходѧ́й бг҃ъ, вопло́щсѧ и҆з̾ дв҃ы ѻ҆́блака свѣ́тлагѡ, ѻ҆́блакомъ свѣ́тлымъ ѿ землѝ на высотꙋ̀ взы́де, зрѧ́щымъ ᲂу҆ч҃нкѡ́мъ сла́вное вознесе́нїе.

И҆ ны́нѣ, бг҃оро́диченъ:

Невоздѣ́ланнаѧ землѐ, возрасти́вшаѧ всѣ́хъ пита́телѧ ѿверза́юща рꙋ́кꙋ, и҆ бл҃говоле́нїемъ свои́мъ насыща́юща всѧ́кое живо́тное, крѣ́пости бж҃е́ственныѧ: ᲂу҆твердѝ хлѣ́бомъ живо́тнымъ разсла́блєннаѧ сердца̀ сы́тостїю ѕлы́хъ на́шихъ грѣхопаде́нїй.

Пѣ́снь и҃.

І҆рмо́съ: Ѡ҆ подо́бїи зла́тѣ небре́гше требл҃же́ннїи ю҆́ношы, неизмѣ́нный и҆ живы́й бж҃їй ѻ҆́бразъ ви́дѣвше, средѝ ѻ҆гнѧ̀ воспѣва́хꙋ: ѡ҆сꙋществова́ннаѧ да пое́тъ гдⷭ҇а всѧ̀ тва́рь, и҆ превозно́ситъ во всѧ̀ вѣ́ки.

Є҆стество̀ а҆да́мово воспрїи́мъ, и҆ сїѐ ѡ҆божи́въ сло́ве, къ первонача́льникꙋ свѣ́та вознесѐ своемꙋ̀ ѻ҆ц҃ꙋ̀, ᲂу҆диви́вшымсѧ всѣ̑мъ безплѡ́тнымъ чинѡ́мъ, и҆ вопїю́щымъ: по́йте гдⷭ҇а, и҆ превозноси́те є҆го̀ во вѣ́ки.

И҆лїа̀ проѡбразꙋ́ѧ стра́шное твоѐ вознесе́нїе животода́вче, бж҃е́ственнымъ дх҃омъ показа́сѧ ѻ҆рꙋ́жникъ, и҆ къ высотѣ̀ ве́сь ѿ землѝ ноша́шесѧ, поѧ̀ влⷣцѣ: да пое́тъ гдⷭ҇а всѧ̀ тва́рь, и҆ превозно́ситъ є҆го̀ во вѣ́ки. <<тк҃є: 649>>

Сла́ва:

Хвали́те бг҃а, воскли́кните ꙗ҆зы́цы, восплещи́те рꙋка́ми, согла́снѡ по́йте, со сла́вою хрⷭ҇то́съ взы́де, ѿѻнꙋ́дꙋже къ на́мъ прїи́де, спастѝ вопїю́щыѧ: по́йте и҆ превозноси́те є҆го̀ во вѣ́ки.

И҆ ны́нѣ: трⷪ҇ченъ:

Ѻ҆ц҃а̀ и҆ сн҃а, и҆ собезнача́льна просла́вимъ всѝ дх҃а, трⷪ҇цꙋ несозда́ннꙋю, є҆стество́мъ соедине́ннꙋ, раздѣле́ннꙋ же тꙋ̀ ли́цы, пою́ще: ѡ҆сꙋ́щественнаѧ да пое́тъ гдⷭ҇а всѧ̀ тва́рь, и҆ превозно́ситъ є҆го̀ во вѣ́ки.

Пѣ́снь ѳ҃.

І҆рмо́съ: Недоꙋмѣ́етъ всѧ́къ ѧ҆зы́къ благохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀ бцⷣе, ѻ҆ба́че бл҃га́ѧ сꙋ́щи, вѣ́рꙋ прїимѝ: и҆́бо любо́вь вѣ́си бж҃е́ственнꙋю на́шꙋ, ты́ бо хрⷭ҇тїа́нъ є҆сѝ предста́тельница: тѧ̀ велича́емъ.

Со сла́вою ны́нѣ восходѧ́й на ѻ҆́блацѣхъ, кто̀ ᲂу҆́бѡ є҆́сть; реко́ша го́рнѣйшїи чи́нове, вопїю́ще и҆̀мъ: врата̀ ᲂу҆́мнаѧ ѿими́те, бг҃ъ є҆ди́ный ꙗ҆̀же на землѝ совокꙋпи́вый небесє́мъ, семꙋ̀ вели́чїе, и҆ сла́вꙋ со стра́хомъ принесе́мъ.

Зри́те, ре́клъ є҆сѝ сло́ве ᲂу҆ченикѡ́мъ, скорбѧ́щымъ твои́мъ восхо́домъ: сѣди́те ждꙋ́ще вѣ́рою, до́ндеже прїи́детъ къ ва́мъ бж҃е́ственный ᲂу҆тѣ́шитель ѿ вы́шнихъ, дарѡ́въ всѣ̑мъ незави́стный и҆сто́чникъ. се́й ва́съ наꙋчи́тъ всемꙋ̀, ꙗ҆́кѡ пребл҃гі́й.

Сла́ва:

Ѿпа́дшее є҆стество̀ а҆да́мово ви́дитсѧ въ вы́шнихъ, на престо́лѣ ѻ҆́ч҃и водрꙋже́нно пресла́внѡ, и҆ покланѧ́емо <<тк҃є ѡ҆б.: 650>> всегда̀ ѿ а҆́гг҃лъ и҆ а҆рха̑гг҃лъ, ѿ престѡ́лъ, си́лъ и҆ нача̑лъ: сла́ва и҆зво́лившемꙋ та́кѡ, є҆ди́номꙋ бг҃ꙋ на́шемꙋ.

И҆ ны́нѣ, бг҃оро́диченъ:

Кра́сна добро́тою роди́ тѧ красна̀ дв҃ца, є҆го́же зрѧ́щи ни ви́да внегда̀ страда́ти, нижѐ добро́ты и҆мꙋ́ща, сп҃се, рыда́ющи глаго́лаше: дивлю́сѧ твоемꙋ̀ па́че ᲂу҆ма̀ сн҃е мо́й смире́нїю, и҆́мже спаса́еши смири́вшеесѧ є҆стество̀ человѣ́ческое.

Въ сре́дꙋ седмы́ѧ недѣ́ли по па́сцѣ,

трипѣ́снецъ, гла́съ г҃.

Пѣ́снь г҃.

І҆рмо́съ: Оу҆твержде́нїе на тѧ̀ надѣ́ющихсѧ, ᲂу҆твердѝ гдⷭ҇и це́рковь, ю҆́же стѧжа́лъ є҆сѝ честно́ю твое́ю кро́вїю.

Ѡ҆сꙋжде́нное и҆ престꙋпле́нїемъ и҆стлѣ́вшее є҆стество̀ человѣ́ческое, возве́лъ є҆сѝ влⷣко превы́ше а҆́гг҃лъ, ꙗ҆́кѡ милосе́рдъ.

Возше́лъ є҆сѝ на нб҃са̀ со сла́вою, пою́щымъ тѧ̀ гдⷭ҇и безплѡ́тнымъ, ꙗ҆́кѡ всѣ́хъ творца̀ и҆ бг҃а на́шего.

