Глас 3-й. Четверг.
Въ сре́дꙋ ве́чера,
на Гдⷭ҇и воззва́хъ, стїхи̑ры ст҃ы̑мъ а҆пⷭ҇лѡмъ, гла́съ г҃
Подо́бенъ: Ве́лїѧ мꙋ́чєникъ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Мл҃твами честны́хъ и҆ бж҃е́ственныхъ а҆пⷭ҇лъ твои́хъ, чл҃вѣколю́бче ще́дрый, є҆ди́не ми́лостиве, смире́нїе твоѐ пода́ждь рабѡ́мъ твои̑мъ, и҆ сп҃сѝ ѿ бѣ́дъ воспѣва́ющихъ тѧ̀, и҆ вѣ́рою покланѧ́ющихсѧ.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Є҆гда̀ на престо́лѣхъ ѻ҆боюна́десѧтихъ сѧ́дете со всѣ́хъ сꙋдїе́ю, сꙋди́ти всѧ́кой тва́ри: не ѡ҆сꙋжде́на мѧ̀ покажи́те, и҆ тьмы̀ и҆ всѧ́кагѡ томле́нїѧ и҆зба́вите благода́тели моѝ, бж҃е́ственнїи а҆пⷭ҇толи.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Ѿ стрѣ́лъ нечести́вагѡ и҆зба́вите мѧ̀, ꙗ҆́кѡ бж҃їи самови́дцы, ᲂу҆гаша́юще є҆гѡ̀ кова̑рства: и҆ ѡ҆роси́те мѧ̀ дꙋхо́вною росо́ю, ва́съ молю̀ мꙋ́дрїи бл҃года́тели моѝ, бж҃е́ственнїи а҆пⷭ҇ли.
Та́же въ мине́и стїхи̑ры ст҃о́мꙋ. А҆́ще нѣ́сть мине́и, и҆́ны стїхи̑ры ст҃о́мꙋ и҆ вели́комꙋ чꙋдотво́рцꙋ нїкола́ю: гла́съ и҆ подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Оу҆ѧ́звенъ бы́хъ ѻ҆каѧ́нный ѕмїи́нымъ ᲂу҆грызе́нїемъ, и҆ лежꙋ̀ пове́рженъ ме́ртвъ без̾ дыха́нїѧ: бо́дренною твое́ю мольбо́ю возста́ви мѧ̀ вско́рѣ, всеблаже́нне ст҃и́телю, да сла́влю твою̀ скоропослꙋшли́вꙋю бл҃года́ть.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Оу҆ма̀ моегѡ̀ помрачи́вшасѧ ѕлы́ми помышле́ньми, и҆ лежа́ща предви́дѧ, ника́коже престае́тъ ловле́ньми на мѧ̀ льстивомꙋ́дрый: но ꙗ҆́кѡ бг҃ъ ᲂу҆ще́дри и҆ спаси́ мѧ, нїкола́а мл҃твами.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ и҆ и҆́стина гдⷭ҇нѧ пребыва́етъ во вѣ́къ.
Вели́кое сп҃се́нїе всѣ̑мъ на́мъ ꙗ҆ви́лсѧ є҆сѝ, нїко́лае пребл҃же́нне: и҆збавлѧ́еши бо всѧ́ческихъ бѣ́дъ и҆ напа́стей рабы̑ твоѧ̑, и҆ и҆скꙋше́нїй и҆ недꙋ́гѡвъ и҆ ѡ҆бстоѧ́нїѧ, и҆ врагѡ́въ неви́димыхъ.
Сла́ва, и҆ ны́нѣ, бг҃оро́диченъ: Ве́лїѧ чꙋде́съ твои́хъ чⷭ҇таѧ, си́ла: и҆збавлѧ́еши бо ѿ бѣ́дъ, и҆ сп҃са́еши ѿ сме́рти, и҆ восхища́еши ѿ напа́стей ненача́емыхъ, и҆ скѡ́рби разрѣша́еши, и҆ согрѣшє́нїѧ человѣ́кѡвъ ѿе́млеши.
Та́же, Свѣ́те ти́хїй: Прокі́менъ днѐ.
На стїхо́внѣ стїхи̑ры а҆пⷭ҇льскїѧ, гла́съ г҃:
Во всю̀ зе́млю и҆зы́де вѣща́нїе ва́ше ст҃і́и а҆пⷭ҇ли, і҆́дѡльскꙋю пре́лесть разрꙋши́сте, бг҃оразꙋ́мїе проповѣ́давше: сѐ до́брый по́двигъ ва́шъ є҆́сть блаже́ннїи. сегѡ̀ ра́ди пое́мъ, и҆ славосло́вимъ па̑мѧти ва́шѧ.
Сті́хъ: Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Живоно́снагѡ вїногра́да сꙋ́ще ло́зїе, сла́внїи а҆пⷭ҇ли, пло́дъ бл҃гоче́стїѧ са́ми сѧ бг҃ꙋ принесо́сте. тѣ́мже дерзнове́нїе и҆мꙋ́ще къ немꙋ̀, проси́те дарова́ти ми́ръ, и҆ ве́лїю ми́лость дꙋша́мъ на́шымъ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ и҆ ᲂу҆ничиже́нїѧ го́рдыхъ.
Мꙋ́чєницы твоѝ гдⷭ҇и, вѣ́рою ᲂу҆тве́рждшесѧ, и҆ наде́ждею ᲂу҆крѣ́пльшесѧ, любо́вїю крⷭ҇та̀ твоегѡ̀ дꙋше́внѡ соедини́вшесѧ, вра́жїе мꙋчи́тельство разрꙋши́ша: и҆ ᲂу҆лꙋчи́вше вѣнцы̀, со безпло́тными мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ, бг҃оро́диченъ: Вельмѝ согрѣша́юща мѧ̀ ѻ҆трокови́це, и҆схитѝ вели́кою твое́ю мл҃твою пла́мене нꙋ́жднагѡ: и҆ и҆спра́ви чи́стаѧ твои́ми мольба́ми, ко спаси́тєльнымъ стезѧ́мъ наставлѧ́ющи мѧ̀, мт҃рними твои́ми мл҃твами.
Въ сре́дꙋ на повече́рїи,
канѡ́нъ моле́бный къ прест҃ѣ́й бцⷣѣ, гла́съ г҃.
Пѣ́снь а҃
І҆рмо́съ: Во́ды дре́вле ма́нїемъ бж҃е́ственнымъ во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.
Стена́нїе мѝ ᲂу҆́бѡ пода́ждь бцⷣе сокрꙋше́нное, и҆ сле́зꙋ дꙋше́внꙋю, ꙗ҆́кѡ да мои́хъ мно́гихъ прегрѣше́нїй пла́чꙋсѧ, и҆ со́вѣсти неисправле́нїѧ ѻ҆трокови́це, и҆ ᲂу҆молю̀ млⷭ҇рдїе твоѐ.
По́мыслы пополза́ѧсѧ, и҆ впа́даѧ въ бе́зднꙋ поги́бели, твоѐ дв҃о ны́нѣ молю̀ застꙋпле́нїе: ᲂу҆твердѝ непоколеби́мо неможе́нїе ᲂу҆ма̀ моегѡ̀ на ка́мени тве́рдѣмъ бж҃їихъ за́повѣдей.
Сла́ва: Смоко́вницꙋ ношꙋ̀ безпло́дїѧ, и҆ бою́сѧ посѣче́нїѧ и҆ прѝ, да не во ѻ҆́гнь по́слетъ мѧ̀ зижди́тель мо́й бг҃ъ. влⷣчце предвари́вши, покаѧ́нїѧ мѧ̀ дѣ́лы плодоно́сна сотворѝ, да сла́влю тѧ̀.
И҆ ны́нѣ: Ꙗ҆́кѡ непоро́ченъ хра́мъ цр҃е́въ, страстьмѝ безмѣ́стными ѡ҆скве́рншеесѧ се́рдце моѐ, молю́сѧ, ѡ҆чи́сти пречⷭ҇таѧ, цѣломꙋ́дрїемъ же и҆ чи́стымъ житїе́мъ, и҆ дѣ́лы ѡ҆богатѝ бг҃облагода́тнаѧ.
