Великая Среда

Великая Среда

<<уа҃і: 821>>

Во ст҃ы́й и҆ вели́кїй вто́рникъ повече́рїе вели́кое,

на не́мже пое́мъ трипѣ́снецъ, творе́нїе господи́на а҆ндре́а кри́тскагѡ. Гла́съ в҃.

Пѣ́снь г҃.

І҆рмо́съ: Непло́дствовавшїй мо́й ᲂу҆́мъ, плодоно́сенъ бж҃е покажи́ ми, дѣ́лателю до́брыхъ, насади́телю бл҃ги́хъ, бл҃гоꙋтро́бїемъ твои́мъ.

Кончи́ны вре́мѧ, ѡ҆брати́мсѧ про́чее, хрⷭ҇то́съ ᲂу҆чи́тъ: прїи́детъ бо во мгнове́нїи, прїи́детъ и҆ не ᲂу҆ме́длитъ, сꙋди́ти мі́рꙋ всемꙋ̀.

Внеза́пное своегѡ̀ прише́ствїѧ хрⷭ҇то́съ ꙗ҆влѧ́ѧ, речѐ, нѡ́ево дре́вле ненаде́жное тлѣ́нїе, навести́сѧ хотѧ́щее землѝ.

Ѿве́рзесѧ черто́гъ, ᲂу҆краси́сѧ съ ни́мъ бж҃е́ственный бра́къ, жени́хъ бли́зъ призыва́ѧй на́съ, ᲂу҆гото́вимсѧ про́чее.

Сі́мѡновъ до́мъ, невмѣсти́маго вездѣ̀, вмѣсти́ тѧ і҆и҃се цр҃ю̀, и҆ жена̀ грѣ́шнаѧ мѵ́ромъ тѧ̀ пома́за.

Бл҃гово́нїѧ та́инственнагѡ и҆спо́лнена жена̀, пе́рвагѡ и҆зба́висѧ ѕлово́нїѧ сп҃се, мно́гихъ грѣхѡ́въ. мѵ́ро бо и҆сточа́еши жи́зни.

Нбⷭ҇наѧ пи́ще а҆́лчꙋщымъ, животѐ са́мъ сы́й, ꙗ҆́лъ є҆сѝ хрⷭ҇тѐ съ человѣ́ки, проѧвлѧ́ѧ снисхожде́нїе твоѐ. <<уа҃і ѡ҆б.: 822>>

Неблагода́рный ᲂу҆чени́къ, ѿве́ргсѧ тебѐ хрⷭ҇тѐ, собо́рище всебеззако́нныхъ люде́й сподвиза́ше на тѧ̀, на преда́нїе ѡ҆бра́щьсѧ.

Сла́ва: Со ѻ҆ц҃е́мъ тебѣ̀ сн҃ꙋ, и҆ дх҃ꙋ пра́вомꙋ, є҆ди́номꙋ є҆стествꙋ̀ покланѧ́юсѧ и҆ воспѣва́ю, ли́цы раздѣлѧ́ѧ, и҆ сꙋщество́мъ соединѧ́ѧ.

И҆ ны́нѣ, бг҃оро́диченъ: Ро́ждшаѧ тѧ̀ а҆́гница, па́стырѧ и҆ а҆́гнца, при́снѡ мо́литъ і҆и҃се бж҃е, ѡ҆ всѣ́хъ лю́дехъ вѣ́рꙋющихъ въ тѧ̀.

Сѣда́ленъ, гла́съ а҃. Подо́бенъ: Ли́къ а҆́гг҃льскїй:

Сѐ лꙋка́вый совѣ́тъ вои́стиннꙋ собра́сѧ неи́стовнѡ, ꙗ҆́кѡ ѡ҆сꙋ́жденника ѡ҆сꙋди́ти, горѣ̀ сѣдѧ́щаго, ꙗ҆́кѡ сꙋдїю̀ всѣ́хъ гдⷭ҇а: ны́нѣ собира́етсѧ съ пїла́томъ и҆́рѡдъ, а҆́нна, вкꙋ́пѣ же и҆ каїа́фа, и҆спыта́ти є҆ди́наго долготерпѣли́ваго.

Пѣ́снь и҃.

І҆рмо́съ: Въ кꙋпинѣ̀ мѡѷсе́ю дв҃ы чꙋ́до. на сїна́йстѣй горѣ̀ проѡбрази́вшаго и҆ногда̀. по́йте, бл҃гослови́те, и҆ превозноси́те во всѧ̑ вѣ́ки.

Не невѣ́дый вре́мѧ на́шегѡ сконча́нїѧ, держа́й вѣ́ки, де́нь ѻ҆́ный не вѣ́дѣти предречѐ: но предѣ́лы всѣ̑мъ положѝ къ смиреномꙋ́дрїю.

Є҆гда̀ сѧ́деши сꙋдїѐ, разлꙋча́ѧй, ꙗ҆́коже ре́клъ є҆сѝ, па́стырь ѿ ѻ҆ве́цъ кѡ́злища сп҃се, стоѧ́нїѧ ѻ҆́нагѡ и҆зба́ви на́съ, не лиши́ же на́съ бж҃е́ственныѧ десни́цы твоеѧ̀.

Ты̀ є҆сѝ па́сха на́ша, пожре́ный за всѣ́хъ, ꙗ҆́кѡ а҆́гнецъ и҆ же́ртва, и҆ прегрѣше́нїй ѡ҆чище́нїе, и҆ твоѧ̑ бж҃є́ственныѧ стрⷭ҇ти превозно́симъ хрⷭ҇тѐ, во всѧ̑ вѣ́ки.

Дре́вꙋ ᲂу҆подо́бисѧ, и҆ селꙋ̀, и҆ хра́минѣ, всѐ житїѐ дꙋшѐ моѧ̀: тѣ́мже стѧжѝ къ бг҃ꙋ гото́во се́рдце, да не что̀ тлѣ́нїемъ пло́ти ѡ҆ста́виши. <<ув҃і: 823>>

Не къ фарїсе́ѡмъ сп҃се, ни къ сі́мѡнꙋ то́кмѡ и҆зво́лилъ є҆сѝ во хра́мъ на снѣ́дь вни́ти: но ᲂу҆жѐ и҆ мытарѝ вкꙋ́пѣ и҆ блꙋдни̑цы, твоѐ почерпа́ютъ милосе́рдїе.

Сребролю́бїе рачи́тельствꙋѧй преда́тель і҆ꙋ́да, ѡ҆ и҆стощи́вшемсѧ мѵ́рѣ печа́шесѧ: про́чее же ѡ҆ прода́нїи влⷣки, къ беззакѡ́ннымъ прише́дъ ѡ҆ цѣнѣ̀ согласова́ше.

Ѽ бл҃же́нныхъ рꙋ́къ! ѽ власѡ́въ и҆ ᲂу҆сте́нъ цѣломꙋ́дренныѧ блꙋдни́цы! и҆́миже возлїѧ̀, сп҃се, мѵ́ро на но́зѣ твоѝ, ѡ҆тира́ющи ѧ҆̀, и҆ ча́стѡ ѡ҆блобыза́ющи.

Возлежа́щꙋ тебѣ̀ сло́ве, жена̀ предста́вши, и҆ ᲂу҆ но́гъ рыда́ющи, стклѧ́ницꙋ сп҃се и҆стощѝ мѵ́ра на главꙋ̀ тебѐ безсме́ртнагѡ мѵ́ра.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Со ѻ҆ц҃е́мъ сн҃а и҆ ст҃а́го дх҃а, ст҃ꙋ́ю трⷪ҇цꙋ въ бж҃ествѣ̀ є҆ди́номъ сла́вимъ, вопїю́ще: ст҃ъ, ст҃ъ, ст҃ъ є҆сѝ во вѣ́ки.

И҆ ны́нѣ, бг҃оро́диченъ: Мл҃твами сп҃се, пречⷭ҇тыѧ твоеѧ̀ мт҃ре, и҆ твои́хъ а҆пⷭ҇лъ, млⷭ҇ти твоѧ̑ на́мъ низпослѝ бога́тнѡ, и҆ ми́ръ тво́й пода́ждь лю́демъ твои̑мъ.

Та́же: Хва́лимъ, бл҃гослови́мъ, покланѧ́емсѧ гдⷭ҇ви:

І҆рмо́съ: Въ кꙋпинѣ̀ мѡѷсе́ю дв҃ы чꙋ́до:

Пѣ́снь ѳ҃.

І҆рмо́съ: Преесте́ственнѡ пло́тїю заче́ншꙋю во чре́вѣ, ѿ ѻ҆ц҃а̀ безлѣ́тнѡ предвозсїѧ́вшее сло́во, въ пѣ́снехъ немо́лчныхъ велича́емъ вѣ́рнїи.

Дѣ́ланїѧ вре́мѧ, сп҃се́нїѧ намѣ́ренїе: тала́нтъ взе́мши, дре́внїй ѡ҆́бразъ, дꙋшѐ моѧ̀, кꙋпѝ вѣ́чнꙋю жи́знь.

Ꙗ҆́кѡ свѣщы̀ свѣ̑тлыѧ ᲂу҆краси́вше дꙋ́шы, женихꙋ̀ приходѧ́щꙋ къ нетлѣ́нномꙋ бра́кꙋ, пре́жде заключе́нїѧ двере́й, вни́демъ съ ни́мъ. <<ув҃і ѡ҆б.: 824>>

Показа́ти хотѧ̀ і҆и҃се, преесте́ственное твоегѡ̀ смире́нїѧ всѣ̑мъ, ꙗ҆́лъ є҆сѝ въ домꙋ̀ сі́мѡновѣ вечерѧ́въ, а҆́лчꙋщихъ пи́ще.

Хлѣ́бъ сы́й животворѧ́щїй, снѣ́лъ є҆сѝ і҆исꙋ́се съ сі́мѡномъ фарїсе́емъ, да блꙋдни́ца прїѡбрѧ́щетъ некꙋпи́мꙋю бл҃года́ть твою̀, и҆стоща́нїемъ мѵ́ра.

Рꙋ́цѣ моѝ скверна́вѣ, ᲂу҆стнѣ̀ блꙋдни́чи во мнѣ̀, нечи́сто моѐ житїѐ, растлѣ́нны ᲂу҆́ды: но ѡ҆сла́би мѝ, и҆ ѡ҆ста́ви, вопїе́тъ блꙋдни́ца хрⷭ҇тꙋ̀.

Пристꙋ́пльши жена̀ къ нога́ма твои́ма сп҃се, возлива́ше мѵ́ро, бл҃гоꙋха́нїѧ и҆сполнѧ́ющи, и҆ мѵ́ра и҆сполнѧ́ема дѣ́лъ ѡ҆чище́нїѧ.

