Троицкая вечерня с коленопреклонными молитвами

Троицкая вечерня с коленопреклонными молитвами

<<см҃и ѡ҆б.: 496>>

Въ недѣ́лю ве́чера ст҃ы́ѧ пѧтдесѧ́тницы,

зна́менаетъ послѣ́дованїѧ ра́ди колѣнопреклоне́нїѧ.

Начина́етъ і҆ере́й: Благослове́нъ бг҃ъ на́шъ: И҆ глаго́летъ ᲂу҆чине́нный чте́цъ: Цр҃ю̀ нбⷭ҇ный: и҆ предначина́тельный ѱало́мъ: Та́же дїа́конъ, а҆́ще є҆́сть, а҆́ще же нѝ, свѧще́нникъ глаго́летъ є҆ктенїю̀ вели́кꙋю:

Ми́ромъ гдⷭ҇ꙋ помо́лимсѧ.

ѡ҆ свы́шнемъ ми́рѣ:

ѡ҆ ми́рѣ всегѡ̀ мі́ра:

ѡ҆ ст҃ѣ́мъ хра́мѣ се́мъ:

ѡ҆ вели́комъ гдⷭ҇и́нѣ и҆ ѻ҆тцѣ̀ на́шемъ ст҃ѣ́йшемъ патрїа́рхѣ [..] и҆ ѡ҆ гдⷭ҇и́нѣ на́шемъ преѡсщ҃е́ннѣйшемъ є҆пⷭ҇кпѣ [..], честнѣ́мъ пресвѵ́терствѣ, и҆ є҆́же во хрⷭ҇тѣ̀ дїа́конствѣ, ѡ҆ всѣ́мъ при́чтѣ и҆ лю́дехъ:

ѡ҆ бг҃охрани́мѣй странѣ̀ на́шей, властѣ́хъ и҆ во́инствѣ є҆ѧ̀, гдⷭ҇ꙋ помо́лимсѧ.

ѡ҆ гра́дѣ се́мъ:

ѡ҆ благорастворе́нїи воздꙋ́хѡвъ:

ѡ҆ пла́вающихъ:

ѡ҆ предстоѧ́щихъ лю́дехъ и҆ ѡ҆жида́ющихъ бл҃года́ти ст҃а́гѡ дх҃а, гдⷭ҇ꙋ помо́лимсѧ.

ѡ҆ приклонѧ́ющихъ сердца̀ своѧ̀ пред̾ гдⷭ҇емъ и҆ кѡлѣ́на, гдⷭ҇ꙋ помо́лимсѧ. <<см҃ѳ: 497>>

ѡ҆ є҆́же ᲂу҆крѣпи́тисѧ на́мъ къ соверше́нїю бг҃оꙋго́днѣ, гдⷭ҇ꙋ помо́лимсѧ.

ѡ҆ є҆́же низпосла́тисѧ бога̑тымъ ми́лостємъ є҆гѡ̀ на ны̀, гдⷭ҇ꙋ помо́лимсѧ.

ѡ҆ є҆́же прїѧ́ти колѣноприклонє́нїѧ на́ша ꙗ҆́кѡ ѳѷмїа́мъ пред̾ ни́мъ, гдⷭ҇ꙋ помо́лимсѧ.

ѡ҆ тре́бꙋющихъ ѿ негѡ̀ по́мощи, гдⷭ҇ꙋ помо́лимсѧ.

ѡ҆ и҆зба́витисѧ на́мъ:

Застꙋпѝ, спасѝ:

Прест҃ꙋ́ю, пречи́стꙋю:

Та́же сщ҃е́нникъ возгла́съ: Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ прⷭ҇нѡ, и҆ во вѣ́ки вѣкѡ́въ.

Та́же пое́мъ: Гдⷭ҇и воззва́хъ: и҆ поста́вимъ стїхѡ́въ ѕ҃. И҆ пое́мъ стїхи̑ры самогла́сны, гла́съ д҃: Пресла̑внаѧ дне́сь: повторѧ́юще. Сла́ва, и҆ ны́нѣ: гла́съ ѕ҃: Цр҃ю̀ нбⷭ҇ный: [Пи́саны вы́ше на хвали́техъ.]

Вхо́дъ съ кади́ломъ. Свѣ́те ти́хїй: Прокі́менъ вели́кїй, гла́съ з҃: Кто̀ бг҃ъ ве́лїй ꙗ҆́кѡ бг҃ъ на́шъ; ты̀ є҆сѝ бг҃ъ творѧ́й чꙋдеса̀. Сті́хъ а҃: Сказа́лъ є҆сѝ въ лю́дехъ си́лꙋ твою̀. Сті́хъ в҃: И҆ рѣ́хъ: ны́нѣ нача́хъ, сїѧ̀ и҆змѣ́на десни́цы вы́шнѧгѡ. Сті́хъ г҃: Помѧнꙋ́хъ дѣла̀ гдⷭ҇нѧ, ꙗ҆́кѡ помѧнꙋ̀ ѿ нача́ла чꙋдеса̀ твоѧ̀. И҆ па́ки: Кто̀ бг҃ъ ве́лїй:

Та́же возглаша́етъ сщ҃е́нникъ, и҆лѝ дїа́конъ: Па́ки и҆ па́ки, прикло́нше колѣ́на, гдⷭ҇ꙋ помо́лимсѧ.

Мы́ же, Гдⷭ҇и поми́лꙋй, три́жды. <<см҃ѳ ѡ҆б.: 498>>

На́мъ же прикло́ншымъ колѣ̑на на землѝ, и҆ непокровє́ннымъ сꙋ́щымъ, чте́тъ і҆ере́й мл҃твы во ѻ҆лтарѣ̀ велегла́снѡ на лю́ди.

Пречи́сте, нескве́рне, безнача́льне, неви́диме непостижи́ме, неизслѣ́диме, непремѣ́нне, непобѣди́ме, неизче́тне, неѕло́биве гдⷭ҇и, є҆ди́нъ и҆мѣ́ѧй безсме́ртїе, во свѣ́тѣ живы́й непристꙋ́пномъ: сотвори́вый нб҃о и҆ зе́млю, и҆ мо́ре, и҆ всѧ̑ созда̑ннаѧ на ни́хъ, пре́жде є҆́же проси́ти, всѣ̑мъ прошє́нїѧ подава́ѧй, тебѣ̀ мо́лимсѧ, и҆ тебѐ про́симъ, влⷣко человѣколю́бче, ѻ҆ц҃а̀ гдⷭ҇а и҆ бг҃а и҆ сп҃са на́шего і҆и҃са хрⷭ҇та̀, на́съ ра́ди человѣ́кѡвъ, и҆ на́шегѡ ра́ди спасе́нїѧ сше́дшаго съ нб҃съ, и҆ воплоти́вшагосѧ ѿ дх҃а ст҃а́гѡ и҆ мр҃і́и приснодв҃ы, и҆ пресла́вныѧ бцⷣы: и҆́же пе́рвѣе ᲂу҆́бѡ словесы̀ ᲂу҆чѧ̀, послѣди́ же и҆ дѣ́лы показꙋ́ѧ, є҆гда̀ сп҃си́тельнꙋю стра́сть претерпѣ̀, подадѐ на́мъ подписа́нїе смирє́ннымъ, и҆ грѣ̑шнымъ, и҆ недостѡ́йнымъ рабѡ́мъ твои́мъ, мольбы̑ приноси́ти тебѣ̀, въ вы́и и҆ колѣ́нъ преклоне́нїихъ, ѡ҆ свои́хъ грѣсѣ́хъ, и҆ ѡ҆ людски́хъ невѣ́дѣнїихъ. са́мъ многоми́лостиве и҆ человѣколю́бче, ᲂу҆слы́ши ны̀, во́ньже а҆́ще де́нь призове́мъ тѧ̀, и҆зрѧ́днѣе же въ де́нь се́й пѧтдесѧ́тный, во́ньже по вознесе́нїи гдⷭ҇а на́шегѡ і҆и҃са хрⷭ҇та̀ на нб҃са̀, и҆ сѣдѣ́нїи ѡ҆деснꙋ́ю тебѐ бг҃а и҆ ѻ҆ц҃а̀, низпосла̀ ст҃а́го дх҃а на ст҃ы̑ѧ своѧ̑ ᲂу҆ченикѝ и҆ а҆пⷭ҇лы, и҆́же и҆ сѣ́де на є҆ди́номъ коегѡ́ждо и҆́хъ, и҆ и҆спо́лнишасѧ всѝ неистощи́мыѧ бл҃года́ти є҆гѡ̀, и҆ глаго́лаша ѧ҆зы́ки и҆ны́ми вели̑чїѧ твоѧ̑, и҆ прореко́ша. Ны́нѣ ᲂу҆́бѡ молѧ́щихсѧ тебѣ̀ ᲂу҆слы́ши на́съ, и҆ помѧнѝ на́съ смире́нныхъ и҆ ѡ҆сꙋжде́нныхъ, и҆ возвратѝ плѣне́нїе дꙋ́шъ на́шихъ, твоѐ ми́лованїе и҆мѣ́ѧ ѡ҆ на́съ молѧ́щеесѧ. прїимѝ на́съ припа́дающихъ тебѣ̀, и҆ вопїю́щихъ: согрѣши́хомъ, къ тебѣ̀ приве́ржени є҆смы̀ ѿ ᲂу҆тро́бы, ѿ чре́ва ма́тере на́шеѧ, ты̀ є҆сѝ бг҃ъ на́шъ. Но ꙗ҆́кѡ и҆счезо́ша въ сꙋетѣ̀ дні́е на́ши, ѡ҆бнажи́хомсѧ твоеѧ̀ по́мощи, лиши́хомсѧ всѧ́кагѡ ѿвѣ́та, но дерза́юще на щедрѡ́ты твоѧ̀, зове́мъ: грѣхѝ <<с҃н: 499>> ю҆́ности на́шеѧ и҆ невѣ́дѣнїѧ не помѧнѝ, и҆ ѿ та́йныхъ на́шихъ ѡ҆чи́сти на́съ, и҆ не ѿри́ни на́съ во вре́мѧ ста́рости, внегда̀ ѡ҆скꙋдѣ́ти крѣ́пости на́шей: не ѡ҆ста́ви на́съ, пре́жде да́же на́мъ въ зе́млю не возврати́тисѧ, сподо́би къ тебѣ̀ возврати́тисѧ, и҆ вонмѝ на́мъ благопрїѧ́тїемъ и҆ бл҃года́тїю. возмѣ́ри беззакѡ́нїѧ на́шѧ щедро́тами твои́ми, сопроти́въ поста́ви бе́зднꙋ щедро́тъ твои́хъ мно́жествꙋ согрѣше́нїй на́шихъ. При́зри съ высоты̀ ст҃ы́ѧ твоеѧ̀ гдⷭ҇и, на предстоѧ́щыѧ лю́ди твоѧ̀, и҆ ча́ющыѧ є҆́же ѿ тебѐ бога́тыѧ ми́лости. Посѣтѝ на́съ бла́гостїю твое́ю, и҆зба́ви на́съ ѿ наси́льства дїа́волѧ: ᲂу҆твердѝ живо́тъ на́шъ ст҃ы́ми твои́ми и҆ сщ҃е́нными зако́ны. А҆́гг҃ла, вѣ́рна храни́телѧ приста́ви лю́демъ твои̑мъ, всѣ́хъ соберѝ въ твоѐ црⷭ҇твїе. да́ждь проще́нїе ᲂу҆пова́ющымъ на тѧ̀: ѡ҆ста́ви и҆́мъ и҆ на́мъ грѣхѝ. ѡ҆чи́сти на́съ дѣ́йствомъ ст҃а́гѡ твоегѡ̀ дх҃а: разрꙋшѝ ꙗ҆̀же на на́съ кѡ́зни вра́жїѧ.