Пѣ́снь г҃
І҆рмо́съ: И҆́же ѿ не сꙋ́щихъ всѧ̑ приведы́й, сло́вомъ созида́ємаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.
Борю́щїи и҆ ѡ҆скорблѧ́ющїи мѧ̀ мно́зи сꙋ́ть, и҆ нѣ́сть ѡ҆сла́бы ѡ҆брѣстѝ и҆збавле́нїѧ ѿ ѡ҆быше́дшихъ мѧ̀: но не пре́зри чⷭ҇таѧ моле́нїѧ моегѡ̀.
Ѡ҆тѧгче́нъ мно́жествомъ ѕлы́хъ, и҆ мно́гими прегрѣше́нїи мои́ми, къ высотѣ̀ нбⷭ҇нѣй воззрѣ́ти не могꙋ̀: но ты̀ ѡ҆ставле́нїе мѝ пода́ждь, пречⷭ҇таѧ.
Сла́ва: Расто́ргнꙋти смире́ннꙋю мою̀ дꙋ́шꙋ ѕмі́й лꙋка́вый по всѧ̑ дни̑ покꙋша́етсѧ: но семꙋ̀ сокрꙋшѝ бцⷣе дꙋшетлѣ̑нныѧ зꙋ́бы.
И҆ ны́нѣ: И҆зба́ви мѧ̀ бцⷣе всѧ́кїѧ ѡ҆держа́щїѧ бѣды̀, и҆ грѣхо́вныѧ бꙋ́ри раба̀ твоего̀: и҆ къ сп҃си́тельномꙋ мѧ̀ приста́нищꙋ напра́ви твои́ми мл҃твами.
Пѣ́снь д҃
І҆рмо́съ: Положи́лъ є҆сѝ къ на́мъ тве́рдꙋю любо́вь гдⷭ҇и, є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й гдⷭ҇и.
Трепе́щꙋ помышлѧ́ѧ грѣхѡ́въ мои́хъ пꙋчи́нꙋ, и҆ сопроти́вныхъ помышле́нїй лю́тое и҆ вели́кое волне́нїе: но ты̀ ѡ҆кормѝ, и҆ къ тишинѣ̀ напра́ви мѧ̀ пречⷭ҇таѧ.
Недовѣ́дѣнїе тѧ́жкое дꙋ́шꙋ мою̀ ны́нѣ пости́же, неразꙋ́мїе и҆ забве́нїе ѕлы́хъ, ꙗ҆̀же въ житїѝ содѣ́ѧхъ: но ты̀ ᲂу҆́бѡ пречⷭ҇таѧ, на покаѧ́нїе содѣ́ѧнныхъ мно́ю наведи́ мѧ.
Сла́ва: Ѻ҆́гнь страсте́й сле́зными стрꙋѧ́ми ᲂу҆гасѝ, и҆ ᲂу҆давлѧ́ющее мо́й ᲂу҆́мъ жите́йское треволне́нїе, и҆ те́рнїе попалѝ ѻ҆гне́мъ дх҃а бг҃ороди́тельнице: ты́ бо покро́въ мѝ є҆сѝ и҆ похвала̀.
И҆ ны́нѣ: Молво́ю напа́стей и҆ треволне́нїй ве́сь потоплѧ́емь є҆́смь лꙋка́выми по́мыслы, и҆ во глꙋбинꙋ̀ ѿча́ѧнїѧ при́снѡ низвлеко́мь, вопїю́ ти: влⷣчце сп҃си́ мѧ раба̀ твоего̀.
Пѣ́снь є҃
І҆рмо́съ: Ꙗ҆́кѡ ви́дѣ и҆са́їа ѻ҆бра́знѡ на престо́лѣ превознесе́на бг҃а, ѿ а҆́гг҃лъ сла́вы дорѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ, и҆ ми́ромъ влады́чествꙋюща.
Дꙋшѝ моеѧ̀ болѣ̑зни, и҆ пло́ти неможе́нїе вѣ́си влⷣчце, и҆ ᲂу҆ма̀ моегѡ̀ гни́лость и҆ непостоѧ́тельное. тѣ́мже сподо́би мѧ̀ млⷭ҇ти и҆ бл҃года́ти твоеѧ̀, да тѧ̀ сла́влю спаса́емь кро́вомъ твои́мъ.
Не затвори́ ми млⷭ҇рдїѧ щедро́тъ твои́хъ, влⷣчце всенепоро́чнаѧ: но во ᲂу҆миле́нїи приходѧ́щемꙋ къ тебѣ̀ пода́ждь твоѧ̑ ми́лѡсти, и҆ лю́тыхъ премѣне́нїе и҆ проще́нїе, ꙗ҆́кѡ да благода́рнѡ пою̀ вели̑чїѧ твоѧ̑.
Сла́ва: Оу҆мно́жишасѧ дв҃о ненави́дѧщїи мѧ̀ всꙋ́е, и҆ ѡ҆скорблѧ́ющїи ны́нѣ, па́че вла̑съ главы̀ моеѧ̀ чⷭ҇таѧ, и҆́щꙋще расто́ргнꙋти, и҆ снѣ́дь сотвори́ти себѣ̀: си́хъ ᲂу҆́бѡ стꙋда̀ и҆спо́лнши возвратѝ.
И҆ ны́нѣ: Ꙗ҆́же мі́рови ми́ръ, и҆ сп҃се́нїе всѣ̑мъ пода́вшаѧ, ꙗ҆́кѡ бж҃е́ственный ми́ръ поро́ждши дв҃о, бра́нь страсте́й дꙋшѝ моеѧ̀ и҆ тѣ́ла, чи́стаѧ, ᲂу҆мирѝ стра́хомъ и҆ любо́вїю сп҃са хрⷭ҇та̀.
Пѣ́снь ѕ҃
І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но простры́й влⷣко высо́кꙋю твою̀ мы́шцꙋ, ꙗ҆́кѡ петра́ мѧ ᲂу҆пра́вителю спасѝ.
Въ дѣ́лѣ и҆ сло́вѣ и҆ дѣѧ́нїи, нѣ́сть ѕлѣ̀ пожи́вша на землѝ, ꙗ҆́коже а҆́зъ: тѣ́мже твоегѡ̀ прошꙋ̀ влⷣчце чл҃вѣколю́бїѧ, ᲂу҆лꙋчи́ти ми́лѡсти.
Дѣѧ̑нїѧ ѕлы́хъ прегрѣше́нїй, печа̑ли ражда́ютъ всѣ̑мъ тѣ́мже го́рькими напа́стьми ѡ҆держи́ми є҆смы̀ ны́нѣ: помозѝ на́мъ, ꙗ҆́же є҆ди́на хрⷭ҇тїа́нѡмъ сп҃се́нїе.
Сла́ва: И҆ ражда́еши, и҆ чиста̀ по ржⷭ҇твѣ̀ ꙗ҆ви́ласѧ є҆сѝ бцⷣе дв҃о. тѣ́мже молѝ твоѐ ржⷭ҇тво̀ при́снѡ, да и҆зба́вимсѧ ѿ всѧ́кагѡ вре́да вра́жїѧ твоѝ рабѝ.
И҆ ны́нѣ: Мл҃твами пречи́стыѧ мт҃ре твоеѧ̀, и҆ всѣ́хъ прⷪ҇рѡ́къ и҆ мꙋ́чєникъ, и҆ свѧще́нныхъ ᲂу҆чєни́къ, сло́ве бж҃їй пода́ждь на́мъ ми́ръ, и҆ ѡ҆чище́нїе прегрѣше́нїй.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ г҃:
Всѐ житїѐ моѐ въ лѣ́ности мно́зѣ преидо́хъ пречи́стаѧ, и҆ ны́нѣ прибли́жихсѧ ко и҆схо́дꙋ моегѡ̀ вре́мене, и҆ ᲂу҆страши́хсѧ ѿ врагѡ́въ мои́хъ, да не расто́ргнꙋтъ дꙋ́шꙋ мою̀ всенепоро́чнаѧ, и҆ въ поги́бели мѧ̀ глꙋбинꙋ̀ ѿпꙋ́стѧтъ: но ᲂу҆ще́дри раба̀ твоего̀ дв҃о, и҆ и҆зба́ви мѧ̀ си́хъ ѡ҆ѕлобле́нїѧ.
Пѣ́снь з҃
І҆рмо́съ: Ꙗ҆́коже дре́вле благочєсти́выѧ трѝ ѻ҆́троки ѡ҆роси́лъ є҆сѝ въ пла́мени халде́йстѣмъ, свѣ́тлымъ бж҃ества̀ ѻ҆гне́мъ и҆ на́съ ѡ҆зарѝ, бл҃гослове́нъ є҆сѝ, взыва́ющыѧ, бж҃е ѻ҆тє́цъ на́шихъ.
Тебѐ мт҃рь бж҃їю чи́стꙋю и҆ непоро́чнꙋю, ѡ҆скверне́нный тѣ́ломъ и҆ дꙋше́ю, и҆ ѻ҆калѧ́нный дѣѧ́ньми нечи́стыми, молю̀ влⷣчце, надѣ́ѧсѧ на млⷭ҇ть твою̀ ᲂу҆ще́дри мѧ̀ пречⷭ҇таѧ.
Прегрѣше́нїй мои́хъ мно́жество, и҆ ѕлы́хъ и҆спыта́нїе, недоꙋмѣ́нїемъ мѧ̀ препира́етъ ѕѣлѡ̀, и҆ во ѿча́ѧнїѧ влече́тъ мѧ̀ глꙋбинꙋ̀: но ты̀ пречи́стаѧ влⷣчце, спаси́ мѧ погиба́ющаго, и҆ лю́тѣ потоплѧ́ема.
Сла́ва: Мно́жествомъ щедро́тъ твоеѧ̀ бл҃гости, грѣхѡ́въ на́шихъ мно́жество пре́зри бл҃же, и҆ благопремѣ́ненъ бꙋ́ди немо́лчнѡ зовꙋ́щымъ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
И҆ ны́нѣ: Ѿ бре́нїѧ страсте́й, и҆ глꙋбины̀ скорбе́й, и҆ напа́стей жите́йскихъ, привлецы̀ на́съ къ безстра́стїю чи́стаѧ, и҆ ра́достномꙋ весе́лїю, благослове́ннаѧ, зовꙋ́щихъ: ты̀ є҆сѝ є҆ди́на бг҃облагода́тнаѧ.
Пѣ́снь и҃
І҆рмо́съ: Веще́ственнагѡ ѻ҆гнѧ̀ пла́мень невеще́ственнымъ ᲂу҆вѧди́ша, бг҃озри́мїи ѻ҆́троцы, и҆ поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.
Сласте́й го́ресть чꙋ̑вства всѧ̑ тѣлє́снаѧ проше́дши, дꙋ́шꙋ мою̀ безмѣ́стнѡ ѡ҆калѧ́етъ, и҆ въ сме́рть влече́тъ: влⷣчце мі́ра, бꙋ́ди мѝ сп҃се́нїе.
На тѧ̀ дꙋ́шꙋ, и҆ се́рдце, и҆ тѣ́ло возложи́хъ: не и҆́мамъ бо и҆ны́ѧ наде́жды ра́звѣ тебѐ влⷣчце, є҆́юже полꙋчꙋ̀ ми́лѡсти. тѣ́мже мѝ пода́ждь бога́тꙋю твою̀ млⷭ҇ть и҆ бл҃года́ть.
Сла́ва: Ѕмі́й мѧ̀ ꙗ҆́домъ приползнꙋ́въ, плотско́ю сла́стїю ѻ҆каѧ́ннꙋю дꙋ́шꙋ мою̀ лю́тѣ ᲂу҆морѝ: но ѡ҆живѝ сїю̀ сопроти́вными лѣчба́ми, чⷭ҇таѧ, твои́ми мл҃твами.
И҆ ны́нѣ: Ꙗ҆́же бг҃а и҆ сп҃са ро́ждшаѧ, миронача́льника, того̀ молѝ, ми́ръ мі́рови посла́ти вско́рѣ, ꙗ҆́кѡ да въ ми́рѣ того̀ славосло́вимъ.
Пѣ́снь ѳ҃
І҆рмо́съ: Тебѐ неѡпали́мꙋю кꙋпинꙋ̀, и҆ ст҃ꙋ́ю дв҃ꙋ, мт҃рь свѣ́та, и҆ бцⷣꙋ, наде́ждꙋ всѣ́хъ на́съ велича́емъ.
Скве́рнꙋ стра́стныхъ помышле́нїй моегѡ̀ ᲂу҆ма̀ ѡ҆чи́сти чⷭ҇таѧ, въ безстра́стїѧ ри́зꙋ свѣ́тлꙋю ѡ҆дѣва́ющи мѧ̀.
Ѿве́рзи мѝ дв҃о бж҃є́ственныѧ вхо́ды покаѧ́нїѧ, вхо́ды страсте́й и҆ сласте́й мои́хъ загражда́ющи, и҆ возбранѧ́ющи си́лою твое́ю.
Сла́ва: Оу҆слы́ши гла́съ стена́нїѧ моегѡ̀, и҆ гла́съ пла́ча моегѡ̀, и҆ пода́ждь ѡ҆чище́нїе и҆ сп҃се́нїе ѻ҆каѧ́ннѣй мое́й дꙋшѝ, дв҃о всенепоро́чнаѧ.
И҆ ны́нѣ: Ви́дѣ данїи́лъ прⷪ҇ро́къ твоѐ рождество̀ дв҃о, ви́дѣ рѣсноти́внѡ вои́стиннꙋ, и҆́же на престо́лѣ ви́дѣ, є҆го́же де́ньми ве́тхаго возгласѝ.
Та́же, Досто́йно є҆́сть: И҆ покло́нъ. Трист҃о́е, и҆ по Ѻ҆́ч҃е на́шъ: тропарѝ, и҆ про́чее ѻ҆бы́чное, и҆ ѿпꙋ́стъ.
Въ четверто́къ ᲂу҆́тра,
по а҃-мъ стїхосло́вїи сѣда́ленъ, гла́съ г҃:
Прїиди́те всѝ, а҆пⷭ҇лы восхва́лимъ ꙗ҆́кѡ ко́рмчыѧ: і҆́дѡльскꙋю бо пре́лесть ᲂу҆праздни́ша, и҆ къ свѣ́тꙋ жи́зни возведо́ша, и҆ въ трⷪ҇цꙋ вѣ́ровати наꙋчи́ша. тѣ́мже дне́сь па́мѧть и҆́хъ честнꙋ́ю соверша́юще вѣ́рнїи, сла́вимъ хрⷭ҇та̀ бг҃а на́шего.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
А҆пⷭ҇лъ твои́хъ па́мѧть ᲂу҆ѧсни́лъ є҆сѝ гдⷭ҇и, ꙗ҆́кѡ всеси́ленъ, ꙗ҆́кѡ ᲂу҆крѣпи́лъ є҆сѝ и҆̀хъ, стрⷭ҇те́мъ твои̑мъ подо́битисѧ, и҆ побѣди́ша мꙋ́жески вра́жїю си́лꙋ. тѣ́мже и҆ прїѧ́ша и҆сцѣле́нїй благода̑ти: тѣ́хъ мл҃твами чл҃вѣколю́бче, ми́ръ пода́ждь лю́демъ твои̑мъ.
Сла́ва, и҆ ны́нѣ, бг҃оро́диченъ: Непостижи́маго и҆ неѡпи́саннаго, є҆диносꙋ́щнаго безнача́льномꙋ ѻ҆ц҃ꙋ̀, во чре́во твоѐ та́йнѡ вмѣсти́ла є҆сѝ бцⷣе. є҆ди́но и҆ несмѣ́сно ѿ трⷪ҇цы бж҃ество̀ разꙋмѣ́хомъ, ржⷭ҇тво̀ твоѐ въ мі́рѣ сла́вѧще. тѣ́мже и҆ бл҃года́рнѡ вопїе́мъ тѝ: ра́дꙋйсѧ ѡ҆бра́дованнаѧ.
