Отдание Пасхи
<<рѻ҃з ѡ҆б.: 354>>
Во вто́рникъ ве́чера
ѿда́нїе пра́здника па́схи.
По ѳ҃-мъ часѣ̀ твори́тъ сщ҃е́нникъ нача́ло съ кади́ломъ и҆ со свѣще́ю, црⷭ҇кимъ две́ремъ ѿве́рзєннымъ, и҆ пое́тъ: Хрⷭ҇то́съ воскр҃се: со стїхѝ. И҆ по стїсѣ́хъ ѱало́мъ: Блгⷭ҇вѝ дꙋшѐ моѧ̀ гдⷭ҇а: И҆ є҆ктенїа̀. Та́же каѳі́сма ѻ҆бы́чнаѧ.
На Гдⷭ҇и воззва́хъ: пое́мъ стїхи̑ры самогла́сны, слѣпа́гѡ, на ѕ҃. Гла́съ в҃:
Слѣпы́й роди́выйсѧ, въ свое́мъ по́мыслѣ глаго́лаше: є҆да̀ а҆́зъ грѣ̑хъ ра́ди роди́тельныхъ роди́хсѧ без̾ ѻ҆́чїю; <<рѻ҃и: 355>> є҆да̀ а҆́зъ за невѣ́рїе ꙗ҆зы́кѡвъ роди́хсѧ во ѡ҆бличе́нїе; не домышлѧ́юсѧ вопроша́ти: когда̀ но́щь, когда̀ де́нь; не терпи́та мѝ но́зѣ ка́меннагѡ претыка́нїѧ, не ви́дѣхъ сл҃нца сїѧ́юща, нижѐ во ѻ҆́бразѣ менѐ созда́вшагѡ. но молю́ ти сѧ хрⷭ҇тѐ бж҃е, при́зри на мѧ̀, и҆ поми́лꙋй мѧ̀.
Мимоходѧ̀ і҆и҃съ ѿ ст҃и́лища, ѡ҆брѣ́те человѣ́ка слѣ́па ѿ рожде́нїѧ, и҆ ᲂу҆милосе́рдивсѧ положѝ бре́нїе на ѻ҆́чїю є҆гѡ̀, и҆ речѐ къ немꙋ̀: и҆дѝ ᲂу҆мы́йсѧ въ сїлѡа́мѣ: и҆ ᲂу҆мы́всѧ прозрѣ̀, сла́вꙋ возсыла́ѧ бг҃ꙋ. сосѣ́ди же є҆гѡ̀ глаго́лахꙋ є҆мꙋ̀: кто̀ твоѝ зѣ̑ницы ѿве́рзе, и҆́хже никто́же зрѧ́щихъ и҆сцѣли́ти возмо́же; ѻ҆́нъ же возопи́въ, речѐ: человѣ́къ і҆и҃съ глаго́лемый, ѻ҆́нъ мѝ речѐ: ᲂу҆мы́йсѧ въ сїлѡа́мѣ, и҆ прозрѣ́хъ. то́й є҆́сть вои́стиннꙋ, є҆го́же речѐ мѡѷсе́й въ зако́нѣ, хрⷭ҇та̀ мессі́ю: то́й є҆́сть сп҃съ дꙋша́мъ на́шымъ.
Гла́съ д҃: Всѐ житїѐ слѣпы́й но́щь помышлѧ́ѧ, возопѝ тебѣ̀: гдⷭ҇и, ѿве́рзи мѝ зѣ̑ницы, сн҃е дв҃довъ сп҃се на́шъ, да со всѣ́ми и҆ а҆́зъ воспою̀ твою̀ си́лꙋ.
