← претходни дан | Минеј — Новембар | следећи дан →
29 ноября: Святого мученика Парамона. Святого мученика Филумена. Преподобного Акакия Синайского
Мѣ́сѧца тогѡ́же въ к҃ѳ-й де́нь.
Ст҃а́гѡ мꙋ́ченика парамо́на:
И҆ ст҃а́гѡ мꙋ́ченика фїлꙋме́на:
И҆ прпⷣбнагѡ а҆ка́кїа, и҆́же въ лѣ́ствицѣ свидѣ́тельствованнагѡ.
На Гдⷭ҇и, воззва́хъ, стїхи̑ры мꙋ́ченика г҃, гла́съ д҃.
Подо́бенъ: Зва́нный свы́ше:
Свѣтоѧвле́нїемъ ꙗ҆́вѣ ѡ҆зарѧ́емь, ꙳ всеблаже́нне парамо́не, ꙳ бжⷭ҇твеннагѡ дх҃а, ꙳ тмꙋ̀ глꙋбоча́йшꙋю до конца̀ ꙳ возненави́дѣлъ є҆сѝ многобо́жїѧ, ꙳ и҆ прише́лъ є҆сѝ благоключи́мное вре́мѧ прїе́мъ, всеблаже́нне, ꙳ къ предлежа́щымъ страда́нїємъ доблемꙋ́дреннѡ, ꙳ и҆ побѣдоно́сецъ ꙗ҆́вльсѧ, ꙳ низложи́лъ є҆сѝ го́рдаго и҆ ра́тника всѣ́хъ земны́хъ, ꙳ велича́ѧ хрⷭ҇та̀. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
За всѣ́хъ бг҃а и҆ цр҃ѧ̀, ꙳ мно́жество многочи́сленное, ꙳ закала́емое разꙋмѣ́въ, парамо́не, ꙳ бжⷭ҇твенною ре́вностїю разже́глсѧ є҆сѝ, ꙳ и҆ возопи́лъ є҆сѝ: хрⷭ҇то́въ ра́бъ и҆́скреннїй є҆́смь всегда̀, ꙳ разꙋмѣ́йте, пребеззако́ннїи мꙋчи́тели, ꙳ ꙗ҆́кѡ бо а҆́гнецъ неѕло́бивъ закла́тисѧ, ꙳ сѐ ны́нѣ самозва́нъ прїидо́хъ. ꙳ не пецы́тесѧ ᲂу҆̀бо: ꙳ же́ртва прїѧ́тна ꙳ пожре́нномꙋ пло́тїю, ꙳ менє̀ ра́ди во́льнѡ, ꙳ бы́ти понꙋжда́юсѧ.
Седмочи́сленною чествꙋ́емь десѧти́цею, ꙳ трегꙋ́бнѡ же честны́й, ꙳ со́тницею ли́къ страда́льцєвъ, ꙳ многобо́жнꙋю низложи́лъ є҆сѝ ле́сть ꙳ пребеззако́ннꙋющихъ вѣ́рою: ꙳ съ ни́миже вѣнча́лсѧ є҆сѝ подвиза́всѧ доблемꙋ́дреннѡ, парамо́не, ꙳ и҆ ликѡ́мъ безтѣле́сныхъ ꙳ ра́дꙋѧсѧ сочи́слилсѧ є҆сѝ. ꙳ съ ни́миже моли́сѧ, ꙳ всѧ́кїѧ ско́рби и҆ напа́стей ꙳ и҆зба́витисѧ на́мъ, ꙳ тѧ̀ чтꙋ́щымъ и҆ при́снѡ блажа́щымъ.
А҆́ще и҆зво́литъ настоѧ́тель пѣ́ти а҆ллилꙋ́їа, да пое́тъ сі́и стїхи̑ры бцⷣѣ пре́жде, гла́съ и҆ подо́бенъ то́йже:
И҆зъ безнача́льна ѻ҆ц҃а̀, ꙳ сн҃ъ безлѣ́тнѡ, ꙳ снизхожде́нїѧ ра́ди и҆ спасе́нїѧ человѣ́кѡвъ, ꙳ бг҃ъ человѣ́къ бы́сть, ꙳ да пода́стъ первозда́нномꙋ ны́нѣ ра́й: ꙳ тогда̀ и҆ всѐ є҆стество̀ и҆зба́витсѧ ꙳ ѿ пре́лести ѕмі́евы, ꙳ и҆ ѻ҆́бразъ па́дшїй спасе́тъ, ꙳ ꙗ҆́кѡ благопремѣни́тель: ꙳ ѿѻнꙋ́дꙋже мт҃рь содѣ́ла ꙳ невѣсторо́дицꙋ чи́стꙋ, ꙗ҆́кѡ нескве́рнꙋ: ꙳ ю҆́же ꙗ҆́кѡ а҆гкѵ́рꙋ всѝ ꙳ и҆ приста́нище ᲂу҆блажа́емъ.
