← претходни дан | Минеј — Децембар | следећи дан →
20 декабря: Предпразднество по плоти Рождества Господа Бога и Спаса нашего Иисуса Христа. Священномученика Игнатия Богоносца.
Мѣ́сѧца тогѡ́же въ к҃-й де́нь.
Предпра́зднство по пло́ти ржⷭ҇тва̀ гдⷭ҇а бг҃а и҆ сп҃са на́шегѡ і҆и҃са хрⷭ҇та̀.
И҆ ст҃а́гѡ сщ҃енномч҃ника і҆гна́тїа бг҃оно́сца.
И҆ првⷣнагѡ і҆ѡа́нна кроншта́дскагѡ. Слꙋ́жба є҆гѡ̀ пи́сана въ приложе́нїи.
На Гдⷭ҇и, воззва́хъ, стїхи̑ры предпра́зднства, г҃: и҆ ст҃а́гѡ, г҃.
Стїхи̑ры предпра́зднства, гла́съ а҃. Самогла́сны. А҆нато́лїа:
Предпра́зднꙋимъ, лю́дїе, хрⷭ҇то́во ржⷭ҇тво̀, и҆ возне́сше ᲂу҆́мъ къ виѳлее́мꙋ, вознесе́мсѧ мы́слїю: и҆ ᲂу҆смо́тримъ дв҃ꙋ дꙋше́вными ѻ҆чесы̀, и҆дꙋ́щꙋю роди́ти въ верте́пѣ всѣ́хъ гдⷭ҇а и҆ бг҃а на́шегѡ. є҆гѡ́же і҆ѡ́сифъ ви́дѣвъ чꙋде́съ вели́чество, мнѧ́ше чл҃вѣ́ка зрѣ́ти, ꙗ҆́кѡ млⷣнца пелена́ми повива́ема, поразꙋмѣва́ше же ѿ веще́й бг҃а бы́ти и҆́стиннаго, подаю́щаго дꙋша́мъ на́шымъ ве́лїю ми́лость.
Предпра́зднꙋимъ, лю́дїе, хрⷭ҇то́во ржⷭ҇тво̀, и҆ ᲂу҆́мъ возне́сше къ виѳлее́мꙋ, вознесе́мсѧ мы́слїю, и҆ ᲂу҆́зримъ въ верте́пѣ ве́лїе та́инство: ѿве́рзесѧ бо є҆де́мъ, ѿ дв҃ы чⷭ҇тыѧ бг҃ꙋ происходѧ́щꙋ, соверше́нъ сы́й то́йжде въ бжⷭ҇твѣ̀ и҆ человѣ́чествѣ. тѣ́мже воззове́мъ: ст҃ы́й бж҃е, ѻ҆́ч҃е безнача́льный: ст҃ы́й крѣ́пкїй, сн҃е воплоти́выйсѧ: ст҃ы́й безсме́ртный, ᲂу҆тѣ́шительный дш҃е. трⷪ҇це ст҃а́ѧ, сла́ва тебѣ̀.
Слы́ши, нб҃о, и҆ внꙋшѝ, землѐ: се́ бо сн҃ъ и҆ сло́во бг҃а и҆ ѻ҆ц҃а̀, прихо́дитъ роди́тисѧ ѿ ѻ҆трокови́цы неискꙋсомꙋ́жныѧ, благоволе́нїемъ роди́вшагѡ є҆го̀ безстра́стнѡ, и҆ содѣ́йствомъ ст҃а́гѡ дх҃а. виѳлее́ме, гото́висѧ, ѿве́рзи врата̀, є҆де́ме, ꙗ҆́кѡ сы́й быва́етъ, є҆́же не бѣ̀: и҆ содѣ́тель всеѧ̀ тва́ри назида́етсѧ, подаѧ́й мі́рꙋ ве́лїю ми́лость.
И҆́ны стїхи̑ры ст҃а́гѡ, гла́съ д҃. Подо́бенъ: Зва́нный свы́ше:
Бг҃оно́сецъ нарица́емый досто́йнѡ, ꙳ є҆гда̀ влⷣка тѧ̀, ꙳ блаже́нне і҆гна́тїе, ꙳ ꙗ҆́кѡ ми́лостивъ, ѡ҆б̾ѧ́тъ, ꙳ любомꙋ́дрїѧ го́рнѣйшагѡ ꙗ҆влѧ́ѧ догма́ты: ꙳ тогда̀ многосвѣ́тлꙋю лꙋчꙋ̀ воспрїѧ́лъ є҆сѝ, ꙳ ꙗ҆́коже гꙋ́ба во́ды, ꙳ ѿ бе́здны просвѣще́нїй поче́рплъ є҆сѝ. ꙳ тѣ́мъ и҆ стопа́мъ послѣ́довалъ є҆сѝ, ꙳ зовꙋ́щемꙋ хрⷭ҇тꙋ̀ бг҃ꙋ на́шемꙋ: ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Оу҆ѧ́звенъ любо́вїю соверше́нною ꙳ є҆гда̀ спасе́нное раче́нїе ꙳ разжжѐ твою̀ дꙋ́шꙋ, свѧще́ннѣйше, ꙳ ко влⷣцѣ тѧ̀ понꙋжда́ющее, ѻ҆́ч҃е, и҆тѝ. ꙳ тогда̀ приснопѣ́тое сло́во возопи́лъ є҆сѝ: ꙳ пшени́ца є҆́смь созда́вшагѡ, ꙳ и҆ зꙋбы̑ ѕвѣре́й подоба́етъ мѝ всѧ́кѡ смоло́тисѧ, ꙳ да сло́вꙋ чистѣ́йшїй хлѣ́бъ ꙗ҆влю́сѧ, ꙳ и҆ бг҃ꙋ на́шемꙋ: ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Сраспѧ́лсѧ є҆сѝ хрⷭ҇тꙋ̀, ꙳ свѧщенноѧвле́нне, ꙳ є҆гда̀ бг҃одꙋхнове́нное сло́во возопи́лъ є҆сѝ: ꙳ моѐ раче́нїе распѧ́тисѧ, ꙳ и҆ приѡбщи́тисѧ тогѡ̀ стрⷭ҇ти ѕѣлѡ̀ тщꙋ́сѧ. ꙳ ѿсю́дꙋ, і҆гна́тїе, ꙳ ꙗ҆́коже со́лнце ѿ восто́ка, ᲂу҆стреми́всѧ на за́падъ, ꙳ просвѣща́ѧ, бл҃же́нне, ѡ҆бте́клъ є҆сѝ: ꙳ и҆ ца́рскою дїади́мою ᲂу҆кра́шенъ, ꙳ хрⷭ҇тꙋ̀ приве́лсѧ є҆сѝ. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Сла́ва, гла́съ и҃. А҆нато́лїево:
Бг҃оно́се і҆гна́тїе, твоего̀ жела́емаго хрⷭ҇та̀ вперси́въ, мздꙋ̀ воспрїѧ́лъ є҆сѝ свѧщеннодѣ́йства є҆ѵⷢ҇лїа хрⷭ҇то́ва, є҆́же сконча́тисѧ кро́вїю. тѣ́мже пшени́ца бы́въ безсме́ртнагѡ дѣ́лателѧ, зꙋбы̑ ѕвѣре́й смеле́нъ бы́лъ є҆сѝ, и҆ хлѣ́бъ сла́докъ томꙋ̀ ꙗ҆ви́лсѧ є҆сѝ: молѝ ѡ҆ на́съ, страда́льче блаже́нне.
И҆ ны́нѣ, гла́съ то́йже:
Воспрїимѝ, виѳлее́ме, бж҃їю митропо́лїю, свѣ́тъ бо незаходи́мый въ тебѣ̀ роди́тисѧ прихо́дитъ. а҆́гг҃ли, ᲂу҆диви́тесѧ на нб҃сѝ, человѣ́цы, просла́вите на землѝ, волсвѝ, ѿ персі́ды пресла́вный да́ръ принеси́те, па́стырїе, свирѧ́юще, трист҃о́е пѣ́нїе сла́дцѣ воспо́йте: всѧ́кое дыха́нїе да хва́литъ вседѣ́телѧ.
А҆́ще слꙋчи́тсѧ предпра́зднство ржⷭ҇тва̀ хрⷭ҇то́ва въ сꙋббѡ́тꙋ:
Въ пѧто́къ ве́чера бг҃оро́диченъ а҃-й мимоше́дшагѡ гла́са не пое́тсѧ.
Та́кожде и҆ въ предпра́зднство ст҃ы́хъ бг҃оѧвле́нїй.
На стїхо́внѣ стїхи̑ры, самогла́сны, гла́съ в҃: Кѷпрїа́ново:
Сѐ, вре́мѧ прибли́жисѧ спасе́нїѧ на́шегѡ, гото́висѧ, верте́пе: дв҃а приближа́етсѧ, є҆́же роди́ти. виѳлее́ме, землѐ і҆ꙋ́дова, красꙋ́йсѧ и҆ весели́сѧ, ꙗ҆́кѡ и҆зъ тебє̀ возсїѧ̀ гдⷭ҇ь на́шъ. ᲂу҆слы́шите го́ры и҆ хо́лми, и҆ ѻ҆крє́стныѧ страны̑ і҆ꙋдє́йскїѧ, ꙗ҆́кѡ грѧде́тъ хрⷭ҇то́съ, да спасе́тъ є҆го́же созда̀ человѣ́ка, ꙗ҆́кѡ чл҃вѣколю́бецъ.
Сті́хъ: Бг҃ъ ѿ ю҆́га прїи́детъ, и҆ ст҃ы́й и҆зъ горы̀ приѡсѣне́нныѧ ча́щи.
Виѳлее́ме, землѐ і҆ꙋ́дова, є҆́же по пло́ти жи́тельство, свѣ́тлѡ ᲂу҆гото́ви бжⷭ҇твенный верте́пъ, въ не́мже бг҃ъ пло́тїю ражда́етсѧ, ѿ неискꙋсомꙋ́жныѧ ст҃ы́ѧ дв҃ы, во є҆́же спастѝ ро́дъ на́шъ.
Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ.
А҆ндре́а пѵ́рскагѡ:
Прїиди́те всѝ, хрⷭ҇то́во ржⷭ҇тво̀ вѣ́рнѡ предпра́зднꙋимъ, и҆ мы́сленнѣ пѣ́нїе, ꙗ҆́кѡ ѕвѣздꙋ̀ предлага́юще, волхвѡ́въ славослѡ́вїѧ съ па́стырьми возопїи́мъ: прїи́де спасе́нїе человѣ́кѡвъ и҆зъ дѣ́вственныхъ ложе́снъ, вѣ̑рныѧ воззыва́ѧ.