А҆рѡма́ты богатѣ́ю, добродѣ́тельми же нище́тствꙋю, ꙗ҆̀же и҆́мамъ, тебѣ̀ приношꙋ̀: да́ждь са́мъ, ꙗ҆̀же и҆́маши, и҆ ѡ҆сла́би мѝ, и҆ ѡ҆ста́ви, вопїе́тъ блꙋдни́ца хрⷭ҇тꙋ̀.

Мѵ́ро ᲂу҆ менѐ тлѣ́нное, мѵ́ро ᲂу҆ тебѐ жи́зни, мѵ́ро бо тебѣ̀ и҆́мѧ и҆злїѧ́нное на достѡ́йныѧ: но ѡ҆сла́би мѝ, и҆ ѡ҆ста́ви, вопїе́тъ блꙋдни́ца хрⷭ҇тꙋ̀.

Сла́ва: Безнача́ленъ є҆сѝ ѻ҆́ч҃е, несозда́ненъ є҆сѝ сн҃е, сопресто́ленъ и҆ дш҃е, є҆ди́но трѝ є҆стество́мъ, и҆ трѝ ли́цами, є҆ди́нъ бг҃ъ и҆́стинный.

И҆ ны́нѣ, бг҃оро́диченъ: Бцⷣе, ᲂу҆пова́нїе чтꙋ́щихъ тѧ̀ при́снѡ, не преста́й молѧ́щи и҆з̾ тебѐ роди́вшагосѧ, и҆зба́вити мѧ̀ бѣ́дъ, и҆ всѧ́кихъ и҆скꙋше́нїй. <<уг҃і: 825>>

Во ст҃ꙋ́ю и҆ вели́кꙋю сре́дꙋ, на ᲂу҆́трени,

по шестоѱа́лмїи А҆ллилꙋ́їа, на гла́съ и҃, и҆ тропа́рь три́жды Сѐ жени́хъ: Зрѝ въ понедѣ́льникъ вели́кїй.

И҆ стїхосло́вїе. По а҃ стїхосло́вїи сѣда́ленъ, гла́съ г҃.

Подо́бенъ: Красотѣ̀ дѣ́вства:

Блꙋдни́ца пристꙋпѝ къ тебѣ̀, мѵ́ро со слеза́ми и҆злива́ющи на но́зѣ твоѝ чл҃вѣколю́бче, и҆ смра́да ѕѡ́лъ и҆збавлѧ́етсѧ повелѣ́нїемъ твои́мъ! ды́шѧ же бл҃года́ть твою̀ ᲂу҆чени́къ неблагода́рный, сїю̀ ѿлага́етъ, и҆ смра́домъ ѡ҆дѣва́етсѧ, сребролю́бїемъ продаѧ̀ тебѐ. сла́ва хрⷭ҇тѐ бл҃гоꙋтро́бїю твоемꙋ̀.

Сла́ва, и҆ ны́нѣ, то́йже.

По в҃-мъ стїхосло́вїи сѣда́ленъ, гла́съ д҃.

Подо́бенъ: Оу҆диви́сѧ і҆ѡ́сифъ:

І҆ꙋ́да льсте́цъ, сребролю́бїѧ рачи́тельствꙋѧй, преда́ти тѧ̀ гдⷭ҇и, сокро́вище живота̀, ле́стнѡ поꙋча́шесѧ, ѿѻнꙋ́дꙋже и҆ ᲂу҆пи́всѧ, тече́тъ ко і҆ꙋде́ѡмъ, глаго́летъ беззакѡ́ннымъ: что́ ми хо́щете да́ти, и҆ а҆́зъ ва́мъ преда́мъ, во є҆́же распѧ́ти є҆го̀;

Сла́ва, и҆ ны́нѣ, то́йже.

По г҃-мъ стїхосло́вїи сѣда́ленъ, гла́съ а҃.

Подо́бенъ: Гро́бъ тво́й:

Блꙋдни́ца въ пла́чѣ вопїѧ́ше ще́дре, ѡ҆тира́ющи те́плѣ пречⷭ҇тѣи твоѝ но́зѣ власы̀ главы̀ своеѧ̀, и҆ и҆з̾ глꙋбины̀ стенѧ́щи: не ѿри́ни мѧ̀, нижѐ ѡ҆мерзѝ бж҃е мо́й: но прїими́ мѧ ка́ющꙋюсѧ, и҆ сп҃сѝ ꙗ҆́кѡ є҆ди́нъ чл҃вѣколю́бецъ.

Сла́ва, и҆ ны́нѣ, то́йже. Чтє́нїѧ же всѧ̑ ѿ сказа́нїѧ, є҆́же ѿ матѳе́а ст҃а́гѡ є҆ѵⷢ҇лїа днѐ. Та́же є҆ѵⷢ҇лїе ѿ і҆ѡа́нна, зача́ло м҃а, бли́зъ конца̀, без̾ престꙋ́пки: Во вре́мѧ ѻ҆́но, свидѣ́тельствоваше наро́дъ сы́й со і҆и҃сомъ, є҆гда̀ ла́зарѧ возгласѝ ѿ гро́ба: <<уг҃і ѡ҆б.: 826>> Коне́цъ въ зача́лѣ м҃г-мъ: Ꙗ҆̀же ᲂу҆́бѡ а҆́зъ глаго́лю, ꙗ҆́коже речѐ мнѣ̀ ѻ҆ц҃ъ, та́кѡ глаго́лю. Ѱало́мъ н҃, и҆ трипѣ́снецъ, творе́нїе господи́на космы̀, є҆гѡ́же краестро́чїе: Тетра́дї ѱалѡ̀. Сі́есть въ сре́дꙋ воспою̀. І҆рмосы̀ по два́жды. Тропарѝ на в҃і. Послѣди́ же і҆рмо́съ ѻ҆́ба ли̑ка вкꙋ́пѣ. Гла́съ в҃.

Пѣ́снь г҃.

[Т] І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́ бо сѧ дꙋ́хъ мо́й внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебѐ гдⷭ҇и.

[Е] Во тще́тныхъ собо́рище беззако́нныхъ, и҆ мы́слїю собира́етсѧ ѕлонра́вною, ѡ҆сꙋжде́на и҆зба́вителѧ и҆зрещи́ тѧ хрⷭ҇тѐ. є҆мꙋ́же пое́мъ: ты̀ є҆сѝ бг҃ъ на́шъ, и҆ нѣ́сть ст҃ъ па́че тебѐ гдⷭ҇и.

[Т] Лю́тый совѣ́тъ беззако́нныхъ, притворѧ́етсѧ бг҃обо́рныѧ дꙋшѝ сꙋ́щїй, ꙗ҆́кѡ ѕлопотре́бна пра́веднаго ᲂу҆би́ти хрⷭ҇та̀. є҆мꙋ́же пое́мъ: ты̀ є҆сѝ бг҃ъ на́шъ, и҆ нѣ́сть ст҃ъ па́че тебѐ гдⷭ҇и.

Конда́къ, гла́съ д҃.

Подо́бенъ: Вознесы́йсѧ:

Па́че блꙋдни́цы бла́же, беззако́нновавъ, сле́зъ тꙋ́чы ника́коже тебѣ̀ принесо́хъ: но молча́нїемъ молѧ́сѧ припа́даю тѝ, любо́вїю ѡ҆блобыза́ѧ пречⷭ҇тѣи твоѝ но́зѣ, ꙗ҆́кѡ да ѡ҆ставле́нїе мнѣ̀ ꙗ҆́кѡ влⷣка пода́си долгѡ́въ, зовꙋ́щꙋ тѝ сп҃се: ѿ скве́рныхъ дѣ́лъ мои́хъ и҆зба́ви мѧ̀.

І҆́косъ: Ꙗ҆́же пе́рвѣе блꙋдни́ца жена̀, внеза́пꙋ цѣломꙋ́дренна ꙗ҆ви́сѧ, возненави́дѣвши дѣла̀ стꙋ́днагѡ грѣха̀, и҆ сла́дости тѣле́сныѧ, помина́ющи стꙋ́дъ мно́гїй и҆ сꙋ́дъ мꙋче́нїѧ, є҆го́же претерпѧ́тъ блꙋдни́цы и҆ скве́рнїи, ѿ ни́хже пе́рвый є҆́смь а҆́зъ, и҆ бою́сѧ: но пребыва́ю въ ѕло́мъ ѻ҆бы́чаи безꙋ́мный. блꙋ́днаѧ же жена̀ <<уд҃і: 827>> ᲂу҆боѧ́вшисѧ, и҆ потща́вшисѧ ско́рѡ прїи́де, вопїю́щи ко и҆зба́вителю: чл҃вѣколю́бче и҆ ще́дре, ѿ скве́рныхъ дѣ́лъ мои́хъ и҆зба́ви мѧ̀.

Сѷнаѯа́рїй. Стїхѝ:

Жена̀ полага́ющи тѣлесѝ хрⷭ҇то́вꙋ мѵ́ро,

Нїкоди́мовъ предпрїѧ́тъ смѷрнало́й.

