← претходни дан | Минеј — Децембар | следећи дан →
11 декабря: Преподобного Даниила Столпника. Неделя святых праотец.
Мѣ́сѧца тогѡ́же въ а҃і-й де́нь.
Прпⷣбнагѡ ѻ҆тца̀ на́шегѡ данїи́ла сто́лпника.
А҆ллилꙋ́їа, и҆лѝ тропа́рь. На Гдⷭ҇и, воззва́хъ, стїхи̑ры г҃, гла́съ и҃.
Подо́бенъ: Что̀ вы̀ нарече́мъ:
Что́ тѧ, данїи́ле, провѣща́емъ; ꙳ страсте́й и҆скорени́телѧ ꙳ и҆ садотща́телѧ добродѣ́телей, ꙳ и҆́стинна чꙋдодѣ́лателѧ ꙳ и҆ моли́твенника ѡ҆ грѣ́шныхъ, ꙳ дꙋхѡ́въ прогони́телѧ до́блественнѣйша, ꙳ свѣти́льника, благоче́стїемъ сїѧ́юще, ꙳ цр҃кве побо́рника. ꙳ молѝ спасти́сѧ дꙋша́мъ на́шымъ.
Что́ тѧ, данїи́ле, воз̾именꙋ́емъ; ꙳ по́стника, ꙗ҆́кѡ стра̑сти покори́лъ є҆сѝ ᲂу҆мꙋ̀; ꙳ страда́льца, ꙗ҆́кѡ всѧ́кꙋ претерпѣ́въ є҆сѝ лю́тость, ꙳ на высотꙋ̀ ѿ землѝ ꙳ столпа̀ воздвиза́ема, ꙳ на ка́мени и҆́стины водрꙋжа́ема, ꙳ подви́жника ᲂу҆се́рднѣйша, и҆ врача̀ и҆скꙋ́снѣйша, молѝ спасти́сѧ дꙋша́мъ на́шымъ.
Что́ тѧ, данїи́ле, ны́нѣ нарече́мъ; ꙳ мона́шествꙋющихъ ѻ҆́бразъ, ꙳ и҆ воздержа́нїѧ наказа́телѧ, ꙳ ᲂу҆краше́нїе вѣ́рныхъ, ꙳ и҆ цѣле́нїй самодѣ́телѧ ꙳ свѣти́льника, сꙋ́щымъ во тмѣ̀ свѣ́тъ ѡ҆блиста́юща, ꙳ а҆́гг҃лѡвъ сограждани́на и҆ равноче́стна, ꙳ раѧ̀ жи́телѧ и҆ нбⷭ҇наго чл҃вѣ́ка. ꙳ молѝ спасти́сѧ дꙋша́мъ на́шымъ.
И҆́ны стїхи̑ры прест҃ы́ѧ бцⷣы, гла́съ и҆ подо́бенъ то́йже.
А҆́ще а҆ллилꙋ́їа, пою́тсѧ сі́и стїхи̑ры пре́жде:
Стра́нно та́инство, чи́стаѧ, ꙳ безсѣ́меннагѡ твоегѡ̀ ржⷭ҇тва̀, дв҃о, и҆ ᲂу҆жа́сно, ꙳ превосходѧ́що вели́чествомъ ꙳ всѧ́кꙋ мы́сль человѣ́чꙋ. ꙳ є҆го́же бо не терпѧ́тъ зрѣ́ти многоѻчи́тїи, ꙳ и҆ чи́ни всѝ ст҃ы́хъ а҆́гг҃лъ трепе́щꙋтъ, ꙳ на́мъ пло́тїю породила̀ є҆сѝ, ꙳ неѿстꙋ́пльша же ѻ҆́ч҃а сꙋщества̀: ꙳ сла́вимъ ро́ждшꙋю тѧ̀, бг҃оневѣ́сто.
Комꙋ̀ ᲂу҆подо́биласѧ є҆сѝ, ѻ҆каѧ́ннаѧ, ꙳ къ покаѧ́нїю ника́коже возни́чꙋщи, дꙋшѐ, ꙳ и҆ ѻ҆гнѧ̀ не ᲂу҆жаса́ешисѧ ѕлы́хъ ждꙋ́щагѡ; ꙳ воста́ни, и҆ є҆ди́нꙋ къ застꙋпле́нїю ꙳ ско́рꙋю призовѝ, и҆ возопі́й: ꙳ дв҃о мт҃и, молѝ ꙳ твоего̀ сн҃а ꙳ и҆ бг҃а на́шего, ꙳ и҆зба́вити мѧ̀ сѣ́тей льсти́вагѡ.
Ѻ҆́гнь ро́ждши нестерпи́мый, ꙳ попалѧ́ющїй грѣхѝ, ꙳ и҆ ѡ҆роша́ющїй вѣ̑рныѧ, ꙳ вє́щнаѧ безмѣ́рныхъ мои́хъ, пренепоро́чнаѧ чⷭ҇таѧ, согрѣше́нїй, ꙳ попалѝ моли́твами твои́ми, ꙳ и҆ росо́ю и҆ста́ѧвшꙋю страстьмѝ, ꙳ дꙋ́шꙋ мою̀ прохладѝ, ꙳ ꙗ҆́кѡ да твою̀ велегла́снѡ ми́лость. и҆ си́лꙋ, ꙳ велича́ю ра́бъ тво́й.
Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:
Всѣ́хъ застꙋпле́нїе, влⷣчце, ꙳ пꙋчи́ною ѡ҆бꙋрева́емомꙋ мнѣ̀ тмы̀, ꙳ и҆ лю́тыхъ житїѧ̀ треволне́ньми ꙳ погрꙋжа́емꙋ мѝ при́снѡ, ꙳ ка́плю млⷭ҇ти твоеѧ̀ низпослѝ, ꙳ и҆ рꙋ́кꙋ по́мощи твоеѧ̀ пода́ждь мѝ, ꙳ и҆ ча́сти сподо́би мѧ̀ ꙳ и҆збра́нныхъ и҆ пра́ведныхъ, ꙳ ꙗ҆́кѡ бе́зднꙋ ро́ждшаѧ чл҃вѣколю́бца.
А҆́ще ли среда̀, и҆лѝ пѧто́къ, И҆ ны́нѣ,
Крⷭ҇тобг҃оро́диченъ, гла́съ и҆ подо́бенъ то́йже:
А҆́гница а҆́гнца ꙗ҆́кѡ ви́дѣ на дре́вѣ, ꙳ просте́рта во́лею крⷭ҇тнѣмъ, ꙳ вопїѧ́ше мт҃рски, ꙳ болѣ́знꙋющи съ пла́чемъ: ꙳ сн҃е мо́й, что̀ стра́нное сїѐ видѣ́нїе; ꙳ всѣ̑мъ живо́тъ даѧ́й, ꙗ҆́кѡ гдⷭ҇ь, ꙳ ка́кѡ ᲂу҆мерщвлѧ́ешисѧ, долготерпѣли́ве, ꙳ земны̑мъ подаѧ̀ воскресе́нїе; ꙳ сла́влю твоѐ мно́гое, бж҃е мо́й, снизхожде́нїе.
А҆́ще ли, Бг҃ъ гдⷭ҇ь: Сла́ва, гла́съ є҃. Стꙋді́тово:
Ввѣ́ренный тебѣ̀ тала́нтъ ѿ хрⷭ҇та̀ до́брѣ дѣ́лавъ, прпⷣбне ѻ҆́ч҃е, ꙗ҆ви́лсѧ є҆сѝ и҆ по сме́рти де́мѡнѡвъ прогони́тель, и҆ вра́чь разли́чныхъ болѣ́зней, сто́лпъ и҆ ᲂу҆твержде́нїе, и҆ гора̀ ст҃а́ѧ цр҃кве хрⷭ҇то́вы. тѣ́мъ тѧ̀ мо́лимъ, данїи́ле чꙋдотво́рче, ми́ръ и҆спросѝ, и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ: На стїхо́внѣ ѻ҆ктѡ́иха. Тропа́рь, гла́съ а҃:
Терпѣ́нїѧ сто́лпъ бы́лъ є҆сѝ, ревнова́вый пра́ѻтцємъ, прпⷣбне, і҆́ѡвꙋ во страсте́хъ, і҆ѡ́сифꙋ во и҆скꙋше́нїихъ, и҆ безпло́тныхъ жи́тельствꙋ, сы́й въ тѣлесѝ, данїи́ле, ѻ҆́ч҃е на́шъ, молѝ хрⷭ҇та̀ бг҃а, спасти́сѧ дꙋша́мъ на́шымъ.
На ᲂу҆́трени, ѻ҆́ба канѡ́на ѻ҆ктѡ́иха, и҆ прпⷣбнагѡ на д҃, є҆гѡ́же краегране́сїе: Пѣ́сньми чествꙋ́ю данїи́ла сто́лпника. І҆ѡ́сифъ.
Гла́съ и҃. Пѣ́снь а҃. І҆рмо́съ:
Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Пѣ́сньми бл҃говосхвали́ти хотѧ́щꙋ па́мѧть твою̀, блаже́нне, свѣтоно́снꙋю мѝ зарю̀, данїи́ле, съ нб҃сѐ низпослѝ.
Ве́лїе сл҃нце и҆́стиннѡ, ѻ҆́ч҃е, возсїѧ́лъ є҆сѝ концє́мъ, добродѣ́телей свѣ́тлостїю ѡ҆зарѧ́ѧй вѣ́рныхъ собра̑нїѧ.
Зако́нѡмъ влады̑чнимъ, ѻ҆́ч҃е, повинꙋ́ѧсѧ, ᲂу҆мертви́лъ є҆сѝ воздержа́нїемъ пло́ть, и҆ повинꙋ́лъ є҆сѝ сїю̀ дх҃ꙋ.
Бг҃оро́диченъ:
Ве́сь чл҃вѣ́къ ꙗ҆ви́сѧ, пребы́въ є҆́же бѣ̀ и҆ по воплоще́нїи, и҆́же и҆зъ тебє̀, бцⷣе, роди́выйсѧ неизмѣ́нный гдⷭ҇и.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Жезло́мъ воздержа́нїѧ страсте́й мо́ре, ѻ҆́ч҃е, растерза́въ, преше́лъ є҆сѝ непотопле́нъ, и҆ го́рꙋ дости́глъ є҆сѝ и҆́стиннагѡ безстра́стїѧ, и҆ бг҃ꙋ бесѣ́довалъ є҆сѝ ᲂу҆ма̀ чистото́ю.
Возше́дъ на высотꙋ̀ добродѣ́телей, зна́емь бы́лъ є҆сѝ мі́рꙋ: на столпѣ́ бо стоѧ̀ возвы́шенъ, и҆ сїѧ́нїемъ пресла́вныхъ чꙋде́съ ѡ҆зарѧ́ѧй вѣ́рою къ тебѣ̀ притека́ющыѧ.