Сла́ва:

Оу҆тѣ́шителѧ и҆́стиннаго дх҃а посла́лъ є҆сѝ влⷣко ᲂу҆ченикѡ́мъ твои́мъ, возше́дъ на нб҃са̀ пребл҃гі́й.

И҆ ны́нѣ, бг҃оро́диченъ:

Воплоще́нное и҆з̾ тебѐ чи́стаѧ про́йде сло́во, паде́нїе первозда́нныхъ за милосе́рдїе щедро́тъ и҆справлѧ́ѧй. <<тк҃ѕ: 651>>

Пѣ́снь и҃.

І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́ноши, пла́менемъ же неврежде́ни, бж҃е́ственнꙋю пѣ́снь поѧ́хꙋ: бл҃гослови́те всѧ̀ дѣла̀ гдⷭ҇нѧ гдⷭ҇а, и҆ превозноси́те во всѧ̀ вѣ́ки.

Всѐ ꙗ҆́кѡ бг҃ъ и҆спо́лнивъ є҆́же ѡ҆ на́съ смотре́нїе, возне́слсѧ є҆сѝ зрѧ́щымъ ᲂу҆ченикѡ́мъ твои̑мъ, и҆ стра́хомъ вопїю́щымъ тѝ: бл҃гослови́те всѧ̀ дѣла̀ гдⷭ҇нѧ гдⷭ҇а.

Мꙋ́жїе вои́стиннꙋ галїле́йстїи, что̀ взира́ете си́це, влⷣцѣ къ нб҃сѝ восходѧ́щꙋ, глаго́лахꙋ а҆́гг҃ли; ꙗ҆́коже ви́дите, па́ки се́й и҆́мать прїитѝ сꙋди́ти все́й тва́ри, є҆го́же превозно́симъ во вѣ́ки.

Сла́ва:

Дх҃а пра́ваго, дх҃а бж҃е́ственнаго, дх҃а сꙋ́щаго съ тобо́ю нераздѣ́льнаго, ꙗ҆́коже ѡ҆бѣща́лсѧ є҆сѝ, послѝ на́мъ, на ѻ҆́блацѣхъ сла́вы носи́мый, сло́ве бж҃їй, бжⷭ҇твеннїи а҆пⷭ҇ли зовѧ́хꙋ: ꙗ҆́кѡ да тѧ̀ пое́мъ и҆ превозно́симъ во вѣ́ки.

И҆ ны́нѣ:

И҆з̾ тебѐ бж҃їѧ премꙋ́дрость до́мъ себѣ̀ созда́вши, воплоти́сѧ неизрече́ннымъ соше́ствїемъ, ѻ҆трокови́це неискꙋсобра́чнаѧ: ты́ бо є҆ди́на во всѣ́хъ родѣ́хъ и҆збра́на є҆сѝ, бы́ти жили́ще хрⷭ҇тꙋ̀ бг҃ꙋ.

Пѣ́снь ѳ҃.

І҆рмо́съ: Но́вое чꙋ́до и҆ бг҃олѣ́пное, дв҃и́ческꙋю бо две́рь затворе́нꙋю ꙗ҆́вѣ прохо́дитъ гдⷭ҇ь, на́гъ во вхо́дѣ, и҆ плотоно́сецъ ꙗ҆ви́сѧ во и҆схо́дѣ бг҃ъ, и҆ пребыва́етъ две́рь затворе́на: сїю̀ неизрече́ннѡ ꙗ҆́кѡ бг҃ома́терь велича́емъ. <<тк҃ѕ ѡ҆б.: 652>>

Со сла́вою въ воскликнове́нїи восхо́дитъ, ꙗ҆́коже проро́къ дре́вле речѐ, се́й всѣ́хъ є҆́сть гдⷭ҇ь и҆ влⷣка: по́йте семꙋ̀ вѣ́рою ꙗ҆зы́цы, по́йте и҆ съ тре́петомъ того̀ славосло́вите, ꙗ҆́кѡ содѣ́ла неизслѣ̑димаѧ и҆ неизречє́ннаѧ.

Скорбѧ́щымъ ре́клъ є҆сѝ ᲂу҆ченикѡ́мъ: не разлꙋчꙋ́сѧ во вѣ́ки ѿ ва́съ, а҆́ще и҆ къ посла́вшемꙋ мѧ̀ и҆дꙋ̀ ѻ҆ц҃ꙋ̀: и҆ди́те, мі́ръ ве́сь наꙋчи́те, позна́ти мѧ̀ бг҃а и҆́стиннаго, содѣ́лавша мѧ̀ пресла̑внаѧ, ꙗ҆̀же ви́дѣсте и҆ слы́шасте.

Сла́ва:

Ми́ръ всѣ̑мъ ре́клъ є҆сѝ хрⷭ҇тѐ, и҆ ѻ҆́блакъ под̾е́мъ тѧ̀ а҆́бїе свѣ́та, всѣ̑мъ зрѧ́щымъ, ѿ землѝ возне́слсѧ є҆сѝ, и҆ возше́дъ превы́ше сѣ́лъ є҆сѝ, над̾ всѧ́кимъ нача́ломъ и҆ вла́стїю: тѣ́мже сла́вимъ многопѣ́тꙋю си́лꙋ твою̀.

И҆ ны́нѣ, бг҃оро́диченъ:

Свѣ́та прїѧ́телище ꙗ҆ви́ласѧ є҆сѝ вои́стиннꙋ, ꙗ҆́кѡ и҆з̾ тебѐ непрело́жнѡ вопло́щсѧ неизрече́ннѡ бг҃ъ, на крⷭ҇тѣ̀ возвы́сивъ а҆да́мово сꙋщество̀, и҆ въ ме́ртвыхъ перворожде́нъ бы́въ, и҆ пребыва́ѧ бг҃ъ въ вы́шнихъ, кꙋ́пнѡ со ѻ҆ц҃е́мъ же и҆ бж҃е́ственнымъ дх҃омъ сла́вимый.

Въ четверто́къ седмы́ѧ недѣ́ли по па́сцѣ,

трипѣ́снецъ, гла́съ д҃.

Пѣ́снь д҃.

І҆рмо́съ: Сѣдѧ́й въ сла́вѣ на престо́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребж҃е́ственный, нетлѣ́нною дла́нїю, и҆ спасѐ зовꙋ́щыѧ: сла́ва хрⷭ҇тѐ си́лѣ твое́й. <<тк҃з: 653>>

Непристꙋ́пный є҆стество́мъ, пристꙋ́пенъ мнѣ̀ бы́въ, въ менѐ ѡ҆болкі́йсѧ, всѐ моѐ є҆стество̀ ѡ҆свѣтлѝ, и҆ свои́мъ вознесе́нїемъ возведѐ превы́ше всѧ́кагѡ нача́ла и҆ вла́сти.

Колесницеѣ́здникъ и҆лїа̀ воздꙋ́хъ прохожда́ше, проѡбразꙋ́ѧ дре́вле твоѐ сло́ве бж҃їй вознесе́нїе: ꙗ҆́кѡ на колесни́цѣ бо сп҃се носи́мь ѻ҆́блакомъ, ко ѻ҆те́чєскимъ нѣ́дрѡмъ дости́глъ є҆сѝ.

