← претходни дан | Минеј — Децембар | следећи дан →
5 декабря: Преподобного Саввы Освященного.
Мѣ́сѧца тогѡ́же въ є҃-й де́нь.
Прпⷣбнагѡ и҆ бг҃оно́снагѡ ѻ҆тца̀ на́шегѡ са́ввы ѡ҆свѧще́ннагѡ.
На ма́лѣй вече́рни, стїхи̑ры на д҃. Гла́съ а҃. Поⷣ: Всехва́льнїи мч҃ницы:
Зри́тель бы́лъ є҆сѝ ᲂу҆мо́мъ мы́сленныхъ си́лъ, ꙳ ꙗ҆́кѡ дѣ́теленъ бжⷭ҇твенныхъ слове́съ, ꙳ полага́ѧ во твое́мъ се́рдцѣ: ꙳ въ не́мже и҆ восхождє́нїѧ, ꙳ ꙗ҆́кѡ лѣ́ствицꙋ ᲂу҆тверди́лъ є҆сѝ, ꙳ преподо́бне са́вво, ѻ҆́ч҃е на́шъ. ꙳ и҆ ны́нѣ моли́сѧ ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Два́жды.
Са́вво прпⷣбнѣйше, ꙳ твою̀ и҆зъ младе́нства ꙳ возложи́лъ є҆сѝ жи́знь хрⷭ҇тꙋ̀ бг҃ꙋ на́шемꙋ: ꙳ ѿ негѡ́же ᲂу҆крѣплѧ́емь, ꙳ плотскі̑ѧ стра̑сти по́мыслꙋ повинꙋ́лъ є҆сѝ, ꙳ хꙋ́ждшее покарѧ́ѧ лꙋ́чшемꙋ. ꙳ тѣ́мже моли́сѧ ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Бг҃омꙋ́дре ѻ҆́ч҃е на́шъ, ꙳ свѣти́льникъ ꙗ҆ви́лсѧ є҆сѝ велича́йшїй, ꙳ просвѣща́ѧ подсо́лнечнꙋю чꙋде́съ сїѧ́ньми, ꙳ и҆ бжⷭ҇твенными дѣ́лы. ꙳ тѣ́мже по ᲂу҆спе́нїи ꙳ незаходи́мый тѧ̀ свѣ́тъ прїѧ́тъ. ꙳ и҆ ны́нѣ моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Сла́ва, гла́съ в҃:
Прпⷣбне ѻ҆́ч҃е, и҆зъ младе́нства добродѣ́тели прилѣ́жнѡ ѡ҆бꙋчи́всѧ, ѻ҆рга́нъ бы́лъ є҆сѝ ст҃а́гѡ дх҃а: и҆ ѿ негѡ̀ прїе́мъ чꙋде́съ дѣ́йство, ᲂу҆вѣща́лъ є҆сѝ человѣ́ки преѡби́дѣти сла̑дкаѧ. ны́нѣ же бжⷭ҇твеннымъ свѣ́томъ чистѣ́йше ѡ҆сїѧва́емь, просвѣтѝ и҆ на́шѧ мы̑сли, са́вво, ѻ҆́ч҃е на́шъ.
И҆ ны́нѣ, бг҃оро́диченъ:
Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ подъ кро́вомъ твои́мъ.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Ꙗ҆ви́лсѧ є҆сѝ ꙳ ѿ ма́тернихъ пеле́нъ, ꙳ бг҃оно́се ѻ҆́ч҃е на́шъ, ꙳ ѡ҆свѧще́нный сосꙋ́дъ, ꙳ и҆ до́мъ всест҃а́гѡ дх҃а.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Носѧ̀ на ра́мѣхъ твои́хъ ꙳ крⷭ҇тъ гдⷭ҇ень, ꙳ де́мѡнскаѧ мечта̑нїѧ, ꙳ ѻ҆́ч҃е на́шъ са́вво, ꙳ до конца̀ и҆стреби́лъ є҆сѝ.
Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Лє́сти лꙋка́выхъ де́мѡнѡвъ ꙳ ѡ҆бличи́въ крⷭ҇та̀ си́лою, ꙳ ᲂу҆ѧсни́лъ же є҆сѝ ꙳ сла́вꙋ хрⷭ҇то́вꙋ, ꙳ са́вво, ѻ҆́ч҃е на́шъ.
Сла́ва, и҆ ны́нѣ, бг҃оро́диченъ, подо́бенъ то́йже:
Влⷣчце бл҃га́ѧ, ꙳ ст҃ы̑ѧ твоѧ̑ рꙋ́ки ꙳ къ сн҃ꙋ твоемꙋ̀ вознесѝ, ꙳ дꙋшелюби́вомꙋ содѣ́телю, ꙳ ᲂу҆ще́дрити рабы̑ твоѧ̑.
Тропа́рь, гла́съ и҃:
Сле́зъ твои́хъ тече́ньми пꙋсты́ни безпло́дное воздѣ́лалъ є҆сѝ, и҆ и҆̀же и҆зъ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдєсы̀, са́вво, ѻ҆́ч҃е на́шъ: молѝ хрⷭ҇та̀ бг҃а спасти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: И҆́же на́съ ра́ди рожде́йсѧ:
На вели́цѣй вече́рни, Блаже́нъ мꙋ́жъ, а҃-й а҆нтїфѡ́нъ.
На Гдⷭ҇и, воззва́хъ, стїхи̑ры на и҃, гла́съ є҃. Поⷣ: Прпⷣбне ѻ҆́ч҃е:
Са́вво бг҃омꙋ́дре, а҆́гг҃лѡвъ равностоѧ́телю, є҆диносе́льниче прпⷣбныхъ, собесѣ́дниче прⷪ҇ро́кѡвъ, мꙋ́ченикѡвъ и҆ а҆пⷭ҇лѡвъ снаслѣ́дниче, во свѣ́тѣ невече́рнѣмъ ны́нѣ ѡ҆бита́ѧй. є҆гѡ́же лꙋча́ми сїѧ́ѧ бжⷭ҇твенными, кра́йнѣйшимъ жела́нїемъ, є҆мꙋ́же предстоѧ̀ со дерзнове́нїемъ, просвѣще́нъ и҆ наслажда́ѧсѧ тогѡ̀ видѣ́ньми, и҆ пита́ѧсѧ тогѡ̀ добро́тами непреста́ннѡ, хрⷭ҇та̀ молѧ̀, хрⷭ҇та̀ ᲂу҆молѝ, прпⷣбне, дарова́ти цр҃кви є҆диномышле́нїе, ми́ръ и҆ ве́лїю ми́лость.
Са́вво бг҃омꙋ́дре, воздержа́нїѧ свѣти́ло неꙋгаси́мое, свѣти́льниче мона́шествꙋющихъ пресвѣ́тлѣйшее, любвѐ лꙋча́ми просвѣща́емь, сто́лпе непрекло́нный терпѣ́нїѧ, ᲂу҆твержде́нїе и҆ си́ла вѣ́рою тѧ̀ чтꙋ́щихъ, и҆сцѣле́нїй сокро́вище, жи́телю пꙋсты́нный ꙗ҆́кѡ вои́стиннꙋ, ꙗ҆́кѡ ра́й сїю̀ бжⷭ҇твенный показа́въ, бжⷭ҇твєнныѧ плоды̀ приносѧ́щꙋ спаса́емыхъ, хрⷭ҇та̀ молѧ̀, хрⷭ҇та̀ ᲂу҆молѝ, прпⷣбне, дарова́ти цр҃кви є҆диномышле́нїе, ми́ръ и҆ ве́лїю ми́лость.
Са́вво бг҃омꙋ́дре, добродѣ́телей сто́лпе ѻ҆́гненный, свѣти́льниче, и҆́же, и҆зъ мо́рѧ мїрска́гѡ лю́ди къ приста́нищꙋ бжⷭ҇твенномꙋ наставлѧ́ѧ, пре́лести дꙋ́ха низложи́вый, дх҃а ст҃а́гѡ чи́стое прїѧ́телище, наста́вниче мона́шествꙋющихъ, и҆звѣ́стнаѧ мѣ́ра воздержа́нїѧ, смире́нїѧ свѣ́тлаѧ высото̀, и҆сто́чниче, точа́щїй врачева́нїй пꙋчи́нꙋ, хрⷭ҇та̀ молѧ̀, хрⷭ҇та̀ ᲂу҆молѝ, прпⷣбне, дарова́ти цр҃кви є҆диномышле́нїе, ми́ръ и҆ ве́лїю ми́лость.
Сла́ва, гла́съ ѕ҃:
Є҆́же по ѻ҆́бразꙋ соблю́дъ невреди́мѡ, ᲂу҆́мъ влады́кꙋ на стра̑сти па̑гꙋбныѧ по́стнически поста́вивъ, во є҆́же по подо́бїю, ꙗ҆́кѡ мо́щно, возше́лъ є҆сѝ: мꙋ́жески бо є҆стество̀ понꙋ́дивъ, потща́лсѧ є҆сѝ хꙋ́ждшее покори́ти лꙋ́чшемꙋ, и҆ пло́ть порабо́тити дꙋ́хꙋ. тѣ́мже мона́шествꙋющихъ ꙗ҆ви́лсѧ є҆сѝ ве́рхъ, жи́тель пꙋсты́нный, благотекꙋ́щихъ ѡ҆бꙋчи́тель, пра́вило добродѣ́тели и҆звѣ́стнѣйшее. и҆ ны́нѣ на нб҃сѣ́хъ, зерца́лѡмъ разрѣ́шшымсѧ, ѻ҆́ч҃е на́шъ са́вво, чи́стѣ зри́ши ст҃ꙋ́ю трⷪ҇цꙋ, молѧ́сѧ несре́дственнѣ ѡ҆ и҆̀же вѣ́рою и҆ любо́вїю чтꙋ́щихъ тѧ̀.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
Вхо́дъ. Прокі́менъ днѐ. Чтє́нїѧ г҃.
Премꙋ́дрости соломѡ́ни чте́нїе.
[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѡ҆ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Глава̀ є҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ: и҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.
Премꙋ́дрости соломѡ́ни чте́нїе.
[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи́ра хра́ма: И҆ ст҃а́гѡ самогла́сны, гла́съ в҃:
По́стническое ѡ҆бꙋче́нїе собра́въ на землѝ, прпⷣбне са́вво, и҆ страсте́й прилѡ́ги тече́нїемъ сле́зъ твои́хъ всѧ̑ притꙋпи́лъ є҆сѝ: лѣ́ствице бжⷭ҇твеннаѧ и҆ честна́ѧ, на нб҃о возводѧ́щаѧ, всѣ̑мъ позна́сѧ бг҃опрїѧ́тное житїѐ твоѐ: бл҃гоче́стїѧ бо плоды̀ въ не́мъ показа́въ, врачꙋ́еши и҆́ми не́мѡщи страсте́й вѣ́рнѡ вопїю́щихъ тѝ: ра́дꙋйсѧ, восто́чнаѧ ѕвѣздо̀ златоза́рнѣйшаѧ, и҆ мона́шествꙋющихъ лампа́до свѣ́тлаѧ, и҆ па́стырю: ра́дꙋйсѧ, приснопѣва́емый, пꙋсты́нное ѕѣлѡ̀ добрѣ́йшее воспита́нїе и҆ цр҃кве непоколеби́мое ᲂу҆твержде́нїе: ра́дꙋйсѧ, заблꙋ́ждшихъ вели́кїй пꙋтево́жде: ра́дꙋйсѧ, на́ша хвало̀, и҆ вселе́нныѧ свѣ́тлое ра́дованїе.
На землѝ а҆́гг҃ла и҆ на нб҃сѣ́хъ человѣ́ка бж҃їѧ, мі́ра благокрасо́тство, сла́дость благи́хъ и҆ добродѣ́телей по́стническихъ похвалꙋ̀, са́ввꙋ да почти́мъ: насажде́нъ бо въ домꙋ̀ бж҃їи процвѣтѐ пра́веднѡ и҆, ꙗ҆́кѡ ке́дръ въ пꙋсты́ни, ᲂу҆мно́жи па́ствꙋ хрⷭ҇то́вꙋ слове́сныхъ ѻ҆ве́цъ, въ прпⷣбїи и҆ пра́вдѣ.
И҆́же є҆ди́нъ на ст҃ы́хъ ѡ҆почива́ѧй бг҃ъ, ѡ҆свѧще́ннꙋю дꙋ́шꙋ твою̀ чи́стое ѡ҆брѣ́тъ жили́ще, въ ню̀ всели́сѧ, и҆ бжⷭ҇твенныхъ бл҃года́тей сїю̀ и҆спо́лни, и҆́миже ко свѣ́тꙋ наставлѧ́еши пою́щихъ тѧ̀, ѡ҆сщ҃е́нный са́вво бл҃же́нне.
Сла́ва, гла́съ в҃:
Є҆́же па́че ᲂу҆ма̀ благи́хъ прїе́мъ жела́нїе, всѧ̑ ꙗ҆̀же въ мі́рѣ кра̑снаѧ презрѣ́лъ є҆сѝ, бг҃опрїѧ́тне: ѿтꙋ́дꙋ бо плодо́мъ не запѧ́лсѧ є҆сѝ, ꙗ҆́коже а҆да́мъ: ѕмі́ѧ же ѿрази́въ воздержа́нїемъ, а҆́гг҃льски житїѐ пожи́лъ є҆сѝ. и҆ ны́нѣ на нб҃сѣ́хъ водворѧ́ешисѧ, наслажда́ѧсѧ дре́ва жи́зненнагѡ, бг҃а молѧ̀ ѡ҆ на́съ, вѣ́рнѡ соверша́ющихъ, ѡ҆свѧще́нне са́вво, па́мѧть твою̀.
И҆ ны́нѣ, бг҃оро́диченъ: Ѽ чꙋдесѐ но́вагѡ!
На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:
Ра́дꙋйсѧ, по́стническихъ вои́стиннꙋ подвигѡ́въ благово́нный сосꙋ́де: крⷭ҇тъ бо на ра́мо взе́мъ, и҆ влⷣцѣ хрⷭ҇тꙋ̀ себѐ, всебл҃же́нне, возложи́въ, пло́ти попра́лъ є҆сѝ долꙋвлекꙋ́щее мꙋдрова́нїе: добродѣ́тельми же дꙋ́шꙋ просвѣти́лъ є҆сѝ, и҆ къ бжⷭ҇твенномꙋ впери́лсѧ є҆сѝ жела́нїю. тѣ́мъ всесвѧтꙋ́ю твою̀ ѡ҆крꙋжи́вше ра́кꙋ, всехва́льне са́вво, бжⷭ҇твеннагѡ чл҃вѣколю́бїѧ про́симъ полꙋчи́ти твои́ми моли́твами, и҆ мі́рꙋ дарова́ти ве́лїю ми́лость.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Оу҆́гль бг҃осїѧ́ненъ ѻ҆гню̀ прибли́живсѧ, бг҃оно́се, дх҃а, показа́лсѧ є҆сѝ въ мі́рѣ, са́вво, просвѣща́ѧ дꙋ́шы, вѣ́рнѡ, бг҃омꙋ́дре, пристꙋпа́ющихъ къ тебѣ̀, къ свѣ́тꙋ пꙋтеводѧ̀ ты́ѧ невече́рнемꙋ, прпⷣбне: пꙋсты́нное же, ѡ҆роша́емь свы́ше бжⷭ҇твенною бл҃года́тїю, ᲂу҆вѧди́лъ є҆сѝ ᲂу҆́глїе. тѣ́мъ и҆ побѣ́ды тебѣ̀ проѧвле́ннѡ дарова̀ вѣне́цъ, бл҃же́нне, бжⷭ҇твенныѧ пра́вды строи́тель хрⷭ҇то́съ: є҆го́же молѝ, дарова́ти дꙋша́мъ на́шымъ ве́лїю ми́лость.
Сті́хъ: Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Лѣ́ствица небомѣ́рнаѧ ꙗ҆́вѣ житїѐ твоѐ бы́сть, бг҃омꙋ́дре, є҆́юже на высотꙋ̀ возвы́силсѧ є҆сѝ, и҆ влⷣцѣ хрⷭ҇тꙋ̀ бесѣ́довати, всебл҃же́нне, сподо́билсѧ є҆сѝ: ᲂу҆́мъ просвѣти́въ та́мѡ сꙋ́щими ѡ҆сїѧ̑нїи, лꙋча́ми же тогѡ̀ просвѣща́емь, равноа́гг҃льнꙋ прїѧ́лъ є҆сѝ свѣ́тлость. є҆мꙋ́же и҆ ны́нѣ предстоѧ̀, моли́сѧ, преподо́бне, соверша́ющыѧ бжⷭ҇твеннꙋю и҆ всесвѧще́ннꙋю па́мѧть твою̀ съ тобо́ю предста́вити, и҆ мі́рꙋ дарова́ти ве́лїю ми́лость.
Сла́ва, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ са́вво: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ, хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇ꙋ, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ: Безневѣ́стнаѧ дв҃о:
Тропа́рь ст҃а́гѡ два́жды, пи́санъ на ма́лѣй вече́рни.
И҆ Бцⷣе дв҃о: є҆ди́ножды.
На ᲂу҆́трени, на Бг҃ъ гдⷭ҇ь: Тропа́рь ст҃а́гѡ два́жды. Сла́ва, и҆ ны́нѣ: бг҃оро́диченъ, воскрⷭ҇нъ.
По а҃ стїхосло́вїи сѣда́ленъ, гла́съ а҃. Поⷣ: Ли́къ а҆́гг҃льскїй:
Житїѐ благоче́стнѡ на землѝ сконча́въ, прїѧ́телище чи́стое ты̀ дх҃а ꙗ҆ви́лсѧ є҆сѝ, просвѣща́ѧ вѣ́рою къ тебѣ̀ притека́ющыѧ, блаже́нне: тѣ́мже молѝ твоего̀ влⷣкꙋ, просвѣти́ти дꙋ́шы на́шѧ, воспѣва́ющихъ тѧ̀, са́вво, бг҃омꙋ́дре, ѻ҆́ч҃е на́шъ.
Два́жды.
Сла́ва, и҆ ны́нѣ, бг҃оро́диченъ:
Всѣ́хъ творца̀ и҆ бг҃а же и҆ содѣ́телѧ, всенепоро́чнаѧ, чⷭ҇таѧ, дх҃омъ бжⷭ҇твеннымъ въ ложесна́хъ зачала̀ є҆сѝ, и҆ безъ и҆стлѣ́нїѧ родила̀ є҆сѝ. є҆го́же сла́вѧще, тѧ̀ воспѣва́емъ, дв҃о, ꙗ҆́кѡ пала́тꙋ цр҃ѧ̀ всѣ́хъ, и҆ мі́ра защище́нїе.
По в҃-мъ стїхосло́вїи сѣда́ленъ, гла́съ д҃: Поⷣ: Ꙗ҆ви́лсѧ є҆сѝ дне́сь:
Возсїѧ́въ ꙗ҆́коже со́лнце, лꙋча́ми ѡ҆блиста́еши, прпⷣбне, всемꙋ̀ мі́рꙋ, далечесїѧ́тельными ᲂу҆чє́нїи твои́ми, чꙋ́дный са́вво свѣтоно́сче, прпⷣбныхъ похвало̀.
Два́жды.
Сла́ва, и҆ ны́нѣ, бг҃оро́диченъ:
Въ кро́въ тво́й, всечⷭ҇таѧ дв҃о, прибѣга́ющихъ на́съ мольбꙋ̀ прїе́мши, не преста́й молѧ́щи чл҃вѣколю́бца спастѝ рабы̑ твоѧ̑.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
И҆зъ ᲂу҆тро́бы ѡ҆свѧти́лсѧ є҆сѝ, ꙗ҆́кѡ вои́стиннꙋ свѧще́ннѣйшїй са́вво, и҆ на землѝ ꙗ҆́кѡ а҆́гг҃лъ пожи́лъ є҆сѝ: пло́ть бо ᲂу҆мертви́лъ є҆сѝ воздержа́нїемъ, є҆ѵѳѵ́мїа бо вели́кагѡ нра́вꙋ досто́йнѡ поревнова́лъ є҆сѝ, и҆ трⷪ҇цы показа́лсѧ є҆сѝ ᲂу҆го́дникъ, блаже́нне. тѣ́мже и҆ къ ре́вности бжⷭ҇твеннагѡ твоегѡ̀ житїѧ̀ ли́ки совокꙋпи́лъ є҆сѝ мона́шествꙋющихъ, приснопа́мѧтне, бг҃оно́се ѻ҆́ч҃е на́шъ, моли́сѧ хрⷭ҇тꙋ̀ бг҃ꙋ грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Нбⷭ҇нꙋю две́рь и҆ кївѡ́тъ, всест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ѧсѧ мі́ра, и҆ ѡ҆ставле́нїе дре́внихъ согрѣше́нїй. сегѡ̀ ра́ди и҆ вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти бл҃гоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе лꙋкѝ, зача́ло к҃д.
По н҃-мъ ѱалмѣ̀ стїхи́ра, гла́съ ѕ҃:
Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ. тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ непоро́чнѡ поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
Канѡ́нъ прест҃ы́ѧ бцⷣы на ѕ҃, є҆гѡ́же краегране́сїе:
Пою̀ хвалꙋ̀ живоно́снѣй ѻ҆трокови́цѣ.
Гла́съ в҃. Пѣ́снь а҃. І҆рмо́съ:
Нетре́нꙋ, неѻбы́чнꙋ, немо́креннѡ морскꙋ́ю ше́ствовавъ стезю̀, и҆збра́нный вопїѧ́ше і҆и҃ль: гдⷭ҇еви пои́мъ, ꙗ҆́кѡ просла́висѧ.
Невеще́ственнаѧ дре́вле лѣ́ствица, и҆ стра́ннѡ ѡ҆лѧденѣ́вшїй пꙋ́ть мо́рѧ, твоѐ ꙗ҆влѧ́ше рождество̀, чⷭ҇таѧ: ю҆́же пое́мъ всѝ, ꙗ҆́кѡ просла́висѧ.
