Глас 2-й. Среда.
Во вто́рникъ ве́чера,
на Гдⷭ҇и воззва́хъ, стїхи̑ры крⷭ҇тны, гла́съ в҃.
Подо́бенъ: Є҆гда̀ ѿ дре́ва:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Свѣти́ти свѣти̑ла не терпѧ́ще ѡ҆мрачи́шасѧ, на крⷭ҇тѣ̀ заше́дшꙋ тебѣ̀ сло́ве: землѧ́ же подвиза́шесѧ, и҆ ка́менїе разсѣда́шесѧ, церко́вное бл҃голѣ́пїе раздира́шесѧ посредѣ̀, гро́бы ѿверза́хꙋсѧ, ме́ртвїи востаѧ́хꙋ, а҆́дъ и҆здаѧ́ше всѧ̑ сꙋ́щыѧ до́лꙋ, бѣ́си побѣжда́хꙋсѧ, и҆ со́нъ всѣ̑мъ вмѣнѧ́шесѧ сме́рть.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Є҆гда̀ плодови́тый тѧ̀ хрⷭ҇тѐ вїногра́дъ, разбо́йникъ благонра́вный ви́дѣвъ, лꙋ́чшїй бы́сть разбо́йникъ благоискꙋ́сенъ, и҆ ᲂу҆кра́даетъ проще́нїе дре́внихъ согрѣше́нїй, ѕѣлѡ̀ благоесте́ственнѣ ма́лымъ гла́сомъ: томꙋ̀ ревни́тели бы́ти потщи́мсѧ. є҆́же помѧнѝ и҆ на́съ чл҃вѣколю́бче, всѝ зовꙋ́ще.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Сїѧ́етъ ꙗ҆́кѡ ѕвѣзда̀ на нб҃сѝ, въ цр҃кви бж҃е́ственный вои́стиннꙋ крⷭ҇тъ тво́й хрⷭ҇тѐ, ѡ҆палѧ́ѧ ᲂу҆́бѡ бѣ́сы, вѣ̑рныѧ же просвѣща́ѧ, и҆ посрамлѧ́ѧ ли́ца тебѐ распе́ншихъ: и҆́мже прароди́тели дре́вомъ воѡбража́ющимъ крⷭ҇та̀, пре́жде ѿ рабо́ты и҆зве́лъ є҆сѝ, и҆ ѿ ка́мене ме́дъ сса́ти въ пꙋсты́ни сотвори́лъ є҆сѝ.
Та́же стїхи̑ры мине́и.
А҆́ще ли нѣ́сть мине́и, и҆́ны стїхи̑ры прест҃ѣ́й бцⷣѣ, гла́съ и҃, подо́бенъ то́йже:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Всѣ̑мъ предста́тельницꙋ тѧ̀ человѣ́кѡмъ, всѣ̑мъ прибѣ́жище вели́кое, всѣ̑мъ застꙋ́пницꙋ тѧ̀ показа̀, влⷣчце, хрⷭ҇тїа́нѡмъ, и҆́же и҆з̾ тебѐ въ на́ше смѣше́нїе ѡ҆бо́лксѧ бл҃гоꙋтро́бнѣ, и҆ распѧ́тїе и҆ сме́рть на́съ ра́ди под̾ѧ́тъ. что̀ ᲂу҆́бѡ молѝ непреста́ннѡ, всѣ̑мъ ѡ҆чище́нїе низпосла́ти прегрѣше́нїй, бг҃оневѣ́стнаѧ.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Дре́вле дв҃а и҆ а҆́гница, зрѧ́щи и҆з̾ чре́ва є҆ѧ̀, на дре́вѣ повѣ́шена, ꙗ҆́кѡ ѡ҆сꙋжде́на со двѣма̀ ѡ҆сꙋжде́ннома, восклица́ющи глаго́лаше: сн҃е и҆ бж҃е мо́й, стра́нно ви́димое стра́шное та́инство: ѻ҆ба́че мꙋ́дрости твоеѧ̀ бе́зднꙋ и҆спыта́ти никто́же мо́жетъ: пою̀ твоѐ долготерпѣ́нїе.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Гдѣ̀ твоегѡ̀ видѣ́нїѧ бл҃голѣ́пїе; гдѣ̀ красота̀ скры́сѧ добро́ты твоеѧ̀, сн҃е; ка́кѡ и҆́же добро́тою неизречє́ннаѧ сотвори́вый бж҃е, кра́сный въ добро́тахъ, за всѧ̑ человѣ́ки, безсла́венъ и҆ безче́стенъ на дре́вѣ ви́сиши, ви́да, ни добро́ты не и҆мѣ́ѧй, ча́до; предо́браѧ дв҃а вопїѧ́ше, стенѧ́щи и҆ пла́чꙋщи.
Сла́ва, и҆ ны́нѣ, крⷭ҇тобг҃оро́диченъ: За́йде свѣти́лѡвъ зарѧ̀, земны́мъ свѣ́томъ побѣ́ждшисѧ, ѡ҆бна́жшимсѧ на крⷭ҇тѣ̀: побѣжда́етсѧ ᲂу҆́бѡ при́снѡ хꙋ́ждшее бо́льшимъ, и҆ лꙋ́чшемꙋ ме́ньшее дае́тъ мѣ́сто, ка́кѡ ᲂу҆́бѡ не подоба́ше свѣтѧ́щꙋ хрⷭ҇тꙋ̀, скры́тисѧ зарѣ̀ чꙋ́вственнѣй; достѡ́йнымъ глаго́лаше, тѧ̀ зрѧ́щи пречⷭ҇таѧ, свѣти́лѡмъ свѣ́та.
Та́же, Свѣ́те ти́хїй: Прокі́менъ: Млⷭ҇ть твоѧ̀ гдⷭ҇и, пожене́тъ мѧ̀ всѧ̑ дни̑ живота̀ моегѡ̀. и҆ Сподо́би гдⷭ҇и, въ ве́черъ се́й:
На стїхо́внѣ стїхи̑ры крⷭ҇тны. Гла́съ в҃:
Сп҃си́ мѧ хрⷭ҇тѐ сп҃се, си́лою кре́стною, спасы́й петра̀ въ мо́ри, и҆ поми́лꙋй мѧ̀ бж҃е.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀, та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Да ра́спнетсѧ вопїѧ́хꙋ, и҆̀же твои́хъ дарова́нїй при́снѡ наслажда́ющїисѧ, и҆ ѕлодѣ́ѧ во благода́телѧ мѣ́сто проша́хꙋ прїѧ́ти, и҆̀же првⷣникѡвъ ᲂу҆бі̑йцы: молча́лъ же є҆сѝ хрⷭ҇тѐ, терпѧ̀ и҆́хъ сꙋровство̀, пострада́ти хотѧ̀, и҆ сп҃стѝ на́съ ꙗ҆́кѡ чл҃вѣколю́бецъ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Мч҃нченъ: Ли́цы мч҃ничестїи проти́вишасѧ мꙋчи́телємъ, глаго́люще: мы̀ во́инствꙋемъ цр҃ю̀ си́лъ, а҆́ще и҆ ѻ҆гню̀ и҆ мꙋ́камъ преда́сте на́съ: но не ѿмета́емсѧ трⷪ҇ческїѧ си́лы.
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Є҆гда̀ ѿ дре́ва тѧ̀:
Болѣ̑зни претерпѣ́вши мнѡ́гїѧ въ распѧ́тїи сн҃а и҆ бг҃а твоегѡ̀ пречⷭ҇таѧ, стенѧ́ше, слезѧ́щи и҆ восклица́ющи: ᲂу҆вы̀ мнѣ̀ ча́до сла́дкое, без̾ пра́вды ка́кѡ стра́ждеши, хотѧ̀ и҆зба́вити ꙗ҆̀же ѿ а҆да́ма земнорѡ́дныѧ; тѣ́мже пречⷭ҇таѧ дв҃о, тебѐ мо́лимъ вѣ́рою: ми́лостива на́мъ того̀ содѣ́лай.