Водрꙋже́нъ, на ка́мени бж҃їѧ зна́нїѧ, всѣ́ми козньмѝ бѣсо́вскими ꙗ҆ви́лсѧ є҆сѝ непоколеби́мь: на сто́лпъ ᲂу҆́бѡ тѣ́ло твоѐ на землѝ возвы́силъ є҆сѝ, дꙋ́шꙋ же впери́лъ є҆сѝ къ нбⷭ҇нымъ.
Бг҃оро́диченъ:
И҆зба́ви мѧ̀ страсте́й наше́ствїѧ, влⷣчце, и҆ борю́щыѧ мѧ̀ врагѝ ны́нѣ преборѝ: ᲂу҆тверди́ мѧ на ка́мени бж҃їѧ во́ли: дꙋ́шꙋ мою̀ просвѣтѝ, две́ре бжⷭ҇твеннагѡ свѣ́та.
Сѣда́ленъ, гла́съ а҃. Подо́бенъ: Гро́бъ тво́й:
На сто́лпъ тебѐ са́маго возвы́сивъ, ѻ҆́ч҃е, воздержа́нїемъ, данїи́ле, пло́ть и҆знꙋри́лъ є҆сѝ. тѣ́мъ и҆ дх҃а сосꙋ́дъ досто́инъ бы́лъ є҆сѝ: бл҃года́ть же бжⷭ҇твеннꙋю воспрїе́мъ, требл҃же́нне, недꙋ́гъ всѧ́кїй ѿго́ниши вѣ́рою чтꙋ́щихъ па́мѧть твою̀.
Сла́ва, и҆ ны́нѣ, бг҃оро́диченъ:
Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма̀ и҆ сло́ва, непреста́ннѡ молѝ ѡ҆ воспѣва́ющихъ тѧ̀, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ сла́вѧщымъ тѧ̀.
Крⷭ҇тобг҃оро́диченъ:
Нескве́рнаѧ а҆́гница а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й сни́тїе, и҆ вѡ́льныѧ стрⷭ҇ти, бж҃е пребл҃гі́й;
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Ꙗ҆́кѡ свѣтоза́рное сл҃нце, ѻ҆́ч҃е приснопа́мѧтне, на столпѣ̀ блиста́юща ви́дѣлъ є҆сѝ бж҃їѧ раба̀ сѷмеѡ́на: и҆ и҆стека́ющими ѿ тогѡ̀ бж҃е́ственными свѣтлостьмѝ бж҃е́ственнѡ ѡ҆зари́лсѧ є҆сѝ, данїи́ле, и҆ во слѣ́дъ тогѡ̀ жи́тельства ходи́лъ є҆сѝ.
Де́мѡнскїѧ полкѝ ѻ҆рꙋ́жїемъ вѣ́ры побѣди́лъ є҆сѝ стрꙋѧ́ми же потопи́лъ є҆сѝ моли́твъ, па́гꙋбꙋ тѣ́хъ, ѻ҆́ч҃е, ѿгна́въ, ю҆́же творѧ́хꙋ пла́вающымъ, и҆ спа́слъ є҆сѝ вѣ́рою бг҃ꙋ пѣснопою́щыѧ: си́лѣ твое́й сла́ва, чл҃вѣколю́бче.
Возстолплѧ́ѧ, ѻ҆́ч҃е, тебѐ сама́го, всебл҃же́нне, всено́щнѣ стоѧ́лъ є҆сѝ, ꙗ҆́кѡ безпло́тенъ, не высо́ко дꙋше́вное ѻ҆́ко стѧжа́въ, и҆ чи́сто ꙗ҆́коже зерца́ло дх҃а зарю̀ и҆ бжⷭ҇твєннаѧ ꙗ҆влє́нїѧ чи́стымъ по́мысломъ прїе́млю.
Бг҃оро́диченъ:
Зако́ни въ тебѣ̀ є҆стества̀ ѡ҆бновлѧ́ютсѧ: законода́вца бо сло́ва родила̀ є҆сѝ, па́че вины̀ ꙗ҆́кѡ и҆́стиннѡ, пречⷭ҇таѧ, и҆ сло́ва, безслове́сїѧ и҆зба́вльшаго ро́дъ человѣ́ческїй, вѣ́рнѡ пѣснопою́щихъ: си́лѣ твое́й сла́ва, чл҃вѣколю́бче.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Да безсме́ртныѧ сла́вы полꙋчи́ши, плѡтска́ѧ ᲂу҆мертви́лъ є҆сѝ жела̑нїѧ, ѻ҆́ч҃е, и҆ страсте́й стремлє́нїѧ ѡ҆бꙋзда́лъ є҆сѝ воздержа́нїѧ трꙋды̑, и҆ рѣка̀ чꙋде́съ ꙗ҆ви́лсѧ є҆сѝ, и҆ и҆сто́чникъ врачева́нїй, приснопа́мѧтне.
Є҆́же хожда́ше стезе́ю, ѻ҆́ч҃е, на землѝ, сѷмеѡ́нъ чꙋ́дный, во ᲂу҆́жасѣ, бл҃же́нне, бы́вшꙋ тебѣ̀ ꙗ҆ви́сѧ, показꙋ́ѧ тебѣ̀ со двѣма̀ а҆́гг҃лы, грѧдѝ, вопїѧ̀, и҆ ста́ни ᲂу҆ менє̀, къ бг҃ꙋ возвыша́ѧсѧ благода́тїю.
Просвѣща́емь заре́ю, ѻ҆́ч҃е, невече́рнею и҆ бжⷭ҇твеннымъ ѡ҆сїѧ́нїемъ, бѣсо́вскїй мра́къ и҆ страсте́й мглꙋ̀ ѿгна́лъ є҆сѝ, и҆ ꙗ҆ви́лсѧ є҆сѝ сто́лпъ свѣтови́дѣнъ, и҆ лѣ́ствица, и҆́стиннѡ къ бг҃ꙋ вѣ̑рныѧ возводѧ́щаѧ.
Бг҃оро́диченъ:
Влⷣкꙋ ро́ждшаѧ ꙗ҆ви́ласѧ є҆сѝ превы́шши го́рнихъ си́лъ, и҆ земны́хъ є҆стество̀ ѡ҆божи́ла є҆сѝ, ѻ҆трокови́це бг҃оневѣ́стнаѧ. тѣ́мъ бцⷣꙋ тѧ̀ всеи́стиннꙋю дꙋше́ю и҆ ѧ҆зы́комъ, вѣ́рнїи, дв҃о, сла́вимъ.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Оу҆́мъ тво́й къ бг҃ꙋ приближе́нїемъ ѡ҆блиста́емь, неѧ́тенъ сла́достей ѻ҆гне́мъ, ѻ҆́ч҃е, пребы́сть, и҆ страсте́й го́рншїй, и҆ къ пло́ти пристра́стїѧ вы́шшїй.
Во́дъ животво́рныхъ дарова́нїй, дх҃а и҆спо́лншисѧ твоѧ̀ дꙋша̀, бг҃омꙋ́дре всебл҃же́нне, рѣ́ки и҆сточѝ врачева́нїй и҆́стиннѡ, то́ки страсте́й сꙋша́щыѧ.
Бг҃оро́диченъ:
Тѧ̀ предста́тельницꙋ вѣ́рнїи и҆ стѣ́нꙋ всѝ стѧжа́хомъ, во глꙋбинѣ̀ ѕлы́хъ и҆ молвѣ̀ скорбе́й при́снѡ бѣ́дствꙋюще, бцⷣе, є҆ди́на земны́хъ прибѣ́жище.
Конда́къ, гла́съ и҃. Подо́бенъ: Ꙗ҆́кѡ нача́тки:
Ꙗ҆́коже ѕвѣзда̀ многосвѣ́тлаѧ, ты̀ возше́дъ, бл҃же́нне, на сто́лпъ, мі́ръ просвѣти́лъ є҆сѝ прпⷣбными дѣ́лы твои́ми, и҆ тмꙋ̀ пре́лести ѿгна́лъ є҆сѝ, ѻ҆́ч҃е. тѣ́мже мо́лимъ тѧ̀, и҆ ны́нѣ ѡ҆блиста́й въ сердца́хъ ра̑бъ твои́хъ незаходѧ́щїй свѣ́тъ ра́зꙋма.
І҆́косъ:
Пѣ́снь скве́рна къ похвале́нїю пѡ́двигъ твои́хъ, ѻ҆́ч҃е, прино́ситсѧ: не и҆́мамъ бо чи́сто се́рдце моѐ, ꙗ҆́кѡ сїѐ сра́мнѡ ѡ҆калѧ́хъ: но пода́ждь мѝ сло́во, свѧ́те, чи́стѣ воспѣ́ти твоѐ житїѐ, є҆мꙋ́же ᲂу҆диви́шасѧ вои́стиннꙋ и҆ а҆́гг҃ли: и҆́бо бы́лъ є҆сѝ, ꙗ҆́коже безтѣле́сенъ, прїе́мъ свѣ́тъ незаходѧ́щїй ра́зꙋма.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще. благослове́нъ є҆сѝ, гдⷭ҇и бж҃е, во вѣ́ки.
Чи́ни а҆́гг҃льстїи твоемꙋ̀ стоѧ́нїю ᲂу҆диви́шасѧ, всеблаже́нне бг҃оно́се: съ тѣ́ломъ бо тѣ́хъ жи́тельство воспрїе́мъ, взыва́лъ є҆сѝ: бл҃гослове́нъ є҆сѝ, гдⷭ҇и бж҃е, во вѣ́ки.
Высото́ю невеще́ственнагѡ жи́тельства и҆ прⷪ҇ро́чества сїѧ́ѧ свѣтозаре́нїемъ, врачева́нїи на́мъ ѡ҆блиста́лъ є҆сѝ лꙋчы̀, бл҃гоче́стнѡ чтꙋ́щымъ тѧ̀, данїи́ле чꙋдоно́сне.
Разрѣшѝ страсте́й мои́хъ мглꙋ̀ свѣ́тлостїю, всебл҃же́нне, твоеѧ̀ моли́твы, и҆ на стезю̀ жи́зни наста́ви вопїю́ща: благослове́нъ є҆сѝ, гдⷭ҇и бж҃е, во вѣ́ки.
Бг҃оро́диченъ:
Ми́лостива мнѣ̀ бꙋ́ди, дв҃о, и҆ ᲂу҆ѧ́звлена мѧ̀ ѻ҆рꙋ́жїемъ грѣха̀, врачевство́мъ твоеѧ̀ моли́твы и҆злѣчѝ, бл҃гослове́нъ, зовꙋ́ща, пло́дъ чре́ва твоегѡ̀.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Жела́нїй коне́чное, до́брыхъ кра́йнѣйшее, ѻ҆́ч҃е бг҃оно́се, и҆звѣ́стнѡ дости́глъ є҆сѝ, кри́лы ѡ҆блегчева́ѧсѧ добродѣ́тельныхъ дѣѧ́нїй, и҆ со безтѣле́сными, данїи́ле, взыва́еши: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Бж҃їѧ тѧ̀ си́ла проѧвле́ннѣ ᲂу҆крѣпи́вши, терпѣ́ти зимы̀ ѕлостꙋ́жное сотворѝ, и҆ сл҃нца зно́й, и҆ гни́лости твоеѧ̀ пло́ти, и҆ ѿ неѧ̀ бы́вшихъ черве́й ѡ҆ѕлобле́нїе, вопїю́ща: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Но́вый і҆́ѡвъ ты̀ ꙗ҆ви́лсѧ є҆сѝ, данїи́ле досточꙋ́дне, мно́жествомъ и҆скꙋше́нїй ѡ҆бдержи́мъ и҆ скорбе́й, дв҃довꙋ кро́тость, и҆ і҆а́кѡвле безѕло́бїе, и҆ цѣломꙋ́дрїе і҆ѡ́сифово подража́лъ є҆сѝ, вопїѧ̀ бл҃года́рственнѣ: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Бг҃оро́диченъ:
Бцⷣꙋ, влⷣчце всест҃а́ѧ, мꙋ́дрствꙋющїи тѧ̀, глаго́лѡмъ послѣ́дꙋюще твои̑мъ, всепѣ́таѧ, тѧ̀ ны́нѣ блажи́мъ, ꙗ҆́кѡ бг҃а бл҃же́ннаго родила̀ є҆сѝ на́мъ: є҆го́же, во двꙋ̀ сꙋщества́хъ, є҆ди́нѣй же ѵ҆поста́си, воспѣва́юще вопїе́мъ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.
Сѐ, тебѣ̀ двє́ри нбⷭ҇ныѧ ѿверзо́шасѧ преста́вльшемꙋсѧ, и҆ тече́нїе сконча́вшемꙋ, ѻ҆́ч҃е, и҆ а҆́гг҃лѡвъ чи́ни воспрїѧ́ша, вѣнцода́вецъ же хрⷭ҇то́съ сла́вою вѣнча́ тѧ пра́вды. є҆го́же пою́ще, вѣ́рнїи, велича́емъ.
Ꙗ҆́кѡ крі́нъ, ѻ҆́ч҃е, се́льный въ раѝ воздержа́нїѧ процвѣ́лъ є҆сѝ: и҆ ꙗ҆́кѡ кѷпарі́съ, на высотꙋ̀ возвы́силсѧ є҆сѝ соверше́нства: ꙗ҆́кѡ ма́слина, ѱало́мски ꙗ҆ви́лсѧ є҆сѝ, ли́ца и҆ сердца̀ на̑ша ᲂу҆маща́ѧ є҆ле́емъ болѣ́зней твои́хъ.
Сто́лпъ тѧ̀ ѡ҆снова́нїемъ добродѣ́телей ᲂу҆твержда́емь тва́рь позна̀, забра́ло непоколеби́мо, чꙋде́съ и҆сто́чникъ, приста́нище бл҃гоꙋти́шное, врачева́нїй сокро́вище, прїѧ́телище дх҃а. тѣ́мъ твою̀ дне́сь, данїи́ле, сотворѧ́емъ па́мѧть.
Со́лнца дне́сь на́мъ возсїѧ̀ свѣтлѣ́е, прпⷣбне, бжⷭ҇твеннаѧ па́мѧть твоѧ̀, вѣ́рныхъ сердца̀ просвѣща́ющи свѣ́томъ пра́вды, мра́къ же ѿгонѧ́щи дꙋшетлѣ́нныхъ страсте́й: ю҆́же соверша́юще, благоче́стнѡ воспѣва́емъ тѧ̀.
Бг҃оро́диченъ:
Пощади́ мѧ, сп҃се, рожде́йсѧ и҆ сохрани́въ ро́ждшꙋю тѧ̀ нетлѣ́ннꙋ по рождествѣ̀, є҆гда̀ сѧ́деши сꙋди́ти дѣла̀ моѧ̑, беззакѡ́нїѧ презира́ѧ и҆ грѣхѝ моѧ̑, ꙗ҆́кѡ безгрѣ́шенъ, ꙗ҆́кѡ бг҃ъ, ми́лостивъ и҆ чл҃вѣколю́бецъ.
Свѣти́ленъ ѻ҆ктѡ́иха. Сла́ва, ст҃а́гѡ. Поⷣ: Свѣ́те неизмѣ́нный:
Твоѧ̑ по́двиги сто́лпъ вопїе́тъ гла́сы неглаго́льными, стра́ждꙋща безпокро́внѡ ка́чествы проти́вными, ѿѻнꙋ́дꙋже, ꙗ҆́кѡ свѣти́льникъ свѣтоно́сне, просїѧ́лъ є҆сѝ, ѻ҆́ч҃е, ѡ҆зарѧ́ѧ всю̀ тва́рь.
И҆ ны́нѣ, бг҃оро́диченъ:
Тѧ̀ пѣ́сньми немо́лчными блажи́мъ, дв҃о, ꙗ҆́кѡ ѿ трⷪ҇цы є҆ди́наго родила̀ є҆сѝ, бцⷣе, и҆ но́сиши бжⷭ҇твенными рꙋка́ми пресꙋ́щное сло́во, невра́щнѡ и҆ неизмѣ́ннѡ.
На стїхо́внѣ ѻ҆ктѡ́иха.
Вѣ́дати подоба́етъ, ꙗ҆́кѡ ѿ сегѡ̀ а҃і днѐ начина́етсѧ недѣ́лѧ пра́ѻч҃ескаѧ, и҆ восхо́дитъ сегѡ́ же деке́мврїа до з҃і днѐ. Быва́етъ же си́це:
А҆́ще ᲂу҆́бѡ слꙋчи́тсѧ ржⷭ҇тво̀ хрⷭ҇то́во въ недѣ́лю: и҆ тогда̀ пра́ѻч҃ескаѧ недѣ́лѧ быва́етъ деке́мврїа въ а҃і-й де́нь:
А҆ ст҃ы́хъ ѻ҆ц҃ъ недѣ́лѧ, ꙗ҆́же предъ ржⷭ҇тво́мъ хрⷭ҇то́вымъ, деке́мврїа въ и҃і-й де́нь.
А҆́ще ли слꙋчи́тсѧ ржⷭ҇тво̀ хрⷭ҇то́во въ понедѣ́льникъ: и҆ тогда̀ пра́ѻч҃ескаѧ недѣ́лѧ быва́етъ деке́мврїа въ з҃і-й де́нь:
А҆ недѣ́лѧ ст҃ы́хъ ѻ҆ц҃ъ, ꙗ҆́же предъ ржⷭ҇тво́мъ хрⷭ҇то́вымъ, тогда̀ быва́етъ деке́мврїа въ к҃д-й де́нь.
А҆́ще ли слꙋчи́тсѧ ржⷭ҇тво̀ хрⷭ҇то́во во вто́рникъ: и҆ тогда̀ пра́ѻч҃ескаѧ недѣ́лѧ быва́етъ деке́мврїа въ ѕ҃і-й де́нь:
А҆ ст҃ы́хъ ѻ҆ц҃ъ недѣ́лѧ, ꙗ҆́же предъ ржⷭ҇тво́мъ хрⷭ҇то́вымъ, деке́мврїа въ к҃г-й де́нь.
А҆́ще ли слꙋчи́тсѧ ржⷭ҇тво̀ хрⷭ҇то́во въ сре́дꙋ: и҆ тогда̀ быва́етъ пра́ѻч҃ескаѧ недѣ́лѧ деке́мврїа въ є҃і-й де́нь:
А҆ ст҃ы́хъ ѻ҆ц҃ъ недѣ́лѧ деке́мврїа въ к҃в-й де́нь.
А҆́ще ли слꙋчи́тсѧ ржⷭ҇тво̀ хрⷭ҇то́во въ четверто́къ: и҆ тогда̀ быва́етъ пра́ѻч҃ескаѧ недѣ́лѧ деке́мврїа въ д҃і-й де́нь:
А҆ ст҃ы́хъ ѻ҆ц҃ъ недѣ́лѧ деке́мврїа въ к҃а-й де́нь.
А҆́ще ли слꙋчи́тсѧ ржⷭ҇тво̀ хрⷭ҇то́во въ пѧто́къ: и҆ тогда̀ быва́етъ пра́ѻч҃ескаѧ недѣ́лѧ деке́мврїа въ г҃і-й де́нь:
А҆ ст҃ы́хъ ѻ҆ц҃ъ недѣ́лѧ въ к҃-й де́нь.
А҆́ще ли слꙋчи́тсѧ ржⷭ҇тво̀ хрⷭ҇то́во въ сꙋббѡ́тꙋ: и҆ тогда̀ быва́етъ пра́ѻч҃ескаѧ недѣ́лѧ деке́мврїа во в҃і-й де́нь:
А҆ недѣ́лѧ ст҃ы́хъ ѻ҆ц҃ъ, ꙗ҆́же предъ ржⷭ҇тво́мъ хрⷭ҇то́вымъ, деке́мврїа въ ѳ҃і-й де́нь.
Ѿ здѣ̀ блюдѝ недѣ́лю ст҃ы́хъ пра̑ѻц҃ъ въ ко́е число̀ прилꙋчи́тсѧ.
А҆́ще и҆ пре́жде недѣ́ли к҃и-ѧ, и҆лѝ по́слѣжде: И҆ на лїтꙋргі́и є҆ѵⷢ҇лїе чтѝ недѣ́ли к҃и-ѧ, лꙋкѝ, зача́ло ѻ҃ѕ: Человѣ́къ нѣ́кїй сотворѝ ве́черю ве́лїю: непремѣ́ннѡ є҆ди́но. А҆ въ к҃и недѣ́лю чтѝ рѧдово́е, ко́е прилꙋчи́тсѧ и҆ны́ѧ недѣ́ли.
Подоба́етъ вѣ́дати ѡ҆ недѣ́ли ст҃ы́хъ пра̑ѻц҃ъ.
Є҆гда̀ ᲂу҆́бѡ быва́етъ недѣ́лѧ ст҃ы́хъ пра̑ѻц҃ъ, ѡ҆ставлѧ́етсѧ послѣ́дованїе прилꙋчи́вшагѡсѧ ст҃а́гѡ въ тꙋ̀ недѣ́лю, и҆ пое́мъ пре́жде въ пѧто́къ на повече́рїи.
Въ сꙋббѡ́тꙋ на ма́лѣй вече́рни пое́мъ по ѻ҆бы́чаю.
На вели́цѣй вече́рни на Гдⷭ҇и, воззва́хъ стїхи̑ры воскрⷭ҇ны г҃: и҆ ꙾восто́чны꙾[[꙾А҆натѡ́лїевы꙾]] г҃: и҆ ст҃ы́хъ пра̑ѻц҃ъ д҃, гла́съ и҃. Подо́бенъ: И҆́же во є҆де́мѣ: Сла́ва, пра́ѻц҃євъ, гла́съ ѕ҃: И҆́же пре́жде зако́на: И҆ ны́нѣ, бг҃оро́диченъ настоѧ́щагѡ гла́са. На лїті́и стїхи́ра хра́ма: Сла́ва, пра́ѻц҃євъ, гла́съ а҃: Лꙋча́ми ѡ҆блиста́вшесѧ бг҃оглаго́ланїѧ: И҆ ны́нѣ, бг҃оро́диченъ: Сѐ, и҆спо́лнисѧ и҆са́їино: На стїхо́внѣ стїхи̑ры воскрⷭ҇ны: Сла́ва, пра́ѻц҃євъ, гла́съ г҃: Пра́ѻц҃ъ собо́ръ: И҆ ны́нѣ, бг҃оро́диченъ: Безъ сѣ́мене ѿ бжⷭ҇твеннагѡ дх҃а: На благослове́нїи хлѣ́бѡвъ тропа́рь: Бцⷣе дв҃о, два́жды. и҆ пра́ѻц҃євъ є҆ди́ножды, гла́съ в҃: Вѣ́рою пра́ѻц҃ы ѡ҆правда́лъ є҆сѝ:
На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды, Сла́ва, и҆ ны́нѣ пра́ѻц҃євъ. По а҃-й и҆ по в҃-й каѳі́смѣ сѣда́льны воскрⷭ҇ны, и҆ чте́нїе во є҆ѵⷢ҇лїи толково́мъ, недѣ́лѧ рѧ́дъ. Посе́мъ полѷеле́й: и҆ тропарѝ воскрⷭ҇ны. А҆́гг҃льскїй собо́ръ: та́же ѵ҆пакоѝ гла́са, и҆ сѣда́ленъ пра́ѻц҃євъ: и҆ чте́нїе. Степє́нна, и҆ прокі́менъ гла́са. Всѧ́кое дыха́нїе: Є҆ѵⷢ҇лїе воскрⷭ҇ное: и҆ Воскрⷭ҇нїе хрⷭ҇то́во: ѱало́мъ н҃. Стїхи́ра воскрⷭ҇на. Канѡ́нъ воскрⷭ҇нъ, со і҆рмосо́мъ на д҃: и҆ ѻ҆трокѡ́въ на д҃: гла́съ и҃: и҆ пра́ѻц҃євъ на ѕ҃, гла́съ а҃: Катава́сїа: Хрⷭ҇то́съ ражда́етсѧ: По г҃-й пѣ́сни ѵ҆пакоѝ пра́ѻц҃євъ є҆ди́ножды, гла́съ в҃: Въ ро́сꙋ дѣ́темъ: По ѕ҃-й пѣ́сни конда́къ пра́ѻц҃євъ, гла́съ ѕ҃: Рꙋкопи́саннагѡ ѻ҆́браза не поче́тше: и҆ і҆́косъ. По ѳ҃-й пѣ́сни свѣти́ленъ воскрⷭ҇нъ: Сла́ва, пра́ѻц҃євъ: И҆ ны́нѣ, бг҃оро́диченъ. На хвали́техъ стїхи̑ры воскрⷭ҇ны д҃: и҆ ст҃ы́хъ пра́ѻц҃євъ, д҃, гла́съ в҃. Подо́бенъ: До́ме є҆ѵфра́ѳовъ: Сла́ва, пра́ѻц҃євъ, гла́съ з҃: Прїиди́те всѝ вѣ́рнѡ: И҆ ны́нѣ, Пребл҃гослове́нна є҆сѝ: Славосло́вїе вели́кое, и҆ ѿпꙋ́стъ: Стїхи́рꙋ же є҆ѵⷢ҇льскꙋю пое́мъ въ притво́рѣ: и҆ ча́съ а҃-й: и҆ коне́чный ѿпꙋ́стъ.
На лїтꙋргі́и Бл҃жє́нна гла́са, на ѕ҃: и҆ пра́ѻц҃євъ пѣ́снь г҃-ѧ, на д҃. По вхо́дѣ тропа́рь воскрⷭ҇нъ, и҆ пра́ѻц҃євъ: Сла́ва, и҆ ны́нѣ, конда́къ пра́ѻц҃євъ. Прокі́менъ, пѣ́снь ѻ҆ц҃є́въ, гла́съ д҃. Бл҃гослове́нъ є҆сѝ, гдⷭ҇и бж҃е ѻ҆ц҃ъ на́шихъ. Сті́хъ: Ꙗ҆́кѡ пра́веденъ є҆сѝ: А҆пⷭ҇лъ пра́ѻц҃євъ къ колосса́ємъ, зача́ло сл҃з. А҆ллилꙋ́їа, гла́съ д҃: Мѡѷсе́й и҆ а҆арѡ́нъ: Є҆ѵⷢ҇лїе лꙋкѝ, зача́ло ѻ҃ѕ. Рѧ́дъ же недѣ́ли ѡ҆ставлѧ́етсѧ. Прича́стенъ: Хвали́те гдⷭ҇а: Дрꙋгі́й: Ра́дꙋйтесѧ.
Недѣ́лѧ свѧты́хъ пра́ѻтєцъ.
На Гдⷭ҇и, воззва́хъ, стїхи̑ры воскрⷭ҇ны, и҆ ꙾восто́чны꙾[[꙾А҆натѡ́лїевы꙾]], г҃, и҆ пра́ѻц҃євъ на д҃, гла́съ и҃. Подо́бенъ: И҆́же во є҆де́мѣ:
Пра́ѻтцєвъ дне́сь, вѣ́рнїи, соверша́юще па́мѧть, воспои́мъ хрⷭ҇та̀ и҆зба́вителѧ, возвели́чившаго и҆̀хъ во всѣ́хъ ꙗ҆зы́цѣхъ, и҆ чꙋде́съ пресла̑внаѧ вѣ́рнѡ соверши́вшаго гдⷭ҇а, ꙗ҆́кѡ держа́вна и҆ си́льна, и҆ ѿ ни́хъ показа́вша же́злъ си́лы на́мъ є҆ди́нꙋ неискꙋсомꙋ́жнꙋю и҆ бг҃оѻтрокови́цꙋ марі́ю чи́стꙋю, и҆зъ неѧ́же цвѣ́тъ про́йде хрⷭ҇то́съ, и҆зрасти́вый всѣ̑мъ жи́знь и҆ неиждива́емꙋю пи́щꙋ, и҆ спасе́нїе вѣ́чное.
И҆́же ст҃ы̑ѧ ѻ҆́троки и҆зъ ѻ҆гнѧ̀ и҆зба́вивый, влⷣко, и҆ ѿ ᲂу҆́стъ льво́выхъ данїи́ла, бл҃гослови́вый а҆враа́ма, и҆ і҆саа́ка, раба̀ твоего̀, и҆ сего̀ сн҃а і҆а́кѡва, бл҃говоли́вый ѿ сѣ́мене и҆́хъ бы́ти по на́мъ: да пре́жде поползнꙋ́вшыѧсѧ спасе́ши пра́ѻтцы на́шѧ, крⷭ҇то́мъ твои́мъ и҆ воскресе́нїемъ, и҆ расто́ргнꙋвъ смє́ртныѧ ᲂу҆́зы, совозста́виши всѧ̑, ꙗ҆̀же ѿ вѣ́ка сꙋ́щыѧ въ ме́ртвыхъ, покланѧ́ющыѧсѧ тебѣ̀, хрⷭ҇тѐ, цр҃ю̀ вѣкѡ́въ.
Ꙗ҆́коже въ хла́дѣ посредѣ̀ пла́мене, росо́ю дх҃а ра́дꙋющесѧ ѻ҆́троцы бж҃їи хожда́хꙋ, та́инственнѡ въ не́мъ проѡбрази́вше трⷪ҇цꙋ, и҆ воплоще́нїе хрⷭ҇то́во, и҆ ꙗ҆́кѡ мꙋ́дрїи, вѣ́рою ᲂу҆гаси́ша си́лꙋ ѻ҆́гненнꙋю: и҆ данїи́лъ же пра́ведный львѡ́въ ꙗ҆ви́сѧ ѡ҆бꙋзда́тель: и҆́хже моли́твами ᲂу҆моле́нъ бы́въ, чл҃вѣколю́бче сп҃се, и҆ на́съ негаси́магѡ вѣ́чнагѡ и҆зба́ви ѻ҆гнѧ̀, и҆ сподо́би ны̀ црⷭ҇твїѧ твоегѡ̀ гдⷭ҇и. Ꙗ҆́коже въ росѣ̀ сꙋ́ще, вѣ́рнїи и҆ ст҃і́и ѻ҆́троцы твоѝ въ пещѝ пла́мене ѻ҆́гненнагѡ предживописа́хꙋ та́инственнѡ, є҆́же и҆зъ дв҃ы, твоѐ прише́ствїе, неѡпа́льнѡ возсїѧ́вшее на́мъ, и҆ данїи́лъ же пра́ведный и҆ во прⷪ҇ро́цѣхъ чꙋ́дный, ꙗ҆́снѡ бжⷭ҇твенное второ́е твоѐ прише́ствїе проѧвлѧ́ѧ, ви́дѣхъ, до́ндеже прⷭ҇то́ли поста́вишасѧ, глаго́летъ, и҆ сꙋдїѧ̀ сѣ́де, и҆ ѻ҆́гненнаѧ потечѐ рѣка̀: є҆ѧ́же да и҆зба́вимсѧ, хрⷭ҇тѐ, моли́твами и҆́хъ, влⷣко.
Сла́ва, гла́съ ѕ҃. А҆нато́лїево:
И҆̀же пре́жде зако́на, ѻ҆тцы̀ всѧ̑ восхва́лимъ дне́сь, вѣ́рнїи, а҆враа́ма бг҃олюби́ваго, и҆ і҆саа́ка ѿ ѡ҆бѣща́нїѧ рожде́ннаго, и҆ і҆а́кѡва, и҆ двана́десѧть патрїа́рхи, дв҃да кротча́йшаго, и҆ данїи́ла, жела́нїй прⷪ҇ро́ка, и҆ трѝ ѻ҆́троки съ ни́ми сла́вѧще, пе́щь въ ро́сꙋ преложи́вшыѧ, просѧ́ще ѡ҆ставле́нїѧ ѿ хрⷭ҇та̀ бг҃а, прославлѧ́емаго во ст҃ы́хъ свои́хъ.
И҆ ны́нѣ, бг҃оро́диченъ пе́рвый гла́са.
На лїті́и стїхи́ра хра́ма. Сла́ва, гла́съ а҃:
Лꙋча́ми ѡ҆блиста́вшесѧ бг҃оглаго́ланїѧ великоимени́тїи прⷪ҇ро́цы прⷭ҇нѡ блажа́тсѧ: и҆ речє́нїѧ дх҃а пло́дствꙋюще, несказа́нное ржⷭ҇тво̀ хрⷭ҇та̀ бг҃а всѣ̑мъ проповѣ́даша: зако́ннѡ же кончи́нꙋ соверши́ша, пожи́вше жи́знь пречꙋ́днꙋю.
И҆ ны́нѣ, бг҃оро́диченъ: Сѐ, и҆спо́лнисѧ и҆са́їино прорече́нїе:
Стїхо́вна воскрⷭ҇на. Сла́ва, гла́съ г҃. Ге́рманово:
Пра́ѻц҃євъ собо́ръ, празднолю́бцы, прїиди́те, ѱало́мски да восхва́лимъ, а҆да́ма пра́ѻц҃а, є҆нѡ́ха, нѡ́а, мелхїседе́ка, а҆враа́ма, і҆саа́ка, и҆ і҆а́кѡва: по зако́нѣ мѡѷсе́а, и҆ а҆арѡ́на, і҆исꙋ́са, самꙋи́ла, и҆ дв҃да съ ни́миже и҆са́їю, і҆еремі́ю, і҆езекі́илѧ, и҆ данїи́ла, и҆ двана́десѧть, кꙋ́пнѡ и҆лїю̀, є҆лїссе́а, и҆ всѧ̑: заха́рїю, и҆ крⷭ҇ти́телѧ, и҆ проповѣ́давшыѧ хрⷭ҇та̀, жи́знь и҆ воскресе́нїе ро́да на́шегѡ.
И҆ ны́нѣ, бг҃оро́диченъ: Безъ сѣ́мене:
Тропа́рь, воскрⷭ҇нъ. Сла́ва, и҆ ны́нѣ, пра́ѻц҃ємъ, гла́съ в҃:
Вѣ́рою пра́ѻц҃ы ѡ҆правда́лъ є҆сѝ, ѿ ꙗ҆зы̑къ тѣ́ми пред̾ѡбрꙋчи́вый цр҃ковь: хва́лѧтсѧ въ сла́вѣ ст҃і́и, ꙗ҆́кѡ ѿ сѣ́мене и҆́хъ є҆́сть пло́дъ бл҃госла́венъ, безъ сѣ́мене ро́ждшаѧ тѧ̀. тѣ́хъ моли́твами, хрⷭ҇тѐ бж҃е, поми́лꙋй на́съ.
На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды. Сла́ва, и҆ ны́нѣ, пра́ѻц҃ємъ. По ѻ҆бо́ихъ каѳі́смахъ сѣда́льны воскрⷭ҇ны, съ бг҃оро́дичны и҆́хъ. По полѷеле́и ѵ҆пакоѝ гла́са.
И҆ сѣда́ленъ пра́ѻц҃євъ, гла́съ и҃. Подо́бенъ: Премꙋ́дрости:
А҆враа́ма, і҆саа́ка же и҆ і҆а́кѡва восхва́лимъ всѝ пѣ́сненнѡ, дв҃да кро́ткаго, і҆и҃сꙋ́са, и҆ двана́десѧть патрїа́рхи, кꙋ́пнѡ съ тремѝ ю҆́ношами, ᲂу҆гаси́вшими ѻ҆́гненный пла́мень си́лою дх҃о́вною: ра́дꙋйтесѧ, вопїю́ще къ ни̑мъ, пре́лесть до́блественнѣ ѡ҆бличи́вше царѧ̀ безꙋ́мнагѡ, и҆ хрⷭ҇тꙋ̀ моли́тесѧ, согрѣше́нїй ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть ва́шꙋ.
Два́жды.
Сла́ва, и҆ ны́нѣ, бг҃оро́диченъ:
Бл҃года́рственное похвале́нїе до́лжно, ꙗ҆́коже вдови́ца ѻ҆́наѧ два̀ ле́пта приношꙋ̀ тебѣ̀ влⷣчце, ѡ҆ всѣ́хъ дарова́нїихъ твои́хъ: ты́ бо ꙗ҆ви́ласѧ є҆сѝ покро́въ, кꙋ́пнѡ и҆ по́мощь, напа́стей и҆ скорбе́й при́снѡ мѧ̀ и҆з̾има́ющи. тѣ́мже ꙗ҆́кѡ ѿ среды̀ горѧ́щїѧ пе́щи и҆зба́вльсѧ ѡ҆скорблѧ́ющихъ мѧ̀, ѿ се́рдца взыва́ю тебѣ̀: бцⷣе, помози́ ми, молѧ́щи хрⷭ҇та̀ бг҃а, согрѣше́нїй ѡ҆ставле́нїе да́ти мнѣ̀, тѧ́ бо и҆мѣ́ю наде́ждꙋ ра́бъ тво́й.
Канѡ́ни трѝ: воскрⷭ҇нъ на д҃: и҆ ст҃ы́хъ трїе́хъ ѻ҆трокѡ́въ на д҃. и҆ пра́ѻц҃євъ на ѕ҃. Канѡ́нъ ст҃ы́хъ трїе́хъ ѻ҆трокѡ́въ, є҆гѡ́же краегране́сїе: Трѝ ѻ҆́троки пою̀, и҆ данїи́ла вели́каго. Ѳеофа́ново.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Безнача́льное сло́во и҆зъ ѻ҆ц҃а̀ пре́жде всѣ́хъ вѣкѡ́въ рожде́нно бг҃олѣ́пнѡ, въ пещѝ ю҆́ношамъ ѻ҆бра́знѡ ви́дѣно бы́вшее просла́вимъ.
Глаго́лы мꙋчи́телѧ ѕлочести́вагѡ бл҃горо́днїи ѻ҆́троцы ѡ҆плева́вше терпѣли́внѡ, снѣ́дьми беззако́нныхъ ѡ҆скверни́тисѧ халде́йски не восхотѣ́ша.
Пита́стесѧ ᲂу҆́бѡ сло́вомъ дꙋше́внѣ, снѣ́дьми же самора́сленными пло́тски, па́че пита́ющихсѧ дебе́лыми снѣ́дьми, цр҃ю̀ краснѣ́йшїи ли́цы ꙗ҆ви́стесѧ.
Бг҃оро́диченъ:
Ꙗ҆́дъ ѕмїи́нъ въ слꙋ́хи го́рькѡ и҆злїѧ́вшїйсѧ є҆́ѵины, ꙗ҆́же и҆зъ дв҃да возра́стшаѧ, ѻ҆трокови́це, и҆сцѣлѧ́еши, и҆зба́вителѧ ро́ждши.
И҆́нъ канѡ́нъ ст҃ы́хъ пра́ѻц҃євъ, є҆гѡ́же краегране́сїе: Ѻ҆ц҃є́мъ хвалꙋ̀ въ лѣ́потꙋ ны́нѣ приноша́ю. І҆ѡ́сифъ.
Гла́съ а҃. Пѣ́снь а҃. І҆рмо́съ:
Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ.
Ѻ҆ц҃є́мъ пѣ́нїе принесе́мъ, пре́жде зако́на, и҆ въ зако́нѣ возсїѧ́вшымъ, и҆ и҆зъ дв҃ы возсїѧ́вшемꙋ гдⷭ҇ꙋ и҆ влⷣцѣ во́лею пра́вою ᲂу҆годи́вшымъ, и҆ незаходи́магѡ просвѣще́нїѧ ны́нѣ наслажда́ющымсѧ.
А҆да́ма пе́рваго почти́мъ, рꙋко́ю почте́ннаго зижди́телѧ, и҆ всѣ́хъ на́съ пра́ѻтца ᲂу҆жѐ бы́вшаго, и҆ въ ски́нїахъ нбⷭ҇ныхъ со всѣ́ми и҆збра́нными почива́юща.
А҆́велѧ, да́ры прине́сшаго дꙋше́ю бл҃горо́днѣйшею, прїѧ́тъ всѣ́хъ бг҃ъ и҆ гдⷭ҇ь: сего́ же па́ки скверноꙋбі́йственною рꙋко́ю ᲂу҆мерщвле́на, принесѐ къ свѣ́тꙋ, ꙗ҆́кѡ бжⷭ҇твенна мч҃ника.
Бг҃оро́диченъ:
Рече́нїй бжⷭ҇твенныхъ ᲂу҆слы́шимъ, вопїю́щихъ хрⷭ҇то́во ꙗ҆вле́нїе: се́ бо въ верте́пѣ ражда́етсѧ и҆зъ ѻ҆трокови́цы неискꙋсомꙋ́жныѧ, є҆гѡ́же стра́шное ржⷭ҇тво̀ провозвѣща́етъ ѕвѣздосло́вцємъ ѕвѣзда̀ ꙗ҆́вльшаѧсѧ.
Катава́сїа: Хрⷭ҇то́съ ражда́етсѧ, сла́вите:
Пѣ́снь г҃. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Ра́зꙋмъ стѧжа́вше бг҃онаꙋче́нный, влⷣко, ѻ҆́троцы дв҃довы, зако́ны ѻ҆те́чєскїѧ бг҃омꙋ́дреннѡ соблюдо́ша.
Ѻ҆́гнь не ѡ҆палѝ чистѣ̑йшаѧ тѣлеса̀ благочести́выхъ: посто́мъ бо дꙋшепита́тельнымъ напаѧ́хꙋсѧ.
Хвалꙋ̀ всемі́рнꙋю и҆ многопѣ́тꙋю пою́тъ ѻ҆́троцы трїѐ, посредѣ̀ пе́щи чꙋ́днѡ ѡ҆роша́еми.
Бг҃оро́диченъ:
Да ржⷭ҇тво̀, влⷣко, и҆зъ дѣ́вствꙋющагѡ тѣлесѐ пока́жеши на́мъ, спаса́еши въ пещѝ дѣ̑вствꙋющаѧ тѣлеса̀.
И҆́нъ. І҆рмо́съ:
Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ гдⷭ҇и.
Пое́тсѧ въ мі́рѣ си́ѳово къ зижди́телю разжже́нїе, и҆́бо въ непоро́чнѣмъ жи́тельствѣ и҆ дꙋше́внѣй любвѝ томꙋ̀ и҆́стиннѡ ᲂу҆годѝ, и҆ ны́нѣ во странѣ̀ живы́хъ вопїе́тъ: ст҃ъ є҆сѝ, гдⷭ҇и.
Оу҆сты̑ и҆ ѧ҆зы́комъ и҆ се́рдцемъ є҆нѡ́съ чꙋ́дный призва́ти бг҃омꙋ́дреннѡ влⷣкꙋ всѣ́хъ и҆ бг҃а, надѣ́ѧшесѧ въ дс҃ѣ: и҆ благоꙋго́днѡ пожи́въ на землѝ, сла́вꙋ воспрїѧ́тъ.
Свѧщеннослѡ́вїи свѧще́нными є҆нѡ́ха ᲂу҆блажи́мъ, благоꙋгоди́въ бо гдⷭ҇ꙋ, преста́висѧ въ сла́вѣ, ꙗ҆ви́всѧ лꙋ́чши сме́рти, ꙗ҆́коже писа́сѧ, и҆́мже бж҃їй бы́въ ра́бъ и҆́скреннѣйшїй.
Бг҃оро́диченъ:
Ны́нѣ ча́ѧнїе ꙗ҆зы́кѡвъ ѿ дв҃ы предгрѧде́тъ, и҆ виѳлее́мъ заключе́нный ѿверза́етъ свѣ́тлѡ є҆де́ма, сло́во воплоща́емое прїе́млѧ, и҆ въ ꙗ҆́слѣхъ пло́тїю возле́гшаго.
Катава́сїа: Пре́жде вѣ̑къ: И҆ ѵ҆пакоѝ, гла́съ в҃:
Въ ро́сꙋ дѣ́темъ ѻ҆́гнь прелага́шесѧ, пла́чь въ ра́дость жена́мъ премѣнѧ́шесѧ: а҆́гг҃лъ бо во ѻ҆бои́хъ слꙋжа́ше чꙋдесѣ́хъ, ѻ҆́вымъ ᲂу҆́бѡ во ᲂу҆покое́нїе претвори́вый пе́щь, си̑мъ же воскресе́нїе возвѣсти́вый тридне́вное: нача́льниче жи́зни на́шеѧ, гдⷭ҇и, сла́ва тебѣ̀.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Данїи́лъ мꙋдрѣ́йшїй бжⷭ҇твеннѣ ᲂу҆мо́мъ просвѣща́емь, сѡ́нїѧ разрѣшѝ самоде́ржцєвъ бжⷭ҇твенною бл҃года́тїю.
Ѡ҆блиста́етъ чꙋдесмѝ, є҆́же въ пещѝ, ѻ҆трокѡ́въ страда́нїе: мꙋчи́телѧ бо ᲂу҆лови́ша къ позна́нїю твоемꙋ̀, всеси́льне.
Согла́сїѧ ѻ҆рга́ны и҆ мꙋсїкі́и пѣ̑сни всесли̑чныѧ до́блественныхъ не привлеко́ша, и҆ злато́мꙋ ѻ҆́бразꙋ не подклони́ша.
Бг҃оро́диченъ:
Пѣ́сньми, всепѣ́таѧ, и҆̀же въ вавѷлѡ́нѣ, дѣ́ти почита́ютъ сн҃а твоего̀ пребжⷭ҇твеннаго, є҆го́же въ пещѝ позна́ша.
И҆́нъ. І҆рмо́съ:
Же́злъ и҆зъ ко́рене і҆ессе́ева и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀, хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.
Хвалꙋ̀ принесе́мъ бг҃ꙋ, чтꙋ́ще пѣ́сньми нѡ́а, вои́стиннꙋ сꙋ́ща пра́веднаго: во всѣ́хъ бо за́повѣдехъ бжⷭ҇твенныхъ ᲂу҆краша́емь ꙗ҆ви́сѧ, хрⷭ҇тꙋ̀ благоꙋгоди́въ, є҆мꙋ́же пѣснопое́мъ вѣ́рнїи: сла́ва си́лѣ твое́й, гдⷭ҇и.
Ви́дѣвъ твоѐ бг҃ъ благоро́дное нра́ва, и҆ просто́е, и҆ по всемꙋ̀ нѡ́е соверше́на втора́гѡ мі́ра, ꙗ҆́вѣ началовожда́ тѧ показꙋ́етъ, спа́сшаго томꙋ̀ всѧ́кагѡ ро́да ѿ пото́па чꙋ́вственнагѡ сѣ́мѧ, ꙗ҆́коже са́мъ повелѣ̀.
Нѡ́а сохра́ншаго бж҃їй зако́нъ невреди́мь, и҆ ѡ҆брѣ́тшасѧ тогда̀ пра́ведна въ ро́дѣ свое́мъ, и҆ дре́вѧнымъ спа́сша дре́вле ковче́гомъ безслове́сныхъ ро́ды, повелѣ́нїемъ вседѣ́тельнымъ, пѣ́сньми благоче́стнѡ ᲂу҆блажи́мъ.
Вїно̀ ᲂу҆миле́нїѧ на́мъ то́читъ, чтꙋ́щымъ тѧ̀, нѡ́е блаже́нне, па́мѧть твоѧ̀, веселѧ́щее и҆ дꙋ́шы и҆ сердца̀ всегда̀, чи́стѣ блажа́щихъ нра́вы твоѧ̑ честны̑ѧ и҆ жи́тельство бжⷭ҇твенное.
Бг҃оро́диченъ:
Ны́нѣ и҆збавле́нїе на́ше въ ꙗ҆́слѣхъ возлега́етъ, и҆ пелена́ми повива́етсѧ, ꙗ҆́коже младе́нецъ. И҆ волсвѝ, восто́чнїи ца́рїе прихо́дѧтъ, сего̀, ꙗ҆́кѡ бг҃а и҆ цр҃ѧ̀, ро́ждшагосѧ ѿ чⷭ҇тыѧ, ви́дѣти, и҆ поклони́тисѧ съ да̑ры вѣ́рнѡ.
Катава́сїа: Же́злъ и҆зъ ко́рене і҆ессе́ева:
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Наꙋчи́вшесѧ зако́нꙋ, сп҃се, не ѿверго́шасѧ твоѝ ᲂу҆го́дницы, данїи́лъ вели́кїй съ тремѝ ю҆́ношами бг҃омꙋ́дрыми: но, крѣ́пость прїе́мше ѿ тебє̀, бл҃годѣ́телѧ, мꙋчи́тели мꙋ́жески побѣди́ша.
Мы́сленнѡ наꙋча́шесѧ данїи́лъ, чл҃вѣколю́бче, твои̑мъ та́йнамъ: на ѻ҆́блацѣ бо, ꙗ҆́кѡ сн҃а тѧ̀ человѣ́ча грѧдꙋ́ща, ꙗ҆зы́кѡвъ всѣ́хъ, ꙗ҆́кѡ сꙋдїю̀ и҆ цр҃ѧ̀, зрѧ́ше ᲂу҆ма̀ чистото́ю.
Оу҆краси́сѧ, ѽ дѣ́ти! па́че ка́мене сапфі́ра, ва́ше совокꙋпле́нїе, ꙗ҆́кѡ зарѧ̀ злата́ѧ, благоче́стїѧ ре́вностїю распа́льшесѧ, ходѧ́ще ра́достнѡ въ пещѝ, и҆ собира́юще ликова́нїе всемі́рное.
Бг҃оро́диченъ:
Данїи́лъ тѧ̀, дв҃о, го́рꙋ прописа̀ ꙗ҆́вѣ бжⷭ҇твенный, трїе́ же ѻ҆́троцы ви́дѣвше пла́мень ѡ҆роша́ющъ, твоѐ бжⷭ҇твенное ржⷭ҇тво̀ пѣснопѣ́сненнѡ восхвалѧ́ютъ, ꙗ҆́кѡ сп҃са и҆ зижди́телѧ и҆ гдⷭ҇а.
И҆́нъ. І҆рмо́съ:
Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ: тѣ́мъ, бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.
Хвала́ми бжⷭ҇твенными да почти́тсѧ си́мъ, ѻ҆ч҃еское бл҃гослове́нїе приплоди́въ: и҆ предъ бг҃омъ благоꙋго́денъ ꙗ҆́вльсѧ, къ пра́ѻч҃єскимъ ликѡ́мъ причте́сѧ, и҆ во странѣ̀ живы́хъ ра́достнѡ почива́етъ.
Ви́дѣти сподо́бисѧ, ꙗ҆́кѡ дрꙋ́гъ бж҃їй, а҆враа́мъ де́нь зижди́телѧ своегѡ̀, и҆ и҆спо́лнь быва́етъ ра́дости дх҃о́вныѧ: сего̀ ᲂу҆́бѡ, ᲂу҆ма̀ пра́востїю чтꙋ́ще, ᲂу҆блажи́мъ всѝ, ꙗ҆́кѡ хрⷭ҇то́ва бжⷭ҇твенна пра́ѻц҃а.
Ви́дѣлъ є҆сѝ, ꙗ҆́коже є҆́сть мо́щно человѣ́кꙋ ви́дѣти, трⷪ҇цꙋ, и҆ тꙋ́ю ᲂу҆гости́лъ є҆сѝ, ꙗ҆́кѡ дрꙋ́гъ при́сный, преблаже́нне а҆враа́ме: тѣ́мже мздꙋ̀ прїѧ́лъ є҆сѝ стра́ннагѡ гоще́нїѧ, є҆́же бы́ти тебѣ̀ безчи́сленныхъ ꙗ҆зы́кѡвъ ѻ҆ц҃ꙋ̀ вѣ́рою.
Бг҃оро́диченъ:
По́лный и҆стощава́етсѧ пло́тїю на́съ ра́ди, и҆ нача́ло безнача́льный прїе́млетъ: ѡ҆бнищева́етъ же бога́тый, и҆ сло́во сы́й бг҃ъ, въ ꙗ҆́слѣхъ безслове́сныхъ возлежи́тъ, ꙗ҆́кѡ младе́нецъ, воззва́нїе всѣ́хъ сꙋ́щихъ ѿ вѣ́ка содѣ́ловаѧ.
Катава́сїа: Бг҃ъ сы́й ми́ра:
Пѣ́снь ѕ҃. І҆рмо́съ:
Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ, ꙗ҆́кѡ петро́ви: ѽ ᲂу҆пра́вителю! и҆ спасѝ.
Ѡ҆блада́вше дꙋше́вными страстьмѝ си́лою сло́ва, страны̀ ꙗ҆зы̑къ халде́йскихъ вла́стели бы́сте: вѣ́сть бо добродѣ́тель че́сть дарова́ти стѧжа́вшымъ ю҆̀, ѽ дв҃довы мꙋ́дрїи внꙋ́цы!
Въ ме́ртвость данїи́лъ живоно́снꙋю ѡ҆дѣ́ѧвсѧ дре́вле, ꙗ҆́кѡ бг҃а халде́ємъ ѕлочести́внѡ мни́маго, ᲂу҆бива́етъ снѣ́дїю ѕмі́ѧ ѕлѣ́йшаго. свѧще́нники же ѕлочести̑выѧ мꙋ́дрѣ ᲂу҆би́лъ є҆́сть.
Бг҃оро́диченъ:
Млⷭ҇тива мѝ сꙋдїю̀ сн҃а твоего̀, бцⷣе дв҃о, твои́ми моли́твами бы́ти въ де́нь сꙋда̀, и҆зба́вителѧ же лю́тыхъ, мт҃и, ᲂу҆молѝ: на тѧ́ бо є҆ди́нꙋ наде́ждꙋ мою̀ возлага́ю.
И҆́нъ. І҆рмо́съ:
И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее, про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Ѻ҆́бразъ хрⷭ҇то́вы стрⷭ҇ти бы́лъ є҆сѝ ꙗ҆́вѣ, і҆саа́че преблаже́нне, возводи́мь ѻ҆́ч҃имъ бл҃гопокоре́нїемъ, є҆́же закала́тисѧ. сегѡ̀ ра́ди ᲂу҆блажи́лсѧ є҆сѝ, и҆ ра́бъ бж҃їй вои́стиннꙋ ꙗ҆ви́лсѧ є҆сѝ бли́жнїй, со всѣ́ми пра́ведными вселѧ́ѧсѧ.
