← претходни дан | Минеј — Јул | следећи дан →
7 июля: Преподобных Фомы Малейского и Акакия, упоминаемого в Лествице
Мѣ́сѧца тогѡ́же въ з҃-й де́нь.
Прпⷣбныхъ ѻ҆тє́цъ на́шихъ, ѳѡмы̀, и҆́же въ мале́и, и҆ а҆ка́кїа, и҆́же въ лѣ́ствицѣ.
Стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Бг҃осїѧ́нна тѧ̀ свѣти́льника, ѻ҆́ч҃е, позна́хомъ, ꙳ мы́сленными зарѧ́ми ѡ҆зарѧ́юща мі́ръ, ꙳ и҆ тмꙋ̀ ѿгонѧ́ща лꙋка́вагѡ ꙳ де́мѡнѡвъ смꙋще́нїѧ. ꙳ тѣ́мже свѣтоно́снꙋю твою̀ па́мѧть ꙳ вѣ́рнѡ пра́зднꙋемъ, бл҃же́нне.
Свѣ́телъ въ житїѝ дре́вле бы́въ, бога́тствомъ и҆ си́лою, ꙳ мона́шескимъ ѻ҆́бразомъ, ꙳ преподо́бне, ѡ҆дѣ́ѧлсѧ є҆сѝ, ѻ҆́ч҃е ѳѡмо̀, ꙳ нищетѣ̀ подо́бѧсѧ на́съ ра́ди вопло́щшагѡсѧ: ꙳ тѣ́мже мно́гими тѧ̀ дарова̑нїи ѡ҆богати́лъ є҆́сть.
Столпо́мъ ѻ҆́гненнымъ зри́тельнѡ тѧ̀ ꙳ бг҃ъ наста́ви ко спасе́нїю, ꙳ ѻ҆́ч҃е, ꙳ къ ти́хомꙋ приста́нищꙋ, ꙳ и҆ къ горѣ̀ безстра́стїѧ: ꙳ во́дꙋ же твое́ю моли́твою и҆сточи́лъ є҆сѝ, ꙳ и҆ неви́дѧщымъ є҆́же ви́дѣти, ꙳ и҆ хромы̑мъ благотече́нїе дарова́лъ є҆сѝ.
И҆́ны стїхи̑ры ст҃а́гѡ а҆ка́кїа, гла́съ д҃. Подо́бенъ: Ꙗ҆́кѡ до́блѧ:
Воздержа́нїемъ мꙋ́дрость плотскꙋ́ю ᲂу҆мертви́лъ є҆сѝ, ꙳ и҆ дꙋ́шꙋ ѡ҆живи́лъ є҆сѝ посто́мъ, ꙳ и҆ добродѣ́телей соверше́нїемъ. ꙳ ѿсю́дꙋже и҆ ꙗ҆ви́лсѧ є҆сѝ ꙳ ꙗ҆́кѡ жи́въ по кончи́нѣ вои́стиннꙋ: ꙗ҆́коже бо со́нъ вмѣни́сѧ тебѣ̀ сме́рть, ꙳ къ бг҃ꙋ преста́вльшꙋсѧ, ꙳ и҆ въ рꙋ́цѣ дꙋ́шꙋ прело́жшꙋ є҆мꙋ̀, ꙳ а҆ка́кїе сла́вне.
Страсте́й ᲂу҆спи́лъ є҆сѝ ꙳ жела̑нїѧ, а҆ка́кїе, ꙳ бдѣ́нїе всено́щное ꙗ҆́кѡ стѧжа́въ, ꙳ послꙋша́нїе и҆ смире́нїе, ꙳ поꙋче́нїе же бжⷭ҇твенныхъ писа́нїй, ꙳ и҆ се́рдце чи́сто, ꙳ и҆ ᲂу҆́мъ несмꙋще́нъ. ꙳ тѣ́мже бы́лъ є҆сѝ и҆ прїѧ́телище дх҃а ст҃а́гѡ, ꙳ зари̑ чꙋде́съ возсїѧ́въ концє́мъ.