Воплоще́нна созда́телѧ всѣ́хъ ꙳ и҆мѣ́ла є҆сѝ во ᲂу҆тро́бѣ твое́й, бг҃облаже́ннаѧ, ꙳ воѡбрази́вшаго человѣ́ка, ꙳ пре́жде па́дшаго престꙋпле́нїемъ ѕмїи́нымъ: ꙳ бг҃а бо родила̀ є҆сѝ ꙳ пло́тїю несказа́ннѡ на́мъ, ꙳ и҆ и҆зъ тлѣ́нїѧ свободи́ла є҆сѝ ꙳ є҆стество̀ всѐ ѡ҆бветша́вшее ꙳ ржⷭ҇тво́мъ твои́мъ. ꙳ тѣ́мже пое́мъ и҆ сла́вимъ ꙳ твою̀ благода́ть, дв҃о безневѣ́стнаѧ, ꙳ моли́тисѧ не преста́й, ꙳ спасти́сѧ дꙋша́мъ на́шымъ.
Да твоеѧ̀ всѣ̑мъ мно́жество ми́лости ꙳ и҆ бла́гости ѿкры́еши на́мъ ꙳ неѡпредѣли́мꙋю пꙋчи́нꙋ, ꙳ грѣхѝ рабѡ́въ твои́хъ всѧ̑ загла́ди: ꙳ и҆́маши бо, всенепоро́чнаѧ ꙳ ꙗ҆́кѡ мт҃и сꙋ́щи бж҃їѧ, ꙳ вла́сть созда́нїѧ, ꙳ и҆ во́диши всѧ̑, ꙳ ꙗ҆́кѡ хо́щеши, си́лою твое́ю: ꙳ и҆́бо бл҃года́ть дх҃а ст҃а́гѡ, ꙳ ꙗ҆́вѣ все́льшаѧсѧ въ тѧ̀, ꙳ содѣ́йствꙋетъ тѝ во все́мъ при́снѡ, ꙳ всеблаже́ннѣйшаѧ.
Сла́ва, и҆ ны́нѣ, бг҃оро́диченъ:
И҆́же со ѻ҆ц҃е́мъ ꙳ и҆ дх҃омъ славосло́вимый сн҃ъ, ꙳ въ вы́шнихъ ѿ серафі́мѡвъ, ꙳ первозда́ннаго па́ки ѡ҆бнови́ти хотѧ̀, ꙳ всего̀ себѐ и҆стощѝ неизрече́ннѡ, ꙳ во ᲂу҆тро́бѣ твое́й, бцⷣе всепѣ́таѧ: ꙳ и҆ и҆зъ тебє̀ возсїѧ́вый, ꙳ просвѣтѝ ве́сь мі́ръ бжⷭ҇тво́мъ, ꙳ и҆зба́вивый ѿ і҆дѡлонеи́стовства, ꙳ собо́ю ѡ҆божи́вый, ꙳ на нб҃са̀ возведѐ человѣ́чество, ꙳ хрⷭ҇то́съ бг҃ъ ꙳ и҆ сп҃съ дꙋ́шъ на́шихъ.
Крⷭ҇тобг҃оро́диченъ. Подо́бенъ то́йже:
Не рыда́й менє̀, мт҃и, ꙳ зрѧ́щи на дре́вѣ ꙳ повѣ́шена твоего̀ сн҃а и҆ бг҃а, ꙳ и҆́же на вода́хъ повѣ́сившаго зе́млю неѡдержи́мѡ, ꙳ и҆ всю̀ тва́рь созда́вшаго: ꙳ и҆́бо воскреснꙋ̀ и҆ просла́влюсѧ, ꙳ и҆ а҆́дова ца̑рствїѧ сокрꙋшꙋ̀ крѣ́постїю, ꙳ и҆ погꙋблю̀ тогѡ̀ си́лꙋ, ꙳ и҆ свѧ̑занныѧ и҆зба́влю ꙳ ѡ҆ ѕлодѣ́йства є҆гѡ̀, ꙳ ꙗ҆́кѡ бл҃гоꙋтро́бенъ, ꙳ и҆ ѻ҆ц҃ꙋ̀ моемꙋ̀ приведꙋ̀, ꙳ ꙗ҆́кѡ чл҃вѣколю́бецъ.
