Неделя всех Святых
book: Триодь цветная title: Неделя всех святых
<<с҃ѻ: 539>>
Недѣ́лѧ всѣ́хъ ст҃ы́хъ,
Въ сꙋббѡ́тꙋ ве́чера, на ма́лѣй вече́рни,
на Гдⷭ҇и воззва́хъ: поста́вимъ стїхѝ д҃. И҆ пое́мъ стїхи̑ры воскре́сны, д҃, гла́съ и҃:
Вече́рнюю пѣ́снь: Гдⷭ҇и, гдⷭ҇и, не ѿве́ржи: Ра́дꙋйсѧ сїѡ́не: Є҆́же ѿ бг҃а ѻ҆ц҃а̀ сло́во: Сла́ва: гла́съ ѕ҃: Мꙋ́ченикѡвъ бж҃е́ственный ли́къ: [И҆щѝ си́хъ всѣ́хъ на вели́цѣй вече́рни]
И҆ ны́нѣ: бг҃оро́диченъ догма́тїкъ, гла́съ и҃:
Ка́кѡ тѧ̀ ᲂу҆блажи́мъ бцⷣе; ка́кѡ же воспое́мъ пребл҃гослове́ннаѧ, непостижи́мое та́инство рожде́нїѧ твоегѡ̀; вѣкѡ́въ бо творе́цъ, и҆ на́шегѡ содѣ́тель є҆стества̀, сво́й ѻ҆́бразъ ᲂу҆ще́дривъ, низведѐ самого̀ себѐ во и҆стоща́нїе неизслѣ́димое: сы́й въ невеще́ственныхъ нѣ́дрѣхъ ѻ҆́ч҃ихъ, во ᲂу҆тро́бѣ твое́й чи́стаѧ, всели́сѧ, и҆ пло́ть непрело́жнѡ бы́сть, ѿ тебѐ неискꙋсобра́чнаѧ, пребы́въ ᲂу҆́бѡ є҆́же бѣ̀ є҆стество́мъ бг҃ъ. тѣ́мже є҆мꙋ̀ покланѧ́емсѧ бг҃ꙋ соверше́ннꙋ, и҆ человѣ́кꙋ соверше́ннꙋ, томꙋ̀ во ѻ҆бое́мъ зра́цѣ: и҆́бо ѻ҆́ба є҆стєства̀ въ не́мъ сꙋ́ть вои́стиннꙋ. сꙋгꙋ́ба же всѧ̑ проповѣ́дꙋемъ є҆сте́ствєннаѧ є҆гѡ̀ свѡ́йства, по сꙋгꙋ́бомꙋ сꙋществꙋ̀, два̀ почита́юще дѣ̑йства и҆ хотѣ̑нїѧ: є҆диносꙋ́щенъ бо сы́й бг҃ꙋ и҆ ѻ҆ц҃ꙋ̀, самовла́стнѡ хо́щетъ и҆ дѣ́йствꙋетъ ꙗ҆́кѡ бг҃ъ: є҆диносꙋ́щенъ же сы́й и҆ на́мъ, самовла́стнѡ <<с҃ѻ ѡ҆б.: 540>> хо́щетъ, и҆ дѣ́йствꙋетъ ꙗ҆́кѡ человѣ́къ. того̀ молѝ, чи́стаѧ, всебл҃же́ннаѧ, спасти́сѧ дꙋша́мъ на́шымъ.
На стїхо́внѣ стїхи́ра воскре́сна. Та́же бг҃оро́дичны, подо́бны г҃. Гла́съ и҃:
Ѽ пресла́внагѡ чꙋдесѐ!
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Ра́дꙋйсѧ бцⷣе всепѣ́таѧ. ра́дꙋйсѧ и҆сто́чниче, жи́знь вѣ̑рнымъ и҆сточа́ющїй. ра́дꙋйсѧ всѣ́хъ влⷣчце, и҆ гпⷭ҇жѐ тва́ри бл҃гослове́ннаѧ. ра́дꙋйсѧ всенепоро́чнаѧ, препросла́вленнаѧ. ра́дꙋйсѧ всепречи́стаѧ. ра́дꙋйсѧ пала́то. ра́дꙋйсѧ бж҃е́ственное селе́нїе. ра́дꙋйсѧ чи́стаѧ. ра́дꙋйсѧ мт҃и дв҃о. ра́дꙋйсѧ бг҃оневѣ́сто.
Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.
Ра́дꙋйсѧ бг҃ома́ти пречⷭ҇таѧ. ра́дꙋйсѧ вѣ́рныхъ наде́жде. ра́дꙋйсѧ мі́ра ѡ҆чище́нїе. ра́дꙋйсѧ всѧ́кїѧ ско́рби и҆збавлѧ́ющи рабы̀ твоѧ̀. ра́дꙋйсѧ человѣ́кѡвъ ᲂу҆тѣше́нїе живоно́сное. ра́дꙋйсѧ застꙋпле́нїе. ра́дꙋйсѧ предсто́лпїе призыва́ющымъ тѧ̀. ра́дꙋйсѧ бж҃їе бж҃е́ственное пребыва́нїе, и҆ горо̀ ст҃а́ѧ.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Ра́дꙋйсѧ бцⷣе, мт҃и хрⷭ҇то́ва. ра́дꙋйсѧ є҆ди́на наде́жде, человѣ́кѡвъ застꙋпле́нїе. ра́дꙋйсѧ прибѣ́жище. ра́дꙋйсѧ свѣ́щниче свѣ́та свѣ́тлый. ра́дꙋйсѧ свѣщѐ ѡ҆свѧще́ннаѧ. ра́дꙋйсѧ пала́то. ра́дꙋйсѧ раю̀. ра́дꙋйсѧ бж҃е́ственное селе́нїе. ра́дꙋйсѧ и҆сто́чниче, и҆сточа́ющь во́ды притека́ющымъ къ тебѣ̀. <<сѻ҃а: 541>>
Сла́ва, и҆ ны́нѣ: бг҃оро́диченъ:
Є҆гѡ́же нб҃о не вмѣстѝ дв҃о бцⷣе, во чре́вѣ твое́мъ нетѣсномѣ́стнѡ вмѣсти́сѧ, и҆ пребыла̀ є҆сѝ чи́стаѧ, сло́вомъ неизрече́ннымъ, ничи́мже дѣ́вствꙋ ѡ҆скве́рншꙋсѧ. ты́ бо є҆ди́на была̀ є҆сѝ въ жена́хъ, и҆ мт҃и, и҆ дв҃а: и҆ ты̀ є҆ди́на пречи́стаѧ воздои́ла є҆сѝ сн҃а живода́вца, и҆ на ѡ҆б̾ѧ́тїѧхъ твои́хъ носи́ла є҆сѝ недре́млющее ѻ҆́ко. но не ѡ҆ста́ви нѣ̑дра ѻ҆́ч҃а, ꙗ҆́коже пре́жде вѣ́къ предбы́сть: но горѣ̀ ве́сь бг҃ъ со а҆́гг҃лы, до́лѣ ве́сь и҆з̾ тебѐ съ человѣ́ки, и҆ вездѣ̀ несказа́ннѡ. того̀ молѝ всест҃а́ѧ влⷣчце, спасти́сѧ правосла́внѡ бцⷣꙋ чⷭ҇тꙋю и҆сповѣ́дающымъ тѧ̀.
По Ны́нѣ ѿпꙋща́еши: И҆ по Ѻ҆́ч҃е на́шъ: тропа́рь воскрⷭ҇нъ. Сла́ва, и҆ ны́нѣ: бг҃оро́диченъ. Є҆ктєнїѝ. И҆ ѿпꙋ́стъ.
На вели́цѣй вече́рни,
по ѻ҆бы́чномъ ѱалмѣ̀ пе́рвꙋю каѳі́смꙋ всю̀.
На Гдⷭ҇и воззва́хъ: поста́вимъ стїхѡ́въ і҃. И҆ пое́мъ стїхи̑ры воскре́сны г҃: и҆ ꙾восто́чны꙾[[а҆нато́лїевы]] г҃: и҆ ст҃ы́хъ д҃.
Стїхи̑ры воскре́сны, гла́съ и҃:
Вече́рнюю пѣ́снь, и҆ слове́снꙋю слꙋ́жбꙋ, тебѣ̀ хрⷭ҇тѐ прино́симъ: ꙗ҆́кѡ бл҃говоли́лъ є҆сѝ поми́ловати на́съ воскрⷭ҇нїемъ.
Гдⷭ҇и, гдⷭ҇и, не ѿве́ржи на́съ ѿ твоегѡ̀ лица̀: но бл҃говолѝ поми́ловати на́съ воскрⷭ҇нїемъ.
Ра́дꙋйсѧ, сїѡ́не ст҃ы́й, мт҃и цр҃кве́й, бж҃їе жили́ще, ты́ бо прїѧ́лъ є҆сѝ пе́рвый, ѡ҆ставле́нїе грѣхѡ́въ, воскрⷭ҇нїемъ. <<сѻ҃а ѡ҆б.: 542>>
꙾Восто́чны꙾[[а҆нато́лїевы]]
Є҆́же ѿ бг҃а ѻ҆ц҃а̀ сло́во, пре́жде вѣ́къ ро́ждшеесѧ, въ послѣ̑днѧѧ же времена̀, то́ежде ѿ неискꙋсобра́чныѧ вопло́щшеесѧ во́лею, распѧ́тїе сме́ртное претерпѣ̀: и҆ дре́вле ᲂу҆мерщвле́ннаго человѣ́ка сп҃сѐ свои́мъ воскрⷭ҇нїемъ.
Є҆́же и҆з̾ ме́ртвыхъ твоѐ воскрⷭ҇нїе славосло́вимъ хрⷭ҇тѐ, и҆́мже свободи́лъ є҆сѝ а҆да́мскїй ро́дъ ѿ а҆́дова мꙋчи́тельства: и҆ дарова́лъ є҆сѝ мі́рови ꙗ҆́кѡ бг҃ъ жи́знь вѣ́чнꙋю, и҆ ве́лїю млⷭ҇ть.
Сла́ва тебѣ̀ хрⷭ҇тѐ сп҃се, сн҃е бж҃їй є҆диноро́дный, пригвозди́выйсѧ на крⷭ҇тѣ̀, и҆ воскр҃сы́й и҆з̾ гро́ба тридне́венъ.
Стїхи̑ры всѣ́мъ ст҃ы̑мъ, гла́съ ѕ҃.
Подо́бенъ: Всю̀ ѿложи́вше:
Дх҃о́внїи вѣті́и, ᲂу҆ченицы̀ сп҃совы, дх҃ꙋ ѻ҆рга́ни бы́вше вѣ́рою, разсѣ́ѧшасѧ въ концы̀ землѝ, чⷭ҇тно́е проповѣ́данїе правосла́внѣ сѣ́юще: ѿ ни́хже прозѧбо́ша бж҃е́ственнымъ земледѣ́лїемъ, и҆ бл҃года́тїю мч҃нкъ вѡ́инства, стра́сть честнꙋ́ю ѡ҆бразꙋ́ющѧ, многоѻбра́зными раздробле́нїй ра́нами и҆ ѻ҆гне́мъ, и҆ со дерзнове́нїемъ мо́лѧтсѧ ѡ҆ дꙋша́хъ на́шихъ.
Ѻ҆гне́мъ воспалѧ́еми гдⷭ҇ни любвѐ, ѻ҆гнѧ̀ презрѣ́ша, и҆ ꙗ҆́кѡ бж҃е́ственное ᲂу҆́глїе возжига́еми честні́и мꙋ́чєницы во хрⷭ҇тѣ̀, попали́ша хвра́стное ле́сти шата́нїе: ѕвѣре́й же загради́ша ᲂу҆ста̀ честны́мъ призыва́нїемъ, и҆ во главы̑ ᲂу҆сѣка́еми, посѣко́ша врага̀ всѧ̑ ѡ҆полчє́нїѧ, и҆ крове́й пролива́юще пото́ки терпѣли́внѡ, цр҃ковь напои́ша вѣ́рою просвѣща́емꙋ.
Со ѕвѣрьмѝ бра́вшесѧ, бїе́ми мече́мъ, ноготьмѝ растерза́еми, рꙋка́ми ѿе́млеми, и҆ мꙋ́чими тве́рдїи мꙋ́ченицы, <<сѻ҃в: 543>> и҆ ѻ҆гне́мъ веще́ственнымъ неща́днѡ пали́ми, и҆ пробода́еми, и҆ соста́вы ссѣца́еми, претерпѣ́ша твердѣ́йше: ᲂу҆покое́нїе предви́дѣша бꙋ́дꙋщее, и҆ нетлѣ̑нныѧ вѣнцы̀, и҆ сла́вꙋ хрⷭ҇та̀, є҆мꙋ́же со дерзнове́нїемъ мо́лѧтсѧ ѡ҆ дꙋша́хъ на́шихъ.
Во всѣ́хъ концѣ́хъ страда́вшыѧ вѣ́рнѡ а҆пⷭ҇лы, мꙋ́ченики, сщ҃е́нники бг҃омꙋ̑дрыѧ, чⷭ҇тны́хъ же́нъ сщ҃е́нное стека́нїе, сщ҃е́нными пѣ́сньми по до́лгꙋ восхва́лимъ, ꙗ҆́кѡ соедини́шасѧ нбⷭ҇нымъ земні́и, и҆ страстьмѝ безстра́стїе блгⷣтїю хрⷭ҇то́вою прїѧ́ша: и҆ ны́нѣ ꙗ҆́кѡ ѕвѣ́зды свѣ̑тлыѧ ѡ҆зарѧ́юще на́съ, со дерзнове́нїемъ мо́лѧтсѧ ѡ҆ дꙋша́хъ на́шихъ.
Сла́ва: гла́съ то́йже:
Мꙋ́чєникъ бж҃е́ственный ли́къ, цр҃кви ѡ҆снова́нїе, бл҃говѣ́стїю сконча́нїе, вы̀ дѣ́ломъ сп҃сова глагѡ́ланїѧ и҆спо́лнисте: ва́ми бо врата̀ а҆́дова на цр҃ковь ѿве́рзшаѧсѧ заключи́шасѧ, кро́ве ва́шеѧ ли́тїе і҆́дѡльскїѧ жє́ртвы и҆зсꙋшѝ, закла́нїе ва́ше породѝ цр҃ко́вное и҆сполне́нїе, безпло́тныхъ ᲂу҆диви́сте, бг҃ꙋ вѣнцено́сцы предстоитѐ: є҆го́же непреста́ннѡ моли́те ѡ҆ дꙋша́хъ на́шихъ.
