← претходни дан | Минеј — Децембар | следећи дан →
2 декабря: Святого пророка Аввакума
Мѣ́сѧца тогѡ́же во в҃-й де́нь.
Ст҃а́гѡ прⷪ҇ро́ка а҆ввакꙋ́ма.
На Гдⷭ҇и, воззва́хъ, стїхи̑ры прⷪ҇ро́ка, гла́съ д҃. Поⷣ: Ꙗ҆́кѡ до́блѧ:
А҆ввакꙋ́мъ чꙋ́дный, ꙳ зарю̀ дх҃а прїе́мъ, ꙳ бы́сть ве́сь бжⷭ҇твенъ: ꙳ и҆ сꙋде́й нече́стїе, ꙳ и҆ сꙋ́дъ непра́ведный ꙳ зрѧ̀ негодꙋ́етъ, ꙳ нра́ва показꙋ́ѧ пра́вость хрⷭ҇та̀ и҆ влⷣки, ꙳ бг҃олюбе́знѡ и҆ те́плою мы́слїю, ꙳ ꙗ҆́кѡ ᲂу҆тѣснѧ́емь разгара́етсѧ.
На бжⷭ҇твеннѣй стоѧ̀ стра́жи, ꙳ честны́й а҆ввакꙋ́мъ ꙳ слы́шаше та́инство ꙳ къ на́мъ твоегѡ̀ прише́ствїѧ, хрⷭ҇тѐ, неизрече́нное: ꙳ и҆ проповѣ́данїе твоѐ ꙳ прⷪ҇ро́чествꙋетъ ꙗ҆́вственнѣйше, ꙳ прови́дѧ и҆ премꙋ̑дрыѧ а҆пⷭ҇лы, ꙗ҆́коже ко́ни, ꙳ ꙗ҆зы̑къ многоплеме́нныхъ, ꙳ возмꙋща́ющыѧ мо́ре.
Въ гдⷭ҇ѣ ра́дꙋѧсѧ бз҃ѣ сп҃сѣ твое́мъ, ꙳ бг҃оглаго́ливе сла́вне, ꙳ веселѧ́сѧ, ꙳ и҆ та́мѡ сꙋ́щагѡ сїѧ́нїѧ зарю̀ прїе́мъ, ꙳ и҆ свѣ́томъ бг҃одѣ́льнымъ ꙳ мы́сленнѡ просвѣща́емь, ꙳ па́мѧть твою̀ всепра́зднственнꙋю ꙳ вѣ́рою соверша́ющыѧ, ꙳ напа́стей же и҆ бѣ́дъ ꙳ твои́ми моли́твами и҆зба́ви.
И҆́ны стїхи̑ры бцⷣы, гла́съ и҆ подо́бенъ то́йже:
(А҆́ще а҆ллилꙋ́їа, сі́и стїхи̑ры пою́тсѧ пре́жде.)
Тꙋ́чами дх҃а ст҃а́гѡ, пречⷭ҇таѧ, ꙳ мою̀ мы́сль ѡ҆росѝ, ꙳ ка́плю ро́ждшаѧ ꙳ хрⷭ҇та̀ безмѣ́рнꙋю, ꙳ беззакѡ́нїѧ земны́хъ ꙳ щедро́тами ѡ҆мы́вшꙋю, ꙳ и҆зсꙋшѝ и҆сто́чникъ страсте́й мои́хъ, ꙳ и҆ пото́ка сподо́би мѧ̀ сла́дости ꙳ присноживо́тною твое́ю моли́твою.
Подъ зе́млю низве́рженъ бы́хъ, ꙳ грѣхи̑ ᲂу҆мертви́всѧ, ꙳ дꙋше́вными страстьмѝ и҆ тѣле́сными. ꙳ тѣ́мже тмо́ю покрыва́юсѧ ѿча́ѧнїѧ: ꙳ но воздви́гни мѧ̀ ны́нѣ къ жи́зни нетлѣ́ннѣй, ꙳ пꙋтеводѧ́щи мѧ̀ къ вы́шнемꙋ ѻ҆те́чествꙋ, ꙳ и҆дѣ́же гла́съ чи́стъ пра́зднꙋющихъ, ꙳ и҆ и҆дѣ́же свѣ́тъ лица̀ твоегѡ̀, хрⷭ҇тѐ.
