← претходни дан | Минеј — Јун | следећи дан →
2 июня: Святителя Никифора, патриарха Константинополя, исповедника. Великомученика Иоанна Нового
Мѣ́сѧца тогѡ́же во в҃-й де́нь.
И҆́же во ст҃ы́хъ, ѻ҆ц҃а̀ на́шегѡ нїки́фора, патрїа́рха кѡнстанті́нѧ гра́да, и҆сповѣ́дника:
И҆ ст҃а́гѡ великомꙋ́ченика і҆ѡа́нна но́вагѡ, мꙋ́чена въ бѣлѣгра́дѣ.
Слꙋ́жба є҆гѡ̀ пи́сана по се́й слꙋ́жбѣ.
Стїхи̑ры и҆сповѣ́дника, гла́съ д҃. Подо́бенъ: Ꙗ҆́кѡ до́блѧ:
И҆́стины водрꙋже́нїе, ꙳ и҆ вѣ́ры ᲂу҆твержде́нїе, ꙳ и҆ догма́тѡвъ предложи́телѧ тѧ̀ зна́емъ, ꙳ благоче́стїѧ согла́сника, ꙳ чистоты̀ селе́нїе, ꙳ и҆ прїѧ́телище и҆збра́нное, благово́нїе дх҃а, ꙳ и҆ превели́кое сокро́вище ᲂу҆че́нїй, ꙳ и҆ ѡ҆снова́нїе хрⷭ҇то́вы цр҃кве, ꙳ свѧщенноѧвле́нне бг҃одꙋхнове́нне.
А҆по́столѡвъ прее́мника, ꙳ страда́льцєвъ є҆динонра́вна, ꙳ по́стникѡвъ є҆диноревни́телѧ восхвалѧ́емъ тѧ̀, ꙳ и҆ ᲂу҆чи́телей печа́ть, ꙳ и҆ бжⷭ҇твенное и҆з̾ѡбраже́нїе, ꙳ хрⷭ҇то́ва тайноводи́телѧ, ꙳ ст҃и́телю бл҃же́нне, и҆ бг҃ото́чнꙋю рѣкꙋ̀ разꙋмѣ́нїй, ꙳ беззако́нникѡвъ и҆ хꙋ́льникѡвъ мы̑сли потоплѧ́юща, премꙋ́дре.
Премꙋ́дрости тала́нтъ ꙳ ᲂу҆мно́живъ, пребога́те, ꙳ ра́дости сподо́билсѧ є҆сѝ гдⷭ҇а твоегѡ̀, ꙳ и҆спещре́нъ бл҃года́тїю ꙳ бж҃е́ственнагѡ сїѧ́нїѧ, и҆ заре́ю мы́сленнѡ сїѧ́ѧ дх҃о́вною, ꙳ ны́нѣ предстои́ши десни́цѣ жизноно́снѣй, ꙳ ѿтꙋ́дꙋ лꙋча́ми всегда̀ ѡ҆блиста́емь, сла́вне.
И҆́ны стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!
Въ бжⷭ҇твенныхъ незаходи́мыхъ внꙋ́трь, ꙳ и҆́стинныѧ же ски́нїи, ꙳ ю҆́же гдⷭ҇ь водрꙋзѝ, ꙳ ꙗ҆́кѡ свѧще́нникъ зако́ненъ ꙳ вше́лъ є҆сѝ, преподо́бне ꙳ не чꙋжде́ю, ѻ҆́ч҃е, кро́вїю, но твое́ю, ꙳ хрⷭ҇тꙋ̀ подо́бѧсѧ, совѣ́тномꙋ не поко́рсѧ томле́нїю, є҆́юже бг҃ꙋ, ѻ҆́ч҃е, ᲂу҆годи́лъ є҆сѝ до конца̀.
Сло́вомъ и҆ дѣѧ́нїемъ ᲂу҆кра́шенъ, ꙳ и҆ свѧще́нною твое́ю ѻ҆де́ждею, и҆ ᲂу҆че́нїѧ пра́востїю, нїки́форе всемꙋ́дре, ꙳ премꙋ́дрости пита́телю, и҆сповѣ́данїемъ си́хъ прїѧ́лъ є҆сѝ, ꙳ заточє́нїи и҆стѧза́емь, терпѣ́лъ є҆сѝ ᲂу҆се́рднѡ, ꙳ по́мысла крѣ́постїю лю̑таѧ, ꙳ всѧ̑ приходѧ̑щаѧ, блаже́нне.
Ѻ҆рга́нъ ꙗ҆ви́лсѧ є҆сѝ дх҃а, ꙳ бг҃одохнове́нными гла́сы ѡ҆глаша́емь свы́ше, ꙳ и҆ возглаша́ѧ несказа́нное сп҃са та́инство, ꙳ и҆ бж҃е́ственнаѧ трꙋба̀, ꙳ вои́стиннꙋ и҆ наро́читаѧ, ꙳ велегла́снѡ на́мъ проповѣ́дающи сло́ва воплоще́нїе, ꙳ є҆́же па́че достиже́нїѧ, ꙳ и҆ вы́ше ᲂу҆ма̀ всѧ̑, ꙳ и҆ по́мысла, прече́стне.
Сла́ва, и҆ ны́нѣ, бг҃оро́диченъ:
Спаси́ мѧ, влⷣчце пречⷭ҇таѧ, ꙗ҆́же сп҃са хрⷭ҇та̀ неизрече́ннѡ ро́ждшаѧ: ꙳ тѧ́ бо є҆ди́нꙋ стѧжа́хъ предста́тельницꙋ, ꙳ и҆ неѡбори́мꙋю стѣ́нꙋ, ꙳ и҆ покро́въ, и҆ ра́дованїе, ꙳ и҆ дꙋшѝ моеѧ̀ бж҃е́ственное ᲂу҆тѣше́нїе. ꙳ Ты̀ ᲂу҆́бѡ мѧ̀ и҆зба́ви неꙋсыпа́ющагѡ че́рвїѧ, ꙳ и҆ ѻ҆гнѧ̀ вѣ́чнꙋющагѡ, ꙳ мт҃и хрⷭ҇та̀ бг҃а.
Крⷭ҇тобг҃оро́диченъ:
Тѧ̀ ви́дѧщи пригвожда́ема ꙳ на крⷭ҇тѣ̀, і҆и҃се, ꙳ и҆ стрⷭ҇ти прїе́млюща во́лею, ꙳ дв҃а и҆ мт҃и твоѧ̀, влⷣко, ꙳ ᲂу҆вы̀ мнѣ̀, вопїѧ́ше, ꙳ ча́до сла́дкое, ꙳ ра̑ны непра́веднѡ ка́кѡ терпи́ши, ꙳ врачꙋ̀, и҆сцѣли́вый человѣ́ческое неможе́нїе, ꙳ и҆ ѿ тлѝ всѣ́хъ и҆зба́вивый милосе́рдїемъ твои́мъ;
Тропа́рь, гла́съ д҃:
Пра́вило вѣ́ры и҆ ѻ҆́бразъ кро́тости, воздержа́нїѧ ᲂу҆чи́телѧ, ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина: сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ѻ҆́ч҃е нїки́форе, молѝ хрⷭ҇та̀ бг҃а, спасти́сѧ дꙋша́мъ на́шымъ.
Канѡ́нъ, є҆гѡ́же краегране́сїе:
Нїки́фора ꙗ҆́кѡ побѣдоно́сна пѣ́сньми пою̀. Ѳеофа́нъ.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Дѣѧ́нїе видѣ́нїѧ показа́лъ є҆сѝ, ꙗ҆́вѣ восхожде́нїе: дꙋ́шꙋ бо согласи́лъ є҆сѝ дѣ́тельнѡ, нїки́форе пребога́те, къ видѣ́нїю и҆зрѧ́днѡ кра́йнемꙋ возлетѣ́лъ є҆сѝ.
Оу҆мертви́въ ꙗ҆̀же на землѝ мꙋдрова̑нїѧ воздержа́нїемъ ты̀, и҆ дꙋ́шꙋ напра́вилъ є҆сѝ прилѣжа́нїемъ, нїки́форе бг҃одохнове́нне, ко приста́нищємъ дости́глъ є҆сѝ невла́емагѡ наслажде́нїѧ.
Недꙋ́говавъ мамѡ́ны є҆́ресїю ле́въ ѻ҆каѧ́нный, и҆ къ тве́рдомꙋ тебѣ̀ ка́мени прира́жсѧ, нїки́форе бг҃опрїѧ́тне, разсы́пасѧ вско́рѣ при а҆́дѣ пребезꙋ́мный.
Бг҃оро́диченъ:
И҆сцѣлѝ сокрꙋше́нїе, пренепоро́чнаѧ, человѣ́чества, творца̀ ро́ждши, всѧ̑ ны̀ и҆спра́вльшаго, низве́ржєнныѧ паде́нїемъ пра́ѻтєцъ, бг҃оневѣ́стнаѧ.
Пѣ́снь г҃. І҆рмо́съ:
Не мꙋ́дростїю и҆ си́лою, и҆ бога́тствомъ, хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.
Оу҆краси́въ добродѣ́тельми твои́ми житїѐ твоѐ, и҆ свѣти́льникъ сло́ва жи́зни, ꙗ҆́вѣ храни́тель бы́въ, хрⷭ҇то́во всесщ҃е́нное ста́до наста́вль.
Бг҃оглаго́ливый ѻ҆́гненный ѧ҆зы́къ тво́й бж҃е́ственный ѻ҆гне́мъ разꙋ́мнымъ тернѡ́вныѧ попалѝ є҆́рєси, бг҃омꙋ́дре ѻ҆́ч҃е сла́вне.
Любомꙋ́дрїемъ премꙋ́дрости глꙋбинꙋ̀ и҆спыта́въ, ᲂу҆че́нїй твои́хъ плени́цами, ѿмета́ющыѧсѧ ѻ҆́браза хрⷭ҇то́ва, ꙗ҆́снѡ придави́лъ є҆сѝ, досточꙋ́дне.
Бг҃оро́диченъ:
И҆сповѣ́дающе ѻ҆ц҃ꙋ̀ превѣ́чномꙋ сн҃а собезнача́льна, напослѣ́докъ и҆зъ твоеѧ̀ ᲂу҆тро́бы ро́ждшасѧ, пречⷭ҇таѧ, вои́стиннꙋ сла́вимъ тѧ̀ бж҃їю мт҃рь.
Сѣда́ленъ, гла́съ и҃. Подо́бенъ: Премꙋ́дрости:
Слове́съ твои́хъ бл҃года́ть разꙋ́мныхъ, и҆ ᲂу҆че́нїй высота̀ та́йныхъ, бж҃е́ственнагѡ на́мъ бы́сть восхожде́нїѧ лѣ́ствица: дꙋхо́внꙋ бо, ѻ҆́ч҃е, стѧжа́лъ є҆сѝ трꙋбꙋ̀, се́ю проповѣ́далъ є҆сѝ бж҃е́ствєннаѧ ᲂу҆чє́нїѧ. Тѣ́мже и҆ на мѣ́стѣ всели́лсѧ є҆сѝ ѕла́чнѣ, ѕвѣ́рѧ ѿгна́лъ є҆сѝ пра́щею слове́съ твои́хъ, нїки́форе бл҃же́нне: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ всечестнꙋ́ю твою̀ па́мѧть.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ младе́нца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е рождество̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ рождествꙋ̀ твоемꙋ̀.
Крⷭ҇тобг҃оро́диченъ:
А҆́гнца и҆ па́стырѧ, и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше, пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ[[В оригинале ᲂу҆молосе́рдисѧ. Прим. orthlib]] и҆ да́рꙋй согрѣше́нїй ѡ҆ставле́нїе вѣ́рою пою́щымъ бж҃е́ствєнныѧ стра̑сти твоѧ̑.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Си́лою бжⷭ҇твенною чє́люсти, свѧщенноѧвле́нне, нечести́выхъ сокрꙋши́лъ є҆сѝ, тве́рдымъ твои́мъ сло́вомъ си́хъ побѣди́въ, и҆ чествова́ти наꙋчи́лъ є҆сѝ бжⷭ҇твенный сп҃са ѻ҆́бразъ.
И҆сповѣ́данїемъ бжⷭ҇твенное свѧще́нство, свѣ́тлѡ ᲂу҆ѧсни́лъ є҆сѝ, ѻ҆́ч҃е нїки́форе, льво́во сꙋровство̀ загражда́ѧ, таи́нниче неизрече́нныхъ, бг҃опрїѧ́тне.
Ю҆́ношески проти́вльсѧ, нїки́форе, благочести́выми ᲂу҆чє́нїи чⷭ҇тны́ѧ цр҃кве, ра́ною слове́съ твои́хъ во́лки ѿгна́лъ є҆сѝ, вѣ́рꙋ пра́вꙋю корче́мствꙋющыѧ.
Бг҃оро́диченъ:
Воплоще́на безпло́тнаго пе́рвѣе, ро́ждши сло́ва бж҃їѧ, всенепоро́чнаѧ, ѡ҆бра́дованнаѧ, мі́ръ ѡ҆бнови́ла є҆сѝ. тѣ́мже тѧ̀, бг҃оневѣ́сто, вѣ́рою правосла́вною почита́емъ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Оу҆́мъ и҆мѣ́ѧ чи́стъ на нб҃са̀ восходѧ́щъ, ра́зꙋма и҆ премꙋ́дрости неꙋвѧда́ющїй цвѣ́тъ ѡ҆б̾ѧ́лъ є҆сѝ, всеблаже́нне.
И҆сцѣле́нїе дꙋша́мъ правосла̑внымъ ѡ҆роси́лъ є҆сѝ слове́съ твои́хъ, бг҃оѧвле́нне, зе́млю же неразꙋ́мныхъ ѡ҆прове́рглъ є҆сѝ твои́ми ᲂу҆чє́нїи.
Сло́во дѣ́ѧтельно и҆ живо́тъ и҆мѣ́ѧ неѿе́млемь, ꙗ҆́кѡ со́лнце ѡ҆блиста́ѧ, чⷭ҇тны́ѧ цр҃кве просвѣща́еши ᲂу҆твержде́нїе.
Бг҃оро́диченъ:
Разрѣше́нїе клѧ́твы прама́тере ты̀ была̀ є҆сѝ, пренепоро́чнаѧ, заче́нши на́съ благослове́ньми бжⷭ҇твенными вѣнча́вшаго.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Свѣтоно́снѡ зарѧ́ми сїѧ́ѧ дꙋхо́вными, цр҃квамъ, бг҃омꙋ́дре, ꙗ҆ви́лсѧ є҆сѝ сто́лпъ, нб҃сѝ ра́венъ, и҆ ѻ҆́блакъ къ наслѣ́дїю веды́й нбⷭ҇номꙋ.
Всю̀ твою̀ жи́знь бг҃ꙋ ѡ҆свѧти́лъ є҆сѝ, пребыва́ѧ по все́й вселе́ннѣй нача́льникъ, просла́вилсѧ є҆сѝ, свѧщенноѧвле́нне ѻ҆́ч҃е блаже́нне.
Растерза́етъ плетє́нїѧ безбо́жныхъ є҆ресе́й твоѐ бг҃одохнове́нное сло́во, ѻ҆бою́дꙋ ѻ҆́стрымъ мече́мъ ᲂу҆тѣ́шителѧ, свѣ́тъ же и҆́стины всѣ̑мъ предпоказа̀.
Бг҃оро́диченъ:
Зако́ни пресла́внѡ є҆стества̀ разрѣша́ютсѧ: дв҃а бо ражда́етъ, и҆ пита́етъ ѻ҆трокови́ца, неискꙋсобра́чнѡ заче́нши всѣ́хъ зижди́телѧ и҆ гдⷭ҇а.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Побѣ́ды вѣне́цъ, ѽ нїки́форе! съ нб҃сѐ, пресла́вне, ꙗ҆́кѡ прїе́мъ ѿ бг҃а, спаса́й вѣ́рою почита́ющыѧ тѧ̀, ꙗ҆́кѡ свѧщеннонача́льника хрⷭ҇то́ва и҆ ᲂу҆чи́телѧ.
І҆́косъ:
Ꙗ҆́коже невоева́нъ гра́дъ бж҃їй на горѣ̀, вели́кїй і҆ера́рхъ стоѧ̀ водрꙋже́нъ ꙗ҆ви́сѧ, соблюда́ѧ мі́ръ моли́твами, полкѝ безбо́жныхъ побѣди́въ, пребы́сть невреди́мь, ѿ врагѡ́въ стрѣлѧ́нїй неꙋѧ́звенъ, всѣ́хъ цр҃ѧ̀ и҆ гдⷭ҇а внꙋ́трь въ се́рдцы носѧ̀. тѣ́мже и҆ ᲂу҆ѧснѧ́етъ чтꙋ́щыѧ хрⷭ҇та̀ на і҆кѡ́нѣ, съ высоты̀ добродѣ́телей, и҆ столпа̀ дѣ́лъ, пра́щею мета́етъ на полкѝ врагѡ́въ, двє́ри же милосе́рдїемъ ѿверза́етъ, вѣ́рою пою́щымъ сего̀, ꙗ҆́кѡ свѧти́телѧ хрⷭ҇то́ва и҆ ᲂу҆чи́телѧ.
Пѣ́снь з҃. І҆рмо́съ:
Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Цр҃ковь тѧ̀ жи́вꙋ бг҃а жива́гѡ вѣ́мы, внꙋ́трь ꙗ҆́кѡ свѣти́льника и҆мꙋ́ща златоза́рна, трⷪ҇цы позна́нїе: благослове́нъ є҆сѝ въ хра́мѣ сла́вы твоеѧ̀, гдⷭ҇и.
Є҆реті́чествꙋющихъ ѧ҆зыкобѡ́лїѧ низложи́лъ є҆сѝ, ᲂу҆вѣрѧ́ѧ чти́ти і҆кѡ́нꙋ хрⷭ҇то́вꙋ, нїки́форе, взыва́ющыѧ: благослове́нъ є҆сѝ въ хра́мѣ сла́вы твоеѧ̀, гдⷭ҇и.
Премꙋ́дрости бога́тство, и҆ житїѐ и҆мѣ́ѧ бжⷭ҇твенно, всѐ преминꙋ́лъ є҆сѝ чꙋ́вство мы́сленнѡ, хрⷭ҇тꙋ̀ ны́нѣ бесѣ́дꙋеши: благослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ:
Нераздѣлѧ́юще соединє́ннаѧ, нижѐ слива́юще, є҆ди́наго хрⷭ҇та̀ сла́вимъ, и҆зъ тебє̀ воплоще́ннаго сло́ва, зовꙋ́ще: благослове́нъ є҆сѝ въ хра́мѣ сла́вы твоеѧ̀, гдⷭ҇и.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Кро́вїю хрⷭ҇то́вою и҆зба́вленъ, ра́зꙋмомъ и҆́же є҆гѡ̀ ра́ди под̾ѧ́тъ сме́рть: со́вѣсти бо прине́слъ є҆сѝ мꙋче́нїе и҆сповѣ́данїѧ благода́тїю сїѧ́ѧ: гдⷭ҇а по́йте, дѣла̀, взыва́ѧ, и҆ превозноси́те є҆го̀ во всѧ̑ вѣ́ки.
Тѣ́ломъ и҆ дꙋше́ю ѡ҆чище́нъ, сло́вꙋ всеви́дцꙋ сло́вомъ поже́рлъ є҆сѝ, сїѐ пре́жде безпло́тно и҆ безнача́льно показꙋ́ѧ, и҆ ми́лостивна бы́вша чл҃вѣ́ка по́слѣжде: гдⷭ҇а по́йте, дѣла̀, взыва́ѧ, и҆ превозноси́те є҆го̀ во всѧ̑ вѣ́ки.
Да наслѣ́дїе нбⷭ҇ное, и҆ сла́вꙋ неизмѣ́ннꙋю ᲂу҆лꙋчи́ши, сла́вне, сла́вꙋ ᲂу҆вѧда́емꙋю, ѻ҆́ч҃е, ѡ҆ста́вилъ є҆сѝ, и҆згна́нїе и҆ ѡ҆ѕлобле́нїе терпѧ̀ до́блественнѣ, мꙋ́дре, взыва́ѧ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Бг҃оро́диченъ:
Є҆ди́нꙋ голꙋби́цꙋ чи́стꙋ тѧ̀ жени́хъ мы́сленный ѡ҆брѣ́те, всенепоро́чнаѧ, крі́нъ благово́ннѣйшїй, цвѣ́тъ прекра́снѣйшїй и҆ свѣтоно́сенъ черто́гъ, невѣ́стꙋ приведѐ. тѣ́мже тѧ̀ дв҃ꙋ пое́мъ, и҆ превозно́симъ во всѧ̑ вѣ́ки.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ, веселѧ́щесѧ, тѧ̀, бцⷣе, велича́емъ.
Ѡ҆брѣ́лъ є҆сѝ блаже́нный коне́цъ, преше́дшымъ зерца́лѡмъ, и҆́стинѣ ꙗ҆́вльшейсѧ, видѣ́нїемъ нетлѣ́нныѧ добро́ты: є҆ѧ́же ны́нѣ насыща́ѧсѧ, твои́ми моли́твами на́съ помина́й.
Ра́кꙋ ѡ҆бстꙋпи́вше бжⷭ҇твеннꙋю бг҃оно́снагѡ нїки́фора, прїиди́те, хрⷭ҇тоно́снїи, ᲂу҆се́рднѡ, ꙗ҆́кѡ побѣдоно́сца сего̀ воспои́мъ, и҆ тогѡ̀ торжество̀ съ весе́лїемъ пра́зднꙋимъ.
Всѧ́кꙋ добродѣ́тель ᲂу҆держа́въ, при кончи́нѣ подвигѡ́въ и҆сповѣ́данїѧ вѣнце́мъ, сщ҃енномꙋ́чениче, ꙗ҆ви́лсѧ є҆сѝ ᲂу҆кра́шенъ, и҆́мже ᲂу҆добре́нъ твоемꙋ̀ влⷣцѣ ны́нѣ предстои́ши.
Бг҃оро́диченъ:
Ꙗ҆́кѡ ко́рень и҆ и҆сто́чникъ, и҆ винꙋ̀ нетлѣ́нїѧ, тѧ̀, дв҃о, всѝ вѣ́рнїи вѣ́дꙋще, хвала́ми почита́емъ: ты́ бо ѵ҆поста́сное безсме́ртїе на́мъ и҆сточи́ла є҆сѝ.
Свѣти́ленъ. Подо́бенъ: Оу҆чн҃икѡ́мъ зрѧ́щымъ:
Ꙗ҆́кѡ побѣдоно́сецъ и҆зрѧ́денъ страсте́й, нїки́форе, вѣне́цъ сꙋгꙋ́бъ прїѧ́лъ є҆сѝ ѿ хрⷭ҇та̀ сп҃са: ꙗ҆́кѡ є҆́ресь бг҃обо́рнꙋю бжⷭ҇твєнныѧ і҆кѡ́ны ѿмета́ющихъ, премꙋ́дре низлага́ѧ, ст҃и́телю, и҆ страда́лецъ, ꙗ҆́кѡ благоче́стїѧ побо́рникъ, ѻ҆́ч҃е. ѡ҆ на́съ ᲂу҆̀бо молѝ, чтꙋ́щихъ тѧ̀, блаже́нне.
Сла́ва, и҆ ны́нѣ, бг҃оро́диченъ:
Ѻ҆ч҃ескихъ не ѡ҆ста́вль нѣ́дръ, а҆́ще и҆ воплоти́лсѧ є҆сѝ ѿ дв҃ы, гдⷭ҇и: и҆́бо спастѝ менѐ па́дшаго, преклони́въ нб҃са̀ соше́лъ є҆сѝ, и҆ и҆схи́тити хотѧ̀ ѿ ᲂу҆́стъ ѕвѣ́рѧ мы́сленнагѡ, и҆ є҆гѡ̀ ᲂу҆давлє́нїи держи́маго. тѣ́мже и҆зба́вльсѧ, сла́влю твою̀ си́лꙋ.
Слꙋ́жба ст҃а́гѡ великомꙋ́ченика і҆ѡа́нна но́вагѡ, мꙋ́ченнагѡ въ бѣлѣгра́дѣ.
На ма́лѣй вече́рни поста́вимъ стїхѝ д҃, и҆ пое́мъ стїхи̑ры, гла́съ а҃.
Подо́бенъ: Нбⷭ҇ныхъ чинѡ́въ:
Нбⷭ҇ныхъ чинѡ́въ слико́вника, ꙳ и҆ мꙋ́ченикѡмъ сострада́льца, ꙳ премꙋ́драго во́ина благоче́стїѧ, ꙳ и҆ и҆́стиннаго проповѣ́дника хрⷭ҇то́ва, ꙳ і҆ѡа́нна великоимени́таго, ꙳ восхва́лимъ, вѣ́рнїи, ра́дꙋющесѧ.
Два́жды.
Хрїстїа́нъ забра́ло крѣ́пкое, ꙳ столпа̀ непоколеби́маго мꙋчи́тельскими ласка̑нїи, ꙳ кꙋпца̀ всеизрѧ́днаго, ꙳ на нетлѣ́нныхъ и҆змѣни́вшаго тлѣ̑ннаѧ, ꙳ и҆ на́съ свы́ше назира́юща, вѣ́рнѡ ᲂу҆блажи́мъ.
Пе́рваго пострада́телѧ всѝ і҆ѡа́нна ꙳ свѣ́тлаго храбо́рника, ꙳ ны́нѣ на́мъ возсїѧ́вшаго ꙳ и҆́стиннаго страда́нїѧ лꙋча́ми, ꙳ воспое́мъ веселѧ́щесѧ, ꙳ и҆ тогѡ̀ моще́мъ кла́нѧющесѧ.
Сла́ва, гла́съ ѕ҃:
Прїиди́те, мꙋчениколю́бцы всѝ, прїиди́те, ли́къ соста́вимъ, вѣнцы̀ похвала́ми плетꙋ́ще, и҆ честнꙋ́ю главꙋ̀ і҆ѡа́нна вѣнча́юще: се́й бо всехрабо́рникъ хрⷭ҇то́вою воѡрꙋжи́всѧ вѣ́рою, въ по́двигъ вни́де мꙋ́жественнѣ, и҆ хрⷭ҇та̀ и҆сповѣ́да сн҃а бж҃їѧ и҆ бг҃а, творца̀ и҆ сꙋдїю̀ всѧ́ческихъ, пе́рсскꙋю до конца̀ горды́ню низложи́въ, и҆ мꙋчи́телѧ попра́въ свои́мъ терпѣ́нїемъ, мꙋ́ченикѡвъ бы́сть ѻ҆́бразъ и҆ надписа́нїе: и҆ ны́нѣ хрⷭ҇тꙋ̀ мо́литсѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ. А҆́ще н҃-ца: И҆ ны́нѣ, пра́здника.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Ѿ восто́чныхъ къ сѣ́вєрнымъ, ꙳ ꙗ҆́коже со́лнце возсїѧ́лъ є҆сѝ, ꙳ зарѧ́ми страда́нїѧ, ꙳ всѣ́хъ привлачѧ̀ ꙳ сердца̀ и҆ помышлє́нїѧ ꙳ къ твои̑мъ чꙋдесє́мъ, сла́вне.
Сті́хъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.
Сѣ́вєрнаѧ племена̀ всѧ̑, ꙳ є҆ли́кѡ благочєсти́ваѧ, ꙳ дꙋхо́внѣ ликовствꙋ́йте, пѣ́сньми ꙳ і҆ѡа́нна сла́вѧще, ꙳ ва́съ возлю́бльшаго.
Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.
Послѣ̑днимъ си̑мъ временѡ́мъ ꙳ ты̀ красота̀ показа́лсѧ є҆сѝ ꙳ мꙋ́ченикѡвъ страда̑нїѧ ѡ҆бновлѧ́ѧ, ꙳ и҆ до конца̀ низлага́ѧ ꙳ пре́лесть, блаже́нне, дꙋшегꙋби́тельнꙋю.
Сла́ва, и҆ ны́нѣ, бг҃оро́диченъ:
Бцⷣꙋ тѧ̀ и҆́стиннꙋю мꙋ́чєницы и҆сповѣ́даша, ꙳ со і҆ѡа́нномъ сла́внымъ, ꙳ мр҃і́е бг҃оневѣ́сто: ꙳ мы́ же тѝ припа́даемъ, грѣхѡ́въ просѧ́ще проще́нїѧ.
На вели́цѣй вече́рни: Блаже́нъ мꙋ́жъ:
На Гдⷭ҇и, воззва́хъ, поста́вимъ стїхѡ́въ и҃: и҆ пое́мъ стїхи̑ры, гла́съ в҃.
Подо́бенъ: Кі́ими похва́льными:
Кі́ими благохва́льными пѣ́сньми ꙳ воспое́мъ і҆ѡа́нна, и҆́стиннаго во́ина цр҃ѧ̀ вели́кагѡ, ꙳ свѣ́тлаго храбо́рника, ꙳ хрⷭ҇то́ва всеизрѧ́днаго страда́льца; ꙳ ᲂу҆тверди́телѧ вѣ́ры, ꙳ и҆ низложи́телѧ ле́сти, ꙳ терпѣли́ваго во и҆скꙋше́нїихъ, ꙳ и҆ въ мꙋ́кахъ непристра́шнаго, ꙳ нечести́выхъ наказа́телѧ стра́шнаго, ꙳ и҆ благочєсти́вымъ помо́щника те́плаго, ꙳ и҆́мже хрⷭ҇то́съ на́мъ да́рꙋетъ ве́лїю ми́лость.
Кі́ими похва́льными вѣнцы̀ ꙳ вѣнча́емъ і҆ѡа́нна; ꙳ мꙋ́ченикѡвъ ѡ҆бновле́нїе, ꙳ и҆скꙋ́снаго борца̀, ꙳ благоче́стїѧ бори́телѧ, ꙳ врага̀ низложи́вшаго, ꙳ кро́вїю зе́млю ѡ҆свѧ́щшаго, ꙳ и҆ воздꙋ̑шныѧ кнѧ́зи ᲂу҆страши́вшаго, ꙳ и҆ нбⷭ҇нымъ причта́вшагосѧ а҆́гг҃лѡмъ, ꙳ столпа̀ всезлата́го, ꙳ ѡ҆ не́мже содержа́тсѧ страны̑ сѣ́вєрныѧ: ꙳ и҆́мже хрⷭ҇то́съ си́хъ врагѝ побѣжда́етъ, ꙳ и҆мѣ́ѧй ве́лїю ми́лость.
Кі́ими благососта́вными гла́сы ꙳ просла́вимъ і҆ѡа́нна; ꙳ высокопа́рнаго ѻ҆рла̀ ꙳ слове́съ премꙋ́дростїю, ꙳ є҆гѡ́же крило́ма зла́та междора́мїѧ, ꙳ трꙋбꙋ̀ благоче́стїѧ, ꙳ бж҃їѧ сло́ва ꙳ та̑инства возгремѣ́вшаго, ꙳ меча̀ и҆з̾ѡщре́ннаго ꙳ прⷪ҇ро́ческими велѣ̑нїи, ꙳ и҆́мже пе́рсское возноше́нїе ꙳ хрⷭ҇то́съ низложѝ, ꙳ и҆мѣ́ѧй ве́лїю ми́лость.
Кі́ими пѣ́сньми и҆ добро́тами ꙳ ᲂу҆вѧзе́мъ і҆ѡа́нна чꙋ́днаго; ꙳ пло́ть да́вшаго ꙳ къ ра́намъ содробле́нїѧ, ꙳ на́съ ра́ди плещѝ на ра̑ны да́вшаго, ꙳ и҆ кро́вь неща́днѡ и҆злїѧ́вшаго ꙳ за и҆стощи́вшаго себѐ до ра́бїѧ ѻ҆́браза, ꙳ мꙋчи́телѧ ᲂу҆ди́вльшаго ꙳ преесте́ственнымъ терпѣ́нїемъ, ꙳ и҆ того̀ посра́мльша ꙳ сопротивле́нїемъ крѣ́пкимъ: ꙳ є҆го́же хрⷭ҇то́съ бг҃ъ вѣнцы̀ нетлѣ́нїѧ вѣнча̀, ꙳ и҆мѣ́ѧй ве́лїю ми́лость.
Сла́ва, гла́съ и҃:
Дне́сь честно́е торжество̀ нбⷭ҇наѧ пра́зднꙋютъ мы́сленнѡ, земна̑ѧ къ весе́лїю созыва́юще, въ па́мѧть до́блѧгѡ подви́жника і҆ѡа́нна, терпѣли́вагѡ а҆дама́нта: и҆знемого́ша бо рꙋ́ки бїю́щихъ, и҆ сꙋдїѧ̀ ᲂу҆трꙋди́сѧ, мꙋ̑ки ᲂу҆мышлѧ́ѧ. ѻ҆́нъ же вы́ше всѣ́хъ пребыва́ше, стоѧ̀ ꙗ҆́кѡ ле́въ посредѣ̀ по́двига, и҆ мꙋчи́телѧ ᲂу҆страша́ѧ и҆сповѣ́данїемъ хрⷭ҇то́вымъ, благодерзнове́ннѡ бо къ немꙋ̀ вопїѧ́ше: не коснѝ, ѽ є҆па́рше, сѐ тѝ пло́ть къ томле́нїю! ты̀ ᲂу҆́бѡ довѡ́льны ра̑ны наносѝ, хрⷭ҇то́съ же вѣнцы̀ нетлѣ̑нны да́рꙋетъ мнѣ̀, є҆го́же проповѣ́даю со ѻ҆ц҃е́мъ и҆ ст҃ы́мъ дх҃омъ.
И҆ ны́нѣ, бг҃оро́диченъ: а҆́ще н҃-ца, и҆ ны́нѣ, пра́здника.
Вхо́дъ. Прокі́менъ днѐ. Чтє́нїѧ трѝ.
Прⷪ҇ро́чества и҆са́їина чте́нїе.
[Глава̀ м҃г] Та́кѡ гл҃го́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ́зи ѿ ни́хъ: кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тели своѧ̑ и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тели, и҆ а҆́зъ свидѣ́тель, глаго́летъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ, да позна́ете и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бг҃ъ, и҆ по мнѣ̀ не бꙋ́детъ: А҆́зъ є҆́смь бг҃ъ, и҆ нѣ́сть ра́звѣ менє̀ спаса́ѧй. А҆́зъ возвѣсти́хъ и҆ спасо́хъ, ᲂу҆ничижи́хъ и҆ не бѣ̀ въ ва́съ чꙋ́ждїй. Вы̀ мнѣ̀ свидѣ́тели, и҆ а҆́зъ гдⷭ҇ь бг҃ъ: и҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй, сотворю̀, и҆ кто̀ ѿврати́тъ то̀; Си́це глаго́летъ гдⷭ҇ь бг҃ъ, и҆збавлѧ́ѧй ва́съ, свѧты́й і҆зра́илевъ.
Премꙋ́дрости соломѡ́ни чте́нїе.
[Глава̀ г҃] Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Глава̀ д҃] Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть: и҆ живы́й посредѣ̀ грѣ̑шникъ, преста́вленъ бы́сть: восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи̑ры, гла́съ а҃, самогла̑сны:
Сѣ́вєрнаѧ всѧ̑, ра́дꙋйтесѧ, и҆ веселѧ́щесѧ взыгра́йте, посредѣ̀ себє̀ и҆мꙋ́ще ѕвѣздꙋ̀ незаходи́мꙋю и҆ многосвѣ́тлꙋю, со́лнєчныѧ зари̑ превосходѧ́щꙋю, і҆ѡа́нна великоимени́таго, благочести́вагѡ ко́рене мꙋ́ченическꙋю вѣ́твь, многопло́днꙋю и҆ и҆збра́ннꙋю, мно́гѡ хрⷭ҇та̀ возлю́бльшаго, и҆ ѿ негѡ̀ мно́жае возлю́бленна бы́вшаго, и҆ на́мъ просѧ́ща ве́лїѧ ми́лости.
Благочести́выхъ ро́дове всѝ, дꙋхо́внѡ ликовствꙋ́юще, ѻ҆́бщꙋю по́льзꙋ восхвали́те, въ наро́читомъ днѝ сегѡ̀ пра́здника, посредѣ̀ себѐ и҆мꙋ́ще, ꙗ҆́кѡ ши́покъ благово́нный, тогѡ̀ ст҃о́е и҆ многострада́льное тѣ́ло, ны́нѣ просла́вленное сла́вою нетлѣ́нїѧ, и҆ цѣльбы̑ подаю́ща дꙋшє́внымъ страсте́мъ и҆ тѣлє́снымъ.
Востѡ́чнаѧ, сѣ́вєрнымъ сликовствꙋ́йте, и҆ не высѡ́каѧ мꙋ́дрствꙋйте: и҆́бо со́лнце дрꙋго́е здѣ̀ пресла́внѡ показа́сѧ, не къ за́падѡмъ творѧ́ще тече́нїе, и҆ под̾ зе́млю ᲂу҆стремлѧ́ющесѧ, но къ нб҃сє́мъ восхо́дъ и҆мѣ́юще ѿ землѝ, невеще́ствєннымъ спребыва́юще ᲂу҆мовѡ́мъ: и҆ ѿтꙋ́дꙋ на́съ ѡ҆зарѧ́етъ, соблюда́етъ и҆ ѡ҆свѧща́етъ, и҆ ѿ хрⷭ҇та̀ про́ситъ ве́лїѧ ми́лости.