Гла́съ є҃: Гдⷭ҇и, мимоходѧ̀ пꙋте́мъ, ѡ҆брѣ́лъ є҆сѝ человѣ́ка слѣ́па ѿ рожде́нїѧ, и҆ ᲂу҆дивле́ни бы́вше ᲂу҆ченицы̀, вопроша́хꙋ тѧ̀ глаго́люще: ᲂу҆чи́телю, кто̀ согрѣшѝ, се́й ли, и҆лѝ роди́тели є҆гѡ̀, да слѣ́пъ роди́сѧ; ты́ же сп҃се мо́й, возопи́лъ є҆сѝ къ ни́мъ: ни се́й согрѣшѝ, ни роди́тели є҆гѡ̀, но да ꙗ҆вѧ́тсѧ дѣла̀ бж҃їѧ на не́мъ. мнѣ̀ подоба́етъ дѣ́лати дѣла̀ посла́вшагѡ мѧ̀, ꙗ҆̀же никто́же мо́жетъ дѣ́лати. и҆ сїѧ̑ ре́къ, плю́нꙋвъ до́лꙋ, бре́нїе сотво́рь, пома́залъ є҆сѝ ѻ҆́чи є҆гѡ̀, ре́къ къ немꙋ̀: и҆дѝ ᲂу҆мы́йсѧ въ сїлѡа́мстѣй кꙋпѣ́ли. ѻ҆́нъ же <<рѻ҃и ѡ҆б.: 356>> ᲂу҆мы́всѧ здра́въ бы́сть, и҆ вопїѧ́ше къ тебѣ̀: вѣ́рꙋю гдⷭ҇и, и҆ поклони́сѧ тебѣ̀. тѣ́мже вопїе́мъ и҆ мы̀: поми́лꙋй на́съ.
Гла́съ и҃: Пра́вды со́лнце мы́сленное хрⷭ҇тѐ бж҃е, и҆з̾ ᲂу҆тро́бы свѣ́та лише́ннаго, твои́мъ пречи́стымъ прикоснове́нїемъ просвѣти́вшее ѻ҆бою́дꙋ, и҆ на́ши ѻ҆́чи дꙋшє́вныѧ ѡ҆зари́вшее, сы́ны днѐ покажѝ, да вѣ́рою вопїе́мъ тѝ: мно́гое твоѐ и҆ неизрече́нное, є҆́же на на́съ благоꙋтро́бїе, человѣколю́бче сла́ва тебѣ̀.
За милосе́рдїе ми́лости воплоти́выйсѧ хрⷭ҇тѐ бж҃е, свѣ́та лише́ннаго ѿ ᲂу҆тро́бы, милосе́рдїемъ неизрече́нныхъ щедро́тъ сїѧ́нїѧ бж҃е́ственнагѡ сподо́билъ є҆сѝ сегѡ̀ зѣ́ницамъ пе́рстїю созда́тельными пе́рсты твои́ми прикоснꙋ́выйсѧ: са́мъ и҆ ны́нѣ свѣтода́телю, и҆ на́шѧ ѡ҆зарѝ дꙋшє́внаѧ чꙋ̑вства, ꙗ҆́кѡ є҆ди́нъ независтнода́тель.
Сла́ва и҆ ны́нѣ: гла́съ и҃:
Кто̀ возглаго́летъ си̑лы твоѧ̀ хрⷭ҇тѐ; и҆лѝ кто̀ и҆зочте́тъ чꙋде́съ твои́хъ мно́жєства; сꙋгꙋ́бъ бо ꙗ҆́кѡ ви́дѣнъ бы́лъ є҆сѝ на землѝ за бл҃гость, сꙋгꙋ́бы и҆ цѣльбы̑ недꙋ́гꙋющымъ подава́лъ є҆сѝ. не то́чїю бо тѣлє́сныѧ ѻ҆́чи ѿве́рзлъ є҆сѝ, и҆́же ѿ ᲂу҆тро́бы слѣпо́мꙋ, но и҆ дꙋшє́вныѧ. тѣ́мже бг҃а тѧ̀ и҆сповѣ́даше таѧ́щагосѧ, и҆ всѣ̑мъ подаю́ща ве́лїю ми́лость.
Прокі́менъ днѐ.
На стїхо́внѣ стїхи́ра, гла́съ є҃:
Тебѐ воплоще́ннаго сп҃са хрⷭ҇та̀, и҆ нб҃съ не разлꙋчи́вшасѧ, во гла́сѣхъ пѣ́нїй велича́емъ: ꙗ҆́кѡ крⷭ҇тъ и҆ сме́рть прїѧ́лъ є҆сѝ за ро́дъ на́шъ, ꙗ҆́кѡ чл҃вѣколю́бецъ гдⷭ҇ь, и҆спрове́ргїй <<рѻ҃ѳ: 357>> а҆́дова врата̀, тридне́внѡ воскре́слъ є҆сѝ, сп҃са́ѧ дꙋ́шы на́шѧ.