Мїрска́гѡ пристра́стїѧ ꙳ до конца̀ возгнꙋша́всѧ, ꙳ безстра́стїѧ сосꙋ́дъ бы́лъ є҆сѝ: ꙳ въ любомꙋ́дрїи же, сла́вне, ꙳ дѣ́тельнымъ восхожде́нїемъ ꙳ возвы́силсѧ є҆сѝ къ самомꙋ̀ жела́нїю коне́чномꙋ, ꙳ и҆ ᲂу҆зрѣ́лъ є҆сѝ та́йнымъ видѣ́нїемъ ꙳ неви́димыхъ недомы́слєнныѧ и҆ бжⷭ҇твєнныѧ добрѡ́ты, ꙳ а҆ка́кїе всемꙋ́дре и҆ блаже́нне.
Сла́ва, и҆ ны́нѣ, бг҃оро́диченъ:
Ꙗ҆́же бг҃а невмѣсти́маго ꙳ во чре́вѣ твое́мъ вмѣсти́вшаѧ, ꙳ чл҃вѣколю́бнѡ чл҃вѣ́ка бы́вша, ꙳ и҆ на́ше смѣше́нїе и҆зъ тебє̀ прїи́мша, ꙳ и҆ ѡ҆божи́вша ꙗ҆́вѣ, ꙳ не пре́зри менѐ, всечи́стаѧ, ны́нѣ скорбѧ́ща: ꙳ но ᲂу҆ще́дри ско́рѡ, ꙳ и҆ разли́чныѧ вражды́ же ꙳ и҆ вре́да лꙋка́вагѡ свободѝ.
Крⷭ҇тобг҃оро́диченъ:
А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тѝ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
Тропа́рь, гла́съ д҃:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѿ на́съ, но моли́твами и҆́хъ въ ми́рѣ ᲂу҆пра́ви живо́тъ на́шъ.
Канѡ́нъ прпⷣбнагѡ ѳѡмы̀.
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Просвѣще́нїе бжⷭ҇твенныѧ благода́ти, сла́вне, въ дꙋшѝ прїи́мъ, ꙗ҆́кѡ дрꙋгі́й є҆гѵ́петъ страсте́й мглꙋ̀ ѡ҆ста́вилъ є҆сѝ, и҆ житїѐ прїѧ́лъ є҆сѝ нбⷭ҇ное.
Свѣ́телъ, ѻ҆́ч҃е, въ житїѝ бы́въ, на и҆ноплеме́нники воздви́глъ є҆сѝ неисчє́тны побѣ̑ды, и҆ мона́шествовавъ прпⷣбнѡ, полкѝ де́мѡнѡвъ побѣди́лъ є҆сѝ.
Воздержа́тельнѡ врагꙋ̀ спле́тсѧ, посо́бїемъ, прпⷣбне, бжⷭ҇твеннагѡ дх҃а смири́лъ є҆сѝ сего̀, и҆ побѣ́ды съ небесѐ вѣне́цъ прїѧ́лъ є҆сѝ.
Бг҃оро́диченъ:
Є҆ди́на бг҃а всѣ́хъ сꙋ́щаго невмѣсти́ма, тебѣ̀ вмѣ́стна бы́вша за бла́гость, породила̀ є҆сѝ, ѻ҆трокови́це. є҆го́же молѝ, спастѝ пою́щыѧ тѧ̀.
И҆́нъ канѡ́нъ прпⷣбнагѡ а҆ка́кїа, є҆гѡ́же краегране́сїе:
А҆ка́кїа, и҆зрѧ́днаго послꙋ́шника, пѣ́сньми пою̀.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Неѕло́бнымъ нра́вомъ ѡ҆бложи́всѧ, благоѻбра́знꙋю добродѣ́телей стѧжа́лъ є҆сѝ добро́тꙋ, хрⷭ҇то́вꙋ во́льномꙋ послꙋша́нїю подо́бѧсѧ да́же до сме́рти, всеблаже́нне.
Ѕло́бы ѡ҆брѣта́телѧ посрами́лъ є҆сѝ безѕло́бїемъ твои́мъ, терпѣ́нїемъ же, ѻ҆́ч҃е, и҆скꙋше́нїй тогѡ̀ го́рдꙋю и҆ вознесе́ннꙋю враждꙋ̀ къ землѝ, всеблаже́нне, смири́лъ є҆сѝ.