Сла́ва:

Оу҆ченикѡ́мъ взира́ющымъ стра́шное взѧ́тїе, и҆ дивѧ́щымсѧ, бж҃е́ственнїи провѣщава́хꙋ а҆́гг҃ли: мꙋ́жїе вы̀ галїле́йстїи, ꙗ҆́коже ви́дите, си́це па́ки прїи́детъ і҆и҃съ сꙋди́ти всѧ̑.

И҆ ны́нѣ, бг҃оро́диченъ:

Ѡ҆бновлѧ́еши пречи́стаѧ сокрꙋше́нное человѣ́ческое є҆стество̀, и҆ тлѝ подкло́ншеесѧ, бг҃а воплоти́вши, и҆ па́че є҆стества̀ роди́вши неискꙋсобра́чнаѧ. є҆мꙋ́же зове́мъ: сла́ва хрⷭ҇тѐ си́лѣ твое́й.

Пѣ́снь и҃.

І҆рмо́съ: Ѻ҆́троки благочєсти́выѧ въ пещѝ ржⷭ҇тво̀ бг҃оро́дичо спасло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ въ всѧ̀ вѣ́ки.

Ходѧ́й на крилꙋ̀ вѣ́треннюю ѻ҆́блакомъ носи́мь, ны́нѣ воспрїе́млетсѧ въ небє́снаѧ, и҆дѣ́же бѧ́ше пре́жде, и҆ ᲂу҆тѣ́шителѧ посыла́етъ ᲂу҆ченикѡ́мъ, хвалосло́вѧщымъ и҆ превозносѧ́щымъ во вѣ́ки.

Распѧ́тїе и҆ погребе́нїе претерпѣ́въ во́лею, воскре́слъ є҆сѝ всеси́льне, и҆ лю́бѧщымъ тѧ̀ въ четыредесѧти́хъ дне́хъ ꙗ҆влѧ́ѧсѧ <<тк҃з ѡ҆б.: 654>> радостотвори́лъ є҆сѝ: та́же си́хъ бл҃гослови́въ, къ твоемꙋ̀ ѻ҆ц҃ꙋ̀ возше́лъ є҆сѝ со сла́вою.

Сла́ва:

Наꙋчи́въ ꙗ҆́вѣ, ꙗ҆̀же па́че сло́ва сло́вꙋ бг҃осло́вцы, и҆ возше́дъ посла́лъ є҆сѝ си̑мъ, ꙗ҆́коже ѡ҆бѣща́сѧ, вседѣ́йственнаго и҆ сопресто́льнаго дх҃а, пою́щымъ: гдⷭ҇а по́йте, и҆ превозноси́те є҆го̀ во вѣ́ки.

И҆ ны́нѣ, бг҃оро́диченъ:

Две́ре бж҃їѧ затворе́ннаѧ, ю҆́же є҆ди́нъ про́йде вы́шнїй, напра́ви мѧ̀ къ стезѧ́мъ бж҃е́ствєннымъ, и҆ ѿве́рзи спасе́нїѧ двє́ри мнѣ̀, бг҃облагода́тнаѧ: къ тебѣ́ бо прибѣга́ю дв҃о, є҆ди́нѣй застꙋ́пницѣ ро́да чл҃вѣ́ческагѡ.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ́щаѧсѧ є҆стества̀: тѣ́мъ веселѧ́щесѧ, тѧ̀ бцⷣе велича́емъ.

До́ндеже ᲂу҆́бѡ ѡ҆блече́тесѧ си́лою съ высоты̀, ре́клъ є҆сѝ ᲂу҆ченикѡ́мъ, сѣди́те вкꙋ́пѣ со́брани: а҆́зъ бо ᲂу҆жѐ воспрїе́млемь є҆́смь, и҆ ѻ҆ц҃ꙋ̀ сопресто́льнаго послю̀ ва́мъ ᲂу҆тѣ́шителѧ.

Прїиди́те та́йнѡ, возше́дше всѝ на высотꙋ̀ видѣ́нїѧ, ѻ҆чи́ма ᲂу҆́зримъ ᲂу҆́мныма возне́сшасѧ, и҆ сѣдѧ́ща ѡ҆деснꙋ́ю, ꙗ҆́кѡ сопресто́льна ѻ҆ц҃ꙋ̀ сло́ва соприсносꙋ́щнаго.

Сла́ва:

Сл҃нце и҆з̾ гро́ба красно̀ возсїѧ́въ влⷣка, ꙗ҆́коже свѣтонѡ́сныѧ лꙋчѝ, вселе́ннѣй все́й ва́съ распосла̀ а҆по́столы свѣтѧ́щыѧ и҆ мглꙋ̀ ѿгонѧ́ющыѧ. <<тк҃и: 655>>

И҆ ны́нѣ, бг҃оро́диченъ:

Пощади́ мѧ хрⷭ҇тѐ, є҆гда̀ прїи́деши сꙋди́ти мі́рꙋ со сла́вою, разрѣша́ѧ мглꙋ̀ страсте́й мои́хъ, моли́твами ро́ждшїѧ тѧ̀, и҆ наслѣ́дника мѧ̀ сотворѝ небе́снагѡ ца́рствїѧ твоегѡ̀.

Въ пѧто́къ седмы́ѧ недѣ́ли по па́сцѣ,

трипѣ́снецъ, гла́съ ѕ҃.

Пѣ́снь є҃.

І҆рмо́съ: Къ тебѣ̀ ᲂу҆́тренюю, милосе́рдїѧ ра́ди себѐ и҆стощи́вшемꙋ непрело́жнѡ, и҆ до страсте́й безстра́стнѡ прекло́ншемꙋсѧ сло́ве бж҃їй, ми́ръ пода́ждь мѝ па́дшемꙋ, человѣколю́бче.

Сме́рти держа́вꙋ бж҃е́ственною си́лою низложи́въ, воскре́слъ є҆сѝ тридне́внѡ хрⷭ҇тѐ мо́й, и҆ къ небє́снымъ со сла́вою возше́лъ є҆сѝ, твои̑мъ ᲂу҆ченикѡ́мъ воспѣва́ющымъ тѧ̀ бг҃а и҆ человѣколю́бца.

На́съ да не ѡ҆ста́виши си́рыхъ ще́дре, ꙗ҆́коже ѡ҆бѣща́лсѧ є҆сѝ, послѝ ст҃а́го твоего̀ дх҃а, твоѝ ᲂу҆ченицы̀ и҆зба́вителю приглаша́хꙋ, внегда̀ ѿ землѝ восходѧ́ща ви́дѣша тѧ̀ человѣколю́бче.