И҆ ны́нѣ, бг҃оро́диченъ, гла́съ и҃:
Цр҃ь нбⷭ҇ный за чл҃вѣколю́бїе на землѝ ꙗ҆ви́сѧ, и҆ съ человѣ́ки поживѐ: ѿ дв҃ы бо чⷭ҇тыѧ пло́ть прїе́мый, и҆ и҆з̾ неѧ̀ проше́дый съ воспрїѧ́тїемъ: є҆ди́нъ є҆́сть сн҃ъ, сꙋгꙋ́бъ є҆стество́мъ, но не ѵ҆поста́сїю. тѣ́мже соверше́нна того̀ бг҃а, и҆ соверше́нна чл҃вѣ́ка вои́стиннꙋ проповѣ́дающе, и҆сповѣ́дꙋемъ хрⷭ҇та̀ бг҃а на́шего: є҆го́же молѝ мт҃и безневѣ́стнаѧ, поми́ловатисѧ дꙋша́мъ на́шымъ.
Вхо́дъ. Свѣ́те ти́хїй: Прокі́менъ днѐ: Гдⷭ҇ь воцари́сѧ: и҆ чтє́нїѧ. <<сѻ҃в ѡ҆б.: 544>>
Проро́чества и҆са́їина чте́нїе. [Глава̀ м҃г.]
Та́кѡ глаго́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ́зи ѿ ни́хъ. Кто̀ возвѣсти́тъ сїѧ̑; и҆лѝ ꙗ҆̀же ѿ нача́ла, кто̀ слы́шана сотвори́тъ ва́мъ; да приведꙋ́тъ свидѣ́тели своѧ̑, и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тели, и҆ а҆́зъ свидѣ́тель, глаго́летъ гдⷭ҇ь бг҃ъ, и҆ ѻ҆́трокъ є҆го́же и҆збра́хъ: да позна́ете, и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менѐ не бы́сть и҆́нъ бг҃ъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менѐ спаса́ѧй. А҆́зъ возвѣсти́хъ и҆ спасо́хъ, ᲂу҆ничижи́хъ, и҆ не бѣ̀ въ ва́съ чꙋжді́й. Вы̀ мнѣ̀ свидѣ́тели, и҆ а҆́зъ гдⷭ҇ь бг҃ъ, и҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй: сотворю̀, и҆ кто̀ ѿврати́тъ то̀; Си́це глаго́летъ гдⷭ҇ь бг҃ъ, и҆збавлѧ́ѧй ва́съ ст҃ы́й і҆и҃левъ.
Премꙋ́дрости соломѡ́ни чте́нїе. [Глава̀ г҃.]
Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: И҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ чл҃вѣ́ческимъ, а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено: И҆ въ ма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ досто́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ: и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ и҆ ѡ҆блада́ютъ людьмѝ, и҆ воцари́тсѧ гдⷭ҇ь въ ни́хъ во <<сѻ҃г: 545>> вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀. Ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе. [Глава̀ є҃.]
Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆́хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ ѻ҆рꙋ́жїе: спобо́ретъ же съ ни́мъ мі́ръ на безꙋ́мныѧ. По́йдꙋтъ праволꙋ̑чныѧ стрѣ́лы мо́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ: И҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды. Вознегодꙋ́етъ на ни́хъ вода̀ морска́ѧ, рѣ́ки же пото́пѧтъ ѧ҆̀ на́глѡ. Сопроти́въ ста́нетъ и҆̀мъ дх҃ъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆́бѡ ца́рїе и҆ разꙋмѣ́йте, навы́кните сꙋдїѝ концє́въ землѝ. Внꙋши́те держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы̑къ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.
На лїті́и стїхи́ра хра́ма.
Та́же самогла́сны ст҃ы́хъ всѣ́хъ. Гла́съ а҃:
Вѣ́ры согла́сїемъ мїрско́е торжество̀, ѿ вѣ́ка бг҃ꙋ бл҃гоꙋгоди́вшихъ, патрїа́рхѡвъ честно́е и҆ проро́кѡвъ <<сѻ҃г ѡ҆б.: 546>> сосло́вїе, а҆пⷭ҇лѡвъ ᲂу҆добре́нїе, мч҃нкѡвъ собра́нїе, по́стникѡвъ похвалꙋ̀, всѣ́хъ ст҃ы́хъ па́мѧть дꙋхо́внѣ пра́зднꙋимъ: мо́лѧтъ бо сѧ непреста́ннѡ, дарова́тисѧ ми́рꙋ мі́рови, и҆ дꙋша́мъ на́шымъ ве́лїей ми́лости.
Прїиди́те всѝ вѣ́рнїи, ст҃ы́хъ всѣ́хъ всесла́внꙋю па́мѧть, во ѱалмѣ́хъ, пѣ́нїихъ и҆ пѣ́снехъ дх҃о́вныхъ восхва́лимъ: крⷭ҇ти́телѧ сп҃си́телева, а҆пⷭ҇лы, проро́ки и҆ мч҃нки, сщ҃еннонача́льники, ᲂу҆чи́тели же и҆ прпⷣбныѧ, по́стники и҆ првⷣныѧ, и҆ ст҃ы́хъ же́нъ бг҃олю́бное состоѧ́нїе, че́стнѡ ᲂу҆блажа́юще, согла́снѡ возопїи́мъ: пребл҃гі́й хрⷭ҇тѐ бж҃е на́шъ, тѣ́хъ мл҃твами пода́ждь ми́ръ цр҃квамъ твои̑мъ, побѣ̑ды на врагѝ хрⷭ҇толюби̑вымъ лю́демъ, и҆ дꙋша́мъ на́шымъ ве́лїю ми́лость.
Прїиди́те всѝ дх҃о́внѣ возвесели́мсѧ ѡ҆ па́мѧти ст҃ы́хъ: се́ бо прїи́де богатотвѡ́рнаѧ на́мъ дарова̑нїѧ приносѧ́щи. тѣ́мже во гла́сѣ ра́дости, и҆ чи́стѣй со́вѣсти возопїи́мъ, глаго́люще: ра́дꙋйтесѧ проро́кѡвъ сосло́вїе, и҆̀же прише́ствїе хрⷭ҇то́во мі́рови проповѣ́давше, и҆ ꙗ҆̀же и҆здале́ча, ꙗ҆́кѡ бли́зꙋ предви́дѣвше. ра́дꙋйтесѧ а҆пⷭ҇льскїй ли́че, ꙗ҆зы́кѡвъ мрє́жницы, и҆ ловцы̀ человѣ́кѡвъ. ра́дꙋйтесѧ мч҃никѡвъ собо́ре, ѿ конє́цъ землѝ собра́вшїисѧ во є҆ди́нꙋ вѣ́рꙋ, и҆ ѡ҆ то́й мꙋ́къ томлє́нїѧ претерпѣ́вшїи, и҆ соверше́ннѣ страда́нїѧ вѣне́цъ прїе́мшїи. ра́дꙋйтесѧ ѻ҆ц҃є́въ наслажде́нїе, своѧ̑ тѣлеса̀ поще́нїемъ и҆ста́ѧвше, и҆ ᲂу҆мертви́вше стра̑сти плотскі̑ѧ, ᲂу҆́мъ бж҃е́ственнымъ раче́нїемъ впери́сте, на нб҃са̀ возлетѣ́сте, и҆ со а҆́гг҃лы водворѧ́ющесѧ, воспрїе́млете вѣ̑чнаѧ бл҃га̑ѧ. но ѽ проро́цы, а҆пⷭ҇ли, и҆ мꙋ́ченицы съ <<сѻ҃д: 547>> по́стники, ва́съ вѣнча́вшаго прилѣ́жнѡ моли́те, и҆зба́витисѧ ѿ вра̑гъ ви́димыхъ и҆ неви́димыхъ, въ вѣ́рѣ и҆ любвѝ соверша́ющымъ при́снѡ честнꙋ́ю па́мѧть ва́шꙋ.
Сла́ва: гла́съ є҃:
Ны́нѣшнемꙋ торжествꙋ̀ стеце́мсѧ вѣ́рнїи: предлага́етъ сѧ и҆ на́мъ дх҃о́внаѧ трапе́за, и҆ ча́ша та́инственнаѧ ѿ сла́дкихъ бра́шенъ, весе́лїѧ и҆спо́лнена мꙋ́ченическихъ добродѣ́телей. сїи́ бо терпѣливодꙋ́шнїи ѿ конє́цъ землѝ, тѣле́сное всеразли́чнымъ преда́вше ра́намъ, бг҃ꙋ принесо́ша же́ртвꙋ слове́снꙋ, всѧ́кїй во́зрастъ: ѻ҆́ви ᲂу҆́бѡ во главы̑ ᲂу҆сѣка́еми, ѻ҆́вїи же по хребтꙋ̀ стрꙋ́жеми: дрꙋзі́и же рꙋ́къ ѿсѣче́нїе и҆ всѣ́хъ ᲂу҆дѡ́въ, всѝ вкꙋ́пѣ ст҃і́и хрⷭ҇то́вымъ страда́нїємъ ѻ҆́бщницы бы́ша. но вѣнцы̀ тѣ̑мъ возме́здїе мꙋ́къ пода́вый гдⷭ҇и, во слѣ́дъ тѣ́хъ жи́тельствовати сподо́би на́съ, ꙗ҆́кѡ человѣколю́бецъ.
И҆ ны́нѣ: бг҃оро́диченъ, гла́съ то́йже:
Хра́мъ и҆ две́рь є҆сѝ, пала́та и҆ престо́лъ цр҃е́въ, дв҃о всечестна́ѧ: є҆́юже и҆зба́витель мо́й, хрⷭ҇то́съ гдⷭ҇ь, во тмѣ̀ спѧ́щымъ ꙗ҆ви́сѧ, сл҃нце сы́й пра́вды, просвѣти́ти хотѧ̀, ꙗ҆̀же созда̀ по ѻ҆́бразꙋ своемꙋ̀ рꙋко́ю свое́ю. тѣ́мже всепѣ́таѧ, ꙗ҆́кѡ мт҃рне дерзнове́нїе къ немꙋ̀ стѧжа́вшаѧ, непреста́ннѡ молѝ спасти́сѧ дꙋша́мъ на́шымъ.
На стїхо́внѣ стїхи̑ры воскрⷭ҇ны. гла́съ и҃:
Возше́лъ є҆сѝ на крⷭ҇тъ і҆и҃се, снизше́дый съ нб҃сѐ: прише́лъ є҆сѝ на сме́рть животѐ безсме́ртный, къ сꙋ́щымъ во тьмѣ̀ свѣ́тъ и҆́стинный: къ па́дшымъ всѣ́хъ воскрⷭ҇нїе, просвѣще́нїе, и҆ сп҃се на́шъ, сла́ва тебѣ̀. <<сѻ҃д ѡ҆б.: 548>>
И҆́ны стїхи̑ры ꙾восто́чны꙾[[а҆нато́лїевы]] по а҆лфави́тꙋ.
Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Хрⷭ҇та̀ славосло́вимъ, воскрⷭ҇шаго ѿ ме́ртвыхъ: дꙋ́шꙋ бо и҆ тѣ́ло прїе́мъ, стра̑сти ѿѻбою́дꙋ ѿсѣчѐ, пречⷭ҇тѣй ᲂу҆́бѡ дш҃ѝ во а҆́дъ соше́дшей, є҆го́же и҆ плѣнѝ: во гро́бѣ же и҆стлѣ́нїѧ не ви́дѣ ст҃о́е тѣ́ло, и҆зба́вителѧ дꙋ́шъ на́шихъ.
Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ.
Ѱалмы̀ и҆ пѣ́сньми славосло́вимъ хрⷭ҇тѐ, ѿ ме́ртвыхъ твоѐ воскрⷭ҇нїе: и҆́мже на́съ свободи́лъ є҆сѝ мꙋчи́тельства а҆́дова, и҆ ꙗ҆́кѡ бг҃ъ дарова́лъ є҆сѝ жи́знь вѣ́чнꙋю, и҆ ве́лїю млⷭ҇ть.
Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.
Ѽ влⷣко всѣ́хъ непостижи́ме, тво́рче нб҃сѐ и҆ землѝ, крⷭ҇то́мъ пострада́вый, мнѣ̀ безстра́стїе и҆сточи́лъ є҆сѝ: погребе́нїе же прїе́мъ, и҆ воскр҃съ во сла́вѣ, совоскр҃си́лъ є҆сѝ а҆да́ма рꙋко́ю всеси́льною. сла́ва твоемꙋ̀ тридне́вномꙋ воста́нїю, и҆́мже дарова́лъ є҆сѝ на́мъ вѣ́чнꙋю жи́знь, и҆ ѡ҆чище́нїе грѣхѡ́въ, ꙗ҆́кѡ є҆ди́нъ бл҃гоꙋтро́бенъ.
Сла́ва: гла́съ ѕ҃:
Прїиди́те вѣ́рнїи, дне́сь ли́къ совокꙋпи́вше, бл҃гоче́стнѡ торжествꙋ́имъ, и҆ всѣ́хъ ст҃ы́хъ пресла́внꙋю и҆ честнꙋ́ю па́мѧть сла́внѡ почти́мъ, глаго́люще: ра́дꙋйтесѧ а҆пⷭ҇ли сла́внїи, проро́цы, и҆ мꙋ́чєницы, и҆ сщ҃еннонача́льницы. ра́дꙋйтесѧ преподо́бныхъ собо́ре и҆ пра́ведныхъ. ра́дꙋйтесѧ честны́хъ же́нъ ли́че, и҆ хрⷭ҇та̀ ѡ҆ мі́рѣ моли́те, побѣ̑ды на сопроти̑вныѧ дарова́ти, и҆ дꙋша́мъ на́шымъ ве́лїю ми́лость. <<сѻ҃є: 549>>
И҆ ны́нѣ: бг҃оро́диченъ:
Творе́цъ и҆ и҆зба́витель мо́й, пречⷭ҇таѧ, хрⷭ҇то́съ гдⷭ҇ь и҆з̾ твои́хъ ложе́снъ проше́дъ, въ мѧ̀ ѡ҆болкі́йсѧ, пе́рвыѧ клѧ́твы а҆да́ма свободѝ. тѣ́мже тѝ, всечⷭ҇таѧ, ꙗ҆́кѡ бж҃їи мт҃ри же и҆ дв҃ѣ, вои́стиннꙋ вопїе́мъ немо́лчнѡ: ра́дꙋйсѧ а҆́гг҃льски, ра́дꙋйсѧ влⷣчце, предста́тельство и҆ покро́ве, и҆ спасе́нїе дꙋ́шъ на́шихъ.
По трист҃о́мъ тропа́рь: Бцⷣе дв҃о ра́дꙋйсѧ: два́жды. И҆ ст҃ы́хъ є҆ди́нощи. И҆ благослове́нїе хлѣ́бѡвъ. И҆ чте́нїе посла́нїѧ собо́рнагѡ і҆а́кѡвлѧ.
