Глас 8-й. Неделя.
Гла́съ и҃.
Въ сꙋббѡ́тꙋ ве́чера, на ма́лѣй вече́рни,
на Гдⷭ҇и воззва́хъ, стїхи̑ры воскрⷭ҇ны г҃, повторѧ́юще пе́рвꙋю. Гла́съ и҃:
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Вече́рнюю пѣ́снь, и҆ слове́снꙋю слꙋ́жбꙋ, тебѣ̀ хрⷭ҇тѐ прино́симъ: ꙗ҆́кѡ бл҃говоли́лъ є҆сѝ поми́ловати на́съ воскрⷭ҇нїемъ.
Гдⷭ҇и, гдⷭ҇и, не ѿве́ржи на́съ ѿ твоегѡ̀ лица̀: но бл҃говолѝ поми́ловати на́съ воскрⷭ҇нїемъ.
Ра́дꙋйсѧ сїѡ́не ст҃ы́й, мт҃и цр҃кве́й, бж҃їе жили́ще: ты́ бо прїѧ́лъ є҆сѝ пе́рвый, ѡ҆ставле́нїе грѣхѡ́въ, воскрⷭ҇нїемъ.
Сла́ва, и҆ ны́нѣ, бг҃оро́диченъ, догма́тїкъ. Гла́съ и҃.
Ка́кѡ тѧ̀ ᲂу҆бл҃жи́мъ бцⷣе; ка́кѡ же воспои́мъ пребл҃гослове́ннаѧ, непостижи́мое та́инство рожде́нїѧ твоегѡ̀; вѣкѡ́въ бо творе́цъ, и҆ на́шегѡ содѣ́тель є҆стества̀, сво́й ѡ҆́бразъ ᲂу҆ще́дривъ, низведѐ самаго̀ себѐ во и҆стоща́нїе неизслѣ́димое, сы́й въ невеще́ственныхъ нѣ́дрѣхъ ѻ҆́ч҃ихъ, во ᲂу҆тро́бѣ твое́й чⷭ҇таѧ всели́сѧ, и҆ пло́ть непрело́жнѡ бы́сть, ѿ тебѐ неискꙋсобра́чнаѧ, пребы́въ ᲂу҆́бѡ, є҆́же бѣ̀ є҆стество́мъ бг҃ъ. тѣ́мже є҆мꙋ̀ покланѧ́емсѧ бг҃ꙋ соверше́ннꙋ, и҆ человѣ́кꙋ соверше́ннꙋ, томꙋ̀ во ѻ҆бое́мъ зра́цѣ: и҆́бо ѻ҆боѐ є҆стество̀ въ не́мъ є҆́сть вои́стиннꙋ: сꙋгꙋ́ба же всѧ̑ проповѣ́дꙋемъ є҆сте́ствєннаѧ є҆гѡ̀ свѡ́йства, по сꙋгꙋ́бомꙋ сꙋществꙋ̀, два̀ почита́юще дѣ̑йства и҆ хотѣ̑нїѧ. є҆диносꙋ́щенъ бо сы́й бг҃ꙋ и҆ ѻ҆ц҃ꙋ̀, самовла́стнѡ хо́щетъ и҆ дѣ́йствꙋетъ ꙗ҆́кѡ бг҃ъ: є҆диносꙋ́щенъ же сы́й и҆ на́мъ, самовла́стнѡ хо́щетъ, и҆ дѣ́йствꙋетъ ꙗ҆́кѡ человѣ́къ. того̀ молѝ чⷭ҇таѧ всебл҃же́ннаѧ, сп҃сти́сѧ дꙋша́мъ на́шымъ.
Та́же, Свѣ́те ти́хїй: Посе́мъ прокі́менъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ. Три́жды. Сті́хъ: Ѡ҆блече́сѧ гдⷭ҇ь въ си́лꙋ, и҆ препоѧ́сасѧ. Та́же, Сподо́би гдⷭ҇и въ ве́черъ се́й:
І҆ере́й же є҆ктенїѝ не глаго́летъ, но пое́мъ на стїхо́внѣ стїхи́рꙋ воскрⷭ҇нꙋ, гла́съ и҃:
Возше́лъ є҆сѝ на крⷭ҇тъ і҆и҃се, снизше́дый съ нб҃сѐ: прише́лъ є҆сѝ на сме́рть животѐ безсме́ртный, къ сꙋ́щымъ во тьмѣ̀, свѣ́тъ и҆́стинный: къ па́дшымъ, всѣ́хъ воскрⷭ҇нїе, просвѣще́нїе, и҆ сп҃се на́шъ, сла́ва тебѣ̀.
Та́же, бг҃оро́дичны подѡ́бны, трѝ. Гла́съ и҃:
Подо́бенъ: Ѽ пресла́внагѡ чꙋдесѐ!
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Ра́дꙋйсѧ бцⷣе всепѣ́таѧ. ра́дꙋйсѧ и҆сто́чниче живота̀ вѣ̑рнымъ и҆сточа́ющь. ра́дꙋйсѧ всѣ́хъ влⷣчце, и҆ госпожѐ тва́ри бл҃гослове́ннаѧ. ра́дꙋйсѧ всенепоро́чнаѧ, препросла́вленнаѧ. ра́дꙋйсѧ всепречⷭ҇таѧ. ра́дꙋйсѧ пала́то. ра́дꙋйсѧ бж҃е́ственное селе́нїе. ра́дꙋйсѧ чⷭ҇таѧ. ра́дꙋйсѧ мт҃и дв҃о. ра́дꙋйсѧ бг҃оневѣ́сто.
Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.
Ра́дꙋйсѧ, бг҃ома́ти пречⷭ҇таѧ. ра́дꙋйсѧ, вѣ́рныхъ наде́жде. ра́дꙋйсѧ, мі́ра ѡ҆чище́нїе. ра́дꙋйсѧ, всѧ́кїѧ ско́рби и҆збавлѧ́ющи рабы̑ твоѧ̑. ра́дꙋйсѧ, человѣ́кѡвъ ᲂу҆тѣше́нїе живоно́сное. ра́дꙋйсѧ, застꙋпле́нїе. ра́дꙋйсѧ, предсто́лпїе призыва́ющихъ тѧ̀. ра́дꙋйсѧ, бж҃їе бж҃е́ственное пребыва́нїе, и҆ горо̀ ст҃а́ѧ.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Ра́дꙋйсѧ бцⷣе, мт҃и хрⷭ҇то́ва. ра́дꙋйсѧ, є҆ди́на наде́жде, человѣ́кѡвъ застꙋпле́нїе. ра́дꙋйсѧ, прибѣ́жище. ра́дꙋйсѧ, свѣ́щниче свѣ́та свѣ́тлый. ра́дꙋйсѧ, свѣщѐ ѡ҆свѧще́ннаѧ. ра́дꙋйсѧ пала́то. ра́дꙋйсѧ раю̀. ра́дꙋйсѧ бж҃е́ственное селе́нїе. ра́дꙋйсѧ и҆сто́чниче, и҆сточа́ющь во́ды притека́ющымъ къ тебѣ̀.
Сла́ва, и҆ ны́нѣ, бг҃оро́диченъ догма́тїкъ:
Є҆гѡ́же нб҃о не вмѣстѝ, дв҃о бцⷣе, во чре́вѣ твое́мъ нетѣсномѣ́стнѡ вмѣсти́сѧ: и҆ пребыла̀ є҆сѝ чⷭ҇таѧ, сло́вомъ неизрече́ннымъ, ничи́мже дв҃ствꙋ ѡ҆скве́рншꙋсѧ. ты́ бо є҆ди́на была̀ є҆сѝ въ жена́хъ, и҆ мт҃и, и҆ дв҃а: и҆ ты̀ є҆ди́на пречⷭ҇таѧ, воздои́ла є҆сѝ сн҃а живода́вца, и҆ на ѡ҆б̾ѧ́тїѧхъ твои́хъ носи́ла є҆сѝ недре́млющее ѻ҆́ко: но не ѡ҆ста́ви нѣ́дра ѻ҆́ч҃а, ꙗ҆́коже пре́жде вѣ̑къ предбы́сть. но горѣ̀ ве́сь бг҃ъ со а҆́гг҃лы, до́лѣ ве́сь и҆з̾ тебѐ съ человѣ́ки, и҆ вездѣ̀ несказа́ннѡ. того̀ молѝ, всест҃а́ѧ влⷣчце сп҃сти́сѧ, правосла́внѡ бцⷣꙋ чⷭ҇тꙋю и҆сповѣ́дающымъ тѧ̀.
Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ: Тропа́рь воскрⷭ҇нъ. Сла́ва, и҆ ны́нѣ, бг҃оро́диченъ є҆гѡ̀, и҆ ѿпꙋ́стъ.
Въ сꙋббѡ́тꙋ на вели́цѣй вече́рни,
на Гдⷭ҇и воззва́хъ, поста́вимъ стїхѡ́въ і҃, и҆ пое́мъ стїхи̑ры воскрⷭ҇ны, гла́съ и҃:
Сті́хъ: И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀.
Вече́рнюю пѣ́снь, и҆ слове́снꙋю слꙋ́жбꙋ, тебѣ̀ хрⷭ҇тѐ прино́симъ: ꙗ҆́кѡ бл҃говоли́лъ є҆сѝ поми́ловати на́съ воскрⷭ҇нїемъ.
Сті́хъ: Менѐ ждꙋ́тъ пра́вєдницы, до́ндеже возда́си мнѣ̀.
Гдⷭ҇и, гдⷭ҇и, не ѿве́ржи на́съ ѿ твоегѡ̀ лица̀: но бл҃говолѝ поми́ловати на́съ воскрⷭ҇нїемъ.
Сті́хъ: И҆з̾ глꙋбины̀ воззва́хъ къ тебѣ̀ гдⷭ҇и, гдⷭ҇и, ᲂу҆слы́ши гла́съ мо́й.
Ра́дꙋйсѧ, сїѡ́не ст҃ы́й, мт҃и цр҃кве́й, бж҃їе жили́ще, ты́ бо прїѧ́лъ є҆сѝ пе́рвый, ѡ҆ставле́нїе грѣхѡ́въ, воскрⷭ҇нїемъ.
И҆́ны стїхи̑ры а҆натѡ́лїевы, гла́съ то́йже.
Сті́хъ: Да бꙋ́дꙋтъ ᲂу҆́ши твоѝ, вне́млющѣ гла́сꙋ моле́нїѧ моегѡ̀.
Є҆́же ѿ бг҃а ѻ҆ц҃а̀ сло́во, пре́жде вѣ̑къ ро́ждшеесѧ, въ послѣ̑днѧѧ же времена̀, то́ежде ѿ неискꙋсобра́чныѧ вопло́щшеесѧ во́лею, распѧ́тїе сме́ртное претерпѣ̀: и҆ дре́вле ᲂу҆мерщвле́ннаго человѣ́ка сп҃сѐ свои́мъ воскрⷭ҇нїемъ.
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Є҆́же и҆з̾ ме́ртвыхъ твоѐ воскрⷭ҇нїе славосло́вимъ хрⷭ҇тѐ, и҆́мже свободи́лъ є҆сѝ а҆да́мскїй ро́дъ ѿ а҆́дова мꙋчи́тельства: и҆ дарова́лъ є҆сѝ мі́рови ꙗ҆́кѡ бг҃ъ жи́знь вѣ́чнꙋю, и҆ ве́лїю млⷭ҇ть.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Сла́ва тебѣ̀ хрⷭ҇тѐ сп҃се, сн҃е бж҃їй є҆диноро́дный, пригвозди́выйсѧ на крⷭ҇тѣ̀, и҆ воскр҃сы́й и҆з̾ гро́ба тридне́венъ.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Тебѐ сла́вимъ гдⷭ҇и, во́лею на́съ ра́ди крⷭ҇тъ претерпѣ́вшаго, и҆ тебѣ̀ покланѧ́емсѧ всеси́льне сп҃се: не ѿве́ржи на́съ ѿ лица̀ твоегѡ̀, но ᲂу҆слы́ши и҆ сп҃си́ ны воскрⷭ҇нїемъ твои́мъ, чл҃вѣколю́бче.
И҆́ны стїхи̑ры бцⷣѣ, па́ѵла а҆мморре́йскагѡ. Гла́съ д҃:
Подо́бенъ: Ꙗ҆́кѡ до́блѧ:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
А҆́гг҃льстїи чи́нове тѧ̀ бг҃омт҃и сла́вѧтъ: бг҃а бо пречⷭ҇таѧ родила̀ є҆сѝ, и҆́же со ѻ҆ц҃е́мъ и҆ дх҃омъ присносꙋ́щнаго, и҆ а҆́гг҃льскаѧ вѡ́инства, ѿ не сꙋ́щихъ хотѣ́нїемъ соста́вльшаго. є҆го́же молѝ, сп҃стѝ и҆ просвѣти́ти дꙋ́шы, и҆̀же правосла́внѡ ꙗ҆́кѡ бцⷣꙋ воспѣва́ющихъ тѧ̀.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Ꙗ҆́кѡ и҆сто́чникъ ѡ҆сщ҃е́нїѧ, ковче́гъ же всезлаты́й, бж҃е́ственнымъ дх҃омъ ѡ҆зарѧ́емь, молю̀ и҆ припа́даю: страсте́мъ пре́даннꙋю и҆ ѻ҆каѧ́ннꙋю мою̀ дꙋ́шꙋ просвѣтѝ влⷣчце, и҆збавлѧ́ющи мѧ̀ го́рькагѡ мꙋчи́тельства бѣсо́вскагѡ, и҆ пꙋ́ть мнѣ̀ сп҃се́нїѧ подаю́щи непреткнове́ненъ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Прⷭ҇то́ли є҆гда̀ поста́вѧтсѧ, и҆ кни̑ги разгнꙋ́тсѧ, и҆ дѣла̀ ѡ҆блича́тсѧ, и҆ всѧ́къ ко́ждо предста́нетъ ѡ҆бремене́нъ и҆ ѡ҆бнаже́нъ, ве́сь трепе́щѧ негодова́нїѧ бж҃їѧ, и҆ пра́веднагѡ тогѡ̀ ѿвѣща́нїѧ: тогда̀ мѧ̀ пощадѝ влⷣчце, и҆ всѧ́кагѡ сꙋда̀ и҆схитѝ, всѧ́ческихъ томле́нїй сꙋ́щаго вино́вна.
