← претходни дан | Минеј — Јун | следећи дан →
11 июня: Апостолов Варфоломея и Варнавы
Мѣ́сѧца тогѡ́же въ а҃і-й де́нь.
Ст҃ы́хъ а҆пⷭ҇лъ, варѳоломе́а и҆ варна́вы.
На вече́рни пое́мъ, Бл҃же́нъ мꙋ́жъ: а҃-й а҆нтїфѡ́нъ.
На Гдⷭ҇и, воззва́хъ, стїхи̑ры на и҃, гла́съ д҃. Подо́бенъ: Ꙗ҆́кѡ до́блѧ:
Мре́жею слове́съ твои́хъ, ꙳ бг҃оглаго́ливе а҆пⷭ҇ле, ꙳ и҆зъ глꙋбины̀ возве́лъ є҆сѝ сꙋ́етства, ꙳ и҆ лю́тагѡ безбо́жїѧ, ꙳ мїрскі̑ѧ концы̀: ꙳ и҆ приве́лъ є҆сѝ хрⷭ҇тꙋ̀ бг҃ꙋ вѣ́рою, ꙳ таковꙋ́ю тебѣ̀ бл҃года́ть пода́вшемꙋ, ꙳ ꙗ҆́кѡ бж҃е́ственнꙋ ᲂу҆ченикꙋ̀ и҆ тайноглаго́льникꙋ, ꙳ варѳоломе́е а҆пⷭ҇ле.
Два́жды.
Сл҃нце сла́вы тѧ̀ і҆и҃съ бг҃ъ на́шъ, ꙳ ꙗ҆́кѡ лꙋчꙋ̀, пресла́вне, посла̀ ꙳ въ мїрска̑ѧ и҆сполнє́нїѧ, ꙳ крѣ́пкѡ ѿгонѧ́щꙋю безбо́жїѧ мглꙋ̀, ꙳ и҆ просвѣща́ющꙋю всѣ́хъ, ꙳ во тмѣ̀ невѣ́дѣнїѧ сѣдѧ́щихъ: ꙳ и҆̀хже наслѣ́дники содѣ́ла свѣ́та, ꙳ варѳоломе́е бг҃омꙋ́дре.
Два́жды.
Повинꙋ́ѧсѧ манове́нїємъ, ꙳ є҆гѡ́же манове́нїю всѧ́чєскаѧ повинꙋ́ютсѧ: ꙳ семꙋ́ же подо́бѧсѧ ꙳ ꙗ҆́кѡ пра́вды ᲂу҆чи́телю, ꙳ ча́шꙋ сме́рти стрⷭ҇ти ра́ди крⷭ҇тныѧ, ꙳ ра́дꙋѧсѧ и҆спи́лъ є҆сѝ, ꙳ и҆ предстои́ши жела́нїй кра́йнемꙋ, ꙳ а҆́гг҃лѡмъ и҆ а҆пⷭ҇лѡмъ сликовствꙋ́ѧ, ꙳ варѳоломе́е сла́вне.
И҆́ны стїхи̑ры а҆пⷭ҇ла варна́вы, гла́съ то́йже.
Подо́бенъ: Да́лъ є҆сѝ зна́менїе:
Прїѧ́лъ є҆сѝ, а҆пⷭ҇ле, ꙳ на де́мѡны непобѣди́мꙋю вла́сть и҆ си́лꙋ, ꙳ ѡ҆ и҆́мени хрⷭ҇то́вѣ, ꙳ нача̑ла тмы̀ ѿгонѧ́ти, ꙳ проше́лъ є҆сѝ зе́млю, ꙳ просвѣща́ѧ ꙗ҆́коже со́лнце, ꙳ и҆ въ ри́мъ сла́вный прише́дъ, ꙳ пе́рвѣе, сла́вне, хрⷭ҇то́во проповѣ́далъ є҆сѝ ꙳ спаси́тельное прише́ствїе.
Пе́рвѣй бла́гости, ꙳ и҆ є҆сте́ственномꙋ, и҆ пребж҃е́ственномꙋ ꙳ житїю̀ подо́бѧсѧ, ꙳ мꙋ́жъ бы́лъ є҆сѝ бла́гъ, ꙳ варна́во, по сꙋществꙋ̀, ꙳ и҆ ᲂу҆тѣше́нїѧ сы́нъ подо́бїемъ и҆менꙋ́емь, ꙳ нра́вѡвъ твои́хъ бла́гостїю, ꙳ и҆ ᲂу҆ма̀ чистото́ю, ꙳ хрⷭ҇то́въ показа́лсѧ є҆сѝ ᲂу҆чени́къ и҆́скреннїй.
Ѻ҆рга́нъ до́брѣ соста́вленъ, ꙳ дѣ́ланїемъ дх҃о́внымъ, варна́во, бы́лъ є҆сѝ, ꙳ ꙗ҆зы́кѡмъ зва́нїю ты̀ ввѣ́рилсѧ є҆сѝ, ꙳ къ позна́нїю хрⷭ҇то́вꙋ наставлѧ́ѧ, ꙳ словесы̀ и҆ дѣѧ̑нїи, ꙳ и҆ всѧ̑ просвѣти́лъ є҆сѝ, ꙳ и҆сповѣ́дати и҆́стинное ꙳ і҆и҃сово бжⷭ҇тво̀, ꙳ сп҃са дꙋ́шъ на́шихъ.
Сла́ва, гла́съ ѕ҃. Вѷзанті́ево.
Варна́во прехва́льне, блиста́ющїй сосꙋ́де ст҃а́гѡ дх҃а, ꙗ҆́кѡ сы́нъ ᲂу҆тѣше́нїѧ, и҆́же пре́жде па́ѵла, седми́десѧтимъ ᲂу҆ченикѡ́мъ бы́въ ве́рхъ и҆ съ па́ѵломъ па́ки проповѣ́давъ є҆ѵⷢ҇лїе концє́мъ. тѣ́мже и҆ бл҃года́ти сло́во дѣ́лы и҆спо́лнивъ, себѐ прине́слъ є҆сѝ всепло́дїе чи́сто ᲂу҆чи́телю твоемꙋ̀ хрⷭ҇тꙋ̀: молѝ всегда̀, а҆пⷭ҇ле сла́вне, въ ми́рѣ спасти́сѧ дꙋша́мъ на́шымъ, мо́лимсѧ.
И҆ ны́нѣ, пра́здника, и҆лѝ бг҃оро́диченъ: Кто̀ тебє̀ не ᲂу҆блажи́тъ:
Вхо́дъ. Прокі́менъ днѐ: Чтє́нїѧ трѝ. И҆щѝ сегѡ̀ мцⷭ҇а въ к҃ѳ де́нь.
На стїхо́внѣ стїхи̑ры пра́здника: а҆́ще ли по́стъ, стїхи̑ры а҆пⷭ҇лѡвъ, гла́съ а҃. Подо́бенъ: Всехва́льнїи мꙋ́чєницы:
Во всю̀ зе́млю и҆зы́де ꙳ ва́ше спаси́тельное вѣща́нїе, ꙳ бг҃ови́дцы а҆пⷭ҇ли, и҆ просвѣтѝ дꙋ́шы заблꙋ́ждшыѧ, ꙳ и҆ хрⷭ҇тꙋ̀ приведѐ человѣ́ки ꙳ просвѣщє́нныѧ благода́тїю. ꙳ тѣ́мже моли́те, ꙳ дарова́ти дꙋша́мъ на́шымъ ми́ръ ꙳ и҆ ве́лїю ми́лость.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Свѣти́льницы пресвѣ́тлїи хрⷭ҇тѡ́вы, ꙳ сосꙋ́ди честнѣ́йшїи, ꙳ зарю̀ дх҃а премꙋ́дрїи вѣ́рою вмѣсти́вшїи, ꙳ цр҃ко́внїи столпѝ, ꙳ нб҃са̀ пресла̑внаѧ, ꙳ бж҃їю сла́вꙋ возвѣща́ющаѧ. ꙳ того̀ моли́те, ꙳ дарова́ти дꙋша́мъ на́шымъ ми́ръ ꙳ и҆ ве́лїю ми́лость.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Ꙗ҆зы́ки приведо́сте ꙳ хрⷭ҇тꙋ̀ бг҃ꙋ, бл҃же́ннїи, ꙳ и҆зба́влєнныѧ кро́вїю ꙳ на землѝ роди́тисѧ бл҃говоли́вшагѡ, ꙳ и҆ крⷭ҇тъ и҆ сме́рть ꙳ во́лею претерпѣ́вшагѡ, сла́внїи, ꙳ є҆го́же ны́нѣ моли́те, ꙳ дарова́ти дꙋша́мъ на́шымъ ми́ръ ꙳ и҆ ве́лїю ми́лость.
Сла́ва, гла́съ и҃:
А҆пⷭ҇толе сп҃совъ, варна́во прехва́льне, прїѧ́телище вѣ́ры, сы́не ᲂу҆тѣше́нїѧ, тишино̀ ѡ҆бꙋрева́емыхъ, непреста́ннѡ въ па́мѧти твое́й дерзнове́нїе и҆мѣ́ѧ, молѝ, въ ми́рѣ сохрани́тисѧ дꙋша́мъ на́шымъ.
И҆ ны́нѣ, пра́здника, и҆лѝ бг҃оро́диченъ: Безневѣ́стнаѧ дв҃о:
Тропа́рь, гла́съ г҃:
А҆пⷭ҇ли ст҃і́и, моли́те ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
На ᲂу҆́трени, на Бг҃ъ гдⷭ҇ь, тропа́рь а҆по́столѡвъ, два́жды.
Сла́ва, и҆ ны́нѣ: Тѧ̀ хода́тайствовавшꙋю:
По а҃-й каѳі́смѣ, сѣда́ленъ, гла́съ а҃. Подо́бенъ: Гро́бъ тво́й:
Ли́къ дꙋхо́вный а҆пⷭ҇льскїй, мі́рꙋ посла́сѧ та́йнѡ, ѿ бг҃а вы́шнѧгѡ: и҆ нево́лею стра́ждꙋщымъ вра́чеве ꙗ҆ви́шасѧ, трїѷпоста́снаго є҆ди́нственнѣ призыва́юще, бжⷭ҇твенное воплоще́нїе є҆мманꙋ́ила гдⷭ҇а, мꙋ́дрѣ написа́ша.
Два́жды.
Сла́ва, и҆ ны́нѣ, бг҃оро́диченъ:
Кꙋпинꙋ̀, ю҆́же мѡѷсе́й неѡпали́мꙋ ви́дѣ, го́рꙋ бж҃їю, ст҃ы́й ѻ҆́блакъ, сѣ́нь нескве́рнꙋю, бг҃опрїѧ́тнꙋю трапе́зꙋ, пала́тꙋ высо́кагѡ цр҃ѧ̀, всесвѣ́тлꙋю и҆ непроходи́мꙋю две́рь, дв҃о, пое́мъ тѧ̀.
По в҃-й каѳі́смѣ, сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Свѣтолꙋ́чными сїѧ̑нїи, ꙗ҆́кѡ ѕвѣ́зды земны̑ѧ концы̀ просвѣща́ете, бг҃оꙋчє́нїи ст҃а́гѡ проповѣ́данїѧ, нбⷭ҇нїи таи́нницы гдⷭ҇ни а҆пⷭ҇ли.
Два́жды.
Сла́ва, и҆ ны́нѣ, бг҃оро́диченъ:
Те́плое застꙋпле́нїе сꙋ́щымъ въ нꙋ́ждахъ на́шꙋ по́мощь и҆ къ бг҃ꙋ премѣне́нїе, є҆ѧ́же ра́ди тлѝ и҆зба́вихомсѧ, бцⷣꙋ вѣ́рнїи ᲂу҆блажа́емъ.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Мре́жею сло́ва возве́дъ, и҆зъ глꙋбины̀ неразꙋ́мїѧ бг҃олѣ́пнѡ, ꙗ҆зы́ки приве́лъ є҆сѝ вѣ́рою, и҆ ꙗ҆́кѡ и҆сто́чникъ сы́й во́дъ дх҃о́вныхъ, вселе́ннꙋю всю̀ напои́лъ є҆сѝ бл҃года́тїю. тѣ́мже и҆ спа́сшїисѧ тобо́ю, бг҃огла́се, ꙗ҆́кѡ дрꙋ́га тѧ̀ бли́жнѧго хрⷭ҇то́ва ᲂу҆блажа́емъ, варѳоломе́е, вопїю́ще тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Степє́нна, а҃-й а҆нтїфѡ́нъ, д҃-гѡ гла́са. Прокі́менъ, гла́съ д҃: Во всю̀ зе́млю и҆зы́де вѣща́нїе и҆́хъ: Сті́хъ: Нб҃са̀ повѣ́даютъ сла́вꙋ бж҃їю: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з.
По н҃-мъ ѱалмѣ̀, стїхи́ра, гла́съ а҃:
Во всю̀ зе́млю и҆зы́де ва́ше спаси́тельное вѣща́нїе, бг҃ови́дцы а҆пⷭ҇ли, и҆ просвѣтѝ дꙋ́шы заблꙋ́ждшыѧ, и҆ хрⷭ҇тꙋ̀ приведѐ человѣ́ки просвѣщє́нныѧ бл҃года́тїю. тѣ́мже моли́те, дарова́ти дꙋша́мъ на́шымъ ми́ръ и҆ ве́лїю ми́лость.
Канѡ́нъ бцⷣы со і҆рмосо́мъ на ѕ҃: и҆ а҆пⷭ҇лѡвъ два̀ на и҃.
Канѡ́нъ ст҃а́гѡ а҆пⷭ҇ла варѳоломе́а:
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.
Провѣ́децъ всѣ́хъ и҆ бг҃ъ, ᲂу҆ма̀ твоегѡ̀ бг҃ови́днѡ зрѧ̀ и҆збра̀, и҆ тѧ̀ сочета̀ ли́кꙋ а҆пⷭ҇льскꙋ, варѳоломе́е всехва́льне, бл҃года́тїю просвѣти́въ се́рдце твоѐ.
Добродѣ́телей на высотꙋ̀ возше́дъ, ѧ҆зы́комъ ѻ҆гнедохнове́ннымъ, ѻ҆гневи́днѡ раздѣле́нїемъ ѡ҆богати́лсѧ є҆сѝ, ꙗ҆́кѡ хрⷭ҇то́въ а҆пⷭ҇лъ, прише́ствїемъ ᲂу҆тѣ́шителѧ, пребога́те, нече́стїѧ хвра́стїе поѧда́ѧ и҆ неразꙋ́мїѧ.
Бг҃оно́сенъ ᲂу҆́гль вои́стиннꙋ, бжⷭ҇твеннагѡ дх҃а заре́ю разжже́нъ показа́лсѧ є҆сѝ, пре́лести сѣ́но попалѧ́ѧ, варѳоломе́е прехва́льне, и҆ просвѣща́ѧ вѣ́рою сердца̀ пою́щихъ тѧ̀.
Бг҃оро́диченъ:
Чи́стаѧ, рцы̀, ка́кѡ дои́ши; ка́кѡ же мт҃и была̀ є҆сѝ, дѣ́вствеными печа́тьми сїѧ́ющи; не пыта́й бе́здны, неприча́стна є҆стество́мъ, и҆спыта́ѧй є҆ди́нъ всѣ́хъ бг҃ъ и҆ гдⷭ҇ь, є҆го́же и҆ пло́тїю роди́хъ.
И҆́нъ канѡ́нъ ст҃а́гѡ варна́вы. Гла́съ и҆ і҆рмо́съ то́йже.
Ꙗ҆́кѡ мꙋ́жъ сы́й бл҃гъ, и҆ ᲂу҆тѣше́нїѧ сы́нъ ꙗ҆́вльсѧ, дꙋшѝ моеѧ̀ ѡ҆ѕлобле́нїе, и҆ грѣха̀ дꙋшегꙋ́бнꙋю печа́ль ѿженѝ, ꙗ҆́кѡ да, весе́лїѧ и҆спо́лненъ бы́въ, воспою́ тѧ.
Ѡ҆держи́мь, бл҃же́нне, чи́стымъ сїѧ́нїемъ, прозѧ́бшаго ѿ колѣ́на і҆ꙋ́дова, пребога́те, хрⷭ҇та̀ всецр҃ѧ̀, ѿ леѵі́тска сро́дства прише́дша свѧще́нна, зако́на же преложе́нїе проповѣ́далъ є҆сѝ.
Свѣ́тлаѧ твоѧ̀, премꙋ́дре, жи́знь, пе́рвыѧ бла́гости, и҆ є҆сте́ственнагѡ сꙋщества̀, показа̀ бг҃а тѧ̀ втора́го, є҆́же ѿтꙋ́дꙋ ᲂу҆блажа́ема бл҃года́тьми, сла́вне варна́во, порожде́нїе бжⷭ҇твеннагѡ ᲂу҆тѣше́нїѧ.
Бг҃оро́диченъ:
Ѻ҆трокови́цъ бжⷭ҇твенный ли́къ, бжⷭ҇твеннѡ въ жена́хъ тѧ̀ до́брꙋю воспѣва́етъ, бцⷣе влⷣчце, добро́тами ᲂу҆кра́шенꙋ бжⷭ҇тва̀: добротвори́тельное бо сло́во, па́че сло́ва, родила̀ є҆сѝ.
Катава́сїа по ᲂу҆ста́вꙋ.
Пѣ́снь г҃. І҆рмо́съ:
Процвѣла̀ є҆́сть пꙋсты́нѧ ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.
Ꙗ҆́кѡ до́ждь нбⷭ҇ный, и҆зсо́хшꙋю, премꙋ́дре, вселе́ннꙋю всю̀ тмо́ю безбо́жїѧ, напои́лъ є҆сѝ, бг҃ови́дче досточꙋ́дне.
И҆сто́чникъ и҆зы́де спаси́тельнагѡ пи́ва, варѳоломе́е всечⷭ҇тне, и҆ многосꙋгꙋ́бъ пло́дъ прине́слъ є҆сѝ ꙗ҆зы́кѡмъ спасе́нїѧ, досточꙋ́дне.
Со́лїю бл҃года́ти і҆́дѡльское ᲂу҆ста́вилъ є҆сѝ гное́нїе, всемꙋ́дре, сла́дкимъ сло́вомъ вѣ́ры, сердца̀ ᲂу҆слажда́ѧ чтꙋ́щихъ тѧ̀.
Бг҃оро́диченъ:
Є҆ди́нꙋ дв҃ꙋ тѧ̀ и҆ мт҃рь чти́мъ, ꙗ҆́кѡ спасе́нїѧ хода́таицꙋ бы́вшꙋю на́мъ, непоро́чнаѧ, и҆ мі́ръ и҆збавлѧ́ющꙋю моли́твами твои́ми.
И҆́нъ. І҆рмо́съ то́йже.
Ѻ҆́блакъ во́льный на́мъ до́ждь носѧ́щїй ѿ и҆сто́чника бл҃года́ти, ви́дѣнъ бы́лъ є҆сѝ, варна́во сла́вне, и҆ пи́щный пото́къ напаѧ́ющїй.
Разли́чными ѡ҆дарова́на сїѧ̑нїи, ви́дѧщи всеси́льнагѡ дх҃а вла́сть, та́йнамъ хрⷭ҇тѡ́вымъ слꙋжи́телѧ, ѿлꙋчѝ тѧ̀, прехва́льне.
Просвѣща́еми бл҃года́тїю крⷭ҇та̀ твоегѡ̀, влⷣко, благосла́внїи а҆пⷭ҇ли, тебѣ̀ ꙗ҆зы́ки вѣ́рою приведо́ша, варна́ва и҆ па́ѵелъ, бг҃омꙋ́дрїи.
Бг҃оро́диченъ:
Ꙗ҆ви́ласѧ є҆сѝ чистото́ю ꙗ҆́кѡ крі́нъ, влⷣчце, посредѣ̀ те́рнїѧ возсїѧ́вши зарѧ́ми дѣ́вства твоегѡ̀, бцⷣе всечⷭ҇таѧ.
Конда́къ гла́съ г҃: Подо́бенъ: Дв҃а дне́сь:
Гдⷭ҇ень бы́лъ є҆сѝ всеи́стинный слꙋжи́тель, а҆пⷭ҇лѡвъ же ꙗ҆ви́лсѧ є҆сѝ седми́десѧтихъ пе́рвый, ѡ҆зари́лъ є҆сѝ и҆ съ па́ѵломъ про́повѣдь твою̀, всѣ̑мъ возвѣща́ѧй хрⷭ҇та̀ сп҃са: сегѡ̀ ра́ди пѣснопѣ́нїи бжⷭ҇твеннꙋю па́мѧть твою̀, варна́во, соверша́емъ.
І҆́косъ:
Сн҃ъ бж҃їй, соприсносꙋ́щный дх҃ꙋ, бл҃говоле́нїемъ на землѝ пло́ть прїе́мь, ꙗ҆́кѡ чл҃вѣ́къ, и҆ стрⷭ҇тїю честно́ю безстра́стїе да́въ тѧ̀ полага́етъ, бл҃же́нне, а҆пⷭ҇ла, и҆ виті́ѧ вѣ́ры мꙋ́дра въ сло́вѣ и҆ досточꙋ́дна, проповѣ́дника че́стна, ꙗ҆зы́кѡвъ ᲂу҆чи́телѧ, варна́во блаже́нне, и҆ трⷪ҇цы и҆́стинна покло́нника. тѣ́мже возсїѧ̀ вѣ̑рнымъ честна́ѧ денни́ца свѣ́тлаѧ, ѡ҆зарѧ́ющаѧ твоѧ̀ бж҃е́ственнаѧ па́мѧть, ю҆́же досто́йнѡ соверша́емъ.
Сѣда́ленъ, гла́съ и҃. Подо́бенъ: Премꙋ́дрости:
Мре́жею сло́ва возве́дъ, и҆зъ глꙋбины̀ неразꙋ́мїѧ бг҃олѣ́пнѡ, ꙗ҆зы́ки приве́лъ є҆сѝ вѣ́рою, и҆ ꙗ҆́кѡ и҆сто́чникъ сы́й во́дъ дх҃о́вныхъ, вселе́ннꙋю всю̀ напои́лъ є҆сѝ бл҃года́тїю, тѣ́мже и҆ спа́сшїисѧ тобо́ю, бг҃огла́се, ꙗ҆́кѡ дрꙋ́га тѧ̀ бли́жнѧго хрⷭ҇то́ва ᲂу҆блажа́емъ, варѳоломе́е, вопїю́ще тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Сла́ва, варна́вы, гла́съ и҆ подо́бенъ то́йже:
Слове́сенъ показа́лсѧ є҆сѝ, ꙗ҆́кѡ нбⷭ҇нꙋю повѣ́дꙋѧ сла́вꙋ бж҃їю, чꙋде́съ свѣ́тлостїю, и҆ си́лы лꙋча́ми, неразꙋ́мїѧ но́щь ѿгонѧ̀ бл҃года́тїю, бг҃оразꙋ́мїѧ же лꙋчы̀ ѡ҆блиста́ѧ концє́мъ. тѣ́мже свѣтоно́снꙋю и҆ ст҃ꙋ́ю твою̀ па́мѧть сла́вимъ дне́сь вѣ́рнїи, и҆ вопїе́мъ тѝ: варна́во всехва́льне, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
И҆ ны́нѣ, пра́здника, и҆лѝ бг҃оро́диченъ:
Ꙗ҆́кѡ всенепоро́чнаѧ невѣ́сто творцꙋ̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ, препѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ бѣсѡ́мъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити: и҆ свѣ́тлое жили́ще добродѣ́телей совершѝ, свѣтоно́снаѧ нетлѣ́ннаѧ: ѿженѝ ѻ҆́блакъ стрⷭ҇те́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.
Пѣ́снь д҃. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и.
Оу҆праздни́лъ є҆сѝ, крⷭ҇то́мъ гдⷭ҇нимъ ѡ҆гражда́емь, де́мѡнское свирѣ́пство, варѳоломе́е преизрѧ́дне, и҆ си́хъ дꙋшегꙋби́тельнꙋю пре́лесть ѿгна́лъ є҆сѝ проповѣ́данїемъ.
Свѣ́тъ мі́ра, сла́вы бж҃е́ственное сїѧ́нїе, хрⷭ҇то́съ тѧ̀ показа̀, варѳоломе́е бг҃опрїѧ́тне: всю́ бо просвѣти́лъ є҆сѝ бг҃оразꙋ́мїемъ тва́рь, всеблаже́нне.
Возмꙋти́лъ є҆сѝ ꙗ҆зы́чєскаѧ морѧ̀, а҆пⷭ҇ле, ꙗ҆́кѡ ко́нь преизрѧ́денъ, колесни́ца сло́ва бы́въ: вѣ́рою же погаси́лъ є҆сѝ го́рькагѡ безбо́жїѧ концы̀.
Бг҃оро́диченъ:
И҆сцѣлѧ́ѧ є҆́ѵино ве́тхое престꙋпле́нїе, въ тѧ̀ непоро́чнꙋю, пречⷭ҇таѧ, всели́сѧ, всего́ мѧ человѣ́ка ѡ҆бновѝ па́дшаго пребж҃е́ственный.
И҆́нъ. І҆рмо́съ то́йже.
Послѣ́дꙋѧ повелѣ́нїемъ влⷣки, а҆пⷭ҇ле варна́во прехва́льне, ни́щымъ разда́лъ є҆сѝ всѐ твоѐ и҆мѣ́нїе, и҆ хрⷭ҇то́въ проповѣ́дникъ бы́въ велегла́сенъ.
Дости́глъ є҆сѝ добродѣ́телей свѣ́тлость коне́чнꙋю, и҆ па́ѵла ѡ҆брѣ́тъ бг҃огла́снаго а҆пⷭ҇ла, съ ни́мже всѣ̑мъ возвѣсти́лъ є҆сѝ та́инства глꙋбинꙋ̀ неизрече́ннꙋю.
Ꙗ҆́кѡ со́лнце претека́ѧ мі́ра концы̀, варна́во всече́стне, зарелꙋ́чными сїѧ̑нїи, па́ѵлꙋ послѣ́дꙋѧ, просвѣща́еши сло́вомъ благода́ти.
Соприча́стникъ страсте́й сп҃са бы́въ, варна́во прехва́льне, въ нбⷭ҇ныхъ се́лѣхъ съ ни́мъ прославлѧ́ешисѧ, па́че ᲂу҆ма̀, весе́лїѧ насыща́ѧсѧ.
Бг҃оро́диченъ:
Є҆́ѵы прама́тере клѧ́тва ᲂу҆праздни́сѧ тобо́ю, всенепоро́чнаѧ: воплоще́ннаго бо сло́ва родила̀ є҆сѝ присносꙋ́щнаго, бл҃гослове́ньми мі́ръ вѣнча́вшаго.
Пѣ́снь є҃. І҆рмо́съ:
Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ, приведе́нїе и҆́мамы.
Несозда́ннꙋ свѣ́тꙋ, на́съ ра́ди въ зда́нїихъ ꙗ҆́вльшемꙋсѧ хрⷭ҇тꙋ̀, перводѣ́льнѡ бесѣ́довалъ є҆сѝ, къ немꙋ̀ прише́дъ, а҆пⷭ҇ле, и҆ бжⷭ҇твенными зарѧ́ми ѿ негѡ̀ просвѣща́емь.
Ꙗ҆́кѡ роса̀ бж҃їѧ человѣ́кѡмъ и҆сцѣле́нїе подаю́щи, въ мі́рѣ бы́лъ є҆сѝ, ѽ варѳоломе́е преблаже́нне: и҆ зе́млю нече́стїѧ прⷪ҇ро́чески ѡ҆прове́рглъ є҆сѝ.
Къ пе́рвомꙋ свѣ́тꙋ пристꙋ́пль, бы́лъ є҆сѝ свѣ́тъ вторы́й, ꙗ҆̀же ѿтꙋ́дꙋ сїѧ̑нїи и҆ свѣтоли̑тїи ѡ҆зарѧ́емь, ꙗ҆́кѡ самови́децъ сло́ва, варѳоломе́е всемꙋ́дре.
Бг҃оро́диченъ:
Глаго́лы твоѧ̑ по́мнѧще, тѧ̀ ны́нѣ бл҃жи́мъ: тобо́ю бо, непоро́чнаѧ, бл҃же́нство ѡ҆брѣто́хомъ, и҆ жи́знїю честно́ю и҆́стинною ѡ҆богати́хомсѧ.
И҆́нъ. І҆рмо́съ то́йже.
Зако́на сѣ́нь преше́дъ, и҆ бл҃года́тїю сїѧ́ѧ, ꙗ҆зы́кѡмъ и҆сполне́нїе бл҃говѣствꙋ́ѧ, просвѣти́лъ є҆сѝ, бг҃омꙋ́дрый варна́во, хрⷭ҇то́вымъ проповѣ́данїемъ.
Крѣ́постїю держа́вною ст҃а́гѡ дх҃а, а҆пⷭ҇ле, ꙗ҆́вѣ ѡ҆бложе́нъ, лꙋка́вствїѧ дꙋ́хи низложи́въ, ѿ тѣ́хъ ѕлодѣ́йства мі́ръ и҆зба́вилъ є҆сѝ.
Вопїю́щагѡ гла́съ въ пꙋсты́хъ ꙗ҆зы́цѣхъ бы́лъ є҆сѝ, мꙋ́дре, бж҃е́ственнагѡ воплоще́нїѧ непостижи́мое та́инство возвѣща́ѧ всѣ̑мъ, варна́во пребога́те.
Бг҃оро́диченъ:
Сѐ во ᲂу҆тро́бѣ, бцⷣе пречⷭ҇таѧ, хрⷭ҇та̀ бг҃а па́че сло́ва и҆мѣ́ла є҆сѝ, ꙗ҆́коже и҆са́їа предречѐ: вы́ше є҆стества́ же сего̀, бг҃ороди́тельнице, родила̀ є҆сѝ.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Чꙋде́съ благода́ть прїе́мъ, и҆ и҆сцѣле́нїй ѡ҆бога́щсѧ дѣ́телїю, варѳоломе́е всемꙋ́дре, ꙗ҆зы̑къ стада̀ ᲂу҆лови́лъ є҆сѝ.
Ѻ҆́гненный тво́й ѧ҆зы́къ, пресла́вне, всѧ́кꙋ пре́лесть ꙗ҆́кѡ сѣ́но попалѝ: вѣ́рныхъ же просвѣтѝ сердца̀ бжⷭ҇твеннымъ проповѣ́данїемъ.
И҆сто́чника премꙋ́дрости, ᲂу҆чи́телѧ и҆мѣ́ѧ, пресла́вне, сло́ва безнача́льнаго, мїрскꙋ́ю ѡ҆бꙋи́лъ є҆сѝ, бг҃опроповѣ́дниче, мꙋ́дрость благода́тїю.
Бг҃оро́диченъ:
Па́че є҆стества̀, дв҃о, родила̀ є҆сѝ, и҆ вѣ́чнꙋеши дв҃ою, ꙗ҆влѧ́ющи и҆́стиннагѡ бж҃ества̀, сн҃а и҆ бг҃а твоегѡ̀ ѻ҆́бразы.
И҆́нъ. І҆рмо́съ то́йже.
Возсїѧ́въ мі́рꙋ, хрⷭ҇тѐ бж҃е, пра́вды сл҃нце, влⷣко, ꙗ҆́коже лꙋчѝ сїѧ́ющыѧ, варна́вꙋ и҆ па́ѵла возблиста́лъ є҆сѝ.
Кореносѣ́чна сѣки́ра бы́лъ є҆сѝ, ѡ҆лѧденѣ́вшꙋю пре́лесть сѣкꙋ́щи па́че сло́ва чꙋдесы̀, бг҃оглаго́ливе варна́во чꙋ́дне.
Законополо́жникъ показа́лсѧ є҆сѝ благода́ти, ꙗ҆́кѡ ве́тхагѡ завѣ́та ѻ҆́бразы ко и҆́стинномꙋ ꙗ҆вле́нїю прелага́ѧ, варна́во бг҃опрїѧ́тне.
Бг҃оро́диченъ:
Небеса̀ простры́й во́лею, не́бо земно́е дрꙋго́е показа̀ тѧ̀, бг҃ома́ти пречⷭ҇таѧ, и҆ и҆зъ тебє̀ возсїѧ́въ ꙗ҆ви́сѧ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Ꙗ҆ви́лсѧ є҆сѝ вели́кое сл҃нце вселе́ннѣй, ᲂу҆че́нїй сїѧ́ньми и҆ чꙋде́съ стра́шныхъ, свѣтоводѧ̀ почита́ющыѧ тѧ̀, варѳоломе́е гдⷭ҇ень а҆пⷭ҇толе.
І҆́косъ:
Ꙗ҆́кѡ нб҃о сла́вꙋ бж҃їю вѣща́ѧ ви́дѣнъ бы́лъ є҆сѝ, дх҃омъ ст҃ы́мъ, а҆пⷭ҇ле бг҃ови́дче, и҆ ꙗ҆́кѡ сл҃нце свѣ́тло ꙗ҆ви́лсѧ є҆сѝ мі́рꙋ, преле́стное помраче́нїе разгонѧ́ѧ бжⷭ҇твенною бл҃года́тїю. тѣ́мъ молю́тисѧ и҆ ми́лсѧ дѣ́ю: бжⷭ҇твенными твои́ми лꙋча́ми, дꙋшѝ моеѧ̀ ѡ҆слѣпле́нныѧ, всебога́те, просвѣтѝ зѣ̑ницы, и҆ сло́во тѧ̀ пѣ́ти да́ждь во ѿверзе́нїе ᲂу҆стѡ́мъ мои̑мъ, въ твое́й дне́сь па́мѧти: въ ню́же всѧ́къ вѣ́рный веселѧ́сѧ хва́литъ тѧ̀, варѳоломе́е гдⷭ҇ень а҆пⷭ҇толе.
Пѣ́снь з҃. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
Вели́кое та́инство, варѳоломе́е, бж҃е́ственнагѡ воплоще́нїѧ, мі́рꙋ ꙗ҆ви́лъ є҆сѝ, є҆́же всѣ̑мъ невмѣсти́мое и҆ непостижи́мое, є҆ди́нѣмъ же вмѣсти́мо вѣ̑рнымъ, несказа́емо и҆ вѣ́рꙋемо.
Ꙗ҆́кѡ ка́мень, прест҃ы́й варѳоломе́е, чи́стѣ валѧ́ѧсѧ, пре́лести ᲂу҆твержде́нїе крѣ́пкѡ ѡ҆прове́рглъ є҆сѝ: цр҃кви же неѡбори́мое ѡ҆снова́нїе ꙗ҆́вльсѧ, сохранѧ́еши сїю̀ непоколеби́мꙋ.
Бжⷭ҇твенное подо́бїе, варѳоломе́е, добродѣ́телей ша́ромъ, пребл҃же́нне, написа́лъ є҆сѝ: ѿвсю́дꙋ а҆пⷭ҇лъ бж҃е́ственъ бы́въ, всѣ̑мъ проповѣ́далъ є҆сѝ хрⷭ҇то́во прише́ствїе многопѣ́тое.
Бг҃оро́диченъ:
Гро́здъ созрѣ́вшїй, є҆го́же невоздѣ́ланнѡ, чⷭ҇таѧ, возрасти́ла є҆сѝ, на дре́вѣ ꙗ҆́кѡ ᲂу҆зрѣ́вши повѣ́шена, вопїѧ́ла є҆сѝ: ча́до сла́дкое, мсто̀ и҆ска́пи, и҆́мже страсте́й пїѧ́нство ѿи́метсѧ.
И҆́нъ. І҆рмо́съ то́йже.
Свѧ́тѡ ст҃а́го, во ст҃ы́хъ почива́ющаго, варна́во, проповѣ́далъ є҆сѝ сн҃а, собезнача́льна ѻ҆ц҃ꙋ̀ и҆ сопрⷭ҇то́льна, чл҃вѣ́ка бы́вша, на́мъ спасе́нїе содѣва́юща.
Лꙋчы̀ блиста́ющыѧ бж҃е́ственное сїѧ́нїе, варна́ва всечестны́й и҆ па́ѵелъ бг҃опрїѧ́тный, ꙗ҆́кѡ свѣ́тъ и҆схо́дѧтъ, просвѣща́ющыѧ сло́вомъ благода́ти ꙗ҆зы̑къ всенаслѣ́дїе, хрⷭ҇топроповѣ̑дницы.
Ра́дꙋетсѧ дне́сь воспита́вый тѧ̀, варна́во, цвѣтꙋ́щаго сло́во благода́тное, хрⷭ҇то́ви тѧ̀ прозѧ́бши, бг҃облаже́нне. Є҆го́же и҆змѣни́въ, ны́нѣшнѧгѡ плѣне́нїѧ и҆зба́ви моли́твами твои́ми.
Бг҃оро́диченъ:
Направлѧ́ющи, всечⷭ҇таѧ, мою̀ жи́знь, ко твоемꙋ̀ бл҃гоꙋти́шномꙋ приста́нищꙋ наста́ви, бг҃а ро́ждшаѧ, благи́хъ и҆сто́чника, всѣ̑мъ подаю́ща вѣ̑рнымъ незави́стнꙋю бла́гость.
Пѣ́снь и҃. І҆рмо́съ:
Пе́щь и҆ногда̀ ѻ҆́гненнаѧ въ вавѷлѡ́нѣ дѣ́йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Ве́лїе и҆ ма́ло, мно́го же и҆ ᲂу҆ма́лено, сп҃сово є҆ѵⷢ҇лїе премꙋ́дрѡ наꙋчи́лъ є҆сѝ. вє́лїѧ и҆ пресла̑внаѧ сложе́нными глагѡ́лы, всѣ̑мъ назна́меналъ є҆сѝ, варѳоломе́е бг҃омꙋ́дре.
Ꙗ҆́коже рѣка̀ ѿ сїѡ́на и҆сходѧ̀, цр҃кѡ́вныѧ со́нмы напоѧ́еши, пребога́те, и҆ пото́къ бж҃е́ственныѧ пи́щи и҆спꙋсти́лъ є҆сѝ ꙗ҆вле́ннѣйше, зовы́й: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бжⷭ҇твенныхъ дарѡ́въ ꙗ҆́вѣ свѣтлѣ́йшими и҆ вели́кими ꙗ҆́кѡ а҆пⷭ҇лъ бжⷭ҇твеннѣ ᲂу҆краси́лсѧ є҆сѝ. превосхо́дитъ са́нъ бл҃госла́вїѧ всегѡ̀, бл҃же́нне, сꙋ́щее во человѣ́цѣхъ зри́мое благода́тїю.
Бг҃оро́диченъ:
Оу҆́мъ безстра́стенъ въ ложесна́хъ твои́хъ є҆дини́тсѧ человѣ́чꙋ ᲂу҆мꙋ̀, всечⷭ҇таѧ: пло́ти же дебельство́мъ подлѣ́тенъ бы́въ, вѣкѡ́въ превы́шшїй. Тѣ́мъ тѧ̀, бцⷣе, вѣ́рою и҆ любо́вїю сла́вимъ.
И҆́нъ. І҆рмо́съ то́йже.
Мо́ре ꙗ҆зы́ческое возмꙋти́ти, твоѧ̑ ко́ни ꙗ҆́кѡ бл҃годѣ́тель наве́лъ є҆сѝ, варна́вꙋ сла́внаго и҆ па́ѵла чꙋ́днаго пре́лесть многобо́жнꙋю, ᲂу҆че́ньми, живода́вче, бл҃гоче́стїѧ ѿгонѧ́щыѧ.
Положѝ ꙗ҆́кѡ бг҃ъ, ᲂу҆тѣ́шителю дш҃е вседѣ́тельный, въ цр҃кви твое́й свѣти̑ла сїѧ̑ющаѧ, твою̀ си́лꙋ проповѣ̑дающаѧ, сн҃ꙋ же и҆ роди́телю зовꙋ̑щаѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Ѡ҆блиста́лъ є҆сѝ свѣ́тлѡ ꙗ҆́кѡ сл҃нце въ мі́рѣ, мы́сленномꙋ бесѣ́довавъ ꙗ҆́вѣ сл҃нцꙋ, бг҃опрїѧ́тне: разже́гсѧ бо сїѧ́нїемъ, свѣ́тъ вторы́й бы́лъ є҆сѝ, всѣ̑мъ ꙗ҆влѧ́ѧ та́инства си́лꙋ.
Зе́млю всю̀ ᲂу҆че́ньми просвѣти́въ, є҆́же па́че ᲂу҆ма̀ блаже́нство досто́йнѡ ᲂу҆лꙋчи́лъ є҆сѝ, въ нбⷭ҇ныхъ се́лѣхъ, варна́во всече́стне, вѣне́цъ бл҃голѣ́пїѧ ѿ влⷣки прїе́мъ.
Бг҃оро́диченъ:
Да клѧ́твꙋ пе́рвꙋю погꙋби́ши, и҆ сме́рти ѡ҆сꙋжде́нїе, дре́внїѧ прамт҃ре, ѿ дв҃ы бг҃ома́тере сло́во бж҃їе роди́сѧ, всѣ̑мъ дарова̀ безсме́ртїе неги́блющее.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. Тѣ́мъ всепѣ́тꙋю бцⷣꙋ велича́емъ.
Сло́ва бы́въ самови́децъ и҆ слꙋжи́тель, ᲂу҆чени́къ же и҆ проповѣ́дникъ бг҃ови́дѣнъ, и҆дѣ́же ны́нѣ є҆́сть сло́во, ты̀ жи́ти вои́стиннꙋ сподо́билсѧ є҆сѝ, ꙗ҆́коже са́мъ ѡ҆бѣща̀ нело́жнѡ пребл҃гі́й.
Ꙗ҆́кѡ ны́нѣ предстоѧ̀ прⷭ҇то́лꙋ влⷣки твоегѡ̀, и҆ ѿѻнꙋ́дными зарѧ́ми ѡ҆сїѧ́емь, ѽ варѳоломе́е бг҃омꙋ́дре, пѣвцы̀ твоѧ̑ назира́ѧ, страсте́й и҆збавлѧ́еши, и҆ разли́чныхъ ѡ҆бстоѧ́нїй.
Сн҃ъ вѣ́ры ра́ди сподо́бльсѧ бы́ти бг҃ꙋ, ѻ҆те́ческихъ наслѣ́дникъ сокро́вищъ бы́лъ є҆сѝ. ѽ великода́рныѧ дла́ни! ѽ дарова́нїѧ ны́нѣ превосходѧ́щагѡ, хрⷭ҇та̀ просла́вльшагѡ тѧ̀, бг҃ови́дче всебл҃же́нне!
Бг҃оро́диченъ:
Разꙋмѣ́вше и҆здале́ча прозорли́выма ѻ҆чи́ма прⷪ҇ро́цы, тѧ̀ всѝ провозгласи́ша хотѧ́щꙋю мт҃рь бы́ти вседѣ́телѧ, и҆ всѣ́хъ влⷣки. Тѣ́мъ тѧ̀ всепѣ́тꙋю бцⷣꙋ возвѣща́емъ.
И҆́нъ. І҆рмо́съ то́йже.
Свѣ́тъ бы́вше добродѣ́телїю а҆пⷭ҇ли, и҆ свѣ́тꙋ вели́комꙋ ны́нѣ предстоѧ́ще, мі́рꙋ ми́ръ пода́ти, и҆ на́шꙋ спастѝ цр҃ковь, ю҆́же соста́висте, влⷣкꙋ ᲂу҆моли́те.
Виті́йскꙋю лю́тость премꙋ́дрости твоеѧ̀ пла́менемъ, бг҃оѧвле́нне варна́во, ꙗ҆́вѣ погаси́лъ є҆сѝ, сїѧ́нїй бжⷭ҇твенныхъ, ꙗ҆́кѡ и҆сто́чникъ внꙋ́трь и҆мѣ́ѧ. тѣ́мже всесвѧще́нный пра́здникъ тво́й почита́емъ.
Вѣ́рою па́мѧть твою̀ соверша́юще ны́нѣ, а҆пⷭ҇ле, моли́твенника ко влⷣцѣ тѧ̀ предлага́емъ, разрѣше́нїѧ просѧ́ще согрѣше́нїй, твои́мъ прїѧ́ти хода́тайствомъ, варна́во всече́стне, бг҃опроповѣ́дниче свѧще́нне.
Бг҃оро́диченъ:
Ꙗ҆́кѡ ᲂу҆́тро ѡ҆брѣ́тесѧ ᲂу҆́треннее, въ жите́йстѣй но́щи дѣ́вства зарѧ́ми сїѧ́ющи, восто́къ сл҃нца разꙋ́мнагѡ пра́вды на́мъ ꙗ҆́вльши, бг҃ома́ти всечⷭ҇таѧ.
Свѣти́ленъ. Подо́бенъ: Посѣти́лъ ны̀:
А҆пⷭ҇лы хрⷭ҇тѡ́вы, прїиди́те, лю́дїе, воспои́мъ бжⷭ҇твеннаго варѳоломе́а, и҆ варна́вꙋ мꙋ́драго, проповѣ́дники вѣ́ры, ꙗ҆́кѡ молѧ́щыѧсѧ хрⷭ҇тꙋ̀ ѡ҆ дꙋша́хъ на́шихъ.
Два́жды.
Сла́ва, и҆ ны́нѣ, пра́здника, и҆лѝ бг҃оро́диченъ:
Чтⷭ҇аѧ влⷣчце ст҃а́ѧ, и҆ є҆ди́на мꙋженеискꙋ́снаѧ, спасе́нїе и҆ ᲂу҆пова́нїе ты̀, молѝ и҆зъ тебє̀ рожде́ннаго и҆зба́вителѧ на́шего, спастѝ мі́ръ ѿ ле́сти, бѣ́дъ и҆ скорбе́й.
На хвали́техъ стїхи̑ры, на д҃, гла́съ д҃. Подо́бенъ: Ꙗ҆́кѡ до́блѧ:
Пра́вды тѧ̀ сл҃нце ꙳ і҆и҃съ бг҃ъ на́шъ, ꙳ во всѧ̑ мїрска̑ѧ и҆сполнє́нїѧ, ꙳ ꙗ҆́коже многосвѣ́тлꙋю лꙋчꙋ̀, ꙳ бг҃омꙋ́дре а҆пⷭ҇ле, положи́лъ є҆́сть, ꙳ ѕло́бы мглꙋ̀ ѿгонѧ́ща, ꙳ и҆ просвѣща́юща ѡ҆мрачє́ннаѧ сердца̀ неразꙋ́мїемъ ꙳ и҆ страсте́й ѡ҆бдержа́нїемъ, ꙳ варѳоломе́е пребога́те.
Два́жды.
Чи́стое прїѧ́телище ꙳ трⷪ҇цы бы́лъ є҆сѝ, ꙳ добродѣ́телей свѣтлостьмѝ ѡ҆блиста́емь, ꙳ и҆ въ се́рдцы прїе́мъ, варна́во, ꙳ ѿ неѧ̀ сїѧ́нїе, ꙳ и҆ просвѣще́нїе сл҃нца свѣтлѣ́йшее, ꙳ въ концѣ́хъ свѣ́тлѡ препосыла́ѧ ꙳ и҆ просвѣща́ѧ во тмѣ̀ сѣдѧ́щыѧ неразꙋ́мїѧ, ꙳ бг҃опрїѧ́тне.
Ꙗ҆́коже ѻ҆́блацы, блаже́ннїи, ꙳ во всѧ̑ концы̀ до́ждь и҆ска́паете нбⷭ҇ный, ꙳ и҆ дꙋ́шы вѣ́рныхъ напаѧ́ете ꙳ бжⷭ҇твенною бл҃года́тїю, ꙳ потопи́вше лю́тагѡ безбо́жїѧ пле́велы, ꙳ и҆ соверши́вше дꙋ́шы ꙳ плодонѡ́сны человѣ́чєскїѧ: ꙳ сегѡ̀ ра́ди во хвале́нїи ва́съ почита́емъ, ꙳ гдⷭ҇ни а҆пⷭ҇ли.
Сла́ва, гла́съ є҃. Вѷзанті́ево:
Премꙋ́дрость бж҃їѧ, соприсносꙋ́щное сло́во ѻ҆́ч҃ее, ꙗ҆́коже во є҆ѵⷢ҇лїихъ предречѐ: вы̀ є҆стѐ и҆зѻби̑льныѧ ло́зы, прехва́льнїи а҆пⷭ҇ли, и҆̀же гро́здъ зрѣ́лый и҆ кра́сенъ въ вѣ́твїѧхъ ва́шихъ носѧ́ше. Є҆го́же вѣ́рнїи ꙗ҆дꙋ́ще, ᲂу҆слажда́емъ вкꙋ́съ къ весе́лїю, варѳоломе́е бг҃опрїѧ́тне, и҆ варна́во сы́не ᲂу҆тѣше́нїѧ, прилѣ́жнѡ моли́тесѧ ѡ҆ дꙋша́хъ на́шихъ.
И҆ ны́нѣ, пра́здника, и҆лѝ бг҃оро́диченъ: Бл҃жи́мъ тѧ̀, бцⷣе дв҃о:
Славосло́вїе вели́кое, И҆ ѿпꙋ́стъ.
На лїтꙋргі́и, блажє́нна ѿ канѡ́на варѳоломе́а, пѣ́снь г҃-ѧ на д҃: И҆ варна́вы пѣ́снь ѕ҃ на д҃. Прокі́менъ: гла́съ и҃: Во всю̀ зе́млю и҆зы́де вѣща́нїе и҆́хъ: Сті́хъ: Нб҃са̀ повѣ́даютъ сла́вꙋ бж҃їю: А҆пⷭ҇лъ дѣѧ́нїй, зача́ло к҃и: А҆ллилꙋ́їа, гла́съ а҃. И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и: Є҆ѵⷢ҇лїе лꙋкѝ, зача́ло н҃а. Прича́стенъ: Во всю̀ зе́млю и҆зы́де вѣща́нїе и҆́хъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.