Сла́ва:

Сѐ дх҃ъ хо́щетъ сни́ти на зе́млю въ ѧ҆зы́цѣхъ ѻ҆́гненныхъ, ꙗ҆́кѡ да пока́жетъ ѻ҆́гненны ꙗ҆́вѣ брє́нныѧ, сло́ва честны́ѧ ᲂу҆ченикѝ, возвѣща́ющѧ сегѡ̀ человѣколю́бное. <<тк҃и ѡ҆б.: 656>>

И҆ ны́нѣ, бг҃оро́диченъ:

Въ человѣ́ческое є҆стество̀, ѿ неискꙋсомꙋ́жныѧ ѡ҆бле́клсѧ є҆сѝ сло́ве, кра́йнѧгѡ ра́ди благоꙋтро́бїѧ, тве́рдꙋю на́мъ тꙋ̀ стѣ́нꙋ да́лъ є҆сѝ и҆ кро́въ при́снѡ, вѣ́дꙋщымъ тѧ̀ бг҃а и҆ человѣ́ка.

Пѣ́снь и҃.

І҆рмо́съ: За зако́ны ѻ҆те́чєскїѧ блаже́ннїи въ вавѷлѡ́нѣ ю҆́ношы предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени и҆́мже не свари́шасѧ ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̀ вѣ́ки.

Разстоѧ̑щаѧсѧ совокꙋпи́въ бл҃гостїю, сло́ве всепребл҃гі́й, порази́въ сꙋпоста́та, стра́стїю пло́ти твоеѧ̀, ко ѻ҆ц҃ꙋ̀, є҆го́же не ѡ҆ста́вилъ є҆сѝ когда̀, со сла́вою восте́клъ є҆сѝ, ᲂу҆ченикѡ́мъ зрѧ́щымъ: тѣ́мже тѧ̀ съ ни́ми благослови́мъ, и҆ превозно́симъ во вѣ́ки.

Поми́ловавъ сп҃се, и҆̀хже возлюби́лъ є҆сѝ, ѡ҆ѕло́бленныхъ вра́жїею лю́тостїю, ѿ ма́сличныѧ горы̀ влⷣко возне́слсѧ є҆сѝ, зрѧ́щымъ ᲂу҆ченикѡ́мъ твои́мъ и҆ дивѧ́щымсѧ, ка́кѡ съ пло́тїю тѧ̀ ѻ҆́блакъ под̾ѧ́тъ, ꙗ҆́кѡ херꙋві́мскїй престо́лъ; тѣ́мже тѧ̀ съ ни́ми бл҃гослови́мъ, и҆ превозно́симъ во вѣ́ки.

Сла́ва:

Не ѡ҆ста́влю си́рыхъ ва́съ, сы́нове и҆ наслѣ̑дницы црⷭ҇твїѧ моегѡ̀, возше́дъ же ᲂу҆тѣ́шителѧ послю̀ съ высоты̀, ва́съ тайнонаꙋча́юща, па́че постиже́нїѧ и҆ ᲂу҆ма̀, и҆ ѻ҆́гненныхъ показꙋ́юща прича́стїемъ бре́нныхъ, вопи́лъ є҆сѝ ᲂу҆ченикѡ́мъ твои́мъ ще́дре: тѣ́мже съ ни́ми тѧ̀ пое́мъ, и҆ превозно́симъ во вѣ́ки. <<тк҃ѳ: 657>>

И҆ ны́нѣ: бг҃оро́диченъ:

Зако́нныхъ кромѣ̀ дв҃о є҆сте́ствъ, законода́вца ро́ждши, зако́нꙋ ѿе́млющаго сѣно́вное, и҆ бл҃года́ти да́рꙋющаго свѣ́тлость. тѣ́мже зако́номъ грѣха̀ мѧ̀ чи́стаѧ, лю́тѣ ны́нѣ побѣжда́ема свободѝ пѣ́ти: гдⷭ҇а по́йте всѧ̀ дѣла̀, и҆ превозноси́те є҆го̀ во вѣ́ки.

Пѣ́снь ѳ҃.

І҆рмо́съ: Недоꙋмѣ́етъ всѧ́къ ѧ҆зы́къ благохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀ бцⷣе, ѻ҆ба́че бл҃га́ѧ сꙋ́щи, вѣ́рꙋ прїимѝ: и҆́бо любо́вь вѣ́си бж҃е́ственнꙋю на́шꙋ. ты́ бо хрⷭ҇тїа́нъ є҆сѝ предста́тельница, тѧ̀ велича́емъ.

Ѿве́рженное и҆ ѡ҆ѕло́бленное є҆стество̀ поми́ловавый, є҆ди́нъ ꙗ҆́кѡ сы́й ми́лостивъ и҆ человѣколюби́въ благодѣ́телю, пло́ть человѣ́ческꙋю воспрїѧ́лъ є҆сѝ, и҆ стра́стїю крѣ́пкаго свѧза́въ, восте́клъ є҆сѝ хрⷭ҇тѐ горѣ̀ ко ѻ҆ц҃ꙋ̀, и҆спо́лнивъ сла́вы всѧ́чєскаѧ.

Что̀ скорбитѐ; что́ же ᲂу҆дивлѧ́етесѧ; вопїѧ́хꙋ а҆пⷭ҇толѡмъ а҆́гг҃ли, стоѧ́ще съ ни́ми на горѣ̀: се́й і҆и҃съ, є҆го́же ви́дите возне́сшасѧ, си́це во сла́вѣ мно́зѣ па́ки прїи́детъ, сꙋди́ти вселе́ннѣй, и҆ всѣ̑мъ да́ти достѡ́йнаѧ.

Сла́ва:

Ми́ръ да́вый свѧщє́ннымъ ᲂу҆ченикѡ́мъ твои́мъ, дх҃омъ твои́мъ всѣ́хъ благослови́въ ꙗ҆́кѡ ще́дръ благодѣ́телю, ѿ лꙋка́вагѡ соблюдѝ невреди́мы, ꙗ҆́кѡ да твою̀ сотвори́вше во́лю хрⷭ҇тѐ, всѝ ца́рствїю твоемꙋ̀ вкꙋ́пѣ сподо́бимсѧ. <<тк҃ѳ ѡ҆б.: 658>>

И҆ ны́нѣ, бг҃оро́диченъ:

Свѣ́та прїѧ́телище, всю̀ просвѣти́вшагѡ тва́рь, показа́ласѧ є҆сѝ є҆ди́на пречи́стаѧ, всенепоро́чнаѧ мр҃і́е бцⷣе. тѣ́мже молю́ тѧ: просвѣтѝ ѡ҆мрачи́вшꙋсѧ сластьмѝ житїѧ̀ стра́стнꙋю мою̀ дꙋ́шꙋ, ꙗ҆́кѡ да во днѝ бж҃е́ственными стезѧ́ми пойдꙋ̀.

Во вто́рникъ пѧтдесѧ́тныѧ недѣ́ли,

трипѣ́снецъ. Гла́съ в҃.

Пѣ́снь в҃.

І҆рмо́съ: Бг҃ъ, и҆́стинна дѣла̀ є҆гѡ̀, и҆ всѝ пꙋтїѐ є҆гѡ̀ сꙋдьбы̑.

Дш҃е пра́вый, на пꙋти̑ пра̑выѧ наста́ви, тебѐ бг҃осло́вѧщыѧ.

Ѿ нб҃съ прише́дый ᲂу҆тѣ́шителю, спасѝ тебѐ пою́щыѧ.

Живо́тъ жизнотворѧ́й, и҆ свѣ́тъ сы́й ᲂу҆тѣ́шителю, спасѝ тебѐ пою́щыѧ.

