Глас 7-й. Среда.
Во вто́рникъ ве́чера,
на Гдⷭ҇и воззва́хъ, стїхи̑ры крⷭ҇тны. Гла́съ з҃:
Подо́бенъ: Не ктомꙋ̀ возбранѧ́еми є҆смы̀:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Дре́во и҆згна́ мѧ дре́вле и҆з̾ раѧ̀, ны́нѣ же дре́во къ раю̀ возведѐ, тебѣ̀ распе́ншꙋсѧ хрⷭ҇тѐ.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Чꙋ́до стра́шно, созда́нїю ка́кѡ созда́тель предстоѧ̀, ѡ҆сꙋжда́емь є҆́сть, и҆ распина́емь, на сп҃се́нїе человѣ́кѡвъ!
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Крⷭ҇те хрⷭ҇то́въ, а҆́гг҃лъ ст҃ы́хъ чꙋ́до, дїа́волꙋ же и҆ бѣсѡ́мъ вели́каѧ ꙗ҆́зва, сп҃са́й рабы̑ твоѧ̑.
Та́же мине́и стїхи̑ры ст҃о́мꙋ. Сла́ва, ст҃о́мꙋ, а҆́ще и҆́мать: И҆ ны́нѣ, крⷭ҇тобг҃оро́диченъ гла́са. А҆́ще ли нѣ́сть мине́и, и҆́ны стїхи̑ры бцⷣы, гла́съ з҃: Подо́бенъ: Дне́съ бди́тъ і҆ꙋ́да:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Ви́дѧщи просте́рта на дре́вѣ а҆́гнца, нескве́рнаѧ а҆́гница и҆ дв҃а, посредѣ̀ двою̀ разбѡ́йникꙋ, ᲂу҆вы̀ мнѣ̀, вопїѧ́ше, сладча́йшее моѐ ча́до! что̀ стра́нное сїѐ, и҆ пресла́вное та́инство; ка́кѡ тѧ̀ беззако́нный собо́ръ на крⷭ҇тъ воздви́же, и҆ же́лчїю напоѝ, ма́нны насы́тившаго человѣ́ки;
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Є҆гда́ тѧ на крⷭ҇тѣ̀ пригвожде́на дв҃а и҆ мт҃и твоѧ̀ ᲂу҆зрѣ̀ хрⷭ҇тѐ мо́й, сꙋдо́мъ законопрестꙋ́пнымъ, ѿ і҆ꙋдє́й на мѣ́стѣ ло́бнѣмъ: ᲂу҆вы̀ мнѣ̀, вопїѧ́ше, сн҃е мо́й любе́знѣйшїй! что̀ стра́нное видѣ́нїе сѐ; ка́кѡ тѧ̀ ко крⷭ҇тꙋ̀ пригвожда́ютъ дѣ́ти неразꙋ̑мныѧ є҆врє́йскїѧ, всѣ́хъ гдⷭ҇а;
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Є҆ди́нꙋ тѧ̀ всест҃а́ѧ влⷣчце, по ржⷭ҇твѣ̀ позна́хомъ всѝ дв҃ꙋ ꙗ҆́вльшꙋюсѧ, и҆ є҆го́же без̾ сѣ́мене ро́ждши, на дре́вѣ ви́дѧщи рꙋ́цѣ своѝ во́лею пригвозди́вшаго, пречⷭ҇таѧ пла́чꙋщи взыва́ше: во́лею долготерпѣли́ве, ᲂу҆мира́еши, и҆збавлѧ́ѧ всѣ́хъ ѿ сме́рти пою́щихъ тѧ̀.
Сла́ва, и҆ ны́нѣ, крⷭ҇тобг҃оро́диченъ: Влⷣчце всест҃а́ѧ дв҃о, ро́ждшаѧ гдⷭ҇а, за млⷭ҇рдїе на крⷭ҇тѣ̀ пригвозди́вшагосѧ, и҆ жи́зни стрꙋи̑ и҆сточи́вшаго мі́рꙋ, того̀ ᲂу҆молѝ сп҃сти́сѧ дꙋша́мъ на́шымъ. тебе́ бо є҆ди́нꙋ и҆́мамы вѣ́рнїи прибѣ́жище, стѣ́нꙋ и҆ застꙋпле́нїе: тѣ́мже и҆ притека́емъ къ покро́вꙋ твоемꙋ̀.
Та́же, Свѣ́те ти́хїй: Прокі́менъ днѐ. И҆ Сподо́би гдⷭ҇и въ ве́черъ се́й:
На стїхо́внѣ стїхи̑ры крⷭ҇тны, гла́съ з҃:
Не ктомꙋ̀ возбранѧ́еми є҆смы̀ дре́ва живо́тнагѡ, ᲂу҆пова́нїе и҆мꙋ́ще крⷭ҇тъ тво́й, гдⷭ҇и сла́ва тебѣ̀.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Повѣ́шенъ бы́въ на дре́вѣ безсме́ртне, разрꙋши́лъ є҆сѝ сѣ̑ти дїа́вѡли, гдⷭ҇и сла́ва тебѣ̀.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Мч҃нченъ: Неради́вше ѡ҆ всѣ́хъ земны́хъ ст҃і́и мч҃нцы, и҆ на сꙋди́щи хрⷭ҇та̀ мꙋ́жески проповѣ́давше, возмє́здїѧ ѡ҆ мꙋ́кахъ ѿ негѡ̀ прїѧ́сте: но ꙗ҆́кѡ и҆мꙋ́ще дерзнове́нїе, того̀ ᲂу҆моли́те, ꙗ҆́кѡ всеси́льнаго бг҃а, дꙋ́шы на́шѧ сп҃стѝ, притека́ющихъ къ ва́мъ, мо́лимсѧ.
Сла́ва, и҆ ны́нѣ, крⷭ҇тобг҃оро́диченъ: Своего̀ сн҃а на дре́вѣ ви́дѧщи дре́вле, се́рдце твоѐ ѻ҆рꙋ́жїемъ печа́ли ᲂу҆ѧзвлѧ́ше пречⷭ҇таѧ.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ: тропа́рь, є҆ктенїа̀ и҆ ѿпꙋ́стъ.
Во вто́рникъ на повече́рїи,
канѡ́нъ прест҃ѣ́й бцⷣѣ. Гла́съ з҃:
Пѣ́снь а҃
І҆рмо́съ: Ма́нїемъ твои́мъ на земны́й ѡ҆́бразъ преложи́сѧ, пре́жде ᲂу҆доборазлива́емое водно́е є҆стество̀ гдⷭ҇и: тѣ́мже немо́креннѡ пѣшеше́ствовавъ і҆и҃ль, пое́тъ тебѣ̀ пѣ́снь побѣ́днꙋю.
Оу҆ста́ви бꙋ́рю сласте́й, и҆ страсте́й мои́хъ, тишино́ю бж҃е́ственныѧ твоеѧ̀ мольбы̀ пренепоро́чнаѧ: ꙗ҆́кѡ да ти́химъ се́рдцемъ твоѐ славосло́влю неизглаго́ланное ржⷭ҇тво̀.
Всѐ жела́нїе и҆ сла́дость сп҃се́нїѧ ржⷭ҇тво́мъ твои́мъ бы́сть, бцⷣе влⷣчце: всѧ́кꙋ го́ресть ѿгонѧ́й, є҆́же ѿ страсте́й прегрѣше́нїй, рабѡ́мъ твои̑мъ.
Сла́ва: И҆зба́ви мѧ̀ пречⷭ҇таѧ, бѣсо́вскїѧ пре́лести, ѡ҆ѕлобле́нїѧ же и҆ вре́да, и҆ и҆скꙋше́нїѧ: да вѣ́рою тѧ̀ сла́влю, сꙋ́щꙋю по бз҃ѣ застꙋ́пницꙋ и҆ покро́въ мо́й.
И҆ ны́нѣ: Ꙗ҆ви́лсѧ є҆сѝ при кꙋпинѣ̀ мѡѷсе́ю, бж҃їй сло́ве, ꙗ҆́кѡ ѻ҆́гнь попалѧ́ѧ, и҆ не ѡ҆палѧ́ѧ же ѿню́дъ, є҆́же ѿ дв҃ы ржⷭ҇тво̀ твоѐ воѡбража́ѧ: є҆ѧ́же ра́ди человѣ́ка воѡбрази́лъ є҆сѝ.