Сла́ва, и҆ ны́нѣ, бг҃оро́диченъ: Цр҃ь нбⷭ҇ный за чл҃вѣколю́бїе на землѝ ꙗ҆ви́сѧ, и҆ съ человѣ́ки поживѐ: ѿ дв҃ы бо чⷭ҇тыѧ пло́ть прїе́мый, и҆ и҆з̾ неѧ̀ проше́дый съ воспрїѧ́тїемъ: є҆ди́нъ є҆́сть сн҃ъ, сꙋгꙋ́бъ є҆стество́мъ, но не ѵ҆поста́сїю. тѣ́мже соверше́нна того̀ бг҃а, и҆ соверше́нна чл҃вѣ́ка вои́стиннꙋ проповѣ́дающе, и҆сповѣ́дꙋемъ хрⷭ҇та̀ бг҃а на́шего: є҆го́же молѝ мт҃и безневѣ́стнаѧ, поми́ловатисѧ дꙋша́мъ на́шымъ.
Вхо́дъ. Свѣ́те ти́хїй: Прокі́менъ днѐ: Гдⷭ҇ь воцр҃и́сѧ: и҆ про́чее по ѻ҆бы́чаю.
На стїхо́внѣ стїхи̑ры воскрⷭ҇ны, гла́съ и҃:
Возше́лъ є҆сѝ на крⷭ҇тъ і҆и҃се, снизше́дый съ нб҃сѐ: прише́лъ є҆сѝ на сме́рть животѐ безсме́ртный, къ сꙋ́щымъ во тьмѣ̀ свѣ́тъ и҆́стинный: къ па́дшымъ всѣ́хъ воскрⷭ҇нїе, просвѣще́нїе, и҆ сп҃се на́шъ, сла́ва тебѣ̀.
И҆́ны стїхи̑ры, по а҆лфави́тꙋ.
Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Хрⷭ҇та̀ славосло́вимъ, воскрⷭ҇шаго ѿ ме́ртвыхъ: дꙋ́шꙋ бо и҆ тѣ́ло прїе́мъ, стра̑сти ѿѻбою́дꙋ ѿсѣчѐ, пречⷭ҇тѣй ᲂу҆́бѡ дш҃ѝ во а҆́дъ соше́дшей, є҆го́же и҆ плѣнѝ: во гро́бѣ же и҆стлѣ́нїѧ не ви́дѣ ст҃о́е тѣ́ло, и҆зба́вителѧ дꙋ́шъ на́шихъ.
Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ.
Ѱалмы̀ и҆ пѣ́сньми славосло́вимъ хрⷭ҇тѐ, ѿ ме́ртвыхъ твоѐ воскрⷭ҇нїе: и҆́мже на́съ свободи́лъ є҆сѝ мꙋчи́тельства а҆́дова, и҆ ꙗ҆́кѡ бг҃ъ дарова́лъ є҆сѝ жи́знь вѣ́чнꙋю, и҆ ве́лїю млⷭ҇ть.
Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.
Ѽ влⷣко всѣ́хъ непостижи́ме, тво́рче нб҃сѐ и҆ землѝ, крⷭ҇то́мъ пострада́вый, мнѣ̀ безстра́стїе и҆сточи́лъ є҆сѝ: погребе́нїе же прїе́мъ, и҆ воскр҃съ во сла́вѣ, совоскр҃си́лъ є҆сѝ а҆да́ма рꙋко́ю всеси́льною. сла́ва твоемꙋ̀ тридне́вномꙋ воста́нїю, и҆́мже дарова́лъ є҆сѝ на́мъ вѣ́чнꙋю жи́знь, и҆ ѡ҆чище́нїе грѣхѡ́въ, ꙗ҆́кѡ є҆ди́нъ бл҃гоꙋтро́бенъ.
Сла́ва, и҆ ны́нѣ, бг҃оро́диченъ: Безневѣ́стнаѧ дв҃о, ꙗ҆́же бг҃а неизрече́ннѡ заче́нши пло́тїю, мт҃и бг҃а вы́шнѧгѡ, твои́хъ рабѡ́въ мольбы̑ прїимѝ всенепоро́чнаѧ, всѣ̑мъ подаю́щи ѡ҆чище́нїе прегрѣше́нїй: ны́нѣ на̑ша молє́нїѧ прїе́млющи, молѝ сп҃сти́сѧ всѣ̑мъ на́мъ.
Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ:
Тропа́рьвоскрⷭ҇нъ, гла́съ и҃:
Съ высоты̀ снизше́лъ є҆сѝ бл҃гоꙋтро́бне, погребе́нїе прїѧ́лъ є҆сѝ тридне́вное, да на́съ свободи́ши страсте́й, животѐ и҆ воскрⷭ҇нїе на́ше, гдⷭ҇и сла́ва тебѣ̀.
Сла́ва, и҆ ны́нѣ, бг҃оро́диченъ: И҆́же на́съ ра́ди рожде́йсѧ ѿ дв҃ы, и҆ распѧ́тїе претерпѣ́въ бл҃гі́й, и҆спрове́ргїй сме́ртїю сме́рть, и҆ воскрⷭ҇нїе ꙗ҆вле́й ꙗ҆́кѡ бг҃ъ, не пре́зри ꙗ҆̀же созда́лъ є҆сѝ рꙋко́ю твое́ю: ꙗ҆вѝ чл҃вѣколю́бїе твоѐ млⷭ҇тиве, прїимѝ ро́ждшꙋю тѧ̀ бцⷣꙋ молѧ́щꙋюсѧ за ны̀: и҆ сп҃сѝ сп҃се на́шъ, лю́ди ѿча̑ѧнныѧ.
Та́же, и҆ ѿпꙋ́стъ.
Въ сꙋббѡ́тꙋ на повече́рїи,
канѡ́нъ моле́бный прест҃ѣ́й бцⷣѣ. Гла́съ и҃:
Пѣ́снь а҃
І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Припѣ́въ: Прест҃а́ѧ бцⷣе, сп҃сѝ на́съ.
Прїиди́те та́йнѡ бра́тїе, ꙗ҆́кѡ ѿ нача́ла ст҃ѣ́й бцⷣѣ, внесе́мъ вѣ́рнїи пѣ́снь но́вꙋ, дне́сь похвалѧ́юще вели̑чїѧ є҆ѧ̀.
Дре́вле бг҃овидѣ́нїемъ мѡѷсе́й ѡ҆зари́всѧ ᲂу҆мо́мъ, твоемꙋ̀ ꙗ҆́снѡ наꙋча́шесѧ чⷭ҇таѧ, бг҃олѣ́пномꙋ зача́тїю, па́че є҆стества̀ дв҃о, ꙗ҆́вльшꙋсѧ є҆мꙋ̀ въ кꙋпинѣ̀ садꙋ̀.
Сла́ва: Тебѣ̀ предлага́ю сердє́чнаѧ дѣѧ̑нїѧ, и҆ прїѧ́тнѡ подаю̀ писа́нїе, бли́зъ сꙋ́щїй бж҃е́ственный застꙋпле́нїѧ кро́въ, ко влⷣцѣ хрⷭ҇тꙋ̀ тебѐ предложи́въ.
И҆ ны́нѣ: Приклони́ ми ᲂу҆́хо твоѐ чⷭ҇таѧ, правосла́вною вѣ́рою, въ сѣ́ни лица̀ твоегѡ̀, че́стнѡ любо́вїю тѝ притека́ющемꙋ, и҆ стра́хомъ покланѧ́ющꙋсѧ, моле́бный мо́й гла́съ ᲂу҆слы́ши.
Пѣ́снь г҃
І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и: ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Лѣ́ствица дре́вле патрїа́рхова тѧ̀ проѡбража́ше, пренепоро́чнаѧ: а҆́гг҃льско во ꙗ҆влѧ́ше сни́тїе бж҃їе къ на́мъ, бж҃е́ственное соше́ствїе во ᲂу҆тро́бѣ твое́й.
І҆ꙋ́дово колѣ́но всели́сѧ, ю҆́же і҆а́кѡвъ проречѐ, ѿ колѣ́на є҆гѡ̀ прорасти́ти и҆збавле́нїе, і҆и҃са хрⷭ҇та̀: є҆го́же ты̀ ро́ждши пречⷭ҇таѧ, просла́виласѧ є҆сѝ.
Сла́ва: Грѣхмѝ ѿча́ѧнъ, ѡ҆брѣто́хъ тѧ̀ приста́нище сп҃се́нїѧ пречⷭ҇таѧ бцⷣе, ᲂу҆пова́нїе на́ше и҆ по́моще: тѣ́мже мѧ̀ къ покаѧ́нїю наста́ви.
И҆ ны́нѣ: Бли́зъ тѧ̀ сꙋ́щꙋ влⷣки и҆́мамъ, пресла́внаѧ влⷣчце, дѣѧ́нїй мои́хъ кни́гꙋ возложи́хъ на тѧ̀ вѣ́рою: не премолчѝ ᲂу҆ще́дрити мѧ̀.
Пѣ́снь д҃
І҆рмо́съ: И҆з̾ горы̀ прїѡсѣне́нныѧ сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.
Ты̀ ꙗ҆́кѡ мони́сты златы́ми ѡ҆дѣ́ѧна невѣ́ста ѻ҆́ч҃а, бл҃года́ть прїе́мши, ᲂу҆кра́шшисѧ добро́тою дѣ́вства, мт҃и ꙗ҆ви́ласѧ є҆сѝ сн҃а бж҃їѧ.
Тѧ̀ и҆́стинный сїѡ́нъ, хрⷭ҇то́съ сло́во, и҆зво́ли себѣ̀ въ бж҃е́ственное селе́нїе, ꙗ҆́кѡ и҆збра́ннꙋ и҆збра́въ бцⷣе, на ѡ҆бновле́нїе всегѡ̀ мі́ра.
Сла́ва: Ра́дꙋйсѧ, кра́снаѧ пала́то сло́ва, дѣ́вственный черто́же цр҃ѧ̀: ра́дꙋйсѧ, похвало̀ всѣ́хъ безпло́тныхъ: ра́дꙋйсѧ, человѣ́кѡвъ по́моще.
И҆ ны́нѣ: Оу҆далѧ́ютсѧ ѿ бг҃а, тѣ́мже и҆ погиба́ютъ, ѿмета́ющїи ѡ҆́бразы сн҃а твоегѡ̀, мт҃и бж҃їѧ дв҃о бцⷣе: и҆́миже сп҃са́ютсѧ чтꙋ́щїи тѧ̀.
Пѣ́снь є҃
І҆рмо́съ: Мра́къ дꙋшѝ моеѧ̀ разженѝ свѣтода́вче хрⷭ҇тѐ бж҃е, началоро́днꙋю тьмꙋ̀ и҆згна́въ бе́здны: и҆ да́рꙋй мѝ свѣ́тъ повелѣ́нїй твои́хъ сло́ве, да ᲂу҆́тренюѧ сла́влю тѧ̀.
Съ бж҃е́ственнымъ соше́дшесѧ гаврїи́ломъ, возопїи́мъ бцⷣѣ вѣ́рнѡ: ра́дꙋйсѧ дв҃о ст҃а́ѧ, бл҃года́тнаѧ, гдⷭ҇ь съ тобо́ю, и҆́же тебѐ ра́ди потреби́въ печа́ль, подадѐ ра́дованїе.
Пречⷭ҇тое твоѐ чре́во гедеѡ́нъ ви́дѣ дв҃о чⷭ҇таѧ, въ не́же ꙗ҆́кѡ до́ждь сло́во соше́дъ, воплоти́сѧ бж҃е́ственнымъ дх҃омъ, ѻ҆́ч҃а неразлꙋ́ченъ сы́й бж҃ества̀.
Сла́ва: Помо́щница мі́ра, и҆ застꙋ́пница є҆сѝ человѣ́кѡвъ грѣ́шныхъ, бг҃ороди́тельнице дв҃о: и҆ вѣ́рою и҆ любо́вїю прибѣга́ющымъ къ тебѣ̀, премѣне́нїе сп҃си́тельное, и҆ рѣши́ло прегрѣше́нїй мно́гихъ.
