Глас 4-й. Пятница.
Въ четверто́къ ве́чера,
на Гдⷭ҇и воззва́хъ, стїхи̑ры крⷭ҇тны. Гла́съ д҃.
Подо́бенъ: Да́лъ є҆сѝ зна́менїе:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Є҆гда́ тѧ распина́ема тва́рь всѧ̀ ви́дѣ, и҆змѣнѧ́шесѧ и҆ трепета́ше: землѧ́ же трѧсꙋ́щисѧ всѧ̀ колеба́шесѧ, долготерпѣли́ве сло́ве, и҆ завѣ́са цр҃ко́внаѧ стра́хомъ раздира́шесѧ, досажда́емꙋ тебѣ̀, и҆ ка́менїе распада́шесѧ ѿ стра́ха, и҆ со́лнце лꙋчы̀ скры̀, творца̀ своего̀ вѣ́дꙋщи тѧ̀.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Ка́кѡ беззако́ннѣйшїй собо́ръ дерзнꙋ̀ ѡ҆сꙋди́ти тѧ̀ сꙋдїю̀ безсме́ртнаго, зако́нъ да́вшаго въ пꙋсты́ни дре́вле мѡѷсе́ю бг҃ови́дцꙋ; ка́кѡ жи́знь всѧ́ческихъ на дре́вѣ зрѧ́ще ᲂу҆ме́ршꙋю, ника́коже ᲂу҆боѧ́шасѧ, нижѐ во ᲂу҆мѣ̀ помышлѧ́хꙋ, ꙗ҆́кѡ ты̀ є҆ди́нъ гдⷭ҇ь и҆ влⷣка тва́ри.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Растерза́етсѧ рꙋкописа́нїе, є҆́же ѿ вѣ́ка а҆да́ма пра́ѻтца, прободе́нїемъ твои́хъ ре́бръ многомлⷭ҇тиве, и҆ ѿринове́ное є҆стество̀ человѣ́ческое кропле́нїемъ кро́ве твоеѧ̀ ѡ҆свѧти́сѧ, зовꙋ́щее: сла́ва бл҃гоꙋтро́бїю твоемꙋ̀, сла́ва бж҃е́ственномꙋ распѧ́тїю твоемꙋ̀, і҆и҃се всеси́льне, сп҃се дꙋ́шъ на́шихъ.
Та́же въ мине́и стїхи̑ры ст҃о́мꙋ, а҆́ще и҆́мать. А҆́ще ли нѣ́сть мине́и:
И҆́ны стїхи̑ры прест҃ѣ́й бцⷣѣ. Гла́съ д҃.
Подо́бенъ: Ꙗ҆́кѡ до́блѧ:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
На крⷭ҇тѣ̀ ꙗ҆́кѡ ᲂу҆зрѣ́ тѧ пригвожде́на гдⷭ҇и, а҆́гница и҆ мт҃и твоѧ̀ дивлѧ́шесѧ, и҆ что̀ видѣ́нїе сїѐ, взыва́ше, сн҃е вожделѣ́нне, сїѧ̑ ли тѝ непокори́вый собо́ръ воздадѐ беззако́нный, и҆́же мно́гихъ твои́хъ чꙋде́съ наслади́выйсѧ; но сла́ва неизрече́нномꙋ схожде́нїю твоемꙋ̀ влⷣко.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
И҆ па́ки глаго́лемъ тꙋ́южде стїхи́рꙋ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
А҆́гнца и҆ па́стырѧ тѧ̀, ꙗ҆́кѡ ви́дѣ на дре́вѣ а҆́гница ро́ждшаѧ, рыда́ше мт҃рски, тебѣ̀ вѣща́ше: сн҃е любе́знѣйшїй, ка́кѡ на дре́вѣ крⷭ҇тнѣмъ повѣ́шенъ є҆сѝ долготерпѣли́ве; ка́кѡ рꙋ́цѣ и҆ но́зѣ твоѝ сло́ве, пригвозди́шасѧ ѿ беззако́нныхъ; и҆ кро́вь твою̀ и҆злїѧ́лъ є҆сѝ влⷣко.
Сла́ва, и҆ ны́нѣ, крⷭ҇тобг҃оро́диченъ: Ꙗ҆́кѡ ᲂу҆зрѣ̀ тѧ̀ гдⷭ҇и, дв҃а и҆ мт҃и твоѧ̀ на крⷭ҇тѣ̀ повѣ́шена, дивлѧ́шесѧ и҆ взира́ющи глаго́лаше: что́ ти возда́ша, и҆̀же мно́гихъ твои́хъ дарѡ́въ насла́ждшїисѧ влⷣко; но молю́сѧ, не ѡ҆ста́ви менѐ є҆ди́нꙋ въ мі́рѣ: но потщи́сѧ воскрⷭ҇нꙋ́ти, совозставлѧ́ѧ пра́ѻтца.
Та́же, Свѣ́те ти́хїй: Прокі́менъ днѐ: и҆ Сподо́би гдⷭ҇и въ ве́черъ се́й:
На стїхо́внѣ стїхи̑ры крⷭ҇тны, гла́съ д҃:
Ѻ҆рꙋ́жїе непобѣди́мое хрⷭ҇тѐ, крⷭ҇тъ тво́й на́мъ да́лъ є҆сѝ, и҆ си́мъ побѣжда́емъ прило́ги чꙋжда́гѡ.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Всегда̀ и҆мꙋ́ще хрⷭ҇тѐ крⷭ҇тъ тво́й на по́мощь, сѣ̑ти вра̑жїѧ ᲂу҆до́бнѣ попира́емъ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Прославлѧ́ѧйсѧ въ па́мѧтехъ ст҃ы́хъ твои́хъ хрⷭ҇тѐ бж҃е, и҆ ѿ ни́хъ ᲂу҆моле́нъ быва́ѧ, низпослѝ на́мъ ве́лїю млⷭ҇ть.
Сла́ва, и҆ ны́нѣ, крⷭ҇тобг҃оро́диченъ: Подо́бенъ: Зва́нный свы́ше:
Не рыда́й менѐ мт҃и, зрѧ́щи на дре́вѣ ви́сѧща твоего̀ сн҃а и҆ бг҃а, на вода́хъ повѣ́сившаго зе́млю неѡдержи́мѡ, и҆ всю̀ тва́рь созда́вшаго: и҆́бо воста́нꙋ и҆ просла́влюсѧ, и҆ а҆́дѡва ца̑рствїѧ сокрꙋшꙋ̀ крѣ́постїю, и҆ потреблю̀ є҆гѡ̀ всю̀ си́лꙋ, и҆ ᲂу҆́зники и҆зба́влю ѿ ѕлодѣ́йства є҆гѡ̀, ꙗ҆́кѡ млⷭ҇рдъ: и҆ ѻ҆ц҃ꙋ̀ моемꙋ̀ приведꙋ̀, ꙗ҆́кѡ чл҃вѣколю́бецъ.
Та́же: Ны́нѣ ѿпꙋща́еши: И҆ Трист҃о́е. По Ѻ҆́ч҃е на́шъ: тропа́рь, и҆ ѿпꙋ́стъ.
Въ четверто́къ на повече́рїи,
канѡ́нъ прест҃ѣ́й бцⷣѣ. Гла́съ д҃.
Пѣ́снь а҃
І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Ты̀ є҆ди́на застꙋпле́нїе, прибѣ́жище и҆ храни́тельница рабѡ́въ твои́хъ є҆сѝ, бг҃ороди́тельнице чⷭ҇таѧ. сегѡ̀ ра́ди припа́даю тѝ и҆ зовꙋ̀: сп҃си́ мѧ ѻ҆каѧ́ннаго, ꙗ҆́кѡ млⷭ҇тива.
Дѣѧ̑нїѧ сквє́рнаѧ со́вѣсть мою̀ ра́нѧтъ, пред̾ лице́мъ носѧ́щꙋю си́хъ ѡ҆бличе́нїе: ᲂу҆скорѝ влⷣчце, и҆ по́мощь бꙋ́ди мѝ, и҆ пре́жде кончи́ны и҆зба́ви, и҆ сп҃си́ мѧ.
Сла́ва: Ѡ҆ст҃ѝ влⷣчце, ѡ҆скверне́нное се́рдце моѐ, ꙗ҆́же прест҃о́е сло́во ро́ждшаѧ, и҆ сꙋ́щаѧ всѣ́хъ ст҃ѣ́йшаѧ вы́шнихъ си́лъ, є҆ди́на всепѣ́таѧ.