А҆́ще ли ᲂу҆́бѡ не твори́тсѧ бдѣ́нїе, на Гдⷭ҇и воззва́хъ: воскре́сны г҃: и҆ ꙾восто́ченъ꙾[[а҆нато́лїевъ]] є҆ди́нъ, и҆ ст҃ы́хъ на ѕ҃. Подо́бенъ: Всю̀ ѿложи́вше:
По трист҃о́мъ тропа́рь воскре́сенъ: Сла́ва: ст҃ы̑мъ: И҆ ны́нѣ: бг҃оро́диченъ: пи́саны въ нача́лѣ ᲂу҆́трени. И҆ ѿпꙋ́стъ. На полꙋ́нощницѣ канѡ́нъ тро́ичный ѿ ѻ҆ктѡ́иха, гла́са.
Въ недѣ́лю всѣ́хъ ст҃ы́хъ на ᲂу҆́трени,
на Бг҃ъ гдⷭ҇ь: тропа́рь воскре́сный, гла́съ и҃.
Съ высоты̀ снизше́лъ є҆сѝ благоꙋтро́бне, погребе́нїе прїѧ́лъ є҆сѝ тридне́вное, да на́съ свободи́ши страсте́й, животѐ и҆ воскресе́нїе на́ше, гдⷭ҇и сла́ва тебѣ̀.
Сла́ва: ст҃ы̑мъ тропа́рь, гла́съ д҃:
И҆́же во все́мъ мі́рѣ мч҃нкъ твои́хъ, ꙗ҆́кѡ багрѧни́цею и҆ вѵ́ссомъ кровьмѝ цр҃ковь твоѧ̀ ᲂу҆краси́вшисѧ, <<сѻ҃є ѡ҆б.: 550>> тѣ́ми вопїе́тъ тѝ хрⷭ҇тѐ бж҃е: лю́демъ твои̑мъ щедрѡ́ты твоѧ̀ низпослѝ, ми́ръ жи́тельствꙋ твоемꙋ̀ да́рꙋй, и҆ дꙋша́мъ на́шымъ ве́лїю ми́лость.
И҆ ны́нѣ: бг҃оро́диченъ:
Є҆́же ѿ вѣ́ка ᲂу҆тае́нное, и҆ а҆́гг҃лѡмъ несвѣ́домое та́инство, тобо́ю, бцⷣе, сꙋ́щымъ на землѝ ꙗ҆ви́сѧ бг҃ъ, въ несли́тномъ соедине́нїи воплоща́емь, и҆ крⷭ҇тъ во́лею на́съ ра́ди воспрїи́мъ: и҆́мже воскреси́въ первозда́ннаго, спасѐ ѿ сме́рти дꙋ́шы на́шѧ.
По а҃-мъ стїхосло́вїи сѣда́ленъ воскре́сенъ, гла́съ и҃:
Воскре́слъ є҆сѝ и҆з̾ ме́ртвыхъ животѐ всѣ́хъ, и҆ а҆́гг҃лъ свѣ́та жена́мъ вопїѧ́ше: преста́ните ѿ сле́зъ, а҆пⷭ҇лѡмъ бл҃говѣсти́те, возопі́йте пою́ще: ꙗ҆́кѡ воскре́се хрⷭ҇то́съ гдⷭ҇ь, благоволи́вый спастѝ ꙗ҆́кѡ бг҃ъ, ро́дъ человѣ́ческїй.
Сті́хъ: Воскрⷭ҇нѝ гдⷭ҇и бж҃е мо́й:
Человѣ́цы сп҃се гро́бъ тво́й запеча́таша, а҆́гг҃лъ ка́мень ѿ две́рей ѿвалѝ: жєны̀ ви́дѣша воста́вша и҆з̾ ме́ртвыхъ, и҆ ты̑ѧ благовѣсти́ша ᲂу҆ченикѡ́мъ твои́мъ въ сїѡ́нѣ, ꙗ҆́кѡ воскре́слъ є҆сѝ животѐ всѣ́хъ, и҆ разрѣши́шасѧ ᲂу҆́зы смє́ртныѧ: гдⷭ҇и сла́ва тебѣ̀.
Сла́ва, и҆ ны́нѣ: бг҃оро́диченъ:
И҆́же на́съ ра́ди рожде́йсѧ ѿ дв҃ы, и҆ распѧ́тїе претерпѣ́въ благі́й, и҆спрове́ргїй сме́ртїю сме́рть, и҆ воскресе́нїе ꙗ҆вле́й, ꙗ҆́кѡ бг҃ъ, не пре́зри ꙗ҆̀же созда́лъ є҆сѝ рꙋко́ю твое́ю: ꙗ҆вѝ человѣколю́бїе твоѐ ми́лостиве, прїимѝ ро́ждшꙋю тѧ̀ бцⷣꙋ, молѧ́щꙋюсѧ за ны̀, и҆ спасѝ сп҃се на́шъ лю́ди ѿча̑ѧнныѧ.
И҆ чте́нїе во є҆ѵⷢ҇лїи толково́мъ. <<сѻ҃ѕ: 551>>
По в҃-мъ стїхосло́вїи сѣда́ленъ, гла́съ и҃.
Подо́бенъ: Повелѣ́нное та́йнѡ:
Бѣлоносѧ́й гаврїи́лъ свѣ́телъ предста̀, ꙗ҆́кѡ въ ви́дѣ мо́лнїи, хрⷭ҇то́вꙋ гро́бꙋ, и҆ ка́мень ѿвалѝ ѿ гро́ба, и҆ стра́хъ ве́лїй содержа́ше твоѧ̑ стра̑жи, и҆ внеза́пꙋ пребы́ша всѝ а҆́ки ме́ртви. ѿ гро́ба стра́жей, и҆ ка́мене печа́ти ᲂу҆стыди́тесѧ пребеззако́ннїи, разꙋмѣ́йте, ꙗ҆́кѡ воскре́се хрⷭ҇то́съ.
Дрꙋгі́й сѣда́ленъ. Подо́бенъ: Премꙋ́дрости сло́ва:
Воскре́съ ѿ гро́ба ꙗ҆́кѡ вои́стиннꙋ, преподѡ́бнымъ повелѣ́лъ є҆сѝ жена́мъ проповѣ́дати воста́нїе а҆пⷭ҇лѡмъ, ꙗ҆́коже пи́сано є҆́сть: и҆ ско́рый пе́тръ предста̀ гро́бꙋ, и҆ свѣ́тъ во гро́бѣ зрѧ̀ ᲂу҆жаса́шесѧ. тѣ́мже и҆ ви́дѣвъ плащани̑цы є҆ди́ны, кромѣ̀ бж҃е́ственнагѡ тѣ́ла, въ не́мъ лежа́щыѧ, со стра́хомъ возопѝ: сла́ва тебѣ̀ хрⷭ҇тѐ бж҃е, ꙗ҆́кѡ спаса́еши всѧ̑ сп҃се на́шъ, ѻ҆́ч҃ее бо є҆сѝ сїѧ́нїе.
Сла́ва, и҆ ны́нѣ: бг҃оро́диченъ [не сѣдѧ́ще пое́мъ, но стоѧ́ще и҆ со стра́хомъ и҆ благоговѣ́нїемъ глаго́лемъ] настоѧ́щїй:
Ѡ҆ тебѣ̀ ра́дꙋетсѧ бл҃года́тнаѧ всѧ́каѧ тва́рь, а҆́гг҃льскїй собо́ръ, и҆ человѣ́ческїй ро́дъ: ѡ҆свѧще́нный хра́ме, и҆ раю̀ слове́сный, двⷭ҇твеннаѧ похвало̀, и҆з̾ неѧ́же бг҃ъ воплоти́сѧ, и҆ младе́нецъ бы́сть, пре́жде вѣ́къ сы́й бг҃ъ на́шъ: ложесна́ бо твоѧ̀ прⷭ҇то́лъ сотворѝ, и҆ чре́во твоѐ простра́ннѣе нб҃съ содѣ́ла. ѡ҆ тебѣ̀ ра́дꙋетсѧ бл҃года́тнаѧ, всѧ́каѧ тва́рь, сла́ва тебѣ̀.
И҆ чте́нїе во є҆ѵⷢ҇лїи толково́мъ.
По непоро́чнахъ тропарѝ: А҆́гг҃льскїй собо́ръ: <<сѻ҃ѕ ѡ҆б.: 552>>
И҆ по ни́хъ ѵ҆пакоѝ, гла́съ и҃:
Мѷронѡ́сицы жизнода́вца предстоѧ́щыѧ гро́бꙋ, влⷣкꙋ и҆ска́хꙋ въ ме́ртвыхъ безсме́ртнаго, и҆ ра́дость благовѣ́щенїѧ ѿ а҆́гг҃ла прїе́мшыѧ, а҆пⷭ҇лѡмъ возвѣща́хꙋ воскре́се хрⷭ҇то́съ бг҃ъ, подаѧ́й мі́рови ве́лїю ми́лость.
Степє́нна, гла́съ и҃. А҆нтїфѡ́нъ а҃:
Ѿ ю҆́ности моеѧ̀ вра́гъ мѧ̀ и҆скꙋша́етъ, сластьмѝ пали́тъ мѧ̀, а҆́зъ же надѣ́ѧсѧ на тѧ̀ гдⷭ҇и, побѣжда́ю сего̀.
Ненави́дѧщїи сїѡ́на, да бꙋ́дꙋтъ ᲂу҆́бѡ пре́жде и҆сторже́нїѧ ꙗ҆́кѡ трава̀: ссѣче́тъ бо хрⷭ҇то́съ вы̑ѧ и҆́хъ, ᲂу҆сѣче́нїемъ мꙋ́къ.
Сла́ва:
Ст҃ы́мъ дх҃омъ, є҆́же жи́ти всѧ́чєскимъ: свѣ́тъ ѿ свѣ́та, бг҃ъ вели́къ, со ѻ҆ц҃е́мъ пое́мъ є҆мꙋ̀, и҆ сло́вомъ.
И҆ ны́нѣ: то́йже.
А҆нтїфѡ́нъ в҃:
Се́рдце моѐ стра́хомъ твои́мъ да покры́етсѧ, смиреномꙋ́дрствꙋющее, да не возне́сшеесѧ ѿпаде́тъ ѿ тебѐ всеще́дре.
На гдⷭ҇а и҆мѣ́вый наде́ждꙋ, не ᲂу҆страши́тсѧ тогда̀, є҆гда̀ ѻ҆гне́мъ всѧ̑ сꙋди́ти и҆́мать и҆ мꙋ́кою.
Сла́ва:
Ст҃ы́мъ дх҃омъ, всѧ́къ кто̀ бж҃е́ственный ви́дитъ, и҆ предглаго́летъ, чꙋдодѣ́йствꙋетъ вы̑шнѧѧ, въ трїе́хъ є҆ди́наго бг҃а поѧ̀: а҆́ще бо и҆ трисїѧ́етъ, є҆динонача́льствꙋетъ бж҃ество̀.
И҆ ны́нѣ: то́йже.
А҆нтїфѡ́нъ г҃:
Воззва́хъ тебѣ̀ гдⷭ҇и, вонмѝ, приклони́ ми ᲂу҆́хо <<сѻ҃з: 553>> твоѐ, вопїю́щꙋ: и҆ ѡ҆чи́сти пре́жде да́же не во́змеши менѐ ѿсю́дꙋ.
Къ мт҃ри свое́й землѝ ѿходѧ́й всѧ́къ, па́ки разрѣша́етсѧ, прїѧ́ти мꙋ̑ки, и҆лѝ по́чєсти пожи́вшихъ.
Сла́ва:
Ст҃ы́мъ дх҃омъ, бг҃осло́вїе є҆ди́ница трист҃а́ѧ: ѻ҆ц҃ъ бо безнача́ленъ, ѿ негѡ́же роди́сѧ сн҃ъ безлѣ́тнѡ, и҆ дх҃ъ сопресто́ленъ, соѻбра́зенъ, ѿ ѻ҆ц҃а̀ спросїѧ́вшїй.
И҆ ны́нѣ, то́йже.
А҆нтїфѡ́нъ д҃:
Сѐ ны́нѣ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ; въ се́мъ бо гдⷭ҇ь ѡ҆бѣща̀ живо́тъ вѣ́чный.
Ѡ҆ ри́зѣ свое́й, и҆́же крі́ны се́льныѧ ᲂу҆краша́ѧй повелѣва́етъ, ꙗ҆́кѡ не подоба́етъ пещи́сѧ.
Сла́ва:
Ст҃ы́мъ дх҃омъ, є҆динови́дною вино́ю, всѧ̑ содержа́тсѧ миропода́тельнѣ: бг҃ъ бо се́й є҆́сть, ѻ҆ц҃ꙋ́ же и҆ сн҃ови є҆диносꙋ́щенъ гдⷭ҇ственнѣ.
И҆ ны́нѣ, то́йже.
Прокі́менъ, гла́съ и҃: Воцр҃и́тсѧ гдⷭ҇ь во вѣ́къ, бг҃ъ тво́й сїѡ́не въ ро́дъ и҆ ро́дъ. Сті́хъ: Хвалѝ дꙋшѐ моѧ̀ гдⷭ҇а, восхвалю̀ гдⷭ҇а въ животѣ̀ мое́мъ. Всѧ́кое дыха́нїе: Є҆ѵⷢ҇лїе ѿ матѳе́а воскре́сно, а҃ ᲂу҆́треннее, зача́ло рѕ҃і: Є҆динїина́десѧть ᲂу҆ченицы̀: Ѿ сегѡ̀ ᲂу҆́бѡ днѐ ᲂу҆́треннѧѧ є҆ѵⷢ҇лїа воскре́сна начина́емъ честѝ по рѧ́дꙋ.
Воскрⷭ҇нїе хрⷭ҇то́во: И҆ ѱало́мъ н҃. Сла́ва, Моли́твами ст҃ы́хъ а҆пⷭ҇лѡвъ: И҆ ны́нѣ: Моли́твами бцⷣы: Стїхи́ра, гла́съ ѕ҃: Воскре́съ і҆и҃съ ѿ гро́ба: <<сѻ҃з ѡ҆б.: 554>>
Канѡ́ны д҃: воскре́сенъ со і҆рмосо́мъ на д҃, крⷭ҇товоскре́сенъ на два̀, и҆ бцⷣѣ на два̀, и҆ всѣ́мъ ст҃ы̑мъ на ѕ҃.
Канѡ́нъ воскре́сенъ, гла́съ и҃.
Пѣ́снь а҃.
І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.