Та́же: Ны́нѣ ѿпꙋща́еши: и҆ Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ѿпꙋ́стъ.
Во вто́рникъ на повече́рїи,
канѡ́нъ прест҃ѣ́й бцⷣѣ. Гла́съ в҃.
Пѣ́снь а҃
І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Сло́во моегѡ̀ прїѡбрѣ́тенїѧ ѿню́дъ нѣ́сть къ пѣсносло́вїю всечⷭ҇таѧ, ꙗ҆́кѡ покрыва́етъ мѧ̀ грѣхѡ́въ мои́хъ тьма̀: но ѽ бг҃ороди́тельнице! ᲂу҆тѣснѧ́ема прїими́ мѧ.
Под̾ тво́й покро́въ прибѣга́ю пречⷭ҇таѧ, ѿ грѣ̑хъ безчи́сленныхъ въ коне́цъ, и҆ бг҃а и҆ влⷣкꙋ благопремѣ́нна сотворѝ чⷭ҇таѧ, и҆ сп҃си́ мѧ.
Сла́ва: Ты̀ мнѣ̀ влⷣчце те́плое ѡ҆чисти́лище, къ тебѣ̀ прибѣга́ѧ спасꙋ́сѧ, и҆ прїѡбрѧ́щꙋ дꙋше́вное сп҃се́нїе: мо́жеши бо всѧ̑, ꙗ҆́кѡ сꙋ́щи мт҃и всѣ́хъ бг҃а.
И҆ ны́нѣ: И҆́же дꙋша́мъ льсте́цъ, привлече́ мѧ въ поги́бельный ро́въ: но мнѣ̀ прострѝ держа́внꙋю твою̀ рꙋ́кꙋ, бцⷣе дв҃о, и҆ ско́рѡ ко свѣ́тꙋ возведѝ.
Пѣ́снь г҃
І҆рмо́съ: Оу҆твердѝ на́съ въ тебѣ̀ гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Во мнѡ́гїѧ впа́дъ разбо́йники ѻ҆каѧ́нный, ѡ҆бнаже́нъ бы́хъ, ᲂу҆ѧ́звленъ же и҆ ѡ҆ста́вленъ: но ты̀ бцⷣе чⷭ҇таѧ, не пре́зри менѐ.
Ѡ҆бнажѝ а҆да́ма пре́жде ѕмі́й, прельсти́въ дре́вомъ, ны́нѣ же ᲂу҆до́бнѡ плѣнѝ дꙋ́шꙋ мою̀: молю́сѧ тѝ влⷣчце, ᲂу҆ще́дри мѧ̀.
Сла́ва: Ны́нѣ тебѣ̀ моѧ̑ приношꙋ̀ та̑йнаѧ, и҆́стиннѣй предста́тельницѣ мое́й и҆ покро́вꙋ: ꙗ҆́кѡ да сїѧ̑ мнѣ̀ не ѡ҆бличи́тъ сн҃ъ тво́й, на сꙋдѣ̀ пра́веднѣмъ свое́мъ.
И҆ ны́нѣ: Поми́лꙋй на́съ чⷭ҇таѧ, поми́лꙋй: и҆́бо ѿ дѣ́лъ сп҃се́нїѧ ѿню́дъ нѣ́сть на́мъ. тѣ́мже вѣ́рою те́плою къ тебѣ̀ вопїе́мъ: поми́лꙋй рабы̑ твоѧ̑.
Пѣ́снь д҃
І҆рмо́съ: Пою̀ тѧ̀, слꙋ́хомъ бо гдⷭ҇и, ᲂу҆слы́шахъ и҆ ᲂу҆жасо́хсѧ, до мене́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю многомлⷭ҇тиве.
Болѧ́ща мѧ̀ неисцѣ́льнѡ влⷣчце, и҆ ѡ҆бнища́вша не пре́зри: но да́ждь мѝ є҆ле́й бл҃гости твоеѧ̀ дв҃о, и҆ твои́ми промышле́ньми ѡ҆богати́ мѧ, є҆́же ѿ бг҃а зла́томъ нетлѣ́ннымъ.
До́брыхъ всѣ́хъ ѡ҆бнажи́хсѧ, и҆ лежꙋ̀ во ѕлы́хъ, ѡ҆бо́лксѧ па́че всѣ́хъ дре́вле па́дшихъ: и҆ ны́нѣ пре́жними ᲂу҆краси́ мѧ, и҆ вторы́хъ и҆зба́ви бг҃оневѣ́сто.
Сла́ва: Блꙋдни́цꙋ превзыдо́хъ въ блꙋдѣ́хъ, и҆ мытарѧ̀ лихои́мствомъ всегда̀, сло́вомъ и҆ и҆зволе́нїемъ: но ᲂу҆́бѡ ѻ҆бою̀ покаѧ́нїе, пре́жде конца̀ стѧжа́ти мѝ влⷣчце сподо́би.
И҆ ны́нѣ: Водвори́хсѧ въ пꙋсты́ни печа́льнѣй, ᲂу҆дали́хсѧ ѿ тебѐ бг҃ороди́тельнице, кто̀ да́стъ мѝ крилѣ̀, и҆ полещꙋ̀, и҆ прїидꙋ̀ къ тебѣ̀ наде́жди мое́й, спаса́ющей малодꙋ́шїе менѐ ѻ҆каѧ́ннагѡ;
Пѣ́снь є҃
І҆рмо́съ: Свѣ́та пода́телю, и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебѐ и҆но́гѡ бг҃а не зна́емъ.
Ꙗ҆́кѡ невече́рнїй свѣ́тъ ѿ чре́ва твоегѡ̀ влⷣчце, сꙋ́щымъ на землѝ возсїѧ́вшїй, смра́днꙋю дꙋ́шꙋ мою̀ ѡ҆зарѝ чⷭ҇таѧ, и҆ ѿженѝ всѧ́кꙋ мглꙋ̀ се́рдца моегѡ̀.
Но́щь мѧ̀ покрыва́етъ лю́таѧ лꙋка́выхъ мои́хъ и҆ ѕлы́хъ дѣѧ́нїй, но вопїю́ ти влⷣчце: наста́ви мѧ̀ къ свѣ́тꙋ бж҃е́ственномꙋ твоегѡ̀ сн҃а и҆ влⷣки всепѣ́таѧ.
Сла́ва: И҆ менѐ прїимѝ чⷭ҇таѧ, ꙗ҆́коже блꙋ́днаго сы́на прїѧ́тъ тво́й сн҃ъ и҆ зижди́тель всѧ́ческихъ, вопїю́щаго съ ни́мъ: согрѣши́хъ вои́стиннꙋ, и҆ сп҃си́ мѧ влⷣчце.
И҆ ны́нѣ: Оу҆ѧзви́вшеесѧ моѐ се́рдце прило́ги лꙋка́вагѡ, пречⷭ҇таѧ, ꙗ҆́кѡ ми́лостива и҆сцѣлѝ, на крⷭ҇тѣ̀ пло́тїю ᲂу҆ѧ́звленнаго, неизглаго́ланнѡ ро́ждши.
Пѣ́снь ѕ҃
І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ, ѿ тлѝ бж҃е мѧ̀ возведѝ.
Въ ро́въ грѣхо́вный впадо́хъ, и҆ къ незабыва́ющемꙋ не взира́ю бг҃ꙋ, стра́хомъ ѡ҆держи́мь: но къ тебѣ̀ примета́юсѧ бг҃оневѣ́сто.
Покры́вшеесѧ лю́тѣ се́рдце моѐ недовѣ́домыхъ прегрѣше́нїй волно́ю, всеси́льною твое́ю мл҃твою бцⷣе дв҃о ѡ҆кормѝ.