Пѣ́снь г҃
І҆рмо́съ: Въ нача́лѣ нб҃са̀ всеси́льнымъ сло́вомъ твои́мъ ᲂу҆твержде́й гдⷭ҇и сп҃се, и҆ вседѣ́тельнымъ и҆ бж҃їимъ дх҃омъ, всю̀ си́лꙋ и҆́хъ: на недви́жимѣмъ мѧ̀ ка́мени и҆сповѣ́данїѧ твоегѡ̀ ᲂу҆твердѝ
Возне́сшагосѧ на крⷭ҇тъ, и҆ низло́жшаго а҆́да, бцⷣе сего̀ прилѣ́жнѡ молѝ ѡ҆ вѣ́рнѡ пою́щихъ тѧ̀ всегда̀ гла́сы и҆ пѣ́сньми сщ҃е́нными, наде́жде мі́ра, и҆ вѣ́рныхъ застꙋпле́нїе.
Вы́шшаѧ нб҃съ, и҆ сла́внѣйшаѧ херꙋві̑мъ, заче́нши родила̀ є҆сѝ бг҃а: тѣ́мже молѝ є҆го̀, прегрѣше́нїй и҆зба́вити мѧ̀, и҆ ѡ҆сꙋжде́нїѧ стра́шнагѡ, твое́ю млⷭ҇рдою мольбо́ю, и҆ па́че сло́ва си́лою твое́ю.
Сла́ва: И҆змѣни́вшаѧ человѣ́ки ѿ тлѝ сме́рти, ржⷭ҇тво́мъ твои́мъ влⷣчце, тлѣ́нїѧ мѧ̀ страсте́й и҆ недꙋ̑гъ и҆зба́ви, и҆ прегрѣше́нїй лю́тыхъ: и҆ живо́тъ нестарѣ́ющїйсѧ да́рꙋй мѝ, бж҃е́ственнымъ хода́тайствомъ твои́мъ.
И҆ ны́нѣ: Неизмѣ́ннѡ человѣ́кѡмъ ᲂу҆подо́бльсѧ по всемꙋ̀ бж҃їй сло́ве, ѿ дв҃ы чⷭ҇тыѧ проше́лъ є҆сѝ ꙗ҆́вѣ, и҆ всѣ̑мъ ꙗ҆ви́лъ є҆сѝ бг҃онача́лїе трисвѣ́тлое, въ неразли́чнѣ сꙋществѣ̀, неизмѣ́нныхъ ѵ҆поста́сехъ.
Пѣ́снь д҃
І҆рмо́съ: Ѻ҆́ч҃а нѣ́дра не ѡ҆ста́вль, и҆ соше́дъ на зе́млю хрⷭ҇тѐ бж҃е, та́йнꙋ ᲂу҆слы́шахъ смотре́нїѧ твоегѡ̀, и҆ просла́вихъ тѧ̀ є҆ди́не чл҃вѣколю́бче.
Млⷭ҇ть твою̀ и҆ млⷭ҇рдїе на рабы̑ твоѧ̑ чⷭ҇таѧ, прострѝ, при́снѡ молѧ́щыѧ тѧ̀, стра́шныѧ мꙋ́ки и҆збавлѧ́ющи мл҃твами твои́ми.
Чи́стою мл҃твою, и҆ те́плою вѣ́рою, къ тебѣ̀ прибѣга́ю пренепоро́чнаѧ: ты̀ бꙋ́ди ѡ҆чисти́лище мно́гихъ прегрѣше́нїй мои́хъ, и҆збавлѧ́ющи и҆ сп҃са́ющи мѧ̀.
Сла́ва: Ра́дости на́шеѧ хода́таица пречⷭ҇таѧ, твои́мъ ржⷭ҇тво́мъ ꙗ҆ви́сѧ влⷣчце: сего̀ молѝ пренепоро́чнаѧ, напа́стей и҆зба́вити, и҆ вѣ́чныѧ жи́зни сподо́бити мѧ̀.
И҆ ны́нѣ: Ѻ҆́ч҃ескихъ нѣ́дръ не ѿлꙋ́чьсѧ, и҆ ѿ дв҃ы вопло́щьсѧ хрⷭ҇тѐ бж҃е, сохранѝ ста́до твоѐ, смотре́нїѧ твоегѡ̀ покланѧ́ющеесѧ бж҃е́ствєннымъ ѡ҆бразѡ́мъ.
Пѣ́снь є҃
І҆рмо́съ: Но́щь несвѣтла̀ невѣ̑рнымъ хрⷭ҇тѐ, вѣ̑рнымъ же просвѣще́нїе въ сла́дости слове́съ твои́хъ. сегѡ̀ ра́ди къ тебѣ̀ ᲂу҆́треннюю, и҆ воспѣва́ю твоѐ бж҃ество̀.
Тѧ̀ молю̀ дв҃о чⷭ҇таѧ, ѿ мра́чнагѡ грѣха̀ дꙋ́шꙋ мою̀ и҆зба́вити, и҆ ѡ҆зари́ти бж҃е́ственною заре́ю покаѧ́нїѧ млⷭ҇ти твоеѧ̀.
Сꙋ́щыѧ въ пꙋчи́нѣ лю́тыхъ напа́стей, и҆ нꙋ́жныхъ страсте́й, прест҃а́ѧ чⷭ҇таѧ, твои́ми мл҃твами и҆ мольба́ми и҆зба́ви, и҆ сп҃сѝ хва́лѧщихъ тѧ̀.
Сла́ва: Ꙗ҆́же бг҃а заче́нши во ᲂу҆тро́бѣ дв҃и́честѣй, и҆ ро́ждши бцⷣе прест҃а́ѧ, тѧ̀ пою́щыѧ ѿ всѧ́кагѡ и҆зба́ви вѣ́чнагѡ ѡ҆сꙋжде́нїѧ.
И҆ ны́нѣ: Вѣ́дꙋще бж҃їю тѧ̀ мт҃рь чⷭ҇таѧ, и҆ застꙋ́пницꙋ на́шꙋ, тѧ̀ хода́таицꙋ предлага́емъ сп҃се́нїѧ на́шегѡ ко ще́дромꙋ гдⷭ҇ꙋ.
Пѣ́снь ѕ҃
І҆рмо́съ: Возопи́хъ гдⷭ҇и, внегда̀ скорбѣ́ти мѝ къ тебѣ̀, и҆ возве́лъ є҆сѝ живо́тъ мо́й многомлⷭ҇тиве.
Твоего̀ сн҃а влⷣчце, вознесе́ннаго на крⷭ҇тъ, и҆ и҆зба́вльшаго человѣ́ки ѿ тлѝ, ᲂу҆молѝ сп҃сти́сѧ на́мъ.
Пречⷭ҇таѧ влⷣчце, не ѡ҆ста́ви менѐ на тѧ̀ ᲂу҆пова́ющаго: но твою̀ ᲂу҆скорѝ по́мощь.
Сла́ва: Ѿ печа́ли и҆зба́ви призыва́ющихъ твоѐ бж҃е́ственное и҆́мѧ, и҆ стра́шныѧ свободѝ мꙋ́ки.
И҆ ны́нѣ: Пречⷭ҇таѧ влⷣчце, наде́ждо тве́рдаѧ, любо́вїю. пою́щыѧ тѧ̀, ꙗ҆́кѡ и҆́стиннꙋю бцⷣꙋ, сохранѝ.
Та́же, Гдⷭ҇и поми́лꙋй. три́жды. Сла́ва, и҆ ны́нѣ:
Сѣда́ленъ,гла́съ з҃:
Распе́ншагосѧ на́съ ра́ди хрⷭ҇та̀ бг҃а, и҆ низло́жшаго сме́рти держа́вꙋ, непреста́ннѡ молѝ бцⷣе дв҃о, да сп҃се́тъ дꙋ́шы на́шѧ.
Пѣ́снь з҃
І҆рмо́съ: Пе́щь ѻ҆́троцы ѻ҆гнепа́льнꙋ дре́вле росоточа́щꙋ показа́ша, є҆ди́наго бг҃а воспѣва́юще, и҆ глаго́люще: превозноси́мый ѻ҆тцє́въ бг҃ъ и҆ препросла́вленъ.