Во ст҃ꙋ́ю и҆ вели́кꙋю сре́дꙋ, пома́завшїѧ гдⷭ҇а мѵ́ромъ жены̀ блꙋдни́цы, па́мѧть твори́ти повелѣ́ша бж҃е́ственнѣйшїи ѻ҆тцы̀: занѐ ма́лѡ пре́жде сп҃си́тельныѧ стрⷭ҇ти сїѐ бы́сть. Вше́дшꙋ бо і҆и҃сꙋ во і҆ерⷭ҇ли́мъ, и҆ въ домꙋ̀ прокаже́ннагѡ сі́мѡна бы́вшꙋ, жена̀ къ немꙋ̀ пристꙋпѝ, и҆ и҆злїѧ̀ на главꙋ̀ є҆гѡ̀ ѻ҆́ное многоцѣ́нное мѵ́ро. Оу҆чине́но ᲂу҆́бѡ сегѡ̀ ра́ди бы́сть здѣ̀, да по сп҃совꙋ словесѝ вездѣ̀ и҆ во всѣ́хъ ѻ҆́ноѧ теплѣ́йшее дѣ́ло проповѣ́стсѧ. Ѿкꙋ́дꙋ же подви́гшисѧ прїи́де; зане́же сострада́тельное хрⷭ҇то́во зрѧ́ше, и҆ ко всѣ̑мъ ѡ҆бщи́тельное, и҆ ны́нѣ па́че, є҆гда̀ въ до́мъ прокаже́ннагѡ того̀ ви́дѣ введе́на, є҆го́же нечи́ста и҆ ѿрече́нна во ѡ҆бще́нїе, зако́нъ повелѣва́ше бы́ти. Помы́сли ᲂу҆́бѡ жена̀, ꙗ҆́коже ѻ҆́нагѡ прока́зꙋ, си́це и҆ є҆ѧ̀ дꙋше́вный недꙋ́гъ и҆сцѣли́тъ. И҆ ᲂу҆́бѡ возлежа́щꙋ є҆мꙋ̀ на ве́чери, на ве́рхъ главы̀ є҆гѡ̀ лїе́тъ мѵ́ро, ꙗ҆́кѡ цѣно́ю сꙋ́щее дина́рїй тре́хъ сѡ́тъ: є҆́же є҆́сть шестьдесѧ́тъ а҆сса́рїй, пѣ́нѧзей де́сѧть, сре́бренникѡвъ трїе́хъ. Є҆́йже ᲂу҆ченицы̀ запрети́ша, и҆ наипа́че і҆ꙋ́да і҆скарїѡ́тскїй: но хрⷭ҇то́съ сїю̀ застꙋпѝ, да не пресѣкꙋ́тъ до́брагѡ є҆ѧ̀ намѣ́ренїѧ. Та́же и҆ погребе́нїе своѐ воспомина́етъ, і҆ꙋ́дꙋ ѿвраща́ѧ преда́тельства, и҆ женꙋ̀ по́чести сподоблѧ́ѧ, є҆́же вездѣ̀ по вселе́ннѣй сеѧ̀ до́бромꙋ дѣ́лꙋ проповѣ́датисѧ. Вѣ́домо же бꙋ́ди, ꙗ҆́кѡ жена̀ сїѧ̀, є҆ди́на ᲂу҆́бѡ мни́тсѧ нѣ̑кимъ бы́ти, ᲂу҆ є҆ѵⷢ҇лі́стѡвъ всѣ́хъ. нѣ́сть же, но ᲂу҆ трїе́хъ ᲂу҆́бѡ, ꙗ҆́коже глаго́летъ бж҃е́ственный златоꙋ́стый[[Бесѣ́да на матѳ. г҃і]] , є҆ди́на и҆ та́ѧжде є҆́сть, ꙗ҆́же и҆ блꙋдни́ца си́це и҆менова́сѧ, ᲂу҆ і҆ѡа́нна же не ктомꙋ̀: но дрꙋга́ѧ нѣ́каѧ чꙋ́днаѧ, и҆ житїѐ и҆мꙋ́щаѧ честно́е, марі́а сестра̀ ла́зарева, ꙗ҆́же не а҆́ки блꙋдни́ца сꙋ́щи, хрⷭ҇то́мъ люби́ма бѣ̀. Си́хъ же, ѻ҆́ваѧ <<уд҃і ѡ҆б.: 828>> ᲂу҆́бѡ марі́а, пре́жде шестѝ дне́й па́схи, въ домꙋ̀ свое́мъ, и҆́же въ виѳа́нїи, на ве́чери возлежа́щꙋ, мѵ́ра пома́занїе содѣ́ѧ, на кра́снѣи ѻ҆́нагѡ но́зѣ сїѐ и҆злива́ющи, и҆ главны́ми власы̀ сїѧ̑ ѡ҆тира́ющи, и҆з̾ѻби́лїѧ цѣны̀ на́нь ᲂу҆потреблѧ́ющи, и҆ а҆́ки бг҃ꙋ мѵ́ро приносѧ́щи. Вѣ́дѧше бо и҆звѣ́стнѡ, ꙗ҆́кѡ и҆ въ же́ртвахъ приноша́шесѧ є҆ле́й бг҃ꙋ[[И҆схо́дъ гл. л҃, Быт. к҃и и҆ л҃є]]: и҆ свѧще́нницы мѵ́ромъ пома́зовахꙋсѧ: и҆ і҆а́кѡвъ дре́вле сто́лпъ пома́за бг҃ꙋ. Принесе́ же сїѐ да́рствꙋющи ꙗ҆́вѣ ᲂу҆чи́телю, а҆́ки бг҃ꙋ, па́ки ѡ҆живле́нїѧ ра́ди бра́тнѧгѡ. Тѣ́мже нижѐ мзда̀ є҆́й ѡ҆бѣщава́етсѧ, є҆гда̀ и҆ са́мъ і҆ꙋ́да ро́пщетъ, ꙗ҆́кѡ любостѧжа́теленъ. Дрꙋга́ѧ же ꙗ҆́вѣ блꙋдни́ца, пре́жде двою̀ дню̀ па́схи, въ то́йже виѳа́нїи є҆щѐ сꙋ́щꙋ хрⷭ҇тꙋ̀ и҆ въ домꙋ̀ бы́вшꙋ сі́мѡна прокаже́ннагѡ на ве́чери, и҆ тогда̀ возлежа́щꙋ, многоцѣ́нное ѻ҆́ное мѵ́ро на главꙋ̀ и҆злива́етъ, ꙗ҆́коже сщ҃е́нный матѳе́й и҆ ма́ркъ повѣствова́ша. Ѡ҆ се́й же блꙋдни́цѣ и҆ ᲂу҆ченицы̀ негодꙋ́ютъ, къ млⷭ҇тыни хрⷭ҇тꙋ̀ тща́тельнѡ ᲂу҆гото́ванное и҆звѣ́стнѡ прови́дѣвше: се́й же и҆ мзда̀ даде́сѧ, є҆́же всю́дꙋ по вселе́ннѣй до́бромꙋ є҆ѧ̀ дѣ́лꙋ просла́витисѧ. Ѻ҆́вїи ᲂу҆́бѡ є҆ди́нꙋ: ѧ҆зы́комъ же златы́й си́це двѣ̀ женѣ̀ бы́ти глаго́летъ. Сꙋ́ть же нѣ́цыи и҆ трѝ сїѧ̑ бы́ти глаго́лютъ: двѣ̀ ᲂу҆́бѡ предрече́ннѣи, стрⷭ҇ти хрⷭ҇то́вой къ две́ремъ приближа́ющейсѧ, тре́тїю же и҆нꙋ́ю пре́жде си́хъ, па́че же пе́рвꙋю та́мѡ бли́зъ среды̀ про́повѣди є҆ѵⷢ҇льскїѧ сїѐ сотво́ршꙋю, ꙗ҆́же и҆ блꙋдни́ца и҆ грѣ́шница бѣ̀, внꙋ́трь же до́мꙋ не прокаже́ннагѡ, но фарїсе́а сі́мѡна. на но́зѣ хрⷭ҇та̀ самагѡ̀, и҆ наединѣ̀ мѵ́ро и҆злїѧ́вшаѧ: є҆гда̀ и҆ є҆ди́нъ фарїсе́й соблазнѧ́шесѧ, є҆́йже и҆ мздꙋ̀ сп҃съ, ѡ҆ставле́нїе грѣхѡ́въ да́рꙋетъ. Ѡ҆ се́й же то́кмѡ само́й бж҃е́ственный лꙋка̀[[зача́ло л҃г]] въ свое́мъ є҆ѵⷢ҇лїи бли́зъ среды̀, ꙗ҆́коже рече́сѧ повѣствꙋ́етъ. И҆ по по́вѣсти ѡ҆ се́й блꙋдни́цѣ, а҆́бїе наво́дитъ си́це глаго́лѧ: и҆ бы́сть по се́мъ, и҆ то́й прохожда́ше сквозѣ̀ гра́ды и҆ вє́си, бл҃говѣствꙋ́ѧ и҆ проповѣ́дꙋѧ црⷭ҇твїе бж҃їе, ѿ ни́хже ꙗ҆влѧ́етсѧ, ꙗ҆́кѡ не во вре́мѧ стрⷭ҇ти сїѐ бы́сть. Мни́тсѧ ᲂу҆́бѡ и҆ ѿ вре́мене, и҆ ѿ прїе́мшихъ є҆го̀, и҆ ѿ мѣ́ста, и҆ ли́цъ, и҆ домѡ́въ, <<ує҃і: 829>> є҆ще́ же и҆ ѿ нра́ва мѷропома́занїѧ тре́мъ бы́ти жена́мъ си̑мъ: двѣ̀ ᲂу҆́бѡ блꙋдни̑цы, тре́тїю же ла́заревꙋ бы́ти сестрꙋ̀ марі́ю, житїе́мъ сїѧ́ющꙋю чⷭ҇тны́мъ. И҆ и҆́ный ᲂу҆́бѡ до́мъ бы́ти фарїсе́а сі́мѡна, дрꙋгі́й же прокаже́ннагѡ сі́мѡна въ виѳа́нїи, и҆ и҆́ный па́ки до́мъ марі́и и҆ ма́рѳы се́стръ ла́заревыхъ въ то́йже виѳа́нїи, ꙗ҆́коже ѿ си́хъ сразꙋмѣ́ти є҆́сть: ꙗ҆́кѡ и҆ двѣ̀ ве́черѣ бѣ́стѣ хрⷭ҇тꙋ̀, и҆ ѻ҆боѝ въ виѳа́нїи: є҆ди́на ᲂу҆́бѡ пре́жде шестѝ дне́й па́схи въ домꙋ̀ ла́заревѣ, є҆гда̀ ꙗ҆дѧ́ше съ ни́мъ и҆ ла́зарь, ꙗ҆́коже гро́мовъ сы́нъ повѣствꙋ́етъ[[і҆ѡа́н. м҃а]], глаго́лѧ си́це: пре́жде шестѝ дне́й па́схи, прїи́де і҆и҃съ въ виѳа́нїю, и҆дѣ́же бѣ̀ ла́зарь ᲂу҆ме́рый, є҆го́же воздви́же ѿ ме́ртвыхъ. сотвори́ша ᲂу҆́бѡ є҆мꙋ̀ ве́черю, та́мѡ, и҆ ма́рѳа слꙋжа́ше: ла́зарь же є҆ди́нъ бѣ̀ ѿ совозлежа́щихъ є҆мꙋ̀. Марі́а ᲂу҆́бѡ прїе́мши лі́трꙋ мѵ́ра на́рда пїсті́ки многоцѣ́ннагѡ, пома́за но́зѣ і҆и҃совѣ, и҆ ѡ҆трѐ власы̀ свои́ми но́зѣ є҆гѡ̀. Дрꙋга́ѧ же ве́черѧ бы́сть є҆мꙋ̀ пре́жде двою̀ дню̀ па́схи, є҆щѐ сꙋ́щꙋ въ виѳа́нїи хрⷭ҇тꙋ̀ въ домꙋ̀ сі́мѡна прокаже́ннагѡ, є҆гда̀ и҆ блꙋдни́ца прїи́де къ немꙋ̀ многоцѣ́нное мѵ́ро и҆злива́ющи, ꙗ҆́коже сщ҃е́нный матѳе́й повѣствꙋ́етъ глаго́лѧ[[матѳ. р҃и]], ꙗ҆́кѡ ѿ хрⷭ҇та̀ ко ᲂу҆ченикѡ́мъ: вѣ́сте, ꙗ҆́кѡ по двою̀ дню̀ па́сха бꙋ́детъ. И҆ пома́лѣ па́ки нано́ситъ: і҆и҃сꙋ же бы́вшꙋ въ виѳа́нїи, въ домꙋ̀ сі́мѡна прокаже́ннагѡ, пристꙋпѝ къ немꙋ̀ жена̀, а҆лава́стръ мѵ́ра и҆мꙋ́щи тѧжкоцѣ́ннагѡ, и҆ возлива́ше на главꙋ̀ є҆гѡ̀ возлежа́щагѡ. Є҆мꙋ́же согласꙋ́етъ и҆ ма́ркъ, глаго́лѧ[[ма́рк. ѯ҃г]]: бѣ́ же па́сха, и҆ ѻ҆прѣсно́цы по двою̀ дню̀, и҆ сꙋ́щꙋ є҆мꙋ̀ въ виѳа́нїи въ домꙋ̀ сі́мѡна прокаже́ннагѡ возлежа́щꙋ, прїи́де жена̀: и҆ є҆ли̑ка по се́мъ. Прѧ́щїисѧ же и҆ глаго́лющїи, є҆ди́нꙋ и҆ тꙋ́южде бы́ти, ᲂу҆ четыре́хъ є҆ѵⷢ҇лі́стѡвъ женꙋ̀ пома́завшꙋю гдⷭ҇а мѵ́ромъ є҆ди́наго и҆ того́жде мнѧ́тъ бы́ти сі́мѡна, фарїсе́а же и҆ прокаже́ннаго: є҆го́же и҆ ѻ҆тца̀ ла́зарѧ же и҆ се́стръ є҆гѡ̀ марі́и и҆ ма́рѳы, бы́ти нѣ́цыи и҆зда́ша, и҆ є҆ди́нꙋ ве́черю и҆ тꙋ́южде, и҆ то́йжде и҆ є҆ди́нъ до́мъ є҆гѡ̀, и҆́же въ виѳа́нїи, ᲂу҆ негѡ́же и҆ го́рница по́стлана ᲂу҆гото́васѧ, и҆ та́инственнꙋю ве́черю бы́ти, не до́брѣ мнѧ́тъ. Сі́и <<ує҃і ѡ҆б.: 830>> бо двѣ̀ ве́чєри, внѣ̀ і҆ерⷭ҇ли́ма въ виѳа́нїи бѣ́стѣ хрⷭ҇тꙋ̀ пре́жде шестѝ, и҆ пре́жде двою̀ [ꙗ҆́коже рече́сѧ] дню̀ зако́нныѧ па́схи, є҆гда̀ и҆ жєны̀ мѵ́ра разли́чнѡ хрⷭ҇тꙋ̀ принесо́ша. Та́йнаѧ же ве́черѧ, и҆ по́стланнаѧ го́рница, внꙋ́трь гра́да і҆ерⷭ҇ли́ма бл҃гоꙋкраси́шасѧ, пре́жде є҆ди́нагѡ зако́нныѧ па́схи и҆ стрⷭ҇ти хрⷭ҇то́вы днѐ. Ѻ҆́вїи ᲂу҆́бѡ въ домꙋ̀ невѣ́домагѡ человѣ́ка, ѻ҆́вїи же въ домꙋ̀ [ꙗ҆́коже глаго́лютъ] напе́рсника и҆ ᲂу҆ч҃нка̀ і҆ѡа́нна во ст҃о́мъ сїѡ́нѣ, и҆дѣ́же и҆ ᲂу҆ченицы̀ стра́ха ра́ди і҆ꙋде́йска бѧ́хꙋ сокрове́ни, и҆ ѳѡмино̀ бы́сть ѡ҆сѧза́нїе по воскрⷭ҇нїи, и҆ ст҃а́гѡ дх҃а прише́ствїе на пѧтьдесѧ́тницꙋ, и҆ и҆́наѧ нѣ̑каѧ неизречє́ннаѧ и҆ та́инствєннаѧ соверши́шасѧ. Тѣ́мже сїѐ ᲂу҆́бѡ мни́тсѧ мѝ, и҆ и҆́стинѣ златоглаго́ливагѡ па́че и҆звѣ́стнѣе бы́ти, ꙗ҆́кѡ двѣ̀ ᲂу҆́бѡ сїѧ̀ жєны̀ вмѣнѧ́ютсѧ: є҆ди́на ᲂу҆́бѡ, ꙗ҆́коже рече́сѧ ᲂу҆ трїе́хъ є҆ѵⷢ҇лі́стѡвъ, блꙋдни́ца сꙋ́щи и҆ грѣ́шница, на главꙋ̀ хрⷭ҇то́вꙋ мѵ́ро возлїѧ́вшаѧ: и҆на́ѧ же ᲂу҆ і҆ѡа́нна, марі́а сестра̀ ла́зарева, самѣ́мъ же бж҃е́ствєннымъ нога́мъ хрⷭ҇тѡ́вымъ сїѐ прине́сшаѧ и҆ возлїѧ́вшаѧ. И҆ны̑ѧ ᲂу҆́бѡ ꙗ҆̀же въ виѳа́нїи ве́чєри: и҆́нꙋю же бы́ти та́йнꙋю. И҆ ꙗ҆́вственнѡ и҆ ѿ ѻ҆́ныхъ по по́вѣсти ѡ҆ блꙋдни́цѣ се́й, ᲂу҆ч҃нкѝ сп҃съ ко гра́дꙋ посыла́етъ, ᲂу҆гото́вати па́схꙋ. И҆ди́те, глаго́лѧ, во гра́дъ ко ѻ҆́нсицѣ, и҆ рцы́те: ᲂу҆чи́тель глаго́летъ, ᲂу҆ тебѐ сотворю̀ па́схꙋ со ᲂу҆ченикѝ мои́ми. И҆ па́ки: и҆ срѧ́щетъ вы̀ человѣ́къ, скꙋде́льникъ воды̀ носѧ̀, и҆ то́й пока́жетъ ва́мъ го́рницꙋ ве́лїю по́стланнꙋю, та́мѡ ᲂу҆гото́вайте на́мъ. Ѻ҆ни́ же ѿше́дше, глаго́летъ, ѡ҆брѣто́ша, ꙗ҆́коже заповѣ́да и҆̀мъ, и҆ ᲂу҆гото́ваша па́схꙋ, ꙗ҆́вѣ зако́ннꙋю при две́рехъ сꙋ́щꙋю, ю҆́же и҆ прише́дъ совершѝ со ᲂу҆ч҃нкѝ, ꙗ҆́коже бж҃е́ственный златоꙋ́стъ глаго́летъ. Та́же и҆ ве́чери быва́емой, сі́есть та́йной, и҆ бж҃е́ственномꙋ ᲂу҆мове́нїю посредѣ̀ содѣ́ѧнꙋ бы́вшꙋ, па́ки возле́гъ, и҆ на́шꙋ предае́тъ па́схꙋ на са́мой трапе́зѣ, ꙗ҆́коже ѧ҆зы́комъ златы́й і҆ѡа́ннъ повѣствꙋ́етъ, и҆ сїѧ̑ ᲂу҆́бѡ та́кѡ. Бж҃е́ственный же і҆ѡа́ннъ, къ семꙋ̀ и҆ ма́ркъ, бж҃е́ственнїи є҆ѵⷢ҇лі́сти, и҆ мѵ́ра ви́дъ приложи́ша, вѣ́рное сїѐ и҆менова́вше и҆ многоцѣ́нное. Возмнѣ́ша же пїстїко́нъ, сі́есть <<уѕ҃і: 831>> вѣ́рное нарещѝ, неле́стное же и҆ нерастворе́нное и҆ ввѣ́ренное въ чистотꙋ̀, не́гли же и҆ нарица́нїе бѣ̀ нѣ́кое сїѐ, и҆зрѧ́днѣйшагѡ и҆ пе́рвагѡ мѵ́ра. прилага́етъ же ма́ркъ, ꙗ҆́кѡ и҆ сосꙋ́дъ сокрꙋшѝ ѿ тща́нїѧ жена̀, а҆́ки тѣсновхо́дный, и҆́же и҆ а҆лава́стръ и҆менꙋ́етъ. Є҆́сть же се́й сосꙋ́дъ стклѧ́ный, ꙗ҆́коже глаго́летъ сщ҃е́нный є҆пїфа́нїй, без̾ рꙋкоѧ́ти сотворе́нный нѣ́кїѧ, и҆́же и҆ вѷкі́онъ си́це глаго́летсѧ. Бѣ́ же мѵ́ро ѻ҆́ное сложе́нное ѿ ви́дѡвъ ᲂу҆́бѡ и҆ и҆́ныхъ мно́гихъ, па́че же ѿ си́хъ, смѵ́рны, цвѣ́та кїнамѡ́ма бл҃гоꙋха́нна, сі́есть, тро́сти а҆рѡма́тскїѧ, и҆ є҆ле́а. Но и҆́же ᲂу҆́мнымъ мѵ́ромъ пома́завыйсѧ хрⷭ҇тѐ бж҃е, находѧ́щихъ страсте́й свободѝ, и҆ поми́лꙋй на́съ, ꙗ҆́кѡ є҆ди́нъ ст҃ъ и҆ чл҃вѣколю́бецъ, а҆ми́нь.