Сла́ва: Красотꙋ̀ мнѣ̀ ви́дѣти сла́вы твоеѧ̀ сподо́би, є҆гда̀ ѿ пло́ти моеѧ̀ хощꙋ̀ разлꙋчи́тисѧ, ꙗ҆́кѡ ᲂу҆твержде́нїе моѐ влⷣчце: да ѿсю́дꙋ ᲂу҆вѣ́мъ ѡ҆ставле́нїе.
И҆ ны́нѣ: Напа́стей и҆ бѣ́дъ и҆ скорбе́й и҆зба́ви рабы̑ твоѧ̑, ст҃а́ѧ влⷣчце, ꙗ҆̀же къ бг҃ꙋ твои́ми мл҃твами, вѣ́рою къ тебѣ̀ прибѣга́ющыѧ.
Та́же: Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ в҃: Тѧ̀ велича́емъ бцⷣе, вопїю́ще: ра́дꙋйсѧ же́зле, ѿ негѡ́же безсѣ́меннѡ бг҃ъ прозѧбы́й, погꙋбѝ на дре́вѣ сме́рть.
Пѣ́снь з҃
І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Ны́нѣ тщи́тсѧ зїѧ́ѧ вра́гъ прїѧ́ти мѧ̀ во ᲂу҆тро́бꙋ свою̀: и҆́бо приноша́етъ мѝ ѿвсю́дꙋ и҆скꙋшє́нїѧ и҆ сѣ̑ти, ве́сь пресѣка́ѧ, спѣ́хъ мо́й: но предвари́вши и҆зба́ви мѧ̀ дв҃о мт҃и, ѿ тогѡ̀ навѣ́та лꙋка́вагѡ.
Ѡ҆сквернѧ́етъ и҆ смꙋща́етъ чꙋ̑вствїѧ и҆ ᲂу҆́мъ сопоста́тъ, и҆ въ ро́въ ѿча́ѧнїѧ свести́ мѧ тщи́тсѧ. тѣ́мже вопїю́ ти є҆ди́нѣй: прибѣ́жище моѐ бг҃оневѣ́сто, и҆зба́ви мѧ̀ ѿ рꙋкѝ сегѡ̀ льсти́вагѡ.
Сла́ва: И҆́же дре́вле трѝ ю҆́ношы ѿ пе́щи горѧ́щїѧ, хрⷭ҇тѐ мо́й, и҆збавле́й, са́мъ сло́ве, и҆ менѐ мольба́ми неискꙋсобра́чныѧ мт҃ре твоеѧ̀ ѿ пла́мене, є҆го́же разжего́хъ безмѣ́рными ѕлы́ми, и҆зба́ви и҆ ѡ҆росѝ.
И҆ ны́нѣ: Ве́щно ѡ҆брѣ́тъ се́рдце моѐ тли́тель, ᲂу҆мертвѝ є҆̀: но ты́ мѧ ᲂу҆́бѡ си́лою бж҃е́ственною ѡ҆дождѝ неискꙋсобра́чнаѧ мт҃и, и҆ побѣди́ти мѝ сподо́би сего̀, ꙗ҆́кѡ да вѣ́рою зовꙋ́ ти: бл҃гослове́ннаѧ, ꙗ҆́же бг҃а пло́тїю ро́ждшаѧ.
Пѣ́снь и҃
І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Мно́гими ѕлы́ми мои́ми погорбле́нъ бы́въ лю́тѣ, мно́жествомъ тѧго́тъ, и҆ ѻ҆́ко моѐ ѿню́дъ на нб҃са̀ не смѣ́ю возвестѝ, но вопїю́ ти: поми́лꙋй є҆ди́на бцⷣе, менѐ па́дшаго.
Во́ньже впадо́хъ гнѣ́въ твоегѡ̀ сн҃а и҆ бг҃а, чⷭ҇таѧ и҆зба́ви мѧ̀: и҆ въ ча́съ, во́ньже хо́щетъ твори́ти и҆спыта́нїе, бꙋ́ди мѝ по́мощь пречⷭ҇таѧ, и҆ ѿ шꙋ́ихъ ко́злищь и҆зба́ви мѧ̀.
Сла́ва: Оу҆мерщвле́ннаго мѧ̀ мы́сленнѡ, ѿ безчи́сленныхъ мои́хъ ѕѡ́лъ, воздви́гни бг҃оневѣ́сто ѻ҆трокови́це: и҆ мольбо́ю твое́ю и҆зба́ви мѧ̀ ѿ всѧ́кїѧ пре́лести дꙋшетлѣ́ннагѡ врага̀ и҆ ᲂу҆бі́йцы.
И҆ ны́нѣ: Ѕлонеиспра́вленнаѧ дꙋшѐ, ка́кѡ ѡ҆черни́ла є҆сѝ ѕлѣ̀ пе́рвꙋю добро́тꙋ; ка́кѡ ѿве́ргла є҆сѝ всѧ̑, ꙗ҆̀же къ зижди́телю твоемꙋ̀ ѡ҆бѣ́ты, и҆ прїѧ́ла є҆сѝ ѕлѡ́бнаѧ; но грѧдѝ и҆ притецы̀ бл҃гоче́стнѡ къ бцⷣѣ.
Пѣ́снь ѳ҃
І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Дѣ́лы тѧ́жкими чꙋ́вства ѡ҆скверни́хъ вои́стиннꙋ, и҆ всегѡ̀ стꙋдодѣѧ́нїѧ и҆спо́лненъ є҆́смь: но ѡ҆чи́сти ᲂу҆́бѡ пречⷭ҇таѧ, вре́мѧ мнѣ̀ и҆спроша́ющи бл҃гоꙋмиле́нїѧ, да непреста́ннѡ тѧ̀ велича́ю.
Ты́ мѧ бцⷣе, ѡ҆правда́й, є҆гда̀ ꙗ҆вѧ́тсѧ дѣла̀ сокровє́ннаѧ коегѡ́ждо ꙗ҆́вѣ, и҆́маши бо вои́стиннꙋ си́лꙋ: и҆ тьмы̀ мѧ̀ и҆зба́ви и҆ во странѣ̀ ᲂу҆чинѝ свѣ́та мл҃твами твои́ми, и҆дѣ́же є҆́сть ра́дость неизглаго́ланнаѧ.
Сла́ва: Молю́ тѧ сло́ве, пре́жде прише́ствїѧ конца̀ покаѧ́нїе мѝ да́рꙋй те́плое, и҆ ᲂу҆миле́нїе слеза́мъ, цѣломꙋ́дрїе вкꙋ́пѣ и҆ смире́нїе, и҆ любо́вь бж҃е́ственнꙋю, и҆ ста́дꙋ твоемꙋ̀ ᲂу҆строе́нїе, мольба́ми ро́ждшїѧ тѧ̀.
И҆ ны́нѣ: Оу҆́мныхъ же и҆ чꙋ́вственныхъ, преминꙋ́вши дв҃о сла́вою и҆ че́стїю, ра́звѣ бг҃а, не ѡ҆мерзѝ менѐ преминꙋ́вшагѡ въ прегрѣше́нїихъ, ве́тхихъ же и҆ но́выхъ человѣ̑къ согрѣ́шшихъ на землѝ: но твое́ю мл҃твою сп҃си́ мѧ.
Та́же: Досто́йно є҆́сть: и҆ покло́нъ.Трист҃о́е. По Ѻ҆́ч҃е на́шъ: тропарѝ, и҆ про́чее ѻ҆бы́чно, и҆ ѿпꙋ́стъ.