Ꙗ҆́же бг҃а невмѣсти́маго во чре́во твоѐ вмѣсти́вшаѧ, ꙳ чл҃вѣколю́бнѡ чл҃вѣ́ка бы́вша, ꙳ и҆ на́ше смѣше́нїе и҆зъ тебє̀ прїи́мша, ꙳ и҆ ѡ҆божи́вшаго ꙗ҆́вѣ, ꙳ не пре́зри менє̀, пречⷭ҇таѧ, ꙳ ны́нѣ скорбѧ́ща: ꙳ но ᲂу҆ще́дри вско́рѣ, ꙳ и҆ всѧ́кїѧ вражды̀ и҆ вре́да лꙋка́вагѡ свободѝ.
Сла́ва, и҆ ны́нѣ, гла́съ и҆ подо́бенъ то́йже:
Тма́ми, пречⷭ҇таѧ, ѡ҆бѣща́хсѧ ꙳ покаѧ́нїе ѡ҆ мои́хъ сотвори́ти согрѣше́нїихъ: ꙳ но не ѡ҆ставлѧ́етъ мѧ̀ ꙳ неподо́бный мо́й ѕлы́й ѻ҆бы́чай. ꙳ сегѡ̀ ра́ди вопїю́ ти, ꙳ и҆ припа́даѧ молю́сѧ: ꙳ ты̀ мѧ̀, влⷣчце, и҆змѝ такова́гѡ томле́нїѧ, ꙳ пꙋтеводѧ́щи къ лꙋ́чшымъ, ꙳ и҆ спасе́нїѧ бли́зъ сꙋ́щымъ.
Крⷭ҇тобг҃оро́диченъ. Подо́бенъ: то́йже.
А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тебѣ̀ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́ки и҆ но́ги твоѧ̑, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
Тропа́рь, гла́съ в҃:
Прⷪ҇ро́ка твоегѡ̀ а҆ввакꙋ́ма па́мѧть, гдⷭ҇и, пра́зднꙋюще: тѣ́мъ тѧ̀ мо́лимъ, спасѝ дꙋ́шы на́шѧ.
Канѡ́нъ прⷪ҇ро́ка, є҆гѡ́же краегране́сїе:
Тѧ̀, прⷪ҇ро́че а҆ввакꙋ́ме, пою̀, бл҃же́нне. Ѳеофа́ново:
Гла́съ д҃. Пѣ́снь а҃. І҆рмо́съ:
Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́новы и҆ си́лꙋ.
Оу҆мꙋдри́ мѧ, гдⷭ҇и бж҃е мо́й, твоего̀ прⷪ҇ро́ка а҆ввакꙋ́ма пѣ́ти бжⷭ҇твеннаго, и҆ бл҃года́тїю твое́ю просвѣтѝ, бл҃же, се́рдце моѐ.
Доко́лѣ, гдⷭ҇и, прⷪ҇ро́къ глаго́летъ, возопїю̀ къ тебѣ̀, и҆ не ᲂу҆слы́шиши; вскꙋ́ю же мѝ показа́лъ є҆сѝ сꙋде́й нече́стїе;
Честнꙋ́ю па́мѧть твою̀, прⷪ҇ро́че, соверша́ющыѧ благоче́стнѡ твои́ми мольба́ми ѿ бѣ́дъ и҆зба́ви и҆ лю́тыхъ ѡ҆бстоѧ́нїй.
Бг҃оро́диченъ:
Бг҃ъ ст҃ы́й ꙗ҆ви́сѧ, внегда̀ прибли́житисѧ вре́мени, и҆зъ тебє̀ бцⷣе, бы́въ чл҃вѣ́къ, да спасе́тъ человѣ́ка.
Пѣ́снь г҃. І҆рмо́съ:
Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Воззрѣ́нїемъ къ бг҃ꙋ возвыша́емь, и҆ свѣтодаѧ̑нїи ѿ негѡ̀ просвѣща́емь, бꙋ́дꙋщихъ предзрѣ́лъ є҆сѝ, бг҃оѧвле́нне, проѡбраже́нїе.
Всѧ́кꙋ добродѣ́тель содержа́лъ є҆сѝ, всѧ́кꙋ же ѕло́бꙋ ѿ ᲂу҆ма̀ возненави́дѣлъ є҆сѝ, и҆ пра́веднѡ беззако́ннꙋющихъ возгнꙋша́лсѧ є҆сѝ, всебл҃же́нне.
Рече́нїемъ ст҃а́гѡ дх҃а, ты̀, ꙗ҆́кѡ чи́стъ, ввѣ́рилсѧ є҆сѝ, ꙗ҆снѣ́йше прⷪ҇ро́чествꙋѧ бꙋ́дꙋщихъ сбытїѧ̑, досточꙋ́дне.
Бг҃оро́диченъ:
Гора̀ добродѣ́тельми приѡсѣне́ннаѧ, и҆зъ неѧ́же влⷣка раболѣ́пнѡ прїи́де, рабо́ты свободи́ти человѣ́ки, ꙗ҆ви́ласѧ є҆сѝ, всечⷭ҇таѧ.
Сѣда́ленъ, гла́съ д҃. Подо́бенъ: Вознесы́йсѧ:
На бжⷭ҇твеннѣй стра́жи ста́лъ є҆сѝ, бл҃же́нне, и҆ ᲂу҆разꙋмѣ́лъ є҆сѝ бж҃їе прише́ствїе, прⷪ҇ро́ческими ѻ҆чесы̀, бг҃одохнове́нне. тѣ́мже и҆ возопи́лъ є҆сѝ, а҆ввакꙋ́ме, со стра́хомъ: гдⷭ҇и, ᲂу҆слы́шахъ стра́шное прише́ствїе твоѐ, и҆ воспѣва́ю тѧ̀, пло́ть бре́ннꙋю ѿ дв҃ы понестѝ восхотѣ́вшаго.
Сла́ва, и҆ ны́нѣ, бг҃оро́диченъ:
По бз҃ѣ въ тво́й, бцⷣе, прибѣга́ю смире́нный покро́въ бжⷭ҇твенный, припа́даѧ, молю́сѧ: поми́лꙋй, пречⷭ҇таѧ, ꙗ҆́кѡ превзыдо́ша главꙋ̀ мою̀ грѣсѝ, и҆ бою́сѧ, влⷣчце, мꙋ́ки, и҆ трепе́щꙋ: моле́нїе сотворѝ, чⷭ҇таѧ, къ сн҃ꙋ твоемꙋ̀, ѿ си́хъ и҆зба́вити мѧ̀.
Крⷭ҇тобг҃оро́диченъ:
И҆́же и҆зъ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый, ꙗ҆́кѡ бг҃ъ, ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.
Пѣ́снь д҃. І҆рмо́съ:
Твоегѡ̀ на землѝ ꙗ҆вле́нїѧ, хрⷭ҇тѐ бж҃е проповѣ́даѧ проро́къ прише́ствїе, съ весе́лїемъ вопїѧ́ше: сла́ва си́лѣ твое́й, гдⷭ҇и.
Свѣтови́денъ добродѣ́телїю ꙗ҆ви́лсѧ, бг҃одохнове́нне, и҆ свѣ́тъ невече́рнїй возвѣсти́лъ є҆сѝ. є҆мꙋ́же ны́нѣ вѣ́рою зове́мъ: сла́ва си́лѣ твое́й, гдⷭ҇и.
Всесвѣ́тлаѧ бл҃года́ть дх҃а, ѻ҆би́льнѡ все́льшисѧ въ тѧ̀, всемꙋ́дре, прⷪ҇ро́ка совершѝ, всѣ̑мъ сп҃са возвѣща́юща.
Слꙋ́хомъ ѡ҆гласи́всѧ вседержи́телѧ, благоговѣ́йнѡ ᲂу҆боѧ́лсѧ є҆сѝ, ѽ чꙋ́дне! разꙋмѣ́въ же дѣла̀ сегѡ̀, во ᲂу҆́жасѣ бы́лъ є҆сѝ.
Бг҃оро́диченъ:
Кївѡ́тъ свидѣ́нїѧ тѧ̀, дв҃о, пи́шетъ, хлѣ́бъ и҆́стиннѡ жи́зни прїе́мшꙋю, чⷭ҇таѧ, сло́во, ѻ҆ц҃ꙋ̀ соприсносꙋ́щное.
Пѣ́снь є҃. І҆рмо́съ:
Возсїѧ́вый свѣ́тъ, и҆ просвѣти́вый ᲂу҆́тро, и҆ показа́вый де́нь, сла́ва тебѣ̀, сла́ва тебѣ̀, і҆и҃се сн҃е бж҃їй.
Ны́нѣ воздви́жена ви́дитъ честна́ѧ цр҃ковь сл҃нца на дре́вѣ, ꙗ҆́коже проре́клъ є҆сѝ, а҆ввакꙋ́ме свѧще́ннѣйше.
Впери́въ ᲂу҆́мъ, на стра́жи твое́й ста́лъ є҆сѝ, пребога́те, и҆ ᲂу҆смотри́лъ є҆сѝ гдⷭ҇не прише́ствїе.
Велегла́снѡ, мꙋ́дре, ѡ҆ бз҃ѣ сп҃сѣ возра́дꙋюсѧ, возопи́лъ є҆сѝ, и҆ возвеселю́сѧ, а҆ввакꙋ́ме всебл҃же́нне.
Бг҃оро́диченъ:
Ѡ҆тѧгче́нъ плени́цами мно́гихъ мои́хъ прегрѣше́нїй, къ тебѣ̀ прибѣга́ю, спаси́ мѧ, влⷣчце бцⷣе, вѣ́рныхъ хвало̀.
Пѣ́снь ѕ҃. І҆рмо́съ:
Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ
Ѿ ю҆́га, бг҃ъ вопло́щсѧ, прїи́де, ꙗ҆́кѡ проре́клъ є҆сѝ, ѿ негѡ̀ свѣ́тлѡ просвѣща́емь, а҆ввакꙋ́ме требл҃же́нне, и҆ мі́ръ свѣ́томъ ᲂу҆ѧснѝ.
Ѡ҆зарѝ, бж҃е, дꙋ́шы пою́щихъ тѧ̀, моли́твами а҆ввакꙋ́ма честна́гѡ и҆ бг҃омꙋ́драгѡ, и҆́же вдохнове́нїемъ бжⷭ҇твеннымъ просвѣще́й тогѡ̀ помышле́нїе.
Вѣща́нїе твоѐ и҆ глагѡ́лъ бжⷭ҇твенныхъ си́ла, бг҃оглаго́ливе, про́йде всѧ̑ концы̀, сло́ва бжⷭ҇твенное прише́ствїе на́мъ прⷪ҇ро́чествꙋѧ.
Бг҃оро́диченъ:
Сꙋ́щагѡ ѻ҆ц҃ꙋ̀ сн҃а є҆диносꙋ́щна, и҆ безнача́льнѡ ро́ждшемꙋ ꙗ҆́вѣ сразꙋмѣва́емаго, въ послѣ́докъ пло́ть бы́вша, дв҃о, родила̀ є҆сѝ.
Конда́къ гла́съ и҃: Подо́бенъ: Взбра́нной:
Возгласи́вый вселе́ннѣй ѿ ю҆́га прише́ствїе бж҃їе ѿ дв҃ы, а҆ввакꙋ́ме бг҃оглаго́ливе, и҆ на бжⷭ҇твеннѣй стра́жи предстоѧ́нїемъ слы́шанїѧ ѿ свѣтоно́сна а҆́гг҃ла, хрⷭ҇то́во воскресе́нїе возвѣсти́лъ є҆сѝ мі́рꙋ. сегѡ̀ ра́ди ве́селѡ зове́мъ тѝ: ра́дꙋйсѧ, прⷪ҇ро́кѡвъ свѣ́тлаѧ добро́то.
Пѣ́снь з҃. І҆рмо́съ:
А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
Наꙋча́емь, блаже́нне, па́че сло́ва зна́нїю, и҆ проро́чествꙋѧ многосвѣ́тлꙋю свѣщꙋ̀, взыва́еши ны́нѣ: ѻ҆тє́цъ на́шихъ бж҃е, бл҃гослове́нъ є҆сѝ.
Сїѧ́нїѧ трисвѣ́тлагѡ, и҆ невече́рнїѧ сла́вы прича́стїѧ тебѣ̀ дадѐ хрⷭ҇то́съ, є҆го́же просла́вилъ є҆сѝ, вопїѧ̀: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Въ ро́дѣхъ родѡ́въ мт҃и дв҃а ꙗ҆ви́ласѧ є҆сѝ бл҃гослове́ннаѧ, па́че ᲂу҆ма̀ сло́во ро́ждши воплоще́нное: тѣ́мже, чⷭ҇таѧ, воспѣва́емъ тѧ̀.
Пѣ́снь и҃. І҆рмо́съ:
Всѧ̑ дѣла̀ бж҃їѧ, и҆ всѧ̀ тва́рь благослови́те гдⷭ҇а, прпⷣбнїи и҆ смире́ннїи се́рдцемъ по́йте є҆го̀, и҆ превозноси́те во всѧ̑ вѣ́ки.
Просвѣще́нъ свѣ́томъ трисо́лнечнымъ, сподо́билсѧ є҆сѝ, всеизрѧ́дне, бжⷭ҇твенныхъ и҆ преесте́ственныхъ видѣ́нїй зовы́й: превозноси́те бг҃а во вѣ́ки всѧ̑.
Пїѧ̀ ѿ пото́ка сла́дости, и҆ невеще́ственнагѡ видѣ́нїѧ и҆сполнѧ́емь, сла́вы же проро́ческїѧ и҆ предсѣда́тельства причаща́ѧсѧ, ра́дꙋѧсѧ воспѣва́еши бг҃а во вѣ́ки.
Ѽ бжⷭ҇твенныѧ и҆ честны́ѧ прⷪ҇ро́ка а҆ввакꙋ́ма красоты̀! се́й бо со а҆́гг҃льскими ликꙋ́ѧ си́лами, ра́дꙋѧсѧ хрⷭ҇та̀ воспѣва́етъ во вѣ́ки.
Бг҃оро́диченъ:
Мт҃и ꙗ҆ви́ласѧ є҆сѝ и҆́стиннѡ пре́жде вѣ̑къ и҆зъ ѻ҆ц҃а̀ возсїѧ́вшагѡ: є҆ди́на бо ст҃ѣ́йши всѣ́хъ была̀ є҆сѝ. тѧ̀ превозно́симъ чⷭ҇тꙋю во вѣ́ки.
Пѣ́снь ѳ҃. І҆рмо́съ:
Ржⷭ҇тво̀ твоѐ нетлѣ́нно ꙗ҆ви́сѧ: бг҃ъ и҆зъ бокꙋ̀ твоє́ю про́йде, ꙗ҆́кѡ плотоно́сецъ ꙗ҆ви́сѧ на землѝ, и҆ съ человѣ́ки поживѐ. тѧ̀, бцⷣе, тѣ́мъ всѝ велича́емъ.
Блиста́етъ па́мѧть твоѧ̀, прⷪ҇ро́че, свѣ́тлꙋ и҆спꙋща́ющи зарю̀ твоегѡ̀ бг҃оглаго́ланїѧ, и҆ твоегѡ̀ тайноꙋче́нїѧ и҆ проро́чества, тѧ̀ чтꙋ́щымъ, а҆ввакꙋ́ме блаже́ннѣйше.
Проповѣ́давъ гдⷭ҇а сла́вы, и҆ сегѡ̀ проре́къ прише́ствїе, ѿ ст҃ы́ѧ дв҃ы проѧвле́ннѡ бы́вшее, и҆ пока́занное ви́дѧ, весели́сѧ, а҆ввакꙋ́ме бг҃облаже́нне.
Ра́дꙋютсѧ всѝ прⷪ҇ро́цы, въ ра́достный тво́й де́нь веселѧ́щесѧ, бг҃омꙋ́дре, ра́дости твоеѧ̀ причаща́ющесѧ и҆ бж҃е́ственныѧ сла́вы. съ ни́миже молѧ́сѧ, пою́щыѧ тѧ̀ спаса́й.
Бг҃оро́диченъ:
Кропле́нїемъ, чⷭ҇таѧ, щедро́тъ твои́хъ, дꙋшѝ моеѧ̀ ѡ҆мы́й скве́рнꙋ, и҆ то́ки сле́зъ и҆сточа́ти мнѣ̀ непреста́ннѡ сотворѝ, ѻ҆трокови́це, страсте́й мои́хъ пото́ки ᲂу҆ставлѧ́ющи.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.