Ꙗ҆ви́сѧ і҆а́кѡвъ ᲂу҆го́дникъ вѣ́рнѣйшїй всѣ́хъ бг҃а: тѣ́мже и҆ бра́сѧ со а҆́гг҃ломъ, ᲂу҆́мъ зрѧ̀ бг҃а нарече́сѧ, и҆ спѧ̀, бжⷭ҇твеннꙋю лѣ́ствицꙋ ви́дѣ, на не́йже бг҃ъ ᲂу҆твержда́шесѧ, пло́тїю ѡ҆бложи́выйсѧ за благосты́ню.
Любѧ̀ і҆ѡ́сифъ ко ѻ҆ц҃ꙋ̀ благопокоре́нїе, въ ро́въ вве́рженъ, продаде́сѧ во ѻ҆́бразъ закла́ннагѡ и҆ въ ро́вѣ положе́ннагѡ хрⷭ҇та̀: пшеницода́вецъ же є҆гѵ́пта бы́сть, цѣломꙋ́дръ бы́въ и҆ пра́веденъ, ца́рь же страсте́й и҆́стиннѣйшїй.
Бг҃оро́диченъ:
Мла́до на землѝ ѻ҆троча̀ познава́етсѧ, сы́й со ѻ҆ц҃е́мъ при́снѡ и҆ дх҃омъ, пелена́ми же повива́етсѧ и҆́же зе́млю повива́ѧй мгло́ю ꙗ҆́вѣ, и҆ въ ꙗ҆́слѣхъ безслове́сныхъ возлежи́тъ. сегѡ̀ ны́нѣ предпра́зднꙋемъ ра́дꙋющесѧ безсѣ́менное ржⷭ҇тво̀.
Катава́сїа: И҆зъ ᲂу҆тро́бы і҆ѡ́нꙋ: Конда́къ, гла́съ ѕ҃:
Рꙋкопи́саннагѡ ѻ҆́браза не поче́тше, но неѡпи́саннымъ сꙋщество́мъ защити́вшесѧ, требл҃же́ннїи, въ по́двизѣ ѻ҆гнѧ̀, просла́вистесѧ: средѣ́ же пла́мене нестерпи́магѡ стоѧ́ще, бг҃а призва́сте: ᲂу҆скорѝ, ѽ ще́дрый, и҆ потщи́сѧ, ꙗ҆́кѡ млⷭ҇тивъ, въ по́мощь на́шꙋ, ꙗ҆́кѡ мо́жеши хотѧ́й.
І҆́косъ:
Прострѝ твою̀ рꙋ́кꙋ, є҆́юже дре́вле прїѧ́ша и҆скꙋше́нїе є҆гѵ́птѧне борю́щїи, и҆ є҆вре́є бори́мїи. не ѡ҆ста́ви на́съ, да не пожре́тъ на́съ сме́рть, жа́ждꙋщаѧ на́съ, и҆ сатана̀ ненави́дѧй на́съ, но прибли́жисѧ на́мъ, и҆ пощадѝ дꙋ́шы на́шѧ, ꙗ҆́коже пощади́лъ є҆сѝ и҆ногда̀ ѻ҆́троки твоѧ̑, сꙋ́щыѧ въ вавѷлѡ́нѣ, непреста́ннѡ сла́вѧщыѧ тѧ̀, и҆ вве́ржєнныѧ тебє̀ ра́ди въ пе́щь, и҆ ѿ сеѧ̀ вопїю́щыѧ тѝ: ᲂу҆скорѝ, ще́дрый, и҆ потщи́сѧ, ꙗ҆́кѡ ми́лостивъ на по́мощь на́шꙋ, ꙗ҆́кѡ мо́жеши хотѧ́й.
Пѣ́снь з҃. І҆рмо́съ:
Ѻ҆́троцы бг҃очести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ, глаго́люще: превозноси́мый ѻ҆ц҃є́въ и҆ на́съ бж҃е, бл҃гослове́нъ є҆сѝ.
Гла́съ бг҃олюбе́зенъ поѧ́шесѧ и҆зъ среды̀ ѻ҆гнѧ̀ вседержи́телю, а҆за́рїа бо бжⷭ҇твенный ли́къ соста́вивъ, пѣ́снь воспѣва́ѧ, глаго́лаше: бл҃гослове́нъ бг҃ъ ѻ҆тє́цъ на́шихъ.
Цѣвни́ца ю҆́ношей бг҃осло́вствꙋетъ всѣ́хъ бг҃а и҆ вседержи́телѧ, тѣ̑мъ въ пещѝ ꙗ҆́снѡ ꙗ҆́вльшагосѧ и҆ пѣ́снь воспѣва́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.
Трѝ въ пе́щь вве́ржєнныѧ ви́дѣвъ ца́рь, ꙗ҆́кѡ ᲂу҆зрѣ̀ четве́ртагѡ ви́дъ, сн҃а пронаречѐ бж҃їѧ, и҆ всѣ̑мъ возопѝ: бл҃гослове́нъ бг҃ъ ѻ҆ц҃ъ на́шихъ.
Бг҃оро́диченъ:
И҆мѣ́ѧ просвѣще́нъ бжⷭ҇твенною заре́ю ᲂу҆́мъ, данїи́ле бг҃облаже́нне, дв҃ы ржⷭ҇тво̀ ꙗ҆́вѣ предви́дѣлъ є҆сѝ, та́инственными ѻ҆́бразы ѡ҆бразꙋ́емо, бл҃гослове́нъ, вопїѧ̀, бж҃е ѻ҆ц҃ъ на́шихъ.
И҆́нъ. І҆рмо́съ:
Ѻ҆́троцы, благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене, стоѧ́ще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Да воспое́тсѧ а҆на́нїа, а҆за́рїа, мїсаи́лъ съ данїи́ломъ, пе́щь ᲂу҆гаси́вше ѻ҆́гненнꙋю, и҆ львѡ́въ ѡ҆бꙋзда́вше стремлє́нїѧ, и҆ хрⷭ҇тꙋ̀ согла́снѡ пою́ще: ѻ҆тцє́въ бж҃е, бл҃гослове́нъ є҆сѝ.
Зако́ннѡ пострада́въ въ напа́стехъ и҆ неѡсла́бныхъ ско́рбехъ, ᲂу҆го́дникъ нарече́сѧ і҆́ѡвъ бж҃їй всеи́стиннѣйшїй, кро́токъ, неѕло́бивъ, пра́въ, соверше́нъ, непоро́ченъ, вопїѧ̀: ѻ҆тцє́въ бж҃е, благослове́нъ є҆сѝ.
Вѣ́рою мѡѷсе́а, а҆арѡ́на же и҆ ѡ҆́ра почти́мъ, восхвалѧ́юще і҆исꙋ́са и҆ леѵі́ю свѧще́ннѣйшаго, гедеѡ́на же и҆ самѱѡ́на, и҆ взыва́емъ: ѻ҆тцє́въ бж҃е, бл҃гослове́нъ є҆сѝ.
Бг҃оро́диченъ:
Сѐ, ꙗ҆́коже проречѐ прⷪ҇ро́къ, во чре́вѣ зача̀ неискꙋсобра́чнаѧ бг҃а, и҆ роди́ти ꙗ҆́вѣ и҆́детъ въ верте́пѣ виѳлее́млѣ. є҆мꙋ́же всѝ пое́мъ: ѻ҆тцє́въ бж҃е, бл҃гослове́нъ є҆сѝ.
Катава́сїа: Ѻ҆́троцы благоче́стїю совоспита́ни:
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
А҆враа́мово благоро́дїе сохрани́ти тща́щесѧ, сво́йственное къ немꙋ̀ стѧжа́сте ѡ҆снова́нїе вѣ́ры и҆ наде́жды, преподо́бнїи, терпѣ́нїе и҆ напа́стемъ пожда́нїе, вопїю́ще: благослови́те, свѧще́нницы влⷣкꙋ, лю́дїе, превозноси́те є҆го̀ во вѣ́ки.
Ꙗ҆́кѡ свѣти̑ла просїѧ́вше, и҆ зе́млю ѡ҆небеси́вше, и҆ благоче́стїѧ просвѣще́нїемъ ѡ҆сїѧ́вшесѧ, всемі́рное соста́вльше ликостоѧ́нїе, пою́тъ ѿ напа́стей спа́сшемꙋ влⷣцѣ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Ю҆́ношески погаси́вше распали́мꙋю пе́щь, и҆ львѡ́въ чє́люсти загра́ждше дв҃дѡвы внꙋ́цы, ны́нѣ ра́дꙋющесѧ пою́тъ тѧ̀ бл҃годѣ́телѧ, цр҃ѧ̀ всѣ́хъ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Бг҃оро́диченъ:
Тайнонаꙋча́етъ, пречⷭ҇таѧ, данїи́лъ мꙋдрѣ́йшїй, и҆ предживописꙋ́ютъ ѻ҆́троцы трїѐ ржⷭ҇тво̀ твоѐ бг҃омꙋ́дреннїи, ѻ҆́бразы зрѧ́ще и҆зъ ᲂу҆тро́бы твоеѧ̀ проше́дшагѡ несказа́ннѡ: є҆го́же дѣ́ти благословѧ́тъ, свѧще́нницы воспѣва́ютъ, лю́дїе превозно́сѧтъ во всѧ̑ вѣ́ки.
И҆́нъ. І҆рмо́съ:
Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Дне́сь сꙋ́щихъ ѿ вѣ́ка бжⷭ҇твеннꙋю па́мѧть соверша́емъ честны́хъ ѻ҆тє́цъ, а҆да́ма, а҆́велѧ же, си́ѳа, и҆ нѡ́а, и҆ є҆нѡ́са, и҆ є҆нѡ́ха, и҆ а҆враа́ма, мелхїседе́ка и҆ і҆́ѡва, і҆саа́ка и҆ вѣ́рнагѡ і҆а́кѡва: да благослови́тъ тва́рь, вопїю́ще, гдⷭ҇а, и҆ превозно́ситъ во всѧ̑ вѣ́ки.
По́лкъ бг҃окра́сный бжⷭ҇твенныхъ ѻ҆тє́цъ да восхва́лимъ, вара́ка, и҆ наѳа́на, и҆ є҆леаза́ра, і҆ѡсі́ю, и҆ дв҃да, і҆ефѳа́ѧ, самꙋи́ла же, прє́днѧѧ зрѧ́ща че́стнѣ, и҆ взыва́юща: да благослови́тъ тва́рь всѧ̀ гдⷭ҇а и҆ превозно́ситъ є҆го̀ во вѣ́ки.