Въ недовѣ́дѣнїи и҆ печа́ли сы́й, и҆ въ бѣда́хъ, пречⷭ҇таѧ, тѧ̀ призыва́ю те́плѣ ѿ се́рдца моегѡ̀: предварѝ, и҆ и҆зба́ви мѧ̀, и҆ пода́ждь чⷭ҇таѧ, ᲂу҆тѣше́нїе мнѣ̀.
Прегрѣше́нїй мно́гихъ, и҆ страсте́й треволнє́нїѧ ѡ҆бꙋрева́ютъ мѧ̀, и҆ ко глꙋбинѣ̀ поги́бели низво́дѧтъ: да́ждь мнѣ̀ рꙋ́кꙋ бцⷣе, и҆ сп҃сѝ, и҆ поми́лꙋй мѧ̀ си́лою твое́ю.
Сла́ва: Твою̀ мт҃рь привождꙋ́ ти въ мл҃твꙋ сп҃се чл҃вѣколю́бче: ю҆́же прїе́мъ и҆зба́ви мѧ̀ прегрѣше́нїй и҆ бꙋ́дꙋщагѡ сꙋда̀, и҆ вѣ́чнꙋющагѡ и҆змѝ мꙋче́нїѧ.
И҆ ны́нѣ: Оу҆мерщвле́нꙋ дꙋ́шꙋ стѧжа́въ лю́тыми престꙋпле́ньми, тѧ̀ молю̀ влⷣчце, ᲂу҆мори́вшꙋю а҆́дъ ржⷭ҇тво́мъ твои́мъ, покаѧ́нїѧ ѡ҆́бразы ѡ҆живи́ мѧ.
Пѣ́снь и҃
І҆рмо́съ: Вои́стиннꙋ сꙋ́щаго бг҃а, и҆ всѣ́хъ сꙋщества̀ вино́внаго, хрⷭ҇та̀ превозно́симъ, и҆ славосло́вимъ во всѧ̑ вѣ́ки.
Сп҃си́ мѧ пречⷭ҇таѧ, ѿ бѣ́дъ, и҆ тлѝ, и҆ страсте́й: къ тебѣ́ бо прибѣга́ю мое́й наде́ждѣ, и҆ бж҃е́ственномꙋ сп҃се́нїю.
Въ ча́съ коне́чный, ѿ клевєтни́къ лю́тыхъ и҆з̾е́мши влⷣчце дв҃о, къ бж҃е́ственномꙋ жили́щꙋ сама̀ наста́ви мѧ̀.
Сла́ва: Возни́кни, ѽ дꙋшѐ! бцⷣѣ припа́дающи возопі́й: наде́жде и҆ сп҃се́нїе всѣ́хъ, ѻ҆гнѧ̀ вѣ́чнагѡ и҆зба́ви мѧ̀.
И҆ ны́нѣ: Є҆ди́нꙋ въ жена́хъ бл҃гослове́ннꙋю дв҃ꙋ воспои́мъ, хрⷭ҇та̀ превозноша́юще и҆ славосло́вѧще во всѧ̑ вѣ́ки.
Пѣ́снь ѳ҃
І҆рмо́съ: Мт҃и бж҃їѧ и҆ дв҃а, ро́ждшаѧ, и҆ дв҃ствꙋющаѧ па́ки, не є҆стества̀ дѣ́ло, но бж҃їѧ снизхожде́нїѧ: тѣ́мъ ꙗ҆́кѡ є҆ди́нꙋ, бж҃їихъ чꙋде́съ сподо́бльшꙋюсѧ, тѧ̀ при́снѡ велича́емъ.
Бцⷣа прино́ситъ тѝ мольбꙋ̀ ѡ҆ мнѣ̀, влⷣко хрⷭ҇тѐ, ю҆́же прїи́мъ, и҆зба́ви мѧ̀ ѿ всѧ́кїѧ мꙋ́ки.
Всегда̀ молю́ тѧ влⷣчце: смире́ннꙋю и҆зба́ви дꙋ́шꙋ мою̀, бꙋ́дꙋщагѡ сꙋда̀ и҆ мꙋ́ки.
Сла́ва: Творца̀ моего̀ и҆ зижди́телѧ молѝ дв҃о, стра́шнагѡ и҆зба́вити мѧ̀ сꙋда̀, и҆ жи́знь дарова́ти мѝ.
И҆ ны́нѣ: Всенепоро́чнаѧ мт҃и дв҃о чⷭ҇таѧ, дꙋше́вныхъ скве́рнъ и҆зба́ви твоѐ ста́до, тебѐ велича́ющее.
Та́же, Досто́йно є҆́сть: Трист҃о́е. По Ѻ҆́ч҃е на́шъ: тропарѝ и҆ про́чее ѻ҆бы́чно, и҆ ѿпꙋ́стъ.
Въ сре́дꙋ ᲂу҆́тра,
по а҃-мъ стїхосло́вїи, сѣда́льны крⷭ҇тны, гла́съ з҃:
Цр҃ковь вопїе́тъ тѝ хрⷭ҇тѐ бж҃е, въ пе́ѵкѣ, и҆ ке́дрѣ, и҆ кѷпарі́сѣ покланѧ́ющисѧ тебѣ̀: побѣ̑ды вѣ̑рнымъ да́рꙋй, бцⷣы ра́ди, и҆ поми́лꙋй на́съ.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
И҆́же менѐ ра́ди претерпѣ́вый, є҆́же на крⷭ҇тѣ̀ пригвожде́нїе, прїимѝ моѐ бо́дренное хвале́нїе хрⷭ҇тѐ бж҃е, и҆ сп҃си́ мѧ.
Сла́ва, и҆ ны́нѣ, крⷭ҇тобг҃оро́диченъ: Распе́ншагосѧ на́съ ра́ди хрⷭ҇та̀ бг҃а, и҆ низложи́вшаго сме́рти держа́вꙋ, непреста́ннѡ молѝ бцⷣе дв҃о, да сп҃се́тъ дꙋ́шы на́шѧ.
По в҃-мъ стїхосло́вїи, сѣда́льны крⷭ҇тны, гла́съ з҃:
Ѻ҆гнѧ̀ свѣтлѣ́йшее, и҆ пла́мене дѣ́йственнѣйшее дре́во показа́лъ є҆сѝ хрⷭ҇тѐ, крⷭ҇та̀ твоегѡ̀, попалѧ́ющее грѣхѝ человѣ́кѡвъ, и҆ просвѣща́ющее сердца̀ пою́щихъ во́льное твоѐ распѧ́тїе: хрⷭ҇тѐ бж҃е, сла́ва тебѣ̀.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
Ѡ҆блада́ѧй безпло́тными си́лами, и҆ свѣ́дый дꙋшѝ моеѧ̀ лѣ́ностное, крⷭ҇то́мъ твои́мъ сп҃си́ мѧ хрⷭ҇тѐ бж҃е, ꙗ҆́кѡ чл҃вѣколю́бецъ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Ра́дꙋйтесѧ пра́веднїи, да веселѧ́тсѧ нбⷭ҇наѧ: на земли́ бо мч҃нцы подвиза́вшесѧ, врага̀ попра́ша: да и҆гра́етъ цр҃ковь побѣди́тєльнаѧ, пра́зднꙋющи подвигополо́жникꙋ є҆ди́номꙋ, и҆ побѣдотво́рцꙋ хрⷭ҇тꙋ̀ бг҃ꙋ, подаю́щемꙋ мі́рови ве́лїю млⷭ҇ть.
Сла́ва, и҆ ны́нѣ, крⷭ҇тобг҃оро́диченъ: Є҆гда̀ зрѧ́щи тѧ̀ гдⷭ҇и дв҃а, распина́ема, пла́чꙋщи вопїѧ́ше тѝ: воспѣва́ю твоѐ неизрече́нное, ѽ сн҃е мо́й, долготерпѣ́нїе, и҆ є҆́же къ человѣ́кѡмъ кра́йнее и҆ бж҃е́ственное соше́ствїе.
