Неделя ваий (Вербное Воскресенье)

Неделя ваий (Вербное Воскресенье)

<<тп҃г ѡ҆б.: 766>>

Въ сꙋббѡ́тꙋ ва́їй ве́чера

на ма́лѣй вече́рни поста́вимъ стїхѝ д҃, и҆ пое́мъ настоѧ́щыѧ стїхи̑ры. Гла́съ ѕ҃: Подо́бенъ: Тридне́внѡ:

Ѿ неѕло́бивыхъ млⷣнєцъ хрⷭ҇тѐ, на жребѧ́ти сѣдѧ̀ прїѧ́лъ є҆сѝ побѣ́днꙋю пѣ́снь, грѧды́й ко стрⷭ҇ти: трист҃ы́мъ пѣ́нїемъ ѿ а҆́гг҃лъ воспѣва́емый.

Сѐ цр҃ь тво́й сїѡ́не, кро́токъ и҆ сп҃са́ѧй грѧде́тъ на жребѧ́ти, врагѝ взыскꙋ́ѧй порази́ти въ крѣ́пости: ра́дꙋйсѧ и҆ красꙋ́йсѧ съ ва́їемъ пра́зднꙋющи.

Воспле́щимъ согла́снѡ вѣ́рнїи, вѣ̑тви добродѣ́телей и҆ мы̀, ꙗ҆́кѡ ѻ҆́троцы ны́нѣ приносѧ́ще хрⷭ҇тꙋ̀, и҆ семꙋ̀ бж҃е́ственныхъ дѣ́лъ распростре́мъ ѡ҆дѣѧ̑нїѧ, и҆ та́инственнѡ сего̀ прїи́мемъ.

Ва̑їа добродѣ́телей бра́тїе, принесе́мъ хрⷭ҇тꙋ̀ бг҃ꙋ грѧдꙋ́щемꙋ, на́съ ра́ди человѣ́чески пострада́ти во́лею, бж҃ества̀ крѣ́постїю всѣ̑мъ безстра́стїе дарова́ти.

Сла́ва, и҆ ны́нѣ, подо́бенъ то́йже: На плеща́хъ херꙋві́мскихъ ꙗ҆́кѡ бг҃ъ носи́мый, сѣда́етъ на жребѧ̀, на́съ ра́ди на снѣ́дь грѧды́й хотѣ́нїемъ: прїиди́те ᲂу҆се́рднѡ сего̀ съ ва́їемъ воспои́мъ.

На стїхо́внѣ, гла́съ в҃:

Подо́бенъ: До́ме є҆ѵфра́ѳовъ:

Свѣтли́сѧ сїѡ́не но́вый ва́їемъ, воспѣва́й со ѻ҆́троки, сѐ цр҃ь тво́й сп҃са́ѧй къ стрⷭ҇ти грѧде́тъ.

Сті́хъ: И҆з̾ ᲂу҆́стъ млⷣнєцъ и҆ ссꙋ́щихъ соверши́лъ є҆сѝ хвалꙋ̀.

Весели́тесѧ а҆да́ме и҆ є҆́ѵо, съ прⷪ҇ро́ки, сѐ призва́ти ва́съ стрⷭ҇тїю, гдⷭ҇ь прихо́дитъ.

Сті́хъ: Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ. <<тп҃д: 767>>

Горѣ̀ со ѻ҆ц҃е́мъ, и҆ дх҃омъ, а҆́гг҃льскꙋю прїе́мый пѣ́снь, ѡ҆бнищава́етъ стра́ннѡ до́лѣ, и҆ ѻ҆́троческꙋю пѣ́снь прїе́млетъ.

Сла́ва, и҆ ны́нѣ, подо́бенъ то́йже: Пою̀ твоѐ стра́шное смотре́нїе стра́хомъ, є҆́же ѡ҆са́нна взыва́ю тебѣ̀: мене́ бо грѧде́ши сп҃стѝ, бл҃гослове́нный гдⷭ҇и.

Ны́нѣ ѿпꙋща́еши: Трист҃о́е. И҆ про́чее ꙗ҆́коже ѻ҆бы́чай.

И҆ тропарѝ, гла́съ а҃: Ѻ҆́бщее воскрⷭ҇нїе, пре́жде твоеѧ̀ стрⷭ҇ти ᲂу҆вѣрѧ́ѧ, и҆з̾ ме́ртвыхъ воздви́глъ є҆сѝ ла́зарѧ хрⷭ҇тѐ бж҃е. тѣ́мже и҆ мы̀ ꙗ҆́кѡ ѻ҆́троцы побѣ́ды зна́мєнїѧ носѧ́ще, тебѣ̀ побѣди́телю сме́рти вопїе́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не.

И҆ дрꙋгі́й, гла́съ д҃: Спогре́бшесѧ тебѣ̀ креще́нїемъ хрⷭ҇тѐ бж҃е на́шъ, безсме́ртныѧ жи́зни сподо́бихомсѧ воскрⷭ҇нїемъ твои́мъ, и҆ воспѣва́юще зове́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не.

И҆ быва́етъ ѿпꙋ́стъ. И҆ вхо́димъ въ трапе́зꙋ.

Въ сꙋббѡ́тꙋ ва́їй ве́чера,

на вели́цѣй вече́рни, по предначина́тельномъ ѱалмѣ̀, ѻ҆бы́чное стїхосло́вїе. Бл҃же́нъ мꙋ́жъ: Каѳі́сма всѧ̀. На Гдⷭ҇и воззва́хъ, поста́вимъ стїхѡ́въ і҃. И҆ пое́мъ стїхи̑ры самогла́сны є҃, повторѧ́юще ѧ҆̀.

Гла́съ ѕ҃:

Дне́сь бл҃года́ть ст҃а́гѡ дх҃а на́съ собра̀, и҆ всѝ взе́мше крⷭ҇тъ тво́й глаго́лемъ, бл҃гослове́нъ грѧды́й во и҆́мѧ гдⷭ҇не, ѡ҆са́нна въ вы́шнихъ. <<тп҃д ѡ҆б.: 768>>

И҆мѣ́ѧй прⷭ҇то́лъ нб҃о, и҆ подно́жїе зе́млю, бг҃а ѻ҆ц҃а̀ сло́во и҆ сн҃ъ соприсносꙋ́щный, на жребѧ́ти безслове́снѣмъ смири́сѧ дне́сь, въ виѳа́нїю прише́дъ. тѣ́мже дѣ́ти є҆врє́йскїѧ, вѣ̑тви рꙋка́ми держа́ще, хва́лѧхꙋ гла́сомъ: ѡ҆са́нна въ вы́шнихъ, бл҃гослове́нъ грѧды́й цр҃ь і҆и҃левъ.

Прїиди́те и҆ мы̀ дне́сь ве́сь но́вый і҆и҃ль, ꙗ҆́же ѿ ꙗ҆зы̑къ цр҃ковь, со прⷪ҇ро́комъ заха́рїею возопїи́мъ: ра́дꙋйсѧ ѕѣлѡ̀ дщѝ сїѡ́нова, проповѣ́дꙋй дщѝ і҆ерⷭ҇ли́мова: ꙗ҆́кѡ сѐ цр҃ь тво́й грѧде́тъ тебѣ̀ кро́токъ и҆ сп҃са́ѧй, и҆ всѣ́дый на жребѧ̀ ѻ҆́сле, сы́на под̾ѧре́мнича: пра́зднꙋй ꙗ҆̀же дѣте́й, вѣ̑тви рꙋка́ми держа́щи похвалѝ: ѡ҆са́нна въ вы́шнихъ, бл҃гослове́нъ грѧды́й цр҃ь і҆и҃левъ.

Честно́е воскрⷭ҇нїе твоѐ проѡбразꙋ́ѧ на́мъ, воздви́глъ є҆сѝ ᲂу҆ме́ршаго повелѣ́нїемъ твои́мъ, бездыха́ннаго ла́зарѧ дрꙋ́га бл҃же, и҆з̾ гро́ба четверодне́вна смердѧ́ща. тѣ́мже и҆ на жребѧ̀ возше́дъ ѡ҆бра́знѡ, ꙗ҆́коже на колесни́цѣ носи́мь, ꙗ҆зы́ки ᲂу҆кротѣва́ѧ сп҃се. сегѡ̀ ра́ди и҆ хвале́нїе прино́ситъ возлю́бленный і҆и҃ль и҆з̾ ᲂу҆́стъ ссꙋ́щихъ, и҆ млⷣнєцъ неѕло́бивыхъ, зрѧ́щихъ тѧ̀ хрⷭ҇тѐ, входѧ́ща во ст҃ы́й гра́дъ, пре́жде шестѝ дне́й па́схи.