Сла́ва:

Бг҃ъ сы́й и҆́стинный и҆ бл҃года́тель, ᲂу҆тѣ́шителю, спасѝ тебѐ пою́щыѧ.

И҆ ны́нѣ, бг҃оро́диченъ:

Бг҃а и҆́стинна дв҃о мт҃и родила̀ є҆сѝ, въ на́ше спасе́нїе: є҆го́же молѝ ѡ҆ всѣ́хъ на́съ.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̀ вѣ́ки. <<т҃л: 659>>

Въ го́рницѣ собра̑ннымъ премꙋ́дрымъ ᲂу҆ч҃нкѡ́мъ, ꙗ҆ви́шасѧ внеза́пꙋ раздѣлѧ́еми ѧ҆зы́цы, ꙗ҆́кѡ ѻ҆́гненни, и҆ дыха́нїѧ бꙋ́рна гла́съ слы́шашесѧ, превозносѧ́щымъ хрⷭ҇та̀ во вѣ́ки.

И҆но́го ᲂу҆тѣ́шителѧ на́мъ, ᲂу҆тѣ́шитель хрⷭ҇то́съ бл҃года́тнѡ низпосла̀ дх҃а, во проро́цѣхъ глаго́лющаго, и҆ ѧ҆зы́ки ѻ҆́гненными вѣща́юща, бг҃огла́сныхъ и҆ премꙋ́дрыхъ а҆пⷭ҇лъ.

Сла́ва:

Дарова́нїємъ и҆сто́чникъ, благи́хъ пода́тель, прише́дъ ᲂу҆тѣ́шитель дх҃ъ, хрⷭ҇тѡ́вымъ ᲂу҆ченикѡ́мъ, слїѧ́въ и҆̀хъ ѡ҆бновѝ, свѣ́тъ благоче́стїѧ тѣ́ми ѡ҆блиста́въ.

И҆ ны́нѣ, бг҃оро́диченъ:

Въ нѣ́дрѣхъ ѻ҆́ч҃їихъ неразлꙋ́чнѡ вкꙋ́пѣ сѣдѧ́щаго, въ ве́щное чре́во твоѐ все́льшасѧ чи́стаѧ, пое́мъ дв҃о бг҃оневѣ́сто, и҆ превозно́симъ во вѣ́ки.

Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.

А҆́гг҃льскїѧ ли́ки ѡ҆свѧща́ѧй, и҆ си́хъ чи́ны ѡ҆кормлѧ́ѧй ꙗ҆́кѡ бл҃гъ, се́й ны́нѣ прїи́де съ нб҃сѐ соше́дъ, бж҃е́ственными блиста́ньми премꙋ̑дрыѧ а҆пⷭ҇лы ᲂу҆премꙋ́дривъ, вселе́ннѣй посла̀.

Бж҃ества̀ бога́тство раздава́етъ, пребыва́ющее и҆ невзима́емое, ꙗ҆́вѣ дх҃ъ ст҃ы́й, а҆пⷭ҇лѡмъ въ ѧ҆зы́цѣхъ ѻ҆́гненныхъ и҆ пла́мене ѕѣ́льнѣйшихъ, на пре́лесть си́хъ сотворѝ, і҆дѡлобѣ́сїѧ ти́нꙋ попалѧ́ющихъ. <<т҃л ѡ҆б.: 660>>

Сла́ва:

Дш҃е и҆́стины и҆ ра́зꙋма, дш҃е премꙋ́дрости и҆ крѣ́пости, и҆ совѣ́та, и҆з̾ ѻ҆ц҃а̀ и҆сходѧ́й, сн҃а же ра́ди, тва́ри бога́тнѡ дае́мый, спаса́й на́съ вѣ́рою покланѧ́ющихсѧ держа́вѣ твое́й.

И҆ ны́нѣ, бг҃оро́диченъ:

Бг҃облаже́ннаѧ дв҃о, ᲂу҆пова́нїе моѐ всѐ ᲂу҆се́рднѡ возлага́ю на тѧ̀: спаси́ мѧ мт҃и сꙋ́щїѧ жи́зни, и҆ пи́щи вѣ́чныѧ насы́титисѧ сподо́би чи́стаѧ, да вѣ́рою и҆ любо́вїю въ пѣ́снехъ велича́ю тѧ̀.

Въ сре́дꙋ пѧтдесѧ́тныѧ недѣ́ли,

трипѣ́снецъ. Гла́съ г҃.

Пѣ́снь г҃.

І҆рмо́съ: Оу҆тверже́нїе на тѧ̀ надѣ́ющихсѧ, ᲂу҆твердѝ гдⷭ҇и цр҃ковь, ю҆́же стѧжа́лъ є҆сѝ честно́ю твое́ю кро́вїю.

Оу҆тверди́вый нбⷭ҇ныѧ си̑лы, показа̀ дне́сь а҆пⷭ҇лы небеса̀, дх҃ъ ᲂу҆тѣ́шительный.

Є҆диносꙋ́щнꙋ, равноси́льнꙋ же дх҃ꙋ сопресто́льнꙋ, и҆ соѻбра́знꙋ ѻ҆ц҃ꙋ̀ и҆ сло́вꙋ, покланѧ́ющесѧ благоче́стнѡ велича́емъ.

Сла́ва:

Нескве́рнаго чистѣ́йшаго дх҃а, ᲂу҆тѣ́шителѧ пречи́стаго бг҃осло́вимъ, владѣ́юща все́ю тва́рїю.

И҆ ны́нѣ, бг҃оро́диченъ:

Хра́мъ ст҃ы́й, и҆ ковче́гъ, и҆ свѣ́щникъ, всепречи́стаѧ, <<тл҃а: 661>> была̀ є҆сѝ незаходи́магѡ свѣ́та, сꙋ́щымъ во тмѣ̀ хрⷭ҇та̀ возсїѧ́вша.

Пѣ́снь и҃.

І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни бжⷭ҇твеннꙋю пѣ́снь поѧ́хꙋ: благослови́те всѧ̀ дѣла̀ гдⷭ҇нѧ гдⷭ҇а, и҆ превозноси́те во всѧ̀ вѣ́ки.

Є҆ди́номꙋ въ трїе́хъ ли́цѣхъ, несѣко́мꙋ, бж҃е́ственномꙋ сꙋществꙋ̀ покланѧ́емсѧ, є҆динонача́лїе и҆ црⷭ҇тво бг҃омꙋ́дреннѡ пою́ще: бл҃гослови́те всѧ̀ дѣла̀ гдⷭ҇нѧ гдⷭ҇а.

Живонача́льный и҆ бжⷭ҇твенный дх҃ъ, соверши́тельный же въ трⷪ҇цѣ позна́вше, трист҃ы́ми хвалослове́ньми правосла́внѡ пое́мъ: бл҃гослови́те всѧ̀ дѣла̀ гдⷭ҇нѧ гдⷭ҇а.

Сла́ва: Дх҃ъ ᲂу҆́мный, дх҃ъ бжⷭ҇твенный влⷣчествꙋѧй, всебога́тнѡ раздава́ѧй дарѡ́въ дѣ̑йства, въ вѣ́рѣ пою́щымъ: бл҃гослови́те всѧ̀ дѣла̀ гдⷭ҇нѧ гдⷭ҇а.