По в҃-мъ стїхосло́вїи сѣда́льны, гла́съ г҃:
Всю̀ напои́ша зе́млю стрꙋѧ́ми а҆пⷭ҇ли, бж҃їѧ сло́ва, и҆ возрастѐ кла́съ вѣ́ры, и҆ концы̀ вселе́нныѧ напо́лни: пле́велы бо всѧ̑ посѣко́ша. тѣ́мже всѣ́хъ хрⷭ҇тꙋ̀ бг҃ꙋ приведо́ша, креща́юще тѣ́хъ въ трⷪ҇цꙋ несозда́ннꙋю.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
И҆ па́ки глаго́лемъ то́йже сѣда́ленъ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Стрⷭ҇тоте́рпцы ст҃і́и, моли́те ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Прⷪ҇ро́цы проповѣ́даша, а҆пⷭ҇ли наꙋчи́ша, мꙋ́чєницы и҆сповѣ́даша, и҆ мы̀ вѣ́ровахомъ бцⷣꙋ тѧ̀ вои́стиннꙋ сꙋ́щꙋю: тѣ́мже и҆ велича́емъ ржⷭ҇тво̀ твоѐ, пречⷭ҇таѧ.
По г҃-мъ стїхосло́вїи сѣда́льны, гла́съ г҃:
А҆пⷭ҇лы твоѧ̑ хрⷭ҇тѐ, въ концы̀ земны̑ѧ посла́лъ є҆сѝ, ꙗ҆́кѡ млⷭ҇рдъ, ꙗ҆́кѡ и҆з̾ѡщре́ныѧ си́льнѣ стрѣ́лы, закала́ющѧ всѧ́кое нече́стїе и҆ ѕлосꙋ́етствїе, и҆ насажда́ющѧ сп҃си́тєльнаѧ ᲂу҆чє́нїѧ: тѣ́хъ мольба́ми ще́дре, ми́ръ пода́ждь дꙋша́мъ на́шымъ.
Тебѐ проповѣ́дника и҆́стины, и҆ пресвѣ́тлаго свѣти́льника мі́рꙋ, хва́лѧще воспѣва́емъ нїко́лае, и҆ вопїе́мъ вѣ́рою молѧ́щесѧ: ꙗ҆́коже непови̑нныѧ ѿ сме́рти и҆схи́тилъ є҆сѝ: та́кѡ свѧ́те, и҆ на́съ ѿ бѣ́дъ и҆ скорбе́й и҆ всѧ́кагѡ и҆зба́ви лю́тагѡ ѡ҆ѕлобле́нїѧ.
Сла́ва, и҆ ны́нѣ, бг҃оро́диченъ: Оу҆мертви́вшꙋюсѧ дꙋ́шꙋ мою̀ согрѣше́ньми мно́гими, всенепоро́чнаѧ влⷣчце: ѡ҆живѝ, ꙗ҆́кѡ дерзнове́нїе ма́тернее къ сн҃ꙋ твоемꙋ̀ и҆мꙋ́щи: ты́ бо є҆ди́на родила̀ є҆сѝ па́че ᲂу҆ма̀ и҆ смы́сла сло́во собезнача́льное ѻ҆ц҃ꙋ̀ и҆ дх҃ꙋ, живо́тъ и҆ нетлѣ́нїе мі́рꙋ да́рꙋюща при́снѡ, и҆ ве́лїю млⷭ҇ть.
Канѡ́нъ ст҃ы̑мъ сла̑внымъ и҆ всехва̑льнымъ а҆пⷭ҇лѡмъ. Творе́нїе ѳеофа́ново. Гла́съ г҃.
Пѣ́снь а҃
І҆рмо́съ: Во́ды дре́вле, ма́нїемъ бж҃е́ственнымъ, во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ: се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.
Цр҃кѡ́вныѧ столпы̀, ѡ҆снова̑нїѧ вѣ́ры, бл҃гочє́стнаѧ ᲂу҆тверждє́нїѧ, и҆ вѣ̑рныѧ всѧ̑ ᲂу҆твержда́ющаѧ, прїиди́те ᲂу҆бл҃жи́мъ сщ҃є́нныѧ а҆пⷭ҇лы, ꙗ҆́кѡ да мольба́ми и҆́хъ спасе́мсѧ. [Два́жды.]
Са́мъ себѐ пре́жде сꙋда̀ блꙋ́дный ᲂу҆боѧ́всѧ ѡ҆сꙋжда́ю, ѕла̑ѧ бо дѣла̀ безчи́слєннаѧ стѧжа́хъ. тѣ́мже молю́сѧ тѝ првⷣный сꙋдїѐ: ѿча́ѧннаго мѧ̀ сп҃сѝ бж҃е́ственными мольба́ми а҆пⷭ҇лъ твои́хъ.
Непревра́тнїи столпы̀ бл҃гоче́стїѧ, прельще́нїемъ мѧ̀ вра́жїимъ препѧ́таго, и҆ на землѝ лежа́щаго и҆ бѣ́дствꙋющаго, и҆ недоꙋмѣва́ющагосѧ и҆спра́вите, ꙗ҆́кѡ да ѡ҆брѧ́щꙋ ѡ҆ставле́нїе, ѡ҆ ни́хже согрѣши́хъ.
Бг҃оро́диченъ: Со ст҃ы́ми прⷪ҇ро́ки, со а҆пⷭ҇лы, и҆ мч҃нки, и҆з̾ тебѐ вопло́щшагосѧ гдⷭ҇а, прилѣ́жнѡ чи́стаѧ молѝ, ꙗ҆́кѡ да плотскі̑ѧ на́шѧ всѧ̑ стра̑сти ᲂу҆мертви́тъ, и҆ живо́тъ вѣ́чный на́мъ да́рꙋетъ.
Дрꙋгі́й канѡ́нъ, ст҃о́мꙋ и҆ вели́комꙋ чꙋдотво́рцꙋ нїкола́ю. Творе́нїе і҆ѡ́сифово. Гла́съ г҃.
Пѣ́снь а҃
І҆рмо́съ: Пои́мъ гдⷭ҇еви, сотво́ршемꙋ ди̑внаѧ чꙋдеса̀ въ чермнѣ́мъ мо́ри: по́нтомъ бо покры̀ проти̑вныѧ, и҆ спасѐ і҆и҃лѧ. томꙋ̀ є҆ди́номꙋ пои́мъ, ꙗ҆́кѡ просла́висѧ.
Пресвѣ́тлаго свѣти́льника неꙋгаси́маго, на землѝ сꙋ́щаго столпа̀, и҆ къ приста́нищꙋ бж҃е́ственномꙋ призыва́юща, и҆̀же волна́ми жите́йскими при́снѡ потоплѧ́емїи, нїкола́а всѝ почти́мъ, и҆ любо́вїю ᲂу҆блажи́мъ.
Си́лою бж҃їею всебл҃же́нне ᲂу҆крѣплѧ́емь, ре́вность бл҃гоче́стїѧ по ра́зꙋмꙋ стѧжа́лъ є҆сѝ: тѣ́мже хотѧ́щыѧ непра́веднѡ ᲂу҆мре́ти и҆зба́вилъ є҆сѝ. сегѡ̀ ра́ди тѧ̀ мо́лимъ: всѧ́кагѡ непра́веднагѡ ѡ҆ѕлобле́нїѧ и҆зба́ви на́съ нїко́лае.
Молє́нїѧ гдⷭ҇еви ѻ҆́тче неѡскꙋ́днѡ приносѝ ты̀: ꙗ҆́кѡ да грѣхѡ́въ и҆ пла́мене мꙋче́нїѧ вѣ́чнꙋющагѡ, и҆ напа́стей, и҆ скорбе́й и҆зба́витъ на́съ, ꙗ҆́кѡ є҆ди́нъ бл҃гі́й.
Бг҃оро́диченъ: Ковче́гъ бж҃е́ственный и҆́же вмѣсти́вшїй законода́вца на́ша беззакѡ́нїѧ всѧ̑ ѿе́млющаго, ра́ди млⷭ҇рдїѧ бж҃е́ственнагѡ несказа́нныѧ пꙋчи́ны, мр҃і́ю пречи́стꙋю согла́снѡ воспои́мъ.
