← претходни дан | Минеј — Јул | следећи дан →
2 июля: Положение честной ризы Пресвятой Богородицы во Влахерне
Мѣ́сѧца тогѡ́же во в҃-й де́нь.
Положе́нїе чⷭ҇тны́ѧ ри́зы прест҃ы́ѧ влⷣчцы на́шеѧ бцⷣы ко влахе́рнѣ.
Ве́черъ, ѻ҆бы́чнаѧ каѳі́сма.
На Гдⷭ҇и, воззва́хъ, стїхи̑ры на ѕ҃, гла́съ д҃: Поⷣ: Да́лъ є҆сѝ зна́менїе:
Да́лъ є҆сѝ, чл҃вѣколю́бче, твою̀ мт҃рь, ꙳ по́мощь рабѡ́мъ твои̑мъ, ꙳ ꙗ҆́кѡ бл҃гоꙋтро́бенъ: ꙳ є҆́юже неизрече́нное и҆ стра́шное содѣ́лалъ є҆сѝ смотре́нїе твоѐ, ꙳ и҆ первозда́нное на́ше и҆спра́вилъ є҆сѝ бжⷭ҇твенное досто́инство. ꙳ тѣ́мже всечестно́е тоѧ̀ чтꙋ́ще торжество̀, ꙳ воспѣва́емъ держа́вꙋ твою̀, ꙳ і҆и҃се всеси́льне, сп҃се дꙋ́шъ на́шихъ.
Два́жды.
Гра́дъ почита́ющїй тѧ̀, ꙳ и҆ по до́лгꙋ сла́вѧщїй, ѡ҆гражда́еши, всепѣ́таѧ, ꙳ ри́зою твое́ю честно́ю ꙳ ѿ безбо́жныхъ, чⷭ҇таѧ, и҆ноплемє́нникъ, ꙳ ѿ гла́да же и҆ трꙋ́са, ꙳ и҆ междоꙋсо́бныѧ бра́ни всегда̀, ꙳ дв҃о неискꙋсобра́чнаѧ: ꙳ и҆ сегѡ̀ ра́ди сла́витъ тѧ̀, прест҃а́ѧ бг҃оневѣ́сто, ꙳ человѣ́кѡвъ помо́щнице.
Два́жды.
Ри́зꙋ честнꙋ́ю твою̀, бг҃облагода́тнаѧ влⷣчце, ꙳ дарова́ла є҆сѝ гра́дꙋ твоемꙋ̀, ꙳ бога́тство неѿе́млемо: ꙳ покро́въ же и҆ сла́вꙋ, ꙳ и҆ неѡбори́мꙋ стѣ́нꙋ, ꙳ и҆ и҆сцѣле́нїй сокро́вище, ꙳ и҆ чꙋде́съ и҆сто́чникъ приснотекꙋ́щїй, ꙳ приста́нище же спаси́тельное ѡ҆бꙋрева́ємымъ всегда̀, ꙳ сегѡ̀ ра́ди пое́мъ тѧ̀, препѣ́таѧ чⷭ҇таѧ.
Почерпи́те человѣ́цы ꙳ здра́вїе дꙋшѝ и҆ тѣ́ла: ꙳ ра́ка бо всѣ̑мъ предлежи́тъ, ꙳ въ не́йже положи́сѧ чⷭ҇тна́ѧ ри́за приснодв҃ы, ꙳ и҆сточа́ющаѧ на́мъ чꙋде́съ стрꙋи̑, ꙳ и҆ ѡ҆мыва́ющаѧ серде́цъ ѡ҆мрачє́нїѧ, ꙳ и҆ страсте́й ѡ҆сквернє́нїѧ, ꙳ и҆ дꙋ́шы ѡ҆свѧща́ющаѧ вѣ́рныхъ ꙳ бжⷭ҇твенною бл҃года́тїю.
Сла́ва, и҆ ны́нѣ, гла́съ в҃:
Смы́слъ ѡ҆чи́стивше и҆ ᲂу҆́мъ, со а҆́гг҃лы и҆ мы̀ торжествꙋ́емъ, свѣ́тлѡ начина́юще дв҃дскꙋю пѣ́снь ѻ҆трокови́цѣ, невѣ́стѣ всѣ́хъ цр҃ѧ̀ хрⷭ҇та̀ бг҃а на́шегѡ, воскрⷭ҇нѝ, гдⷭ҇и, глаго́люще, въ поко́й тво́й, ты̀, и҆ кївѡ́тъ ст҃ы́ни твоеѧ̀: ꙗ҆́кѡ бо пала́тꙋ краснꙋ̀ сїю̀ ᲂу҆краси́въ, и҆ причтѐ ю҆̀ гра́дꙋ твоемꙋ̀, влⷣко, стро́ити и҆ покрыва́ти ѿ сꙋпоста́тныхъ пога̑нъ, держа́вною си́лою твое́ю моли́твами є҆ѧ̀.
На стїхо́внѣ стїхи̑ры, гла́съ а҃. Подо́бенъ: Всехва́льнїи мꙋ́ченицы:
Пала́та ѡ҆дꙋшевле́ннаѧ бж҃їѧ ꙳ є҆ди́на была̀ є҆сѝ, ꙳ и҆ честнꙋ́ю ри́зꙋ твою̀, ꙳ въ домꙋ̀ ст҃ѣ́мъ твое́мъ сокрове́нꙋ, ꙳ вѣ̑рнымъ ѡ҆свѧще́нїе, и҆ стѣ́нꙋ дарова́ла є҆сѝ неѡбори́мꙋ: ꙳ є҆ѧ́же ра́ди гра́дъ тво́й, бг҃ома́ти, спаса́етсѧ, ꙳ воспѣва́ѧ бжⷭ҇твеннꙋю держа́вꙋ твою̀.