По г҃-мъ стїхосло́вїи сѣда́льны, гла́съ з҃:
Распе́ншꙋсѧ тѝ влⷣко хрⷭ҇тѐ, вра́гъ свѧ́занъ бы́сть, и҆ сме́рть ᲂу҆мертви́сѧ: дꙋ́шы, ꙗ҆̀же во а҆́дѣ въ преиспо́днихъ содержи́мыѧ, ѿ ᲂу҆́зъ разрѣша́хꙋсѧ.
И҆́же на́съ ра́ди во́льное прїе́мый распѧ́тїе, сокрꙋшѝ врагѝ невѣ́дꙋщыѧ тѧ̀ бг҃а и҆́стиннаго, и҆ сп҃сѝ на́съ.
Сла́ва, и҆ ны́нѣ, крⷭ҇тобг҃оро́диченъ: Крⷭ҇то́мъ сн҃а твоегѡ̀ при́снѡ соблюда́еми дв҃о, прилѡ́гъ бѣсѡ́вскихъ и҆збѣга́емъ: тѣ́мже тѧ̀ по до́лгꙋ воспѣва́юще сла́вимъ, бцⷣе всепѣ́таѧ.
Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀ гдⷭ҇ню, [є҆гѡ́же краегране́сїе: Крⷭ҇тъ насажде́ный пре́лесть и҆сто́ргїй.] Творе́нїе кѵ́ръ і҆ѡ́сифово. Гла́съ з҃:
Пѣ́снь а҃
І҆рмо́съ: Ма́нїемъ твои́мъ на земны́й ѡ҆́бразъ преложи́сѧ, пре́жде ᲂу҆доборазлива́емое водно́е є҆стество̀ гдⷭ҇и: тѣ́мже немо́креннѡ пѣшеше́ствовавъ і҆и҃ль, пое́тъ тебѣ̀ пѣ́снь побѣ́днꙋю.
Распѧ́тїе влⷣка поноша́емь терпи́тъ, человѣ́кѡвъ ѿе́млѧ поношє́нїѧ, ꙗ҆́кѡ чл҃вѣколю́бецъ: копїе́мъ въ ре́бра пробода́етсѧ, си́мъ закала́ѧ врага̀ бори́телѧ.
Ꙗ҆́коже лꙋ́къ напрѧ́гъ крⷭ҇тъ тво́й млⷭ҇тиве, стрѣла́ми ᲂу҆ѧзви́лъ є҆сѝ гвозде́й сопротивобо́рца, сп҃се, и҆ ѿ негѡ̀ дре́вле ᲂу҆ѧзвлє́ныѧ человѣ́ки и҆сцѣли́лъ є҆сѝ.
Мч҃нченъ: Кровьмѝ ст҃ы́хъ, ме́рзкаѧ крове́й преста́ша сквернє́нїѧ, і҆́дѡлѡмъ приноси̑маѧ: всѧ́ же землѧ̀ ѡ҆свѧти́сѧ, тѣ́хъ хвала́ми при́снѡ ᲂу҆бл҃жа́ющи.
Мч҃нченъ: Воспѣ́ша си̑лы нбⷭ҇ныѧ, земны́хъ зрѧ́ще въ тѣлесѝ со безпло́тными борю́щихсѧ: ѿню́дꙋже подвигополо́жникъ си́хъ вѣнцы̀ побѣ́ждшихъ вѣнча̀.
Бг҃оро́диченъ: Раздра́сѧ рꙋкописа́нїе а҆да́мово, вопїѧ́ше пречⷭ҇таѧ влⷣчца, копїе́мъ сн҃е прободе́нꙋ тѝ бы́вшꙋ: тѣ́мже воспѣва́ю твоѐ страда́нїе, всѣ̑мъ и҆сточи́вшее безстра́стїе, влⷣко. Дрꙋгі́й канѡ́нъ прест҃ѣ́й бцⷣѣ: творе́нїе і҆ѡ́сифово. Гла́съ з҃:
І҆рмо́съто́йже.
Пою́щыѧ бцⷣе, вели̑чїѧ твоѧ̑ любо́вїю, твоѧ̑ снабдѝ лю́ди, и҆ ѿ вре́да и҆зба́ви: ты́ бо всѣ́хъ є҆сѝ предста́тельница и҆ наста́вница, чⷭ҇таѧ, и҆ ᲂу҆твержде́нїе.
Во́дꙋ безсме́ртїѧ ро́ждши дв҃о, и҆сцѣле́нїѧ во́ды на́мъ пода́ждь, всѧ̑ смертонѡ́сныѧ стра̑сти дꙋ́шъ на́шихъ и҆ тѣле́съ ѡ҆мыва́ющи.
Честно́е влⷣчце бг҃ора́дованнаѧ, селе́нїе ꙗ҆ви́ласѧ є҆сѝ поче́тшагѡ є҆стество̀ пра́ѻтца: тѣ́мже тѧ̀ чⷭ҇таѧ, мо́лимъ, всѧ́кагѡ безче́стїѧ страсте́й и҆зба́ви на́съ.
Сл҃нце пра́вды ро́ждши мі́рови, тьмꙋ̀ ѿженѝ ѿ воспѣва́ющихъ тѧ̀ вѣ́рою, ѻ҆трокови́це, во свѣтоза́рнѣмъ твое́мъ се́мъ и҆ ст҃ѣ́мъ хра́мѣ, всенепоро́чнаѧ.
Пѣ́снь г҃
І҆рмо́съ: Въ нача́лѣ нб҃са̀, всеси́льнымъ сло́вомъ твои́мъ ᲂу҆твержде́й гдⷭ҇и сп҃се, и҆ вседѣ́тельнымъ и҆ бж҃їимъ дх҃омъ, всю̀ си́лꙋ и҆́хъ: на недви́жимѣмъ мѧ̀ ка́мени и҆сповѣ́данїѧ твоегѡ̀ ᲂу҆твердѝ.
Пропны́й нб҃о ꙗ҆́кѡ ко́жꙋ, на дре́вѣ распросте́рлъ є҆сѝ рꙋ́цѣ і҆и҃се, рꙋкѝ неꙋдержа́нїе а҆да́мова грѣха̀ и҆сцѣлѧ́ѧ, ꙗ҆́кѡ млⷭ҇тивъ, и҆ и҆схища́ѧ всѣ́хъ ѿ рꙋкѝ льсти́вагѡ борца̀.
Тебѐ те́рнїемъ цр҃ю̀, лю́дїе законопрестꙋ́пнїи вѣнчава́ютъ, сла́вою вѣнча́вшаго человѣ́ки, и҆ преслꙋша́нїѧ а҆да́мова те́рнїе и҆скорени́вшаго, хрⷭ҇тѐ, и҆ насади́вшаго всѣ̑мъ бг҃оразꙋ́мїѧ прозѧбе́нїе.
Мч҃нченъ: Є҆стество́мъ сꙋ́ще сме́ртни, безсме́ртїю въ то́мъ поꙋчи́тисѧ и҆зво́листе премꙋ́дрїи: тѣ́мже ра̑ны и҆ скѡ́рби, мч҃нцы, гонє́нїѧ же, бїє́нїѧ, и҆ ᲂу҆дѡ́въ ѿсѣчє́нїѧ, всѧ̑ ра́дꙋющесѧ, претерпѣ́сте.
Мч҃нченъ: Тве́рдымъ по́мысломъ, потреби́ти всѧ̑ претѧ́щаго льсти́ваго врага̀ вы̀ страда́льцы смири́сте, смири́вшесѧ ѡ҆ хрⷭ҇тѣ̀, и҆ вознесо́стесѧ держа́вою бж҃е́ственною, на того̀ воѡрꙋжи́вшесѧ.
Бг҃оро́диченъ: Во́лею закла́наго а҆́гнца на стрⷭ҇ть прише́дша, зрѧ́щи мт҃и и҆ а҆́гница, сле́зъ и҆сто́чники пролива́еши, глаго́лющи: что̀ сїѐ ча́до свѧще́нное, ка́кѡ ᲂу҆мерщвлѧ́ешисѧ, ѡ҆живи́ти всѧ̑ ᲂу҆ме́ршыѧ промышлѧ́ѧ;
И҆́нъ І҆рмо́съ то́йже.
Да́ждь рабѡ́мъ твои̑мъ, чⷭ҇таѧ, сп҃си́тєльнаѧ прошє́нїѧ, въ бж҃е́ственнѣмъ твое́мъ се́мъ хра́мѣ, въ не́мже и҆сто́чникъ чꙋде́съ показа́ла є҆сѝ: и҆сточа́ѧ при́снѡ наи́тїемъ бж҃е́ственнымъ, и҆ вѣ́чнагѡ и҆зба́ви мꙋче́нїѧ.
Млⷭ҇тей бе́зднꙋ хрⷭ҇та̀ па́че вины̀ и҆ сло́ва, да́телѧ всѣ́хъ бл҃ги́хъ ро́ждши, чⷭ҇таѧ, бж҃е́ственный хра́мъ тво́й се́й показꙋ́еши вои́стиннꙋ, ѡ҆сѣне́нїемъ твои́мъ бж҃е́ственнымъ, всѧ́ческихъ страсте́й ѡ҆чище́нїе.
Бл҃гослове́нъ пло́дъ твоегѡ̀ чре́ва, дв҃о бцⷣе всѣ́хъ ра́досте: ра́дость бо всемꙋ̀ мі́рꙋ родила̀ є҆сѝ, и҆ весе́лїе вои́стиннꙋ, чл҃вѣколю́бца, разгна́вши печа́ль грѣхо́внꙋю, бг҃оневѣ́сто.
Ковче́же мы́сленный, ꙗ҆́же нетлѣ́ннꙋю ма́ннꙋ ро́ждшаѧ мі́рꙋ вои́стиннꙋ, посредѣ̀ на́съ дв҃о прїидѝ въ ча́съ се́й, и҆ всѧ́кїѧ на́съ и҆змѣнѝ скве́рны, чи́стѣ тебѐ ᲂу҆бл҃жа́ющихъ.
Пѣ́снь д҃
І҆рмо́съ: Ѻ҆́ч҃а нѣ́дра не ѡ҆ста́вль, и҆ соше́дъ на зе́млю хрⷭ҇тѐ бж҃е, та́йнꙋ ᲂу҆слы́шахъ смотре́нїѧ твоегѡ̀, и҆ просла́вихъ тѧ̀ є҆ди́не чл҃вѣколю́бче.
На землѝ чл҃вѣ́къ ꙗ҆́вльсѧ, нбⷭ҇ныѧ человѣ́ки соверши́лъ є҆сѝ, вознесе́нъ бы́въ на дре́во влⷣко, всѧ̑ совозне́слъ є҆сѝ воспѣва́ющыѧ твоѧ̑ страда̑нїѧ.
За сме́ртныхъ ᲂу҆мира́еши животѐ, за непра́вєдныѧ і҆и҃се мо́й пра́ведный, стрⷭ҇ть терпи́ши поно́снꙋю: пое́мъ долготерпѣли́ве, безмѣ́рное бл҃гоꙋтро́бїе твоѐ.
Мч҃нченъ: Ѕвѣре́й ᲂу҆стремлє́нїѧ, врѣ̑нїѧ ѻ҆́гнєннаѧ, рꙋ́къ же и҆ но́гъ ѿсѣчє́нїѧ, и҆сторга̑нїѧ ᲂу҆дѡ́въ, и҆ всѧ́ческꙋю и҆нꙋ́ю мꙋ́кꙋ претерпѣ́сте мч҃нцы, хода́тайствꙋющꙋю бж҃е́ственное наслажде́нїе.
Мч҃нченъ: Ѿ тѣле́сныхъ конє́цъ страда́льцы, ко хрⷭ҇тꙋ̀ всѣ́хъ бг҃ꙋ зовꙋ́ще, ᲂу҆слы́шани бы́сте, и҆ на ка́мень вознесо́стесѧ бж҃е́ственнагѡ ны́нѣ соверше́нїѧ.
Бг҃оро́диченъ: Мольбꙋ̀ ѡ҆ на́съ къ воплоще́нномꙋ и҆з̾ тебѐ бцⷣе, сотворѝ, ꙗ҆́кѡ да ѡ҆брѧ́щемъ по́мощь во вре́мѧ напа́сти, и҆̀же тогѡ̀ стра̑сти сла́вѧщїи.
И҆́нъ І҆рмо́съ то́йже.
Тѧ̀ а҆ввакꙋ́мъ го́рꙋ дре́вле возгласи́въ, пречⷭ҇таѧ бцⷣе, добродѣ́тельми прїѡсѣне́ннꙋю, всѣ́хъ влⷣчце ѡ҆сѣнѧ́ющꙋю, ѿ ѡ҆пале́нїѧ ѕло́бы нача́льнагѡ борца̀.
Моле́нїе гдⷭ҇ꙋ принесѝ, воплоще́нномꙋ и҆з̾ твои́хъ влⷣчце, пречⷭ҇тыхъ крове́й, сп҃стѝ лю́ди твоѧ̑ всѧ́кагѡ вре́да, тебѐ по до́лгꙋ бл҃жа́щыѧ.
Твоѧ̀ пресла́внаѧ сїѧ̀ бг҃обл҃года́тнаѧ цр҃ковь бы́сть во и҆сцѣле́нїе дꙋ́шъ же и҆ тѣле́съ: ᲂу҆ставлѧ́етъ бо всѧ́кꙋ болѣ́знь, и҆ ѡ҆чища́етъ ѿ страсте́й вѣ́рнѡ тебѐ бл҃жа́щыѧ.
Посѣще́нїемъ твои́мъ дв҃о, сп҃сѝ те́плымъ и҆ чⷭ҇тны́мъ, всѣ́хъ съ любо́вїю прибѣга́ющихъ влⷣчце, къ твоемꙋ̀ застꙋпле́нїю, посѣща́й и҆ дава́й ꙗ҆́же къ жи́зни прошє́нїѧ.
Пѣ́снь є҃
І҆рмо́съ: Гдⷭ҇и бж҃е мо́й, ѿ но́щи ᲂу҆́треневавъ, тебѣ̀ молю́сѧ: пода́ждь мѝ ѡ҆ставле́нїе прегрѣше́нїй мои́хъ: и҆ къ свѣ́тꙋ твои́хъ повелѣ́нїй пꙋти̑ моѧ̑ напра́ви, молю́сѧ.
Распѧ́тїе прїѧ́тъ во ѕлы́хъ ѿѧ́тїе, бж҃їй сло́ве, же́лчи же вкꙋси́лъ є҆сѝ, сла́достнагѡ бра́шна го́рькїй вре́дъ потреблѧ́ѧ. сла́ва мно́гомꙋ бл҃гоꙋтро́бїю твоемꙋ̀.
И҆́же на крⷭ҇тѣ̀ воздви́женїемъ твои́мъ, всю̀ зе́млю поколеба́лъ є҆сѝ бж҃е́ственною твое́ю держа́вою, и҆ и҆сцѣлѧ́еши є҆ѧ̀ влⷣко, сокрꙋшє́нїѧ, и҆ коле́блємаѧ сердца̀ къ твоемꙋ̀ ᲂу҆твержда́еши позна́нїю.
Мч҃нченъ: Распросте́ръ велїа́ръ всю́дꙋ сѣ̑ти ѕлѡ́бныѧ, но не ѡ҆б̾ѧ́лъ є҆́сть хрⷭ҇тѡ́вы мч҃нки: крилѣ́ бо прїе́мше ѻ҆́гнєнныѧ, ко ѻ҆би́телємъ бж҃е́ствєннымъ достиго́ша.
Мч҃нченъ: Ма́нїемъ неѡскꙋ́днымъ ѿ бг҃а ѡ҆божа́еми страстоте́рпцы, болѣ́зненныхъ мꙋче́нїй ѿню́дъ не ᲂу҆страши́стесѧ, ꙗ҆́коже и҆но́мꙋ стра́ждꙋщꙋ, си́це премꙋ́дрїи са́ми пребы́сте.
Бг҃оро́диченъ: Кі́има ѻ҆чи́ма воззрю̀, ѻ҆́ко и҆зсꙋша́ющее всѧ̑ бє́здны, сн҃е мо́й, ᲂу҆гаша́емое, на крⷭ҇тѣ̀ ви́сѧщꙋ тѝ; чⷭ҇таѧ дв҃а вопїѧ́ше, рыда́ньми себѐ смꙋща́ющи.
И҆́нъ
І҆рмо́съ: Но́щь несвѣтла̀ невѣ̑рнымъ хрⷭ҇тѐ, вѣ̑рнымъ же просвѣще́нїе въ сла́дости слове́съ твои́хъ: сегѡ̀ ра́ди къ тебѣ̀ ᲂу҆́тренюю, и҆ воспѣва́ю твоѐ бж҃ество̀.
Ѡ҆тѧгче́нныхъ сно́мъ грѣхо́внымъ. чⷭ҇таѧ, бо́дры творѧ́щи, ѻ҆ба́че же въ пречⷭ҇тнѣ́мъ хра́мѣ твое́мъ, твое́ю бо́дренною бж҃е́ственною мл҃твою на́съ ᲂу҆ще́дри, бг҃оневѣ́сто.
Да́ждь чⷭ҇таѧ, всѣ̑мъ на́мъ рꙋ́кꙋ по́мощи къ тебѣ̀ прибѣга́ющымъ, и҆ ѿмы́й всѧ́кїѧ ѕло́бы скве́рнꙋ, и҆ болѣ̑зни ѡ҆чи́сти мл҃твами твои́ми.
Ꙗ҆́же бг҃а заче́нши во ᲂу҆тро́бѣ дв҃и́честѣй, и҆ ро́ждши бцⷣе пречⷭ҇таѧ, тѧ̀ пою́щихъ и҆зба́ви всѧ́кагѡ вѣ́чнагѡ ѡ҆сꙋжде́нїѧ.
Въ хра́мъ тво́й вѣ́рою приходѧ́щихъ дꙋ́шы ѡ҆бновлѧ́ютсѧ ѡ҆бетша́вшыѧ грѣхмѝ, и҆ по до́лгꙋ тѧ̀ всѝ пренепоро́чнаѧ, сла́вѧтъ.
Пѣ́снь ѕ҃
І҆рмо́съ: Пла́вающаго въ молвѣ̀ жите́йскихъ попече́нїй, съ корабле́мъ потоплѧ́ема грѣхѝ, и҆ дꙋшетлѣ́нномꙋ ѕвѣ́рю примета́ема, ꙗ҆́кѡ і҆ѡ́на хрⷭ҇тѐ вопїю́ ти: и҆з̾ смертоно́сныѧ глꙋбины̀ возведи́ мѧ.
И҆зба́вителю сы́й є҆ди́не, цѣ́нꙋ твою̀ вда́лъ є҆сѝ сп҃си́тельнꙋю кро́вь, и҆ и҆скꙋпи́лъ є҆сѝ плѣнє́ныѧ ны̀ пребл҃гі́й, и҆ твоемꙋ̀ роди́телю приве́лъ є҆сѝ, ᲂу҆би́въ крⷭ҇то́мъ хрⷭ҇тѐ, мꙋчи́телѧ.
Невоздержа́нїемъ дре́вле паде́нїе лю́тое под̾ѧ́хъ, хрⷭ҇то́съ же воздвиза́емь на дре́во, рꙋ́цѣ просте́ръ, па́дшаго мѧ̀ воздви́же, и҆ ᲂу҆ѧзви́всѧ во́лею, всѧ̑ моѧ̑ ꙗ҆́звы ꙗ҆́вѣ и҆сцѣлѝ.
Мч҃нченъ: Дрема́нїемъ пре́лести ѿню́дъ не воздрема́вшесѧ, всѧ́ко ᲂу҆стремле́нїе ᲂу҆спи́сте мꙋчи́телей, мч҃нцы: и҆ и҆̀же пра́веднымъ прили́чнымъ сно́мъ ᲂу҆́спше бл҃же́ннїи, бо́дреннїи ѡ҆ всѣ́хъ мл҃твєнницы бы́сте.
Мч҃нченъ: Оу҆твержде́ни на ка́мени бж҃е́ственныхъ хрⷭ҇то́выхъ повелѣ́нїй, вра́жїими ко́зньми непревра́тни пребы́сте всесла́внїи мч҃нцы: и҆ того̀ нога́ми попра́сте бг҃омꙋ́дреннѡ, къ бг҃ꙋ бг҃олѣ́пнѣ ше́ствꙋюще.
Бг҃оро́диченъ: Ю҆́но ѻ҆троча̀ ражда́еши бцⷣе, пре́жде вѣ̑къ безлѣ́тнѡ ѻ҆ц҃ꙋ̀ сразꙋмѣва́емаго, ѡ҆бновлѧ́ющаго крⷭ҇то́мъ человѣ́чество, ѡ҆бетша́вшее грѣхмѝ ѕлонача́льнагѡ совѣ́томъ, пренепоро́чнаѧ.
И҆́нъ
І҆рмо́съ: І҆ѡ́на и҆з̾ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.
Є҆ди́на на́мъ сп҃се́нїѧ и҆сточи́ла є҆сѝ во́дꙋ, є҆ди́на чⷭ҇таѧ, распале́нїе пре́лести и҆зсꙋши́вши, ѡ҆роша́еши ра́зꙋмъ и҆́стинный рабѡ́мъ твои̑мъ.
Ѡ҆дꙋшевле́нный бг҃а на́шегѡ гра́де, ста́до твоѐ ѿ безбо́жныхъ ва̑рваръ, трꙋ́са же и҆ нꙋ́жди, и҆ всѧ́ческагѡ и҆скꙋше́нїѧ свободѝ.
Ꙗ҆́звы дꙋ́шъ на́шихъ, бцⷣе ѿженѝ, мл҃твъ твои́хъ ѡ҆кропле́нїемъ, и҆ тѣлє́сныѧ недꙋ́ги: да бж҃е́ственными гла́сы воспѣва́емъ тѧ̀.
Ꙗ҆́же разрѣши́вшаѧ ѿ болѣ́зней дв҃о є҆́ѵꙋ, ржⷭ҇тво́мъ твои́мъ пречⷭ҇тымъ ѻ҆трокови́це, разрѣши́ ми болѣ̑зни стра̑стныѧ дꙋши́ же и҆ тѣлесѐ.
Пѣ́снь з҃
І҆рмо́съ: Пе́щь ѻ҆́троцы ѻ҆гнепа́льнꙋ дре́вле росоточа́щꙋ показа́ша, є҆ди́наго бг҃а воспѣва́юще, и҆ глаго́люще: превозноси́мый ѻ҆тцє́въ бг҃ъ и҆ препросла́вленъ.
Неболѣ́зненнꙋю ѡ҆брѣ́те жи́знь пра́ѻтецъ, тебѣ̀ во́лею поболѣ́вшꙋ на крестѣ̀ и҆ ме́ртвꙋ бы́вшꙋ, и҆ ѕмі́ѧ ᲂу҆мертви́вшꙋ, і҆и҃се хрⷭ҇тѐ многомлⷭ҇тиве.
Зако́нныѧ клѧ́твы и҆зба́вихомсѧ всѝ: законода́вецъ бо воздви́жесѧ на крⷭ҇тъ, бл҃гослове́нїе приснотекꙋ́щее и҆ бл҃года́ть, и҆ млⷭ҇ть, и҆ тлѣ́нїю и҆сточи́въ потребле́нїе.
Мч҃нченъ: Во́льными ᲂу҆стремле́ньми пристꙋпа́юще къ мꙋче́нїємъ мч҃нцы, во́лею пострада́вшаго воѡбража́хꙋ: ѿ негѡ́же вѣнча́вшесѧ, со а҆́гг҃лы ны́нѣ ликовствꙋ́ютъ.
Мч҃нченъ: Тѣ́ло преда́вше разли̑чнымъ мꙋ́камъ прехва́льнїи мч҃нцы, кро́вными пролїѧ́нїи безплѡ́тныѧ врагѝ ᲂу҆дави́сте, и҆ и҆сто́чники и҆сцѣле́нїй и҆сточа́ете.
Бг҃оро́диченъ: Ка́кѡ не воспла́чꙋсѧ сладча́йшее ча́до, на крⷭ҇тѣ̀ зрѧ́щи тѧ̀; ка́кѡ не возрыда́ю непра́веднѡ тебѐ стра́ждꙋща, сꙋдїѐ пра́веднѣйшїй; дв҃а мт҃и вѣща́ше.
И҆́нъ І҆рмо́съ то́йже.
Ѻ҆́гнь ро́ждшаѧ бж҃е́ственный дв҃о, хвра̑стныѧ попалѝ стра̑сти воспѣва́ющихъ тѧ̀ всепѣ́таѧ, и҆ свѣ́томъ ѡ҆зарѝ покаѧ́нїѧ всѣ́хъ, мо́лимсѧ.
Нетлѣ́ннаѧ ѻ҆трокови́це, ѿ тлѝ на́съ и҆зба́ви: бж҃їѧ пала́то ѡ҆дꙋшевле́ннаѧ, хра́мы на́съ покажѝ бж҃е́ственнагѡ дх҃а, въ цр҃кви твое́й непреста́ннѡ вѣ́рою пою́щихъ тѧ̀.
Стрꙋи̑ и҆злива́еши и҆сцѣле́нїй всѣ̑мъ, и҆сто́чникъ бо жи́зни родила̀ є҆сѝ: и҆ те́плою бцⷣе, мл҃твою твое́ю, сїѐ твоѐ ста́до ѡ҆чи́сти ѿ скве́рны, бг҃оневѣ́сто.
Ѡ҆́бразы всѝ бж҃е́ственнагѡ твоегѡ̀ ржⷭ҇тва̀, бж҃е́ственнїи прⷪ҇ро́цы ви́дѣвше, ра́достнѡ воспѣва́хꙋ, вопїю́ще: препѣ́тый ѻ҆тцє́въ бж҃е бл҃гослове́нъ є҆сѝ.
Пѣ́снь и҃
І҆рмо́съ: Неѡпа́льнаѧ ѻ҆гню̀ въ сїна́и прича́щшаѧсѧ кꙋпина̀ бг҃а ꙗ҆вѝ медленоѧзы́чномꙋ и҆ гꙋгни́вомꙋ мѡѷсе́ови, и҆ ѻ҆́троки ре́вность бж҃їѧ трѝ непребори̑мыѧ во ѻ҆гнѝ пѣвцы̀ показа̀: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
Кро́вь и҆ вода̀ и҆сте́кшаѧ и҆з̾ ре́бръ твои́хъ сп҃се, мі́ръ ве́сь ѡ҆бнови́ша, и҆ нетлѣ́нїе и҆сточи́ша: жє́ртвы же мє́рзкїѧ и҆ проли́тїе скве́рныхъ крове́й преста́ша. тѣ́мже тѧ̀ всѧ̑ дѣла̀ ꙗ҆́кѡ гдⷭ҇а пое́мъ, и҆ превозно́симъ во всѧ̑ вѣ́ки.
Вѣнце́мъ терно́вымъ ᲂу҆вѧ́злсѧ є҆сѝ сп҃се, ѻ҆́цта и҆ же́лчи вкꙋси́лъ є҆сѝ, и҆ ѡ҆плева́нъ бы́лъ є҆сѝ, и҆ бїе́нъ, воздви́глсѧ є҆сѝ на крⷭ҇тѣ̀, гво́здїе прїе́мъ, и҆́миже сп҃се́нъ бы́въ а҆́зъ взыва́ю тѝ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во всѧ̑ вѣ́ки.
Мч҃нченъ: Ѿ неистощи́мыхъ сокро́вищъ и҆́стины, пресвѣ́тлѡ ѡ҆богати́вшесѧ страда́льцы, всѧ́кꙋ нищетꙋ̀ ѡ҆плева́сте і҆́дѡльскꙋю, и҆ ѡ҆богати́телїе ни́щихъ ꙗ҆ви́стесѧ, вопїю́ще: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆гѡ̀ во всѧ̑ вѣ́ки.
Мч҃нченъ: Законоположє́нїѧ ѕлочести́выхъ небрегꙋ́ще, ꙗ҆́коже ѻ҆́троцы, мч҃нцы, во ѻ҆́гнь горѧ́щъ вве́ржени бы́сте, въ не́мже ро́сꙋ бж҃їю прохла́ждшꙋю ва́съ ѡ҆брѣто́сте, вопїю́ще: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во всѧ̑ вѣ́ки.
Бг҃оро́диченъ: Зако́нный дре́вле тѧ̀ ковче́гъ проѡбража́ше чⷭ҇таѧ, не скрижа̑ли внꙋ́трь носѧ́щъ, но хрⷭ҇та̀ законода́вца, є҆го́же беззако́ннїи лю́дїе на крⷭ҇тѣ̀ пригвозди́ша, на́съ вопїю́щихъ сп҃са́юща: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во всѧ̑ вѣ́ки.
И҆́нъ
І҆рмо́съ: Є҆ди́наго безнача́льнаго цр҃ѧ̀ сла́вы, є҆го́же бл҃гословѧ́тъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте сщ҃е́нницы, лю́дїе превозноси́те є҆го̀ во вѣ́ки.
Чꙋде́съ бе́зднꙋ и҆сточа́ющи мі́рꙋ всепѣ́таѧ, страсте́й на́шихъ стрꙋю̀ и҆зсꙋшѝ, и҆ ѡ҆ставле́нїѧ ро́сꙋ и҆сточѝ на́мъ, вѣ́рою несꙋмнѣ́нною почита́ющымъ тѧ̀ дв҃о.
И҆з̾ тебѐ сл҃нце пра́ведное возсїѧ̀, во тьмѣ̀ страсте́й сѣдѧ́щымъ, тебѐ свѣ́тъ содѣ́ла всепѣ́таѧ чⷭ҇таѧ: тѣ́мже тѧ̀ по до́лгꙋ пои́мъ бцⷣе.
Цр҃ковь всесвѣ́тлаѧ бж҃їѧ бы́вши, собира́ющыѧсѧ во ст҃ѣ́мъ хра́мѣ твое́мъ рабы̑ твоѧ̑, дх҃а жили̑ща покажѝ чⷭ҇таѧ, тебѐ славосло́вѧщыѧ во всѧ̑ вѣ́ки.
Свѣ́томъ твоегѡ̀ ржⷭ҇тва̀ вселе́ннꙋю чꙋдолѣ́пнѡ просвѣти́ла є҆сѝ бцⷣе, и҆́стиннаго бг҃а на рꙋкꙋ̀ твоє́ю носи́вши, просвѣща́ющаго при́снѡ вѣ́рою зовꙋ́щыѧ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.
Пѣ́снь ѳ҃
І҆рмо́съ: Мт҃и бж҃їѧ и҆ дв҃а, ро́ждшаѧ и҆ дв҃ствꙋющаѧ па́ки, не є҆стества̀ дѣ́ло, но бж҃їѧ снизхожде́нїѧ: тѣ́мъ ꙗ҆́кѡ є҆ди́нꙋ бж҃їихъ чꙋде́съ сподо́бльшꙋюсѧ, тѧ̀ при́снѡ велича́емъ.
Крѣ́пость вра́жїѧ ѿню́дъ ѡ҆скꙋдѣ̀, тебѣ̀ крѣ́пкѡ на дре́вѣ си́льне возопи́вшꙋ къ пребезнача́льномꙋ ѻ҆ц҃ꙋ̀ твоемꙋ̀, и҆ созва́вшꙋ расточє́нныѧ ѻ҆́вцы твоѧ̑ влⷣко хрⷭ҇тѐ, къ твоемꙋ̀ позна́нїю.
Ꙗ҆́коже а҆́гнецъ воздви́глсѧ є҆сѝ влⷣко, на крⷭ҇тъ во́лею, и҆схища́ѧ ѿ во́лка словє́сныѧ сп҃се, ѻ҆́вцы твоѧ̑, и҆ во ѡ҆гра́дѣ твои́хъ повелѣ́нїй затворѧ́ѧ сїѧ̑ воспѣва́ющыѧ тѧ̀.
Мч҃нченъ: Твои́хъ страсте́й подража́телїе ꙗ҆влѧ́еми бл҃госла́внїи стрⷭ҇тоте́рпцы, многоѡбра̑зныѧ ви́ды мꙋ́къ претерпѣ́ша чл҃вѣколю́бче: ѿню́дꙋже вѣнцы̀ ᲂу҆лꙋчи́ша сла́вы, и҆ црⷭ҇твїѧ твоегѡ̀ хрⷭ҇тѐ сподо́бишасѧ.