И҆ ны́нѣ: На тѧ̀ наде́ждꙋ моегѡ̀ сп҃се́нїѧ возложи́хъ, и҆ къ тебѣ̀ бл҃гоꙋтро́бнѣй вѣ́рою прибѣго́хъ: не пре́зри менѐ наде́ждо ненаде́жныхъ, нижѐ ꙗ҆ви́ мѧ ѡ҆бра́дованїе бѣсѡ́мъ.
Пѣ́снь г҃
І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ, вѣнцє́въ сла́вы сподо́би.
Ро́сꙋ твоегѡ̀ бл҃гоꙋтро́бїѧ пода́ждь мѝ пренепоро́чнаѧ чⷭ҇таѧ, грѣхо́внымъ зно́емъ та́ющемꙋ, и҆ печа́ль сама̀ ᲂу҆стꙋжа́ющи мѝ, и҆ ра́дость бж҃е́ственнꙋю подаю́щи.
Оу҆ма̀ моегѡ̀ тьмꙋ̀ разрꙋшѝ бцⷣе, свѣ́томъ и҆́же въ тебѣ̀, ꙗ҆́кѡ бл҃га́ѧ, и҆ молю́сѧ, покаѧ́нїѧ мѧ̀ ѡ҆́бразы ᲂу҆тверди́ти, ꙗ҆́кѡ ще́дра и҆ многомлⷭ҇тива, да сп҃са́емь ᲂу҆бл҃жа́ю тѧ̀.
Сла́ва: Кропле́нїемъ млⷭ҇ти твоеѧ̀, дв҃о бг҃ора́дованнаѧ, ᲂу҆́глїе погасѝ мои́хъ страсте́й, и҆ ᲂу҆га́сшїй свѣти́льникъ се́рдца моегѡ̀ возжзѝ, златы́й свѣ́щниче всенепоро́чнаѧ.
И҆ ны́нѣ: Потоплѧ́етъ мѧ̀ волна̀ грѣхо́внаѧ, и҆ бꙋ́рѧ безмѣ́стныхъ помышле́нїй: но ᲂу҆милосе́рдисѧ всенепоро́чнаѧ, и҆ рꙋ́кꙋ мѝ по́мощи ꙗ҆́кѡ млⷭ҇тива прострѝ, да сп҃са́емь ᲂу҆бл҃жа́ю тѧ̀.
Пѣ́снь д҃
І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ, тебѐ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ зовѧ́ше: сла́ва си́лѣ твое́й гдⷭ҇и.
Ꙗ҆́же всепречꙋ́днаѧ мт҃и бж҃їѧ, возсїѧ́й мѝ покаѧ́нїѧ зари̑, и҆ разрѣшѝ мра́къ ѻ҆каѧ́нныѧ моеѧ̀ дꙋшѝ, и҆ ѿженѝ дв҃о, лꙋка̑ваѧ помышлє́нїѧ се́рдца моегѡ̀.
Тѧ̀ ѡ҆чисти́лище всѣ́хъ человѣ́кѡвъ вѣ́рою молю̀ бл҃гослове́ннаѧ, и҆ прошꙋ̀: млⷭ҇тива мѝ сꙋдїю̀ сн҃а твоего̀ сотворѝ, ꙗ҆́кѡ да хвала́ми прославлѧ́ю тѧ̀.
Сла́ва: Смире́нное є҆ди́на чⷭ҇таѧ, и҆ прокаже́нное се́рдце моѐ, нечи́стыми страсте́й наведе́нїи, ꙗ҆́кѡ вра́чь и҆сцѣлѝ, и҆ ѿ рꙋкѝ бѣсо́вскїѧ и҆схитѝ.
И҆ ны́нѣ: Глаго́ломъ бг҃одохнове́ннымъ пре́жде бл҃же́нный а҆ввакꙋ́мъ, го́рꙋ тѧ̀ чи́стꙋю и҆ присѣ́ннꙋю наречѐ, прише́дшаго ѿ ю҆́га, и҆ тобо́ю воплоща́ема влⷣчце, возвѣща́ѧ ꙗ҆вле́ннѣйше.
Пѣ́снь є҃
І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Оу҆мерщвле́нъ страстьмѝ и҆ помышле́нїи всенепоро́чнаѧ, къ щедро́тамъ твои̑мъ прибѣга́ю, и҆ къ те́пломꙋ твоемꙋ̀ притека́ю влⷣчце, покро́вꙋ и҆ по́мощи: ꙗ҆́же жи́знь є҆ди́на ро́ждшаѧ, се́рдце моѐ ѡ҆живѝ.
Ѻ҆рꙋ́жїемъ снѣде́на мѧ̀ грѣхо́внымъ, и҆сцѣлѝ дѣ́йственною твое́ю лѣчьбо́ю, ꙗ҆́же сп҃са ро́ждшаѧ гдⷭ҇а, копїе́мъ ᲂу҆ѧ́звленнаго менѐ ра́ди пречⷭ҇таѧ, и҆ ᲂу҆ѧзви́вшаго се́рдце ѕмі́ево.
Сла́ва: Оу҆ма̀ моегѡ̀ ᲂу҆врачꙋ́й сокрꙋшє́нїѧ, пренепоро́чнаѧ, и҆ и҆сцѣлѝ стра̑сти дꙋшѝ моеѧ̀, и҆ ᲂу҆ны́нїѧ тьмꙋ̀ потребѝ, ꙗ҆́кѡ да во хвале́нїи тѧ̀ пою̀ приснобл҃же́ннꙋю, бцⷣе всепѣ́таѧ.
И҆ ны́нѣ: Гро́здъ вїногра́да, є҆го́же возрастѝ дв҃о на дре́вѣ ви́сѧща ви́дѣвши, вопїѧ́ше: ча́до, мсто̀ и҆скопа́еши, пїѧ́нство ѿпꙋща́ѧ врагѡ́мъ всꙋ́е распе́ншымъ тѧ̀, во все́мъ долготерпѣли́ваго.
Пѣ́снь ѕ҃
І҆рмо́съ: Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Ꙗ҆́же є҆ди́на всѣ̑мъ по́мощь, помозѝ на́мъ бѣ́дствꙋющымъ, и҆ рꙋ́кꙋ пода́ждь, и҆ къ приста́нищꙋ напра́ви сп҃си́тельномꙋ, є҆ди́на бг҃обл҃года́тнаѧ.
И҆стѧза́нїѧ мѧ̀ пречⷭ҇таѧ, въ ча́съ стра́шный ты̀ и҆схитѝ, ѿ бѣсѡ́въ ѕлы́ѧ пре́лести, и҆ сꙋда̀, и҆ ѻ҆гнѧ̀, и҆ тьмы̀, и҆ мꙋ́ки.
Сла́ва: Пѣсносло́влю тѧ̀ всепѣ́таѧ, сла́влю чєстна́ѧ вели̑чїѧ твоѧ̑: ты́ же нечи́стыхъ мѧ̀ страсте́й свободѝ, и҆ вѣ́чныѧ сла́вы сподо́би.
И҆ ны́нѣ: Пѣ́ти тѧ̀ до́лжни є҆смы̀, но вои́стиннꙋ по достоѧ́нїю не мо́жемъ: тѣ́мже пое́мъ тѧ̀, молча́нїемъ чтꙋ́ще несказа́нное, є҆́же на тебѣ̀ дв҃о, содѣ́ѧнное та́инство.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ д҃:
На крⷭ҇тѣ́ тѧ возвы́шена, ꙗ҆́кѡ ᲂу҆зрѣ̀ пречⷭ҇таѧ твоѧ̀ сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до сн҃е мо́й; ка́кѡ жи́знь всѣ́хъ вкꙋша́еши сме́рти, ѡ҆живи́ти мє́ртвыѧ хотѧ̀, ꙗ҆́кѡ млⷭ҇рдъ;
Пѣ́снь з҃
І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Непремѣ́ннагѡ ро́ждши є҆ди́на бг҃обл҃года́тнаѧ, моли́сѧ чⷭ҇таѧ, десни́цею є҆гѡ̀ премѣни́ти мо́й ᲂу҆́мъ къ лꙋ́чшымъ, лю́тѣ премѣне́нный бѣсо́вскими и҆скꙋше́нїи.
Цр҃и́це дв҃о, ро́ждшаѧ цр҃ѧ̀ хрⷭ҇та̀, ᲂу҆ще́дри и҆ сп҃си́ мѧ, страстьмѝ преклоне́наго: вѣ́рою ᲂу҆твердѝ, и҆ наста́ви мѧ̀ ко сп҃се́нїѧ стезѝ, вѣ́рныхъ сп҃се́нїе.
