Пяток первой седмицы
<<рк҃є ѡ҆б.: 250>>
Въ пѧто́къ пе́рвыѧ седми́цы на ᲂу҆́трени
трⷪ҇чны. По пе́рвомъ стїхосло́вїи глаго́лемъ сѣда́льны крє́стныѧ ѻ҆смогла́сника, и҆ бг҃оро́диченъ.
По в҃-мъ же стїхосло́вїи сѣда́ленъ господи́на і҆ѡ́сифа. Гла́съ в҃. Подо́бенъ: Бл҃гоѡбра́зный і҆ѡ́сифъ:
Стрⷭ҇тьмѝ твои́ми безстра́стїе всѣ̑мъ даѧ́й чл҃вѣколю́бче, стра̑сти пло́ти моеѧ̀ ᲂу҆мертви́въ крⷭ҇то́мъ бж҃е́ственнымъ, сподо́би ви́дѣти и҆ ст҃о́е воскрⷭ҇нїе твоѐ гдⷭ҇и.
Сла́ва, то́йже:
И҆ ны́нѣ, крⷭ҇тобг҃оро́диченъ: Чⷭ҇тны́мъ крⷭ҇то́мъ сн҃а твоегѡ̀ сохранѧ́еми, влⷣчце чⷭ҇таѧ бцⷣе, всѧ́кїй прило́гъ борца̀, <<рк҃ѕ: 251>> всѝ ᲂу҆до́бь побѣжда́емъ: тѣ́мже тѧ̀ по до́лгꙋ при́снѡ ᲂу҆бл҃жа́емъ, ꙗ҆́кѡ мт҃рь бж҃їю, и҆ є҆ди́нꙋ наде́ждꙋ дꙋ́шъ на́шихъ.
По г҃-мъ же стїхосло́вїи сѣда́ленъ господи́на ѳео́дѡра. Гла́съ в҃.
Подо́бенъ: Млⷭ҇рдїѧ сꙋ́щи:
Чистоты̀ сы́й и҆сто́чникъ, посто́мъ соблюдѝ на́съ млⷭ҇тиве, при́зри на ны̀ тебѣ̀ припа́дающыѧ, вонмѝ воздѣѧ́нїю рꙋ́къ на́шихъ, простры́й дла̑ни твоѝ на дре́вѣ распина́емь ѡ҆ всѣ́хъ земноро́дныхъ, безпло́тныхъ є҆ди́не гдⷭ҇и.
Сла́ва, то́йже. И҆ ны́нѣ, крⷭ҇тобг҃оро́диченъ. Подо́бенъ:
Дв҃а и҆ мт҃и твоѧ̀ хрⷭ҇тѐ, на дре́вѣ зрѧ́ще тѧ̀ ме́ртва просте́рта, пла́чꙋщи го́рцѣ, сн҃е мо́й, глаго́лаше, что̀ стра́шное сїѐ та́инство; всѣ̑мъ да́рꙋѧй жи́знь вѣ́чнꙋю, во́лею на крⷭ҇тѣ̀ ка́кѡ ᲂу҆мира́еши сме́ртїю поно́сною;
Канѡ́нъ въ мине́и на ѕ҃. И҆ трипѣ́снцы по чи́нꙋ и҆́хъ. Стїхосло́вимъ и҆ пѧ́тꙋю пѣ́снь ѻ҆бы́чнѡ. Гла́съ в҃.
Пѣ́снь є҃.
І҆рмо́съ: Просвѣще́нїе во тьмѣ̀ лежа́щихъ:
Во мнѣ̀ зрѧ̀ грѣ́хъ, льстивомꙋ́дрый, спѣши́тсѧ и҆ содѣ́йствꙋетъ грѣхꙋ̀: ра́дꙋетсѧ бо вои́стиннꙋ ѡ҆ мое́й поги́бели: но ты́ ми да́ждь и҆справле́нїе сп҃се, во ѻ҆́нагѡ ᲂу҆бїе́нїе, молю́сѧ.
Нача̑ла побѣди́вый тьмы̀, на крⷭ҇тѣ̀ твое́мъ, си́хъ и҆змѝ мѧ̀ ѕлодѣѧ́нїѧ, па́дшаго во глꙋбинꙋ̀ грѣха̀, и҆ въ ꙗ҆́мꙋ безмѣ́стныхъ дѣѧ́нїй, твое́ю же млⷭ҇тїю сп҃сти́сѧ ᲂу҆пова́юща.
Оу҆мертви́выйсѧ на крⷭ҇тѣ̀ просте́ртъ, ᲂу҆мерщвле́ннꙋю грѣхо́мъ ѡ҆живѝ дꙋ́шꙋ мою̀, и҆ честно́е твоѐ воскрⷭ҇нїе дости́гнꙋти, въ ми́рѣ хрⷭ҇тѐ сподо́би, дѣ́лающа ᲂу҆се́рднѡ твоѧ̑ ѡ҆правда̑нїѧ. <<рк҃ѕ ѡ҆б.: 252>>
Бг҃оро́диченъ: Просвѣще́нїе моеѧ̀ не́мощи, сп҃се́нїе ѡ҆мраче́нныѧ дꙋшѝ моеѧ̀ чⷭ҇таѧ, сп҃си́ мѧ, сп҃сѝ погиба́юща ѻ҆трокови́це, и҆ въ ри́зꙋ нетлѣ́нїѧ мѧ̀ ѡ҆блецы̀, и҆стлѣ́вшаго лю́тыми прегрѣше́ньми.
И҆́ный, гла́съ то́йже.
І҆рмо́съ: Но́щи преше́дшей:
Ты̀ на мѣ́стѣ ло́бнѣмъ пло́тїю распѧ́тисѧ и҆зво́лилъ є҆сѝ, є҆ди́не безсме́ртне, человѣ́ческїй ро́дъ ѡ҆безсме́ртствꙋѧ, и҆ воз̾ѡбража́ѧ гдⷭ҇и.
Стрⷭ҇ти твоеѧ̀ доса́дꙋ, тва́рь зрѧ́щи всѧ̀ премѣнѧ́шесѧ, гдⷭ҇и, і҆ꙋде́йскагѡ рыда́ющи ᲂу҆бі́йства: но претерпѣ́лъ є҆сѝ сп҃стѝ всѧ́чєскаѧ.
Сла́ва, трⷪ҇ченъ: Ѽ трⷪ҇це всест҃а́ѧ! ты̀ на́ше слꙋже́нїе, ты̀ и҆ прибѣ́жище и҆ держа́ва, въ є҆стествѣ̀ є҆ди́номъ тѧ̀ воспѣва́ющымъ, ѡ҆чище́нїе прегрѣше́нїй низпослѝ.
Бг҃оро́диченъ: Многоимени́таѧ ѻ҆трокови́це, ра́дꙋйсѧ бцⷣе, ковче́же, и҆ ста́мно и҆ трапе́зо, свѣтоно́сный свѣ́щниче, ѻ҆гнезра́чнаѧ кꙋпино̀, горо̀ бж҃їѧ присѣ́ннаѧ.
Сла́ва тебѣ̀ бж҃е на́шъ, сла́ва тебѣ̀.
Мі́рꙋ и҆ сꙋ́щымъ въ мі́рѣ ра́доватисѧ прире́кшїи, ны́нѣ ꙗ҆́кѡ хрⷭ҇тꙋ̀ сраспина́еми, прете́рпимъ доса́дꙋ, рꙋга́нїе, и҆ дрꙋга̑ѧ, да съ ни́мъ просла́вимсѧ.
І҆рмо́съ: Но́щи преше́дшей, прибли́жисѧ де́нь, и҆ свѣ́тъ мі́рꙋ возсїѧ̀: сегѡ̀ ра́ди хва́лѧтъ тѧ̀ а҆́гг҃льстїи чи́ни, и҆ славосло́вѧтъ тѧ̀ всѧ́чєскаѧ.
Пѣ́снь и҃.
І҆рмо́съ: Въ пе́щь ѻ҆́гненнꙋю:
Смири́вый себѐ, возне́слсѧ є҆сѝ за бл҃гоꙋтро́бїе на крⷭ҇тъ, возвыша́ѧй па́дшаго снѣ́дїю дре́ва и҆ногда̀: тѣ́мже тѧ̀ є҆ди́не пребл҃гі́й, просла́вленнаго пое́мъ во вѣ́ки. <<рк҃з: 253>>
Невнима́нїѧ дрема́нїемъ грѣха̀ тѧ́жкїй под̾ѧ́хъ со́нъ: но ты̀ ᲂу҆снꙋ́вый на крⷭ҇тѣ̀ менѐ ра́ди хрⷭ҇тѐ мо́й, воздви́гни мѧ̀ па́дшаго, да мѧ̀ не прїи́метъ но́щь сме́ртнаѧ.
Ѡ҆слѣпи́всѧ сластьмѝ, ѡ҆бношꙋ̀ дꙋ́шꙋ ѡ҆мраче́ннꙋю, и҆ смѣе́тсѧ зрѧ́ мѧ льстивомꙋ́дрый вра́гъ: тѣ́мже мѧ̀ просвѣтѝ, и҆ и҆зба́ви сегѡ̀ ѕло́бы, хрⷭ҇тѐ во вѣ́ки.
Бг҃оро́диченъ: Въ лѣ́ности жи́знь и҆жди́въ, дрема́нїемъ грѣха̀ дꙋ́шꙋ ѡ҆тѧгчи́хъ: неꙋсы́пной же твое́й мл҃твѣ притека́ю, не да́ждь мнѣ̀ въ сме́рти дв҃о пречⷭ҇таѧ, ᲂу҆снꙋ́ти.
И҆́ный. І҆рмо́съ: Въ кꙋпинѣ̀ мѡѷсе́ю:
Те́рнїемъ вѣнча́всѧ, и҆ во ѻ҆де́ждꙋ ѿ порфѵ́ры ѡ҆бо́лксѧ, ꙗ҆ви́лсѧ є҆сѝ краснѣ́йшїй хрⷭ҇тѐ, добро́тою па́че всѣ́хъ сынѡ́въ человѣ́ческихъ, сла́вою ѡ҆блистава́ѧ.
Же́лчь и҆ ѻ҆́цетъ пїѧ̀, двѣ̀ стрꙋи̑ пролива́еши, живота̀ и҆ нетлѣ́нїѧ, и҆з̾ бж҃е́ственныхъ твои́хъ ре́бръ, вѣ́рою тѧ̀ пою́щымъ, и҆ славосло́вѧщымъ хрⷭ҇тѐ во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Бж҃ество̀ є҆ди́но трⷪ҇це, нераздѣли́мое є҆стество̀, раздѣ́льнаѧ же ли́цы, неги́блющаѧ держа́во, ѻ҆́ч҃е сн҃е и҆ дш҃е, тѧ̀ пѣсносло́вимъ во всѧ̑ вѣ́ки.
Бг҃оро́диченъ: Бг҃ороди́тельнице чⷭ҇таѧ, нбⷭ҇наѧ две́ре, сп҃си́тєльнаѧ врата̀, всѣ́хъ хрⷭ҇тїа́нъ моле́нїе прїимѝ, тебѐ бл҃жа́щихъ во всѧ̑ вѣ́ки.
Сла́ва тебѣ̀ бж҃е на́шъ, сла́ва тебѣ̀.
Крⷭ҇те ски́птре хрⷭ҇то́въ, цр҃кве ро́ге, царе́й побѣ́до, храни́телю хрⷭ҇тїа́нъ, ты̀ є҆сѝ просвѣще́нїе моѐ, ты̀ и҆ похвала̀ моѧ̀ во всѧ̑ вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Въ кꙋпинѣ̀ мѡѷсе́ю, дв҃ы чꙋ́до, на сїна́йстѣй горѣ̀ проѡбрази́вшаго и҆ногда̀, по́йте, бл҃гослови́те и҆ превозноси́те во всѧ̑ вѣ́ки. <<рк҃з ѡ҆б.: 254>>
Пѣ́снь ѳ҃.
І҆рмо́съ: Ꙗ҆́же пре́жде со́лнца:
Прокаже́ннꙋю дꙋ́шꙋ мою̀ безмѣ́стными помышле́нїи, ѡ҆кропле́нїемъ кро́ве твоеѧ̀ ѡ҆чи́сти бж҃їй сло́ве, и҆ ѻ҆́бщника мѧ̀ сла́вы твоеѧ̀ сотворѝ, менѐ ра́ди безсла́вное претерпѣ́вый хрⷭ҇тѐ распѧ́тїе.
Ве́сь слѧко́хсѧ тѧгото́ю безмѣ́стныхъ, хрⷭ҇тѐ, дѣѧ́нїй, и҆ сѣ́тꙋѧ зовꙋ́ ти, чл҃вѣколю́бче: дꙋшѝ моеѧ̀ неисцѣ̑льныѧ ꙗ҆́звы и҆сцѣлѝ твое́ю честно́ю кро́вїю, да пою̀ твоѐ бж҃ество̀.
Снѣ́дь ѕло́бꙋ, и҆ питїѐ небреже́нїе творѧ̀, по всемꙋ̀ пребыва́ю неиспра́вленъ, снѣ́дей ѡ҆ша́ѧнїемъ безвре́меннѡ ра́дꙋюсѧ: не сицево́мꙋ бо постꙋ̀ речѐ гдⷭ҇ь бы́ти.
Бг҃оро́диченъ: Лю́тагѡ дре́внѧгѡ ѿрече́нїѧ гꙋби́тельницꙋ, и҆ прама́тере и҆справле́нїе, ро́да къ бг҃ꙋ винꙋ̀ присвое́нїѧ, къ зижди́телю мо́стъ, тѧ̀ бцⷣе велича́емъ.
И҆́ный. І҆рмо́съ: Чⷭ҇тꙋю и҆ пречⷭ҇тꙋю:
На дре́вѣ распе́ншꙋсѧ тѝ тва́рь колеба́шесѧ, бг҃ъ сы́й пострада́лъ є҆сѝ пло́тски, за бл҃гоꙋтро́бїе щедро́тъ, да сп҃се́ши на́съ.
Крⷭ҇та̀ твоегѡ̀ гдⷭ҇и, си́ла вели́каѧ: и҆́бо ѡ҆бразꙋ́юще сего̀ въ себѣ̀, а҆́бїе де́монѡвъ крѣ́пость ѿража́емъ.
Сла́ва, трⷪ҇ченъ: Є҆ди́нице трїѷпоста́снаѧ, трⷪ҇це є҆ди́нственнаѧ, гдⷭ҇онача́лїе, є҆стество̀ равносла́вное, ѻ҆́ч҃е, сн҃е, и҆ бж҃е́ственный дш҃е, сп҃сѝ всѣ́хъ на́съ.
Бг҃оро́диченъ: Ра́дꙋйсѧ ѡ҆чисти́лище мі́рꙋ бцⷣе, въ не́же притека́юще всѝ грѣ́шнїи, къ бг҃ꙋ примире́нїе при́снѡ ѡ҆брѣта́емъ.
Сла́ва тебѣ̀ бж҃е на́шъ, сла́ва тебѣ̀.
Крⷭ҇та̀ твоегѡ̀ гдⷭ҇и, бж҃е́ственнымъ могꙋ́тствомъ ᲂу҆крѣпи́ мѧ, непоро́чное и҆ чи́стое вре́мѧ поста̀, тебѣ̀ приноси́ти. <<рк҃и: 255>>
І҆рмо́съ: Чⷭ҇тꙋю и҆ пречⷭ҇тꙋю мт҃рь и҆ дв҃ꙋ, пѣ́сньми пѣ́сней, всѝ вѣ́рнїи, бл҃гоче́стнѡ ꙗ҆́кѡ бцⷣꙋ велича́емъ.
Свѣти́ленъ гла́са.
На стїхо́внѣ самогла́сенъ днѐ, два́жды, гла́съ и҃:
По́стное завѣща́нїе ра́достнѡ воспрїи́мемъ: а҆́ще бо бы сїѐ пра́ѻтецъ сохрани́лъ, є҆де́мскагѡ ѿпаде́нїѧ не прїѧ́ли бы́хомъ. кра́сный бѣ̀ въ видѣ́нїе, и҆ до́брый въ снѣ́дь, ᲂу҆мори́вый менѐ пло́дъ: да не восхи́тимсѧ вѣ́ждами, ни да ᲂу҆слади́тсѧ на́ша горта́нь почита́емыми бра́шны, по прїѧ́тїи же безче́ствꙋемыми. бѣжи́мъ невоздержа́нїѧ, и҆ по насыще́нїи страсте́мъ не покори́мсѧ. назна́менаимсѧ кро́вїю, ѡ҆ на́съ веде́нагѡ на сме́рть во́лею, и҆ не ко́снетсѧ на́съ гꙋби́тель: и҆ снѣ́мы па́схꙋ хрⷭ҇то́вꙋ сщ҃е́ннѣйшꙋю, во сп҃се́нїе дꙋ́шъ на́шихъ.
Мч҃нченъ. Что́ вы нарече́мъ ст҃і́и; херꙋві́мы ли; ꙗ҆́кѡ на ва́съ почи́лъ є҆́сть хрⷭ҇то́съ. серафі́мы ли; ꙗ҆́кѡ непреста́ннѡ просла́висте є҆го̀. а҆́гг҃лы ли; тѣ́ла бо ѿврати́стесѧ. си̑лы ли; дѣ́йствꙋете бо чꙋдесы̀. мнѡ́гаѧ ва̑ша и҆мена̀, и҆ бѡ́льшаѧ дарова̑нїѧ, моли́те сп҃сти́сѧ дꙋша́мъ на́шымъ.
Сла́ва, и҆ ны́нѣ, крⷭ҇тобг҃оро́диченъ, гла́съ то́йже.
Подо́бенъ: Ѽ пресла́внагѡ чꙋдесѐ!
Ꙗ҆́кѡ ви́дѣ тѧ̀ распина́ема на ло́бнѣмъ сп҃се, и҆змѣнѧ́шесѧ всѧ̀ тва́рь, и҆ содрога́шесѧ дви́жꙋщесѧ не терпѧ́щи. дв҃а же чⷭ҇таѧ и҆ мт҃и твоѧ̀, рыда́ющи тебѣ̀ вопїѧ́ше: ᲂу҆вы̀ мнѣ̀, ѽ ча́до моѐ, сп҃се мо́й сладча́йшїй, что̀ но́вое сїѐ и҆ пресла́вное и҆ стра́нное видѣ́нїе;
Бл҃го є҆́сть: и҆ про́чее послѣ́дованїе. Ча́съ а҃-й без̾ стїхосло́вїѧ: та́кожде и҆ въ про́чыѧ пѧткѝ ст҃ы́ѧ вели́кїѧ м҃-цы. <<рк҃и ѡ҆б.: 256>>
На ѕ҃-мъ часѣ̀ тропа́рь, гла́съ є҃:
Многогрѣхо́вное на́ше житїѐ, и҆ непокаѧ́нный нра́въ щедро́тами предварѝ гдⷭ҇и: ра́звѣ бо тебѐ и҆но́гѡ не вѣ́мы, живото́мъ и҆ сме́ртїю влⷣчествꙋюща, сп҃сѝ ꙗ҆́кѡ чл҃вѣколю́бецъ.
Прокі́менъ, ѱало́мъ з҃і, гла́съ з҃: Возлюблю́ тѧ гдⷭ҇и крѣ́посте моѧ̀, гдⷭ҇ь ᲂу҆твержде́нїе моѐ. Сті́хъ: Бг҃ъ мо́й, помо́щникъ мо́й.
Прⷪ҇ро́чества и҆са́їина чте́нїе. [Глава̀ г҃, ст. а҃- д҃і.]
Сѐ влⷣка гдⷭ҇ь саваѡ́ѳъ ѿи́метъ ѿ і҆ерⷭ҇ли́ма и҆ ѿ і҆ꙋде́и крѣ́пкаго, и҆ крѣ́пкꙋю, крѣ́пость хлѣ́ба, и҆ крѣ́пость воды̀: И҆споли́на, и҆ крѣ́пкаго, и҆ человѣ́ка ра́тника, и҆ сꙋдїю̀, и҆ прⷪ҇ро́ка, и҆ смотрели́ваго, и҆ ста́рца: И҆ пѧтьдесѧтонача́льника, и҆ ди́внаго совѣ́тника, и҆ премꙋ́драго а҆рхїте́ктона, и҆ разꙋ́мнаго послꙋ́шателѧ. И҆ поста́влю ю҆́ношы кнѧ́зи и҆́хъ, и҆ рꙋга́тели госпо́дствовати бꙋ́дꙋтъ и҆́ми: И҆ напада́ти и҆́мꙋтъ лю́дїе, человѣ́къ на человѣ́ка, и҆ человѣ́къ на бли́жнѧго своего̀: прирази́тсѧ ѻ҆троча̀ къ ста́рцꙋ, и҆ безче́стный къ честно́мꙋ. Ꙗ҆́кѡ и҆́метсѧ человѣ́къ бра́та своегѡ̀, и҆лѝ дома́шнѧгѡ ѻ҆тца̀ своегѡ̀, глаго́лѧ: ри́зꙋ и҆́маши, началово́ждь на́мъ бꙋ́ди, и҆ бра́шно моѐ под̾ тобо́ю да бꙋ́детъ. И҆ ѿвѣща́въ въ де́нь ѻ҆́ный рече́тъ: не бꙋ́дꙋ тво́й началово́ждь, нѣ́сть бо въ домꙋ̀ мое́мъ ни хлѣ́ба, ни ри́зы: не бꙋ́дꙋ началово́ждь лю́демъ си̑мъ. Ꙗ҆́кѡ ѡ҆ста́вленъ бы́сть і҆ерⷭ҇ли́мъ и҆ і҆ꙋде́а падѐ, и҆ ꙗ҆зы́къ и҆́хъ со беззако́нїемъ, не покарѧ́ютсѧ гдⷭ҇ви. Сегѡ̀ ра́ди ны́нѣ смири́сѧ сла́ва и҆́хъ, и҆ стꙋ́дъ лица̀ и҆́хъ проти́вꙋ ста̀ и҆̀мъ: грѣ́хъ же сво́й ꙗ҆́кѡ содо́мскїй возвѣсти́ша, и҆ ꙗ҆ви́ша. го́ре дꙋшѝ и҆́хъ, занѐ ᲂу҆мы́слиша совѣ́тъ лꙋка́вый на себѐ сами́хъ, <<рк҃ѳ: 257>> Ре́кше: свѧ́жемъ првⷣнаго, ꙗ҆́кѡ непотре́бенъ на́мъ є҆́сть: ᲂу҆̀бо плоды̀ дѣ́лъ свои́хъ снѣдѧ́тъ. Го́ре беззако́нномꙋ, лꙋка̑ваѧ бо приключа́тсѧ є҆мꙋ̀ по дѣлѡ́мъ рꙋ́къ є҆гѡ̀. Лю́дїе моѝ, приста̑вницы ва́ши пожина́ютъ ва́съ, и҆ и҆стѧза́ющїи ѡ҆блада́ютъ ва́ми: лю́дїе моѝ, бл҃жа́щїи ва́съ льстѧ́тъ вы̀, и҆ стєзѝ но́гъ ва́шихъ возмꙋща́ютъ. Но ны́нѣ ᲂу҆стро́итсѧ гдⷭ҇ь на сꙋ́дъ, и҆ поста́витъ на сꙋ́дъ лю́ди своѧ̑. Са́мъ гдⷭ҇ь на сꙋ́дъ прїи́детъ со старѣ̑йшины люде́й, и҆ съ кнѧ́зи и҆́хъ.
Прокі́менъ, ѱало́мъ и҃і, гла́съ ѕ҃: Гдⷭ҇и, помо́щниче мо́й, и҆ и҆зба́вителю мо́й. Сті́хъ: Нб҃са̀ повѣ́даютъ сла́вꙋ бж҃їю:
Вѣ́домо да є҆́сть, ꙗ҆́кѡ послѣ́дованїе мине́и прилꙋчи́вшагѡсѧ ст҃а́гѡ въ сꙋббѡ́тꙋ и҆ въ недѣ́лю пое́тсѧ на повече́рїи, и҆лѝ є҆гда̀ хо́щетъ є҆кклисїа́рхъ.
Въ пѧто́къ ве́чера во свѣти́льничное,
по ѻ҆бы́чномъ стїхосло́вїи, на Гдⷭ҇и воззва́хъ, поста́вимъ стїхѡ́въ і҃, и҆ пое́мъ стїхи̑ры, самогла́сенъ днѐ, два́жды. Гла́съ є҃:
Прїиди́те вѣ́рнїи, дѣ́лаимъ во свѣ́тѣ дѣла̀ бж҃їѧ, ꙗ҆́кѡ во днѝ бл҃гоѡбра́знѡ хо́димъ, всѧ́кое непра́ведное списа́нїе ѿ себѐ бли́жнѧгѡ ѿи́мемъ, не полага́юще претыка́нїѧ семꙋ̀ въ собла́знъ. ѡ҆ста́вимъ пло́ти сладостра́стїе, возрасти́мъ дꙋшѝ дарова̑нїѧ, дади́мъ тре́бꙋющымъ хлѣ́бъ, и҆ пристꙋ́пимъ хрⷭ҇тꙋ̀ въ покаѧ́нїи вопїю́ще: бж҃е на́шъ, поми́лꙋй на́съ.
Та́же пое́мъ и҆ четы́ре мч҃ничны ѻ҆ктѡ́иха, прилꙋчи́вшагѡсѧ гла́са.
Та́же самогла́сны д҃, ст҃а́гѡ ѳео́дѡра. Гла́съ в҃:
Прїиди́те мч҃нколю́бцы всѝ, дх҃о́внѡ возвесели́мсѧ, и҆ торжествꙋ́имъ: дне́сь бо предлага́етъ трапе́зꙋ та́йнꙋю мч҃нкъ ѳео́дѡръ, веселѧ́щꙋю празднолю́бцєвъ на́съ, є҆́же <<рк҃ѳ ѡ҆б.: 258>> вопи́ти къ немꙋ̀: ра́дꙋйсѧ стрⷭ҇тоте́рпче непобѣди́мый, прещє́нїѧ мꙋчи́телей на землѝ разори́вый. ра́дꙋйсѧ, бре́нное твоѐ тѣ́ло за хрⷭ҇та̀ ѿда́вый мꙋ́камъ. ра́дꙋйсѧ, въ разли́чныхъ бѣда́хъ, и҆скꙋ́сный во́инъ ꙗ҆ви́выйсѧ нбⷭ҇нагѡ во́инства. тѣ́мже мо́лимъ тѧ̀ мч҃нкѡвъ ᲂу҆краше́нїе, моли́сѧ ѡ҆ дꙋша́хъ на́шихъ.
Бг҃одарова́ннꙋю бл҃года́ть чꙋде́съ твои́хъ, мч҃нче ѳео́дѡре, всѣ̑мъ простира́еши, вѣ́рою къ тебѣ̀ притека́ющымъ, є҆́юже хва́лимъ тѧ̀, глаго́люще: плѣнє́нныѧ и҆збавлѧ́еши, и҆сцѣлѧ́еши болѧ́щыѧ, ни́щыѧ ѡ҆богаща́еши: и҆ сп҃са́еши пла́вающыѧ, сꙋ́етное тече́нїе ᲂу҆держава́еши рабѡ́въ, и҆ тщеты̀ ꙗ҆вле́нїе твори́ши ᲂу҆крада́ющымъ страда́льче, и҆ во́ины наказꙋ́еши восхище́нїѧ ѡ҆греба́тисѧ, младе́нцємъ да́рꙋеши ми́лостивнѡ прошє́нїѧ, те́плый ѡ҆брѣта́ешисѧ предста́тель творѧ́щымъ твою̀ сщ҃е́ннꙋю па́мѧть. съ ни́миже и҆ на́съ страда́льче сщ҃е́ннѣйшїй, воспѣва́ющымъ твоѐ мꙋче́нїе, просѝ ᲂу҆ хрⷭ҇та̀ ве́лїю млⷭ҇ть.
Да́ръ бж҃їй превы́шшїй показа́лсѧ є҆сѝ мч҃нче ѳео́дѡре: занѐ и҆ по кончи́нѣ ꙗ҆́кѡ жи́въ притека́ющымъ дае́ши прошє́нїѧ. тѣ́мже сы́нꙋ восхище́ннꙋ жены̀ и҆ногда̀, плѣне́ннꙋ и҆новѣ́рными во́ины, предста́вши вдови́ца слеза́ми хра́мъ тво́й моча́ше: ты́ же ꙗ҆́кѡ млⷭ҇тивъ на конѣ̀ бѣ́ломъ наше́дъ, сеѧ̀ ѻ҆́трока предста́вилъ є҆сѝ неви́димѡ: и҆ по се́мъ и҆ съ си́мъ дѣ́йствꙋѧй чꙋдесы̀, не преста́лъ є҆сѝ. но молѝ хрⷭ҇та̀ бг҃а, сп҃сти́сѧ дꙋша́мъ на́шымъ.
Бж҃е́ственныхъ дарѡ́въ тезоимени́та тѧ̀ чтꙋ̀, требл҃же́нне ѳео́дѡре: свѣ́та бо бж҃е́ственнагѡ незаходи́мое свѣти́ло ꙗ҆вле́йсѧ, ᲂу҆ѧсни́лъ є҆сѝ страда́ньми твои́ми всю̀ тва́рь: и҆ ѻ҆гнѧ̀ си́льнѣйшїй ꙗ҆ви́всѧ, пла́мень ᲂу҆гаси́лъ є҆сѝ, и҆ льсти́вагѡ ѕмі́ѧ главꙋ̀ сокрꙋши́лъ є҆сѝ. тѣ́мже во страда́нїихъ твои́хъ хрⷭ҇то́съ приклони́всѧ, вѣнча̀ <<р҃л: 259>> бж҃е́ственнꙋю главꙋ̀ твою̀ великомч҃нче страда́льче, ꙗ҆́кѡ и҆мѣ́ѧй дерзнове́нїе къ бг҃ꙋ, прилѣ́жнѡ моли́сѧ ѡ҆ дꙋша́хъ на́шихъ.
Сла́ва, гла́съ ѕ҃: Сосꙋ́да ᲂу҆потреби́въ вра́гъ соѿстꙋ́пника мꙋчи́телѧ, ᲂу҆мышле́нїемъ лю́тымъ, посто́мъ ѡ҆чища́ющыѧсѧ лю́ди бл҃гочести̑выѧ, ѿ скве́рныхъ же́ртвъ, ѡ҆скверне́нными бра́шны ѿкꙋша́шесѧ ѡ҆скверни́ти: но ты̀ ѻ҆́нагѡ ᲂу҆хищре́нїе мꙋдрѣ́йшимъ разрꙋши́лъ є҆сѝ ᲂу҆мышле́нїемъ, во снѣ̀ предста́лъ є҆сѝ тогда́шнемꙋ а҆рхїере́ю, и҆ глꙋбо́кое ра́зꙋма ѿкрыва́ѧ, и҆ безмѣ́стное начина́нїе ꙗ҆влѧ́ѧ, и҆ тебѣ̀ ᲂу҆́бѡ бл҃года́рствєннаѧ приносѧ́ще, сп҃са написꙋ́емъ, лѣ́тное воспомина́нїе бы́вшагѡ чꙋдесѐ творѧ́ще: и҆ про́чее молѧ́щесѧ, ѿ ᲂу҆мышле́нїй лꙋка́вагѡ невреди̑мымъ сп҃сти́сѧ, къ бг҃ꙋ твои́ми мл҃твами мч҃нче ѳео́дѡре.
И҆ ны́нѣ, бг҃оро́диченъ гла́са. Вхо́дъ без̾ є҆ѵⷢ҇лїа. Свѣ́те ти́хїй:
Прокі́менъ, ѱало́мъ ѳ҃і. Гла́съ є҃: Оу҆слы́шитъ тѧ̀ гдⷭ҇ь въ де́нь печа́ли. Сті́хъ: Защи́титъ тѧ̀ и҆́мѧ бг҃а і҆а́кѡвлѧ.
Бытїѧ̀ чте́нїе. [Глава̀ в҃, ст. к҃-к҃є. глава̀ г҃, ст. а҃- к҃.]
Наречѐ а҆да́мъ и҆мена̀ всѣ̑мъ скотѡ́мъ, и҆ всѣ̑мъ пти́цамъ нбⷭ҇нымъ, и҆ всѣ̑мъ ѕвѣрє́мъ зємны́мъ, а҆да́мꙋ же не ѡ҆брѣ́тесѧ помо́щникъ подо́бный є҆мꙋ̀. И҆ наложѝ бг҃ъ и҆зстꙋпле́нїе на а҆да́ма, и҆ ᲂу҆́спе: и҆ взѧ̀ є҆ди́но ѿ ре́бръ є҆гѡ̀, и҆ и҆спо́лни пло́тїю вмѣ́стѡ є҆гѡ̀. И҆ созда̀ гдⷭ҇ь бг҃ъ ребро̀, є҆́же взѧ̀ ѿ а҆да́ма, въ женꙋ̀, и҆ приведѐ ю҆̀ ко а҆да́мꙋ. И҆ речѐ а҆да́мъ: сѐ ны́нѣ ко́сть ѿ косте́й мои́хъ, и҆ пло́ть ѿ пло́ти моеѧ̀: сїѧ̀ нарече́тсѧ жена̀, ꙗ҆́кѡ ѿ мꙋ́жа своегѡ̀ взѧта̀ бы́сть сїѧ̀. Сегѡ̀ ра́ди ѡ҆ста́витъ человѣ́къ ѻ҆тца̀ своего̀ и҆ ма́терь, и҆ прилѣпи́тсѧ къ женѣ̀ свое́й, и҆ бꙋ́дета два̀ въ пло́ть є҆ди́нꙋ. И҆ бѣ́ста ѻ҆́ба на̑га, а҆да́мъ же и҆ жена̀ є҆гѡ̀, и҆ не стыдѧ́стасѧ. Ѕмі́й же бѣ̀ мꙋдрѣ́йшїй <<р҃л ѡ҆б.: 260>> всѣ́хъ ѕвѣре́й сꙋ́щихъ на землѝ, и҆̀хже сотворѝ гдⷭ҇ь бг҃ъ. и҆ речѐ ѕмі́й женѣ̀: что̀ ꙗ҆́кѡ речѐ бг҃ъ: да не ꙗ҆́сте ѿ всѧ́кагѡ дре́ва ра́йскагѡ; И҆ речѐ жена̀ ѕмі́ю: ѿ всѧ́кагѡ дре́ва ра́йскагѡ ꙗ҆́сти бꙋ́демъ: Ѿ плода́ же дре́ва, є҆́же є҆́сть посредѣ̀ раѧ̀, речѐ бг҃ъ, да не ꙗ҆́сте ѿ негѡ̀, нижѐ прикосне́тесѧ є҆мꙋ̀, да не ᲂу҆́мрете. И҆ речѐ ѕмі́й женѣ̀: не сме́ртїю ᲂу҆́мрете. Вѣ́дѧше бо бг҃ъ, ꙗ҆́кѡ во́ньже а҆́ще де́нь снѣ́сте ѿ негѡ̀, ѿве́рзꙋтсѧ ѻ҆́чи ва́ши, и҆ бꙋ́дете ꙗ҆́кѡ бо́зи, вѣ́дѧще до́брое и҆ лꙋка́вое. И҆ ви́дѣ жена̀, ꙗ҆́кѡ добро̀ дре́во въ снѣ́дь, и҆ ꙗ҆́кѡ ᲂу҆го́дно ѻ҆чи́ма ви́дѣти, и҆ красно̀ є҆́сть, є҆́же разꙋмѣ́ти: и҆ взе́мши ѿ плода̀ є҆гѡ̀, ꙗ҆дѐ: и҆ дадѐ мꙋ́жꙋ своемꙋ̀ съ собо́ю, и҆ ꙗ҆до́ста. И҆ ѿверзо́шасѧ ѻ҆́чи ѻ҆бѣ́ма, и҆ разꙋмѣ́ша, ꙗ҆́кѡ на́зи бѣ́ша, и҆ сши́ста ли́ствїе смоко́вное, и҆ сотвори́ста себѣ̀ препоѧ̑санїѧ. И҆ ᲂу҆слы́шаста гла́съ гдⷭ҇а бг҃а, ходѧ́ща въ раѝ по полꙋ́дни: и҆ скры́стасѧ а҆да́мъ же и҆ жена̀ є҆гѡ̀ ѿ лица̀ гдⷭ҇а бг҃а посредѣ̀ дре́ва ра́йскагѡ. И҆ призва̀ гдⷭ҇ь бг҃ъ а҆да́ма, и҆ речѐ є҆мꙋ̀: а҆да́ме, гдѣ̀ є҆сѝ; И҆ речѐ є҆мꙋ̀: гла́съ слы́шахъ тебѐ ходѧ́ща въ раѝ, и҆ ᲂу҆боѧ́хсѧ ꙗ҆́кѡ на́гъ є҆́смь, и҆ скры́хсѧ. И҆ речѐ є҆мꙋ̀ бг҃ъ: кто̀ возвѣстѝ тебѣ̀, ꙗ҆́кѡ на́гъ є҆сѝ, а҆́ще не бы̀ ѿ дре́ва, є҆го́же заповѣ́дахъ тебѣ̀, сегѡ̀ є҆ди́нагѡ не ꙗ҆́сти, ѿ негѡ̀ ꙗ҆́лъ є҆сѝ; И҆ речѐ а҆да́мъ: жена̀, ю҆́же да́лъ є҆сѝ со мно́ю, та́ ми дадѐ ѿ древа̀, и҆ ꙗ҆до́хъ. И҆ речѐ гдⷭ҇ь бг҃ъ женѣ̀: что̀ сїѐ сотвори́ла є҆сѝ; и҆ речѐ жена̀: ѕмі́й прельсти́ мѧ, и҆ ꙗ҆до́хъ. И҆ речѐ гдⷭ҇ь бг҃ъ ѕмі́ю: ꙗ҆́кѡ сотвори́лъ є҆сѝ сїѐ, про́клѧтъ ты̀ ꙾ѿ꙾[[꙾па́че꙾]] всѣ́хъ скотѡ́въ, и҆ ѿ всѣ́хъ ѕвѣре́й земны́хъ: на пе́рсехъ твои́хъ и҆ чре́вѣ ходи́ти бꙋ́деши, и҆ зе́млю снѣ́си всѧ̑ дни̑ живота̀ твоегѡ̀. И҆ враждꙋ̀ положꙋ̀ междꙋ̀ тобо́ю, и҆ междꙋ̀ жено́ю, и҆ междꙋ̀ сѣ́менемъ твои́мъ, и҆ междꙋ̀ сѣ́менемъ тоѧ̀: то́й твою̀ <<рл҃а: 261>> ꙾блюстѝ бꙋ́детъ꙾[[є҆вр: ꙾сотре́тъ꙾]] главꙋ̀, и҆ ты̀ блюстѝ бꙋ́деши є҆гѡ̀ пѧ́тꙋ. И҆ женѣ̀ речѐ: ᲂу҆множа́ѧ ᲂу҆мно́жꙋ печа́ли твоѧ̑, и҆ воздыха̑нїѧ твоѧ̑, въ болѣ́знехъ роди́ши ча̑да, и҆ къ мꙋ́жꙋ твоемꙋ̀ ѡ҆браще́нїе твоѐ, и҆ то́й тобо́ю ѡ҆блада́ти бꙋ́детъ. И҆ а҆да́мꙋ речѐ: ꙗ҆́кѡ послꙋ́шалъ є҆сѝ гла́са жены̀ твоеѧ̀, и҆ ꙗ҆́лъ є҆сѝ ѿ дре́ва, є҆го́же заповѣ́дахъ тебѣ̀ сегѡ̀ є҆ди́нагѡ не ꙗ҆́сти, ѿ негѡ̀ ꙗ҆́лъ є҆сѝ: проклѧта̀ землѧ̀ въ дѣ́лѣхъ твои́хъ, въ печа́лехъ снѣ́си тꙋ́ю всѧ̑ дни̑ живота̀ твоегѡ̀. Тє́рнїѧ и҆ волчцы̀ возрасти́тъ тебѣ̀, и҆ снѣ́си травꙋ̀ се́льнꙋю. Въ по́тѣ лица̀ твоегѡ̀ снѣ́си хлѣ́бъ тво́й, до́ндеже возврати́шисѧ въ зе́млю, ѿ неѧ́же взѧ́тъ є҆сѝ: ꙗ҆́кѡ землѧ̀ є҆сѝ, и҆ въ зе́млю ѿи́деши. И҆ наречѐ а҆да́мъ и҆́мѧ женѣ̀ свое́й жи́знь, ꙗ҆́кѡ та̀ ма́ти всѣ́хъ живꙋ́щихъ.
Прокі́менъ, ѱало́мъ к҃, гла́съ ѕ҃: Вознеси́сѧ гдⷭ҇и, си́лою твое́ю, воспое́мъ и҆ пое́мъ си̑лы твоѧ̑. Сті́хъ: Гдⷭ҇и, си́лою твое́ю возвесели́тсѧ ца́рь.
При́тчей чте́нїе. [Глава̀ г҃, ст. ѳ҃і-л҃д.]
Бг҃ъ премꙋ́дростїю ѡ҆снова̀ зе́млю, ᲂу҆гото́ва же нб҃са̀ ра́зꙋмомъ: Въ чꙋ́вствѣ є҆гѡ̀ бє́здны разверзо́шасѧ, ѻ҆́блацы же и҆сточи́ша ро́сꙋ. Сы́не да не премине́ши, соблюди́ же мо́й совѣ́тъ, и҆ мы́сль: Да жива̀ бꙋ́детъ дꙋша̀ твоѧ̀, и҆ бл҃года́ть бꙋ́детъ на твое́й вы́и: [бꙋ́детъ же и҆сцѣле́нїе пло́темъ твои̑мъ, и҆ ᲂу҆врачева́нїе косте́мъ твои̑мъ:] Да хо́диши надѣ́ѧсѧ въ ми́рѣ во всѣ́хъ пꙋте́хъ твои́хъ, нога́ же твоѧ̀ не по́ткнетсѧ, А҆́ще бо сѧ́деши, безбоѧ́зненъ бꙋ́деши, а҆́ще же поспи́ши сла́достнѡ поспи́ши: И҆ не ᲂу҆бои́шисѧ стра́ха наше́дшагѡ, нижѐ ᲂу҆стремле́нїѧ нечести́выхъ находѧ́щагѡ. Гдⷭ҇ь бо бꙋ́детъ на всѣ́хъ пꙋте́хъ твои́хъ, и҆ ᲂу҆тверди́тъ но́гꙋ твою̀, да не поползне́шисѧ. Не ѿрецы́сѧ бл҃готвори́ти тре́бꙋющемꙋ, <<рл҃а ѡ҆б.: 262>> є҆гда̀ и҆́мать рꙋка̀ твоѧ̀ помога́ти. Не рцы̀: ѿше́дъ возврати́сѧ, и҆ заꙋ́тра да́мъ, си́льнꙋ тѝ сꙋ́щꙋ бл҃готвори́ти: не вѣ́си бо что̀ породи́тъ находѧ́щїй де́нь. Не соплета́й на дрꙋ́га твоегѡ̀ ѕла̀, прише́льца сꙋ́ща и҆ ᲂу҆пова́юща на тѧ̀. Не враждꙋ́й на человѣ́ка тꙋ́не, да не что̀ на тѧ̀ содѣ́етъ ѕло́е. Не стѧжѝ ѕлы́хъ мꙋже́й поношє́нїѧ, не возревнꙋ́й пꙋтє́мъ и҆́хъ. Нечи́стъ бо пред̾ гдⷭ҇емъ всѧ́къ законопрестꙋ́пникъ и҆ съ првⷣными не сочетава́етсѧ. Клѧ́тва гдⷭ҇нѧ въ домѣ́хъ нечести́выхъ: дворы́ же првⷣныхъ бл҃гословлѧ́ютсѧ. Гдⷭ҇ь гѡ́рдымъ проти́витсѧ: смирє́ннымъ же дае́тъ бл҃года́ть.
Та́же, Да и҆спра́витсѧ мл҃тва моѧ̀:
И҆ про́чее послѣ́дованїе преждесщ҃е́нныхъ.
По заамвѡ́нной мл҃твѣ
пое́мъ настоѧ́щїй моле́бный канѡ́нъ ст҃а́гѡ ѳео́дѡра. Предло́жши же ко́лѷво, глаго́лемъ ѱало́мъ рм҃в: Гдⷭ҇и, ᲂу҆слы́ши мл҃твꙋ мою̀: Та́же, Бг҃ъ гдⷭ҇ь, и҆ ꙗ҆ви́сѧ на́мъ:
И҆ а҆́бїе тропа́рь, гла́съ в҃:
Вє́лїѧ вѣ́ры и҆справлє́нїѧ, во и҆сто́чницѣ пла́мене, ꙗ҆́кѡ на водѣ̀ ᲂу҆покое́нїѧ, ст҃ы́й мч҃нкъ ѳео́дѡръ ра́довашесѧ: ѻ҆гне́мъ бо всесожже́гсѧ, ꙗ҆́кѡ хлѣ́бъ сла́дкїй трⷪ҇цѣ принесе́сѧ. тогѡ̀ мл҃твами хрⷭ҇тѐ бж҃е сп҃сѝ дꙋ́шы на́шѧ.
Сла́ва, то́йже.
И҆ ны́нѣ, бг҃оро́диченъ: Всѧ̑ па́че смы́ла, всѧ̑ пресла̑внаѧ твоѧ̑ бцⷣе та̑инства, чистотѣ̀ запеча́танной, и҆ дв҃ствꙋ храни́мꙋ, мт҃и позна́ласѧ є҆сѝ нело́жна бг҃а ро́ждши и҆́стиннаго: того̀ молѝ сп҃сти́сѧ дꙋша́мъ на́шымъ.
И҆ а҆́бїе ѱало́мъ н҃. <<рл҃в: 263>>
Та́же настоѧ́щїй канѡ́нъ, гла́съ и҃:
Творе́нїе і҆ѡа́нна дамаски́на, є҆гѡ́же краестро́чїе: Бж҃їихъ тѧ̀ пою̀ дарѡ́въ тезоимени́те.
Пѣ́снь а҃.
І҆рмо́съ: Во́дꙋ проше́дъ:
Бж҃їѧ тѧ̀ рачи́телѧ ѳео́дѡре вѣ́дый и҆ любо́вїю неизбѣ́жною твое́ю запе́нсѧ, дꙋ́шꙋ же и҆ тѣ́ло, и҆ словеса̀ похва́лъ возлага́ю.
Писа́шесѧ повелѣ́нїе бг҃оме́рзкое, же́ртвꙋ і҆́дѡлѡмъ, а҆ не живо́мꙋ бг҃ꙋ приноси́ти: но приведе́нъ бы́лъ є҆сѝ, не пожрѧ́й стрⷭ҇тоте́рпче, бг҃ꙋ же и҆мы́й приведе́нъ бы́ти.
Сла́ва: Раче́нїемъ бж҃е́ственнымъ пригвожде́нъ, бг҃а вы́шнѧгѡ сн҃ꙋ є҆диноро́дномꙋ, ѳео́дѡре мч҃нче вво́инилсѧ є҆сѝ, и҆ по́честей не погрѣши́лъ є҆сѝ.
Бг҃оро́диченъ: Чи́ни тѧ̀ а҆́гг҃лѡвъ и҆ человѣ́кѡвъ безневѣ́стнаѧ мт҃и восхвалѧ́ютъ непреста́ннѡ: содѣ́телѧ бо си́хъ, ꙗ҆́кѡ млⷣнца во ѡ҆б̾ѧ́тїихъ твои́хъ носи́ла є҆сѝ.
Пѣ́снь г҃.
І҆рмо́съ: Ты̀ є҆сѝ ᲂу҆твержде́нїе:
Пѣ́нїе и҆з̾ ᲂу҆сте́нъ мои́хъ, и҆ и҆з̾ болѣ́зненныѧ дꙋшѝ мольбꙋ̀ приношꙋ̀, ю҆́же ᲂу҆ще́дри стрⷭ҇тоте́рпче ѳео́дѡре.
Пло́ть покори́лъ є҆сѝ самоде́ржцꙋ, сла́вне мч҃нче, ᲂу҆мꙋ̀, и҆ ѻ҆бои́ми ᲂу҆гожда́еши созда́вшемꙋ.
Сла́ва: Ста́лъ є҆сѝ на сꙋди́щи мꙋчи́тельскомъ, хрⷭ҇та̀ цр҃ѧ̀ бг҃осло́вѧ: жре́ти бо сквє́рнымъ ѿре́клсѧ є҆сѝ ѳео́дѡре.
Бг҃оро́диченъ: Тѧ̀ всѝ стѧжа́хомъ прибѣ́жище и҆ стѣ́нꙋ при́снѡ хрⷭ҇тїа́не: тѧ̀ славосло́вимъ немо́лчнѡ безневѣ́стнаѧ. <<рл҃в ѡ҆б.: 264>>
Пѣ́снь д҃.
І҆рмо́съ: Оу҆слы́шахъ гдⷭ҇и:
Та̑инъ бж҃е́ственныхъ вкꙋси́въ, въ ра́зꙋмѣ мч҃нче ѳео́дѡре, непосты́днꙋю про́повѣдь бж҃їѧ рожде́нїѧ и҆сповѣ́далъ є҆сѝ.
Стра́стное бж҃ество̀ непщева́хꙋ, страсте́мъ слꙋжа́щїи, и҆̀хже дх҃омъ и҆з̾ѡбличи́лъ є҆сѝ, страда́льче ѳео́дѡре просвѣща́емь.
Сла́ва: И҆зба́вителѧ мл҃твою, тебѐ воспѣва́ющымъ бл҃же́нне ѳео́дѡре, ѿ разли́чныхъ ѡ҆бстоѧ́нїй и҆ страсте́й бы́ти мо́лимъ.
Бг҃оро́диченъ: Кла́съ возрасти́вшаѧ животворѧ́щїй, неѡра́ннаѧ ни́во, подаю́щїй мі́рови жи́знь, бцⷣе, сп҃сѝ пою́щыѧ тѧ̀.
Пѣ́снь є҃.
І҆рмо́съ: Оу҆́тренююще:
Люби́те возлюби́вшаго гдⷭ҇а, возглаша́лъ є҆сѝ страда́льче ѳео́дѡре, стра́ждꙋщымъ съ тобо́ю мч҃нкѡмъ.
Ꙗ҆́кѡ ре́вностїю стрⷭ҇тоте́рпче разжиза́ѧсѧ се́рдцемъ, боги́ню лжеимени́тꙋю съ тре́бищемъ попали́лъ є҆сѝ.
Сла́ва: Си́лою непобѣди́мою ѳео́дѡре стрⷭ҇тоте́рпче, ва́рварскꙋю де́рзость, и҆ моѧ̑ стра̑сти погꙋбѝ.
Бг҃оро́диченъ: Дв҃ꙋ по ржⷭ҇твѣ̀ пое́мъ тѧ̀ бцⷣе: ты́ бо бг҃а сло́ва пло́тїю мі́рови родила̀ є҆сѝ.
Пѣ́снь ѕ҃.
І҆рмо́съ: Ѡ҆чи́сти мѧ̀ сп҃се:
Ко́ль сла́бое, ко́ль немощно́е, богѡ́въ сꙋ́етныхъ шата́нїе! на ѿмще́нїе своѐ, человѣ́кѡмъ молѧ́шесѧ въ стоѧ́нїи побѣжда́емое, нело́жныхъ мч҃нкѡвъ проповѣ́дающихъ и҆́стинꙋ. [Два́жды.] <<рл҃г: 265>>
Сла́ва: Оу҆крѣпи́всѧ си́лою бж҃їею, мч҃нкѡвъ сла́во ѳео́дѡре, мꙋ̑ки ѕлочести́выхъ, младе́нєцъ стрѣлѧ́нїѧ зре́лъ є҆сѝ бл҃же́нне, вѣ́чнꙋющее бꙋ́дꙋщихъ предзрѧ̀.
Бг҃оро́диченъ: Да и҆зба́вимсѧ ѿ лю́тыхъ прегрѣше́нїй мл҃твами твои́ми бг҃ороди́тельнице чⷭ҇таѧ, и҆ да ᲂу҆лꙋчи́мъ всечⷭ҇таѧ бж҃е́ственнагѡ ѡ҆сїѧ́нїѧ, и҆з̾ тебѐ неизрече́ннѡ воплоти́вшагѡсѧ сн҃а бж҃їѧ.
Конда́къ, гла́съ и҃: Вѣ́рꙋ хрⷭ҇то́вꙋ ꙗ҆́кѡ щи́тъ внꙋ́трь прїи́мъ въ се́рдцы твое́мъ, проти̑вныѧ си̑лы попра́лъ є҆сѝ многострада́льче, и҆ вѣнце́мъ нбⷭ҇нымъ вѣнча́лсѧ є҆сѝ вѣ́чнѡ ѳео́дѡре, ꙗ҆́кѡ непобѣди́мый.
Пѣ́снь з҃.
І҆рмо́съ: Ѿ і҆ꙋде́и доше́дше:
Оу҆ра́ненъ бы́лъ є҆сѝ тѣ́ломъ, за ᲂу҆ра́неннаго сло́ва пло́тїю на́съ ра́ди, и҆ семꙋ̀ бл҃года́рственнѡ веселѧ́сѧ возопи́лъ є҆сѝ, стрⷭ҇тоте́рпче ѳео́дѡре: ѻ҆тє́цъ на́шихъ бж҃е бл҃гослове́нъ є҆сѝ.
Ꙗ҆́кѡ во гро́бѣ положи́сѧ, и҆ во́лею запечатлѣ́сѧ и҆зба́вителю всѣ́хъ, въ темни́цѣ запечатлѣ́нной всели́лсѧ є҆сѝ, вопїѧ̀ стрⷭ҇тоте́рпче ѳео́дѡре: ѻ҆тє́цъ на́шихъ бж҃е бл҃гослове́нъ є҆сѝ.
Оу҆мерщвле́нъ бы́въ, и҆ стра̑сти плотскі̑ѧ произволе́нїемъ ѿтрѧ́съ, не снѣ́дїю страстоте́рпче, но любо́вїю бж҃е́ственною пита́ѧсѧ пѣ́лъ є҆сѝ: ѻ҆тє́цъ на́шихъ бж҃е бл҃гослове́нъ є҆сѝ.
Сла́ва: Въ темни́цѣ стрⷭ҇тоте́рпче, ꙗ҆́коже въ пещѝ ю҆́ношы и҆ногда̀, є҆ди́нъ нетлѣ́нныѧ трⷪ҇цы тебѐ ᲂу҆крѣплѧ́етъ, ви́дѣнъ бы́въ, вопїю́ща: ѻ҆тє́цъ на́шихъ бж҃е бл҃гослове́нъ є҆сѝ.
Бг҃оро́диченъ: На́ше сп҃се́нїе, ꙗ҆́коже восхотѣ́лъ є҆сѝ сп҃се ᲂу҆стро́ити, во ᲂу҆тро́бꙋ дв҃ы всели́лсѧ є҆сѝ, ю҆́же мі́рꙋ <<рл҃г ѡ҆б.: 266>> предста́тельницꙋ показа́лъ є҆сѝ: ѻ҆тє́цъ на́шихъ бж҃е бл҃гослове́нъ є҆сѝ.
Пѣ́снь и҃.
І҆рмо́съ: Седмери́цею пе́щь:
Ѡ҆слѣпле́нъ ᲂу҆мо́мъ, беззако́нныхъ нача́льникъ, бг҃очести́вꙋ тебѣ̀ нечести́внѡ претѧ́ше: что̀ всꙋ́е на человѣ́ка нꙋ́ждею ᲂу҆ме́рша, безꙋ́мне, возложи́лъ є҆сѝ наде́ждꙋ; но ты̀ возопи́лъ є҆сѝ: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Ꙗ҆́кѡ смы́сленный и҆ премꙋ́дрый строи́тель бл҃года́ти, да́нною тебѣ̀ ѿ бг҃а бл҃года́тїю, возопи́лъ є҆сѝ ѳео́дѡре, повелѣва́ющемꙋ нечести́внѡ: се́й стꙋ́дъ мнѣ̀ и҆ пою́щымъ бꙋ́ди: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Сла́ва: Ю҆́ношески подвиза́лсѧ є҆сѝ, де́рзостнѡ и҆з̾ѡбличи́лъ є҆сѝ: что̀ безꙋ́мствꙋеши, мꙋчи́телю взыва́лъ є҆сѝ, повелѣва́ѧ тва́рємъ слꙋжи́ти ло́жнѡ, ѡ҆ста́вльшымъ созда́вшаго; но а҆́зъ воспѣва́ю: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Бг҃оро́диченъ: Плотски́ми и҆з̾ѡбраже́ньми, и҆ разли́чными гана̑нїи, и҆ знамена́тельными и҆ ѡ҆брази́тельными и҆зрече́ньми, твоѐ предвѣща́хꙋ бг҃оглаго́ливїи ржⷭ҇тво̀, преесте́ственное и҆ чꙋ́дное дв҃о: тѣ́мже тѧ̀ веселѧ́щесѧ бл҃гоче́стнѡ восхвалѧ́емъ, хрⷭ҇та̀ превозносѧ́ще во всѧ̑ вѣ́ки.
Пѣ́снь ѳ҃.
І҆рмо́съ: Тѧ̀ неискꙋсобра́чнꙋю:
Вещество̀ мꙋче́нїѧ твоегѡ̀, бж҃їе ѳео́дѡре жела́нїе. тѣ́мже тѝ и҆ вещество̀ бы́сть веще́ственномꙋ тѣ́ло ѻ҆гню̀: и҆́мже къ бж҃е́ственномꙋ ра́дꙋѧсѧ ѻ҆гню̀ и҆зше́лъ є҆сѝ, стрⷭ҇тоте́рпче ᲂу҆го́дниче бж҃їй ѳео́дѡре. <<рл҃д: 267>>
Мч҃нче всече́стне, попали́въ, не попали́лсѧ є҆сѝ: ты́ бо пре́лесть попали́лъ є҆сѝ, бг҃ꙋ же предстои́ши живы́й, и҆ въ не́мъ мч҃нчески веселѧ́сѧ стрⷭ҇тоте́рпче, и҆ ᲂу҆го́дниче ѳео́дѡре.
Сла́ва: Є҆ди́наго тѧ̀ зна́емъ хрⷭ҇та̀, є҆ди́наго ѿ трⷪ҇цы, во двою̀ совершє́ннꙋ є҆стєствꙋ̀, лю́ди твоѧ̑ сп҃сѝ сїѧ̑, ꙗ҆̀же стѧжа́лъ є҆сѝ честно́ю твое́ю кро́вїю, ѳео́дѡра страстоте́рпца мл҃твами.
Бг҃оро́диченъ: Тѧ̀ неви́димаго бг҃а носи́вшꙋю ѡ҆б̾ѧ́тїи, на нб҃сѣ́хъ воспѣва́емаго ѿ всеѧ̀ си́лы: и҆ тобо́ю на́мъ да́рꙋемое вы́нꙋ сп҃се́нїе во ѡ҆бстоѧ́нїи велича́емъ.
І҆рмо́съ: Тѧ̀ неискꙋсобра́чнꙋ. мт҃рь бг҃а вы́шнѧгѡ: тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословле́нїи велича́емъ.
И҆ а҆́бїе, Трист҃о́е. И҆ тропа́рь ст҃а́гѡ: Вє́лїѧ вѣ́ры: Сла́ва, конда́къ: Вѣ́рꙋ хрⷭ҇то́вꙋ ꙗ҆́кѡ щи́тъ:
И҆ ны́нѣ, бг҃оро́диченъ, гла́съ то́йже: Ꙗ҆́коже предста́тельство всѝ, и҆ держа́вное застꙋпле́нїе, прегрѣ́шшїи стѧжа́хомъ всечⷭ҇таѧ, твою̀ те́плꙋю по́мощь дв҃о мт҃и мр҃і́е, хрⷭ҇тїа́нъ сп҃се́нїе. тѣ́мъ не преста́й ѡ҆ на́съ молѧ́щи сп҃са, дарова́тисѧ проще́нїю.
И҆ быва́етъ бл҃гослове́нїе ко́лѷва. Та́же, Бꙋ́ди и҆́мѧ гдⷭ҇не: И҆ Бл҃гословлю̀ гдⷭ҇а: И҆ дае́тсѧ преломле́нїе ѿ і҆ере́а. И҆ ѿпꙋ́стъ. А҆ и҆дѣ́же не бы́ти преждесщ҃е́нной, конча́емъ часы̀ си́це. По Ѡ҆сла́би, ѡ҆ста́ви: И҆ по коне́чнѣхъ покло́нѣхъ глаго́лемъ Трист҃о́е. по Ѻ҆́ч҃е на́шъ: Гдⷭ҇и поми́лꙋй, в҃і. Та́же мл҃тва, Всест҃а́ѧ трⷪ҇це: И҆ начина́емъ вече́рню: Прїиди́те поклони́мсѧ: три́жды. ѱало́мъ р҃г. Каѳі́сма. И҆ пое́мъ на Гдⷭ҇и воззва́хъ, стїхи̑ры на ѕ҃. Мч҃нчны г҃. во ѻ҆ктѡ́ихѣ гла́са, и҆́же на рѧдꙋ̀: И҆ ст҃о́мꙋ ѳео́дѡрꙋ, г҃, Сла́ва, ѳео́дѡрꙋ: Сосꙋ́да ᲂу҆потреби́въ: И҆ ны́нѣ, бг҃оро́диченъ, гла́са рѧдова́гѡ. Свѣ́те ти́хїй: без̾ вхо́да. Чте́нїе. На стїхо́внѣ трїѡ́ди <<рл҃д ѡ҆б.: 268>> самогла́сенъ днѐ два́жды, и҆ мч҃нченъ, гла́съ є҃: Бл҃гослове́но во́инство: Сла́ва, ѳео́дѡрꙋ, гла́съ в҃: Бж҃е́ственныхъ дарѡ́въ: Пи́санъ въ стїхи́рахъ. И҆ ны́нѣ, бг҃оро́диченъ: Всѐ ᲂу҆пова́нїе: Ны́нѣ ѿпꙋща́еши: Трист҃о́е. по Ѻ҆́ч҃е на́шъ:Тропа́рь: Вє́лїѧ вѣ́ры: Сла́ва, и҆ ны́нѣ, бг҃оро́диченъ: Всѧ̑ па́че смы́сла: Та́же є҆ктенїа̀, Поми́лꙋй на́съ бж҃е: И҆ покло́ны, г҃. И҆ ѡ҆блачи́тсѧ сщ҃е́нникъ въ багрѧ́ный фелѡ́нь, и҆ начина́етъ: Бл҃гослове́нъ бг҃ъ на́шъ: И҆ мы̀ глаго́лемъ ѱало́мъ рм҃в: Гдⷭ҇и ᲂу҆слы́ши мл҃твꙋ: И҆ про́чее ꙗ҆́коже ᲂу҆ка́зано пре́жде. Канѡ́нъ на д҃. И҆ по соверше́нїи канѡ́на, Вмѣ́стѡ: Досто́йнѡ є҆́сть: Пое́мъ і҆рмо́съ ѳ҃ пѣ́сни: Тѧ̀ неискꙋсобра́чнꙋю: Та́же Трист҃о́е. по Ѻ҆́ч҃е на́шъ: Тропа́рь: Вє́лїѧ вѣ́ры: Сла́ва, конда́къ: Вѣ́рꙋ хрⷭ҇то́вꙋ: И҆ ны́нѣ, бг҃оро́диченъ: Ꙗ҆́коже предста́тельство: Та́же мл҃твꙋ над̾ ко́лѷвомъ, бл҃гослове́нїе ко́лѷва. Посе́мъ, Бꙋ́ди и҆́мѧ гдⷭ҇не: И҆ Бл҃гословлю̀ гдⷭ҇а: И҆ ѿпꙋ́стъ. И҆ вхо́димъ въ трапе́зꙋ, и҆ вкꙋша́емъ вїна̀ и҆ є҆ле́а, ра́ди ст҃а́гѡ. Сїѐ прїѧ́хомъ въ ла́ѵрѣ прпⷣбнагѡ ѻ҆тца̀ на́шегѡ са́ввы, и҆ кїно́вїи прпⷣбнагѡ вели́кагѡ є҆ѵѳѵ́мїа: но не твори́мъ сегѡ̀ ны́нѣ за че́стность днѐ. Ѻ҆ба́че ꙗ҆ди́мъ варе́нїе съ сли́вами, без̾ ма́сла и҆ а҆рме́а: произволѧ́ющїи же ꙗ҆дѧ́тъ сꙋхоѧде́нїе, ꙗ҆́коже и҆ въ сре́дꙋ.
Подоба́етъ вѣ́дати, ꙗ҆́кѡ во всѣ́хъ пѧтка́хъ ст҃ы́ѧ и҆ вели́кїѧ четыредесѧ́тницы, на вече́рнѧхъ и҆ повече́рїѧхъ покло́нѡвъ не твори́мъ, то́кмѡ воѡбражє́нныѧ въ преждеѡсщ҃е́нной, є҆́же є҆́сть по Да и҆спра́витсѧ: покло́ны г҃. По вхо́дѣ ст҃ы́хъ дарѡ́въ, покло́ны г҃. И҆ на Бꙋ́ди и҆́мѧ гдⷭ҇не, покло́ны г҃.
Повечє́рїѧ же пое́мъ вели̑каѧ, на ни́хже пое́мъ покѡ́йныѧ канѡ́ны настоѧ́щагѡ гла́са, въ гробни́цѣ.
Канѡ́ны же въ мине́и настоѧ́щїѧ сꙋббѡ́ты и҆ недѣ́ли пое́мъ, є҆гда̀ и҆зво́литъ є҆кклисїа́рхъ: є҆ди́нъ ᲂу҆́бѡ пое́мъ въ повече́рїи пѧтка̀, дрꙋгі́й же канѡ́нъ пое́мъ въ повече́рїи недѣ́ли.
Та́кѡ твори́мъ во всѣ́хъ пѧтка́хъ, въ ве́черъ ст҃ы́ѧ и҆ вели́кїѧ четыредесѧ́тницы.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.