Сла́ва, гла́съ є҃:
Вострꙋ́бимъ дх҃о́вною цѣвни́цею, въ пра́зднественнѣй па́мѧти, і҆ѡа́нна доблемꙋ́дреннаго во́ина, ꙗ҆̀же ѻ҆́крестъ созыва́юще съ высо́кимъ проповѣ́данїемъ, и҆ глаго́люще: сѐ и҆́же на землѝ пострада́вый, и҆ ны́нѣ на нб҃сѣ́хъ црⷭ҇твꙋѧй. Прїиди́те, бра́тїе, семꙋ̀ поревнꙋ́йте, и҆ поревнова́вше послѣ́дꙋйте ᲂу҆се́рдїю, мꙋ́чєницы бы́вше произволе́нїемъ, сѐ ми́лостыни сокро́вище пребога́тое, прїиди́те, ца́рїе и҆ кнѧ́зи, сего̀ подража́йте, да и҆ подѡ́бнымъ вѣнцє́мъ приѡбщите́сѧ: бога́тїи и҆ ни́щїи, здра́вїи и҆ недꙋ́жнїи, почерпи́те ѻ҆би́льнѡ и҆сцѣлє́нїѧ ѿ ковче́га сщ҃е́ннагѡ, ꙗ҆́кѡ ѿ нетлѣ́нна и҆сто́чника, въ сла́вꙋ бг҃ꙋ и҆ сп҃сꙋ, прославлѧ́ющемꙋ того̀ просла́вльшаго.
И҆ ны́нѣ, бг҃оро́диченъ: А҆́ще н҃-ца, И҆ ны́нѣ, пра́здника.
На стїхо́внѣ стїхи̑ры, гла́съ д҃. Подо́бенъ: Ꙗ҆́кѡ до́блѧ:
Ꙗ҆́кѡ бл҃гонаро́читъ ѻ҆ве́нъ, ꙳ морскꙋ́ю преплы́лъ є҆сѝ пꙋчи́нꙋ, ꙳ и҆ же́ртва прине́слсѧ є҆сѝ жива̀ и҆ ѡ҆дꙋшевле́нна, ꙳ на́съ ра́ди, сла́вне, закла́вшемꙋсѧ ꙳ бж҃їю а҆́гнцꙋ: ꙳ ѿ негѡ́же прїе́мь трꙋдѡ́въ твои́хъ по́чєсти, ꙳ молѝ ѿ тлѝ и҆ бѣ́дъ и҆зба́витисѧ, ꙳ вѣ́рою и҆ любо́вїю творѧ́щымъ ꙳ пречестнꙋ́ю па́мѧть твою̀.
Сті́хъ: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.
Ни сꙋровство̀ мꙋчи́телѧ, ꙳ ни же́злєннаѧ бїє́нїѧ, ꙳ ни пло́ти содроблє́нїѧ, ꙳ ни крове́й пото́цы, ꙳ твою̀ тве́рдость возмого́ша, сла́вне, ѿ хрⷭ҇та̀ ѿврати́ти, ꙳ па́че же вопїѧ́лъ є҆сѝ къ мꙋ́чащымъ: ꙳ раздежи́те мѧ̀ мꙋ́ками, ꙳ ꙗ҆́коже горни́ломъ и҆скꙋси́тельнымъ, ꙳ да зла́то и҆скꙋше́но ꙗ҆влю́сѧ созда́вшемꙋ.
Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.
Ни вери́гъ тѧ́жести, ꙳ ни темни́цы ѕлосмра́дїе, ꙳ ни влача́щихъ безчеловѣ́чїе, ꙳ твоѐ благостоѧ́нїе ѿ твоегѡ̀ влⷣки, ꙳ блаже́нне, поколеба́ша: ꙳ темни́цꙋ бо черто́гъ свѣ́телъ, ꙳ вери̑ги же гри́внꙋ зла́тꙋ, ꙳ влаче́нїе же го́рькое колесни́цꙋ ца́рскꙋю, ꙳ хрⷭ҇та̀ ра́ди вмѣнѧ́лъ є҆сѝ.
Сла́ва, гла́съ г҃:
Страстоте́рпческїѧ лꙋчы̀ возсїѧ́вше, прите́кше наслади́тесѧ, бра́тїе: ѿ нб҃съ бо къ на́мъ соше́дъ неви́димѡ, и҆збра́нный во́инъ хрⷭ҇то́въ і҆ѡа́ннъ, и҆ трапе́зꙋ предложи́въ дꙋхо́внꙋю, всѣ́хъ ᲂу҆чрежда́етъ ѻ҆би́льнѡ, проти́вꙋ коегѡ́ждо проше́нїѧ, и҆ припаде́мъ вѣ́рою тогѡ̀ мо́щи, ѡ҆б̾е́млюще, и҆ моле́бнѣ глаго́люще: многострада́льне и҆ треблаже́нне, це́рковь, ю҆́же возлюби́лъ є҆сѝ, въ не́йже честны̑мъ твои̑мъ моще́мъ ста́ти и҆зво́лилъ є҆сѝ, съ бг҃овѣнча́нными господа́ми на́шими, возлю́бльшими тѧ̀ и҆ прине́сшими, сохранѧ́й и҆ покрыва́й твои́мъ къ бг҃ꙋ дерзнове́нїемъ.
И҆ ны́нѣ, бг҃оро́диченъ: А҆́ще н҃-ца, И҆ ны́нѣ, пра́здника.
Тропа́рь, гла́съ д҃:
Житїѐ на землѝ до́брѣ ѡ҆кормлѧ́ѧ, страда́льче, ми́лостынѧми и҆ ча́стыми моли́твами, и҆ слеза́ми, па́ки же ко страда́нїю мꙋ́жески ᲂу҆стреми́всѧ, пе́рсское ѡ҆бличи́лъ є҆сѝ нече́стїе. Тѣ́мже цр҃кве бы́лъ є҆сѝ ᲂу҆твержде́нїе, и҆ хрⷭ҇тїа́нъ похвало̀, і҆ѡа́нне приснопа́мѧтне.
На ᲂу҆́трени, по а҃-й стїхоло́гїи, сѣда́ленъ, гла́съ а҃.
Подо́бенъ: Гро́бъ тво́й:
Гро́бъ тво́й, свѧ́те, дрꙋгі́й бы́сть сїлѡа́мъ вѣ́рою приходѧ́щымъ, и҆сцѣле́нїе точѧ̀ недꙋ́гѡмъ тѣлє́снымъ, и҆ страсте́мъ дꙋшє́внымъ: тѣ́мже дне́сь соше́дшесѧ, твою̀ ст҃ꙋ́ю соверша́емъ па́мѧть, сла́вѧще є҆ди́наго бг҃а на́шего.
Два́жды.
Сла́ва, и҆ ны́нѣ, бг҃оро́диченъ:
Тебѐ, бг҃ома́ти, і҆ѡа́ннъ вѣнцено́сецъ посредѝ сꙋди́ща свѣ́тлѡ и҆́стиннꙋю бцⷣꙋ и҆сповѣ́да, ѿ трⷪ҇цы є҆ди́наго ро́ждшꙋю, и҆ дв҃ꙋ пребы́вшꙋю: тѣ́мже, всепѣ́таѧ, съ ни́мъ твоего̀ сн҃а и҆ бг҃а молѝ, грѣхѡ́въ дарова́ти на́мъ проще́нїе.
По в҃-й стїхоло́гїи, сѣда́ленъ гла́съ г҃. Подо́бенъ: Красотѣ̀:
Красе́нъ на́мъ вои́стиннꙋ ѿ бг҃а дарова́лсѧ є҆сѝ па́че зла́та и҆ топа́зїѧ, і҆ѡа́нне честнѣ́йшїй, всѣ́хъ ѻ҆́чи ᲂу҆́мныѧ и҆ сердє́чныѧ привлачѧ̀ къ разꙋмѣ́нїю чꙋде́съ твои́хъ страда́нїй. тѣ́мже любо́вїю зове́мъ тѝ: ра́дꙋйсѧ, на́ша похвало̀ пресвѣ́тлаѧ.
Два́жды.
Сла́ва, и҆ ны́нѣ, бг҃оро́диченъ:
Красотѣ̀ дѣ́вства твоегѡ̀, и҆ пресвѣ́тлой чистотѣ̀ твое́й гаврїи́лъ ᲂу҆диви́всѧ, вопїѧ́ше тѝ, бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀; недоꙋмѣва́ю и҆ ᲂу҆жаса́юсѧ. тѣ́мже ꙗ҆́кѡ повелѣ́нъ бы́хъ, вопїю́ ти: ра́дꙋйсѧ, благода́тнаѧ.
По полѷеле́и сѣда́ленъ, гла́съ д҃. Подо́бенъ: Оу҆диви́сѧ:
Оу҆диви́сѧ мꙋчи́тель, пачеесте́ственное зрѧ̀ въ тебѣ̀ терпѣ́нїе, воспрїѧ́ша тѧ̀ а҆́гг҃ли, вѣнцы̀ ѡ҆блага́юще, посрами́шасѧ бѣ́сове твое́ю до́блестїю. Є҆го́же бо мнѧ́хꙋ ласка́ньми низложи́ти, си́мъ побѣжде́ни бы́ша и҆ падо́ша, ᲂу҆тверди́шасѧ вѣ́рнїи твои́мъ и҆сповѣ́данїемъ: и҆́же сего̀ тогда̀ ᲂу҆крѣпи́вый, просвѣтѝ дꙋ́шы на́шѧ.