И҆ ны́нѣ: Прорасти́ла є҆сѝ без̾ сѣ́мене, и҆́же пре́жде всѧ́кїѧ тва́ри, прозѧбе́нїе сн҃а ѻ҆́ч҃а, безлѣ́тно же и҆ безнача́льно, дх҃омъ бж҃е́ственнымъ, бг҃ороди́тельнице чⷭ҇таѧ: є҆гѡ́же подо́бїе ви́да всѝ почита́емъ.
Пѣ́снь ѕ҃
І҆рмо́съ: Содержи́ма мѧ̀ прїимѝ чл҃вѣколю́бче, грѣхѝ мно́гими, и҆ припа́дающа щедро́тамъ твои̑мъ, ꙗ҆́кѡ прⷪ҇ро́ка гдⷭ҇и, и҆ сп҃си́ мѧ.
Дв҃ства тѧ̀ зерца́ло сꙋ́що, и҆ прїѧ́телище чи́сто бж҃ества̀ восхвалѧ́емъ, дв҃о неискꙋсобра́чнаѧ, пѣ́сньми.
Бг҃ъ во ᲂу҆тро́бѣ твое́й воплоти́сѧ, безстра́стнѡ и҆ ᲂу҆жа́снѡ бг҃оневѣ́сто, ꙗ҆́коже въ сви́тцѣ но́вѣ пи́санъ пе́рстомъ ѻ҆́ч҃имъ.
Сла́ва: Ѡ҆чище́нїе и҆́мамы покро́въ тво́й, и҆ и҆звѣ́стнꙋю наде́ждꙋ и҆ застꙋпле́нїе, дв҃о чⷭ҇таѧ: не посрамѝ влⷣчце рабы̑ твоѧ̑.
И҆ ны́нѣ: Страсте́й неꙋста́вное бѣше́нїе, предста́нїемъ твои́мъ бг҃оневѣ́сто, ᲂу҆ста́ви въ тишинꙋ̀: и҆ ко приста́нищꙋ наста́ви на́съ тишины̀.
Та́же: Гдⷭ҇и поми́лꙋй, три́жды. Сла́ва, и҆ ны́нѣ:
Конда́къ,гла́съ и҃:
Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: ра́дꙋйсѧ невѣ́сто неневѣ́стнаѧ.
Пѣ́снь з҃
І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Ра́дости на́шеѧ хода́таица ꙗ҆ви́ласѧ є҆сѝ дв҃о, и҆ бл҃года́ти приносѧ́ще вѣне́цъ любо́вїю, ра́дꙋйсѧ, вопїе́мъ тѝ, бл҃гослове́ннаѧ чⷭ҇таѧ, похвалѧ́юще.
Гора̀ ст҃а́ѧ є҆сѝ бж҃їѧ прїѡсѣне́ннаѧ, гора̀ тꙋ́чна пренепоро́чнаѧ: гора̀ ᲂу҆сыре́нна бж҃е́ственными сїѧ́нїи: гора̀, въ не́йже бг҃ъ бл҃говолѝ жи́ти.
Сла́ва: Побѣжда́ѧй бл҃года́ть твою̀ нѣ́сть грѣ́хъ, мт҃рне бо дерзнове́нїе и҆ во́лю и҆́маши, и҆ рѣши́ши прегрѣшє́нїѧ мл҃твами твои́ми, и҆ прево́диши всѧ̑ стремлє́нїѧ.
И҆ ны́нѣ: Ѿ трⷪ҇цы родила̀ є҆сѝ є҆ди́наго, бцⷣе, бы́вша непрело́жна плотски́мъ соедине́нїемъ, сꙋгꙋ́ба сꙋ́ща є҆стество́мъ: є҆го́же ви́да ѡ҆́бразъ почита́емъ.
Пѣ́снь и҃
І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Кади́льница ꙗ҆ви́ласѧ є҆сѝ прⷪ҇ро́кꙋ, бж҃е́ственнагѡ ᲂу҆́глѧ сꙋ́щи, грѣхѝ ѿе́млющагѡ, бцⷣе дв҃о мт҃и бг҃а на́шегѡ.
Данїи́лъ прови́дѣ тѧ̀ го́рꙋ ве́лїю, бцⷣе дв҃о: и҆з̾ неѧ́же честны́й ка́мень хрⷭ҇то́съ, пло́тїю ѡ҆блече́сѧ, и҆ ле́сти низложѝ і҆́дѡльскїѧ хра́мы.
Сла́ва: Вели́кїй ки́тъ и҆́щетъ пожре́ти мѧ̀, лю́тагѡ грѣха̀ и҆ страсте́й мои́хъ ѿча́ѧнїѧ: но предварѝ и҆ сп҃сѝ раба̀ твоего̀ влⷣчце.
И҆ ны́нѣ: И҆́же тобо́ю бесѣ́довавый къ человѣ́кѡмъ, бг҃ъ сы́й всѧ́ческихъ, зра́къ человѣ́ка воспрїѧ́тъ: є҆гѡ́же взо́ръ почита́емъ дв҃о, въ писа́нїихъ.
Пѣ́снь ѳ҃
І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ сп҃се́ннїи тобо́ю дв҃о чⷭ҇таѧ, съ безпло́тными ли́ки тѧ̀ велича́юще.
Вертогра́дъ затворе́нъ тѧ̀ дв҃о бцⷣе, и҆ запеча́танъ и҆сто́чникъ дх҃омъ бж҃е́ственнымъ, премꙋ́дрый въ пѣ́снехъ пое́тъ: тѣ́мже ꙗ҆́кѡ са́дъ жи́зни, воплоща́етсѧ хрⷭ҇то́съ.
Твоегѡ̀ неска́заннагѡ ржⷭ҇тва̀ прописꙋ́ѧ прⷪ҇ро́къ, кни́гꙋ запеча́танꙋ прови́дѣ, є҆ѧ́же никто́же та́инство разꙋмѣ̀, вочеловѣ́ченїѧ ржⷭ҇тва̀ твоегѡ̀.
Сла́ва: Тебѣ̀ во ᲂу҆миле́нїи дꙋшѝ мо́лимсѧ всѝ: не пре́зри влⷣчце на́шѧ мольбы̑, но бꙋ́ди бл҃гоꙋвѣ́тливъ на́мъ покро́въ, и҆ мл҃твꙋ на́шꙋ ᲂу҆слы́ши.
И҆ ны́нѣ: Твоемꙋ̀ и҆ сн҃а твоегѡ̀ припа́даю ѡ҆бразѡ́мъ: и҆ сомнѧ́щихсѧ почита́ти, ꙗ҆́кѡ ма́нентовы лжы̀ ѿмета́ю, бцⷣе дв҃о: тѣ́мже правосла́внѡ пѣ́снь скончава́ю.
Та́же, досто́йно є҆́сть: Трист҃о́е. И҆ по Ѻ҆́ч҃е на́шъ: конда́къ, и҆ про́чее по ѻ҆бы́чаю, и҆ ѿпꙋ́стъ.
Въ недѣ́лю ᲂу҆́тра, на полꙋ́нощницѣ,
канѡ́нъ прест҃ѣ́й и҆ живонача́льнѣй трⷪ҇цѣ, [є҆го́же краестро́чїе: Трⷪ҇це є҆ди́нице, сп҃си́ мѧ твоего̀ раба̀.] Творе́нїе митрофа́ново. Гла́съ и҃:
Пѣ́снь а҃
І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀ пѣшехо́дца сп҃сѐ, пѣ́снь бг҃ови воспѣва́юща.
Припѣ́въ: Прест҃а́ѧ трⷪ҇це, бж҃е на́шъ, сла́ва тебѣ̀.
Трисо́лнечномꙋ цр҃ю̀, и҆ строи́телю, и҆ промысли́телю всѧ́ческихъ, и҆ бл҃го́мꙋ є҆ди́номꙋ, є҆сте́ственнѣ сꙋ́щемꙋ, и҆ є҆ди́нственнꙋю и҆мꙋ́щемꙋ бж҃ества̀ сла́вꙋ, бг҃ꙋ є҆динонача́льномꙋ припа́даемъ, пѣ́снь трист҃ꙋ́ю пою́ще.
Течє́нїѧ бж҃е́ствєннаѧ, и҆ прⷪ҇ро́чєствїѧ ꙗ҆̀же свы́ше по́мнѧще ꙗ҆́вѣ, бг҃онача́льное є҆стество̀ є҆ди́нственное сла́вимъ, присносꙋ́щное, собезнача́льное, въ трїе́хъ ли́цѣхъ, ѻ҆ц҃ѣ̀, и҆ сн҃ѣ, и҆ дс҃ѣ, содѣ́тельное, всеси́льное.
Сщ҃еннотаи́нникъ а҆враа́мъ бы́въ, сщ҃енноѡбра́знѡ дре́вле, творца̀ всѣ́хъ и҆ бг҃а и҆ гдⷭ҇а, въ трїе́хъ ᲂу҆́бѡ ѵ҆поста́сехъ прїѧ́тъ ра́дꙋѧсѧ, и҆ тре́хъ ѵ҆поста́сей держа́вꙋ є҆ди́нственнꙋю позна̀.
Бг҃оро́диченъ: Неискꙋсобра́чнѡ хрⷭ҇та̀ родила̀ є҆сѝ, є҆́же по на́мъ, на́съ ра́ди воспрїе́мша є҆стество̀ пречⷭ҇таѧ, и҆ непрело́жна по ѻ҆бою̀ пребы́вша. є҆го́же молѝ непреста́ннѡ, грѣхѡ́въ мѝ дарова́ти и҆ и҆скꙋше́нїй и҆збавле́нїе.
Пѣ́снь г҃
І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀ хрⷭ҇тѐ ꙾за́повѣдей твои́хъ꙾[[цр҃кве]] ᲂу҆твердѝ, ꙗ҆́кѡ нѣ́сть ст҃ъ па́че тебѐ, є҆ди́не чл҃вѣколю́бче.
Тебѐ непристꙋ́пнаго бг҃а и҆ цр҃ѧ̀ сла́вы на прⷭ҇то́лѣ и҆са́їа ви́дѣ высо́цѣ, и҆ херꙋві́мы и҆ серафі́мы сла́вѧщыѧ непреста́нными пѣ́сньми, є҆ди́нственнаго трїѷпоста́снаго.
Є҆ди́наго ѿ ѻ҆ц҃а̀ ꙗ҆́кѡ ѿ ᲂу҆ма̀ рожде́наго сло́ва, и҆ дх҃а происходѧ́ща неизглаго́ланнѡ, по коемꙋ́ждо помышле́нїи, и҆ кни́жными ᲂу҆че́нїи пости́гше, є҆ди́наго бг҃а трисо́лнечнаго почита́емъ.
И҆́же сы́й нерожде́нный ѻ҆ц҃ъ, и҆ своегѡ̀ сꙋщества̀ сїѧ́нїе роди́въ нетлѣ́ннѡ сн҃а, свѣ́тъ ѿ свѣ́та: и҆схо́днѣ предлага́етъ сра́сленный свѣ́тъ дх҃а, вседѣ́тельна, и҆ є҆диноче́стна.
Бг҃оро́диченъ: Хра́мъ ꙗ҆ви́ласѧ є҆сѝ чи́стъ, дв҃о мт҃и мр҃і́е, всѧ̑ всеси́льнѡ и҆ премꙋ́дрѡ соста́вльшемꙋ хрⷭ҇тꙋ̀, и҆ въ чи́нѣ поло́жшемꙋ и҆ носѧ́щемꙋ: є҆го́же млⷭ҇тива мѝ сотворѝ мт҃рними твои́ми мл҃твами.
Гдⷭ҇и поми́лꙋй, три́жды.
Та́же, сѣда́ленъ, гла́съ и҃: Подо́бенъ: Повеле́нное та́йнѡ:
Трисо́лнечнагѡ и҆ честна́гѡ бг҃онача́лїѧ си́лꙋ вѣ́рнїи ны́нѣ восхва́лимъ, ꙗ҆́кѡ ма́нїемъ то́кмѡ всѧ̑ соста́вилъ вы̑шнѧѧ ликостоѧ̑нїѧ а҆́гг҃льскаѧ, и҆ ни̑жнѧѧ сщ҃еннонача̑лїѧ цр҃кѡ́внаѧ, є҆́же взыва́ти: ст҃ъ, ст҃ъ, ст҃ъ є҆сѝ бж҃е пребл҃гі́й: сла́ва и҆ пѣ́нїе держа́вѣ твое́й.
Сла́ва, и҆ ны́нѣ, бг҃оро́диченъ: Ꙗ҆́же непремѣ́ннаго бг҃а поро́ждшаѧ, премѣнѧ́емое при́снѡ се́рдце моѐ грѣхо́мъ и҆ лѣ́ностїю, прило́гми льсти́вагѡ, ᲂу҆твердѝ бл҃га́ѧ мл҃твами мт҃рними твои́ми: ꙗ҆́кѡ да и҆ а҆́зъ бл҃года́рнѡ сла́влю тѧ̀ бг҃ороди́тельнице мр҃і́е, поми́лꙋй ста́до твоѐ, є҆́же стѧжа́ла є҆сѝ, всенепоро́чнаѧ.
Пѣ́снь д҃
І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва чл҃вѣколю́бче.
Восто́къ ꙗ҆́вльшисѧ бж҃ества̀ сꙋ́щымъ во тьмѣ̀, всю̀ разгна̀ несвѣ́тлꙋю но́щь страсте́й: и҆ пра́вды сл҃нце возсїѧ̀, про́сто ᲂу҆́бѡ по сꙋществꙋ̀, трисїѧ́нно же ли́цы: є҆́же пое́мъ при́снѡ, и҆ сла́вимъ.