И҆ ны́нѣ, бг҃оро́диченъ:

І҆а́кѡвлю добро́тꙋ, тебѐ бг҃олѣ́пнѣйшꙋю, бг҃ома́ти пречⷭ҇таѧ, кра́сный па́че всѣ́хъ, и҆збра̀ бг҃ъ сло́во, є҆го́же пое́мъ: благослови́те всѧ̀ дѣла̀ гдⷭ҇нѧ гдⷭ҇а.

Пѣ́снь ѳ҃.

І҆рмо́съ: Въ зако́нѣ сѣ́ни и҆ писа́нїй, ѻ҆́бразъ ви́димъ вѣ́рнїи: всѧ́къ мꙋ́жескїй по́лъ ложесна̀ разверза́ѧ, ст҃ъ бг҃ꙋ тѣ́мъ перворожде́нное сло́во, ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.

Многоче́стный, и҆ благодви́жимый дх҃ъ бг҃осло́вимъ, дре́вле во проро́цѣхъ предвозвѣсти́вшїй ны́нѣшнее <<тл҃а ѡ҆б.: 662>> просвѣще́нїе, и҆ всебога́тное и҆злїѧ́нїе благи́хъ дарѡ́въ, раздѣлѧ́емое ᲂу҆ченикѡ́мъ сло́ва и҆ свидѣ́телємъ.

Бг҃онача́льнаго, невре́днаго дх҃а славосло́вимъ, всѣ̑мъ и҆сточа́ющаго и҆ дѣлѧ́щаго бж҃е́ствєнныѧ да́ры, дх҃а, ᲂу҆тѣ́шителѧ дрꙋга́го, и҆з̾ безнача́льна ѻ҆ц҃а̀ и҆сходѧ́ща, и҆ сн҃ꙋ собезнача́льномꙋ сразꙋмѣва́ема.

Сла́ва:

Благодѣ́тельна и҆ бога́та дх҃а хвалосло́вимъ, всѣ́хъ ѡ҆свѧща́ющаго, и҆ просвѣща́ющаго свѣ́томъ разꙋ́мнымъ, всеси́льнꙋю держа́вꙋ всепосѣти́тельнꙋю, счинѧ́емꙋю ѻ҆ц҃ꙋ̀, и҆ сн҃ꙋ спрославлѧ́емꙋю.

И҆ ны́нѣ, бг҃оро́диченъ:

Зако́на сѣ́нь мимотечѐ, и҆ просвѣще́нїе возсїѧ̀ во тмѣ̀ сѣдѧ́щымъ, и҆з̾ тебѐ дв҃о воплоти́выйсѧ, за мно́гое благоꙋтро́бїе, и҆з̾ безнача́льна ѻ҆ц҃а̀ роди́выйсѧ пре́жде вѣ́къ, ро́ждшемꙋ є҆диносꙋ́щенъ.

Въ четверто́къ пѧтдесѧ́тныѧ недѣ́ли,

трипѣ́снецъ. Гла́съ д҃.

Пѣ́снь д҃.

І҆рмо́съ: Сѣдѧ́й въ сла́вѣ на престо́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ спасѐ зовꙋ́щыѧ: сла́ва хрⷭ҇тѐ си́лѣ твое́й.

И҆́стиннагѡ ѡ҆бѣтова́нїѧ пред̾ꙋзаконе́нїе и҆спо́лнисѧ, свѣтоно́снаѧ благода́ть пѧтдесѧ́тницею прїи́де, ᲂу҆тѣ́шителева сла́ва ꙗ҆ви́сѧ зовꙋ́щымъ: сла́ва хрⷭ҇тѣ̀ си́лѣ твое́й. <<тл҃в: 663>>

Непостижи́мь є҆́сть дх҃ъ всест҃ы́й, прехо́дитъ всѧ́къ ᲂу҆́мъ и҆ смы́сла ско́рость, ꙗ҆́кѡ вѣкѡ́въ всѣ́хъ дре́внѣйшїй, ꙗ҆́кѡ ѻ҆ц҃ꙋ̀ и҆ є҆диноро́дномꙋ сн҃ꙋ счинѧ́емь.

Сла́ва:

Неначина́емь є҆́же бы́ти, и҆ непрестава́емь по́слѣжде, но при́снѡ сы́й пꙋчи́на бога́тства неизмѣ́римаѧ, всеси́льный дх҃ъ присносꙋ́щный, ѻ҆ц҃ꙋ̀ и҆ є҆диноро́дномꙋ сн҃ꙋ спрославлѧ́етсѧ.

И҆ ны́нѣ, бг҃оро́диченъ:

Ѡ҆сѣнѝ на тѧ̀ дх҃ъ всест҃ы́й, всест҃а́ѧ ѻ҆трокови́це, тебѐ бг҃олѣ́пное пребыва́лище воплоще́нїю сн҃а содѣ́ловаѧ красно̀, нб҃съ вы́шшꙋю.

Пѣ́снь и҃.

І҆рмо́съ: И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̀ дѣла̀ бл҃гослови́те, по́йте гдⷭ҇а.

Печа́ли мглꙋ̀ разсы́пли преблагі́й, ᲂу҆тѣ́шительствомъ твои́мъ, благоче́стнѡ пою́щихъ тѧ̀, и҆ вѣ́рнѡ вопїю́щихъ: благослови́те дѣла̀ гдⷭ҇нѧ гдⷭ҇а.

Хотѣ́нїемъ твои́мъ дарова̑нїѧ раздава́ѧй, и҆̀мже хо́щеши ᲂу҆тѣ́шителю, тебѐ бг҃а зна́ющымъ, твою̀ благода́ть пода́ждь вѣ́рою вопїю́щымъ: бл҃гослови́те всѧ̀ дѣла̀ гдⷭ҇нѧ гдⷭ҇а.

Сла́ва:

Ꙗ҆́кѡ бг҃ъ и҆́стинный, ᲂу҆тѣ́шитель покланѧ́емь є҆́сть вѣ́рнѡ, и҆ слꙋжи́мь благоче́стнѡ сла́вѧщими, и҆ вопїю́щими непреста́ннѡ: бл҃гослови́те всѧ̀ дѣла̀ гдⷭ҇нѧ гдⷭ҇а. <<тл҃в ѡ҆б.: 664>>

И҆ ны́нѣ, бг҃оро́диченъ:

Бг҃а воплоще́нна роди́вшаѧ, страсте́й мои́хъ ᲂу҆толѝ мѧте́жъ, и҆ дꙋ́шꙋ мою̀ просвѣтѝ, сподо́бивши пѣ́ти: благослови́те всѧ̀ дѣла̀ гдⷭ҇нѧ гдⷭ҇а.

Пѣ́снь ѳ҃.

І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же дв҃о бцⷣе, прозѧбе́нїемъ чревоноше́нїѧ, мі́рови блгⷭ҇ве́нїе процвѣла̀ є҆сѝ: тѣ́мъ тѧ̀ всѝ велича́емъ.