Пѣ́снь и҃.

[Р] І҆рмо́съ: Глаго́лъ мꙋчи́телевъ поне́же превозмо́же, седмери́цею пе́щь разжже́нна бы́сть и҆ногда̀: въ не́йже ѻ҆́троцы не ѡ҆пали́шасѧ, царе́во попра́вше велѣ́нїе, но вопїѧ́хꙋ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.

[А] И҆злива́ющи жена̀ мѵ́ро честно́е, влады́чню и҆ бж҃е́ственномꙋ стра́шномꙋ верхꙋ̀ хрⷭ҇тѐ, слѣдѡ́въ твои́хъ пречⷭ҇тыхъ прикоснꙋ́сѧ, ѡ҆скверне́ныма дла́ньма, и҆ вопїѧ́ше: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.

[Д] Слеза́ми ѡ҆мыва́етъ но́зѣ, пови́ннаѧ грѣхѡ́мъ, созда́вшагѡ, и҆ ѡ҆тира́етъ власы̀ свои́ми. тѣ́мже въ житїѝ содѣ́ѧнныхъ не погрѣшѝ и҆збавле́нїѧ, но вопїѧ́ше: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.

[І] Сщ҃еннодѣ́йствꙋетсѧ и҆збавле́нїе благонра́внѣй, ѿ сп҃си́тельныхъ ᲂу҆тро́бъ же и҆ сле́зъ и҆сто́чника, въ не́мже и҆сповѣ́данїемъ и҆змы́вшисѧ, не стыдѧ́шесѧ, но вопїѧ́ше: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.

Та́же, Хва́лимъ, бл҃гослови́мъ: <<уѕ҃і ѡ҆б.: 832>>

И҆ па́ки і҆рмо́съ: Глаго́лъ мꙋчи́телевъ:

Чⷭ҇тнѣ́йшꙋю, не пое́мъ.

Пѣ́снь ѳ҃.

[Ѱ] І҆рмо́съ: Дꙋша́ми чи́стыми, и҆ нескве́рными ᲂу҆стна́ми, прїиди́те возвели́чимъ нескве́рнꙋю, и҆ пречⷭ҇тꙋю мт҃рь є҆мманꙋ́илевꙋ, є҆́юже и҆з̾ неѧ̀ къ рожде́нномꙋ приносѧ́ще мл҃твꙋ: пощадѝ дꙋ́шы на́шѧ хрⷭ҇тѐ бж҃е, и҆ сп҃сѝ на́съ.

[А] Неразꙋ́менъ ꙗ҆́вльсѧ, и҆ лꙋка́въ ревноѡбра́зникъ, да́ръ достойнобж҃е́ственъ сло́вомъ продае́тъ. и҆́мже до́лгъ разрѣши́сѧ грѣхѡ́въ, кра́дый лю́тый і҆ꙋ́да любобж҃е́ственнꙋю бл҃года́ть: пощадѝ дꙋ́шы на́шѧ хрⷭ҇тѐ бж҃е, и҆ сп҃сѝ на́съ.

[Л] Глаго́летъ ше́дъ беззакѡ́ннымъ кнѧзє́мъ: что́ ми хо́щете да́ти, и҆ а҆́зъ хрⷭ҇та̀ ва́мъ и҆ско́маго хотѧ́щымъ преда́мъ; присвое́нїе хрⷭ҇то́во і҆ꙋ́да ѿри́нꙋвый зла́томъ: пощадѝ дꙋ́шы на́шѧ хрⷭ҇тѐ бж҃е, и҆ сп҃сѝ на́съ.

[Ѡ] Ѽ слѣпо́тнагѡ сребролю́бїѧ нечести́ве, ѿѻнꙋ́дꙋже забве́нїе полꙋчи́лъ є҆сѝ, ꙗ҆́кѡ дꙋшѝ ника́коже равностоѧ́теленъ мі́ръ, ꙗ҆́коже наꙋчи́лсѧ є҆сѝ: ѿча́ѧнїемъ бо са́мъ себѐ ᲂу҆дави́лъ є҆сѝ вже́гсѧ преда́телю: пощадѝ дꙋ́шы на́шѧ хрⷭ҇тѐ бж҃е, и҆ сп҃сѝ на́съ.

Та́же і҆рмо́съ: Дꙋша́ми чи́стыми, и҆ нескве́рными ᲂу҆стна́ми:

Є҆ѯапостїла́рїй, три́жды, ꙗ҆́кѡ ѡ҆бы́чно:

Черто́гъ тво́й ви́ждꙋ сп҃се мо́й ᲂу҆краше́нный, и҆ ѻ҆де́жды не и҆́мамъ, да вни́дꙋ во́нь, просвѣтѝ ѻ҆дѣѧ́нїе дꙋшѝ моеѧ̀ свѣтода́вче, и҆ сп҃си́ мѧ.

На хвали́техъ поста́вимъ стїхѝ д҃, и҆ пое́мъ сїѧ̑ самогла́сны, гла́съ а҃:

Тебѐ дв҃ыѧ сн҃а, блꙋдни́ца позна́вши бг҃а, глаго́лаше, въ пла́чи молѧ́щисѧ, ꙗ҆́кѡ сле́зъ достѡ́йнаѧ содѣ́лавшаѧ: разрѣшѝ до́лгъ, ꙗ҆́коже и҆ а҆́зъ власы̀: возлюбѝ лю́бѧщꙋю, <<уз҃і: 833>> пра́веднѡ ненави́димꙋю, и҆ бли́зъ мытаре́й тебѐ проповѣ́мъ, бл҃годѣ́телю чл҃вѣколю́бче.

Многоцѣ́нное мѵ́ро, блꙋдни́ца смѣсѝ со слеза́ми, и҆ и҆злїѧ̀ на пречⷭ҇тѣи но́зѣ твоѝ, ѡ҆блобыза́ющи: ѻ҆́нꙋю а҆́бїе ѡ҆правда́лъ є҆сѝ, на́мъ же проще́нїе да́рꙋй пострада́вый ѡ҆ на́съ, и҆ сп҃сѝ на́съ.

Є҆гда̀ грѣ́шнаѧ приноша́ше мѵ́ро, тогда̀ ᲂу҆чени́къ соглаша́шесѧ пребеззакѡ́ннымъ. ѻ҆́ваѧ ᲂу҆́бѡ ра́довашесѧ, и҆стоща́ющи мѵ́ро многоцѣ́нное: се́й же тща́шесѧ прода́ти безцѣ́ннаго. сїѧ̀ влⷣкꙋ познава́ше, а҆ се́й ѿ влⷣки разлꙋча́шесѧ. сїѧ̀ свобожда́шесѧ, а҆ і҆ꙋ́да ра́бъ быва́ше врагꙋ̀. лю́то є҆́сть лѣ́ность, ве́лїе покаѧ́нїе: є҆́же мнѣ̀ да́рꙋй сп҃се, пострада́вый ѡ҆ на́съ, и҆ сп҃сѝ на́съ.

Ѽ і҆ꙋ́дина ѡ҆каѧ́нства! зрѧ́ше блꙋдни́цꙋ цѣлꙋ́ющꙋю стѡпы̀, и҆ ᲂу҆мышлѧ́ше ле́стїю преда́нїѧ цѣлова́нїе. ѻ҆́наѧ власы̀ разрѣшѝ, а҆ се́й ꙗ҆́ростїю вѧза́шесѧ, носѧ̀ вмѣ́стѡ мѵ́ра ѕлосмра́днꙋю ѕло́бꙋ: за́висть бо не вѣ́сть предпочита́ти поле́зное. ѽ і҆ꙋ́дина ѻ҆каѧ́нства! ѿ негѡ́же и҆зба́ви бж҃е, дꙋ́шы на́шѧ.

Сла́ва, гла́съ в҃: Грѣ́шнаѧ течѐ къ мѵ́рꙋ, кꙋпи́ти многоцѣ́нное мѵ́ро, є҆́же пома́зати бл҃годѣ́телѧ, и҆ мѷропрода́телю вопїѧ́ше: Да́ждь мѝ мѵ́ро, да пома́жꙋ и҆ а҆́зъ ѡ҆чи́стившаго всѧ̑ моѧ̑ грѣхѝ.

И҆ ны́нѣ, гла́съ ѕ҃: Погрꙋже́ннаѧ грѣхо́мъ, ѡ҆брѣ́те тѧ̀ приста́нище сп҃се́нїѧ, ви́ждь и҆ мѵ́ра со слеза́ми растворѧ́ющꙋю, тебѣ̀ вопїѧ́ше: ви́ждь согрѣша́ющихъ покаѧ́нїѧ ѡ҆жида́ѧй. но влⷣко сп҃си́ мѧ ѿ волны̀ грѣхо́вныѧ, вели́кїѧ ра́ди твоеѧ̀ млⷭ҇ти.

На стїхо́внѣ стїхи̑ры самогла́сны, гла́съ: ѕ҃.

Дне́сь хрⷭ҇то́съ прихо́дитъ въ до́мъ фарїсе́овъ, и҆ жена̀ грѣ́шница пристꙋпи́вши къ нога́мъ, валѧ́шесѧ вопїю́щи: <<уз҃і ѡ҆б.: 834>> ви́ждь погрꙋже́ннꙋю грѣхо́мъ, ѿча́ѧннꙋю дѣѧ́нїй ра́ди, негнꙋша́емꙋю ѿ твоеѧ̀ бл҃гости: и҆ да́ждь мѝ гдⷭ҇и ѡ҆ставле́нїе ѕлы́хъ, и҆ сп҃си́ мѧ.

Сті́хъ: И҆спо́лнихомсѧ заꙋ́тра млⷭ҇ти твоеѧ̀, гдⷭ҇и:

Прострѐ блꙋдни́ца власы̀ тебѣ̀ влⷣцѣ, прострѐ і҆ꙋ́да рꙋ́цѣ беззакѡ́ннымъ: ѻ҆́ва ᲂу҆́бѡ прїѧ́ти ѻ҆ставле́нїе, ѻ҆́въ же взѧ́ти сре́бреники. тѣ́мже тебѣ̀ вопїе́мъ про́даномꙋ и҆ свобо́ждшемꙋ на́съ: гдⷭ҇и сла́ва тебѣ̀.

Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ:

Пристꙋпѝ жена̀ ѕлосмра́днаѧ и҆ ѡ҆скверне́наѧ, сле́зы пролива́ющи, лю́бѧщи сп҃се, стра́сть и҆сповѣ́дающи: ка́кѡ воззрю̀ къ тебѣ̀ влⷣцѣ; са́мъ бо прише́лъ є҆сѝ сп҃стѝ блꙋдни́цꙋ: и҆з̾ глꙋбины̀ ᲂу҆ме́ршꙋю мѧ̀ воскресѝ, и҆́же ла́зарѧ воздви́гнꙋвый и҆з̾ гро́ба четверодне́вна: прїими́ мѧ ѻ҆каѧ́ннꙋю гдⷭ҇и, и҆ сп҃си́ мѧ.

Сті́хъ: И҆сповѣ́мсѧ тебѣ̀ гдⷭ҇и всѣ́мъ се́рдцемъ мои́мъ:

Ѿча́ѧннаѧ житїѧ̀ ра́ди, и҆ ᲂу҆вѣ́домаѧ нра́ва ра́ди, мѵ́ра носѧ́щаѧ пристꙋпѝ тебѣ̀ вопїю́щи: да не ѿве́ржеши менѐ блꙋ́днꙋю, роди́выйсѧ ѿ дв҃ы: да не пре́зриши моѧ̑ сле́зы ра́досте а҆́гг҃лѡвъ. но прїими́ мѧ ка́ющꙋюсѧ, ю҆́же не ѿри́нꙋлъ є҆сѝ согрѣша́ющꙋю гдⷭ҇и, вели́кїѧ ра́ди твоеѧ̀ млⷭ҇ти.