Сла́ва: Мл҃твенница мѝ бꙋ́ди пренепоро́чнаѧ, къ ро́ждшемꙋсѧ и҆з̾ тебѐ: и҆ ѡ҆ставле́нїе лю́тыхъ долгѡ́въ пода́ждь мѝ, и҆ црⷭ҇твїѧ бж҃їѧ бж҃е́ственный вхо́дъ, и҆ пи́щи воспрїѧ́тїѧ, и҆ свѣ́та прича́стїе.
И҆ ны́нѣ: Всенепоро́чнаѧ мр҃і́е, дв҃о неискꙋсобра́чнаѧ чⷭ҇таѧ, безмѣ́рнаѧ бл҃гостїю, ꙗ҆́же бг҃а пло́тїю ро́ждшаѧ, того̀ молѝ, всѧ́кїѧ на́съ и҆зба́вити печа́ли и҆ грѣха̀.
Пѣ́снь и҃
І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Блꙋ́днѡ житїѐ и҆жди́въ, и҆ всѧ́кꙋ скве́рнꙋ содѣ́лавъ, трепе́щꙋ сꙋди́ща, трепе́щꙋ и҆стѧза́нїѧ, трепе́щꙋ и҆ ѿвѣ́та ѡ҆сꙋжде́нїѧ моегѡ̀: поми́лꙋй дꙋ́шꙋ мою̀ ѻ҆каѧ́ннꙋю, чⷭ҇таѧ, и҆ пре́жде сме́рти просвѣще́нїе мѝ пода́ждь.
На тѧ̀ всю̀ наде́ждꙋ сп҃се́нїѧ моегѡ̀ возложи́хъ, бг҃омт҃и неискꙋсобра́чнаѧ, и҆ тебѐ на по́мощь призыва́ю всегда̀: сп҃си́ мѧ ѿ печа́лей, и҆ напа́стей вра́жїихъ, и҆ разрѣшѝ плени̑цы ѕѡ́лъ мои́хъ, и҆ ѿ вѣ́чныѧ тьмы̀ и҆схити́ мѧ.
Сла́ва: Ꙗ҆ви́ласѧ є҆сѝ а҆́гг҃лъ вы́шши, бг҃а неизрече́ннѡ воплоти́вши: сего̀ ᲂу҆́бѡ молѝ, влⷣчце всенепоро́чнаѧ, плотски́хъ и҆скꙋше́нїй вы́шшꙋ бы́ти мѝ, и҆ сꙋда̀ бꙋ́дꙋщагѡ и҆зба́витисѧ дв҃о, и҆ вѣ́чныѧ мꙋ́ки.
И҆ ны́нѣ: Во́дъ бж҃е́ственныхъ и҆спо́лни мѧ̀ дв҃о, ꙗ҆́же и҆сто́чникъ во чре́вѣ носи́вшаѧ: и҆зба́ви ѿ гно́ѧ грѣхѡ́въ мои́хъ, и҆ къ жи́зни наста́ви сп҃се́нїѧ, чⷭ҇таѧ, и҆ ᲂу҆ны̑нїѧ дꙋшѝ моеѧ̀ ѻ҆каѧ́нныѧ ѿженѝ дв҃о, и҆ ѿ бѣсѡ́въ и҆зба́ви.
Пѣ́снь ѳ҃
І҆рмо́съ: Всѧ́къ земноро́дный да взыгра́етсѧ дꙋ́хомъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющи сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ бцⷣе, чⷭ҇таѧ приснодв҃о.
Разрꙋшѝ па́жить грѣха̀, ѡ҆скверне́нныѧ моеѧ̀ дꙋшѝ и҆ тѣлесѐ, бг҃ора́дованнаѧ пречⷭ҇таѧ влⷣчце, си́льною мл҃твою, твое́ю, ѽ всенепоро́чнаѧ! и҆сцѣле́нїе да́вши сп҃си́тельное, влⷣчнїй стра́хъ пречⷭ҇тый.
Ты̀ мнѣ̀ просвѣще́нїе, ты́ ми и҆збавле́нїе и҆ ра́дованїе, ты̀ побо́рница моѧ̀, ты̀ моѧ̀ сла́ва, и҆ похвала̀, и҆ наде́жда, и҆ сп҃се́нїе моѐ є҆сѝ пренепоро́чнаѧ, и҆ тебѣ̀ вѣ́рнѡ покланѧ́юсѧ, и҆ вопїю́ ти: сп҃си́ мѧ ѻ҆каѧ́ннаго раба̀ твоего̀, и҆ ѿ а҆́довыхъ вра́тъ и҆схити́ мѧ.
Сла́ва: Сп҃си́ мѧ чⷭ҇таѧ, сп҃са ро́ждшаѧ всеще́драго, и҆ ᲂу҆ще́дри раба̀ твоего̀, и҆ къ покаѧ́нїѧ пꙋтѝ наста́ви, лꙋка́вагѡ собла́зны ѿ среды̀ ѿженѝ, и҆ тогѡ̀ ловле́нїѧ и҆зба́ви мѧ̀, и҆ ѻ҆гнѧ̀ вѣ́чнагѡ, пренепоро́чнаѧ, и҆схити́ мѧ.
И҆ ны́нѣ: Пло́тїю є҆́же и҆з̾ тебѐ, сло́во пренепоро́чнаѧ ѡ҆дѣ́ѧвсѧ, воплоти́всѧ же поживѐ въ мі́рѣ, ꙗ҆́кѡ млⷭ҇рдъ, пребы́въ не хꙋ́ждши, и҆́же пре́жде безпло́тный: и҆ и҆́же дре́вле всѣ́хъ мꙋ́чившаго, бж҃е́ственною си́лою низложѝ.
Та́же: Досто́йно є҆́сть: и҆ покло́нъ. Трист҃о́е. По Ѻ҆́ч҃е на́шъ: тропа́рь, и҆ про́чее ѻ҆бы́чное, и҆ ѿпꙋ́стъ.
Въ пѧто́къ ᲂу҆́тра,
по а҃-мъ стїхосло́вїи, сѣда́льны крⷭ҇тны, гла́съ д҃:
И҆скꙋпи́лъ ны̀ є҆сѝ ѿ клѧ́твы зако́нныѧ чⷭ҇тно́ю твое́ю кро́вїю, на крⷭ҇тѣ̀ пригвозди́всѧ, и҆ копїе́мъ пробо́дьсѧ, безсме́ртїе и҆сточи́лъ є҆сѝ человѣ́кѡмъ: сп҃се на́шъ сла́ва тебѣ̀.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
На крⷭ҇тѣ́ тѧ пригвозди́ша і҆ꙋдє́и сп҃се, и҆́мже ѿ ꙗ҆зы̑къ на́съ призва́лъ є҆сѝ и҆ногда̀, хрⷭ҇тѐ бж҃е на́шъ, просте́рлъ є҆сѝ дла̑ни на не́мъ во́лею твое́ю: копїе́мъ же въ ре́бра твоѧ̑ восхотѣ́лъ є҆сѝ прободе́нъ бы́ти, мно́жествомъ щедро́тъ твои́хъ чл҃вѣколю́бче.
Сла́ва, и҆ ны́нѣ, крⷭ҇тобг҃оро́диченъ: Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде прест҃ꙋ́ю твою̀ дш҃ꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же бл҃гослове́ннаѧ молѧ́щи не преста́й, проще́нїе прегрѣше́нїй на́мъ дарова́ти.
По в҃-мъ стїхосло́вїи, сѣда́льны, гла́съ д҃:
Ско́рѡ предварѝ пре́жде да́же не порабо́тимсѧ врагѡ́мъ хꙋ́лѧщымъ тѧ̀, и҆ претѧ́щымъ на́мъ, хрⷭ҇тѐ бж҃е на́шъ: погꙋбѝ крⷭ҇то́мъ твои́мъ борю́щыѧ на́съ, да ᲂу҆разꙋмѣ́ютъ, ка́кѡ мо́жетъ правосла́вныхъ вѣ́ра, мл҃твами бцⷣы, є҆ди́не чл҃вѣколю́бче.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
Оу҆ѧ́звенꙋ тѝ влⷣко, копїе́мъ бж҃е́ственномꙋ ребрꙋ̀, ѻ҆рꙋ́жїѧ ѡ҆скꙋдѣ́ша неви́димагѡ врага̀ до конца̀, и҆ преста̀ всѧ́кое наси́лїе ѕлодѣ́йства є҆гѡ̀. тѣ́мже покланѧ́емсѧ твои̑мъ сп҃си́тєльнымъ стрⷭ҇те́мъ, сла́вѧще бж҃е́ственное смотре́нїе твоѐ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Дне́сь а҆́гг҃льскаѧ вѡ́инства, въ па́мѧть стрⷭ҇тоте́рпєцъ прїидо́ша, вѣ́рныхъ мы̑сли просвѣти́ти, и҆ вселе́ннꙋю бл҃года́тїю ᲂу҆ѧсни́ти. тѣ́хъ ра́ди, бж҃е ᲂу҆моле́нъ быва́ѧ, да́рꙋй на́мъ ве́лїю млⷭ҇ть.
Сла́ва, и҆ ны́нѣ, крⷭ҇тобг҃оро́диченъ: На крⷭ҇тѣ́ тѧ возвыша́ема ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное чꙋ́до сїѐ, сн҃е мо́й; ка́кѡ животѐ всѣ́хъ вкꙋша́еши сме́рти, ѡ҆живи́ти ᲂу҆ме́ршыѧ хотѧ̀, ꙗ҆́кѡ млⷭ҇рдъ;
По г҃-мъ стїхосло́вїи сѣда́льны, гла́съ д҃:
Крⷭ҇тъ и҆ сме́рть за ны̀, бл҃же, за безмѣ́рнꙋю млⷭ҇ть во́лею претерпѣ́лъ є҆сѝ, и҆ сꙋ́дъ непра́веденъ: ꙗ҆́кѡ да ѡ҆сꙋжде́нїѧ и҆ дре́внїѧ клѧ́твы всѣ́хъ свободи́ши, ле́стїю въ тлѣ́нїе впа́дшихъ. тѣ́мже и҆ покланѧ́емсѧ, сло́ве, твоемꙋ̀ распѧ́тїю.
На дре́вѣ повѣ́шена ᲂу҆смотри́вшее тѧ̀ со́лнце, сл҃нца пра́вды хрⷭ҇та̀, свѣ́тъ помрачѝ. тва́рь же колеба́шесѧ, и҆ ме́ртвїи ꙗ҆́кѡ ѿ сна̀ ско́рѡ и҆з̾ гробѡ́въ воста́ша, сло́ве, бж҃е́ственнꙋю пѣсносло́вѧще держа́вꙋ сла́вы твоеѧ̀.
Сла́ва, и҆ ны́нѣ, крⷭ҇тобг҃оро́диченъ: Непоро́чнаѧ мт҃и твоѧ̀, хрⷭ҇тѐ, ꙗ҆́кѡ ᲂу҆зрѣ̀ на крⷭ҇тѣ́ тѧ возвыша́ема, рыда́ющи мт҃рски, такѡва́ѧ глаго́лаше: что̀ но́вое и҆ стра́нное сїѐ чꙋ́до, сн҃е мо́й; ка́кѡ тѧ̀ беззако́нный со́нмъ ко крⷭ҇тꙋ̀ пригвожда́етъ всѣ́хъ жи́знь, свѣ́те мо́й сладча́йшїй;
Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, [є҆гѡ́же краегране́сїе сїѐ: Крⷭ҇тꙋ̀ пригвожде́нъ хрⷭ҇то́съ, пре́лесть разрѣша́етъ. Творе́нїе і҆ѡ́сифово.] Гла́съ д҃.
Пѣ́снь а҃
І҆рмо́съ: Ѿве́рзꙋ ᲂу҆ста̀ моѧ̑ и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
На крⷭ҇тѣ̀ распросте́рлъ є҆сѝ бж҃е́ствєнныѧ дла̑ни, долготерпѣли́ве, и҆ погиба́ющїй мі́ръ призва́лъ є҆сѝ къ позна́нїю держа́вы твоеѧ̀, ще́дре. тѣ́мже велича́емъ бл҃гоꙋтро́бїе твоѐ.
Ѕмі́ѧ воздви́глъ є҆́сть мѡѷсе́й, проѡбразꙋ́ѧ бж҃е́ственное твоѐ распѧ́тїе, сло́ве пребезнача́льне, и҆́мже падѐ ꙗ҆дови́тый ѕмі́й паде́нїю а҆да́мовꙋ хода́тай бы́вый.
Мч҃нченъ: Во свѣ́тлостехъ ст҃ы́хъ ны́нѣ жи́ти сподо́бистесѧ мч҃нцы, непоколеби́мое прїе́мше ꙗ҆́вѣ црⷭ҇тво, ꙗ҆́коже сказа̀ па́ѵелъ, и҆ сла́вы соприча̑стницы хрⷭ҇то́вы бы́сте.
Мч҃нченъ: Воздвиза́емыми волна́ми нестерпи́мыхъ мꙋче́нїй ва́шихъ, непогрꙋ́зимь бы́сть кора́бль, мч҃нцы: ѡ҆кормле́нїемъ бо всѣ́хъ цр҃ѧ̀, въ приста́нище доспѣ́сте поко́ищное.
Бг҃оро́диченъ: Ѻ҆рꙋ́жїе, ꙗ҆́коже речѐ сѷмеѡ́нъ, се́рдце твоѐ про́йде, є҆гда̀ ви́дѣла є҆сѝ хрⷭ҇та̀ распина́ема, дв҃о влⷣчце, и҆ є҆ди́наго пробода́ема копїе́мъ. тѣ́мже рыда́ющи болѣ̑зни претерпѣ́ла є҆сѝ.
И҆́нъ канѡ́нъ прест҃ѣ́й бцⷣѣ. Гла́съ д҃.
Пѣ́снь а҃ І҆рмо́съ то́йже.
Ты̀ є҆ди́на застꙋпле́нїе, и҆ прибѣ́жище, и҆ храни́тельница є҆сѝ рабѡ́мъ твои̑мъ бг҃ороди́тельнице чⷭ҇таѧ. сегѡ̀ ра́ди припа́дающе вопїе́мъ тѝ: сп҃сѝ на́съ влⷣчце, млⷭ҇рдїемъ твои́мъ.
Ѡ҆свѧтѝ влⷣчце ѡ҆скверне́нное се́рдце моѐ, ꙗ҆́же прест҃о́е сло́во ро́ждшаѧ, и҆ сꙋ́щи всѣ́хъ ст҃ѣ́йшаѧ вы́шнихъ си́лъ, ѻ҆трокови́це всенепоро́чнаѧ.
Па́дшихъ воззва́нїе, и҆ стоѧ́щихъ є҆сѝ ᲂу҆твержде́нїе, всенепоро́чнаѧ. тѣ́мже молю́сѧ тѝ: па́дшїй мо́й ᲂу҆́мъ грѣхо́мъ и҆спра́ви влⷣчце, да сла́влю тѧ̀.
Ме́ртва мѧ̀ скорбьмѝ и҆ недѣ́йственна лежа́ща, рꙋ́кꙋ просте́рши по́мощи твоеѧ̀ возста́ви, и҆ бж҃е́ственнагѡ весе́лїѧ и҆спо́лнена покажи́ мѧ, бг҃ороди́тельнице.
Пѣ́снь г҃
І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ въ бж҃е́ственнѣй твое́й сла́вѣ вѣнцє́въ сла́вы сподо́би.
Ꙗ҆́кѡ ѻ҆вча̀ на заколе́нїе ведѧ́хꙋ тѧ̀ хрⷭ҇тѐ, лю́дїе пребеззако́ннїи, а҆́гнца бж҃їѧ сꙋ́ща, и҆ хотѧ́ща и҆зба́вити ѻ҆́вцы ѿ во́лка лю́тагѡ, и҆̀хже чл҃вѣколю́бнѣ возлюби́лъ є҆сѝ.
Предста́лъ є҆сѝ сꙋдїѝ сꙋди́мь непра́веднѡ, сꙋдѧ́й пра́веднѡ все́й землѝ, и҆ претерпѣ́лъ є҆сѝ ᲂу҆даре́нїе въ лани́тꙋ, свободи́ти мѧ̀ хотѧ̀ порабоще́ннаго гдⷭ҇и, лꙋка́вомꙋ мїроде́ржцꙋ.
Мч҃нченъ: Страда́вше ст҃і́и зако́ннѡ, беззакѡ́нныѧ врагѝ посрами́сте, и҆ во́лею ᲂу҆мерщвлѧ́еми за всѣ́хъ воста́нїе, и҆ и҆̀же сме́рть и҆схода́таившаго побори́сте ѕмі́ѧ.
Мч҃нченъ: Ѿ земны́хъ возвы́сившесѧ, ко бл҃госла́вїю же прише́дше страда́льчески мч҃нцы ст҃і́и, и҆ къ невеще́ствєннымъ чинѡ́мъ веще́ственнїи соедини́шасѧ, ра́дости неизрече́нныѧ и҆сполнѧ́еми.
Бг҃оро́диченъ: И҆з̾ тебѐ дв҃о, ѡ҆бновле́нїе є҆́ѵѣ ꙗ҆ви́сѧ вои́стиннꙋ, бг҃ъ пло́тїю ражда́емь, и҆ на крⷭ҇тъ возвыша́емь, низлага́ѧ бѣ́сы, бг҃обл҃года́тнаѧ влⷣчце.
И҆́нъ І҆рмо́съ то́йже.
Поми́лꙋй пречⷭ҇таѧ дв҃о, въ пꙋчи́нѣ жите́йстей лю́тѣ мѧ̀ потоплѧ́ема, и҆ ко приста́нищꙋ ти́хомꙋ сп҃се́нїѧ и҆спра́ви: тѧ́ бо є҆ди́нꙋ наде́ждꙋ стѧжа́хъ.
Оу҆ма̀ моегѡ̀ тьмꙋ̀ разорѝ, бцⷣе, свѣ́томъ и҆́же въ тебѣ̀ ꙗ҆́кѡ бл҃га, и҆ молю́сѧ: покаѧ́нїѧ мѧ̀ ѡ҆́бразы ᲂу҆твердѝ ꙗ҆́кѡ ще́дра, и҆ многомлⷭ҇тива, да сп҃са́емь ᲂу҆бл҃жа́ю тѧ̀.
Кропле́нїемъ млⷭ҇ти твоеѧ̀, дв҃о бг҃ора́дованнаѧ, ᲂу҆́глїе погасѝ мои́хъ страсте́й: и҆ ᲂу҆га́сшїй свѣти́льникъ се́рдца моегѡ̀ возжзѝ, златы́й свѣ́щнице всенепоро́чнаѧ.
Болѧ́щꙋю лю́тѣ страстьмѝ ѻ҆каѧ́ннꙋю мою̀ дꙋ́шꙋ, бг҃ороди́тельнице, ꙗ҆́кѡ млⷭ҇тиваѧ посѣтѝ, и҆ сп҃си́ мѧ мл҃твами твои́ми: ꙗ҆́кѡ да живо́тъ лꙋ́чшїй полꙋчи́въ велича́ю тѧ̀.
Пѣ́снь д҃
І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ, тебѐ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ зовѧ́ше: сла́ва си́лѣ твое́й гдⷭ҇и.
Да ѿпꙋ́стиши мѧ̀ ѿ ᲂу҆́зъ грѣхо́вныхъ, чл҃вѣколю́бче, твое́ю во́лею свѧ́занъ бы́лъ є҆сѝ, и҆ на крⷭ҇тѣ̀ ᲂу҆́мерлъ є҆сѝ ꙗ҆́кѡ ѕлодѣ́й: сла́ва мно́гомꙋ бл҃гоꙋтро́бїю твоемꙋ̀.
Ꙗ҆́звы претерпѣ́лъ є҆сѝ сло́ве бж҃їй, и҆ поно́снꙋю сме́рть, ѡ҆безсме́ртствꙋѧ сꙋщество̀ земны́хъ ᲂу҆мерщвле́ное страстьмѝ: сла́ва мно́гомꙋ бл҃гоꙋтро́бїю твоемꙋ̀.
Мч҃нченъ: И҆̀же ра́дѡванїѧ бж҃їѧ хотѧ́ще наслѣ́довати дх҃омъ всест҃ы́мъ, ра́достною дꙋше́ю ра̑ны претерпѣ́ша, и҆ нꙋ́жднꙋю сме́рть мч҃нцы, и҆ лꙋка́ваго ᲂу҆ѧзви́ша.
Мч҃нченъ: Рꙋ́цѣ ѿсѣца́еми, и҆ главы̑, и҆ ѧ҆зы́ки ᲂу҆рѣ́заеми, бг҃осло́внїи, и҆ ѻ҆́чи лиша́еми свѣ́та, и҆ на ᲂу҆́ды ссѣца́еми мч҃нцы, не ѿсѣ́чени же ѿ бг҃а пребы́сте.
Бг҃оро́диченъ: Раздра́сѧ рꙋкописа́нїе а҆да́мово, копїе́мъ прободе́нꙋ тѝ влⷣко, бцⷣа вопїѧ́ше ᲂу҆ крⷭ҇та̀ предстоѧ́щи, гдⷭ҇и, и҆ болѣ́зненнѡ восклица́ющи.
И҆́нъ І҆рмо́съ то́йже.
Ꙗ҆́же всенепоро́чнаѧ мт҃и бж҃їѧ, возсїѧ́й мѝ покаѧ́нїѧ зарю̀, разрꙋшѝ мра́къ ѻ҆каѧ́нныѧ моеѧ̀ дꙋшѝ, и҆ лꙋка̑ваѧ помышлє́нїѧ се́рдца моегѡ̀ ѿженѝ, дв҃о.
Ꙗ҆́же бл҃гопремѣ́ннаго и҆ бл҃гоꙋвѣ́тливаго, пречⷭ҇таѧ, влⷣкꙋ ро́ждши, дв҃омт҃и, ꙗ҆́кѡ бл҃га́ѧ, ѡ҆ на́съ того̀ молѝ всегда̀, ѿ чꙋжда́гѡ и҆зба́вити на́съ.
Тѧ̀ ѡ҆чисти́лище всѣ́хъ человѣ́кѡвъ, вѣ́рою молю̀ и҆ прошꙋ̀ бл҃гослове́ннаѧ: млⷭ҇тива мнѣ̀ сꙋдїю̀ сн҃а твоего̀ сотворѝ, ꙗ҆́кѡ да во хвале́нїи сла́влю тѧ̀.
И҆мѣ́ѧ тѧ̀, пречⷭ҇таѧ, помо́щницꙋ всегда̀ никогѡ̀ ᲂу҆бою́сѧ, и҆лѝ ᲂу҆страшꙋ́сѧ: кто́ же ли хотѧ̀ скѡ́рбнаѧ принестѝ рабꙋ̀ твоемꙋ̀, и҆ не ᲂу҆страши́тсѧ;
Пѣ́снь є҃
І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Ви́дѣвшее тѧ̀ сл҃нца на крⷭ҇тѣ̀ простира́ема, со́лнце скры̀ лꙋчы̀, сїѧ́ти не могꙋ́щее, тебѣ̀ сп҃се заше́дшꙋ, и҆ просвѣща́ющꙋ и҆̀же въ нощѝ пре́лести спѧ́щыѧ, покланѧ́ющыѧсѧ держа́вѣ твое́й.
Распина́емь за млⷭ҇рдїе, гдⷭ҇и, и҆ сп҃са́еши мѧ̀, ѻ҆́цта и҆ же́лчи прїе́млеши вкꙋше́нїе, сла́стнагѡ и҆збавлѧ́ѧ на́съ вкꙋше́нїѧ ꙗ҆́кѡ бл҃гъ, и҆́мже прельсти́хомсѧ, и҆ тлѝ подпадо́хомъ.
Мч҃нченъ: Пре́лести разори́сте зи́мꙋ, бж҃е́ственнїи мч҃нцы, дх҃а ст҃а́гѡ теплото́ю, и҆ къ веснѣ̀ поко́ѧ ра́дꙋющесѧ доидо́сте кꙋ́пнѡ, всѣ̑мъ помога́юще сꙋ́щымъ въ ско́рбехъ.
Мч҃нченъ: Тꙋ́чами бж҃е́ственныѧ кро́ве зе́млю всю̀ напои́сте, и҆зсꙋша́юще пото́ки безбо́жїѧ, ст҃і́и мч҃нцы: тѣ́мже къ водѣ̀ живо́тнѣй ны́нѣ всели́стесѧ, ѡ҆ всѣ́хъ молѧ́щесѧ.
Бг҃оро́диченъ: Пло́тїю є҆го́же родила̀ сн҃а, бг҃ора́дованнаѧ, ꙗ҆́кѡ ви́дѣ на дре́вѣ возвы́шена, пла́чемъ и҆спо́лнисѧ, и҆ долготерпѣ́нїю є҆гѡ̀ дивлѧ́шесѧ вои́стиннꙋ: тѣ́мже велича́ше є҆гѡ̀ снизхожде́нїе.
И҆́нъ І҆рмо́съ то́йже.
Оу҆мерщвле́нъ страстьмѝ и҆ скве́рнами всенепоро́чнаѧ, къ щедро́тамъ твои̑мъ прибѣга́ю, и҆ къ те́пломꙋ твоемꙋ̀ притека́ю, влⷣчце, покро́вꙋ и҆ по́мощи: жи́знь є҆ди́на ро́ждшаѧ, се́рдце моѐ ѡ҆живѝ.
Просвѣтѝ ѡ҆мраче́нное моѐ се́рдце, пречⷭ҇таѧ, ꙗ҆́же свѣтода́вца ро́ждшаѧ, бг҃а вкꙋ́пѣ и҆ чл҃вѣ́ка: є҆го́же ꙗ҆́кѡ мт҃и ᲂу҆молѝ, пода́ти мѝ и҆збавле́нїе, гпⷭ҇жѐ, пре́жде стра́шнагѡ днѐ.
Оу҆ма̀ моегѡ̀ ᲂу҆врачꙋ́й сокрꙋшє́нїѧ, всенепоро́чнаѧ, и҆сцѣлѝ стра̑сти дꙋшѝ моеѧ̀, и҆ ᲂу҆ны́нїѧ тьмꙋ̀ ѿженѝ: ꙗ҆́кѡ да во хвале́нїи тѧ̀ пою̀ приснобл҃же́ннꙋю, бцⷣе всепѣ́таѧ.
Низложѝ влⷣчце, врагѡ́въ мои́хъ шата̑нїѧ: тѧ́ бо є҆ди́нꙋ и҆́мамъ предста́тельницꙋ и҆ наде́ждꙋ, и҆ по́мощь крѣ́пкꙋю, ты́ мѧ соблюдѝ, чⷭ҇таѧ, всѧ́кагѡ и҆збавлѧ́ющи мѧ̀ тѣ́хъ нахожде́нїѧ.
Пѣ́снь ѕ҃
І҆рмо́съ: Бж҃е́ственное сїѐ и҆ всечестно́е соверша́юще пра́зднество бг҃омꙋ́дрїи бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Болѣ́зньми, ꙗ҆̀же претерпѣ́лъ є҆сѝ распина́емь, бѡлѣ́зни ᲂу҆ста́вилъ є҆сѝ человѣ́чествꙋ, и҆ къ неболѣ́зненномꙋ житїю̀ всѣ́хъ приво́диши, бл҃гоꙋтро́бне гдⷭ҇и.
Со́лнца лꙋчы̀ скрыва́хꙋсѧ, цр҃ко́внаѧ же свѣ́тлость раздира́шесѧ, и҆ землѧ̀ трѧса́шесѧ, ка́менїе стра́хомъ распада́шесѧ, на крⷭ҇тѣ̀ зижди́телѧ зрѣ́ти не могꙋ́ще.
Мч҃нченъ: Ме́ртвъ ѕмі́й бы́сть, мꙋ́ками ᲂу҆мерщвлѧ́емы зрѧ̀ бж҃е́ствєнныѧ мч҃нки, и҆ живо́тъ вѣ́чный наслѣ́дꙋющыѧ вои́стиннꙋ, бж҃е́ственною бл҃года́тїю.
Мч҃нченъ: Мнѡ́гїѧ мꙋ̑ки претерпѣ́сте, мнѡ́гїѧ и҆ вѣнцы̀ ᲂу҆лꙋчи́сте, многочи́слєннаѧ мно́жєства мч҃нкъ при́снѡ живꙋ́щихъ: тѣ́мже ѕѡ́лъ мои́хъ мно́жество ѿжени́те.
Бг҃оро́диченъ: Приста́нище бꙋ́ди мѝ, всенепоро́чнаѧ, въ пꙋчи́нѣ лю́тыхъ пла́вающꙋ, ꙗ҆́же бѣ́дствꙋющꙋю всю̀ тва́рь ржⷭ҇тво́мъ твои́мъ бг҃ороди́тельнице, сп҃сла̀ є҆сѝ.
И҆́нъ
І҆рмо́съ: Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се цр҃ю̀ си́лъ.
Возсїѧ́й мѝ покаѧ́нїѧ зарю̀, влⷣчце, и҆ ѻ҆́блаки ѕлы́хъ помышле́нїй мои́хъ разорѝ, ѻ҆́блаче сл҃нца пра́веднагѡ приснодв҃о.
Оу҆толѝ страсте́й мои́хъ свирѣ́пꙋю во́лнꙋ, и҆ бꙋ́рю ѕлы́хъ помышле́нїй ᲂу҆кротѝ, приста́нище вели́кое ѡ҆бꙋрева́емыхъ приснодв҃о.
Напо́й мѧ̀ ᲂу҆миле́нїѧ питїе́мъ, влⷣчце, сле́зъ рѣ́ки мнѣ̀ ны́нѣ подаю́щи: и҆́миже ᲂу҆гашꙋ̀ пла́мень вѣ́чнꙋющїй, є҆ди́на всепѣ́таѧ.
И҆зсꙋша́ющи ѕѡ́лъ мои́хъ свирѣ́пꙋю пꙋчи́нꙋ, ро́ждшаѧ бл҃гости вои́стиннꙋ пꙋчи́нꙋ, наста́ви мѧ̀ ко приста́нищꙋ бж҃е́ственныѧ во́ли.
Пѣ́снь з҃
І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Побѣжде́нъ бы́сть сопротивобо́рецъ, и҆ паде́сѧ ди́внымъ паде́нїемъ, возне́сшꙋсѧ хрⷭ҇тꙋ̀ на дре́во, и҆ сп҃се́сѧ пре́жде ѡ҆сꙋжде́нный, вопїѧ̀ є҆мꙋ̀: и҆́же ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Оу҆мерщвле́на мѧ̀ дре́вомъ ѡ҆живи́лъ є҆сѝ на дре́вѣ хрⷭ҇тѐ ᲂу҆ме́рый, и҆ бж҃е́ственными ᲂу҆́бѡ ра́нами твои́ми стрꙋ́пы се́рдца моегѡ̀ и҆сцѣли́лъ є҆сѝ: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Мч҃нченъ: Да́ръ прїе́мше и҆сцѣле́нїѧ, и҆сцѣлѧ́ти недꙋ́ги, и҆ бѣ́сы ѿ человѣ̑къ ѿгонѧ́ти си́лою дх҃о́вною, и҆сцѣли́те стра̑сти се́рдца моегѡ̀ ва́шими мл҃твами мч҃нцы непобѣди́мїи.
Мч҃нченъ: И҆стоплє́нїѧ под̾е́мый бори́тель, кровьмѝ ва́шими погиба́ше со тьма́ми є҆гѡ̀. вы́ же всехва́льнїи мч҃нцы, ра́дꙋющесѧ воспѣва́ете: и҆́же ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Бг҃оро́диченъ: Невѣ́ста непоро́чнаѧ, пала́та зижди́телѧ, землѐ недѣ́ланнаѧ, прⷭ҇то́лъ ѻ҆гнезра́ченъ ꙗ҆ви́ласѧ є҆сѝ, пречⷭ҇таѧ. тѣ́мже вопїе́мъ тѝ: ра́дꙋйсѧ, пречⷭ҇таѧ влⷣчце, ꙗ҆́же человѣ́ки ѡ҆божи́вшаѧ бж҃їимъ твои́мъ ржⷭ҇тво́мъ.
И҆́нъ
І҆рмо́съ: Сп҃сы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Любо́вїю притека́ю мно́гою под̾ ст҃ы́й тво́й покро́въ, не ѿвратѝ менѐ тща̀: но да́ждь мѝ, пречⷭ҇таѧ, ѡ҆ставле́нїе прегрѣше́нїй, и҆ сп҃си́ мѧ, да ви́дѣвше вразѝ моѝ посра́мѧтсѧ.
Не ᲂу҆бою́сѧ ѕла̀, ты́ бо со мно́ю є҆сѝ дв҃о: поженꙋ̀ врагѝ, ꙗ҆̀же неща́днѡ менѐ гонѧ́щыѧ, и҆ побѣждꙋ̀ си́лою твое́ю ᲂу҆крѣплѧ́емь, мр҃і́е бг҃ороди́тельнице.
И҆́маши є҆́же мощѝ при́снѡ всѣ́хъ, ꙗ҆́кѡ ро́ждши влⷣкꙋ, влады́чествїѧ мѧ̀ сла́стнагѡ и҆ страсте́й свободѝ, да пою̀ ра́дꙋѧсѧ: ра́дꙋйсѧ прⷭ҇то́ле вы́шнѧгѡ, бл҃гослове́ннаѧ.
Тѧ̀ є҆ди́нꙋ покрови́тельницꙋ и҆́мамъ на землѝ тво́й ра́бъ, и҆ по́мощь вои́стиннꙋ сп҃си́тельнꙋю и҆ тве́рдꙋю, пречⷭ҇таѧ, бг҃опросла́вленнаѧ: и҆ къ тебѣ̀ прибѣга́ю, сп҃си́ мѧ ѿ сѣ́тей ловѧ́щихъ, бг҃ороди́тельнице.
Пѣ́снь и҃
І҆рмо́съ: Ѻ҆́троки бл҃гочєсти́выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Разрѣша́еши мѧ̀ ѿ ᲂу҆́зъ лѣ́тныхъ, въ лѣ́то безлѣ́тный бы́въ, свѧ́занъ же бы́въ во́лею, го́рдаго ᲂу҆́замъ нерѣши̑мымъ ѿсла́лъ є҆сѝ влⷣко, и҆ сп҃са́еши мѧ̀ крⷭ҇то́мъ и҆ стрⷭ҇тїю: тѣ́мже бл҃гословлю́ тѧ, хрⷭ҇тѐ, во вѣ́ки.
Воздви́гсѧ на дре́во во́лею, и҆ всю̀ тва́рь совоздви́глъ є҆сѝ, сло́ве препѣ́тый, безнача́льне и҆ неви́диме, и҆́же нача̑ла и҆ вла̑сти тьмы̀ стрⷭ҇тїю твое́ю, хрⷭ҇тѐ, ѡ҆бличи́лъ є҆сѝ: тѣ́мже тѧ̀ пое́мъ во всѧ̑ вѣ́ки.
Мч҃нченъ: Всѣдо́сте на кро́вь свою̀ ꙗ҆́кѡ на колесни́цꙋ, мч҃нцы всекра́снїи, и҆ къ премі̑рнымъ взѧ́ти бы́сте селе́нїємъ, ѿ хрⷭ҇та̀ достѡ́йныѧ по́чєсти прїе́млюще, гдⷭ҇а по́йте, вопїю́ще, и҆ превозноси́те є҆го̀ во вѣ́ки.
Мч҃нченъ: На древа̀ возвыша́еми, и҆ въ ро́въ вмета́еми, ѕвѣрє́мъ же вдава́еми, во ѻ҆́гнь же и҆ въ во́дꙋ раздѣле́ни быва́юще, стрⷭ҇тоно́сцы мч҃нцы, ра́дꙋющесѧ поѧ́хꙋ: гдⷭ҇а по́йте, и҆ превозноси́те є҆го̀ во вѣ́ки.
Бг҃оро́диченъ: Ви́дѣвши ᲂу҆снꙋ́вша на дре́вѣ хрⷭ҇та̀, всѣ̑мъ бо́дрость подаю́щаго бж҃е́ственнꙋю и҆ сп҃си́тельнꙋю, мт҃и всенепоро́чнаѧ, восклица́нїемъ рыда́ше и҆ взыва́ше: что̀ сїѐ новѣ́йшее чꙋ́до; ѡ҆живлѧ́ѧй всѧ̑, ᲂу҆мира́етъ хотѧ̀.
И҆́нъ І҆рмо́съ то́йже.
Блꙋ́днѡ житїѐ и҆жди́въ, и҆ всѧ́кꙋю нечистотꙋ̀ содѣ́лавъ, трепе́щꙋ сꙋди́ща, трепе́щꙋ и҆стѧза́нїѧ, трепе́щꙋ и҆ ѿвѣ́та ѡ҆сꙋжде́нїѧ моегѡ̀, чⷭ҇таѧ: ꙗ҆́же сꙋдїю̀ ро́ждшаѧ, предста́ни мѝ тогда̀, и҆ и҆зба́ви мѧ̀ нꙋ́жды.
На тѧ̀ всю̀ наде́ждꙋ сп҃се́нїѧ моегѡ̀ возложи́хъ, бг҃омт҃и неискꙋсобра́чнаѧ, и҆ тебѐ на по́мощь призыва́ю всегда̀: сп҃си́ мѧ ѿ печа́лей и҆ напа́стей врага̀, и҆ разрѣшѝ плени̑цы ѕѡ́лъ мои́хъ, и҆ вѣ́чныѧ тьмы̀ и҆схити́ мѧ.
Въ ча́съ, дв҃о, конца̀ моегѡ̀ рꙋкѝ бѣсо́вскїѧ мѧ̀ и҆схитѝ, и҆ сꙋда̀ и҆ прѣ́нїѧ, и҆ стра́шнагѡ и҆спыта́нїѧ, и҆ мыта́рствъ го́рькихъ, и҆ кнѧ́зѧ лю́тагѡ, бг҃ома́ти, и҆ вѣ́чнагѡ ѡ҆сꙋжде́нїѧ.
Соблюдѝ раба̀ твоего̀, дв҃о, ѿ всѧ́кагѡ навѣ́та чꙋжда́гѡ, тѧ́ бо и҆́мамъ влⷣчце, покро́въ и҆ застꙋпле́нїе, прибѣ́жище и҆ ᲂу҆твержде́нїе: и҆ тебѐ ра́ди ча́ю и҆зба́витисѧ сѣ́тей врага̀, є҆ди́на предста́тельнице ро́да человѣ́ческагѡ.
Та́же, пое́мъ пѣ́снь бцⷣѣ: Вели́читъ дꙋша̀ моѧ̀ гдⷭ҇а:
Пѣ́снь ѳ҃
І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ бцⷣе, чⷭ҇таѧ приснодв҃о.
Стоѧ́ше сꙋди́мь чл҃вѣколю́бче, и҆́же сꙋди́ти хотѧ́й всѣ̑мъ: вѣнце́мъ же терно́вымъ ᲂу҆вѧ́злсѧ є҆сѝ хоти́тельнѣ, сп҃се свое́ю во́лею, преслꙋша́нїѧ, хрⷭ҇тѐ, тє́рнїѧ и҆з̾ ко́рене и҆стерза́ѧ, всѣ̑мъ же насажда́ѧ твоегѡ̀ бл҃гоꙋтро́бїѧ позна́нїе.
Ѽ ка́кѡ лю́дїе беззако́ннїи, за́вистїю сꙋ́ще ѡ҆мраче́ни, пра́ведна сꙋ́ща, и҆ непоро́чна тѧ̀, свѣтода́вче крⷭ҇тꙋ̀ предаю́тъ; є҆гѡ́же стрⷭ҇ть со́лнце зрѧ̀ помрача́шесѧ, и҆ свѣ́тлость цр҃ко́внаѧ раздира́шесѧ, и҆ колеба́хꙋсѧ ѡ҆снова̑нїѧ землѝ.
Мч҃нченъ: Соѡбра́зни стрⷭ҇те́мъ хрⷭ҇тѡ́вымъ бы́сте ст҃і́и мч҃нцы, и҆ снаслѣ̑дницы црⷭ҇твїѧ и҆ свѣ́тлости: тѣ́мже просвѣти́те премꙋ́дрїи, пѣвцы̀ ва́шѧ, грѣхо́внагѡ мра́ка свобожда́юще, и҆ разли́чныхъ ѡ҆бстоѧ́нїй.
Мч҃нченъ: Оу҆жѐ въ са̑маѧ премꙋ́дрїи нбⷭ҇наѧ все́льшесѧ, сла́вꙋ же прїе́мше присносꙋ́щнꙋю, и҆ прича́стїи сщ҃е́нными ѡ҆божа́еми, помѧни́те всѣ́хъ на́съ, чтꙋ́щихъ вѣ́рою всесщ҃е́ннꙋю и҆ честнꙋ́ю ва́шꙋ па́мѧть, присносла́внїи.
Бг҃оро́диченъ: Просвѣтѝ, чⷭ҇таѧ, любо́вїю воспѣва́ющихъ и҆ велича́ющихъ тѧ̀, разрѣшѝ страсте́й на́шихъ тьмꙋ̀, ѻ҆трокови́це, ᲂу҆кротѝ бꙋ́рю и҆ лꙋка́вагѡ собла́зны ѿ среды̀ ѿженѝ, ты̀, ѻ҆трокови́це, мл҃твами твои́ми.
И҆́нъ І҆рмо́съ то́йже.
Ра́дꙋйсѧ, ꙗ҆́же ра́дость ро́ждшаѧ, пречⷭ҇таѧ, сꙋ́щымъ на землѝ вои́стиннꙋ. ра́дꙋйсѧ, сп҃си́тельное приста́нище, и҆ покро́ве притека́ющихъ къ тебѣ̀. ра́дꙋйсѧ, лѣ́ствице чⷭ҇таѧ, возвы́сившаѧ па́дшихъ. ра́дꙋйсѧ, всебл҃же́ннаѧ бцⷣе, ᲂу҆пова́нїе дꙋша́мъ на́шымъ.
Разрꙋшѝ па́жить грѣха̀ моегѡ̀, ѡ҆скверне́нныѧ моеѧ̀ дꙋшѝ и҆ тѣлесѐ, бг҃ора́дованнаѧ пречⷭ҇таѧ влⷣчце, си́льною мл҃твою твое́ю, ѽ всенепоро́чнаѧ, и҆сцѣле́нїе да́вши сп҃си́тельное, влⷣчнїй стра́хъ бж҃е́ственный.
Ты̀ мнѣ̀ просвѣще́нїе, ты̀ мѝ и҆збавле́нїе и҆ ра́дованїе, ты̀ побо́рница моѧ̀, ты̀ моѧ̀ сла́ва и҆ похвала̀, и҆ ча́ѧнїе сп҃се́нїѧ моегѡ̀ є҆сѝ всенепоро́чнаѧ, и҆ тебѣ̀ вѣ́рнѡ покланѧ́юсѧ, и҆ вопїю́ ти: сп҃си́ мѧ ѻ҆каѧ́ннаго раба̀ твоего̀, и҆ ѿ вра́тъ а҆́довыхъ и҆схити́ мѧ.
Сп҃сѝ мѧ̀ чⷭ҇таѧ, сп҃са ро́ждшаѧ и҆ всеще́драго, ᲂу҆ще́дри мѧ̀ раба̀ твоего̀, и҆ къ покаѧ́нїѧ пꙋтѝ наста́ви: лꙋка́вагѡ собла́зны ѿ среды̀ ѿженѝ, и҆ тогѡ̀ ловле́нїѧ и҆зба́ви мѧ̀ и҆ ѻ҆гнѧ̀ вѣ́чнагѡ, пренепоро́чнаѧ, и҆схитѝ мѧ̀.
Та́же, Досто́йно є҆́сть: Є҆ктенїа̀, и҆ свѣти́ленъ, ѱалмы̀ ѻ҆бы́чны.
На стїхо́внѣ стїхи̑ры, гла́съ д҃:
Стѣна̀ бꙋ́ди на́мъ крⷭ҇тъ тво́й і҆и҃се сп҃се на́шъ: и҆но́гѡ бо ᲂу҆пова́нїѧ вѣ́рнїи не и҆́мамы, ра́звѣ тебѐ, на не́мъ пло́тїю пригво́ждшагѡсѧ, и҆ подаю́щагѡ на́мъ ве́лїю млⷭ҇ть.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Да́лъ є҆сѝ зна́менїе боѧ́щымсѧ тебѐ гдⷭ҇и, крⷭ҇тъ тво́й чⷭ҇тны́й, и҆́мже посрами́лъ є҆сѝ нача̑ла тьмы̀ и҆ вла̑сти, и҆ возве́лъ є҆сѝ на́съ на пе́рвое бл҃же́нство. тѣ́мже твоѐ чл҃вѣколю́бное смотре́нїе сла́вимъ, і҆и҃се всеси́льне, сп҃се дꙋ́шъ на́шихъ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Кто̀ не ᲂу҆жаса́етсѧ зрѧ̀ ст҃і́и мч҃нцы, по́двига до́брагѡ, и҆́мже подвиза́стесѧ; ка́кѡ во пло́ти сꙋ́ще, безпло́тнаго врага̀ побѣди́сте, хрⷭ҇та̀ и҆сповѣ́дающе, и҆ крⷭ҇то́мъ воѡрꙋжи́вшесѧ; тѣ́мже досто́йнѡ ꙗ҆ви́стесѧ бѣсѡ́въ прогони́телїе, и҆ ва́рварѡвъ побѣди́телїе, непреста́ннѡ молѧ́щесѧ сп҃сти́сѧ дꙋша́мъ на́шымъ.
Сла́ва, и҆ ны́нѣ, крⷭ҇тобг҃оро́диченъ: Подо́бенъ: Ꙗ҆́кѡ до́блѧ:
На крⷭ҇тѣ̀ тѧ̀ ꙗ҆́кѡ ᲂу҆зрѣ̀ пригвожде́на, гдⷭ҇и, а҆́гница и҆ мт҃и твоѧ̀ дивлѧ́шесѧ, и҆ что̀ видѣ́нїе сїѐ взыва́ше, сн҃е вожделѣ́нне; сїѧ̑ тѝ невѣ́рный собо́ръ воздадѐ беззако́нный, и҆́же мно́гихъ твои́хъ чꙋде́съ наслади́выйсѧ; но сла́ва неизглаго́ланномꙋ соше́ствїю твоемꙋ̀, влⷣко.
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е. По Ѻ҆́ч҃е на́шъ: Тропа́рь, є҆ктенїа̀, и҆ ча́съ а҃-й, и҆ про́чее ѻ҆бы́чно, и҆ ѿпꙋ́стъ.
Въ пѧто́къ бл҃жє́нны, гла́съ д҃:
Дре́вомъ а҆да́мъ раѧ̀ бы́сть и҆зселе́нъ: дре́вомъ же кре́стнымъ разбо́йникъ въ ра́й всели́сѧ. ѻ҆́въ ᲂу҆́бѡ вкꙋ́шъ, за́повѣдь ѿве́рже сотво́ршагѡ: ѻ҆́въ же сраспина́емь, бг҃а и҆сповѣ́да таѧ́щагосѧ, помѧни́ мѧ, вопїѧ̀, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Зрѧ́ще тѧ̀ на крⷭ҇тѣ̀ распросте́рта, є҆ди́не долготерпѣли́ве, си̑лы нбⷭ҇ныѧ, недоꙋмѣ́ющесѧ съ тре́петомъ дивлѧ́хꙋсѧ: землѧ́ же колеба́шесѧ, и҆ свѣти̑лъ добро́та ᲂу҆гаса́ше непра́веднѡ чл҃вѣколю́бче, ѡ҆сꙋжда́емꙋ тебѣ̀, а҆да́мъ ѡ҆сꙋжде́нный ѡ҆правда́шесѧ: сла́влю бл҃гоꙋтро́бїе твоѐ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
На ло́бнѣмъ возне́ссѧ, вра́жїю главꙋ̀ сокрꙋши́лъ є҆сѝ: на дре́вѣ же ᲂу҆́меръ, плодо́мъ дре́внымъ ᲂу҆ме́ршыѧ ѡ҆живи́лъ є҆сѝ влⷣко, и҆ раѧ̀ жи́тели ꙗ҆ви́лъ є҆сѝ, непреста́ннѡ сла́вѧщихъ твою̀ бл҃госты́ню, и҆ вопїю́щихъ: помѧнѝ на́съ во црⷭ҇твїи твое́мъ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Ꙗ҆́коже ѻ҆рꙋ́жїе крⷭ҇тъ воспрїе́мше ст҃і́и мч҃нцы, ко ѡ҆полче́нїю врагѡ́въ по́мысломъ до́блимъ и҆зыдо́сте: и҆ тѣ́хъ погꙋ́бльше, нетлѣ́ннымъ вѣнце́мъ ᲂу҆вѧзо́стесѧ, и҆ сла́вꙋ полꙋчи́сте вы́шнюю, ра́дꙋющесѧ достобл҃же́ннїи: тѣ́мже вѣ́рою ва́съ ᲂу҆бл҃жа́емъ.
Сла́ва: Да пока́жеши ꙗ҆́вственнѡ, є҆́же къ на́мъ сп҃се, бл҃гоꙋтро́бїе твоѐ, пригвозди́лсѧ є҆сѝ на крⷭ҇тѣ̀, ѻ҆ц҃ꙋ̀ соедине́нный и҆ дх҃ꙋ: гꙋ́бꙋ, и҆ тро́сть, порꙋга̑нїѧ и҆ ра̑ны претерпѣ́лъ є҆сѝ, хотѧ̀ и҆зба́вити ѻ҆гнѧ̀ вѣ́чнагѡ зовꙋ́щыѧ: помѧнѝ на́съ сп҃се, во црⷭ҇твїи твое́мъ.
И҆ ны́нѣ: Невмѣсти́мый вездѣ̀, нестѣснѧ́емь мѣ́стомъ, всели́сѧ во ст҃ꙋ́ю ᲂу҆тро́бꙋ твою̀, бг҃ороди́тельнице пречⷭ҇таѧ влⷣчце, и҆ на дре́вѣ повѣ́шенъ, жи́знь мі́рови ꙗ҆́вѣ и҆сточи́лъ є҆́сть. того̀ ᲂу҆молѝ ᲂу҆мертви́ти мꙋдрѡва́нїѧ пло́ти на́шеѧ, и҆ сп҃стѝ всѣ́хъ, ꙗ҆́кѡ чл҃вѣколю́бца.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.