На стїхо́внѣ ѻ҆ктѡ́иха.
Прпⷣбнагѡ а҆ка́кїа слꙋ́жба пое́тсѧ на повече́рїи.
Канѡ́нъ, є҆гѡ́же краегране́сїе:
А҆ка́кїа, и҆збра́ннаго послꙋ́шателѧ, пѣ́сньми пою̀. Ѳеофа́нъ:
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Неѕло́бнымъ нра́вомъ ѡ҆бло́жсѧ, благоѻбра́знꙋю добродѣ́телей стѧжа́лъ є҆сѝ добро́тꙋ, хрⷭ҇то́вꙋ во́льномꙋ послꙋша́нїю подо́бѧсѧ, да́же до сме́рти, всебл҃же́нне.
Ѕло́бы ѡ҆брѣта́телѧ посрами́лъ є҆сѝ безѕло́бїемъ свои́мъ: терпѣ́нїемъ же, ѻ҆́ч҃е, и҆скꙋше́нїй, тогѡ̀ го́рдꙋю и҆ вознесе́ннꙋю враждꙋ̀, къ землѝ, всеблаже́нне, смири́лъ є҆сѝ.
Воздержа́нїемъ терпѣли́внымъ, прпⷣбне, пред̾ѡбꙋча́ѧсѧ и҆ страсте́й ѿсѣка́ѧ нача̑ла, безстра́стїѧ ѻ҆де́ждею ᲂу҆краси́лсѧ є҆сѝ по́слѣжде, благода́тїю бжⷭ҇твенною покрыва́емь.
Оу҆крѣпи́въ дꙋше́вное ᲂу҆строе́нїе терпѣ́нїемъ тве́рдымъ и҆ до́блимъ, всеблаже́нне, по́мысломъ, по всѧ̑ дни̑ терпѣ́лъ є҆сѝ мч҃ническїй по́двигъ, и҆ вѣне́чникъ показа́лсѧ є҆сѝ.
Бг҃оро́диченъ:
Крѣ́пость твори́тельна и҆ пѣ́нїе, бг҃ъ и҆ гдⷭ҇ь, и҆́же на́съ ра́ди и҆зъ тебє̀ воплоще́йсѧ и҆ рожде́йсѧ, прⷪ҇ро́чески ꙗ҆́коже и҆са́їа, пречⷭ҇таѧ, благовѣстѝ.
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Всего̀ тебѐ сама́го творцꙋ̀ твоемꙋ̀ и҆ бг҃ꙋ, прпⷣбне, возложи́въ, терпѣ́лъ є҆сѝ томи́тельное и҆зничтоже́нїе.
Зако́ннѡ страда́льческое терпѣ́нїе, возде́ржниче, показа́лъ є҆сѝ на землѝ: тѣ́мже тебѣ̀ нбⷭ҇ное весе́лїе даде́сѧ.
Смире́нїе и҆́стинно, долготерпѣ́нїе ѻ҆па́снѡ держа́лъ є҆сѝ, терпѣ́нїе, воздержа́нїе съ послꙋша́нїемъ, преблаже́нне.
Бг҃оро́диченъ:
Всѣ́хъ содѣ́тель зи́ждетсѧ, на́съ ра́ди, пречⷭ҇таѧ, пло́ть прїе́мь ѡ҆дꙋшевле́ннꙋ, и҆зъ тебє̀, прест҃а́ѧ бг҃оневѣ́сто.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Оу҆мертви́въ, ѻ҆́ч҃е, мꙋ́дрость пло́ти твоеѧ̀, твою̀ дꙋ́шꙋ ѡ҆живи́лъ є҆сѝ, и҆ пра́вды вѣне́цъ прїѧ́лъ є҆сѝ, зовы́й а҆ка́кїе: сла́ва си́лѣ твое́й, гдⷭ҇и.
По́двиги до́лги прїе́млѧ, и҆́же по всѧ̑ дни̑ терпѣли́вное пока́зывалъ є҆сѝ сопротивле́нїе, ѻ҆́ч҃е. тѣ́мже по сме́рти, ꙗ҆́кѡ жи́въ, возопи́лъ є҆сѝ: сла́ва си́лѣ твое́й, гдⷭ҇и.