Въ сре́дꙋ ᲂу҆́тра,
по а҃-мъ стїхосло́вїи сѣда́льны крⷭ҇тны, гла́съ в҃:
Сп҃се́нїе содѣ́лалъ є҆сѝ посредѣ̀ землѝ хрⷭ҇тѐ бж҃е, на крⷭ҇тѣ̀ пречⷭ҇тѣи рꙋ́цѣ твоѝ просте́рлъ є҆сѝ, собира́ѧ всѧ̑ ꙗ҆зы́ки, зовꙋ́щыѧ: гдⷭ҇и, сла́ва тебѣ̀.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
И҆́мже ѡ҆́бразомъ плѣни́лъ є҆́сть вра́гъ а҆да́ма дре́вомъ снѣ́днымъ: та́коже гдⷭ҇и, са́мъ плѣни́лъ є҆сѝ ты̀ врага̀ дре́вомъ крⷭ҇тнымъ, и҆ стрⷭ҇тїю твое́ю: на се́ бо прише́лъ є҆сѝ вторы́й а҆да́мъ, взыска́ти заблꙋ́ждшаго, и҆ ѡ҆живи́ти ᲂу҆ме́ршаго: бж҃е сла́ва тебѣ̀.
Сла́ва, и҆ ны́нѣ, крⷭ҇тобг҃оро́диченъ: Тѧ̀ велича́емъ бцⷣе вопїю́ще: ра́дꙋйсѧ же́зле, ѿ негѡ́же безсѣ́меннѡ бг҃ъ прозѧбы́й, погꙋбѝ на дре́вѣ сме́рть.
По в҃-мъ стїхосло́вїи сѣда́льны, гла́съ в҃:
Животворѧ́щїй крⷭ҇тъ твоеѧ̀ бл҃гости, є҆го́же дарова́лъ є҆сѝ на́мъ недостѡ́йнымъ гдⷭ҇и, тебѣ̀ прино́симъ въ мл҃твꙋ: сп҃сѝ гра́дъ тво́й, ми́ръ да́рꙋѧй бцⷣы ра́ди, є҆ди́не чл҃вѣколю́бче.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
Просвѣти́вый земна̑ѧ крⷭ҇то́мъ и҆ призва́вый на покаѧ́нїе грѣ̑шныѧ, не ѿлꙋчѝ менѐ ста́да твоегѡ̀, па́стырю до́брый: но взыщѝ менѐ заблꙋ́ждшаго влⷣко, и҆ ст҃о́мꙋ твоемꙋ̀ ста́дꙋ сопричтѝ, и҆́же є҆ди́нъ бл҃гъ и҆ чл҃вѣколю́бецъ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: И҆́же просвѣти́вый ст҃ы̑ѧ твоѧ̑ па́че зла́та, и҆ просла́вивый прпⷣбныѧ твоѧ̑, ꙗ҆́кѡ бл҃гъ: ѿ ни́хже ᲂу҆моле́нъ быва́ѧ хрⷭ҇тѐ бж҃е, жи́знь на́шꙋ ᲂу҆мирѝ, ꙗ҆́кѡ чл҃вѣколю́бецъ, и҆ мл҃твꙋ и҆спра́ви ꙗ҆́кѡ кади́ло, и҆́же є҆ди́не во ст҃ы́хъ почива́ѧй.
Сла́ва, и҆ ны́нѣ: крⷭ҇тобг҃оро́диченъ:
Подо́бенъ: Млⷭ҇рдїѧ сꙋ́щи:
Дв҃а и҆ мт҃и твоѧ̀, хрⷭ҇тѐ, на крⷭ҇тѣ̀ зрѧ́щи тѧ̀ ме́ртва просте́рта, пла́чꙋщи го́рькѡ глаго́лаше: сн҃е мо́й, что̀ стра́шное сїѐ та́инство; и҆́же всѣ̑мъ да́рꙋѧй живо́тъ вѣ́чный, во́лею на крⷭ҇тѣ̀ ка́кѡ ᲂу҆мира́еши сме́ртїю поно́сною;
По г҃-мъ стїхосло́вїи сѣда́льны, гла́съ в҃:
Подо́бенъ: Млⷭ҇рдїѧ сꙋ́щи:
Распѧ́тисѧ претерпѣ́лъ є҆сѝ на́съ ра́ди, и҆ ме́ртвъ бы́ти і҆и҃се жизнода́вче, ꙗ҆́кѡ да рꙋкꙋ̀ твоє́ю созда́нїе ѿ сме́ртнагѡ ѡ҆сꙋжде́нїѧ и҆зба́виши, ꙗ҆́кѡ бл҃гоꙋтро́бенъ бг҃ъ и҆ чл҃вѣколю́бецъ, за мно́жество щедро́тъ: и҆́же є҆ди́нъ сы́й безгрѣ́шенъ.
Ꙗ҆́кѡ разбо́йникъ и҆сповѣ́дꙋю, и҆ вопїю́ ти бл҃го́мꙋ: помѧни́ мѧ гдⷭ҇и, во црⷭ҇твїи твое́мъ: и҆ съ ни́мъ мѧ̀ сопричтѝ, и҆́же во́лею стрⷭ҇ти на́съ ра́ди прїе́мый.
Сла́ва, и҆ ны́нѣ: крⷭ҇тобг҃оро́диченъ: Чⷭ҇тны́мъ крⷭ҇то́мъ сн҃а твоегѡ̀ сохранѧ́еми, влⷣчце чⷭ҇таѧ бцⷣе, всѧ́къ прило́гъ бори́телѧ всѝ ᲂу҆до́бнѣ побѣжда́емъ: сегѡ̀ ра́ди по до́лгꙋ тѧ̀ ᲂу҆бл҃жа́емъ, ꙗ҆́кѡ мт҃рь бж҃їю, є҆ди́нꙋ ᲂу҆пова́нїе дꙋша́мъ на́шымъ.
Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, [є҆гѡ́же краегране́сїе си́це: Паде́нїе є҆́сть бѣсѡ́мъ, крⷭ҇тное стоѧ́нїе.] Творе́нїе і҆ѡ́сифово. Гла́съ в҃.
Пѣ́снь а҃
І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.
Престꙋпи́въ пе́рвꙋю за́повѣдь дре́вле первозда́нный, ѿ сада̀ сме́рть ѡ҆б̾е́мъ: воздви́гнꙋвыйсѧ же на дре́во безсме́ртный, и҆ сме́рти вкꙋси́вый, безсме́ртїе всѣ̑мъ человѣ́кѡмъ дарова̀.
Крⷭ҇тꙋ̀ водрꙋзи́вшꙋсѧ на землѝ, низпадѐ шата́нїе врага̀, и҆ ѿню́дъ потреби́сѧ: пре́жде же ѿринове́нный человѣ́къ па́ки въ ра́й вхо́дитъ. сла́ва тебѣ̀ та́кѡ є҆ди́номꙋ бл҃гоизво́лившемꙋ бг҃ꙋ на́шемꙋ.
Мч҃нченъ: Ꙗ҆́кѡ ѻ҆внѝ, ꙗ҆́кѡ а҆́гнцы слове́снїи, всѝ закала́еми, и҆ на ᲂу҆́ды неми́лостивнѡ ссѣка́еми прехва́льнїи мч҃нцы, и҆ принесе́ни бы́сте закла́номꙋ ꙗ҆́кѡ ѻ҆вча́та: и҆ ны́нѣ цр҃ковь ст҃ꙋ́ю перворо́дныхъ просвѣща́ете.
Мч҃нченъ: Крѣ́пкое стоѧ́нїе мꙋ́дрїи всегда̀ творѧ́ще, лꙋка̑выѧ врагѝ низложи́сте, мечѝ ссѣка́еми, и҆ во ѻ҆́гнь и҆ въ во́дꙋ вмета́еми: тѣ́мже бл҃же́нныѧ кончи́ны стрⷭ҇тоте́рпцы сподо́бистесѧ.
Бг҃оро́диченъ: Сщ҃е́нный тѧ̀ прⷪ҇ро́ческїй ли́къ нарица́ше две́рь непрохо́днꙋю, зе́млю и҆збра́ннꙋю, и҆ го́рꙋ несѣко́мꙋю, пречⷭ҇таѧ влⷣчце: влⷣкꙋ бо всѣ́хъ родила̀ є҆сѝ во́лею распѧ́тїе пло́тїю прїе́мшаго.