Пѣ́снь г҃
І҆рмо́съ: И҆́же ѿ не сꙋ́щихъ всѧ̑ приведы́й, сло́вомъ созида́ємаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.
И҆́же мі́ра концы̀ ᲂу҆че́нїѧ бж҃е́ственнагѡ и҆спо́лнивше, дꙋ́шꙋ мою̀ и҆спо́лните добродѣ́тельныхъ дѣѧ́нїй, и҆ помышле́нїй благи́хъ, хрⷭ҇то́вы самови́дцы. [Два́жды.]
Ѿ собла̑знъ мно́гихъ лꙋка́вагѡ, и҆ ѿ всѧ́кїѧ ско́рби, и҆ ѿ всѧ́кїѧ тѣсноты̀, ѿ всѧ́кагѡ ѡ҆бстоѧ́нїѧ, ᲂу҆ченицы̀ хрⷭ҇то́вы и҆зба́вите мѧ̀.
Оу҆вы̀ дꙋшѐ моѧ̀ ѻ҆каѧ́ннаѧ и҆ смире́ннаѧ, ча́стѡ согрѣша́ющи, и҆ бг҃а прогнѣ́вающи, ка́кѡ и҆спро́сиши проще́нїе ѕлы́хъ, и҆́хже не престае́ши творѧ́щи;
Бг҃оро́диченъ: Бж҃е́ственнаѧ лѣ́ствице, ю҆́же ви́дѣ і҆а́кѡвъ, по не́йже сни́де бг҃ъ, возносѧ̀ на́съ, прилѣ́жнѡ молѝ со а҆пⷭ҇лы, ᲂу҆ще́дрити на́съ.
И҆́нъ
І҆рмо́съ: Непло́днаѧ дꙋшѐ и҆ безча́днаѧ, стѧжѝ пло́дъ бл҃госла́вный, веселѧ́щисѧ возопі́й: ᲂу҆тверди́хсѧ тобо́ю бж҃е, нѣ́сть ст҃ъ, нѣ́сть пра́веденъ, па́че тебѐ гдⷭ҇и.
И҆зощре́нъ ме́чь дꙋхо́вный ꙗ҆ви́лсѧ є҆сѝ мꙋ́дре: лꙋка̑выѧ пле́вєлы є҆реті́чествꙋющихъ посѣца́ѧ, и҆ добродѣ́телей стєзѝ сп҃си́тєльныѧ вѣ̑рнымъ ᲂу҆глажда́ѧ, ѻ҆́тче нїко́лае.
Тебѣ̀ и҆сто́чникꙋ и҆сточа́ющꙋ и҆сцѣле́нїй пото́ки, мо́лимсѧ свѧ́те: сквє́рны страсте́й всѣ́хъ на́съ мл҃твами твои́ми ѡ҆мы́й, бѣ́дъ и҆ скорбе́й и҆збавлѧ́ѧ.
Крѣ́пкими твои́ми мл҃твами низлага́ѧ врага̀, и҆ ны́нѣ на́нь ᲂу҆крѣпѝ немѡщствꙋ́ющаѧ помышлє́нїѧ на́шѧ стра́стными прилѡ́ги, призыва́нїемъ ст҃ы́хъ твои́хъ мл҃твъ, ѻ҆́тче нїко́лае.
Бг҃оро́диченъ: Оу҆́мъ разꙋмѣ́ти не мо́жетъ, є҆́же па́че ᲂу҆ма̀ рожде́нїе, чꙋде́снагѡ ржⷭ҇тва̀ твоегѡ̀, бг҃ороди́тельнице всенепоро́чнаѧ, тѣ́мже молю́ тѧ: ᲂу҆́мъ мо́й ѡ҆благодатѝ при́снѡ сла́вити тѧ̀.
Пѣ́снь д҃
І҆рмо́съ: Положи́лъ є҆сѝ къ на́мъ тве́рдꙋю любо́вь гдⷭ҇и: є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й гдⷭ҇и.
Ꙗ҆́коже мѡ́лнїи, и҆ ꙗ҆́кѡ лꙋчы̀ незаходи́магѡ со́лнца, а҆пⷭ҇лы простира́ѧ сло́ве, въ мїрскі̑ѧ концы̀, всѣ́хъ просвѣти́въ, и҆ безбо́жїѧ мра́къ ѿгна́лъ є҆сѝ. [Два́жды.]
Мо́ре лю́тагѡ грѣха̀ сло́ве ѡ҆бꙋрева́етъ мѧ̀, и҆ волнє́нїѧ безчи́нныхъ помышле́нїй смире́ннꙋю дꙋ́шꙋ мою̀ смꙋща́ютъ: ѡ҆корми́телю гдⷭ҇и, ᲂу҆ч҃нкъ твои́хъ мольба́ми сп҃си́ мѧ.
Оу҆жаса́юсѧ помышлѧ́ѧ стра́шное твоѐ влⷣко прише́ствїе: и҆́мамъ бо пре́жде сꙋда̀, мою̀ ѡ҆сꙋжда́ющꙋю мѧ̀ внꙋ́трь со́вѣсть, и҆ пре́жде мꙋ́чащїѧ мꙋ́ки, нечꙋ́вствїе моѐ.
Бг҃оро́диченъ: Сло́ве бж҃їй, и҆́же рожде́йсѧ ѿ дв҃ы бг҃оѻтрокови́цы тоѧ̀ хода́тайствы сщ҃е́нными, и҆ премꙋ́дрыхъ а҆пⷭ҇лъ твои́хъ сп҃се, всѧ́кагѡ ѡ҆бстоѧ́нїѧ и҆ всѧ́кїѧ нꙋ́жды и҆зба́ви дꙋ́шы на́шѧ.
И҆́нъ
І҆рмо́съ: Прїѡсѣне́ннꙋю го́рꙋ а҆ввакꙋ́мъ прозрѧ́ше пречⷭ҇тꙋю твою̀ ᲂу҆тро́бꙋ чⷭ҇таѧ. тѣ́мъ взыва́ше: ѿ ю҆́га прїи́детъ бг҃ъ, и҆ ст҃ы́й ѿ горы̀ прїѡсѣне́нныѧ ча́щи.
Къ бг҃ꙋ хода́таѧ всѧ́къ вѣ́рный всегда̀ нїко́лае предлага́етъ тѧ̀. тѣ́мже тѧ̀ мо́лимъ, ѿ напа́стей лю́тыхъ, и҆ паде́нїй грѣхо́вныхъ на́съ и҆зба́ви ѻ҆́тче.
Во́дꙋ жи́вꙋ въ се́рдцы и҆мы́й бл҃года́ть гдⷭ҇ню, ѡ҆роша́еши при́снѡ мꙋ́дре, зно́емъ скорбе́й, и҆ сꙋхото́ю грѣхѡ́въ бѣ́дствꙋющихъ, ѻ҆каѧ́ннѣ поги́бнꙋти и҆мꙋ́щихъ, всебл҃же́нне.
И҆́же и҆зба́вилъ є҆сѝ и҆ногда̀ ведѡ́мыѧ на сме́рть непра́веднѡ, всебл҃же́нне: ны́нѣ и҆ на́съ сп҃са́й ѿ человѣ̑къ тлетво́рныхъ стꙋже́нїѧ, и҆ ѿ всѧ́кїѧ бѣсо́вскїѧ ле́сти.
Бг҃оро́диченъ: Вопло́щшесѧ сло́во премно́жествомъ бл҃гоꙋтро́бїѧ неизрече́ннѡ родила̀ є҆сѝ: того̀ молѝ пречⷭ҇таѧ, плотскі́ѧ стра́сти и҆ скве́рны всѣ́хъ и҆зба́вити, и҆ всѣ́хъ нꙋ́ждныхъ житїѧ̀.
Пѣ́снь є҃
І҆рмо́съ: На землѝ неви́димый ꙗ҆ви́лсѧ є҆сѝ, и҆ человѣ́кѡмъ во́лею сожи́лъ є҆сѝ непостижи́мый: и҆ къ тебѣ̀ ᲂу҆́тренююще, воспѣва́емъ тѧ̀ чл҃вѣколю́бче.