Тве́рдымъ ᲂу҆мо́мъ томлє́нїѧ за хрⷭ҇та̀ претерпѣ́лъ є҆сѝ, а҆ка́кїе блаже́нне, сего̀ помышлѧ́ѧ на крⷭ҇тѣ̀ пригвожде́на, за спасе́нїе ро́да на́шегѡ.
Бг҃оро́диченъ:
Чистѣ́йши є҆сѝ нб҃съ и҆ мы́сленныхъ си́лъ, ꙗ҆́кѡ си́хъ зижди́телѧ, пречⷭ҇таѧ, ро́ждши. тѣ́мже тѝ зове́мъ: ра́дꙋйсѧ, бцⷣе всепѣ́таѧ.
Пѣ́снь є҃. І҆рмо́съ:
Ты̀, гдⷭ҇и, мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Ты̀, прпⷣбне, ꙗ҆́звами мꙋ́жески ᲂу҆ранѧ́емь, и҆ бїє́нїи по всѧ̑ дни̑ терпѧ̀ крѣ́пкѡ, прпⷣбнѡ почи́лъ є҆сѝ.
Тече́нїе до́брое сконча́въ, а҆ка́кїе неѕло́бный, и҆ трꙋдѡ́въ свобо́дный и҆ болѣ́зней воспрїѧ́лъ є҆сѝ поко́й.
Оу҆́мъ тво́й чи́стымъ по́мысломъ ѡ҆кормлѧ́емь, а҆ка́кїе бг҃оно́се, къ вино́вномꙋ всѣ́хъ благополꙋ́чнѡ ᲂу҆стреми́сѧ.
Бг҃оро́диченъ:
Ни а҆́гг҃льскїй ᲂу҆́мъ, ни человѣ́чь мо́жетъ ржⷭ҇тво̀ твоѐ сказа́ти: превосхо́дитъ бо всѧ́ко постиже́нїе ра́зꙋма.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Оу҆снꙋ́лъ є҆сѝ блаже́ннымъ сно́мъ, блаже́нне, и҆ по сме́рти ꙗ҆ви́сѧ послꙋ́шаѧ, ѻ҆́ч҃е, вопроша́ющихъ, ꙗ҆́кѡ не ᲂу҆мира́етъ послꙋша́нїе и҆мѣ́ѧй.
Сконча́въ дѡ́брыѧ по́двиги, тезоимени́те, нетлѣ́ннагѡ, бг҃омꙋ́дре, сподо́билсѧ вои́стиннꙋ безсме́ртїѧ, и҆дѣ́же ра́дꙋѧсѧ вѣнцы̀ побѣ́ды воспрїѧ́лъ є҆сѝ.
Бжⷭ҇твенное и҆ до́брое и҆ бг҃оꙋго́дное воздержа́нїе житїѧ̀ твоегѡ̀, блаже́нне, мнѡ́гїѧ ᲂу҆твержда́етъ бжⷭ҇твеннымъ стра́хомъ и҆ жела́нїемъ бла̑гъ бꙋ́дꙋщихъ, а҆ка́кїе.
Бг҃оро́диченъ:
Вои́стиннꙋ бцⷣꙋ тѧ̀ вѣ́рою сла́вимъ, ꙗ҆́кѡ бг҃а заче́ншꙋю, и҆ ро́ждшꙋю сего̀ неискꙋсобра́чнѡ, соеди́ншасѧ и҆зъ тебє̀ прїѧ́тныѧ ст҃ы́мъ хра́момъ.
Сѣда́ленъ, гла́съ д҃. Подо́бенъ: Ско́рѡ предварѝ:
Свѣ́тлостїю вѣ́ры и҆ дѣ́тельнымъ свѣ́томъ, ꙗ҆ви́лсѧ є҆сѝ равноа́гг҃ленъ на землѝ, вои́стиннꙋ, а҆ка́кїе всемꙋ́дре. показа́лъ є҆сѝ мꙋ́жески крѣ́пкое ᲂу҆ма̀ твоегѡ̀, сокрꙋши́лъ є҆сѝ напа̑данїѧ страсте́й посто́мъ: тѣ́мже и҆ по кончи́нѣ, ꙗ҆́кѡ жи́въ ꙗ҆ви́лсѧ є҆сѝ, непобѣди́ме.