Та́же: Да воскре́снетъ бг҃ъ, и҆ расточа́тсѧ вразѝ є҆гѡ̀. И҆ пое́мъ стїхи̑ры па́схи съ припѣ́вы и҆́хъ. Па́сха сщ҃е́ннаѧ на́мъ дне́сь показа́сѧ: и҆ прѡ́чаѧ. Сла́ва, и҆ ны́нѣ: Воскрⷭ҇нїѧ де́нь: И҆ пото́мъ. Хрⷭ҇то́съ воскре́се: съ пѣ́нїемъ, є҆ди́ножды. Та́же, Ны́нѣ ѿпꙋща́еши: Трист҃о́е. И҆ по Ѻ҆́ч҃е на́шъ: Тропа́рь воскрⷭ҇нъ, гла́съ є҃: Собезнача́льное сло́во: Сла́ва, и҆ ны́нѣ: бг҃оро́диченъ є҆гѡ̀. И҆ є҆ктенїа̀: Поми́лꙋй на́съ бж҃е: И҆ ѻ҆бы́чный ѿпꙋ́стъ глаго́летъ і҆ере́й без̾ крⷭ҇та̀: Воскресы́й и҆з̾ ме́ртвыхъ: И҆ ст҃а́го днѐ помина́етъ. И҆ многолѣ́тны.
[зрѝ] На повече́рїи по Досто́йно: и҆ по трист҃о́мъ, конда́къ слѣпа́гѡ: Сла́ва, и҆ ны́нѣ: па́схи: А҆́ще и҆ во гро́бъ:
[зрѝ] Полꙋ́нощницꙋ же пое́мъ по ѻ҆бы́чаю съ каѳі́смою. По а҃-мъ трист҃о́мъ, вмѣ́стѡ: Сѐ жени́хъ грѧде́тъ: глаго́лемъ тропа́рь воскре́сенъ: Собезнача́льное сло́во: Сла́ва, и҆ ны́нѣ: бг҃оро́диченъ є҆гѡ̀. По в҃-мъ трист҃о́мъ, вмѣ́стѡ: Помѧнѝ гдⷭ҇и ꙗ҆́кѡ бл҃гъ: глаго́лемъ конда́къ па́схи: А҆́ще и҆ во гро́бъ: Посе́мъ, Гдⷭ҇и поми́лꙋй. в҃і. И҆ ѿпꙋ́стъ. Моли́твы же: Помѧнѝ гдⷭ҇и, въ наде́жди: не глаго́лемъ.
Въ сре́дꙋ ѕ҃-ѧ седми́цы по па́сцѣ, на ᲂу҆́трени,
нача́ло твори́тъ сщ҃е́нникъ: Сла́ва ст҃ѣ́й, и҆ є҆диносꙋ́щнѣй: по ѻ҆бы́чаю, съ кади́ломъ, и҆ со стїхѝ, ꙗ҆́кѡ и҆з̾ѡбрази́сѧ ве́чера. И҆ по стїсѣ́хъ глаго́летъ настоѧ́тель, и҆лѝ чте́цъ: Сла́ва въ вы́шнихъ бг҃ꙋ: И҆ шестоѱа́лмїе по ѻ҆бы́чаю: На Бг҃ъ гдⷭ҇ь: <<рѻ҃ѳ ѡ҆б.: 358>> тропа́рь воскрⷭ҇нъ, гла́съ є҃: Собезнача́льное сло́во: два́жды. Сла́ва, и҆ ны́нѣ: бг҃оро́диченъ є҆гѡ̀.
По а҃-мъ стїхосло́вїи, сѣда́ленъ воскре́сенъ. Сла́ва, и҆ ны́нѣ: бг҃оро́диченъ. Пи́саны въ недѣ́лю слѣпа́гѡ. И҆ чте́нїе і҆ѡа́нна.