Два́жды.
Сла́ва, и҆ ны́нѣ, бг҃оро́диченъ:
Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, сщ҃е́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃ою пребыва́етъ.
Степє́нна, а҃-й а҆нтїфѡ́нъ д҃-гѡ гла́са. Прокі́менъ. Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀. Є҆ѵⷢ҇лїе лꙋкѝ, зача́ло р҃ѕ.
По н҃-мъ ѱалмѣ̀ стїхи́ра, гла́съ ѕ҃:
Дне́сь цр҃ковь торжествꙋ́етъ, страстоте́рпца красѧ́щисѧ по́двиги, ꙗ҆́кѡ многоцѣ́нною ѻ҆де́ждею, и҆ вопїе́тъ хва́лѧщисѧ: сицєва̀ моѧ̑ рождє́нїѧ, таковы̑ моѝ сы́нове, и҆̀хже пе́рвѣе породи́хъ кр҃ще́нїемъ, воспита́хъ же стра́хомъ гдⷭ҇нимъ, и҆ ны́нѣ мꙋ́ченики ви́ждꙋ, и҆́стинѣ вѣне́чники и҆збра̑нны, да мо́лѧтсѧ ѡ҆ вселе́ннѣй ко гдⷭ҇ꙋ.
Канѡ́нъ бцⷣы на ѕ҃, гла́съ в҃: Нетре́нꙋ, неѻбы́чнꙋ:
И҆ ст҃а́гѡ на и҃, є҆гѡ́же краегране́сїе:
Но́вомꙋ мч҃никꙋ но́вꙋ приношꙋ̀ хвалꙋ̀, въ бг҃оро́дичнахъ же, григо́рїе.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑ и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Новоѧвле́нъ мч҃никъ, бл҃же́нне і҆ѡа́нне, вселе́ннѣй напослѣ́докъ ꙗ҆ви́лсѧ є҆сѝ. тѣ́мже мѝ пода́ждь сло́во твое́ю бл҃года́тїю, твоѧ̑ по́двиги воспѣ́ти по достоѧ́нїю.
Ѻ҆чи́ма мы́сленныма предстоѧ̀ на сꙋди́щи, мꙋ́ченикѡвъ зрѣ́лъ є҆сѝ честно́е сосло́вїе, тебѐ призыва́ющихъ ра́достнѡ, і҆ѡа́нне, и҆ подо́бными вѣнцы̀ ᲂу҆краша́ющихъ.
Во́инствомъ досточꙋ́днымъ твоегѡ̀ сопротивле́нїѧ побѣ̑днаѧ прїѧ́хомъ, на мꙋчи́телѧ є҆стествꙋ̀: соверше́ннѣ бо посра́мленъ бы́въ, не ктомꙋ̀ мꙋчи́тєльскаѧ дерза́ти начина́етъ.
Ѡ҆дѣ́ѧвсѧ въ бронѧ̀ и҆сповѣ́данїѧ вѣ́ры, и҆ шле́мъ возложи́въ бл҃года́ти свѣтлѣ́йшїй, ѧ҆зы́комъ же, і҆ѡа́нне, бг҃овѣща́ннымъ и҆ честны́мъ, ꙗ҆́коже мече́мъ ссѣ́клъ є҆сѝ безꙋ́мнаго є҆па́рха.
Бг҃оро́диченъ:
Гора̀ превысо́каѧ, ю҆́же ви́дѣ данїи́лъ, ка́мень ѿ горы́ же ѿсѣче́сѧ мꙋ́жескꙋ рꙋкꙋ̀ кромѣ̀, тебѐ проѡбразова̀, бцⷣе: безъ мꙋ́жа бо на́мъ пло́тїю родила̀ є҆сѝ є҆мманꙋ́ила.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.
Мꙋ́ками ꙗ҆́кѡ зла́то чⷭ҇тно́е и҆скꙋси́лсѧ є҆сѝ, страда́льче сла́вне, и҆ цр҃ю̀ си́лъ прине́слсѧ є҆сѝ всепло́дїе словесѝ и҆́стинно, вмѣ́стѡ ѻ҆гнѧ̀ ѻ҆лта́рнагѡ мече́мъ и҆стлѣ́емо.
Ѡ҆ влⷣцѣ пе́рвѣе и҆ гдѣ̀ не насы́тишасѧ і҆ꙋде́є законопрестꙋ́пнїи и҆ прⷪ҇рокоꙋбі́йственнїи: но и҆ тогѡ̀ мꙋ́ченика влачи́ма неми́лостивнѡ ѿ слꙋ́гъ нече́стїѧ текꙋ́ще закла́хꙋ.
Є҆па́рхъ сѣ̑ти простира́ше, словесы̀ ласка́тельными къ ловле́нїю страда́льца премꙋ́драгѡ, но ѻ҆́нъ вопїѧ́ше къ немꙋ̀: преста́ни на мно́зѣ бꙋесло́вѧ, а҆́зъ бо тва́ри не поклоню́сѧ па́че созда́вшагѡ.
Ма́слина плодови́таѧ въ цр҃кви жива́гѡ бг҃а твои́хъ моще́й ра́ка ны́нѣ ꙗ҆ви́сѧ, ѿ неѧ́же ѡ҆бира́емъ разли̑чнаѧ недꙋ́гѡвъ и҆сцѣлє́нїѧ, и҆́же тобо́ю ѡ҆бога́щшїисѧ, и҆ чꙋдесы̀ твои́ми красѧ́щїисѧ.
Бг҃оро́диченъ:
Речѐ бж҃е́ственный і҆езекі́иль: и҆ бꙋ́детъ две́рь затворе́на, и҆ сїѐ на тебѣ̀ и҆спо́лнисѧ, влⷣчце: вни́де бо несказа́ннѡ въ тѧ̀ ѻ҆́ч҃ее сло́во, и҆ мі́рꙋ ꙗ҆ви́сѧ плотоно́сецъ и҆зъ тебє̀, дв҃о, сохрани́въ тѧ̀ во ѻ҆бои́хъ.
Сѣда́ленъ, гла́съ и҃. Подо́бенъ: Премꙋ́дрости:
Премꙋ́дрости рачи́тель бы́въ, сокро́вище добродѣ́телей, ѿѻнꙋ́дꙋже и҆ поче́рплъ є҆сѝ бжⷭ҇твєннаѧ разꙋмѣ̑нїѧ. тѣ́мже и҆ вре́мени призва́вшꙋ, къ подвигѡ́мъ ᲂу҆се́рднѡ совле́клсѧ є҆сѝ, прїе́млѧ мꙋ́ченичєскїѧ ра̑ны, пло́ти содробле́нїе, и҆ крове́й и҆стоща́нїе, и҆ ны́нѣ живе́ши въ неизрече́ннѣ свѣ́тѣ съ мꙋ́ченики. Сегѡ̀ ра́ди вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дорова́ти покланѧ́ющымсѧ вѣ́рою ст҃ы̑мъ моще́мъ твои̑мъ.
Два́жды.
Сла́ва, и҆ ны́нѣ, бг҃оро́диченъ:
Помышлѧ́ю сꙋ́дъ и҆ бою́сѧ, и҆спыта́нїѧ трепе́щꙋ стра́шнагѡ, и҆ ᲂу҆жаса́юсѧ мꙋ́ки, и҆ ѻ҆гнѧ̀ болѣ́зни, тмы́ же и҆ та́ртара. Оу҆вы̀, что̀ сотворю̀; стꙋ́дъ ка́кѡ претерплю̀, є҆гда̀ кни̑ги разгнꙋ́тсѧ и҆ дѣѧ̑нїѧ ѡ҆блича́тсѧ; Сегѡ̀ ра́ди припа́даю тѝ, бцⷣе пречⷭ҇таѧ, предста́ни мѝ тогда̀, нꙋ́жды ѻ҆́ныѧ и҆зима́ющи: тебе́ бо и҆́мамъ прибѣ́жище, влⷣчце.
Пѣ́снь д҃. І҆рмо́съ:
Сѣдѧ́й въ сла́вѣ на престо́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Оу҆́дица льсти́ваѧ ѧ҆зы́къ бѧ́ше мꙋчи́телѧ, вра́жїими подви́жимь ко́зньми, преложи́ти великодꙋ́шнаго спѣша́щь: но бездѣ́ленъ ѡ҆бличи́сѧ, страда́льцꙋ въ ра́дости зовꙋ́щꙋ: сла́ва си́лѣ твое́й, гдⷭ҇и.
Что́ ми мнѡ́гаѧ словеса̀, и҆ ѡ҆бѣща́нїѧ тлѣ́ємаѧ, ꙗ҆̀же безꙋ́мнѣ предлага́еши, і҆ѡа́ннъ къ мꙋчи́телю вопїѧ́ше; сїѧ̑ всѧ̑ мнѣ̀ же́лчи горча̑йша, сла́достнѡ взыва́ющꙋ: сла́ва си́лѣ твое́й, гдⷭ҇и.
Є҆гда̀ ра̑ны мно́жайшыѧ на мои́хъ процвѣтꙋ́тъ пло́техъ, тогда̀ вѣнцє́мъ свѣтлѣ́йшымъ ᲂу҆пова́ю сподо́битисѧ, страда́лецъ къ пе́рсꙋ глаго́лаше: не коснѝ про́чее, ѽ ѕломꙋ́дренне! а҆́зъ бо вопїю̀: сла́ва си́лѣ твое́й, гдⷭ҇и.
Ника́коже тебє̀ послꙋ́шаю къ па́гꙋбѣ привлача́ща, ѻ҆гнеслꙋжи́телю і҆ѡа́ннъ вѣща́ше, ᲂу҆мрꙋ́ же па́че ᲂу҆се́рднѡ за ᲂу҆ме́ршаго менє̀ ра́ди, съ мꙋ́ченики свѣ́тлѡ вопїю̀: сла́ва си́лѣ твое́й, гдⷭ҇и.
Бг҃оро́диченъ:
И҆з̾ѡбразова́ше въ чермнѣ́мъ проше́ствїе дре́вле і҆и҃лево безмꙋ́жное твоѐ ржⷭ҇тво̀, всецр҃и́це: ꙗ҆́коже бо ѻ҆́нъ тогда̀ про́йде немо́креннѡ, та́кѡ и҆ хрⷭ҇то́съ безсѣ́меннѡ ѿ твои́хъ пречⷭ҇тыхъ крове́й произы́де, дв҃о.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а всѣ̑мъ воспѣва́ющымъ тѧ̀ ми́ръ подава́ющаѧ.
И҆знемого́ша бїю́ще слꙋги̑ страстоте́рпчєскїѧ плѡ́ти, ᲂу҆трꙋди́сѧ и҆ мꙋчи́тель, томле́нїѧ и҆зыскꙋ́ѧ: но ѻ҆́нъ до́блественнѣ терпѧ́ше, красꙋ́ѧсѧ ра́нами, ꙗ҆̀же за любо́вь под̾ѧ́тъ гдⷭ҇а своегѡ̀.
Ко́ль стра́шно же и҆ сла́вно ѡ҆ хрⷭ҇тѣ̀ сопротивле́нїе твоѐ, є҆мꙋ́же ᲂу҆́бѡ почꙋди́шасѧ племена̀, ѡ҆брѣ̑тшаѧсѧ на по́двизѣ, и҆ похвали́ша терпѣ́нїе, пе́рсы же посрами́шасѧ со і҆ꙋдє́и, стꙋдо́мъ ѡ҆бо́лкшесѧ.
Ѻ҆́крестъ стоѧ́хꙋ мнѡ́жества, зрѧ́ще быва́емое, сла́вне, и҆ мꙋчи́тель предсѣдѧ́ше, тебѐ приѡбрѣстѝ надѣ́ѧсѧ: по погрѣшѝ безꙋ́мный тща́нїѧ, всꙋ́е претѧ̀ непрестра́шномꙋ, и҆ вотщѐ бїѧ̀ а҆дама́нта.
Є҆па́рха ѕлочести́вагѡ безꙋ́мномꙋ велѣ́нїю рꙋга́ѧсѧ бжⷭ҇твенный і҆ѡа́ннъ, пре́лесть ѡ҆блича́ше пе́рсскїѧ горды́ни, со́лнцꙋ, глаго́лѧ, не поклоню́сѧ, тва́ри сꙋ́щи, человѣ́кѡмъ рабо́тающей, бо́льшемꙋ рꙋ́къ бж҃їихъ созда́нїю.
Бг҃оро́диченъ:
Горѣ̀ бѧ́ше соприсносꙋ́щенъ ѻ҆ц҃ꙋ̀ и҆ бг҃ꙋ, бг҃ъ сло́во, и҆ съ на́ми бг҃ъ и҆ чл҃вѣ́къ, бцⷣе, тобо́ю соше́дъ къ на́шемꙋ смире́нїю, свобожда́ѧ[[В источнике свобожда́ю. Прим. orthlib]] ѿ клѧ́твы пра́дѣднїѧ: тебе́ бо ви́дѣ патрїа́рхъ і҆а́кѡвъ лѣ́ствицꙋ нбⷭ҇нꙋю.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Ника́коже поколеба́ша столпа̀ благоче́стїѧ, свирѣ́пство повелѣва́ющагѡ, нижѐ па́лицами бїє́нїѧ, но ни ра̑ны, ни сме́рть нꙋ́жднѣйшаѧ.
Ѻ҆́кꙋ херꙋві́мскꙋ ᲂу҆ма̀ твоегѡ̀ чистота̀ ᲂу҆подо́бисѧ: до́лѣ бо мꙋ́жески терпѣ́лъ є҆сѝ мꙋчє́нїѧ, и҆ горѣ̀ предстоѧ́лъ є҆сѝ влⷣцѣ, и҆́же посла̀ тебѣ̀ вѣне́цъ побѣди́тельный.
Взыгра́шасѧ свѣ́тлѡ мꙋ́ченичестїи тогда̀ ли́кове, ви́дѣвше твоѐ дерзнове́нїе, и҆ прини́кше кꙋ́пнѡ со а҆́гг҃лы, неви́димѡ ᲂу҆крѣплѧ́хꙋ тѧ̀ въ по́двизѣ.
Оу҆́жа желѣ̑знаѧ і҆ѡа́ннъ страда́лецъ и҆зѧ́щный зла́та ѻ҆гѡ́рлїѧ вмѣнѧ́еши ѧ҆̀, и҆ ꙗ҆̀же ѿ і҆ꙋдє́й ка́меней мєта́нїѧ, степе́ни къ нбⷭ҇номꙋ ше́ствїю.
Бг҃оро́диченъ:
Ѻ҆бра́знѣ рꙋно̀ гедеѡ́нъ прїѧ́тъ ѡ҆роше́но, твоѐ предвозвѣща́ѧ чꙋ́до: сни́де бо ꙗ҆́кѡ до́ждь на рꙋно̀, бцⷣе, є҆ди́ный ѿ трⷪ҇цы во ᲂу҆тро́бꙋ твою̀ воплоща́емь.
Конда́къ, гла́съ д҃. Подо́бенъ: Вознесы́йсѧ:
Морскꙋ́ю пла́ваѧ пꙋчи́нꙋ кꙋ́плею, ѿ восто́ка тща́лсѧ є҆сѝ къ сѣ́верꙋ: но бг҃ꙋ призва́вшꙋ тѧ̀, ꙗ҆́коже матѳе́й мы́тницꙋ, ты́ же кꙋ́плю ѡ҆ста́вль, и҆ томꙋ̀ послѣ́довалъ є҆сѝ кро́вїю мꙋче́нїѧ, вре́менными и҆скꙋпи́въ непроходи̑маѧ, и҆ вѣне́цъ прїѧ́лъ є҆сѝ непобѣди́мый.
І҆́косъ:
Премꙋ́дрый зижди́тель и҆ влⷣка, и҆ господи́нъ вїногра́да мы́сленнагѡ, ꙗ҆́коже прест҃ы́ми свои́ми ᲂу҆сты̑ во при́тчи вїногра́да глаго́летъ: ꙗ҆́кѡ во є҆диныйна́десѧть ча́съ дѣ́лавшымъ подо́бнꙋю дадѐ цѣ́нꙋ, ꙗ҆́коже и҆ ѿ пе́рвагѡ дѣ́лавшымъ. ны́нѣ дѣ́лы и҆звѣстѝ въ при́тчи кры́емое, і҆ѡа́нна показа́въ свѣ́тла мꙋ́ченика, на са́мый ᲂу҆жѐ послѣ́докъ лѣ̑тнымъ ты́сѧщамъ, подо́бнѡ пе́рвымъ страда́льцємъ просла́ви нетлѣ́нїемъ, и҆ и҆сцѣле́нїѧ да́ромъ: вре́менными бо и҆скꙋпи́въ непроходи̑маѧ, и҆ вѣне́цъ но́ситъ непобѣди́мый.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
Приноси̑маѧ тѝ страда́нїѧ, і҆ѡа́нне досточꙋ́дне, младе́нєцъ стрѣлѧ̑нїѧ мꙋ́жески вмѣнѧ́лъ є҆сѝ, ра́достнѡ поѧ̀: препѣ́тый ѻ҆тцє́въ гдⷭ҇ь и҆ бг҃ъ, благослове́нъ є҆сѝ.
Рꙋ́кꙋ ча́стѡ простира́ѧ къ мꙋчи́телю, і҆ѡа́ннъ глаго́лаше: что̀ всꙋ́е трꙋди́шисѧ, безстꙋ́дне; мꙋ́ки бо творѧ̀ мнѣ̀, пестра̑ ѡ҆дѣѧ̑нїѧ, и҆ сме́рть вѣне́цъ безсме́ртїѧ.
И҆́стиненъ а҆́зъ мꙋ́ченикъ, и҆́стиннагѡ хрⷭ҇та̀ бг҃а на́шегѡ, страда́лецъ взыва́ше: влечє́нїѧ бо цвѣ́ты благовѡ́нны вмѣнѧ́ю, и҆ крѡ́вныѧ стрꙋи̑, ба́ню креще́нїѧ.
Но́щь ѿ менє̀ сꙋ́дитсѧ житїѐ є҆́же во пло́ти, і҆ѡа́ннъ любомꙋ́дрствоваше: ско́рѡ ᲂу҆́бѡ про́чее пло́ти разрѣши́ мѧ соꙋ́за, да ꙗ҆́же со хрⷭ҇то́мъ жи́знь наслѣ́дꙋю.
Бг҃оро́диченъ:
Ри́торствꙋющїй ѧ҆зы́къ безгла́сенъ и҆ недви́жимь, и҆́же ѡ҆ тебѣ̀ зри́мъ, бг҃ора́дованнаѧ: не и҆́мать бо пости́гнꙋти непостижи́магѡ зача́тїѧ неизрече́нное рожде́нїе.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Оу҆блажи́ша тѧ̀ царѝ, благослови́ша тѧ̀ свѧти́тели, слы́шаще твоѐ мꙋ́жественное терпѣ́нїе, и҆ ко хрⷭ҇тꙋ̀ хода́таѧ стѧжа́вше тѧ̀: и҆ ны́нѣ приходѧ́ще честны̑мъ твои̑мъ моще́мъ покланѧ́ютсѧ.
Шата́шасѧ и҆ногда̀ ꙗ҆зы́цы съ людьмѝ законопрестꙋ́пными, на хрⷭ҇та̀ и҆ гдⷭ҇а поꙋча́ющесѧ тщє́тнаѧ, и҆ ны́нѣ собра́шасѧ, пе́рсы ᲂу҆́бѡ і҆ѡа́нна влача́ще, і҆ꙋдє́и же закала́юще.
Ꙗ҆́тъ бы́сть тобо́ю и҆ ᲂу҆держа́нъ, и҆ до конца̀ низложе́нъ ѕмі́й безпло́тный во пло́ти твои́мъ терпѣ́нїемъ. и҆ тогѡ̀ крѣ́пость ᲂу҆гасѐ, и҆ лю́тое мꙋчи́тельство, хрⷭ҇тꙋ̀ въ пло́ть ѡ҆бо́лкшꙋсѧ.
Хвалѧ́сѧ ꙗ҆́звами хрⷭ҇то́выми, къ вѣ̑чнымъ восте́клъ є҆сѝ ѻ҆би́телемъ, въ багрѧни́цꙋ ѡ҆дѣ́ѧнъ, мꙋ́чениче, ѿ крове́й твои́хъ ѡ҆багре́нꙋю, и҆ свѣ́тлѡ цр҃ю̀ си́лъ предстои́ши, съ мꙋ́ченики ликꙋ́ѧ.
Бг҃оро́диченъ:
И҆са́їи ᲂу҆́гль дре́вле по́сланъ бы́сть, клеща́ми носи́мь ѿ серафі́ма, каса́ющсѧ томꙋ̀, и҆ грѣхѝ ѡ҆ставлѧ́ющь: клеща́ же ты̀ є҆сѝ, дв҃о, бжⷭ҇твенный ᲂу҆́гль носи́вшаѧ, во ѡ҆ставле́нїе грѣхѡ́въ человѣ́чествꙋ.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чи́стаѧ приснодв҃о.
Во́инъ и҆́стинный хрⷭ҇то́ва проповѣ́данїѧ бы́лъ є҆сѝ, і҆ѡа́нне, и҆ ле́сти потреби́тель безбо́жїѧ. тѣ́мже и҆ ны́нѣ моли́твами твои́ми потребѝ ва́рварское воста́нїе, во́инствꙋ на́шемꙋ подъ но́ги сїѐ, сла́вне, низлага́ѧ.
А҆́ще и҆ разсѣ́ѧни бы́ша сщ҃є́нныѧ твоѧ̑ плѡ́ти, мꙋ́дре, а҆́ще и҆ крѡ́ви и҆злїѧ́шасѧ, но побѣди́тєльнаѧ на тебѣ̀ преидо́ша. тѣ́мъ на на́съ востаю́щихъ си́лою твое́ю посрамѝ, и҆ во́инство на́ше ꙗ҆вѝ побѣди́телѧ.
Лꙋ́къ сокрꙋшѝ нечести́выхъ, во́ине непобѣди́ме, непра́веднѡ дви́жимый на твоѐ достоѧ́нїе, є҆́же себѣ̀ и҆збра́лъ є҆сѝ возлюби́въ, и҆ ѻ҆те́чество на́ше ᲂу҆твердѝ: да и҆ мы̀ ти́хѡ и҆ ми́рнѡ препро́водимъ жи́тельство.
Ю҆́же жела́хомъ па́мѧть свѣтоза́рнꙋю твою̀ и҆ честнꙋ́ю, прїѧ́хомъ и҆ ѡ҆блобыза́хомъ ра́дꙋющесѧ дꙋ́хомъ, и҆ и҆гра́юще мо́лимсѧ, блаже́нне: мѣ́сто сїѐ и҆ лю́ди, и҆дѣ́же и҆зво́ли сла́витисѧ, сохранѧ́й невре́днѡ, со ѻ҆те́чествомъ на́шимъ.
Бг҃оро́диченъ:
Є҆го́же прⷪ҇ро́цы провозвѣсти́ша всѝ многоѻбра́знѣ, воплоща́ема на́съ ра́ди, тобо́ю ви́дѣхомъ, бцⷣе, бг҃а на́мъ соверше́нна, и҆збавлѧ́ющаго человѣ́ки ѿ клѧ́твы пра́дѣднїѧ: мы́ же твои́ми моли́твами вѣ́чныѧ гее́нны да и҆зба́вимсѧ.
Свѣти́ленъ. Подо́бенъ: Пло́тїю ᲂу҆снꙋ́въ:
Свѣ́тꙋ невече́рнемꙋ предстоѧ̀, блаже́нне, съ мꙋ́ченическими ли̑ки, воспѣва́ющыѧ тѧ̀ въ па́мѧти твое́й ѿ и҆скꙋше́нїѧ спаса́й моли́твами твои́ми.
Два́жды.
Сла́ва, и҆ ны́нѣ, бг҃оро́диченъ.
Незаходи́магѡ свѣ́та носи́ло, приснодѣ́во, просвѣ́щшагѡ сѣдѧ́щихъ во тмѣ̀ невѣ́дѣнїѧ пре́лести, ѡ҆зарѝ и҆ на́мъ грѣ̑шнымъ свѣ́тъ сн҃а твоегѡ̀.
На хвали́техъ, Всѧ́кое дыха́нїе: поста́вимъ стїхѝ д҃: и҆ пое́мъ стїхи̑ры, гла́съ а҃. Подо́бенъ: Всехва́льнїи мꙋ́чєницы:
Прехва́льне і҆ѡа́нне, ꙳ тебѐ ни свирѣ́пство мꙋчи́телѧ, ꙳ ни слове́съ ласка̑нїѧ, ꙳ ни мꙋ́къ прещє́нїѧ, ꙳ ни гѡ́рькаѧ бїє́нїѧ, ѿ хрⷭ҇та̀ ѿторго́ша, ꙳ є҆го́же ѿ младе́нства возлюби́лъ є҆сѝ: ꙳ є҆мꙋ́же и҆ моли́сѧ, ꙳ дарова́ти дꙋша́мъ на́шымъ ми́ръ и҆ ве́лїю ми́лость.
Два́жды.
Мнѣ̀ ничто́же сладча́йше, ꙳ нижѐ предпочте́ннѣйше, ꙳ і҆ѡа́нне, глаго́лалъ є҆сѝ мꙋ́чащымъ, ꙳ ни сла́ва преходѧ́щаѧ, ꙳ ни бога́тство тлѣ́нное, ꙳ па́че хрⷭ҇та̀ нбⷭ҇нагѡ цр҃ѧ̀: є҆го́же молѝ, ꙳ дарова́ти дꙋша́мъ на́шымъ ми́ръ ꙳ и҆ ве́лїю ми́лость.
Ѻ҆́бразъ бы́сть мꙋ́ченичествꙋ въ лѣ́тѣхъ послѣ́днихъ, ꙳ благоро́днѣйшїй мꙋ́ченикъ, ꙳ къ ре́вности распала́ѧ ꙳ дꙋ́шы боголюбе́зныхъ ꙳ страда́нїй свои́хъ сла́вою пребога́тою: хрⷭ҇тꙋ́ же мо́литсѧ, ꙳ дарова́ти дꙋша́мъ на́шымъ ми́ръ ꙳ и҆ ве́лїю ми́лость.
Сла́ва, гла́съ в҃:
Прїиди́те, мꙋчениколю́бцы, наслади́мсѧ мы́сленнѡ дꙋхо́вныѧ дне́сь трапе́зы, ю҆́же на́мъ предложѝ мꙋ́ченикъ і҆ѡа́ннъ, є҆ѧ́же и҆ а҆́гг҃ли наслажда́ютсѧ, по ре́кшемꙋ прⷪ҇ро́кꙋ: хлѣ́бъ а҆́гг҃льскїй ꙗ҆дѐ. съ ни́миже и҆ дꙋ́хомъ водворѧ́етсѧ, и҆ на́мъ про́ситъ ѿ сп҃са хрⷭ҇та̀ грѣхѡ́въ ѡ҆ставле́нїѧ, тогѡ̀ честнꙋ́ю па́мѧть соверша́ющымъ.
И҆ ны́нѣ, бг҃оро́диченъ:
Славосло́вїе вели́кое, и҆ є҆ктєнїѝ, и҆ ѿпꙋ́стъ.
На лїтꙋргі́и, блажє́нна, пѣ́снь г҃, и҆ ѕ҃-ѧ. Прокі́менъ: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀. А҆пⷭ҇толъ ко є҆фесе́ємъ, зача́ло сл҃г. А҆ллилꙋ́їа, гла́съ д҃: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ. Є҆ѵⷢ҇лїе матѳе́а, зача́ло л҃ѕ. Прича́стенъ: Въ па́мѧть вѣ́чнꙋю:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.