Си́ла вы́шнѧгѡ, ѵ҆поста́сь соверше́ннаѧ, бж҃їѧ мꙋ́дрость, вопло́щшаѧсѧ, пречⷭ҇таѧ, и҆зъ тебє̀ человѣ́кѡмъ бесѣ́дова, ꙗ҆́кѡ просла́висѧ.
Про́йде сквозѣ̀ две́рь непрохо́днꙋю заключе́нныѧ ᲂу҆тро́бы твоеѧ̀ пра́вды сл҃нце, чⷭ҇таѧ, и҆ мі́рꙋ возсїѧ̀, ꙗ҆́кѡ просла́висѧ.
Канѡ́нъ прпⷣбнагѡ на и҃, є҆гѡ́же краегране́сїе:
Всеизрѧ́днаго въ по́стницѣхъ са́ввꙋ любе́знѡ пою̀:
Творе́нїе ѳеофа́ново.
Гла́съ и҃. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.
Свѣтозаре́нїемъ ст҃а́гѡ дх҃а, са́вво, ѡ҆зарѝ благоче́стною любо́вїю пѣ́сньми восхвалѧ́ющыѧ тѧ̀, по́стникѡвъ похвалꙋ̀, мона́шествꙋющихъ сла́вꙋ, пꙋсты́ни ᲂу҆краси́телѧ, благоче́стїѧ ᲂу҆чи́телѧ.
Всю̀ любо́вь къ бг҃ꙋ возложи́въ ѿ ю҆́ности, и҆ къ немꙋ̀ ра́дꙋѧсѧ всѐ твоѐ жела́нїе и҆мѣ́ѧ, пло́ти движє́нїѧ, и҆ страсте́й нахо́ды воздержа́нїемъ ᲂу҆мертви́лъ є҆сѝ, са́вво бг҃оно́се всехва́льне.
Побѣди́въ плодо́мъ, сокрове́ннаго ѕмі́ѧ попра́лъ є҆сѝ, и҆ тогѡ̀ сѣ̑ти легкѡ̀ преминꙋ́лъ є҆сѝ, бг҃оче́стїѧ крилы̀ впери́всѧ, ѻ҆́ч҃е: жи́знь же ра́дꙋѧсѧ ѡ҆б̾ѧ́лъ є҆сѝ ѿ са́да крⷭ҇тнагѡ.
Просвѣща́емь свѣ́томъ благода́ти, во ѻ҆́гнь вше́лъ є҆сѝ, ꙗ҆́коже трїѐ ѻ҆́троцы пребы́лъ є҆сѝ неѡпале́нъ, бг҃ꙋ тѧ̀ сохра́ншꙋ, и҆ ꙗ҆влѧ́ющꙋ всѣ̑мъ бꙋ́дꙋщее тебѣ̀ преспѣ́ѧнїе, по́слѣжде, ѻ҆́ч҃е, и҆ соверше́нїе.
Бг҃оро́диченъ:
Неꙋде́ржными на на́съ сме́рть стремле́ньми ꙗ҆́тсѧ: но, твоемꙋ̀ рождествꙋ̀ прибли́жившисѧ, поги́бе, и҆ прирази́вшисѧ, ᲂу҆праздни́сѧ, бцⷣе дв҃о. жи́знь бо вои́стиннꙋ присносꙋ́щнꙋю воплоти́вшꙋюсѧ родила̀ є҆сѝ.
Катава́сїа: Спасѐ лю́ди чꙋдодѣ́йствꙋѧй влⷣка:
Пѣ́снь г҃. І҆рмо́съ:
Лꙋ́къ сокрꙋши́сѧ си́льныхъ держа́вою твое́ю, хрⷭ҇тѐ, и҆ си́лою немощствꙋ́ющїи препоѧ́сашасѧ.
И҆́же вре́мене внѣ̀ всѧ́кагѡ, ꙗ҆́кѡ време́нъ творе́цъ, и҆зъ тебє̀, дв҃о, во́льнѡ младе́нецъ созда́сѧ.
Чре́во простра́ншее небе́съ воспои́мъ, и҆́мже а҆да́мъ на нб҃сѣ́хъ ра́дꙋѧсѧ жи́тельствꙋетъ.
И҆́нъ. І҆рмо́съ:
Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче.
Оу҆́мъ влады́кꙋ надъ страстьмѝ, всебога́те, поста́вивъ, пода́тель пра́вды показа́лсѧ є҆сѝ, лꙋ́чшемꙋ бо ꙗ҆́вѣ хꙋ́ждшее повинꙋ́лъ є҆сѝ. тѣ́мже ꙗ҆́кѡ фі́нїѯъ, ѻ҆́ч҃е, въ пꙋсты́нѧхъ процвѣ́лъ є҆сѝ.
Послѣ́довати разꙋмѣ́въ стопа́мъ влⷣки, пресе́льникъ ѻ҆те́чества бы́лъ є҆сѝ, и҆ въ пꙋсты́ни ѡ҆бита́ѧ, побѣ́дꙋ воздви́глъ є҆сѝ на противобѡ́рныѧ, бжⷭ҇твенною си́лою ᲂу҆крѣплѧ́емь.
Тве́рдостїю ра́зꙋма, всеблаже́нне, ᲂу҆крѣплѧ́емь, разли̑чнаѧ вра̑жїѧ кова́рства ѡ҆бличи́лъ є҆сѝ, мꙋ́дре, и҆ всѣ̑мъ ꙗ҆ви́лъ є҆сѝ, и҆ горды́ню ѻ҆́нагѡ возвы́шеннꙋю низложи́лъ є҆сѝ.
Свѧще́нна тѧ̀ дꙋше́ю, и҆ простоты̀ и҆зволе́нїѧ добродѣ́тельми ᲂу҆кра́шена ви́дѧ, свѣтлѣ́йшаѧ ѕвѣзда̀ є҆ѵѳѵ́мїй прїѧ́тъ, проро́чески вѣща́ѧ твою̀, всеблаже́нне, свѣ́тлость.
Бг҃оро́диченъ:
Спаси́тельнагѡ на́съ ра́ди сло́ва строе́нїѧ свѣ́тлаѧ ты̀, мт҃и дв҃о две́рь позна́ласѧ є҆сѝ, вои́стиннꙋ: ты́ бо на́мъ ввела̀ є҆сѝ ᲂу҆́мнꙋю лꙋчꙋ̀ пребжⷭ҇твеннагѡ бж҃ества̀.
Катава́сїа: При́зри на пѣ̑нїѧ рабѡ́въ, бл҃годѣ́телю:
Сѣда́ленъ, гла́съ и҃. Подо́бенъ: Премꙋ́дрости:
Земна̑ѧ всѧ̑ ѡ҆ста́вивъ, въ мі́рѣ сы́й тѣле́снѡ, дꙋ́хомъ бы́лъ є҆сѝ а҆́гг҃лѡмъ соприча́стникъ: настоѧ́щыѧ бо стра̑сти тѣлє́сныѧ ᲂу҆мертви́въ, трⷪ҇цы показа́лсѧ є҆сѝ слꙋжи́тель, блаже́нне. тѣ́мже и҆ недꙋ́гꙋющихъ врачꙋ́еши стра̑сти, и҆ сло́вомъ дꙋ́хи ѿго́ниши благода́тїю, бг҃оно́се ѻ҆́ч҃е на́шъ: моли́сѧ хрⷭ҇тꙋ̀ бг҃ꙋ, прегрѣше́нїй ѡ҆ставле́нїю дарова́тисѧ пра́зднꙋющымъ любо́вїю свѧтꙋ́ю па́мѧть твою̀.
Сла́ва:
Молвы̑ житє́йскїѧ ѡ҆ста́вивъ, крⷭ҇тъ тво́й на ра́мена взе́мъ, всего̀ возложи́лъ є҆сѝ тебѐ бг҃ꙋ, пло́ти же и҆ мі́ра внѣ̀ бы́въ, дх҃ꙋ бы́лъ є҆сѝ ст҃о́мꙋ собесѣ́дникъ. тѣ́мже и҆ къ ре́вности лю́ди воздвиза́ѧ, гра́ды и҆стощи́лъ є҆сѝ, и҆ пꙋсты̑ни гра́ды сотвори́лъ є҆сѝ, бг҃оно́се ѻ҆́ч҃е на́шъ: молѝ хрⷭ҇та̀ бг҃а, прегрѣше́нїй ѡ҆ставле́нїю дарова́тисѧ пра́зднꙋющымъ любо́вїю свѧтꙋ́ю па́мѧть твою̀.
И҆ ны́нѣ, бг҃оро́диченъ:
Ꙗ҆́кѡ всенепоро́чнаѧ невѣ́сто творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ, всепѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ де́мѡнѡмъ и҆гра́лище въ ра́зꙋмѣ бы́вша: потщи́сѧ и҆ тѣ́хъ ѕлодѣ́йствїѧ мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ, нетлѣ́ннаѧ, ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.
Пѣ́снь д҃. І҆рмо́съ:
Оу҆слы́шахъ, гдⷭ҇и, сла́вное твоѐ смотре́нїе, и҆ просла́вихъ, человѣколю́бче, непостижи́мꙋю твою̀ си́лꙋ.
Сѐ превозвы́сисѧ бжⷭ҇твеннаѧ гора̀ до́мꙋ гдⷭ҇нѧ превы́шше си́лъ, бг҃ома́терь ꙗ҆́вственнѣйши.
Зако́нѡвъ є҆сте́ственныхъ кромѣ̀, є҆ди́на дв҃о, ро́ждши влⷣчествꙋющаго тва́рїю, сподо́биласѧ є҆сѝ бжⷭ҇твеннагѡ зва́нїѧ.
И҆́нъ. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Дꙋше́вное ѡ҆чища́ѧ ᲂу҆строе́нїе, и҆ разширѧ́ѧ бжⷭ҇твенными видѣ̑нїи, вмѣ́стнꙋ сїю̀ вои́стиннꙋ бжⷭ҇твенныхъ дарова́нїй содѣ́лалъ є҆сѝ, бг҃облаже́нне: возложе́нїемъ же рꙋ́къ твои́хъ немощствꙋ́ющыѧ и҆сцѣли́лъ є҆сѝ, подража́тель влⷣки бы́въ.
И҆́же на тѧ̀, ѻ҆́ч҃е, лю́тѣ разсвирѣ́пѣвъ, поглоти́сѧ ꙗ҆́кѡ даѳа́нъ ѻ҆каѧ́нный, и҆ ꙗ҆́кѡ а҆вїрѡ́нъ потреби́всѧ: тѧ́ бо неви́димѡ бжⷭ҇твеннаѧ хранѧ́ше благода́ть, мно́гихъ промышлѧ́ющи спасе́нїе, всебл҃же́нне, сла́вный са́вво бг҃омꙋ́дре.
Зако́номъ бж҃їимъ наказа́въ, бг҃оглаго́ливе, чꙋ̑вства, къ разꙋмѣ́нїю безтѣле́сныхъ и҆ мы́сленныхъ твою̀ хꙋдо́жнꙋю ᲂу҆пра́вилъ є҆сѝ мы́сль, проходѧ̀ неѡсла́бнѡ ѿ сла́вы въ сла́вꙋ, ѿ си́лы, ѻ҆́ч҃е, въ си́лꙋ.
Благодѣ́тельствовати є҆диноплемє́нныѧ предложи́въ, въ пꙋсты́ни гра́ды созда́лъ є҆сѝ бг҃олѣ̑пны и҆ дꙋшеполє́зны, и҆ въ землѝ жа́ждꙋщей и҆сто́чники во́дъ и҆зве́лъ є҆сѝ, и҆ тꙋ̑чи съ небесѐ пресла́внѡ, бг҃омꙋ́дре, въ безво́дныхъ се́лѣхъ низве́лъ є҆сѝ.
Бг҃оро́диченъ:
Новоцвѣ́тный безсме́ртїѧ ра́й, и҆ красе́нъ вои́стиннꙋ показа́ласѧ є҆сѝ, дре́во жи́зни въ тебѣ̀ насажде́нное бг҃онача́льнѣйше чревоносѧ́щи и҆ ражда́ющи, всѣ̑мъ и҆ска́пающее спаси́тєльныѧ надє́жды, вѣ́рнѡ бцⷣꙋ мꙋ́дрствꙋющымъ тѧ̀.
Катава́сїа: Ро́да человѣ́ча ѡ҆бновле́нїе:
Пѣ́снь є҃. І҆рмо́съ:
Оу҆́гль и҆са́їи проѧвле́йсѧ, сл҃нце и҆зъ дѣ́вственныѧ ᲂу҆тро́бы возсїѧ̀, во тмѣ̀ заблꙋ́ждшымъ, бг҃оразꙋ́мїѧ просвѣще́нїе да́рꙋѧ.
Ѻ҆́блацы весе́лїѧ сла́дость кропи́те сꙋ́щымъ на землѝ, ꙗ҆́кѡ ѻ҆троча̀ даде́сѧ, сы́й пре́жде вѣ̑къ, и҆зъ дв҃ы вопло́щсѧ бг҃ъ на́шъ.
Житїю̀ и҆ пло́ти мое́й свѣ́тъ возсїѧ̀, и҆ дрѧ́хлость грѣха̀ разрꙋшѝ, напослѣ́докъ и҆зъ дв҃ы безъ сѣ́мене вопло́щсѧ высоча́йшїй.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Неꙋкло́нною мы́слїю къ твоемꙋ̀ жела́емомꙋ простира́ѧсѧ, ѿ негѡ̀ бл҃года́ть велича́йшихъ чꙋде́съ незави́стнꙋ прїѧ́лъ є҆сѝ, ѻ҆́ч҃е, и҆ вѣ́рнѡ приходѧ́щыѧ сострада́тельнѡ ᲂу҆врачева́лъ є҆сѝ, прпⷣбне.
Плотски́хъ тѧ́жестей дебельство̀ ѿложи́въ, сосꙋ́дъ бг҃одѣ́ланенъ и҆збра́нъ бы́лъ є҆сѝ ст҃а́гѡ, чꙋ́дне, дх҃а, ѡ҆ша́ѧнїемъ снѣ́дей и҆ моли́твою, и҆ терпѣ́нїемъ, и҆ смиреномꙋ́дрїемъ ᲂу҆краша́емь.
Проповѣ̑дникъ бжⷭ҇твенныхъ догма̑тъ велегла́снѣйшїй рꙋкоположе́нъ є҆сѝ, собо́рѡвъ, ѻ҆́ч҃е, ст҃ы́хъ соѻ́бщникъ бы́лъ є҆сѝ, царѝ ᲂу҆мꙋдрѧ́ѧ, и҆́миже ꙗ҆́вѣ, бл҃года́тїю бжⷭ҇твенною ѡ҆гражда́емь, ꙗ҆ви́лсѧ є҆сѝ, бл҃же́нне.
Ѿ бг҃а да́вшаѧсѧ бл҃года́ть тебѣ̀, бг҃одохнове́нне, провозгласи́сѧ, раздаде́сѧ всѣ̑мъ бо вселе́нныѧ концы̀, ꙗ҆́вѣ творѧ́щи бг҃олѣ́пнѡ показа́нїѧ чꙋде́съ бжⷭ҇твенное дѣ́йство.
Бг҃оро́диченъ:
Вѣ́рныхъ предста́тельница, стѣна̀ неразрꙋши́ма благохва́лѧщихъ тѧ̀, ꙗ҆́кѡ всемꙋ̀ ро́дꙋ человѣ́ческомꙋ ꙗ҆́вльшеесѧ спасе́нїе, бг҃а ро́ждши тѣле́снѣ ꙗ҆́вльшасѧ, дꙋ́шꙋ мою̀ спасѝ, пречⷭ҇таѧ.
Катава́сїа: И҆зъ но́щи дѣ́лъ ѡ҆мраче́нныѧ пре́лести:
Пѣ́снь ѕ҃. І҆рмо́съ:
Гла́съ глагѡ́лъ моле́бныхъ ѿ болѣ́зненныѧ, влⷣко, дꙋшѝ ᲂу҆слы́шавъ, ѿ лю́тыхъ мѧ̀ и҆зба́ви: є҆ди́нъ бо є҆сѝ на́шегѡ спасе́нїѧ вино́венъ.
Є҆стество̀ человѣ́ческое, рабо́тающее грѣхꙋ̀, влⷣчце чⷭ҇таѧ, тобо́ю свобо́дꙋ ᲂу҆лꙋчѝ: тво́й бо сн҃ъ, ꙗ҆́кѡ а҆́гнецъ, за всѣ́хъ закала́етсѧ.
Вопїе́мъ тѝ всѝ и҆́стиннѣй мт҃ри бж҃їи: прогнѣ́вавшыѧ рабы̑ и҆зба́ви, є҆ди́на бо дерзнове́нїе къ сн҃ꙋ и҆́маши.
И҆́нъ. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Любо́вь къ бг҃ꙋ и҆ бли́жнемꙋ стѧжа́въ, зако́на и҆ прⷪ҇ро́кѡвъ и҆сполнѧ́ѧ глави́знꙋ: преимꙋ́щꙋю бо всѣ́хъ несосꙋ́днѡ добродѣ́тель, ѻ҆́ч҃е, и҆спра́вилъ є҆сѝ.
Равноа́гг҃льное на землѝ ты̀ жи́тельство стѧжа́лъ є҆сѝ, равноа́гг҃льнꙋ же че́сть хрⷭ҇то́съ тебѣ̀ дарова̀, ст҃ы́хъ чи́ны спꙋтьше́ствꙋющыѧ дꙋшѝ твое́й посла́въ.
Премꙋ́дрости поро́дъ ꙗ҆ви́всѧ, нача́ло премꙋ́дрости возжелѣ́лъ є҆сѝ стра́хъ бж҃їй, и҆́мже ᲂу҆крѣплѧ́емь къ соверше́нїю вмѣ́стномꙋ человѣ́кѡмъ, ѻ҆́ч҃е, дости́глъ є҆сѝ.
Бг҃оро́диченъ:
Сп҃са и҆ и҆зба́вителѧ бг҃а всѣ́хъ, и҆ гдⷭ҇и ро́ждши, на́мъ пло́тїю приѡбщи́вшасѧ, спаса́й, пречⷭ҇таѧ, призыва́ющыѧ тѧ̀ ѿ бѣ́дъ, влⷣчце.
Катава́сїа: Ѡ҆бита́ѧ і҆ѡ́на:
Конда́къ, гла́съ и҃. Подо́бенъ: Взбра́нной:
Ꙗ҆́кѡ ѿ младе́нства бг҃ꙋ же́ртва непоро́чнаѧ прине́слсѧ є҆сѝ добродѣ́телїю, са́вво бл҃же́нне садодѣ́латель бы́въ благоче́стїѧ: тѣ́мже бы́лъ є҆сѝ прпⷣбныхъ ᲂу҆добре́нїе, граждани́нъ же пꙋсты́нный достохва́ленъ. тѣ́мже зове́мъ тѝ: ра́дꙋйсѧ, са́вво пребога́те.
І҆́косъ:
Ѽ ѻ҆тцє́въ верхо́вниче, и҆ прпⷣбныхъ красото̀, по́стникѡвъ ко хрⷭ҇тꙋ̀ дерзнове́нїе, пꙋсты́нный граждани́не и҆ садодѣ́лателю. ка́кѡ воспою̀ твоѐ житїѐ, прпⷣбне; блиста́еши бо концє́мъ, ꙗ҆́кѡ со́лнце. тѣ́мъ вопїю́ ти: ра́дꙋйсѧ, кра́снаѧ каппадо́кѡвъ сла́во: ра́дꙋйсѧ, честно́е вселе́нныѧ зна́менїе: ра́дꙋйсѧ, пꙋсты́ни добрѣ́йшее прозѧбе́нїе: ра́дꙋйсѧ, пра́ведныхъ бжⷭ҇твенное наслажде́нїе: ра́дꙋйсѧ, ꙗ҆́кѡ презрѣ́лъ є҆сѝ текꙋ̑щаѧ и҆ тлѣ̑ннаѧ: ра́дꙋйсѧ, ꙗ҆́кѡ на нб҃сѣ́хъ со а҆́гг҃лы ѡ҆бита́еши: ра́дꙋйсѧ, мона́шествꙋющихъ и҆справле́нїе и҆ пра́вило: ра́дꙋйсѧ, лѣнѧ́щихсѧ къ бг҃ꙋ воздви́женїе: ра́дꙋйсѧ, и҆сто́чниче чꙋде́съ бг҃ото́чный: ра́дꙋйсѧ, честны́й дх҃а ѻ҆рга́не: ра́дꙋйсѧ, и҆́мже ᲂу҆краси́сѧ восто́къ: ра́дꙋйсѧ, и҆́мже за̑паднаѧ сїѧ́ютъ: ра́дꙋйсѧ, са́вво пребога́те.
Пѣ́снь з҃. І҆рмо́съ:
Виті̑и ꙗ҆ви́шасѧ ѻ҆́троцы любомꙋ́дрѣйшїи дре́вле, ѿ бг҃опрїѧ́тныѧ бо дꙋшѝ, бг҃осло́вѧще ᲂу҆стна́ми, поѧ́хꙋ: пребжⷭ҇твенный ѻ҆тцє́въ и҆ на́шъ бж҃е, бл҃гослове́нъ є҆сѝ.
Зрѧ́ше въ нощѝ ᲂу҆́бѡ і҆а́кѡвъ ꙗ҆́кѡ въ гада́нїи бг҃а, воплоще́нъ же и҆зъ тебє̀, свѣ́тлостїю ꙗ҆ви́сѧ пою́щымъ: пребжⷭ҇твенный ѻ҆тцє́въ бг҃ъ и҆ препросла́вленъ.
Зна́менїѧ, є҆́же въ тебѣ̀, неизрече́ннагѡ проѧвлѧ́ѧ сплетє́нїѧ, со і҆а́кѡвомъ бо́ретсѧ: чрезъ є҆́же во́льнѡ соедини́сѧ человѣ́кѡмъ, чⷭ҇таѧ, пребжⷭ҇твенный ѻ҆тцє́въ бг҃ъ и҆ препросла́вленъ.
Ме́рзокъ, не проповѣ́дꙋѧй є҆ди́нагѡ дв҃ы тѧ̀ сн҃а, ѿ всепѣ́тыѧ трⷪ҇цы, и҆ несомнѣ́нною мы́слїю, и҆ ѧ҆зы́комъ вопїѧ̀: пребжⷭ҇твенный ѻ҆тцє́въ бг҃ъ и҆ препросла́вленъ.
И҆́нъ. І҆рмо́съ:
Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Ѿложи́лъ є҆сѝ привре́мєннаѧ, вѣ́чными возме́здивсѧ, и҆ со а҆́гг҃лы ликꙋ́еши, ꙗ҆́кѡ а҆́гг҃льское пожи́въ житїѐ. съ ни́миже и҆ пѣ́лъ є҆сѝ: бл҃гослове́нъ бг҃ъ ѻ҆тє́цъ на́шихъ.
Вопїе́тъ бл҃года́рнѡ ко гдⷭ҇ꙋ твоѧ̀ вели́каѧ и҆ всечестна́ѧ ла́ѵра, жи́телѧ и҆ зижди́телѧ и҆ граждани́на тѧ̀ предлага́ющи, мꙋ́дре, и҆ хва́лѧщисѧ зове́тъ: бл҃гослове́нъ бг҃ъ ѻ҆тє́цъ на́шихъ.
Непреста́ннѡ молѝ гдⷭ҇а, са́вво бг҃омꙋ́дре, ѡ҆ па́ствѣ твое́й, прилѣ́жнѡ же и҆спросѝ твои̑мъ трꙋдѡ́мъ вѣ́чновати при́снѡ, плодоносѧ́щымъ и҆ любо́вїю зовꙋ́щымъ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Невѣ́стникъ пречи́стъ, па́че словесѐ, сло́ва воплоще́нїѧ, и҆ черто́гъ, и҆ прⷭ҇то́лъ, пра̑ваѧ мꙋ́дрствꙋющїи тѧ̀ и҆менꙋ́емъ, и҆ ра́дꙋющесѧ твоемꙋ̀ сн҃ꙋ зове́мъ: бл҃гослове́нъ бг҃ъ ѻ҆тє́цъ на́шихъ.
Катава́сїа: Всецр҃ѧ̀ любо́вїю ᲂу҆ловле́ннїи ѻ҆́троцы:
Пѣ́снь и҃. І҆рмо́съ:
Ѡ҆ подо́бїи зла́тѣ небре́гше требл҃же́ннїи ю҆́ношы, неизмѣ́нный и҆ живы́й бж҃їй ѻ҆́бразъ ви́дѣвше, средѝ ѻ҆гнѧ̀ воспѣва́хꙋ: ѡ҆сꙋществова́ннаѧ да пое́тъ гдⷭ҇а всѧ̀ тва́рь, и҆ превозно́ситъ во всѧ̑ вѣ́ки.
Ви́дѣнъ бы́сть на землѝ тобо́ю, и҆ съ человѣ̑ки поживѐ и҆́же бл҃гостїю несравне́нный и҆ си́лою. є҆мꙋ́же, пою́ще, всѝ вѣ́рнїи зове́мъ: ѡ҆сꙋществова́ннаѧ да пое́тъ гдⷭ҇а всѧ́каѧ тва́рь, и҆ превозно́ситъ во всѧ̑ вѣ́ки.
Вои́стиннꙋ тѧ̀ чⷭ҇тꙋю возвѣща́юще сла́вимъ, бцⷣе: ты́ бо є҆ди́наго родила̀ є҆сѝ ѿ трⷪ҇цы воплоще́нна. є҆мꙋ́же со ѻ҆ц҃е́мъ и҆ дх҃омъ всѝ пое́мъ: да пое́тъ гдⷭ҇а всѧ́каѧ тва́рь, и҆ превозно́ситъ во всѧ̑ вѣ́ки.
И҆́нъ. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Съ весе́лїемъ, прпⷣбне, ст҃ы́хъ чи́ны чистѣ́йшей твое́й дꙋшѝ предтекꙋ́тъ на мѣ́сто ѿра́дно въ свѣ̑тлаѧ селє́нїѧ, и҆дѣ́же првⷣныхъ ли́цы веселѧ́тсѧ. съ ни́миже ны́нѣ пое́ши: свѧще́нницы воспо́йте, лю́дїе превозноси́те хрⷭ҇та̀ во вѣ́ки.
Стра̑нна твоѧ̑ чꙋдеса̀: ѕвѣ́ри бо ᲂу҆кроти́лъ є҆сѝ, ᲂу҆ти́шивъ страсте́й во́лны, предглаго́леши бꙋ̑дꙋщаѧ прⷪ҇ро́ческимъ да́ромъ, полкѝ де́мѡнскїѧ прогонѧ́ѧ, ꙗ҆зви́ши благомо́щными бдѣ̑нїи же и҆ моли́твами, и҆ поще́ньми, и҆ креста̀ си́лою непобѣди́мою, бг҃оно́се.
И҆́же мѡѷсе́ю пе́рвѣе ѿ столпа̀ вѣща́вый, сто́лпъ ѿ землѝ до нб҃сѐ всесвѣ́телъ просте́ртъ тебѣ̀ показа̀, и҆дѣ́же ны́нѣ лежи́тъ терпѣли́вое твоѐ и҆ многострада́льное тѣ́ло. є҆мꙋ́же, вѣ́рою предстоѧ́ще, благоче́стнѡ пое́мъ: лю́дїе, превозноси́те хрⷭ҇та̀ во вѣ́ки.
Ра́достнѡ па́мѧть твоѧ̀ соверша́етсѧ, всехва́льне: въ радостотво́рнꙋю бо ѡ҆дѣ́ѧлсѧ є҆сѝ добродѣ́тель, и҆́стиннꙋю ри́зꙋ спасе́нїѧ, и҆ чи́стꙋю, и҆ свѣтови́днꙋю весе́лїѧ ѻ҆де́ждꙋ, въ не́йже ны́нѣ, красꙋ́ѧсѧ, пое́ши непреста́ннѡ: свѧще́нницы, воспо́йте, лю́дїе, превозноси́те хрⷭ҇та̀ во вѣ́ки.
Бг҃оро́диченъ:
Неискꙋсобра́чнѡ родила̀ є҆сѝ, дв҃а пребы́вши, и҆ стра́ннымъ ржⷭ҇тво́мъ твои́мъ совокꙋпи́ла є҆сѝ всѧ̑, вре́меннꙋю бра́нь и҆ да́льнее разстоѧ́нїе разрꙋши́вши, хрⷭ҇та̀, ми́ра да́телѧ, носѧ́щи въ нѣ́дрѣхъ твои́хъ. є҆го́же вѣ́рнѡ пое́мъ и҆ превозно́симъ во вѣ́ки.
Катава́сїа: Оу҆тро́бꙋ неѡпа́льнѡ ѡ҆бразꙋ́ютъ:
Пѣ́снь ѳ҃. І҆рмо́съ:
Ве́сь є҆сѝ жела́нїе, ве́сь сла́дость, сло́ве бж҃їй, дв҃ы сн҃е, бж҃е богѡ́въ, гдⷭ҇и, ст҃ы́хъ прест҃ы́й: тѣ́мъ тѧ̀ всѝ съ ро́ждшею велича́емъ.