Всеси́льнꙋ хрⷭ҇то́вꙋ бж҃ествꙋ̀ ка́кѡ не диви́мсѧ; ѿ страсте́й ᲂу҆́бѡ всѣ̑мъ вѣ̑рнымъ безстра́стїе и҆ нетлѣ́нїе точа́щꙋ, ѿ ребра́ же ст҃а́гѡ и҆сто́чникъ безсме́ртїѧ и҆ска́пающꙋ, и҆ живо́тъ и҆з̾ гро́ба присносꙋ́щный.
Ꙗ҆́кѡ бл҃голѣ́пенъ жена́мъ а҆́гг҃лъ ны́нѣ ꙗ҆ви́сѧ, и҆ свѣ̑тлыѧ носѧ̀ є҆сте́ствєнныѧ ѻ҆́бразы невеще́ственныѧ чистоты̀, зра́комъ же возвѣща́ѧ свѣ́тъ воскресе́нїѧ, зовы́й: воскре́се гдⷭ҇ь.
Бг҃оро́диченъ:
Пресла̑внаѧ возглаго́лашасѧ ѡ҆ тебѣ̀ въ ро́дѣхъ родѡ́въ, бг҃а сло́ва во чре́вѣ вмѣ́щшаѧ, чиста́ же пребы́вши бцⷣе мр҃і́е. тѣ́мже тѧ̀ всѝ почита́емъ, сꙋ́щее по бз҃ѣ предста́тельство на́ше.
Канѡ́нъ крⷭ҇товоскре́сенъ.
І҆рмо́съ: Во́дꙋ проше́дъ:
Взѧ́шасѧ врата̀ болѣ́знєннаѧ, и҆ ᲂу҆жасо́шасѧ вра́тницы а҆́довы, зрѧ́ще въ преиспѡ́днѣйшаѧ соше́дшаго, и҆́же на высотѣ̀ всѣ́хъ превы́ше є҆стества̀.
Оу҆диви́шасѧ чи́ни а҆́гг҃льстїи, зрѧ́ще на престо́лѣ посажде́но ѻ҆́ч҃и па́дшее є҆стество̀ человѣ́ческое, затворе́нное въ преиспо́днихъ землѝ. <<сѻ҃и: 555>>
И҆́нъ канѡ́нъ прест҃ѣ́й бцⷣѣ.
І҆рмо́съ: Пои́мъ гдⷭ҇ви:
Пречи́стаѧ бцⷣе, вопло́щшеесѧ присносꙋ́щное и҆ пребж҃е́ственное сло́во па́че є҆стества̀ ро́ждшаѧ, пое́мъ тѧ̀.
Гро́здъ тѧ̀ живоно́сенъ, всемі́рнагѡ и҆ска́пающь сла́дость спасе́нїѧ, дв҃а хрⷭ҇тѐ родѝ.
Канѡ́нъ всѣ́мъ ст҃ы̑мъ. Гла́съ и҃.
є҆го́же краестро́чїе: Ст҃ы́хъ всѣ́хъ многоимє́нныѧ чи́ны пою̀.
І҆рмо́съ: Колесницегони́телѧ фараѡ́нѧ:
Твои́хъ ст҃ы́хъ воспѣва́ѧ чи́ны, твои́мъ свѣ́томъ дꙋшѝ мое́й моли́твами си́хъ ѡ҆зари́тисѧ молю́сѧ: ты́ бо є҆сѝ свѣ́тъ непристꙋ́пный, невѣ́дѣнїѧ мра́къ ѿгонѧ̀, твои́ми свѣтлостьмѝ, сло́ве бж҃їй свѣтода́вче хрⷭ҇тѐ. [Два́жды.]
Ꙗ҆́кѡ возвы́силсѧ є҆сѝ на дре́вѣ, привле́клъ є҆сѝ къ твоемꙋ̀ позна́нїю ꙗ҆зы́кѡвъ всѐ наслѣ́дїе влⷣко, и҆ свѣ́томъ ᲂу҆ѧсни́лъ є҆сѝ ст҃ы́ѧ трⷪ҇цы, а҆пⷭ҇лы ст҃ы́ми твои́ми, и҆́миже мглꙋ̀ пре́лести ѿгна́лъ є҆сѝ.
Законоположе́нїемъ твои́мъ хрⷭ҇тѐ, ᲂу҆вѣщава́еми твоѝ а҆пⷭ҇ли, ꙗ҆̀же на землѝ всѧ̑ благоче́стнѡ ѿри́нꙋша, и҆ свѣ́томъ бл҃года́ти ѡ҆свѣти́ша всю̀ вселе́ннꙋю сла́внїи, є҆ѵⷢ҇льски тѧ̀ проповѣ́дающе.
Сла́ва:
Ра́дꙋющесѧ мꙋ́чєницы, крⷭ҇тъ тво́й взе́мше, и҆ честнꙋ́ю стра́сть неꙋкло́ннѡ подража́юще, мꙋчи́тельскагѡ не ᲂу҆боѧ́шасѧ преще́нїѧ до́блїи, ни ѻ҆гнѧ̀, ни меча̀, ни ра́нъ, но нижѐ гла́да, нижѐ сме́рти. <<сѻ҃и ѡ҆б.: 556>>
И҆ ны́нѣ, бг҃оро́диченъ:
Намѣ́ренїе мꙋ́жеское дв҃ы, всечи́стаѧ воспрїе́мше ꙗ҆́вѣ: мꙋ́ченичєскаѧ бо страда̑нїѧ неꙋкло́ннѡ подража́юще, и҆ ѱало́мски въ слѣ́дъ тебѐ, сн҃ꙋ твоемꙋ̀ дв҃о, бж҃е́ственнѣ сра́дꙋющесѧ, всецр҃ю̀ приведо́шасѧ.
Катава́сїѧ: Ѿве́рзꙋ ᲂу҆ста̀ моѧ̀:
Пѣ́снь г҃.
І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀ хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть ст҃ъ, па́че тебѐ є҆ди́не человѣколю́бче.
Ѡ҆сꙋжде́нна бы́вша а҆да́ма вкꙋше́нїемъ грѣха̀, пло́ти твоеѧ̀ спаси́тельною стра́стїю ѡ҆правда́лъ є҆сѝ хрⷭ҇тѐ: са́мъ бо непови́ненъ сме́ртнагѡ и҆скꙋ́са бы́лъ є҆сѝ безгрѣ́шне.
Воскрⷭ҇нїѧ свѣ́тъ возсїѧ̀ сꙋ́щымъ во тмѣ̀, и҆ сѣ́ни сме́ртнѣй сѣдѧ́щымъ, бг҃ъ мо́й і҆и҃съ, и҆ свои́мъ бж҃ество́мъ крѣ́пкаго свѧза́въ, сегѡ̀ сосꙋ́ды расхи́тилъ є҆́сть.
Бг҃оро́диченъ:
Херꙋві̑мъ и҆ серафі̑мъ превы́шши ꙗ҆ви́ласѧ є҆сѝ бцⷣе: ты́ бо є҆ди́на прїѧ́ла є҆сѝ невмѣсти́маго бг҃а, въ твое́мъ чре́вѣ нескве́рнаѧ. тѣ́мже тѧ̀ вѣ́рнїи всѝ пѣ́сньми чи́стаѧ ᲂу҆блажа́емъ.
И҆́нъ.
І҆рмо́съ: Небе́снагѡ крꙋ́га верхотво́рче:
Ѿве́ргшагосѧ пре́жде за́повѣди гдⷭ҇и, и҆зринове́нна мѧ̀ сꙋ́ща ѿ тебѐ сотвори́лъ є҆сѝ, въ него́же воѡбрази́всѧ, послꙋша́нїю же навы́къ, себѐ па́ки назда́лъ є҆сѝ распѧ́тїемъ.
Премꙋ́дростїю всѧ̑ проꙋвѣ́дѣвый гдⷭ҇и, и҆ ра́зꙋмомъ твои́мъ водрꙋзи́вый преиспѡ́днѧѧ, не не сподо́билъ є҆сѝ <<сѻ҃ѳ: 557>> снизхожде́нїемъ твои́мъ сло́ве бж҃їй, воскреси́ти є҆́же по ѻ҆́бразꙋ твоемꙋ̀.
И҆́нъ. І҆рмо́съ: Ты̀ є҆сѝ ᲂу҆твержде́нїе:
Да́ждь на́мъ по́мощь твои́ми мл҃твами всечи́стаѧ, прило́ги ѿража́ющи лю́тыхъ ѡ҆бстоѧ́нїй.
Є҆́ѵѣ прама́тери ты̀ и҆справле́нїе была̀ є҆сѝ, нача́льника жи́зни мі́рови хрⷭ҇та̀ бцⷣе ро́ждши.
И҆́нъ. І҆рмо́съ: Оу҆твержде́й въ нача́лѣ небеса̀:
Сщ҃е́нствомъ сщ҃е́ннымъ сщ҃е́нницы и҆ па́стырїе ѡ҆бле́кшесѧ, и҆ то̀ мꙋ́дрственнѡ ѡ҆корми́вше хрⷭ҇тꙋ̀, досто́йнѡ ᲂу҆краси́ша ᲂу҆чи́тельства сло́во, свы́ше вои́стиннꙋ ѡ҆богати́вшесѧ. [Два́жды.]
Оу҆краси́вшесѧ ᲂу҆добре́ньми пе́рвагѡ добротворе́нїѧ, и҆ ꙗ҆ви́вшесѧ ꙗ҆́кѡ непрелє́стнаѧ свѣти̑ла, ѡ҆небеси́сте цр҃ковь, хрⷭ҇то́вꙋ ст҃і́и, ѿи́нꙋдꙋ и҆на́гѡ тꙋ̀ разли́чнѡ ᲂу҆краси́вше. [Два́жды.]
Сла́ва:
Зако́нꙋ повинꙋ́ющесѧ твоемꙋ̀ блаже́нныхъ собо́ри, многоѻбра́зными добродѣ́тельми просвѣти́вшесѧ: наслѣ́доваша ѻ҆би́тєли нбⷭ҇ныѧ влⷣко, ра́дꙋющесѧ: и҆́нꙋю бо и҆́ный, всѝ ты̑ѧ досто́йнѡ и҆спо́лниша.
Бг҃оро́диченъ:
Ѿ чре́ва дѣ́вственна, и҆́же ѿ бг҃а бг҃а сло́ва родила̀ є҆сѝ на́мъ бг҃ома́ти, є҆го́же дв҃ы чи́стыѧ бг҃олѣ́пнѡ возлюби́ша, и҆ въ слѣ́дъ тебѐ всѧ̑ семꙋ̀ ꙗ҆́вѣ послѣ́доваша.
Сѣда́ленъ, гла́съ и҃. Подо́бенъ: Премꙋ́дрости сло́ва:
Пра̑ѻц҃ъ, ѻ҆ц҃ъ, патрїа̑рхъ, а҆пⷭ҇лъ, мꙋ́чєникъ, прорѡ́къ, ст҃и́телей, и҆ преподо́бныхъ твои́хъ, по́стникѡвъ и҆ <<сѻ҃ѳ ѡ҆б.: 558>> пра́ведныхъ же, и҆ всѧ́кагѡ и҆́мене пи́саннагѡ въ кни́зѣ жи́зни, ст҃ꙋ́ю па́мѧть соверша́юще хрⷭ҇тѐ бж҃е, всѣ́хъ подвиза́емъ на моли́твꙋ, молѧ́щесѧ: ᲂу҆мирѝ мі́ръ тво́й тѣ́ми ꙗ҆́кѡ чл҃вѣколю́бецъ, да всѝ вопїе́мъ тѝ: бж҃е прославлѧ́емый въ совѣ́тѣ ст҃ы́хъ твои́хъ, ты̀ є҆сѝ вои́стиннꙋ просла́вивый досто́йнѡ па́мѧть и҆́хъ.
Сла́ва: то́йже. И҆ ны́нѣ: бг҃оро́диченъ:
Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти, благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.
Пѣ́снь д҃.
І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ проро́комъ а҆ввакꙋ́момъ зовꙋ́ ти: си́лѣ твое́й сла́ва человѣколю́бче.
Ты̀ врага̀ сꙋ́ща мѧ̀ ѕѣлѡ̀ возлюби́лъ є҆сѝ, ты̀ и҆стоща́нїемъ стра́ннымъ соше́лъ є҆сѝ на зе́млю, благоꙋтро́бне сп҃се, послѣ́днѧгѡ моегѡ̀ досажде́нїѧ не ѿве́ргсѧ, и҆ пребы́въ на высотѣ̀ пречи́стыѧ твоеѧ̀ сла́вы, пре́жде безче́ствованнаго просла́вилъ є҆сѝ.
Кто̀ зрѧ̀ влⷣко, ны́нѣ не ᲂу҆жаса́етсѧ, стра́стїю сме́рть разрꙋша́емꙋ, крⷭ҇то́мъ бѣжа́щее тлѣ́нїе, и҆ сме́ртїю а҆́дъ бога́тства и҆стощава́емый, бж҃е́ственною си́лою тебѐ распѧ́тагѡ; чꙋ́дно дѣ́ло человѣколю́бче. <<с҃п: 559>>
Бг҃оро́диченъ:
Ты̀ вѣ́рныхъ похвала̀ є҆сѝ безневѣ́стнаѧ, ты̀ предста́тельнице, ты̀ и҆ прибѣ́жище хрїстїа́нъ, стѣна̀ и҆ приста́нище: къ сн҃ꙋ бо твоемꙋ̀ мольбы̑ но́сиши всенепоро́чнаѧ, и҆ спаса́еши ѿ бѣ́дъ, вѣ́рою и҆ любо́вїю бцⷣꙋ чи́стꙋю тебѐ зна́ющыѧ.
И҆́нъ.
І҆рмо́съ: Оу҆слы́шахъ гдⷭ҇и:
На крⷭ҇тѣ́ тѧ пригвозди́ша законопрестꙋ́пныхъ дѣ́ти, хрⷭ҇тѐ бж҃е: и҆́мже спа́слъ є҆сѝ ꙗ҆́кѡ бл҃гоꙋтро́бенъ, сла́вѧщыѧ твоѧ̑ страда̑нїѧ.
Воскре́съ ѿ гро́ба, всѧ̑ совоскреси́лъ є҆сѝ сꙋ́щыѧ во а҆́де мє́ртвыѧ, и҆ просвѣти́лъ є҆сѝ ꙗ҆́кѡ благоꙋтро́бенъ, сла́вѧщыѧ твоѐ воскрⷭ҇нїе.
І҆рмо́съ то́йже.
Кла́съ возрасти́вшаѧ животво́рный, неѡра́ннаѧ ни́во, подаю́щаго мі́рови жи́знь, бцⷣе спаса́й пою́щыѧ тѧ̀.
Бцⷣꙋ тѧ̀ всечи́стаѧ, просвѣ́щшїисѧ всѝ проповѣ́дꙋемъ, со́лнце бо пра́вды родила̀ є҆сѝ, приснодв҃о.
И҆́нъ. І҆рмо́съ: Ты̀ моѧ̀ крѣ́пость гдⷭ҇и:
Совокꙋ́пльсѧ собо́ръ ст҃ы́хъ твои́хъ любо́вїю, и҆ тебѐ наслажда́ѧйсѧ, и҆́стиннѡ же и҆ чи́стѡ въ ра́дости, ли́къ неразрꙋша́емый а҆́гг҃лѡмъ сликꙋ́етъ, ѡ҆ тебѣ̀ всеви́дче, бз҃ѣ всѣ́хъ и҆ гдⷭ҇ѣ. [Два́жды.]
Ю҆́ношески сла́внїи свѧщенномꙋ́чєницы, мꙋ́ченическимъ вѣнце́мъ ᲂу҆вѧзо́стесѧ, бг҃одѣ́тельнымъ пома́занїемъ, є҆́же пе́рвѣе свѧще́нства ᲂу҆кра́шени пребога́тїи. тѣ́мже сꙋгꙋ́бы вѣнцы̀ досто́йнѡ прїе́мше, со хрⷭ҇то́мъ вѣ́чнѡ ра́дꙋетесѧ.
Плотско́е мꙋдрова́нїе всѐ дх҃ꙋ бг҃оно́снїи вои́стиннꙋ <<с҃п ѡ҆б.: 560>> повинꙋ́сте, по́стнически сегѡ̀ стремлє́нїѧ неꙋдержи́маѧ, посто́мъ ᲂу҆вѧди́вше: и҆ ны́нѣ безстра́стїѧ свѣ́томъ просвѣти́вшесѧ, мзды̀ трꙋдѡ́въ прїѧ́сте.
Сла́ва:
Ꙗ҆́кѡ хрⷭ҇та̀ мꙋ́чєницы первомꙋ́ченика, мꙋ̑ки ѕѣлѡ̀ претерпѣ́сте, терпѣли́вѡ же и҆ до́блественнѣ, ꙗ҆́кѡ въ чꙋжди́хъ страда́льчествꙋюще тѣлесѣ́хъ сла́внїи, и҆ ны́нѣ црⷭ҇твїѧ наслѣ̑дницы показа́вшесѧ, вѣ̑рнымъ и҆сцѣлє́нїѧ и҆сточа́ете.
И҆ ны́нѣ, бг҃оро́диченъ:
Невѣ́ста бж҃їѧ была̀ є҆сѝ бг҃ороди́тельнице, сего́ бо сло́во превѣ́чное, тѣле́снѣ родила̀ є҆сѝ на́мъ: въ не́мже и҆ жєны̀ свѧ́тѡ пожи́вше, и҆ страда́льчествы всеразли́чными тобо́ю ᲂу҆краси́вшесѧ, прама́тернее паде́нїе и҆спра́виша.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Ѡ҆дѣ́ѧтисѧ претерпѣ́лъ є҆сѝ въ багрѧни́цꙋ, пре́жде стра́сти твоеѧ̀ сп҃се, порꙋга́емь, первозда́ннагѡ покрыва́ѧ без̾ѻбра́зное ѡ҆бнаже́нїе, и҆ на́гъ пригвозди́лсѧ є҆сѝ на крⷭ҇тѣ̀ пло́тїю, совлача́ѧ хрⷭ҇тѐ ри́зꙋ ᲂу҆мерщвле́нїѧ.
Ѿ пе́рсти сме́ртныѧ, ты̀ па́дшее моѐ па́ки назда́лъ є҆сѝ сꙋщество̀ воскре́съ, и҆ нестарѣ́ющеесѧ хрⷭ҇тѐ ᲂу҆стро́илъ є҆сѝ, ꙗ҆ви́въ па́ки ꙗ҆́коже црⷭ҇кїй ѻ҆́бразъ, нетлѣ́нїѧ жи́знь блиста́ющъ.
Бг҃оро́диченъ:
Мт҃рнее дерзнове́нїе, є҆́же къ сн҃ꙋ твоемꙋ̀ и҆мꙋ́щи <<сп҃а: 561>> всечи́стаѧ, сро́днагѡ промышле́нїѧ є҆́же ѡ҆ на́съ не пре́зри, мо́лимсѧ, ꙗ҆́кѡ тебѐ и҆ є҆ди́нꙋ хрⷭ҇тїа́не ко влⷣцѣ, ѡ҆чище́нїе ми́лостивно предлага́емъ.
И҆́нъ.
І҆рмо́съ: Просвѣтѝ на́съ:
Наста́ви на́съ си́лою крⷭ҇та̀ твоегѡ̀ хрⷭ҇тѐ: тѣ́мъ бо тебѣ̀ припа́даемъ, ми́ръ пода́ждь на́мъ человѣколю́бче.
Ѡ҆кормѝ живо́тъ на́шъ, ꙗ҆́кѡ пребл҃гі́й, пою́щихъ твоѐ воста́нїе, и҆ ми́ръ пода́ждь на́мъ человѣколю́бче.
И҆́нъ.
І҆рмо́съ: Оу҆́тренююще вопїе́мъ тѝ:
Оу҆толѝ нестерпи́мꙋю бꙋ́рю страсте́й мои́хъ, ꙗ҆́же бг҃а ро́ждшаѧ, ѡ҆корми́телѧ и҆ гдⷭ҇а.
Слꙋ́жатъ рождествꙋ̀ твоемꙋ̀ пречи́стаѧ бцⷣе, а҆́гг҃льстїи чи́нове и҆ человѣ́кѡвъ собра́нїе.
И҆́нъ. І҆рмо́съ: Вскꙋ́ю мѧ̀ ѿри́нꙋлъ є҆сѝ:
Предзрѣ́ти, ꙗ҆́коже проро́цы бж҃е́ственнїи, хотѧ̑щаѧ бы́ти сподо́бистесѧ, и҆ возжелѣ́сте благоро́дїю дꙋшѝ ѡ҆чи́ститисѧ житїе́мъ чи́стымъ, ѽ бг҃оно́снїи, просвѣща́еми си́лою дꙋхо́вною. [Два́жды.]
Ли́къ ст҃ы́хъ ны́нѣ свѣ́титсѧ бжⷭ҇твенными дарова́ньми, и҆̀же пре́жде зако́на всѝ патрїа́рси, проро́цы, а҆пⷭ҇ли, и҆ мꙋ́чєникъ собо́ри, и҆ по́стникѡвъ, и҆ ᲂу҆чи́телей, и҆ пра́ведныхъ, со свѧщенномꙋ́ченики. [Два́жды.]
Сла́ва:
Свѣтѧ́щеесѧ зрѧ́ще твои́хъ ст҃ы́хъ дне́сь собра́нїе, твое́ю сп҃се свѣ́тлостїю, и҆ свѣща́ми неꙋгаса́емыми благода́ти, твоѐ бж҃е́ственное бога́тство благи́хъ и҆ и҆з̾ѡби́лїе воспѣва́емъ непреста́ннѡ человѣколю́бче. <<сп҃а ѡ҆б.: 562>>
Бг҃оро́диченъ:
Преди́вное твоѐ ржⷭ҇тво̀ возлюби́вше жєны̀ пречестны̑ѧ, кра̑снаѧ житїѧ̀ нивочто́же вмѣни́ша всечи́стаѧ, є҆гѡ̀ є҆ди́ни рачи́тельнѡ жела́юще свѣ́тлости и҆ бж҃е́ственнагѡ ѡ҆сїѧ́нїѧ.
Пѣ́снь ѕ҃.
І҆рмо́съ: Ѡ҆чи́сти мѧ̀ сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀ бж҃е спасе́нїѧ моегѡ̀.
Дре́вомъ крѣ́пкѡ низложи́ мѧ началоѕло́бный: ты́ же хрⷭ҇тѐ, возне́ссѧ на крⷭ҇тѣ̀, крѣпча́е низложи́лъ є҆сѝ, посрами́въ сего̀, па́дшаго же воскреси́лъ є҆сѝ.
Ты̀ ᲂу҆ще́дрилъ є҆сѝ сїѡ́на, возсїѧ́вый ѿ гро́ба, но́ваго вмѣ́стѡ ве́тхагѡ соверши́въ, ꙗ҆́кѡ благоꙋтро́бенъ, бж҃е́ственною твое́ю кро́вїю: и҆ ны́нѣ ца́рствꙋеши въ не́мъ во вѣ́ки хрⷭ҇тѐ.
Бг҃оро́диченъ:
Да и҆зба́вимсѧ ѿ лю́тыхъ прегрѣше́нїй мольба́ми твои́ми бг҃ороди́тельнице чи́стаѧ, и҆ да ᲂу҆лꙋчи́мъ пречⷭ҇таѧ, бж҃е́ственное сїѧ́нїе, и҆з̾ тебѐ неизрече́ннѡ воплоще́ннагѡ сн҃а бж҃їѧ.
И҆́нъ. І҆рмо́съ: Моли́твꙋ пролїю̀ ко гдⷭ҇ꙋ:
Дла̑ни на крⷭ҇тѣ̀ распросте́рлъ є҆сѝ, и҆сцѣлѧ́ѧй неꙋдержа́ннѡ просте́ртꙋю во є҆де́мѣ рꙋ́кꙋ первозда́ннагѡ, и҆ твое́ю во́лею же́лчи вкꙋси́лъ, и҆ спа́слъ є҆сѝ хрⷭ҇тѐ, ꙗ҆́кѡ си́ленъ, сла́вѧщыѧ твоѧ̀ страда̑нїѧ.
Сме́рти и҆зба́витель вкꙋсѝ дре́внѧгѡ ѡ҆сꙋжде́нїѧ, ꙗ҆́кѡ да и҆ тлѣ́нїѧ ца́рство разрꙋши́тъ: и҆ во а҆́дскаѧ сше́дъ воскресѝ, и҆ спасѐ ꙗ҆́кѡ си́ленъ пою́щыѧ є҆гѡ̀ воскресе́нїе. <<сп҃в: 563>>
И҆́нъ. І҆рмо́съ: Ри́зꙋ мнѣ̀ пода́ждь свѣ́тлꙋ:
Хра́мъ тѧ̀ бж҃їй и҆ кївѡ́тъ, и҆ черто́гъ ѡ҆дꙋшевле́нный, и҆ две́рь нбⷭ҇нꙋю, бцⷣе, вѣ́рнїи возвѣща́емъ.
Тре́бищємъ разрꙋши́тель, ꙗ҆́кѡ бг҃ъ, бы́вшее ржⷭ҇тво̀ твоѐ мр҃і́е бг҃оневѣ́сто, покланѧ́емо є҆́сть со ѻ҆ц҃е́мъ и҆ дх҃омъ.
И҆́нъ. І҆рмо́съ: Ѡ҆чи́сти мѧ̀ сп҃се:
Ꙗ҆́кѡ честны́й и҆збра́нный, положе́нный ка́мень краеꙋго́льный, ст҃і́и въ сїѡ́нѣ ѡ҆брѣ́тше тѧ̀ влⷣко, ѡ҆снова́нїе непоколеби́мое, и҆збра́нное ка́менїе себѐ назда́ша. [Два́жды.]
Пронзє́ннымъ твои́мъ ре́брѡмъ, ка̑пли кро́ве и҆ска́паша, съ водо́ю бг҃одѣ́тельнѡ, мі́ръ ѡ҆бнови́ша, и҆ бж҃е́ственный собо́ръ ст҃ы́хъ всѣ́хъ бл҃годѣ́телю призда́ша. [Два́жды.]
Сла́ва:
Пое́мъ всеблагоче́стнѡ мꙋ́чєникъ ѻ҆́блакъ бж҃е́ственный, благода́тїю просвѣще́нный, и҆ возсїѧ́вшїй свѣтлѣ́е багрѧни́цею кро́ве, и҆ червлени́цею и҆́хъ тве́рдагѡ страда́нїѧ.
Бг҃оро́диченъ:
Мт҃рь всеи́стиннꙋю бж҃їю тѧ̀ всѝ зна́емъ, є҆́юже є҆стество̀ же́нское и҆зба́вльшеесѧ, всенепоро́чнаѧ, ѡ҆ хрⷭ҇тѣ̀ предпострада̀, добродѣ́тели же всѧ́кїѧ бл҃гоче́стнѡ бы́сть и҆спо́лнено.
Конда́къ, гла́съ и҃:
Ꙗ҆́кѡ нача́тки є҆стества̀, насади́телю тва́ри, вселе́ннаѧ прино́ситъ тѝ гдⷭ҇и бг҃онѡ́сныѧ мꙋ́ченики. тѣ́хъ моли́твами въ ми́рѣ глꙋбо́цѣ цр҃ковь твою̀, жи́тельство твоѐ, бцⷣею соблюдѝ многоми́лостиве.
І҆́косъ:
И҆́же по все́й землѝ мꙋ́чившїисѧ, и҆ на нб҃са̀ <<сп҃в ѡ҆б.: 564>> пресели́вшїисѧ, и҆̀же стрⷭ҇ти хрⷭ҇то́вы подража́вшїи, и҆ стра̑сти на́шѧ ѿе́млющїи, здѣ̀ дне́сь собира́ютсѧ, перворожде́нныхъ показꙋ́юще цр҃ковь, ꙗ҆́кѡ го́рнїѧ ѻ҆́бразъ содержа́щꙋ, и҆ хрⷭ҇тꙋ̀ вопїю́щꙋ: бг҃ъ мо́й є҆сѝ ты̀, бцⷣею соблюди́ мѧ, многомлⷭ҇тиве.
И҆ чте́мъ про́логъ.
Сѷнаѯа́рь въ недѣ́лю всѣ́хъ ст҃ы́хъ.
Стїхѝ: Гдⷭ҇а моегѡ̀ всѧ̀ пою̀ дрꙋ́ги:
А҆́ще же кто̀ хотѧ̀ ко всѣ́мъ да и҆́детъ.