Воздержа́нїемъ терпѣли́внымъ, прпⷣбне, пред̾ѡбꙋча́ѧсѧ, и҆ страсте́й ѿсѣка́ѧ нача̑ла, безстра́стїѧ ѻ҆де́ждею ᲂу҆краси́лсѧ є҆сѝ по́слѣжде, бл҃года́тїю бжⷭ҇твенною покрыва́емь.
Оу҆крѣ́пль дꙋше́вное ᲂу҆строе́нїе терпѣ́нїемъ тве́рдымъ, и҆ до́блимъ, всеблаже́нне, по́мысломъ по всѧ̑ дни̑ терпѣ́въ мꙋ́ченическїй по́двигъ, и҆ вѣне́чникъ показа́лсѧ є҆сѝ.
Бг҃оро́диченъ:
Крѣ́пость твори́тельнаѧ и҆ пѣ́нїе, бг҃ъ и҆ гдⷭ҇ь, и҆́же на́съ ра́ди и҆з̾ тебє̀ воплоще́йсѧ и҆ рожде́йсѧ, прⷪ҇ро́чески ꙗ҆́коже и҆са́їа, пречⷭ҇таѧ, благовѣстѝ.
Пѣ́снь г҃. І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Твои́ми прекло́ньсѧ бг҃ъ мольба́ми, рꙋко́ю тѧ̀ прⷪ҇ро́ка ᲂу҆́зъ и҆зба́ви, и҆ ше́ствовати благоизво́ли къ болѣ́зненномꙋ трꙋдꙋ̀ воздержа́нїѧ.
Житїѧ̀ го́рькое ѡ҆ста́вивъ треволне́нїе, ко приста́нищꙋ пристꙋпи́лъ є҆сѝ воздержа́нїѧ и҆ тишинѣ̀ бжⷭ҇твеннѣй, ѻ҆́ч҃е ѳѡмо̀, и҆спо́лнивсѧ дх҃а благода́тїю.
Столпо́мъ і҆и҃лѧ, и҆ногда̀ пꙋсты́ню, всеблаже́нне, проходи́ти наста́вивый, столпо́мъ тѧ̀ ѻ҆́гненнымъ наставлѧ́ше, прови́дѧй дꙋшѝ твоеѧ̀ благоро́дїе.
Бг҃оро́диченъ:
Златꙋ́ю ꙗ҆́кѡ и҆́стиннѡ кади́льницꙋ, и҆ ста́мнꙋ ма́нны, и҆ бжⷭ҇твеннꙋю го́рꙋ, и҆ пала́тꙋ краснꙋ̀ бж҃їю, тѧ̀, дв҃о, и҆менꙋ́емъ.
И҆́нъ. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Всего̀ тебѐ сама́го творцꙋ̀ твоемꙋ̀ и҆ бг҃ꙋ, прпⷣбне, возложи́въ, терпѣ́лъ є҆сѝ томи́тельное ᲂу҆ничиже́нїе.
Зако́ннѡ страда́льческое терпѣ́нїе, возде́ржниче, показа́лъ є҆сѝ на землѝ. тѣ́мже тебѣ̀ небе́сное весе́лїе даде́сѧ.
Смире́нїе и҆́стинно, долготерпѣ́нїе ѻ҆па́сно держа́лъ є҆сѝ, терпѣ́нїе, воздержа́нїемъ съ послꙋша́нїемъ, пребл҃же́нне.
Бг҃оро́диченъ:
Всѣ́хъ содѣ́тель зи́ждетсѧ, на́съ ра́ди, пречⷭ҇таѧ, пло́ть прїе́мъ ѡ҆дꙋшевле́нꙋ, и҆зъ тебє̀, прест҃а́ѧ бг҃оневѣ́сто.
Конда́къ а҆ка́кїа, гла́съ в҃. Подо́бенъ: Вы́шнихъ и҆щѧ̀:
Мі́ръ ѡ҆ста́вль, хрⷭ҇тꙋ̀ послѣ́довалъ є҆сѝ ѿ младе́нства, премꙋ́дре а҆ка́кїе прпⷣбне, тогѡ̀ подража́ѧ во́льное смире́нїе, низве́рглъ є҆сѝ го́рдостнаго мꙋчи́телѧ: молѝ непреста́ннѡ ѡ҆ всѣ́хъ на́съ.
Сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Ꙗ҆ви́лсѧ є҆сѝ, преподо́бне, благоꙋгоди́въ бжⷭ҇твенными дѣѧ̑нїи, и҆ житїе́мъ чи́стымъ, наслѣ́дїѧ сподо́билсѧ є҆сѝ безпло́тныхъ, молѝ спасти́сѧ на́мъ.
Сла́ва, а҆ка́кїа, гла́съ то́йже. Подо́бенъ: Ско́рѡ предварѝ:
Свѣ́тлостїю вѣ́ры, и҆ дѣ́тельнымъ свѣ́томъ, ꙗ҆ви́лсѧ є҆сѝ равноа́гг҃ленъ на землѝ вои́стиннꙋ, а҆ка́кїе всемꙋ́дре, показа́лъ є҆сѝ мꙋ́жески крѣ́пкое ᲂу҆ма̀ твоегѡ̀, сокрꙋши́лъ є҆сѝ напа̑данїѧ страсте́й посто́мъ. тѣ́мже и҆ по кончи́нѣ, ꙗ҆́кѡ жи́въ ꙗ҆ви́лсѧ є҆сѝ, непобѣди́ме.
И҆ ны́нѣ, бг҃оро́диченъ:
Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀: и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
Крⷭ҇тобг҃оро́диченъ:
На крⷭ҇тѣ́ тѧ возвы́шена ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й, ка́кѡ жи́знь всѣ́хъ вкꙋша́еши сме́рти, ѡ҆живи́ти мє́ртвыѧ хотѧ̀, ꙗ҆́кѡ милосе́рдъ;
Пѣ́снь д҃. І҆рмо́съ:
Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.
Воздержа́нїѧ поже́глъ є҆сѝ ѻ҆гне́мъ бжⷭ҇твеннымъ те́рнїе грѣхо́вное, и҆ чꙋде́съ заре́ю, ѻ҆́ч҃е, ѡ҆блиста́лъ є҆сѝ.
Дꙋшѝ твоеѧ̀ ѻ҆́чи ѿ страстны́ѧ ти́ны ѡ҆чи́стивъ, незрѧ́щыѧ зѣ̑ницы, ѻ҆́ч҃е, ѿве́рзлъ є҆сѝ.
Са́мъ ѿчꙋжди́лсѧ є҆сѝ мїрски́хъ мѧте́жей, бг҃оно́се, и҆ премі́рнꙋю тишинꙋ̀ полꙋчи́лъ є҆сѝ.
Бг҃оро́диченъ:
Неискꙋсобра́чнаѧ влⷣчце, ꙗ҆́же бг҃а безъ сѣ́мене заче́ншаѧ, напа́стей и҆ печа́лей всѣ́хъ и҆зба́ви.
И҆́нъ. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Оу҆мертви́въ, ѻ҆́ч҃е, мꙋ́дрость пло́ти твоеѧ̀, твою̀ дꙋ́шꙋ ѡ҆живи́лъ є҆сѝ, и҆ пра́вды вѣне́цъ прїѧ́лъ є҆сѝ, зовы́й, а҆ка́кїе: сла́ва си́лѣ твое́й, гдⷭ҇и.
По́двиги дѡ́лги прїе́млѧ, и҆́же по всѧ̑ дни̑ терпѣли́вное пока́зовалъ є҆сѝ сопротивле́нїе, ѻ҆́ч҃е. тѣ́мже по сме́рти ꙗ҆́кѡ жи́въ возопи́лъ є҆сѝ: сла́ва си́лѣ твое́й, гдⷭ҇и.
Тве́рдымъ ᲂу҆мо́мъ томлє́нїѧ за хрⷭ҇та̀ претерпѣ́лъ є҆сѝ, а҆ка́кїе блаже́нне, сего̀ помышлѧ́ѧ на крⷭ҇тѣ̀ пригвожде́нна за спасе́нїе ро́да на́шегѡ.