По в҃-мъ стїхосло́вїи сѣда́ленъ, гла́съ є҃:
Ѻ҆ц҃ꙋ̀ и҆ дх҃ови собезнача́льный, и҆́же свѣ́томъ ꙗ҆́кѡ ри́зою ѡ҆дѣва́ѧйсѧ, человѣколю́бнѡ въ на́ше є҆стество̀ ѡ҆блече́сѧ, и҆ недꙋ́ги человѣ́чєскїѧ ѿгонѧ́ѧ ꙗ҆́кѡ бг҃ъ, просвѣтѝ и҆ зѣ̑ницы ѿ ложе́снъ мт҃рнихъ лише́ннагѡ свѣ́та. [Два́жды.]
Воскрⷭ҇нїе хрⷭ҇то́во: Ѱало́мъ пѧтьдесѧ́тый. Канѡ́ны трѝ: па́сцѣ со і҆рмосы̀ на ѕ҃: и҆ слѣпа́гѡ на д҃: и҆ предпра́зднствꙋ вознесе́нїѧ, на д҃.
Канѡ́нъ предпра́зднствꙋ вознесе́нїѧ,
є҆гѡ́же краестро́чїе, по а҆лфави́тꙋ. Гла́съ є҃.
Пѣ́снь а҃.
І҆рмо́съ: Конѧ̀ и҆ вса́дника:
Горѣ̀ ко ѻ҆ц҃ꙋ̀ хрⷭ҇то́съ восхо́дитъ, и҆ прино́ситъ пло́ть, ю҆́же ѿ на́съ воспрїѧ́тъ: того̀ воспои́мъ въ похвале́нїи дне́сь, побѣ́днꙋю пѣ́снь пою́ще.
Кни̑ги писа́нїй бж҃е́ственныхъ, и҆ про́пѡвѣди премꙋ́дрыхъ бг҃оглагѡ́льникъ, коне́цъ ꙗ҆́вѣ прїѧ́ша: по воста́нїи бо влⷣка, восхо́дитъ со сла́вою въ нбⷭ҇наѧ.
Землѧ̀ та́йнѡ ликꙋ́етъ, и҆ нбⷭ҇наѧ весе́лїѧ и҆сполнѧ́ютсѧ ѡ҆ вознесе́нїи хрⷭ҇та̀, дре́вле разстоѧ̑щаѧсѧ соедини́вшагѡ бл҃года́тїю, и҆ є҆́ѵино прегражде́нїе разори́вшагѡ.
Катава́сїа: Сп҃си́телю бг҃ꙋ: <<р҃п: 359>>
Пѣ́снь г҃.
І҆рмо́съ: Водрꙋзи́вый на ничесо́мже зе́млю:
Свѧза́въ свое́ю сме́ртїю сло́ве сме́рть, и҆з̾ ме́ртвыхъ воскре́слъ є҆сѝ ꙗ҆́вѣ тридне́венъ, и҆ къ нбⷭ҇нымъ сп҃се возше́лъ є҆сѝ со сла́вою, пѣсносло́вѧщымъ безплѡ́тнымъ твоѐ смотре́нїе неизрече́нное.
Прише́лъ є҆сѝ къ земны̑мъ хрⷭ҇тѐ кромѣ̀ тѣ́ла, и҆ ѡ҆бле́ксѧ въ пло́ть, крⷭ҇тъ претерпѣ́лъ є҆сѝ, и҆ воскре́съ и҆з̾ ме́ртвыхъ, возше́лъ є҆сѝ со сла́вою къ началосвѣ́тномꙋ ѻ҆ц҃ꙋ̀ твоемꙋ̀, ᲂу҆миротвори́вый всѧ́чєскаѧ.
Поиска́въ хрⷭ҇тѐ на землѝ заблꙋ́ждшее ѻ҆вча̀, незаблꙋ́днымъ сло́ве, сїѐ счини́лъ є҆сѝ: и҆ возне́ссѧ къ нб҃сє́мъ, сѣ́лъ є҆сѝ во сла́вѣ ѡ҆деснꙋ́ю твоегѡ̀ роди́телѧ. сла́ва мно́гомꙋ бл҃гоꙋтро́бїю твоемꙋ̀.
Катава́сїа: Си́лою крⷭ҇та̀ твоегѡ̀ хрⷭ҇тѐ:
Конда́къ слѣпа́гѡ, гла́съ д҃: Дꙋше́вныма ѻ҆чи́ма: И҆ і҆́косъ.
Та́же сѣда́ленъ, гла́съ а҃. Подо́бенъ: Гро́бъ тво́й сп҃се:
Воѻчи́лъ є҆сѝ хрⷭ҇тѐ ѿ ᲂу҆тро́бы рожде́ннаго без̾ ѻ҆че́съ, показа́вый і҆ꙋде́ємъ сп҃се мо́й, сла́вꙋ твою̀ неизрече́ннꙋю, и҆ ꙗ҆́кѡ свѣ́тъ всѣ́хъ є҆сѝ: но за́вистїю тѧ̀ ѡ҆слѣпле́ннїи ᲂу҆мо́мъ навѣ́тꙋюще, живота̀ пода́телѧ ᲂу҆мертви́ти потща́хꙋсѧ.
Сла́ва, и҆ ны́нѣ: Подо́бенъ:
Роди́лсѧ є҆сѝ, ꙗ҆́кѡ ты̀ сп҃се мо́й восхотѣ́вый, ꙗ҆ви́лсѧ же па́ки є҆сѝ, ꙗ҆́кѡ ты̀ восхотѣ́лъ є҆сѝ, и҆ пострада́лъ є҆сѝ ꙗ҆́кѡ человѣ́къ, ꙗ҆́кѡ бг҃ъ же воскре́слъ є҆сѝ. на нб҃са̀ со сла́вою возше́лъ є҆сѝ, и҆ возве́лъ є҆сѝ чл҃вѣ́ческое сꙋщество̀, и҆ сла́вою ᲂу҆добри́лъ є҆сѝ. <<р҃п ѡ҆б.: 360>>
Пѣ́снь д҃.
І҆рмо́съ: Бж҃е́ственное твоѐ разꙋмѣ́въ:
Пре́жде грѣхо́мъ ѡ҆сꙋжде́нное є҆стество̀ на́ше всецр҃ю̀ твои́мъ прїѧ́тїемъ поми́ловасѧ, пѣсносло́вѧщее твоѐ со стра́хомъ воста́нїе, и҆ бж҃е́ственное вознесе́нїе.
Дивѧ́тсѧ безпло́тныхъ чи́ни, смотрѧ́юще тѧ̀ хрⷭ҇тѐ носѧ́ща тѣ́ло земно́е, и҆ возше́дша на ѻ҆́блакъ, и҆ къ небє́снымъ восходѧ́ща.
Сла́ва:
Ви́дѣвше ѡ҆червле́ны ри̑зы твоѧ̑ хрⷭ҇тѐ всецр҃ю̀, твои́мъ восхо́домъ ᲂу҆жасо́шасѧ а҆́гг҃льскїѧ си̑лы и҆ стра́хомъ и҆ ра́достїю поклони́шасѧ.
И҆ ны́нѣ:
Воспле́щимъ рꙋка́ма, гдⷭ҇ь воста́въ и҆з̾ ме́ртвыхъ, на нб҃са̀ взы́де, повинꙋ́вшымсѧ є҆мꙋ̀ а҆́гг҃лѡмъ, ꙗ҆́кѡ творцꙋ̀ и҆ бг҃ꙋ на́шемꙋ.
Катава́сїа: Оу҆слы́шахъ слꙋ́хъ си́лы крⷭ҇та̀:
Пѣ́снь є҃.
І҆рмо́съ: Ѡ҆дѣѧ́йсѧ свѣ́томъ:
Разрѣши́въ ѡ҆сꙋжде́нїе человѣ́чества, хрⷭ҇то́съ воскре́се и҆ къ нбⷭ҇нымъ, ѻ҆́ч҃имъ сосѣдѣ́нїемъ поче́тъ, и҆̀хже возлюбѝ. [Два́жды.]
Сла́ва:
По воскресе́нїи радостнотвори́вый хрⷭ҇тѐ ᲂу҆ченикѝ твоѧ̑, возше́лъ є҆сѝ горѣ̀, къ твоемꙋ̀ роди́телю, є҆гѡ́же не разлꙋчи́лсѧ є҆сѝ, а҆́ще и҆ человѣ́кѡмъ бесѣ́довалъ є҆сѝ.
И҆ ны́нѣ:
Зако́нꙋ предсѣ̑нїѧ, и҆ проповѣ̑данїѧ бг҃оглаго́ливыхъ <<рп҃а: 361>> и҆спо́лнивъ, хрⷭ҇тѐ возше́лъ є҆сѝ, ѻ҆́блакꙋ тѧ̀ под̾е́мшꙋ сп҃се, къ нбⷭ҇нымъ.
Катава́сїа: Оу҆́тренююще вопїе́мъ тѝ:
Пѣ́снь ѕ҃.
І҆рмо́съ: Неи́стовствꙋющеесѧ бꙋ́рею:
Стра́нное видѣ́нїе ꙗ҆ви́лсѧ є҆сѝ а҆́гг҃лѡмъ.чл҃вѣ́чь зра́къ носѧ̀, восхо́домъ твои́мъ стра́шнымъ человѣколю́бче: тѣ́мже со стра́хомъ воспѣва́емъ тѧ̀. [Два́жды.]
Сла́ва:
Всѣ́хъ гдⷭ҇ь со сла́вою восхо́дитъ свѣ́тлѡ къ своемꙋ̀ безнача́льномꙋ роди́телю: всѧ̀ тва́рь ны́нѣ пра́зднꙋетъ ликꙋ́ющи.
И҆ ны́нѣ:
Всѧ́къ ѧ҆зы́къ дне́сь да вопїе́тъ: въ воскликнове́нїи, хрⷭ҇то́съ взы́де, и҆ въ трꙋбы̀ бж҃е́ственномъ гла́сѣ къ нб҃сє́мъ: и҆̀хже не ѡ҆ста́ви.
Катава́сїа: Ѡ҆бы́де мѧ̀ бе́здна:
Конда́къ па́сцѣ: А҆́ще и҆ во гро́бъ: и҆ і҆́косъ.
Сѷнаѯа́рь мине́и.
Пѣ́снь з҃.
І҆рмо́съ: Превозноси́мый ѻ҆ц҃є́въ:
Растерза́въ средостѣ́нїе вражды̀ гдⷭ҇и, крⷭ҇то́мъ и҆ стра́стїю твое́ю, ѻ҆́блакомъ носи́мь возше́лъ є҆сѝ со сла́вою къ безнача́льномꙋ ѻ҆ц҃ꙋ̀.
Тре́петни взыва́хꙋ си̑лы: возми́те врата̀, прїи́де хрⷭ҇то́съ тѣ́ло земно́е носѧ̀, и҆ бж҃е́ственною стра́стїю велїа́ра ᲂу҆мертви́въ. <<рп҃а ѡ҆б.: 362>>
Сла́ва:
Что̀ твоѧ̑ ри̑зы червлє́ны человѣколю́бче; си́ламъ бж҃є́ственнымъ вопроша́ющымъ: точи́ло ны́нѣ и҆згнето́хъ, хрⷭ҇то́съ восходѧ̀ вопїѧ́ше.
И҆ ны́нѣ:
Пѣ́сньми твоѐ распѧ́тїе хрⷭ҇тѐ, и҆ воста́нїе согла́снѡ сла́вимъ, свѣ́тлѡ пра́зднꙋюще ѡ҆ вознесе́нїи честнѣ́мъ твое́мъ во вѣ́ки.
Катава́сїа: Въ пещѝ ѻ҆́гненнѣй:
Пѣ́снь и҃.
І҆рмо́съ: Тебѣ̀ вседѣ́телю:
Свѣ́тъ тѧ̀ ѿ свѣ́та сꙋ́щїй, ѻ҆́блакъ свѣ́телъ под̾ѧ́тъ ѿ горы̀ ма́сличныѧ, всѣ̑мъ зрѧ́щымъ бж҃є́ственнымъ ᲂу҆ченикѡ́мъ твои́мъ, и҆ тебѐ воспѣва́ющымъ во всѧ̀ вѣ́ки.