Похвалꙋ̀ пѣснопѣ́сненнѡ да принесе́мъ бж҃їимъ прⷪ҇ро́кѡмъ, восхвалѧ́юще і҆ѡсі́ю, и҆ мїхе́а, софо́нїа, и҆ а҆ввакꙋ́ма, заха́рїю, и҆ і҆ѡ́нꙋ, а҆гге́а же, и҆ а҆мѡ́са, и҆ со а҆вді́емъ малахі́ю, и҆ наꙋ́ма, и҆са́їю и҆ і҆еремі́ю, и҆ і҆езекі́илѧ, кꙋ́пнѡ данїи́ла, и҆лїю̀ и҆ є҆лїссе́а.
Глаго́лы трⷪ҇ческими всест҃ꙋ́ю воспое́мъ, вѣ́рнїи, трⷪ҇цꙋ, ѻ҆ц҃а̀ безнача́льнаго, сн҃а же и҆ пра́ваго дх҃а ст҃а́го, є҆ди́ницꙋ трїѷпоста́снꙋю, ю҆́же всѧ́кое дыха́нїе сла́витъ, зовꙋ́ще: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Ꙗ҆ви́лсѧ є҆сѝ ѿ дѣ́вственныхъ, хрⷭ҇тѐ, крове́й, воплоща́емь неизрече́ннымъ сло́вомъ, и҆ ꙗ҆́кѡ млⷣнецъ соверше́нъ въ верте́пѣ, премно́жествомъ бл҃гоꙋтро́бїѧ, і҆и҃се, ражда́ѧсѧ: ѕвѣзда́ же тѧ̀ и҆здале́ча возвѣстѝ ѕвѣздосло́вцємъ, по́йте, вѣ́рою зовꙋ́щымъ, и҆ превозноси́те хрⷭ҇та̀ во вѣ́ки.
Катава́сїа: Чꙋ́да преесте́ственнагѡ:
Пѣ́снь ѳ҃. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чи́стаѧ, съ безпло́тными ли́ки тѧ̀ велича́юще.
Достиго́сте кончи́нꙋ жела́емꙋю, и҆ жела́нїй кра́йнѣйшемꙋ предстоитѐ въ нбⷭ҇ныхъ черто́зѣхъ, ѻ҆́троцы всеблаже́ннїи.
Ра́дꙋющесѧ рꙋкоѧ́тїе, є҆́же ѿ сле́зъ, до́брагѡ ва́шегѡ земледѣ́ланїѧ прїѧ́сте, нетлѣ́нїѧ кла́съ плодоноси́вше.
Возсїѧ̀ свѣ́тлость ны́нѣ ва́мъ досто́йнѡ, и҆ весе́лїе се́рдца процвѣтѐ: ѿѻнꙋ́дꙋже бо ѿбѣжѐ печа́ль, всели́стесѧ.
Бг҃оро́диченъ:
Па́жить сме́ртнꙋю ᲂу҆ста́вила є҆сѝ, дв҃о, жизнода́вца ро́ждши и҆ гдⷭ҇а, животворѧ́щаго вѣ́рою велича́ющыѧ тѧ̀.
И҆́нъ. І҆рмо́съ:
Та́инство стра́нное ви́жꙋ и҆ пресла́вное: не́бо, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же, воспѣва́юще, велича́емъ.
Крѣ́постїю твое́ю дре́вле си̑лы сотвори́ша дщє́ри, гдⷭ҇и, а҆́нна, и҆ і҆ꙋді́ѳъ, и҆ девѡ́ра, ѻ҆лда̀, і҆аи́ль же, є҆сѳи́рь, са́рра, марїа́мъ же мѡѷсе́ева, рахи́ль и҆ реве́кка и҆ рꙋ́ѳь, велемꙋ̑дрыѧ.
Ꙗ҆́кѡ ᲂу҆гаси́вшыѧ ѻ҆́троки ст҃ы̑ѧ пе́щь, свѧще́ннѡ почти́мъ, кꙋ́пнѡ съ данїи́ломъ прⷪ҇ро́комъ, и҆ всѣ́ми пра́ведными ꙗ҆́вѣ, пре́жде зако́на ѡ҆блиста́вшими до́брѣ и҆ въ зако́нѣ влⷣцѣ ᲂу҆годи́вшими.
Премꙋ́дрїи бжⷭ҇твеннїи прⷪ҇ро́цы бы́вше а҆враа́мѡвы внꙋ́цы, є҆́же ѿ а҆враа́ма и҆ і҆ꙋ́ды ро́ждшеесѧ сло́во бж҃їе провозвѣсти́ша дх҃омъ: тѣ́хъ мольба́ми, і҆и҃се, всѧ̑ ᲂу҆ще́дри.
Ѡ҆свѧти́сѧ всѧ̀ тва́рь па́мѧтїю ва́шею, и҆ торжествꙋ́ющи зове́тъ, ра́бски вопїю́щи: мольбꙋ̀ гдⷭ҇ꙋ при́снѡ принеси́те, блаже́ннїи, ᲂу҆лꙋчи́ти вѣ́чныхъ бла̑гъ благохва́лѧщымъ ва́съ.
Бг҃оро́диченъ:
Ѡ҆блекі́йсѧ въ мѧ̀, ѿ дв҃ы предгрѧде́тъ, и҆ въ верте́пѣ ражда́етсѧ сло́во ѻ҆́ч҃ее несли́тнѡ: ликꙋ́й тва́рь, гла́сы благода́рственными велича́ющи, тогѡ̀ є҆́же за милосе́рдїе всест҃о́е снизше́ствїе.
Катава́сїа: Та́инство стра́нное: Свѣти́ленъ воскрⷭ҇нъ.
Сла́ва, пра́ѻц҃євъ. Подо́бенъ: Жєны̀ ᲂу҆слы́шите:
А҆да́ма восхва́лимъ, а҆́велѧ, си́ѳа и҆ є҆нѡ́са, є҆нѡ́ха и҆ нѡ́а: а҆враа́ма, і҆саа́ка и҆ і҆а́кѡва: мѡѷсе́а, і҆́ѡва и҆ а҆арѡ́на: є҆леаза́ра и҆ і҆исꙋ́са: вара́ка, самѱѡ́на и҆ і҆ефѳа́ѧ: дв҃да и҆ соломѡ́на.
И҆ ны́нѣ:
Со́лнце вели́кое, созда́тель ѿ неискꙋсомꙋ́жныѧ дв҃ы, ꙗ҆́же ѿ а҆да́ма просвѣти́ти въ виѳлее́мъ тщи́тсѧ. тѣ́мже возвѣща́етъ чꙋ́до пра̑ѻц҃ъ, всесвѣтлѣ́йшаѧ па́мѧть.
На хвали́техъ стїхи̑ры воскрⷭ҇ны, д҃: и҆ ст҃ы́хъ пра́ѻц҃євъ д҃, гла́съ в҃.
Подо́бенъ: До́ме є҆ѵфра́ѳовъ:
Всѝ честны́хъ ны́нѣ пра́ѻтєцъ ꙳ па́мѧть соверша́емъ, ꙳ пою́ще бг҃оꙋго́дное си́хъ житїѐ, ꙳ є҆гѡ́же ра́ди возвели́чишасѧ.
Два́жды.
Сті́хъ: Бл҃гослове́нъ є҆сѝ, гдⷭ҇и бж҃е ѻ҆ц҃ъ на́шихъ, и҆ хва́льно, и҆ просла́влено и҆́мѧ твоѐ во вѣ́ки.
Оу҆гаси́ша си́лꙋ ꙳ ѻ҆́троцы ѻ҆́гненнꙋю, ꙳ ликꙋ́юще посредѣ̀ пе́щи, ꙳ и҆ пою́ще ꙳ бг҃а всеси́льнаго.
Сті́хъ: Ꙗ҆́кѡ пра́веденъ є҆сѝ ѡ҆ всѣ́хъ, ꙗ҆̀же сотвори́лъ є҆сѝ на́мъ.
Въ ро́вѣ заключе́нъ, ꙳ ѕвѣрє́мъ соѻбита́тель, ꙳ данїи́лъ прⷪ҇ро́къ, ꙳ неприча́стенъ си́хъ ꙳ показа́сѧ ѡ҆ѕлобле́нїѧ.
Сла́ва, гла́съ з҃. Ге́рманово:
Прїиди́те всѝ, вѣ́рнѡ торжествꙋ́имъ, пре́жде зако́на ѻ҆ц҃ъ, а҆враа́ма и҆ сꙋ́щихъ съ ни́мъ, лѣ́тнюю па́мѧть. і҆ꙋ́дово пле́мѧ досто́йнѡ почти́мъ, и҆̀же въ вавѷлѡ́нѣ ѻ҆́троки ᲂу҆гаси́вшыѧ пе́щный пла́мень, ꙗ҆́кѡ трⷪ҇цы ѻ҆́бразъ, съ данїи́ломъ восхва́лимъ, проро́чєскаѧ проречє́нїѧ и҆звѣ́стнѡ держа́ще, со и҆са́їемъ велегла́снѡ возопїи́мъ: сѐ дв҃а во чре́вѣ прїи́метъ, и҆ роди́тъ сн҃а є҆мманꙋ́ила, и҆́же є҆́сть съ на́ми бг҃ъ.
И҆ ны́нѣ, бг҃оро́диченъ: Пребл҃гослове́нна є҆сѝ:
Славосло́вїе вели́кое. Є҆ктєнїѝ, и҆ ѿпꙋ́стъ: и҆ стїхи́ра є҆ѵⷢ҇льскаѧ. Ча́съ а҃-й, и҆ коне́чный ѿпꙋ́стъ.
На лїтꙋргі́и бл҃жє́нна ѻ҆ктѡ́иха, на ѕ҃: пра́ѻц҃євъ пѣ́снь г҃, на д҃. По вхо́дѣ тропа́рь воскрⷭ҇нъ, и҆ пра́ѻц҃євъ: Сла́ва, и҆ ны́нѣ, конда́къ пра́ѻц҃євъ. Прокі́менъ, пѣ́снь ѻ҆ц҃є́въ, гла́съ д҃: Бл҃гослове́нъ є҆сѝ, гдⷭ҇и бж҃е ѻ҆ц҃ъ на́шихъ, и҆ хва́льно и҆ просла́влено и҆́мѧ твоѐ во вѣ́ки. Сті́хъ: Ꙗ҆́кѡ пра́веденъ є҆сѝ ѡ҆ всѣ́хъ: А҆пⷭ҇лъ пра́ѻц҃євъ, къ колосса́ємъ, зача́ло сн҃з. А҆ллилꙋ́їа, гла́съ д҃: Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋи́лъ въ призыва́ющихъ и҆́мѧ є҆гѡ̀. Є҆ѵⷢ҇лїе лꙋкѝ, зача́ло ѻ҃ѕ. Прича́стенъ: Хвали́те гдⷭ҇а съ нб҃съ: Дрꙋгі́й: Ра́дꙋйтесѧ, пра́веднїи ѡ҆ гдⷭ҇ѣ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.