Шестая седмица по Пасхе (с понедельника по субботу)
<<рѻ҃а ѡ҆б.: 342>>
Въ недѣ́лю ве́чера,
На Гдⷭ҇и воззва́хъ: поста́вимъ стїхѡ́въ ѕ҃: пра́здника г҃, и҆ мине́и г҃.
Пра́здникꙋ, гла́съ є҃. Подо́бенъ: Ра́дꙋйсѧ по́стникѡвъ:
Свѣ́тъ всемꙋ̀ є҆стествꙋ̀ человѣ́ческомꙋ, и҆ ѻ҆́ко тѣ́лꙋ мі́ра сегѡ̀, сы́й бж҃е и҆ сло́ве, и҆ ѻ҆чесє́мъ ѻ҆́бще, содѣ́тель и҆ зижди́тель познава́емь: и҆ ны́нѣ ѿ смѣше́нїѧ <<рѻ҃в: 343>> бре́нїѧ и҆ плюнове́нїѧ, слѣпа́го неизрече́ннѡ воѻча́еши пе́рсты твои́ми созида́ющими и҆ бре́нїе, и҆ видѣ́нїе: є҆́же и҆ ᲂу҆лꙋчи́въ, пре́жде въ рожде́нныхъ зна́емый, со́лнца ѿню́дъ не ви́дѧ, тебѐ сла́дкое ви́дитъ со́лнце, зрѧ̀ ѻ҆́бразъ, на́съ за бл҃гоꙋтро́бїе неизрече́нное созда́вшагѡ.
Оу҆дѡ́въ лише́нїемъ, и҆ ѿложе́нїемъ человѣ́ческїѧ плотскі́ѧ ѻ҆рꙋ́дїйныѧ ча́сти богатѣ́ѧ, пре́жде слѣпы́й ѿ ᲂу҆тро́бы ма́терни произше́дый, ꙗ҆́кѡ не бы́ти созда́нїе помышлѧ́ше, ѻ҆че́съ лише́нїе, и҆з̾ негѡ́же нога́ма, и҆ мнѡжа́йшаѧ тѣлесѐ преткновє́нїѧ, є҆́же ѡ҆ ка́менїе быва́хꙋ: и҆́же тобо́ю и҆ сїѐ бога́тство стѧжа́въ, ви́дитъ свѣ́тъ мі́ра, и҆ тебѐ свѣ́тѡвъ строи́телѧ бг҃а и҆ влⷣкꙋ тва́ремъ возвѣща́етъ, и҆ содѣ́телѧ всемі́рнаго.
Оу҆сты̀ и҆ дꙋше́ю и҆ ᲂу҆мо́мъ, ѿ пе́рсти зижди́тельски и҆ плюнове́нїѧ ѻ҆че́съ зѣ́ницы да́вшаго, и҆ ѻ҆́бщее просвѣще́нїе, и҆́же пре́жде слѣпы́й и҆сповѣ́даше, тва́ремъ всемі́рнаго смотри́телѧ и҆ строи́телѧ, за милосе́рдїе то́кмѡ созда́нїѧ вочеловѣ́чившагосѧ, и҆ проповѣ́даше ꙗ҆́кѡ бг҃а всеси́льнаго: є҆го́же кни̑жницы ре́вностїю, и҆ є҆́же къ ни̑мъ бесѣ́дованїе ѿню́дъ не могꙋ́ще зрѣ́ти, слѣпотствꙋ́юще мно́жае, и҆згна́на ѿ собо́рища сꙋ́дѧтъ, и҆ногда̀ зѣ́ницы да́вшаго слѣпо́мꙋ, дꙋшє́вныѧ и҆ тѣлє́сныѧ.
Сла́ва, и҆ ны́нѣ: гла́съ в҃:
Слѣпы́й роди́выйсѧ въ свое́мъ по́мыслѣ глаго́лаше: є҆да̀ а҆́зъ грѣ̑хъ ра́ди роди́тельныхъ роди́хсѧ без̾ ѻ҆́чїю; є҆да̀ а҆́зъ за невѣ́рїе ꙗ҆зы́кѡвъ роди́хсѧ во ѡ҆бличе́нїе; домышлѧ́юсѧ вопроша́ти: когда̀ но́щь, когда̀ де́нь; не терпи́та мѝ но́зѣ ка́меннагѡ претыка́нїѧ: не <<рѻ҃в ѡ҆б.: 344>> ви́дѣхъ бо со́лнца сїѧ́юща, нижѐ во ѻ҆́бразѣ менѐ созда́вшаго: но молю́ ти сѧ хрⷭ҇тѐ бж҃е, при́зри на мѧ̀ и҆ поми́лꙋй мѧ̀.
На стїхо́внѣ стїхи̑ры воскре́сны, гла́съ є҃:
Честны́мъ твои́мъ крⷭ҇то́мъ хрⷭ҇тѐ, дїа́вола посрами́лъ є҆сѝ, и҆ воскрⷭ҇нїемъ твои́мъ жа́ло грѣхо́вное притꙋпи́лъ є҆сѝ, и҆ сп҃слъ є҆сѝ ны̀ ѿ вра́тъ сме́ртныхъ: сла́вимъ тѧ̀ є҆диноро́дне.
Сті́хъ: Къ тебѣ̀ возведо́хъ ѻ҆́чи моѝ:
Покаѧ́ненъ: Гдⷭ҇и, согрѣша́ѧ не престаю̀, человѣколю́бїѧ сподоблѧ́емь не разꙋмѣ́ю: побѣдѝ моѐ ѡ҆мраче́нїе, є҆ди́не бл҃же, и҆ поми́лꙋй мѧ̀.
Сті́хъ: Поми́лꙋй на́съ гдⷭ҇и, поми́лꙋй на́съ:
Мꙋ́чениченъ: Ѡ҆ земны́хъ всѣ́хъ небре́гше, и҆ на мꙋ̑ки мꙋ́жески дерзнꙋ́вше, блаже́нныхъ наде́ждъ не погрѣши́сте, но нб҃е́снагѡ црⷭ҇твїѧ наслѣ̑дницы бы́сте, прехва́льнїи мꙋ́чєницы: и҆мꙋ́ще дерзнове́нїе къ чл҃вѣколю́бцꙋ бг҃ꙋ, мі́рꙋ ми́ръ проси́те, и҆ дꙋша́мъ на́шымъ ве́лїю ми́лость.
Сла́ва, и҆ ны́нѣ: гла́съ и҃:
Мимоходѧ̀ і҆и҃съ ѿ ст҃и́лища, ѡ҆брѣ́те человѣ́ка слѣ́па ѿ рожде́нїѧ, и҆ ᲂу҆милосе́рдивсѧ положѝ бре́нїе на ѻ҆́чїю є҆гѡ̀, и҆ речѐ къ немꙋ̀: и҆дѝ, ᲂу҆мы́йсѧ въ сїлѡа́мѣ: и҆ ᲂу҆мы́всѧ прозрѣ̀, сла́вꙋ возсыла́ѧ бг҃ꙋ. сосѣ́ди же є҆гѡ̀ глаго́лахꙋ є҆мꙋ̀: кто̀ твоѝ зѣ̑ницы ѿве́рзе, и҆̀хже никто́же ѿ зрѧ́щихъ и҆сцѣли́ти возмо́же; ѻ҆́нъ же возопи́въ речѐ: чл҃вѣ́къ і҆и҃съ глаго́лемый, ѻ҆́нъ мѝ речѐ: ᲂу҆мы́йсѧ въ сїлѡа́мѣ, и҆ прозрѣ́хъ. то́й є҆́сть вои́стиннꙋ, є҆го́же речѐ мѡѷсе́й въ зако́нѣ хрⷭ҇та̀, мессі́ю, то́й є҆́сть сп҃съ дꙋ́шъ на́шихъ. <<рѻ҃г: 345>>
Въ понедѣ́льникъ слѣпа́гѡ на ᲂу҆́трени,
По а҃-мъ стїхосло́вїи сѣда́ленъ, гла́съ є҃.
Подо́бенъ: Собезнача́льное сло́во:
Крⷭ҇тъ гдⷭ҇нь похва́лимъ, погребе́нїе ст҃о́е пѣ́сньми почти́мъ, и҆ воскрⷭ҇нїе є҆гѡ̀ препросла́вимъ: ꙗ҆́кѡ совозста́ви мє́ртвыѧ ѿ грѡ́бъ, ꙗ҆́кѡ бг҃ъ, плѣни́въ сме́рти держа́вꙋ, и҆ крѣ́пость дїа́волю, и҆ сꙋ́щымъ во а҆́дѣ свѣ́тъ возсїѧ̀.
Сті́хъ: Гдⷭ҇и да не ꙗ҆́ростїю твое́ю:
Всѝ побди́мъ, и҆ хрⷭ҇та̀ ᲂу҆срѧ́щимъ вѣ́рнїи со мно́жествомъ є҆ле́а, и҆ свѣща́ми свѣ́тлыми, ꙗ҆́кѡ да черто́га внꙋ́трь сподо́бимсѧ: внѣ́ бо двере́й ѡ҆брѣта́ѧйсѧ, бездѣ́льнѡ бг҃ови воззове́тъ: поми́лꙋй мѧ̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мꙋ́чениченъ: Гдⷭ҇и, ча́ши стрⷭ҇ти твоеѧ̀ страстоте́рпцы твоѝ поревнова́вше, ѡ҆ста́виша жите́йскꙋю красотꙋ̀, и҆ бы́ша а҆́гг҃лѡмъ соприча̑стницы. тѣ́хъ мольба́ми пода́ждь дꙋша́мъ на́шымъ ми́ръ хрⷭ҇тѐ бж҃е, и҆ ве́лїю ми́лость.
Сла́ва, и҆ ны́нѣ:
Со а҆́гг҃лы нбⷭ҇наѧ, съ чл҃вѣ́ки земна̑ѧ, во гла́сѣ ра́дованїѧ бцⷣе вопїе́мъ тѝ: ра́дꙋйсѧ, врата̀ нб҃съ ши́ршаѧ. ра́дꙋйсѧ, є҆ди́но земноро́дныхъ спасе́нїе. ра́дꙋйсѧ чⷭ҇тна́ѧ, ра́дꙋйсѧ бл҃года́тнаѧ, ро́ждшаѧ бг҃а воплоще́ннаго.
По в҃-мъ стїхосло́вїи сѣда́ленъ, гла́съ є҃.
Подо́бенъ: Собезнача́льное сло́во:
Пре́жде крⷭ҇та̀ твоегѡ̀ ще́дре, и҆ воста́нїѧ, и҆дꙋ́щꙋ тѝ, слѣпы́й ѿ рожде́нїѧ взыва́ше те́плѣ: сн҃е дв҃довъ <<рѻ҃г ѡ҆б.: 346>> поми́лꙋй, да́ждь мѝ свѣ́тъ ѻ҆чесє́мъ, да ᲂу҆зрю́ тѧ и҆ а҆́зъ: є҆гѡ́же зѣ́ницы пома́завъ бре́нїемъ ѿ плюнове́нїѧ сло́ве, томꙋ̀ свѣ́тъ свѣ́тлѡ да́лъ є҆сѝ.
Сла́ва, и҆ ны́нѣ: то́йже.
Воскрⷭ҇нїе хрⷭ҇то́во: ѱало́мъ н҃. И҆ посе́мъ, канѡ́нъ пра́здника, со і҆рмосо́мъ на и҃. И҆ мине́и на д҃. Конда́къ и҆ є҆ѯапостїла́рїй пра́здника.
На хвали́техъ поста́вимъ стїхѝ д҃. И҆ пое́мъ стїхи̑ры ѻ҆смогла́сника, гла́съ є҃:
Гдⷭ҇и, запеча́танꙋ гро́бꙋ ѿ беззако́нникѡвъ, проше́лъ є҆сѝ и҆з̾ гро́ба, ꙗ҆́коже роди́лсѧ є҆сѝ ѿ бцⷣы: не ᲂу҆разꙋмѣ́ша, ка́кѡ воплоти́лсѧ є҆сѝ, безпло́тнїи твоѝ а҆́гг҃ли: не чꙋ́вствоваша, когда̀ воскре́слъ є҆сѝ, стрегꙋ́щїи тѧ̀ во́ини. ѻ҆боѧ́ бо запечатлѣ́стасѧ и҆спытꙋ́ющымъ, ꙗ҆ви́шасѧ же чꙋдеса̀ кла́нѧющымсѧ вѣ́рою та́инствꙋ: є҆́же воспѣва́ющымъ, возда́ждь на́мъ ра́дость и҆ ве́лїю млⷭ҇ть. [Два́жды.]
Оу҆вы̀ мнѣ̀, комꙋ̀ ᲂу҆подо́бихсѧ а҆́зъ; непло́днѣй смоко́вницѣ, и҆ бою́сѧ проклѧ́тїѧ съ посѣче́нїемъ. но нбⷭ҇ный дѣ́лателю хрⷭ҇тѐ бж҃е, ѡ҆лѧденѣ́вшꙋю мою̀ дꙋ́шꙋ плодоно́снꙋ покажѝ, и҆ ꙗ҆́кѡ блꙋ́днаго сы́на прїими́ мѧ̀, и҆ поми́лꙋй мѧ̀.
Мꙋ́чениченъ:
Благослове́но во́инство цр҃ѧ̀ нбⷭ҇нагѡ: а҆́ще бо и҆ земноро́дни бы́ша страстоте́рпцы, но а҆́гг҃льское досто́инство потща́шасѧ дости́гнꙋти: тѣлеса̀ презрѣ́вше, и҆ страда́ньми безпло́тныхъ сподо́бльшесѧ че́сти. моли́твами тѣ́хъ гдⷭ҇и, низпослѝ на́мъ ве́лїю ми́лость. <<рѻ҃д: 347>>
Сла́ва, и҆ ны́нѣ: гла́съ в҃:
Всѐ житїѐ слѣпы́й но́щь помышлѧ́ѧ, возопѝ къ тебѣ̀: гдⷭ҇и ѿве́рзи мѝ зѣ́ницы, сн҃е дв҃довъ, сп҃се на́шъ, да со всѣ́ми и҆ а҆́зъ воспою̀ твою̀ си́лꙋ.
На стїхо́внѣ стїхи̑ры пра́здника, гла́съ є҃.
Подо́бенъ: Преподо́бне ѻ҆́ч҃е:
Ѡ҆слѣпле́нїе ꙗ҆ви́сѧ слѣпы́й не́гли ви́дѧщымъ, ѡ҆мрача́ѧ и҆ ра́зꙋмы и҆ дꙋ́шы и҆ ᲂу҆́мъ, зрѧ́щымъ є҆гѡ̀ безго́дное прозрѣ́нїе, и҆ пригласи́вше вопроша́хꙋ съ лю́тостїю: ка́кѡ ны́нѣ зри́ши ꙗ҆́кѡ є҆ди́нъ ѿ свѣ́тъ ви́дѧщихъ, слѣ́пъ сы́й ѿ рожде́нїѧ, и҆ присѣдѧ́й стезѧ́мъ и҆ просѧ́й; тѣ́мже показа̀ свѣ́тъ подава́ющаго, и҆ созда́вшаго свѣти̑ла въ мі́рѣ. ѿ ни́хже проповѣ́даетсѧ сн҃ъ бж҃їй пребезнача́льный, въ послѣ̑днѧѧ и҆з̾ дв҃ы человѣ́къ ꙗ҆вле́йсѧ за милосе́рдїе, ѿ бж҃е́ственнагѡ дх҃а.
Сті́хъ: При́зри на мѧ̀, и҆ поми́лꙋй мѧ̀.
Ꙗ҆́коже бре́мѧ и҆ земно́е тѧжконо́сїе зрѧ́шесѧ, въ мі́рѣ ходѧ̀ слѣпы́й, и҆ по сто́гнахъ но́ги сокрꙋша́ѧй, не́гли ꙗ҆́коже зрѣ́нїемъ жезло́мъ богатѣ́ѧ. тѣ́мже прибѣга́етъ къ свѣтода́телю, ѿ негѡ́же прїе́млетъ свѣ́тъ зрѣ́ти, и҆ ѻ҆чи́ма свои́ма ви́дѣти творца̀, по подо́бїю твоемꙋ̀, и҆ по ѻ҆́бразꙋ созда́вшаго є҆стество̀ человѣ́ческое ѿ землѝ пе́рвѣе, и҆ ны́нѣ пе́рстїю и҆ плюнове́нїемъ просвѣти́вшаго є҆гѡ̀ зѣ́ницы, и҆ да́вшаго человѣколю́бнѡ зрѣ́ти со́лнце.
Сті́хъ: Стѡпы̀ моѧ̑ напра́ви по словесѝ твоемꙋ̀:
Соѻбра́зна ᲂу҆зрѣ̀ человѣ́ческомꙋ ѻ҆́бразꙋ сло́ва ѻ҆́ч҃а, свѣ́тъ ви́дѣвъ слѣпы́й, ѿ негѡ́же свѣтоно́сное и҆ <<рѻ҃д ѡ҆б.: 348>> дненача́льное ви́дѣ со́лнце, ꙗ҆́коже и҆ про́чїи человѣ́цы ра́дꙋѧсѧ зрѣ́нїю новолѣ́пнѣйшемꙋ, и҆́мже ᲂу҆красѧ́шесѧ пра́во и҆ды́й, и҆ безтрꙋ́днѣ проходѧ̀ стєзѝ, и҆ просвѣти́вшаго сн҃а бж҃їѧ познава́ѧ, вочеловѣ́чшасѧ кра́йнѧгѡ ра́ди бл҃гоꙋтро́бїѧ, и҆ є҆́же бѣ̀ пребы́вша бг҃а, человѣ́ка бы́вша, и҆ прїи́мша є҆́же не бѣ̀, неслїѧ́нное же соблюда́юща си́хъ соедине́нїе.
Сла́ва, и҆ ны́нѣ: гла́съ є҃:
Гдⷭ҇и, мимоходѧ̀ пꙋте́мъ, ѡ҆брѣ́лъ є҆сѝ человѣ́ка слѣ́па ѿ рожде́нїѧ, и҆ ᲂу҆дивле́ни бы́вше ᲂу҆ченицы̀, вопроша́хꙋ тѧ̀ глаго́люще: ᲂу҆чи́телю, кто̀ согрѣшѝ, се́й ли, и҆лѝ роди́тели є҆гѡ̀, да слѣ́пъ роди́сѧ; ты́ же сп҃се мо́й возопи́лъ є҆сѝ къ ни́мъ: ни се́й согрѣшѝ, ни роди́тели є҆гѡ̀, но да ꙗ҆вѧ́тсѧ дѣла̀ бж҃їѧ на не́мъ. мнѣ̀ подоба́етъ дѣ́лати дѣла̀ посла́вшагѡ мѧ̀, ꙗ҆̀же никто́же мо́жетъ дѣ́лати. и҆ сїѧ̑ ре́къ, плю́нꙋвъ до́лꙋ, и҆ бре́нїе сотво́рь, пома́залъ є҆сѝ ѻ҆́чи є҆гѡ̀, ре́къ къ немꙋ̀: и҆дѝ ᲂу҆мы́йсѧ въ сїлѡа́мстѣй кꙋпѣ́ли. ѻ҆́нъ же ᲂу҆мы́всѧ здра́въ бы́сть, и҆ вопїѧ́ше къ тебѣ̀: вѣ́рꙋю гдⷭ҇и, и҆ поклони́сѧ тебѣ̀. тѣ́мже вопїе́мъ и҆ мы̀: поми́лꙋй на́съ.
Въ понедѣ́льникъ ве́чера,
На Гдⷭ҇и воззва́хъ: поста́вимъ стїхѡ́въ ѕ҃, и҆ пое́мъ стїхи̑ры пра́здника г҃: и҆ мине́и г҃. Стїхи̑ры пра́здника, гла́съ є҃.
Подо́бенъ: Ра́дꙋйсѧ по́стникѡвъ:
Оу҆сты̀ и҆ дꙋше́ю и҆ ᲂу҆мо́мъ, ѿ пе́рсти зижди́тельски <<рѻ҃є: 349>> и҆ плюнове́нїѧ, ѻ҆че́съ зѣ́ницы да́вшаго, и҆ ѻ҆́бщее просвѣще́нїе, и҆́же пре́жде слѣпы́й и҆сповѣ́даше, тва́ремъ всемі́рнаго смотри́телѧ и҆ строи́телѧ, за милосе́рдїе то́кмѡ созда́нїѧ вочеловѣ́чившагосѧ, и҆ проповѣ́даше ꙗ҆́кѡ бг҃а всеси́льнаго. є҆го́же кни̑жницы за́вистїю, и҆ є҆́же къ ни́мъ бесѣ́дованїе, ѿню́дъ не могꙋ́ще зрѣ́ти, слѣпотствꙋ́юще мно́жае, и҆згна́на ѿ собо́рища сꙋ́дѧтъ, и҆ногда̀ зѣ́ницы да́вшаго слѣпо́мꙋ дꙋшє́вныѧ и҆ тѣлє́сныѧ.
Побѣ́дꙋ до́бльствїѧ слѣпы́й на ви́дѧщихъ до конца̀ взѧ́тъ: и҆́бо содѣ́телѧ сего̀ и҆ созда́телѧ всѣ́хъ и҆ слѣпы́й сы́й ᲂу҆зрѣ̀, ви́дѣвъ воѻчевле́нїе созда́вшеесѧ ѿ плюнове́нїѧ, и҆ си́мъ є҆ди́нѣмъ позна́вый просвѣти́вшаго, и҆ сн҃а бж҃їѧ, и҆ влⷣкꙋ всемі́рнаго: є҆го́же ви́дѧще за́висти ѕло́бою ѡ҆слѣплѧ́еми весьма̀ не ви́дѣша. и҆ та́кѡ сїѧ̑ многосꙋгꙋ́бѡ ви́дѧще, ѿ сегѡ̀ чꙋде́съ дѣ̑йствїѧ пресла̑внаѧ є҆ди́нѣми глаго́лы.
Сомни́теленъ кни́жникѡмъ слѣпы̑мъ, воѻчи́выйсѧ пре́жде слѣпы́й сы́й, ꙗ҆ви́сѧ, ꙗ҆́кѡ не́гли ника́коже ви́дѧ: но ло́жнѡ є҆́же зрѣ́ти сп҃са ра́ди притворѧ́ѧйсѧ, ѡ҆слѣплѧ́тисѧ хотѧ́щымъ, помраче́ньми пи́смене, въ ни́хже сїѧ́етъ сла́дкое вои́стиннꙋ со́лнце, сꙋббѡтодѣ́йствїе ѡ҆бновлѧ́ѧй, содѣ́лавый мнѣ̀, и҆́же сѣно́вное сегѡ̀ свѣтодѣ́ѧй, и҆ покрове́нїе взе́млѧй, и҆ свѣ́тъ и҆́же въ си́хъ пре́жде слѣпы̑мъ подадѐ: и҆ ны́нѣ зрѧ́ще, свѣтопода́телѧ мі́рови проповѣ́дꙋетъ.
Сла́ва, и҆ ны́нѣ: гла́съ и҃:
Пра́вды со́лнце мы́сленное хрⷭ҇тѐ бж҃е, и҆з̾ ᲂу҆тро́бы свѣ́та лише́ннаго, твои́мъ пречи́стымъ прикоснове́нїемъ <<рѻ҃є ѡ҆б.: 350>> просвѣти́вшее ѻ҆бою́дꙋ, и҆ на́ши ѻ҆́чи дꙋше́вныѧ ѡ҆зари́вшее, сы́ны днѐ покажѝ, да вѣ́рою вопїе́мъ тѝ: мно́гое твоѐ и҆ неизрече́нное, є҆́же на на́съ бл҃гоꙋтро́бїе, чл҃вѣколю́бче сла́ва тебѣ̀.
На стїхо́внѣ стїхи̑ры, гла́съ є҃:
Воскрⷭ҇нїе даѧ́й ро́дꙋ человѣ́ческомꙋ, ꙗ҆́кѡ ѻ҆вча̀ на заколе́нїе веде́сѧ: ᲂу҆страши́шасѧ сегѡ̀ кнѧ́зи а҆́дстїи, и҆ взѧ́шасѧ врата̀ плачє́внаѧ. вни́де бо цр҃ь сла́вы хрⷭ҇то́съ, глаго́лѧ сꙋ́щымъ во ᲂу҆́захъ, и҆зыди́те: и҆ сꙋ́щымъ во тьмѣ̀, ѿкры́йтесѧ.
Сті́хъ: Къ тебѣ̀ возведо́хъ ѻ҆́чи моѝ:
Гдⷭ҇и, и҆ стра́ха твоегѡ̀ бою́сѧ, и҆ лꙋка́вое твори́ти не престаю̀. кто̀ на сꙋди́щи сꙋдїѝ не бои́тсѧ; и҆лѝ кто̀ и҆сцѣли́тисѧ хотѧ̀, врача̀ прогнѣ́ваетъ, ꙗ҆́коже а҆́зъ: долготерпѣли́ве гдⷭ҇и, на не́мощь мою̀ ᲂу҆милосе́рдисѧ и҆ поми́лꙋй мѧ̀.
Сті́хъ: Поми́лꙋй на́съ гдⷭ҇и, поми́лꙋй на́съ:
Мꙋ́чениченъ: Щито́мъ вѣ́ры ѡ҆бо́лкшесѧ, и҆ ѻ҆́бразомъ кре́стнымъ себѐ ᲂу҆крѣпи́вше, къ мꙋ́камъ мꙋ́жески вда́шасѧ, и҆ дїа́волю ле́сть и҆ де́рзость ᲂу҆праздни́ша, ст҃і́и твоѝ гдⷭ҇и. тѣ́хъ мольба́ми ꙗ҆́кѡ всеси́льный бг҃ъ, мі́рови ми́ръ низпослѝ, и҆ дꙋша́мъ на́шымъ ве́лїю ми́лость.
Сла́ва, и҆ ны́нѣ: гла́съ и҃:
За милосе́рдїе ми́лости воплоти́выйсѧ хрⷭ҇тѐ бж҃е, свѣ́та лише́ннаго ѿ ᲂу҆тро́бы, милосе́рдїемъ неизрече́нныхъ щедро́тъ, сїѧ́нїѧ бж҃е́ственнагѡ сподо́билъ є҆сѝ, сегѡ̀ зѣ́ницамъ пе́рстїю созда́тельными пе́рсты твои́ми прикоснꙋ́выйсѧ. са́мъ и҆ ны́нѣ свѣтода́телю, и҆ на́шѧ ѡ҆зарѝ дꙋшє́внаѧ чꙋ̑вства, ꙗ҆́кѡ є҆ди́нъ независтнода́тель. <<рѻ҃ѕ: 351>>
Во вто́рникъ слѣпа́гѡ, на ᲂу҆́трени,
По а҃-мъ стїхосло́вїи, сѣда́ленъ, гла́съ є҃:
Подо́бенъ: Собезнача́льное сло́во:
Гдⷭ҇и, ме́ртвъ наре́клсѧ є҆сѝ, ᲂу҆мертви́вый сме́рть: во гро́бѣ положи́лсѧ є҆сѝ, и҆стощи́вый гро́бы: горѣ̀ во́ини гро́бъ стрежа́хꙋ, до́лѣ ѿ вѣ́ка мє́ртвыѧ воскреси́лъ є҆сѝ. всеси́льне и҆ непостижи́ме гдⷭ҇и сла́ва тебѣ̀.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ:
Сꙋдїѝ сѣдѧ́щꙋ, и҆ а҆́гг҃лѡмъ предстоѧ́щымъ, трꙋбѣ̀ гласѧ́щей, и҆ пла́мени горѧ́щꙋ, что̀ сотвори́ши дꙋшѐ моѧ̀, ведо́ма на сꙋ́дъ; тогда́ бо лю̑таѧ твоѧ̑ предста́нꙋтъ, и҆ та̑йнаѧ твоѧ̑ ѡ҆блича́тсѧ согрѣшє́нїѧ. тѣ́мже пре́жде конца̀ возопі́й къ сꙋдїѝ: бж҃е ѡ҆чи́сти мѧ̀, и҆ спаси́ мѧ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мꙋ́чениченъ: Сїѧ́етъ дне́сь па́мѧть страстоте́рпцєвъ, и҆́мать бо ѿ нб҃съ ѡ҆заре́нїе: ли́къ а҆́гг҃льскїй торжествꙋ́етъ, и҆ человѣ́ческїй ро́дъ спра́зднꙋетъ. тѣ́мже мо́лѧтсѧ гдⷭ҇ви, поми́ловатисѧ дꙋша́мъ на́шымъ.
Сла́ва, и҆ ны́нѣ: бг҃оро́диченъ:
Мт҃и бж҃їѧ прест҃а́ѧ, стѣно̀ хрⷭ҇тїа́нъ, и҆зба́ви лю́ди твоѧ̀ ѻ҆бы́чнѡ, зовꙋ́щыѧ къ тебѣ̀ прилѣ́жнѡ: сопроти́въ ста́ни врагѡ́въ, и҆ возвыша́ющихсѧ мы́слей, да вопїе́мъ тѝ: ра́дꙋйсѧ бл҃года́тнаѧ.
По в҃-мъ стїхосло́вїи, сѣда́ленъ, гла́съ є҃.
Подо́бенъ: Собезнача́льное сло́во:
Прозрѣ́вый ви́дитсѧ слѣпы́й плюнове́нїемъ, чл҃вѣ́ческое <<рѻ҃ѕ ѡ҆б.: 352>> составле́нїе пре́жде созда́вшагѡ, не ви́дѧй ѿ рожде́нїѧ вели́кое со́лнце. тѣ́мже и҆ благодаре́нїе бг҃ꙋ возсыла́етъ ѿ дꙋшѝ, сегѡ̀ зрѧ̀ ѻ҆́бразъ, по подо́бїю созда́нный ѻ҆́бразъ созда́вшагѡ.
Сла́ва, и҆ ны́нѣ: то́йже.
Пое́мъ канѡ́нъ пра́здника, со і҆рмосы̀ на и҃: и҆ мине́и на д҃. Конда́къ, и҆ є҆ѯапостїла́рїй пра́здника.
На хвали́техъ стїхи̑ры ѻ҆смогла́сника, гла́съ є҃:
Гдⷭ҇и, верєѝ вѣ́чныѧ сокрꙋши́вый, и҆ ᲂу҆́зы растерза́вый ѿ гро́ба воскре́слъ є҆сѝ, ѡ҆ста́вль твоѧ̑ погреба̑льнаѧ, во свидѣ́тельство и҆́стиннагѡ тридне́внагѡ твоегѡ̀ погребе́нїѧ: и҆ предвари́лъ є҆сѝ въ галїле́и, въ пеще́рѣ стрего́мый. ве́лїѧ твоѧ̀ ми́лость, непостижи́ме сп҃се поми́лꙋй, и҆ спасѝ на́съ. [Два́жды].
Мно́жєства прегрѣше́нїй мои́хъ пре́зри гдⷭ҇и, ѿ дв҃ы рожде́йсѧ, и҆ всѧ̑ ѡ҆чи́сти беззакѡ́нїѧ моѧ̑, по́мыслъ мнѣ̀ подаѧ́й ѡ҆браще́нїѧ, ꙗ҆́кѡ є҆ди́нъ человѣколю́бецъ, молю́сѧ, и҆ поми́лꙋй мѧ̀.
Мꙋ́чениченъ:
Страстоте́рпцы твоѝ гдⷭ҇и, чи́ны а҆́гг҃льскїѧ подража́вше, ꙗ҆́кѡ безпло́тнїи мꙋ̑ки претерпѣ́ша, є҆диномы́сленное ᲂу҆пова́нїе и҆мꙋ́ще, ѡ҆бѣща́нныхъ бла̑гъ наслажде́нїе. тѣ́хъ моли́твами хрⷭ҇тѐ бж҃е на́шъ, ми́ръ да́рꙋй мі́рꙋ твоемꙋ̀ и҆ дꙋша́мъ на́шымъ ве́лїю ми́лость.
Сла́ва, и҆ ны́нѣ: гла́съ и҃:
Кто̀ возглаго́летъ си̑лы твоѧ̀ хрⷭ҇тѐ; и҆лѝ кто̀ и҆зочте́тъ чꙋде́съ твои́хъ мно́жєства; сꙋгꙋ́бъ бо ꙗ҆́кѡ ви́дѣнъ бы́лъ є҆сѝ на землѝ за бла́гость, сꙋгꙋ́бы и҆ <<рѻ҃з: 353>> цѣльбы̑ недꙋ́гꙋющымъ подава́лъ є҆сѝ: не то́чїю бо тѣлє́сныѧ ѻ҆́чи ѿве́рзлъ є҆сѝ, и҆́же ѿ ᲂу҆тро́бы слѣпо́мꙋ, но и҆ дꙋшє́вныѧ. тѣ́мже бг҃а тѧ̀ и҆сповѣ́даше таѧ́щагосѧ, и҆ всѣ̑мъ подаю́ща ве́лїю ми́лость.
На стїхо́внѣ стїхи̑ры подо́бны, гла́съ є҃.
Подо́бенъ: Преподо́бне ѻ҆́ч҃е:
Сїѧ́нїе свѣтоно́сное просїѧ́вшее, зрѧ́ще проѧвле́ннѡ въ сꙋббѡ́тꙋ, свѣтоно́снаго слѣпца̀, зако́нми мѡѷсе́а смꙋща́емїи, нра́вомъ ѡ҆слѣплѧ́ющесѧ зрѧ́ще сѣ́нь, ѡ҆сѣне́нїѧ не разꙋмѣ́юще покрыва́юща зако́ны, и҆з̾ негѡ́же не ви́дѣша свѣтодѣ́телѧ, и҆ сло́вомъ сꙋббѡ́ты содѣ́телѧ, воѻчи́вшагѡ слѣпа́го и҆змове́нїемъ, и҆ плюнове́нїѧ но́вымъ бренотворе́нїемъ. съ ни́мже смѣша́еми бг҃а того̀ ᲂу҆́зримъ, ѡ҆слѣпле́нїе фарїсе́йское ѡ҆блича́юще зрѣ́нїемъ, є҆́же ѿ лꙋ́чшагѡ.
Сті́хъ: При́зри на мѧ̀, и҆ поми́лꙋй мѧ̀.
Оу҆́тро возсїѧ̀ во тмѣ̀ пребыва́ющемꙋ но́щи невидѣ́нїѧ, многоболѣ́зненномꙋ слѣпо́мꙋ, во стрꙋѧ́хъ кꙋпѣ́ли сїлѡа́мстѣй и҆змове́нномꙋ, свѣ́тъ ѻ҆чесє́мъ бж҃е́ственнымъ повелѣ́нїемъ. тѣ́мже свѣтоно́сный новѣ́йшїй ви́дитсѧ, мра́къ тмы̀ нощетво́рныхъ зако́нныхъ и҆з̾ѡблича́ѧ кни́жникѡвъ, и҆ помраче́нное си́хъ невидѣ́нїе возсїѧ́ньми просвѣща́ѧй свѣтоно́сными: и҆з̾ ни́хже ѡ҆слѣпле́нїе сѣно́вныхъ пре́жде пи́сменъ воѻча́етсѧ, ѿ сло́ва на́мъ подае́мыми свѣ́тлыми сїѧ́ньми.
Сті́хъ: Стѡпы̀ моѧ̀ напра́ви по словесѝ твоемꙋ̀.
На высотꙋ̀ взы́де свѣтоно́снагѡ восхожде́нїѧ, свѣ́томъ бг҃оразꙋ́мїѧ просвѣ́щсѧ слѣпы́й, терпѧ̀ тѣле́сное и҆ <<рѻ҃з ѡ҆б.: 354>> ᲂу҆́мное ѡ҆мраче́нїе, є҆́же ѿ сло́ва но́выми свѣтоли́тїи просвѣ́щсѧ ве́сь, а҆́ще и҆ пе́рвѣе ѡ҆слѣпи́сѧ во ѻ҆бои́хъ и҆ свѣтода́вца познава́етъ, и҆ свѣтодѣ́телѧ возсїѧ́вшаго и҆з̾ гро́ба тридне́внѡ, и҆ зе́млю ᲂу҆ѧсни́вшаго свои́мъ воскресе́нїемъ: и҆з̾ негѡ́же возсїѧ̀ свѣ́тъ возсозда́нїѧ во тмѣ̀ держи́мымъ человѣ́кѡмъ, за благоꙋтро́бїе и҆ ве́лїю млⷭ҇ть.
Сла́ва. и҆ ны́нѣ: гла́съ и҃:
Пра́вды сл҃нце мы́сленное хрⷭ҇тѐ бж҃е, и҆з̾ ᲂу҆тро́бы свѣ́та лише́ннаго, твои́мъ пречи́стымъ прикоснове́нїемъ просвѣти́вшее ѻ҆бою́дꙋ, и҆ на́ши ѻ҆́чи дꙋшє́вныѧ ѡ҆зари́вшее, сы́ны днѐ покажѝ, да вѣ́рою вопїе́мъ тѝ мно́гое твоѐ и҆ неизрече́нное, є҆́же на на́съ бл҃гоꙋтро́бїе, человѣколю́бче, сла́ва тебѣ̀.
Во вто́рникъ ве́чера ѿда́нїе пра́здника па́схи.
По ѳ҃-мъ часѣ̀ твори́тъ сщ҃е́нникъ нача́ло съ кади́ломъ и҆ со свѣще́ю, црⷭ҇кимъ две́ремъ ѿве́рзєннымъ, и҆ пое́тъ: Хрⷭ҇то́съ воскр҃се: со стїхѝ. И҆ по стїсѣ́хъ ѱало́мъ: Блгⷭ҇вѝ дꙋшѐ моѧ̀ гдⷭ҇а: И҆ є҆ктенїа̀. Та́же каѳі́сма ѻ҆бы́чнаѧ.
На Гдⷭ҇и воззва́хъ: пое́мъ стїхи̑ры самогла́сны, слѣпа́гѡ, на ѕ҃. Гла́съ в҃:
Слѣпы́й роди́выйсѧ, въ свое́мъ по́мыслѣ глаго́лаше: є҆да̀ а҆́зъ грѣ̑хъ ра́ди роди́тельныхъ роди́хсѧ без̾ ѻ҆́чїю; <<рѻ҃и: 355>> є҆да̀ а҆́зъ за невѣ́рїе ꙗ҆зы́кѡвъ роди́хсѧ во ѡ҆бличе́нїе; не домышлѧ́юсѧ вопроша́ти: когда̀ но́щь, когда̀ де́нь; не терпи́та мѝ но́зѣ ка́меннагѡ претыка́нїѧ, не ви́дѣхъ сл҃нца сїѧ́юща, нижѐ во ѻ҆́бразѣ менѐ созда́вшагѡ. но молю́ ти сѧ хрⷭ҇тѐ бж҃е, при́зри на мѧ̀, и҆ поми́лꙋй мѧ̀.
Мимоходѧ̀ і҆и҃съ ѿ ст҃и́лища, ѡ҆брѣ́те человѣ́ка слѣ́па ѿ рожде́нїѧ, и҆ ᲂу҆милосе́рдивсѧ положѝ бре́нїе на ѻ҆́чїю є҆гѡ̀, и҆ речѐ къ немꙋ̀: и҆дѝ ᲂу҆мы́йсѧ въ сїлѡа́мѣ: и҆ ᲂу҆мы́всѧ прозрѣ̀, сла́вꙋ возсыла́ѧ бг҃ꙋ. сосѣ́ди же є҆гѡ̀ глаго́лахꙋ є҆мꙋ̀: кто̀ твоѝ зѣ̑ницы ѿве́рзе, и҆́хже никто́же зрѧ́щихъ и҆сцѣли́ти возмо́же; ѻ҆́нъ же возопи́въ, речѐ: человѣ́къ і҆и҃съ глаго́лемый, ѻ҆́нъ мѝ речѐ: ᲂу҆мы́йсѧ въ сїлѡа́мѣ, и҆ прозрѣ́хъ. то́й є҆́сть вои́стиннꙋ, є҆го́же речѐ мѡѷсе́й въ зако́нѣ, хрⷭ҇та̀ мессі́ю: то́й є҆́сть сп҃съ дꙋша́мъ на́шымъ.
Гла́съ д҃: Всѐ житїѐ слѣпы́й но́щь помышлѧ́ѧ, возопѝ тебѣ̀: гдⷭ҇и, ѿве́рзи мѝ зѣ̑ницы, сн҃е дв҃довъ сп҃се на́шъ, да со всѣ́ми и҆ а҆́зъ воспою̀ твою̀ си́лꙋ.
Гла́съ є҃: Гдⷭ҇и, мимоходѧ̀ пꙋте́мъ, ѡ҆брѣ́лъ є҆сѝ человѣ́ка слѣ́па ѿ рожде́нїѧ, и҆ ᲂу҆дивле́ни бы́вше ᲂу҆ченицы̀, вопроша́хꙋ тѧ̀ глаго́люще: ᲂу҆чи́телю, кто̀ согрѣшѝ, се́й ли, и҆лѝ роди́тели є҆гѡ̀, да слѣ́пъ роди́сѧ; ты́ же сп҃се мо́й, возопи́лъ є҆сѝ къ ни́мъ: ни се́й согрѣшѝ, ни роди́тели є҆гѡ̀, но да ꙗ҆вѧ́тсѧ дѣла̀ бж҃їѧ на не́мъ. мнѣ̀ подоба́етъ дѣ́лати дѣла̀ посла́вшагѡ мѧ̀, ꙗ҆̀же никто́же мо́жетъ дѣ́лати. и҆ сїѧ̑ ре́къ, плю́нꙋвъ до́лꙋ, бре́нїе сотво́рь, пома́залъ є҆сѝ ѻ҆́чи є҆гѡ̀, ре́къ къ немꙋ̀: и҆дѝ ᲂу҆мы́йсѧ въ сїлѡа́мстѣй кꙋпѣ́ли. ѻ҆́нъ же <<рѻ҃и ѡ҆б.: 356>> ᲂу҆мы́всѧ здра́въ бы́сть, и҆ вопїѧ́ше къ тебѣ̀: вѣ́рꙋю гдⷭ҇и, и҆ поклони́сѧ тебѣ̀. тѣ́мже вопїе́мъ и҆ мы̀: поми́лꙋй на́съ.
Гла́съ и҃: Пра́вды со́лнце мы́сленное хрⷭ҇тѐ бж҃е, и҆з̾ ᲂу҆тро́бы свѣ́та лише́ннаго, твои́мъ пречи́стымъ прикоснове́нїемъ просвѣти́вшее ѻ҆бою́дꙋ, и҆ на́ши ѻ҆́чи дꙋшє́вныѧ ѡ҆зари́вшее, сы́ны днѐ покажѝ, да вѣ́рою вопїе́мъ тѝ: мно́гое твоѐ и҆ неизрече́нное, є҆́же на на́съ благоꙋтро́бїе, человѣколю́бче сла́ва тебѣ̀.
За милосе́рдїе ми́лости воплоти́выйсѧ хрⷭ҇тѐ бж҃е, свѣ́та лише́ннаго ѿ ᲂу҆тро́бы, милосе́рдїемъ неизрече́нныхъ щедро́тъ сїѧ́нїѧ бж҃е́ственнагѡ сподо́билъ є҆сѝ сегѡ̀ зѣ́ницамъ пе́рстїю созда́тельными пе́рсты твои́ми прикоснꙋ́выйсѧ: са́мъ и҆ ны́нѣ свѣтода́телю, и҆ на́шѧ ѡ҆зарѝ дꙋшє́внаѧ чꙋ̑вства, ꙗ҆́кѡ є҆ди́нъ независтнода́тель.