Рꙋка́ми ѱало́мски воспле́щимъ, воскре́се хрⷭ҇то́съ бг҃ъ на́шъ, и҆ взы́де, ѿѻнꙋ́дꙋже сни́де къ на́мъ человѣколю́бнѡ, ᲂу҆миротвори́вый дре́вле разстоѧ̑щаѧсѧ.
Бл҃гослови́мъ ѻ҆ц҃а̀, и҆ сн҃а, и҆ ст҃а́гѡ дх҃а, гдⷭ҇а.
Поѧ̀ дв҃дъ вопїе́тъ: хрⷭ҇то́съ взы́де на херꙋві́мѣхъ свои́хъ, и҆ возлетѣ̀ ꙗ҆́вѣ на крилꙋ̀ ᲂу҆́мныхъ чинѡ́въ: є҆го́же превозно́симъ во всѧ̀ вѣ́ки.
И҆ ны́нѣ:
Ꙗ҆ви́лсѧ є҆сѝ ᲂу҆ченикѡ́мъ воскре́съ ѿ гро́ба, и҆ си́хъ возве́лъ є҆сѝ на го́рꙋ ма́сличнꙋю, ѿѻнꙋ́дꙋже ѻ҆́блакъ свѣ́телъ под̾е́мъ, взѧ́тъ къ гѡ́рнимъ хрⷭ҇тѐ тебѐ со сла́вою. <<рп҃в: 363>>
Катава́сїа: И҆з̾ ѻ҆ц҃а̀ пре́жде вѣ́къ:
Честнѣ́йшꙋю: не пое́мъ: но пое́мъ припѣ́вы па́схи.
Пѣ́снь ѳ҃.
І҆рмо́съ: И҆са́їе ликꙋ́й:
Сщ҃е́нное торжество̀ всѧ̀ тва́рь прино́ситъ ꙗ҆́вѣ вознесе́нїю твоемꙋ̀ сло́ве бж҃їй, и҆́мже прине́слъ є҆сѝ ѻ҆ц҃ꙋ̀ твоемꙋ̀, є҆́же ѿ на́съ є҆стество̀ воспрїѧ́лъ є҆сѝ па́че сло́ва неизмѣ́нне.
Ꙗ҆́кѡ бг҃ъ сте́рлъ є҆сѝ врата̀ а҆́дова сп҃се и҆ верєѝ, и҆ воскре́съ и҆з̾ ме́ртвыхъ, къ нбⷭ҇нымъ восте́клъ є҆сѝ чинѡ́мъ а҆́гг҃льскимъ, врата̀ возми́те, вопїю́щымъ со ᲂу҆дивле́нїемъ.
Твоемꙋ̀ бж҃е́ственномꙋ восхо́дꙋ дивѧ́щымсѧ бж҃є́ственнымъ ᲂу҆ченикѡ́мъ, предста́ша ꙗ҆́вственнѡ а҆́гг҃ли, тѣ̑мъ вопїю́ще: є҆го́же ви́дите восходѧ́ща на нб҃са̀, се́й прїи́детъ со сла́вою сꙋди́ти всѣ̑мъ.
Сла́ва:
Є҆́же хрⷭ҇тѐ дарова́лъ є҆сѝ ми́ръ ᲂу҆ч҃нкѡ́мъ, къ гѡ́рнимъ дре́вле восходѧ̀. то́й и҆ на́мъ бога́тнѡ низпослѝ, въ любвѝ всѣ́хъ содержа́ѧ: ꙗ҆́кѡ да согла́снѡ тебѐ сп҃са велича́емъ.
И҆ ны́нѣ:
Свѣтоно́снаѧ колесни́ца сл҃нца мы́сленнагѡ, ты̀ была̀ є҆сѝ вои́стиннꙋ, нескве́рнаѧ чи́стаѧ, и҆́мже сѣдѧ́щїи во тмѣ̀ ви́дѣша свѣ́тъ позна́нїѧ, по до́лгꙋ тѧ̀ сла́вѧще.