Же́злъ крѣ́пости даде́сѧ є҆стествꙋ̀ тлѣ́нномꙋ сло́во бж҃їе, во ᲂу҆тро́бѣ твое́й, чⷭ҇таѧ: и҆ сїѐ возста́ви ко а҆́дꙋ попо́лзшеесѧ. тѣ́мже тѧ̀, всечи́стаѧ, ꙗ҆́кѡ бцⷣꙋ, велича́емъ.
Ю҆́же и҆зво́лилъ є҆сѝ, влⷣко, прїимѝ ми́лостивнѡ моли́твенницꙋ мт҃рь твою̀ ѡ҆ на́съ, и҆ твоеѧ̀ бла́гости всѧ́чєскаѧ и҆спо́лнѧтсѧ: да тѧ̀ всѝ, ꙗ҆́кѡ бл҃годѣ́телѧ, велича́емъ.
И҆́нъ. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Благоꙋха́етъ твоѧ̀ ра́ка дꙋхо́вное благово́нїе, бога́тнѡ веселѧ́щи твоѧ̑ сы́ны, тѧ̀ ѡ҆бстоѧ́щыѧ и҆́скреннѡ, помина́ющыѧ, прпⷣбне, а҆́гг҃льское твоѐ пребыва́нїе, и҆ тебѣ̀ да́ннꙋю свѣ́тлость и҆ сла́вꙋ, и҆ присносꙋ́щнꙋю красотꙋ̀.
Прото́ржесѧ въ пꙋсты́ни вода̀, и҆ землѧ̀ жа́ждꙋщаѧ въ бла́то бы́сть. моли́твами претво́ршисѧ, ѻ҆́ч҃е, твои́ми: по́стничестїи бо полкѝ сїю̀ населѧ́ютъ, ꙗ҆́кѡ рѣ́чнꙋ, страна̀ і҆ѻрда́нова процвѣтѐ, ꙗ҆́кѡ крі́нъ, напаѧ́ема твои́ми слеза́ми.
Свѣ́тлость ст҃ы́хъ на нб҃сѣ́хъ, ꙗ҆́кѡ пра́ведникꙋ, тебѣ̀ возсїѧ̀, ѻ҆́ч҃е, хрⷭ҇та́ бо пра́вдꙋ и҆́стиннꙋю проѧвле́ннѡ возлюби́лъ є҆сѝ: є҆гѡ́же жи́тельствꙋ послѣ́дꙋѧ, всеблаже́нне, ᲂу҆подо́бивсѧ сегѡ̀ живоно́снѣй, ꙗ҆́кѡ мо́щно бѣ̀, ст҃ы́ни.
Бога́тнымъ, бг҃оно́се сїѧ́ѧ свѣ́томъ, и҆ ли́ки а҆́гг҃льскїѧ ви́дѧ, свѣтови̑дны ѡ҆бходѧ́щыѧ тро́ическїй свѣ́тъ, и҆ прїе́млющыѧ бл҃года́тїю бг҃овидѣ́нїѧ лꙋчы̀, не преста́й молѧ̀ ѡ҆ставле́нїѧ грѣхѡ́въ сподо́битисѧ пою́щымъ тѧ̀.
Бг҃оро́диченъ:
Ꙗ҆́кѡ всѣ́хъ превы́шши земноро́дныхъ несравне́нными, чⷭ҇таѧ, пе́рвєнствы: бг҃а бо, всѣ́хъ тва́рей творца̀, во ᲂу҆тро́бꙋ твою̀ вмѣсти́ла є҆сѝ. того̀ молѝ, ꙗ҆́кѡ ми́лостива, є҆диномышле́нїе, ми́ръ, бл҃гостоѧ́нїе ти́хое цр҃квамъ дарова́ти.
Катава́сїа: Люби́ти ᲂу҆́бѡ на́мъ:
Свѣти́ленъ:
Пꙋсты́ню гра́дъ сотвори́лъ є҆сѝ любомꙋ́дрыми нра̑вы, ѻ҆тцє́въ красото̀, са́вво, ѻ҆́ч҃е бг҃омꙋ́дре, и҆ сїю̀ соверши́лъ є҆сѝ мы́сленный ра́й, цвѣтꙋ́щь цвѣ̑ты бжⷭ҇твенными, є҆динонра́вныхъ мно́жєства, досто́йнѡ соверша́ющихъ твою̀ честнꙋ́ю па́мѧть.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ и҆мꙋ́щи сострада́тельное, и҆ ми́лость ве́лїю, при́зри, всепѣ́таѧ бцⷣе дв҃о, на моѐ смире́нїе, и҆ страсте́й молвꙋ̀ и҆ собла́знѡвъ житїѧ̀ разорѝ, ѻ҆трокови́це, и҆ ѻ҆гнѧ̀ гее́нскагѡ и҆зба́ви мѧ̀ моли́твами твои́ми.
На хвали́техъ стїхи̑ры, на д҃, гла́съ а҃. Поⷣ: Нбⷭ҇ныхъ чинѡ́въ:
Презира́тель до́льнихъ и҆ пресе́льникъ, ꙳ рачи́тель го́рнихъ, ꙳ и҆ пꙋсты́нный граждани́нъ са́вво бг҃омꙋ́дрый, ꙳ всѣ̑мъ на́мъ пра́здновати повелѣва́етъ, ꙳ къ бг҃ꙋ ѿше́ствїѧ є҆гѡ̀ вѣ́рнѡ ꙳ де́нь спаси́тельный.
Два́жды.
Внѣ̀ пло́ти и҆ мі́ра добродѣ́тельми бы́въ, ꙳ и҆ тѣ́ми на землѝ въ житїѝ ꙳ просла́вилъ є҆сѝ гдⷭ҇а сла́вы, ѻ҆́ч҃е мꙋ́дре: ꙳ и҆ по достоѧ́нїю ѿ негѡ̀ просла́вилсѧ є҆сѝ, ꙳ и҆ врачева́нїй показа́лсѧ є҆сѝ бжⷭ҇твенный и҆сто́чникъ, ꙳ са́вво бг҃опрїѧ́тне.
Смире́нъ, неѕло́бивъ, кро́токъ, про́стъ, ꙳ молчали́въ ꙗ҆́кѡ бы́лъ є҆сѝ, ѻ҆́ч҃е, ꙳ па́че человѣ́ка вои́стиннꙋ: ꙳ и҆ невеще́ственъ въ ве́щи до́мъ бж҃їй ꙗ҆ви́лсѧ є҆сѝ вседосто́йный, ꙳ ꙗ҆̀же ѿ негѡ̀ прибы̑вшаѧ тебѣ̀ дарова̑нїѧ ꙳ ми́лостивнѡ подава́ѧ на́мъ.
Сла́ва, гла́съ ѕ҃:
Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ, тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ непоро́чнѡ поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
И҆ ны́нѣ: Бцⷣе, ты̀ є҆сѝ лоза̀ и҆́стиннаѧ:
Славосло́вїе вели́кое. И҆ ѿпꙋ́стъ.
На лїтꙋргі́и, Бл҃жє́нна ѿ канѡ́на ст҃а́гѡ, пѣ́снь г҃ и҆ ѕ҃-ѧ. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃і. А҆ллилꙋ́їа, гла́съ и҃: Блаже́нъ мꙋ́жъ, боѧ́йсѧ гдⷭ҇а. Сті́хъ: Си́льно на землѝ бꙋ́детъ сѣ́мѧ. Є҆ѵⷢ҇лїе матѳе́а, зача́ло м҃г. Прича́стенъ: Въ па́мѧть вѣ́чнꙋю бꙋ́детъ пра́ведникъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.