Пре́жде шестѝ дне́й па́схи прїи́де і҆и҃съ во виѳа́нїю, и҆ пристꙋпи́ша къ немꙋ̀ ᲂу҆ч҃нцы̀ є҆гѡ̀, глаго́люще є҆мꙋ̀: гдⷭ҇и, гдѣ̀ хо́щеши, ᲂу҆гото́ваемъ тѝ ꙗ҆́сти па́схꙋ. ѻ҆́нъ же посла̀ и҆́хъ: и҆ди́те въ пре́днюю ве́сь, и҆ ѡ҆брѧ́щете человѣ́ка, скꙋде́ль воды̀ носѧ́ща: послѣ́дꙋйте є҆мꙋ̀, и҆ до́мꙋ влады́цѣ рцы́те: ᲂу҆ч҃тль глаго́летъ, ᲂу҆ тебѐ сотворю̀ па́схꙋ со ᲂу҆ч҃нкѝ мои́ми.

Сла́ва, а҃-ю стїхи́рꙋ: Дне́сь бл҃года́ть ст҃а́гѡ дх҃а: И҆ ны́нѣ, па́ки то́йже. Вхо́дъ. Свѣ́те ти́хїй. Прокі́менъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ. <<тп҃є: 769>>

Бытїѧ̀ чте́нїе. [Глава̀ м҃ѳ, ст. а҃-в҃і.]

Призва̀ і҆а́кѡвъ сы́ны своѧ̑, и҆ речѐ и҆̀мъ: собери́тесѧ, да возвѣщꙋ̀ ва́мъ, что̀ срѧ́щетъ ва́съ въ послѣ̑днїѧ дни̑. Собери́тесѧ, и҆ послꙋ́шайте менѐ сы́нове і҆а́кѡвли: послꙋ́шайте і҆и҃лѧ, послꙋ́шайте ѻ҆тца̀ ва́шего. І҆ꙋ́до, тебѐ похва́лѧтъ бра́тїѧ твоѧ̑: рꙋ́цѣ твоѝ на плещꙋ̀ вра̑гъ твои́хъ: покло́нѧтсѧ тебѣ̀ сы́нове ѻ҆тца̀ твоегѡ̀. Скѵ́менъ львѡ́въ і҆ꙋ́да, ѿ лѣ́торасли сы́не мо́й возше́лъ є҆сѝ: возле́гъ ᲂу҆снꙋ́лъ є҆сѝ ꙗ҆́кѡ ле́въ, и҆ ꙗ҆́кѡ скѵ́менъ, кто̀ возбꙋ́дитъ є҆го̀; Не ѡ҆скꙋдѣ́етъ кнѧ́зь ѿ і҆ꙋ́ды, и҆ во́ждь ѿ чре́слъ є҆гѡ̀, до́ндеже прїи́дꙋтъ ѿложє́наѧ є҆мꙋ̀: и҆ то́й ча́ѧнїе ꙗ҆зы́кѡвъ. Привѧзꙋ́ѧй къ лозѣ̀ жребѧ̀ своѐ, и҆ къ ві́нничїю жребца̀ ѻ҆слѧ́те своегѡ̀: и҆спере́тъ вїно́мъ ѻ҆де́ждꙋ свою̀, и҆ кро́вїю гро́здїѧ ѡ҆дѣѧ́нїе своѐ. Радостотво́рны ѻ҆́чи є҆гѡ̀ па́че вїна̀, и҆ бѣлы̀ зꙋ́бы є҆гѡ̀ па́че млека̀.

Прⷪ҇ро́чества софѡ́нїева чте́нїе. [Глава̀ г҃, ст. д҃і- ѳ҃і.]

Та́кѡ глаго́летъ гдⷭ҇ь: ра́дꙋйсѧ дщѝ сїѡ́нова ѕѣлѡ̀, проповѣ́дꙋй дщѝ і҆ерⷭ҇ли́мова, весели́сѧ и҆ преꙋкраша́йсѧ ѿ всегѡ̀ се́рдца твоегѡ̀, дщѝ і҆ерⷭ҇ли́млѧ. Ѿѧ́тъ гдⷭ҇ь непра̑вды твоѧ̑, и҆ и҆зба́вилъ тѧ̀ є҆́сть и҆з̾ рꙋкѝ вра̑гъ твои́хъ: воцр҃и́тсѧ гдⷭ҇ь посредѣ̀ тебѐ, и҆ не ᲂу҆́зриши ѕла̀ ктомꙋ̀. Во вре́мѧ ѻ҆́но рече́тъ гдⷭ҇ь і҆ерⷭ҇ли́мꙋ: дерза́й сїѡ́не, да не ѡ҆слабѣ́ютъ рꙋ́цѣ твоѝ. Гдⷭ҇ь бг҃ъ тво́й въ тебѣ̀, си́льный сп҃се́тъ тѧ̀: наведе́тъ на тѧ̀ весе́лїе, и҆ ѡ҆бнови́тъ тѧ̀ въ любвѝ свое́й, и҆ возвесели́тсѧ ѡ҆ тебѣ̀ во ᲂу҆краше́нїи, ꙗ҆́кѡ въ де́нь пра́здника. И҆ соберꙋ̀ сотрє́ныѧ твоѧ̑: го́ре, кто̀ прїи́метъ на́нь поноше́нїе; Сѐ а҆́зъ сотворю̀ въ тебѣ̀, тебѐ ра́ди, глаго́летъ гдⷭ҇ь, во вре́мѧ ѻ҆́но: и҆ спасꙋ̀ <<тп҃є ѡ҆б.: 770>> ᲂу҆тисне́ннꙋю, и҆ ѿринове́ннꙋю прїимꙋ̀, и҆ положꙋ̀ ѧ҆̀ въ похвале́нїе, и҆ и҆мени́ты по все́й землѝ.

Прⷪ҇ро́чества заха́рїина чте́нїе. [Глава̀ ѳ҃, ст. ѳ҃- є҃і.]

Та́кѡ глаго́летъ гдⷭ҇ь: ра́дꙋйсѧ ѕѣлѡ̀ дщѝ сїѡ́нѧ, проповѣ́дꙋй дщѝ і҆ерⷭ҇ли́млѧ: сѐ цр҃ь тво́й грѧде́тъ тебѣ̀ првⷣнъ и҆ сп҃са́ѧй, то́й кро́токъ, и҆ всѣ́дъ на под̾ѧре́мника и҆ жребца̀ ю҆́на. И҆ потреби́тъ колєсни́цы ѿ є҆фре́ма, и҆ ко́ни ѿ і҆ерⷭ҇ли́ма, и҆ потреби́тъ лꙋ́къ бра́нный, и҆ мно́жество, и҆ ми́ръ ѿ ꙗ҆зы́кѡвъ: и҆ ѡ҆блада́етъ вода́ми ѿ мо́рѧ до мо́рѧ, и҆ ѿ рѣ́къ до и҆схо́дищъ землѝ. И҆ ты̀ въ кро́ви завѣ́та твоегѡ̀, и҆спꙋсти́лъ є҆сѝ ᲂу҆́зники твоѧ̑ ѿ ро́ва не и҆мꙋ́ща воды̀. Сѧ́дите въ твердѣ́лехъ свѧ́зани со́нмища, и҆ за є҆ди́нъ де́нь прише́льствїѧ твоегѡ̀ сꙋгꙋ́бѡ возда́мъ тѝ. Зане́же напрѧго́хъ тѧ̀ себѣ̀ і҆ꙋ́до ꙗ҆́кѡ лꙋ́къ, и҆спо́лнихъ є҆фре́ма, и҆ воздви́гнꙋ ча̑да твоѧ̑ сїѡ́не на ча̑да є҆́ллинска, и҆ ѡ҆сѧжꙋ́ тѧ ꙗ҆́кѡ ме́чь ра́тника. И҆ гдⷭ҇ь на ни́хъ ꙗ҆ви́тсѧ, и҆ и҆зы́детъ ꙗ҆́кѡ мо́лнїѧ стрѣла̀ є҆гѡ̀: и҆ гдⷭ҇ь бг҃ъ вседержи́тель въ трꙋбꙋ̀ вострꙋ́битъ, и҆ по́йдетъ въ шꙋ́мѣ преще́нїѧ своегѡ̀. Гдⷭ҇ь вседержи́тель защити́тъ и҆̀хъ.

На лїті́и стїхи̑ры самогла́сны, гла́съ а҃:

Всест҃ы́й дх҃ъ, а҆пⷭ҇лы наꙋчи́вый глаго́лати и҆ны́ми стра́нными ѧ҆зы́ки, то́й дѣ́темъ є҆врє́йскимъ неискꙋсоѕлѡ́бнымъ повелѣва́етъ зва́ти: ѡ҆са́нна въ вы́шнихъ, бл҃гослове́нъ грѧды́й цр҃ь і҆и҃левъ.

Собезнача́льный и҆ соприсносꙋ́щный, сн҃ъ и҆ сло́во ѻ҆́ч҃ее, на жребѧ́ти безслове́сномъ сѣдѧ̀, прїи́де дне́сь во гра́дъ і҆ерⷭ҇ли́мъ: є҆гѡ́же херꙋві́ми со стра́хомъ зрѣ́ти не мо́гꙋтъ, дѣ́ти восхвали́ша, съ ва́їемъ и҆ вѣ́твьми, хвалꙋ̀ та́инственнѡ воспѣва́юще: ѡ҆са́нна въ вы́шнихъ, <<тп҃ѕ: 771>> ѡ҆са́нна сн҃ꙋ дв҃довꙋ, прише́дшемꙋ сп҃стѝ ѿ пре́лести ве́сь ро́дъ на́шъ.