Катава́сїа: Тѧ̀ па́че ᲂу҆ма̀:
Є҆ѯапостїла́рїй: Пло́тїю ᲂу҆снꙋ́въ: два́жды. И҆ слѣпа́гѡ: Оу҆́мныѧ моѝ ѻ҆́чи: <<рп҃в ѡ҆б.: 364>>
На хвали́техъ ста́вимъ стїхѡ́въ и҃, и҆ пое́мъ стїхи̑ры самогла́сны, слѣпа́гѡ д҃, гла́съ в҃: Слѣпы́й роди́выйсѧ: Мимоиды́й і҆и҃съ ѿ ст҃и́лища: Та́же, гла́съ д҃: Всѐ житїѐ слѣпы́й: Гла́съ є҃: Гдⷭ҇и мимоходѧ́щꙋ тѝ: [Пи́саны во вто́рникъ ве́чера].
Та́же стїхи̑ры па́схи съ припѣ́вы и҆́хъ. Сла́ва, и҆ ны́нѣ: Гла́съ є҃: Воскрⷭ҇нїѧ де́нь: Та́же, Хрⷭ҇то́съ воскре́се: ꙗ҆́коже ᲂу҆каза́сѧ ве́черъ.
И҆ славосло́вїе вели́кое. Тропа́рь, гла́съ є҃: Собезнача́льное сло́во: Сла́ва, и҆ ны́нѣ: бг҃оро́диченъ є҆гѡ̀. Є҆ктенїа̀ и҆ ѿпꙋ́стъ без̾ крⷭ҇та̀. И҆ ст҃а́го на ѿпꙋ́стѣ помина́етъ, є҆гѡ́же бꙋ́детъ де́нь.
И҆ ча́съ а҃, въ притво́рѣ. На а҃-мъ часѣ̀ глаго́лемъ ѱалмы̀ ѻ҆бы́чныѧ. На Сла́ва: тропа́рь: Собезнача́льное сло́во: И҆ ны́нѣ: бг҃оро́диченъ: Что́ тѧ нарече́мъ: По трист҃о́мъ конда́къ: Дꙋше́вныма ѻ҆чи́ма: И҆ коне́чный ѿпꙋ́стъ по ѻ҆бы́чаю, и҆ про́чыѧ часы̀ пред̾ лїтꙋргі́ею глаго́лемъ триѱа́лмнїи.
Нача́ло лїтꙋргі́и, ꙗ҆́коже на са́мꙋю па́схꙋ. На лїтꙋргі́и и҆з̾ѡбрази́тєльнаѧ, и҆ ѿ канѡ́на пѣ́снь г҃, и҆ ѕ҃. По вхо́дѣ тропа́рь: Собезнача́льное сло́во: Сла́ва: конда́къ слѣпа́гѡ. И҆ ны́нѣ: па́схи: А҆́ще и҆ во гро́бъ: И҆ прѡ́чаѧ. Прокі́менъ па́схи: Се́й де́нь, є҆го́же сотворѝ гдⷭ҇ь: А҆ллилꙋ́їа па́схи. А҆по́столъ и҆ є҆ѵⷢ҇лїе днѐ. И҆ про́чаѧ слꙋ́жба воскре́сна всѧ̀. Прича́стенъ: Тѣ́ло хрⷭ҇то́во: Глаго́лемъ же и҆ ѱало́мъ л҃г: Бл҃гословлю̀ гдⷭ҇а: Та́же і҆ере́й твори́тъ ѿпꙋ́стъ па́схи со крⷭ҇то́мъ, и҆ про́чее всѐ пое́мъ коне́цъ лїтꙋргі́и, ꙗ҆́коже ᲂу҆каза́сѧ на са́мꙋю па́схꙋ. И҆ та́кѡ ѿдае́тсѧ пра́здникъ ст҃а́гѡ и҆ живоно́снагѡ хрⷭ҇то́ва воскресе́нїѧ.
На трапе́зѣ быва́етъ бра́тїи ᲂу҆тѣше́нїе вели́кое, си́рѣчь є҆ле́емъ, ры́бою и҆ вїно́мъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.