Дрꙋгі́й канѡ́нъ прест҃ѣ́й бцⷣѣ. Гла́съ в҃.
І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Всѝ вѣ́рнїи прїиди́те, согла́снѡ воспои́мъ бцⷣꙋ: та́ бо хрⷭ҇та̀ родила̀ є҆́сть па́че ᲂу҆ма̀ человѣ́ча, и҆ непреста́ннѡ мо́литъ сп҃стѝ всѣ́хъ на́съ.
И҆́же ѡ҆́бразъ ѻ҆́ч҃и ѵ҆поста́си, и҆з̾ тебѐ прїѧ́тъ смѣше́нїе бг҃ороди́тельнице, и҆ и҆стлѣ́вшїй ѡ҆́бразъ просла́ви, и҆ сего̀ но́ва сотворѝ.
Херꙋві̑мъ чⷭ҇тнѣ́йши сꙋ́щи, и҆ нбⷭ҇ныхъ крꙋ̑гъ превы́шши была̀ є҆сѝ: бг҃а бо па́че ᲂу҆ма̀ во ᲂу҆тро́бѣ твое́й безстра́стнѡ вмѣсти́ла є҆сѝ.
И҆збавле́нїе на́шихъ грѣхѡ́въ родила̀ є҆сѝ бл҃года́телѧ гдⷭ҇а, и҆змѣни́вши ме́ртвость пра́ѻтца а҆да́ма, возвела̀ є҆сѝ є҆стество̀ къ нбⷭ҇нымъ.
Пѣ́снь г҃
І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ въ не́йже ᲂу҆тверди́сѧ моѐ се́рдце.
Распина́емь поколеба́лъ є҆сѝ всю̀ тва́рь гдⷭ҇и, и҆ вѣ̑рныѧ ᲂу҆тверди́лъ є҆сѝ, воспѣва́ющыѧ си́лꙋ твою̀, и҆ неизрече́нное сло́ве снизхожде́нїе твоѐ.
Ра́й ѿве́рзлъ є҆сѝ крⷭ҇то́мъ твои́мъ влⷣко, и҆ разбо́йника вве́лъ є҆сѝ позна́вшаго црⷭ҇твїе твоѐ, и҆ бога́тство бж҃е́ственнагѡ твоегѡ̀ бл҃гоꙋтро́бїѧ.
Мч҃нченъ: Процвѣто́ша мч҃нцы ꙗ҆́коже шипцы̀ бл҃гоꙋха́ннїи, въ мы́сленныхъ де́брѣхъ, и҆ ѕлосмра́днꙋю пре́лесть ѿгна́ша, и҆ вѣ́рныхъ сердца̀ ѡ҆бл҃гоꙋха́ша.
Мч҃нченъ: Свѣти́льницы вселе́нныѧ, вѣ́рныхъ сп҃си́телїе ст҃і́и, свѣ́тлыми дх҃а зарѧ́ми всѣ́хъ просвѣти́те, ва́съ по до́лгꙋ ᲂу҆бл҃жа́ющихъ.
Бг҃оро́диченъ: Воздвиза́ема на дре́во жизнода́вца ви́дѧщи, и҆ во́лею ᲂу҆мира́юща, всѣ̑мъ жи́знь подаю́щаго, болѧ́ше ᲂу҆тро́бою всенепоро́чнаѧ.
И҆́нъ
І҆рмо́съ: Оу҆твердѝ на́съ въ тебѣ̀ гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Златꙋ́ю ꙗ҆́кѡ вои́стиннꙋ кади́льницꙋ, и҆ рꙋ́чкꙋ ма́нны, и҆ бж҃їю го́рꙋ, и҆ пала́тꙋ краснꙋ̀ бж҃е́ственнꙋю, тѧ̀ дв҃о и҆менꙋ́емъ.
Цр҃ковь и҆ сщ҃е́нное жили́ще сло́ва сꙋ́щи бцⷣе: согрѣше́нїй ѡ҆чисти́лище, пречⷭ҇таѧ, бꙋ́ди мѝ приснодв҃о.
Ни ѧ҆зы́къ земноро́дныхъ, ни ᲂу҆́мъ безпло́тныхъ возмо́жетъ ржⷭ҇тво̀ твоѐ сказа́ти: вы́ше є҆стества́ бо и҆ смы́сла, бцⷣе зижди́телѧ родила̀ є҆сѝ.
Оу҆твержде́нїе бꙋ́ди и҆ прибѣ́жище, и҆ покро́въ дв҃о бг҃ороди́тельнице, вѣ́рою къ тебѣ̀ прибѣга́ющымъ, и҆ бж҃їю тѧ̀ мт҃рь провозвѣща́ющымъ.
Пѣ́снь д҃
І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.
Оу҆праздни́лъ є҆сѝ нача́ло лю́тагѡ мїроде́ржца, на дре́во возноси́мь, и҆ клѧ́твꙋ потреби́лъ є҆сѝ. тѣ́мже тѧ̀ сла́вимъ, и҆̀же тобо́ю сп҃се́ни, є҆ди́не гдⷭ҇и.
Распросте́рта на дре́вѣ ви́дѣвшее тѧ̀ со́лнце скры̀ свѣ́тъ, го́ры и҆ ка́менїе распадо́шасѧ, и҆ завѣ́са церко́внаѧ раздра́сѧ всеси́льне.
Мч҃нченъ: Оу҆мерщвлѧ́еми, врага̀ до конца̀ ᲂу҆мертви́сте, желѣ́зомъ стрꙋ́жеми, ко́жнагѡ ᲂу҆мерщвле́нїѧ дебельства̀ совлеко́стесѧ мч҃нцы гдⷭ҇ни, и҆ сла́вою ѡ҆блеко́стесѧ.
Мч҃нченъ: Оу҆сѣка́емыми глава́ми мч҃нцы, ᲂу҆жа́снѡ лꙋка́выхъ си́лъ главы̑ ѿсѣко́ша, и҆ пребыва́ющꙋю сла́вꙋ наслѣ́доваша ра́дꙋющесѧ.
Бг҃оро́диченъ: Возсїѧ̀ и҆з̾ ᲂу҆тро́бы твоеѧ̀, ѻ҆трокови́це неискꙋсобра́чнаѧ, ѻ҆́ч҃ее заре́нїе хрⷭ҇то́съ, и҆ просвѣтѝ вселе́ннꙋю, распина́емь, и҆ бѣсо́вскꙋю тьмꙋ̀ потреби́лъ є҆́сть.
И҆́нъ. І҆рмо́съ то́йже
Ка́плю мѝ ᲂу҆миле́нїѧ ѡ҆дождѝ влⷣчце, взима́ющи всѧ́къ се́рдца моегѡ̀ зно́й, и҆ помышле́нїѧ моегѡ̀ мꙋ̑тныѧ пото́ки ᲂу҆ставлѧ́ющи.
Ѻ҆рꙋ́жїемъ мѧ̀ сласте́й ᲂу҆ѧ́звлена, и҆ лежа́ща ᲂу҆ра́нена, пречⷭ҇таѧ не пре́зри, но и҆сцѣлѝ копїе́мъ и҆ кро́вїю распѧ́тагѡ сн҃а твоегѡ̀ и҆ бг҃а на́шегѡ.
Ѡ҆богати́вши влады́чествомъ всю̀ тва́рь, лю́тѣ мѧ̀ ѡ҆бнища́вша бл҃года́тїю бж҃е́ственною ᲂу҆ще́дри: ꙗ҆́кѡ да велича́ю тѧ̀, ꙗ҆́кѡ бл҃гꙋ́ю мою̀ предста́тельницꙋ, всенепоро́чнаѧ.
Прохлади́ мѧ̀ дв҃о покаѧ́нїемъ, и҆ ѡ҆дождѝ се́рдце моѐ и҆зсо́хшее зно́емъ страсте́й, и҆злива́ющи на мѧ̀ є҆ле́й и҆ цѣле́нїе млⷭ҇ти твоеѧ̀.