Бг҃оро́диченъ:
Чистѣ́йши є҆сѝ нб҃съ, и҆ мы́сленныхъ си́лъ, ꙗ҆́кѡ си́хъ зижди́телѧ, пречⷭ҇таѧ, ро́ждши. тѣ́мже тѝ зове́мъ: ра́дꙋйсѧ, бцⷣе всепѣ́таѧ.
Пѣ́снь є҃. І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.
Рꙋководѧ́щаго тѧ̀ къ пꙋсты́нѧмъ благоче́стнѡ и҆мѣ́лъ є҆сѝ и҆лїю̀, ѻ҆́ч҃е, ѳесві́тѧнина, ꙗ҆влѧ́ющасѧ но́щїю и҆ тайноꙋча́ща бжⷭ҇твєннымъ тѧ̀, прпⷣбне.
Ꙗ҆́кѡ въ дрꙋгі́й карми́лъ, въ мале́йскꙋю го́рꙋ, мꙋ́дре, всели́лсѧ є҆сѝ, видѣ́нїй бжⷭ҇твенныхъ наслажда́ѧсѧ, и҆ чꙋдотворе́нїй бл҃года́ть пресла́внѡ, блаже́нне, прїе́млѧ.
Простра́ннагѡ пꙋтѝ тѣ́сный предпочита́ѧ, дости́глъ є҆сѝ ра́достнѡ широтꙋ̀ раѧ̀: и҆ дре́вꙋ жи́зненномꙋ, ѻ҆́ч҃е, невозбра́ннѡ причаща́ешисѧ веселѧ́сѧ.
Бг҃оро́диченъ:
Оу҆ѧзви́вшеесѧ прилѡ́ги вра́жїими, чⷭ҇таѧ, ꙗ҆́кѡ ми́лостива, и҆сцѣлѝ се́рдце моѐ, на крⷭ҇тѣ̀ пло́тїю пригвозди́вшагосѧ неизрече́ннѡ ро́ждшаѧ.
И҆́нъ. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Ты̀ прпⷣбне, ꙗ҆́звами мꙋ́жески ᲂу҆ранѧ́емь, и҆ бїє́нїи по всѧ̑ дни̑, терпѧ̀ крѣ́пкѡ, прпⷣбнѡ почи́лъ є҆сѝ.
Тече́нїе до́брое сконча́въ, а҆ка́кїе неѕло́бный, трꙋдѡ́въ свобо́дный и҆ болѣ́зней воспрїѧ́лъ є҆сѝ поко́й.
Оу҆́мъ тво́й чи́стымъ по́мысломъ ѡ҆кормлѧ́емь, а҆ка́кїе бг҃оно́се, къ вино́вномꙋ всѣ́хъ благополꙋ́чнѡ ᲂу҆стреми́сѧ.
Бг҃оро́диченъ:
Ни а҆́гг҃льскїй ᲂу҆́мъ, ни человѣ́чь мо́жетъ ржⷭ҇тва̀ твоегѡ̀ сказа́ти: превосхо́дитъ бо всѧ́ко постиже́нїе ра́зꙋма.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Въ пꙋсты́ни безво́днѣй всели́лсѧ є҆сѝ, и҆ моли́твъ ѡ҆дожде́нїемъ твои́хъ, прпⷣбне, во́дꙋ всебога́тнꙋ, влⷣкꙋ и҆сточи́ти ᲂу҆моли́лъ є҆сѝ.
Ꙗ҆́коже а҆враа́мъ дре́вле пра́ведный, во и҆́нꙋ странꙋ̀ себѐ ᲂу҆дали́лъ є҆сѝ, и҆ бг҃ꙋ прибли́жилсѧ, и҆ въ зе́млю кро́ткихъ всели́лсѧ є҆сѝ.
Мона́хъ и҆́стиненъ бы́лъ є҆сѝ, и҆ по погребе́нїи и҆сцѣле́нїй дарова̑нїѧ, ѻ҆́ч҃е ѳѡмо̀, тре́бꙋющымъ и҆сточа́еши си́лою дꙋхо́вною.
Бг҃оро́диченъ:
Во́лею всѧ̑ содѣ́лавый, въ ложесна̀ восхотѣ́въ неискꙋсобра́чныѧ всели́сѧ, тлѣ́нїемъ недꙋ́говавшыѧ нетлѣ́нїемъ почестѝ хотѧ̀, ꙗ҆́кѡ благосе́рдъ.