Пѣ́снь з҃. І҆рмо́съ:
Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Всѣ́мъ жела́нїемъ влⷣцѣ и҆ды́й, доса̑ды и҆ безчє́стїѧ, прпⷣбне, и҆ ꙗ҆́звы терпѧ̀, взыва́лъ є҆сѝ: благослове́нъ є҆сѝ въ хра́мѣ сла́вы твоеѧ̀, гдⷭ҇и.
По́мыслъ тво́й влⷣчнїѧ помышлѧ́ѧ стрⷭ҇ти и҆ распѧ́тїе, и҆ сме́рти поꙋча́ѧсѧ, ᲂу҆ранѧ́емь пѣ́лъ є҆сѝ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ме́ртвъ во гро́бѣ, по зако́нꙋ ᲂу҆мира́ющихъ лежа̀ безъ дыха́нїѧ, глаго́лющемꙋ вѣща́еши па́че є҆стества̀, ꙗ҆́кѡ не ᲂу҆́мерлъ є҆́смь, взыва́еши: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ:
Оу҆ме́ршыѧ, и҆́мже, дв҃о, держи́ми бѣ́хомъ зако́номъ, жи́знь ро́ждши и҆́стиннꙋю, возста́вила є҆сѝ зовꙋ́щыѧ: бл҃гослове́на ты̀ въ жена́хъ, всенепоро́чнаѧ влⷣчце.
Пѣ́снь и҃. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Крѣ́пкимъ воздержа́нїемъ, бг҃ꙋ тебѣ̀ бы́сть смѣси́тисѧ, прпⷣбне, ᲂу҆́зъ тѣ́ла разрѣ́шшꙋсѧ, и҆ пло́ть и҆знꙋри́вшꙋ, и҆ видѣ́нїемъ дѣ́тельнымъ, ѻ҆́ч҃е, зовы́й: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Съ мꙋ́чєники хрⷭ҇то́вы сочета́емь и҆ вчинѧ́емь, непреста́ннѡ, прпⷣбне, поѧ̀ чл҃вѣколю́бца, и҆ молѧ́сѧ ѡ҆ на́съ, восхвалѧ́ющихъ тѧ̀ и҆ вопїю́щихъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Пострада́въ зако́ннѡ на землѝ, нбⷭ҇ный ѡ҆брѣ́лъ є҆сѝ поко́й, ра́дꙋѧсѧ, прпⷣбне, со ст҃ы́ми, и҆ соприча́стникъ весе́лїѧ и҆ ра́дости и҆́хъ бы́въ, и҆ взыва́ѧ: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Воплоща́етсѧ безпло́тный пре́жде, содѣ́тель зи́ждетсѧ и҆зъ тебє̀, всенепоро́чнаѧ: и҆́бо въ пречⷭ҇таѧ ложесна̀ твоѧ̑ вше́дъ непостижи́мый, ѡ҆писа́нїемъ плотски́мъ хотѧ̀ ѡ҆б̾ѧ́тисѧ. тѣ́мже вси́ тѧ благослови́мъ, марі́е бг҃оневѣ́сто.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Ми́лостивнѡ вмѣсти́сѧ, ѻ҆́ч҃е, ко всѧ́ческихъ бл҃годѣ́телю, неѕло́бїѧ добро́тою ᲂу҆краша́ѧсѧ, и҆ красото́ю добродѣ́телей сїѧ́ѧ. тѣ́мже тѧ̀ всѝ ᲂу҆блажа́емъ.
Зако́нꙋ повинꙋ́ѧсѧ влⷣчню, твою̀ преклони́лъ є҆сѝ вы́ю, мона́шествꙋющихъ боре́нїю, и҆ побѣдоно́сецъ, ѻ҆́ч҃е, бы́въ, къ неѕло́бїю дости́глъ є҆сѝ соверше́нномꙋ, всеблаже́нне.
Пѣ́нїе бг҃ꙋ возсыла́ти со безпло́тными сподо́билсѧ є҆сѝ, ꙗ҆́кѡ соблю́дъ ѻ҆́нѣхъ житїѐ и҆ чистотꙋ̀: терпѣ́нїемъ же дѣ́лъ мꙋ́ченикѡвъ сла́вꙋ прїѧ́лъ є҆сѝ.
Прїимѝ ѿ на́съ, бг҃оно́се, приноси́мое тебѣ̀ пѣ́нїе ѿ чи́ста се́рдца, и҆ возда́ждь мольба́ми твои́ми согрѣше́нїй ѡ҆ставле́нїе и҆ спасе́нїе, всече́стне.