Сла́ва и҆ ны́нѣ: гла́съ и҃:
Кто̀ возглаго́летъ си̑лы твоѧ̀ хрⷭ҇тѐ; и҆лѝ кто̀ и҆зочте́тъ чꙋде́съ твои́хъ мно́жєства; сꙋгꙋ́бъ бо ꙗ҆́кѡ ви́дѣнъ бы́лъ є҆сѝ на землѝ за бл҃гость, сꙋгꙋ́бы и҆ цѣльбы̑ недꙋ́гꙋющымъ подава́лъ є҆сѝ. не то́чїю бо тѣлє́сныѧ ѻ҆́чи ѿве́рзлъ є҆сѝ, и҆́же ѿ ᲂу҆тро́бы слѣпо́мꙋ, но и҆ дꙋшє́вныѧ. тѣ́мже бг҃а тѧ̀ и҆сповѣ́даше таѧ́щагосѧ, и҆ всѣ̑мъ подаю́ща ве́лїю ми́лость.
Прокі́менъ днѐ.
На стїхо́внѣ стїхи́ра, гла́съ є҃:
Тебѐ воплоще́ннаго сп҃са хрⷭ҇та̀, и҆ нб҃съ не разлꙋчи́вшасѧ, во гла́сѣхъ пѣ́нїй велича́емъ: ꙗ҆́кѡ крⷭ҇тъ и҆ сме́рть прїѧ́лъ є҆сѝ за ро́дъ на́шъ, ꙗ҆́кѡ чл҃вѣколю́бецъ гдⷭ҇ь, и҆спрове́ргїй <<рѻ҃ѳ: 357>> а҆́дова врата̀, тридне́внѡ воскре́слъ є҆сѝ, сп҃са́ѧ дꙋ́шы на́шѧ.
Та́же: Да воскре́снетъ бг҃ъ, и҆ расточа́тсѧ вразѝ є҆гѡ̀. И҆ пое́мъ стїхи̑ры па́схи съ припѣ́вы и҆́хъ. Па́сха сщ҃е́ннаѧ на́мъ дне́сь показа́сѧ: и҆ прѡ́чаѧ. Сла́ва, и҆ ны́нѣ: Воскрⷭ҇нїѧ де́нь: И҆ пото́мъ. Хрⷭ҇то́съ воскре́се: съ пѣ́нїемъ, є҆ди́ножды. Та́же, Ны́нѣ ѿпꙋща́еши: Трист҃о́е. И҆ по Ѻ҆́ч҃е на́шъ: Тропа́рь воскрⷭ҇нъ, гла́съ є҃: Собезнача́льное сло́во: Сла́ва, и҆ ны́нѣ: бг҃оро́диченъ є҆гѡ̀. И҆ є҆ктенїа̀: Поми́лꙋй на́съ бж҃е: И҆ ѻ҆бы́чный ѿпꙋ́стъ глаго́летъ і҆ере́й без̾ крⷭ҇та̀: Воскресы́й и҆з̾ ме́ртвыхъ: И҆ ст҃а́го днѐ помина́етъ. И҆ многолѣ́тны.
[зрѝ] На повече́рїи по Досто́йно: и҆ по трист҃о́мъ, конда́къ слѣпа́гѡ: Сла́ва, и҆ ны́нѣ: па́схи: А҆́ще и҆ во гро́бъ:
[зрѝ] Полꙋ́нощницꙋ же пое́мъ по ѻ҆бы́чаю съ каѳі́смою. По а҃-мъ трист҃о́мъ, вмѣ́стѡ: Сѐ жени́хъ грѧде́тъ: глаго́лемъ тропа́рь воскре́сенъ: Собезнача́льное сло́во: Сла́ва, и҆ ны́нѣ: бг҃оро́диченъ є҆гѡ̀. По в҃-мъ трист҃о́мъ, вмѣ́стѡ: Помѧнѝ гдⷭ҇и ꙗ҆́кѡ бл҃гъ: глаго́лемъ конда́къ па́схи: А҆́ще и҆ во гро́бъ: Посе́мъ, Гдⷭ҇и поми́лꙋй. в҃і. И҆ ѿпꙋ́стъ. Моли́твы же: Помѧнѝ гдⷭ҇и, въ наде́жди: не глаго́лемъ.
Въ сре́дꙋ ѕ҃-ѧ седми́цы по па́сцѣ, на ᲂу҆́трени,
нача́ло твори́тъ сщ҃е́нникъ: Сла́ва ст҃ѣ́й, и҆ є҆диносꙋ́щнѣй: по ѻ҆бы́чаю, съ кади́ломъ, и҆ со стїхѝ, ꙗ҆́кѡ и҆з̾ѡбрази́сѧ ве́чера. И҆ по стїсѣ́хъ глаго́летъ настоѧ́тель, и҆лѝ чте́цъ: Сла́ва въ вы́шнихъ бг҃ꙋ: И҆ шестоѱа́лмїе по ѻ҆бы́чаю: На Бг҃ъ гдⷭ҇ь: <<рѻ҃ѳ ѡ҆б.: 358>> тропа́рь воскрⷭ҇нъ, гла́съ є҃: Собезнача́льное сло́во: два́жды. Сла́ва, и҆ ны́нѣ: бг҃оро́диченъ є҆гѡ̀.
По а҃-мъ стїхосло́вїи, сѣда́ленъ воскре́сенъ. Сла́ва, и҆ ны́нѣ: бг҃оро́диченъ. Пи́саны въ недѣ́лю слѣпа́гѡ. И҆ чте́нїе і҆ѡа́нна.
По в҃-мъ стїхосло́вїи сѣда́ленъ, гла́съ є҃:
Ѻ҆ц҃ꙋ̀ и҆ дх҃ови собезнача́льный, и҆́же свѣ́томъ ꙗ҆́кѡ ри́зою ѡ҆дѣва́ѧйсѧ, человѣколю́бнѡ въ на́ше є҆стество̀ ѡ҆блече́сѧ, и҆ недꙋ́ги человѣ́чєскїѧ ѿгонѧ́ѧ ꙗ҆́кѡ бг҃ъ, просвѣтѝ и҆ зѣ̑ницы ѿ ложе́снъ мт҃рнихъ лише́ннагѡ свѣ́та. [Два́жды.]
Воскрⷭ҇нїе хрⷭ҇то́во: Ѱало́мъ пѧтьдесѧ́тый.
Канѡ́ны трѝ: па́сцѣ со і҆рмосы̀ на ѕ҃: и҆ слѣпа́гѡ на д҃: и҆ предпра́зднствꙋ вознесе́нїѧ, на д҃.
Канѡ́нъ предпра́зднствꙋ вознесе́нїѧ,
є҆гѡ́же краестро́чїе, по а҆лфави́тꙋ. Гла́съ є҃.
Пѣ́снь а҃.
І҆рмо́съ: Конѧ̀ и҆ вса́дника:
Горѣ̀ ко ѻ҆ц҃ꙋ̀ хрⷭ҇то́съ восхо́дитъ, и҆ прино́ситъ пло́ть, ю҆́же ѿ на́съ воспрїѧ́тъ: того̀ воспои́мъ въ похвале́нїи дне́сь, побѣ́днꙋю пѣ́снь пою́ще.
Кни̑ги писа́нїй бж҃е́ственныхъ, и҆ про́пѡвѣди премꙋ́дрыхъ бг҃оглагѡ́льникъ, коне́цъ ꙗ҆́вѣ прїѧ́ша: по воста́нїи бо влⷣка, восхо́дитъ со сла́вою въ нбⷭ҇наѧ.
Землѧ̀ та́йнѡ ликꙋ́етъ, и҆ нбⷭ҇наѧ весе́лїѧ и҆сполнѧ́ютсѧ ѡ҆ вознесе́нїи хрⷭ҇та̀, дре́вле разстоѧ̑щаѧсѧ соедини́вшагѡ бл҃года́тїю, и҆ є҆́ѵино прегражде́нїе разори́вшагѡ.
Катава́сїа: Сп҃си́телю бг҃ꙋ: <<р҃п: 359>>
Пѣ́снь г҃.
І҆рмо́съ: Водрꙋзи́вый на ничесо́мже зе́млю:
Свѧза́въ свое́ю сме́ртїю сло́ве сме́рть, и҆з̾ ме́ртвыхъ воскре́слъ є҆сѝ ꙗ҆́вѣ тридне́венъ, и҆ къ нбⷭ҇нымъ сп҃се возше́лъ є҆сѝ со сла́вою, пѣсносло́вѧщымъ безплѡ́тнымъ твоѐ смотре́нїе неизрече́нное.
Прише́лъ є҆сѝ къ земны̑мъ хрⷭ҇тѐ кромѣ̀ тѣ́ла, и҆ ѡ҆бле́ксѧ въ пло́ть, крⷭ҇тъ претерпѣ́лъ є҆сѝ, и҆ воскре́съ и҆з̾ ме́ртвыхъ, возше́лъ є҆сѝ со сла́вою къ началосвѣ́тномꙋ ѻ҆ц҃ꙋ̀ твоемꙋ̀, ᲂу҆миротвори́вый всѧ́чєскаѧ.
Поиска́въ хрⷭ҇тѐ на землѝ заблꙋ́ждшее ѻ҆вча̀, незаблꙋ́днымъ сло́ве, сїѐ счини́лъ є҆сѝ: и҆ возне́ссѧ къ нб҃сє́мъ, сѣ́лъ є҆сѝ во сла́вѣ ѡ҆деснꙋ́ю твоегѡ̀ роди́телѧ. сла́ва мно́гомꙋ бл҃гоꙋтро́бїю твоемꙋ̀.
Катава́сїа: Си́лою крⷭ҇та̀ твоегѡ̀ хрⷭ҇тѐ:
Конда́къ слѣпа́гѡ, гла́съ д҃: Дꙋше́вныма ѻ҆чи́ма: И҆ і҆́косъ.
Та́же сѣда́ленъ, гла́съ а҃. Подо́бенъ: Гро́бъ тво́й сп҃се:
Воѻчи́лъ є҆сѝ хрⷭ҇тѐ ѿ ᲂу҆тро́бы рожде́ннаго без̾ ѻ҆че́съ, показа́вый і҆ꙋде́ємъ сп҃се мо́й, сла́вꙋ твою̀ неизрече́ннꙋю, и҆ ꙗ҆́кѡ свѣ́тъ всѣ́хъ є҆сѝ: но за́вистїю тѧ̀ ѡ҆слѣпле́ннїи ᲂу҆мо́мъ навѣ́тꙋюще, живота̀ пода́телѧ ᲂу҆мертви́ти потща́хꙋсѧ.
Сла́ва, и҆ ны́нѣ: Подо́бенъ:
Роди́лсѧ є҆сѝ, ꙗ҆́кѡ ты̀ сп҃се мо́й восхотѣ́вый, ꙗ҆ви́лсѧ же па́ки є҆сѝ, ꙗ҆́кѡ ты̀ восхотѣ́лъ є҆сѝ, и҆ пострада́лъ є҆сѝ ꙗ҆́кѡ человѣ́къ, ꙗ҆́кѡ бг҃ъ же воскре́слъ є҆сѝ. на нб҃са̀ со сла́вою возше́лъ є҆сѝ, и҆ возве́лъ є҆сѝ чл҃вѣ́ческое сꙋщество̀, и҆ сла́вою ᲂу҆добри́лъ є҆сѝ. <<р҃п: 359>>
Пѣ́снь д҃.
І҆рмо́съ: Бж҃е́ственное твоѐ разꙋмѣ́въ:
Пре́жде грѣхо́мъ ѡ҆сꙋжде́нное є҆стество̀ на́ше всецр҃ю̀ твои́мъ прїѧ́тїемъ поми́ловасѧ, пѣсносло́вѧщее твоѐ со стра́хомъ воста́нїе, и҆ бж҃е́ственное вознесе́нїе.
Дивѧ́тсѧ безпло́тныхъ чи́ни, смотрѧ́юще тѧ̀ хрⷭ҇тѐ носѧ́ща тѣ́ло земно́е, и҆ возше́дша на ѻ҆́блакъ, и҆ къ небє́снымъ восходѧ́ща.
Сла́ва:
Ви́дѣвше ѡ҆червле́ны ри̑зы твоѧ̑ хрⷭ҇тѐ всецр҃ю̀, твои́мъ восхо́домъ ᲂу҆жасо́шасѧ а҆́гг҃льскїѧ си̑лы и҆ стра́хомъ и҆ ра́достїю поклони́шасѧ.
И҆ ны́нѣ:
Воспле́щимъ рꙋка́ма, гдⷭ҇ь воста́въ и҆з̾ ме́ртвыхъ, на нб҃са̀ взы́де, повинꙋ́вшымсѧ є҆мꙋ̀ а҆́гг҃лѡмъ, ꙗ҆́кѡ творцꙋ̀ и҆ бг҃ꙋ на́шемꙋ.
Катава́сїа: Оу҆слы́шахъ слꙋ́хъ си́лы крⷭ҇та̀:
Пѣ́снь є҃.
І҆рмо́съ: Ѡ҆дѣѧ́йсѧ свѣ́томъ:
Разрѣши́въ ѡ҆сꙋжде́нїе человѣ́чества, хрⷭ҇то́съ воскре́се и҆ къ нбⷭ҇нымъ, ѻ҆́ч҃имъ сосѣдѣ́нїемъ поче́тъ, и҆̀хже возлюбѝ. [Два́жды.]
Сла́ва:
По воскресе́нїи радостнотвори́вый хрⷭ҇тѐ ᲂу҆ченикѝ твоѧ̑, возше́лъ є҆сѝ горѣ̀, къ твоемꙋ̀ роди́телю, є҆гѡ́же не разлꙋчи́лсѧ є҆сѝ, а҆́ще и҆ человѣ́кѡмъ бесѣ́довалъ є҆сѝ.
И҆ ны́нѣ:
Зако́нꙋ предсѣ̑нїѧ, и҆ проповѣ̑данїѧ бг҃оглаго́ливыхъ <<рп҃а: 361>> и҆спо́лнивъ, хрⷭ҇тѐ возше́лъ є҆сѝ, ѻ҆́блакꙋ тѧ̀ под̾е́мшꙋ сп҃се, къ нбⷭ҇нымъ.
Катава́сїа: Оу҆́тренююще вопїе́мъ тѝ:
Пѣ́снь ѕ҃.
І҆рмо́съ: Неи́стовствꙋющеесѧ бꙋ́рею:
Стра́нное видѣ́нїе ꙗ҆ви́лсѧ є҆сѝ а҆́гг҃лѡмъ.чл҃вѣ́чь зра́къ носѧ̀, восхо́домъ твои́мъ стра́шнымъ человѣколю́бче: тѣ́мже со стра́хомъ воспѣва́емъ тѧ̀. [Два́жды.]
Сла́ва:
Всѣ́хъ гдⷭ҇ь со сла́вою восхо́дитъ свѣ́тлѡ къ своемꙋ̀ безнача́льномꙋ роди́телю: всѧ̀ тва́рь ны́нѣ пра́зднꙋетъ ликꙋ́ющи.
И҆ ны́нѣ:
Всѧ́къ ѧ҆зы́къ дне́сь да вопїе́тъ: въ воскликнове́нїи, хрⷭ҇то́съ взы́де, и҆ въ трꙋбы̀ бж҃е́ственномъ гла́сѣ къ нб҃сє́мъ: и҆̀хже не ѡ҆ста́ви.
Катава́сїа: Ѡ҆бы́де мѧ̀ бе́здна:
Конда́къ па́сцѣ: А҆́ще и҆ во гро́бъ: и҆ і҆́косъ.
Сѷнаѯа́рь мине́и.
Пѣ́снь з҃.
І҆рмо́съ: Превозноси́мый ѻ҆ц҃є́въ:
Растерза́въ средостѣ́нїе вражды̀ гдⷭ҇и, крⷭ҇то́мъ и҆ стра́стїю твое́ю, ѻ҆́блакомъ носи́мь возше́лъ є҆сѝ со сла́вою къ безнача́льномꙋ ѻ҆ц҃ꙋ̀.
Тре́петни взыва́хꙋ си̑лы: возми́те врата̀, прїи́де хрⷭ҇то́съ тѣ́ло земно́е носѧ̀, и҆ бж҃е́ственною стра́стїю велїа́ра ᲂу҆мертви́въ. <<рп҃а ѡ҆б.: 362>>
Сла́ва:
Что̀ твоѧ̑ ри̑зы червлє́ны человѣколю́бче; си́ламъ бж҃є́ственнымъ вопроша́ющымъ: точи́ло ны́нѣ и҆згнето́хъ, хрⷭ҇то́съ восходѧ̀ вопїѧ́ше.
И҆ ны́нѣ:
Пѣ́сньми твоѐ распѧ́тїе хрⷭ҇тѐ, и҆ воста́нїе согла́снѡ сла́вимъ, свѣ́тлѡ пра́зднꙋюще ѡ҆ вознесе́нїи честнѣ́мъ твое́мъ во вѣ́ки.
Катава́сїа: Въ пещѝ ѻ҆́гненнѣй:
Пѣ́снь и҃.
І҆рмо́съ: Тебѣ̀ вседѣ́телю:
Свѣ́тъ тѧ̀ ѿ свѣ́та сꙋ́щїй, ѻ҆́блакъ свѣ́телъ под̾ѧ́тъ ѿ горы̀ ма́сличныѧ, всѣ̑мъ зрѧ́щымъ бж҃є́ственнымъ ᲂу҆ченикѡ́мъ твои́мъ, и҆ тебѐ воспѣва́ющымъ во всѧ̀ вѣ́ки.
Рꙋка́ми ѱало́мски воспле́щимъ, воскре́се хрⷭ҇то́съ бг҃ъ на́шъ, и҆ взы́де, ѿѻнꙋ́дꙋже сни́де къ на́мъ человѣколю́бнѡ, ᲂу҆миротвори́вый дре́вле разстоѧ̑щаѧсѧ.
Бл҃гослови́мъ ѻ҆ц҃а̀, и҆ сн҃а, и҆ ст҃а́гѡ дх҃а, гдⷭ҇а.
Поѧ̀ дв҃дъ вопїе́тъ: хрⷭ҇то́съ взы́де на херꙋві́мѣхъ свои́хъ, и҆ возлетѣ̀ ꙗ҆́вѣ на крилꙋ̀ ᲂу҆́мныхъ чинѡ́въ: є҆го́же превозно́симъ во всѧ̑ вѣ́ки.
И҆ ны́нѣ:
Ꙗ҆ви́лсѧ є҆сѝ ᲂу҆ченикѡ́мъ воскре́съ ѿ гро́ба, и҆ си́хъ возве́лъ є҆сѝ на го́рꙋ ма́сличнꙋю, ѿѻнꙋ́дꙋже ѻ҆́блакъ свѣ́телъ под̾е́мъ, взѧ́тъ къ гѡ́рнимъ хрⷭ҇тѐ тебѐ со сла́вою. <<рп҃в: 363>>
Катава́сїа: И҆з̾ ѻ҆ц҃а̀ пре́жде вѣ́къ:
Честнѣ́йшꙋю: не пое́мъ: но пое́мъ припѣ́вы па́схи.
Пѣ́снь ѳ҃.
І҆рмо́съ: И҆са́їе ликꙋ́й:
Сщ҃е́нное торжество̀ всѧ̀ тва́рь прино́ситъ ꙗ҆́вѣ вознесе́нїю твоемꙋ̀ сло́ве бж҃їй, и҆́мже прине́слъ є҆сѝ ѻ҆ц҃ꙋ̀ твоемꙋ̀, є҆́же ѿ на́съ є҆стество̀ воспрїѧ́лъ є҆сѝ па́че сло́ва неизмѣ́нне.
Ꙗ҆́кѡ бг҃ъ сте́рлъ є҆сѝ врата̀ а҆́дова сп҃се и҆ верєѝ, и҆ воскре́съ и҆з̾ ме́ртвыхъ, къ нбⷭ҇нымъ восте́клъ є҆сѝ чинѡ́мъ а҆́гг҃льскимъ, врата̀ возми́те, вопїю́щымъ со ᲂу҆дивле́нїемъ.
Твоемꙋ̀ бж҃е́ственномꙋ восхо́дꙋ дивѧ́щымсѧ бж҃є́ственнымъ ᲂу҆ченикѡ́мъ, предста́ша ꙗ҆́вственнѡ а҆́гг҃ли, тѣ̑мъ вопїю́ще: є҆го́же ви́дите восходѧ́ща на нб҃са̀, се́й прїи́детъ со сла́вою сꙋди́ти всѣ̑мъ.
Сла́ва:
Є҆́же хрⷭ҇тѐ дарова́лъ є҆сѝ ми́ръ ᲂу҆ч҃нкѡ́мъ, къ гѡ́рнимъ дре́вле восходѧ̀. то́й и҆ на́мъ бога́тнѡ низпослѝ, въ любвѝ всѣ́хъ содержа́ѧ: ꙗ҆́кѡ да согла́снѡ тебѐ сп҃са велича́емъ.
И҆ ны́нѣ:
Свѣтоно́снаѧ колесни́ца сл҃нца мы́сленнагѡ, ты̀ была̀ є҆сѝ вои́стиннꙋ, нескве́рнаѧ чи́стаѧ, и҆́мже сѣдѧ́щїи во тмѣ̀ ви́дѣша свѣ́тъ позна́нїѧ, по до́лгꙋ тѧ̀ сла́вѧще.
Катава́сїа: Тѧ̀ па́че ᲂу҆ма̀:
Є҆ѯапостїла́рїй: Пло́тїю ᲂу҆снꙋ́въ: два́жды. И҆ слѣпа́гѡ: Оу҆́мныѧ моѝ ѻ҆́чи: <<рп҃в ѡ҆б.: 364>>
На хвали́техъ ста́вимъ стїхѡ́въ и҃, и҆ пое́мъ стїхи̑ры самогла́сны, слѣпа́гѡ д҃, гла́съ в҃: Слѣпы́й роди́выйсѧ: Мимоиды́й і҆и҃съ ѿ ст҃и́лища: Та́же, гла́съ д҃: Всѐ житїѐ слѣпы́й: Гла́съ є҃: Гдⷭ҇и мимоходѧ́щꙋ тѝ: [Пи́саны во вто́рникъ ве́чера].
Та́же стїхи̑ры па́схи съ припѣ́вы и҆́хъ. Сла́ва, и҆ ны́нѣ: Гла́съ є҃: Воскрⷭ҇нїѧ де́нь: Та́же, Хрⷭ҇то́съ воскре́се: ꙗ҆́коже ᲂу҆каза́сѧ ве́черъ.
И҆ славосло́вїе вели́кое. Тропа́рь, гла́съ є҃: Собезнача́льное сло́во: Сла́ва, и҆ ны́нѣ: бг҃оро́диченъ є҆гѡ̀. Є҆ктенїа̀ и҆ ѿпꙋ́стъ без̾ крⷭ҇та̀. И҆ ст҃а́го на ѿпꙋ́стѣ помина́етъ, є҆гѡ́же бꙋ́детъ де́нь.
И҆ ча́съ а҃, въ притво́рѣ. На а҃-мъ часѣ̀ глаго́лемъ ѱалмы̀ ѻ҆бы́чныѧ. На Сла́ва: тропа́рь: Собезнача́льное сло́во: И҆ ны́нѣ: бг҃оро́диченъ: Что́ тѧ нарече́мъ: По трист҃о́мъ конда́къ: Дꙋше́вныма ѻ҆чи́ма: И҆ коне́чный ѿпꙋ́стъ по ѻ҆бы́чаю, и҆ про́чыѧ часы̀ пред̾ лїтꙋргі́ею глаго́лемъ триѱа́лмнїи.
Нача́ло лїтꙋргі́и, ꙗ҆́коже на са́мꙋю па́схꙋ. На лїтꙋргі́и и҆з̾ѡбрази́тєльнаѧ, и҆ ѿ канѡ́на пѣ́снь г҃, и҆ ѕ҃. По вхо́дѣ тропа́рь: Собезнача́льное сло́во: Сла́ва: конда́къ слѣпа́гѡ. И҆ ны́нѣ: па́схи: А҆́ще и҆ во гро́бъ: И҆ прѡ́чаѧ. Прокі́менъ па́схи: Се́й де́нь, є҆го́же сотворѝ гдⷭ҇ь: А҆ллилꙋ́їа па́схи. А҆по́столъ и҆ є҆ѵⷢ҇лїе днѐ. И҆ про́чаѧ слꙋ́жба воскре́сна всѧ̀. Прича́стенъ: Тѣ́ло хрⷭ҇то́во: Глаго́лемъ же и҆ ѱало́мъ л҃г: Бл҃гословлю̀ гдⷭ҇а: Та́же і҆ере́й твори́тъ ѿпꙋ́стъ па́схи со крⷭ҇то́мъ, и҆ про́чее всѐ пое́мъ коне́цъ лїтꙋргі́и, ꙗ҆́коже ᲂу҆каза́сѧ на са́мꙋю па́схꙋ. И҆ та́кѡ ѿдае́тсѧ пра́здникъ ст҃а́гѡ и҆ живоно́снагѡ хрⷭ҇то́ва воскресе́нїѧ.
На трапе́зѣ быва́етъ бра́тїи ᲂу҆тѣше́нїе вели́кое, си́рѣчь є҆ле́емъ, ры́бою и҆ вїно́мъ. <<рп҃г: 365>>
Въ сре́дꙋ ве́чера ѕ҃-ѧ седми́цы по па́сцѣ, пра́зднꙋемъ
вознесе́нїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀.
Ча́съ ѳ҃-й триѱа́лмный. По нача́лѣ глаго́летъ чте́цъ трист҃о́е, и҆ до недѣ́ли и҃-ѧ во всѧ́комъ цр҃ко́вномъ пѣ́нїи.
На ма́лѣй вече́рни,
на Гдⷭ҇и воззва́хъ: поста́вимъ стїхи̑ры д҃, гла́съ ѕ҃:
Гдⷭ҇ь вознесе́сѧ на небеса̀: Гдⷭ҇и твоемꙋ̀ вознесе́нїю: На гора́хъ ст҃ы́хъ: Гдⷭ҇и, смотре́нїѧ соверши́въ та́инство: [зрѝ ни́же на вели́цѣй вече́рни.] Сла́ва, и҆ ны́нѣ: гла́съ то́йже: Гдⷭ҇и, а҆пⷭ҇ли ꙗ҆́кѡ ви́дѣша тѧ̀:
Прокі́менъ днѐ.
На стїхо́внѣ стїхи̑ры, гла́съ а҃:
Возше́дъ на небеса̀: Сті́хъ: Всѝ ꙗ҆зы́цы восплещи́те рꙋка́ми: Возше́лъ є҆сѝ хрⷭ҇тѐ къ безнача́льномꙋ ѻ҆ц҃ꙋ̀: Сті́хъ: Взы́де бг҃ъ въ воскликнове́нїи: А҆́гг҃ли твоѝ гдⷭ҇и: Сла́ва, и҆ ны́нѣ, гла́съ в҃: Роди́лсѧ є҆сѝ, ꙗ҆́кѡ са́мъ восхотѣ́лъ є҆сѝ: [зрѝ на вели́цѣй вече́рни.]
Ны́нѣ ѿпꙋща́еши: Трист҃о́е. По Ѻ҆́ч҃е на́шъ. ѿпꙋсти́тельный тропа́рь, гла́съ д҃:
Возне́слсѧ є҆сѝ во сла́вѣ хрⷭ҇тѐ бж҃е на́шъ, ра́дость сотвори́вый ᲂу҆ченикѡ́мъ ѡ҆бѣтова́нїемъ ст҃а́гѡ дх҃а, и҆звѣщє́ннымъ и҆̀мъ бы́вшымъ благослове́нїемъ, ꙗ҆́кѡ ты̀ є҆сѝ сн҃ъ бж҃їй, и҆зба́витель мі́ра.
Та́же є҆ктенїа̀ ма́лаѧ. И҆ ѿпꙋ́стъ. <<рп҃г ѡ҆б.: 366>>
На вели́цѣй вече́рни.
По предначина́тельномъ ѱалмѣ̀ каѳі́смы не глаго́лемъ. На Гдⷭ҇и воззва́хъ: поста́вимъ стїхѡ́въ і҃. И҆ пое́мъ стїхи̑ры самогла́сны є҃, повторѧ́юще ѧ҆̀. Гла́съ ѕ҃:
Гдⷭ҇ь вознесе́сѧ на нб҃са̀, да по́слетъ ᲂу҆тѣ́шителѧ мі́рꙋ: небеса̀ ᲂу҆гото́ваша престо́лъ є҆гѡ̀, ѻ҆́блацы восхожде́нїе є҆гѡ̀. а҆́гг҃ли дивѧ́тсѧ, человѣ́ка зрѧ́ще превы́ше себѐ. ѻ҆ц҃ъ жде́тъ, є҆го́же въ нѣ́драхъ и҆́мать соприсносꙋ́щна: дх҃ъ же ст҃ы́й вели́тъ всѣ́мъ а҆́гг҃лѡмъ є҆гѡ̀: возми́те врата̀ кнѧ́зи ва́шѧ, всѝ ꙗ҆зы́цы восплещи́те рꙋка́ми, ꙗ҆́кѡ взы́де хрⷭ҇то́съ, и҆дѣ́же бѣ̀ пе́рвѣе. [Два́жды.]
Гдⷭ҇и, твоемꙋ̀ вознесе́нїю ᲂу҆диви́шасѧ херꙋві́ми, зрѧ́ще тебѐ бг҃а на ѻ҆́блацѣхъ восходѧ́ща, на ни́хъ сѣдѧ́щаго и҆ сла́вимъ тѧ̀, ꙗ҆́кѡ бла́га ми́лость твоѧ̀, сла́ва тебѣ̀. [Два́жды.]
На гора́хъ ст҃ы́хъ зрѧ́ще твоѐ вознесе́нїе хрⷭ҇тѐ, сїѧ́нїе сла́вы ѻ҆́ч҃и, воспѣва́емъ тво́й свѣтоѻбра́зный лица̀ зра́къ, кла́нѧемсѧ страстє́мъ твои̑мъ, почита́емъ воскрⷭ҇нїе, сла́вное вознесе́нїе сла́вѧще: поми́лꙋй на́съ. [Два́жды.]
Гдⷭ҇и, а҆пⷭ҇ли ꙗ҆́кѡ ви́дѣша тѧ̀, на ѻ҆́блацѣхъ возноси́ма, рыда́нїемъ сле́зъ, жизнода́вче хрⷭ҇тѐ, ско́рби и҆сполнѧ́еми, рыда́юще глаго́лахꙋ: влⷣко, не ѡ҆ста́ви на́съ си́рыхъ, за милосе́рдїе возлюби́лъ є҆сѝ рабы̑ твоѧ̀, ꙗ҆́кѡ благоꙋтро́бенъ: но послѝ ꙗ҆́коже ѡ҆бѣща́лъ є҆сѝ на́мъ, прест҃а́го твоего̀ дх҃а, просвѣща́юща дꙋ́шы на́шѧ. [Два́жды].
Гдⷭ҇и, смотре́нїѧ соверши́въ та́инство, пои́мъ твоѧ̑ ᲂу҆ченикѝ на го́рꙋ є҆леѡ́нскꙋю, возноси́лсѧ є҆сѝ, и҆ сѐ тве́рдь небе́снꙋю проше́лъ є҆сѝ, менѐ ра́ди ѡ҆бнища́вый по мнѣ̀ <<рп҃д: 367>> и҆ возше́дъ ѿѻнꙋ́дꙋже не разлꙋчи́лсѧ є҆сѝ, всест҃а́го твоего̀ дх҃а низпослѝ, просвѣща́юща дꙋ́шы на́шѧ [Два́жды.]
Сла́ва, и҆ ны́нѣ: гла́съ то́йже.
Нѣ́дръ ѻ҆те́ческихъ не разлꙋ́чсѧ, сладча́йшїй і҆и҃се, и҆ съ земны́ми ꙗ҆́кѡ человѣ́къ пожи́въ, дне́сь ѿ горы̀ є҆леѡ́нскїѧ возне́слсѧ є҆сѝ во сла́вѣ, и҆ па́дшее є҆стество̀ на́ше ми́лостивнѡ возне́съ, ѻ҆ц҃ꙋ̀ спосади́лъ є҆сѝ. тѣ́мже небе́снїи безпло́тныхъ чи́нове, чꙋдесѝ ᲂу҆дивлѧ́ющесѧ, ᲂу҆жаса́хꙋсѧ ᲂу҆́жасомъ, и҆ тре́петомъ содержи́ми, твоѐ человѣколю́бїе велича́хꙋ. съ ни́миже и҆ мы̀ земні́и, є҆́же къ на́мъ твоѐ снизхожде́нїе, и҆ є҆́же ѿ на́съ вознесе́нїе славосло́вѧще, мо́лимсѧ глаго́люще: ᲂу҆ченикѝ, и҆ ро́ждшꙋю тѧ̀ бцⷣꙋ, ра́дости безчи́сленныѧ и҆спо́лнивый во твоѐ вознесе́нїе, и҆ на́съ сподо́би и҆збра́нныхъ твои́хъ ра́дости, моли́твами и҆́хъ, вели́кїѧ ра́ди твоеѧ̀ ми́лости.
Вхо́дъ. Прокі́менъ днѐ. и҆ чтє́нїѧ.
Проро́чества и҆са́їина чте́нїе. [Глава̀ в҃.]
Та́кѡ глаго́летъ гдⷭ҇ь: бꙋ́детъ въ послѣ́днїѧ днѝ ꙗ҆вле́на гора̀ гдⷭ҇нѧ, и҆ до́мъ бж҃їй на версѣ́хъ го́ръ, и҆ вознесе́тсѧ превы́ше холмѡ́въ, и҆ прїи́дꙋтъ на ню̀ всѝ ꙗ҆зы́цы. И҆ по́йдꙋтъ лю́дїе мно́зи, и҆ рекꙋ́тъ: прїиди́те взы́демъ на го́рꙋ гдⷭ҇ню, и҆ въ до́мъ бг҃а і҆а́кѡвлѧ, и҆ возвѣсти́тъ на́мъ пꙋ́ть сво́й, и҆ по́йдемъ по немꙋ̀.
Проро́чества и҆са́їина чте́нїе. [Глава̀ ѯ҃в.]
Та́кѡ глаго́летъ гдⷭ҇ь: поиди́те и҆ вни́дите враты̀ мои́ми, ᲂу҆гото́вите пꙋ́ть мо́й, и҆ пꙋ́ть твори́те лю́демъ мои̑мъ, и҆ ка́мєнїѧ ѿ пꙋтѝ размещи́те, вознеси́те зна́менїе на ꙗ҆зы́ки. Се́ бо гдⷭ҇ь сотворѝ слы́шано <<рп҃д ѡ҆б.: 368>> да́же до послѣ́днихъ землѝ: рцы́те дще́ри сїѡ́новѣ, сѐ сп҃си́тель тво́й прихо́дитъ, и҆мѣ́ѧ съ собо́ю мздꙋ̀, и҆ дѣ́ло є҆гѡ̀ пред̾ лице́мъ є҆гѡ̀. И҆ прозове́тъ ѧ҆̀ лю́ди свѧ́ты, и҆зба́влены ѿ гдⷭ҇а: ты́ же нарече́шисѧ взыска́нный гра́дъ, и҆ неѡста́вленный. Кто̀ се́й прише́дый и҆з̾ є҆дѡ́ма, ѡ҆броще́нїе ри́зъ є҆гѡ̀ ѿ восо́ра; се́й красе́нъ во ѻ҆де́жди свое́й, вопїе́тъ съ крѣ́постїю ве́лїею: а҆́зъ глаго́лю пра́вдꙋ и҆ сꙋ́дъ спасе́нїѧ. Почто́ ти ѡ҆бро́щены ри̑зы, и҆ ѻ҆дє́жды твоѧ̑ ꙗ҆́кѡ ѿ и҆стопта́нїѧ точи́ла и҆спо́лнены и҆стопта́нїѧ; точи́ло и҆стопта́хъ є҆ди́нъ, и҆ ѿ ꙗ҆зы̑къ нѣ́сть мꙋ́жъ со мно́ю. Ми́лость гдⷭ҇ню помѧнꙋ́хъ, добродѣ́тєли гдⷭ҇ни во всѣ́хъ, и҆́миже на́мъ воздава́етъ. Гдⷭ҇ь, сꙋдїѧ̀ бл҃гі́й до́мꙋ і҆и҃левꙋ, нано́ситъ на́мъ по ми́лости свое́й, и҆ по мно́жествꙋ пра́вды своеѧ̀. И҆ речѐ: не лю́дїе ли моѝ, ча́да не ѿве́ргꙋтъ ли сѧ; и҆ бы́сть и҆̀мъ во спасе́нїе ѿ всѧ́кїѧ ско́рби и҆́хъ. Не хода́тай, нижѐ а҆́гг҃лъ, но са́мъ гдⷭ҇ь спасѐ и҆̀хъ: за є҆́же люби́ти и҆̀хъ, и҆ щадѣ́ти и҆̀хъ, са́мъ и҆зба́ви и҆̀хъ, и҆ воспрїѧ́тъ и҆̀хъ, и҆ вознесѐ и҆̀хъ во всѧ̀ днѝ вѣ́ка.
Проро́чества заха́рїина чте́нїе. [Глава̀ д҃і.]
Та́кѡ глаго́летъ гдⷭ҇ь: сѐ де́нь грѧде́тъ гдⷭ҇нь, и҆ ста́нꙋтъ но́зѣ є҆гѡ̀ въ де́нь ѻ҆́ный на горѣ̀ є҆леѡ́нстѣй, прѧ́мѡ і҆ерꙋсали́ма, ѿ востѡ́къ со́лнца. И҆ въ де́нь ѻ҆́ный и҆зы́детъ вода̀ жива̀ и҆з̾ і҆ерꙋсали́ма, по́лъ є҆ѧ̀ въ мо́ре пе́рвое, и҆ по́лъ є҆ѧ̀ въ мо́ре послѣ́днее: въ жа́твꙋ и҆ въ ве́снꙋ бꙋ́детъ та́кѡ. И҆ бꙋ́детъ гдⷭ҇ь цр҃ь по все́й землѝ, въ де́нь ѻ҆́ный бꙋ́детъ гдⷭ҇ь є҆ди́нъ. И҆́мѧ є҆гѡ̀ є҆ди́но, ѡ҆крꙋжа́ющее всю̀ зе́млю и҆ пꙋсты́ню, ѿ га́вы да́же <<рп҃є: 369>> до реммѡ́на, проти́вꙋ хребтꙋ̀ і҆ерꙋсали́млю: и҆ вознесе́тсѧ, и҆ на мѣ́стѣ пребꙋ́детъ, ѿ вра́тъ венїамі́новыхъ, да́же до мѣ́ста двере́й пе́рвыхъ, да́же до вра́тъ ᲂу҆го́льныхъ, и҆ да́же до столпа̀ а҆намеи́лева, да́же до подточи́лїй цр҃е́выхъ, ѡ҆бита́ютъ въ не́мъ: и҆ а҆на́ѳема не бꙋ́детъ ктомꙋ̀, и҆ всели́тсѧ і҆ерꙋсали́мъ надѣ́ѧйсѧ.
На лїті́и стїхи̑ры самогла́сны. Гла́съ а҃:
Возше́дъ на небеса̀, ѿѻнꙋ́дꙋже и҆ соше́лъ є҆сѝ, не ѡ҆ста́ви на́съ си́рыхъ гдⷭ҇и: да прїи́детъ тво́й дх҃ъ, носѧ̀ ми́ръ мі́рови, покажѝ сынѡ́мъ человѣ́ческимъ дѣла̀ си́лы твоеѧ̀, гдⷭ҇и человѣколю́бче.
Возше́лъ є҆сѝ хрⷭ҇тѐ къ безнача́льномꙋ ѻ҆ц҃ꙋ̀ твоемꙋ̀, неѡпи́санныхъ є҆гѡ̀ нѣ́дръ не разлꙋчи́выйсѧ, и҆ прилѡ́гъ си́лы хвале́нїѧ трист҃а́гѡ не прїѧ́ша, но є҆ди́наго сн҃а и҆ по вочеловѣ́ченїи позна́ша тѧ̀ гдⷭ҇и, є҆диноро́дна ѻ҆ц҃ꙋ̀: во мно́жествѣ щедро́тъ твои́хъ поми́лꙋй на́съ.
А҆́гг҃ли твоѝ гдⷭ҇и, а҆пⷭ҇лѡмъ глаго́лахꙋ: мꙋ́жїе галїле́йстїи, что̀ стоитѐ, зрѧ́ще на не́бо; се́й є҆́сть хрⷭ҇то́съ бг҃ъ, вознесы́йсѧ ѿ ва́съ на не́бо, то́й прїи́детъ па́ки, и҆́мже ѻ҆́бразомъ ви́дѣсте є҆го̀ и҆дꙋ́ща на не́бо: послꙋжи́те є҆мꙋ̀ въ преподо́бїи и҆ пра́вдѣ.
Гла́съ д҃: Є҆гда̀ прише́лъ є҆сѝ на го́рꙋ хрⷭ҇тѐ є҆леѡ́нскꙋю, ѻ҆́ч҃ее соверши́ти благоволе́нїе, ᲂу҆жасо́шасѧ небе́снїи а҆́гг҃ли, и҆ ᲂу҆страши́шасѧ преиспо́днїи. предста́ша же ᲂу҆ченицы̀ съ ра́достїю тре́петни, ꙗ҆́кѡ глаго́лалъ є҆сѝ и҆̀мъ, ꙗ҆́кѡ престо́лъ же готовлѧ́шесѧ проти́въ ѻ҆́блакъ ждꙋ́щїй: врата́ же не́бо ѿве́рзшее добро́тꙋ ꙗ҆влѧ́ше, и҆ землѧ̀ сокрѡ́вища ѿкрыва́етъ, а҆да́мовꙋ схожде́нїю ꙗ҆́кѡ <<рп҃є ѡ҆б.: 370>> позна́тисѧ, и҆ па́ки восхожде́нїю. но стопы̑ ᲂу҆́бѡ возвыша́хꙋсѧ, ꙗ҆́коже рꙋ́цѣ, ᲂу҆ста́ же вельмѝ бл҃гословлѧ́хꙋ, ꙗ҆́коже слы́шашесѧ, ѻ҆́блакъ под̾е́млѧше, и҆ не́бо внꙋ́трь тебѐ прїѧ́тъ. дѣ́ло сїѐ гдⷭ҇и содѣ́лалъ є҆сѝ вели́кое и҆ пресла́вное, во спасе́нїе дꙋ́шъ на́шихъ.
Низше́дшее є҆стество̀ а҆да́мово, въ до́льнѣйшыѧ страны̑ землѝ, бж҃е новосотвори́вый собо́ю превы́ше всѧ́кагѡ нача́ла и҆ вла́сти, возве́лъ є҆сѝ дне́сь: ꙗ҆́кѡ бо возлюби́въ спосади́лъ є҆сѝ, ꙗ҆́коже поми́ловавъ соедини́лъ є҆сѝ себѣ̀, ꙗ҆́кѡ соедини́вый спострада́лъ є҆сѝ, ꙗ҆́кѡ безстра́стенъ пострада́въ, и҆ спросла́вилъ є҆сѝ. но безпло́тнїи, кто̀ є҆́сть се́й, глаго́лахꙋ кра́сный мꙋ́жъ; но не человѣ́къ то́чїю, бг҃ъ же и҆ человѣ́къ, совокꙋпле́ннѡ и҆ ꙗ҆влѧ́емѡ. тѣ́мже ᲂу҆дивле́ни а҆́гг҃ли, во ѻ҆де́ждахъ лета́юще ѻ҆́крестъ ᲂу҆ченикѡ́въ, дрꙋзі́и же стоѧ́ще вопїѧ́хꙋ: мꙋ́жїе галїле́йстїи, и҆́же ѿ ва́съ ѿи́де, се́й є҆́сть і҆и҃съ человѣ́къ бг҃ъ. бг҃ъ человѣ́къ па́ки прїи́детъ, сꙋдїѧ̀ живы́хъ и҆ ме́ртвыхъ, вѣ̑рнымъ же да́рꙋѧй грѣхѡ́въ проще́нїе и҆ ве́лїю ми́лость.
Є҆гда̀ возне́слсѧ є҆сѝ во сла́вѣ хрⷭ҇тѐ бж҃е, ᲂу҆ченикѡ́мъ зрѧ́щымъ, ѻ҆́блацы под̾има́хꙋ тѧ̀ съ пло́тїю, врата̀ взѧ́шасѧ нбⷭ҇наѧ, ли́къ а҆́гг҃льскїй ра́довашесѧ съ весе́лїемъ, го́рнѣйшыѧ си̑лы зовѧ́хꙋ глаго́люще: возми́те врата̀ кнѧ́зи ва́шѧ, и҆ вни́детъ цр҃ь сла́вы. ᲂу҆ченицы́ же дивѧ́щесѧ глаго́лахꙋ: не разлꙋчи́сѧ на́съ па́стырю до́брый, но послѝ на́мъ дх҃а твоего̀ прест҃а́го, наставлѧ́юща, и҆ ᲂу҆твержда́юща, и҆ просвѣща́юща, и҆ ѡ҆свѧща́юща дꙋ́шы на́шѧ.
Сла́ва и҆ ны́нѣ: гла́съ то́йже:
Гдⷭ҇и, та́инство є҆́же ѿ вѣкѡ́въ сокрове́нное и҆ ѿ родѡ́въ <<рп҃ѕ: 371>> и҆спо́лнивъ ꙗ҆́кѡ бл҃гъ, прише́лъ є҆сѝ со ᲂу҆ченикѝ твои́ми на го́рꙋ є҆леѡ́нскꙋю, и҆мѣ́ѧ ро́ждшꙋю тѧ̀ творца̀ и҆ всѣ́хъ содѣ́телѧ: то́й бо въ стрⷭ҇ти твое́й мт҃рски па́че всѣ́хъ болѣ́зновавшей, подоба́ше и҆ сла́вою пло́ти твоеѧ̀, премно́гїѧ наслади́тисѧ ра́дости. є҆ѧ́же и҆ мы̀ причаща́ющесѧ, є҆́же на нб҃са̀ восхо́домъ твои́мъ влⷣко, вели́кꙋю твою̀ ми́лость на на́съ бы́вшꙋю сла́вимъ.
На стїхо́внѣ стїхи̑ры самогла́сны, гла́съ в҃:
Роди́лсѧ є҆сѝ ꙗ҆́кѡ са́мъ восхотѣ́лъ є҆сѝ, ꙗ҆ви́лсѧ є҆сѝ ꙗ҆́кѡ са́мъ и҆зво́лилъ є҆сѝ: пострада́лъ є҆сѝ пло́тїю бж҃е на́шъ, и҆з̾ ме́ртвыхъ воскре́слъ є҆сѝ попра́въ сме́рть. возне́слсѧ є҆сѝ во сла́вѣ, всѧ́чєскаѧ и҆сполнѧ́ѧй, и҆ посла́лъ є҆сѝ на́мъ дх҃а бж҃е́ственнаго, є҆́же воспѣва́ти и҆ сла́вити твоѐ бж҃ество̀.
Сті́хъ: Всѝ ꙗ҆зы́цы восплещи́те рꙋка́ми:
Воспрїе́млемꙋ тебѣ̀ хрⷭ҇тѐ ѿ горы̀ ма́сличныѧ, си̑лы зрѧ́ще, дрꙋ́гъ дрꙋ́гꙋ вопїѧ́хꙋ: кто̀ є҆́сть се́й; и҆ глаго́летъ къ ни́мъ: се́й є҆́сть держа́вный и҆ си́льный, се́й є҆́сть си́льный въ бра́ни, се́й є҆́сть вои́стиннꙋ цр҃ь сла́вы. и҆ почто̀ є҆мꙋ̀ червле́ны ри̑зы; и҆з̾ восо́ра прихо́дитъ, є҆́же є҆́сть пло́ти. ты́ же са́мъ ꙗ҆́кѡ бг҃ъ ѡ҆деснꙋ́ю сѣ́дъ вели́чествїѧ, посла́лъ є҆сѝ на́мъ дх҃а ст҃а́го, да наста́витъ и҆ спасе́тъ дꙋ́шы на́шѧ.
Сті́хъ: Взы́де бг҃ъ въ воскликнове́нїи:
Возне́слсѧ є҆сѝ во сла́вѣ на горѣ̀ ма́сличнѣй хрⷭ҇тѐ бж҃е, пред̾ твои́ми ᲂу҆ченикѝ, и҆ сѣ́лъ є҆сѝ ѡ҆деснꙋ́ю ѻ҆ц҃а̀, всѧ́чєскаѧ и҆сполнѧ́ѧй бж҃ество́мъ, и҆ посла́лъ є҆сѝ и҆̀мъ дх҃а ст҃а́го, просвѣща́юща и҆ ᲂу҆твержда́юща, и҆ ѡ҆свѧща́юща дꙋ́шы на́шѧ. <<рп҃ѕ ѡ҆б.: 372>>
Сла́ва и҆ ны́нѣ: гла́съ ѕ҃:
Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ, є҆́же вознестѝ па́дшїй ѻ҆́бразъ а҆да́мовъ, и҆ посла́ти дх҃а ᲂу҆тѣ́шителѧ, є҆́же ѡ҆свѧти́ти дꙋ́шы на́шѧ.
Та́же, Ны́нѣ ѿпꙋща́еши: И҆ трист҃о́е. На блгⷭ҇ве́нїи хлѣ́бѡвъ, тропа́рь пра́здника, гла́съ д҃: Возне́слсѧ є҆сѝ во сла́вѣ: три́жды. И҆ чте́нїе вели́кое въ дѣѧ́нїихъ ст҃ы́хъ а҆пⷭ҇лъ.
А҆ и҆дѣ́же нѣ́сть всено́щнагѡ: по Ны́нѣ ѿпꙋща́еши: тропа́рь пра́здника є҆ди́ножды. На повече́рїи по Досто́йно: конда́къ пра́здника.
Полꙋ́нощницꙋ пое́мъ по ѻ҆бы́чаю съ каѳі́смою. По а҃- мъ трист҃о́мъ, вмѣ́стѡ, Сѐ жени́хъ: глаго́лемъ тропа́рь пра́здника. По в҃-мъ трист҃о́мъ, вмѣ́стѡ, Помѧнѝ гдⷭ҇и, ꙗ҆́кѡ бл҃гъ: глаго́лемъ конда́къ пра́здника. Та́же, Гдⷭ҇и поми́лꙋй. в҃і. И҆ ѿпꙋ́стъ. Моли́твы, Помѧнѝ гдⷭ҇и, въ наде́жди: не глаго́лемъ. Оу҆́трени нача́ло по ѻ҆бы́чаю. И҆ а҆́бїе чте́цъ глаго́летъ: Прїиди́те поклони́мсѧ: три́жды. и҆ ѻ҆бы́чныѧ два̀ ѱалма̀, ѳ҃і и҆ к҃. и҆ шестоѱа́лмїе.
Въ четверто́къ на ᲂу҆́трени,
На Бг҃ъ гдⷭ҇ь: тропа́рь пра́здника: Возне́слсѧ є҆сѝ во сла́вѣ: три́жды.
По а҃-мъ стїхосло́вїи сѣда́ленъ, гла́съ а҃.
Подо́бенъ: Ка́мени запеча́танꙋ:
А҆́гг҃лѡмъ дивѧ́щымсѧ восхо́да стра́нномꙋ, и҆ ᲂу҆ченикѡ́мъ ᲂу҆жаса́ющымсѧ стра́шномꙋ взы́тїѧ, возше́лъ є҆сѝ со сла́вою ꙗ҆́кѡ бг҃ъ, и҆ врата̀ тебѣ̀ взѧ́шасѧ сп҃се. сегѡ̀ ра́ди си̑лы нбⷭ҇ныѧ дивлѧ́хꙋсѧ вопїю́ще: сла́ва снизхожде́нїю <<рп҃з: 373>> твоемꙋ̀ сп҃се, сла́ва црⷭ҇твїю твоемꙋ̀, сла́ва вознесе́нїю твоемꙋ̀, є҆ди́не человѣколю́бче. [Два́жды.]
По в҃-мъ стїхосло́вїи сѣда́ленъ, гла́съ г҃:
Подо́бенъ: Красотѣ̀ двⷭ҇тва:
Превѣ́чный бг҃ъ и҆ безнача́льный, є҆́же воспрїѧ́тъ є҆стество̀ человѣ́ческое, ѡ҆бг҃отвори́въ та́йнѡ дне́сь вознесѐ. а҆́гг҃ли предтекꙋ́ще а҆пⷭ҇лѡмъ пока́зовахꙋ сего̀ и҆дꙋ́ща на нб҃са̀ сла́вою мно́гою, томꙋ́же поклони́вшесѧ глаго́лахꙋ: сла́ва бг҃ꙋ возне́сшемꙋсѧ. [Два́жды.]
По полѷеле́и сѣда́ленъ, гла́съ є҃. Подо́бенъ: Собезнача́льное сло́во:
Соше́дый съ нб҃сѐ на земна̑ѧ, и҆ до́лꙋ лежа́щїй во а҆́довѣ стра́жи, совоскреси́вый ꙗ҆́кѡ бг҃ъ а҆да́мовъ зра́къ, вознесе́нїемъ твои́мъ хрⷭ҇тѐ на нб҃са̀ возве́дъ, престо́лꙋ ѻ҆те́ческомꙋ твоемꙋ̀ сосѣди́телѧ содѣ́лалъ є҆сѝ, ꙗ҆́кѡ ми́лостивъ и҆ человѣколю́бецъ. [Два́жды.]
И҆ чте́нїе пра́здникꙋ: Похва́льнаѧ словеса̀, творе́нїе кѵ́ръ а҆ндре́а, и҆лѝ про́чихъ. Степє́нна, а҆ а҆нтїфѡ́нъ д҃-гѡ гла́са. Прокі́менъ. гла́съ д҃: Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ. Сті́хъ: Всѝ ꙗ҆зы́цы восплещи́те рꙋка́ми: Всѧ́кое дыха́нїе: Є҆ѵⷢ҇лїе ѿ ма́рка, зача́ло ѻ҃а: Воскре́съ і҆и҃съ заꙋ́тра въ пе́рвꙋю сꙋббѡ́тꙋ: Воскрⷭ҇нїе хрⷭ҇то́во: є҆ди́ножды. ѱало́мъ н҃. Сла́ва: гла́съ в҃: Моли́твами а҆по́столѡвъ: И҆ ны́нѣ: Мл҃твами бцⷣы: Та́же, сті́хъ: Поми́лꙋй мѧ̀ бж҃е, по вели́цѣй ми́лости твое́й: И҆ пое́мъ настоѧ́щїй самогла́сенъ, гла́съ ѕ҃:
Дне́сь на нб҃сѣ́хъ гѡ́рнїѧ си̑лы на́ше є҆стество̀ зрѧ́ще, дивѧ́щесѧ стра́ннагѡ ѻ҆́браза восхо́дꙋ, недоꙋмѣва́хꙋсѧ дрꙋ́гъ ко дрꙋ́гꙋ глаго́люще: кто̀ се́й прише́дый; ви́дѧще <<рп҃з ѡ҆б.: 374>> же своего̀ влⷣкꙋ, нбⷭ҇наѧ врата̀ взѧ́ти повелѣва́хꙋ: съ ни́миже непреста́ннѡ воспои́мъ съ пло́тїю ѿѻнꙋ́дꙋ па́ки грѧдꙋ́щаго, ꙗ҆́кѡ сꙋдїю̀ всѣ́хъ и҆ бг҃а всеси́льна.
КАНѠ́НЫ:
гла́съ пѧ́тый, со і҆рмосы̀ на и҃: и҆ четве́ртый, на ѕ҃.
Канѡ́нъ, творе́нїе і҆ѡа́нна мона́ха. Гла́съ є҃.
Пѣ́снь а҃.
І҆рмо́съ: Сп҃си́телю бг҃ꙋ въ мо́ри лю́ди немо́крыми нога́ми наста́вльшемꙋ, и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ: ꙗ҆́кѡ просла́висѧ.
Воспои́мъ всѝ лю́дїе, на ра́мѣхъ херꙋві́мскихъ возне́сшꙋсѧ со сла́вою хрⷭ҇тꙋ̀, и҆ спосади́вшемꙋ на́съ ѡ҆деснꙋ́ю ѻ҆ц҃а̀, пѣ́снь побѣ́днꙋю: ꙗ҆́кѡ просла́висѧ.
Хода́таѧ бг҃ꙋ и҆ человѣ́кѡмъ хрⷭ҇та̀, ли́цы а҆́гг҃льстїи ви́дѣвше, съ пло́тїю въ вы́шнихъ ᲂу҆дивлѧ́хꙋсѧ, согла́снѡ же воспѣва́хꙋ пѣ́снь побѣ́днꙋю: ꙗ҆́кѡ просла́висѧ.
Ꙗ҆́вльшемꙋсѧ бг҃ꙋ на горѣ̀ сїна́йстѣй, и҆ зако́нъ да́вшемꙋ бг҃ови́дцꙋ мѡѷсе́ю, ѿ горы̀ є҆леѡ́нскїѧ возне́сшемꙋсѧ пло́тїю, томꙋ̀ всѝ воспои́мъ: ꙗ҆́кѡ просла́висѧ.
Бг҃оро́диченъ:
Пречи́стаѧ мт҃и бж҃їѧ, воплоще́ннаго ѿ тебѐ, и҆ ѿ нѣ́дръ роди́телѧ неѿстꙋ́пльшаго бг҃а непреста́ннѡ молѝ, ѿ всѧ́кагѡ ѡ҆бстоѧ́нїѧ спастѝ, ꙗ҆̀же созда̀.
Дрꙋгі́й канѡ́нъ господи́на і҆ѡ́сифа,
є҆гѡ́же краестро́чїе по а҆лфави́тꙋ. Во ѻ҆смо́й же, и҆ девѧ́той пѣ́сни: Ѡ҆дѝ і҆ѡ́сифъ. Є҆́же є҆́сть, пѣ́снь і҆ѡ́сифова, гла́съ д҃.
Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̀: <<рп҃и: 375>>
Воскре́слъ є҆сѝ тридне́венъ, по є҆стествꙋ̀ безсме́ртный, и҆ ꙗ҆ви́лсѧ є҆сѝ є҆динона́десѧтимъ, и҆ всѣ́мъ ᲂу҆ченикѡ́мъ, и҆ восте́клъ є҆сѝ хрⷭ҇тѐ ко ѻ҆ц҃ꙋ̀, ѻ҆́блакомъ носи́мь всѣ́хъ тво́рче.
Вопїе́тъ ꙗ҆́вственнѡ поѧ̀ дв҃дъ бг҃одохнове́нный, взы́де гдⷭ҇ь къ нбⷭ҇нымъ, въ воскликнове́нїи и҆ трꙋбы̀ шꙋ́мѣ, и҆ къ началосвѣ́тномꙋ ѻ҆ц҃ꙋ̀ доспѣ̀.
Сла́ва:
Состарѣ́вшїйсѧ, гдⷭ҇и, мі́ръ мно́гими грѣхмѝ, ѡ҆бнови́въ стрⷭ҇тїю твое́ю и҆ воста́нїемъ твои́мъ, возше́лъ є҆сѝ носи́мь ѻ҆́блакомъ къ пренебє́снымъ: сла́ва сла́вѣ твое́й.
И҆ ны́нѣ: бг҃оро́диченъ:
Влⷣкꙋ родила̀ є҆сѝ всѣ́хъ, всенепоро́чнаѧ влⷣчце, стрⷭ҇ть во́льнꙋю прїи́мшаго, и҆ возше́дша къ своемꙋ̀ ѻ҆ц҃ꙋ̀, є҆гѡ́же не ѡ҆ста́ви, а҆́ще и҆ пло́ть взѧ́тъ.
Катава́сїа: Бж҃е́ственнымъ покрове́нъ, медленоѧзы́чный мра́комъ, и҆звиті́йствова бг҃опи́санный зако́нъ: ти́нꙋ бо ѿтрѧ́съ ѻ҆чесѐ ᲂу҆́мнагѡ, ви́дитъ сꙋ́щаго, и҆ наꙋча́етсѧ дх҃а ра́зꙋмꙋ, хвалѧ̀ бж҃е́ственными пѣ́сньми.
Пѣ́снь г҃.
І҆рмо́съ: Си́лою крⷭ҇та̀ твоегѡ̀ хрⷭ҇тѐ, ᲂу҆твердѝ моѐ помышле́нїе, во є҆́же пѣ́ти и҆ сла́вити спаси́тельное твоѐ вознесе́нїе.
Возше́лъ є҆сѝ жизнода́вче хрⷭ҇тѐ ко ѻ҆ц҃ꙋ̀, и҆ возне́слъ ро́дъ на́шъ человѣколю́бче, неизрече́ннымъ благоꙋтро́бїемъ твои́мъ.
Чи́ни а҆́гг҃льстїи сп҃се, человѣ́ческое є҆стество̀ ви́дѣвше совосходѧ́щее тебѣ̀, непреста́ннѡ ᲂу҆дивлѧ́еми воспѣва́хꙋ тѧ̀. <<рп҃и ѡ҆б.: 376>>
Оу҆жаса́хꙋсѧ а҆́гг҃льстїи ли́цы хрⷭ҇тѐ, зрѧ́ще тѧ̀ съ тѣлесе́мъ возне́сшасѧ, и҆ воспѣва́хꙋ ст҃о́е твоѐ вознесе́нїе.
Є҆стество̀ человѣ́ческое хрⷭ҇тѐ, тлѣ́нїемъ па́дшее возста́вилъ є҆сѝ, и҆ восхо́домъ твои́мъ возне́слъ є҆сѝ, и҆ съ собо́ю на́съ просла́вилъ є҆сѝ.
Бг҃оро́диченъ:
Молѝ непреста́ннѡ чⷭ҇таѧ, произше́дшаго ѿ ложе́снъ твои́хъ, и҆зба́витисѧ пре́лести дїа́воли, пою́щымъ тѧ̀ мт҃рь бж҃їю.
И҆́нъ. і҆рмо́съ: Твоѧ̀ пѣсносло́вцы бцⷣе:
Возми́те врата̀ нбⷭ҇наѧ, сѐ прїи́де хрⷭ҇то́съ цр҃ь тва́ри, въ тѣ́ло ѡ҆бо́лксѧ земно́е, го́рнѣйшымъ глаго́лахꙋ си́ламъ до́льнѣйшыѧ.
Взыска́въ хрⷭ҇тѐ, прельще́ннаго пре́лестїю ѕмїе́вою а҆да́ма, ꙗ҆́кѡ въ сего̀ ѡ҆болкі́йсѧ, возше́лъ є҆сѝ, и҆ сѣ́лъ є҆сѝ ѡ҆деснꙋ́ю, ꙗ҆́кѡ сопресто́ленъ ѻ҆ц҃ꙋ̀, пою́щымъ а҆́гг҃лѡмъ тебѐ.
Сла́ва:
Землѧ̀ пра́зднꙋетъ и҆ ликꙋ́етъ, ра́дꙋетсѧ и҆ нб҃о, вознесе́нїемъ дне́сь творца̀ тва́ри, пред̾ѧвле́ннѡ соедини́вшагѡ разстоѧ̑щаѧсѧ хотѣ́нїемъ.
И҆ ны́нѣ: бг҃оро́диченъ:
Сме́рти роди́вши разрꙋши́телѧ, є҆ди́наго безсме́ртнаго бг҃а, дв҃о мт҃и всечи́стаѧ: того̀ при́снѡ ᲂу҆молѝ, ᲂу҆мерщвлѧ́ющыѧ моѧ̑ стра̑сти ᲂу҆мори́ти, и҆ спасти́ мѧ.
Катава́сїа: Разве́рзе ᲂу҆тро́бы неча́дствовавшїѧ ᲂу҆́зы, доса́дꙋ же неꙋдоботерпи́мꙋ благоча́дствꙋющїѧ, є҆ди́на моли́тва проро́чицы дре́вле а҆́нны носѧ́щїѧ дꙋ́хъ сокрꙋше́нъ, къ си́льномꙋ, и҆ бг҃ꙋ ра́зꙋмѡвъ. <<рп҃ѳ: 377>>
Сѣда́ленъ, гла́съ и҃. Подо́бенъ: Премꙋ́дрости:
Всѣ́дъ на ѻ҆́блаки нбⷭ҇ныѧ, ѡ҆ста́вивъ ми́ръ сꙋ́щымъ на землѝ, возше́лъ и҆ сѣ́лъ є҆сѝ ѡ҆деснꙋ́ю ѻ҆ц҃а̀, ꙗ҆́кѡ є҆диносꙋ́щенъ семꙋ̀ сы́й и҆ дх҃ꙋ. а҆́ще бо и҆ во пло́ти ꙗ҆ви́лсѧ є҆сѝ, но непрело́женъ пребы́лъ є҆сѝ: тѣ́мже ча́еши соверше́нїѧ коне́цъ, сꙋди́ти грѧды́й на зе́млю мі́рꙋ всемꙋ̀. правосꙋ́де гдⷭ҇и, пощадѝ дꙋ́шы на́шѧ, прегрѣше́нїй ѡ҆ставле́нїе да́рꙋѧ, ꙗ҆́кѡ бг҃ъ ми́лостивъ, рабѡ́мъ твои́мъ.
Сла́ва, и҆ ны́нѣ: то́йже. И҆ чте́нїе пра́здника.
Пѣ́снь д҃.
І҆рмо́съ: Оу҆слы́шахъ слꙋ́хъ си́лы крⷭ҇та̀, ꙗ҆́кѡ ра́й ѿве́рзесѧ и҆́мъ, и҆ возопи́хъ: сла́ва си́лѣ твое́й гдⷭ҇и.
Возне́слсѧ є҆сѝ во сла́вѣ, а҆́гг҃лѡвъ цр҃ю̀, ᲂу҆тѣ́шителѧ на́мъ ѿ ѻ҆ц҃а̀ посла́въ. тѣ́мже вопїе́мъ: сла́ва хрⷭ҇тѐ вознесе́нїю твоемꙋ̀.
Ꙗ҆́кѡ взы́де сп҃съ ко ѻ҆ц҃ꙋ̀ съ пло́тїю, ᲂу҆диви́шасѧ а҆́гг҃льскаѧ вѡ́инства, и҆ возопи́ша: сла́ва хрⷭ҇тѐ вознесе́нїю твоемꙋ̀.
А҆́гг҃льскїѧ си̑лы го́рнѣйшымъ вопїѧ́хꙋ: врата̀ возми́те, хрⷭ҇тꙋ̀ на́шемꙋ цр҃ю̀, є҆го́же воспѣва́емъ вкꙋ́пѣ со ѻ҆ц҃е́мъ и҆ дх҃омъ.
Бг҃оро́диченъ:
Дв҃а родѝ, и҆ мт҃рнѧѧ не позна̀: но мт҃и ᲂу҆́бѡ є҆́сть, дв҃ою же пребы́сть, ю҆́же воспѣва́юще, ра́дꙋйсѧ бцⷣе, взыва́емъ.
И҆́нъ. І҆рмо́съ: Сѣдѧ́й во сла́вѣ:
І҆и҃съ жизнода́вецъ прїи́мъ, и҆̀хже возлюбѝ, на є҆леѡ́нскꙋю го́рꙋ восхо́дитъ, и҆ си́хъ бл҃гословѝ, и҆ <<рп҃ѳ ѡ҆б.: 378>> ѻ҆́блакомъ носи́мь ѻ҆́ч҃аѧ нѣ́дра доспѣ̀, ꙗ҆̀же ника́коже бѣ̀ ѡ҆ста́вилъ.
Мі́ръ ве́сь пра́зднꙋетъ ви́димый и҆ неви́димый: въ ра́дости а҆́гг҃ли ликꙋ́ютъ, и҆ чл҃вѣ́цы славосло́вѧще непреста́ннѡ вознесе́нїе, пло́тїю соедини́вшагѡсѧ на́мъ бла́гостїю.
Сла́ва:
Разрꙋши́вый держа́вꙋ сме́рти ꙗ҆́кѡ безсме́ртный гдⷭ҇и, безсме́ртїе всѣ̑мъ дарова́лъ є҆сѝ человѣколю́бче, и҆ возне́слсѧ є҆сѝ во сла́вѣ, зрѧ́щымъ тѧ̀ честны̑мъ ᲂу҆ч҃нкѡ́мъ і҆и҃се всеси́льне.
И҆ ны́нѣ: бг҃оро́диченъ:
Бл҃же́нно чре́во твоѐ всенепоро́чнаѧ бы́сть: чре́во бо а҆́дово пресла́внѡ и҆стощи́вшаго, несказа́ннѡ вмѣсти́ти сподо́биласѧ є҆сѝ: є҆го́же молѝ спастѝ на́съ пою́щихъ тѧ̀.
Катава́сїа: Цр҃ю̀ цр҃е́й, ꙗ҆ковы́й ѿ ꙗ҆кова́гѡ є҆ди́нъ сло́ве произше́дый, ѿ ѻ҆ц҃а̀ безвино́внагѡ, равномо́щнаго твоего̀ дх҃а а҆пⷭ҇лѡмъ и҆́стиннѡ посла́лъ є҆сѝ, ꙗ҆́кѡ бл҃годѣ́телѧ пою́щымъ: сла́ва держа́вѣ твое́й гдⷭ҇и.
Пѣ́снь є҃.
І҆рмо́съ: Оу҆́тренююще вопїе́мъ тѝ гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ бо тебѐ и҆но́гѡ не зна́емъ.
И҆спо́лнивъ весе́лїѧ всѧ́чєскаѧ млⷭ҇тиве, къ гѡ́рнимъ си́ламъ съ пло́тїю прише́лъ є҆сѝ.
А҆́гг҃льскїѧ си̑лы взе́млема тебѐ ви́дѣвше, врата̀, взыва́хꙋ цр҃ю̀ на́шемꙋ, возми́те.
А҆пⷭ҇ли ви́дѣвше возвыша́ема сп҃са, съ тре́петомъ взыва́хꙋ цр҃ю̀ на́шемꙋ: сла́ва тебѣ̀. <<р҃ч: 379>>
Бг҃оро́диченъ:
Дв҃ꙋ по рождествѣ̀ пое́мъ тѧ̀ бцⷣе, ты́ бо бг҃а сло́ва пло́тїю мі́рови родила̀ є҆сѝ.
И҆́нъ. І҆рмо́съ: Оу҆жасо́шасѧ всѧ́чєскаѧ:
Оу҆мертви́въ сме́рть твое́ю сме́ртїю гдⷭ҇и, взе́мъ и҆̀хже возлюби́лъ є҆сѝ, возше́лъ є҆сѝ на ма́сличнꙋю го́рꙋ ст҃ꙋ́ю, и҆ ѿтꙋ́дꙋ восте́клъ є҆сѝ хрⷭ҇тѐ къ твоемꙋ̀ роди́телю, ѻ҆́блакомъ носи́мь.
Стра́нно твоѐ ржⷭ҇тво̀, стра́нно твоѐ воскресе́нїе, стра́нно и҆ стра́шно твоѐ жизнода́вче, є҆́же ѿ горы̀ бж҃е́ственное вознесе́нїе, є҆́же и҆з̾ѡбразꙋ́ѧ и҆лїа̀ четвероко́нный восхожда́ше, воспѣва́ѧ тѧ̀ человѣколю́бче.
Сла́ва:
Зрѧ́щымъ а҆по́столѡмъ вѣща́хꙋ а҆́гг҃ли: мꙋ́жїе галїле́йстїи, что̀ чꙋдите́сѧ вознесе́нїю жизнода́вца хрⷭ҇та̀: се́й прїи́детъ па́ки на зе́млю сꙋди́ти мі́рꙋ всемꙋ̀, ꙗ҆́кѡ сꙋдїѧ̀ пра́веднѣйшїй.
И҆ ны́нѣ: бг҃оро́диченъ:
Дв҃ꙋ сохрани́въ тѧ̀ по ржⷭ҇твѣ̀ нетлѣ́ннꙋ, восхо́дитъ хрⷭ҇то́съ ко ѻ҆ц҃ꙋ̀ бг҃ороди́тельнице, є҆го́же не ѡ҆ста́ви, а҆́ще и҆ пло́ть прїѧ́тъ и҆з̾ тебѐ, мы́сленнꙋю же и҆ ѡ҆дꙋшевле́ннꙋю, за млⷭ҇ть неизрече́ннꙋю.
Катава́сїа: Рѣши́тельное ѡ҆чище́нїе грѣхѡ́въ, ѻ҆гнедохнове́ннꙋю прїими́те дх҃а ро́сꙋ, ѽ ча́да свѣтоѻбра́знаѧ цр҃кѡ́внаѧ. ны́нѣ ѿ сїѡ́на бо и҆зы́де зако́нъ, ѧ҆зыкоѻгнеѻбра́знаѧ дх҃а бл҃года́ть.
Пѣ́снь ѕ҃.
І҆рмо́съ: Ѡ҆бы́де мѧ̀ бе́здна, гро́бъ мнѣ̀ ки́тъ бы́сть, <<р҃ч ѡ҆б.: 380>> а҆́зъ же возопи́хъ къ тебѣ̀ человѣколю́бцꙋ, и҆ спасе́ мѧ десни́ца твоѧ̀ гдⷭ҇и.
Взыгра́шасѧ а҆пⷭ҇ли, зрѧ́ще на высотꙋ̀ дне́сь зижди́телѧ взе́млема, ᲂу҆пова́нїемъ дх҃а, и҆ стра́хомъ зовѧ́хꙋ: сла́ва восхо́дꙋ твоемꙋ̀.
Предста́ша а҆́гг҃ли, вопїю́ще хрⷭ҇тѐ ᲂу҆ченикѡ́мъ твои́мъ: и҆́мже ѻ҆́бразомъ ви́дѣсте хрⷭ҇та̀ восходѧ́ща съ пло́тїю, па́ки прїи́детъ пра́ведный всѣ́хъ сꙋдїѧ̀.
Ꙗ҆́кѡ ви́дѣша тѧ̀ сп҃се на́шъ нбⷭ҇ныѧ си̑лы, на высотꙋ̀ взе́млема съ тѣ́ломъ, взыва́хꙋ, глаго́люще: вели́ко влⷣко, человѣколю́бїе твоѐ.
Бг҃оро́диченъ:
Кꙋпинꙋ́ тѧ неѡпали́мꙋю, и҆ го́рꙋ, и҆ лѣ́ствицꙋ ѡ҆дꙋшевле́ннꙋю, и҆ две́рь нбⷭ҇нꙋю досто́йнѡ сла́вимъ мр҃і́е сла́внаѧ, правосла́вныхъ похвало̀.
И҆́нъ. І҆рмо́съ: Бж҃е́ственное сїѐ и҆ всечестно́е:
Да ка́плютъ на́мъ свы́ше ѻ҆́блацы весе́лїе вѣ́чное, хрⷭ҇то́съ бо, ѻ҆́блакомъ ꙗ҆́кѡ херꙋві́мы носи́мый, къ своемꙋ̀ ѻ҆ц҃ꙋ̀ восхо́дитъ дне́сь.
Пло́ти ꙗ҆ви́всѧ подо́бїемъ, пре́жде разстоѧ̑щаѧсѧ собра́лъ є҆сѝ во є҆ди́но человѣколю́бче, и҆ возне́слсѧ є҆сѝ ще́дре въ нбⷭ҇наѧ, зрѧ́щымъ тѧ̀ ᲂу҆ченикѡ́мъ твои́мъ.
Сла́ва: Что̀ червле́ны ри̑зы пло́ти соедини́вшагѡсѧ дебельствꙋ̀; ст҃і́и а҆́гг҃ли хрⷭ҇та̀ зрѧ́ще вѣща́хꙋ, стра́сти честны́ѧ бж҃е́ствєнныѧ носѧ́ща ѻ҆́бразы.
И҆ ны́нѣ: бг҃оро́диченъ:
Пое́мъ ѻ҆трокови́це зача́тїе, пое́мъ твоѐ неизрече́нное <<рч҃а: 381>> ржⷭ҇тво̀, и҆́мже и҆зба́вихомсѧ чи́стаѧ тлѝ и҆ ѡ҆ѕлобле́нїѧ, и҆ мра́чнагѡ а҆́дова затворе́нїѧ.
Катава́сїа: Ѡ҆чище́нїе на́мъ хрⷭ҇тѐ и҆ сп҃се́нїе влⷣко, возсїѧ́лъ є҆сѝ ѿ дв҃ы, да ꙗ҆́кѡ проро́ка ѿ ѕвѣ́рѧ морска́гѡ пе́рсей і҆ѡ́нꙋ, ѿ тлѝ и҆схити́ши всего̀ а҆да́ма всеро́дна па́дшаго.
Конда́къ самогла́сенъ, гла́съ ѕ҃:
Є҆́же ѡ҆ на́съ и҆спо́лнивъ смотре́нїе, и҆ ꙗ҆̀же на землѝ соедини́въ нбⷭ҇нымъ, возне́слсѧ є҆сѝ во сла́вѣ хрⷭ҇тѐ бж҃е на́шъ, ника́коже ѿлꙋча́ѧсѧ, но пребыва́ѧ неѿстꙋ́пный, и҆ вопїѧ̀ лю́бѧщымъ тѧ̀: а҆́зъ є҆́смь съ ва́ми, и҆ никто́же на вы̀.
І҆́косъ:
Ꙗ҆̀же землѝ на землѝ ѡ҆ста́вившїи, ꙗ҆̀же пе́пєльнаѧ пе́рсти ᲂу҆стꙋпа́ющїи, прїиди́те воспрѧ́немъ, и҆ на высотꙋ̀ возведе́мъ ѻ҆́чи и҆ мы̑сли, впери́мъ ви́ды, вкꙋ́пѣ чꙋ̑вства, на нбⷭ҇наѧ врата̀ сме́ртнїи, непщꙋ́имъ бы́ти въ ма́сличной горѣ̀, и҆ взира́ти на и҆збавлѧ́ющаго на ѻ҆́блацѣхъ носи́ма. ѿѻнꙋ́дꙋ бо гдⷭ҇ь на нб҃са̀ востечѐ, и҆ та́мѡ даролюбе́зны да́ры раздаѧ̀ а҆пⷭ҇лѡмъ свои́мъ, ᲂу҆тѣ́шивъ ѧ҆̀ ꙗ҆́кѡ ѻ҆ц҃ъ, и҆ ᲂу҆тверди́въ ѧ҆̀, наста́вивъ ꙗ҆́кѡ сынѡ́въ, и҆ речѐ къ ни́мъ: не разлꙋча́юсѧ ва́съ, а҆́зъ є҆́смь съ ва́ми, и҆ никто́же на вы̀.
Сѷнаѯа́рь на вознесе́нїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀.
Стїхѝ: Ѡ҆деснꙋ́ю сѣ́лъ є҆сѝ ѻ҆ц҃а̀ сло́ве:
Вѣ́рꙋ ᲂу҆ченикѡ́мъ и҆звѣ́стншꙋю показа́вый.
Въ то́йже де́нь, въ четверто́къ шесты́ѧ недѣ́ли по па́сцѣ, вознесе́нїе пра́зднꙋемъ гдⷭ҇а бг҃а и҆ сп҃са на́шегѡ і҆и҃са хрⷭ҇та̀. Поне́же бо со ᲂу҆ченикѝ пре́жде стра́сти пребыва́ѧ, всест҃а́гѡ дх҃а <<рч҃а ѡ҆б.: 382>> ѡ҆бѣща̀ прише́ствїе, ре́къ: поле́зно є҆́сть, да а҆́зъ и҆дꙋ̀: а҆́ще бо а҆́зъ не и҆дꙋ̀, ᲂу҆тѣ́шитель не прїи́детъ. И҆ па́ки: є҆гда́ же прїи́детъ ѻ҆́нъ, наꙋчи́тъ ва́съ на всю̀ и҆́стинꙋ. По воскресе́нїи же и҆з̾ ме́ртвыхъ, во дне́хъ четы́редесѧтихъ ꙗ҆влѧ́ѧсѧ и҆̀мъ, не вкꙋ́пѣ, но ѻ҆собопребыва́нїемъ ꙗ҆ды́й съ ни́ми и҆ пїѧ̀, и҆звѣ́стнѣйшее воскресе́нїе представлѧ́ѧ. Коне́чнѣе мнѡ́га ѡ҆ црⷭ҇твїи бж҃їи ѡ҆бѣтова́въ, заповѣ́даше си̑мъ ѿ і҆ерꙋсали́ма не ѿлꙋча́тисѧ, но та́мѡ пребыва́ти, прест҃а́гѡ дх҃а прише́ствїѧ жда́ти, и҆ тѣ́мъ креща́ємымъ: водо́ю бо бѧ́ше и҆ є҆ди́ною пре́жде креще́нїе ѿ і҆ѡа́нна, а҆́ще и҆ по́слѣжде є҆пїфа́нїй кѵ́прскїй повѣствова̀: ꙗ҆́кѡ бг҃осло́въ ᲂу҆́бѡ і҆ѡа́ннъ бцⷣꙋ крестѝ, пе́тръ же и҆ то́й и҆ про́чыѧ а҆по́столы. Заповѣ́да же и҆́мъ пребыва́ти во і҆ерꙋсали́мѣ, да та́мѡ пре́жде про́повѣдь є҆ѵⷢ҇лїа и҆звѣсти́тсѧ, да не ка́кѡ въ чꙋжда̑ѧ ѿше́дше мѣста̀, ᲂу҆до́бнѡ ѡ҆бо́лгани бꙋ́дꙋтъ, и҆ ꙗ҆́кѡ до́лжно бѧ́ше, ꙗ҆́кѡ во́инѡмъ нѣ́кимъ ѿсю́дꙋ ᲂу҆гото́витисѧ ѻ҆рꙋ́жїемъ дх҃а, и҆ та́кѡ на бра́нь поитѝ вра̑гъ хрⷭ҇то́выхъ. Но поне́же вре́мѧ наста̀ вознесе́нїѧ, возво́дитъ ᲂу҆̀бо и҆̀хъ на го́рꙋ є҆леѡ́нскꙋю: нарица́етсѧ же си́це, занѐ мно́жайшими ма́слинами насажде́на бѣ̀. и҆ глаго́лавъ и҆̀мъ ѡ҆ є҆́же въ концѣ̀ сегѡ̀ проповѣ́данїѧ: є҆ще́ же и҆ ѡ҆ непостижи́момъ свое́мъ црⷭ҇твїи въ бꙋ́дꙋщемъ, поне́же и҆ ѻ҆́нѣхъ не и҆скꙋша́ти є҆го̀ хотѧ́щихъ зрѧ́ще, сꙋ́щей та́мѡ и҆ пречи́стѣй є҆гѡ̀ ма́тери, приставлѧ́етъ а҆́гг҃лы и҆̀мъ, на нб҃са̀ восхожде́нїе показꙋ́ющыѧ. И҆ зрѧ́щымъ ᲂу҆́бѡ взѧ́тсѧ ѿ среды̀ и҆́хъ, ѻ҆́блакꙋ ѻ҆́нагѡ под̾и́мшꙋ, и҆ та́кѡ ѿ а҆́гг҃лъ предсыла́емь, повелѣва́ющихъ дрꙋ́гъ дрꙋ́гꙋ нбⷭ҇ныхъ двере́й взѧ́тїе, и҆ дивѧ́щихсѧ є҆́же ѿ крове́й пло́ти є҆гѡ̀ червле́нномꙋ, взы́де и҆ сѣ́де ѡ҆деснꙋ́ю ѻ҆ц҃а̀, ѡ҆божи́въ пло́ть и҆ дерзнꙋ̀ глаго́лати, сотвори́въ сїю̀ кꙋ́пнѡ бж҃е́ственнꙋю, є҆́юже мы̀ примири́хомсѧ, дре́внѣй враждѣ̀ разрꙋши́вшейсѧ. А҆пⷭ҇лѡмъ ᲂу҆́бѡ а҆́гг҃ли въ ви́дѣ мꙋже́й предста́ша глаго́люще: мꙋ́жїе галїле́йстїи, что̀ стоитѐ дивѧ́щесѧ, и҆ на нб҃о взира́юще; се́й є҆го́же ви́дите съ пло́тїю бг҃а і҆и҃са, се́й прїи́детъ па́ки съ пло́тїю ꙗ҆́вѣ: ѻ҆ба́че не ꙗ҆́коже пе́рвѣе, ᲂу҆бо́зѣ же и҆ молчали́внѣ, но со сла́вою вели́кою, ꙗ҆́коже ны́нѣ зритѐ ѿ а҆́гг҃лъ провожда́ема. Тогда̀ а҆пⷭ҇ли <<рч҃в: 383>> є҆́же взира́ти ѡ҆ста́вльше, возврати́шасѧ ѿ горы̀ є҆леѡ́нъ: бли́зъ же сїѧ̀ є҆́сть ѿ і҆ерꙋсали́ма двѣ̀ ты́сѧщи и҆ четы́редесѧть ножны́хъ сто́пъ, разстоѧ́щи є҆́й: се́ бо є҆́сть сꙋббѡ́тѣ пꙋ́ть. Си́це же ᲂу҆зако́нено бы́сть мѡѷсе́емъ на толи́кѡ сто́пъ въ сꙋббѡ́тꙋ ходи́ти, зане́же и҆ сѣ́нь свидѣ́нїѧ, толи́цѣми стопа́ми но́гꙋ бѧ́ше ѿстоѧ́щи ѿ і҆ꙋде́йскагѡ полка̀. Возмо́жно бо бѣ̀ нѣ̑кимъ та́мѡ въ сꙋббѡ́тꙋ ходи́ти поклони́тисѧ, и҆ не вѧ́щшее ше́ствїе протѧза́ти, сегѡ̀ ра́ди нарече́сѧ и҆ сꙋббѡ́ты пꙋ́ть. Мни́тсѧ же нѣ̑кимъ ѿсю́дꙋ, ꙗ҆́кѡ и҆ хрⷭ҇то́во вознесе́нїе въ сꙋббѡ́тꙋ бы́сть, ѻ҆ба́че погрѣши́ша. Возвра́щшесѧ же а҆пⷭ҇ли внидо́ша въ го́рницꙋ, въ не́йже бѣ́ша соше́дшесѧ съ мѷроно́сицами жена́ми, и҆ мт҃рїю сло́ва, посто́мъ и҆ мл҃твами, и҆ моле́нїемъ ᲂу҆пражнѧ́ющесѧ, и҆ наше́ствїѧ всест҃а́гѡ дх҃а ѡ҆жида́юще, ꙗ҆́коже бѣ̀ ѡ҆бѣща́нїе. Вознесы́йсѧ во сла́вѣ хрⷭ҇тѐ бж҃е, поми́лꙋй на́съ. а҆ми́нь.
Пѣ́снь з҃.
І҆рмо́съ: Въ пещѝ ѻ҆́гненнѣй пѣсносло́вцы спасы́й ѻ҆́троки, блгⷭ҇ве́нъ бг҃ъ ѻ҆тє́цъ на́шихъ.
На ѻ҆́блацѣхъ свѣ́та вознесы́йсѧ, и҆ спасы́й мі́ръ, бл҃гослове́нъ бг҃ъ ѻ҆тє́цъ на́шихъ.
На ра́мꙋ сп҃се, заблꙋ́ждшее взе́мъ є҆стество̀, возне́ссѧ, бг҃ꙋ и҆ ѻ҆ц҃ꙋ̀ приве́лъ є҆сѝ.
Возше́дый во пло́ти къ безпло́тномꙋ ѻ҆ц҃ꙋ̀, бл҃гослове́нъ бг҃ъ ѻ҆тє́цъ на́шихъ.
Оу҆мерщвле́ное на́ше грѣхо́мъ є҆стество̀ взе́мъ, твоемꙋ̀ сво́йственномꙋ ѻ҆ц҃ꙋ̀ сп҃се приве́лъ є҆сѝ.
Бг҃оро́диченъ:
Ѿ дв҃ы ро́ждсѧ, ю҆́же бцⷣꙋ содѣ́лалъ є҆сѝ, бл҃гослове́нъ бг҃ъ ѻ҆тє́цъ на́шихъ.
И҆́нъ. і҆рмо́съ: Не послꙋжи́ша тва́ри:
Свѣ́тлый тѧ̀ свѣ́тъ сꙋ́ща, под̾ѧ́тъ ѻ҆́блакъ гдⷭ҇и, ѿ <<рч҃в ѡ҆б.: 384>> землѝ па́че ᲂу҆ма̀ воспрїе́млема и҆ нбⷭ҇нїи собо́ри восхвали́ша со а҆пⷭ҇лы, глаго́люще: бж҃е бл҃гослове́нъ є҆сѝ.
Рꙋка́ма всѝ ра́дꙋющесѧ воспле́щимъ, вознесе́нїемъ хрⷭ҇то́вымъ, и҆ воскли́кнемъ: взы́де бг҃ъ во гла́сѣ трꙋ́бнѣ, и҆ сѣ́де ѡ҆деснꙋ́ю, ꙗ҆́кѡ сопресто́ленъ ѻ҆ц҃ꙋ̀ во вѣ́ки.
Сла́ва:
Поѧ̀ дре́вле мѡѷсе́й вели́кїй, взыва́ше: да покло́нѧтсѧ восходѧ́щꙋ хрⷭ҇тꙋ̀ нбⷭ҇нїи а҆́гг҃ли, ꙗ҆́кѡ всѣ́хъ цр҃ю̀, є҆мꙋ́же зове́мъ: ѻ҆тцє́въ гдⷭ҇и и҆ бж҃е блгⷭ҇ве́нъ є҆сѝ.
И҆ ны́нѣ: бг҃оро́диченъ:
Ѽ чꙋде́съ пресла́вныхъ! ка́кѡ вмѣсти́ла є҆сѝ бг҃а невмѣсти́маго бг҃ора́дованнаѧ, пло́тїю ѡ҆бнища́вшаго, со сла́вою мно́гою въ небє́снаѧ возне́сшагосѧ дне́сь, и҆ ѡ҆живи́вшаго человѣ́ки;
Катава́сїа: Согла́снаѧ возшꙋмѣ̀ ѻ҆рга́нскаѧ пѣ́снь, почита́ти златосотворе́нный бездꙋ́шный и҆стꙋка́нъ: ᲂу҆тѣ́шителева же свѣтоно́снаѧ бл҃года́ть почествꙋ́етъ, є҆́же вопи́ти: трⷪ҇це є҆ди́наѧ, равноси́льнаѧ, безнача́льнаѧ, бл҃гослове́на є҆сѝ.
Пѣ́снь и҃.
І҆рмо́съ: И҆з̾ ѻ҆ц҃а̀ пре́жде вѣ́къ рожде́ннаго сн҃а, и҆ бг҃а, и҆ въ послѣ̑днѧѧ лѣ̑та воплоще́ннаго ѿ дв҃ы мт҃ре, свѧще́нницы по́йте, лю́дїе превозноси́те во всѧ̀ вѣ́ки.
Во двою̀ сꙋщєствꙋ̀ возлетѣ́вшаго жизнода́вца хрⷭ҇та̀ на небеса̀ со сла́вою, и҆ ѻ҆ц҃ꙋ̀ сосѣдѧ́щаго, сщ҃е́нницы по́йте, лю́дїе превозноси́те во всѧ̀ вѣ́ки.
Ѿ рабо́ты і҆́дѡльскїѧ тва́рь и҆зба́вившаго, и҆ предста́вившаго тꙋ̀ свобо́днꙋ твоемꙋ̀ ѻ҆ц҃ꙋ̀, тебѐ сп҃се пое́мъ, и҆ тебѐ превозно́симъ во всѧ̀ вѣ́ки. <<рч҃г: 385>>
Свои́мъ схожде́нїемъ низложи́вшаго сꙋпоста́та, и҆ свои́мъ возше́ствїемъ возне́сшаго человѣ́ки, свѧще́нницы по́йте, лю́дїе превозноси́те во всѧ̀ вѣ́ки.
Бг҃оро́диченъ:
Херꙋві́мѡвъ превы́шшаѧ ꙗ҆ви́ласѧ є҆сѝ бцⷣе чи́стаѧ, во чре́вѣ твое́мъ си́ми носи́маго носи́вшаѧ: є҆го́же со безпло́тными, человѣ́цы славосло́вимъ во всѧ̀ вѣ́ки.
И҆́нъ. І҆рмо́съ: Ѻ҆́троки благочести̑выѧ:
Ꙗ҆ви́шасѧ ᲂу҆́мове а҆пⷭ҇лѡмъ въ вознесе́нїи, и҆ вѣща́хꙋ: что̀ взира́юще стоитѐ дивѧ́щесѧ; се́й восходѧ́й въ небє́снаѧ, прїи́детъ и҆ па́ки сꙋди́ти и҆̀же на землѝ человѣ́кѡмъ, сꙋдїѧ̀ сы́й є҆ди́нъ.
Дади́мъ бг҃ꙋ вели́чїе, хвалы̀ согла́сїе воскли́кнемъ, воспои́мъ, ликꙋ́имъ, рꙋка́ми же воспле́щимъ: взы́де бг҃ъ на́шъ на нб҃са̀ ѿ землѝ, а҆́гг҃лѡмъ, а҆рха́гг҃лѡмъ пою́щымъ сего̀, ꙗ҆́кѡ влⷣкꙋ и҆ творца̀ всѣ́хъ.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Взѧ́тсѧ превы́ше а҆́гг҃лъ є҆стество̀ на́ше, дре́вле ѿпа́дшее, и҆ на прⷭ҇то́лѣ посажде́но бы́сть бж҃е́ственнѣ, па́че смы́сла: прїиди́те торжествꙋ́имъ и҆ воззове́мъ: гдⷭ҇а по́йте дѣла̀, и҆ превозноси́те во всѧ̑ вѣ́ки.
И҆ ны́нѣ:
Сѐ сн҃ъ тво́й бцⷣе, плѣни́въ крⷭ҇то́мъ свои́мъ сме́рть, воскре́се тридне́венъ, и҆ ᲂу҆ченикѡ́мъ свои́мъ ꙗ҆́вльсѧ, востечѐ къ нбⷭ҇нымъ: съ ни́миже тебѣ̀ покланѧ́ющесѧ пое́мъ и҆ славосло́вимъ во всѧ̀ вѣ́ки.
Та́же, Хва́лимъ, бл҃гослови́мъ, покланѧ́емсѧ:
Катава́сїа: Разрѣша́етъ ᲂу҆́зы, и҆ ѡ҆роша́етъ пла́мень, <<рч҃г ѡ҆б.: 386>> трисвѣ́тлый бг҃онача́лїѧ ѻ҆́бразъ: пою́тъ ѻ҆́троцы, благослови́тъ же є҆ди́наго сп҃са и҆ вседѣ́телѧ, ꙗ҆́кѡ благодѣ́телѧ сотворе́ннаѧ всѧ́ческаѧ тва́рь.
Честнѣ́йшꙋю: не пое́мъ, но пое́мъ припѣ́въ:
Велича́й дꙋшѐ моѧ̀, возне́сшагосѧ ѿ землѝ на нб҃о, хрⷭ҇та̀ жизнода́вца.
Пѣ́снь ѳ҃.
І҆рмо́съ: Тѧ̀ па́че ᲂу҆ма̀ и҆ словесѐ мт҃рь бж҃їю, въ лѣ́то безлѣ́тнаго неизрече́ннѡ ро́ждшꙋю вѣ́рнїи є҆диномꙋ́дреннѡ велича́емъ.
Тебѐ и҆зба́вителѧ мі́ра хрⷭ҇та̀ бг҃а, а҆пⷭ҇ли ви́дѧще бж҃е́ственнѡ возвыша́ема, со стра́хомъ и҆гра́юще велича́хꙋ.
Твою̀ ѡ҆божи́вшꙋюсѧ пло́ть зрѧ́ще хрⷭ҇тѐ, на высотѣ̀ а҆́гг҃ли, дрꙋ́гъ ко дрꙋ́гꙋ глаго́лахꙋ: вои́стиннꙋ се́й є҆́сть бг҃ъ на́шъ.
Тебѐ безпло́тныхъ чи́нове хрⷭ҇тѐ бж҃е, на ѻ҆́блацѣхъ взе́млема ви́дѧще, взыва́хꙋ: сла́вы цр҃ю̀, врата̀ возми́те.
Тебѐ соше́дшаго да́же до послѣ́днихъ землѝ, и҆ человѣ́ка спа́сшаго, и҆ восхожде́нїемъ твои́мъ возвы́сившаго, сего̀ велича́емъ.
Бг҃оро́диченъ:
Ра́дꙋйсѧ бцⷣе мт҃и хрⷭ҇та̀ бг҃а: є҆го́же родила̀ є҆сѝ, дне́сь ѿ землѝ возноси́ма со а҆пⷭ҇лы зрѧ́щи, возвелича́ла є҆сѝ.
Вторы́й припѣ́въ:
А҆́гг҃ли восхожде́нїе влⷣки зрѧ́ще ᲂу҆жаса́хꙋсѧ, ка́кѡ со сла́вою взѧ́тсѧ ѿ землѝ на гѡ́рнѧѧ.
И҆́нъ. І҆рмо́съ: Всѧ́къ земноро́дный:
Ѽ дарѡ́въ па́че постиже́нїѧ! ѽ та́инства стра́шнагѡ! <<рч҃д: 387>> всѣ́ми бо влады́чествꙋѧй, ѿ землѝ ѿходѧ̀ къ нбⷭ҇нымъ, ᲂу҆ченикѡ́мъ посла̀ дх҃а свѧта́го, просвѣти́вшаго си́хъ смы́слъ, и҆ ѻ҆́гненны сотвори́вшаго благода́тїю.
Полцы̀ ᲂу҆чени́честїи, гдⷭ҇ь речѐ, вы̀ сѣди́те во і҆ерꙋсали́мѣ: и҆ а҆́зъ низпослю̀ ва́мъ ᲂу҆тѣ́шителѧ дрꙋга́го, ѻ҆ц҃ꙋ̀ сопресто́льна и҆ мнѣ̀ равноче́стна, є҆го́же ви́дите взима́ема, и҆ ѻ҆́блакомъ свѣ́тлымъ носи́ма.
Взѧ́тсѧ ꙗ҆́вѣ великолѣ́пїе вы́ше нб҃съ, пло́тїю ѡ҆бнища́вшагѡ, и҆ сосѣдѣ́нїемъ ѻ҆ц҃а̀ почте́сѧ є҆стество̀ на́ше ѿпа́дшее: торжествꙋ́имъ, и҆ согла́снѡ всѝ воскли́кнемъ, воспле́щимъ рꙋка́ми ра́дꙋющесѧ.
Бг҃оро́диченъ:
Свѣ́тъ ѿ свѣ́та возсїѧ́вый всенепоро́чнаѧ, и҆з̾ тебѐ возсїѧ̀, и҆ че́рность безбо́жїѧ всю̀ разрꙋшѝ, и҆ въ нощѝ спѧ́щихъ просвѣтѝ. сегѡ̀ ра́ди всѝ по до́лгꙋ тѧ̀ во вѣ́ки при́снѡ ᲂу҆блажа́емъ.
Катава́сїа: Ра́дꙋйсѧ цр҃и́це, мт҃родѣ́вственнаѧ сла́во: всѧ́ка бо ᲂу҆добоѡбраща́тельнаѧ благоглаго́ливаѧ ᲂу҆ста̀ виті́йствовати не мо́гꙋтъ, тебѐ пѣ́ти досто́йнѡ: низꙋмѣва́етъ же ᲂу҆́мъ всѧ́къ, твоѐ рождество̀ разꙋмѣ́ти. тѣ́мже тѧ̀ согла́снѡ сла́вимъ.
Є҆ѯапостїла́рїй самогла́сенъ:
Оу҆ченикѡ́мъ зрѧ́щымъ тѧ̀, возне́слсѧ є҆сѝ хрⷭ҇тѐ ко ѻ҆ц҃ꙋ̀ сосѣдѧ̀, а҆́гг҃ли предтекꙋ́ще зовѧ́хꙋ: возми́те врата̀, возми́те, цр҃ь бо взы́де къ нача́льномꙋ свѣ́тꙋ сла́вы. [Три́жды.]
На хвали́техъ, Всѧ́кое дыха́нїе: поста́вимъ стїхѝ д҃ и҆ пое́мъ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
А҆́гг҃льски и҆̀же въ мі́рѣ торжествꙋ́имъ, на престо́лѣ <<рч҃д ѡ҆б.: 388>> сла́вы бг҃ꙋ носи́момꙋ, взыва́юще пѣ́нїе: ст҃ъ є҆сѝ ѻ҆́ч҃е нбⷭ҇ный, соприсносꙋ́щный сло́ве, ст҃ъ є҆сѝ и҆ дш҃е всест҃ы́й.
Нача́льницы а҆́гг҃лѡвъ смотрѧ́юще, сп҃се, восхожде́нїѧ стра́нное, недоꙋмѣва́хꙋсѧ дрꙋ́гъ ко дрꙋ́гꙋ: что̀ видѣ́нїе сїѐ; человѣ́къ ᲂу҆́бѡ зра́комъ ви́димый, ꙗ҆́коже бг҃ъ, превы́ше небе́съ съ пло́тїю восхо́дитъ.
Галїле́ане зрѧ́ще тѧ̀ вознесе́нна, ѿ ма́сличныѧ горы̀ съ тѣ́ломъ сло́ве, слы́шахꙋ а҆́гг҃лѡвъ вопїю́щихъ и҆̀мъ: что̀ стоитѐ зрѧ́ще; се́й прїи́детъ па́ки съ пло́тїю, и҆́мже ѻ҆́бразомъ ви́дѣсте.
Повторѧ́юще а҃-ю.
Сла́ва, и҆ ны́нѣ, гла́съ в҃:
Роди́лсѧ є҆сѝ ꙗ҆́кѡ са́мъ восхотѣ́лъ є҆сѝ, ꙗ҆ви́лсѧ є҆сѝ ꙗ҆́кѡ са́мъ и҆зво́лилъ є҆сѝ: пострада́лъ є҆сѝ пло́тїю бж҃е на́шъ, и҆з̾ ме́ртвыхъ воскре́слъ є҆сѝ попра́въ сме́рть. возне́слсѧ є҆сѝ во сла́вѣ, всѧ́чєскаѧ и҆сполнѧ́ѧй, и҆ посла́лъ є҆сѝ на́мъ дх҃а бж҃е́ственнаго, є҆́же воспѣва́ти и҆ сла́вити твоѐ бж҃ество̀.
Славосло́вїе вели́кое. Дае́тсѧ и҆ ст҃ы́й є҆ле́й бра́тїи. И҆ поꙋче́нїе стꙋді́тово. И҆ ча́съ а҃-й въ притво́рѣ. И҆ соверше́нный ѿпꙋ́стъ.
На лїтꙋргі́и пое́мъ настоѧ́щыѧ а҆нтїфѡ́ны, ѱало́мъ м҃ѕ, гла́съ в҃: Всѝ ꙗ҆зы́цы восплещи́те рꙋка́ми, воскли́кните бг҃ꙋ гла́сомъ ра́дованїѧ. Моли́твами бцⷣы сп҃се спасѝ на́съ. Сті́хъ в҃: Ꙗ҆́кѡ гдⷭ҇ь вы́шнїй стра́шенъ, цр҃ь ве́лїй по все́й землѝ. Моли́твами бцⷣы: Сті́хъ г҃: Покорѝ лю́ди на́мъ и҆ ꙗ҆зы́ки под̾ но́ги на́шѧ. Моли́твами бцⷣы: Сті́хъ д҃: Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ. Моли́твами бцⷣы сп҃се спасѝ на́съ. Сла́ва, и҆ ны́нѣ: <<рч҃є: 389>> Моли́твами бцⷣы сп҃се спасѝ на́съ. А҆нтїфѡ́нъ в҃, ѱало́мъ м҃з, гла́съ в҃. Сті́хъ а҃: Ве́лїй гдⷭ҇ь и҆ хва́ленъ ѕѣлѡ̀, во гра́дѣ бг҃а на́шегѡ въ горѣ̀ ст҃ѣ́й є҆гѡ̀. Сп҃сѝ на́съ сн҃е бж҃їй, вознесы́йсѧ во сла́вѣ, пою́щыѧ тѝ: А҆ллилꙋ́їа. Сті́хъ в҃: Го́ры сїѡ́нскїѧ, рє́бра сѣ́верова, гра́дъ цр҃ѧ̀ вели́кагѡ. Спасѝ на́съ сн҃е бж҃їй: Сті́хъ г҃: Бг҃ъ въ тѧ́жестѣхъ є҆гѡ̀ зна́емь є҆́сть, є҆гда̀ застꙋпа́етъ и҆̀. Спасѝ на́съ сн҃е бж҃їй, вознесы́йсѧ: Сті́хъ д҃: Ꙗ҆́кѡ сѐ цр҃їе зе́мстїи собра́шасѧ, снидо́шасѧ вкꙋ́пѣ: Спасѝ на́съ сн҃е бж҃їй, вознесы́йсѧ: Сла́ва, и҆ ны́нѣ: Є҆диноро́дный сн҃е: А҆нтїфѡ́нъ г҃, ѱало́мъ м҃и, гла́съ д҃. Сті́хъ а҃. Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй. Тропа́рь, гла́съ д҃: Возне́слсѧ є҆сѝ во сла́вѣ хрⷭ҇тѐ бж҃е на́шъ: Сті́хъ в҃: Земноро́днїи же и҆ сы́нове человѣ́честїи, вкꙋ́пѣ бога́тъ и҆ ᲂу҆бо́гъ. Тропа́рь: Возне́слсѧ є҆сѝ во сла́вѣ: Сті́хъ г҃: Оу҆ста̀ моѧ̀ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Тропа́рь: Возне́слсѧ є҆сѝ во сла́вѣ: Сті́хъ д҃: Приклоню̀ въ при́тчꙋ ᲂу҆́хо моѐ, ѿве́рзꙋ во ѱалти́ри гана́нїе моѐ. Тропа́рь: Возне́слсѧ є҆сѝ: Вхо́дный: Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ. Тропа́рь: Возне́слсѧ є҆сѝ: Сла́ва, и҆ ны́нѣ: конда́къ: Є҆́же ѡ҆ на́съ и҆спо́лнивъ: Та́же трист҃о́е. Прокі́менъ, гла́съ з҃: Вознеси́сѧ на небеса̀ бж҃е, и҆ по все́й землѝ сла́ва твоѧ̀. Сті́хъ: Гото́во се́рдце моѐ бж҃е, гото́во се́рдце моѐ: воспою̀ и҆ пою̀ во сла́вѣ мое́й. А҆пⷭ҇лъ въ дѣѧ́нїихъ, зача́ло а҃: Пе́рвое ᲂу҆́бѡ сло́во сотвори́хъ: А҆ллилꙋ́їа, гла́съ в҃: Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ. Сті́хъ: Всѝ ꙗ҆зы́цы восплещи́те рꙋка́ми, воскли́кните бг҃ꙋ гла́сомъ ра́дованїѧ. Є҆ѵⷢ҇лїе лꙋкѝ, зача́ло рд҃і: <<рч҃є ѡ҆б.: 390>> Воскре́съ і҆и҃съ ѿ ме́ртвыхъ, и҆ ста̀ посредѣ̀ ᲂу҆чєни́къ свои́хъ: За Досто́йно, пое́мъ и҆ до ѿда́нїѧ і҆рмо́съ: Тѧ̀ па́че ᲂу҆ма̀: Прича́стный: Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ. А҆ллилꙋ́їа, три́жды.
На трапе́зѣ ве́лїе ᲂу҆тѣше́нїе бра́тїи.
Въ четверто́къ ве́чера вознесе́нїѧ,
каѳі́смы не глаго́лемъ: а҆́ще ли гдѣ̀ всено́щное не бы́сть, каѳі́смꙋ глаго́лемъ рѧдовꙋ́ю.
На Гдⷭ҇и воззва́хъ: поста́вимъ стїхѡ́въ ѕ҃: и҆ пое́мъ стїхи̑ры самогла́сны пра́здника г҃. и҆ мине́и г҃.
Пра́здника, гла́съ а҃:
Возше́дъ на нб҃са̀, ѿѻнꙋ́дꙋже и҆ соше́лъ є҆сѝ, не ѡ҆ста́ви на́съ си́рыхъ гдⷭ҇и: да прїи́детъ тво́й дх҃ъ, носѧ̀ ми́ръ мі́рови, покажѝ сыновѡ́мъ человѣ́чєскимъ дѣла̀ си́лы твоеѧ̀, гдⷭ҇и человѣколю́бче.