На землѝ вопло́щьсѧ, содѣ́лалъ є҆сѝ ᲂу҆ч҃нкѝ, нб҃са̀ вѣща̑юща хрⷭ҇тѐ сла́вꙋ твою̀: тѣ́хъ ра́ди ᲂу҆́бѡ гдⷭ҇и, дꙋ́шы на́шѧ поми́лꙋй. [Два́жды.]
Ѿ страсте́й и҆ ѿ всѧ́кїѧ нꙋ́жды, ѿ лю́тагѡ ѡ҆бстоѧ́нїѧ, сло́ве и҆зба́ви рабы̑ твоѧ̑, а҆пⷭ҇лъ твои́хъ бл҃гопрїѧ́тными мл҃твами.
Оу҆вы̀ мнѣ̀ дꙋшѐ всестра́стнаѧ, ка́кѡ хо́щеши стра́шномꙋ сꙋдꙋ̀ предста́ти безпло́дна сꙋ́щи; потщи́сѧ, пока́йсѧ, добродѣ́телей плоды̀ возраща́ющи.
Бг҃оро́диченъ: И҆́же на землѝ ꙗ҆́вльшагосѧ неизрече́ннѡ съ пло́тїю, ѿ чи́стыхъ крове́й твои́хъ чⷭ҇таѧ, молѝ ꙗ҆́кѡ сн҃а твоего̀ всегда̀, ѡ҆чище́нїе на́мъ дарова́ти.
И҆́нъ
І҆рмо́съ: Свѣ́томъ твои́мъ невече́рнимъ хрⷭ҇тѐ, ѡ҆зарѝ бж҃е смире́ннꙋю мою̀ дꙋ́шꙋ, и҆ наста́ви на стра́хъ тво́й, занѐ свѣ́тъ повелѣ̑нїѧ твоѧ̑.
Свѣ́тꙋ чи́стомꙋ предстоѧ̀, и҆ ѿтꙋ́дꙋ при́снѡ и҆сходѧ́щими зарѧ́ми просвѣща́емь ѻ҆́тче, и҆спросѝ всѣ̑мъ ѡ҆чище́нїе и҆ ми́ръ.
Менѐ па́че всѣ́хъ человѣ̑къ тебѐ прогнѣ́вавша ᲂу҆мо́мъ неразꙋ́мнымъ, пребл҃гі́й ᲂу҆ще́дри, нїкола́а те́плыми мл҃твами.
Во ᲂу҆ны́нїи и҆жди́вша мою̀ жи́знь, молю́сѧ тѝ ѻ҆́тче нїко́лае, воздви́гни къ покаѧ́нїю мы́сль мою̀ ѡ҆скверне́нꙋю.
Бг҃оро́диченъ: Ꙗ҆́кѡ є҆ди́на а҆́гг҃лѡвъ ра́дость бг҃ора́дованнаѧ, ра́дости и҆спо́лни мою̀ мы́сль сѣ́тꙋющꙋю, и҆ лѣ́ностїю погрꙋжа́емꙋю.
Пѣ́снь ѕ҃
І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но простры́й влⷣко высо́кꙋю твою̀ мы́шцꙋ, ꙗ҆́кѡ петра́ мѧ ᲂу҆пра́вителю сп҃сѝ.
Бе́зднꙋ премꙋ́дрости дꙋхо́вныѧ и҆сточи́вше, а҆пⷭ҇льское сосло́вїе, мїрска́гѡ и҆зсꙋшѝ мꙋдрова́нїѧ тече́нїе, и҆ напо́й бл҃гочести́выхъ собра̑нїѧ. [Два́жды.]
Воздохнѝ и҆ прослези́сѧ смире́ннаѧ дꙋшѐ моѧ̀, и҆ возопі́й ко гдⷭ҇ꙋ, глаго́лющи: согрѣши́хъ тѝ влⷣко, ѡ҆чи́сти мѧ̀ бл҃гоꙋтро́бне, мольба́ми премꙋ́дрыхъ а҆пⷭ҇лъ твои́хъ.
Потеко́ша пото́цы страсте́й, и҆ потопи́ша мою̀ дꙋше́внꙋю хра́минꙋ: рѣ́ки дꙋхѡ́вныѧ бы́вше а҆пⷭ҇ли, сокрꙋше́ннаго мѧ̀ къ животꙋ̀ ѡ҆бнови́те.
Бг҃оро́диченъ: Собо́ръ тѧ̀ а҆пⷭ҇лѡвъ хрⷭ҇тѐ, мо́литъ съ ро́ждшею тѧ̀: ѡ҆чище́нїе низпосла́ти и҆ ми́ръ рабѡ́мъ твои̑мъ, ꙗ҆́кѡ чл҃вѣколю́бецъ и҆ бг҃ъ бл҃гопремѣни́тель.
И҆́нъ
І҆рмо́съ: Глꙋбина̀ страсте́й воста̀ на мѧ̀, и҆ бꙋ́рѧ проти́вныхъ вѣ́трѡвъ: но предвари́въ мѧ̀ ты̀ сп҃сѝ сп҃се, и҆ и҆зба́ви ѿ тлѝ, ꙗ҆́кѡ сп҃слъ є҆сѝ ѿ ѕвѣ́рѧ прⷪ҇ро́ка.
Оу҆мертви́въ воздержа́нїемъ ᲂу҆́ды, стѧжа́лъ є҆сѝ жи́знь нестарѣ́емꙋю: є҆́йже и҆ на́съ ѻ҆́бщники твои́ми мл҃твами содѣ́лай мꙋ́дре, и҆збѣжа́нїемъ ѕла́гѡ грѣха̀.
Вѣ́триломъ сщ҃е́нныхъ твои́хъ мл҃твъ, пꙋчи́нꙋ напа́стей многоѡбра́зныхъ, и҆ грѣхо́вныѧ глꙋбины̀ и҆зба́ви на́съ, ко приста́нищꙋ же живота̀ приводѧ̀ мꙋ́дре ст҃и́телю.
Оу҆краси́въ мѷрлѷкі́йскїй престо́лъ, ꙗ҆ви́лсѧ є҆сѝ красота̀ первосщ҃е́нникѡмъ: но мл҃твами твои́ми ѿ мїрски́хъ напа́стей сп҃са́й ны̀ невреди́мы, ст҃и́телю.
Бг҃оро́диченъ: Всели́вшеесѧ во ᲂу҆тро́бꙋ твою̀ сло́во, мт҃и чⷭ҇таѧ, дре́вле въ человѣ́цѣхъ всели́вшꙋюсѧ ѿ престꙋпле́нїѧ тлю̀, ꙗ҆́кѡ бг҃ъ є҆ди́нъ, внѣ̀ и҆згна́лъ є҆́сть, за млⷭ҇рдїе млⷭ҇ти.
Пѣ́снь з҃
І҆рмо́съ: Пре́жде ѡ҆́бразꙋ злато́мꙋ, персі́дскомꙋ чти́лищꙋ, ѻ҆́троки не поклони́шасѧ, трїѐ пою́ще посредѣ̀ пе́щи: ѻ҆тцє́въ бж҃е бл҃гослове́нъ є҆сѝ.
И҆́же свѣ́тъ мі́рꙋ хрⷭ҇то́съ, свѣ́тъ ва́съ показа̀, свѣтоно́снїи а҆пⷭ҇ли, разгонѧ́ющихъ тьмꙋ̀ прельще́нїѧ, и҆ просвѣща́ющихъ вѣ́рныхъ мы̑сли. [Два́жды.]
Ꙗ҆̀же на на́съ вра̑жїѧ сѣ̑ти сокрꙋши́те, бг҃огла́снїи а҆пⷭ҇ли, и҆ стєзѝ на́мъ покаѧ́нїѧ ᲂу҆гла́дите, къ ва́мъ прибѣга́ющымъ.
Ѡ҆б̾юродѣ́вшꙋю дꙋ́шꙋ мою̀ плотски́ми страстьмѝ со́ль бж҃е́ственнаѧ сꙋ́ще бг҃оглаго́ливїи гдⷭ҇ни а҆пⷭ҇ли, ѡ҆чи́стите вѣ́рнѡ ѡ҆живлѧ́юще.
Бг҃оро́диченъ: Добро́то і҆а́кѡвлѧ, до́брыми мѧ̀ зра́ки просвѣтѝ, молю́сѧ, молѧ́щисѧ ны́нѣ со а҆пⷭ҇лы, ро́ждшемꙋсѧ ѿ твои́хъ чи́стыхъ крове́й.
И҆́нъ
І҆рмо́съ: Трїѐ ѻ҆́троцы въ пещѝ трⷪ҇цꙋ проѡбрази́вше, преще́нїе ѻ҆́гненное попра́ша, и҆ пою́ще вопїѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Гꙋбѧ́щаго дре́вле гдⷭ҇ни лю́ди, безꙋ́мнаго а҆́рїа ᲂу҆дави́лъ є҆сѝ жи́лами слове́съ твои́хъ, ꙗ҆́кѡ па́стырь нача́льный и҆́стиненъ, ѻ҆́тче нїко́лае.
Свѧ́тѡ преше́дъ прест҃о́е житїѐ твоѐ, со ст҃ы́ми живе́ши ѻ҆́тче нїко́лае, сщ҃е́нїе посыла́ѧ и҆ просвѣще́нїе бл҃гоче́стнѡ тѧ̀ бл҃жа́щымъ.
Ꙗ҆́кѡ гото́ва тѧ̀ и҆зба́вителѧ, ꙗ҆́кѡ те́пла застꙋ́пника призыва́емъ при́снѡ ѻ҆́тче нїко́лае, ѿ страсте́й на́съ и҆зба́ви и҆ неча́емыхъ напа́стей, находѧ́щихъ на ны̀.
Бг҃оро́диченъ: Менѐ небреже́нїемъ дꙋ́шꙋ ѡ҆мрачи́вшаго, просвѣтѝ чⷭ҇таѧ, ꙗ҆́же свѣ́тъ ро́ждшаѧ, се́рдца моегѡ̀ возжиза́ющи свѣти́льникъ, ꙗ҆́кѡ да ᲂу҆се́рдїемъ бл҃ги́мъ сла́влю тѧ̀.
Пѣ́снь и҃
І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни, бж҃е́ственнꙋю пѣ́снь поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки.
Оу҆ѧзви́хсѧ страсте́й ѻ҆рꙋ́жїемъ, и҆ ѡ҆стрꙋпи́хъ се́рдце безꙋ́мїемъ, ѕло́бы содѣ́телемъ: а҆пⷭ҇ли сла́внїи и҆сцѣли́те мѧ̀ всего̀ недоꙋмѣ́ющасѧ, дꙋ́шъ и҆ тѣле́съ вра́чеве сꙋ́ще. [Два́жды.]
Во всю̀ зе́млю проповѣ́дникѡвъ вѣща́нїе и҆зы́де бж҃е́ственное, ᲂу҆ча́щее правосла́внѡ ѡ҆ є҆ди́нственномъ сꙋществѣ̀, є҆ди́но є҆стество̀ почита́ти ст҃ы́ѧ трⷪ҇цы, и҆ є҆ди́но вои́стиннꙋ гдⷭ҇ьство, и҆ є҆ди́но црⷭ҇тво во всѧ̑ вѣ́ки.
Менѐ многосогрѣши́вшаго, и҆ долготерпѣ́нїе твоѐ бж҃е́ственное и҆жди́вшаго. въ пребыва́нїи прегрѣше́нїй, возвратѝ влⷣко, вѣ́дый мою̀ не́мощь сло́ве, и҆ лѣ́ность, и҆ ѕломꙋ́дрїе.
Бг҃оро́диченъ: Бж҃е́ственнаѧ клещѐ, ꙗ҆́же бж҃е́ственнаго ᲂу҆́глѧ неизрече́ннѡ прїе́мши бцⷣе, страсте́й мои́хъ разжже́нное ᲂу҆́глїе ᲂу҆гасѝ пречⷭ҇таѧ, росо́ю твои́хъ мл҃твъ, и҆ всесла́вныхъ и҆ бж҃е́ственныхъ а҆пⷭ҇лъ.
И҆́нъ
І҆рмо́съ: А҆́гг҃льми немо́лчнѡ въ вы́шнихъ сла́вимаго бг҃а, нб҃са̀ нб҃съ, землѧ̀, и҆ го́ры, и҆ хо́лми, и҆ глꙋбина̀, и҆ ве́сь ро́дъ человѣ́ческїй, пѣ́сньми того̀ ꙗ҆́кѡ созда́телѧ, и҆ и҆зба́вителѧ бл҃гослови́те, и҆ превозноси́те во всѧ̑ вѣ́ки.
Зе́млю кро́ткихъ наслѣ́довалъ є҆сѝ, кро́токъ прпⷣбне бы́въ. тѣ́мже молю́сѧ тѝ вѣ́рнѡ: ᲂу҆кротѝ мл҃твами твои́ми, подвиза̑ющаѧсѧ на мѧ̀ при́снѡ лꙋка́вагѡ треволнє́нїѧ.
Ꙗ҆́коже и҆зба́вилъ є҆сѝ воевѡ́ды, и҆̀же непра́веднѡ ᲂу҆мре́ти хотѧ́щыѧ: та́кѡ ѿ человѣ̑къ лꙋка́выхъ ѡ҆ѕлобле́нїѧ на́съ и҆зба́ви, и҆ ѿ всѧ́кагѡ бѣсо́вскагѡ навѣ́та, нїко́лае, молѧ̀ сп҃са.
Пꙋ́ть показа́лъ є҆сѝ человѣ́кѡмъ пра́вый и҆ сп҃си́тельный: на него́же наста́ви на́съ въ житїѝ преходѧ́щихъ нїко́лае, мл҃твами твои́ми, ꙗ҆́кѡ да кꙋ́пнѡ вни́демъ въ живѡ́тнаѧ врата̀.
Бг҃оро́диченъ: Крѣ́пость и҆ пѣ́нїе моѐ є҆́сть, и҆́же и҆з̾ тебѐ рожде́йсѧ пречⷭ҇таѧ, є҆го́же прилѣ́жнѡ молѝ дв҃о, разсла́бленнаго мѧ̀ страстьмѝ ᲂу҆крѣпи́ти, и҆ твори́ти сп҃си́тєльнаѧ є҆гѡ̀ повелѣ̑нїѧ.
Та́же, пое́мъ пѣ́снь бцⷣѣ: Вели́читъ дꙋша̀ моѧ̀ гдⷭ҇а: Съ покло́ны.
Пѣ́снь ѳ҃
І҆рмо́съ: Въ зако́нѣ сѣ́ни и҆ писа́нїй ѡ҆́бразъ ви́димъ вѣ́рнїи, всѧ́къ мꙋ́жескїй по́лъ ложесна̀ разверза́ѧ, ст҃ъ бг҃ꙋ: тѣ́мъ перворожде́нное сло́во, ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.
И҆́же словесы̀ твои́хъ ᲂу҆ч҃нкъ, ᲂу҆тверди́лъ є҆сѝ зємны́ѧ концы̀ ѻ҆ц҃а̀ безнача́льнагѡ сло́ве: тѣ́хъ мольба́ми, и҆ менѐ, къ страсте́мъ безсловє́снымъ попо́лзшасѧ, и҆ бѣсо́вскимъ прельще́нїемъ потоплѧ́ема ᲂу҆ще́дри. [Два́жды.]
Дꙋшѐ моѧ̀, страсте́й рабо́тающаѧ ᲂу҆стремле́нїємъ, пострада́вшемꙋ на́съ ра́ди принесѝ мольбы̑, ꙗ҆́кѡ да и҆зба́витъ тѧ̀ лю́тыхъ, молѧ́щымсѧ проѧвле́ннѣ сщ҃є́ннымъ ᲂу҆ч҃нкѡ́мъ, и҆ ᲂу҆подо́бльшымсѧ тогѡ̀ плотски̑мъ страда́нїємъ.
Хрⷭ҇тѡ́вы ᲂу҆ч҃нцы̀, є҆гда̀ съ ни́мъ сꙋди́ти сѧ́дете сꙋдꙋ̀ пови́нныхъ, неѡсꙋжде́ннꙋ мою̀ дꙋ́шꙋ соблюди́те, ѡ҆скверне́ннꙋю безмѣ́стными дѣ́лы, ꙗ҆́кѡ блазі́и моѝ предста́телїе, и҆ ꙗ҆́кѡ мі́ра застꙋ̑пницы.
Бг҃оро́диченъ: Дв҃о чⷭ҇таѧ, дв҃о пречⷭ҇таѧ, хрⷭ҇то́ва пала́то, дв҃о прест҃а́ѧ, ст҃а́го ст҃ы́хъ бг҃а, па́че вины̀ и҆ сло́ва ро́ждшаѧ, со а҆пⷭ҇лы ст҃ы́ми, ѡ҆ всѣ́хъ моли́сѧ.
И҆́нъ
І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ, данїи́лъ же тѧ̀ ви́дѣ го́рꙋ несѣко́мꙋю, же́злъ прозѧ́бшїй, и҆са́їа взыва́ше, ѿ ко́рене дв҃дова.
Ꙗ҆́кѡ ѡ҆гражде́нїе бж҃е́ственное и҆ ᲂу҆твержде́нїе, и҆ до́брое прибѣ́жище, земны́й мі́ръ стѧжа̀ тѧ̀: хода́тайствы бо твои́ми при́снѡ и҆збавлѧ́емсѧ ѿ всѧ́кагѡ и҆скꙋше́нїѧ и҆ тѣсноты̀, ѻ҆́тче нїко́лае. тѣ́мже во хвале́нїи вѣ́рнѡ ᲂу҆бл҃жа́емъ тѧ̀.
Оу҆ тѣснѧ́емь бы́въ мно́гими ѡ҆бстоѧ́нїи, къ простра́нствꙋ прибѣга́ю всебл҃же́нне, те́плыхъ мл҃твъ твои́хъ, претворѝ дꙋшѝ моеѧ̀ бѡлѣ́зни, вопїю́ ти: во́лны ᲂу҆кротѝ ѿча́ѧнїѧ, и҆ ᲂу҆мирѝ моегѡ̀ ᲂу҆ма̀ смꙋще́нїе.
Творца̀ настои́тъ прише́ствїе сꙋди́ти все́й землѝ, и҆ негото́въ сы́й ѻ҆каѧ́нный, ве́сь ᲂу҆страша́юсѧ, помышлѧ́ѧ ѕѡ́лъ мои́хъ мно́жество: гдⷭ҇и долготерпѣли́ве, ᲂу҆ще́дри, и҆ сп҃си́ мѧ бж҃е́ственными нїкола́а мл҃твами прпⷣбнагѡ твоегѡ̀.
Бг҃оро́диченъ: Просвѣще́нїе моѐ сп҃си́тельное ꙗ҆ви́ласѧ є҆сѝ, ро́ждшаѧ свѣ́тъ, дꙋшѝ моеѧ̀ ѻ҆́блаки разгонѧ́ющи мра̑чныѧ и҆ лю̑тыѧ: ꙗ҆́кѡ да сн҃ъ днѐ мл҃твами твои́ми бꙋ́дꙋ содѣва́ѧ прпⷣбнаѧ, ꙗ҆́кѡ да въ пѣснословле́нїи прпⷣбнѣ ᲂу҆бл҃жа́ю тѧ̀.
Та́же, Досто́йно є҆́сть: Є҆ктенїа̀. И҆ свѣти́ленъ.
На стїхо́внѣ стїхи̑ры, гла́съ г҃:
Во всю̀ зе́млю и҆зы́де вѣща́нїе ва́ше ст҃і́и а҆пⷭ҇ли: і҆́дѡльскꙋю пре́лесть разрꙋши́сте, бг҃оразꙋ́мїе проповѣ́давше. сѐ до́брый по́двигъ ва́шъ є҆́сть бл҃же́ннїи, тѣ́мже пое́мъ и҆ славосло́вимъ ва́шѧ па̑мѧти.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Хрⷭ҇тѡ́вы за́пѡвѣди непоро́чнѡ сохра́ньше, ст҃і́и а҆пⷭ҇ли, тꙋ́не прїѧ́сте, тꙋ́не подава́ете, и҆сцѣлѧ́юще стра̑сти дꙋ́шъ и҆ тѣле́съ на́шихъ. тѣ́мже и҆мꙋ́ще дерзнове́нїе, того̀ моли́те, поми́ловатисѧ дꙋша́мъ на́шымъ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Ꙗ҆́кѡ свѣти̑ла въ мі́рѣ сїѧ́ете, и҆ по сме́рти ст҃і́и мч҃нцы, по́двигомъ до́брымъ подви́гшесѧ. и҆мꙋ́ще дерзнове́нїе, хрⷭ҇та̀ моли́те, поми́ловатисѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Без̾ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ прест҃а́ѧ дв҃о.
Та́же, Бл҃го є҆́сть: И҆ ча́съ а҃-й, и҆ ѿпꙋ́стъ.
Въ четверто́къ бл҃жє́нны, гла́съ г҃:
Ѿве́ргша хрⷭ҇тѐ, за́повѣдь твою̀, пра́ѻтца а҆да́ма и҆з̾ раѧ̀ и҆згна́лъ є҆сѝ: разбо́йника же ще́дре, и҆сповѣ́даша тѧ̀ на крⷭ҇тѣ̀, во́нь всели́лъ є҆сѝ, зовꙋ́ща: помѧни́ мѧ сп҃се, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
И҆́же тро́стїю крⷭ҇тною и҆з̾ глꙋбины̀ невѣ́дѣнїѧ лю́ди и҆зве́дше а҆пⷭ҇ли, и҆ є҆́ллинскꙋю пре́лесть ѿгна́сте ѿ землѝ, неле́стнїи сп҃си́телїе бы́сте вѣ̑рнымъ вои́стиннꙋ. тѣ́мже бл҃жи́ми є҆стѐ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Ꙗ҆́кѡ лꙋчы̀ та̑йныѧ, и҆ свѣти̑ла пра́веднагѡ сл҃нца бы́вше, сла́внїи а҆пⷭ҇ли, ѕлоче́стїѧ тьмꙋ̀ ѿгна́ли є҆стѐ, и҆ къ свѣ́тꙋ бг҃оразꙋ́мїѧ наста́висте всѧ̑ лю́ди: тѣ́мже вы̀ почита́емъ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Мꙋ́къ разжжє́нїѧ претерпѣ́сте, свы́ше страда́льцы бл҃года́ти ро́сꙋ прїѧ́ли є҆стѐ: и҆ человѣ́чєскїѧ стра̑сти, ꙗ҆́кѡ хрⷭ҇тѡ́вы ᲂу҆гѡ́дницы, при́снѡ бл҃гоче́стнѡ мꙋ́дрїи и҆сцѣлѧ́ете. тѣ́мже вѣ́рнѡ ва́съ ст҃і́и почита́емъ.
Сла́ва: Трⷪ҇цы сщ҃е́ннїи проповѣ̑дницы, пе́тре, и҆ па́ѵле, ма́рко, и҆ лꙋко̀, матѳе́е, сі́мѡне, і҆а́кѡве, а҆ндре́е, і҆ѡа́нне, ѳѡмо̀, варѳоломе́е и҆ фїлі́ппе мꙋ́дре, прилѣ́жнѡ всегда̀ сїю̀ моли́те, и҆зба́витисѧ на́мъ ѿ всѧ́кагѡ ѡ҆бстоѧ́нїѧ.
И҆ ны́нѣ: А҆пⷭ҇лѡвъ добро́то, и҆ ст҃ы́хъ стрⷭ҇тоте́рпєцъ ра́дованїе, бг҃обл҃года́тнѣйшаѧ влⷣчце, ѡ҆ на́съ молѝ всѣ́хъ сп҃са и҆ бг҃а: ꙗ҆́кѡ да прегрѣше́нїй прїи́мемъ ѡ҆ставле́нїе, и҆ бж҃е́ственныѧ жи́зни всѝ прича̑стницы бꙋ́демъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.