Бг҃оро́диченъ:
Ꙗ҆́кѡ ко́рень сꙋ́щꙋ вои́стиннꙋ нетлѣ́нїѧ, тѧ̀ дв҃о, всѝ вѣ́рнїи, и҆ ᲂу҆твержде́нїѧ, хвала́ми почита́емъ: ты́ бо ѵ҆поста́сное безсме́ртїе на́мъ родила̀ є҆сѝ.
Стїхи̑ры прпⷣбнагѡ, гла́съ д҃. Подо́бенъ: Ꙗ҆́кѡ до́блѧ:
Воздержа́нїемъ мꙋ́дрость плотскꙋ́ю ᲂу҆мертви́лъ є҆сѝ, ꙳ и҆ дꙋ́шꙋ ѡ҆живи́лъ є҆сѝ посто́мъ, ꙳ и҆ добродѣ́телей соверше́нїемъ. ꙳ ѿсю́дꙋ же и҆ ꙗ҆ви́лсѧ є҆сѝ, ꙳ ꙗ҆́кѡ жи́въ по кончи́нѣ вои́стиннꙋ: ꙳ ꙗ҆́коже бо со́нъ вмѣни́сѧ тебѣ̀ сме́рть, ꙳ къ бг҃ꙋ преста́вльшꙋсѧ, ꙳ и҆ въ рꙋ́цѣ дꙋ́шꙋ прело́жшꙋ є҆мꙋ̀, ꙳ а҆ка́кїе сла́вне.
Страсте́й ᲂу҆спи́лъ є҆сѝ ꙳ жела̑нїѧ, а҆ка́кїе, ꙳ бдѣ́нїе всено́щное ꙗ҆́кѡ стѧжа́въ, ꙳ послꙋша́нїе и҆ смире́нїе, ꙳ поꙋче́нїе же бжⷭ҇твенныхъ писа́нїй, ꙳ и҆ се́рдце чи́сто, ꙳ и҆ ᲂу҆́мъ несмꙋще́нъ. ꙳ тѣ́мже бы́лъ є҆сѝ и҆ прїѧ́телище дх҃а ст҃а́гѡ, ꙳ зари̑ чꙋде́съ возсїѧ́въ концє́мъ.
Мїрска́гѡ пристра́стїѧ ꙳ до конца̀ возгнꙋша́всѧ, ꙳ безстра́стїѧ сосꙋ́дъ бы́лъ є҆сѝ: ꙳ любомꙋ́дрїѧ же, сла́вне, ꙳ дѣ́тельнымъ восхожде́нїемъ, ꙳ возвы́силсѧ є҆сѝ къ самомꙋ̀ жела́нїю коне́чномꙋ, ꙳ и҆ ᲂу҆зрѣ́лъ є҆сѝ та́йнымъ видѣ́нїемъ ꙳ неви́димыхъ недомы́слєнныѧ и҆ бжⷭ҇твєнныѧ добрѡ́ты, ꙳ а҆ка́кїе всемꙋ́дре и҆ блаже́нне.
Сла́ва, и҆ ны́нѣ, бг҃оро́диченъ:
Ѻ҆ц҃ꙋ̀ є҆диносꙋ́щна ꙳ и҆ дх҃ꙋ сопресто́льна, ꙳ и҆зъ чⷭ҇тыхъ крове́й твои́хъ воплоти́ла є҆сѝ, ꙳ и҆ па́че сло́ва породила̀ є҆сѝ, ꙳ во двꙋ́хъ познава́ема дѣ́йственныхъ сꙋщества́хъ ꙳ и҆́стиннѡ и҆ хотѣ́нїихъ. ꙳ є҆го́же молѝ, прест҃а́ѧ дв҃о, ꙳ ꙗ҆́кѡ сн҃а твоего̀ и҆ бг҃а, ꙳ спастѝ вѣ́рою чи́стою тебѐ блажа́щыѧ.
Крⷭ҇тобг҃оро́диченъ. Подо́бенъ то́йже:
А҆́гнца и҆ па́стырѧ тѧ̀, ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тебѣ̀ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ на д҃. є҆гѡ́же краегране́сїе: Воспѣва́ти твою̀ ны́нѣ да́ждь, мч҃ниче, бл҃года́ть. І҆ѡ́сифъ.
Канѡ́нъ.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Пою́ща свѣтоно́снꙋю твою̀ па́мѧть, мꙋ́чениче парамо́не, свѣща́тельными дх҃а зарѧ́ми се́рдце моