← претходни дан | Минеј — Децембар | следећи дан →
27 декабря: Святого апостола первомученика и архидиакона Стефана. Преподобного Феодора начертанного, исповедника.
Мѣ́сѧца тогѡ́же въ к҃з-й де́нь.
Ст҃а́гѡ а҆пⷭ҇ла, первомꙋ́ченика и҆ а҆рхїдїа́кона стефа́на.
И҆ прпⷣбнагѡ ѻ҆тца̀ на́шегѡ, и҆ и҆сповѣ́дника ѳео́дѡра начерта́ннагѡ, и҆ бра́та ѳеофа́на творца̀.
На Гдⷭ҇и, воззва́хъ: стїхи̑ры а҆пⷭ҇ла г҃, и҆ прпⷣбнагѡ г҃. стїхи̑ры а҆пⷭ҇ла, гла́съ д҃. Подо́бенъ: Ꙗ҆́кѡ до́блѧ:
Дх҃а благода́тїю ꙳ просвѣти́въ помышле́нїе, ꙳ зра́комъ ꙗ҆́кѡ а҆́гг҃лъ ꙳ ꙗ҆ви́лсѧ є҆сѝ, стефа́не, ѡ҆блиста́вшꙋ тѣлесѝ внꙋ́треннею свѣ́тлостїю, ꙳ и҆ зарю̀ дꙋше́внꙋю ꙗ҆влѧ́ющꙋ ви́дѧщымъ, ꙳ є҆ѧ́же ра́ди полꙋчи́лъ є҆сѝ и҆ свѣ́та зрѣ́нїе, ꙳ нб҃сє́мъ тебѣ̀ пресла́внѡ ѿве́рзєннымъ, ꙳ нача́ло мꙋ́ченикѡвъ и҆ похвало̀.
Ꙗ҆́кѡ степє́ни ꙳ и҆ лѣ́ствица на нбⷭ҇ный восхо́дъ, ꙳ ка́мєннаѧ мета̑нїѧ бы́ша тебѣ̀. ꙳ на нѧ́же вше́дъ ви́дѣлъ є҆сѝ ꙳ стоѧ́ща гдⷭ҇а ѡ҆деснꙋ́ю ѻ҆ц҃а̀, ꙳ тебѣ̀ тезоимени́тъ вѣне́цъ простира́юща ꙳ десни́цею живоно́сною, ꙳ є҆гѡ́же бли́зъ, ꙗ҆́кѡ добропобѣ́дникъ, предстои́ши, ꙳ и҆ страда́льцєвъ верхо́вный.
Зна́меньми и҆ чꙋдесы̀ блиста́ѧйсѧ, ꙳ и҆ догма̑ты пребеззако́нныхъ погаси́лъ є҆сѝ собо́рище: ꙳ и҆ ѿ ни́хъ ᲂу҆бива́емь ꙳ ка́менїемъ мета́емь, ꙳ за ᲂу҆бива́ющыѧ ты̀ ѡ҆ ѡ҆ставле́нїи моли́лсѧ є҆сѝ, ꙳ подо́бѧсѧ гла́сꙋ сп҃совꙋ, ꙳ є҆гѡ́же въ рꙋ́ки пре́далъ є҆сѝ тво́й дꙋ́хъ, ꙳ свѧще́нный стефа́не.
И҆́ны стїхи̑ры прпⷣбнагѡ, гла́съ и҆ подо́бенъ то́йже:
Стра́нничества ꙗ҆́звамъ, ꙳ приложи́шасѧ тебѣ̀ ꙗ҆́звы, ꙳ заточє́нїѧ, преподо́бне, лютѣ̑йшаѧ, ꙳ пребеззако́ннѡ держа́щемꙋ ꙳ престо́лъ зако́нный, ꙳ и҆ смꙋща́ющꙋ лю́тѣ зако́ны вѣ́ры, ꙳ и҆ пречⷭ҇тый сп҃совъ ѻ҆́бразъ низлага́ющꙋ, ꙳ є҆го́же бл҃года́тїю бжⷭ҇твенною, ꙳ хрⷭ҇то́въ ᲂу҆го́дниче, посрами́лъ є҆сѝ.
Ни темни́ца тѧ̀, ни тѣснота̀, ꙳ нижѐ тма̀ несвѣ́тлаѧ, ꙳ ни ра̑ны, ни бїє́нїѧ, ѻ҆́ч҃е, ꙳ возмого́ша къ бг҃ꙋ любвѐ ꙳ разлꙋчи́ти, ѳео́дѡре, ꙳ нижѐ недꙋ́гъ лю́тъ и҆ до́лгъ и҆ нестерпи́мь, ꙳ нижѐ скꙋ́дость пи́щи, бг҃оглаго́ливе: но непрело́жнѣ претерпѣ́лъ є҆сѝ, ꙳ прови́дѧ твои́хъ трꙋдѡ́въ воздаѧ́нїе.
Вмѣ́стѡ ско́рби ѡ҆сла́бꙋ, ꙳ вмѣ́стѡ болѣ́зней наслажде́нїе, ꙳ вмѣ́стѡ тмы̀ ѡ҆сїѧ́нїе тебѣ̀ дарова̀, ꙳ подвигополо́жникъ пра́ведный. ꙳ вмѣ́стѡ же, чꙋ́дне, на лицѣ̀ твое́мъ писа́нїѧ, ꙳ написа́лсѧ є҆сѝ въ кни́зѣ жи́зни, ꙳ цр҃кви же перворо́дныхъ вчини́лсѧ є҆сѝ въ вы́шнихъ, ꙳ и҆ ко а҆́гг҃лѡвъ торжествꙋ̀ ꙳ прера́достнѡ прише́лъ є҆сѝ.
Сла́ва, гла́съ в҃. А҆нато́лїево:
Цр҃ю̀ и҆ влⷣцѣ всѣ́хъ ро́ждшемꙋсѧ на землѝ, вѣне́цъ пресвѣ́телъ прино́ситсѧ: не ѿ ка́менїй честны́хъ ᲂу҆стро́енъ, но ѿ твои́хъ крове́й процвѣте́нъ. но, ѽ мꙋчениколю́бцы! прїиди́те, пѣ́снїй цвѣ́ты взе́мше, главы̑ ᲂу҆вѧзе́мъ, и҆ пѣ̑сни воспѣва́юще рце́мъ: мꙋ́дростїю и҆ благода́тїю дꙋ́шꙋ просвѣти́вый, первомꙋ́чениче, хрⷭ҇та̀ бг҃а, просѝ на́мъ ми́ра и҆ ве́лїѧ ми́лости.
И҆ ны́нѣ, гла́съ то́йже:
Ве́лїе и҆ пресла́вное чꙋ́до соверши́сѧ дне́сь: дв҃а ражда́етъ, и҆ ᲂу҆тро́ба не и҆стлѣва́етъ: сло́во воплоща́етсѧ, и҆ ѻ҆ц҃а̀ не ѿлꙋча́етсѧ. а҆́гг҃лы съ па̑стыри сла́вѧтъ, и҆ мы̀ съ ни́ми вопїе́мъ: сла́ва въ вы́шнихъ бг҃ꙋ, и҆ на землѝ ми́ръ.
На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
И҆зъ ѻ҆ц҃а̀ пре́жде вѣ̑къ возсїѧ́вша, ꙳ и҆ ꙗ҆́кѡ сн҃а въ нѣ́дрѣ ѻ҆́ч҃емъ присносꙋ́ща, ꙳ па́ки въ послѣ̑днѧѧ на рꙋка́хъ мт҃рнихъ, ꙳ ꙗ҆́кѡ на прⷭ҇то́лѣ сѣдѧ́щаго, ꙳ и҆ ѿ а҆́гг҃лѡвъ, па́стырей, волхвѡ́въ же, ꙳ ны́нѣ покланѧ́емаго воспои́мъ.
Сті́хъ: И҆зъ чре́ва пре́жде денни́цы роди́хъ тѧ̀.
Въ виѳлее́мъ соше́дшесѧ вѣ́рнїи, ꙳ ᲂу҆́зримъ всѣ́хъ творца̀ ꙳ лежа́щаго во ꙗ҆́слехъ, ꙳ и҆ ѿ землѝ халде́йскїѧ ꙳ да́ръ и҆збра́нный прине́сшыѧ тривеще́ственный, ꙳ ꙗ҆́кѡ цр҃ю̀ и҆ бг҃ꙋ, ꙳ и҆ на́съ ра́ди тридне́вномꙋ сꙋ́щꙋ мертвецꙋ̀.
Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀.
И҆зъ дв҃ы роди́лсѧ є҆сѝ въ верте́пѣ, ꙳ и҆ вѡ́инства а҆́гг҃льскаѧ ѡ҆бстоѧ́ще вопїѧ́хꙋ: ꙳ сла́ва въ вы́шнихъ тебѣ̀ бг҃ꙋ, ꙳ ро́ждшемꙋсѧ въ ра́бїи ѻ҆́бразѣ, ꙳ и҆ ѡ҆бно́вльшемꙋ мі́ръ, ꙳ во чре́вѣ дв҃ы ꙳ и҆ неискꙋсомꙋ́жныѧ ма́тере.
Сла́ва, гла́съ ѕ҃. А҆нато́лїево:
Пе́рвый въ мꙋ́ченицѣхъ показа́лсѧ є҆сѝ, и҆ въ дїа́конѣхъ, стефа́не а҆пⷭ҇ле, страда́льцєвъ ᲂу҆добре́нїе, вѣ́рныхъ ᲂу҆твержде́нїе, сла́ва првⷣныхъ. честнꙋ́ю твою̀ па́мѧть пра́зднꙋющымъ просѝ, ꙗ҆́кѡ предстоѧ̀ прⷭ҇то́лꙋ хрⷭ҇та̀ всецарѧ̀ прегрѣше́нїй ѡ҆чище́нїѧ, и҆ црⷭ҇твїѧ нбⷭ҇нагѡ сподо́битисѧ.
И҆ ны́нѣ, гла́съ то́йже. Ге́рманово:
Ликꙋ́ютъ а҆́гг҃ли всѝ на нб҃сѝ, и҆ ра́дꙋютсѧ человѣ́цы дне́сь: и҆гра́етъ же всѧ̀ тва́рь ро́ждшагѡсѧ ра́ди въ виѳлее́мѣ сп҃са гдⷭ҇а: ꙗ҆́кѡ всѧ́каѧ ле́сть і҆́дѡльскаѧ преста̀, и҆ црⷭ҇твꙋетъ хрⷭ҇то́съ во вѣ́ки.
Тропа́рь ст҃а́гѡ, гла́съ д҃:
По́двигомъ до́брымъ подвиза́лсѧ є҆сѝ, первомꙋ́чениче хрⷭ҇то́въ и҆ а҆пⷭ҇ле, и҆ мꙋчи́телей ѡ҆бличи́лъ є҆сѝ нече́стїе: ка́менїемъ бо побїе́нъ ѿ рꙋ́къ беззако́нныхъ, вѣне́цъ ѿ ꙗ҆́же свы́ше десни́цы прїѧ́лъ є҆сѝ, и҆ къ бг҃ꙋ взыва́лъ є҆сѝ, вопїѧ̀: гдⷭ҇и, не поста́ви и҆̀мъ грѣха̀ сегѡ̀.
Сла́ва, прпⷣбнагѡ тропа́рь, гла́съ и҃:
Правосла́вїѧ наста́вниче, бл҃гоче́стїѧ ᲂу҆чи́телю и҆ чистоты̀, вселе́нныѧ свѣти́льниче, мона́шествꙋющихъ бг҃одохнове́нное ᲂу҆добре́нїе, ѳео́дѡре премꙋ́дре, ᲂу҆че́ньми твои́ми всѧ̑ просвѣти́лъ є҆сѝ, цѣвни́це дх҃о́внаѧ: молѝ хрⷭ҇та̀ бг҃а, спасти́сѧ дꙋша́мъ на́шымъ.
И҆ ны́нѣ, пра́здника. Ржⷭ҇тво̀ твоѐ, хрⷭ҇тѐ бж҃е:
На ᲂу҆́трени, на Бг҃ъ гдⷭ҇ь, тропа́рь пра́здника, є҆ди́ножды, и҆ а҆пⷭ҇ла, є҆ди́ножды. Сла́ва, прпⷣбнагѡ, И҆ ны́нѣ, пра́здника.
По а҃-й стїхоло́гїи, сѣда́ленъ, гла́съ г҃. Подо́бенъ: Дв҃а дне́сь:
Безсѣ́менное зача́тїе и҆зба́вителѧ ражда́етъ, и҆ волсвѝ прихо́дѧтъ жи́зни поклони́тисѧ, человѣ́цы со а҆́гг҃лы славосло́вѧтъ: верте́пъ же и҆ ꙗ҆́сли дароно́сѧтъ. воспѣва́юще рожде́ннаго ѻ҆троча̀ мла́до превѣ́чнаго бг҃а.
Сла́ва, и҆ ны́нѣ, то́йже.
По в҃-й стїхоло́гїи, сѣда́ленъ, гла́съ д҃. Поⷣ: Оу҆диви́сѧ і҆ѡ́сифъ:
Невмѣсти́мый вездѣ̀, ка́кѡ вмѣсти́сѧ во чре́во; сы́й въ нѣ́дрѣхъ ѻ҆́ч҃ихъ, ка́кѡ на рꙋка́хъ ма́тернихъ; всѧ́кѡ ꙗ҆́кѡ вѣ́сть, ꙗ҆́кѡ восхотѣ̀, и҆ ꙗ҆́кѡ благоволѝ: безпло́тенъ бо сы́й воплоти́сѧ во́льнѡ. и҆ бы́сть сы́й, є҆́же не бѣ̀, на́съ ра́ди, и҆ не ѿстꙋпи́въ є҆стества̀ причасти́сѧ на́шемꙋ смѣше́нїю, сꙋгꙋ́бъ роди́сѧ хрⷭ҇то́съ, вы́шнїй мі́ръ хотѧ̀ и҆спо́лнити.
Сла́ва, и҆ ны́нѣ, то́йже.
Канѡ́нъ пра́здника пе́рвый, со і҆рмосо́мъ на ѕ҃, и҆ ст҃ы́хъ два̀ канѡ́на, на и҃.
Канѡ́нъ пра́здника:
Гла́съ а҃. Пѣ́снь а҃. І҆рмо́съ:
Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте, лю́дїе, ꙗ҆́кѡ просла́висѧ.
И҆стлѣ́вша престꙋпле́нїемъ, по бж҃їю ѻ҆́бразꙋ бы́вшаго, всегѡ̀ и҆стлѣ́нїѧ сꙋ́ща, лꙋ́чшїѧ ѿпа́дша бжⷭ҇твенныѧ жи́зни, па́ки ѡ҆бновлѧ́етъ мꙋ́дрый содѣ́тель, ꙗ҆́кѡ просла́висѧ.
Ви́дѣвъ зижди́тель ги́блема человѣ́ка, рꙋка́ми є҆го́же созда̀, приклони́въ нб҃са̀ схо́дитъ: сего́ же ѿ дв҃ы бжⷭ҇твенныѧ чⷭ҇тыѧ всего̀ ѡ҆сꙋществꙋ́етъ, вои́стиннꙋ вопло́щсѧ, ꙗ҆́кѡ просла́висѧ.
Мꙋ́дрость, сло́во, и҆ си́ла, сн҃ъ сы́й ѻ҆́ч҃їй и҆ сїѧ́нїе, хрⷭ҇то́съ бг҃ъ, си́лъ ᲂу҆таи́всѧ, є҆ли́кѡ премі́рныхъ, и҆ є҆ли́кѡ на землѝ, и҆ вочл҃вѣ́чсѧ ѡ҆бнови́лъ є҆́сть на́съ, ꙗ҆́кѡ просла́висѧ.
Канѡ́нъ а҆пⷭ҇ла, творе́нїе і҆ѡа́нна дамаскина̀.
Гла́съ є҃. Пѣ́снь а҃. І҆рмо́съ:
Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.
Грѧди́те, вѣнцы̀ пѣ́сней первомꙋ́ченика хрⷭ҇то́ва цр҃кви, сла́внѡ вѣнча́имъ: и҆ бжⷭ҇твенною вѣнча́еми стефа́новою благода́тїю, побѣ́днꙋю пѣ́снь воспои́мъ.
Носѧ̀ ᲂу҆ч҃телевъ кро́ткїй смы́слъ, и҆ є҆́же ѿ любвѐ бг҃отво́рное смире́нїе, досто́йнѡ, стефа́не, дїа́конѡвъ старѣ́йшина и҆ предста́тель вдови́цамъ бы́лъ є҆сѝ.
Ты̀ на по́мощь а҆пⷭ҇лѡвъ хрⷭ҇то́выхъ досто́йнѡ призва́лсѧ є҆сѝ: и҆ ꙗ҆́кѡ вѣ́ренъ дїа́конъ, тезоимени́те стефа́не, бы́лъ є҆сѝ, и҆дѣ́же хрⷭ҇то́съ, кро́вїю преше́лъ є҆сѝ.
Бг҃оро́диченъ:
Ты̀ ᲂу҆́бѡ за человѣ́ки, хрⷭ҇тѐ, человѣ́ка ѿ дв҃ы поне́съ ꙗ҆́кѡ млⷣнцъ пови́тсѧ, тво́й же посы́панъ первомꙋ́ченикъ ка́меней мета̑нїи, человѣ́ка совлачи́тсѧ.
И҆́нъ канѡ́нъ прпⷣбнагѡ, є҆гѡ́же краегране́сїе:
Твоѧ̑, бра́те, бли̑жнѧѧ плетꙋ̀ хвалы̑. Ѳеофа́нъ.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Ті́тлꙋ твоегѡ̀ честна́гѡ лица̀ ви́дѣвше херꙋві́ми, ѿстꙋпа́ютъ ѿ дре́ва жи́зни: пла́менное же ѻ҆рꙋ́жїе всеблагоговѣ́йнѡ плещы̀ тебѣ̀ дае́тъ, всемꙋ́дре ѳео́дѡре.
Ті́тла надъ главо́ю лежа́ше цр҃ѧ̀ хрⷭ҇та̀, напи́сана на дре́вѣ крⷭ҇тнѣмъ: твоѧ́ же ті́тла, всемꙋ́дре, на лицѣ̀ твое́мъ начерта́сѧ, напи́сана благолѣ́пнѣ.
Возвы́сисѧ ᲂу҆́бѡ на крⷭ҇тъ гдⷭ҇ь, и҆ прободе́нъ бы́сть въ ре́бра: ты́ же протѧже́нъ на скамїѝ, терпѣли́внѡ бодє́нїѧ претерпѣ́лъ є҆сѝ, ꙗ҆́коже ѻ҆ве́нъ наро́читъ, свѧщеннотаи́нниче, назна́менаемь.
Мꙋ́дростїю всѧ́кою ᲂу҆краша́емь, ѻ҆́ч҃е ѳео́дѡре, предста́телѧ ѡ҆бличи́лъ є҆сѝ ꙗ҆́вѣ ѕлы́ѧ є҆́реси: терпѣ́нїемъ же дѣ́лъ, сегѡ̀ мꙋдрова́нїѧ ᲂу҆жаси́лъ є҆сѝ.
Бг҃оро́диченъ:
Мꙋ́дрости премꙋ́дростныѧ была̀ є҆сѝ прїѧ́телище, пречⷭ҇таѧ бг҃ороди́тельнице, є҆ди́на вѣ́рныхъ спасе́нїе и҆ пѣ́нїе: ты́ бо на́мъ родила̀ є҆сѝ дне́сь бжⷭ҇твенное и҆збавле́нїе.
Пѣ́снь г҃. І҆рмо́съ:
Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.
И҆́же вдохнове́нїѧ прича́щсѧ лꙋ́чшагѡ а҆да́мъ пе́рстный, и҆ къ тлѣ́нїю попо́лзсѧ же́нскою ле́стїю, хрⷭ҇та̀ ѿ жены̀ ви́дѧ, вопїе́тъ: и҆́же менє̀ ра́ди по мнѣ̀ бы́въ, свѧ́тъ є҆сѝ, гдⷭ҇и.
Соѻбра́зенъ бре́нномꙋ ᲂу҆мале́нїю растворе́нїемъ, хрⷭ҇тѐ, бы́въ, и҆ прича́стїемъ пло́ти го́ршїѧ, пода́въ бжⷭ҇твеннагѡ є҆стества̀, зе́мленъ бы́въ, и҆ пребы́въ бг҃ъ, и҆ возвы́сивый ро́гъ на́шъ, свѧ́тъ є҆сѝ, гдⷭ҇и.
Виѳлее́ме, весели́сѧ, кнѧзе́й і҆ꙋ́довыхъ сы́й цр҃ь: і҆и҃лѧ бо пасы́й, на ра́мѣхъ херꙋві́мскихъ, и҆зъ тебє̀ про́йде хрⷭ҇то́съ ꙗ҆́вѣ: и҆ вознесы́й ро́гъ на́шъ надъ всѣ́ми воцр҃и́сѧ.
И҆́нъ. І҆рмо́съ:
Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче.
Зако́ннѡ ꙗ҆́кѡ хрⷭ҇то́въ во́инъ стефа́нъ, къ бг҃оꙋбі́йцамъ ѡ҆полчи́всѧ, въ непобѣди́мꙋю є҆гѡ̀ си́лꙋ ѡ҆дѣ́ѧнъ, пребеззако́нныхъ ѡ҆бличѝ всѐ лꙋка́вное противле́нїе.
Ре́вностїю хрⷭ҇то́вы разже́гсѧ любвѐ, и҆ къ подвигѡ́мъ совле́ксѧ, вѣ́ры и҆ дх҃а и҆спо́лнивсѧ бжⷭ҇твеннагѡ первомꙋ́ченикъ, ры́барей и҆звѣсти́лъ є҆сѝ всѣ̑мъ бг҃осꙋ́днꙋю про́повѣдь.
Ꙗ҆́кѡ проповѣ́дникъ сокрове́нныѧ вои́стиннꙋ и҆ бжⷭ҇твенныѧ жи́зни, настоѧ́щꙋю ꙗ҆́коже забы́въ, дѣ́ломъ показа̀ ꙗ҆́вѣ всѣ̑мъ, первомꙋ́ченикъ побѣдоно́снꙋю и҆́стинꙋ, влⷣко, произво́ливъ сме́рть.
Бг҃оро́диченъ:
Въ жите́йскїй на́съ ра́ди влⷣка верте́пъ вни́де, ѻ҆́бразомъ низхожде́нїѧ: мꙋ́ченикѡвъ же нача́льникъ стефа́нъ, ѿ тѧ́жести человѣ́ческїѧ и҆схо́дитъ, любо́вїю влⷣчнею побѣжда́емь.
И҆́нъ. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Не и҆мѣ́ѧ что̀ твои̑мъ ᲂу҆че́нїємъ противорещѝ, прпⷣбне, на ра̑ны ѡ҆браща́етсѧ, є҆́ллинскагѡ неи́стовства и҆спо́лненный.
Под̾ѧ́лъ є҆сѝ терпѣли́внѡ є҆́же на ра́мѣхъ и҆ на пе́рсехъ ра̑ны, хрⷭ҇та̀ ра́ди, бг҃одохнове́нне, и҆ по главѣ̀ ᲂу҆дарє́нїѧ.
Мꙋ́дростїю дꙋхо́вною и҆ ᲂу҆се́рдїемъ по́мысла, посрами́лъ є҆сѝ ѕлочести́ваго и҆ беззако́ннаго свѧще́ннѣйшими твои́ми догма̑ты.
Бг҃оро́диченъ:
Дв҃дъ ꙗ҆́коже ковче́гъ въ виѳлее́мѣ, проро́ческими ѻ҆чесы̀, мт҃и бж҃їѧ, ви́дитъ тѧ̀, млⷣнца пребжⷭ҇твеннаго носѧ́щꙋ.
Конда́къ, гла́съ г҃:
Дв҃а дне́сь пресꙋ́щественнаго ражда́етъ, и҆ землѧ̀ верте́пъ непристꙋ́пномꙋ прино́ситъ. а҆́гг҃ли съ па́стырьми славосло́вѧтъ, волсви́ же со ѕвѣздо́ю пꙋтеше́ствꙋютъ: на́съ бо ра́ди роди́сѧ ѻ҆троча̀ мла́до, превѣ́чный бг҃ъ.
І҆́косъ:
Є҆де́мъ виѳлее́мъ ѿве́рзе, прїиди́те ви́димъ, пи́щꙋ въ та́йнѣ ѡ҆брѣто́хомъ: прїиди́те, прїи́мемъ сꙋ̑щаѧ ра̑йскаѧ внꙋ́трь верте́па: та́мѡ ꙗ҆ви́сѧ ко́рень ненапое́нъ, прозѧба́ѧ ѿпꙋще́нїе: та́мѡ ѡ҆брѣ́тесѧ кла́дѧзь неиско́панъ, и҆зъ негѡ́же дв҃дъ пи́ти дре́вле возжада́сѧ: та́мѡ дв҃а ро́ждши младе́нца, жа́ждꙋ ᲂу҆ста́ви а҆́бїе а҆да́мовꙋ и҆ дв҃довꙋ. сегѡ̀ ра́ди къ немꙋ̀ и҆́демъ, гдѣ̀ роди́сѧ ѻ҆троча̀ мла́до, превѣ́чный бг҃ъ.
Сѣда́ленъ, гла́съ а҃. Подо́бенъ: Гро́бъ тво́й:
А҆пⷭ҇ле хрⷭ҇то́въ, дїа́конѡвъ пе́рвый, первомꙋ́чениче мꙋ́дре, мꙋ́ченикѡвъ ве́рхъ, мі́ра концы̀ ѡ҆свѧти́въ страда̑нїи твои́ми, и҆ чꙋдесы̀ дꙋ́шы человѣ́кѡвъ просвѣти́лъ є҆сѝ: чтꙋ́щыѧ тѧ̀ и҆зба́ви всѧ́ческихъ бѣ́дъ, всехва́льне стефа́не.
Сла́ва, прпⷣбнагѡ сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:
Оу҆ста̀ бы́лъ є҆сѝ де́рзости, горды́ню мꙋчи́телевꙋ велемꙋ́дреннѡ посрами́въ терпѣ́нїемъ страда́нїй твои́хъ: ᲂу҆ѧзвлѧ́емь бо бы́въ въ лицѐ, ѳео́дѡре, за хрⷭ҇то́вꙋ і҆кѡ́нꙋ всечестнꙋ́ю, и҆звѣсти́лъ же є҆сѝ чти́ти и҆ сла́вити всѧ̑, просѧ̀ на́мъ ве́лїю ми́лость.
И҆ ны́нѣ, бг҃оро́диченъ:
Ржⷭ҇тво̀ безсѣ́менное смотрѧ́ющи всенепоро́чнаѧ, дивѧ́щисѧ, и҆зъ неѧ̀ рожде́нномꙋ вѣща́ше: а҆́ще и҆ зра́комъ человѣ́ческимъ ѡ҆бложи́лсѧ є҆сѝ, но бг҃а тѧ̀ проповѣ́дꙋютъ вє́щи, ча́до безнача́льное безнача́льнагѡ ѻ҆ц҃а̀ собезнача́льне, всѣ̑мъ подаѧ́й ве́лїю ми́лость.
Пѣ́снь д҃. І҆рмо́съ:
Же́злъ и҆зъ ко́рене і҆ессе́ева и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀, хва́льный, приѡсѣне́нныѧ ча́щи, прише́лъ є҆сѝ вопло́щсѧ, ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.
Є҆го́же дре́вле проречѐ і҆а́кѡвъ, ꙗ҆зы́кѡвъ жда́нїе, хрⷭ҇тѐ, ѿ колѣ́на і҆ꙋ́дова возсїѧ́лъ є҆сѝ, и҆ си́лꙋ дама́сковꙋ, самарі́йскꙋю же коры́сть прише́лъ є҆сѝ и҆спроврещѝ, ле́сть премѣнѧ́ѧ въ вѣ́рꙋ бг҃олѣ́пнꙋ: сла́ва си́лѣ твое́й, гдⷭ҇и.
Волхва̀ дре́вле валаа́ма словесы̀ ᲂу҆ченикѝ, мꙋ̑дрыѧ ѕвѣздоблюсти́тели, ра́дости и҆спо́лнилъ є҆сѝ: ѕвѣзда̀ ѿ і҆а́кѡва возсїѧ́въ, влⷣко: ꙗ҆зы́кѡвъ нача́токъ вводи́мый, прїѧ́лъ же є҆сѝ ꙗ҆́вѣ: сла́ва си́лѣ твое́й, гдⷭ҇и.
Ꙗ҆́кѡ на рꙋно̀, во чре́во дв҃ы сше́лъ є҆сѝ до́ждь, хрⷭ҇тѐ, и҆ ꙗ҆́кѡ ка̑пли на зе́млю ка́плющыѧ. є҆ѳїо́пїа и҆ ѳарсі́съ, и҆ а҆раві́тстїи ѻ҆́строви же, сава̀, ми́дѡвъ всю̀ зе́млю держа́щїи, припадо́ша тебѣ̀, сп҃се: сла́ва си́лѣ твое́й, гдⷭ҇и.
И҆́нъ. І҆рмо́съ:
Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ пома̑занныѧ твоѧ̑ прише́лъ є҆сѝ.
Поревнова́въ а҆́гг҃льскомꙋ ᲂу҆се́рдїю, и҆ зра́комъ а҆́гг҃льскимъ свѣ́тлѡ ᲂу҆краси́всѧ, зри́ши сла́вꙋ бжⷭ҇твеннꙋю, и҆ сеѧ̀ ѡ҆заре́нїе.
Клеветни́къ, сꙋдїѧ́ же и҆ мꙋчи́тель, человѣкоꙋбі́йца и҆ ѻ҆те́цъ лжѝ ꙗ҆влѧ́етсѧ, стефа́не: но себѐ побѣжда́етъ, сѣ̑ти на сѧ̀ простира́ѧ.
Ꙗ҆́кѡ пе́рвый мꙋ́ченикѡвъ стефа́нъ, пꙋтесотвори́въ же на́мъ мꙋче́нїѧ вхо́дъ, вѣнцено́сецъ ликꙋ́етъ, вѣнце́мъ мꙋ́ченическимъ вѣнча́емь.
Бг҃оро́диченъ:
Просїѧ́въ ѿ дв҃ы, ꙗ҆́кѡ со́лнце, совозсїѧ́вшꙋ, хрⷭ҇тѐ, ꙗ҆́кѡ денни́цꙋ, сла́внꙋю первомꙋ́ченика па́мѧть, свое́ю ᲂу҆краша́еши свѣ́тлостїю.
И҆́нъ. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Просте́ртъ на дсцѣ̀ начерта́нъ бы́сть ꙗ҆́кѡ покланѧ́ющсѧ, ѳео́дѡре, хрⷭ҇то́вѣ і҆кѡ́нѣ и҆ бг҃ома́тере, на́глостїю свирѣ́пства и҆ ва́рварскимъ сꙋровство́мъ.
Слꙋжи́въ ѿ ю҆́ности влⷣцѣ, и҆ къ немꙋ̀ непреста́ннѡ жела́нїе и҆мѣ́ѧ, блаже́нне, воздержа́нїемъ, мꙋ́ченическою кро́вїю а҆́бїе ᲂу҆краси́лсѧ є҆сѝ свѣтлѣ́йше.
Свѣ́телъ ꙗ҆́кѡ со́лнце, бг҃оно́се, ѿ восто́ка ᲂу҆стреми́лсѧ є҆сѝ, зари̑ и҆спꙋща́ѧ и҆сповѣ́данїѧ твоегѡ̀, и҆ велемꙋ́дреннагѡ и҆ до́блественнѣйшагѡ противле́нїѧ.
Бг҃оро́диченъ:
Благослове́нъ грѧды́й бг҃ъ сло́во въ виѳлее́мъ, ꙗ҆́кѡ благоꙋтро́бенъ, ѿ неискꙋсобра́чнагѡ, пречⷭ҇таѧ, чре́ва твоегѡ̀. є҆го́же ны́нѣ молѝ спастѝ къ тебѣ̀ прибѣга́ющыѧ.
Пѣ́снь є҃. І҆рмо́съ:
Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ. тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.
Въ рабѣ́хъ ке́саревымъ повелѣ́нїемъ написа́тисѧ поко́рьсѧ, и҆ на́съ рабы̑ сꙋ́щыѧ, врага̀ и҆ грѣха̀ свободи́лъ є҆сѝ, хрⷭ҇тѐ. ве́сь же по на́мъ ѡ҆бнища́въ, и҆ пе́рстнагѡ ѿ самагѡ̀ є҆дине́нїѧ и҆ ѡ҆бще́нїѧ бг҃осодѣ́лалъ є҆сѝ.
Сѐ дв҃а, ꙗ҆́коже дре́вле речѐ, во чре́вѣ прїе́мши, родила̀ є҆́сть бг҃а вочеловѣ́чшасѧ, и҆ пребыва́етъ дв҃а. є҆ѧ́же ра́ди примири́вшесѧ бг҃ꙋ грѣ́шнїи, бцⷣꙋ сꙋ́щꙋю вои́стиннꙋ вѣ́рнїи воспои́мъ.
И҆́нъ. І҆рмо́съ:
Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ.
Ѡ҆блиста̀ ꙗ҆́кѡ а҆́гг҃лъ первомꙋ́ченикъ тво́й, небе́сныхъ крꙋгѡ́въ, хрⷭ҇тѐ, бы́въ превы́шше, и҆ сла́вы неизглаго́ланныѧ твоеѧ̀ насы́щсѧ, чл҃вѣколю́бче.
Бг҃оглаго́ливыхъ ᲂу҆́стъ ѡ҆дождє́нїи, низложѝ скверноꙋбі̑йцы первомꙋ́ченикъ, ѿ ни́хже безчи́сленными ка́меней ѡ҆дожде́ньми, ꙗ҆́кѡ побѣди́тель вѣнча́сѧ.
Ꙗ҆́кѡ непобѣди́мо первомꙋ́ченика бжⷭ҇твенныѧ ре́вности дерзнове́нїе: и҆́бо да́же до кро́ве къ бг҃оꙋбі́йцамъ мꙋ́жески ѡ҆полчи́сѧ.
Бг҃оро́диченъ:
Прише́дшаго ѿ неискꙋсомꙋ́жныѧ мт҃ре, первомꙋ́ченикъ въ недви́жимѣмъ ѻ҆ц҃а̀ бжⷭ҇твѣ̀ и҆ сла́вѣ, стоѧ́ща на нб҃сѣ́хъ ви́дѣ.
И҆́нъ. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
На землѝ стра́ннѣй ѡ҆бита́ѧй, стра́нничество, ѡ҆ѕлобле́нїе, ра̑ны, заточє́нїѧ и҆ темни̑цы лютѣ́йшыѧ под̾ѧ́лъ є҆сѝ терпѣли́внѡ.
Ны́нѣ ра́дꙋешисѧ вои́стиннꙋ, побѣдоно́сное вѣнча́нїе прїе́мъ въ де́нь свѣ́тлый и҆ свѣтоно́сный бжⷭ҇твеннагѡ первомꙋ́ченика.
Є҆́же и҆мѣ́лъ є҆сѝ ѿ дѣ́вства благоче́стїѧ ѡ҆бѣща́нїе, соблю́лъ є҆сѝ да́же до конца̀, не превраще́нъ пребы́въ, непобѣди́ме ѳео́дѡре.
Бг҃оро́диченъ:
Тѧ̀ ѻ҆рꙋ́жїе непобѣди́мое на врагѝ предлага́емъ, тѧ̀ по́мощь и҆ наде́ждꙋ на́шегѡ спасе́нїѧ, бг҃оневѣ́сто, стѧжа́хомъ.
Пѣ́снь ѕ҃. І҆рмо́съ:
И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Прїи́де вопло́щсѧ хрⷭ҇то́съ бг҃ъ на́шъ и҆зъ чре́ва, є҆го́же ѻ҆ц҃ъ пре́жде денни́цы ражда́етъ: правлє́нїѧ же держа̀ пречи́стыхъ си́лъ, въ ꙗ҆́слехъ ско́тїихъ возлежи́тъ, и҆ пелена́ми повива́етсѧ: разрѣша́етъ же многоплетє́нныѧ плєни́цы прегрѣше́нїй.
Ю҆́но и҆зъ а҆да́ма ѻ҆троча̀ смѣше́нїѧ, роди́сѧ сн҃ъ, и҆ вѣ̑рнымъ даде́сѧ, бꙋ́дꙋщагѡ вѣ́ка се́й є҆́сть ѻ҆ц҃ъ и҆ нача́льникъ: и҆ нарица́етсѧ вели́кагѡ совѣ́та а҆́гг҃лъ. се́й крѣ́покъ бг҃ъ є҆́сть, и҆ держа́й ѻ҆́бластїю всю̀ тва́рь.
И҆́нъ. І҆рмо́съ:
Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.
Сла́вный чинонача́льникъ мꙋ́ченикѡвъ стефа́нъ, вѣ́рнїи зако́ны є҆стества̀ благода́тїю преше́дъ, бжⷭ҇твенною сла́вою ѡ҆зарѧ́етсѧ.
Подо́бникъ всеизрѧ́днѣйшїй бы́въ, влⷣко хрⷭ҇тѐ, честны̑ѧ стрⷭ҇ти твоеѧ̀ стефа́нъ, ᲂу҆бі́йцамъ благослове́нїемъ ѿмща́етъ.
Скверноꙋбі́йственнагѡ дѣѧ́нїѧ неприча́стны сохранѝ, хрⷭ҇тѐ, и҆ первомꙋ́ченика сподо́би твоѧ̑ пѣвцы̀ наслѣ́дїѧ, ꙗ҆́кѡ бл҃гоꙋтро́бенъ.
Бг҃оро́диченъ:
Всемі́рнагѡ бы́сть спасе́нїѧ, влⷣко хрⷭ҇тѐ, нача́ло рождество̀ твоѐ, и҆ мꙋ́ченикѡвъ бг҃олѣ́пнагѡ и҆сповѣ́данїѧ ѡ҆снова́нїе.
И҆́нъ. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
По́томъ подвигѡ́въ є҆щѐ ка́паѧ, подвигополо́жникꙋ предста́лъ є҆сѝ, пра́веднымъ сꙋдо́мъ всю̀ тва́рь пра́вѧщемꙋ, бг҃оно́се всеблаже́нне ѳео́дѡре.
Ничто́же тѧ̀ хрⷭ҇то́вы любвѐ ѿлꙋчѝ, ни ᲂу҆ране́нїе тѣ́ла, ни сме́ртнагѡ ѡ҆сꙋжде́нїѧ преще́нїе, ни тщета̀ присꙋ́щихъ, всеблаже́нне ѳео́дѡре.
Сн҃ъ сы́й и҆ свѣ́та и҆ днѐ пресвѣ́тлый, по́лнъ свѣ́та предста́вилсѧ є҆сѝ, къ бжⷭ҇твенномꙋ сїѧ́нїю возраста́емь, дне́мъ и҆ но́щїю неѡскꙋдѣва́емь, бг҃опрїѧ́тне.
Бг҃оро́диченъ:
Тѧ̀ є҆ди́нꙋ посредѝ те́рнїѧ ѡ҆брѣ́тъ, ꙗ҆́кѡ честнѣ́йшїй крі́нъ, и҆ ᲂу҆до́льный цвѣ́тъ, ѽ бг҃омт҃и, жени́хъ мы́сленный въ тѧ̀ всели́сѧ.
Конда́къ, гла́съ г҃. Подо́бенъ: Дв҃а дне́сь.
Влⷣка вчера̀ на́мъ пло́тїю прихожда́ше, и҆ ра́бъ дне́сь ѿ пло́ти и҆схожда́ше. вчера̀ црⷭ҇твꙋѧй пло́тїю роди́сѧ, дне́сь ра́бъ ка́менїемъ побива́етсѧ: тогѡ̀ ра́ди и҆ скончава́етсѧ первомꙋ́ченикъ и҆ бжⷭ҇твенный стефа́нъ.
І҆́косъ:
Ꙗ҆́кѡ ѕвѣзда̀ свѣ́тлаѧ, дне́сь совозсїѧ̀ ржⷭ҇твꙋ̀ хрⷭ҇то́вꙋ первомꙋ́ченикъ стефа́нъ, ѡ҆блиста́ѧй, просвѣща́ѧй земны̑ѧ концы̀, і҆ꙋде́йское то́кмѡ ѡ҆мрачѝ всѐ ѕлоче́стїе. мꙋ́дростїю сло́ва си́хъ и҆з̾ѡбличи́въ, ѿ писа́нїй бесѣ́дꙋѧй и҆ ᲂу҆вѣщава́ѧ сїѧ̑, ро́ждшагосѧ ѿ дв҃ы і҆и҃са, сн҃а бж҃їѧ бы́ти и҆ бг҃а. и҆ посрамѝ си́хъ нечести́вое ѕлодѣ́йство первомꙋ́ченикъ и҆ бжⷭ҇твенный стефа́нъ.
Пѣ́снь з҃. І҆рмо́съ:
Ѻ҆́троцы благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѣ̀ пла́мене стоѧ́ще поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Па́стырїе свирѧ́юще, ᲂу҆жа́сно свѣтоѧвле́нїе полꙋчи́ша: сла́ва бо гдⷭ҇нѧ ѡ҆блиста̀ и҆̀хъ, и҆ а҆́гг҃лъ, воспо́йте, вопїѧ̀: ꙗ҆́кѡ роди́сѧ хрⷭ҇то́съ, ѻ҆тцє́въ бг҃ъ бл҃гослове́нный.
Внеза́пꙋ съ сло́вомъ а҆́гг҃ловымъ нбⷭ҇наѧ вѡ́инства, сла́ва, вопїѧ́хꙋ, бг҃ꙋ въ вы́шнихъ, на землѝ ми́ръ, въ человѣ́цѣхъ благоволе́нїе: хрⷭ҇то́съ возсїѧ̀, ѻ҆тцє́въ бг҃ъ бл҃гослове́нный.
Глаго́лъ что̀ се́й, реко́ша па́стырїе; преше́дше ᲂу҆ви́димъ бы́вшее, бжⷭ҇твеннагѡ хрⷭ҇та̀. виѳлее́ма же доше́дше, съ ро́ждшею покланѧ́хꙋсѧ, воспѣва́юще: ѻ҆тцє́въ бж҃е, бл҃гослове́нъ є҆сѝ.
И҆́нъ. І҆рмо́съ:
Превозноси́мый ѻ҆тцє́въ гдⷭ҇ь пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.
Зꙋбы̀ скреже́щꙋще ᲂу҆бі́йственнѣ беззако́ннїи, ꙗ҆́кѡ ѕвѣ́рїе восхи́тивше ᲂу҆бива́хꙋ стефа́на, бжⷭ҇твеннѣ пою́ща: бж҃е, бл҃гослове́нъ є҆сѝ.
Ꙗ҆́кѡ пе́стрыми цвѣ́ты и҆ кра́сными, стефа́не, ка́менїемъ ᲂу҆краша́емь, тебѐ сама́го приве́лъ є҆сѝ хрⷭ҇тꙋ̀ жизнода́вцꙋ, поѧ̀: бж҃е, бл҃гослове́нъ є҆сѝ.
Ꙗ҆́кѡ непобѣди́мо па́ѵлово противле́нїе, гонѧ́ща пе́рвое бж҃їѧ ᲂу҆го́дники, приводѧ́ща же ꙗ҆зы́ки ны́нѣ ко хрⷭ҇тꙋ̀ во вѣ́ки.
Взѧ́тъ бы́въ дх҃омъ ст҃ы́мъ, стефа́не, неизрече́ннѡ ви́дѣлъ є҆сѝ сн҃а со роди́телемъ, зовы́й трⷪ҇цѣ: бж҃е, бл҃гослове́нъ є҆сѝ.
Бг҃оро́диченъ:
Тебѣ̀ возсїѧ́вшемꙋ ѿ дв҃ы бжⷭ҇твенныѧ чⷭ҇тыѧ, принесе́сѧ ѡ҆дꙋшевле́нный ꙗ҆́кѡ цр҃ю̀ вѣне́цъ, бжⷭ҇твенне пѣснопоѧ̀ тебѣ̀: бж҃е, бл҃гослове́нъ є҆сѝ.
И҆́нъ. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Распалѧ́емь правосла́вною ре́вностїю, всемꙋ́дре, снѣде́нїе скве́рныѧ є҆́реси и҆ лю́тыѧ де́рзостнѣ ѿри́нꙋлъ є҆сѝ бл҃гослове́нъ є҆сѝ, бж҃е мо́й, зовѧ̀, и҆ гдⷭ҇и.
Сло́во мꙋ́дрости, сло́во догма́тѡвъ, сло́во зна́нїѧ, сло́во ᲂу҆че́нїй, ѻ҆́ч҃е, всеблагочести́выхъ, бг҃ъ сло́во тебѣ̀ дарова̀, бл҃гослове́нъ є҆сѝ, бж҃е мо́й, зовꙋ́щꙋ, и҆ гдⷭ҇и.
Возсїѧ́въ ѿ восто́ка, ꙗ҆́коже со́лнце, зарю̀ благоче́стїѧ сѣ́ѧлъ є҆сѝ на землѝ, і҆кѡ́ны поклоне́нїе хрⷭ҇то́вы просвѣща́ющꙋю и҆ ᲂу҆ча́щꙋю, ѻ҆́ч҃е ѳео́дѡре.
Бг҃оро́диченъ:
Оу҆кра́шена, препросла́влена, пресїѧ́ющаѧ свѣ́томъ дѣ́вства, ꙗ҆ви́ласѧ є҆сѝ мт҃и, бг҃а тѣ́ломъ ро́ждшаѧ, и҆ пелена́ми пови́вшаѧ, всѧ̑ ꙗ҆́вѣ повива́ющаго.
Пѣ́снь и҃. І҆рмо́съ:
Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Влече́тъ вавѷлѡ́нѧ дщѝ ѻ҆́троки плѣнє́нныѧ дв҃довы ѿ сїѡ́на къ себѣ̀: дароно́сцы же сле́тъ волхвы̀ дѣ́ти, дв҃довѣ бг҃опрїѧ́тнѣй дще́ри молѧ́щыѧсѧ. тѣ́мъ воспѣва́юще воспое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Ѻ҆рга́ны ᲂу҆клони́ша плачє́вныѧ пѣ̑сни, не поѧ́хꙋ бо въ землѝ чꙋжде́й ѻ҆́троцы сїѡ́новы: вавѷлѡ́нскꙋю же разрѣша́етъ ле́сть всю̀, и҆ мꙋсїкі̑йскїѧ соста́вы, въ виѳлее́мѣ возсїѧ́въ хрⷭ҇то́съ. тѣ́мъ воспѣва́юще воспои́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Коры̑сти вавѷлѡ́нъ црⷭ҇тва сїѡ́нѧ, и҆ плѣне́нное бога́тство прїѧ́тъ: сокрѡ́вища же хрⷭ҇то́съ въ сїѡ́нъ сегѡ̀, и҆ царѝ ѕвѣздо́ю наставлѧ́ѧ ѕвѣздоблюсти́тели влече́тъ. тѣ́мъ воспѣва́юще воспои́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
И҆́нъ. І҆рмо́съ:
Тебѣ̀ вседѣ́телю въ пещѝ ѻ҆́троцы, всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте и҆ превозноси́те во всѧ̑ вѣ́ки.
Прїиди́те, мы́сленнѡ стефа́новою сла́вою ѡ҆блиста́еми, воспои́мъ вопло́щшемꙋсѧ бг҃ꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.
Тебѣ̀, ꙗ҆́кѡ побѣди́телю пребеззако́нныѧ ле́сти, страда́нїй вѣне́цъ и҆сплете́сѧ, стефа́не. тѣ́мъ вопїѧ́лъ є҆сѝ: гдⷭ҇а по́йте, и҆ превозноси́те во всѧ̑ вѣ́ки.
Ꙗ҆ви́сѧ тебѣ̀ хрⷭ҇то́съ во ѻ҆́ч҃ей сла́вѣ, страда́нїй возвѣща́ѧ тебѣ̀ ꙗ҆́вѣ возме́здїѧ: тѣ́мже вопїѧ́лъ є҆сѝ: гдⷭ҇а по́йте и҆ превозноси́те во всѧ̑ вѣ́ки.
И҆сплетѐ на́мъ влⷣчнее ржⷭ҇тво̀ ли́къ и҆ па́мѧть первомч҃ника: тѣ́мъ непреста́ннѡ гдⷭ҇а пое́мъ, и҆ превозно́симъ во всѧ̑ вѣ́ки.
Бг҃оро́диченъ:
Тебѐ па́че ᲂу҆ма̀ бг҃омꙋ́жнѡ сло́вомъ ро́ждшꙋю гдⷭ҇а, и҆ дѣ́вствꙋющꙋю, всѧ̑ дѣла̀, дв҃о, благослови́мъ и҆ превозно́симъ во всѧ̑ вѣ́ки.
И҆́нъ. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Ꙗ҆́кѡ ле́въ, всеблаже́нне, ᲂу҆пова́въ дꙋшѝ тве́рдостїю, не ᲂу҆страши́лсѧ є҆сѝ є҆реті́ческагѡ стремле́нїѧ, неи́стовства тезоимени́тагѡ: є҆го́же ѡ҆плева́въ, лю́демъ ра́дꙋѧсѧ вопїѧ́лъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а.
Оу҆краси́въ мꙋ́жествомъ дꙋ́шꙋ, цѣломꙋ́дрїемъ же, блаже́нне, жела́нїе, ᲂу҆́мъ ра́зꙋма и҆спо́лненъ стѧжа́въ, соверши́лъ є҆сѝ, пра́вдою же твоѧ̑ смы́слы ᲂу҆пра́вилъ є҆сѝ, и҆ вопїе́ши: благослови́те, всѧ̑ дѣла̀ гдⷭ҇нѧ, гдⷭ҇а.
Стремли́вѡ текꙋ́щїй то́къ є҆́реси, ѻ҆́ч҃е, и҆зсꙋши́лъ є҆сѝ, твои́ми наказа̑нїи, прпⷣбне, и҆ всемꙋ́дрыми ᲂу҆каза́ньми хи́трости ѕлочести́выхъ разорѧ́ѧ, и҆ зовѧ̀: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Созда́вый є҆стество̀ въ нача́тцѣхъ человѣ́ческое бг҃ъ, въ сїѐ ѡ҆блачи́тсѧ ѿ пречⷭ҇тагѡ твоегѡ̀, всечⷭ҇таѧ, и҆ ст҃а́гѡ чре́ва, дне́сь въ виѳлее́мѣ прⷪ҇ро́чески ражда́ѧсѧ: тѣ́мъ тѧ̀ всѝ благослови́мъ, марі́е бг҃оневѣ́сто.
Пѣ́снь ѳ҃. І҆рмо́съ:
Та́инство стра́нное ви́жꙋ и҆ пресла́вное: нб҃о, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ, є҆го́же воспѣва́юще, велича́емъ.
И҆зрѧ́дное тече́нїе зрѧ́ще волсвѝ неѻбы́чныѧ но́выѧ ѕвѣзды̀ новосїѧ́ющїѧ, нб҃са̀ просвѣща́ющїѧ, хрⷭ҇та̀ цр҃ѧ̀ поразꙋмꙋва́хꙋ на землѝ ро́ждшагосѧ въ виѳлее́мѣ, на спасе́нїе на́ше.
Новорожде́нное, волхвѡ́мъ глаго́лющымъ, ѻ҆троча̀ цр҃ь, є҆го́же ѕвѣзда̀ ꙗ҆вѝ, гдѣ́ є҆сть; томꙋ́ бо поклони́тисѧ прїидо́хомъ: ꙗ҆рѧ́сѧ и҆́рѡдъ смꙋща́шесѧ, хрⷭ҇та̀ ᲂу҆би́ти, бг҃обо́рецъ шата́ѧсѧ.
И҆спыта̀ и҆́рѡдъ вре́мѧ ѕвѣзды̀, є҆ѧ́же вожде́нїемъ волсвѝ въ виѳлее́мѣ покланѧ́хꙋсѧ хрⷭ҇тꙋ̀ съ да́ры: є҆́юже ко ѻ҆те́чествꙋ наставлѧ́еми, лю́таго дѣтоꙋбі́йцꙋ ѡ҆ста́виша порꙋ́гана.
И҆́нъ. І҆рмо́съ:
И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.
Похва́лъ, стефа́не, преше́лъ є҆сѝ всѧ́къ чи́нъ, и҆ но́сиши по коемꙋ́ждо сло́вꙋ нело́жнѡ ты̀ побѣди́тєльнаѧ: и҆знемога́етъ бо человѣ́ческїй ᲂу҆́мъ, соплестѝ вѣне́цъ похва́лъ тебѣ̀ досто́йный.
Ѽ блаже́ннагѡ твоегѡ̀, є҆го́же провѣща́лъ є҆сѝ, стефа́не, гла́са! не поста́ви ᲂу҆бі́йцамъ, влⷣко, вопїѧ̀, хрⷭ҇тѐ, беззако́нїѧ: но ꙗ҆́кѡ бг҃ъ и҆ содѣ́тель прїимѝ дх҃ъ мо́й, ꙗ҆́коже же́ртвꙋ благово́ннѣйшꙋ.
Ты̀ болѣ́зней воздаѧ́нїе прїѧ́лъ є҆сѝ, побѣди́тельный ѿ вседержи́тельныѧ вѣне́цъ десни́цы: и҆ ны́нѣ, всеблаже́нне, предстоѧ̀ всецр҃ю̀, сла́вою и҆ благода́тїю пою́щыѧ тѧ̀ ᲂу҆вѣнча́й.
Бг҃оро́диченъ:
Вре́меннагѡ бытїѧ̀ ѿ дв҃ы прїѧ́тъ нача́ло пло́тїю, ѿ ѻ҆ц҃а̀ безлѣ́тный сн҃ъ: є҆гѡ́же ра́ди ᲂу҆бива́емь подо́бникъ хрⷭ҇то́въ стефа́нъ, ны́нѣ наслѣ́дова ѿ нача́ла вѣ́чнꙋю жи́знь.
И҆́нъ. І҆рмо́съ:
Ка́мень нерꙋкосѣ́чный ѿ несѣко́мыѧ горы̀, тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ, веселѧ́щесѧ, тѧ̀, бцⷣе, велича́емъ.
Бжⷭ҇твеннымъ побѣжда́емь жела́нїемъ, гоне́нїй ѡ҆полчє́нїѧ ᲂу҆до́бѡ претерпѣ́лъ є҆сѝ, бг҃омꙋ́дре, и҆ гони́телѧ свирѣ́пство низложи́лъ, воспрїѧ́лъ є҆сѝ подвигѡ́въ, ѻ҆́ч҃е, вѣне́цъ.
Бога́тство нбⷭ҇ное ѡ҆брѣ́лъ є҆сѝ, и҆ пребыва́ющꙋю хра́минꙋ, вмѣ́стѡ го́рькагѡ заточе́нїѧ, и҆ стра́нничества и҆ прехожде́нїѧ: и҆ ны́нѣ пита́ешисѧ, прїе́млѧ вѣ́чное наслажде́нїе.
Пѣ́нїе влⷣцѣ приносѧ̀, ѻ҆́ч҃е, и҆ мольбы̑, не преста́й ѡ҆ мое́й не́мощи, и҆ соѡбита̑нїи, и҆ бра́тствѣ, ꙗ҆́кѡ да вкꙋ́пѣ пожи́вше ᲂу҆лꙋчи́мъ вкꙋ́пѣ ѡ҆боже́нїе.
Бг҃оро́диченъ:
Тѧ̀ па́че ᲂу҆ма́ же и҆ сло́ва, въ виѳлее́мѣ бг҃а сло́ва дне́сь ро́ждшꙋю, дв҃о, и҆ въ пелена́хъ сего̀ пови́вшꙋю, ꙗ҆́кѡ вои́стиннꙋ бг҃оѻтрокови́цꙋ и҆ бцⷣꙋ велича́емъ.
Свѣти́ленъ: Подо́бенъ: Дх҃омъ во ст҃и́лищи:
Ѡ҆деснꙋ́ю стоѧ́ща ѻ҆ц҃а̀ ви́дѣлъ є҆сѝ сло́ва пребезнача́льнаго, и҆ свѣ́та неизглаго́ланнагѡ лицѐ и҆спо́лнилъ є҆сѝ, а҆пⷭ҇лѡвъ похвало̀, и҆ мꙋ́ченикѡвъ сла́во: ᲂу҆краси́лсѧ же є҆сѝ вѣнце́мъ ка́менїй мета́ньми, и҆ кончи́нꙋ прїѧ́лъ є҆сѝ бжⷭ҇твеннꙋю.
Сла́ва, и҆ ны́нѣ: Свѣти́ленъ пра́здника:
Во ꙗ҆́слехъ положи́сѧ, младе́нствовавъ ꙗ҆́кѡ младе́нецъ: ѕвѣзда́ же призва̀ тро́ицꙋ волхвѡ́въ: па́стырїе же чꙋдесѝ ᲂу҆ди́вльшесѧ, потща́шасѧ бг҃а ви́дѣти вочл҃вѣ́чшасѧ: а҆́гг҃льстїи же ли́цы дивѧ́щесѧ, сла́ва въ вы́шнихъ, вопїѧ́хꙋ.
На хвали́техъ стїхи̑ры на ѕ҃. Самогла́сны. Гла́съ а҃. Кѷпрїа́ново:
Страда́льческїй вѣне́цъ первострада́льцꙋ вѣ́рнїи и҆сплете́мъ ѿ слове́сныхъ цвѣтѡ́въ: то́й бо мꙋ́ченикѡмъ проꙋгото́ва пꙋ́ть, и҆ въ ра́дости вопїѧ́ше: сѐ нб҃са̀ ѿвє́рста ви́ждꙋ, и҆ сн҃а бж҃їѧ ѡ҆деснꙋ́ю стоѧ́ща неви́димагѡ ѻ҆ц҃а̀.
Гла́съ в҃. А҆нато́лїево:
Пе́рвый въ дїа́конѣхъ, пе́рвый и҆ въ мꙋ́ченицѣхъ показа́лсѧ є҆сѝ, всест҃ы́й стефа́не: пꙋ́ть бо бы́лъ є҆сѝ ст҃ы̑мъ, и҆ мно́ги гдⷭ҇ꙋ приве́лъ є҆сѝ мꙋ́ченики. тѣ́мъ нб҃о тебѣ̀ ѿве́рзесѧ, и҆ бг҃ъ тебѣ̀ ꙗ҆ви́сѧ: того̀ молѝ спасти́сѧ дꙋша́мъ на́шымъ.