И҆́нъ. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости, ѿ ре́бръ твои́хъ и҆сте́кшею кро́вїю.
Оу҆снꙋ́лъ є҆сѝ бл҃же́ннымъ сно́мъ, блаже́нне, и҆ по сме́рти ꙗ҆ви́лсѧ є҆сѝ послꙋ́шаѧ, ѻ҆́ч҃е, вопроша́ющихъ, ꙗ҆́кѡ не ᲂу҆мира́етъ послꙋша́нїе и҆мѣ́ѧй.
Сконча́въ дѡ́брыѧ по́двиги, тезоимени́те, нетлѣ́ннагѡ, бг҃омꙋ́дре, сподо́билсѧ є҆сѝ вои́стиннꙋ безсме́ртїѧ, и҆дѣ́же ра́дꙋѧсѧ вѣнцы̀ побѣ́ды воспрїѧ́лъ є҆сѝ.
Бжⷭ҇твенное и҆ до́брое и҆ бг҃оꙋго́дное воздержа́нїе житїѧ̀ твоегѡ̀, блаже́нне, мнѡ́гїѧ ᲂу҆твержда́етъ бжⷭ҇твеннымъ стра́хомъ, и҆ жела́нїемъ бл҃гъ бꙋ́дꙋщихъ, а҆ка́кїе.
Бг҃оро́диченъ:
Вои́стиннꙋ бцⷣꙋ тѧ̀ вѣ́рою сла́вимъ, ꙗ҆́кѡ бг҃а заче́ншꙋю, и҆ ро́ждшꙋю сего̀ неискꙋсобра́чнѡ, соеди́ншасѧ и҆зъ тебє̀ прїѧ́тныѧ ст҃ы́мъ хра́момъ.
Конда́къ ѳѡмы̀, гла́съ д҃. Подо́бенъ: Вознесы́йсѧ:
Ве́лїю побѣ́дꙋ мꙋ́жески показа́лъ є҆сѝ, ѿѻнꙋ́дꙋже бж҃е́ственною любо́вїю разгорѣ́всѧ, царѧ̀ тлѣ́ннаго и҆ всѧ̑ кра̑снаѧ преѡби́дѣлъ є҆сѝ, на горѣ̀ мале́йстѣй вселе́нїе соверши́въ, ѿ неѧ́же въ нбⷭ҇наѧ возше́лъ є҆сѝ къ цр҃ю̀ царе́й, ѳѡмо̀: молѝ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.
Ѻ҆́гнь страсте́й воздержа́нїѧ росо́ю, ѻ҆́ч҃е, погаси́лъ є҆сѝ, и҆ просїѧ́въ ꙗ҆́коже со́лнце добродѣ́телей свѣ́тлостїю, всѣ́хъ вопїю́щихъ просвѣща́еши сердца̀, блаже́нне: бл҃гослове́нъ є҆сѝ, бж҃е ѻ҆тє́цъ на́шихъ.
Слѣпы̑мъ є҆́же зрѣ́ти, и҆ хромы̑мъ, ѻ҆́ч҃е ѳѡмо̀, благотече́нїе, скѡ́рбнымъ и҆збавле́нїе, и҆ болѧ́щымъ и҆сцѣле́нїе подаѧ̀ си́лою хрⷭ҇то́вою, взыва́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.
Безмо́лвнѡ твою̀ соверши́лъ є҆сѝ жи́знь, ѻ҆́ч҃е блаже́нне, нестѧжа́нїемъ просвѣща́ѧсѧ, и҆ воздержа́нїемъ ᲂу҆краша́ѧсѧ, поѧ̀ ᲂу҆миле́нїемъ се́рдца влⷣцѣ, пребога́те: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Дв҃о чⷭ҇таѧ, неискꙋсобра́чнаѧ, бл҃гослове́ннаѧ, па́дающихъ и҆справле́нїе, согрѣша́ющихъ и҆збавле́нїе, спаси́ мѧ блꙋ́днаго, спасѝ сн҃ꙋ твоемꙋ̀ зовꙋ́ща: бл҃гослове́нъ є҆сѝ, бж҃е ѻ҆тє́цъ на́шихъ.