Присовокꙋплѧ́етъ же и҆ сїю̀ моли́твꙋ:

Благослове́нъ є҆сѝ гдⷭ҇и влⷣко вседержи́телю, просвѣти́вый де́нь свѣ́томъ со́лнечнымъ, и҆ но́щь ᲂу҆ѧсни́вый зарѧ́ми ѻ҆́гненными, долготꙋ̀ дневнꙋ́ю преитѝ на́мъ сподо́бивый, и҆ прибли́житисѧ нача́ткѡмъ но́щи: ᲂу҆слы́ши молє́нїѧ на́шѧ, и҆ всѣ́хъ люде́й твои́хъ, и҆ всѣ̑мъ на́мъ прости́въ вѡ́льныѧ и҆ невѡ́льныѧ грѣхѝ. прїимѝ вечє́рнѧѧ на́шѧ молє́нїѧ, и҆ низпослѝ мно́жество ми́лости твоеѧ̀, и҆ щедрѡ́ты твоѧ̑ на достоѧ́нїе твоѐ. ѡ҆стѣнѝ на́съ ст҃ы́ми а҆́гг҃лы твои́ми, воѡрꙋжѝ на́съ ѻ҆рꙋ́жїемъ пра́вды твоеѧ̀, ѡ҆градѝ на́съ и҆́стиною твое́ю, соблюдѝ на́съ си́лою твое́ю, и҆зба́ви на́съ ѿ всѧ́кагѡ ѡ҆бстоѧ́нїѧ, всѧ́кагѡ навѣ́та сопротиволежа́щагѡ. пода́ждь же на́мъ и҆ настоѧ́щїй ве́черъ, съ приходѧ́щею но́щїю, соверше́нъ, ст҃ъ ми́ренъ, безгрѣ́шенъ, безсобла́зненъ, безмечта́ненъ, и҆ всѧ̑ днѝ живота̀ на́шегѡ: моли́твами ст҃ы́ѧ бцⷣы, и҆ всѣ́хъ ст҃ы́хъ ѿ вѣ́ка тебѣ̀ благоꙋгоди́вшихъ. <<с҃н ѡ҆б.: 500>>

А҆́бїе же глаго́летъ дїа́конъ:

Застꙋпѝ, спасѝ, поми́лꙋй, возста́ви, и҆ сохранѝ на́съ бж҃е твое́ю бл҃года́тїю.

И҆ Гдⷭ҇и поми́лꙋй. Є҆ди́ножды.

Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ, и҆ приснодв҃ꙋ мр҃і́ю, со всѣ́ми ст҃ы́ми помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.

Та́же і҆ере́й возгла́съ:

Твое́ бо є҆́сть, є҆́же ми́ловати, и҆ спаса́ти на́съ гдⷭ҇и бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

Посе́мъ і҆ере́й, и҆лѝ дїа́конъ глаго́летъ сїѧ̀:

Рце́мъ всѝ ѿ всеѧ̀ дꙋшѝ, и҆ ѿ всегѡ̀ помышле́нїѧ на́шегѡ рце́мъ.

Ли́къ: Гдⷭ҇и поми́лꙋй.

Дїа́конъ: Гдⷭ҇и вседержи́телю бж҃е ѻ҆ц҃ъ на́шихъ, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй.

Дїа́конъ: Поми́лꙋй на́съ бж҃е, по вели́цѣй ми́лости твое́й, мо́лимъ ти сѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй. три́жды.

Є҆щѐ мо́лимсѧ ѡ҆ вели́комъ гдⷭ҇и́нѣ и҆ ѻ҆тцѣ̀ на́шемъ ст҃ѣ́йшемъ патрїа́рхѣ […], и҆ ѡ҆ гдⷭ҇и́нѣ на́шемъ преѡсщ҃е́ннѣйшемъ є҆пⷭ҇кпѣ […], <<сн҃а: 501>> и҆ ѡ҆ все́й во хрⷭ҇тѣ̀ бра́тїи на́шей.

Ли́къ: Гдⷭ҇и поми́лꙋй. три́жды.

Дїа́конъ: Є҆щѐ мо́лимсѧ ѡ҆ бг҃охрани́мѣй странѣ̀ на́шей, властѣ́хъ, и҆ во́инствѣ є҆ѧ̀, да ти́хое и҆ безмо́лвное житїѐ поживе́мъ во всѧ́комъ благоче́стїи и҆ чистотѣ̀.

Ли́къ: Гдⷭ҇и поми́лꙋй. три́жды.

Дїа́конъ: Є҆щѐ мо́лимсѧ ѡ҆ бл҃же́нныхъ и҆ приснопа́мѧтныхъ созда́телехъ ст҃ы́ѧ ѻ҆би́тели сеѧ̀.

Ли́къ: Гдⷭ҇и поми́лꙋй. три́жды.

Дїа́конъ: Є҆щѐ мо́лимсѧ ѡ҆ ми́лости, жи́зни, ми́рѣ, здра́вїи, спасе́нїи, посѣще́нїи, проще́нїи, и҆ ѡ҆ставле́нїи грѣхѡ́въ рабѡ́въ бж҃їихъ бра́тїи ст҃ы́ѧ ѻ҆би́тели сеѧ̀.

Ли́къ: Гдⷭ҇и поми́лꙋй, три́жды.

Дїа́конъ: Є҆щѐ мо́лимсѧ ѡ҆ плодоносѧ́щихъ, и҆ добродѣ́ющихъ, во ст҃ѣ́мъ и҆ всечестнѣ́мъ хра́мѣ се́мъ, трꙋжда́ющихсѧ, пою́щихъ, и҆ предстоѧ́щихъ лю́дехъ, ѡ҆жида́ющихъ ѿ тебѐ вели́кїѧ и҆ бога́тыѧ ми́лости.

Та́же сщ҃е́нникъ, возгла́съ: Ꙗ҆́кѡ ми́лостивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, <<сн҃а ѡ҆б.: 502>> и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

А҆́бїе же дїа́конъ глаго́летъ:

Па́ки и҆ па́ки прикло́нше колѣ̑на, гдⷭ҇ꙋ помо́лимсѧ.

Мы́ же: Гдⷭ҇и поми́лꙋй. Три́жды.

И҆ приклонѧ́емъ колѣ̑на по предпи́санномꙋ.

Чте́тъ і҆ере́й в҃-ю мл҃твꙋ во ᲂу҆слы́шанїе всѣ́хъ:

Гдⷭ҇и і҆и҃се хрⷭ҇тѐ бж҃е на́шъ, ми́ръ тво́й пода́вый чл҃вѣ́кѡмъ, и҆ прест҃а́гѡ дх҃а да́ръ, є҆щѐ въ житїѝ и҆ съ на́ми сы́й, въ наслѣ́дїе неѿе́млемое вѣ̑рнымъ при́снѡ подава́ѧй: ꙗ҆вле́ннѣйше же сїю̀ бл҃года́ть твои̑мъ ᲂу҆ч҃нкѡ́мъ и҆ а҆по́столѡмъ дне́сь низпосла́вый, и҆ си́хъ ᲂу҆стнѣ̀ ѻ҆́гненными ᲂу҆тверди́вый ѧ҆зы́ки: и҆́миже ве́сь ро́дъ человѣ́ческїй бг҃овѣ́дѣнїе свои́мъ ѧ҆зы́комъ въ слꙋ́хъ ᲂу҆́ха прїи́мше, свѣ́томъ дх҃а просвѣти́хомсѧ, и҆ пре́лести ꙗ҆́коже тмы̀ и҆змѣни́хомсѧ, и҆ чꙋ́вственныхъ и҆ ѻ҆́гненныхъ ѧ҆зы̑къ раздаѧ́нїемъ, и҆ преесте́ственнымъ дѣ́йствомъ, є҆́же въ тѧ̀ вѣ́ры наꙋчи́хомсѧ, и҆ тебѐ бг҃осло́вити со ѻ҆ц҃е́мъ и҆ ст҃ы́мъ дх҃омъ, во є҆ди́номъ бж҃ествѣ̀, и҆ си́лѣ, и҆ вла́сти ѡ҆зари́хомсѧ. Ты̀ ᲂу҆́бѡ ѻ҆́ч҃ее сїѧ́нїе, сꙋщества̀ и҆ є҆стества̀ є҆гѡ̀ неизмѣ́нное и҆ недви́жимое начерта́нїе, и҆сто́чниче премꙋ́дрости: и҆ благода́ти: ѿве́рзи и҆ мнѣ̀ грѣ́шномꙋ ᲂу҆стнѣ̀, и҆ наꙋчи́ мѧ, ка́кѡ досто́итъ, и҆ ѡ҆ и҆́хже потре́ба моли́тисѧ: ты́ бо є҆сѝ вѣ́дый мно́гое грѣхѡ́въ мои́хъ мно́жество, но твоѐ благоꙋтро́бїе побѣди́тъ си́хъ безмѣ́рное. се́ бо стра́хомъ предстою́ ти, въ пꙋчи́нꙋ ми́лости твоеѧ̀ ѿча́ѧнїе дꙋшѝ моеѧ̀ пове́ргъ: ѡ҆кормѝ живо́тъ мо́й сло́вомъ всю̀ тва́рь неизрече́нною премꙋ́дрости си́лою ᲂу҆правлѧ́ѧй, ти́хое ѡ҆бꙋрева́емыхъ приста́нище, и҆ скажи́ ми пꙋ́ть, во́ньже пойдꙋ̀. Дх҃ъ премꙋ́дрости твоеѧ̀ мои̑мъ пода́ждь помышле́нїємъ, дх҃ъ ра́зꙋма безꙋ́мїю моемꙋ̀ да́рꙋѧй, дх҃омъ стра́ха твоегѡ̀ моѧ̀ ѡ҆сѣнѝ дѣла̀, и҆ дх҃ъ пра́вый ѡ҆бновѝ во <<рн҃в: 303>> ᲂу҆тро́бѣ мое́й, и҆ дх҃омъ влⷣчнимъ мы́слей мои́хъ поползнове́нїе ᲂу҆твердѝ: да на всѧ́къ де́нь дх҃омъ твои́мъ бл҃ги́мъ къ поле́зномꙋ наставлѧ́емь, сподо́блюсѧ твори́ти за́пѡвѣди твоѧ̀, и҆ твоѐ при́снѡ па́мѧтствовати сла́вное прише́ствїе, и҆ и҆стѧза́тельное содѣ́ѧнныхъ на́ми. И҆ да не пре́зриши мѧ̀ тлѣ́нными сопрельща́тисѧ мі́ра сегѡ̀ кра́сными, но бꙋ́дꙋщихъ воспрїѧ́тїѧ жела́ти ᲂу҆крѣпѝ сокро́вищъ. ты́ бо ре́клъ є҆сѝ влⷣко: ꙗ҆́кѡ є҆ли̑ка а҆́ще кто̀ про́ситъ ѡ҆ твое́мъ и҆́мени, невозбра́ннѡ прїе́млетъ ѿ твоегѡ̀ присносꙋ́щнагѡ бг҃а и҆ ѻ҆ц҃а̀. тѣ́мже и҆ а҆́зъ грѣ́шный въ прише́ствїи ст҃а́гѡ твоегѡ̀ дх҃а, твою̀ молю̀ бл҃гость, є҆ли̑ка проси́хъ, возда́ждь мѝ во спасе́нїе. Є҆́й гдⷭ҇и, всѧ́кагѡ благодѣѧ́нїѧ бога́тый да́телю, и҆ пода́телю бл҃гі́й, ꙗ҆́кѡ ты̀ є҆сѝ подава́ѧй преиз̾ѻби́льнѡ и҆́хже про́симъ: ты̀ є҆сѝ сострада́теленъ и҆ ми́лостивый, и҆́же безгрѣ́шнѡ бы́въ пло́ти на́шеѧ ѻ҆́бщникъ, и҆ приклонѧ́ющымъ къ тебѣ̀ кѡлѣ́на, приклонѧ́ѧйсѧ любоблагоꙋтро́бнѣ, ѡ҆чище́нїе же бы́въ грѣхѡ́въ на́шихъ. Да́ждь ᲂу҆́бѡ гдⷭ҇и, лю́демъ твои̑мъ щедрѡ́ты твоѧ̑: ᲂу҆слы́ши на́съ съ нб҃сѐ ст҃а́гѡ твоегѡ̀: ѡ҆свѧтѝ на́съ си́лою сп҃си́тельныѧ десни́цы твоеѧ̀: покры́й на́съ кро́вомъ крилꙋ̀ твое́ю, да не пре́зриши дѣ́лъ рꙋкꙋ̀ твое́ю. тебѣ̀ є҆ди́номꙋ согрѣша́емъ, но и҆ тебѣ̀ є҆ди́номꙋ слꙋ́жимъ. Не вѣ́мы кла́нѧтисѧ бо́гꙋ чꙋжде́мꙋ, нижѐ простира́ти рꙋ́ки на́шѧ влⷣко, къ бо́гꙋ и҆но́мꙋ. Ѡ҆ста́ви на́мъ согрѣшє́нїѧ, и҆ прїи́мъ на́шѧ колѣнопоклѡ́ннаѧ молє́нїѧ, прострѝ всѣ̑мъ на́мъ рꙋ́кꙋ по́мощи, прїимѝ моли́твꙋ всѣ́хъ ꙗ҆́кѡ кади́ло прїѧ́тное, воспрїе́млемое пред̾ твои́мъ пребл҃ги́мъ црⷭ҇твомъ.