Серафі́мскими ᲂу҆сты̀ воспѣва́емаго, бре́нными ᲂу҆стна́ми сла́вимъ є҆ди́нственнаго, и҆ трⷪ҇чнаго гдⷭ҇а сла́вы, є҆стество́мъ и҆ ѵ҆поста́сьми, вопїю́ще: ѽ всецр҃ю̀, твои̑мъ рабѡ́мъ пода́ждь разли́чныхъ прегрѣше́нїй проще́нїе!
Содержи́тельнаѧ всѣ́хъ сꙋ́щихъ, неви́димаѧ, всеще́драѧ, бл҃гоꙋтро́бнаѧ, чл҃вѣколюби́ваѧ трⷪ҇це чⷭ҇тна́ѧ, и҆ бг҃онача́льнаѧ, не забꙋ́ди менѐ твоегѡ̀ раба̀ въ коне́цъ: нижѐ разорѝ и҆́же завѣща́лъ є҆сѝ твои̑мъ рабѡ́мъ завѣ́тъ, за неизрече́ннꙋю млⷭ҇ть.
Бг҃оро́диченъ: Кра́снꙋю тѧ̀ всечⷭ҇таѧ, є҆ди́нꙋ ѡ҆брѣ́тъ ѿ вѣ́ка добро́тꙋ і҆а́кѡвлю, пребезнача́льное сло́во, и҆ всели́сѧ въ тѧ̀ бл҃гоꙋтро́бїѧ ра́ди, ѡ҆бновѝ человѣ́ческое є҆стество̀: є҆го́же молѝ непреста́ннѡ, ѿ всѧ́кїѧ мнѣ̀ и҆зба́витисѧ ско́рби.
Пѣ́снь є҃
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго: но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Соприсносꙋ́щнаѧ трѝ ли́ца сла́вимъ, є҆ди́наго же гдⷭ҇а, тѧ̀ бж҃е́ственное є҆стество̀, раздѣлѧ́юще про́стѡ, и҆ совокꙋплѧ́юще, и҆ вѣ́рнѡ вопїе́мъ: бг҃онача́льнаѧ трⷪ҇це ст҃а́ѧ, твоѧ̑ рабы̑ ѿ ско́рби и҆зба́ви.
Рыда́ю ѕѣ́льнѣ за не́мощь мы́сли моеѧ̀, ка́кѡ не хотѧ̀ страждꙋ̀ нево́льное вои́стиннꙋ и҆змѣне́нїе; сегѡ̀ ра́ди зовꙋ̀: живонача́льнаѧ трⷪ҇це ст҃а́ѧ, до́брыхъ въ стоѧ́нїи мѧ̀ ᲂу҆чинѝ.
Дрема́нїемъ ѡ҆тѧгче́на мѧ̀ грѣхо́внымъ, и҆ порѣва́ема въ со́нъ сме́ртный, ꙗ҆́кѡ чл҃вѣколюби́ваѧ и҆ пребл҃га́ѧ, и҆ всемлⷭ҇тиваѧ, бг҃онача́льнаѧ трⷪ҇це ст҃а́ѧ, ᲂу҆ще́дри и҆ возста́ви мѧ̀.
Бг҃оро́диченъ: Мт҃и дв҃о ѻ҆трокови́це, пречⷭ҇таѧ, всенепоро́чнаѧ, бг҃обл҃года́тнаѧ, твои́ми мл҃твами сн҃а и҆ бг҃а твоего̀ и҆ гдⷭ҇а млⷭ҇тива сотворѝ мнѣ̀: и҆ страсте́й, и҆ прегрѣше́нїй твоего̀ раба̀ и҆зба́ви вско́рѣ.
Пѣ́снь ѕ҃
І҆рмо́съ: Ѡ҆чи́сти мѧ̀ сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
Нбⷭ҇ныхъ ᲂу҆мѡ́въ чинонача̑лїѧ подража́юще, є҆динонача́льнаѧ всѣ́хъ трⷪ҇це пресꙋ́щественнаѧ, трист҃ы́ми пѣ́сньми тѧ̀ славосло́вимъ, бре́нными на́шими ᲂу҆сты̀.
И҆́же по ѡ҆́бразꙋ твоемꙋ̀ человѣ́ка созда́вшемꙋ, и҆ ѿ не сꙋ́щихъ всѐ премꙋ́дрѡ соста́вльшемꙋ, бг҃ꙋ трїѷпоста́сномꙋ покланѧ́юсѧ, и҆ чтꙋ̀, и҆ пою̀, и҆ велича́ю тѧ̀.
Вседержи́телю бж҃е, и҆ є҆ди́не неѡпредѣле́нный, всели́сѧ въ мѧ̀ за неизрече́ннꙋю млⷭ҇ть, трисо́лнечный влⷣко: и҆ ѡ҆зари́ мѧ, и҆ вразꙋмѝ, ꙗ҆́кѡ бл҃гоꙋтро́бенъ.
Бг҃оро́диченъ: Хра́мъ ꙗ҆ви́ласѧ є҆сѝ бг҃а невмѣсти́магѡ пречⷭ҇таѧ, хра́мъ и҆ менѐ тогѡ̀ покажѝ, бж҃е́ственныѧ бл҃года́ти прест҃а́ѧ влⷣчце, твои́ми мольба́ми, и҆ соблюдѝ невреди́ма.
Гдⷭ҇и поми́лꙋй, три́жды.
Сѣда́ленъ,гла́съ и҃: Подо́бенъ: Повелѣ́нное та́йнѡ:
Ѻ҆ц҃а̀ безнача́льна вѣ́рнїи, сн҃а собезнача́льна, и҆ дх҃а бж҃е́ственнаго вои́стиннꙋ пѣсносло́вимъ, неслїѧ́ннѣ, непревра́тнѣ и҆ неизмѣ́ннѣ, трⷪ҇цꙋ про́стꙋ, и҆ ст҃ꙋ, и҆ сра́сленꙋ, вопїю́ще со а҆́гг҃лы: ст҃ъ є҆сѝ ѻ҆́ч҃е, сн҃е, со дх҃омъ прест҃ы́мъ и҆ чⷭ҇тны́мъ. поми́лꙋй, ꙗ҆̀же созда́лъ є҆сѝ по ѡ҆́бразꙋ твоемꙋ̀, влⷣко.
Сла́ва, и҆ ны́нѣ, бг҃оро́диченъ: Бл҃годари́мъ тѧ̀ при́снѡ бцⷣе, и҆ велича́емъ чⷭ҇таѧ, и҆ покланѧ́емсѧ, воспѣва́юще ржⷭ҇тво̀ твоѐ бл҃года́тнаѧ, вопїю́ще непреста́ннѡ: сп҃сѝ на́съ дв҃о премлⷭ҇тиваѧ, ꙗ҆́кѡ бл҃га́ѧ въ ча́съ и҆спыта́нїѧ, да не посра́млени бꙋ́демъ рабѝ твоѝ.
Пѣ́снь з҃
І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Премꙋ́дростїю неизглаго́ланною твое́ю, и҆ пꙋчи́ною бл҃госты́ни, тꙋ́не твоего̀ раба̀ поми́лованна покажи́ мѧ: и҆ ны́нѣ, ꙗ҆́коже дре́вле, и҆зба́ви ѡ҆ѕлобле́нїѧ, трⷪ҇це є҆ди́нице бж҃е, грѣхѡ́въ и҆ страсте́й. [Два́жды.]
Оу҆́мъ нерожде́нный ѻ҆ц҃ъ, и҆ сло́во ро́ждшеесѧ ѿ негѡ̀, и҆ дх҃ъ бж҃е́ственный, непости́жнѣ и҆схо́денъ сы́й, бж҃е є҆динонача́льне, трисо́лнечне, пою̀ тебѣ̀: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ: Оу҆мерщвле́нъ бы́хъ пречⷭ҇таѧ, грѣхо́внымъ ꙗ҆́домъ напое́нъ, и҆ притека́ю къ тебѣ̀ вѣ́рою, ро́ждшей нача́льника живота̀: твои́ми мл҃твами раба̀ твоего̀ ѡ҆живѝ, и҆ и҆скꙋше́нїй и҆ страсте́й и҆зба́ви, є҆ди́на чⷭ҇таѧ.
Пѣ́снь и҃
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Свѣ́тъ сы́й незаходи́мъ, трисїѧ́ненъ и҆ трисо́лнечный и҆ є҆динонача́ленъ, самодержа́венъ, простѣ́йшїй, бг҃ъ непостижи́мый, и҆ самодержа́венъ гдⷭ҇ь, ны́нѣ те́мное и҆ ѡ҆мраче́нное моѐ се́рдце ѡ҆зарѝ: и҆ покажѝ свѣтоза́рнѡ и҆ свѣтоно́снѡ пѣ́ти тѧ̀, и҆ сла́вити во всѧ̑ вѣ́ки.
Сщ҃е́ннѣйшими крилы̑, серафі́ми бж҃е́ственнѣйшїи, ли́ца и҆ но́ги бл҃гоговѣ́йнѡ покрыва́ютъ, сла́вы не терпѧ́ще непостижи́мыѧ добро́ты твоеѧ̀, бл҃гонача́льнаѧ, бг҃онача́льнаѧ, є҆динонача́льнаѧ трⷪ҇це прест҃а́ѧ: ѻ҆ба́че и҆ мы̀ воспѣва́ти тѧ̀ дерза́емъ, и҆ сла́вити вѣ́рнѡ во вѣ́ки.
Гдⷭ҇онача́лїе безнача́льное, всеси́льнꙋю и҆ пребл҃гꙋ, совершеннонача́льнꙋ, бл҃годѣ́йственнꙋ, неѡпредѣ́льнꙋ, винꙋ̀ невино́внꙋ, твори́тельнꙋ, присносꙋ́щнꙋ, промысли́тельнꙋ и҆ сп҃си́тельнꙋю всѣ̑мъ є҆дини́цꙋ по сꙋществꙋ̀, и҆ трⷪ҇цꙋ ли́цы, сла́влю тѧ̀ бж҃е мо́й, вѣ́рнѡ во вѣ́ки.
Бг҃оро́диченъ: На землѝ возсїѧ̀ невече́рнее сл҃нце, ржⷭ҇тво́мъ є҆́же и҆з̾ тебѐ дв҃ственнымъ, пречⷭ҇таѧ влⷣчце, и҆ человѣ́ки и҆зба́ви ѿ і҆́дѡльскагѡ помраче́ннаго мра́ка. тѣ́мже и҆ ны́нѣ мѧ̀ па́че тогѡ̀ бг҃онача́лїѧ ѡ҆зарѝ лꙋча́ми, и҆ соблюдѝ твоего̀ раба̀.
Пѣ́снь ѳ҃
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
И҆́же всѣ́ми црⷭ҇твꙋющее, и҆ вседѣ́тельное пренача́льное є҆стество̀, вышшелѣ́тнꙋю, живонача́льнꙋю, бл҃гоꙋтро́бнꙋ, чл҃вѣколюби́вꙋю, бл҃гꙋ́ю, є҆динонача́льнꙋю трⷪ҇цꙋ тѧ̀ ны́нѣ славосло́вѧще, грѣхѡ́въ проще́нїѧ про́симъ, мі́рови ми́ра, и҆ цр҃квамъ є҆диномы́слїѧ. [Два́жды.]
Є҆ди́но гдⷭ҇ьство и҆ трисїѧ́нное, є҆ди́нственное бг҃онача́лїе трисо́лнечное, пѣвцы̀ прїимѝ твоѧ̑ бг҃олѣ́пнѡ, и҆ прегрѣше́нїй и҆зба́ви, и҆ и҆скꙋше́нїй и҆ лю́тыхъ: и҆ вско́рѣ ми́ръ пода́ждь чл҃вѣколю́бнѡ, и҆ цр҃квамъ соедине́нїе.
Бг҃оро́диченъ: Во ᲂу҆тро́бꙋ хрⷭ҇тѐ сп҃се мо́й, дв҃и́ческꙋю все́льсѧ, ꙗ҆ви́лсѧ є҆сѝ мі́рꙋ твоемꙋ̀ бг҃омꙋ́жнѡ, непревра́тенъ, неслїѧ́ненъ вои́стиннꙋ: и҆ ѡ҆бѣща́лъ є҆сѝ всегда̀ съ твои́ми рабы̑ бы́ти ꙗ҆́вѣ. тѣ́мже тебѐ ро́ждшїѧ мл҃твами, ми́ръ всемꙋ̀ ста́дꙋ твоемꙋ̀ ᲂу҆стро́й.
Посе́мъ припѣ́вы григо́рїа сїнаи́та: Досто́йно є҆́сть: И҆ про́чее полꙋ́нощницы, пи́сано въ концѣ̀ кни́ги сеѧ̀.
На ᲂу҆́трени по є҆ѯаѱалмѣ́хъ,
Бг҃ъ гдⷭ҇ь, и҆ ꙗ҆ви́сѧ на́мъ: на гла́съ и҃, и҆ глаго́лемъ тропа́рь воскрⷭ҇нъ: Съ высоты̀ снизше́лъ є҆сѝ: два́жды. Сла́ва, и҆ ны́нѣ, бг҃оро́диченъ: И҆́же на́съ ра́ди рожде́йсѧ ѿ дв҃ы: Та́же ѻ҆бы́чное стїхосло́вїе ѱалти́ра.
По а҃-мъ стїхосло́вїи, сѣда́льны воскрⷭ҇ны, гла́съ и҃:
Воскр҃слъ є҆сѝ и҆з̾ ме́ртвыхъ животѐ всѣ́хъ, и҆ а҆́гг҃лъ свѣ́телъ жена́мъ вопїѧ́ше: преста́ните ѿ сле́зъ, а҆пⷭ҇лѡмъ бл҃говѣсти́те, возопі́йте пою́щѧ: ꙗ҆́кѡ воскр҃се хрⷭ҇то́съ гдⷭ҇ь, бл҃говоли́вый сп҃стѝ ꙗ҆́кѡ бг҃ъ ро́дъ человѣ́ческїй.
Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Воскр҃сы́й и҆з̾ гро́ба ꙗ҆́кѡ вои́стиннꙋ, прпⷣбнымъ повелѣ́лъ є҆сѝ жена́мъ проповѣ́дати воста́нїе а҆пⷭ҇лѡмъ, ꙗ҆́коже пи́сано є҆́сть: и҆ ско́рый пе́тръ предста̀ гро́бꙋ, и҆ свѣ́тъ зрѧ̀ во гро́бѣ, ᲂу҆жаса́шесѧ. тѣ́мже и҆ ᲂу҆ви́дѣвъ плащани̑цы, кромѣ̀ бж҃е́ственнагѡ тѣ́ла въ не́мъ лежа́щыѧ, ꙾со стра́хомъ꙾[[съ вѣ́рою]] возопѝ: сла́ва тебѣ̀ хрⷭ҇тѐ бж҃е, ꙗ҆́кѡ сп҃са́еши всѧ̑ сп҃сѐ на́шъ: ѻ҆́ч҃ее бо є҆сѝ сїѧ́нїе.
Сла́ва, и҆ ны́нѣ, бг҃оро́диченъ: Нбⷭ҇нꙋю две́рь, и҆ кївѡ́тъ, всест҃ꙋ́ю го́рꙋ, свѣтоза́рный ѻ҆́блакъ воспои́мъ, нбⷭ҇нꙋю лѣ́ствицꙋ, слове́сный ра́й, є҆́ѵино и҆збавле́нїе, вселе́нныѧ всеѧ̀ вели́кое сокро́вище, ꙗ҆́кѡ сп҃се́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ тѝ: молѝ сн҃а твоего̀ и҆ бг҃а, прегрѣше́нїй ѡ҆ставле́нїе дарова́ти, бл҃гоче́стнѡ покланѧ́ющымсѧ прест҃о́мꙋ ржⷭ҇твꙋ̀ твоемꙋ̀.
По в҃-мъ стїхосло́вїи сѣда́льны воскрⷭ҇ны, гла́съ и҃:
Человѣ́цы сп҃се, гро́бъ тво́й запеча́таша: а҆́гг҃лъ ка́мень ѿ двере́й ѿвалѝ: жєны̀ ви́дѣша воста́вша ѿ ме́ртвыхъ, и҆ ты́ѧ бл҃говѣсти́ша ᲂу҆ч҃нкѡ́мъ твои̑мъ въ сїѡ́нѣ, ꙗ҆́кѡ воскре́слъ є҆сѝ животѐ всѣ́хъ, и҆ разрѣши́шасѧ ᲂу҆́зы смє́ртныѧ: гдⷭ҇и сла́ва тебѣ̀.
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Мѵ̑ра погреба́тєльнаѧ жєны̀ прине́сшѧ, гла́съ а҆́гг҃льскїй и҆з̾ гро́ба слы́шахꙋ: преста́ните ѿ сле́зъ, и҆ вмѣ́стѡ печа́ли ра́дость прїими́те, возопі́йте пою́щѧ: ꙗ҆́кѡ воскр҃се хрⷭ҇то́съ гдⷭ҇ь, бл҃говоли́вый сп҃стѝ ꙗ҆́кѡ бг҃ъ ро́дъ человѣ́ческїй.
Сла́ва, и҆ ны́нѣ, бг҃оро́диченъ, не сѣдѧ́ще пое́мъ, но стоѧ́ще, и҆ со стра́хомъ и҆ бл҃гоговѣ́нїемъ:
Ѡ҆ тебѣ̀ ра́дꙋетсѧ бл҃года́тнаѧ всѧ́каѧ тва́рь, а҆́гг҃льскїй собо́ръ, и҆ чл҃вѣ́ческїй ро́дъ, ѡ҆сщ҃е́нный хра́ме, и҆ раю̀ слове́сный: дв҃ственнаѧ похвало̀, и҆з̾ неѧ́же бг҃ъ воплоти́сѧ, и҆ млⷣнецъ бы́сть, пре́жде вѣ̑къ сы́й бг҃ъ на́шъ: ложесна́ бо твоѧ̑ прⷭ҇то́лъ сотворѝ, и҆ чре́во твоѐ простра́ннѣе нб҃съ содѣ́ла. ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, сла́ва тебѣ̀.
Ѵ҆пакоѝ, гла́съ и҃: Мѷронѡ́сицы жизнода́вца предстоѧ́щѧ гро́бꙋ, влⷣкꙋ и҆ска́хꙋ въ ме́ртвыхъ безсме́ртнаго, и҆ ра́дость бл҃говѣ́щенїѧ ѿ а҆́гг҃ла прїе́мшѧ, а҆пⷭ҇лѡмъ возвѣща́хꙋ: ꙗ҆́кѡ воскр҃се хрⷭ҇то́съ бг҃ъ, подаѧ́й мі́рови ве́лїю млⷭ҇ть.
Степє́нна, гла́съ и҃: И҆́хже стїхѝ повторѧ́юще пое́мъ.
А҆нтїфѡ́нъ а҃:
Ѿ ю҆́ности моеѧ̀ вра́гъ мѧ̀ и҆скꙋша́етъ, сластьмѝ пали́тъ мѧ̀: а҆́зъ же надѣ́ѧсѧ на тѧ̀ гдⷭ҇и, побѣжда́ю сего̀.
Ненави́дѧщїи сїѡ́на, да бꙋ́дꙋтъ ᲂу҆́бѡ пре́жде и҆сторже́нїѧ ꙗ҆́кѡ трава̀: ссѣ́четъ бо хрⷭ҇то́съ вы̑ѧ и҆́хъ, ᲂу҆сѣче́нїемъ мꙋ́къ.
Сла́ва: Ст҃ы́мъ дх҃омъ, є҆́же жи́ти всѧ́чєскимъ: свѣ́тъ ѿ свѣ́та, бг҃ъ вели́къ: со ѻ҆ц҃е́мъ пое́мъ є҆мꙋ̀, и҆ съ сло́вомъ.
И҆ ны́нѣ, то́йже.
А҆нтїфѡ́нъ в҃:
Се́рдце моѐ стра́хомъ твои́мъ да покры́етсѧ смиреномꙋ́дрствꙋющее: да не возне́сшеесѧ ѿпаде́тъ ѿ тебѐ всеще́дре.
На гдⷭ҇а и҆мѣ́вый наде́ждꙋ, не ᲂу҆страши́тсѧ тогда̀, є҆гда̀ ѻ҆гне́мъ всѧ̑ сꙋди́ти и҆́мать, и҆ мꙋ́кою.
Сла́ва: Ст҃ы́мъ дх҃омъ, всѧ́къ кто̀ бж҃е́ственный ви́дитъ, и҆ предглаго́летъ, чꙋдодѣ́йствꙋетъ вы̑шнѧѧ, въ трїе́хъ є҆ди́наго бг҃а поѧ̀: а҆́ще бо и҆ трисїѧ́етъ, є҆динонача́льствꙋетъ бж҃ество̀.
И҆ ны́нѣ, то́йже.
А҆нтїфѡ́нъ г҃:
Воззва́хъ тебѣ̀ гдⷭ҇и, вонмѝ, приклони́ ми ᲂу҆́хо твоѐ вопїю́щꙋ, и҆ ѡ҆чи́сти, пре́жде да́же не во́змеши менѐ ѿсю́дꙋ.
Въ ма́тери свое́й землѝ ѿходѧ́й всѧ́къ, па́ки разрѣша́етсѧ, прїѧ́ти мꙋ̑ки, и҆лѝ по́чєсти пожи́вшихъ.
Сла́ва: Ст҃ы́мъ дх҃омъ бг҃осло́вїе, є҆ди́ница трист҃а́ѧ: ѻ҆ц҃ъ бо безнача́ленъ: ѿ негѡ́же роди́сѧ сн҃ъ безлѣ́тнѡ, и҆ дх҃ъ сопрⷭ҇то́ленъ, соѡбра́зенъ, ѿ ѻ҆ц҃а̀ спросїѧ́вшїй.
И҆ ны́нѣ, то́йже.
А҆нтїфѡ́нъ д҃:
Сѐ ны́нѣ что̀ добро̀, и҆лѝ что̀ красно̀; но є҆́же жи́ти бра́тїи вкꙋ́пѣ: въ се́мъ бо гдⷭ҇ь ѡ҆бѣща̀ живо́тъ вѣ́чный.
Ѡ҆ ри́зѣ свое́й, и҆́же крі́ны се́льныѧ ᲂу҆краша́ѧй, повелѣва́етъ, ꙗ҆́кѡ не подоба́етъ пещи́сѧ.
Сла́ва: Ст҃ы́мъ дх҃омъ, є҆динови́дною вино́ю, всѧ̑ содержа́тсѧ миропода́тельнѣ: бг҃ъ бо се́й є҆́сть, ѻ҆ц҃ꙋ́ же и҆ сн҃ови є҆диносꙋ́щенъ госпо́дственнѣ.
И҆ ны́нѣ, то́йже.
Прокі́менъ,гла́съ и҃: Воцр҃и́тсѧ гдⷭ҇ь во вѣ́къ, бг҃ъ тво́й сїѡ́не, въ ро́дъ и҆ ро́дъ. Сті́хъ: Хвалѝ дꙋшѐ моѧ̀ гдⷭ҇а, восхвалю̀ гдⷭ҇а въ животѣ̀ мое́мъ. Всѧ́кое дыха́нїе: и҆ Є҆ѵⷢ҇лїе воскрⷭ҇но ᲂу҆́треннее. Воскрⷭ҇нїе хрⷭ҇то́во. ѱало́мъ н҃. И҆ прѡ́чаѧ порѧ́дꙋ.
Канѡ́нъ воскрⷭ҇нъ. Гла́съ и҃:
Пѣ́снь а҃
І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Всеси́льнꙋ хрⷭ҇то́вꙋ бж҃ествꙋ̀ ка́кѡ не диви́мсѧ; ѿ страсте́й ᲂу҆́бѡ всѣ̑мъ вѣ̑рнымъ, безстра́стїе и҆ нетлѣ́нїе точа́щꙋ, ѿ ребра́ же ст҃а́гѡ и҆сто́чникъ безсме́ртїѧ и҆ска́пающꙋ, и҆ живо́тъ и҆з̾ гро́ба присносꙋ́щный.
Ꙗ҆́кѡ бл҃голѣ́пенъ жена́мъ а҆́гг҃лъ ны́нѣ ꙗ҆ви́сѧ, свѣ́тлыѧ носѧ̀ ѡ҆́бразы є҆сте́ственныѧ невеще́ственныѧ чистоты̀, зра́комъ же возвѣща́ѧ свѣ́тъ воскрⷭ҇нїѧ, зовы́й: воскр҃се гдⷭ҇ь.
Бг҃оро́диченъ: Пресла̑внаѧ возглаго́лашасѧ ѡ҆ тебѣ̀ въ родѣ́хъ родѡ́въ, бг҃а сло́ва во чре́вѣ вмѣ́щшаѧ, чиста́ же пребы́вши бцⷣе мр҃і́е. тѣ́мже тѧ̀ всѝ почита́емъ, сꙋ́щее по бз҃ѣ застꙋпле́нїе на́ше.
Канѡ́нъ крⷭ҇товоскрⷭ҇нъ.
І҆рмо́съ: Во́дꙋ проше́дъ ꙗ҆́кѡ сꙋ́шꙋ:
Взѧ́шасѧ врата̀ болѣ́зненнаѧ, и҆ ᲂу҆жасо́шасѧ вра́тницы а҆́довы, зрѧ́ще въ преиспѡ́днѣйшаѧ соше́дшаго, и҆́же на высотѣ̀ всѣ́хъ превы́ше є҆стества̀.
Оу҆диви́шасѧ чи́ни а҆́гг҃льстїи, зрѧ́ще на прⷭ҇то́лѣ посажде́но ѻ҆́ч҃и, ѿпа́дшее є҆стество̀ человѣ́ческое, затворе́ное въ преиспо́днихъ землѝ.
Чи́ни тѧ̀ а҆́гг҃льстїи и҆ человѣ́честїи, безневѣ́стнаѧ мт҃и, хва́лѧтъ непреста́ннѡ: зижди́телѧ бо си́хъ, ꙗ҆́кѡ млⷣнца на ѡ҆б̾ѧ́тїихъ твои́хъ носи́ла є҆сѝ.
И҆́нъ канѡ́нъ прест҃ѣ́й бцⷣѣ.
І҆рмо́съ: Пои́мъ гдⷭ҇еви, прове́дшемꙋ лю́ди своѧ̑:
Пречⷭ҇таѧ бцⷣе, вопло́щшеесѧ присносꙋ́щное и҆ пребж҃е́ственное сло́во, па́че є҆стества̀ ро́ждши, пое́мъ тѧ̀.
Гро́здъ тѧ̀ живоно́сенъ, всемі́рнагѡ и҆ска́пающъ сла́дость сп҃се́нїѧ, дв҃а хрⷭ҇тѐ родѝ.
Ро́дъ а҆да́мль, ко є҆́же па́че ᲂу҆ма̀ бл҃же́нствꙋ, тобо́ю возведе́нный бцⷣе, досто́йнѡ сла́витъ тѧ̀.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃
І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть ст҃ъ, па́че тебѐ є҆ди́не чл҃вѣколю́бче.
Ѡ҆сꙋжде́на бы́вша а҆да́ма вкꙋше́нїемъ грѣха̀, пло́ти твоеѧ̀ сп҃си́тельною стрⷭ҇тїю ѡ҆правда́лъ є҆сѝ хрⷭ҇тѐ: са́мъ бо непови́ненъ сме́ртнагѡ и҆скꙋ́са бы́лъ є҆сѝ безгрѣ́шне.
Воскрⷭ҇нїѧ свѣ́тъ возсїѧ̀ сꙋ́щымъ во тьмѣ̀, и҆ сѣ́ни сме́ртнѣй сѣдѧ́щымъ, бг҃ъ мо́й і҆и҃съ, и҆ свои́мъ бж҃ество́мъ крѣ́пкаго свѧза́въ, сегѡ̀ сосꙋ́ды расхи́тилъ є҆́сть.
Бг҃оро́диченъ: Херꙋві́мѡвъ и҆ серафі́мѡвъ превы́шши ꙗ҆ви́ласѧ є҆сѝ бцⷣе: ты́ бо є҆ди́на прїѧ́ла є҆сѝ невмѣсти́маго бг҃а въ твое́мъ чре́вѣ, нескве́рнаѧ: тѣ́мже тѧ̀ вѣ́рнїи всѝ пѣ́сньми чⷭ҇таѧ, ᲂу҆бл҃жа́емъ.
И҆́нъ І҆рмо́съ: Нбⷭ҇нагѡ крꙋ́га верхотво́рче гдⷭ҇и:
Ѿве́ргшагосѧ пре́жде за́повѣди, гдⷭ҇и, и҆зринове́на мѧ̀ ѿ тебѐ сотвори́лъ є҆сѝ, въ него́же воѡбрази́всѧ, послꙋша́нїю же ꙾навы́къ, себѣ̀ па́ки назда́лъ꙾[[наꙋчи́въ, къ себѣ̀ всели́лъ]] є҆сѝ распѧ́тїемъ.
Премꙋ́дростїю всѧ̑ проꙋвѣ́дѣвый гдⷭ҇и, и҆ ра́зꙋмомъ твои́мъ водрꙋзи́вый преиспѡ́днѧѧ, не не сподо́билъ є҆сѝ снизхожде́нїемъ твои́мъ сло́ве бж҃їй, воскр҃си́ти, є҆́же по ѡ҆́бразꙋ твоемꙋ̀.
Бг҃оро́диченъ: Всели́всѧ въ дв҃ꙋ тѣле́снѣ гдⷭ҇и, ꙗ҆ви́лсѧ є҆сѝ человѣ́кѡмъ, ꙗ҆́коже подоба́ше ви́дѣти тебѐ: ю҆́же и҆ показа́лъ є҆сѝ ꙗ҆́кѡ и҆́стиннꙋю бцⷣꙋ, и҆ вѣ́рныхъ помо́щницꙋ, є҆ди́не чл҃вѣколю́бче.
И҆́нъ І҆рмо́съ: Ты̀ є҆сѝ ᲂу҆твержде́нїе:
Да́ждь на́мъ по́мощь твои́ми мл҃твами всечⷭ҇таѧ, прило́ги ѿража́ющи лю́тыхъ ѡ҆бстоѧ́нїй.
Є҆́ѵѣ прама́тери ты̀ и҆справле́нїе была̀ є҆сѝ, нача́льника жи́зни мі́рови, хрⷭ҇та̀ бцⷣе ро́ждши.
Препоѧ́ши мѧ̀ си́лою всечⷭ҇таѧ, ꙗ҆́же вои́стиннꙋ бг҃а ро́ждши пло́тїю, ѻ҆́ч҃ꙋю ѵ҆поста́снꙋю си́лꙋ.
Пѣ́снь д҃
І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва чл҃вѣколю́бче.
Ты̀ врага̀ сꙋ́ща мѧ̀ ѕѣлѡ̀ возлюби́лъ є҆сѝ: ты̀ и҆стоща́нїемъ стра́ннымъ соше́лъ є҆сѝ на зе́млю, бл҃гоꙋтро́бне сп҃се, послѣ́днѧгѡ моегѡ̀ досажде́нїѧ не ѿве́ргсѧ, и҆ пребы́въ на высотѣ̀ пречⷭ҇тыѧ твоеѧ̀ сла́вы, пре́жде безче́ствованнаго просла́вилъ є҆сѝ.
Кто̀ зрѧ̀ влⷣко, ны́нѣ не ᲂу҆жаса́етсѧ, стрⷭ҇тїю сме́рть разрꙋша́емꙋ; крⷭ҇то́мъ бѣжа́щее тлѣ́нїе, и҆ сме́ртїю а҆́дъ бога́тства и҆стощава́емый, бж҃е́ственною си́лою тебѐ распѧ́тагѡ; чꙋ́дно дѣ́ло, чл҃вѣколю́бче!
Бг҃оро́диченъ: Ты̀ вѣ̑рнымъ похвала̀ є҆сѝ безневѣ́стнаѧ, ты̀ предста́тельнице, ты̀ и҆ прибѣ́жище хрⷭ҇тїа́нъ, стѣна̀ и҆ приста́нище: къ сн҃ꙋ бо твоемꙋ̀ мольбы̑ но́сиши всенепоро́чнаѧ, и҆ сп҃са́еши ѿ бѣ́дъ, вѣ́рою и҆ любо́вїю бцⷣꙋ чⷭ҇тꙋю тебѐ зна́ющихъ.
И҆́нъ І҆рмо́съ: Оу҆слы́шахъ гдⷭ҇и.
На крⷭ҇тѣ́ тѧ пригвозди́ша законопрестꙋ́пныхъ дѣ́ти, хрⷭ҇тѐ бж҃е: и҆́мже сп҃слъ є҆сѝ ꙗ҆́кѡ бл҃гоꙋтро́бенъ, сла́вѧщыѧ твоѧ̑ страда̑нїѧ.
Воскр҃съ ѿ гро́ба, всѧ̑ совоскр҃си́лъ є҆сѝ сꙋ́щыѧ во а҆́дѣ мє́ртвыѧ, и҆ просвѣти́лъ є҆сѝ ꙗ҆́кѡ бл҃гоꙋтро́бенъ, сла́вѧщыѧ твоѐ воскрⷭ҇нїе.
Бг҃оро́диченъ: Бг҃а, є҆го́же родила̀ є҆сѝ пречⷭ҇таѧ мр҃і́е, того̀ молѝ дарова́ти рабѡ́мъ твои̑мъ согрѣше́нїй проще́нїе.
И҆́нъ І҆рмо́съ то́йже.
Кла́съ возрасти́вшаѧ животво́рный, неѡра́ннаѧ ни́во, подаю́щаго мі́рови жи́знь, бцⷣе, сп҃са́й пою́щыѧ тѧ̀.
Бцⷣꙋ тѧ̀ всечⷭ҇таѧ, просвѣ́щшїисѧ всѝ проповѣ́дꙋемъ: сл҃нце бо пра́вды родила̀ є҆сѝ приснодв҃о.
Ѡ҆чище́нїе да́рꙋй на́шымъ невѣ́дѣнїємъ, ꙗ҆́кѡ безгрѣ́шенъ: и҆ ᲂу҆мирѝ мі́ръ тво́й бж҃е, мл҃твами ро́ждшїѧ тѧ̀.
Пѣ́снь є҃
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Ѡ҆дѣ́ѧтисѧ претерпѣ́лъ є҆сѝ въ багрѧни́цꙋ пре́жде стрⷭ҇ти твоеѧ̀ сп҃се, порꙋга́емь, первозда́ннагѡ покрыва́ѧ без̾ѡбра́зное ѡ҆бнаже́нїе: и҆ на́гъ пригвозди́лсѧ є҆сѝ на крⷭ҇тѣ̀ пло́тїю, совлача́ѧ хрⷭ҇тѐ, ри́зꙋ ᲂу҆мерщвле́нїѧ.
Ѿ пе́рсти сме́ртныѧ, ты̀ па́дшее моѐ па́ки назда́лъ є҆сѝ сꙋщество̀, воскр҃съ: и҆ нестарѣ́ющеесѧ хрⷭ҇тѐ ᲂу҆стро́илъ є҆сѝ, ꙗ҆ви́въ па́ки ꙗ҆́коже ца́рскїй ѡ҆́бразъ, нетлѣ́нїѧ жи́знь блиста́ющъ.
Бг҃оро́диченъ: Мт҃рнее дерзнове́нїе, є҆́же къ сн҃ꙋ твоемꙋ̀ и҆мꙋ́щи всечⷭ҇таѧ, сро́днагѡ промышле́нїѧ, є҆́же ѡ҆ на́съ, не пре́зри, мо́лимсѧ: ꙗ҆́кѡ тебѐ и҆ є҆ди́нꙋ хрⷭ҇тїа́не ко влⷣцѣ ѡ҆чище́нїе млⷭ҇тивнѡ предлага́емъ.
И҆́нъ І҆рмо́съ: Просвѣтѝ на́съ:
Наста́ви на́съ си́лою крⷭ҇та̀ твоегѡ̀ хрⷭ҇тѐ: тѣ́мъ бо тебѣ̀ припа́даемъ, ми́ръ пода́ждь на́мъ чл҃вѣколю́бче.
Ѡ҆кормѝ живо́тъ на́шъ, ꙾ꙗ҆́кѡ пребл҃гі́й꙾[[бж҃е на́шъ]] пою́щихъ твоѐ воста́нїе, и҆ ми́ръ пода́ждь на́мъ чл҃вѣколю́бче.
Бг҃оро́диченъ: Оу҆молѝ чⷭ҇таѧ, сн҃а твоего̀ и҆ бг҃а на́шего, неискꙋсобра́чнаѧ мр҃і́е пречⷭ҇таѧ, є҆́же низпосла́ти на́мъ вѣ̑рнымъ ве́лїю млⷭ҇ть.
И҆́нъ І҆рмо́съ: Оу҆́тренююще, вопїе́мъ тѝ:
Оу҆толѝ нестерпи́мꙋю бꙋ́рю страсте́й мои́хъ, ꙗ҆́же бг҃а ро́ждшаѧ ѡ҆корми́телѧ и҆ гдⷭ҇а.
Слꙋ́жатъ ржⷭ҇твꙋ̀ твоемꙋ̀ пречⷭ҇таѧ бцⷣе, а҆́гг҃льстїи чи́нове, и҆ человѣ́кѡвъ собра́нїе.
Мр҃і́е бцⷣе безневѣ́стнаѧ, ᲂу҆пова̑нїѧ врагѡ́въ ѡ҆сꙋетѝ, и҆ пою́щыѧ тѧ̀ возвеселѝ.
Пѣ́снь ѕ҃
І҆рмо́съ: Ѡ҆чи́сти мѧ̀ сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
Дре́вомъ крѣ́пкѡ низложи́ мѧ началоѕло́бный: ты́ же хрⷭ҇тѐ, возне́ссѧ на крⷭ҇тѣ̀, ꙾крѣпча́е꙾[[крѣ́пльшаго]] низложи́лъ є҆сѝ, посрами́въ сего̀, па́дшаго же воскр҃си́лъ є҆сѝ.
Ты̀ ᲂу҆ще́дрилъ є҆сѝ сїѡ́на, возсїѧ́вый ѿ гро́ба, но́ваго вмѣ́стѡ ве́тхагѡ соверши́въ, ꙗ҆́кѡ бл҃гоꙋтро́бенъ, бж҃е́ственною твое́ю кро́вїю: и҆ ны́нѣ ца́рствꙋеши въ не́мъ во вѣ́ки, хрⷭ҇тѐ.
Бг҃оро́диченъ: Да и҆зба́вимсѧ ѿ лю́тыхъ прегрѣше́нїй, мольба́ми твои́ми бг҃ороди́тельнице чⷭ҇таѧ, и҆ да ᲂу҆лꙋчи́мъ пречⷭ҇таѧ бж҃е́ственное сїѧ́нїе, и҆з̾ тебѐ неизрече́ннѡ воплоще́ннагѡ сн҃а бж҃їѧ.
И҆́нъ І҆рмо́съ: Мл҃твꙋ пролїю̀ ко гдⷭ҇ꙋ:
Дла̑ни на крⷭ҇тѣ̀ распросте́рлъ є҆сѝ, и҆сцѣлѧ́ѧй неꙋдержа́ннѡ просте́ртꙋю во є҆де́мѣ рꙋ́кꙋ первозда́ннагѡ: и҆ твое́ю во́лею же́лчи вкꙋси́въ, и҆ сп҃слъ є҆сѝ хрⷭ҇тѐ ꙗ҆́кѡ си́ленъ, сла́вѧщыѧ твоѧ̑ страда̑нїѧ.
Сме́рти и҆зба́витель вкꙋсѝ, дре́внѧгѡ ѡ҆сꙋжде́нїѧ, ꙗ҆́кѡ да и҆ тлѣ́нїѧ ца́рство разрꙋши́тъ, и҆ во а҆́дскаѧ сше́дъ, воскр҃се хрⷭ҇то́съ, и҆ сп҃сѐ ꙗ҆́кѡ си́ленъ пою́щыѧ є҆гѡ̀ воскрⷭ҇нїе.
Бг҃оро́диченъ: Не преста́й за ны̀ молѧ́щи пречⷭ҇таѧ бцⷣе дв҃о, ꙗ҆́кѡ вѣ̑рнымъ ᲂу҆твержде́нїе ты̀ є҆сѝ наде́ждою твое́ю крѣпи́мсѧ, и҆ любо́вїю тѧ̀, и҆ и҆з̾ тебѐ воплоще́ннаго неизрече́ннѡ сла́вимъ.
И҆́нъ І҆рмо́съ: Ри́зꙋ мнѣ̀ пода́ждь свѣ́тлꙋ:
Хра́мъ тѧ̀ бж҃їй и҆ ковче́гъ, и҆ черто́гъ ѡ҆дꙋшевле́нный, и҆ две́рь нбⷭ҇нꙋю, бцⷣе вѣ́рнїи возвѣща́емъ.
Тре́бищъ разрꙋши́тель ꙗ҆́кѡ бг҃ъ, бы́вшее ржⷭ҇тво̀ твоѐ мр҃і́е бг҃оневѣ́сто, покланѧ́емо є҆́сть со ѻ҆ц҃е́мъ и҆ дх҃омъ.
Сло́во бж҃їе тебѐ земны̑мъ, бцⷣе, показа̀ нбⷭ҇нꙋю лѣ́ствицꙋ: тобо́ю бо къ на́мъ сни́де.
Конда́къ,гла́съ и҃: Подо́бенъ: Ꙗ҆́кѡ нача́тки:
Воскр҃съ и҆з̾ гро́ба, ᲂу҆ме́ршыѧ воздви́глъ є҆сѝ, и҆ а҆да́ма воскр҃си́лъ є҆сѝ, и҆ є҆́ѵа ликꙋ́етъ во твое́мъ воскрⷭ҇нїи, мїрсті́и концы̀ торжествꙋ́ютъ, є҆́же и҆з̾ ме́ртвыхъ воста́нїемъ твои́мъ, многомлⷭ҇тиве.
І҆́косъ: А҆́дѡва ца́рствїѧ плѣни́вый, и҆ мє́ртвыѧ воскреси́вый, долготерпѣли́ве, жєны̀ мѷронѡ́сицы срѣ́тилъ є҆сѝ, вмѣ́стѡ печа́ли ра́дость принесы́й: и҆ а҆пⷭ҇лѡмъ твои̑мъ возвѣсти́лъ є҆сѝ побѣди́тєльнаѧ сп҃се мо́й зна́мєнїѧ живода́телю, и҆ тва́рь просвѣща́еши чл҃вѣколю́бче. сегѡ̀ ра́ди и҆ мі́ръ сра́дꙋетсѧ, є҆́же и҆з̾ ме́ртвыхъ воста́нїю твоемꙋ̀ многомлⷭ҇тиве.
Пѣ́снь з҃
І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Сла́вное и҆стоща́нїе, бж҃е́ственное бога́тство твоеѧ̀ нищеты̀ хрⷭ҇тѐ, ᲂу҆дивлѧ́етъ а҆́гг҃лы, на крⷭ҇тѣ̀ зрѧ́щыѧ тѧ̀ пригвожда́ема, за є҆́же сп҃стѝ вѣ́рою зовꙋ́щыѧ: бл҃гослове́нъ є҆сѝ бж҃е ѻ҆тє́цъ на́шихъ.
Бж҃е́ственнымъ твои́мъ соше́ствїемъ свѣ́та и҆спо́лнилъ є҆сѝ преиспѡ́днѧѧ, и҆ тьма̀ прогна́на бы́сть пре́жде гонѧ́щаѧ. ѿню́дꙋже воскр҃со́ша и҆̀же ѿ вѣ́ка ю҆́зницы, зовꙋ́ще: бл҃гослове́нъ бг҃ъ ѻ҆тє́цъ на́шихъ.
Трⷪ҇ченъ: Всѣ̑мъ ᲂу҆́бѡ гдⷭ҇а, ꙾є҆ди́наго же є҆ди́номꙋ꙾[[є҆ди́номꙋ же то́чїю]] є҆диноро́дномꙋ сн҃ꙋ правосла́внѡ ѻ҆ц҃а̀, бг҃осло́вѧще тѧ̀ возвѣща́емъ, и҆ є҆ди́наго вѣ́дѧще ѿ тебѐ и҆сходѧ́ща дх҃а пра́ваго, соесте́ственна и҆ соприсносꙋ́щна.
И҆́нъ І҆рмо́съ: Ѿ і҆ꙋде́и доше́дше:
Сп҃се́нїе содѣ́лалъ є҆сѝ посредѣ̀ вселе́нныѧ, прⷪ҇ро́чески бж҃е: на дре́во бо вознесе́нъ бы́въ, всѧ̑ призва́лъ є҆сѝ вѣ́рою зовꙋ́щыѧ: ѻ҆тє́цъ на́шихъ бж҃е бл҃гослове́нъ є҆сѝ.
Воскр҃съ ѿ гро́ба, ꙗ҆́коже ѿ сна̀ ще́дре, всѣ́хъ и҆зба́вилъ є҆сѝ ѿ тлѝ, тва́рь же ᲂу҆вѣрѧ́етсѧ а҆пⷭ҇лы проповѣ́дающими воста́нїе: ѻ҆тцє́въ бж҃е бл҃гослове́нъ є҆сѝ.
Бг҃оро́диченъ: Равнодѣ́тельное ро́ждшемꙋ, равноси́льное сло́во и҆ соприсносꙋ́щное, во ᲂу҆тро́бѣ дв҃ы, ѻ҆ц҃а̀ бл҃говоле́нїемъ, и҆ дх҃а, созида́етсѧ: ѻ҆тцє́въ на́шихъ бж҃е бл҃гослове́нъ є҆сѝ.
И҆́нъ І҆рмо́съ то́йже.
Ѿ дв҃ственныхъ ложе́снъ вопло́щьсѧ, ꙗ҆ви́лсѧ є҆сѝ на сп҃се́нїе на́ше. тѣ́мже твою̀ мт҃рь вѣ́дѧще бцⷣꙋ правосла́внѡ зове́мъ: ѻ҆тцє́въ бж҃е бл҃гослове́нъ є҆сѝ.
Же́злъ прорасти́ла є҆сѝ дв҃о, ѿ ко́рене і҆ессе́ова всебл҃же́ннаѧ, пло́дъ цвѣтоносѧ́щи сп҃си́тельный, вѣ́рою сн҃ꙋ твоемꙋ̀ зовꙋ́щымъ: ѻ҆тцє́въ бж҃е бл҃гослове́нъ є҆сѝ.
Премꙋ́дрости и҆спо́лни всѣ́хъ и҆ си́лы бж҃е́ственныѧ, ѵ҆поста́снаѧ премꙋ́дросте вы́шнѧгѡ, бцⷣею, вѣ́рою тебѣ̀ пою́щихъ: ѻ҆тцє́въ на́шихъ бж҃е бл҃гослове́нъ є҆сѝ.
Пѣ́снь и҃
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
І҆и҃сова бж҃ества̀ пребж҃е́ственнаѧ си́ла, въ на́съ бг҃олѣ́пнѡ возсїѧ́ла є҆́сть: пло́тїю во вкꙋ́шъ за всѣ́хъ сме́рть крⷭ҇тнꙋю, разрꙋшѝ а҆́довꙋ крѣ́пость. є҆го́же непреста́ннѡ дѣ́ти бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Распны́йсѧ воста̀, великовы́йный падѐ, пады́й и҆ сокрꙋше́нный и҆спра́висѧ, тлѧ̀ ѿве́ржена бы́сть, и҆ нетлѣ́нїе процвѣтѐ: жи́знїю во ме́ртвенное поже́рто бы́сть. дѣ́ти бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Трⷪ҇ченъ: Трисвѣ́тлое бж҃ество̀, є҆ди́нꙋ сїѧ́ющее зарю̀ ѿ є҆ди́нагѡ трїѷпоста́снагѡ є҆стества̀, роди́телѧ безнача́льна: є҆диноесте́ственно же сло́во ѻ҆ц҃ꙋ̀, и҆ сца́рствꙋющаго є҆диносꙋ́щнаго дх҃а, дѣ́ти бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
И҆́нъ І҆рмо́съ: Побѣди́тели мꙋчи́телѧ:
На дре́вѣ рꙋ́цѣ мнѣ̀ просте́ршаго ѡ҆бнаже́нномꙋ, призыва́юща мѧ̀, свое́ю бл҃гоѡбра́зною согрѣ́ѧти нагото́ю: бл҃гослови́те всѧ̑ дѣла̀ гдⷭ҇нѧ, и҆ превозноси́те є҆го̀ во вѣ́ки.
И҆з̾ преиспо́днѧгѡ а҆́да возне́сша мѧ̀ па́дшаго, и҆ высокопресто́льною сла́вою роди́телѧ поче́тшаго: бл҃гослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те є҆го̀ во вѣ́ки.
Бг҃оро́диченъ: А҆да́ма дв҃о, па́дшагѡ ᲂу҆́бѡ ꙗ҆ви́ласѧ є҆сѝ дщѝ, бг҃а же мт҃и, ѡ҆бнови́вшагѡ моѐ сꙋщество̀: є҆го́же пое́мъ всѧ̑ дѣла̀ ꙗ҆́кѡ гдⷭ҇а, и҆ превозно́симъ во всѧ̑ вѣ́ки.
И҆́нъ І҆рмо́съ: Цр҃ѧ̀ нбⷭ҇наго:
Сопроти́вныхъ разжжє́нныѧ и҆ пламенови̑дныѧ на на́съ ᲂу҆гасѝ стрѣ́лы: ꙗ҆́кѡ да пое́мъ тѧ̀ во всѧ̑ вѣ́ки.
Преесте́ственнѣ содѣ́телѧ и҆ сп҃са, бг҃а сло́ва родила̀ є҆сѝ дв҃о: тѣ́мже тѧ̀ пое́мъ, и҆ превозно́симъ во всѧ̑ вѣ́ки.
Просвѣти́тельнꙋю тѧ̀, и҆ златоза́рнꙋю, все́льшїйсѧ въ тѧ̀ свѣ́тъ непристꙋ́пный дв҃о, показа̀ свѣщꙋ̀ во всѧ̑ вѣ́ки.
Та́же пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: Съ припѣ́вомъ: Чⷭ҇тнѣ́йшꙋю херꙋві̑мъ:
Пѣ́снь ѳ҃
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Бж҃е́ственнымъ и҆ безнача́льнымъ є҆стество́мъ про́стъ сы́й, сложи́лсѧ є҆сѝ прїѧ́тїемъ пло́ти, въ тебѣ̀ само́мъ сїю̀ соста́вивъ сло́ве бж҃їй, и҆ пострада́въ ꙗ҆́кѡ человѣ̑къ, пребы́лъ є҆сѝ кромѣ̀ страсте́й ꙗ҆́кѡ бг҃ъ. тѣ́мже тѧ̀ во двою̀ сꙋщєствꙋ̀ нераздѣ́льнѡ и҆ неслїѧ́ннѡ велича́емъ.
Ѻ҆ц҃а̀ по сꙋществꙋ̀ бж҃е́ственномꙋ, ꙗ҆́коже є҆стество́мъ бы́въ человѣ́къ, ре́клъ є҆сѝ бг҃а вы́шнїй рабѡ́мъ снизходѧ̀, воскр҃съ ѿ гро́ба, бл҃года́тїю ѻ҆ц҃а̀ земнорѡ́днымъ поло́жъ, и҆́же по є҆стествꙋ̀ бг҃а же и҆ влⷣкꙋ, съ ни́мже тѧ̀ всѝ велича́емъ.
Бг҃оро́диченъ: Ꙗ҆ви́ласѧ є҆сѝ, ѽ дв҃о мт҃и бж҃їѧ, па́че є҆стества̀ ро́ждши пло́тїю бг҃а сло́ва, є҆го́же ѻ҆ц҃ъ ѿры́гнꙋ ѿ се́рдца своегѡ̀ пре́жде всѣ́хъ вѣ̑къ, ꙗ҆́кѡ бл҃гъ, є҆го́же ны́нѣ и҆ тѣле́съ превы́шша разꙋмѣ́емъ, а҆́ще и҆ въ тѣ́ло ѡ҆блече́сѧ.
И҆́нъ І҆рмо́съ: Оу҆страши́сѧ:
Бж҃їѧ тѧ̀ є҆стество́мъ ᲂу҆́бѡ сн҃а, зача́таго во ᲂу҆тро́бѣ свѣ́мы бг҃ома́тере, и҆ бы́вшаго на́съ ра́ди человѣ́ка, и҆ зрѧ́ще тѧ̀ на крⷭ҇тѣ̀ є҆стество́мъ ᲂу҆́бѡ стра́ждꙋща человѣ́ческимъ, безстрⷭ҇тна же ꙗ҆́кѡ бг҃а пребыва́юща велича́емъ.
Разрꙋши́сѧ тьма̀ дрѧ́хлаѧ, ѿ а҆́да бо возсїѧ̀ сл҃нце пра́вды хрⷭ҇то́съ, землѝ просвѣща́ѧ всѧ̑ концы̀, сїѧ́ѧ бж҃ества̀ свѣ́томъ, нбⷭ҇ный человѣ́къ, бг҃ъ земны́й: є҆го́же во двою̀ є҆стєствꙋ̀ велича́емъ.
Напрѧзѝ, и҆ ᲂу҆спѣва́й, и҆ ца́рствꙋй, сн҃е бг҃ома́тере, і҆сма́ильтєскїѧ лю́ди покарѧ́ѧ, борю́щыѧ ны̀, ꙗ҆́кѡ ѻ҆рꙋ́жїе непобѣди́мое, приходѧ́щымъ къ тебѣ̀ крⷭ҇тъ съ копїе́мъ да́рꙋѧ.
И҆́нъ І҆рмо́съ: Вои́стиннꙋ бцⷣꙋ:
Ра́дости и҆ весе́лїѧ и҆спо́лнь є҆́сть па́мѧть твоѧ̀, пристꙋпа́ющымъ и҆сцѣлє́нїѧ точа́щи, и҆ бл҃гоче́стнѡ бцⷣꙋ тѧ̀ возвѣща́ющымъ.
Ѱалмы̀ тѧ̀ воспѣва́емъ бл҃года́тнаѧ, и҆ немо́лчнѡ, є҆́же ра́дꙋйсѧ, прино́симъ: ты́ бо и҆сточи́ла є҆сѝ всѣ̑мъ ра́дость.
Красе́нъ бг҃оро́дице прорастѐ пло́дъ тво́й, не тлѝ причаща́ющымсѧ хода́тайственъ, но жи́зни, вѣ́рою тѧ̀ велича́ющымъ.
По катава́сїи є҆ктенїа̀ ма́лаѧ.
Та́же, Ст҃ъ гдⷭ҇ь бг҃ъ на́шъ. Посе́мъ є҆ѯапостїла́рїй.
На хвали́техъ стїхи̑ры воскрⷭ҇ны, гла́съ и҃:
Сті́хъ: Сотвори́ти въ ни́хъ сꙋ́дъ напи́санъ: сла́ва сїѧ̀ бꙋ́детъ всѣ̑мъ прпⷣбнымъ є҆гѡ̀.
Гдⷭ҇и, а҆́ще и҆ сꙋди́лищꙋ предста́лъ є҆сѝ ѿ пїла́та сꙋди́мый, но не ѿстꙋпи́лъ є҆сѝ ѿ прⷭ҇то́ла со ѻ҆ц҃е́мъ сѣдѧ̀: и҆ воскр҃съ и҆з̾ ме́ртвыхъ, мі́ръ свободи́лъ є҆сѝ ѿ рабо́ты чꙋжда́гѡ, ꙗ҆́кѡ ще́дръ и҆ чл҃вѣколю́бецъ.
Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆тверже́нїи си́лы є҆гѡ̀.
Гдⷭ҇и, ѻ҆рꙋ́жїе на дїа́вола крⷭ҇тъ тво́й да́лъ є҆сѝ на́мъ: трепе́щетъ бо и҆ трѧсе́тсѧ, не терпѧ̀ взира́ти на си́лꙋ є҆гѡ̀: ꙗ҆́кѡ мє́ртвыѧ возставлѧ́етъ, и҆ сме́рть ᲂу҆празднѝ. сегѡ̀ ра́ди покланѧ́емсѧ погребе́нїю твоемꙋ̀ и҆ воста́нїю.
Сті́хъ: Хвали́те є҆го̀ на си́лахъ є҆гѡ̀, хвали́те є҆го̀ по мно́жествꙋ вели́чествїѧ є҆гѡ̀.
Гдⷭ҇и, а҆́ще и҆ ꙗ҆́кѡ ме́ртва во гро́бѣ і҆ꙋдє́и положи́ша: но ꙗ҆́кѡ цр҃ѧ̀ спѧ́ща во́ини тѧ̀ стрежа́хꙋ, и҆ ꙗ҆́кѡ живота̀ сокро́вище, печа́тїю печа́таша: но воскрⷭ҇лъ є҆сѝ, и҆ по́далъ є҆сѝ нетлѣ́нїе дꙋша́мъ на́шымъ.
Сті́хъ: Хвали́те є҆го̀ во гла́сѣ трꙋ́бнѣмъ, хвали́те є҆го̀ во ѱалти́ри и҆ гꙋ́слехъ.
А҆́гг҃лъ тво́й гдⷭ҇и, воскрⷭ҇нїе проповѣ́давый, стра̑жи ᲂу҆́бѡ ᲂу҆страшѝ, жена́мъ же возгласѝ глаго́лѧ: что̀ и҆́щете жива́гѡ съ ме́ртвыми; воскр҃се бг҃ъ сы́й, и҆ вселе́ннѣй жи́знь дарова̀.
И҆́ны стїхи̑ры а҆натѡ́лїевы, гла́съ то́йже.
Сті́хъ: Хвали́те є҆го̀ въ тѷмпа́нѣ и҆ ли́цѣ, хвали́те є҆го̀ во стрꙋ́нахъ и҆ ѻ҆рга́нѣ.
Пострада́лъ є҆сѝ крⷭ҇то́мъ, безстрⷭ҇тный бж҃ество́мъ, погребе́нїе прїѧ́лъ є҆сѝ тридне́вное, да на́съ свободи́ши ѿ рабо́ты вра́жїѧ, и҆ ѡ҆безсме́ртивъ ѡ҆животвори́ши на́съ хрⷭ҇тѐ бж҃е, воскрⷭ҇нїемъ твои́мъ чл҃вѣколю́бче.
Сті́хъ: Хвали́те є҆го̀ въ кѷмва́лѣхъ доброгла́сныхъ, хвали́те є҆го̀ въ кѷмва́лѣхъ восклица́нїѧ: всѧ́кое дыха́нїе да хва́литъ гдⷭ҇а.
Покланѧ́юсѧ, и҆ сла́влю, и҆ воспѣва́ю хрⷭ҇тѐ твоѐ и҆з̾ гро́ба воскрⷭ҇нїе, и҆́мже свободи́лъ є҆сѝ на́съ ѿ а҆́довыхъ нерѣши́мыхъ ᲂу҆́зъ: и҆ дарова́лъ є҆сѝ мі́рови ꙗ҆́кѡ бг҃ъ жи́знь вѣ́чнꙋю, и҆ ве́лїю млⷭ҇ть.
Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Жизнопрїе́мнагѡ твоегѡ̀ гро́ба стрегꙋ́ще законопрестꙋ́пнїи, съ кꙋстѡді́ею запеча́таша тогда̀: ты́ же ꙗ҆́кѡ безсме́ртенъ бг҃ъ и҆ всеси́ленъ, воскрⷭ҇лъ є҆сѝ тридне́венъ.
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Доше́дшꙋ тѝ во врата̀ а҆́дѡва, гдⷭ҇и, и҆ сїѧ̑ сокрꙋши́вшꙋ, плѣ́нникъ си́це вопїѧ́ше: кто̀ се́й є҆́сть, ꙗ҆́кѡ не ѡ҆сꙋжда́етсѧ въ преиспо́днихъ землѝ, но и҆ ꙗ҆́кѡ сѣ́нь разрꙋшѝ сме́ртное ᲂу҆зи́лище; прїѧ́хъ того̀ ꙗ҆́кѡ ме́ртва, и҆ трепе́щꙋ ꙗ҆́кѡ бг҃а. всеси́льне поми́лꙋй на́съ.
Сла́ва, стїхи́ра є҆ѵⷢ҇льскаѧ. И҆ ны́нѣ, бг҃оро́диченъ: Пребл҃гослове́нна є҆сѝ бцⷣе дв҃о: Славосло́вїе вели́кое.
Та́же, тропа́рь воскрⷭ҇нъ:
Воскр҃съ и҆з̾ гро́ба, и҆ ᲂу҆́зы растерза́лъ є҆сѝ а҆́да, разрꙋши́лъ є҆сѝ ѡ҆сꙋжде́нїе сме́рти гдⷭ҇и, всѧ̑ ѿ сѣте́й врага̀ и҆зба́вивый: ꙗ҆ви́вый же себѐ а҆пⷭ҇лѡмъ твои̑мъ, посла́лъ є҆сѝ ѧ҆̀ на про́повѣдь, и҆ тѣ́ми ми́ръ тво́й по́далъ є҆сѝ вселе́ннѣй, є҆ди́не многомлⷭ҇тиве.
Та́же є҆ктенїѝ: и҆ ѿпꙋ́стъ.
На лїтꙋргі́и бл҃жє́нны, гла́съ и҃:
Помѧнѝ на́съ, хрⷭ҇тѐ сп҃се мі́ра, ꙗ҆́коже разбо́йника помѧнꙋ́лъ є҆сѝ на дре́вѣ: и҆ сподо́би всѣ́хъ є҆ди́не ще́дре, нбⷭ҇номꙋ црⷭ҇твїю твоемꙋ̀.
Сті́хъ: Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
Слы́ши а҆да́ме, и҆ ра́дꙋйсѧ со є҆́ѵою: ꙗ҆́кѡ ѡ҆бнажи́вый пре́жде ѻ҆боѧ̑, и҆ пре́лестїю взе́мъ ва́съ плѣ́нники, крⷭ҇то́мъ хрⷭ҇то́вымъ ᲂу҆праздни́сѧ.
Сті́хъ: Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.
На дре́вѣ пригвожде́нъ бы́въ сп҃се на́шъ во́лею, ꙗ҆́же ѿ дре́ва клѧ́твы а҆да́ма и҆зба́вилъ є҆сѝ, воздаѧ̀ ꙗ҆́кѡ ще́дръ є҆́же по ѡ҆́бразꙋ, и҆ ра́йское селе́нїе.
Сті́хъ: Бл҃же́ни и҆згна́ни пра́вды ра́ди. ꙗ҆́кѡ тѣ́хъ є҆́сть црⷭ҇тво нбⷭ҇ное.
Дне́сь хрⷭ҇то́съ воскр҃съ ѿ гро́ба, всѣ̑мъ вѣ̑рнымъ подаѧ̀ нетлѣ́нїе, и҆ ра́дость ѡ҆бновлѧ́етъ мѷроно́сицамъ по стрⷭ҇ти и҆ воскрⷭ҇нїи.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Ра́дꙋйтесѧ мꙋ̑дрыѧ жєны̀ мѷронѡ́сицы, пє́рвыѧ хрⷭ҇то́во воскрⷭ҇нїе ви́дѣвшѧ, и҆ є҆го̀ возвѣсти́вшѧ а҆пⷭ҇лѡмъ, всегѡ̀ мі́ра воззва́нїе.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Дрꙋ́зи хрⷭ҇тѡ́вы а҆пⷭ҇ли ꙗ҆́вльшесѧ, сопресто́льни є҆гѡ̀ сла́вѣ бы́ти и҆мꙋ́ще, со дерзнове́нїемъ томꙋ̀ на́мъ предста́ти, ꙗ҆́кѡ ᲂу҆ч҃нцы̀ є҆гѡ̀ моли́тесѧ.
Сла́ва, трⷪ҇ченъ: Безнача́льнаѧ трⷪ҇це, нераздѣ́льное сꙋщество̀, сопрⷭ҇то́льнаѧ є҆ди́нице, є҆диноче́стнаѧ сла́вою, пренача́льное є҆стество̀ и҆ црⷭ҇тво, сп҃са́й и҆̀же вѣ́рою воспѣва́ющихъ тѧ̀.
И҆ ны́нѣ, бг҃оро́диченъ: Ра́дꙋйсѧ, бж҃їе простра́нное вмѣсти́лище: ра́дꙋйсѧ, ковче́же но́вагѡ завѣ́та: ра́дꙋйсѧ, рꙋ́чко, и҆з̾ неѧ́же ма́нна всѣ̑мъ даде́сѧ нбⷭ҇наѧ.
Прокі́менъ,гла́съ и҃: Помоли́тесѧ, и҆ воздади́те гдⷭ҇еви бг҃ꙋ на́шемꙋ. Сті́хъ: Вѣ́домъ во і҆ꙋде́и бг҃ъ, во і҆и҃ли ве́лїе и҆́мѧ є҆гѡ̀. А҆ллилꙋ́їа: Прїиди́те, возра́дꙋемсѧ гдⷭ҇еви, воскли́кнемъ бг҃ꙋ сп҃си́телю на́шемꙋ. Сті́хъ: Предвари́мъ лицѐ є҆гѡ̀ во и҆сповѣ́данїи, и҆ во ѱалмѣ́хъ воскли́кнемъ є҆мꙋ̀.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.