И҆́нъ. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Всѣ́мъ жела́нїемъ ко влⷣцѣ и҆ды́й, доса̑ды и҆ безчє́стїѧ, прпⷣбне, и҆ ꙗ҆́звы терпѧ̀, взыва́лъ є҆сѝ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
По́мыслъ тво́й влⷣчнїѧ помышлѧ́ѧ стрⷭ҇ти и҆ распѧ́тїе, и҆ сме́рти поꙋча́ѧсѧ, ᲂу҆ранѧ́емь поѧ́ше: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ме́ртвъ во гро́бѣ по зако́нꙋ ᲂу҆мира́ющихъ лежѧ̀ безъ дыха́нїѧ, глаго́лющемꙋ вѣща́еши па́че є҆стества̀, ꙗ҆́кѡ не ᲂу҆́мерлъ є҆́смь, и҆ взыва́еши: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ:
Оу҆ме́ршыѧ, и҆́мже, дв҃о, держи́ми бѣ́хомъ зако́номъ, жи́знь ро́ждши и҆́стиннꙋю, возста́вила є҆сѝ зовꙋ́щыѧ: бл҃гослове́на ты̀ въ жена́хъ, пренепоро́чнаѧ влⷣчце.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Стра̑сти неꙋдержи̑мыѧ дꙋшѝ воздержа́нїѧ ᲂу҆здо́ю покори́въ, невеще́ствєннымъ а҆́гг҃лѡмъ ᲂу҆подо́билсѧ є҆сѝ, вопїѧ̀: по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Ѳесві́тѧнина и҆лїѝ послѣ́дꙋѧ, преблаже́нне, свѧще́нномꙋ житїю̀, на го́рꙋ возше́лъ є҆сѝ бесѣ́довати къ бг҃ꙋ, посто́мъ ᲂу҆́мъ ѡ҆чища́ѧ, поѧ̀: благослови́те, всѧ̑ дѣла̀ гдⷭ҇нѧ, гдⷭ҇а.
Кро́токъ и҆ неѕло́бивъ ꙗ҆́вльсѧ, на землѝ кро́ткихъ живе́ши, бг҃омꙋ́дре, со всѣ́ми преподо́бными и҆ и҆збра́нными поѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Живы́й сꙋ́щїй и҆сто́чникъ, ꙗ҆́кѡ во́дꙋ жи́зни ро́ждшаѧ, дꙋ́шꙋ мою̀ и҆ста́ѧвшꙋю грѣхо́внымъ пла́менемъ, дв҃о бцⷣе, напо́й, да тѧ̀ сла́влю во всѧ̑ вѣ́ки.
И҆́нъ. І҆рмо́съ:
Рꙋ́цѣ распросте́ръ, данїи́лъ львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Крѣ́пкимъ воздержа́нїемъ бг҃ꙋ тебѣ̀ бы́сть смѣси́тисѧ, преподо́бне: ᲂу҆́зъ тѣ́ла разрѣ́шшꙋсѧ, и҆ пло́ть и҆знꙋри́вшꙋ, и҆ видѣ́нїемъ дѣ́тельнымъ, ѻ҆́ч҃е, зовы́й: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Съ мꙋ́чєники хрⷭ҇тѡ́вы сочета́емь и҆ вчинѧ́емь, непреста́ннѡ, прпⷣбне, поѧ̀ чл҃вѣколю́бца, и҆ молѧ́сѧ ѡ҆ на́съ восхвалѧ́ющихъ тѧ̀ и҆ вопїю́щихъ: благослови́те, всѧ̑ дѣла̀ гдⷭ҇нѧ, гдⷭ҇а.
Пострада́въ зако́ннѡ на землѝ, небе́сный ѡ҆брѣ́лъ є҆сѝ поко́й, ра́дꙋѧсѧ, преподо́бне, со ст҃ы́ми, и҆ соприча́стникъ весе́лїю и҆ ра́дости и҆́хъ бы́въ, и҆ взыва́ѧ: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Воплоща́етсѧ безпло́тный пре́жде, содѣ́тель зи́ждетсѧ и҆зъ тебє̀, всенепоро́чнаѧ: и҆́бо въ пречⷭ҇таѧ ложесна̀ твоѧ̑ заше́дъ непостижи́мый, ѡ҆писа́нїемъ плотски́мъ хотѧ̀ ѡ҆б̾ѧ́тсѧ. тѣ́мже вси́ тѧ благослови́мъ, марі́е бг҃оневѣ́сто.