Сла́ва, гла́съ а҃: Стꙋді́тово:
Ѽ тве́рдыѧ и҆ а҆дама́нтскїѧ твоеѧ̀ дꙋшѝ, достобл҃же́нне і҆гна́тїе! ты́ бо къ сꙋ́щемꙋ твоемꙋ̀ рачи́телю неѡсла́бное и҆мѣ́ѧ жела́нїе, глаго́лалъ є҆сѝ: нѣ́сть во мнѣ̀ ѻ҆́гнь любовеще́ственъ, вода́ же па́че жива́ѧ и҆ глаго́лющаѧ во мнѣ̀, внꙋ́трь мѝ глаго́лющи: грѧдѝ ко ѻ҆ц҃ꙋ̀. тѣ́мже, бжⷭ҇твеннымъ дх҃омъ распалѧ́емь, ѕвѣ́ри и҆збра́лъ є҆сѝ мі́ра тѧ̀ скорѣ́е разлꙋчи́ти, и҆ къ жела́емомꙋ препосла́ти хрⷭ҇тꙋ̀. є҆го́же молѝ спастѝ дꙋ́шы на́шѧ.
И҆ ны́нѣ, гла́съ то́йже:
Предпра́зднꙋимъ лю́дїе, хрⷭ҇то́во ржⷭ҇тво̀, и҆ возне́сше ᲂу҆́мъ къ виѳлее́мꙋ, вознесе́мсѧ мы́слїю, и҆ ᲂу҆смо́тримъ дв҃ꙋ дꙋше́вными ѻ҆чесы̀, и҆дꙋ́щꙋю роди́ти въ верте́пѣ всѣ́хъ гдⷭ҇а и҆ бг҃а на́шего: є҆гѡ́же і҆ѡ́сифъ ви́дѣвъ чꙋде́съ вели́чество, мнѧ́ше чл҃вѣ́ка зрѣ́ти, ꙗ҆́кѡ млⷣнца, пелена́ми повива́ема: поразꙋмѣва́ше же ѿ веще́й бг҃а бы́ти и҆́стиннаго, подаю́щаго дꙋша́мъ на́шымъ ве́лїю ми́лость.
Тропа́рь, гла́съ д҃:
И҆ нра́вѡмъ прича́стникъ, и҆ прⷭ҇то́лѡмъ намѣ́стникъ а҆по́столѡмъ бы́въ, дѣѧ́нїе ѡ҆брѣ́лъ є҆сѝ, бг҃одохнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, сщ҃енномꙋ́чениче і҆гна́тїе, молѝ хрⷭ҇та̀ бг҃а, спасти́сѧ дꙋша́мъ на́шымъ.
Сла́ва, и҆ ны́нѣ, предпра́зднства гла́съ то́йже:
Гото́висѧ, виѳлее́ме, ѿве́рзисѧ всѣ̑мъ, є҆де́ме, красꙋ́йсѧ, є҆ѵфра́ѳо, ꙗ҆́кѡ дре́во живота̀ въ верте́пѣ процвѣтѐ ѿ дв҃ы: ра́й бо ѻ҆́ноѧ чре́во ꙗ҆ви́сѧ мы́сленный, въ не́мже бжⷭ҇твенный са́дъ: ѿ негѡ́же ꙗ҆́дше жи́ви бꙋ́демъ, не ꙗ҆́коже а҆да́мъ ᲂу҆́мремъ. хрⷭ҇то́съ ражда́етсѧ, пре́жде па́дшїй возста́вити ѻ҆́бразъ.
На повече́рїи пое́мъ трипѣ́снецъ.
Гла́съ в҃. І҆рмо́съ: Непроходи́мое волнѧ́щеесѧ: по два́жды, тропарѝ на ѕ҃: и҆ послѣдѝ і҆рмо́съ ѻ҆́ба ли̑ка вкꙋ́пѣ. А҆ и҆дѣ́же двоїрмо́сенъ трипѣ́снецъ, и҆ пое́мъ а҃-гѡ творца̀ і҆рмо́съ, два́жды. Тропари́ же ѻ҆бою̀ творцѡ́въ на ѕ҃: и҆ послѣдѝ і҆рмо́съ в҃-гѡ канѡ́на ѻ҆́ба ли̑ка вкꙋ́пѣ. Си́це пое́мъ канѡ́нъ и҆ і҆рмосы̀, и҆ на про́чихъ повече́рїихъ въ предпра́зднство хрⷭ҇то́ва ржⷭ҇тва̀. Припѣва́емъ на трипѣ́сницѣ: Сла́ва тебѣ̀, бж҃е на́шъ, сла́ва тебѣ̀.
Вѣ́домо же бꙋ́ди и҆ сїѐ:
Ꙗ҆́кѡ на повече́рїи въ предпра́зднства хрⷭ҇то́ва ржⷭ҇тва̀, на трипѣ́снцѣ, и҆ на канѡ́нѣхъ, на и҃-й пѣ́сни пое́мъ: Хва́лимъ, бл҃гослови́мъ: и҆ пое́мъ і҆рмо́съ и҃-ѧ пѣ́сни ѻ҆́ба ли̑ка вкꙋ́пѣ, и҆ покло́нъ. На повече́рїи конда́къ предпра́зднства: Дв҃а дне́сь:
Вѣ́домо же и҆ сїѐ да бꙋ́детъ.
Ꙗ҆́кѡ ѿ двадесѧ́тагѡ днѐ деке́мврїа до д҃і і҆аннꙋа́рїа, до́ндеже ѿда́стсѧ пра́здникъ ст҃ы́хъ бг҃оѧвле́нїй, ѻ҆ктѡ́ихъ не пое́тсѧ, кромѣ̀ є҆ди́ныхъ недѣ́ль, въ ни́хже пое́тсѧ воскрⷭ҇на слꙋ́жба.
Полѷеле́а же не пое́мъ, кромѣ̀ вели́кагѡ ст҃а́гѡ. На ᲂу҆́трени стїхосло́вимъ по двѣ̀ каѳі̑смы, на вече́рни каѳі́сма рѧдова́ѧ. Сѣда́льны глаго́лютсѧ предпра́зднства, и҆ попра́зднства. Не пое́тсѧ же и҆ междоча́сїе, и҆ канѡ́нъ бцⷣы на повече́рїи.
Трипѣ́снецъ, гла́съ в҃. Є҆гѡ́же краегране́сїе: Второ́мꙋ.
Пѣ́снь а҃. І҆рмо́съ:
Непроходи́мое волнѧ́щеесѧ мо́ре, бж҃їимъ свои́мъ велѣ́нїемъ и҆зсꙋши́вшемꙋ, и҆ пѣшеше́ствовати сквозѣ̀ є҆̀ і҆и҃льтєскїѧ лю́ди наста́вльшемꙋ, гдⷭ҇еви пои́мъ: сла́внѡ бо просла́висѧ.
Припѣ́въ: Сла́ва тебѣ̀, бж҃е на́шъ, сла́ва тебѣ̀.
Неизрече́нное сло́ва бж҃їѧ низше́ствїе: са́мъ бо ꙗ҆́кѡ бг҃очл҃вѣ́къ хрⷭ҇то́съ познава́етсѧ: бг҃ъ нехище́нїе бы́ти вмѣнѧ́емь, воѡбраже́нїемъ раба̀ показꙋ́етсѧ всѣ̑мъ на́мъ: сла́внѡ бо просла́висѧ.
Послꙋжи́ти хрⷭ҇то́съ во́льнѡ прихо́дитъ, є҆гѡ́же ѻ҆́бразъ зижди́тель ны́нѣ прїе́млетъ, ѡ҆бнища́вшаго а҆да́ма ѡ҆богаща́ѧ бжⷭ҇тво́мъ, стра́нное ѡ҆бновле́нїе и҆ возрожде́нїе, ꙗ҆́кѡ бл҃гоꙋтро́бенъ, да́рꙋѧ.
Пѣ́снь и҃. І҆рмо́съ:
Оу҆страши́сѧ ѻ҆трокѡ́въ благочести́выхъ соѻбра́знагѡ дꙋшѝ нескве́рнагѡ тѣ́ла, и҆ ᲂу҆страни́сѧ воспита́нный въ безмѣ́рномъ веществѣ̀, неꙋтрꙋжде́нъ ѻ҆́гнь: присноживꙋ́щꙋ же и҆з̾ꙋвѧ́дшꙋ пла́меню, вѣ́чнꙋющаѧ пѣ́снь воспѣва́шесѧ: гдⷭ҇а, всѧ̑ дѣла̀ по́йте, и҆ превозноси́те во всѧ̑ вѣ́ки.
Ва́съ моѧ̑ всѧ̑ сро́дники ны́нѣ положꙋ̀, а҆́ще моѧ̑ за́пѡвѣди соблюдетѐ, гл҃го́летъ хрⷭ҇то́съ человѣ́кѡмъ, и҆зъ ᲂу҆тро́бы чⷭ҇тыѧ проше́дый: и҆̀мже ми́ръ даѧ́й, и҆ смирє́ннаѧ мꙋ́дрствовати ны́нѣ предлага́етъ, и҆ гдⷭ҇а зна́юще мѧ̀ по́йте, и҆ превозноси́те во всѧ̑ вѣ́ки.
Чи́на проти́внагѡ въ тебѣ̀ плотска́гѡ є҆́сть ржⷭ҇тво̀, сло́ве бж҃їй, не кро́вь бо и҆ пло́ть твою̀ ст҃ꙋ́ю пло́ть соста́виша: но дх҃а ст҃а́гѡ прише́ствїе, и҆ вы́шнѧгѡ бжⷭ҇твенное ѡ҆сѣне́нїе, ꙗ҆́кѡ гдⷭ҇а вѣ́дѧще тѧ̀ пое́мъ и҆ превозно́симъ во всѧ̑ вѣ́ки.
И҆́нъ двопѣ́снецъ, є҆гѡ́же краегране́сїе: И҆ тре́тїемꙋ.
І҆рмо́съ: Велѣ́нїю мꙋчи́телевꙋ:
Лѣ́ности со́нъ ѿ на́съ ѿложи́мъ, и҆ дꙋше́внымъ бо́дрствомъ ражда́ющагосѧ ѿ ѻ҆трокови́цы чи́стыѧ хрⷭ҇та̀ срѧ́щимъ, зовꙋ́ще: благослови́те, дѣла̀ гдⷭ҇нѧ, гдⷭ҇а.
Дово́льно бꙋ́ди дѣѧ́нїе благо́е, на́ше дꙋше́вное сокро́вище: ꙗ҆́кѡ да свѣ́тлымъ лице́мъ хрⷭ҇тꙋ̀ ражда́емомꙋ пое́мъ: благослови́те, дѣла̀ гдⷭ҇нѧ, гдⷭ҇а.