Пѣ́снь є҃
І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ хрⷭ҇тѐ бж҃е: тобо́ю бо влⷣко къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.
На крⷭ҇тѣ̀ пригвозди́всѧ, земна̑ѧ ѡ҆снова̑нїѧ поколеба́лъ є҆сѝ, и҆ копїе́мъ пробода́емь, ѕмі́ѧ началоѕло́бнаго закла́лъ є҆сѝ, и҆ то́ки сп҃се́нїѧ всѣ̑мъ хрⷭ҇тѐ и҆сточи́лъ є҆сѝ.
Не терпѣ́лъ є҆сѝ зрѣ́ти заблꙋжда́ема, є҆го́же рꙋка́ма созда́въ, рꙋ́цѣ распросте́рлъ є҆сѝ сло́ве на дре́вѣ ᲂу҆мерщвлѧ́емь, и҆ ѡ҆живи́лъ є҆сѝ сего̀ дре́вомъ дре́вле ᲂу҆ме́ршаго.
Мч҃нченъ: Дрꙋ́зи хрⷭ҇тѡ́вы, те́плїи человѣ́кѡмъ застꙋ̑пницы, цвѣ́ти честні́и, преꙋдо́бреннїи сосꙋ́ди дх҃а, мꙋ́дрїи стрⷭ҇тоте́рпцы, досто́йнѣ ᲂу҆бл҃жа́ютсѧ.
Мч҃нченъ: Зако́ннѡ пострада̀ ли́къ ст҃ы́хъ твои́хъ страда́лєцъ, беззако́нныхъ посрамѝ є҆ди́не законода́вче, си́лою твое́ю, и҆ сконча́въ тече́нїе, мч҃нчески вѣнча́сѧ.
Бг҃оро́диченъ: Ꙗ҆ви́ласѧ є҆сѝ чⷭ҇таѧ, по ржⷭ҇твѣ̀ нетлѣ́нна, бг҃ъ бо и҆з̾ тебѐ роди́сѧ воплоща́емь: є҆го́же ᲂу҆смотри́вши распина́ема, не терпѧ́щи, ᲂу҆тро́бною болѣ́знїю восклица́ла є҆сѝ.
И҆́нъ
І҆рмо́съ: Свѣ́та пода́телю и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебѐ и҆но́гѡ бг҃а не зна́емъ.
Воплоще́нна и҆з̾ тебѐ бг҃ороди́тельнице, вѣ́рнїи позна́хомъ, без̾ сѣ́мене сн҃а ро́ждшасѧ бг҃а и҆́стинна, и҆ человѣ́ка є҆стество́мъ. тѣ́мже тѧ̀ сла́вимъ.
Под̾ кро́въ тво́й, пречⷭ҇таѧ, и҆ застꙋпле́нїе вѣ́рнїи всегда̀ прибѣга́юще вѣ́рою, тебѐ ра́ди дв҃о, и҆збавлѧ́емсѧ всѧ́кагѡ лю́тагѡ ѡ҆бстоѧ́нїѧ.
И҆зба́ви на́съ и҆скꙋше́нїй, и҆ ѿ бꙋ́ри помышле́нїй пречⷭ҇таѧ, всѧ́кагѡ гнѣ́ва, и҆ всѧ́кагѡ грѣха̀, гла́да же и҆ гꙋби́тельства, и҆ вѣ́чнагѡ дв҃о мꙋче́нїѧ.
Предста́тельнице на́ша, сп҃се́нїе и҆ ᲂу҆пова́нїе влⷣчце хрⷭ҇тїа́нъ сꙋ́щи, сп҃са́й любо́вїю тѧ̀ при́снѡ вѣ́рнѡ воспѣва́ющихъ дв҃о всепѣ́таѧ.
Пѣ́снь ѕ҃
І҆рмо́съ: Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆з̾ глꙋбины̀ а҆́да, молю́сѧ, да ꙗ҆́кѡ и҆зба́вителю во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀.
На ю҆́ныѧ главы̑ поло́жъ дла̑ни и҆ногда̀ і҆а́кѡвъ, крⷭ҇тъ прописова́ше, на не́мже сло́ве распросте́рлъ є҆сѝ дла̑ни: и҆ ѿ рꙋкѝ льсти́вагѡ борца̀ и҆зба́вилъ є҆сѝ хрⷭ҇тѐ человѣ́чество.
Распе́ншꙋсѧ хрⷭ҇тѐ тебѣ̀ всецр҃ю̀ во́лею, ца́рствꙋющїй грѣ́хъ потреби́сѧ: а҆да́мъ же и҆́же и҆ногда̀ дре́вле и҆з̾ раѧ̀ и҆згна́нный, въ то́й вселѧ́етсѧ па́ки, тебѐ воспѣва́ѧ.
Мч҃нченъ: Красны̀ сꙋ́ще въ ра́нахъ сщ҃є́нныѧ, и҆̀же бл҃голѣ́пїемъ ᲂу҆краси́вшыѧсѧ нбⷭ҇нымъ, вои́стиннꙋ возлю́блєнныѧ гдⷭ҇ни мч҃нки, несꙋмнѣ́ннымъ се́рдцемъ воспои́мъ.
Мч҃нченъ: Неꙋгаси́мꙋ свѣщꙋ̀ свою̀ соблю́дше, бж҃е́ственнїи мч҃нцы, напои́ша бога́тнѡ кровьмѝ свои́ми, и҆ бж҃е́ственнагѡ черто́га полꙋчи́ша вхо́дъ ра́дꙋющесѧ.
Бг҃оро́диченъ: Пое́мъ тѧ̀ всепѣ́таѧ, ꙗ҆́кѡ бг҃а ро́ждшꙋю препѣ́таго, на дре́вѣ сопротивоборца̀ врага̀ погꙋ́бльша, и҆ и҆з̾ тлѝ и҆зба́вльшаго воспѣва́ющихъ тогѡ̀ страда̑нїѧ.
И҆́нъ
І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.
И҆́же во́лею всѧ̑ содѣ́лавый, и҆зво́ли во чре́во неискꙋсобра́чныѧ всели́тисѧ: и҆ и҆̀же тлѣ́нїемъ болѧ́щыѧ, нетлѣ́нїемъ ѡ҆богати́лъ є҆́сть, ꙗ҆́кѡ млⷭ҇рдъ.
Превы́шши вы́шнихъ си́лъ, и҆ ст҃ѣ́йши є҆сѝ пренепоро́чнаѧ, па́че є҆стества̀ вмѣсти́вши, невмѣсти́мое сло́во во чре́во твоѐ.
На пꙋти́ мѧ жите́йстѣмъ заблꙋжда́юща, и҆ въ безпꙋ́тїе ча́стѡ впа́дающа грѣхо́вное, къ стезѝ покаѧ́нїѧ влⷣчце наста́ви мѧ̀.
Не пре́зри чⷭ҇таѧ, мольбы̑ на́шѧ, на тѧ̀ возло́жшихъ наде́ждꙋ ра̑бъ твои́хъ: прибѣ́жище бо влⷣчце, и҆ дꙋша́мъ ѡ҆чисти́лище ты̀ є҆сѝ.
Пѣ́снь з҃
І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
Ѻ҆рꙋ́жїе є҆́же пре́жде ѡ҆браща́емое, плещѝ мнѣ̀ дае́тъ, ѿне́лѣже копїе́мъ прободе́сѧ, на крⷭ҇тѣ̀ воздви́женый, бл҃гоꙋтро́бне гдⷭ҇и. тѣ́мже велича́ю тѧ̀, твое́ю честно́ю стрⷭ҇тїю ѡ҆брѣ́тъ безстра́стїе.