Дх҃а бжⷭ҇твенный да́ръ и҆злїѧ́сѧ на всѧ́кꙋю вѣ́ровавшꙋю пло́ть, ꙗ҆́коже дре́вле проро́къ зри́тельнѣ ра́дꙋѧсѧ предвозвѣстѝ: мы́ же предрече́нныхъ ны́нѣ сбытїѐ зрѧ́ще, просвѣща́емсѧ.

Твоѧ̀ бг҃огла́сныѧ ᲂу҆ченикѝ и҆спо́лнилъ є҆сѝ, сп҃се, всест҃а́гѡ дх҃а, мі́рови же си́хъ, ꙗ҆́кѡ лꙋчѝ, свѣ́тъ благоче́стїѧ ѡ҆свѣща́ющыѧ посла́лъ є҆сѝ, ꙗ҆́кѡ влⷣка и҆ гдⷭ҇ь. тѣ́мже тѧ̀ всѝ велича́емъ.

Сла́ва:

Ѻ҆́гнь дꙋхо́вный, ѡ҆чисти́лище ᲂу҆ченикѡ́въ ѡ҆росѝ сердца̀: палѧ́щаѧ роса̀ съ нб҃сѐ, сло́ва самови́дцы просвѣтѝ, мі́рови бг҃оразꙋ́мїе блиста́ющее трⷪ҇чное посла́вши.

И҆ ны́нѣ, бг҃оро́диченъ:

Ѿ ст҃а́гѡ дх҃а чи́стаѧ зачала̀ є҆сѝ, безлѣ́тнѡ возсїѧ́вшаго сло́ва и҆з̾ нерожде́нна ѻ҆ц҃а̀, и҆ сего̀ воплоти́вшасѧ родила̀ є҆сѝ, ра́ди кра́йнѧгѡ человѣколю́бїѧ и҆ бл҃гости, бг҃ороди́тельнице мт҃и дв҃о. <<тл҃г: 665>>

Въ пѧто́къ пѧтдесѧ́тныѧ недѣ́ли,

трипѣ́снецъ. Гла́съ є҃.

Пѣ́снь є҃.

І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.

И҆сходѧ́щаго ѿ безнача́льна ѻ҆ц҃а̀ несꙋмнѣ́ннѡ, на сн҃ѣ же почива́ющаго прест҃а́го дх҃а, вѣ́рнїи славосло́вимъ.

Ѡ҆бновлѧ́емаго въ сердца́хъ на́шихъ, и҆ назида́юща и҆ ѡ҆сщ҃а́юща, въ ни́хже вселѧ́етсѧ, со а҆пⷭ҇лы свѣ́тлѡ воспрїи́мемъ.

Сла́ва:

Неизреченноси́льнаго и҆ всеси́льнаго, пре́жде и҆стлѣ́вшыѧ ѡ҆бновлѧ́ющаго, и҆ просвѣща́ющаго всѣ́хъ, всест҃а́го дх҃а ꙗ҆́снѡ бг҃осло́вимъ.

И҆ ны́нѣ, бг҃оро́диченъ:

Горо̀ ꙗ҆́вственнаѧ, горо̀ присѣ́ннаѧ, тꙋ́чнаѧ горо̀ и҆ ᲂу҆сыре́ннаѧ, ю҆́же бг҃ъ возлюбѝ, свѧта́ѧ дв҃о, спасѝ рабы̑ твоѧ̀.

Пѣ́снь и҃.

І҆рмо́съ: Тебѣ̀ вседѣ́телю, въ пещѝ ѻ҆́троцы, всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̀ вѣ́ки.

Пребыва́нїе бы́вшихъ всѣ́хъ ты̀ є҆сѝ ᲂу҆тѣ́шителю, и҆ соблюде́нїе, спаса́й вѣ́рою тебѐ пою́щыѧ.

Раздаѧ́нїе нетлѣ́нныхъ дарѡ́въ, и҆ бл҃года́ти пꙋчи́на, <<тл҃г ѡ҆б.: 666>> и҆ бога́тство неизглаго́ланное, ты̀ є҆сѝ дш҃е бж҃е́ственный и҆ ст҃ы́й: и҆ тѧ̀ пое́мъ и҆ превозно́симъ во вѣ́ки.

Сла́ва:

Живонача́льнꙋю и҆ живоно́снꙋю благода́ть, ѡ҆бновлѧ́ющꙋю на́съ, дохнове́нїемъ дх҃а бж҃е́ственнагѡ и҆ ст҃а́гѡ, пое́мъ и҆ превозно́симъ во вѣ́ки.

И҆ ны́нѣ, бг҃оро́диченъ:

Содѣ́тель, бж҃їѧ премꙋ́дрость, тѣ́ла хра́мъ и҆з̾ тебѐ дв҃о созда̀, спаса́й вѣ́рою тебѐ всечи́стаѧ чтꙋ́щыѧ, и҆ превозносѧ́щыѧ во всѧ̀ вѣ́ки.

Пѣ́снь ѳ҃.

І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀, є҆го́же велича́юще, дв҃ꙋ ᲂу҆блажа́емъ.

На́шъ нача́токъ ѻ҆ц҃ꙋ̀ твоемꙋ̀ сп҃се прине́слъ є҆сѝ, и҆ є҆стества̀ бж҃е́ственнагѡ бога́тство возда́въ на́мъ, посла́лъ є҆сѝ бл҃гі́й и҆ жизнотвори́вый дх҃ъ ст҃ы́й, и҆ собезнача́льный тебѣ̀ влⷣко.

Нача́токъ бж҃ества̀ ны́нѣ да́рꙋетъ є҆стествꙋ̀ пе́рстномꙋ дх҃ъ ѻ҆́ч҃їй, и҆ є҆диноро́дномꙋ неѿчꙋжа́емый, но сбыва́ѧ ꙗ҆́кѡ є҆диноесте́ственъ, и҆ є҆диносꙋ́щенъ, и҆ є҆диноче́стенъ, и҆ сопресто́ленъ.

Сла́ва:

Нб҃са̀ показа́лъ є҆сѝ сп҃се, бж҃е́ствєнныѧ твоѧ̑ ᲂу҆ченикѝ, глаго́лющыѧ ѧ҆зы́ки ѻ҆́гненными твоѐ є҆́же къ на́мъ стра́шное схожде́нїе, ны́нѣ на ни́хъ свѣтотво́рное посыла́ѧ дѣ́йство, съ нб҃сѐ ᲂу҆тѣ́шителѧ. <<тл҃д: 667>>

И҆ ны́нѣ, бг҃оро́диченъ:

Ст҃а́гѡ дх҃а бцⷣе была̀ є҆сѝ черто́гъ, и҆з̾ неѧ́же содѣ́тель сло́во ѻ҆́ч҃ее про́йде ꙗ҆́кѡ человѣ́къ, и҆ въ на́съ пожи́въ, ны́нѣ ꙗ҆вѝ трⷪ҇цы позна́нїе.

Въ сꙋббѡ́тꙋ пѧтдесѧ́тнꙋю

четверопѣ́снецъ. Гла́съ ѕ҃.

Пѣ́снь ѕ҃.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти, возведѝ ѿ тлѝ живо́тъ мо́й многоми́лостиве.