Въ то́йже де́нь въ недѣ́лю по пѧтдесѧ́тницѣ, и҆̀же повсю́дꙋ вселе́нныѧ, во а҆сі́и, лѷві́и и҆ є҆ѵрѡ́пїи, сѣ́верѣ же и҆ ю҆́зѣ, ст҃ы́хъ всѣ́хъ пра́здникъ пра́зднꙋемъ: є҆го́же ᲂу҆́бѡ по всест҃а́гѡ дх҃а соше́ствїи бж҃е́ственнїи ѻ҆тцы̀ на́ши ᲂу҆зако́ниша соверша́ти, а҆́ки бы ѻ҆́бразъ нѣ́кїй показꙋ́юще, ꙗ҆́кѡ всест҃а́гѡ дх҃а прише́ствїе, сицева̑ѧ а҆пⷭ҇лы дѣ́йствова, ѡ҆свѧти́вшее и҆ ᲂу҆премꙋ́дрившее и҆̀же ѿ на́шегѡ смѣше́нїѧ, въ наполне́нїе ѿпа́дшагѡ ѻ҆́нагѡ чи́на а҆́гг҃льскагѡ, си́хъ ᲂу҆ста́вившее, и҆ бг҃ꙋ хрⷭ҇то́мъ приве́дшее. ѻ҆́вѣхъ ᲂу҆́бѡ мꙋче́нїемъ и҆ кро́вїю, ѻ҆́вѣхъ же добродѣ́тельнымъ житїе́мъ и҆ пребыва́нїемъ, и҆ ꙗ҆̀же па́че є҆стества̀ содѣ́ловаетъ. Схо́дитъ ᲂу҆́бѡ дх҃ъ ст҃ы́й въ ви́дѣ ѻ҆гнѧ̀, є҆стество́мъ го́рнѣйшее и҆мѣ́ѧй преложе́нїе: восхо́дитъ же къ гѡ́рнимъ пе́рсть, є҆стество́мъ до́лꙋ прело́жна сꙋ́щи, и҆ на́ше смѣше́нїе, пре́жде вма́лѣ ᲂу҆́бѡ прїѧ́таѧ, и҆ ѡ҆боже́ннаѧ бг҃омъ сло́вомъ пло́ть, вознесе́ннаѧ, и҆ ѡ҆деснꙋ́ю ѻ҆́ч҃и сла́вы сѣ́дшаѧ. Ны́нѣ же и҆ всѣ́хъ влече́тъ хотѧ́щихъ, ꙗ҆́кѡ ѡ҆бѣтова́нїе, ꙗ҆́коже бг҃ꙋ сло́вꙋ показꙋ́ющꙋ примире́нїѧ дѣла̀, и҆ нѣ́кїй намѣ́ренный коне́цъ, є҆́же къ на́мъ пло́тїю прише́ствїѧ є҆гѡ̀ и҆ смотре́нїѧ, ꙗ҆́коже дре́вле ѿринове́нныѧ въ соедине́нїе и҆ дрꙋ́жество приво́дитъ бж҃їе, незна́ющыѧ ѿ ꙗ҆зы̑къ лю́ди, человѣ́ческагѡ є҆стества̀ а҆́ки нѣ̑кїѧ нача́тки приносѧ́щагѡ бг҃ꙋ, и҆̀же въ не́мъ разли́чнѡ бл҃гоискꙋси́вшихсѧ. По є҆ди́номꙋ ᲂу҆́бѡ ѻ҆́бразꙋ, си́це всѣ́хъ ст҃ы́хъ пра́зднꙋемъ пра́здникъ: по второ́мꙋ же, поне́же мно́зи ᲂу҆́бѡ бг҃ꙋ <<сп҃г: 565>> бл҃гоꙋгоди́ша добродѣ́тели ра́ди кра́йнїѧ, и҆ и҆ноѻбра́знѡ без̾имени́тїи ѿ человѣ̑къ бы́ша: и҆лѝ и҆ за нѣ̑каѧ не́гли человѣ́чєскаѧ, мно́гꙋ же ѻ҆ба́че сла́вꙋ ѿ бг҃а и҆мꙋ́ще. И҆лѝ ꙗ҆́кѡ мно́зи ᲂу҆́бѡ по хрⷭ҇тѣ̀ жи́тельствоваша во і҆нді́и, и҆ є҆гѵ́птѣ, и҆ а҆раві́и, междорѣ́чїи же и҆ фрѷгі́и, и҆ и҆́же вы́ше є҆ѵѯі́на мо́рѧ: є҆ще́ же и҆ во все́мъ за́падѣ, да́же и҆ до самѣ́хъ вретані́йскихъ ѻ҆стровѡ́въ, и҆ про́стѡ рещѝ, въ восто́цѣ и҆ за́падѣ. Не бѧ́ше же подо́бно си́хъ всѣ́хъ ꙗ҆́коже подоба́етъ почестѝ, ра́ди безчи́сльства, ꙗ҆́коже цр҃ко́вный прїѧ́тъ ѻ҆бы́чай: да ᲂу҆́бѡ є҆́же ѿ ѻ҆́нѣхъ всѣ́хъ по́мощь прїи́мемъ, и҆дѣ́же кто̀ на землѝ бг҃ꙋ благоꙋгодѝ. И҆на́кѡ же: и҆ бꙋ́дꙋщихъ ра́ди, не́гли ст҃ы́хъ всѣ́хъ пра́здникъ бж҃е́ственнїи ѻ҆ц҃ы̀ пра́здновати ᲂу҆зако́ниша: всѣ́хъ же, и҆́же пре́жде и҆ по́слѣжде, ꙗ҆вле́нныхъ же и҆ неѧвле́нныхъ, во є҆ли́цѣхъ дх҃ъ ст҃ы́й всели́выйсѧ ѡ҆ст҃ѝ, почита́юще и҆ своспрїе́млюще. И҆лѝ и҆ тре́тїе, подоба́ше по ча́сти на кі́йждо де́нь пра́зднꙋємыѧ ст҃ы̑ѧ, и҆ во є҆ди́нъ собра́ти де́нь да ꙗ҆ви́тсѧ, ꙗ҆́кѡ ѡ҆ є҆ди́номъ хрⷭ҇тѣ̀ подвиза́шасѧ, и҆ всѝ то́жде добродѣ́тели теко́ша по́прище. И҆ та́кѡ всѝ ꙗ҆́кѡ є҆ди́нагѡ бг҃а рабѝ досто́йнѡ вѣнча́ни бы́ша, цр҃ковь сі́и соста́виша, го́рнїй мі́ръ вознаполнѧ́юще, поѡщрѧ́юще же и҆ на́съ ра́вный по́двигъ си́мъ твори́ти, разли́ченъ сꙋ́щъ и҆ многови́денъ, къ по є҆ли́кꙋ же ко́ждо и҆́мать си̑лы, всѣ́мъ ᲂу҆се́рдїемъ тща́тисѧ. Си̑мъ ᲂу҆́бѡ, и҆̀же ѿ вѣ́ка ст҃ы̑мъ всѣ̑мъ, ле́въ приснопа́мѧтный и҆ премꙋ́дрый ца́рь хра́мъ преве́лїй и҆ предо́брый созда̀, бли́зꙋ же є҆́сть се́й ст҃ы́хъ а҆пⷭ҇лъ хра́ма внꙋ́трь кѡнстанті́нѧ гра́да: пре́жде ᲂу҆́бѡ, ꙗ҆́коже глаго́лютъ, ѳеофа́нѣ женѣ̀ є҆гѡ̀ пе́рвѣе сегѡ̀ созида́ѧй, ᲂу҆годи́вшей бг҃ꙋ въ коне́цъ. И҆ є҆́же пресла́вное посредѣ̀ мо́лвъ и҆ ца́рствїй внꙋ́трь: и҆ поне́же прїѡбщѝ намѣ́ренїе своѐ цр҃кви, не ѡ҆брѣ́те є҆ѧ̀ покоре́нныѧ во́ли свое́й, нижѐ восхотѣ̀ мꙋдрова́нїѧ є҆гѡ̀, глаго́лющи: ꙗ҆́кѡ не лѣ́по є҆́сть ѻ҆́нꙋ, ꙗ҆́же вчера̀ неда́внѡ растлѣва́шесѧ ца́рскимъ мечта́нїемъ, и҆ пи́щею, внеза́пꙋ почита́ти толи́кѡ, ꙗ҆́коже созида́ти є҆́й сицевы́й хра́мъ великолѣ́пный, и҆ и҆зрѧ́дный, и҆ нижѐ вре́мѧ даѧ́ше є҆̀, а҆́ще и҆ благоꙋгодѝ бг҃ꙋ. Тогда̀ премꙋ́дрѣйшїй цр҃ь собо́рнымъ хотѣ́нїемъ всеѧ̀ цр҃кве, вели́кїй <<сп҃г ѡ҆б.: 566>> хра́мъ, и҆́же созда̀, посвѧтѝ всѣ́мъ ст҃ы̑мъ вселе́нныѧ, глаго́лѧ: а҆́ще и҆ ѳеофа́на є҆́сть свѧта̀, да сопричте́тсѧ со всѣ́ми ст҃ы́ми. И҆ сегѡ̀ ра́ди а҆́зъ мню̀, ꙗ҆́кѡ ѿсе́лѣ прїѧ́тъ нача́ло пра́здноватисѧ се́й пра́здникъ, внегда̀ бѧ́ше и҆ пре́жде. Сегѡ̀ ра́ди положи́ша и҆̀ послѣдѝ всѣ́хъ пра́здникѡвъ, ѻ҆́крестъ всѧ̑ пра́здники лѣ́та состѧга́ѧй, и҆ заключа́ѧй а҆́ки ѡ҆гражде́нїемъ. Занѐ цр҃ко́вное ᲂу҆ставле́нїе и҆ благочи́нїе, а҆́ще и҆ пре́жде мно́гагѡ нача́сѧ, и҆ пома́лѣ прихожда́ше въ до́брое ᲂу҆ставле́нїе, ꙗ҆́коже подоба́ше: но во днѝ сегѡ̀ цр҃ѧ̀ ᲂу҆ста́виша въ соверше́нное, и҆ и҆з̾ѡбрази́ша чи́номъ, и҆́же дне́сь є҆́сть. Трїѡ́дь ᲂу҆́бѡ, вкра́тцѣ рещѝ, ѡ҆бдержи́тъ внꙋ́трь съ вели́кимъ прилѣжа́нїемъ, є҆ли̑ка бг҃ъ сотворѝ на́съ ра́ди неизрече́нными словесы̀. Паде́нїе дїа́воле съ нб҃сѐ, пе́рвою при́тчею и҆згна́нїе а҆да́мово, и҆ престꙋпле́нїе: є҆́же на́съ ра́ди бг҃а сло́ва смотре́нїе всѐ, и҆ ка́кѡ на небеса̀ ст҃ы́мъ дх҃омъ па́ки взыдо́хомъ, и҆ и҆спа́дшїй ѻ҆́ный чи́нъ и҆спо́лнихомъ, є҆́же ст҃ы́ми всѣ́ми познава́етсѧ. Вѣ́домо же бꙋ́ди, ꙗ҆́кѡ всѧ̑ ны́нѣ пра́зднꙋемъ, є҆ли̑ка благода́тнѡ ѡ҆свѧтѝ дх҃ъ ст҃ы́й: глаго́лю ᲂу҆́бѡ высоча́йшыѧ и҆ ѡ҆свѧща́тєльныѧ ᲂу҆мы̀, девѧтѝ ꙗ҆́вѣ чинѡ́въ: Пра́ѻц҃ы и҆ патрїа́рхи, проро́ки и҆ сщ҃є́нныѧ а҆пⷭ҇лы, мꙋ́ченики и҆ свѧщеннонача́льники, свѧщенномꙋ́ченики и҆ прпⷣбномꙋ́ченики, прпⷣбныѧ и҆ пра́вєдныѧ, и҆ всѧ̀ ст҃ы́хъ же́нъ ликова̑нїѧ, и҆ и҆ны́ѧ всѧ̀ без̾имени́тыѧ ст҃ы̑ѧ, съ ни́миже да бꙋ́дꙋтъ и҆ хотѧ́щїи бы́ти. Пре́жде же всѣ́хъ, и҆ во всѣ́хъ, и҆ со всѣ́ми, ст҃ы́хъ ст҃ꙋ́ю, прест҃ꙋ́ю, и҆ тѣ́хъ пребезсравни́тельнѡ лꙋ́чшꙋю а҆́гг҃льскихъ чинѡ́въ, гпⷭ҇жꙋ̀ на́шꙋ и҆ влⷣчцꙋ, бцⷣꙋ мр҃і́ю приснодв҃ꙋ: є҆ѧ́же мл҃твами хрⷭ҇тѐ бж҃е, и҆ всѣ́хъ ѿ вѣ́ка ст҃ы́хъ твои́хъ, поми́лꙋй и҆ спасѝ на́съ, ꙗ҆́кѡ є҆ди́нъ бла́гъ и҆ чл҃вѣколю́бецъ.
Пѣ́снь з҃.
І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀. сегѡ̀ ра́ди ѻ҆́троцы въ пещѝ, ра́дованною ного́ю ꙗ҆́кѡ во цвѣ́тницѣ ликꙋ́юще, поѧ́хꙋ: благослове́нъ є҆сѝ бж҃е ѻ҆ц҃ъ на́шихъ. <<сп҃д: 567>>
Сла́вное и҆стоща́нїе, бжⷭ҇твенное бога́тство твоеѧ̀ нищеты̀ хрⷭ҇тѐ, ᲂу҆дивлѧ́етъ а҆́гг҃лы, на крⷭ҇тѣ̀ зрѧ́щыѧ тѧ̀ пригвожда́ема, за є҆́же спастѝ вѣ́рою зовꙋ́щыѧ: благослове́нъ бг҃ъ ѻ҆ц҃ъ на́шихъ.
Бж҃е́ственнымъ твои́мъ соше́ствїемъ свѣ́та и҆спо́лнилъ є҆сѝ преиспѡ́днѧѧ, и҆ тма̀ прогна́на бы́сть пре́жде гонѧ́щаѧ: ѿѻнꙋ́дꙋже воскресо́ша и҆̀же ѿ вѣ́ка ю҆́зницы, зовꙋ́ще: благослове́нъ бг҃ъ ѻ҆ц҃ъ на́шихъ.
Трⷪ҇ченъ.
Всѣ́хъ ᲂу҆́бѡ гдⷭ҇а, є҆ди́наго же є҆ди́номꙋ є҆диноро́дномꙋ сн҃ꙋ правосла́внѡ ѻ҆ц҃а̀ бг҃осло́вѧще, тѧ̀ возвѣща́емъ, и҆ є҆ди́наго вѣ́дѧще ѿ тебѐ и҆сходѧ́ща дх҃а пра́ваго, соесте́ственна и҆ соприсносꙋ́щна.
И҆́нъ. І҆рмо́съ: Ѿ і҆ꙋде́и:
Спасе́нїе содѣ́лалъ є҆сѝ посредѣ̀ вселе́нныѧ, проро́чески бж҃е: на дре́во бо вознесе́нъ бы́въ, всѧ̑ призва́лъ є҆сѝ вѣ́рою зовꙋ́щыѧ: ѻ҆ц҃ъ на́шихъ бж҃е благослове́нъ є҆сѝ.