Сла́ва, и҆ ны́нѣ, самогла́сенъ, гла́съ и҃:

Творе́нїе кассїа́ны и҆́нокини.

Гдⷭ҇и, ꙗ҆́же во мнѡ́гїѧ грѣхѝ впа́дшаѧ жена̀, твоѐ ѡ҆щꙋти́вшаѧ бж҃ество̀, мѷроно́сицы взе́мши чи́нъ, рыда́ющи мѵ́ро тебѣ̀ пре́жде погребе́нїѧ прино́ситъ: ᲂу҆вы̀ мнѣ̀ глаго́лющи! ꙗ҆́кѡ но́щь мнѣ̀ є҆́сть разжже́нїе блꙋда̀ невоздержа́нна, мра́чное же и҆ безлꙋ́нное раче́нїе грѣха̀. прїимѝ моѧ̑ и҆сто́чники сле́зъ, и҆́же <<уи҃і: 835>> ѻ҆блака́ми производѧ́й мо́рѧ во́дꙋ. приклони́сѧ къ мои̑мъ воздыха́нїємъ сердє́чнымъ, приклони́вый нб҃са̀ неизрече́ннымъ твои́мъ и҆стоща́нїемъ: да ѡ҆блобыжꙋ̀ пречи́стѣи твоѝ но́зѣ, и҆ ѡ҆трꙋ̀ сїѧ̑ па́ки главы̀ моеѧ̀ власы̀, и҆́хже въ раѝ є҆́ѵа, по полꙋ́дни, шꙋ́момъ ᲂу҆́шы ѡ҆гласи́вши, стра́хомъ скры́сѧ. грѣхѡ́въ мои́хъ мно́жєства, и҆ сꙋде́бъ твои́хъ бє́здны кто̀ и҆зслѣ́дитъ; дꙋшеспа́сче сп҃се мо́й. да мѧ̀ твою̀ рабꙋ̀ не пре́зриши, и҆́же безмѣ́рнꙋю и҆мѣ́ѧй млⷭ҇ть.

И҆ а҆́бїе, Бл҃го є҆́сть: Трист҃о́е съ покло́ны, и҆ ча́съ а҃-й без̾ стїхосло́вїѧ: Быва́ютъ же и҆ покло́ны по чи́нꙋ и҆́хъ. И҆ лїті́а. И҆ ѿпꙋ́стъ. И҆ про́чее ꙗ҆́коже пре́жде ᲂу҆каза́сѧ въ понедѣ́льникъ вели́кїй.

На ѕ҃-мъ часѣ̀ тропа́рь прⷪ҇ро́чества, гла́съ и҃:

Дне́сь лꙋка́вое собра́сѧ со́нмище, и҆ на тѧ̀ тщє́тнаѧ поꙋчи́шасѧ. дне́сь ѿ согла́сїѧ ᲂу҆давле́нїе і҆ꙋ́да ѡ҆брꙋча́етъ, каїа́фа же нево́лею и҆сповѣ́дꙋетъ: ꙗ҆́кѡ є҆ди́нъ за всѣ́хъ воспрїе́млеши сме́рть во́лею, и҆зба́вителю на́шъ хрⷭ҇тѐ бж҃е, сла́ва тебѣ̀.

Прокі́менъ, ѱало́мъ рл҃г, гла́съ д҃: Бл҃гослови́тъ тѧ̀ гдⷭ҇ь ѿ сїѡ́на, сотвори́вый нб҃о и҆ зе́млю. Сті́хъ: Сѐ ны́нѣ бл҃гослови́те гдⷭ҇а всѝ рабѝ гдⷭ҇ни.

Прⷪ҇ро́чества і҆езекі́илева чте́нїе. [Глава̀ в҃, ст. г҃- і҃, глава̀ г҃, ст. а҃-г҃.]

Речѐ гдⷭ҇ь ко мнѣ̀: сы́не человѣ́чь, послю́ тѧ а҆́зъ къ до́мꙋ і҆и҃левꙋ, ѡ҆горчева́ющымъ мѧ̀, и҆̀же ѡ҆горчи́ша мѧ̀, са́ми и҆ ѻ҆тцы̀ и҆́хъ ѿверго́шасѧ менѐ до дне́шнѧгѡ днѐ. И҆ сы́нове жестоколи́чнїи, и҆ твердосерде́чнїи: а҆́зъ послю́ тѧ къ тѣ̑мъ, и҆ рече́ши къ ни̑мъ: та́кѡ глаго́летъ а҆дѡнаі̀ гдⷭ҇ь. А҆́ще ᲂу҆́бѡ ᲂу҆слы́шатъ и҆лѝ ᲂу҆боѧ́тсѧ: занѐ до́мъ ѡ҆горчева́ѧй є҆́сть, и҆ позна́ютъ, <<уи҃і ѡ҆б.: 836>> ꙗ҆́кѡ прⷪ҇ро́къ є҆сѝ ты̀ посредѣ̀ и҆̀хъ. И҆ ты̀ сы́не человѣ́чь, да не ᲂу҆бои́шисѧ и҆́хъ, ни ᲂу҆жаса́йсѧ ѿ лица̀ и҆́хъ: занѐ разсвирѣ́пѣютъ и҆ ѡ҆бы́дꙋтъ тѧ̀ ѻ҆́крестъ, посреди́ бо скорпі́євъ ты̀ живе́ши: слове́съ и҆́хъ не ᲂу҆бо́йсѧ, и҆ ѿ лица̀ и҆́хъ не ᲂу҆жаса́йсѧ, занѐ до́мъ ѡ҆горчева́ѧй є҆́сть. И҆ возглаго́леши словеса̀ моѧ̑ къ ни̑мъ: а҆́ще ᲂу҆́бѡ ᲂу҆слы́шатъ, и҆лѝ ᲂу҆боѧ́тсѧ, занѐ до́мъ прогнѣ́ваѧй є҆́сть. И҆ ты̀ сы́не человѣ́чь послꙋ́шай глаго́лющагѡ къ тебѣ̀, не бꙋ́ди ѡ҆горчева́ѧй, ꙗ҆́коже до́мъ преѡгорчева́ѧй: ѿве́рзи ᲂу҆ста̀ твоѧ̑, и҆ снѣ́ждь, ꙗ҆́же а҆́зъ даю̀ тебѣ̀. И҆ ви́дѣхъ, и҆ сѐ рꙋка̀ просте́рта ко мнѣ̀, и҆ въ не́й сви́токъ кни́жный. И҆ развѝ є҆го̀ предо мно́ю, и҆ въ то́мъ пи̑сана бы́ша прє́днѧѧ и҆ за̑днѧѧ: и҆ впи́сано бѧ́ше въ не́мъ рыда́нїе, и҆ жа́лость, и҆ го́ре. И҆ речѐ ко мнѣ̀: сы́не человѣ́чь, снѣ́ждь сви́токъ се́й, и҆ и҆дѝ, и҆ рцы̀ сынѡ́мъ і҆и҃лєвымъ. И҆ ѿверзо́хъ ᲂу҆ста̀ моѧ̑, и҆ напита́ мѧ сви́ткомъ си́мъ. И҆ речѐ ко мнѣ̀: сы́не человѣ́чь, ᲂу҆ста̀ твоѧ̑ снѣдѧ́тъ, и҆ чре́во твоѐ насы́титсѧ сви́тка сегѡ̀ да́ннагѡ тебѣ̀: и҆ снѣдо́хъ є҆го̀, и҆ бы́сть во ᲂу҆стѣ́хъ мои́хъ ꙗ҆́кѡ ме́дъ сла́докъ.

Прокі́менъ, ѱало́мъ рл҃д, гла́съ ѕ҃: Боѧ́щїисѧ гдⷭ҇а, бл҃гослови́те гдⷭ҇а. Сті́хъ: Хвали́те и҆́мѧ гдⷭ҇не, хвали́те рабѝ гдⷭ҇а.

Чте́нїе є҆ѵⷢ҇лїа. И҆ по чи́нꙋ трист҃о́е съ покло́ны и҆ ѿдае́мъ стїхосло́вїе часѡ́въ. Девѧ́тый же ча́съ начина́емъ ѿ трист҃а́гѡ: въ не́мже и҆ послѣ́днее быва́етъ чте́нїе ѿ є҆ѵⷢ҇лїа. Та́же глаго́лемъ: Не преда́ждь на́съ: Трист҃о́е съ покло́ны. Та́кожде и҆ бл҃жє́нны. Творѧ́ще и҆ ѻ҆бы̑чныѧ покло́ны. Глаго́лемъ же и҆ конда́къ вели́кїѧ среды̀, и҆ хра́ма ст҃а́гѡ, и҆лѝ ст҃ы́ѧ. Сла́ва, Со ст҃ы́ми ᲂу҆поко́й: И҆ ны́нѣ, хра́ма, бцⷣы. А҆́ще же нѝ, глаго́лемъ: Предста́тельство хрⷭ҇тїа́нъ: Гдⷭ҇и поми́лꙋй, м҃, и҆ г҃ вели̑кїѧ покло́ны, <<уѳ҃і: 837>> и҆ в҃і ма̑лыѧ. Трист҃о́е: и҆ покло́ны г҃. Гдⷭ҇и поми́лꙋй, в҃і. и҆ мл҃тва: Всест҃а́ѧ трⷪ҇це: Та́же, Досто́йно є҆́сть: Сла́ва, и҆ ны́нѣ: и҆ вмѣ́стѡ ѿпꙋ́ста глаго́летъ настоѧ́тель мл҃твꙋ: Влⷣко многомлⷭ҇тиве: всю̀ до конца̀. Се́й же глаго́лемѣй мы̀ ни́цъ па́дше на зе́млю, мо́лимсѧ. И҆ по и҆сполне́нїи тоѧ̀, на́мъ воста́вшымъ, преклонѧ́етсѧ и҆ то́й са́мъ къ бра́тїи, и҆ про́ситъ проще́нїѧ, глаго́лѧ: Бл҃гослови́те ѻ҆тцы̀ ст҃і́и, и҆ прости́те мѝ грѣ́шномꙋ, ꙗ҆̀же согрѣши́хъ во все́й жи́зни мое́й, и҆ во все́й ст҃ѣ́й четыредесѧ́тницѣ, сло́вомъ, дѣ́ломъ, помышле́нїемъ, и҆ всѣ́ми мои́ми чꙋ́вствы. Бра́тїѧмъ же ѿвѣща́вшымъ: Бг҃ъ да прости́тъ тѝ честны́й ѻ҆́тче. Та́же прихо́дѧтъ и҆ бра́тїѧ два̀ два̀, про́сѧтъ подо́бнѣ и҆ ті́и проще́нїѧ, глаго́люще: Прости́ мѧ ѻ҆́тче ст҃ы́й: и҆ про́чее, ꙗ҆́коже вы́ше писа́сѧ. И҆ прїе́мше проще́нїе, и҆́демъ въ кє́ллїи на́шѧ, и҆ молчи́мъ до часа̀ вече́рнѧгѡ. Въ собо́рныхъ же хра́мѣхъ и҆ прихо́дскихъ росхо́дъ не быва́етъ: но по проще́нїи трезво́нъ въ дво́и.