Сті́хъ: Воскрⷭ҇нѝ, гдⷭ҇и, въ поко́й тво́й, ты̀, и҆ кївѡ́тъ ст҃ы́ни твоеѧ̀.
Ри́зꙋ честнꙋ́ю твою̀, твоѐ честно́е и҆ ст҃о́е тѣ́ло, ꙳ чⷭ҇таѧ, покры́вшꙋю, ꙳ ѻ҆де́ждꙋ сла́вы дарова́ла є҆сѝ всѣ̑мъ, ꙳ и҆ и҆сто́чникъ и҆сточа́ющь ꙳ благода́ти присноживѡ́тныѧ во́ды. ꙳ є҆ѧ́же пра́зднꙋемъ положе́нїе, ꙳ почита́юще тѧ̀, бцⷣе, всѣ́хъ честнѣ́йшꙋю.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Хра́мъ тво́й, влⷣчце, ꙳ твою̀ свѧще́ннꙋю ри́зꙋ, ꙳ ꙗ҆́кѡ сокро́вище свѧще́нїѧ носѧ̀, ꙳ всегда̀ ѡ҆свѧща́етъ всѧ̑ ꙳ вѣ́рою притека́ющыѧ, ꙳ и҆ тѧ̀ по до́лгꙋ блажа́щыѧ ꙳ въ се́мъ вы́нꙋ, ꙳ ᲂу҆пова́нїе дꙋ́шъ на́шихъ, ꙳ и҆ тве́рдый покро́въ и҆ держа́вꙋ.
Сла́ва, и҆ ны́нѣ, гла́съ в҃:
Ꙗ҆́кѡ вѣнце́мъ пресвѣ́тлымъ, всечⷭ҇таѧ бцⷣе, ри́зою твое́ю честно́ю, цр҃ковь бж҃їѧ приѡдѣ́ѧсѧ, и҆ свѣ́титсѧ ра́дꙋющисѧ дне́сь, и҆ та́йнѡ ликовствꙋ́етъ, влⷣчце, вопїю́щи тебѣ̀: ра́дꙋйсѧ, дїади́ма честна́ѧ, и҆ вѣ́нче бжⷭ҇твенныѧ сла́вы: ра́дꙋйсѧ, є҆ди́на сла́вы соверше́нїе, и҆ вѣ́чное весе́лїе: ра́дꙋйсѧ, къ тебѣ̀ притека́ющымъ приста́нище и҆ и҆збавле́нїе, и҆ спасе́нїе на́ше.
Тропа́рь, гла́съ и҃:
Бцⷣе приснодв҃о, человѣ́кѡвъ покро́ве, ри́зꙋ и҆ по́ѧсъ пречⷭ҇тагѡ твоегѡ̀ тѣлесѐ, держа́вное гра́дꙋ твоемꙋ̀ ѡ҆бложе́нїе дарова́ла є҆сѝ, безсѣ́меннымъ ржⷭ҇тво́мъ твои́мъ, нетлѣ́нна пребыва́ющи: ѡ҆ тебѣ́ бо и҆ є҆стество̀ ѡ҆бновлѧ́етсѧ и҆ вре́мѧ. тѣ́мже мо́лимъ тѧ̀, ми́ръ гра́дꙋ твоемꙋ̀ дарова́ти и҆ дꙋша́мъ на́шымъ ве́лїю ми́лость.
На ᲂу҆́трени, на Бг҃ъ гдⷭ҇ь, тропа́рь бцⷣы, три́жды.
По а҃ стїхоло́гїи сѣда́ленъ, гла́съ г҃. Подо́бенъ: Красотѣ̀ дѣ́вства:
Красото́ю дѣ́вства твоегѡ̀, прекра́сное сло́во ро́ждши, и҆ сего̀ ри́зою твое́ю, чⷭ҇таѧ, ꙗ҆́кѡ млⷣнца ѡ҆бвила̀ є҆сѝ. сїю̀ ᲂу҆́бѡ дарова́ла є҆сѝ рабѡ́мъ твои̑мъ, влⷣчце, покро́въ, по́мощь и҆ и҆сто́чникъ свѧще́нїѧ. є҆ѧ́же честно́е положе́нїе, прест҃а́ѧ дв҃о, всѝ вѣ́рнѡ пра́зднꙋемъ.
Сла́ва, и҆ ны́нѣ, то́йже:
По в҃ стїхоло́гїи сѣда́ленъ, гла́съ г҃. Подо́бенъ: Красотѣ̀ дѣ́вства:
Ржⷭ҇тво̀ нетлѣ́нно и҆ дѣ́вство, є҆ди́на и҆мѣ́ла є҆сѝ, благослове́ннаѧ: ѡ҆дѣѧ́нїе же человѣ́кѡмъ спаси́тельно, твою̀ ст҃ꙋ́ю ри́зꙋ дарова́ла є҆сѝ, да́же до ны́нѣ нетлѣ́ннѡ пребыва́ющꙋю, бг҃оневѣ́сто. є҆ѧ́же ра́ди ѿ бг҃а прїе́млемъ рабѝ твоѝ, чⷭ҇таѧ, ве́лїю ми́лость.
Сла́ва, и҆ ны́нѣ, то́йже:
Канѡ́ны два̀: пе́рвый со і҆рмосо́мъ на и҃, є҆гѡ́же краегране́сїе:
Ри́зꙋ почита́ю пречⷭ҇тыѧ дв҃ы. Творе́нїе і҆ѡ́сифово.
Гла́съ д҃. Пѣ́снь а҃. І҆рмо́съ:
Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ: да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Ри́зꙋ твою̀ честнꙋ́ю, бцⷣе дв҃о, чтꙋ́щымъ тѧ̀ лю́демъ дарова́ла є҆сѝ при́снѡ, сщ҃е́нное ѡ҆гражде́нїе, всѧ́кое сопроти́вныхъ ѡ҆бстоѧ́нїе всегда̀ побѣжда́ющи си́лою дꙋхо́вною.
Пло́тїю на́съ ра́ди ѿ чи́стыхъ твои́хъ крове́й, ꙗ҆́вльшагѡсѧ на землѝ, ри́зꙋ свѧще́ннꙋю ѡ҆сѧза́нїемъ ѡ҆свѧти́ла є҆сѝ, и҆ тѣлесѐ твоегѡ̀ прикоснове́нїемъ: є҆ѧ́же ра́ди всѧ̑ рабы̑ твоѧ̑ ѡ҆свѧща́еши, дв҃о, пою́щыѧ тѧ̀.
Сокро́вище честно́е вѣ́рнѡ тѧ̀ чтꙋ́щымъ дарова́ла є҆сѝ, блага́ѧ дв҃о, вои́стиннꙋ честнꙋ́ю ри́зꙋ твою̀, всѧ̑ ѡ҆богаща́ющи да̑ры бжⷭ҇твеннагѡ дх҃а и҆ чꙋде́съ мно́гими дѣѧ̑нїи.
Нескве́рнаѧ а҆́гнице, а҆́гнца ро́ждшаѧ бж҃їѧ па́че є҆стества̀, дарова́ла є҆сѝ на́мъ честнꙋ́ю ри́зꙋ твою̀, сквє́рны и҆́стиннѡ и҆ вра̑ски ѡ҆чища́ющꙋю всегда̀, покланѧ́ющихсѧ є҆́й, всенепоро́чнаѧ.
Дрꙋгі́й на д҃. Творе́нїе тогѡ́же.
Гла́съ то́йже. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Свѣща̀ свѣтоѧвле́ннаѧ и҆ незаходи́маѧ, пречⷭ҇тыѧ хра́мъ, ꙗ҆́коже нб҃о свѣ́тлое ѡ҆брѣ́тъ честнꙋ́ю ри́зꙋ є҆ѧ̀, вселе́ннꙋю дне́сь благода́тей просвѣща́етъ зарѧ́ми.
Крѣ́пость и҆ ᲂу҆твержде́нїѧ сою́зъ, твою̀, пречⷭ҇таѧ, ри́зꙋ бжⷭ҇твеннꙋю, вои́стиннꙋ стѧжа́въ гра́дъ тво́й, держа́вꙋ непобѣди́мꙋю и҆́мать, тѣ́мъ и҆ хва́литсѧ ѡ҆ тебѣ̀.
Дре́внѧгѡ ꙗ҆́кѡ вои́стиннꙋ кївѡ́та честнѣ́йшаѧ твоѧ̀ ра́ка, бг҃ороди́тельнице, ꙗ҆ви́сѧ на землѝ, є҆гѡ́же зна́мєнїѧ носѧ́щи, но и҆ вѣ́рныхъ во и҆́стинѣ позна́нїѧ сохранѧ́ющи.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Ꙗ҆́кѡ непло́ды родѝ ѿ ꙗ҆зы̑къ цр҃ковь, и҆ мно́гое въ ча́дѣхъ и҆знемо́же со́нмище, чꙋ́дномꙋ бг҃ꙋ на́шемꙋ возопїи́мъ: ст҃ъ є҆сѝ, гдⷭ҇и.
Кра́сное ѡ҆свѧще́нїе, нбⷭ҇нꙋю две́рь, бж҃їю мт҃рь воспое́мъ, и҆ тоѧ̀ ри́зꙋ бжⷭ҇твєннаѧ точа́щꙋ дарѡва́нїѧ, ю҆́же любо́вїю цѣлꙋ́емъ.
Нетлѣ́нїѧ ѡ҆де́ждею, тлѣ́нїемъ ѡ҆бна́жшыѧсѧ твои́мъ нетлѣ́ннымъ ржⷭ҇тво́мъ, всѣ́хъ ѡ҆дѣ́ѧла є҆сѝ, чⷭ҇таѧ: и҆́мже честнꙋ́ю ри́зꙋ твою̀ дарова́ла є҆сѝ бога́тство неѿе́млемо.
И҆́же ѻ҆́блаки, чⷭ҇таѧ, ѡ҆дѣва́ющаго всѐ нб҃о, ри́зою твое́ю ѡ҆бвила̀ є҆сѝ, пречⷭ҇таѧ. є҆́йже покланѧ́ющесѧ вѣ́рнѡ, тѧ̀ сла́вимъ, покро́ве дꙋ́шъ на́шихъ.
Врачева́нїе безме́здно болѧ́щымъ є҆́сть бжⷭ҇твенный се́й хра́мъ: ри́зꙋ бо твою̀, чⷭ҇таѧ, и҆сто́чникъ непреста́ннѡ точа́щїй и҆сцѣлє́нїѧ стѧжа̀, пренепоро́чнаѧ.
И҆́нъ. І҆рмо́съ:
Весели́тсѧ ѡ҆ тебѣ̀ це́рковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Почита́емъ вѣ́рнїи, ꙗ҆́кѡ совокꙋпле́нїѧ къ бг҃ꙋ сою́зъ, чⷭ҇тыѧ дне́сь ри́зы, вѣ́рнѡ говѣ́юще.
И҆сцѣлє́нїѧ вѣ̑рнымъ многочестна́ѧ на́мъ дне́сь прече́стнѡ чⷭ҇тыѧ ри́за и҆сточа́етъ благода́тїю.
Ꙗ҆́кѡ роса̀ ᲂу҆́треннѧѧ ра́дость твоѧ̀ приснотекꙋ́щаѧ, пе́щь страсте́й, тѧ̀ воспѣва́ющихъ, ᲂу҆ставлѧ́етъ при́снѡ.
Сѣда́ленъ, гла́съ д҃. Подо́бенъ: Вознесы́йсѧ:
Чꙋде́съ рѣ́ки, бцⷣе, ѿ всечестны́ѧ твоеѧ̀ ра́ки происходѧ́щыѧ, ꙗ҆́кѡ и҆зъ є҆де́ма напаѧ́ютъ лицѐ землѝ бл҃года̑ти пролива́ющыѧ, вѣ́рнѡ тѧ̀ чтꙋ́щымъ: тѣ́мже тѧ̀ воспѣва́емъ, и҆ вѣ́рнѡ восхвалѧ́емъ, и҆ благода́рнѡ всегда̀ взыва́емъ: ра́дꙋйсѧ, є҆ди́на наде́жде пою́щихъ тѧ̀.
Сла́ва, и҆ ны́нѣ, то́йже:
Пѣ́снь д҃. І҆рмо́съ:
Любвѐ ра́ди, ще́дре, твоегѡ̀ ѻ҆́браза, на крестѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, человѣколю́бче, крѣ́пость моѧ̀ и҆ хвале́нїе.
Возвели́чимъ є҆ди́нꙋ благослове́ннꙋю, и҆ тоѧ̀ ри́зѣ прико́снемсѧ вѣ́рою: ꙗ҆́кѡ да почерпе́мъ благода́ть дꙋхо́внꙋю.
Ꙗ҆́кѡ многоцѣ́нное сокро́вище стѧжа́въ, тебѐ чтꙋ́щїй гра́дъ, ри́зꙋ твою̀, ѻ҆трокови́це, вѣ́рою ѡ҆блобыза́етъ, и҆ благода́ть прїе́млетъ.
Ри́зꙋ твою̀, ꙗ҆́кѡ точа́щꙋю нетлѣ́нїе, ѻ҆де́ждꙋ же сла́вы бы́вшꙋю, всѣ̑мъ пѣсносло́вѧщымъ тѧ̀, почита́емъ, всенепоро́чнаѧ.
Всенепоро́чнаѧ, и҆ є҆ди́на благослове́ннаѧ, херꙋві̑мъ ст҃ѣ́йши ꙗ҆́вльшисѧ, дꙋ́шы на́съ спасѝ ѿ всѧ́кагѡ ѡ҆бстоѧ́нїѧ, вѣ́рою чтꙋ́щихъ тѧ̀.
И҆́нъ. І҆рмо́съ:
Вознесе́на тѧ̀ ви́дѣвши цр҃ковь на крестѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Ꙗ҆́кѡ пречестнꙋ́ю тве́рдь, бцⷣе, творе́цъ и҆ зижди́тель тѧ̀ водрꙋзи́вый, ꙗ҆́коже ѕвѣзда́ми ᲂу҆краси́ тѧ бжⷭ҇твенными сїѧ̑нїи, и҆́миже ᲂу҆краша́еши концы̀.
Ѿ землѝ на́съ возвлачи́тъ къ нб҃сѝ, бг҃ороди́тельнице, бжⷭ҇твеннаѧ твоѧ̀ ри́за, чⷭ҇таѧ, любо́вїю сеѧ̀ распале́нныхъ те́плѣ: тѣ́мже тѧ̀ сла́вимъ, ꙗ҆́кѡ лꙋ́чшагѡ винꙋ̀.
Сѐ бл҃года́ть неисчерпа́емаѧ, прїиди́те всѝ сокрꙋше́ннымъ се́рдцемъ, почерпи́те бжⷭ҇твєнныѧ то́ки, и҆сточа́ющыѧ незави́стнѡ, ѽ празднолю́бцы, ѿ честны́ѧ ра́ки твоеѧ̀, всепѣ́таѧ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Ты̀, влⷣчце чⷭ҇таѧ, на́мъ твои̑мъ рабѡ́мъ дарова́ла є҆сѝ ᲂу҆твержде́нїе ри́зꙋ и҆ честны́й тво́й поѧ́съ, и҆ бжⷭ҇твенное ѡ҆гражде́нїе.
Ра́й красе́нъ, благово́нїе дх҃а, пречⷭ҇таѧ, и҆спꙋща́ѧй, хра́мъ держа́щїй твою̀ ри́зꙋ показа́сѧ.
Ѡ҆свѧтѝ на́шѧ дꙋ́шы и҆ тѣлеса̀, вѣ́рою ст҃ꙋ́ю твою̀, прест҃а́ѧ, ри́зꙋ почита́ющихъ, ꙗ҆́кѡ прече́стнꙋ.
Хра́мы ны̀ бж҃їѧ въ тѧ̀ все́льшагѡсѧ покажѝ, бцⷣе, въ бжⷭ҇твеннѣмъ хра́мѣ твое́мъ вѣ́рнѡ тѧ̀ блажа́щыѧ.
И҆́нъ. І҆рмо́съ то́йже:
Ты̀, гдⷭ҇и, твою̀ мт҃рь возвели́чилъ є҆сѝ: ты̀ возне́слъ є҆сѝ надъ всѧ̑ вла̑сти мы́слєнныѧ безъ сравне́нїѧ сла́вꙋ є҆ѧ̀.
Бл҃года́ть бж҃їю незави́стнѡ точа́щаѧ, ты̀ є҆сѝ, пречⷭ҇таѧ бцⷣе, ѿ честны́ѧ ра́ки твоеѧ̀, любо́вїю покланѧ́ющымсѧ.
Твое́ю си́лою вѣ́рнїи ца́рїе ѡ҆поѧсꙋ́ютсѧ: тѧ̀ сою́зъ, бцⷣе, тво́й и҆́мать гра́дъ, ри́зою твое́ю почита́етсѧ.
Пѣ́снь ѕ҃. І҆рмо́съ:
Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.
Показа́ла є҆сѝ всѣ́ми црⷭ҇твꙋющемꙋ гра́дꙋ, ро́ждшаѧ цр҃ѧ̀ всѣ́хъ и҆ гдⷭ҇а, ꙗ҆́кѡ нерꙋши́мꙋю стѣ́нꙋ, честнꙋ́ю и҆ ст҃ꙋ́ю ри́зꙋ твою̀.
Ра́дꙋющесѧ дв҃ы благода́ть просла́вимъ, и҆ сеѧ̀ прест҃ꙋ́ю ри́зꙋ почти́мъ: и҆зъ неѧ́же всѧ́ко здра́вїе немѡщны́мъ непреста́ннѡ происхо́дитъ.
Во́дъ тѧ̀ животекꙋ́щїй и҆сто́чникъ вѣ́мы, бцⷣе, и҆ почита́емъ бжⷭ҇твеннꙋю ри́зꙋ твою̀, ѿ неѧ́же и҆сцѣле́нїе всегда̀ вѣ́рнїи почерпа́емъ.
Гдⷭ҇ь съ тобо́ю, бцⷣе, бы́вый, человѣ́ческое себѣ̀ присво́илъ сꙋщество̀, и҆ всѧ́къ вре́дъ чꙋжда́гѡ ѿ негѡ̀ и҆згна́лъ є҆́сть.
И҆́нъ. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Всю́ тѧ па́че є҆стества̀ просла́ви гдⷭ҇ь, всю̀ ᲂу҆краси́въ, ѻ҆трокови́це, всю́ тѧ почтѐ па́че сло́ва, бцⷣе, съ по́ѧсомъ, ри́зою и҆ бжⷭ҇твенною ра́кою.
Крѣ́пость тѧ̀ вѣ́рнїи стѧжа́вше, и҆ похвалꙋ̀, ѡ҆дѣва́ютсѧ сла́вою, честно́ю твое́ю ри́зою, бг҃ороди́тельнице, ꙗ҆́коже пресвѣ́тлое ᲂу҆краше́нїе и҆ честно́е тѧ̀ стѧжа́вше.
Ви́дѣти твою̀, бцⷣе, сла́вꙋ неизрече́ннꙋю, дре́вле болѣ́зновахꙋ бжⷭ҇твеннѣ прⷪ҇ро́цы всѝ: но въ послѣ̑днѧѧ дни̑ на́мъ ꙗ҆ви́сѧ, и҆́же лѣ́тъ превы́шшїй.
Конда́къ, гла́съ д҃. Подо́бенъ: Вознесы́йсѧ:
Ѡ҆дѣѧ́нїе всѣ̑мъ вѣ̑рнымъ нетлѣ́нїѧ, бг҃облагода́тнаѧ чⷭ҇таѧ, дарова́ла є҆сѝ, свѧще́ннꙋю ри́зꙋ твою̀, є҆́юже свѧще́нное тѣ́ло твоѐ покрыва́ла є҆сѝ, покро́ве всѣ́хъ человѣ́кѡвъ. є҆ѧ́же положе́нїе пра́зднꙋемъ любо́вїю, и҆ вопїе́мъ со стра́хомъ тѝ, чⷭ҇таѧ: ра́дꙋйсѧ, дв҃о, хрⷭ҇тїа́нъ похвало̀.
І҆́косъ:
Чи́стое ѡ҆дѣѧ́нїе, и҆ ски́нїю бж҃їѧ сло́ва, ѡ҆дꙋшевле́нный ѻ҆́блакъ, и҆ ста́мнꙋ ма́нны, бцⷣꙋ марі́ю, всѝ спа́сшїисѧ ржⷭ҇тво́мъ є҆ѧ̀ вѣ́рою ᲂу҆блажи́мъ: и҆ честнѣ́й ри́зѣ прико́снемсѧ, є҆́юже влⷣкꙋ ѡ҆б̾е́мши, ꙗ҆́кѡ ѻ҆троча̀ носи́ла є҆́сть, въ пло́ть ѡ҆бо́лкшагосѧ: є҆гѡ́же ра́ди человѣ́ческое є҆стество̀ взѧ́тсѧ ко превысоча́йшей жи́зни и҆ црⷭ҇твїю. тѣ́мже съ ра́достїю вопїе́мъ велегла́снѡ: ра́дꙋйсѧ, дв҃о, хрⷭ҇тїа́нъ похвало̀.
Пѣ́снь з҃. І҆рмо́съ:
А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
Высо́кимъ ра́зꙋмомъ, и҆ смире́ннымъ се́рдцемъ цр҃е́въ превысо́кїй прⷭ҇то́лъ просла́вимъ, всест҃ꙋ́ю ѻ҆трокови́цꙋ ѡ҆бра́дованнꙋю.
Черто́гъ бж҃їй и҆збра́нный, въ честнѣ́мъ твое́мъ се́мъ черто́зѣ лежа́щꙋю ри́зꙋ твою̀ вѣ́рою почита́емъ, ꙗ҆́кѡ кївѡ́тъ ст҃ъ, и҆ благочести́выхъ покро́въ.
Ѡ҆бновлѧ́етсѧ всѧ́къ пристꙋпа́ѧй вѣ́рою, и҆ свѧты́й ѡ҆блобыза́ѧй ковче́гъ, держа́щїй твою̀, чⷭ҇таѧ дв҃о, свѣтови́днꙋю ри́зꙋ.
Бг҃ороди́тельнице чⷭ҇таѧ, чтꙋ́щїй тѧ̀ гра́дъ гла́да, трꙋ́са же и҆ ѡ҆ѕлобле́нїѧ всѧ́кагѡ спаса́й, и҆ ꙗ҆зы́ческагѡ нахожде́нїѧ, и҆ сопроти́внагѡ вре́да.
И҆́нъ. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ты̀, ꙗ҆́коже со́лнце пра́вды є҆ди́нъ сы́й, бла́же, бжⷭ҇твеннѡ ᲂу҆краси́лъ є҆сѝ хра́мъ чⷭ҇тыѧ разли́чными твои́ми дарова̑нїи, въ не́мже возсїѧ́вшыѧ лꙋчы̀ и҆спꙋща́етъ ѿ сеѧ̀ ри́зы.
И҆злива́ютъ чꙋдеса̀, пречⷭ҇таѧ, бжⷭ҇твєнныѧ ча́шы твоѧ̑, благода́ть вои́стиннꙋ вѣ̑рнымъ: и҆ незави́стнѡ чтꙋ́щымъ тѧ̀ ѿ твоеѧ̀ ра́ки пролива́ютсѧ, ꙗ҆́кѡ и҆зъ дрꙋга́гѡ є҆де́ма, мы́слєнныѧ рѣ́ки.
Ѿ скве́рны всѧ́кїѧ дꙋше́вныѧ чисти́тельна є҆́сть твоѧ̀, всенепоро́чнаѧ дв҃о, ра́ка, покрыва́ющаѧ честно́е твоѐ тѣ́ло покры́вшею ри́зою.
Ны́нѣ пристꙋпи́те съ весе́лїемъ всѝ, и҆̀же на землѝ, прїиди́те, ра́ка призыва́етъ та́йнѣ, ѡ҆б̾ѧ́ти гпⷭ҇жѝ пресла́внꙋю во мнѣ̀ сокро́виществованнꙋю ри́зꙋ є҆ѧ̀.
Пѣ́снь и҃. І҆рмо́съ:
И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ благослови́те, по́йте гдⷭ҇а.
Благода́рными гла̑сы воспѣва́емъ тѧ̀, всѣ́хъ до́брыхъ на́мъ хода́таицꙋ, и҆ честнꙋ́ю ри́зꙋ твою̀ ѡ҆блобыза́юще, ѻ҆трокови́це, взыва́емъ: благослови́те, всѧ̑ дѣла̀ гдⷭ҇нѧ, гдⷭ҇а.
Ꙗ҆́кѡ мы́сленнꙋю свѣщꙋ̀ и҆мꙋ́ще, на свѣ́щницѣ трапе́зы предлежа́щꙋю, свѧще́ннꙋю ѻ҆де́ждꙋ пречи́стыѧ дв҃ы, сердє́чныѧ просвѣща́емъ зѣ̑ницы всегда̀.
Ника́коже безча́стны ѡ҆ста́вила є҆сѝ, свѧще́ннагѡ твоегѡ̀, дв҃о, прикоснове́нїѧ недостѡ́йныѧ рабы̑ твоѧ̑: вмѣ́стѡ бо тѣ́ла твоегѡ̀ живоно́снагѡ, ри́зꙋ твою̀ всѣ̑мъ дарова́ла є҆сѝ.
Пѣ́сньми бжⷭ҇твенными почти́мъ бж҃їе селе́нїе простра́нное, въ мт҃рехъ пречи́стꙋю, нбⷭ҇нꙋю две́рь, є҆́юже заключи́сѧ къ сме́рти две́рь ведꙋ́щаѧ.
И҆́нъ. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
А҆́гг҃ли, пречⷭ҇таѧ, ны́нѣ сликовствꙋ́ютъ въ честнѣ́мъ хра́мѣ твое́мъ, чⷭ҇таѧ, и҆ ѡ҆крꙋжа́ютъ, влⷣчце, честнꙋ́ю и҆ свѧтꙋ́ю твою̀ ри́зꙋ любо́вїю и҆ ра́достїю: мы́ же весе́лїемъ мно́гимъ покланѧ́емсѧ, воспѣва́юще тѧ̀ сла́вꙋ ро́да на́шегѡ.
Же́злъ, ꙗ҆́же цвѣ́тъ жи́зни прозѧ́бшїй, ты̀ є҆сѝ всѣ́хъ ра́дость многочестна́ѧ, пречⷭ҇таѧ, мѷрополо́жница дх҃а, сокро́вище благи́хъ, а҆рѡма́тъ и҆сто́чникъ, и҆зъ негѡ́же мѵ̑ра и҆сцѣле́нїй и҆сточа́етъ бжⷭ҇твеннаѧ ра́ка.
Воспѣва́ютъ, пречⷭ҇таѧ, вели̑чїѧ твоѧ̑, чⷭ҇таѧ, мы́слєннаѧ вѡ́инства: проповѣ́даютъ всѝ патрїа́рси и҆ прⷪ҇ро́цы ꙗ҆́снѡ, и҆ а҆пⷭ҇ли сїѧ̑, и҆ мꙋ́ченикѡвъ ли́къ, и҆ прпⷣбныхъ всѐ и҆сполне́нїе: съ ни́миже покланѧ́емтисѧ.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.
Се́ тѧ ѻ҆́дръ соломѡ́новъ почита́емъ ра́достными пѣ́сньми, и҆ честнꙋ́ю твою̀ ри́зꙋ, ꙗ҆́кѡ дрꙋгі́й кївѡ́тъ свѧще́нїѧ ѡ҆крꙋжи́вше, и҆сцѣлє́нїѧ прїе́млемъ спаси́тєльнаѧ, приснодв҃о.
Ꙗ҆ви́сѧ ны́нѣ бжⷭ҇твеннаѧ твоѧ̀ ра́ка, содержа́щаѧ ри́зꙋ твою̀ честнꙋ́ю, ꙗ҆́коже и҆сто́чникъ свѣ́та, дв҃о, лꙋчы̀ и҆сцѣле́нїй и҆спꙋща́ющи, и҆ тмꙋ̀ недꙋ́гѡвъ ѿгонѧ́щи, ю҆́же съ любо́вїю цѣлꙋ́емъ.
Дне́сь сра́дꙋютсѧ на́мъ, всенепоро́чнаѧ, покланѧ́нїемъ ри́зы твоеѧ̀, всѧ̑ нбⷭ҇ныѧ си̑лы, а҆пⷭ҇толи, прⷪ҇ро́цы и҆ мꙋ́чєницы, прпⷣбнїи и҆ пра́веднїи всѝ, влⷣчце є҆ди́на приснодв҃о.
Ѡ҆ст҃и́сѧ всѧ̀ землѧ̀ всест҃а́гѡ влⷣчнѧ поко́ища положе́нїемъ ри́зы твоеѧ̀, и҆ дв҃дъ ра́дꙋетсѧ дре́вле положе́нїемъ кївѡ́та, проѡбразꙋ́ющагѡ тѧ̀, приснодв҃о.
Свѣ́тло ѡ҆дѣѧ́нїе твою̀ ри́зꙋ дарова́ла є҆сѝ, и҆ ѡ҆гражде́нїе тѧ̀ чтꙋ́щемꙋ ца́рствꙋющемꙋ гра́дꙋ всѣ́хъ градѡ́въ, ꙗ҆́кѡ цр҃и́ца всѣ́хъ тва́рей сꙋ́щи, бг҃ороди́тельнице мт҃и дв҃о.
И҆́нъ. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Черто́гъ пречестны́й се́й, бг҃ороди́тельнице, ꙗ҆ви́сѧ ра́ка твоѧ̀, честнꙋ́ю твою̀ ри́зꙋ, дѣ́вственное же ѡ҆дѣѧ́нїе, и҆ невѣ́стническое ꙗ҆́кѡ и҆мꙋ́щи, и҆ ꙗ҆́кѡ жи́зни сокро́вище соблюда́ющи.
Хра́мъ и҆з̾ѡбража́ющїй всѧ́ко нбⷭ҇ное благоꙋкраше́нїе дв҃ы, дне́сь вѣ́рнїи дости́гше, чꙋде́съ зарѧ́ми ꙗ҆́коже ѕвѣзда́ми сїѧ́емъ, и҆ ѡ҆зарѧ́емсѧ благода́тїю.
И҆́мать ст҃ы́й тво́й по́ѧсъ, и҆ чⷭ҇тнꙋ́ю твою̀ ри́зꙋ, бг҃ороди́тельнице, тво́й гра́дъ ꙗ҆́кѡ стѣ́нꙋ, и҆ ᲂу҆че́нїй бж҃е́ственныхъ соедине́нїе, и҆ правосла́вныхъ похвалꙋ̀, и҆ во́инствꙋ побѣди́тєльнаѧ.
Пое́мъ неизрече́ннꙋю сла́вꙋ, и҆ безчи́сленнꙋю твою̀ бл҃года́ть: ты́ бо є҆сѝ и҆сто́чникъ премꙋ́дрости, и҆зъ негѡ́же сло́во всѣ̑мъ происхо́дитъ, чтꙋ́щымъ тѧ̀, пречⷭ҇таѧ, и҆ велича́ющымъ ржⷭ҇тво̀ твоѐ.
Свѣти́ленъ. Подо́бенъ: Свѣ́те неизмѣ́нне:
Ѡ҆крили́вшꙋю хрⷭ҇та̀ ри́зꙋ бг҃оѻтрокови́цы, и҆ бцⷣы марі́и, дне́сь прїиди́те земноро́днїи, почти́мъ пѣ́сньми, ꙗ҆́кѡ да благода́тїю сеѧ̀ при́снѡ ᲂу҆блажа́емсѧ.
Сла́ва, и҆ ны́нѣ:
Є҆ди́на и҆ є҆стество̀ и҆ вре́мѧ ѡ҆бнови́ла є҆сѝ, бг҃ома́ти: нетлѣ́нно бо твоѐ ржⷭ҇тво̀, нетлѣ́ннаѧ и҆ ри́за, є҆́юже гра́дъ тво́й покрыва́еши, и҆ є҆́юже ски́петры благоче́стїѧ содержи́ши.
На хвали́техъ стїхи̑ры на д҃, гла́съ д҃. Подо́бенъ: Ꙗ҆́кѡ до́блѧ:
Ра́ка содержа́щаѧ ри́зꙋ твою̀, пречⷭ҇таѧ, ꙳ кївѡ́тъ ѡ҆свѧще́нїѧ рабѡ́мъ твои̑мъ, ꙳ и҆ свѧще́нное ѡ҆гражде́нїе, ꙳ и҆ сла́ва и҆ похвала̀, ꙳ и҆ и҆сцѣле́нїй и҆сто́чникъ ꙳ на всѧ́къ де́нь познава́етсѧ. ꙳ и҆дѣ́же дне́сь свѧще́ннѡ собра́вшесѧ, ꙳ воспѣва́емъ мнѡ́гаѧ твоѧ̑ вели̑чїѧ, ꙳ и҆ чꙋде́съ пꙋчи́нꙋ.
Два́жды.
Сѐ мѣ́сто пресла́вно, ꙳ сѐ до́мъ присносвѣ́телъ, ꙳ въ не́мже сокро́вище положи́сѧ, ꙳ честна́ѧ ри́за бг҃оѻтрокови́цы благода́тїю, ꙳ пристꙋпи́те человѣ́цы, ꙳ просвѣще́нїе и҆ ѡ҆чище́нїе и҆зъ неѧ̀ проѧвле́ннѣ почерпи́те, ꙳ и҆ возопі́йте благода́рнымъ се́рдцемъ: ꙳ прест҃а́ѧ дв҃о, благослови́мъ тѧ̀, ꙳ спаса́еми ржⷭ҇тво́мъ твои́мъ.
Ст҃о́е положе́нїе ри́зы твоеѧ̀, влⷣчце, ꙳ пра́здникъ стѧжа́хомъ веселѧ́щесѧ, ꙳ ꙗ҆́кѡ гра́дꙋ твоемꙋ̀ дне́сь да́тисѧ сподо́биласѧ є҆сѝ ꙳ свѧще́нное ѡ҆дѣѧ́нїе, ꙳ храни́лище некра́домо, ꙳ да́ръ че́стенъ, ꙳ неѿе́млемо бога́тство, ꙳ и҆сцѣле́нїй рѣка̀, ꙳ и҆спо́лнена дарова́нїй дꙋхо́вныхъ.
Сла́ва, и҆ ны́нѣ, гла́съ в҃:
Смы́слъ ѡ҆чи́стивше и҆ ᲂу҆́мъ, со а҆́гг҃лы и҆ мы̀ торжествꙋ́емъ, свѣ́тлѡ начина́юще дв҃дскꙋю пѣ́снь ѻ҆трокови́цѣ, невѣ́стѣ всѣ́хъ цр҃ѧ̀ хрⷭ҇та̀ бг҃а на́шегѡ, воскрⷭ҇нѝ, гдⷭ҇и, глаго́люще, въ поко́й тво́й, ты̀, и҆ кївѡ́тъ ст҃ы́ни твоеѧ̀: ꙗ҆́кѡ бо пала́тꙋ краснꙋ̀ сїю̀ ᲂу҆краси́въ, и҆ причтѐ ю҆̀ гра́дꙋ твоемꙋ̀, влⷣко, стро́ити и҆ покрыва́ти ѿ сꙋпоста́тныхъ пога̑нъ, держа́вною си́лою твое́ю, моли́твами є҆ѧ̀.
Славосло́вїе вели́кое. И҆ ѿпꙋ́стъ.
На лїтꙋргі́и, бл҃жє́нна, пѣ́снь г҃ и҆ ѕ҃ Прокі́менъ, гла́съ г҃, пѣ́снь бцⷣы: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: А҆пⷭ҇лъ ко є҆вре́ємъ, зача́ло т҃к. А҆ллилꙋ́їа, гла́съ и҃: Воскреснѝ, гдⷭ҇и, въ поко́й тво́й: Є҆ѵⷢ҇лїе лꙋкѝ, зача́ло н҃д. Прича́стенъ: Ча́шꙋ спасе́нїѧ прїимꙋ̀:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.