Возше́лъ є҆сѝ хрⷭ҇тѐ къ безнача́льномꙋ ѻ҆ц҃ꙋ̀ твоемꙋ̀, неѡпи́санныхъ є҆гѡ̀ нѣ́дръ не разлꙋчи́выйсѧ, и҆ прило́гъ си́лы хвале́нїѧ трист҃а́гѡ не прїѧ́ша, но є҆ди́нагѡ сн҃а и҆ по вочеловѣ́ченїи позна́ша тѧ̀ гдⷭ҇и, є҆диноро́дна ѻ҆ц҃ꙋ̀: во мно́жествѣ щедро́тъ твои́хъ поми́лꙋй на́съ.
А҆́гг҃ли твоѝ гдⷭ҇и, а҆пⷭ҇лѡмъ глаго́лахꙋ: мꙋ́жїе галїле́йстїи, что̀ стоитѐ, зрѧ́ще на нб҃о; се́й є҆́сть хрⷭ҇то́съ бг҃ъ, вознесы́йсѧ ѿ ва́съ на нб҃о, то́й прїи́детъ па́ки, и҆́мже ѻ҆́бразомъ ви́дѣсте є҆го̀ и҆дꙋ́ща на нб҃о: послꙋжи́те є҆мꙋ̀ въ преподо́бїи и҆ пра́вдѣ. <<рч҃ѕ: 391>>
Сла́ва: ст҃а́гѡ, а҆́ще и҆́мать, а҆́ще же нѝ:
Сла́ва, и҆ ны́нѣ: гла́съ в҃:
Роди́лсѧ є҆сѝ ꙗ҆́кѡ са́мъ восхотѣ́лъ є҆сѝ, ꙗ҆ви́лсѧ є҆сѝ ꙗ҆́кѡ са́мъ и҆зво́лилъ є҆сѝ: пострада́лъ є҆сѝ пло́тїю бж҃е на́шъ, и҆з̾ ме́ртвыхъ воскре́слъ є҆сѝ попра́въ сме́рть: возне́слсѧ є҆сѝ во сла́вѣ, всѧ́чєскаѧ и҆сполнѧ́ѧй, и҆ посла́лъ є҆сѝ на́мъ дх҃а бж҃е́ственнаго, є҆́же воспѣва́ти и҆ сла́вити твоѐ бж҃ество̀.
Вхо́дъ. Свѣ́те ти́хїй: Прокі́менъ вели́кїй, гла́съ з҃: Бг҃ъ на́шъ на нб҃сѝ и҆ на землѝ, всѧ̑ є҆ли̑ка восхотѣ̀ сотворѝ. Сті́хъ: Во и҆схо́дѣ і҆и҃левѣ ѿ є҆гѵ́пта, до́мꙋ і҆а́кѡвлѧ: Сті́хъ: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть. Сті́хъ: Что́ ти є҆́сть мо́ре, ꙗ҆́кѡ побѣ́гло є҆сѝ; и҆ тебѣ̀ і҆ѻрда́не, ꙗ҆́кѡ возврати́лсѧ є҆сѝ вспѧ́ть; И҆ па́ки: Бг҃ъ на́шъ на нб҃сѝ и҆ на землѝ: Є҆ктєнїѝ: Рце́мъ всѝ: И҆спо́лнимъ вече́рнюю моли́твꙋ:
На стїхо́внѣ стїхи̑ры, гла́съ в҃.
Подо́бенъ: Є҆гда̀ ѿ дре́ва:
Глаго́летъ и҆́же всѧ́чєскаѧ и҆сполнѧ́ѧй, ко ᲂу҆ченикѡ́мъ на го́рꙋ є҆леѡ́нскꙋю возше́дъ: прибли́жисѧ, ѽ дрꙋ́зи моѝ, восхожде́нїѧ вре́мѧ, ше́дше наꙋчи́те ꙗ҆зы́ки сло́вꙋ, є҆́же слы́шасте ѿ гла́са моегѡ̀. тогда̀ возне́слсѧ є҆сѝ <<рч҃ѕ ѡ҆б.: 392>> во сла́вѣ ꙗ҆́коже на колесни́цѣ: тѣ́мже тре́петомъ а҆пⷭ҇толи ᲂу҆жаса́хꙋсѧ.
Сті́хъ: Всѝ ꙗ҆зы́цы восплещи́те рꙋка́ми:
Є҆гда̀ мт҃ри со ᲂу҆ченикѝ спꙋтеше́ствꙋющымъ дрꙋ́гъ дрꙋ́гꙋ въ виѳа́нїю хрⷭ҇тѐ, возне́слъ є҆сѝ рꙋ́цѣ твоѝ, во бл҃гослове́нїе и҆́хъ, и҆ внегда̀ благослови́ти и҆̀хъ, ѻ҆́блакъ свѣ́та ѿ ѻ҆че́съ и҆́хъ а҆́бїе взѧ́тъ тѧ̀: тогда̀ возне́слсѧ є҆сѝ во сла́вѣ, и҆ десносѣда́тель вои́стиннꙋ ꙗ҆ви́лсѧ є҆сѝ ѻ҆ц҃ꙋ̀ спокланѧ́емь.
Сті́хъ: Взы́де бг҃ъ въ воскликнове́нїи:
Прїиди́те, совзы́демъ вѣ́рнїи на высо́кꙋю го́рꙋ є҆леѡ́нскꙋю, ꙗ҆́коже а҆пⷭ҇ли совосходѧ́ще, и҆ на высотꙋ̀ взе́мше сердца̀, и҆ мы̑сли, ᲂу҆́зримъ гдⷭ҇а ны́нѣ носи́ма. тѣ́мже и҆ мы̀ благода́рнѡ ра́дꙋющесѧ возопїи́мъ: сла́ва вознесе́нїю твоемꙋ̀ многоми́лостиве.
Сла́ва и҆ ны́нѣ: гла́съ ѕ҃:
На гора́хъ ст҃ы́хъ зрѧ́ще твоѐ вознесе́нїе хрⷭ҇тѐ, сїѧ́нїе сла́вы ѻ҆́ч҃и, воспѣва́емъ тво́й свѣтоѻбра́зный лица̀ зра́къ, кла́нѧемсѧ страстє́мъ твои́мъ, почита́емъ воскресе́нїе, сла́вное вознесе́нїе сла́вѧще: поми́лꙋй на́съ.
Тропа́рь пра́здника: Возне́слсѧ є҆сѝ: И҆ ѿпꙋ́стъ.
Слꙋ́жбꙋ мине́и рѧдова́гѡ ст҃а́гѡ, слꙋчи́вшагѡсѧ въ пра́здникъ вознесе́нїѧ, пое́мъ на повече́рїи.
Въ пѧто́къ вознесе́нїѧ на ᲂу҆́трени,
на Бг҃ъ гдⷭ҇ь: тропа́рь пра́здника.
По а҃-мъ стїхосло́вїи сѣда́ленъ, гла́съ и҃.
Подо́бенъ: Повелѣ́нное та́йнѡ:
На го́рꙋ возше́дъ є҆леѡ́нскꙋю ми́лостиве і҆и҃се, ѿтꙋ́дꙋ взѧ́лсѧ є҆сѝ: свѣ́тлый бо ѻ҆́блакъ ѿ земли́ тѧ под̾ѧ́тъ, зрѧ́щымъ ᲂу҆ченикѡ́мъ твои́мъ чꙋ́до стра́шное, вопїю́щымъ безплѡ́тнымъ на нб҃сѣ́хъ вы́шшымъ во́инствѡмъ: стра́хомъ врата̀ возми́тесѧ. съ ни́миже цр҃ѧ̀ тѧ̀ пое́тъ всѧ̀ тва́рь, всѣ́хъ бг҃а.
Сла́ва, и҆ ны́нѣ: то́йже. <<рч҃з: 393>>
По в҃-мъ стїхосло́вїи сѣда́ленъ, гла́съ и҃.
Подо́бенъ: Премꙋ́дрости сло́ва:
Всѣ́дъ на ѻ҆́блаки нбⷭ҇ныѧ, ѡ҆ста́вивъ ми́ръ сꙋ́щымъ на землѝ, возше́лъ и҆ сѣ́лъ є҆сѝ ѡ҆деснꙋ́ю ѻ҆ц҃а̀, ꙗ҆́кѡ є҆диносꙋ́щенъ семꙋ̀ сы́й и҆ дх҃ꙋ: а҆́ще бо и҆ въ пло́ти ꙗ҆ви́лсѧ є҆сѝ, но непрело́женъ пребы́лъ є҆сѝ. тѣ́мже ча́еши соверше́нїѧ коне́цъ, сꙋди́ти грѧды́й на зе́млю мі́рꙋ всемꙋ̀. правосꙋ́де гдⷭ҇и, пощадѝ дꙋ́шы на́шѧ, прегрѣше́нїй ѡ҆ставле́нїе да́рꙋѧ, ꙗ҆́кѡ бг҃ъ ми́лостивъ, рабѡ́мъ твои́мъ.
Сла́ва, и҆ ны́нѣ: то́йже.
И҆ ѱало́мъ н҃. Канѡ́нъ пра́здника, і҆рмо́съ по два́жды: тропарѝ на ѕ҃, є҆ди́нъ по є҆ди́номꙋ премѣнѧ́ѧ на всѧ́къ де́нь: и҆ мине́и на д҃. По г҃-й пѣ́сни конда́къ ст҃а́гѡ, и҆ і҆́косъ, и҆ сѣда́ленъ є҆гѡ̀. Сла́ва, и҆ ны́нѣ: пра́здника. По ѕ҃-й пѣ́сни конда́къ пра́здника, и҆ і҆́косъ. По ѳ҃-й пѣ́сни свѣти́ленъ пра́здника. Сла́ва: ст҃а́гѡ, а҆́ще и҆́мать: И҆ ны́нѣ: пра́здника. А҆́ще лѝ нѝ, Сла́ва, и҆ ны́нѣ: пра́здника.
На стїхо́внѣ стїхи̑ры пра́здника, гла́съ в҃.
Подо́бенъ: До́ме є҆ѵфра́ѳовъ:
Чꙋ́до новолѣ́пное, человѣ́ческое бо є҆стество̀ на нб҃са̀ взы́де, соедини́вшеесѧ сло́вꙋ бг҃ꙋ вседержи́телю.
Сті́хъ: Всѝ ꙗ҆зы́цы восплещи́те рꙋка́ми:
Возсїѧ̀ ꙗ҆́сный и҆ всесвѣ́тлый де́нь влⷣки, бж҃е́ственнагѡ на нб҃са̀ восхожде́нїѧ, просвѣща́ющїй всѧ́чєскаѧ.
Сті́хъ: Взы́де бг҃ъ въ воскликнове́нїи:
Ꙗ҆́коже ᲂу҆ченикѡ́мъ посла́лъ є҆сѝ съ высоты̀ сра́сленаго твоего̀ дх҃а: и҆ лю́демъ твои́мъ послѝ хрⷭ҇тѐ сп҃се бл҃года́ть твою̀. <<рч҃з ѡ҆б.: 394>>
Сла́ва, и҆ ны́нѣ: гла́съ є҃:
Гдⷭ҇и, взе́млющꙋ ти сѧ ѿѻнꙋ́дꙋже не разлꙋчи́лсѧ є҆сѝ, вѡ́инства а҆́гг҃лѡвъ и҆ всѣ́хъ безпло́тныхъ, ра́достїю вопїѧ́хꙋ го́рншымъ си́ламъ: возми́те врата̀ кнѧ́зи ва́шѧ, и҆ вни́детъ цр҃ь сла́вы: престо́лъ бо херꙋві́мскїй взѧ́тъ тѧ̀ съ пло́тїю, гдⷭ҇и сла́ва тебѣ̀.
И҆ про́чее ᲂу҆́трени, и҆ ѿпꙋ́стъ.
На лїтꙋргі́и блажє́нна ѿ канѡ́на пра́здника, пѣ́снь а҃-ѧ, со і҆рмосо́мъ на ѕ҃.
Въ пѧто́къ ве́чера вознесе́нїѧ,
На Гдⷭ҇и воззва́хъ: поста́вимъ стїхѡ́въ, ѕ҃: пра́здника, г҃: и҆ мине́и г҃.
Стїхи̑ры пра́здника, гла́съ д҃. Подо́бенъ: Да́лъ є҆сѝ зна́менїе:
Пострада́лъ є҆сѝ ꙗ҆́кѡ человѣ́къ, безстра́стный бж҃ество́мъ и҆ воскре́слъ є҆сѝ тридне́венъ плѣни́вый сме́рть, и҆ совоскреси́вый всѧ̑ и҆стлѣ́вшыѧ: и҆ возне́слсѧ є҆сѝ хрⷭ҇тѐ ко ѻ҆ц҃ꙋ̀, ѡ҆бѣща́въ посла́ти ᲂу҆тѣ́шителѧ сщ҃є́ннымъ а҆пⷭ҇лѡмъ твои̑мъ, і҆и҃се всеси́льне, сп҃се дꙋ́шъ на́шихъ.
Вы̀ что̀ стоитѐ зрѧ́ще на нб҃о; ви́димїи а҆́гг҃ли, ꙗ҆́кѡ человѣ́цы глаго́лахꙋ сло́ва таи́нникѡмъ. се́й є҆го́же зритѐ, ѻ҆́блакомъ свѣ́тлымъ возносѧ́щасѧ, то́йже прїи́детъ, и҆́мже ѻ҆́бразомъ ви́дѣсте є҆го̀ сꙋди́ти мі́рꙋ, ꙗ҆́коже речѐ: ше́дше ᲂу҆́бѡ всѧ̑ речє́ннаѧ сотвори́те.
По є҆́же ѿ гро́ба твоегѡ̀ па́че постиже́нїѧ воста́нїи, всеси́льне гдⷭ҇и, прїи́мъ и҆̀хже возлюби́лъ є҆сѝ, да́же до <<рч҃и: 395>> виѳа́нїи и҆зве́лъ є҆сѝ сло́ве, и҆ къ горѣ̀ бы́въ є҆леѡ́нстѣй, си́хъ благослови́въ, и҆ та́кѡ возне́слсѧ є҆сѝ повинꙋ́ющымсѧ а҆́гг҃лѡмъ тебѣ̀, і҆и҃се всеси́льне, сп҃се дꙋ́шъ на́шихъ.
Сла́ва, и҆ ны́нѣ: гла́съ ѕ҃:
Дне́сь на нб҃сѣ́хъ гѡ́рнїѧ си̑лы на́ше є҆стество̀ зрѧ́ще, дивѧ́щесѧ стра́ннагѡ ѻ҆́браза восхо́дꙋ, недоꙋмѣва́хꙋсѧ, дрꙋ́гъ ко дрꙋ́гꙋ глаго́люще: кто̀ се́й прише́дый; ви́дѧще же своего̀ влⷣкꙋ, нбⷭ҇наѧ врата̀ взѧ́ти повелѣва́хꙋ: съ ни́миже непреста́ннѡ воспои́мъ, съ пло́тїю ѿѻнꙋ́дꙋ па́ки грѧдꙋ́щаго, ꙗ҆́кѡ сꙋдїю̀ всѣ́хъ и҆ бг҃а всеси́льна.
На стїхо́внѣ стїхи̑ры, гла́съ в҃.
Подо́бенъ: До́ме є҆ѵфра́ѳовъ:
И҆спо́лнивый бл҃же ѻ҆те́ческое благоволе́нїе, соедини́вый же гѡ́рнѧѧ съ до́льними, возне́слсѧ є҆сѝ во сла́вѣ къ пе́рвѣйшымъ.
Сті́хъ: Всѝ ꙗ҆зы́цы восплещи́те рꙋка́ми:
Возне́слсѧ є҆сѝ къ твоемꙋ̀ роди́телю ще́дре, ѿѻнꙋ́дꙋже не разлꙋчи́лсѧ є҆сѝ, и҆ возне́слъ є҆сѝ до́лꙋ лежа́щее є҆стество̀ влⷣко.
Сті́хъ: Взы́де бг҃ъ въ воскликнове́нїи:
Ѻ҆́блакъ тѧ̀ свѣ́та воспрїѧ́тъ на высотꙋ̀, и҆ а҆́гг҃ли со стра́хомъ и҆ тре́петомъ слꙋжа́хꙋ бж҃е́ственномꙋ твоемꙋ̀ вознесе́нїю.
Сла́ва, и҆ ны́нѣ: гла́съ з҃:
На го́рꙋ є҆леѡ́нскꙋю прише́лъ є҆сѝ ми́лꙋѧй ро́дъ человѣ́ческїй, и҆ ѻ҆́блакъ под̾ѧ́тъ тѧ̀ ѿ ѻ҆́чїю ᲂу҆ченикѡ́въ твои́хъ, трепе́щꙋщымъ ᲂу҆́бѡ за видѣ́нїе, ра́дꙋющымсѧ же за ча́ѧнїе ст҃а́гѡ дх҃а: и҆́мже ᲂу҆тверди́въ сп҃се, поми́лꙋй на́съ. <<рч҃и ѡ҆б.: 396>>
Въ сꙋббѡ́тꙋ на ᲂу҆́трени.
По а҃-мъ стїхосло́вїи сѣда́ленъ, гла́съ а҃.
Подо́бенъ: Ка́мени запеча́танꙋ:
А҆́гг҃лѡмъ дивѧ́щымсѧ восхо́да стра́нномꙋ, и҆ ᲂу҆ченикѡ́мъ ᲂу҆жаса́ющымсѧ стра́шномꙋ взы́тїѧ, возше́лъ є҆сѝ со сла́вою ꙗ҆́кѡ бг҃ъ, и҆ врата̀ тебѣ̀ взѧ́шасѧ сп҃се. сегѡ̀ ра́ди си̑лы нбⷭ҇ныѧ дивлѧ́хꙋсѧ, вопїю́ще: сла́ва снизхожде́нїю твоемꙋ̀, сп҃се, сла́ва црⷭ҇твїю твоемꙋ̀, сла́ва вознесе́нїю твоемꙋ̀, є҆ди́не человѣколю́бче. [Два́жды.]
По в҃-мъ стїхосло́вїи, сѣда́ленъ, гла́съ а҃.
Подо́бенъ: Ка́мени запеча́танꙋ:
А҆́дꙋ плѣни́вшꙋсѧ ѿ тебѐ жизнода́вче, и҆ мі́рꙋ просвѣти́вшꙋсѧ во твое́мъ воскресе́нїи, возше́лъ є҆сѝ со сла́вою сп҃се всѧ̑ ѡ҆бдержа́ѧй рꙋко́ю. сегѡ̀ ра́ди со а҆́гг҃лы славосло́вимъ тѧ̀ вседержи́телю гдⷭ҇и: сла́ва вознесе́нїю твоемꙋ̀ хрⷭ҇тѐ, сла́ва црⷭ҇твїю твоемꙋ̀, сла́ва бл҃гоꙋтро́бїю твоемꙋ̀, є҆ди́не чл҃вѣколю́бче. [Два́жды.]
И҆ ѱало́мъ н҃. Канѡ́нъ пра́здникꙋ, со і҆рмосы̀ на и҃, и҆ мине́и на д҃.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Не ѡ҆ста́влю си̑ры, ꙗ҆̀же а҆́зъ собра́хъ, гдⷭ҇ь дрꙋгѡ́мъ глаго́лаше: но послю̀ ва́мъ дх҃а ст҃а́го.
Сті́хъ: Всѝ ꙗ҆зы́цы восплещи́те рꙋка́ми:
А҆́гг҃ли премꙋ̑дрымъ вопїѧ́хꙋ а҆пⷭ҇лѡмъ: ѽ мꙋ́жїе галїле́йстїи! и҆́мже ѻ҆́бразомъ зритѐ, то́й па́ки прїи́детъ.
Сті́хъ: Взы́де бг҃ъ въ воскликнове́нїи:
Снидо́ша съ ра́достїю ѿ є҆леѡ́нскїѧ горы̀ ᲂу҆ченицы̀ твоѝ сло́ве, сла́вѧще и҆ пою́ще бж҃е́ственное твоѐ вознесе́нїе. <<рч҃ѳ: 397>>
Сла́ва, и҆ ны́нѣ: Гла́съ и҃:
Возне́слсѧ є҆сѝ во сла́вѣ ѿ землѝ на нб҃са̀, всѧ̑ и҆сполнѧ́ѧй бж҃ество́мъ, и҆ ѡ҆деснꙋ́ю ѻ҆ц҃а̀ сѣ́лъ є҆сѝ, и҆́же въ нача́лѣ бг҃ъ сло́во, ѿѻнꙋ́дꙋже нбⷭ҇ныѧ си̑лы зрѧ́ще, а҆пⷭ҇лѡмъ страшли́ви глаго́лахꙋ: на кого̀ взира́ете на нб҃о; се́й, є҆го́же ви́дѣсте, то́й па́ки прїи́детъ со сла́вою сꙋди́ти все́й вселе́ннѣй, и҆ ѿда́ти комꙋ́ждо по дѣлѡ́мъ є҆гѡ̀. къ немꙋ́же возопїи́мъ: непостижи́ме гдⷭ҇и, сла́ва тебѣ̀.
И҆ ѻ҆бы́чный ѿпꙋ́стъ.
На лїтꙋргі́и пра́здника пѣ́снь г҃-ѧ, на ѕ҃. Прокі́менъ пра́здника: Вознеси́сѧ на нб҃са̀ бж҃е: А҆пⷭ҇лъ дѣѧ́нїй, зача́ло м҃г: Во є҆ди́нꙋ ѿ сꙋббѡ́тъ собра́вшымсѧ ᲂу҆ченикѡ́мъ: А҆ллилꙋ́їа пра́здника. Є҆ѵⷢ҇лїе і҆ѡа́нна, зача́ло м҃и: Глаго́лы, ꙗ҆̀же а҆́зъ глаго́лю ва́мъ: Прича́стенъ пра́здника.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.