Мч҃нченъ: Со́лнєчныѧ ѡ҆блистава́ютъ бл҃года̑ти, просвѣща́юще вѣ̑рныѧ, чⷭ҇тны́хъ стрⷭ҇тоте́рпєцъ достохва́льное торжество̀: ѿню́дꙋже и҆ и҆̀же сїѐ при́снѡ соверша́ющїи, тьмы̀ прегрѣше́нїи лю́тыхъ и҆збавлѧ́емсѧ.
Бг҃оро́диченъ: Свѣ́тъ мы́сленный на крⷭ҇тѣ̀ ѡ҆блиста̀, тво́й пречⷭ҇таѧ сн҃ъ, и҆ нача́льники тьмы̀ ѡ҆бличѝ пренепоро́чнаѧ: со́лнечный помрачѝ свѣ́тъ, и҆ вѣ́рныхъ и҆сполнє́нїѧ чⷭ҇таѧ, просвѣти́лъ є҆́сть.
И҆́нъ
І҆рмо́съ: Нетлѣ́нїѧ и҆скꙋше́нїемъ ро́ждшаѧ, и҆ всехитрецꙋ̀ сло́вꙋ пло́ть взаимода́вшаѧ, мт҃и неискꙋсомꙋ́жнаѧ дв҃о бцⷣе, прїѧ́телище нестерпи́магѡ. село̀ невмѣсти́магѡ зижди́телѧ твоегѡ̀, тѧ̀ велича́емъ.
Сщ҃е́ннѣйши вы́шнихъ си́лъ ꙗ҆ви́ласѧ є҆сѝ, творца́ бо всѣ́хъ поро́ждши, мт҃и неискꙋсомꙋ́жнаѧ ст҃а́ѧ бцⷣе: тѣ́мже тѧ̀ со а҆́гг҃лы сла́вимъ, непреста́ннѡ воспѣва́юще вели̑чїѧ твоѧ̑.
Ꙗ҆́кѡ просвѣща́емь зарѧ́ми бж҃е́ственнагѡ дх҃а, го́рꙋ дв҃о зри́тъ тѧ̀ дре́вле присѣ́ннꙋю сщ҃е́ннѣйшїй прⷪ҇ро́къ бцⷣе. тѣ́мже тѧ̀ со а҆́гг҃лы земні́и ᲂу҆бл҃жа́емъ, ꙗ҆́коже прорекла̀ є҆сѝ бг҃обл҃же́ннаѧ.
Рꙋ́чка ꙗ҆ви́ласѧ є҆сѝ ма́ннꙋ бж҃е́ственнꙋю носѧ́щи, лѣ́ствица ви́дѣна была̀ є҆сѝ человѣ́ки ѿ землѝ возводѧ́щи, є҆ди́на неискꙋсомꙋ́жнаѧ дв҃о бцⷣе. тѣ́мже тѧ̀ соше́дшесѧ вѣ́рнїи славосло́вимъ по до́лгꙋ бг҃ора́дованнаѧ.
Бы́вшаѧ бж҃ества̀ ѻ҆трокови́це селе́нїе, бы́вша мѧ̀ разбо́йникѡвъ дꙋшетлѣ́нныхъ верте́пъ, и҆ дѣ́лателище всѧ́кагѡ беззако́нїѧ, ба́нею мѧ̀ сле́зъ ѡ҆мы́вши, бж҃е́ственнагѡ дх҃а жили́ще ꙗ҆вѝ.
Свѣ́тъ ро́ждшаѧ є҆ди́на предвѣ́чный, вѣ́чныѧ мѧ̀ тьмы̀ и҆зба́ви влⷣчце, и҆ просвѣтѝ дв҃о дꙋ́шꙋ мою̀, страстьмѝ житїѧ̀ всю̀ ѡ҆мраче́ннꙋю, да любо́вїю при́снѡ сла́влю тѧ̀.
Та́же, Досто́йно є҆́сть: и҆ є҆ктенїа̀, и҆ свѣти́ленъ, и҆ ѱалмы̀ ѻ҆бы̑чныѧ.
На стїхо́внѣ стїхи̑ры крⷭ҇тны, гла́съ з҃:
Влⷣка сы́й чл҃вѣколю́бче жизнода́вче, и҆скꙋпи́лъ є҆сѝ крⷭ҇то́мъ твои́мъ вселе́ннꙋю, гдⷭ҇и, сла́ва тебѣ̀.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
На крⷭ҇тѣ̀ пригвозди́сѧ лоза̀ и҆́стиннаѧ, и҆ ѡ҆б̾има́ша ꙗ҆зы́цы ра́й съ разбо́йникомъ: сїѧ̀ сла́ва цр҃ко́внаѧ, сїѐ бога́тство црⷭ҇твїѧ. пострада́вый на́съ ра́ди, гдⷭ҇и, сла́ва тебѣ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Свѣти̑ла ꙗ҆ви́шасѧ вселе́ннѣй всехва́льнїи страстоте́рпцы хрⷭ҇тѡ́вы, вопїю́ще: гдⷭ҇и, сла́ва тебѣ̀.
Сла́ва, и҆ ны́нѣ, крⷭ҇тобг҃оро́диченъ: На дре́вѣ пригвожде́на тѧ̀ во́лею, ꙗ҆́кѡ всенепоро́чнаѧ ᲂу҆зрѣ̀ пла́чꙋщи поѧ́ше держа́вꙋ твою̀.
Та́же, Бл҃го є҆́сть: Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ча́съ пе́рвый, и҆ про́чее, и҆ ѿпꙋ́стъ.
Въ сре́дꙋ бл҃жє́нны, гла́съ з҃:
Красе́нъ бѣ̀ и҆ до́бръ въ снѣ́дь, и҆́же менѐ ᲂу҆мертви́вый пло́дъ: хрⷭ҇то́съ є҆́сть дре́во живо́тное, ѿ негѡ́же ꙗ҆ды́й не ᲂу҆мира́ю, но вопїю̀ съ разбо́йникомъ: помѧни́ мѧ гдⷭ҇и, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Распросте́рлъ є҆сѝ на крⷭ҇тѣ̀ дла̑ни, просте́ртїѧ рꙋкѝ а҆да́мовы къ дре́вꙋ снѣ́дномꙋ, и҆справлѧ́ѧ поползне́нїе ще́дре, ра́ди бл҃гости мно́гїѧ: тѣ́мже тѧ̀ сла́вимъ бл҃годѣ́телю гдⷭ҇и.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
На мѣ́стѣ тѧ̀ ло́бнѣмъ собо́ръ є҆вре́йскїй, хрⷭ҇тѐ цр҃ю̀, распѧ̀, сокрꙋша́юща лꙋка́вагѡ гꙋби́тельнꙋю главꙋ̀, и҆ и҆сточа́юща на́мъ ѿ ре́бръ ст҃ы́хъ твои́хъ рѣ́ки ѡ҆ставле́нїѧ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Мч҃нченъ: Подо́бѧщесѧ хрⷭ҇тѡ́вымъ стрⷭ҇те́мъ честны̑мъ и҆ сп҃си́тєльнымъ мч҃нцы прехва́льнїи, претерпѣ́сте мꙋ̑ки многови̑дныѧ, и҆ къ безсме́ртїю преидо́сте вкꙋ́пѣ: тѣ́мже бл҃жи́ми є҆стѐ.
Сла́ва: Соблюдѝ, ѽ трⷪ҇це ст҃а́ѧ! пою́щыѧ тѧ̀ рабы̑ твоѧ̑, ᲂу҆крѣпѝ си́лою крⷭ҇та̀, и҆ къ вы́шнемꙋ гра́дꙋ ходи́ти напра́ви на́съ: и҆дѣ́же и҆ бы́вше, ѡ҆брѧ́щемъ млⷭ҇ть.
И҆ ны́нѣ: Распина́ема и҆з̾ тебѐ ро́ждшагосѧ зрѧ́щи, слезѧ́ще, ᲂу҆тро́бою смꙋща́ющисѧ, мт҃и чⷭ҇таѧ: ка́кѡ сїѧ̑ во́лею стра́ждеши сн҃е, зовꙋ́щи, хотѧ̀ человѣ́чество ѿ страсте́й и҆зба́вити;
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.