Воскре́съ ѿ гро́ба ꙗ҆́коже ѿ сна̀ ще́дре, всѣ́хъ и҆зба́вилъ є҆сѝ ѿ тлѝ, тва́рь же ᲂу҆вѣрѧ́етсѧ а҆пⷭ҇лы проповѣ́дающими воста́нїе: ѻ҆ц҃є́въ бж҃е благослове́нъ є҆сѝ.
І҆рмо́съ то́йже.
Ѿ дѣ́вственнагѡ ложесна̀ вопло́щсѧ, ꙗ҆ви́лсѧ є҆сѝ на спасе́нїе на́ше. тѣ́мже твою̀ мт҃рь вѣ́дѧще бцⷣꙋ, благода́рственнѡ зове́мъ: ѻ҆ц҃є́въ бж҃е благослове́нъ є҆сѝ.
Же́злъ прорасти́ла є҆сѝ дв҃о ѿ ко́рене і҆ессе́ова, всеблаже́ннаѧ, пло́дъ цвѣтоносѧ́щїй спаси́тельный, вѣ́рою сн҃ꙋ твоемꙋ̀ зовꙋ́щымъ: ѻ҆ц҃є́въ бж҃е благослове́нъ є҆сѝ. <<сп҃д ѡ҆б.: 568>>
И҆́нъ. І҆рмо́съ: Бж҃їѧ снисхожде́нїѧ:
Ст҃ы́хъ чи́нове, во ст҃ы́хъ почива́ющаго немо́лчнѡ пою́ще, сла́дости бж҃е́ственныѧ ны́нѣ наслажда́ютсѧ, и҆ ра́дꙋющесѧ ликꙋ́ютъ пою́ще: благослове́нъ бг҃ъ ѻ҆ц҃ъ на́шихъ.
Бжⷭ҇твенными сїѧ́ньми трисо́лнечнагѡ свѣтопроли́тїѧ, че́стнѣ ст҃ы́хъ собо́ри ѡ҆сїѧ́вшесѧ, є҆ди́ницꙋ тричи́сленнꙋю бг҃осло́вѧтъ, ѻ҆ц҃а̀ безнача́льна, и҆ сн҃а бл҃гоче́стнѡ, и҆ дх҃а ст҃а́го.
Неизрече́нною сла́вою твое́ю, є҆гда̀ ꙗ҆ви́шисѧ бж҃е посредѣ̀ богѡ́въ, достѡ́йнаѧ подаѧ̀, и҆ да́ры раздаѧ̀, и҆ вѣнцы̀ даѧ̀, тогда̀ сп҃се сподо́би пѣ́ти тебѣ̀: благослове́нъ бг҃ъ ѻ҆ц҃ъ на́шихъ.
Сла́ва:
Ра́дꙋющесѧ пои́мъ ст҃ы́хъ всѣ́хъ собо́ръ, ѿвсю́дꙋ собра́вшихсѧ, и҆ ро́ды вкꙋ́пѣ и҆ достѡ́инства, и҆ жи́тєльства и҆ съ ни́ми пое́мъ: благослове́нъ бг҃ъ ѻ҆ц҃ъ на́шихъ.
И҆ ны́нѣ: бг҃оро́диченъ:
Мр҃і́ю пречⷭ҇тꙋю, и҆ прест҃ꙋ́ю бг҃ороди́тельницꙋ, ѻ҆трокови̑цы всѧ̑, ли́къ бж҃е́ственный кꙋ́пнѡ соста́вивше, велегла́снѡ ра́дꙋющесѧ возопі́йте: ра́дꙋйсѧ, ра́дости и҆сто́чникъ на́мъ и҆сточа́ющаѧ.
Пѣ́снь и҃.
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ: си́лою же лꙋ́чшею спасе́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, свѧще́нницы воспо́йте, лю́дїе превозноси́те во всѧ̀ вѣ́ки.
І҆и҃сова бж҃ества̀ пребж҃е́ственнаѧ си́ла въ на́съ бг҃олѣ́пнѡ <<сп҃є: 569>> возсїѧ́ла є҆́сть: пло́тїю бо вкꙋ́шь за всѣ́хъ сме́рть кре́стнꙋю, разрꙋшѝ а҆́довꙋ крѣ́пость. є҆го́же непреста́ннѡ ѻ҆́троцы бл҃гослови́те, свѧще́нницы воспо́йте, лю́дїе превозноси́те во всѧ̀ вѣ́ки.
Распны́йсѧ воста̀, великовы́йный падѐ, пады́й и҆ сокрꙋше́нный и҆спра́висѧ, тлѧ̀ ѿве́ржена бы́сть и҆ нетлѣ́нїе процвѣтѐ: жи́знїю бо ме́ртвенное поже́рто бы́сть. ѻ҆́троцы бл҃гослови́те, свѧще́нницы воспо́йте, лю́дїе превозноси́те во всѧ̀ вѣ́ки.
Трⷪ҇ченъ:
Трисвѣ́тлое бж҃ество̀, во є҆ди́ной сїѧ́ющее зарѝ, ѿ є҆ди́нагѡ трїѷпоста́снагѡ є҆стества̀, роди́телѧ безнача́льна, є҆диноесте́ственно же сло́во ѻ҆ц҃ꙋ̀, и҆ сца́рствꙋющаго є҆диносꙋ́щнаго дх҃а, ѻ҆́троцы бл҃гослови́те, свѧще́нницы воспо́йте, лю́дїе превозноси́те во всѧ̀ вѣ́ки.
И҆́нъ. І҆рмо́съ: Побѣди́тели мꙋчи́телѧ:
На дре́вѣ рꙋ́цѣ мнѣ̀ просте́рша, ѡ҆бнаже́ннаго мѧ̀ призыва́юща, свое́ю благоѻбра́зною согрѣ́ѧти нагото́ю, благослови́те всѧ̀ дѣла̀ гдⷭ҇а, и҆ превозноси́те є҆го̀ во вѣ́ки.
И҆з̾ преиспо́днѧгѡ а҆́да возне́сша мѧ̀ па́дшаго, и҆ высокопресто́льною сла́вою роди́телѧ поче́тшаго, бл҃гослови́те всѧ̀ дѣла̀ гдⷭ҇а, и҆ превозноси́те є҆го̀ во вѣ́ки.
И҆́нъ.
І҆рмо́съ: Цр҃ѧ̀ нбⷭ҇наго:
Сопроти́вныхъ разжжє́нныѧ и҆ пламенови̑дныѧ на на́съ ᲂу҆гасѝ стрѣ́лы, ꙗ҆́кѡ да пое́мъ тѧ̀ чⷭ҇таѧ, во всѧ̀ вѣ́ки.
Преесте́ственнѣ содѣ́телѧ и҆ сп҃са, бг҃а сло́ва родила̀ є҆сѝ дв҃о: тѣ́мже тѧ̀ пое́мъ во всѧ̀ вѣ́ки. <<сп҃є ѡ҆б.: 570>>
И҆́нъ.
І҆рмо́съ: Седмери́цею пе́щь:
Ра́дꙋйтесѧ мꙋ́чєницы, проро́цы, а҆по́столи, свѧщенномꙋ́чєникъ честны́й собо́ре: пра́ведныхъ, преподо́бныхъ же и҆ ᲂу҆чи́телей бж҃е́ственный ли́че, съ мѷроно́сицами жена́ми сладкопою́ще: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̀ вѣ́ки.
Ꙗ҆́же па́че ᲂу҆ма̀ свѣ́тлостїю, насыща́еми ст҃і́и бжⷭ҇твеннагѡ весе́лїѧ, и҆ ра́дости и҆сполнѧ́еми, бо́зи быва́ете, къ бг҃ꙋ приближе́нїемъ, бг҃одѣ́тєльнымъ свѣ́тлостємъ ѡ҆бща́ющесѧ, и҆ сла́вы неизрече́нныѧ просвѣти́вшесѧ лꙋча́ми, хрⷭ҇та̀ превозноси́те во всѧ̀ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Ꙗ҆ви́вшесѧ ст҃і́и ꙗ҆́кѡ ѕвѣ́зды многосвѣ̑тлыѧ, цр҃ко́вное нб҃о ᲂу҆ѧснѧ́ете разли́чными дарова́ньми и҆ разли́чными добро́тами, въ пра́вдѣ, цѣломꙋ́дрїи, мꙋ́жествѣ, ра́зꙋмѣ: влⷣкꙋ свѧще́нницы воспо́йте, лю́дїе превозноси́те во всѧ̀ вѣ́ки.
И҆ ны́нѣ:
Съ весе́лїемъ всѧ̑ жєны̀ бг҃омꙋ̑дрыѧ, сконча́вшыѧсѧ, пою́тъ дх҃омъ дв҃ꙋ пречи́стꙋю, и҆́стиннꙋю мт҃рь бж҃їю, ѿ клѧ́твы прамт҃ре є҆́ѵы на́съ и҆зба́вившꙋю, благоговѣ́йнѡ предстоѧ́ще, тоѧ̀ воспо́йте пло́дъ во вѣ́ки.
Хва́лимъ, благослови́мъ, покланѧ́емсѧ гдⷭ҇ви, пою́ще и҆ превозносѧ́ще во всѧ̀ вѣ́ки.
Катава́сїа: Ѻ҆́троки бл҃гочєсти́выѧ:
Та́же пое́мъ: Честнѣ́йшꙋю херꙋві̑мъ:
Пѣ́снь ѳ҃.
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ чл҃вѣ́кѡмъ пло́тски, и҆ чре́во <<сп҃ѕ: 571>> твоѐ бы́сть простра́ннѣйшее нб҃съ. тѣ́мъ тѧ̀ бцⷣꙋ, а҆́гг҃лѡвъ и҆ челѡвѣ́къ чинонача̑лїѧ велича́ютъ.
Бжⷭ҇твеннымъ и҆ безнача́льнымъ є҆стество́мъ про́стъ сы́й, сложи́лсѧ є҆сѝ прїѧ́тїемъ пло́ти, въ тебѣ̀ само́мъ сїю̀ соста́вивъ сло́ве бж҃їй, и҆ пострада́въ ꙗ҆́кѡ человѣ́къ, пребы́лъ є҆сѝ кромѣ̀ страсте́й, ꙗ҆́кѡ бг҃ъ. тѣ́мже тѧ̀ во двою̀ сꙋщєствꙋ̀ нераздѣ́льнѡ и҆ неслїѧ́ннѡ велича́емъ.
Ѻ҆ц҃а̀ по сꙋществꙋ̀ бж҃е́ственномꙋ, ꙗ҆́коже є҆стество́мъ бы́въ человѣ́къ, ре́клъ є҆сѝ бг҃а, вы́шнїй рабѡ́мъ снизходѧ̀: воскре́съ ѿ гро́ба, бл҃года́тїю ѻ҆ц҃а̀ земноро́дныхъ поло́жь, и҆́же по є҆стествꙋ̀ бг҃а же и҆ влⷣкꙋ: съ ни́мже тѧ̀ всѝ велича́емъ.
Бг҃оро́диченъ:
Ꙗ҆ви́ласѧ є҆сѝ, ѽ дв҃о мт҃и бж҃їѧ, па́че є҆стества̀ ро́ждши пло́тїю бг҃а сло́ва, є҆го́же ѻ҆ц҃ъ ѿры́гнꙋ ѿ се́рдца своегѡ̀, пре́жде всѣ́хъ вѣ̑къ ꙗ҆́кѡ бл҃гъ, є҆го́же ны́нѣ и҆ тѣле́съ превы́шша разꙋмѣ́емъ, а҆́ще и҆ въ тѣ́ло ѡ҆блече́сѧ.
И҆́нъ. І҆рмо́съ: Оу҆страши́сѧ:
Бж҃їѧ тѧ̀ є҆стество́мъ ᲂу҆́бѡ сн҃а, зача́таго во ᲂу҆тро́бѣ свѣ́мы бг҃омт҃ре, и҆ бы́вшаго на́съ ра́ди человѣ́ка, и҆ зрѧ́ще тѧ̀ на крⷭ҇тѣ̀, є҆стество́мъ ᲂу҆́бѡ стра́ждꙋща человѣ́ческимъ, безстра́стна же ꙗ҆́кѡ бг҃а пребыва́юща велича́емъ.
Разрꙋши́сѧ тма̀ дрѧ́хлаѧ, ѿ а҆́да бо возсїѧ̀ со́лнце пра́вды хрⷭ҇то́съ, землѝ просвѣща́ѧ всѧ̑ концы̀, сїѧ́ѧ бж҃ества̀ свѣ́томъ небе́сный человѣ́къ, бг҃ъ земны́й, є҆го́же во двою̀ є҆стествꙋ̀ велича́емъ.
И҆́нъ. І҆рмо́съ: Вои́стиннꙋ бцⷣꙋ:
Ра́дости и҆ весе́лїѧ и҆спо́лнь є҆́сть па́мѧть твоѧ̀, <<сп҃ѕ ѡ҆б.: 572>> пристꙋпа́ющымъ и҆сцѣлє́нїѧ точа́щи, и҆ благоче́стнѡ бцⷣꙋ тѧ̀ возвѣща́ющымъ.
Ѱалмы́ тѧ воспѣва́емъ бл҃года́тнаѧ, и҆ немо́лчнѡ, є҆́же ра́дꙋйсѧ, прино́симъ: ты́ бо и҆сточи́ла є҆сѝ всѣ̑мъ ра́дость.
И҆́нъ. І҆рмо́съ: Оу҆жасе́сѧ ѡ҆ се́мъ не́бо:
Наде́ждею и҆ любо́вїю воѡрꙋже́нно, и҆ вѣ́рнѡ ѡ҆гражде́нно счине́нїе и҆збра́нныхъ, всѧ̑ мꙋчи́телей прещє́нїѧ, мꙋ̑ки, и҆ ра̑ны ра́дꙋющесѧ претерпѣ́ша, благосла́внѡ ѿ хрⷭ҇та̀ ѡ҆богати́вшесѧ, побѣдотворѧ́щагѡ въ страда́нїихъ и҆́стины первомꙋ́ченики.
Приста́нище спасе́нїѧ, крⷭ҇ти́телѧ, а҆по́столы, проро́ки и҆ мꙋ́ченики съ по́стники, бж҃е́ствєнныѧ ᲂу҆чи́тели и҆ свѧще́нники, патрїа́рхѡвъ же собра́нїе, и҆ свѧщенномꙋ́ченики благосла̑вныѧ, жєны̀ бг҃олюби̑выѧ, преподѡ́бныѧ и҆ пра́вєдныѧ ны́нѣ досто́йнѡ восхва́лимъ.
Сла́ва:
Ѻ҆гне́мъ и҆скꙋси́вшесѧ и҆скꙋше́нїй, и҆ сластьмѝ не прельсти́вшесѧ ра́дꙋетесѧ чи́стѣ, престо́лꙋ влⷣчню свѣтови́дномꙋ предстоѧ́ще, сла́внїи собо́ри ст҃ы́хъ на нб҃сѣ́хъ, разрѣши́вшымсѧ зерца́лѡмъ, сѣ́ни же мимоше́дшей и҆́стинными ꙗ҆вле́ньми.
И҆ ны́нѣ: бг҃оро́диченъ:
Ꙗ҆ви́ласѧ є҆сѝ разстоѧ́щымсѧ совокꙋпи́тельнаѧ: тобо́ю бо а҆́гг҃лѡмъ є҆диносе́льницы на небесѣ́хъ человѣ́цы бы́ша вои́стиннꙋ, и҆ свидѣ́тельствꙋютъ чи́нове всѣ́хъ ст҃ы́хъ, ны́нѣ съ ни́ми пою́ще твоѐ ржⷭ҇тво̀ дв҃о бцⷣе, въ вѣ́чныхъ пѣ́снехъ.
Катава́сїа: Всѧ́къ земноро́дный:
Ст҃ъ гдⷭ҇ь бг҃ъ на́шъ: пое́мъ по гла́сꙋ. <<сп҃з: 573>>
Та́же є҆ѯапостїла́рїй воскре́сенъ:
Со ᲂу҆ченикѝ взы́демъ на го́рꙋ галїле́йскꙋю, вѣ́рою хрⷭ҇та̀ ви́дѣти, глаго́люща вла́сть прїѧ́ти вы́шнихъ и҆ до́льнихъ: наꙋчи́мсѧ, ка́кѡ ᲂу҆́читъ крести́ти, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, ꙗ҆зы́ки всѧ̑, и҆ спребыва́ти ᲂу҆ченикѡ́мъ, ꙗ҆́коже ѡ҆бѣща́сѧ до сконча́нїѧ.
Сла́ва:
Свѣти́ленъ всѣ́мъ ст҃ы̑мъ. Подо́бенъ:
Крести́телѧ и҆ предте́чꙋ, а҆по́столы, проро́ки, мꙋ́ченики, свѧщеннонача́льники же, по́стники и҆ преподѡ́бныѧ, сщ҃енномꙋ́ченики, кꙋ́пнѡ бг҃олюби̑выѧ жєны̀ и҆ пра́вєдныѧ всѧ̑, и҆ а҆́гг҃лѡвъ чи́ны, до́лжнѡ пѣ́сньми ᲂу҆вѧзе́мъ молѧ́щесѧ, сла́вꙋ си́хъ полꙋчи́ти ѿ хрⷭ҇та̀ сп҃са. .
И҆ ны́нѣ, бг҃оро́диченъ:
И҆́же горѣ̀ прославлѧ́емый бж҃е́ственнѣ ѿ а҆́гг҃лѡвъ, ѿ нѣ́дръ ѻ҆́ч҃ихъ, пречи́стаѧ, не ѿстꙋ́пль неизрече́ннѡ, съ до́льними поживѐ: ты́ же сегѡ̀ была̀ є҆сѝ спасе́нїѧ хода́таица, ѿ чи́стыхъ твои́хъ крове́й семꙋ̀ чи́стаѧ, па́че сло́ва пло́ть заимода́вши. є҆го́же молѝ рабѡ́мъ твои́мъ и҆збавле́нїе да́ти прегрѣше́нїй. .
На хвали́техъ, Всѧ́кое дыха́нїе: поста́вимъ стїхѡ́въ и҃, и҆ пое́мъ стїхи̑ры воскре́сны, гла́съ и҃:
Гдⷭ҇и, а҆́ще и҆ сꙋди́лищꙋ предста́лъ є҆сѝ ѿ пїла́та сꙋди́мый, но не ѿстꙋпи́лъ є҆сѝ ѿ прⷭ҇то́ла со ѻ҆ц҃е́мъ сѣдѧ̀: и҆ воскр҃съ и҆з̾ ме́ртвыхъ, мі́ръ свободи́лъ є҆сѝ ѿ рабо́ты чꙋжда́гѡ, ꙗ҆́кѡ ще́дръ и҆ чл҃вѣколю́бецъ.
Гдⷭ҇и, а҆́ще и҆ ꙗ҆́кѡ ме́ртва во гро́бѣ і҆ꙋдє́и положи́ша: но ꙗ҆́кѡ цр҃ѧ̀ спѧ́ща во́ини тѧ̀ стрежа́хꙋ, и҆ ꙗ҆́кѡ <<сп҃з ѡ҆б.: 574>> живота̀ сокро́вище, печа́тїю печа́таша: но воскрⷭ҇лъ є҆сѝ, и҆ по́далъ є҆сѝ нетлѣ́нїе дꙋша́мъ на́шымъ.
Гдⷭ҇и, ѻ҆рꙋ́жїе на дїа́вола крⷭ҇тъ тво́й да́лъ є҆сѝ на́мъ: трепе́щетъ бо и҆ трѧсе́тсѧ, не терпѧ̀ взира́ти на си́лꙋ є҆гѡ̀: ꙗ҆́кѡ мє́ртвыѧ возставлѧ́етъ, и҆ сме́рть ᲂу҆празднѝ. сегѡ̀ ра́ди покланѧ́емсѧ погребе́нїю твоемꙋ̀ и҆ воста́нїю.
А҆́гг҃лъ тво́й гдⷭ҇и, воскрⷭ҇нїе проповѣ́давый, стра̑жи ᲂу҆́бѡ ᲂу҆страшѝ, жена́мъ же возгласѝ глаго́лѧ: что̀ и҆́щете жива́гѡ съ ме́ртвыми; воскр҃се бг҃ъ сы́й, и҆ вселе́ннѣй жи́знь дарова̀.
И҆́на стїхи́ра ꙾восто́чнаѧ꙾[[а҆нато́лїева]] тогѡ́жде гла́са:
Пострада́лъ є҆сѝ крⷭ҇то́мъ, безстра́стный бж҃ество́мъ, погребе́нїе прїѧ́лъ є҆сѝ тридне́вное, да на́съ свободи́ши ѿ рабо́ты вра́жїѧ, и҆ ѡ҆безсме́ртивъ ѡ҆животвори́ши на́съ хрⷭ҇тѐ бж҃е, воскрⷭ҇нїемъ твои́мъ чл҃вѣколю́бче.
И҆́ны стїхи̑ры всѣ́мъ ст҃ы̑мъ, гла́съ д҃.
Подо́бенъ: Ꙗ҆́кѡ до́блѧ:
Ст҃ы̑ѧ гдⷭ҇ь и҆̀же на землѝ ᲂу҆дивѝ: тогѡ́ бо ра̑ны и҆ страда̑нїѧ въ пло́ти воспрїѧ́ша, въ си́хъ красѧ́щесѧ, и҆ бж҃е́ственными ᲂу҆добре́ньми ꙗ҆вле́ннѡ ᲂу҆добрѧ́еми: ꙗ҆̀же воспои́мъ ꙗ҆́кѡ неꙋвѧда́ющыѧ цвѣ́ты, ꙗ҆́кѡ ѕвѣ́зды непрелє́стныѧ це́ркве, ꙗ҆́кѡ вѡ́льнаѧ заколє́нїѧ.
Сті́хъ: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ.
Съ проро́ки а҆по́столи, съ преподо́бными ᲂу҆чи́телїе, со свѧщенномꙋ́ченики всѝ пра́веднїи, и҆ же́нъ пострада́вшее, и҆ любо́вїю пости́вшеесѧ ст҃ы́хъ мно́жество, и҆ пра́ведныхъ чи́нове, да восхва́лѧтсѧ свѧще́нными пѣ́сньми, ꙗ҆́кѡ го́рнѧгѡ црⷭ҇твїѧ наслѣ̑дницы, ꙗ҆́кѡ раѧ̀ жи́телїе.
Сті́хъ: Ди́венъ бг҃ъ во ст҃ы́хъ свои́хъ:
И҆́же зе́млю ѡ҆небеси́вшїи добродѣ́телей свѣ́тлостїю, <<сп҃и: 575>> и҆̀же хрⷭ҇то́вꙋ сме́рть подража́вшїи, безсме́ртїѧ хода́тайственный пꙋ́ть ше́ствовавшїи, и҆̀же стра̑сти человѣ́кѡмъ рꙋкодѣ́йствїемъ бл҃года́ти ѡ҆чи́стившїи, и҆̀же во все́мъ мі́рѣ є҆динодꙋ́шнѡ страда́льчествовавшїи, до́блественнѣ да восхва́лѧтсѧ мꙋ́чєницы.
Сла́ва: стїхи́ра ᲂу҆́треннѧѧ є҆ѵⷢ҇льскаѧ, а҃-ѧ. Гла́съ а҃:
На го́рꙋ ᲂу҆ченикѡ́мъ и҆дꙋ́щымъ за земно́е вознесе́нїе, предста̀ гдⷭ҇ь: и҆ поклони́вшесѧ є҆мꙋ̀, и҆ да́нныѧ вла́сти вездѣ̀ наꙋчи́вшесѧ, въ поднебе́снꙋю посыла́хꙋсѧ проповѣ́дати є҆́же и҆з̾ ме́ртвыхъ воскресе́нїе, и҆ є҆́же на нб҃са̀ вознесе́нїе: и҆̀мже и҆ во вѣ́ки спребыва́ти нело́жный ѡ҆бѣща́сѧ хрⷭ҇то́съ бг҃ъ и҆ сп҃съ дꙋ́шъ на́шихъ.
И҆ ны́нѣ: Преблгⷭ҇ве́нна є҆сѝ бцⷣе дв҃о: Славосло́вїе вели́кое. По трист҃о́мъ тропа́рь воскре́сенъ то́чїю, є҆ктєнїѝ: и҆ ѿпꙋ́стъ. И҆ ча́съ а҃-й въ притво́рѣ: и҆ поꙋче́нїе стꙋді́тово: и҆ соверше́нный ѿпꙋ́стъ.
На лїтꙋргі́и блажє́нна воскре́сна гла́са, на д҃. Гла́съ и҃:
Помѧнѝ на́съ хрⷭ҇тѐ сп҃се мі́ра, ꙗ҆́коже помѧнꙋ́лъ є҆сѝ разбо́йника на дре́вѣ, и҆ сподо́би всѣ́хъ є҆ди́не ще́дре, нбⷭ҇нагѡ црⷭ҇твїѧ твоегѡ̀.
На дре́вѣ пригво́ждсѧ сп҃се на́шъ во́лею, дре́вомъ а҆да́ма ѿ клѧ́твы и҆зба́вилъ є҆сѝ, воздава́ѧ, ꙗ҆́кѡ ще́дръ є҆́же по ѻ҆́бразꙋ, и҆ раѧ̀ вселе́нїе.
Слы́ши а҆да́ме, и҆ ра́дꙋйсѧ со є҆́ѵою, ꙗ҆́кѡ ѡ҆бнажи́вый дре́вле ѻ҆бои́хъ, и҆ пре́лестїю взе́мый плѣне́нны на́съ, крⷭ҇то́мъ хрⷭ҇то́вымъ ᲂу҆праздни́сѧ.
Дне́сь хрⷭ҇то́съ воскре́се ѿ гро́ба, всѣ̑мъ вѣ̑рнымъ подаѧ̀ нетлѣ́нїе, и҆ ра́дость ѡ҆бновлѧ́етъ мѷроно́сицамъ по стра́сти и҆ воста́нїи. <<сп҃и ѡ҆б.: 576>>
И҆ ѿ канѡ́на всѣ́хъ ст҃ы́хъ пѣ́снь ѕ҃, на д҃.
Прокі́менъ а҆пⷭ҇ла, гла́съ и҃: Помоли́тесѧ, и҆ воздади́те гдⷭ҇ви бг҃ꙋ на́шемꙋ. Сті́хъ: Вѣ́домъ во і҆ꙋде́и бг҃ъ, во і҆и҃ли ве́лїе и҆́мѧ є҆гѡ̀. И҆ ст҃ы̑мъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. А҆пⷭ҇лъ ко є҆вре́ѡмъ, зача́ло т҃а: Ст҃і́и всѝ вѣ́рою: А҆ллилꙋ́їа, гла́съ д҃: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ. Сті́хъ: Мно́ги скѡ́рби пра́вєднымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. Є҆ѵⷢ҇лїе матѳе́а, зача́ло л҃и: Всѧ́къ и҆́же и҆сповѣ́сть мѧ̀ пред̾ человѣ́ки: Прича́стный: Хвали́те гдⷭ҇а съ небе́съ: Дрꙋгі́й: Ра́дꙋйтесѧ пра́веднїи ѡ҆ гдⷭ҇ѣ:
На трапе́зѣ ᲂу҆тѣше́нїе бра́тїи, гото́вѧщымсѧ къ по́стномꙋ по́двигꙋ.
[зрѝ] Подоба́етъ вѣ́дати: а҆́ще хра́мъ всѣ́хъ ст҃ы́хъ: На ма́лѣй и҆ вели́цѣй вече́рни, и҆ на ᲂу҆́трени, и҆ на лїтꙋргі́и, подо́бнѣ пое́мъ, ꙗ҆́коже слꙋчи́тсѧ въ недѣ́лю вели́кагѡ ст҃а́гѡ. є҆мꙋ́же быва́етъ бдѣ́нїе. То́чїю на ᲂу҆́трени пое́мъ полѷеле́й.
По полѷеле́и:
Велича́емъ ва́съ а҆по́столи, мꙋ́чєницы, проро́цы, и҆ всѝ свѧті́и, и҆ чти́мъ ст҃ꙋ́ю па́мѧть ва́шꙋ: вы́ бо моли́те ѡ҆ на́съ хрⷭ҇та̀ бг҃а на́шего.
Ѱало́мъ и҆збра́нный: Бл҃же́нъ мꙋ́жъ боѧ́йсѧ гдⷭ҇а: И҆ сѣда́ленъ ст҃ы̑мъ, пи́санъ въ канѡ́нѣ по г҃-й пѣ́сни. Степє́нна гла́са. Прокі́менъ: Всѧ́кое дыха́нїе: И҆ є҆ѵⷢ҇лїе ст҃ы̑мъ. Воскресе́нїе хрⷭ҇то́во: и҆ ѱало́мъ н҃. Сла́ва: Мл҃твами всѣ́хъ ст҃ы́хъ: И҆ ны́нѣ: Моли́твами бцⷣы: Вмѣ́стѡ Воскре́съ і҆и҃съ: стїхи́ра всѣ́мъ ст҃ы̑мъ, кꙋ́ю во́лиши. Канѡ́нъ воскре́сенъ со і҆рмосо́мъ на д҃, и҆ бцⷣы на в҃, и҆ ст҃ы̑мъ на и҃. И҆ про́чее, ꙗ҆́коже предписа́сѧ.
Коне́цъ, и҆ бг҃ꙋ сла́ва.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.