Ѕмі́й, и҆́же мѡѷсе́емъ возвыша́емый на дре́во, бж҃е́ственное возвыше́нїе проѡбража́ше хрⷭ҇то́во, льсти́ваго ѕмі́ѧ ᲂу҆мертви́вшагѡ, всѣ́хъ же ѡ҆живи́вшагѡ на́съ ᲂу҆мертви́вшихсѧ престꙋпле́нїемъ.
Мч҃нченъ: Сы́нове быва́ете бж҃е́ственнымъ прїѡбще́нїемъ, безнача́льна роди́телѧ сн҃ꙋ собезнача́льнꙋ ст҃і́и стрⷭ҇ти пречⷭ҇тѣй ᲂу҆подо́бльшесѧ, тѣ́мже бра́тїю ва́съ нарица́етъ, и҆ наслѣ́дники црⷭ҇твїѧ своегѡ̀.
Мч҃нченъ: На крⷭ҇тъ возвыша́еми, ꙗ҆́кѡ влⷣка, и҆ копїе́мъ пробода́еми, и҆ мечѝ ссѣца́еми, на ѻ҆́гнь же и҆ во́дꙋ раздѣлѧ́еми, и҆ сдроблѧ́еми колесы̀ бг҃оно́снїи ра́довахꙋсѧ мч҃нцы.
Бг҃оро́диченъ: Гро́здъ созрѣ́вшїй, є҆го́же невоздѣ́ланнѡ чⷭ҇таѧ возрасти́ла є҆сѝ на дре́вѣ ꙗ҆́кѡ ᲂу҆зрѣ̀ повѣ́шена взыва́ше: ча́до моѐ сла́дкое, мсто̀ и҆ска́пай, и҆́мже страсте́й пїѧ́нство ѿи́метсѧ.
И҆́нъ. І҆рмо́съ то́йже
Крѣ́пость моѧ̀ и҆ пѣ́нїе и҆ сп҃се́нїе, и҆ и҆звѣ́стное застꙋпле́нїе, и҆ стѣна̀ неѡбори́маѧ: сꙋ́щи влⷣчце, борю́щыѧ мѧ̀ де́мѡны поборѝ, при́снѡ и҆́щꙋщыѧ ᲂу҆мертви́ти мѧ̀.
Бг҃а вопло́щши ѿ дѣ́вственныхъ твои́хъ крове́й, ѡ҆божи́вшаго дв҃о человѣ́чество: тѣ́мже мѧ̀ страстьмѝ ѡ҆скверне́ннаго, и҆ и҆стлѣ́вша вра́жїими ко́зньми, и҆зба́ви мл҃твами твои́ми.
Пе́щь проѡбража́ше твоѐ ржⷭ҇тво̀ всенепоро́чнаѧ: ѻ҆́троки бо не ѡ҆палѝ, ꙗ҆́коже ни ᲂу҆тро́бꙋ твою̀ ѻ҆́гнь непостоѧ́нный. тѣ́мже мо́лимъ тѧ̀: рабы̑ твоѧ̑ ѻ҆гнѧ̀ вѣ́чнагѡ и҆зба́ви.
Пѣ́снь и҃
Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.
Кро́вїю и҆з̾ твои́хъ ре́бръ нетлѣ́нныхъ и҆ска́павшею долготерпѣли́ве, тва́рь ѡ҆свѧти́сѧ: рѣ́ки же многобо́жїѧ и҆зсꙋше́ны бы́ша: тꙋ́чы же ꙗ҆ви́шасѧ бл҃гоче́стїѧ, пре́лестей бездо́ждїе потреблѧ́ющыѧ.
Распѧ́тїѧ твоегѡ̀ со́лнце ᲂу҆стыдѣ́сѧ, и҆ своѧ̑ лꙋчы̀ сокры̀: ка́менїе же распадо́шасѧ, и҆ а҆́дъ ни́зꙋ ᲂу҆страши́сѧ: пра́ведныхъ же дꙋ́си взыгра́шасѧ, ча́юще всеконе́чнагѡ сло́ве и҆збавле́нїѧ.
Мч҃нченъ: И҆сцѣлє́нїѧ вѣ̑рнымъ то́чатъ ѡ҆ста́нки моще́й стрⷭ҇тоте́рпєцъ, и҆ всегда̀ вре́ды неꙋдобоисцѣ́льныхъ болѣ́зней и҆сцѣлѣва́ютъ: ꙗ҆́кѡ ди́венъ є҆сѝ гдⷭ҇и, зове́мъ бл҃года́рнѡ, во ст҃ы́хъ твои́хъ мч҃нцѣхъ.
Мч҃нченъ: Оу҆ста̀ ѕвѣре́й, и҆ врє́нїѧ конѡ́бнаѧ, померза̑нїѧ же и҆ стꙋ́дєни, тѧ́жесть зно́ѧ, ногте́й и҆стерза̑нїѧ претерпѣ́сте тве́рдостїю, и҆ затворє́нїѧ, и҆ нꙋ́жднꙋю сме́рть стрⷭ҇тоте́рпцы. тѣ́мже со хрⷭ҇то́мъ прославлѧ́етесѧ.
Бг҃оро́диченъ: Пло́ть и҆з̾ твоегѡ̀ чре́ва прїе́млетъ хотѧ́й, и҆ зри́мь быва́етъ неви́димый, и҆ распѧ́тїе прїе́млетъ, и҆ клѧ́тва нарица́етсѧ, ѿ клѧ́твы и҆з̾има́ѧ всѣ́хъ сн҃ъ тво́й, бг҃ора́дованнаѧ влⷣчце.
И҆́нъ
І҆рмо́съ: Дре́вле ѡ҆роси́вшаго є҆врє́йскїѧ ѻ҆́троки въ пла́мени, и҆ ѡ҆пали́вшаго гдⷭ҇а халдє́и пресла́внѡ въ не́мъ, воспое́мъ глаго́люще: бл҃гослови́те и҆ превозноси́те є҆го̀ во вѣ́ки.
Жи́во и҆ незави́стно сп҃се́нїе на́мъ земнорѡ́днымъ, нескве́рнаѧ а҆́гница, ꙗ҆́же породила́ є҆си а҆́гнца бж҃їѧ, не пре́зри менѐ зовꙋ́ща: бл҃гослови́те всѧ̑ дѣла̀ гдⷭ҇нѧ гдⷭ҇а.
Бж҃е́ственное твоѐ пречⷭ҇таѧ, ржⷭ҇тво̀ ѡ҆бновѝ на́съ, и҆ всѣ́хъ ча̑да показа̀ и҆ сы́ны днѐ и҆ свѣ́та, и҆ сп҃сшесѧ взыва́емъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Живꙋ́ю во́дꙋ породила̀ є҆сѝ чⷭ҇таѧ, ѿ ложе́снъ дѣви́ческихъ, и҆ ѡ҆ставле́нїе и҆сточи́ла є҆сѝ ѿ и҆сто́чника и҆сцѣле́нїй вѣ̑рнымъ. тѣ́мже всѝ зове́мъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Гро́здъ зрѣ́лый жи́зни ты̀ возрасти́ла є҆сѝ чⷭ҇таѧ: лоза́ бо є҆сѝ ᲂу҆слажда́ющи зе́млю бл҃ги́ми, ю҆́же пою́ще зове́мъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Пѣ́снь ѳ҃
І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ.
И҆сцѣлѝ сокрꙋше́нїе и҆ ѻ҆каѧ́нство моѐ твое́ю ра́ною сло́ве неизслѣ́дованне, и҆ погребе́нный ѡ҆́бразъ лꙋка́выми страстьмѝ, ѡ҆чи́сти стрⷭ҇тїю твое́ю, гдⷭ҇и бж҃е сп҃се́нїѧ моегѡ̀.
Ви́дѣнъ бы́лъ є҆сѝ возноси́мь, на кѷпарі́сѣ влⷣко, и҆ на пе́ѵкѣ, и҆ ке́дрѣ ра́ди бл҃гости, є҆ди́нъ сы́й ст҃ы́ѧ трⷪ҇цы, є҆ди́нꙋ ѵ҆поста́сь и҆мы́й во двою̀ є҆стєствꙋ̀, да сп҃се́ши человѣ́чество.
Мч҃нченъ: Крⷭ҇то́мъ ꙗ҆́коже щито́мъ ѡ҆бле́кшесѧ мч҃нцы, невреди́ми ꙗ҆ви́стесѧ, всѣ́ми стрѣла́ми содѣ́лателѧ ѕло́бы. тѣ́мже ны́нѣ того̀ попира́ете, томꙋ̀ рꙋга́ющесѧ ꙗ҆́кѡ хꙋдѣ́й пти́цѣ всегда̀.
Мч҃нченъ: Землѧ̀ ᲂу҆́бѡ зи́нꙋвши, крѡ́ви ва́шѧ прїѧ́тъ, нб҃о же бж҃є́ственныѧ прїѧ́тъ дх҃и, и҆ со ѻ҆́гненными чи́нми бж҃е́ственномꙋ прⷭ҇то́лꙋ предстоитѐ, стрⷭ҇тоно́сны мч҃нцы, церко́внїи столпѝ непоколеби́мїи.
Бг҃оро́диченъ: И҆стлѣ́вшее ѡ҆бнови́ла є҆сѝ є҆стество̀ пра́ѻтчее, па́че є҆стества̀ ро́ждши, и҆ дѣ́вствꙋющи, є҆стествꙋ̀ всемꙋ̀ созда́телѧ: є҆го́же на крⷭ҇тѣ̀ повѣ́шена дре́вле ви́дѧщи, восклица́ла є҆сѝ пречⷭ҇таѧ мт҃и дв҃о.
И҆́нъ
І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Чл҃вѣколю́бїѧ мѧ̀ бж҃е́ственнагѡ сподо́би ѻ҆трокови́це, ꙗ҆́же є҆ди́на чл҃вѣколю́бца бг҃а, пло́ть ѿ тебѐ заимова́вша, неизглаго́ланнѡ ро́ждши, и҆зба́ви мѧ̀ бꙋ́дꙋщагѡ пла́мене, и҆ мꙋ́ки всѧ́кїѧ, любо́вїю тебѐ сла́вѧщаго.
Ꙗ҆́кѡ тве́рдꙋю предста́тельницꙋ, ꙗ҆́кѡ ᲂу҆пова́нїе и҆ стѣ́нꙋ, и҆ наде́ждꙋ, и҆ покро́въ тве́рдъ, и҆ неѡбори́мое ᲂу҆твержде́нїе, и҆ небꙋ́рное приста́нище, є҆ди́нꙋ крѣ́пкое прибѣ́жище стѧжа́вше тѧ̀ всѝ, сп҃са́емсѧ всепѣ́таѧ.
Свѣ́тъ ро́ждшаѧ бж҃е́ственный, мно́гими помрачи́вшеесѧ страсте́й наведе́ньми, и҆ помышле́ньми чꙋжда́гѡ, се́рдце моѐ просвѣтѝ ѻ҆трокови́це, ка́плю подаю́щи мѝ при́снѡ, ѿ скве́рнъ грѣха̀ дв҃о, ѡ҆чища́ющꙋю мѧ̀.
Та́же, Досто́йно є҆́сть: И҆ покло́нъ. Є҆ктенїа̀ и҆ свѣти́ленъ и҆ ѱалмы̀ ѻ҆бы̑чныѧ.
На стїхо́внѣ стїхи̑ры крⷭ҇тны, гла́съ в҃:
Крⷭ҇та̀ твоегѡ̀ дре́во хрⷭ҇тѐ бж҃е, дре́во живо́тное показа́лъ є҆сѝ на́мъ вѣ́рꙋющымъ въ тѧ̀, и҆ си́мъ ᲂу҆праздни́лъ є҆сѝ держа́вꙋ и҆мꙋ́щаго сме́рти: ѡ҆живи́лъ же є҆сѝ ны̀ ᲂу҆мерщвлє́нныѧ грѣхо́мъ. тѣ́мже вопїе́мъ тѝ: бл҃года́телю всѣ́хъ, гдⷭ҇и сла́ва тебѣ̀.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑ и҆ на дѣла̀ твоѧ̑, и҆ наста́ви сы́ны и҆́хъ.
Во́лею ѡ҆бнища́въ ѡ҆бнища́нїѧ ра́ди а҆да́мова хрⷭ҇тѐ бж҃е, прише́лъ є҆сѝ на зе́млю ѿ дв҃ы вопло́щьсѧ, и҆ распѧ́тїе прїѧ́лъ є҆сѝ, да на́съ свободи́ши ѿ рабо́ты вра́жїѧ, гдⷭ҇и сла́ва тебѣ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Всѧ́къ гра́дъ и҆ страна̀ чтꙋ́тъ мѡ́щи ва́шѧ, ѽ стрⷭ҇тоте́рпцы мч҃нцы: вы́ бо зако́ннѡ пострада́вше, вѣнцы̀ нбⷭ҇ныѧ прїѧ́сте, и҆ сегѡ̀ ра́ди ст҃и́телємъ є҆стѐ похвала̀ и҆ цр҃квамъ бл҃голѣ́пїе.
Сла́ва, и҆ ны́нѣ, крⷭ҇тобг҃оро́диченъ, гла́съ в҃.
Подо́бенъ: Є҆гда̀ ѿ дре́ва тѧ̀:
Гро́здъ всезрѣ́лый чⷭ҇таѧ, є҆го́же невоздѣ́ланнѡ во ᲂу҆тро́бѣ носи́ла є҆сѝ, на дре́вѣ ꙗ҆́кѡ ᲂу҆зрѣ́ла є҆сѝ сего̀ повѣ́шена, рыда́ющи восклица́ла є҆сѝ, и҆ взыва́ла: ча́до, сла́дость и҆ска́пай, є҆́юже ѿи́метсѧ пїѧ́нство всѧ́кое страсте́й, бл҃года́телю, менѐ ра́ди тебѐ ро́ждшїѧ, свои́мъ бл҃гоꙋтро́бїемъ ᲂу҆молѧ́емь.
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е. По Ѻ҆́ч҃е на́шъ, тропа́рь, є҆ктенїа̀, и҆ ча́съ а҃-й, и҆ про́чее, и҆ ѿпꙋ́стъ.
Въ сре́дꙋ, бл҃жє́нны, гла́съ в҃:
Гла́съ тѝ прино́симъ разбо́йничь, и҆ мо́лимсѧ: помѧнѝ на́съ сп҃се, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
На крⷭ҇тъ возне́сшꙋсѧ тѝ сп҃се, совозне́слъ є҆сѝ всѐ человѣ́ческое є҆стество̀, непреста́ннѡ пою́щее тѧ̀.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
А҆да́мово рꙋкописа́нїе копїе́мъ твои́мъ раздра́лъ є҆сѝ, того̀ написꙋ́ѧ въ кни́зѣ живы́хъ чл҃вѣколю́бче.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Подо́бницы бы́вше распѧ́тїе претерпѣ́вшемꙋ, тогѡ̀ ѻ҆́бщницы и҆ сла́вѣ ꙗ҆ви́стесѧ мч҃нцы.
Сла́ва: Ѻ҆ц҃ъ пребезнача́льный, сн҃ъ собезнача́льный, да пое́тсѧ во є҆ди́ной че́сти и҆ сла́вѣ кꙋ́пнѡ со ст҃ы́мъ дх҃омъ.
И҆ ны́нѣ: На крⷭ҇тѣ̀ ꙗ҆́кѡ ви́дѣвши, є҆го́же без̾ сѣ́мене родила̀ є҆сѝ, тогѡ̀ долготерпѣ́нїе ѻ҆трокови́це, воспѣва́ла є҆сѝ слезѧ́щи.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.