Во ст҃ꙋ́ю и҆ вели́кꙋю сре́дꙋ ве́чера,

во свѣти́льничное, ѻ҆бы́чное стїхосло́вїе ѿ трист҃а́гѡ без̾ покло́нѡвъ. Стїхосло́вимъ же, и҆ Ко гдⷭ҇ꙋ внегда̀ скорбѣ́ти мѝ: без̾ покло́нѡвъ. На Гдⷭ҇и воззва́хъ, поста́вимъ стїхѡ́въ і҃ и҆ пое́мъ самогла́сны, гла́съ а҃:

Тебѐ дв҃ыѧ сн҃а, блꙋдни́ца позна́вши бг҃а, глаго́лаше, въ пла́чи молѧ́щисѧ, ꙗ҆́кѡ сле́зъ достѡ́йнаѧ содѣ́лавшаѧ: разрѣшѝ до́лгъ, ꙗ҆́коже и҆ а҆́зъ власы̀: возлюбѝ лю́бѧщꙋю, пра́веднѡ ненави́димꙋю, и҆ бли́зъ мытаре́й тебѐ проповѣ́мъ, бл҃годѣ́телю чл҃вѣколю́бче. <<уѳ҃і ѡ҆б.: 838>>

Многоцѣ́нное мѵ́ро блꙋдни́ца смѣсѝ со слеза́ми, и҆ и҆злїѧ̀ на пречⷭ҇тѣи но́зѣ твоѝ, ѡ҆блобыза́ющи: ѻ҆́нꙋю а҆́бїе ѡ҆правда́лъ є҆сѝ, на́мъ же проще́нїе да́рꙋй, пострада́вый ѡ҆ на́съ, и҆ сп҃сѝ на́съ.

Є҆гда̀ грѣ́шнаѧ приноша́ше мѵ́ро, тогда̀ ᲂу҆чени́къ соглаша́шесѧ пребеззакѡ́ннымъ. ѻ҆́ваѧ ᲂу҆́бѡ ра́довашесѧ, и҆стоща́ющи мѵ́ро многоцѣ́нное: се́й же тща́шесѧ прода́ти безцѣ́ннаго. сїѧ̀ влⷣкꙋ познава́ше, а҆ се́й ѿ влⷣки разлꙋча́шесѧ. сїѧ̀ свобожда́шесѧ, а҆ і҆ꙋ́да ра́бъ быва́ше врагꙋ̀. лю́то є҆́сть лѣ́ность, ве́лїе покаѧ́нїе: є҆́же мнѣ̀ да́рꙋй сп҃се, пострада́вый ѡ҆ на́съ, и҆ сп҃сѝ на́съ.

Ѽ і҆ꙋ́дина ѻ҆каѧ́нства! зрѧ́ше блꙋдни́цꙋ цѣлꙋ́ющꙋю стѡпы̀, и҆ ᲂу҆мышлѧ́ше ле́стїю, преда́нїѧ цѣлова́нїе ѻ҆́наѧ власы̀ разрѣшѝ, а҆ се́й ꙗ҆́ростїю вѧза́шесѧ, носѧ̀ вмѣ́стѡ мѵ́ра ѕлосмра́днꙋю ѕло́бꙋ: за́висть бо не вѣ́сть предпочита́ти поле́зное. ѽ і҆ꙋ́дина ѻ҆каѧ́нства, ѿ негѡ́же и҆зба́ви бж҃е, дꙋ́шы на́шѧ.

Гла́съ в҃: Грѣ́шнаѧ течѐ къ мѵ́рꙋ, кꙋпи́ти многоцѣ́нное мѵ́ро, є҆́же пома́зати бл҃годѣ́телѧ, и҆ мѷропрода́телю вопїѧ́ше: да́ждь мѝ мѵ́ро, да пома́жꙋ и҆ а҆́зъ ѡ҆чи́стившаго всѧ̑ моѧ̑ грѣхѝ.

Гла́съ ѕ҃: Погрꙋже́наѧ грѣхо́мъ, ѡ҆брѣ́те тѧ̀ приста́нище сп҃се́нїѧ, ви́ждь и҆ мѵ́ра со слеза́ми растворѧ́ющꙋю, тебѣ̀ вопїѧ́ше: ви́ждь, согрѣша́ющихъ покаѧ́нїѧ ѡ҆жида́ѧй: но влⷣко сп҃си́ мѧ ѿ волны̀ грѣхо́вныѧ, вели́кїѧ ра́ди твоеѧ̀ млⷭ҇ти.

Дне́сь хрⷭ҇то́съ прихо́дитъ въ до́мъ фарїсе́овъ, и҆ жена̀ грѣ́шница пристꙋпи́вши къ нога́мъ, валѧ́шесѧ вопїю́щи: ви́ждь погрꙋже́ннꙋю грѣхо́мъ, ѿча́ѧннꙋю дѣѧ́нїй ра́ди, негнꙋша́емꙋю ѿ твоеѧ̀ бл҃гости, и҆ да́ждь мѝ гдⷭ҇и ѡ҆ставле́нїе ѕлы́хъ, и҆ сп҃си́ мѧ. <<у҃к: 839>>

Прострѐ блꙋдни́ца власы̀ тебѣ̀ влⷣцѣ, прострѐ і҆ꙋ́да рꙋ́цѣ беззакѡ́ннымъ: ѻ҆́ва ᲂу҆́бѡ прїѧ́ти ѡ҆ставле́нїе, ѻ҆́въ же взѧ́ти сре́бреники. тѣ́мже тебѣ̀ вопїе́мъ про́даномꙋ, и҆ свобо́ждшемꙋ на́съ: гдⷭ҇и сла́ва тебѣ̀.

Пристꙋпѝ жена̀ ѕлосмра́днаѧ и҆ ѡ҆скверне́наѧ, сле́зы пролива́ющи, лю́бѧщи сп҃се, стра́сть и҆сповѣ́дающи: ка́кѡ воззрю̀ къ тебѣ̀ влⷣцѣ; са́мъ бо прише́лъ є҆сѝ спастѝ блꙋдни́цꙋ: и҆з̾ глꙋбины̀ ᲂу҆ме́ршꙋю мѧ̀ воскресѝ, и҆́же ла́зарѧ воздви́гнꙋвый и҆з̾ гро́ба четверодне́вна: прїими́ мѧ ѻ҆каѧ́ннꙋю гдⷭ҇и, и҆ сп҃си́ мѧ.

Ѿча́ѧннаѧ житїѧ̀ ра́ди, и҆ ᲂу҆вѣ́домаѧ нра́ва ра́ди, мѵ́ра носѧ́щаѧ пристꙋпѝ тебѣ̀ вопїю́щи: да не ѿве́ржеши менѐ блꙋ́днꙋю, роди́выйсѧ ѿ дв҃ы, да не пре́зриши моѧ̑ сле́зы, ра́досте а҆́гг҃лѡвъ, но прїими́ мѧ ка́ющꙋюсѧ, ю҆́же не ѿри́нꙋлъ є҆сѝ согрѣша́ющꙋю гдⷭ҇и, вели́кїѧ ра́ди твоеѧ̀ млⷭ҇ти.

Сла́ва, и҆ ны́нѣ, гла́съ и҃. Творе́нїе кассїа́ны и҆́нокини.

Гдⷭ҇и, ꙗ҆́же во мнѡ́гїѧ грѣхѝ впа́дшаѧ жена̀, твоѐ ѡ҆щꙋти́вшаѧ бж҃ество̀, мѷроно́сицы взе́мши чи́нъ, рыда́ющи мѵ́ро тебѣ̀ пре́жде погребе́нїѧ прино́ситъ: ᲂу҆вы̀ мнѣ̀, глаго́лющи, ꙗ҆́кѡ но́щь мнѣ̀ є҆́сть разжже́нїе блꙋда̀ невоздержа́нна, мра́чное же и҆ безлꙋ́нное раче́нїе грѣха̀. прїимѝ моѧ̑ и҆сто́чники сле́зъ, и҆́же ѻ҆блака́ми производѧ́й мо́рѧ во́дꙋ. приклони́сѧ къ мои̑мъ воздыха́нїємъ сердє́чнымъ, приклони́вый нб҃са̀, неизрече́ннымъ твои́мъ и҆стоща́нїемъ, да ѡ҆блобыжꙋ̀ пречⷭ҇тѣи твоѝ но́зѣ, и҆ ѡ҆трꙋ̀ сїѧ̑ па́ки главы̀ моеѧ̀ власы̀: и҆́хже въ раѝ є҆́ѵа, по полꙋ́дни, шꙋ́момъ ᲂу҆́шы ѡ҆гласи́вши, стра́хомъ скры́сѧ. грѣхѡ́въ мои́хъ мно́жєства, и҆ сꙋде́бъ твои́хъ бє́здны кто̀ и҆зслѣ́дитъ; дꙋшеспа́сче мо́й, да мѧ̀ твою̀ рабꙋ̀ не пре́зриши, и҆́же безмѣ́рнꙋю и҆мѣ́ѧй млⷭ҇ть. <<у҃к ѡ҆б.: 840>>

Вхо́дъ со є҆ѵⷢ҇лїемъ. Свѣ́те ти́хїй:

Прокі́менъ, ѱало́мъ рл҃є, гла́съ д҃: И҆сповѣ́дайтесѧ бг҃ꙋ нбⷭ҇номꙋ, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. Сті́хъ: И҆сповѣ́дайтесѧ бг҃ꙋ богѡ́въ, ꙗ҆́кѡ въ вѣ́къ млⷭ҇ть є҆гѡ̀.

И҆схо́да чте́нїе. [Глава̀ в҃, ст. а҃і-к҃в.]