Во ст҃ы́ню ѡ҆дѣ́ѧлсѧ є҆сѝ, стефа́не блаже́нне, первомч҃ниче и҆ перводїа́коне, а҆́гг҃лѡвъ соприча́стниче: хода́тайствꙋй и҆ моли́сѧ ѡ҆ на́съ сп҃сꙋ гдⷭ҇ꙋ безгрѣ́шномꙋ.
Первомꙋ́ченика и҆ до́блѧго хрⷭ҇то́ва ᲂу҆го́дника стефа́на перводїа́кона досто́йнѡ почти́мъ: то́й бо стоѧ̀ посредѝ беззакѡ́нникъ, ѡ҆деснꙋ́ю ѻ҆ц҃а̀ сн҃а ви́дѣ.
Гла́съ д҃. І҆ѡа́нна мона́ха:
Стефа́не сла́вне, нбⷭ҇ножи́телю, хрⷭ҇то́въ ᲂу҆го́дниче блаже́нне, моли́твꙋ сотворѝ ѡ҆ дꙋша́хъ на́шихъ.
Гла́съ то́йже:
Стефа́нъ до́брое нача́ло мꙋ́ченикѡвъ, по́лнъ благода́ти и҆ си́лы, творѧ́й зна́мєнїѧ и҆ чꙋдеса̀ вє́лїѧ въ лю́дехъ, ѿ беззако́нныхъ ка́менїемъ побїе́нъ быва́ше, но просвѣти́сѧ ꙗ҆́кѡ а҆́гг҃лъ, и҆ зри́тъ сла́вꙋ тебє̀ распе́ншагѡсѧ на́съ ра́ди, ѡ҆деснꙋ́ю си́лы, и҆ дх҃омъ благода́ти на нб҃са̀ взима́шесѧ: и҆ сегѡ̀ ра́ди съ ликостоѧ̑нїи а҆́гг҃льскими водворѧ́ѧсѧ, мо́литсѧ спасти́сѧ дꙋша́мъ на́шымъ.
Сла́ва, гла́съ є҃. Кѷпрїа́ново:
Первомч҃ниче а҆пⷭ҇ле, и҆ перводїа́коне, две́рь мч҃никѡвъ, и҆ сла́ва пра́ведныхъ, а҆пⷭ҇лѡвъ похвало̀: ты̀ нб҃са̀ ви́дѣлъ є҆сѝ ѿвє́рста на сꙋди́щи стоѧ̀, и҆ сн҃а бж҃їѧ ѡ҆деснꙋ́ю стоѧ́ща неви́димагѡ ѻ҆ц҃а̀. тѣ́мже ꙗ҆́кѡ а҆́гг҃лъ возсїѧ́въ лице́мъ, въ ра́дости взыва́лъ є҆сѝ ѡ҆ побива́ющихъ тѧ̀ ка́менїемъ: не поста́ви и҆̀мъ грѣха̀ сегѡ̀. и҆ ны́нѣ и҆спросѝ ѿ любвѐ хва́лѧщымъ тѧ̀ ѡ҆чище́нїе грѣхѡ́въ, и҆ ве́лїю ми́лость.
И҆ ны́нѣ, гла́съ то́йже. І҆ѡа́нна мона́ха:
Непостижи́мое соверша́емое въ виѳлее́мѣ дне́сь та́инство: неви́димый ви́дитсѧ, безпло́тный воплоща́етсѧ. сло́во ѡ҆дебелѣва́етъ, и҆ сы́й, быва́етъ є҆́же не бѣ̀. дв҃а ражда́етъ въ верте́пѣ млⷣнца мла́да, зда́телѧ є҆стества̀. ꙗ҆́сли воѡбразꙋ́ютсѧ въ прⷭ҇то́лъ нбⷭ҇ный, ско́ти ѡ҆бразꙋ́ютъ херꙋві́мское предстоѧ́нїе. па́стырїе чꙋдѧ́тсѧ. волсвѝ да́ры прино́сѧтъ. а҆́гг҃ли воспѣва́юще глаго́лютъ: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бо благоволе́нїе, неизмѣ́нный є҆мманꙋ́илъ.
На стїхо́внѣ стїхи̑ры, гла́съ ѕ҃. Подо́бенъ: А҆́гг҃льскїѧ:
Вождествꙋ́етъ пра́здникъ ра́достїю всѧ̀ тва́рь, ꙳ и҆ нб҃са̀ съ на́ми ра́дꙋютсѧ: ꙳ во ꙗ҆́слехъ бо зижди́тель ꙳ ѿ дв҃ы воплоща́емый, ꙳ и҆ въ виѳлее́мѣ і҆ꙋде́йстѣмъ ꙳ млⷣнецъ ви́дѣнъ бы́сть пресла́внѡ. ꙳ лю́дїе, рце́мъ: ꙳ бл҃гослове́нъ рожде́йсѧ ꙳ бж҃е на́шъ, сла́ва тебѣ̀.
Сті́хъ: И҆зъ чре́ва пре́жде денни́цы роди́хъ тѧ̀:
Да земны̑ѧ нбⷭ҇ны сотвори́ши, ꙳ прише́лъ є҆сѝ на зе́млю вопло́щсѧ ѿ дв҃ы, ꙳ и҆ млⷣнцъ ви́димь бы́лъ є҆сѝ, ꙳ сло́во сы́й превѣ́чное, ꙳ волхвы̀ подви́глъ є҆сѝ ѿ персі́ды ꙳ въ твоѐ поклоне́нїе, ще́дре. ꙳ съ ни́ми же взыва́емъ: ꙳ бл҃гослове́нъ рожде́йсѧ ꙳ бж҃е на́шъ, сла́ва тебѣ̀.
Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀.
Мла́до на́съ ра́ди, і҆и҃се, ꙳ ꙗ҆ви́лсѧ є҆сѝ ѻ҆троча̀, ꙳ и҆зъ ѻ҆ц҃а̀ пре́жде вѣ̑къ возсїѧ́въ, ꙳ ѡ҆бветша́вшыѧ престꙋпле́нїемъ, ꙳ хотѧ̀ всѧ̑ ѡ҆бнови́ти человѣ́ки. ꙳ тѣ́мъ тебѣ̀ всѝ ꙳ благода́рнѡ при́снѡ зове́мъ: ꙳ бл҃гослове́нъ рожде́йсѧ ꙳ бж҃е на́шъ, сла́ва тебѣ̀.
Сла́ва, гла́съ и҃. Кѷпрїа́ново:
Ра́дꙋйсѧ въ гдⷭ҇ѣ, вѣнчено́сче стефа́не, подо́бникъ влⷣки: зане́же и҆ первомч҃никъ бы́лъ є҆сѝ хрⷭ҇та̀ цр҃ѧ̀ на́шегѡ, и҆ ле́сть беззако́нныхъ і҆ꙋдє́й ᲂу҆праздни́лъ є҆сѝ, молѧ́сѧ ѡ҆ на́съ ко гдⷭ҇ꙋ.
И҆ ны́нѣ, гла́съ то́йже. І҆ѡа́нна мона́ха:
Ка́кѡ и҆зрекꙋ̀ вели́кое та́инство; безпло́тный воплоща́етсѧ, сло́во ѡ҆дебелѣва́етъ, неви́димый ви́дитсѧ, и҆ неѡсѧза́емый ѡ҆сѧза́етсѧ, и҆ безнача́льный начина́етсѧ: сн҃ъ бж҃їй, сн҃ъ человѣ́чь быва́етъ: і҆и҃съ хрⷭ҇то́съ вчера̀ и҆ дне́сь, то́йже и҆ во вѣ́ки.
На лїтꙋргі́и: Бл҃жє́нна пра́здника, пѣ́снь а҃, на д҃: и҆ ст҃а́гѡ, пѣ́снь г҃, на д҃. Прокі́менъ пра́здника, и҆ до ѿда́нїѧ: и҆ а҆пⷭ҇ла, гла́съ и҃: Во всю̀ зе́млю и҆зы́де вѣща́нїе и҆́хъ. Сті́хъ: Небеса̀ повѣ́даютъ сла́вꙋ бж҃їю: А҆пⷭ҇лъ въ дѣѧ́нїихъ, зача́ло з҃і. А҆ллилꙋ́їа, гла́съ а҃: И҆сповѣ́дѧтъ небеса̀ чꙋдеса̀ твоѧ̑, гдⷭ҇и. Є҆ѵⷢ҇лїе матѳе́а, зача́ло п҃з. Прича́стенъ пра́здника, и҆ до ѿда́нїѧ, и҆ а҆пⷭ҇ла: Во всю̀ зе́млю:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.