Пѣ́снь ѳ҃. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Дх҃омъ, ѻ҆́ч҃е, ѡ҆бнища́въ, нбⷭ҇ное црⷭ҇тво воспрїѧ́лъ є҆сѝ со всѣ́ми и҆збра́нными, сла́вы неизрече́нныѧ и҆сполнѧ́емь, и҆ болѣ́зней по́честь прїе́млѧ, ѳѡмо̀, возда́нїѧ. сегѡ̀ ра́ди тѧ̀ вѣ́рою и҆ любо́вїю ᲂу҆блажа́емъ.
Моще́й твои́хъ ра́ка вѣ́рнѡ пристꙋпа́ющымъ и҆сточа́етъ и҆сцѣле́нїй рѣ́ки, стра̑сти дꙋ́шъ потоплѧ́ющаѧ, и҆ тѣле́съ болѣ̑зни ѿе́млющаѧ, блаже́нне ѳѡмо̀, моли́твенниче вѣ́рою при́снѡ блажа́щымъ тѧ̀.
Совокꙋплѧ́ѧсѧ съ прпⷣбныхъ свѣ́тлыми ли̑ки, и҆ сїѧ́нїемъ невече́рнимъ мы́сленнѡ, ѻ҆́ч҃е ѳѡмо̀, ѡ҆зарѧ́емь, бж҃е́ственнꙋю твою̀ па́мѧть творѧ́щыѧ просвѣтѝ вѣ́рнѡ, и҆ ᲂу҆лꙋчи́ти спасе́нїе моли́твами твои́ми сподо́би.
Бг҃оро́диченъ:
Ѡ҆блиста́ющаѧ всѣ́хъ чꙋде́съ зарѧ̀ твои́хъ, бг҃облагода́тнаѧ чⷭ҇таѧ, страсте́й и҆ скорбе́й ѿе́млетъ мглꙋ̀, и҆ свѣ́тъ весе́лїѧ мы́сленный простира́етъ, мт҃рь бж҃їю тѧ̀ велича́ющымъ.
И҆́нъ. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Ми́лостивнѡ вмѣсти́лсѧ є҆сѝ, ѻ҆́ч҃е, ко всѧ́ческихъ благода́телю, неѕло́бїѧ добро́тою ᲂу҆краша́емь, и҆ красото́ю добродѣ́телей сїѧ́ѧ: тѣ́мже тѧ̀ всѝ ᲂу҆блажа́емъ.
Зако́нꙋ повинꙋ́ѧсѧ влⷣчню, твою̀ преклони́лъ є҆сѝ вы́ю мона́шествꙋющихъ боре́нїю, и҆ побѣдоно́сецъ, ѻ҆́ч҃е, бы́въ, къ неѕло́бїю дости́глъ є҆сѝ соверше́нномꙋ, всеблаже́нне.
Пѣ́нїе бг҃ꙋ возсыла́ти со безпло́тными сподо́билсѧ є҆сѝ ꙗ҆́кѡ соблю́дъ ѻ҆́нѣхъ житїѐ и҆ чистотꙋ̀: терпѣ́нїемъ же дѣ́лъ мꙋ́чєникъ сла́вꙋ прїѧ́лъ є҆сѝ.
Прїимѝ ѿ на́съ, бг҃оно́се, приноси́мое тебѣ̀ пѣ́нїе ѿ чи́ста се́рдца, и҆ возда́ждь мольба́ми твои́ми согрѣше́нїй ѡ҆ставле́нїе и҆ спасе́нїе, всече́стне.
Бг҃оро́диченъ:
Ꙗ҆́кѡ ко́рень сꙋ́щꙋю вои́стиннꙋ нетлѣ́нїѧ, тѧ̀, дв҃о, всѝ вѣ́рнїи и҆ ᲂу҆твержде́нїѧ хвала́ми почита́емъ: ты́ бо ѵ҆поста́сное безсме́ртїе на́мъ родила̀ є҆сѝ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.