Пре́жде шестѝ дне́й па́схи, гла́съ тво́й ᲂу҆слы́шасѧ гдⷭ҇и, во глꙋбина́хъ а҆́довыхъ: тѣ́мже и҆ ла́зарѧ четверодне́вна воздви́глъ є҆сѝ. дѣ́ти же є҆врє́йскїѧ взыва́хꙋ: ѡ҆са́нна бж҃е на́шъ, сла́ва тебѣ̀.

Гла́съ в҃: Входѧ́щꙋ тѝ гдⷭ҇и во ст҃ы́й гра́дъ, на жребѧ́ти сѣдѧ̀, потща́лсѧ є҆сѝ прїитѝ на стрⷭ҇ть, да соверши́ши зако́нъ и҆ прⷪ҇ро́ки. дѣ́ти же є҆врє́йскїѧ воскрⷭ҇нїѧ побѣ́дꙋ предвозвѣща́юще, срѣта́хꙋ тѧ̀ съ вѣ́твьми и҆ ва́їемъ, глаго́люще: бл҃гослове́нъ є҆сѝ сп҃се, поми́лꙋй на́съ.

Сла́ва тебѣ̀ хрⷭ҇тѐ, въ вы́шнихъ сѣдѧ́щемꙋ на прⷭ҇то́лѣ, и҆ ны́нѣ ча́емомꙋ съ чⷭ҇тны́мъ твои́мъ крⷭ҇то́мъ. тѣ́мже весели́тсѧ дщѝ сїѡ́нова, ра́дꙋютсѧ ꙗ҆зы́цы земні́и, вѣ̑тви держа́тъ дѣ́ти, ри̑зы же ᲂу҆ч҃нцы̀, и҆ всѧ̀ вселе́ннаѧ наꙋчи́сѧ вопи́ти тебѣ̀: бл҃гослове́нъ є҆сѝ сп҃се, поми́лꙋй на́съ.

Сла́ва и҆ ны́нѣ, гла́съ г҃: Пре́жде шестѝ дне́й бытїѧ̀ па́схи, прїи́де і҆и҃съ во виѳа́нїю, воззва́ти ᲂу҆ме́рша четверодне́вна ла́зарѧ, и҆ проповѣ́дати воскрⷭ҇нїе. срѣто́ша же є҆го̀ и҆ жєны̀, ма́рѳа и҆ марі́а сєстры̀ ла́зарєвы, вопїю́ще къ немꙋ̀: гдⷭ҇и, а҆́ще бы є҆сѝ бы́лъ здѣ̀, не бы̀ ᲂу҆́мерлъ бра́тъ на́шъ. тогда̀ глаго́ла къ ни̑мъ: не предреко́хъ ли ва́мъ: вѣ́рꙋѧй въ мѧ̀, а҆́ще и҆ ᲂу҆́мретъ, жи́въ бꙋ́детъ: покажи́те мѝ, гдѣ̀ положи́сте є҆го̀; и҆ вопїѧ́ше къ немꙋ̀ зижди́тель всѣ́хъ: ла́заре, грѧдѝ во́нъ.

И҆ ѻ҆бы̑чныѧ лїті́и мл҃твы въ па́перти.

На стїхо́внѣ стїхи̑ры самогла́сны, гла́съ и҃:

Ра́дꙋйсѧ и҆ весели́сѧ гра́де сїѡ́не, красꙋ́йсѧ и҆ ра́дꙋйсѧ цр҃кве бж҃їѧ: се́ бо цр҃ь тво́й прїи́де въ пра́вдѣ, на жребѧ́ти сѣдѧ̀, ѿ дѣте́й воспѣва́емый: ѡ҆са́нна въ <<тп҃ѕ ѡ҆б.: 772>> вы́шнихъ, бл҃гослове́нъ є҆сѝ, и҆мѣ́ѧй мно́жество щедро́тъ, поми́лꙋй на́съ.

Сті́хъ: И҆з̾ ᲂу҆́стъ младе́нєцъ и҆ ссꙋ́щихъ соверши́лъ є҆сѝ хвалꙋ̀.

Прїи́де сп҃съ дне́сь во гра́дъ і҆ерⷭ҇ли́мъ, и҆спо́лнити писа́нїе, и҆ всѝ прїѧ́ша въ рꙋ́ки ва̑їа: ри̑зы же подстила́хꙋ є҆мꙋ̀, вѣ́дꙋще, ꙗ҆́кѡ то́й є҆́сть бг҃ъ на́шъ, є҆мꙋ́же херꙋві́ми вопїю́тъ непреста́ннѡ: ѡ҆са́нна въ вы́шнихъ, бл҃гослове́нъ є҆сѝ, и҆мѣ́ѧй мно́жество щедро́тъ поми́лꙋй на́съ.

Сті́хъ: Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ.

На херꙋві́мѣхъ носи́мый, и҆ пѣва́емый ѿ серафі̑мъ, возсѣ́лъ є҆сѝ на жребѧ̀ дв҃дски бл҃же: и҆ дѣ́ти тѧ̀ воспѣва́хꙋ бг҃олѣ́пнѡ, і҆ꙋде́є же хꙋ́лѧхꙋ беззако́ннѡ: стро́потное ꙗ҆зы́кѡвъ, сѣда́лище жребца̀ проѡбразова́ше, и҆з̾ невѣ́рїѧ въ вѣ́рꙋ претворѧ́емое. сла́ва тебѣ̀ хрⷭ҇тѐ, є҆ди́не млⷭ҇тиве и҆ чл҃вѣколю́бче.

Сла́ва, гла́съ ѕ҃: Дне́съ бл҃года́ть ст҃а́гѡ дх҃а на́съ собра̀:

И҆ ны́нѣ, па́ки то́йже. Ны́нѣ ѿпꙋща́еши: Трист҃о́е, и҆ про́чее по ѻ҆бы́чаю. И҆ глаго́лемъ тропа́рь ѿпꙋсти́тельный, гла́съ а҃: Ѻ҆́бщее воскрⷭ҇нїе: Два́жды. И҆́нъ тропа́рь, гла́съ д҃: Спогре́бшесѧ тебѣ̀: є҆ди́ножды. и҆ Бꙋ́ди и҆́мѧ гдⷭ҇не: г҃. И҆ ѱало́мъ: Бл҃гословлю̀ гдⷭ҇а: И҆ предложи́тсѧ чте́нїе. Сло́во торже́ственное пра́здника.

Въ недѣ́лю цвѣтоно́сїѧ.

На ᲂу҆́трени, на Бг҃ъ гдⷭ҇ь, тропарѧ̀ ѻ҆́ба: Ѻ҆́бщее воскрⷭ҇нїе: два́жды. Сла́ва, и҆ ны́нѣ: Спогре́бшесѧ тебѣ̀ кр҃ще́нїемъ:

По а҃-мъ стїхосло́вїи сѣда́ленъ, гла́съ д҃.

Подо́бенъ: Оу҆диви́сѧ і҆ѡ́сифъ:

Съ вѣ́твьми ᲂу҆́мнѡ ѡ҆чище́ни дꙋша́ми, ꙗ҆́коже дѣ́ти хрⷭ҇та̀ восхва́лимъ вѣ́рнѡ, велегла́снѡ зовꙋ́ще влⷣцѣ: <<тп҃з: 773>> бл҃гослове́нъ є҆сѝ сп҃се въ мі́ръ прише́дый, сп҃стѝ а҆да́ма ѿ дре́внїѧ клѧ́твы, дх҃о́внѡ бы́въ чл҃вѣколю́бче но́вый а҆да́мъ, ꙗ҆́коже бл҃говоли́лъ є҆сѝ: всѧ̑ сло́ве къ поле́зномꙋ ᲂу҆стро́ивый, сла́ва тебѣ̀.

Сла́ва, и҆ ны́нѣ, и҆ны́й сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ:

Четверодне́вна ла́зарѧ ѿ гро́ба возста́вивый гдⷭ҇и, всѧ̑ наꙋчи́лъ є҆сѝ вопи́ти съ ва́їемъ и҆ вѣ́твьми тебѣ̀: бл҃гослове́нъ є҆сѝ грѧды́й.

И҆ чте́нїе во є҆ѵⷢ҇лїи толково́мъ і҆ѡа́нна златоꙋ́стагѡ.

По в҃-мъ стїхосло́вїи сѣда́ленъ, гла́съ д҃. Подо́бенъ: Оу҆диви́сѧ:

Над̾ дрꙋ́гомъ твои́мъ хрⷭ҇тѐ сле́зы то́чиши та́йнѡ, и҆ воздвиза́еши и҆з̾ ме́ртвыхъ ла́зарѧ лежа́ща ме́ртва, въ не́мже сострада́нїе показа́лъ є҆сѝ чл҃вѣколю́бнѡ: ᲂу҆вѣ́дѣвше же твоѐ прише́ствїе і҆и҃се, мно́жество младе́нєцъ и҆зыдо́ша дне́сь, въ рꙋка́хъ ва̑їа держа́ще, ѡ҆са́нна тебѣ̀ взыва́юще: бл҃гослове́нъ є҆сѝ, во є҆́же мі́ръ сп҃стѝ прише́дый.

Сла́ва, и҆ ны́нѣ, и҆ны́й сѣда́ленъ, гла́съ а҃.

Подо́бенъ: Ка́мени запеча́танꙋ:

Восхвали́те согла́снѡ лю́дїе и҆ ꙗ҆зы́цы: цр҃ь бо а҆́гг҃льскїй взы́де ны́нѣ на жребѧ̀, и҆ грѧде́тъ хотѧ́й на крⷭ҇тѣ̀ порази́ти врагѝ, ꙗ҆́кѡ си́ленъ. сегѡ̀ ра́ди и҆ дѣ́ти съ ва́їемъ взыва́ютъ пѣ́снь: сла́ва тебѣ̀ прише́дшемꙋ побѣди́телю: сла́ва тебѣ̀ сп҃сꙋ хрⷭ҇тꙋ̀: сла́ва тебѣ̀ бл҃гослове́нномꙋ, є҆ди́номꙋ бг҃ꙋ на́шемꙋ.

И҆ чте́нїе тогѡ́же сло́ва.

Та́же полѷеле́й.

И҆ по полѷеле́и сѣда́ленъ, гла́съ и҃. Подо́бенъ: Повелѣ́нное:

На прⷭ҇то́лѣ херꙋві́мстѣ, и҆ на жребѧ́ти возсѣ́дъ на́съ ра́ди, и҆ къ стрⷭ҇ти во́льнѣй дости́гъ, дне́сь слы́шитъ дѣте́й возглаша́ющихъ, ѡ҆са́нна, наро́дѡвъ вопїю́щихъ: <<тп҃з ѡ҆б.: 774>> сн҃е дв҃довъ, ᲂу҆скорѝ сп҃стѝ, и҆̀хже созда́лъ є҆сѝ, бл҃гослове́нне і҆и҃се: на сїе́ бо прише́лъ є҆сѝ, да разꙋмѣ́емъ сла́вꙋ твою̀.

Сла́ва, и҆ ны́нѣ, па́ки то́йже. И҆ чте́нїе твори́мъ ѡ҆ пра́здницѣ, Сло́во кѵ́ръ а҆ндре́а кри́тскагѡ. Та́же, степє́нна, пе́рвый а҆нтїфѡ́нъ д҃-гѡ гла́са.

Прокі́менъ, гла́съ д҃: И҆з̾ ᲂу҆́стъ младе́нєцъ и҆ ссꙋ́щихъ соверши́лъ є҆сѝ хвалꙋ̀. Сті́хъ: Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ. Всѧ́кое дыха́нїе: Є҆ѵⷢ҇лїе ѿ матѳе́а, зача́ло п҃г. Воскрⷭ҇нїе хрⷭ҇то́во: не глаго́лемъ. Но а҆́бїе ѱало́мъ н҃. Та́же і҆ере́й взе́мъ кади́ло, кади́тъ крⷭ҇тоѡбра́знѡ, глаго́лѧ мл҃твꙋ на бл҃гослове́нїе ва́їа.

Дїа́конъ: Гдⷭ҇ꙋ помо́лимсѧ.

Мы́ же: Гдⷭ҇и поми́лꙋй.

Гдⷭ҇и бж҃е на́шъ, сѣдѧ́й на херꙋві́мѣхъ, возста́вивый си́лꙋ твоегѡ̀ сн҃а, гдⷭ҇а на́шегѡ і҆и҃са хрⷭ҇та̀, да сп҃се́тъ мі́ръ крⷭ҇то́мъ, и҆ погребе́нїемъ, и҆ воскрⷭ҇нїемъ свои́мъ: є҆го́же и҆ ны́нѣ прише́дша во і҆ерⷭ҇ли́мъ на во́льнꙋю стрⷭ҇ть, лю́дїе сѣдѧ́щїи во тьмѣ̀, и҆ сѣ́ни сме́ртнѣй, прїе́мше воскрⷭ҇нїѧ зна́мєнїѧ, вѣ̑тви древе́съ, и҆ ва̑їа фі̑нїкъ, воскрⷭ҇нїе зна́менꙋюще срѣто́ша. Са́мъ влⷣко и҆ на́съ по подража́нїю ѻ҆́нѣхъ, въ предпра́зднственный се́й де́нь, ва̑їа и҆ вѣ̑тви древе́съ въ рꙋка́хъ носѧ́щихъ соблюдѝ и҆ сохранѝ. Да ꙗ҆́коже ѻ҆́нїи наро́ди и҆ дѣ́ти ѡ҆са́нна тебѣ̀ приноша́хꙋ, и҆ мы̀ та́кожде въ пѣ́снехъ и҆ пѣ́нїихъ дх҃о́вныхъ, животворѧ́щагѡ и҆ тридне́внагѡ воскрⷭ҇нїѧ дости́гнемъ, въ то́мже хрⷭ҇тѣ̀ і҆и҃сѣ гдⷭ҇ѣ на́шемъ: съ ни́мже бл҃гослове́нъ є҆сѝ, съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Є҆гда́ же цѣлꙋ́ютъ бра́тїѧ є҆ѵⷢ҇лїе, раздава́етъ и҆гꙋ́менъ ва̑їа. <<тп҃и: 775>>

Сла́ва, гла́съ в҃: Дне́сь хрⷭ҇то́съ вхо́дитъ во гра́дъ виѳа́нїю, на жребѧ́ти сѣдѧ́й, безслове́сїе разрѣша́ѧ ꙗ҆зы́къ ѕлѣ́йшее, дре́вле свирѣ́пѣющее.

И҆ ны́нѣ, па́ки то́йже. Та́же, Поми́лꙋй мѧ̀ бж҃е: Стїхи́ра, гла́съ ѕ҃: Дне́сь бл҃года́ть ст҃а́гѡ дх҃а на́съ собра̀: Посе́мъ мл҃тва: Сп҃сѝ бж҃е лю́ди: Гдⷭ҇и поми́лꙋй, в҃і.

И҆ по возгла́сѣ, канѡ́нъ: і҆рмосы̀ по два́жды, тропарѝ на в҃і. Катава́сїа, і҆рмо́съ, ѻ҆́ба ли̑ка: Творе́нїе господи́на космы̀, є҆гѡ́же краегране́сїе: Ѡ҆са́нна хрⷭ҇то́с є҆ѵⷢ҇логиме́нос ѳео́с. Гла́съ д҃.

Пѣ́снь а҃.

[Ѡ] І҆рмо́съ: Ꙗ҆ви́шасѧ и҆сто́чницы бе́здны вла́ги неприча́стны, и҆ ѿкры́шасѧ мо́рѧ волнꙋ́ющасѧ ѡ҆снова̑нїѧ бꙋ́рею: ма́нїемъ бо запрети́лъ є҆сѝ є҆мꙋ̀, и҆зрѧ́дныѧ же лю́ди спа́слъ є҆сѝ. пою́щыѧ побѣ́днꙋю пѣ́снь тебѣ̀ гдⷭ҇и.

[С] И҆з̾ ᲂу҆́стъ младе́нєцъ неѕло́бивыхъ, и҆ ссꙋ́щихъ, хвалꙋ̀ твои́хъ ра̑бъ соверши́лъ є҆сѝ, разрꙋши́ти сꙋпоста́та, и҆ ѿмсти́ти стра́стїю крⷭ҇та̀, паде́нїе дре́внѧгѡ а҆да́ма, дре́вомъ же воскр҃си́ти сего̀, пою́ща побѣ́днꙋю пѣ́снь тебѣ̀ гдⷭ҇и.

[А] Хвале́нїе цр҃ковь прпⷣбныхъ, живꙋ́щемꙋ въ сїѡ́нѣ, тебѣ̀ хрⷭ҇тѐ прино́ситъ: ѡ҆ тебѣ́ же і҆и҃ль творцѣ̀ свое́мъ ра́дꙋетсѧ, и҆ го́ры ꙗ҆зы́цы противоѡбра́знїи каменосерде́чнїи, ѿ лица̀ твоегѡ̀ возвесели́шасѧ, пою́ще побѣ́днꙋю пѣ́снь тебѣ̀ гдⷭ҇и.

Катава́сїа: Ꙗ҆ви́шасѧ и҆сто́чницы:

Пѣ́снь г҃.

[Н] І҆рмо́съ: Точа́щїй краесѣко́мый повелѣ́нїемъ твои́мъ, тве́рдый сса́ша ка́мень і҆и҃льтестїи лю́дїе. ка́мень же ты̀ є҆сѝ хрⷭ҇тѐ и҆ жи́знь, на не́мже ᲂу҆тверди́сѧ цр҃ковь зовꙋ́щаѧ: ѡ҆са́нна бл҃гослове́нъ є҆сѝ грѧды́й.

[Н] Мертвеца̀ четверодне́вна повелѣ́нїемъ твои́мъ, и҆з̾ ме́ртвыхъ съ тре́петомъ а҆́дъ и҆спꙋстѝ ла́зарѧ. воскрⷭ҇нїе бо <<тп҃и ѡ҆б.: 776>> ты̀ хрⷭ҇тѐ и҆ жи́знь, въ не́мже ᲂу҆тверди́сѧ цр҃ковь зовꙋ́щи: ѡ҆са́нна бл҃гослове́нъ є҆сѝ грѧды́й.

[А] Воспо́йте лю́дїе бг҃олѣ́пнѡ въ сїѡ́нѣ, и҆ мл҃твꙋ воздади́те хрⷭ҇тꙋ̀ во і҆ерⷭ҇ли́мѣ, са́мъ грѧде́тъ во сла́вѣ со ѻ҆́бластїю: въ не́мже ᲂу҆тверди́сѧ цр҃ковь зовꙋ́щи: ѡ҆са́нна бл҃гослове́нъ є҆сѝ грѧды́й.

Ѵ҆пакоѝ, гла́съ ѕ҃: Съ вѣ́твьми воспѣ́вше пре́жде, съ древесы̀ послѣдѝ ꙗ҆́ша хрⷭ҇та̀ бг҃а, небл҃года́рнїи і҆ꙋде́є. мы́ же вѣ́рою непрело́жною при́снѡ почита́юще ꙗ҆́кѡ бл҃годѣ́телѧ, вы́нꙋ вопїе́мъ є҆мꙋ̀: бл҃гослове́нъ є҆сѝ грѧды́й а҆да́ма воззва́ти.

И҆ чте́нїе пра́здника.

Пѣ́снь д҃.

[Х] І҆рмо́съ: Хрⷭ҇то́съ грѧды́й ꙗ҆́вственнѡ бг҃ъ на́шъ, прїи́детъ и҆ не закосни́тъ, ѿ горы̀ прїѡсѣне́нныѧ ча́щи, ѻ҆трокови́цы ражда́ющїѧ неискꙋсомꙋ́жныѧ, прⷪ҇ро́къ дре́вле глаго́летъ. тѣ́мъ всѝ вопїе́мъ: сла́ва си́лѣ твое́й гдⷭ҇и.

[Р] Да то́чатъ весе́лїе крѣ́пкое масти́тельное, го́ры, и҆ всѝ хо́лми, и҆ древа̀ дꙋбра̑внаѧ да взыгра́ютъ: хрⷭ҇та̀ хвали́те ꙗ҆зы́цы, и҆ томꙋ̀ всѝ лю́дїе ра́дꙋющесѧ возопі́йте: сла́ва си́лѣ твое́й гдⷭ҇и.

[І] Крѣ́постїю црⷭ҇твꙋѧй вѣ́ки гдⷭ҇ь, ѡ҆блече́нъ прїи́детъ, сегѡ̀ красоты́ же и҆ сла́вы, несравне́нно є҆́сть бл҃голѣ́пїе въ сїѡ́нѣ. тѣ́мже всѝ вопїе́мъ: сла́ва си́лѣ твое́й гдⷭ҇и.

[С] Пѧ́дїю и҆змѣ́ривый нб҃о, дла́нїю же зе́млю, гдⷭ҇ь прїи́де, сїѡ́нъ бо и҆збра̀, въ не́мже жи́ти и҆ црⷭ҇твовати и҆зво́ли, и҆ возлюбѝ лю́ди вѣ́рнѡ вопїю́щыѧ: сла́ва си́лѣ твое́й гдⷭ҇и.

Пѣ́снь є҃.

[Т] І҆рмо́съ: На го́рꙋ сїѡ́нъ взы́ди бл҃говѣствꙋ́ѧй, и҆ і҆ерⷭ҇ли́мꙋ проповѣ́дꙋѧй, въ крѣ́пости вознестѝ гла́съ: пресла̑внаѧ глаго́лашасѧ ѡ҆ тебѣ̀ гра́де бж҃їй. ми́ръ на і҆и҃лѧ, и҆ сп҃се́нїе ꙗ҆зы́кѡмъ. <<тп҃ѳ: 777>>

[О] Въ вы́шнихъ сѣдѧ́й на херꙋві́мѣхъ бг҃ъ, и҆ призира́ѧй на смирє́нныѧ,то́й грѧде́тъ во сла́вѣ со ѻ҆́бластїю, и҆ и҆спо́лнѧтсѧ всѧ́чєскаѧ бж҃е́ственныѧ хвалы̀ є҆гѡ̀. ми́ръ на і҆и҃лѧ, и҆ сп҃се́нїе ꙗ҆зы́кѡмъ.

[С] Сїѡ́не бж҃їй, горо̀ ст҃а́ѧ, и҆ і҆ерⷭ҇ли́ме, ѻ҆́крестъ ѻ҆́чи твоѝ возведѝ, и҆ ви́ждь сѡ́браннаѧ ча̑да твоѧ̑ въ тебѣ̀: се́ бо прїидо́ша и҆здале́ча, поклони́тисѧ цр҃ю̀ твоемꙋ̀. ми́ръ на і҆и҃лѧ, и҆ сп҃се́нїе ꙗ҆зы́кѡмъ.

Пѣ́снь ѕ҃.

[Е] І҆рмо́съ: Возопи́ша съ весе́лїемъ првⷣныхъ дꙋ́си: ны́нѣ мі́рꙋ завѣ́тъ но́вый завѣща́етсѧ, и҆ кропле́нїемъ да ѡ҆бновѧ́тсѧ лю́дїе, бж҃їѧ кро́ве.

[Ѵ] Прїимѝ і҆и҃лю бж҃їе црⷭ҇тво, и҆ пребыва́ѧй во тьмѣ̀, свѣ́тъ да ᲂу҆́зритъ вели́кїй, и҆ кропле́нїемъ да ѡ҆бновѧ́тсѧ лю́дїе, бж҃е́ственныѧ кро́ве.

[Л] Разрѣше́ны своѧ̑ ю҆́зники сїѡ́не и҆спꙋстѝ, и҆ ѿ ро́ва невѣ́дѣнїѧ безво́дна и҆зведѝ, и҆ кропле́нїемъ да ѡ҆бновѧ́тсѧ лю́дїе, бж҃е́ственныѧ кро́ве.

Конда́къ, самогла́сенъ, гла́съ ѕ҃: На прⷭ҇то́лѣ на нб҃сѝ, на жребѧ́ти на землѝ носи́мый хрⷭ҇тѐ бж҃е, а҆́гг҃лѡвъ хвале́нїе, и҆ дѣте́й воспѣва́нїе прїѧ́лъ є҆сѝ зовꙋ́щихъ тѝ: бл҃гослове́нъ є҆сѝ грѧды́й а҆да́ма воззва́ти.

І҆́косъ: Поне́же а҆́да свѧза́лъ є҆сѝ безсме́ртне, и҆ сме́рть ᲂу҆мертви́лъ є҆сѝ, и҆ мі́ръ воскр҃си́лъ є҆сѝ, съ ва́їами младе́нцы восхвалѧ́хꙋ тѧ̀ хрⷭ҇тѐ, ꙗ҆́кѡ побѣди́телѧ, зовꙋ́ще тѝ дне́сь: ѡ҆са́нна сн҃ꙋ дв҃довꙋ. не ктомꙋ́ бо, речѐ, закла́ни бꙋ́дꙋтъ младе́нцы, за млⷣнца мр҃і́ина: но за всѧ̑ младе́нцы и҆ ста́рцы, є҆ди́нъ распина́ешисѧ. не ктомꙋ̀ на на́съ вмѣсти́тсѧ ме́чь: твоѧ̑ бо ре́бра прободꙋ́тсѧ копїе́мъ. тѣ́мже ра́дꙋющесѧ глаго́лемъ: бл҃гослове́нъ грѧды́й а҆да́ма воззва́ти. <<тп҃ѳ ѡ҆б.: 778>>

Сѷнаѯа́рїй. Стїхѝ:

На жребѧ̀ всѣ́дъ сло́вомъ простры́й нб҃о:

Человѣ́ки взыскꙋ́ѧй, разрѣши́ти безслове́сїѧ.

Въ сі́й де́нь, сла́вный и҆ пресвѣ́тлый пра́здникъ ва́їй пра́зднꙋемъ, вины̀ ра́ди сицевы́ѧ: по воста́нїи ла́заревѣ и҆з̾ ме́ртвыхъ, мно́зи ви́дѣвше бы́вшее, вѣ́ровахꙋ во хрⷭ҇та̀. и҆ ᲂу҆́бѡ ᲂу҆твержда́етсѧ сꙋ́дъ і҆ꙋде́йскою со́нмицею, хрⷭ҇та́ же, и҆ самаго̀ ᲂу҆би́ти ла́зарѧ. Бѣ́гаетъ ᲂу҆́бѡ і҆и҃съ мѣ́сто ѕло́бѣ даѧ̀, і҆ꙋдє́и же въ пра́здникъ па́схи ᲂу҆би́ти є҆го̀ поꙋче́нїе положи́ша. И҆ вре́мени бѣ́гства да́нꙋ бы́вшꙋ до́лгꙋ, пре́жде шестѝ дне́й па́схи, глаго́летъ, прїи́де і҆и҃съ во виѳа́нїю, и҆дѣ́же бѣ̀ ла́зарь ᲂу҆ме́рый: и҆ та́мѡ ѡ҆бѣ́дꙋ бы́вшꙋ, ꙗ҆дѧ́ше съ ни́мъ и҆ ла́зарь: сестра́ же є҆гѡ̀ марі́а на хрⷭ҇то́вѣ но́зѣ мѵ́ро и҆злива́ше. И҆ наꙋ́трїе посыла́етъ ᲂу҆ч҃нкѝ своѧ̑ привестѝ ѻ҆сли́цꙋ и҆ жребѧ̀. И҆ и҆мѣ́ѧй прⷭ҇то́лъ нб҃о, всѣ́дъ на жребѧ̀, вхо́дитъ во і҆ерⷭ҇ли́мъ: дѣ́ти же є҆врє́йскїѧ и҆ са́ми подстила́хꙋ є҆мꙋ̀ ри̑зы своѧ̑ и҆ вѣ̑тви фі́нїкѡвъ, ѻ҆́выѧ ᲂу҆́бѡ рѣ́жꙋще, дрꙋгі̑ѧ же и҆ въ рꙋка́хъ носѧ́ще, вопїѧ́хꙋ є҆мꙋ̀ предсыла́юще: ѡ҆са́нна сн҃ꙋ дв҃довꙋ, бл҃гослове́нъ грѧды́й во и҆́мѧ гдⷭ҇не, цр҃ь і҆и҃левъ. Сїе́ же бы́сть, ѻ҆́нѣхъ ѧ҆зы́ки подви́гшꙋ всест҃о́мꙋ дх҃ꙋ, въ сла́вꙋ и҆ бл҃гохвале́нїе хрⷭ҇то́во. Ꙗ҆влѧ́хꙋ же хрⷭ҇то́вꙋ на сме́рть побѣ́дꙋ ва́їами, сі́есть, вѣ́твьми: ва́їа бо ᲂу҆ є҆вре́ѡвъ вѣ́твь мѧ́гкаѧ глаго́летсѧ. Ѻ҆бы́чай бо бѧ́ше, ꙗ҆́кѡ побѣди́телє по́двигѡвъ, и҆лѝ бра́нїй нѣ́кїихъ, вѣ́твьми древе́съ присноцвѣтꙋ́щихъ, въ побѣ́дныхъ провожде́нїихъ почита́еми, и҆ ѡ҆бводи́ми бѧ́хꙋ. Гада́тельственнѡ же зна́меноваше жребе́цъ, сꙋ́щыѧ ны̀ ѿ ꙗ҆зы̑къ лю́ди, на не́мже всѣ́дъ хрⷭ҇то́съ, и҆ препочи́въ, ѡ҆долѣ́тель и҆ побѣди́тель, цр҃ь же всеѧ̀ землѝ нарече́сѧ. Ѡ҆ се́мъ пра́здницѣ и҆ прⷪ҇ро́къ глаго́лаше заха́рїѧ[[глаⷡ҇ ѳ҃, ст. ѳ҃]]: ра́дꙋйсѧ ѕѣлѡ̀ дщѝ сїѡ́нова, сѐ цр҃ь тво́й грѧде́тъ тебѣ̀ кро́токъ, и҆ всѣ́дъ на под̾ѧре́мника и҆ жребца̀ ѻ҆́слѧ сы́на под̾ѧре́мнича. И҆ дв҃дъ па́ки ѡ҆ дѣ́техъ: и҆з̾ ᲂу҆́стъ младе́нєцъ и҆ ссꙋ́щихъ соверши́лъ є҆сѝ хвалꙋ̀. Но входѧ́щꙋ, речѐ, хрⷭ҇тꙋ̀ потрѧсе́сѧ <<т҃ч: 779>> ве́сь і҆ерⷭ҇ли́мъ: и҆ во ѿмще́нїе наро́ди ѿ а҆рхїерє́и поѡщре́ни бы́вше, смотрѧ́хꙋ є҆го̀ ᲂу҆би́ти: то́й же таѧ́шесѧ кры́ѧсѧ, и҆ ꙗ҆влѧ́ѧсѧ, при́тчами глаго́лаше и҆̀мъ. Неизрече́ннымъ твои́мъ милосе́рдїемъ хрⷭ҇тѐ бж҃е на́шъ, побѣди́тели ны̀ безслове́сныхъ страсте́й сотворѝ, и҆ твою̀ свѣ́тлꙋю на сме́рть побѣ́дꙋ: ꙗ҆́сное же и҆ живоно́сное воскрⷭ҇нїе ви́дѣти сподо́би, и҆ поми́лꙋй на́съ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Пѣ́снь з҃.

[О] І҆рмо́съ: Сп҃сы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.

[Г] Покланѧ́ющесѧ лю́дїе, и҆ со ᲂу҆ч҃нкѝ ра́дꙋющесѧ, ва́їемъ, ѡ҆са́нна сн҃ꙋ дв҃довꙋ зовѧ́хꙋ: препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

[И] Неискꙋсоѕло́бное мно́жество, є҆щѐ младе́нствꙋющее є҆стество̀, бг҃олѣ́пнѡ тѧ̀ цр҃ю̀ і҆и҃льтескїй и҆ а҆́гг҃льскїй воспѣ́тъ: препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

[М] Съ ва́їемъ тѧ̀ хрⷭ҇тѐ, вѣ́твьми похвалѧ́хꙋ мно́жєства, бл҃гослове́нъ прише́дый цр҃ь вѣкѡ́въ. вопїѧ́хꙋ же препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

Пѣ́снь и҃.

[Е] І҆рмо́съ: Весели́сѧ і҆ерⷭ҇ли́ме, торжествꙋ́йте лю́бѧщїи сїѡ́на: црⷭ҇твꙋѧй бо во вѣ́ки гдⷭ҇ь си́лъ прїи́де, да бл҃гоговѣ́етъ всѧ̀ землѧ̀ ѿ лица̀ є҆гѡ̀, и҆ да вопїе́тъ: бл҃гослови́те всѧ̑ дѣла̀ гдⷭ҇нѧ гдⷭ҇а.

[Н] На жребѧ̀ мла́до всѣ́дъ цр҃ь тво́й сїѡ́не, предста̀ хрⷭ҇то́съ: безслове́снꙋю бо і҆́дѡльскꙋю пре́лесть разрꙋши́ти, и҆ неꙋдержа́нное стремле́нїе ᲂу҆ста́вити всѣ́хъ ꙗ҆зы́къ прїи́де, во є҆́же пѣ́ти: всѧ̑ дѣла̀ по́йте гдⷭ҇а.

[О] Бг҃ъ тво́й, ра́дꙋйсѧ сїѡ́не ѕѣлѡ̀, воцр҃и́сѧ во вѣ́ки хрⷭ҇то́съ. се́й, ꙗ҆́коже пи́сано є҆́сть, кро́ткїй и҆ сп҃са́ѧй, <<т҃ч ѡ҆б.: 780>> првⷣный и҆зба́витель на́шъ, прїи́де на жребѧ́ти, ко́нское свирѣ́пство ᲂу҆би́ти врагѡ́въ, не вопїю́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а.

[С] Ѡ҆скꙋдѣва́етъ бж҃е́ственныхъ ѡ҆гражде́нїй, законопрестꙋ́пное со́нмище непокори́выхъ, поне́же до́мъ мл҃твы бж҃їѧ, верте́пъ сотвори́ша разбо́йническъ, ѿ се́рдца и҆зба́вителѧ ѿри́нꙋвше, є҆мꙋ́же вопїе́мъ: бл҃гослови́те всѧ̑ дѣла̀ гдⷭ҇нѧ гдⷭ҇а.

Чⷭ҇тнѣ́йшꙋю не пое́мъ.

Пѣ́снь ѳ҃.

[Ѳ] І҆рмо́съ: Бг҃ъ гдⷭ҇ь, и҆ ꙗ҆ви́сѧ на́мъ, соста́вите пра́здникъ, и҆ веселѧ́щесѧ прїиди́те, возвели́чимъ хрⷭ҇та̀, съ ва́їами и҆ вѣ́твьми, пѣ́сньми зовꙋ́ще: бл҃гослове́нъ грѧды́й во и҆́мѧ гдⷭ҇а сп҃са на́шегѡ.

[Е] Ꙗ҆зы́цы вскꙋ́ю шата́етесѧ; пи́сменницы, и҆ сщ҃е́нницы, почто̀ тщє́тнымъ поꙋчи́стесѧ; кто̀ се́й, ре́кше, є҆мꙋ́же дѣ́ти съ ва́їемъ и҆ вѣ́твьми, пѣ́сньми зовꙋ́тъ: бл҃гослове́нъ грѧды́й во и҆́мѧ гдⷭ҇а сп҃са на́шегѡ.

[О] Се́й бг҃ъ на́шъ, є҆мꙋ́же никто́же подо́бенъ, пра́ведный всѧ́къ пꙋ́ть и҆з̾ѡбрѣ́тъ, дадѐ возлю́бленномꙋ і҆и҃лю. по си́хъ же съ человѣ́ки поживѐ ꙗ҆́вльсѧ: бл҃гослове́нъ грѧды́й во и҆́мѧ гдⷭ҇а сп҃са на́шегѡ.

[С] Собла́зны стезѝ, что̀ бли́зъ ва́съ положи́сте непокори́вїи; но́ги ва́шѧ ско́ры кро́вь и҆злїѧ́ти влⷣчню: но воскрⷭ҇нетъ всѧ́кѡ сп҃стѝ зовꙋ́щыѧ: бл҃гослове́нъ грѧды́й во и҆́мѧ гдⷭ҇а сп҃са на́шегѡ.

Свѣти́льна же не глаго́лемъ, но а҆́бїе: Ст҃ъ гдⷭ҇ь бг҃ъ на́шъ.

Три́жды, на гла́съ д҃. На хвали́техъ поста́вимъ стїхѡ́въ ѕ҃, и҆ пое́мъ стїхи̑ры самогла́сны д҃, повторѧ́юще два̀. Гла́съ д҃:

Мно́жество наро́да гдⷭ҇и, постила́хꙋ по пꙋтѝ ри̑зы своѧ̑: дрꙋзі́и же рѣ́захꙋ вѣ̑тви ѿ древе́съ, и҆ ноша́хꙋ. <<тч҃а ѡ҆б.: 782>> пред̾идꙋ́щїи же и҆ послѣ́дꙋющїи, зовѧ́хꙋ глаго́люще: ѡ҆са́нна сн҃ꙋ дв҃довꙋ, бл҃гослове́нъ є҆сѝ прише́дый, и҆ па́ки грѧды́й во и҆́мѧ гдⷭ҇не.

Хотѧ́щꙋ тебѣ̀ вни́ти во ст҃ы́й гра́дъ гдⷭ҇и, вѣ̑тви садѡ́въ лю́дїе ноша́хꙋ, тебѐ пою́ще всѣ́хъ влⷣкꙋ: и҆ зрѧ́ще тѧ̀ на жребѧ́ти сѣдѧ́ща, ꙗ҆́коже на херꙋві́мѣхъ зрѧ́хꙋ. сегѡ̀ ра́ди си́це вопїѧ́хꙋ: ѡ҆са́нна въ вы́шнихъ, бл҃гослове́нъ є҆сѝ прише́дый, и҆ па́ки грѧды́й во и҆́мѧ гдⷭ҇не.

И҆зыди́те ꙗ҆зы́цы, и҆зыди́те и҆ лю́дїе, и҆ ви́дите дне́сь цр҃ѧ̀ нбⷭ҇наго, ꙗ҆́кѡ на прⷭ҇то́лѣ высо́цѣ, на жребѧ́ти хꙋ́дѣ во і҆ерⷭ҇ли́мъ входѧ́ща. ро́де і҆ꙋде́йскїй невѣ́рный и҆ прелюбодѣ́йный, прїидѝ и҆ ви́ждь, є҆го́же ви́дѣ и҆са́їа во пло́ти на́съ ра́ди прїитѝ и҆мꙋ́ща, ка́кѡ ᲂу҆невѣща́етъ себѣ̀, ꙗ҆́кѡ цѣломꙋ́дренный но́вый сїѡ́нъ, и҆ ѿлага́етъ ѡ҆сꙋжде́ннꙋю со́нмицꙋ: ꙗ҆́кѡ въ нетлѣ́нномъ же бра́цѣ и҆ нескве́рномъ, нескве́рнїи стеко́шасѧ бл҃гохва́лѧще, неискꙋсоѕло́бнїи дѣ́ти. съ ни́миже и҆ мы̀ пою́ще возопїе́мъ пѣ́снь а҆́гг҃льскꙋю: ѡ҆са́нна въ вы́шнихъ, и҆мꙋ́щемꙋ ве́лїю млⷭ҇ть.

Ѻ҆́бщее воскрⷭ҇нїе, пре́жде во́льныѧ стрⷭ҇ти твоеѧ̀, во ᲂу҆вѣре́нїе всѣ́хъ предпоказа́вый хрⷭ҇тѐ бж҃е, ла́зарѧ ᲂу҆́бѡ въ виѳа́нїи, держа́вною си́лою твое́ю, четверодне́вна ме́ртва воскр҃си́лъ є҆сѝ: слѣпцє́мъ же є҆́же ви́дѣти ꙗ҆́кѡ свѣтода́вецъ дарова́лъ є҆сѝ сп҃се, и҆ во ст҃ы́й гра́дъ со ᲂу҆ч҃нкѝ твои́ми вше́лъ є҆сѝ, сѣдѧ̀ на жребѧ́ти ѻ҆́сли, прⷪ҇ро́чєскаѧ и҆сполнѧ́ѧй проповѣ̑данїѧ, ꙗ҆́коже на херꙋві́мѣхъ носи́мый, и҆ дѣ́ти є҆вре́йстїи съ вѣ́твьми и҆ ва́їами предсрѣта́хꙋ тѧ̀. тѣ́мже и҆ мы̀ вѣ̑тви ма̑сличныѧ носѧ́ще и҆ ва̑їа, бл҃года́рственнѡ тебѣ̀ вопїе́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не. <<тч҃а ѡ҆б.: 782>>

Сла́ва, и҆ ны́нѣ, гла́съ ѕ҃: Пре́жде шестѝ дне́й па́схи, прїи́де і҆и҃съ въ виѳа́нїю, и҆ пристꙋпи́ша къ немꙋ̀ ᲂу҆ч҃нцы̀ є҆гѡ̀, глаго́люще є҆мꙋ̀: гдⷭ҇и, гдѣ̀ хо́щеши ᲂу҆гото́ваемъ тѝ ꙗ҆́сти па́схꙋ; ѻ҆́нъ же посла̀ и҆́хъ, и҆ди́те въ пре́днюю ве́сь, и҆ ѡ҆брѧ́щете человѣ́ка скꙋде́ль воды̀ носѧ́ща, послѣ́дꙋйте є҆мꙋ̀, и҆ до́мꙋ влады́цѣ рцы́те: ᲂу҆ч҃тль глаго́летъ, ᲂу҆ тебѐ сотворю̀ па́схꙋ со ᲂу҆ч҃нкѝ мои́ми.

Славосло́вїе вели́кое. И҆ тропа́рь: Ѻ҆́бщее воскрⷭ҇нїе: Та́же є҆ктєнїѝ, и҆ ча́съ пе́рвый, и҆ ѡ҆глаше́нїе, и҆ ѻ҆бы́чный ѿпꙋ́стъ, и҆ лїті́а внѣ̀ монастырѧ̀.

На лїтꙋргі́и

а҆нтїфѡ́нъ а҃, гла́съ в҃, ѱало́мъ рд҃і.

Возлюби́хъ, ꙗ҆́кѡ ᲂу҆слы́шитъ гдⷭ҇ь гла́съ моле́нїѧ моегѡ̀. Припѣ́въ: Мл҃твами бцⷣы, сп҃се сп҃сѝ на́съ. Сті́хъ: в҃: Ꙗ҆́кѡ приклонѝ ᲂу҆́хо своѐ мнѣ̀, и҆ во дни̑ моѧ̑ призовꙋ̀. Мл҃твами бцⷣы, сп҃се сп҃сѝ на́съ. Сті́хъ г҃: Ѡ҆б̾ѧ́ша мѧ̀ болѣ̑зни смє́ртныѧ, бѣды̑ а҆́дѡвы ѡ҆брѣто́ша мѧ̀. Мл҃твами бцⷣы, сп҃се сп҃сѝ на́съ. Сті́хъ д҃: Ско́рбь и҆ болѣ́знь ѡ҆брѣто́хъ, и҆ и҆́мѧ гдⷭ҇не призва́хъ. Мл҃твами бцⷣы, сп҃се сп҃сѝ на́съ. Сла́ва, и҆ ны́нѣ: Мл҃твами бцⷣы, сп҃се сп҃сѝ на́съ.

А҆нтїфѡ́нъ в҃, ѱало́мъ рє҃і.

Вѣ́ровахъ, тѣ́мже возглаго́лахъ: а҆́зъ же смири́хсѧ ѕѣлѡ̀. Сп҃си́ ны сн҃е бж҃їй, возсѣ́дый на жребѧ̀, пою́щыѧ тѝ: а҆ллилꙋ́їа. Сті́хъ в҃: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздаде́ ми; Сп҃си́ ны сн҃е бж҃їй: Сті́хъ г҃: Ча́шꙋ сп҃се́нїѧ прїимꙋ̀, и҆ и҆́мѧ гдⷭ҇не призовꙋ̀. Сп҃си́ ны сн҃е бж҃їй: Сті́хъ д҃: Мл҃твы моѧ̑ гдⷭ҇ви возда́мъ, пред̾ всѣ́ми людьмѝ є҆гѡ̀. Сп҃си́ ны сн҃е бж҃їй:

Сла́ва, и҆ ны́нѣ: Є҆диноро́дный сн҃е:

А҆нтїфѡ́нъ г҃, гла́съ а҃, ѱало́мъ рз҃і:

И҆сповѣ́дайтесѧ гдⷭ҇ви ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. Тропа́рь: Ѻ҆́бщее воскрⷭ҇нїе: Сті́хъ в҃: Да рече́тъ ᲂу҆́бѡ до́мъ і҆и҃левъ: ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. Ѻ҆́бщее воскрⷭ҇нїе: Сті́хъ г҃: Да рече́тъ ᲂу҆́бѡ до́мъ а҆арѡ́нь: ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. Ѻ҆́бщее воскрⷭ҇нїе: Сті́хъ д҃: Да рекꙋ́тъ ᲂу҆́бѡ всѝ боѧ́щїисѧ гдⷭ҇а: ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. Ѻ҆́бщее воскрⷭ҇нїе: Вхо́дъ: <<тч҃в: 783>> Бл҃гослове́нъ грѧды́й во и҆́мѧ гдⷭ҇не, бл҃гослови́хомъ вы̀ и҆з̾ до́мꙋ гдⷭ҇нѧ, бг҃ъ гдⷭ҇ь, и҆ ꙗ҆ви́сѧ на́мъ. Тропа́рь: Ѻ҆́бщее воскрⷭ҇нїе: Сла́ва: Спогре́бшесѧ тебѣ̀ кр҃ще́нїемъ хрⷭ҇тѐ: И҆ ны́нѣ, конда́къ: На прⷭ҇то́лѣ на нб҃сѝ: Та́же трист҃о́е. Прокі́менъ а҆пⷭ҇ла, гла́съ д҃: Бл҃гослове́нъ грѧды́й во и҆́мѧ гдⷭ҇не, бг҃ъ гдⷭ҇ь, и҆ ꙗ҆ви́сѧ на́мъ. Сті́хъ: И҆сповѣ́дайтесѧ гдⷭ҇ви ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. А҆пⷭ҇лъ къ фїлїпписі́ємъ, зача́ло см҃з. А҆ллилꙋ́їа, гла́съ а҃: Воспо́йте гдⷭ҇ви пѣ́снь но́вꙋ, ꙗ҆́кѡ ди̑вна сотворѝ гдⷭ҇ь. Сті́хъ: Ви́дѣша всѝ концы̀ землѝ сп҃се́нїе бг҃а на́шегѡ. Є҆ѵⷢ҇лїе ѿ і҆ѡа́нна, зача́ло м҃а. И҆ быва́етъ лїтꙋргі́а златоꙋ́стова. Прича́стенъ: Бл҃гослове́нъ грѧды́й во и҆́мѧ гдⷭ҇не, бг҃ъ гдⷭ҇ь, и҆ ꙗ҆ви́сѧ на́мъ. А҆ллилꙋ́їа, три́жды.

На трапе́зѣ ᲂу҆тѣше́нїе: ꙗ҆ди́мъ ры̑бы, и҆ вїно̀ пїе́мъ, бл҃годарѧ́ще бг҃а.

Въ недѣ́лю ва́їй ве́чера,

На Гдⷭ҇и воззва́хъ, поста́вимъ стїхѡ́въ ѕ҃, и҆ пое́мъ самогла́сны трѝ, повторѧ́юще сїѧ̑, гла́съ и҃:

Ра́дꙋйсѧ и҆ весели́сѧ гра́де сїѡ́не: красꙋ́йсѧ и҆ ра́дꙋйсѧ цр҃кве бж҃їѧ: се́ бо цр҃ь тво́й прїи́де въ пра́вдѣ, на жребѧ́ти сѣдѧ̀, ѿ дѣте́й воспѣва́емый: ѡ҆са́нна въ вы́шнихъ, бл҃гослове́нъ є҆сѝ и҆мѣ́ѧй мно́жество щедро́тъ, поми́лꙋй на́съ.

Прїи́де сп҃съ дне́сь во гра́дъ і҆ерⷭ҇ли́мъ, и҆спо́лнити писа́нїе и҆ всѝ прїѧ́ша въ рꙋ́ки ва̑їа: ри̑зы же подстила́хꙋ є҆мꙋ̀, вѣ́дꙋще, ꙗ҆́кѡ то́й є҆́сть бг҃ъ на́шъ, є҆мꙋ́же херꙋві́ми вопїю́тъ непреста́ннѡ: ѡ҆са́нна въ вы́шнихъ, бл҃гослове́нъ є҆сѝ и҆мѣ́ѧй мно́жество щедро́тъ, поми́лꙋй на́съ. <<тч҃в ѡ҆б.: 784>>

На херꙋві́мѣхъ носи́мый, и҆ пѣва́емый ѿ серафі̑мъ, возсѣ́лъ є҆сѝ на жребѧ̀ дв҃дски бл҃же, и҆ дѣ́ти тѧ̀ воспѣва́хꙋ бг҃олѣ́пнѡ, і҆ꙋде́є же хꙋ́лѧхꙋ беззако́ннѡ: стро́потное ꙗ҆зы́кѡвъ, сѣда́лище жребца̀ проѡбразова́ше, и҆з̾ невѣ́рїѧ въ вѣ́рꙋ претворѧ́емое: сла́ва тебѣ̀ хрⷭ҇тѐ, є҆ди́не млⷭ҇тиве и҆ чл҃вѣколю́бче.

Сла́ва: Ра́дꙋйсѧ и҆ весели́сѧ: И҆ ны́нѣ: На херꙋві́мѣхъ носи́мый: Вхо́дъ. Прокі́менъ ѻ҆бы́чный: Сѐ ны́нѣ бл҃гослови́те:

На стїхо́внѣ стїхи̑ры самогла́сны, гла́съ в҃:

Ѿ вѣ́твїй и҆ ва́їй, ꙗ҆́кѡ ѿ бж҃е́ственна пра́здника, въ бж҃е́ственный преше́дше пра́здникъ, къ чⷭ҇тно́мꙋ хрⷭ҇то́выхъ стрⷭ҇те́й, вѣ́рнїи, стеце́мсѧ та́инствꙋ сп҃си́тельномꙋ: и҆ сего̀ ви́димъ за на́съ стрⷭ҇ть терпѧ́ща во́льнꙋю, томꙋ́ же пѣ́нїе подо́бное бл҃годарѧ́ще воспои́мъ, ᲂу҆ми́льнѡ зовꙋ́ще: бл҃гоꙋтро́бїѧ и҆сто́чниче, и҆ сп҃се́нїѧ приста́нище, гдⷭ҇и сла́ва тебѣ̀.

Сті́хъ: Воспо́йте гдⷭ҇ви пѣ́снь но́вꙋ.

Гла́съ г҃: Стра́шно є҆́же впа́сти въ рꙋ́цѣ бг҃а жи́ва: се́й сꙋдїѧ̀ є҆́сть помышле́нїй и҆ мы́слей серде́чныхъ. никто́же да вни́детъ и҆скꙋша́ѧй вѣ́рꙋ непоро́чнꙋю: но въ кро́тости и҆ стра́сѣ хрⷭ҇тꙋ̀ пристꙋ́пимъ, да прїи́мемъ млⷭ҇ть, и҆ бл҃года́ть ѡ҆брѧ́щемъ, во бл҃говре́меннꙋю по́мощь.

Сті́хъ: Ви́дѣша всѝ концы̀ землѝ сп҃се́нїе бг҃а на́шегѡ.

Гла́съ з҃: Со́нмице лꙋка́ваѧ и҆ прелюбодѣ́йнаѧ, своемꙋ̀ мꙋ́жꙋ не сохра́ншаѧ вѣ́рꙋ, что̀ держи́ши завѣ́тъ, є҆гѡ́же не была̀ є҆сѝ наслѣ́дница; что̀ хва́лишисѧ ѡ҆ ѻ҆ц҃ѣ̀, сн҃а ѿве́ргшаѧсѧ; прⷪ҇ро́ки не прїѧ́ла є҆сѝ, сн҃а возвѣсти́вшыѧ. понѐ свои́хъ ча̑дъ ᲂу҆срами́сѧ, си́це вопїю́щихъ: ѡ҆са́нна сн҃ꙋ дв҃довꙋ, бл҃гослове́нъ грѧды́й во и҆́мѧ гдⷭ҇не. <<тч҃г: 785>>

Сла́ва, гла́съ в҃: Ѿ вѣ́твїй и҆ ва́їй: И҆ ны́нѣ, гла́съ г҃: Стра́шно є҆́же впа́сти въ рꙋ́цѣ бг҃а жи́ва: Ны́нѣ ѿпꙋща́еши: И҆ по Ѻ҆́ч҃е на́шъ, тропа́рь: Бцⷣе дв҃о ра́дꙋйсѧ: И҆ прѡ́чаѧ ꙗ҆́кѡ ѻ҆бы́чно. И҆ ѻ҆бы̑чныѧ покло́ны.

[зрѝ] Вѣ́стно бꙋ́ди, ꙗ҆́кѡ Бцⷣе дв҃о: и҆ прѡ́чаѧ, со сладкопѣ́нїемъ пою́тсѧ, во ст҃ы́ѧ четыредесѧ́тницы недѣ̑ли, та́кожде и҆ въ настоѧ́щꙋю. Въ про́чыѧ же дни̑ вели́кїѧ седми́цы поско́рꙋ глаго́лютсѧ.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.