Тала́нтъ дѣ́лы благи́ми возрасти́вше, ꙗ҆́коже да́ры да́вшемꙋ, вмѣ́стѡ зла́та и҆ лїва́на и҆ смѵ́рны, принесе́мъ хрⷭ҇тꙋ̀, грѧдꙋ́щемꙋ роди́тисѧ и҆зъ дв҃ы бг҃оѻтрокови́цы.
Хва́лимъ, благослови́мъ, покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.
І҆рмо́съ:
Велѣ́нїю мꙋчи́телевꙋ прпⷣбнїи трїѐ ѻ҆́троцы не повинꙋ́вшесѧ, въ пе́щь вве́ржени, бг҃а и҆сповѣ́дахꙋ пою́ще: благослови́те, дѣла̀ гдⷭ҇нѧ, гдⷭ҇а.
И҆ покло́нъ.
Пѣ́снь ѳ҃. І҆рмо́съ:
Возвели́чилъ є҆сѝ, хрⷭ҇тѐ, ро́ждшꙋю тѧ̀ бцⷣꙋ, ѿ неѧ́же, созда́телю на́шъ, въ подобостра́стное на́мъ ѡ҆бле́клсѧ є҆сѝ тѣ́ло, на́шихъ прегрѣше́нїй рѣши́тельное: сїю̀ ᲂу҆блажа́юще всѝ ро́ди, тебѐ велича́емъ.
Кі́йждо ли́къ, пропѣ́въ і҆рмо́съ, твори́тъ покло́нъ.
Скве́рнꙋ всю̀ стра́стнꙋю ѿри́нꙋвше, досто́йнѡ прише́ствїе хрⷭ҇то́во ра́зꙋмомъ воспрїи́мемъ цѣломꙋ́дрымъ: и҆́бо нескве́рнѡ предгрѧде́тъ пло́ть понестѝ, и҆ всѣ̑мъ дарова́ти бжⷭ҇твенное дх҃омъ ѡ҆бновле́нїе.
Взира́юще на хрⷭ҇та̀ смирѧ́ющагосѧ, возвы́симсѧ ѿ долѣре́тныхъ страсте́й: ре́вностїю же до́брою не мꙋ́дрствовати высѡ́каѧ, вѣ́рѣ наꙋчи́вшесѧ, въ дꙋ́сѣ да смири́мсѧ, ꙗ҆́кѡ да ражда́емаго высокотво́рными дѣ́лы возвы́симъ.
И҆́нъ. І҆рмо́съ: Невмѣсти́маго бг҃а:
Бл҃горазꙋ̑мнымъ хрⷭ҇то́съ бо́дрствовати заповѣ́даетъ тогѡ̀ надѣ́ющымсѧ прише́ствїѧ и҆зъ дв҃ы. се́ бо прихо́дитъ роди́тисѧ.
Во второ́мъ твое́мъ, хрⷭ҇тѐ, прише́ствїи, сожи́телѧ десны̑мъ мѧ̀ причтѝ ѻ҆вца́мъ твои̑мъ, твоѐ чтꙋ́щаго въ пло́ти прише́ствїе.
І҆рмо́съ:
Невмѣсти́маго бг҃а во чре́вѣ вмѣсти́вшаѧ и҆ ра́дость мі́рꙋ роди́вшаѧ, тѧ̀ пое́мъ, бцⷣе дв҃о.
И҆ покло́нъ.
На ᲂу҆́трени на Бг҃ъ гдⷭ҇ь: тропа́рь предпра́зднства два́жды: Сла́ва: ст҃а́гѡ, И҆ ны́нѣ: предпра́зднства.
По а҃-й стїхоло́гїи, сѣда́ленъ, гла́съ а҃. Поⷣ: Гро́бъ тво́й, сп҃се.
Весели́сѧ, виѳлее́ме, є҆ѵфра́ѳо, гото́висѧ: се́ бо а҆́гница па́стырѧ вели́каго въ ложесна́хъ носѧ́щи, роди́ти грѧде́тъ: и҆ предви́дѧще бжⷭ҇твеннꙋю ѕвѣздꙋ̀ волсвѝ ра́дꙋютсѧ, съ па́стырьми пою́ще се́рдца пра́востїю.
Сла́ва, и҆ ны́нѣ:
Приклони́вый нб҃са̀, и҆ въ дв҃ꙋ всели́выйсѧ, происхо́дитъ пло́тїю въ виѳлее́мстѣмъ верте́пѣ роди́тисѧ, ꙗ҆́коже писа́сѧ, ви́дѣтисѧ же млⷣнцъ, младе́нцы ѡ҆живлѧ́ѧй во ᲂу҆тро́бѣ: сего̀ ра́дꙋющесѧ ны́нѣ срѧ́щимъ всѝ се́рдца пра́востїю.
По в҃-й стїхоло́гїи сѣда́ленъ, гла́съ д҃. Подо́бенъ: Ско́рѡ предварѝ:
Дѣ́вы, предначни́те дѣви́ческꙋю ра́дость: ма́тєри, восхвали́те провожде́нїе мт҃ре хрⷭ҇та̀ бг҃а на́шегѡ: волсвѝ со а҆́гг҃лы, съ на́ми па́стырїе: грѧде́тъ бо дв҃а, во гра́дѣ виѳлее́мѣ, роди́ти сн҃а превѣ́чнаго бг҃а, спаса́ющаго мі́ръ ѿ тлѣ́нїѧ.
Сла́ва, и҆ ны́нѣ: гла́съ то́йже:
Ра́дꙋйсѧ, сїѡ́не, виѳлее́ме, ᲂу҆краси́сѧ, всѣ́хъ содержи́тель ѕвѣздꙋ̀ предпосла́въ, возвѣстѝ безмѣ́рное своѐ схожде́нїе, є҆гѡ́же трепе́щꙋтъ нбⷭ҇ныѧ си̑лы, вои́стиннꙋ ражда́етсѧ ѿ дв҃ы непрело́жнѡ є҆ди́нъ чл҃вѣколю́бецъ.
По каѳі́смахъ чте́мъ мꙋче́нїе ст҃а́гѡ і҆гна́тїа на дво́е: и҆ сло́во златоꙋ́стово є҆́же ѡ҆ блаже́ннѣмъ фїлого́нїи, на дво́е. Ѱало́мъ н҃.
Вѣ́домо же бꙋ́ди, ꙗ҆́кѡ ѿ дне́шнѧгѡ днѐ, Гдⷭ҇еви пое́мъ: въ пѣ́снехъ не гл҃го́лемъ, до́ндеже ѿда́стсѧ пра́здникъ ст҃ы́хъ бг҃оѧвле́нїй.
Канѡ́на два̀ предпра́зднства со і҆рмосо́мъ на и҃, и҆ ст҃а́гѡ на ѕ҃.
Канѡ́нъ предпра́зднства. Є҆гѡ́же краегране́сїе:
Пое́тсѧ сїѧ̑ предпра́зднствєннаѧ. І҆ѡ́сифъ:
Гла́съ а҃. Пѣ́снь а҃. І҆рмо́съ, по два́жды:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Начне́мъ дне́сь предпра́зднствовати хрⷭ҇то́во ржⷭ҇тво̀, ро́ждшагосѧ пло́тїю ѿ дв҃ы мт҃ре, въ верте́пѣ виѳлее́мстѣмъ, за бл҃гоꙋтро́бїе мно́гое.
Оу҆́зъ ѿрѣша́ѧ мѧ̀ грѣхо́вныхъ, пелена́ми повива́етсѧ и҆ въ ꙗ҆́слѣхъ полага́етсѧ, млⷣнцъ ви́димь, превѣ́чный бг҃ъ: сла́ва держа́вѣ є҆гѡ̀.
Бг҃оро́диченъ:
Є҆де́мъ ѿверза́етсѧ тебѣ̀ ро́ждшꙋсѧ ѿ дв҃ы бг҃оѻтрокови́цы, во гра́дѣ, влⷣко, виѳлее́мѣ пло́тїю: пѣсносло́вимъ стра́шное смотре́нїе твоѐ.
И҆́нъ канѡ́нъ ст҃а́гѡ і҆гна́тїа, гла́съ и҃ і҆рмо́съ то́йже: творе́нїе а҆ндре́а кри́тскагѡ.
Свѣ́тлѡ пра́зднꙋюще да ᲂу҆чреди́мсѧ, мꙋ́ченикъ і҆гна́тїй свѧще́ннѡ созыва́етъ цр҃ковь хрⷭ҇то́вꙋ, на страда́нїе є҆гѡ̀ многопѣ́тое.
Свѣти́льникъ пресвѣ́тлѣйшїй цр҃кве сы́й, і҆гна́тїе, просвѣща́еши всѧ̑ зємны́ѧ концы̀, и҆ за̑паднаѧ ѡ҆зарѧ́еши, ѿ восто́ка прише́дъ.
Па́ѵловымъ подо́бѧсѧ по мѣ́стѡмъ бѣда́мъ, і҆гна́тїе, и҆ сы́й ю҆́зникъ, не стꙋжи́лъ є҆сѝ, ᲂу҆твержда́ѧ писа́ньми. ча́стыми цр҃кви хрⷭ҇тѡ́вы.
Сла́внꙋю па́мѧть твою̀ всѝ пое́мъ, всеблаже́нне і҆гна́тїе, и҆ пѣ́сньми почита́емъ вѣнча́вшаго тво́й всечестны́й ве́рхъ, бг҃облаже́нне.
Да стрꙋ́жетсѧ пло́ть моѧ̀, кро́вь да лїе́тсѧ, жела́нїемъ тщꙋ́сѧ, ко ѕвѣрє́мъ гото́въ, къ сомле́нїю ᲂу҆кра́шенъ, ко ѻ҆гню̀, къ мечꙋ̀, къ снѣде́нїю, мꙋ́ченикъ вопїѧ́ше.
Бг҃оро́диченъ:
Є҆де́ме, ᲂу҆краси́сѧ, є҆ѵфра́ѳа бо созда́телю ᲂу҆гото́васѧ, роди́тисѧ хотѧ́щꙋ ѿ дв҃ы мт҃ре, въ верте́пѣ виѳлее́мстѣмъ, за бл҃гоꙋтро́бїе мно́гое.
Пѣ́снь г҃. І҆рмо́съ:
Ка́мень, є҆гѡ́же небрего́ша зи́ждꙋщїи, се́й бы́сть во главꙋ̀ ᲂу҆́гла, то́й є҆́сть ка́мень, на не́мже ᲂу҆твердѝ цр҃ковь хрⷭ҇то́съ, ю҆́же ѿ ꙗ҆зы̑къ и҆скꙋпѝ.