Дѣ́йствовалъ є҆сѝ пе́рвѣе во а҆́гг҃льскихъ во́инствахъ, свѧще́нїе да́рꙋѧ, и҆ просвѣща́ѧ бж҃ества̀ мо́лнїѧми дш҃е ст҃ы́й, и҆ соблюда́ѧ є҆ди́нственнымъ ѡ҆свѧще́нїемъ.

Прⷪ҇ро́ки показа́лъ є҆сѝ могꙋ́щыѧ прозрѣ́ти бꙋ́дꙋщихъ предвѣ́дѣнїе, въ сердца́хъ и҆́хъ ꙗ҆́кѡ бл҃гъ, все́льсѧ ᲂу҆тѣ́шителю, и҆ да̑льнаѧ прозира́ти ᲂу҆стро́илъ є҆сѝ.

Сла́ва:

Ѿ землѝ возноси́ми бж҃е́ственныхъ ра́ди добродѣ́телей, хрⷭ҇тѡ́вы а҆пⷭ҇ли, съ нб҃сѐ дх҃а влⷣчнѧ прише́дша прїѧ́ша, и҆ бжⷭ҇тва̀ заре́ю просїѧ́ша.

И҆ ны́нѣ, бг҃оро́диченъ:

Дх҃ъ ст҃ы́й соше́дъ на тѧ̀, чи́стый дѣ́вства хра́мъ содѣ́ла свѣ́тлѡ, пречи́стый до́мъ сн҃ꙋ вы́шнѧгѡ всеблаже́ннаѧ. <<тл҃д ѡ҆б.: 668>>

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь, содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ бж҃е ѻ҆ц҃ъ на́шихъ.

Всевино́внаго ѻ҆ц҃а̀ и҆ роди́телѧ, є҆ди́наго пре́жде вѣ̑къ сн҃а, и҆ происхо́дна ст҃а́го дх҃а, вѣ́рнїи согла́снѡ сла́вимъ при́снѡ: бл҃гослове́нъ бг҃ъ ѻ҆ц҃ъ на́шихъ.

Оу҆тѣ́шитель сво́йство бж҃ества̀ носѧ̀ ны́нѣ прїи́де, а҆пⷭ҇лѡмъ бо во ѻ҆́гненныхъ ѧ҆зы́цѣхъ бесѣ́дꙋѧ бг҃ъ, показа́сѧ ꙗ҆́вѣ: бл҃гослове́нъ бг҃ъ ѻ҆ц҃ъ на́шихъ.

Сла́ва:

Нб҃са̀ прⷭ҇нодви́жима є҆диноче́стнымъ дх҃омъ твои́мъ, ᲂу҆тверди́лъ є҆сѝ ᲂу҆ч҃никѝ твоѧ̑ тебѐ хрⷭ҇тѐ проповѣ́дати вели́кое сл҃нце, на́мъ ꙗ҆́снѡ возсїѧ́вшее: бл҃гослове́нъ бг҃ъ ѻ҆ц҃ъ на́шихъ.

И҆ ны́нѣ, бг҃оро́диченъ:

Воплоще́нїемъ сло́ва бж҃е́ственный сосꙋ́дъ чⷭ҇таѧ, дх҃ъ ст҃ы́й ѡ҆сѣнѝ на тѧ̀, бжⷭ҇твенный ковче́гъ свѣ́телъ содѣ́ла пречⷭ҇таѧ: блгⷭ҇ве́нна бг҃а пло́тїю роди́вшаѧ.

Пѣ́снь и҃.

І҆рмо́съ: И҆з̾ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти, тѧ̀ превозно́симъ во всѧ̀ вѣ́ки.

И҆з̾ ѻ҆ц҃а̀ неизрече́ннѡ и҆сходѧ́ща, и҆ на сн҃ѣ неслїѧ́ннѡ почива́юща, дх҃а чⷭ҇тна́го и҆ всеси́льнаго, тѧ̀ превозно́симъ во вѣ́ки. <<тл҃є: 669>>

Дꙋше́вныхъ скве́рнъ на́съ ѡ҆чи́сти, грѣхо́внагѡ ка́ла на́съ ѡ҆мы́й, да́ждь на́мъ хрⷭ҇тѐ дх҃ъ пра́вый спасе́нїѧ, ѡ҆бновлѧ́ющъ во всѧ̀ вѣ́ки.

Сла́ва:

Во гробѣ́хъ живꙋ́щыѧ призва́вый и҆ лицѐ всеѧ̀ землѝ ѡ҆бновлѧ́ѧй, ꙗ҆̀же на землѝ ᲂу҆́ды ᲂу҆мертвѝ, тебѣ̀ покланѧ́ющымсѧ во всѧ̀ вѣ́ки.

И҆ ны́нѣ, бг҃оро́диченъ:

Нб҃о ꙗ҆ви́сѧ чⷭ҇таѧ земно́е, нбⷭ҇ное сло́во во чре́во вмѣсти́вши, сꙋ́щымъ на землѝ пло́тїю прибли́жившасѧ: є҆го́же превозно́симъ во вѣ́ки.

Пѣ́снь ѳ҃.

І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ небе́сными во́и тѧ̀ ᲂу҆блажа́емъ.

Ѻ҆́гненными ѧ҆зы́ки ꙗ҆́снѡ вѣща́юще ᲂу҆ченицы̀, ле́сть і҆́дѡльскꙋю попали́ша, вѣ́рныхъ же дꙋ́шы ѡ҆зари́ша, свѣтлѣ́йшимъ бжⷭ҇твеннымъ дѣ́йствомъ ᲂу҆тѣ́шителѧ, проѧвле́ннѡ прише́дша.

Чи̑стаѧ прїѧ́тєлища бжⷭ҇твенныѧ бл҃года́ти, и҆ бж҃е́ственныѧ зарѝ несквє́рнаѧ зерца̑ла, мꙋ̑дрыѧ твоѧ̑ ᲂу҆ченикѝ показа́лъ є҆сѝ, бг҃онача́льнымъ дх҃а сїѧ́нїемъ, и҆ си́хъ посла́лъ є҆сѝ бл҃же, ꙗ҆́кѡ многоми́лостивъ.

Сла́ва:

Оу҆лꙋчи́ти бж҃е́ственнагѡ бл҃же́нства пѣвцє́мъ тѝ, твои́мъ прише́ствїемъ ᲂу҆тѣ́шителю, ꙗ҆́кѡ и҆сто́чникъ <<тл҃є ѡ҆б.: 670>> бл҃ги́хъ, бл҃говолѝ, всеѻрꙋ́жныхъ дарѡ́въ прича́стїе, ꙗ҆́кѡ бл҃гопода́тель подаѧ̀, є҆ди́не человѣколю́бче.

И҆ ны́нѣ, бг҃оро́диченъ:

Бг҃а человѣ́кѡмъ чⷭ҇таѧ премѣни́ла є҆сѝ па́че є҆стества̀, є҆го́же и҆ на́мъ и҆схода́таивши: тобо́ю бо пречи́стаѧ совокꙋпѝ во є҆ди́но пре́жде расточє́нныѧ, и҆ всѝ небе́снагѡ бж҃е́ственнагѡ наслѣ́дїѧ, и҆ пи́щи сподо́бихомсѧ.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.