Бы́сть во дни̑ мнѡ́гїѧ ѻ҆́ны, вели́къ бы́въ мѡѷсе́й, и҆зы́де къ бра́тїѧмъ свои̑мъ сынѡ́мъ і҆и҃лєвымъ: разꙋмѣ́въ же болѣ́знь и҆́хъ, ви́дѣ человѣ́ка є҆гѵ́птѧнина бїю́ща нѣ́коего є҆вре́анина ѿ бра́тїи є҆гѡ̀ сынѡ́въ і҆и҃левыхъ. Ѡ҆бозрѣ́всѧ же сѣ́мѡ и҆ ѻ҆ва́мѡ, никого́же ви́дѣ: и҆ порази́въ є҆гѵ́птѧнина, скры̀ є҆го̀ въ песцѣ̀. И҆зше́дъ же во вторы́й де́нь, ви́дѣ два̀ мꙋ̑жа є҆вре́анина бїю́щыѧсѧ, и҆ глаго́ла ѡ҆би́дѧщемꙋ: чесѡ̀ ра́ди ты̀ бїе́ши и҆́скреннѧго; Ѻ҆́нъ же речѐ: кто́ тѧ поста́ви кнѧ́зѧ и҆ сꙋдїю̀ над̾ на́ми; є҆да̀ ᲂу҆би́ти мѧ̀ ты̀ хо́щеши, и҆́мже ѡ҆́бразомъ ᲂу҆би́лъ є҆сѝ вчера̀ є҆гѵ́птѧнина; ᲂу҆боѧ́сѧ же мѡѷсе́й, и҆ речѐ: а҆́ще си́це ꙗ҆вле́нъ бы́сть глаго́лъ се́й; ᲂу҆слы́ша же фараѡ́нъ глаго́лъ се́й, и҆ и҆ска́ше ᲂу҆би́ти мѡѷсе́а. ѿи́де же мѡѷсе́й ѿ лица̀ фараѡ́нова, и҆ всели́сѧ въ землѝ мадїа́мстѣй: прише́дъ же въ зе́млю мадїа́мскꙋю, сѣ́де при кла́дѧзѣ. Свѧще́нникꙋ же мадїа́мскомꙋ бѣ́ша се́дмь дще́рей пасꙋ́щихъ ѻ҆́вцы ѻ҆тца̀ своегѡ̀ і҆ѡѳо́ра: прише́дше же че́рпахꙋ, до́ндеже напо́лниша кѡры́та, напои́ти ѻ҆́вцы ѻ҆тца̀ своегѡ̀ і҆ѡѳо́ра. Прише́дше же па́стырїе и҆згна́ша ѧ҆̀: воста́въ же мѡѷсе́й и҆зба́ви и҆̀хъ, и҆ налїѧ̀ и҆̀мъ, и҆ напоѝ ѻ҆́вцы и҆́хъ. Прїидо́ша же къ рагꙋи́лꙋ ѻ҆тцꙋ̀ своемꙋ̀, ѻ҆́нъ же речѐ и҆̀мъ: что̀ ꙗ҆́кѡ ᲂу҆скори́сте прїитѝ дне́сь; Ѻ҆́ныѧ же реко́ша: человѣ́къ є҆гѵ́птѧнинъ и҆зба́ви на́съ ѿ па́стырей, и҆ наче́рпа на́мъ, и҆ напоѝ ѻ҆́вцы на́шѧ. Ѻ҆́нъ же речѐ дще́ремъ свои̑мъ: <<ук҃а ѡ҆б.: 842>> и҆ гдѣ̀ є҆́сть; и҆ вскꙋ́ю си́це ѡ҆ста́висте человѣ́ка; призови́те ᲂу҆̀бо є҆го̀, да ꙗ҆́стъ хлѣ́бъ. Всели́сѧ же мѡѷсе́й ᲂу҆ человѣ́ка: и҆ дадѐ сепфѡ́рꙋ дще́рь свою̀ мѡѷсе́ю въ женꙋ̀. Во чре́вѣ же заче́нши жена̀, родѝ сы́на, и҆ наречѐ мѡѷсе́й и҆́мѧ є҆мꙋ̀, гирса́мъ, глаго́лѧ: ꙗ҆́кѡ пришле́цъ є҆́смь въ землѝ чꙋжде́й. є҆ще́ же заче́нши родѝ сы́на втора́го, и҆ наречѐ и҆́мѧ є҆мꙋ̀ є҆лїезе́ръ, глаго́лѧ: бг҃ъ бо ѻ҆тца̀ моегѡ̀ помо́щникъ мо́й, и҆ и҆зба́ви мѧ̀ и҆з̾ рꙋкѝ фараѡ́новы.

Прокі́менъ, ѱало́мъ рл҃з, гла́съ д҃: Гдⷭ҇и, млⷭ҇ть твоѧ̀ во вѣ́къ, дѣ́лъ рꙋкꙋ̀ твоє́ю не пре́зри. Сті́хъ: И҆сповѣ́мсѧ тебѣ̀ гдⷭ҇и всѣ́мъ се́рдцемъ мои́мъ, и҆ пред̾ а҆́гг҃лы воспою̀ тебѣ̀.

І҆́ѡва чте́нїе. [Глава̀ в҃, ст. а҃-і҃.]

Бы́сть ꙗ҆́кѡ де́нь се́й, и҆ прїидо́ша а҆́гг҃ли бж҃їи предста́ти пред̾ гдⷭ҇емъ: и҆ дїа́волъ прїи́де посредѣ̀ и҆́хъ предста́ти пред̾ гдⷭ҇емъ. И҆ речѐ гдⷭ҇ь дїа́волꙋ: ѿкꙋ́дꙋ ты̀ грѧде́ши; тогда̀ речѐ дїа́волъ пред̾ гдⷭ҇емъ: проше́дъ поднебе́снꙋю, и҆ ѡ҆бше́дъ всю̀ зе́млю, прїидо́хъ. И҆ речѐ гдⷭ҇ь къ дїа́волꙋ: внѧ́лъ ли є҆сѝ ᲂу҆́бѡ [мы́слїю твое́ю] рабꙋ̀ моемꙋ̀ і҆́ѡвꙋ; ꙗ҆́кѡ нѣ́сть такова̀ ѿ сꙋ́щихъ на землѝ: человѣ́къ неѕло́бивъ, и҆́стиненъ, непоро́ченъ, бг҃очести́въ, ᲂу҆далѧ́ѧйсѧ ѿ всѧ́кагѡ ѕла̀, є҆ще́ же придержи́тсѧ неѕло́бїѧ: ты́ же ре́клъ є҆сѝ и҆мѣ̑нїѧ є҆гѡ̀ погꙋби́ти вотщѐ. Ѿвѣща́въ же дїа́волъ гдⷭ҇ви, речѐ: ко́жꙋ за ко́жꙋ, и҆ всѧ̑ є҆ли̑ка и҆́мать человѣ́къ, да́стъ за дꙋ́шꙋ свою̀. Ѻ҆ба́че послѝ рꙋ́кꙋ твою̀, и҆ косни́сѧ косте́мъ є҆гѡ̀, и҆ пло́ти є҆гѡ̀, а҆́ще не въ лице́ тѧ бл҃гослови́тъ. Рече́ же гдⷭ҇ь дїа́волꙋ: сѐ предаю́ ти є҆го̀, то́кмѡ дꙋ́шꙋ є҆гѡ̀ соблюдѝ. И҆зы́де же дїа́волъ ѿ лица̀ гдⷭ҇нѧ, и҆ поразѝ і҆́ѡва гно́емъ лю́тымъ ѿ но́гъ да́же до главы̀. И҆ взѧ̀ [і҆́ѡвъ] чре́пъ, да <<ук҃а ѡ҆б.: 842>> ѡ҆строга́етъ гно́й сво́й, и҆ то́й сѣдѧ́ше на гно́ищи внѣ̀ гра́да. Вре́мени же мно́гꙋ минꙋ́вшꙋ, речѐ къ немꙋ̀ жена̀ є҆гѡ̀ глаго́лющи: доко́лѣ терпи́ши, сѐ пождꙋ̀ вре́мѧ є҆щѐ ма́ло, ча́ющи наде́жди сп҃се́нїѧ моегѡ̀. се́ бо потреби́сѧ ѿ землѝ па́мѧть твоѧ̀, сы́нове твоѝ и҆ дщє́ри, моегѡ̀ чре́ва болѣ̑зни и҆ трꙋды̀, и҆́миже вотщѐ трꙋди́хсѧ съ болѣ́зньми: ты́ же са́мъ въ гноѝ черве́й сѣди́ши, ѡ҆бнощева́ѧ внѣ̀ без̾ покро́ва, и҆ а҆́зъ скита́ющисѧ и҆ слꙋжа́щи, мѣ́сто ѿ мѣ́ста преходѧ́щи, и҆ до́мъ ѿ до́мꙋ, ѡ҆жида́ющи со́лнца, когда̀ за́йдетъ, да почі́ю ѿ трꙋдѡ́въ мои́хъ, и҆ ѿ болѣ́зней, ꙗ҆̀же мѧ̀ ны́нѣ ѡ҆бдержа́тъ. но рцы̀ глаго́лъ нѣ́кїй ко гдⷭ҇ꙋ, и҆ ᲂу҆мрѝ. Ѻ҆́нъ же воззрѣ́въ речѐ къ не́й: вскꙋ́ю ꙗ҆́кѡ є҆ди́на ѿ безꙋ́мныхъ же́нъ возглаго́лала є҆сѝ; а҆́ще блага̑ѧ прїѧ́хомъ ѿ рꙋкѝ гдⷭ҇ни, ѕлы́хъ ли не стерпи́мъ; во всѣ́хъ си́хъ приключи́вшихсѧ є҆мꙋ̀, ничи́мже согрѣшѝ і҆́ѡвъ ᲂу҆стна́ма пред̾ бг҃омъ, [и҆ не дадѐ безꙋ́мїѧ бг҃ꙋ].

Та́же, Да и҆спра́витсѧ мл҃тва моѧ̀: Є҆ѵⷢ҇лїе ѿ матѳе́а, зача́ло р҃и. И҆ про́чее послѣ́дованїе преждеѡсщ҃е́нныхъ. И҆ по пренесе́нїи чⷭ҇тны́хъ дарѡ́въ покло́ны г҃. И҆ а҆́бїе ᲂу҆пражднѧ́ютсѧ соверше́ннѡ въ це́ркви быва́ємыѧ покло́ны. Въ ке́ллїахъ же да́же и҆ до вели́кагѡ пѧтка̀ соверша́ютсѧ.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.