Пѣ́снь предпра́зднственнꙋю всѧ̑ да припѣва́етъ тва́рь, пре́жде денни́цы ѿ ѻ҆ц҃а̀ ро́ждшемꙋсѧ, и҆ ны́нѣ и҆зъ дв҃ы неизрече́ннѡ просїѧ́вшемꙋ, и҆ ражда́ющемꙋсѧ пло́тїю въ виѳлее́мѣ за милосе́рдїе мно́гое.
Ѕвѣзда̀ ᲂу҆жѐ возсїѧ̀ ѿ пле́мене і҆ꙋ́дова, ю҆́же позна́вше ца́рїе, движе́нїе ѿ восто́кѡвъ творѧ́тъ, и҆ дости́гнꙋти тща́тсѧ, ꙗ҆́кѡ да ᲂу҆́зрѧтъ хрⷭ҇та̀, въ виѳлее́мѣ пло́тїю ражда́ема.
Бг҃оро́диченъ:
Сїѐ воплоще́нїе хрⷭ҇то́во ᲂу҆вѣ́дѣвъ и҆са́їа, дх҃омъ ст҃ы́мъ ꙗ҆́вѣ предглаго́летъ: ѻ҆троча̀ и҆зъ дв҃ы ражда́етсѧ гдⷭ҇ь, въ возрожде́нїе на́ше, є҆гѡ́же вла́сть на ра́мѣ є҆гѡ̀.
Ст҃а́гѡ. І҆рмо́съ то́йже.
Ѻ҆́бразъ свѧще́ннагѡ страда́нїѧ показа́лсѧ є҆сѝ, ѻ҆́ч҃е, сто́лпъ терпѣ́нїѧ, и҆ пра́вило мꙋ́жества, и҆ сто́лпъ цр҃кве, и҆ вѣ́ры ᲂу҆твержде́нїе, и҆ добродѣ́тели подписа́нїе, страда́ньми честны́ми вѣнча́всѧ во хрⷭ҇тѣ̀.
Вои́стиннꙋ тезоиме́ннѡ наре́клсѧ є҆сѝ бг҃оно́сецъ, ѻ҆́ч҃е: младе́нецъ бо є҆щѐ во́зрастомъ сы́й, на рꙋка́хъ носи́мь гдⷭ҇а, поста́вилсѧ є҆сѝ возглаша́ющагѡ къ на́мъ: бꙋ́дите мнѣ̀, ꙗ҆́кѡ ѻ҆троча̀ сїѐ.
Пшени́ца чиста̀ бж҃їѧ є҆́смь, вопїѧ́лъ є҆сѝ, ѻ҆́ч҃е: тщꙋ́сѧ ѿ ѕвѣре́й ди́вїихъ смоло́тисѧ, да сокрꙋши́тсѧ моѐ тѣ́ло, да снѣдѧ́тсѧ ᲂу҆деса̀ моѧ̑, и҆ снѣ́дь да бꙋ́дꙋ ѕвѣрє́мъ, да бг҃ꙋ чи́стъ хлѣ́бъ ꙗ҆влю́сѧ.
Стра́нное мꙋче́нїѧ три́знище терпѣли́внѣ соверши́лъ є҆сѝ, чꙋ́дно па́че всѣ́хъ предпострада́вшихъ мꙋ́жество показа́лъ є҆сѝ, любо́вїю разжига́емь неѡсла́бнагѡ раче́нїѧ, ꙗ҆́коже бо ѻ҆́гнь твою̀ возжжѐ дꙋ́шꙋ.
Горѧ́й при́снѡ дꙋ́хомъ, свѧщенномꙋ́ченикъ взыва́ше съ любо́вїю посредѣ̀ бѣ́дъ: хрⷭ҇та̀ гоню̀ ра́дꙋѧсѧ, хрⷭ҇тꙋ̀ сраспина́юсѧ: живꙋ́ же не ктомꙋ̀ ᲂу҆́бѡ а҆́зъ, живе́тъ же, глаго́летъ, во мнѣ̀ є҆ди́нъ хрⷭ҇то́съ.
Бг҃оро́диченъ:
Грѧдѝ, и҆са́їе, возопі́й: сѐ дв҃а и҆́мать во чре́вѣ и҆зба́вителѧ мі́ра, и҆ роди́тъ въ верте́пѣ: и҆ бꙋ́детъ и҆́мѧ ражда́емагѡ і҆и҃съ, бг҃ъ съ на́ми, є҆мманꙋ́илъ саваѡ́ѳъ.
Конда́къ предпра́зднства, гла́съ г҃. Подо́бенъ: Дв҃а дне́сь:
Дв҃а дне́сь превѣ́чное сло́во въ верте́пѣ грѧде́тъ роди́ти неизрече́ннѡ: ликꙋ́й, вселе́ннаѧ, ᲂу҆слы́шавши, просла́ви со а҆́гг҃лы и҆ па́стырьми хотѧ́щаго ꙗ҆ви́тисѧ ѻ҆троча̀ мла́до, превѣ́чнаго бг҃а.
І҆́косъ:
Ѽ ᲂу҆жа́снагѡ и҆́стиннѡ, и҆ па́че сло́ва чꙋдесѐ! є҆́же бы́ти даѧ́й всѣ̑мъ ра́ди бл҃гости, во чре́во ст҃ы́ѧ дв҃ы вни́де, и҆ въ верте́пѣ роди́тисѧ грѧде́тъ, и҆ въ ꙗ҆́слехъ положи́тисѧ. ѕвѣзда́ же сего̀ проповѣ́дꙋетъ свы́ше волхвѡ́мъ, и҆дꙋ́щымъ на поклоне́нїе є҆гѡ̀ съ да́ры, и҆здале́ча привлача́щи со тща́нїемъ послѣ́дꙋющыѧ валаа́мовꙋ прорече́нїю, ре́кшагѡ: ѕвѣзда̀ хо́щетъ провозвѣсти́ти ѻ҆троча̀ мла́до, превѣ́чнаго бг҃а.
Сѣда́ленъ, гла́съ г҃. Подо́бенъ: Красотѣ̀ дѣ́вства:
Рꙋкополага́емь ѿ хрⷭ҇та̀ бг҃а, просвѣти́лъ є҆сѝ свѧще́ннꙋю твою̀ ѻ҆де́ждꙋ, свидѣ́тельство и҆́стинно полꙋчи́въ, бг҃оно́се: ѕвѣ́ри бо раздражи́лъ є҆сѝ ѿ мі́ра ѿлꙋчи́ти тѧ̀, па́ѵлꙋ подо́бѧсѧ чꙋ́дномꙋ а҆пⷭ҇лꙋ. тѣ́мже и҆ въ ри́мѣ сконча́лъ є҆сѝ, ѻ҆́ч҃е, досто́йнѣ мꙋче́нїе.
Сла́ва, гла́съ и҃. Подо́бенъ: Премꙋ́дрости:
Ѿ восто́ка возсїѧ́въ ꙗ҆́коже ѕвѣзда̀, и҆ лꙋча́ми слове́съ ѡ҆зарѧ́ѧ, мі́ръ просвѣти́лъ є҆сѝ, и҆ тмꙋ̀ ѿгна́лъ є҆сѝ, и҆ ꙗ҆́кѡ па́ѵелъ тече́нїе до́блественнѣ соверши́лъ є҆сѝ, претерпѣ́въ бѣды̑ въ ꙗ҆зы́цѣхъ же и҆ гра́дѣхъ. ѿѻнꙋ́дꙋже и҆ ꙗ҆́кѡ пшени́ца, ѕвѣре́й зꙋбы̑ сомле́лсѧ є҆сѝ, блаже́нне, приноше́нїе гдⷭ҇ꙋ твоемꙋ̀, бг҃оно́се і҆гна́тїе. моли́сѧ хрⷭ҇тꙋ̀ бг҃ꙋ прегрѣше́нїй разрѣше́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
И҆ ны́нѣ:
И҆зъ чре́ва пре́жде вѣ̑къ ѿ ѻ҆ц҃а̀ возсїѧ́въ неслїѧ́ннѣ, сло́ве бж҃їй, безсѣ́меннѡ предгрѧде́тъ ѿ твоеѧ̀ ᲂу҆тро́бы, пречⷭ҇таѧ, вре́менми послѣдѝ, возносѧ́й дре́вле лю́тѣ попо́лзшагосѧ, и҆ къ дре́внѣй добро́тѣ возводѧ̀, ꙗ҆́кѡ милосе́рдъ. є҆гѡ́же ржⷭ҇твꙋ̀ вѡ́инства безпло́тныхъ пред̾и́дꙋтъ, и҆ человѣ́кѡмъ побѣ̑днаѧ та́йнѡ возсыла́ютъ, сла́ва, взыва́юще, бг҃ꙋ, дарова́вшемꙋ на́мъ ми́ръ, разрꙋши́вшемꙋ средостѣ́нїе вражды̀, ꙗ҆́коже и҆зво́ли.
Пѣ́снь д҃. І҆рмо́съ:
Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Го́ры, хо́лми же и҆ древа̀ дꙋбра̑внаѧ, рѣ́ки и҆ морѧ̀, и҆ всѧ́кое дыха́нїе, въ весе́лїи взыгра́йте: ны́нѣ приближа́етсѧ спасе́нїе, і҆и҃съ и҆зъ дв҃ы во гра́дѣ виѳлее́мѣ роди́тисѧ.
Воспрїимѝ, прⷪ҇ро́че дв҃де, ѱалти́рь, и҆ пѣснопо́й дх҃омъ ст҃ы́мъ ꙗ҆́вѣ: ѿ дв҃ы бо ражда́етсѧ, неслїѧ́ннѡ пре́жде денни́цы и҆зъ чре́ва ѻ҆́ч҃а возсїѧ́вый, гдⷭ҇ь сла́вы хрⷭ҇то́съ бг҃ъ.
Ка́кѡ прїи́метъ тѧ̀, сло́ве ражда́ема пло́тїю, верте́пъ малѣ́йшїй и҆ ѕѣлѡ̀ хꙋды́й; ка́кѡ же пові́ешисѧ пелена́ми, ѡ҆дѣва́ѧй нб҃о ѻ҆́блаки; ка́кѡ въ ꙗ҆́слехъ безслове́сныхъ возлѧ́жеши, ꙗ҆́кѡ млⷣнецъ;
Ст҃а́гѡ. І҆рмо́съ то́йже.