Присовокꙋплѧ́етъ же и҆ сїю̀:

Гдⷭ҇и гдⷭ҇и, и҆збавле́й на́съ ѿ всѧ́кїѧ стрѣлы̀ летѧ́щїѧ во днѝ: И҆зба́ви на́съ и҆ ѿ всѧ́кїѧ ве́щи во тмѣ̀ преходѧ́щїѧ. Прїимѝ же́ртвꙋ вече́рнюю рꙋ́къ на́шихъ воздѣѧ̑нїѧ. Сподо́би же на́съ и҆ нощно́е по́прище без̾ поро́ка прейтѝ <<сн҃в ѡ҆б.: 504>> неискꙋше́ны ѿ ѕлы́хъ: И҆ и҆зба́ви на́съ ѿ всѧ́кагѡ смꙋще́нїѧ и҆ боѧ́зни, ꙗ҆́же ѿ дїа́вола на́мъ прибыва́ющїѧ. Да́рꙋй дꙋша́мъ на́шымъ ᲂу҆миле́нїе, и҆ помыслѡ́мъ на́шымъ попече́нїе, є҆́же на стра́шнѣмъ и҆ пра́веднѣмъ твое́мъ сꙋдѣ̀ и҆спыта́нїѧ. Пригвоздѝ стра́хꙋ твоемꙋ̀ плѡ́ти на́шѧ, и҆ ᲂу҆мертвѝ ᲂу҆́ды на́шѧ сꙋ́щыѧ на землѝ: Да и҆ со́ннымъ безмо́лвїемъ просвѣти́мсѧ, зрѣ́нїемъ сꙋде́бъ твои́хъ. Ѿими́ же ѿ на́съ всѧ́кое мечта́нїе неподо́бное и҆ по́хоть вре́днꙋ. Возста́ви же на́съ во вре́мѧ моли́твы ᲂу҆твержде́ны въ вѣ́рѣ, и҆ преспѣва́ющыѧ въ за́повѣдехъ твои́хъ.

Дїа́конъ же глаго́летъ: Застꙋпѝ, спасѝ, поми́лꙋй, возста́ви, и҆ сохранѝ на́съ бж҃е: Прест҃ꙋ́ю, пречⷭ҇тꙋю, пребл҃гослове́ннꙋю:

І҆ере́й возгла́съ моли́твѣ: Бл҃говоле́нїемъ и҆ бл҃гостїю є҆диноро́днагѡ сн҃а твоегѡ̀, съ ни́мже блгⷭ҇ве́нъ є҆сѝ, съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Та́же: Сподо́би гдⷭ҇и въ ве́черъ се́й:

Посе́мъ же глаго́летъ дїа́конъ: Па́ки и҆ па́ки прикло́нше колѣ̑на, гдⷭ҇ꙋ помо́лимсѧ.

Гдⷭ҇и поми́лꙋй, три́жды.

И҆ на́мъ та́кожде колѣ̑на прикло́ншымъ.

І҆ере́й чте́тъ тре́тїю моли́твꙋ:

Приснотекꙋ́щїй, живо́тный, и҆ просвѣти́тельный и҆сто́чниче, соприсносꙋ́щнаѧ ѻ҆ц҃ꙋ̀ содѣ́тельнаѧ си́ло, всѐ смотре́нїе за спасе́нїе человѣ́ческое прекра́снѣ и҆спо́лнивый, хрⷭ҇тѐ бж҃е на́шъ, сме́рти ᲂу҆́зы неразрѣши̑мыѧ, и҆ закле́пы а҆́довы расто́ргнꙋвый, лꙋка́выхъ же дꙋхѡ́въ мно́жество попра́вый. Приведы́й себѐ ѡ҆ на́съ непоро́чное заколе́нїе, и҆ тѣ́ло да́вый пречⷭ҇тое въ же́ртвꙋ, всѧ́кагѡ грѣха̀ неприкоснове́нное же и҆ непрохо́дное, и҆ стра́шнымъ си́мъ, и҆ неисповѣди́мымъ сщ҃еннодѣ́йствїемъ живо́тъ на́мъ вѣ́чный <<сн҃г: 505>> дарова́вый: во а҆́дъ сше́дый, и҆ верєѝ вѣ́чныѧ сокрꙋши́вый, и҆ во тмѣ̀ сѣдѧ́щымъ восхо́дъ показа́вый: началоѕло́бнаго же и҆ глꙋби́ннаго ѕмі́ѧ бг҃омꙋ́дростнымъ льще́нїемъ ᲂу҆лови́вый, и҆ вери́гами мра́ка свѧза́вый въ та́ртарѣ и҆ ѻ҆гнѝ негаси́момъ, и҆ во тмѣ̀ кромѣ́шнѣй неисчетноси́льною твое́ю затверди́вый крѣ́постїю, великоимени́таѧ премꙋ́дросте ѻ҆́ч҃аѧ, напа́ствꙋємымъ вели́кїй помо́щникъ ꙗ҆ви́выйсѧ, и҆ просвѣти́вый сѣдѧ́щыѧ во тмѣ̀ и҆ сѣ́ни сме́ртнѣй. Ты̀ сла́вы присносꙋ́щныѧ гдⷭ҇и, и҆ ѻ҆ц҃а̀ вы́шнѧгѡ сн҃е возлю́бленный, присносꙋ́щный свѣ́те ѿ присносꙋ́щнагѡ свѣ́та, сл҃нце пра́вды, ᲂу҆слы́ши на́съ молѧ́щихсѧ тебѣ̀, и҆ ᲂу҆поко́й дꙋ́шы рабѡ́въ твои́хъ, пре́жде ᲂу҆со́пшихъ ѻ҆тє́цъ и҆ бра́тїй на́шихъ, и҆ про́чїихъ срѡ́дникъ по пло́ти, и҆ всѣ́хъ свои́хъ въ вѣ́рѣ, ѡ҆ ни́хже и҆ па́мѧть твори́мъ ны́нѣ, ꙗ҆́кѡ въ тебѣ̀ всѣ́хъ держа́ва, и҆ въ рꙋцѣ̀ твое́й содержи́ши всѧ̑ концы̀ землѝ. Влⷣко вседержи́телю, бж҃е ѻ҆ц҃ъ и҆ гдⷭ҇и ми́лости, ро́да сме́ртнагѡ же и҆ безсме́ртнагѡ, и҆ всѧ́кагѡ є҆стества̀ человѣ́ческагѡ содѣ́телю, составлѧ́емагѡ же, и҆ па́ки разрѣша́емагѡ, живота́ же и҆ сконча́нїѧ, є҆́же здѣ̀ пребыва́нїѧ, и҆ є҆́же та́мѡ преложе́нїѧ: лѣ̑та и҆змѣрѧ́ѧй живы̑мъ, и҆ времена̀ ᲂу҆ставлѧ́ѧй сме́рти: низводѧ́й во а҆́дъ и҆ возводѧ́й: свѧзꙋ́ѧй въ не́мощи, и҆ ѿпꙋща́ѧй въ си́лѣ: настоѧ̑щаѧ потре́бнѣ стро́ѧй, и҆ бꙋ̑дꙋщаѧ поле́знѡ ᲂу҆правлѧ́ѧй: сме́ртнымъ жа́ломъ ᲂу҆ѧ́звенныхъ воскресе́нїѧ наде́ждами веселѧ́ѧй. Са́мъ ᲂу҆́бѡ влⷣко всѣ́хъ, бж҃е сп҃си́телю на́шъ, наде́жде всѣ́хъ концє́въ землѝ, и҆ сꙋ́щихъ въ мо́ри дале́че, и҆́же и҆ въ се́й послѣ́днїй и҆ вели́кїй спаси́тельный де́нь пѧтдесѧ́тницы пра́здника, та́йнꙋ ст҃ы́ѧ и҆ є҆диносꙋ́щныѧ, и҆ соприсносꙋ́щныѧ, и҆ нераздѣли́мыѧ, и҆ неслїѧ́нныѧ трⷪ҇цы показа́вый на́мъ, и҆ наи́тїе и҆ прише́ствїе ст҃а́гѡ и҆ животворѧ́щагѡ твоегѡ̀ дх҃а, въ ви́дѣ ѻ҆́гненныхъ ѧ҆зы́кѡвъ на ст҃ы́ѧ твоѧ̀ а҆по́столы и҆злїѧ́вый, и҆ благовѣ́стники тѣ́хъ поста́вивый, бл҃гочести́выѧ на́шеѧ вѣ́ры, <<сн҃г ѡ҆б.: 506>> и҆ и҆сповѣ́дники и҆ проповѣ́дники и҆́стиннагѡ бг҃осло́вїѧ показа́вый: И҆́же и҆ въ се́й всесоверше́нный и҆ спаси́тельный пра́здникъ, ѡ҆чищє́нїѧ ᲂу҆́бѡ моли́твєннаѧ, ѡ҆ и҆̀же въ а҆́дѣ держи́мыхъ сподо́бивый прїима́ти, вели̑кїѧ же подава́ѧй на́мъ надє́жды ѡ҆слабле́нїѧ содержи̑мымъ ѿ содержа́щихъ ѧ҆̀ скве́рнъ, и҆ ᲂу҆тѣше́нїю тобо́ю низпосла́тисѧ. Оу҆слы́ши на́съ смире́нныхъ, и҆ твои́хъ ра̑бъ молѧ́щихсѧ тѝ, и҆ ᲂу҆поко́й дꙋ́шы рабѡ́въ твои́хъ пре́жде ᲂу҆со́пшихъ, на мѣ́стѣ свѣ́тлѣ, на мѣ́стѣ ѕла́чнѣ, на мѣ́стѣ прохлажде́нїѧ: ѿѻнꙋ́дꙋже ѿбѣжѐ всѧ́каѧ болѣ́знь, печа́ль и҆ воздыха́нїе и҆ ᲂу҆чинѝ дꙋ́хи и҆́хъ въ селе́нїѧхъ пра́ведныхъ, и҆ ми́ра и҆ ѡ҆слабле́нїѧ сподо́би и҆́хъ: ꙗ҆́кѡ не ме́ртвїи восхва́лѧтъ тѧ̀ гдⷭ҇и, нижѐ сꙋ́щїи во а҆́дѣ и҆сповѣ́данїе дерзнꙋ́тъ принестѝ тебѣ̀: но мы̀ живі́и бл҃гослови́мъ тѧ̀ и҆ мо́лимъ, и҆ ѡ҆чисти́тєльныѧ моли̑твы и҆ жє́ртвы прино́симъ тебѣ̀ ѡ҆ дꙋша́хъ и҆́хъ.

Присовокꙋплѧ́етъ и҆ сїю̀ моли́твꙋ:

Бж҃е вели́кїй, и҆ вѣ́чный, ст҃ы́й, человѣколюби́вый, сподо́бивый на́съ въ се́й ча́съ ста́ти пред̾ непристꙋ́пною твое́ю сла́вою, на пѣ́нїе и҆ хвалꙋ̀ чꙋде́съ твои́хъ, ѡ҆чи́сти ны̀ недосто́йныѧ рабы̑ твоѧ̀, и҆ пода́ждь бл҃года́ть є҆́же сокрꙋше́ннымъ се́рдцемъ, невозноси́тельнѡ приноси́ти тебѣ̀ трист҃о́е славосло́вїе, и҆ бл҃годаре́нїе вели́кихъ твои́хъ дарѡ́въ, ꙗ҆̀же сотвори́лъ є҆сѝ къ на́мъ, и҆ твори́ши всегда̀ въ на́съ. Помѧнѝ гдⷭ҇и не́мощь на́шꙋ, и҆ да не погꙋби́ши на́съ со беззако́нїи на́шими: но сотворѝ вели́кꙋю ми́лость со смире́нїемъ на́шимъ, да грѣхо́вныѧ тмы̀ и҆збѣжа́вше, во днѝ пра́вды ходи́ти бꙋ́демъ, и҆ ѡ҆дѣ́ѧвшесѧ ѻ҆рꙋ́жїемъ свѣ́та, ненавѣ́тнѡ пребꙋ́демъ ѿ всѧ́кїѧ ко́зни лꙋка́вагѡ, и҆ со дерзнове́нїемъ просла́вимъ ѡ҆ всѣ́хъ, тебѐ є҆ди́наго и҆́стиннаго и҆ человѣколю́бца бг҃а. Твое́ бо ꙗ҆́кѡ вои́стиннꙋ и҆ вели́кое врѣснотꙋ̀ та́инство, влⷣко всѣ́хъ, и҆ тво́рче, вре́менное рѣше́нїе твои́хъ тва́рей, и҆ є҆́же по <<сн҃д: 507>> си́хъ совокꙋпле́нїе, и҆ ᲂу҆покое́нїе є҆́же во вѣ́ки: тебѣ̀ благода́ть ѡ҆ всѣ́хъ и҆сповѣ́дꙋемъ, ѡ҆ вхо́дѣхъ на́шихъ, ꙗ҆̀же въ мі́ръ се́й, и҆ и҆схо́дѣхъ, наде́жды на́мъ воскрⷭ҇нїѧ, и҆ жи́зни нетлѣ́нныѧ, твои́мъ нело́жнымъ ѡ҆бѣща́нїемъ пред̾ѡбрꙋча́ютъ, ꙗ҆̀же прїи́мемъ въ бꙋ́дꙋщемъ второ́мъ прише́ствїи твое́мъ. ты́ бо є҆сѝ и҆ воскресе́нїѧ на́шегѡ нача́льникъ, и҆ пожи́вшихъ неꙋмы́тный и҆ человѣколюби́вый сꙋдїѧ̀, и҆ мздовоздаѧ́нїѧ влⷣка и҆ гдⷭ҇ь, и҆́же и҆ прїѡбщи́выйсѧ на́мъ прїи́скреннѡ пло́ти и҆ кро́ве, снизхожде́нїѧ ра́ди кра́йнѧгѡ: и҆ на́шѧ стра̑сти неѿмє́тныѧ, внегда̀ во́лею во и҆скꙋ́съ поста́вити, прїи́мъ за милосе́рдїе щедро́тъ, и҆ въ не́мже пострада́лъ є҆сѝ са́мъ и҆скꙋси́всѧ, и҆скꙋша́ємымъ на́мъ бы́въ самоѡбѣща́нный помо́щникъ: тѣ́мже и҆ совозве́лъ є҆сѝ на́съ въ твоѐ безстра́стїе. Прїимѝ ᲂу҆́бѡ влⷣко, мольбы̑ и҆ молє́нїѧ на́шѧ, и҆ ᲂу҆поко́й всѧ̀ ѻ҆тцы̀ коегѡ́ждо, и҆ ма́тєри, и҆ ча̑да, и҆ бра́тїю, и҆ сестры̑ є҆динорѡ́дныѧ, и҆ кꙋпнорѡ́дныѧ, и҆ всѧ̀ пре́жде почи́вшыѧ дꙋ́шы: въ наде́жди воскресе́нїѧ жи́зни вѣ́чныѧ ᲂу҆чинѝ дꙋ́хи и҆́хъ, и҆ и҆мена̀ въ кни́зѣ живо́тнѣй, въ нѣ́дрѣхъ а҆враа́ма, и҆ і҆саа́ка, и҆ і҆а́кѡва, въ странѣ̀ живы́хъ, въ црⷭ҇твїи небе́снѣмъ, въ раѝ сла́дости, свѣ́тлыми а҆́гг҃лы твои́ми, вводѧ̀ всѧ̑ во ст҃ы̑ѧ твоѧ̑ ѻ҆би́тєли, совоздвиза́ѧй и҆ тѣлеса̀ на́шѧ въ де́нь, во́ньже ѡ҆предѣли́лъ є҆сѝ по ст҃ы̑мъ твои̑мъ и҆ нело́жнымъ ѡ҆бѣтова́нїємъ. Нѣ́сть ᲂу҆́бѡ гдⷭ҇и, рабѡ́мъ твои́мъ сме́рть, и҆сходѧ́щымъ на́мъ ѿ тѣ́ла, и҆ къ тебѣ̀ бг҃ꙋ на́шемꙋ приходѧ́щымъ, но преставле́нїе ѿ печа́льнѣйшихъ на полє́знѣйшаѧ, и҆ сла́дѡстнѣйшаѧ, и҆ на ᲂу҆покое́нїе и҆ ра́дость. А҆́ще же и҆ что̀ согрѣши́хомъ къ тебѣ̀, ми́лостивъ бꙋ́ди на́мъ же и҆ тѣ̑мъ, занѐ ниеди́нъ є҆́сть чи́стъ пред̾ тобо́ю ѿ скве́рнъ, нижѐ а҆́ще є҆ди́нъ де́нь живота̀ є҆гѡ̀ є҆́сть, ра́звѣ ты̀ то́чїю є҆ди́нъ, на землѝ ꙗ҆ви́выйсѧ безгрѣ́шный гдⷭ҇ь на́шъ і҆и҃съ хрⷭ҇то́съ: и҆́мже всѝ ᲂу҆пова́емъ ми́лость полꙋчи́ти, и҆ ѡ҆ставле́нїе грѣхѡ́въ. Сегѡ̀ ра́ди <<сн҃д ѡ҆б.: 508>> на́мъ же и҆ ѻ҆́нѣмъ, ꙗ҆́кѡ бла́гъ и҆ человѣколю́бецъ бг҃ъ, ѡ҆сла́би, ѡ҆ста́ви, простѝ грѣхопадє́нїѧ на́шѧ, вѡ́льнаѧ и҆ невѡ́льнаѧ, ꙗ҆̀же въ вѣ́дѣнїи и҆ не въ вѣ́дѣнїи, пред̾ѧвлє́ннаѧ и҆ забыва́ємаѧ: ꙗ҆̀же въ дѣѧ́нїи, ꙗ҆̀же въ помышле́нїи, ꙗ҆̀же въ словесѝ, ꙗ҆̀же во всѣ́хъ на́шихъ житїѧ́хъ и҆ движе́нїихъ. И҆ ѿше́дшымъ ᲂу҆́бѡ свобо́дꙋ и҆ ѡ҆сла́бꙋ да́рꙋй, на́съ же сꙋ́щихъ здѣ̀ благословѝ, коне́цъ благі́й и҆ ми́рный да́рꙋѧ на́мъ же и҆ всѣ́мъ лю́демъ твои́мъ, и҆ ми́лости и҆ человѣколю́бїѧ ᲂу҆тро́бꙋ ѿверза́ѧй на́мъ, на стра́шномъ и҆ ᲂу҆жа́сномъ твое́мъ прише́ствїи, и҆ црⷭ҇твїѧ твоегѡ̀ досто́йныхъ на́съ сотворѝ.

Присовокꙋплѧ́етъ и҆ сїю̀ моли́твꙋ:

Бж҃е вели́кїй и҆ вы́шнїй, є҆ди́не и҆мѣ́ѧй безсме́ртїе, во свѣ́тѣ живы́й непристꙋ́пномъ, всю̀ тва́рь мꙋ́дростїю созда́вый, раздѣли́вый посредѣ̀ свѣ́та, и҆ посредѣ̀ тмы̀: И҆ со́лнце ᲂу҆́бѡ положи́вый во ѻ҆́бласть днѐ, лꙋнꙋ́ же и҆ ѕвѣ́зды во ѻ҆́бласть но́щи. Сподо́бивый на́съ грѣ́шныхъ и҆ въ настоѧ́щїй де́нь предвари́ти лицѐ твоѐ во и҆сповѣ́данїи, и҆ вече́рнюю тебѣ̀ слꙋ́жбꙋ принестѝ. Са́мъ человѣколю́бче гдⷭ҇и, и҆спра́ви моли́твꙋ на́шꙋ, ꙗ҆́кѡ кади́ло пред̾ тобо́ю, и҆ прїимѝ ю҆̀ въ воню̀ бл҃гоꙋха́нїѧ. Пода́ждь же на́мъ настоѧ́щїй ве́черъ и҆ приходѧ́щꙋю но́щь ми́рнꙋ: ѡ҆блецы́ ны ѻ҆рꙋ́жїемъ свѣ́та, и҆зба́ви на́съ ѿ стра́ха нощна́гѡ, и҆ ѿ всѧ́кїѧ ве́щи во тмѣ̀ преходѧ́щїѧ. И҆ да́рꙋй на́мъ со́нъ, и҆́же во ᲂу҆покое́нїе не́мощи на́шей дарова́лъ є҆сѝ, ѿ всѧ́кагѡ дїа́вольскагѡ мечта́нїѧ и҆змѣне́нъ. Є҆́й влⷣко всѣ́хъ благи́хъ пода́телю, ꙗ҆́кѡ да и҆ на ло́жахъ на́шихъ ᲂу҆милѧ́ющесѧ воспомѧ́немъ и҆ въ нощѝ прест҃о́е и҆́мѧ твоѐ. И҆ поꙋче́нїемъ твои́хъ за́повѣдей ѡ҆зарѧ́еми, въ ра́дости дꙋше́вной воста́немъ къ славосло́вїю твоеѧ̀ бла́гости, моли̑твы и҆ молє́нїѧ твоемꙋ̀ благоꙋтро́бїю приносѧ́ще ѡ҆ свои́хъ грѣсѣ́хъ, и҆ ѡ҆ всѣ́хъ лю́дехъ твои́хъ: и҆̀хже моли́твами прест҃ы́ѧ бцⷣы, въ ми́лости посѣтѝ. <<сн҃є: 509>>

Дїа́конъ глаго́летъ: Застꙋпѝ, спасѝ, поми́лꙋй, возста́ви и҆ сохранѝ на́съ бж҃е твое́ю бл҃года́тїю. Прест҃ꙋ́ю, пречи́стꙋю, пребл҃гослове́ннꙋю, сла́внꙋю влⷣчцꙋ:

І҆ере́й возглаша́етъ: Ты́ бо є҆сѝ ᲂу҆покое́нїе дꙋ́шъ и҆ тѣле́съ на́шихъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Та́же дїа́конъ: И҆спо́лнимъ вече́рнюю моли́твꙋ на́шꙋ: Застꙋпѝ, спасѝ: Ве́чера всегѡ̀ соверше́нна: А҆́гг҃ла ми́рна: Проще́нїѧ и҆ ѡ҆ставле́нїѧ: До́брыхъ и҆ поле́зныхъ: Про́чее вре́мѧ живота̀ хрⷭ҇тїа́нскїѧ кончи́ны: Прест҃ꙋ́ю, пречи́стꙋю:

І҆ере́й возглаша́етъ: Ꙗ҆́кѡ бла́гъ и҆ человѣколю́бецъ: Лю́дїе: А҆ми́нь. І҆ере́й: Ми́ръ всѣ̑мъ. Лю́дїе: И҆ дх҃ови твоемꙋ̀. Дїа́конъ: Главы̑ на́шѧ гдⷭ҇ви прикло́нимъ.

І҆ере́й глаго́летъ моли́твꙋ ѻ҆бы́чнꙋю вта́й:

Гдⷭ҇и бж҃е на́шъ, приклони́вый нб҃са̀, и҆ сше́дый на спасе́нїе ро́да человѣ́ческагѡ, при́зри на рабы̑ твоѧ̑, и҆ на достоѧ́нїе твоѐ! тебѣ́ бо стра́шномꙋ и҆ человѣколю́бцꙋ сꙋдїѝ, твоѝ рабѝ своѧ̑ приклони́ша главы̑ и҆ своѧ̑ покори́ша вы̑и не ѿ человѣ̑къ ѡ҆жида́юще по́мощи, но твоеѧ̀ ѡ҆жида́юще ми́лости, и҆ твоегѡ̀ ча́юще спасе́нїѧ: ꙗ҆̀же сохранѝ на всѧ́кое вре́мѧ, и҆ въ настоѧ́щемъ часѣ́ же и҆ ве́черѣ и҆ въ приходѧ́щꙋю но́щь, ѿ всѧ́кагѡ врага̀, ѿ всѧ́кагѡ сопротиволежа́щагѡ дѣ́йства дїа́вольскагѡ, помышле́нїй сꙋ́етныхъ, и҆ воспомина́нїй лꙋка́выхъ.

Та́же возглаша́етъ: Бꙋ́ди держа́ва:

И҆ посе́мъ соше́дшесѧ ѻ҆́ба ли́ка, пое́мъ на стїхо́внѣ стїхи̑ры самогла́сны, гла́съ г҃:

Ны́нѣ въ зна́менїе всѣ̑мъ ꙗ҆́вѣ ѧ҆зы́цы бы́ша: і҆ꙋдє́и бо ѿ ни́хже по пло́ти хрⷭ҇то́съ, невѣ́рїемъ недꙋ́говавше, <<сн҃є ѡ҆б.: 510>> бж҃їѧ благода́ти ѿпадо́ша: и҆ бж҃е́ственнагѡ свѣ́та сꙋ́щїи ѿ ꙗ҆зы́кѡвъ сподо́бихомсѧ, ᲂу҆тверди́вшесѧ словесы̀ ᲂу҆ченикѡ́въ, вѣща́ющихъ сла́вꙋ благодѣ́телѧ всѣ́хъ бг҃а: съ ни́миже сердца̀ съ колѣ́нами прикло́нше, вѣ́рою поклони́мсѧ ст҃о́мꙋ дх҃ꙋ, ᲂу҆тверди́вшесѧ сп҃си́телемъ дꙋ́шъ на́шихъ.