Оу҆ѧсни́лъ є҆сѝ заре́ю страда́нїй твои́хъ зе́млю, свѧще́нне і҆гна́тїе, ᲂу҆́зникъ ꙗ҆ви́всѧ: ѡ҆бте́къ, бо ꙗ҆́кѡ со́лнце лꙋча́ми мꙋчє́нїѧ, ве́черъ ѿ восто́ка ве́сь ᲂу҆ѧснѧ́ѧ просвѣти́лъ є҆сѝ.
Ꙗ҆́коже па́ѵелъ свѧ́занъ ѕвѣрмѝ слове́сными, въ ри́мъ те́клъ є҆сѝ, і҆гна́тїе мꙋ́дре: но не преста́лъ є҆сѝ и҆ свѧ́занъ сы́й ᲂу҆твержда́ѧ цр҃кви, посыла́ѧ по всѧ̑ гра́ды всѣ̑мъ хрⷭ҇тѡ́вымъ і҆ера́рхѡмъ дерза́ти.
Хрⷭ҇то́въ тщꙋ́сѧ бы́ти, хрⷭ҇та̀ є҆ди́нагѡ жела́ю: ве́сь бо хрⷭ҇то́въ є҆́смь, вопїѧ́лъ є҆сѝ, страда́льче. того̀ гоню̀, того̀ и҆дꙋ̀ дости́гнꙋти: и҆ сегѡ̀ ра́ди ѻ҆́гнь, и҆ ме́чь, и҆ ѕвѣ́ри, всѧ̑ терплю̀, да полꙋчꙋ̀ є҆́же жи́ти.
Сладка̀ мнѣ̀ ско́рбь, любе́зны ᲂу҆́зы за жела́емаго, вопїѧ́лъ є҆сѝ, страда́льче: гонє́нїѧ мѝ сла̑ждшаѧ ѻ҆ч҃ества, и҆ сомлє́нїѧ моѧ̑ па́че всѧ́кагѡ весе́лїѧ, болѣ̑зни па́че всѧ́кагѡ здра́вїѧ тѣле́снагѡ.
Ѕвѣре́й мнѣ̀ да бꙋ́дꙋтъ ᲂу҆ста̀ закла́нїе, и҆ чрева̀ гро́бы, вопїѧ́лъ є҆сѝ, страда́льче: никто́же да стꙋжа́етъ, никто́же мѝ сокрꙋша́етъ крѣ́пость: а҆́зъ бо тщꙋ́сѧ сомле́тисѧ ꙗ҆́коже пшени́ца, и҆ хлѣ́бъ ѡ҆брѣсти́сѧ бг҃ꙋ чи́стъ.
Бг҃оро́диченъ:
Въ верте́пѣ земленѣ́мъ роди́тисѧ на́съ ра́ди бг҃ъ сы́й и҆зво́лилъ є҆сѝ, ѡ҆бнища́въ, бл҃же, на́шею нището́ю за милосе́рдїе, и҆ и҆зъ дв҃ы проше́дъ воплоще́нъ, пребы́въ є҆ди́нъ сн҃ъ и҆зъ ѻ҆ц҃а̀ и҆ мт҃ре.
Пѣ́снь є҃. І҆рмо́съ:
Тво́й ми́ръ да́ждь на́мъ, сн҃е бж҃їй: и҆но́гѡ бо, ра́звѣ тебє̀, бо́га не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Да кропѧ́тъ ра́дꙋющесѧ ѻ҆́блацы сла́дость: ᲂу҆же́ бо приближа́етсѧ гдⷭ҇ь роди́тисѧ ꙗ҆́коже млⷣнцъ и҆зъ чи́стыѧ дв҃ы, въ хꙋдѣ́мъ верте́пѣ.
Бжⷭ҇твеннїи ны́нѣ взыгра́йте прⷪ҇ро́цы бж҃їи: прихо́дитъ бо хрⷭ҇то́съ и҆́стина, и҆спо́лнити про́пѡвѣди ва́шегѡ бжⷭ҇твеннагѡ ѧ҆зы́ка, ражда́ѧсѧ ꙗ҆́кѡ млⷣнцъ.
Бг҃оро́диченъ:
Є҆де́ме, заключи́выйсѧ мнѣ̀ дре́вле, ѿве́рзисѧ про́чее, ви́дѧ хрⷭ҇та̀ младе́нствꙋюща пло́тїю, и҆ во гра́дѣ, ꙗ҆́кѡ благоволѝ, виѳлее́мѣ, ѿ дв҃ы ражда́ющасѧ ѻ҆трокови́цы.
Ст҃а́гѡ. І҆рмо́съ то́йже.
Тако́въ на́мъ подоба́ше мꙋ́дръ а҆рхїере́й, прпⷣбенъ, вѣ́ренъ, нескве́рненъ, неѕло́бивъ, вопїѧ̀ па́ѵелъ, преднаписа̀ свѧще́нный ѻ҆́бразъ свѧще́нныхъ твои́хъ нра́вѡвъ.
Свѧ́занъ ѿводи́мь пострада́ти а҆рхїере́й, ᲂу҆́зникъ хрⷭ҇то́въ і҆гна́тїе, писа́лъ є҆сѝ цр҃квамъ и҆ градѡ́мъ, ᲂу҆твержда́ѧ всѧ̑ во и҆сповѣ́данїи.
Па́ѵлѡвымъ и҆справле́нїємъ поревнова́въ благочести́внѡ, всѧ̑ є҆гѡ̀ бѣды̑ претерпѣ́лъ є҆сѝ, свѧщенномꙋ́чениче досточꙋ́дне, восто́чнаѧ свѣ́тлосте, и҆ вече́рнѧѧ ѕвѣздо̀.
Жела́нїемъ ретѧ́сѧ па́ѵловымъ, ᲂу҆́зы и҆мѣ́ѧ на рꙋка́хъ, мі́ръ ѡ҆бте́клъ є҆сѝ, свѧщенномꙋ́чениче, да благоѧвле́нъ свѧще́нными твои́ми страда́ньми ꙗ҆ви́шисѧ всѣ̑мъ.
Пое́мъ по́двиги твоѧ̑, чествꙋ́емъ ᲂу҆́зы каждє́нїи и҆ ѱалмы̑: пе́рсть чествꙋ́емъ твои́хъ моще́й, ꙗ҆́кѡ а҆рѡма̑ты мѷрома́заннꙋю, мꙋ́чениче, свѧще́нными твои́ми страда́ньми.
Бг҃оро́диченъ:
Бг҃ъ человѣ́кѡмъ подо́бенъ бы́въ и҆зъ тебє̀, млⷣнцъ на́съ ра́ди ражда́етсѧ, бг҃оневѣ́сто, и҆ пребыва́етъ ве́сь неизмѣ́ненъ, и҆ во пло́ти ви́дитсѧ бг҃ъ вочл҃вѣ́чивыйсѧ.
Пѣ́снь ѕ҃. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
Нб҃о на землѝ нбⷭ҇наго показꙋ́етъ ѕвѣздо́ю свѣ́тлою цр҃ѧ̀, на́съ ра́ди ражда́ющагосѧ, ѕвѣздосло́вцємъ ны́нѣ во гра́дѣ дв҃довѣ.
Виті́йствꙋетъ и҆ вопїе́тъ прⷪ҇ро́къ ꙗ҆́вѣ: до́ме ты̀ є҆ѵфра́ѳовъ, виѳлее́ме, въ не́мже бг҃ъ ꙗ҆ви́тсѧ ѿ дв҃ы, и҆гра́й и҆ ликꙋ́й.
Въ верте́пѣ виѳлее́мстѣмъ дв҃а ражда́етъ ꙗ҆́вственнѣ гдⷭ҇а всѣ́хъ творца̀, и҆ ꙗ҆́кѡ чл҃вѣ́ка пови́вши пелена́ми, въ ꙗ҆́слѣхъ восклонѧ́етъ ны́нѣ.
Ст҃а́гѡ. І҆рмо́съ то́йже.
Ꙗ҆́кѡ вои́стиннꙋ жела́телѧ возлюби́въ неꙋкло́ннѡ, и҆ ѻ҆́гнь и҆́же къ немꙋ̀ воспали́въ разꙋ́мнѣ, і҆гна́тїе, во́дꙋ и҆мѣ́лъ є҆сѝ въ тебѣ̀ живꙋ́щꙋю и҆ глаго́лющꙋю.
Свидѣ́тельство твоеѧ̀ со́вѣсти и҆сполнѧ́ѧ, не ᲂу҆дово́лилсѧ є҆сѝ, зрѧ̀ ѕвѣре́й стремлє́нїѧ, не ᲂу҆страши́лсѧ є҆сѝ, ꙗ҆́коже пшени́ца хотѧ̀ члено́вными сомле́тисѧ.
Дѡ́лгаѧ твоѧ̑ гонє́нїѧ, и҆ нерѣши̑мыѧ ᲂу҆́зы, ꙗ҆̀же въ ри́мѣ терза̑нїѧ, и҆ ѻ҆́гнь гони́телей въ ничто́же вмѣнѧ́лъ є҆сѝ, свѧщенномꙋ́чениче, за твоего̀ рачи́телѧ.
Вельмѝ горѧ̀, страда́льче, любо́вїю хрⷭ҇то́вою, ко ѻ҆гню̀ и҆скꙋше́нїй ꙗ҆́кѡ на ро́сꙋ ᲂу҆́тренюю поте́клъ є҆сѝ, ѻ҆́наго пости́гнꙋти сꙋ́щѡ сꙋ́щаго рачи́телѧ.
А҆́ще и҆ пи́лъ є҆сѝ хрⷭ҇то́вꙋ ча́шꙋ жажда̀, но пре́былъ є҆сѝ при́снѡ є҆́же пострада́ти, па́че є҆́же жи́ти. и҆ вопїѧ́лъ є҆сѝ: ничто́же мнѣ̀ сїѧ̑, ко є҆́же полꙋчи́ти мнѣ̀ є҆́же жи́ти.
Бг҃оро́диченъ:
Оу҆краси́сѧ, виѳлее́ме; ᲂу҆гото́висѧ, є҆ѵфра́ѳо: безъ ма́тере бо ѿ ѻ҆ц҃а̀, и҆ безъ ѻ҆тца̀ мт҃рїю чревоно́ситсѧ, и҆ ражда́етсѧ, спаса́ѧ ны̀.
Конда́къ, гла́съ г҃. Подо́бенъ: Дв҃а дне́сь:
Свѣ́тлыхъ пѡ́двигъ твои́хъ свѣтоно́сный де́нь предпроповѣ́дꙋетъ всѣ̑мъ въ верте́пѣ рожде́ннаго: сегѡ́ бо жажда́ѧ ѿ любвѐ наслади́тисѧ, потща́лсѧ є҆сѝ ѿ ѕвѣре́й снѣде́нъ бы́ти: сегѡ̀ ра́ди и҆ бг҃оно́сецъ наре́клсѧ є҆сѝ, і҆гна́тїе всемꙋ́дре.
І҆́косъ:
А҆враа́мъ ᲂу҆́бѡ и҆ногда̀ сы́на жрѧ́ше, закла́нїе предвоѡбража́ѧ всѧ̑ содержа́щагѡ, и҆ ны́нѣ въ верте́пѣ тща́щагѡсѧ роди́тисѧ, ты́ же, бг҃омꙋ́дре, всего̀ прине́слъ є҆сѝ тебѐ сама́го, ꙗ҆́коже заколе́нїе, и҆ ѕвѣре́й снѣ́дь бы́въ, пшени́ца чиста̀ ꙗ҆ви́лсѧ є҆сѝ зижди́телю твоемꙋ̀, въ жи́тницахъ нбⷭ҇ныхъ вѣ́чнꙋѧй вои́стиннꙋ, и҆ твоегѡ̀ раче́нїѧ наслажда́ѧсѧ. є҆гѡ́же ра́ди ве́сь мі́ръ ѡ҆ста́вивъ, бг҃оно́сецъ наре́клсѧ є҆сѝ, і҆гна́тїе всемꙋ́дре.
Пѣ́снь з҃. І҆рмо́съ:
Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀, поѧ́хꙋ, и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆ц҃ъ на́шихъ.
Хрⷭ҇то́во во пло́ти показꙋ́ѧ ꙗ҆вле́нїе, і҆еремі́а, вопїѧ́ше: на землѝ вопло́щсѧ бг҃ъ ꙗ҆ви́сѧ: хꙋдо́жества же ѡ҆брѣ́те всѧ́къ пꙋ́ть, рожде́йсѧ въ виѳлее́мѣ и҆зъ мт҃ре.
Сѐ и҆зъ ко́рене і҆ессе́ева прозѧбѐ же́злъ, цвѣ́тъ прозѧба́ющь хрⷭ҇та̀: и҆ на не́мъ ны́нѣ ражда́емѣмъ въ верте́пѣ, дх҃ъ почі́етъ ра́зꙋма и҆ совѣ́та, и҆ бжⷭ҇твеннагѡ вѣ́дѣнїѧ.
Да ᲂу҆слы́шимъ словеса̀ свѧщє́ннаѧ: гдⷭ҇ь ражда́етсѧ, ѻ҆троча̀ ра́ди на́съ, є҆гѡ́же нача́льство на ра́мѣ бы́сть, и҆ нарица́етсѧ а҆́гг҃лъ совѣ́та вели́ка ѻ҆́ч҃а, нача́льникъ ми́ра хрⷭ҇то́съ.
Ст҃а́гѡ. І҆рмо́съ то́йже.
Не и҆мѣ́лъ є҆сѝ ѻ҆гнѧ̀ любове́щна въ тебѣ̀, і҆гна́тїе, во́дꙋ же живꙋ́ю па́че и҆ глаго́лющꙋю, во́дꙋ зовꙋ́щꙋю: грѧдѝ ко ѻ҆ц҃ꙋ̀: во́дꙋ текꙋ́щꙋю ѿ жи́зни въ жи́знь преводѧ́щꙋю на́съ.
Ѕвѣре́й зꙋ́бы, глаго́летъ, да бꙋ́дꙋтъ мнѣ̀ ме́чь и҆ ѻ҆рꙋ̑жїѧ и҆ закла̑нїѧ: гро́бъ же мнѣ̀ львѡ́вы ᲂу҆трѡ́бы да бꙋ́дꙋтъ, и҆ ѻ҆́гнь да поѧ́стъ мѧ̀ пре́жде тлѝ, кѡ́жныѧ ѡ҆ста́нки.
Мнѣ̀ сладка̀ сме́рть, глаго́летъ, сладка̑ мнѣ̀ всѧ̑ трꙋдѡ́въ болѣ́знєннаѧ, ѕвѣ́рїе ра́достни, ѻ҆́гнь се́й роса̀ мнѣ̀ є҆́сть, а҆́ще є҆́же жи́ти воздержꙋ̀. тѣ́мже и҆ тщꙋ́сѧ ᲂу҆мре́ти, да живꙋ̀ со хрⷭ҇то́мъ.
Є҆́же жи́ти мнѣ̀, не є҆́сть рачи́тельно въ тѣлесѝ, дꙋ́хомъ бо жи́ти жела́ю. мнѣ̀ є҆́же жи́ти хрⷭ҇то́съ, бжⷭ҇твенное рачи́тельство: къ немꙋ̀ и҆дꙋ̀, того̀, глаго́летъ, люблю̀, того̀ полꙋчи́ти надѣ́юсѧ.
Бг҃оро́диченъ:
Прⷪ҇ро́кѡмъ дре́вле прорече́нный приближа́етсѧ мнѣ̀, млⷣнцъ и҆зъ дв҃ы рожде́йсѧ. ра́дꙋетсѧ а҆да́мъ, и҆ прама́ти є҆́ѵа болѣ́зней разрѣши́сѧ, и҆ сликовствꙋ́етъ дв҃дъ, ражда́ющїѧ ѻ҆те́цъ.
Пѣ́снь и҃. І҆рмо́съ:
Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите, ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки.
Гдⷭ҇ь грѧде́тъ стра́ннымъ ржⷭ҇тво́мъ ꙗ҆́вѣ во своѧ̑, прїи́мемъ є҆го̀, ꙗ҆́кѡ да ᲂу҆стра́ншыѧсѧ ра́йскїѧ сла́дости па́ки присво́итъ, ражда́ѧсѧ въ верте́пѣ.
Сѐ воззва́нїе на́ше прихо́дитъ, возгласи́мъ пѣ̑нїѧ ра́дѡстнаѧ тща́нїемъ, и҆ воспои́мъ пѣ̑сни предпра́зднствєнныѧ, въ малѣ́йшемъ вмѣща́ющемꙋсѧ верте́пѣ.
Ꙗ҆́кѡ клѧ́тсѧ гдⷭ҇ь, и҆спо́лни ᲂу҆жѐ, ѿ сѣ́мене да́въ на́мъ дв҃дова свою̀ мт҃рь дв҃ꙋ: и҆зъ неѧ́же млⷣнцъ пло́тїю роди́сѧ во гра́дѣ виѳлее́мѣ, па́че сло́ва.
Ст҃а́гѡ. І҆рмо́съ то́йже.
Пѣ́тъ бꙋ́ди і҆гна́тїй бжⷭ҇твенный і҆ере́й, сꙋгꙋ́бѡ вѣнча́емь, ꙗ҆́кѡ мч҃никъ и҆ па́стырь: страда́въ бо се́й за любо́вь бж҃їю, жела́ѧ возжелѣ́нъ бы́ти, пострада́ти не ѿмета́шесѧ.
Течє́нїи вѣ́ры, ꙗ҆́кѡ со́лнце, зе́млю до́блественнѣ прете́клъ є҆сѝ ѿ конє́цъ нб҃сѐ: и҆ заше́дъ незаходи́мѡ ѿ землѝ ко хрⷭ҇тꙋ̀, ѡ҆блистава́еши мі́рꙋ свѣ́тъ нетлѣ́нїѧ.
Жажда́ѧ ча́ши стрⷭ҇ти хрⷭ҇то́вы, свѧ́занъ те́клъ є҆сѝ, і҆гна́тїе мꙋ́дре, и҆ дости́гъ три́знища, не преста́лъ є҆сѝ вопїѧ̀: жа́ждꙋ жажда́ти хрⷭ҇та̀ во вѣ́ки.
Ѽ любвѐ и҆ теплоты̀ бжⷭ҇твеннагѡ раче́нїѧ! жела́нїемъ распѧ́тсѧ, и҆ да живе́тъ рачи́телю: жа́ждетъ є҆́же возжажда́тисѧ, и҆ лю́битъ є҆́же люби́тисѧ, за є҆́же па́ки жи́ти, ᲂу҆мре́ти произволѧ́ѧ.
Пе́рсть ѿложи́въ, невеще́ственнѡ къ сꙋ́щемꙋ ᲂу҆́мъ впери́лъ є҆сѝ, жела́ѧ рачи́телѧ: то́й бо є҆́сть при́сное жела́нїе, и҆ и҆́стиннѡ мꙋ́дрость, и҆ жи́знь бы́вшихъ.
Бг҃оро́диченъ:
Ѕвѣзда̀ возсїѧ̀ хрⷭ҇то́съ ѿ і҆а́кѡва, и҆ волсвѝ стека́ютсѧ во гра́дъ виѳлее́мъ, пѣ́ти, чествова́ти и҆ поклони́тисѧ є҆мꙋ̀, рожде́нномꙋ и҆зъ ложе́снъ чⷭ҇тыѧ бцⷣы.
Пѣ́снь ѳ҃. І҆рмо́съ:
Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи велича́емъ.
Съ патрїа̑рхи, и҆ пра́ведными всѣ́ми, и҆ со ст҃ы́ми прⷪ҇рѡ́ки взыгра́имъ, ѿ дв҃ы гдⷭ҇ь і҆и҃съ, и҆збавле́нїе, просвѣще́нїе, и҆ жи́знь, и҆ спасе́нїе, ны́нѣ во гра́дѣ дв҃довѣ ражда́етсѧ.
Оу҆жѐ бжⷭ҇твеннагѡ сло́ва воплоще́нїѧ, всѣ̑мъ ѿверзо́шасѧ ꙗ҆́вѣ преддвє́рїѧ. нб҃са̀, ра́дꙋйтесѧ, а҆́гг҃ли, взыгра́йте: и҆ да весели́тсѧ землѧ̀ съ человѣ̑ки, съ па́стырьми и҆ волхвы̑, дꙋ́хомъ.
Но́ситъ хрⷭ҇та̀, ꙗ҆́коже мѵ́ро неистоще́нное, ᲂу҆́мный дв҃а а҆лава́стръ, и҆ сїѐ пред̾и́детъ въ верте́пѣ и҆злїѧ́ти дх҃омъ ꙗ҆́вѣ, ꙗ҆́кѡ да напо́лнитъ благоꙋха́нїѧ є҆гѡ̀ дꙋ́шы на́шѧ.
Ст҃а́гѡ. І҆рмо́съ то́йже.
Презира́тель до́льнихъ і҆гна́тїй, и҆ слꙋжи́тель вы́шнихъ та̑инъ, ꙗ҆́кѡ слꙋ́жбꙋ непоро́чнꙋ соверша́ѧ, и҆ соверша́емь свѧщеннодѣ́йствꙋетъ себѐ сама́го мꙋче́нїемъ, и҆ къ ѕвѣрє́мъ и҆ ѻ҆гню̀ гото́витсѧ.
Є҆́же по ѻ҆́бразꙋ любѧ̀ ѡ҆дѣ́ѧтисѧ, вє́тхїѧ ѻ҆́бразы и҆змѣни́лъ є҆сѝ. тѣ́мже но́востїю, а҆ не ве́тхостїю первоѻбра́знагѡ зра́ка пе́рвꙋю добро́тꙋ воспрїе́мъ, хрⷭ҇то́ви соводворѧ́ешисѧ.
Свѧще́ннꙋю твою̀ ѻ҆де́ждꙋ, свѧще́ннѣйше, свѧще́ннѣйшꙋ содѣ́лалъ є҆сѝ страда́ньми твои́ми, тѣ́мже и҆ вѣне́цъ сꙋгꙋ́бъ воспрїе́мъ, съ мч҃ники пое́ши и҆ па̑стыри, свѧщенномꙋ́чениче, хрⷭ҇та̀ бг҃а на́шего.
Пшени́ца бж҃їѧ чиста̀ є҆́смь, глаго́лалъ є҆сѝ, и҆ зꙋбы̑ ѕвѣре́й мелю́сѧ, да хлѣ́бъ бꙋ́дꙋ свѧщенносоверша́емь, рачи́телю и҆ бг҃ꙋ ѡ҆чище́нъ, є҆го́же и҆ любѧ̀, ᲂу҆мре́ти не ѿрица́юсѧ.
Непристꙋ́пнымъ свѣ́томъ ѡ҆сїѧва́емь, и҆ въ вы́шнихъ ѻ҆би́телехъ водворѧ́ѧсѧ, свѧще́нне і҆гна́тїе, бг҃ꙋ и҆ зижди́телю твоемꙋ̀ ѡ҆ ста́дѣ твое́мъ се́мъ молѧ́сѧ неѡскꙋ́днѡ, не преста́й мо́лимсѧ.
Бг҃оро́диченъ:
Ра́дꙋйсѧ, чⷭ҇таѧ, бж҃їй гра́де ѡ҆дꙋшевле́нный, въ не́мже бг҃ъ вмѣсти́тисѧ благоволѝ: не ѡ҆ста́вль бо го́рнихъ къ тебѣ̀ сни́де, ꙗ҆́кѡ до́ждь на зе́млю, бг҃ороди́тельнице, и҆ во гра́дѣ виѳлее́мѣ млⷣнецъ ражда́етсѧ.
Свѣти́ленъ. Подо́бенъ: Дх҃омъ во ст҃и́лищи:
Сло́во пребезнача́льное, бж҃їѧ мꙋ́дрость, неизрече́нною бла́гостїю зємны́мъ приѡбщи́всѧ, ᲂу҆чѧ̀ дре́вле лю́ди, на рꙋка́хъ держа́ше тѧ̀, і҆гна́тїе бг҃оно́се: въ бз҃ѣ же жи́въ, мꙋче́нїе проше́лъ є҆сѝ страда́нїѧ ра́дꙋѧсѧ.
Сла́ва, и҆ ны́нѣ, предпра́зднства. Подо́бенъ: Пред̾ꙋгото́висѧ:
Оу҆краси́сѧ, виѳлее́ме, но́вое жили́ще, ꙗ҆́сли и҆ верте́пъ, па́стырей сѡ́нмища, волсвѝ ѿ восто́кѡвъ въ него̀ предвари́те, ѕвѣзды̀ свѣ́тлостїю: дв҃а бо ᲂу҆жѐ всесоверше́ннаго, ꙗ҆́кѡ младе́нца въ то́мъ ражда́етъ.
На хвали́техъ стїхи̑ры предпра́зднства, гла́съ ѕ҃, на д҃, по а҆лфави́тꙋ Творе́нїе рѡма́на пѣвца̀. Самоподо́бенъ:
А҆́гг҃льскїѧ пред̾иди́те си̑лы, ꙳ и҆̀же въ виѳлее́мѣ ᲂу҆гото́вайте ꙗ҆́сли: ꙳ сло́во бо ражда́етсѧ, ꙳ мꙋ́дрость происхо́дитъ, ꙳ прїе́млетъ цѣлова́нїе цр҃ковь. ꙳ на ра́дость бцⷣы, ꙳ лю́дїе, рце́мъ: бл҃гослове́нъ прише́дый ꙳ бж҃е на́шъ, сла́ва тебѣ̀.
Го́ры сла́дость да ка́плютъ, ꙳ се́ бо прихо́дитъ бг҃ъ ѿ ю҆́га, ꙳ ꙗ҆зы́цы, покарѧ́йтесѧ, ꙳ ра́дꙋйтесѧ, прⷪ҇ро́цы, ꙳ патрїа́рси, взыгра́йте, ꙳ человѣ́цы, восплещи́те рꙋка́ми: ꙳ крѣ́пкїй и҆ вели́кїй кн҃зь хрⷭ҇то́съ ражда́етсѧ, ꙳ цр҃ь нб҃съ на зе́млю прихо́дитъ.
Ѿ землѝ возносѧ̀ человѣ́чество, ꙳ зижди́тель прїи́де, ꙳ ца́рскїй ѡ҆бновлѧ́ѧ па́ки ѻ҆́бразъ. ꙳ сра́дꙋйтесѧ го́рнихъ си̑лы и҆ воспо́йте: ꙳ вражды̀ средостѣ́нїе разори́сѧ, ꙳ прїи́де, є҆мꙋ́же прилѣжа́ше: ꙳ бг҃ъ бо чл҃вѣ́къ быва́етъ, ꙳ цр҃ь і҆и҃левъ ꙳ хрⷭ҇то́съ бг҃ъ на́шъ.
Грѧдѝ, і҆и҃лю тѧжкосе́рдый, ꙳ ѿве́ржи и҆́же въ дꙋшѝ твое́й, надлежа́щїй тебѣ̀ ѻ҆́блакъ, ꙳ позна́й созда́телѧ въ верте́пѣ ражда́ющагосѧ. ꙳ се́й ꙗ҆зы́кѡвъ ча́ѧнїе: ꙳ се́й разори́тъ пра́здники твоѧ̑, ꙳ вопи́ти бо не повинꙋ́ешисѧ: ꙳ цр҃ь і҆и҃левъ ꙳ хрⷭ҇то́съ прихо́дитъ.
Сла́ва, гла́съ и҆ подо́бенъ то́йже:
Приближа́етсѧ хрⷭ҇то́съ: ꙳ виѳлее́ме, пред̾ꙋгото́висѧ, ꙳ ᲂу҆жѐ ꙗ҆зы́кѡвъ спасе́нїе ѡ҆зарѧ́етъ, ꙳ благоꙋкрасѝ ꙗ҆́сли, ꙳ па́стыри соберѝ, ꙳ призовѝ волхвы̀ ѿ персі́ды, ꙳ вѡ́инства безпло́тныхъ ᲂу҆мѡ́въ воззови́те: ꙳ цр҃ь нб҃съ ꙳ на зе́млю прихо́дитъ.
И҆ ны́нѣ, гла́съ и҆ подо́бенъ то́йже:
За́висть же и҆ ѻ҆́гнь поѧ́стъ тѧ̀, ꙳ безꙋ́мный преле́стниче вои́стиннꙋ, ꙳ и҆ зако́ннаѧ клѧ́тва: ꙳ се́ бо дв҃а, ꙳ ꙗ҆́коже и҆са́їа проречѐ, ꙳ и҆мѣ̀ во чре́вѣ, ꙳ и҆ въ ꙗ҆́слехъ восклони́тъ цр҃ѧ̀, ꙳ и҆́мже всѝ ѿ колѣ́на і҆ꙋ́дова ꙳ си́льнїи ѡ҆скꙋдѣ́ютъ.
На стїхо́внѣ стїхи̑ры самогла́сны, гла́съ д҃:
Виѳлее́ме, ᲂу҆краша́йсѧ, воспо́й, гра́де сїѡ́не, ра́дꙋйсѧ, пꙋсты́не, пред̾ѡбрꙋча́ющи ра́дость: ѕвѣзда́ бо пред̾и́детъ въ виѳлее́мъ, возвѣща́ющи хотѧ́щаго роди́тисѧ хрⷭ҇та̀: и҆ верте́пъ прїе́млетъ невмѣсти́маго всѣ́ми, и҆ ꙗ҆́сли гото́вѧтсѧ воспрїѧ́ти жи́знь вѣ́чнꙋю. томꙋ̀ всѝ воспои́мъ, и҆ возопїи́мъ: спасѝ дꙋ́шы на́шѧ, і҆и҃се бж҃е, воплоти́выйсѧ на́съ ра́ди.
Сті́хъ: Бг҃ъ ѿ ю҆́га прїи́детъ, и҆ ст҃ы́й и҆зъ горы̀ приѡсѣне́нныѧ ча́щи.
Хрⷭ҇то́съ грѧды́й ꙗ҆́вѣ бг҃ъ на́шъ, прїи́детъ и҆ не ᲂу҆косни́тъ: ѿ неискꙋсобра́чныѧ ѻ҆трокови́цы ꙗ҆ви́тсѧ, въ верте́пѣ же про́чее препочі́етъ, и҆ въ ꙗ҆́слехъ безслове́сныхъ, є҆го́же не вмѣща́етъ нб҃о: прїимѝ хотѧ́щаго пелена́ми пови́тисѧ въ тебѣ̀, сло́вомъ разрѣ́шшаго ны̀ ѿ безслове́сїѧ. ѕвѣзда̀ возвѣща́етъ, волсвѝ покланѧ́ютсѧ, па́стырїе свирѧ́ютъ, чꙋ́до зрѧ́ще стра́шное, и҆ а҆́гг҃ли воспѣва́ютъ на землѝ, ви́дѧще и҆збавле́нїе ро́да на́шегѡ.
Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ.
И҆са́їе, ликꙋ́й, сло́во бж҃їе воспрїе́мъ, прорцы̀ ѻ҆трокови́цѣ марі́и, кꙋпинѣ̀ горѣ́ти, и҆ ѻ҆гне́мъ не сгара́ти заре́ю бжⷭ҇тва̀. виѳлее́ме, благоꙋкраси́сѧ, ѿве́рзи врата̀, є҆де́ме, и҆ волсвѝ, и҆ди́те ви́дѣти спасе́нїе въ ꙗ҆́слехъ повива́емое: є҆го́же ѕвѣзда̀ показа̀ верхꙋ̀ верте́па, жизнода́вца гдⷭ҇а, спаса́ющаго ро́дъ на́шъ.
Сла́ва, ст҃а́гѡ, гла́съ а҃. Стꙋді́тово:
Сто́лпъ ѡ҆дꙋшевле́нъ, и҆ вдохнове́нный ѻ҆́бразъ, лѣ́тный тво́й наста̀ пра́здникъ, бг҃оно́се і҆гна́тїе, тайновѡ́дства твоѧ̑ и҆ до́блєсти твоѧ̑ проповѣ́даѧй, є҆́же за вѣ́рꙋ да́же до кро́ве противостоѧ́нїе, бл҃же́нный ѻ҆́нъ и҆ приснопа́мѧтный гла́съ, ꙗ҆́кѡ пшени́ца є҆́смь бж҃їѧ, глаго́лющїй и҆ зꙋбы̑ ѕвѣри́ными мелю́сѧ. тѣ́мже подо́бникъ стрⷭ҇те́й хрⷭ҇та̀ твоегѡ̀ бы́въ, молѝ спасти́сѧ дꙋша́мъ на́шымъ.
И҆ ны́нѣ, гла́съ ѕ҃:
Верте́пе, благоꙋкраси́сѧ, а҆́гница бо грѧде́тъ, чревоносѧ́щи хрⷭ҇та̀: ꙗ҆́сли же под̾ими́те сло́вомъ разрѣши́вшаго ѿ безслове́снагѡ дѣѧ́нїѧ на́съ земноро́дныхъ. па́стырїе свирѧ́юще, свидѣ́тельствꙋйте чꙋдесѝ стра́шномꙋ: и҆ волсвѝ ѿ персі́ды, зла́то и҆ лїва́нъ и҆ смѵ́рнꙋ цр҃ю̀ принеси́те: ꙗ҆́кѡ ꙗ҆ви́сѧ гдⷭ҇и и҆зъ дв҃ы мт҃ре. є҆мꙋ́же и҆ прини́кши ра́бски мт҃и поклони́сѧ, и҆ привѣща́ше къ держи́момꙋ на ѡ҆б̾ѧ́тїихъ є҆ѧ̀: ка́кѡ всѣ́ѧлсѧ є҆сѝ мнѣ̀; и҆лѝ ка́кѡ прозѧ́блъ є҆сѝ во мнѣ̀, и҆зба́вителю мо́й и҆ бж҃е;
На часѣ́хъ тропа́рь предпра́зднства. Сла́ва, ст҃а́гѡ. И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ предпра́зднства є҆ди́нъ на всѣ́хъ часѣ́хъ.
На лїтꙋргі́и бл҃жє́нна ѿ канѡ́на предпра́зднства пѣ́снь г҃, со і҆рмосо́мъ на д҃: и҆ ст҃а́гѡ пѣ́снь ѕ҃, на д҃. Прокі́менъ: Возвесели́тсѧ пра́ведникъ ѡ҆ гдⷭ҇ѣ: Сті́хъ: Оу҆слы́ши, бж҃е, гла́съ мо́й. А҆пⷭ҇лъ къ є҆вре́ємъ, зача́ло та҃і. А҆ллилꙋ́їа, гла́съ д҃: Пра́ведникъ, ꙗ҆́кѡ фі́нїѯъ, процвѣте́тъ. Сті́хъ: Насажде́ни въ домꙋ̀ гдⷭ҇ни: Є҆ѵⷢ҇лїе ма́рка, зача́ло м҃а. Прича́стенъ: Въ па́мѧть вѣ́чнꙋю:
А҆́ще слꙋчи́тсѧ недѣ́лѧ ст҃ы́хъ ѻ҆ц҃ъ въ предпра́зднствѣ, внꙋ́трь к҃-гѡ днѐ, си́рѣчь, въ к҃, въ к҃а, въ к҃в и҆ въ к҃г де́нь.
Быва́етъ слꙋ́жба си́це: На ма́лѣй вече́рни стїхи̑ры воскрⷭ҇ны и҆ бцⷣы по ѻ҆бы́чаю. На вели́цѣй вече́рни, на Гдⷭ҇и, воззва́хъ: стїхи̑ры воскрⷭ҇ны г҃, и҆ ꙾восто́ченъ꙾[[꙾А҆нато́лїевъ꙾]] а҃, и҆ предпра́зднства г҃, гла́съ ѕ҃, подо́бенъ: Всѐ ѿло́жше: и҆ ѻ҆ц҃є́въ г҃, гла́съ и҆ подо́бенъ то́йже: Сла́ва, гла́съ ѕ҃: Данїи́лъ, мꙋ́жъ жела́нїй: И҆ ны́нѣ, предпра́зднства, гла́съ то́йже: Верте́пе, благоꙋкраси́сѧ: Вхо́дъ. Прокі́менъ днѐ. И҆ чтє́нїѧ г҃ ѻ҆ц҃є́въ. На лїті́и стїхи̑ры предпра́зднства на рѧдꙋ̀, ко́егѡ днѐ недѣ́лѧ сїѧ̀ пое́тсѧ, стїхѡ́вныѧ, и҆ ѻ҆ц҃є́въ, гла́съ а҃: Лꙋча́ми ѡ҆блиста́вшесѧ: Сла́ва, гла́съ г҃: Пра́ѻц҃євъ собо́ръ: И҆ ны́нѣ, предпра́зднства, гла́съ то́йже: Благоꙋкраси́сѧ, виѳлее́ме: На стїхо́внѣ стїхи̑ры воскрⷭ҇ны: Сла́ва, гла́съ в҃: Ра́дꙋйтесѧ, проро́цы: И҆ ны́нѣ, предпра́зднства, гла́съ то́йже: Сѐ вре́мѧ прибли́жисѧ: На благослове́нїи хлѣ́бѡвъ тропа́рь, Бцⷣе дв҃о: два́жды, и҆ ѻ҆ц҃є́въ: Вє́лїѧ вѣ́ры: є҆ди́ножды. Бꙋ́ди и҆́мѧ гдⷭ҇не: три́жды: И҆ чте́нїе въ толкова́нїихъ а҆пⷭ҇льскихъ.
На ᲂу҆́трени, на Бг҃ъ гдⷭ҇ь: тропа́рь воскрⷭ҇нъ два́жды: Сла́ва, ѻ҆ц҃є́въ, гла́съ в҃: Вє́лїѧ вѣ́ры: И҆ ны́нѣ, предпра́зднства, гла́съ д҃: Гото́висѧ, виѳлее́ме: и҆ ѻ҆бы̑чныѧ каѳі̑смы, и҆ сѣда́льны воскре́сны, и҆ бг҃оро́дичны и҆́хъ. И҆ чте́нїе во є҆ѵⷢ҇лїе толково́мъ, є҆́же ѿ матѳе́а, въ са́момъ нача́лѣ: Кни́га родства̀ і҆и҃са хрⷭ҇та̀. По непоро́чнахъ тропарѝ и҆́хъ: А҆́гг҃льскїй собо́ръ: ѵ҆пакоѝ, и҆ чте́нїе во є҆ѵⷢ҇лїи толково́мъ, є҆́же на рѧдꙋ̀. Степє́нна гла́са, прокі́менъ: Всѧ́кое дыха́нїе: Є҆ѵⷢ҇лїе воскрⷭ҇но, и҆ Воскрⷭ҇нїе хрⷭ҇то́во: По н҃-мъ ѱалмѣ̀ стїхи́ра воскрⷭ҇на. Канѡ́нъ воскрⷭ҇нъ со і҆рмосо́мъ на д҃: и҆ предпра́зднства на д҃: и҆ ѻ҆ц҃є́въ на ѕ҃. Катава́сїа: Хрⷭ҇то́съ ражда́етсѧ: По г҃-й пѣ́сни ѵ҆пакоѝ ѻ҆ц҃є́въ, гла́съ и҃. А҆́гг҃лъ ѻ҆трокѡ́мъ ѡ҆росѝ пе́щь: и҆ чте́нїе. По ѕ҃-й пѣ́сни конда́къ, гла́съ а҃, подо́бенъ: Ли́къ а҆́гг҃льскїй: Весели́сѧ, виѳлее́ме: и҆ і҆́косъ. И҆ чте́мъ про́логъ. По ѳ҃-й пѣ́сни, Ст҃ъ гдⷭ҇ь бг҃ъ на́шъ: Свѣти́ленъ воскре́сенъ: Сла́ва, ѻ҆ц҃є́въ: И҆ ны́нѣ, предпра́зднства. На хвали́техъ стїхи̑ры воскрⷭ҇ны д҃, и҆ ѻ҆ц҃є́въ д҃, гла́съ є҃, подо́бенъ: Ра́дꙋйсѧ: Сла́ва, ѻ҆ц҃є́въ, гла́съ и҃: Зако́нныхъ ᲂу҆че́нїй. И҆ ны́нѣ, Пребл҃гослове́нна є҆сѝ, бцⷣе дв҃о. Славосло́вїе вели́кое. Тропа́рь воскрⷭ҇нъ. Є҆ктєнїѝ. И҆ ѿпꙋ́стъ. Стїхи́ра є҆ѵⷢ҇льскаѧ въ притво́рѣ. И҆ ча́съ а҃. И҆ коне́чный ѿпꙋ́стъ.
На лїтꙋргі́и бл҃жє́нна гла́са, на д҃: и҆ ѻ҆ц҃є́въ ѿ канѡ́на пѣ́снь г҃, на д҃: и҆ предпра́зднства пѣ́снь ѕ҃, на д҃. По вхо́дѣ тропа́рь воскрⷭ҇нъ, и҆ ѻ҆ц҃є́въ, и҆ предпра́зднства. Сла́ва, конда́къ ѻ҆ц҃є́въ: И҆ ны́нѣ, предпра́зднства. Прокі́менъ, пѣ́снь ѻ҆ц҃є́въ, гла́съ д҃. Бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки. А҆пⷭ҇лъ ко є҆вре́ємъ, зача́ло тк҃и. А҆ллилꙋ́їа, гла́съ д҃. Бж҃е, ᲂу҆ши́ма на́шима: Є҆ѵⷢ҇лїе матѳе́а, зача́ло а҃. Рѧ́дъ же недѣ́ли ѡ҆ставлѧ́етсѧ. Прича́стенъ: Хвали́те гдⷭ҇а: Дрꙋгі́й: Ра́дꙋйтесѧ, првⷣнїи:
Ѡ҆ предпра́зднствѣ хрⷭ҇то́ва ржⷭ҇тва̀ вѣ́дати подоба́етъ.
[Зрѝ] Ѿ к҃-гѡ днѐ начина́етсѧ предпра́зднство. По́стъ ᲂу҆́бѡ є҆́сть, покло́ны же въ це́ркви не быва́ютъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.