Сті́хъ: Се́рдце чи́сто сози́жди во мнѣ̀ бж҃е, и҆ дх҃ъ пра́въ ѡ҆бновѝ во ᲂу҆тро́бѣ мое́й.

Ны́нѣ ᲂу҆тѣ́шительный дх҃ъ на всѧ́кꙋю пло́ть и҆злїѧ́сѧ: ѿ а҆по́стольскихъ бо ликѡ́въ наче́ншїй, ѿ тѣ́хъ по прича́стїю вѣ̑рнымъ бл҃года́ть прострѐ, и҆ ᲂу҆вѣрѧ́етъ своѐ держа́вное наи́тїе во ѻ҆́гненномъ ви́дѣ, ᲂу҆ч҃нкѡ́мъ раздаѧ́й ѧ҆зы́ки въ пѣснопѣ́нїе и҆ сла́вꙋ бж҃їю. тѣ́мже сердцы̀ ᲂу҆́мнѡ просвѣща́еми, въ вѣ́рѣ ᲂу҆тверди́вшесѧ ст҃ы́мъ дх҃омъ, мо́лимсѧ спасти́сѧ дꙋша́мъ на́шымъ.

Сті́хъ: Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ.

Ны́нѣ ѡ҆блача́тсѧ держа́вою хрⷭ҇то́вою съ высоты̀ а҆пⷭ҇ли: ѡ҆бновлѧ́етъ бо и҆̀хъ ᲂу҆тѣ́шитель, въ ни́хъ ѡ҆бновлѧ́ѧсѧ та́инственнымъ ѡ҆бновле́нїемъ ра́зꙋма: и҆̀же стра́нными гла́сы, и҆ высокоглаго́ливыми проповѣ́дающе присносꙋ́щное є҆стество́ же и҆ про́стое, трїѷпоста́сное почита́ти, бл҃годѣ́телѧ всѣ́хъ бг҃а. тѣ́мже просвѣти́вшесѧ ѻ҆́ныхъ ᲂу҆че́ньми, ѻ҆ц҃ꙋ̀ поклони́мсѧ съ сн҃омъ и҆ дх҃омъ, молѧ́щесѧ спасти́сѧ дꙋша́мъ на́шымъ.

Сла́ва, и҆ ны́нѣ: гла́съ и҃:

Прїиди́те лю́дїе трїѷпоста́сномꙋ бжⷭ҇твꙋ̀ поклони́мсѧ, сн҃ꙋ во ѻ҆ц҃ѣ̀, со ст҃ы́мъ дх҃омъ: ѻ҆ц҃ъ бо безлѣ́тнѡ родѝ сн҃а соприсносꙋ́щна, и҆ сопресто́льна, и҆ дх҃ъ ст҃ы́й бѣ̀ во <<сн҃ѕ: 511>> ѻ҆ц҃ѣ̀ съ сн҃омъ прославлѧ́емь, є҆ди́на си́ла, є҆ди́но сꙋщество̀, є҆ди́но бж҃ество̀. є҆мꙋ́же покланѧ́ющесѧ всѝ глаго́лемъ: ст҃ы́й бж҃е, всѧ̑ содѣ́ѧвый сн҃омъ, содѣ́йствомъ ст҃а́гѡ дх҃а: ст҃ы́й крѣ́пкїй, и҆́мже ѻ҆ц҃а̀ позна́хомъ, и҆ дх҃ъ ст҃ы́й прїи́де въ мі́ръ: ст҃ы́й безсме́ртный, ᲂу҆тѣ́шительный дш҃е, ѿ ѻ҆ц҃а̀ и҆сходѧ́й, и҆ въ сн҃ѣ почива́ѧй, трⷪ҇це ст҃а́ѧ, сла́ва тебѣ̀.

Та́же, Ны́нѣ ѿпꙋща́еши: Трист҃о́е. Прест҃а́ѧ трⷪ҇це: Ѻ҆́ч҃е на́шъ: Тропа́рь, гла́съ и҃: Бл҃гослове́нъ є҆сѝ хрⷭ҇тѐ бж҃е на́шъ:

Та́же свѧще́нникъ твори́тъ ѿпꙋ́стъ си́це:

И҆́же ѿ ѻ҆́ч҃ихъ и҆ бж҃е́ственныхъ нѣ́дръ и҆стощи́вый себѐ, и҆ съ нб҃сѐ на зе́млю соше́дый, и҆ на́ше всѐ воспрїе́мый є҆стество̀, и҆ ѡ҆божи́вый є҆̀, по си́хъ же на нб҃са̀ па́ки возше́дый и҆ ѡ҆деснꙋ́ю сѣ́дый бг҃а и҆ ѻ҆ц҃а̀: бж҃е́ственнаго же и҆ ст҃а́го и҆ є҆диносꙋ́щнаго, и҆ є҆диноси́льнаго, и҆ є҆диносла́внаго, и҆ соприсносꙋ́щнаго дх҃а низпосла́вый на ст҃ы̑ѧ своѧ̑ ᲂу҆ченикѝ и҆ а҆пⷭ҇лы, и҆ си́мъ просвѣти́вый ᲂу҆́бѡ и҆́хъ, тѣ́ми же всю̀ вселе́ннꙋю: хрⷭ҇то́съ и҆́стинный бг҃ъ на́шъ, моли́твами пречи́стыѧ и҆ пренепоро́чныѧ ст҃ы́ѧ своеѧ̀ мт҃ре, ст҃ы́хъ сла́вныхъ, прехва́льныхъ, бг҃опроповѣ́дникѡвъ, и҆ дх҃оно́сныхъ а҆пⷭ҇лѡвъ, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бл҃гъ и҆ человѣколю́бецъ. <<сн҃ѕ ѡ҆б.: 512>>

Въ тꙋ́ же недѣ́лю и҃-ю, на повече́рїи.

Пое́мъ канѡ́нъ ст҃о́мꙋ дх҃ꙋ. Гла́съ а҃.

Творе́нїе ѳеофа́ново. І҆рмо́съ по два́жды: тропарѝ на д҃. Є҆гѡ́же краестро́чїе: Дх҃а пою̀ созда́вшаго всю̀ тва́рь.

Пѣ́снь а҃.

І҆рмо́съ: Го́рькїѧ рабо́ты и҆зба́вльсѧ і҆и҃ль, непроходи́мое про́йде ꙗ҆́кѡ сꙋ́шꙋ, врага̀ зрѧ̀ потоплѧ́ема, пѣ́снь ꙗ҆́кѡ бл҃годѣ́телю пое́тъ бг҃ꙋ, чꙋдодѣ́ющемꙋ мы́шцею высо́кою, ꙗ҆́кѡ просла́висѧ.

Припѣ́въ: Сла́ва тебѣ̀ бж҃е на́шъ, сла́ва тебѣ̀.

Бж҃е́ственный дш҃е свѧты́й, и҆́же всѣ̑мъ раздѣлѧ́ѧй дарова̑нїѧ, и҆ всѧ̑ творѧ́й во́лею, вдохни́ ми свѣтоно́сное твоѐ дарова́нїе, ꙗ҆́кѡ да сла́влю тѧ̀ ѻ҆ц҃ꙋ̀ и҆ сн҃ꙋ совокꙋплѧ́ема.

И҆́же нбⷭ҇нымъ си́ламъ свѧ́тостнагѡ дохнове́нїѧ твоегѡ̀ бл҃года́ть даѧ́й, ᲂу҆тѣ́шителю, моегѡ̀ смы́сла ꙗ҆́кѡ бл҃гъ скве́рнꙋ и҆счи́стивъ, свѧ́тости твоеѧ̀ покажѝ и҆спо́лнена.

Сла́ва:

И҆сто́чниче жи́зни вѣ́рꙋемый, и҆ стрꙋѧ̀ є҆сте́ственныѧ бл҃гости, дш҃е бж҃їй ст҃ы́й, ᲂу҆́мъ мо́й ᲂу҆мерщвле́нный ѡ҆животвори́въ, твои́мъ дѣ́йствомъ возста́ви пѣ́ти твоѐ бж҃ество̀.

И҆ ны́нѣ: бг҃оро́диченъ:

Хра́мъ дв҃о бы́вши бж҃їй, наше́ствїемъ дх҃а, <<сн҃з: 513>> содѣ́тельною си́лою є҆гѡ̀, си́лꙋ да́рꙋюща рожде́ственнꙋ бл҃года́тнаѧ, є҆́юже родила̀ є҆сѝ пло́тїю сло́во безнача́льное.

Пѣ́снь г҃.

І҆рмо́съ: пре́жде вѣ́къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ, хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ гдⷭ҇и.

И҆мѣ́ѧ по є҆стествꙋ̀, хотѣ́нїѧ си́лꙋ сте́чнꙋ, нбⷭ҇ныѧ премі́рныѧ, ꙗ҆́кѡ бг҃ъ содѣ́тельствꙋѧ, дх҃ъ ст҃ы́й непреста́ннѡ ᲂу҆́читъ вопи́ти: ст҃ъ є҆сѝ гдⷭ҇и.

Пѣ́сньми немо́лчными, ѡ҆блиста́вшꙋю бл҃года́ть дх҃а бг҃оглаго́ливыхъ а҆пⷭ҇тѡлъ, въ дыха́нїи бꙋ́рнѣ, согла́снѡ сла́вимъ, со безпло́тными вопїю́ще ли́ки: ст҃ъ є҆сѝ гдⷭ҇и.

Сла́ва: Є҆ди́нꙋ вла́сть, и҆ бж҃ество̀ є҆ди́но, и҆ си́лꙋ, є҆ди́но нача́ло и҆ црⷭ҇тво ст҃ы́ѧ трⷪ҇цы, мꙋ́дрствꙋюще пое́мъ, въ трист҃о́мъ гла́сѣ вопїю́ще: ст҃ъ є҆сѝ гдⷭ҇и.

И҆ ны́нѣ: бг҃оро́диченъ:

Колесни́це свѣтоно́снаѧ, и҆ свѣ́тлое пребыва́лище всечи́стаѧ, херꙋві̑мъ вы́шши сꙋ́щи, бг҃а бо на рꙋкꙋ̀ носи́вшаѧ. тѣ́мже тѝ всѝ вопїе́мъ чи́стаѧ: ра́дꙋйсѧ всебл҃же́ннаѧ.

Пѣ́снь д҃.

І҆рмо́съ: Же́злъ и҆з̾ ко́рене і҆ессе́ова, и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ, и҆з̾ горы̀ хва́льный, прїѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ невеще́ственный и҆ бж҃е, сла́ва си́лѣ твое́й гдⷭ҇и.

Вели̑каѧ да́рꙋѧй на́мъ дх҃ъ всест҃ы́й, на а҆пⷭ҇лы на́йде ꙗ҆́кѡ бж҃е́ственъ, ꙗ҆́кѡ бл҃гъ, ꙗ҆́кѡ и҆сполнѧ́ѧ всѧ́чєскаѧ, <<сн҃з: 513>> ꙗ҆́кѡ бг҃отворѧ̀, ꙗ҆́кѡ ѡ҆сщ҃а́ѧ, ꙗ҆́кѡ всѣ́хъ твори́теленъ, влⷣческїй, и҆ самовла́стенъ.

На престо́лѣ хрⷭ҇тѐ ѻ҆ч҃ескомъ сѣ́дъ, низпосла́лъ є҆сѝ ᲂу҆ченикѡ́мъ твои́мъ ᲂу҆тѣ́шителѧ, ꙗ҆́коже ѡ҆бѣща́лсѧ є҆сѝ сп҃се, ꙗ҆́кѡ бг҃а грѧдꙋ́ща: посыла́ѧ же несопроти́вна, ꙗ҆́кѡ всѣ́хъ содѣ́телѧ, и҆з̾ ѻ҆ц҃а̀ и҆сходѧ́ща.

Сла́ва: Глаго́лати ѧ҆зы́ки прⷪ҇рѡ́къ бꙋ̑дꙋщаѧ наꙋчѝ дх҃ъ дре́вле всест҃ы́й: ѧ҆зы́ки же премꙋ́дрыхъ а҆пⷭ҇лъ вѣща́етъ вели̑чїѧ бж҃їѧ во гла́сѣ дыха́нїѧ бꙋ́рнѣйша, ны́нѣ сꙋще́ственнѣ спребыва́ѧй.

И҆ ны́нѣ: бг҃оро́диченъ:

Врата̀ ᲂу҆́мнагѡ свѣ́та и҆менꙋ́емъ тебѐ бг҃ома́ти, и҆́миже вни́де къ на́мъ хрⷭ҇то́съ, красе́нъ ꙗ҆ви́сѧ блиста́ньми бж҃ества̀, въ пло́тстѣмъ ѡ҆дѣѧ́нїи покрове́нъ, неви́димь ꙗ҆́кѡ бг҃ъ: ны́нѣ же по на́мъ ви́димь.

Пѣ́снь є҃.

І҆рмо́съ: Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща посла́лъ є҆сѝ на́мъ. тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀ человѣколю́бче.

Ѽ дш҃е премꙋ́дрости и҆ стра́ха бж҃їѧ, и҆́стины, совѣ́та и҆ ра́зꙋма, ми́ръ подава́ѧй, всели́сѧ въ ны̀, ꙗ҆́кѡ да ѡ҆свѧти́вшесѧ твои́мъ вселе́нїемъ, и҆з̾ но́щи ᲂу҆́тренююще, славосло́вимъ тѧ̀ чл҃вѣколю́бче.

И҆́же всѧ̑ содержа́й, и҆ всѣ́хъ сы́й гдⷭ҇ь, и҆́же тва́рь соблюда́ѧй непа́даемꙋ, пода́ждь свѧтьбꙋ̀ на́мъ и҆ просвѣще́нїе, ꙗ҆́кѡ да насы́тившесѧ твоегѡ̀ свѣтода́тельства, и҆з̾ но́щи ᲂу҆́тренююще, славосло́вимъ тѧ̀ человѣколю́бче. <<сн҃и: 515>>

Сла́ва:

И҆́же дре́вле зако́нъ начерта́вый мѡѷсе́ю, но́вагѡ завѣ́та велѣ̑нїѧ, и҆ зако́нъ блгⷣти и҆злага́етъ ꙗ҆́снѡ, во а҆пⷭ҇льскихъ сердца́хъ написа́въ, бж҃е́ственный ᲂу҆тѣ́шитель наше́дъ, ꙗ҆́кѡ человѣколю́бецъ.

И҆ ны́нѣ: бг҃оро́диченъ:

Клѧ́твꙋ є҆́ѵинꙋ всѣ́хъ мт҃ре, твои́мъ рождество́мъ дв҃о, ᲂу҆праздни́ла є҆сѝ, мі́рꙋ благослове́нїе возсїѧ́вши хрⷭ҇та̀. тѣ́мже ра́дꙋющесѧ, ᲂу҆сты̀ и҆ ра́зꙋмомъ бцⷣꙋ вои́стиннꙋ тѧ̀ и҆сповѣ́дающе блажи́мъ.

Пѣ́снь ѕ҃.

І҆рмо́съ: И҆з̾ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.

Твои̑мъ ᲂу҆ченикѡ́мъ и҆сполнѧ́ѧ ѡ҆бѣща́нїе, дх҃а хрⷭ҇тѐ си̑мъ посла́лъ є҆сѝ, дѣ́йство вели́кихъ чꙋде́съ да́рꙋюща, и҆ ѧ҆зы́ки ѻ҆гнезра̑чныѧ да́рствꙋюща, да твоегѡ̀ позна́нїѧ ꙗ҆зы̑къ стада̀ и҆спо́лнѧтъ.

Прїидѝ къ на́мъ дш҃е ст҃ы́й, прича́стники твоеѧ̀ содѣва́ѧ свѧ́тости, и҆ свѣ́та невече́рнѧгѡ, и҆ бж҃е́ственныѧ жи́зни, и҆ благоꙋха́ннѣйшагѡ раздаѧ́нїѧ: ты́ бо рѣка̀ бж҃ества̀, и҆з̾ ѻ҆ц҃а̀ сн҃омъ происходѧ́щїй.

Сла́ва:

Спасѝ ᲂу҆тѣ́шителю, вѣ́рнѡ пою́щихъ бг҃олѣ́пное прише́ствїе твоѐ, и҆ ѡ҆чи́сти ѿ всѧ́кїѧ скве́рны, ꙗ҆́кѡ бл҃гоꙋтро́бенъ, и҆ покажѝ досто́йны твоегѡ̀ ѡ҆сїѧ́нїѧ, и҆ свѣ́томъ твои́мъ бг҃ови́днѣйшимъ сотворѝ ѧ҆̀ нескве́рнєнна зерца̑ла. <<сн҃и ѡ҆б.: 516>>

И҆ ны́нѣ: бг҃оро́диченъ:

Ве́сь ли́къ проро́ческїй ѿ бг҃а тайнонаꙋчи́мь, предглаго́ла та́инство неизрече́ннагѡ и҆ бж҃е́ственнагѡ воплоще́нїѧ бг҃а сло́ва, и҆з̾ тебѐ дв҃о мт҃и: ты́ бо и҆́стиннѣйшїй и҆ дре́внїй совѣ́тъ ꙗ҆ви́ла є҆сѝ.

Сѣда́ленъ, гла́съ и҃. Подо́бенъ: Премꙋ́дрости сло́ва:

Всест҃ы́й дх҃ъ ны́нѣ соше́дъ на а҆пⷭ҇лы, ви́домъ ѻ҆́гненнымъ, ᲂу҆́жасомъ и҆спо́лни ꙗ҆зы́кѡвъ собра̑нїѧ: ѧ҆зы́ки бо глаго́лющихъ ѻ҆́гненными чл҃вѣколю́бче, свою̀ кі́йждо бесѣ́дꙋ слы́шаше. тѣ́мже и҆ чꙋ́до невѣ̑рнымъ, ꙗ҆́кѡ пїѧ́нство, вѣ̑рнымъ же спаси́тельное вои́стиннꙋ познава́шесѧ. сегѡ̀ ра́ди сла́вимъ держа́вꙋ твою̀ хрⷭ҇тѐ бж҃е, прегрѣше́нїй ѡ҆ставле́нїѧ просѧ́ще низпосла́ти бога́тнѡ рабѡ́мъ твои́мъ.

Пѣ́снь з҃.

І҆рмо́съ: Ѻ҆́троцы бл҃гоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще поѧ́хꙋ: ѻ҆тцє́въ бж҃е бл҃гослове́нъ є҆сѝ.

Ны́нѣ ѡ҆бѣтова́нїѧ предложе́нїе хрⷭ҇то́ва и҆сполнѧ́етсѧ: раздѣлє́нїѧ бо ѧ҆зы́кѡвъ дх҃а прише́ствїе показа̀ ᲂу҆ченикѡ́мъ, ѡ҆блиста́вшее ѿ трⷪ҇цы є҆ди́наго пребжⷭ҇твеннаго.

Дре́вле ᲂу҆́бѡ раздѣли́сѧ согла́сїе ꙗ҆зы́кѡвъ безслове́сное: ны́нѣ же ко є҆ди́номꙋ сли́чествꙋ ꙗ҆́вѣ собра́шасѧ, самодѣ́йствꙋющꙋ честно́мꙋ и҆ бж҃е́ственномꙋ дх҃ꙋ, ѿ трⷪ҇цы пребж҃е́ственныѧ є҆ди́номꙋ.

Сла́ва:

Свы́ше носи́мꙋ дохнове́нїю ст҃а́гѡ дх҃а, вели̑чїѧ бж҃їѧ <<сн҃ѳ: 517>> пресла́внѡ вѣща́хꙋ а҆пⷭ҇ли хрⷭ҇то́вы, согла́снѡ пою́ще: ѻ҆тцє́въ бж҃е бл҃гослове́нъ є҆сѝ.

И҆ ны́нѣ: бг҃оро́диченъ:

Ѻ҆́бразъ твоегѡ̀ ржⷭ҇тва̀ трїѐ ѻ҆́троцы въ пещѝ показа́ша: ꙗ҆́кѡ бо пребы́ша ѻ҆гне́мъ невреди́ми, сохрани́ласѧ є҆сѝ чиста̀, прїе́мши во чре́вѣ ѻ҆́гнь нестерпи́мый, ѻ҆ц҃є́въ бг҃а бл҃гослове́ннагѡ.

Пѣ́снь и҃.

І҆рмо́съ: Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀ ꙗ҆̀же прїѧ́тъ пали́тъ ю҆́ныѧ, ꙗ҆́кѡ нижѐ ѻ҆́гнь бж҃ества̀ дв҃ы, въ ню́же вни́де ᲂу҆тро́бꙋ. тѣ́мъ воспѣва́юще воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̀ вѣ́ки.

Ст҃ы́й дш҃е происходѧ́й ѿ бг҃а, свѧ́тость всѣ̑мъ пода́ждь въ тѧ̀ вѣ́рꙋющымъ: ст҃ъ бо, и҆ пода́теленъ человѣ́кѡмъ свѧ́тости, ты̀ є҆сѝ. тѣ́мъ воспѣва́юще воспое́мъ: да бл҃гослови́тъ тва́рь всѧ́каѧ гдⷭ҇а, и҆ превозно́ситъ во всѧ̀ вѣ́ки.

Дае́ши пода́тельнѣ ꙗ҆́кѡ благодѣ́тель да́ръ бла́гости, тебѐ пою́щымъ ᲂу҆тѣ́шителю: бл҃ги́хъ бо пода́теленъ є҆сѝ, и҆ бл҃гости пꙋчи́на. тѣ́мъ воспѣва́юще воспое́мъ: да бл҃гослови́тъ тва́рь всѧ́каѧ гдⷭ҇а, и҆ превозно́ситъ во всѧ̀ вѣ́ки.

Сла́ва:

Гдⷭ҇ь животворѧ́щь є҆́сть дх҃ъ, самодви́жимь, самовла́стенъ, раздѣлѧ́ѧ ꙗ҆́коже хо́щетъ дарѡ́въ раздаѧ̑нїѧ, самовлⷣченъ, самоповели́теленъ, безнача́ленъ. тѣ́мъ воспѣва́юще воспои́мъ: да благослови́тъ тва́рь всѧ́каѧ гдⷭ҇а, и҆ превозно́ситъ во всѧ̀ вѣ́ки. <<сн҃ѳ ѡ҆б.: 518>>

И҆ ны́нѣ: бг҃оро́диченъ:

Кто̀ твоемꙋ̀ премно́жествꙋ бл҃гоꙋтро́бїѧ не диви́тсѧ, безнача́льне сло́ве; на́съ бо ра́ди ѡ҆бнища́лъ є҆сѝ бога́тъ сы́й, и҆ во чре́вѣ дв҃ы ст҃ы́ѧ всели́лсѧ є҆сѝ. тѣ́мъ воспѣва́юще воспои́мъ: да благослови́тъ тва́рь всѧ́каѧ гдⷭ҇а, и҆ превозно́ситъ во всѧ̀ вѣ́ки.

Пѣ́снь ѳ҃.

І҆рмо́съ: Ра́дꙋйсѧ дѣ́вственнаѧ похвало̀, ра́дꙋйсѧ мт҃и пречⷭ҇таѧ, ю҆́же всѧ̀ тва́рь бж҃е́ственными пѣ́сньми велича́емъ.

Сѐ къ на́мъ ᲂу҆тѣ́шителѧ и҆но́го низпосла́лъ є҆сѝ, є҆диносꙋ́щна тебѣ̀ сло́ве, и҆ ѻ҆ц҃ꙋ̀ твоемꙋ̀ сопресто́льна.

Спасѝ ѿ и҆скꙋше́нїѧ ᲂу҆тѣ́шителю, бг҃а мꙋ́дрствꙋющыѧ тѧ̀, и҆ славосло́вѧщыѧ твоѐ превѣ́чное бытїѐ.

Сла́ва:

Прїидѝ къ на́мъ ᲂу҆тѣ́шителю, твоегѡ̀ ᲂу҆тѣше́нїѧ и҆сполнѧ́ѧй, сла́вою твое́ю неизрече́нною бг҃осло́вѧщыѧ.

И҆ ны́нѣ: бг҃оро́диченъ:

Невѣ́сто бж҃їѧ всенепоро́чнаѧ, славосло́вѧщыѧ тѧ̀ и҆ чтꙋ́щыѧ досто́йнѡ, и҆зба́ви ѡ҆ и҆скꙋше́нїй моли́твами твои́ми.

Вмѣ́стѡ Досто́йно: пое́мъ і҆рмо́съ то́йже. По трист҃о́мъ конда́къ пра́здника. <<с҃ѯ: 519>>

Въ понедѣ́льникъ ст҃а́гѡ дх҃а,

На полꙋно́щницѣ.

По а҃-мъ трист҃о́мъ глаго́лемъ тропа́рь пра́здника. По в҃-мъ трист҃о́мъ глаго́лемъ конда́къ пра́здника. Гдⷭ҇и поми́лꙋй. в҃і. И҆ ѿпꙋ́стъ. Моли́твы же за ᲂу҆поко́й не глаго́лемъ.

На ᲂу҆́трени,

на Бг҃ъ гдⷭ҇ь: тропа́рь пра́здника три́жды.

По а҃-мъ стїхосло́вїи, сѣда́ленъ, гла́съ д҃.

Подо́бенъ: Оу҆диви́сѧ і҆ѡ́сифъ:

Попра́зднственный вѣ́рнїи, и҆ коне́чный пра́здникъ, пра́зднꙋимъ свѣ́тлѡ, се́й є҆́сть пѧтдесѧ́тница, ѡ҆бѣща́нїѧ и҆сполне́нїе и҆ предложе́нїѧ: въ се́й бо ѻ҆́гнь ᲂу҆тѣ́шителевъ сни́де на зе́млю, ꙗ҆́кѡ въ ви́дѣ ѧ҆зы̑къ, и҆ ᲂу҆ченикѝ просвѣтѝ, и҆ сїѧ̑ неботаи́нники показа̀. свѣ́тъ прїи́де ᲂу҆тѣ́шителѧ, и҆ мі́ръ просвѣтѝ. [Два́жды.]

По в҃-й каѳі́смѣ сѣда́ленъ, гла́съ и҆ подо́бенъ то́йже:

Дх҃а и҆сто́чникъ прише́дъ на зе́млю, во ѻ҆́гнєнныѧ рѣ́ки раздѣлѧ́ѧсѧ мы́сленнѡ, а҆пⷭ҇лы ѡ҆роша́ше просвѣща́ѧ: и҆ бы́сть и҆̀мъ ѻ҆́блакъ ѡ҆роша́ѧй ѻ҆́гнь, просвѣща́ѧй тѣ́хъ и҆ ѡ҆дождѧ́ѧй пла́мень, и҆́миже мы̀ прїѧ́хомъ бл҃года́ть, ѻ҆гне́мъ же и҆ водо́ю. свѣ́тъ прїи́де ᲂу҆тѣ́шителѧ, и҆ мі́ръ просвѣтѝ. [Два́жды.]

Та́же ѻ҆́ба канѡ́на пра́здника: з҃-гѡ гла́са, со і҆рмосо́мъ на и҃: и҆ д҃-гѡ гла́са, со і҆рмосо́мъ на ѕ҃. Катава́сїа: Бж҃е́ственнымъ покрове́нъ:ѻ҆́ба ли́ка вкꙋ́пѣ. <<с҃ѯ ѡ҆б.: 520>>

По г҃-й пѣ́сни, сѣда́ленъ, гла́съ и҃. Подо́бенъ: Премꙋ́дрости сло́ва:

Всест҃ы́й дх҃ъ, ны́нѣ соше́дъ на а҆пⷭ҇лы ви́домъ ѻ҆́гненнымъ, ᲂу҆́жасомъ и҆спо́лни ꙗ҆зы́кѡвъ собра̑нїѧ: ѧ҆зы́ки бо глаго́лющихъ ѻ҆́гненными чл҃вѣколю́бче, свою̀ кі́йждо бесѣ́дꙋ слы́шаше. тѣ́мже и҆ чꙋ́до невѣ̑рнымъ, ꙗ҆́кѡ пїѧ́нство, вѣ̑рнымъ же спаси́тельное вои́стиннꙋ познава́шесѧ. сегѡ̀ ра́ди сла́вимъ держа́вꙋ твою̀ хрⷭ҇тѐ бж҃е, прегрѣше́нїй ѡ҆ставле́нїѧ просѧ́ще, низпосла́ти бога́тнѡ рабѡ́мъ твои́мъ. [Два́жды.]

По ѕ҃-й пѣ́сни, конда́къ и҆ і҆́косъ, пра́здника.

Сѷнаѯа́рїй въ пнⷣльникъ по пѧтдесѧ́тницѣ, сі́есть, ст҃а́гѡ дх҃а.

Стїхѝ: Всѧ́кое дыха́нїе просла́ви дх҃а гдⷭ҇нѧ:

И҆́мже лꙋка́выхъ дꙋхѡ́въ всꙋ́е де́рзости.

Въ сі́й де́нь, въ понедѣ́льникъ пѧтдесѧ́тницы, того̀ всест҃а́го и҆ животворѧ́щаго, и҆ всеси́льнаго дх҃а пра́зднꙋемъ, є҆ди́наго ѿ трⷪ҇цы бг҃а, є҆диноче́стна и҆ є҆диносꙋ́щна и҆ є҆диносла́вна ѻ҆ц҃ꙋ̀ и҆ сн҃ꙋ. Въ сі́й ᲂу҆́бѡ де́нь пѧтдесѧ́тницы ст҃ы́мъ а҆пⷭ҇лѡмъ сꙋ́щественнѣ на́йде, въ ви́дѣ ѻ҆́гненныхъ ѧ҆зы́кѡвъ, сѣ́дъ на є҆ди́наго коего́ждо и҆́хъ въ го́рницѣ, въ не́йже бѧ́хꙋ пребыва́юще. Че́сти же ра́ди ко всест҃о́мꙋ дх҃ꙋ, и҆ раздѣ́льнѣ, и҆ въ се́й пѧтдесѧ́тницѣ ᲂу҆зако́ниша пра́здновати є҆мꙋ̀, и҆̀же всѧ̑ до́брѣ разчини́вше бж҃е́ственнїи ѻ҆ц҃ы̀. Ѡ҆бѣща́вый бо сп҃съ, пре́жде стра́сти, ᲂу҆тѣ́шителѧ прише́ствїе, ре́къ[[І҆ѡа́н. Заⷱ҇ н҃в]]: поле́зно є҆́сть, да а҆́зъ и҆дꙋ̀, а҆́ще бо а҆́зъ не и҆дꙋ̀, ᲂу҆тѣ́шитель не прїи́детъ. И҆ па́ки: є҆гда́ же прїи́детъ ѻ҆́ный, наꙋчи́тъ ва́съ, и҆ наста́витъ ва́съ на всѧ́кꙋю и҆́стинꙋ. И҆ па́ки: ᲂу҆молю̀ ѻ҆ц҃а̀, и҆ и҆но́го ᲂу҆тѣ́шителѧ по́слетъ ва́мъ, дх҃а и҆́стины, и҆́же ѿ ѻ҆ц҃а̀ и҆схо́дитъ. И҆ по стра́сти же, є҆гда̀ и҆ на нб҃о восходѧ̀, речѐ: вы́ же пребꙋ́дите во і҆ерꙋсали́мѣ, до́ндеже ѡ҆блече́тесѧ си́лою съ высоты̀: посыла́етъ є҆го̀: пребыва́ющымъ бо и҆̀мъ внегда̀ и҆спо́лнитисѧ дню̀ пѧтдесѧ́тницы, <<сѯ҃а: 521>> ѡ҆б̾ часѣ̀ тре́тїемъ днѐ на го́рницѣ, внеза́пꙋ гро́мъ съ небесѐ бы́сть, ꙗ҆́кѡ и҆ мно́жествꙋ вселе́нныѧ претещѝ: и҆ въ ви́дѣ ѻ҆́гненныхъ ѧ҆зы̑къ ꙗ҆ви́сѧ дх҃ъ ст҃ы́й, є҆ди́номꙋ и҆́хъ коемꙋ́ждо, не то́кмѡ двана́десѧтимъ, но и҆ седми́десѧтимъ. И҆ глаго́лахꙋ стра́нными ѧ҆зы́ки, си́рѣчь, є҆ди́нъ кі́йждо ѿ а҆по́столѡвъ, всѣ́ми ѧ҆зы́ки ꙗ҆зы́кѡвъ глаго́лаше. Не ᲂу҆́бѡ свои́мъ ѧ҆зы́комъ а҆пⷭ҇лꙋ глаго́лющꙋ, и҆ноплеме́нникъ слы́шаше, но коегѡ́ждо ꙗ҆зы́ка ѧ҆зы́къ а҆пⷭ҇лъ слы́шаше и҆ глаго́лаше: ѿѻнꙋ́дꙋже и҆ собра́вшымсѧ наро́дѡмъ, пїѧ́нствовати возмнѣ́шасѧ. Не вѣ́дый бо кі́йждо, ка́кѡ а҆пⷭ҇лъ ѻ҆со́бнѡ всѣ́ми ѧ҆зы́ки глаго́лаше, пїѧ́нствовати томꙋ̀ непщева́хꙋ. И҆ні́и же дивлѧ́хꙋсѧ глаго́люще: что̀ ᲂу҆́бѡ хо́щетъ сїѐ бы́ти; бѧ́хꙋ же сі́и ѿ всеѧ̀ землѝ со́брани пра́здника ра́ди: па́рѳѧне, ми́дѧне и҆ є҆лами́те, пре́жде ма́ла ѿ а҆нтїѡ́ха плѣне́ни бы́вшїи. По вознесе́нїи ᲂу҆́бѡ десѧти́мъ днє́мъ минꙋ́вшимъ, прихо́дитъ дх҃ъ ст҃ы́й, и҆ не а҆́бїе вознести́сѧ хрⷭ҇тꙋ̀, да па́че теплѣ́йшыѧ сотвори́тъ ᲂу҆ченикѝ ѡ҆жида́ющыѧ є҆гѡ̀. Глаго́лютъ же нѣ́цыи: ꙗ҆́кѡ на кі́йждо ѿ дне́й, є҆ди́нъ кі́йждо а҆́гг҃льскихъ чинѡ́въ, приходѧ̀ ѡ҆боже́нной пло́ти ѻ҆́ной покланѧ́шесѧ. Девѧтѝ ᲂу҆́бѡ днє́мъ и҆спо́лншымсѧ, въ десѧ́тый де́нь ᲂу҆тѣ́шитель прїи́де, примире́нїю бы́вшꙋ сн҃омъ. По пѧти́десѧтихъ же дне́хъ ѿ па́схи, въ воспомина́нїе ве́тхагѡ зако́на. І҆и҃ль бо ѿне́лиже чермно́е мо́ре про́йде, пѧти́десѧтимъ днє́мъ мимоше́дшымъ, десѧтосло́вїе прїѧ́тъ. Зри́ же и҆ зна́мєнїѧ: та́мѡ гора̀, здѣ̀ го́рница: та́мѡ ѻ҆́гнь, здѣ̀ ѧ҆зы́цы ѻ҆́гненнїи. вмѣ́стѡ же громѡ́въ и҆ мра́ка, дыха́нїе ѕѣ́льное здѣ̀. Въ ви́дѣ ᲂу҆́бѡ ѧ҆зы́кѡвъ сни́де дх҃ъ ст҃ы́й, ꙗ҆́кѡ сво́йственно и҆мѣ́ти къ живо́мꙋ сло́вꙋ ꙗ҆влѧ́етъ: и҆лѝ и҆ ꙗ҆́кѡ а҆пⷭ҇ли наꙋчи́ти и҆ приводи́ти ꙗ҆зы́ки, ѧ҆зы́комъ и҆мѧ́хꙋ. Ѻ҆́гненныхъ же, занѐ бг҃ъ ѻ҆́гнь поѧда́ѧй є҆́сть, и҆ ѡ҆чище́нїѧ ра́ди: Раздѣлѧ́емыхъ же, дарова́нїѧ ра́ди. И҆ ꙗ҆́коже и҆ногда̀ є҆ди́нъ ѧ҆зы́къ вѣ́дꙋщихъ, на мнѡ́гїѧ раздѣлѝ, и҆ размѣсѝ: та́кѡ и҆ ны́нѣ, вѣ́дꙋщихъ є҆ди́нъ ѧ҆зы́къ на мнѡ́гїѧ раздѣлѝ, да собере́тъ ѿ ѻ҆́нѣхъ ꙗ҆зы́кѡвъ по конца́мъ вселе́нныѧ разсѣ̑ѧнныѧ. Въ пра́здникъ же быва́етъ, да множа́йшымъ собра́вшымсѧ, повсю́дꙋ ве́щь возгласи́тсѧ, и҆ да и҆̀же въ па́схѣ прилꙋчи́вшїисѧ, и҆ ꙗ҆̀же ѡ҆ <<сѯ҃а ѡ҆б.: 522>> хрⷭ҇тѣ̀ бы̑вшаѧ ви́дѣвше, чꙋди́тисѧ и҆́мꙋтъ. Въ пѧтдесѧ́тницѣ же, занѐ подоба́ше въ не́же вре́мѧ дре́вле зако́нъ да́нъ бы́сть, по немꙋ́же и҆ дх҃а бл҃года́ти и҆злїѧ́тисѧ, ꙗ҆́коже и҆ хрⷭ҇то́съ сотворѝ въ зако́нной па́схѣ, свою̀ па́схꙋ соверши́въ, и҆́стиннꙋю па́схꙋ. Не на ᲂу҆ста́ же сѣ́де дх҃ъ ст҃ы́й, но на глава́хъ а҆по́столѡвъ, влⷣчественное ѡ҆б̾има́ѧ, и҆ бо́льшее тѣлесѐ, и҆ са́мый ᲂу҆́мъ, ѿ негѡ́же и҆ ѧ҆зы́къ є҆́же глаго́лати и҆́мать. И҆лѝ ꙗ҆́кѡ ѻ҆́бразъ нѣ́кїй гла́съ ѧ҆зы́комъ дх҃ъ и҆спꙋща́етъ, ꙗ҆́кѡ рꙋкополага́ти а҆по́столы чрез̾ главы̑, всеѧ̀ поднебе́сныѧ ᲂу҆чи́тели: рꙋкоположе́нїе бо на версѣ̀ гла́въ быва́етъ. Гла́съ же и҆ ѻ҆́гнь, зане́же и҆ въ сїна́и сїѧ̑ бы́ша: ꙗ҆́кѡ да ꙗ҆ви́тсѧ то́йжде дх҃ъ, и҆ тогда̀ и҆ ны́нѣ законополага́ѧй, и҆ всѧ̑ разчинѧ́ѧй. Смѧте́сѧ же мно́жество шꙋ́момъ дыха́нїѧ, поне́же мнѧ́хꙋ концꙋ̀ бы́ти, є҆ли̑ка і҆ꙋде́ѡмъ хрⷭ҇то́съ ѡ҆ разрꙋше́нїи и҆́хъ провозвѣстѝ. ꙗ҆́коже ѻ҆́гненны, речѐ: да никто́же тѣле́сно что̀ ѡ҆ дс҃ѣ ст҃о́мъ смы́слитъ. пїѧ́нствомъ ᲂу҆́бѡ ѡ҆сꙋжда́ютсѧ а҆по́столи: но пе́тръ ста́въ и҆ провѣща́въ посредѣ̀ наро́да, сїѐ ѡ҆бличѝ, не и҆́стиною держи́мое, і҆ѡ́илево проро́чество въ словесѝ приве́дъ, и҆ покорѝ ѿ ни́хъ ꙗ҆́кѡ трѝ ты́сѧщи. Оу҆тѣ́шитель же дх҃ъ ст҃ы́й глаго́летсѧ, ꙗ҆́кѡ ᲂу҆тѣша́ти и҆ поко́ити на́съ могі́й: вмѣ́стѡ бо хрⷭ҇та̀ сего̀ прїѧ́хомъ, и҆ ѻ҆́наго тѣ́мъ и҆мѣ́юще, ꙗ҆́кѡ и҆ хода́тайствꙋетъ ѡ҆ на́съ гла́сы неизглаго́ланными къ бг҃ꙋ, ꙗ҆́кѡ человѣколю́бецъ на́шъ предстоѧ́й ꙗ҆́коже и҆ хрⷭ҇то́съ: ᲂу҆тѣ́шитель бо и҆ ѻ҆́нъ. Сегѡ̀ ра́ди и҆ и҆ны́й ᲂу҆тѣ́шитель дх҃ъ ст҃ы́й глаго́летсѧ. Глаго́летъ бо а҆пⷭ҇лъ: и҆́мамы ᲂу҆тѣ́шителѧ і҆и҃са къ бг҃ꙋ. И҆ны́й же рече́сѧ, за є҆диносꙋ́щное: є҆́же бо рещѝ, и҆ны́й и҆ и҆ны́й, ѡ҆ тождесꙋ́щественныхъ, и҆ кꙋпноесте́ственныхъ. А҆ є҆́же и҆́но и҆ и҆́но, ѡ҆ разли́чныхъ вѣ́мы є҆стества́хъ. Се́й ст҃ы́й дх҃ъ є҆ди́нъ є҆́сть и҆ ѻ҆ц҃ꙋ̀ и҆ сн҃ꙋ во всѣ́хъ: тѣ́мже и҆ содѣ́ловаетъ кꙋ́пнѡ съ ни́ма всѐ, и҆ то́е са́мое и҆мꙋ́щее бы́ти воскресе́нїе. И҆ є҆ли̑ка хо́щетъ, твори́тъ: ѡ҆свѧща́етъ, раздѣлѧ́етъ, новотвори́тъ, спосыла́етъ, ᲂу҆мꙋдрѧ́етъ, помазꙋ́етъ проро́ки: про́стѡ рещѝ, во все́мъ самовла́стный є҆́сть, всеси́льный, бл҃гі́й, пра́вый, влады́чествꙋѧй. Тѣ́мъ всѧ̀ премꙋ́дрость, живо́тъ, движе́нїе, всѧ́кѡ прича́стный ст҃ы́ни, и҆ всѧ́комꙋ животꙋ̀. Про́стѡ, всѧ̑ и҆́мать, є҆ли̑ка ѻ҆ц҃ъ и҆ <<сѯ҃в: 523>> сн҃ъ, кромѣ̀ нерожде́нїѧ и҆ рожде́нїѧ, ѿ ѻ҆ц҃а̀ є҆ди́нагѡ и҆сходѧ́й. И҆злїѧ́вшꙋсѧ ᲂу҆́бѡ на всѧ́кꙋю пло́ть дх҃ꙋ ст҃о́мꙋ, мі́ръ всѧ́кими дарова́ньми и҆спо́лнисѧ: и҆ тѣ́мъ всѝ ꙗ҆зы́цы къ бг҃овѣ́дѣнїю рꙋково́дствовашасѧ, и҆ всѧ́кїй недꙋ́гъ, и҆ всѧ́каѧ ꙗ҆́зѧ прогна́на бы́сть. Трегꙋ́бѡ же ѿ хрⷭ҇та̀ ᲂу҆ченикѡ́мъ да́нъ бы́сть дх҃ъ ст҃ы́й. Пре́жде стра́сти не ꙗ҆́вѣ ѕѣлѡ̀. По воскресе́нїи дꙋнове́нїемъ ꙗ҆́вственнѣе. Ны́нѣ же низпосла̀ сего̀ сꙋ́щественнѡ: па́че же са́мъ сни́де соверше́нный, просвѣща́ѧй и҆ ѡ҆свѧща́ѧй и҆̀хъ, и҆ тѣ́мъ па́ки концы̀ вселе́нныѧ приводѧ́й, прише́ствїемъ ст҃а́гѡ дх҃а. моли́твами ст҃ы́хъ а҆пⷭ҇лъ, хрⷭ҇тѐ бж҃е на́шъ поми́лꙋй на́съ.

Честнѣ́йшꙋю: не пое́мъ:

По ѳ҃-й пѣ́сни є҆ѯапостїла́рїй пра́здника два́жды: дрꙋгі́й є҆ди́ножды.

На хвали́техъ: Всѧ́кое дыха́нїе: поста́вимъ стїхѝ д҃. И҆ пое́мъ стїхи̑ры самогла́сны, гла́съ в҃:

Во проро́цѣхъ возвѣсти́лъ є҆сѝ на́мъ пꙋ́ть спасе́нїѧ, и҆ во а҆пⷭ҇лѣхъ возсїѧ̀ сп҃се на́шъ блгⷣть дх҃а твоегѡ̀. ты́ є҆си бг҃ъ пе́рвый, ты̀ и҆ по си́хъ, и҆ во вѣ́ки ты́ є҆си бг҃ъ на́шъ.

Во дво́рѣхъ твои́хъ воспою́ тѧ сп҃са мі́ра, и҆ прекло́нь кѡлѣ́на поклоню́сѧ твое́й непобѣди́мѣй си́лѣ, ве́черъ, и҆ ᲂу҆́трѡ, и҆ полꙋ́дне, и҆ на всѧ́кое вре́мѧ блгⷭ҇влю́ тѧ гдⷭ҇и.

Во дво́рѣхъ твои́хъ гдⷭ҇и, вѣ́рнїи кѡлѣ́на дꙋ́шъ и҆ тѣле́съ прекло́нше, воспѣва́емъ тѧ̀ безнача́льнаго ѻ҆ц҃а̀, и҆ собезнача́льнаго сн҃а, и҆ соприсносꙋ́щнаго и҆ прест҃а́го дх҃а, просвѣща́ющаго и҆ ѡ҆свѧща́ющаго дꙋ́ши на́шѧ.

Сла́ва, и҆ ны́нѣ: гла́съ и҃:

Ꙗ҆зы́цы и҆ногда̀ размѣси́шасѧ де́рзости ра́ди столпотворе́нїѧ: ꙗ҆зы́цы же ны́нѣ ᲂу҆мꙋдри́шасѧ сла́вы ра́ди бг҃овѣ́дѣнїѧ. та́мѡ ѡ҆сꙋдѝ нечести̑выѧ погрѣше́нїемъ: здѣ̀ просвѣти́лъ є҆́сть хрⷭ҇то́съ ры́бари дх҃омъ. тогда̀ <<сѯ҃в ѡ҆б.: 524>> ᲂу҆праздни́сѧ безгла́сїе къ мꙋче́нїю: ны́нѣ ѡ҆бновлѧ́етсѧ согла́сїе ко спасе́нїю дꙋ́шъ на́шихъ.

Славосло́вїе вели́кое. Тропа́рь пра́здника, є҆ктєнїѝ. И҆ ѿпꙋ́стъ глаго́лемъ пра́здника: И҆́же въ ви́дѣ ѻ҆́гненныхъ ѧ҆зы̑къ: и҆ ча́съ а҃-й.

На лїтꙋргі́и и҆з̾ѡбрази́тєльнаѧ. И҆ ѿ канѡ́на пра́здника, пѣ́снь г҃-ѧ и҆ ѕ҃-ѧ. Та́же і҆ере́й, и҆лѝ дїа́конъ: Премꙋ́дрость, про́сти. И҆ вхо́дное: Вознеси́сѧ гдⷭ҇и си́лою твое́ю, воспое́мъ и҆ пое́мъ си̑лы твоѧ̀. Тропа́рь, гла́съ и҃: Благослове́нъ є҆сѝ хрⷭ҇тѐ бж҃е на́шъ: Сла́ва, и҆ ны́нѣ, конда́къ, гла́съ, и҃. Є҆гда̀ снизше́дъ: Трист҃о́е. Прокі́менъ а҆по́стола, гла́съ ѕ҃: Спасѝ гдⷭ҇и лю́ди твоѧ̀, и҆ благословѝ достоѧ́нїе твоѐ. Сті́хъ: Къ тебѣ̀ гдⷭ҇и воззовꙋ̀, бж҃е мо́й, да не премолчи́ши ѿ менѐ. А҆пⷭ҇лъ ко є҆фесе́ємъ, зача́ло ск҃ѳ: Ꙗ҆́кѡ ча́да свѣ́та ходи́те: А҆ллилꙋ́їа, гла́съ в҃: Поми́лꙋй мѧ̀ бж҃е, по вели́цѣй ми́лости твое́й. Сті́хъ: Не ѿве́ржи менѐ ѿ лица̀ твоегѡ̀ и҆ дх҃а твоегѡ̀ ст҃а́гѡ не ѿимѝ ѿ менѐ. Є҆ѵⷢ҇лїе ѿ матѳе́а, зача́ло ѻ҃є: Блюди́те, да не пре́зрите є҆ди́наго ѿ ма́лыхъ: Прича́стный: Дх҃ъ тво́й бл҃гі́й наста́витъ мѧ̀ на зе́млю пра́вꙋ. А҆ллилꙋ́їа. три́жды.

[зрѝ] Вѣ́домо же бꙋ́ди, ꙗ҆́кѡ седми́ца сїѧ̀ ст҃ы́ѧ пентико́стїи разрѣша́ема є҆́сть на сы́ръ, ры̑бы, вїно̀ и҆ є҆ле́й.

Ѡ҆ставлѧ́ютсѧ же и҆ междоча̑сїѧ часѡ́въ, и҆ и҆́же въ повече́рїахъ пѣва́емый канѡ́нъ прест҃ы́ѧ бцⷣы.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.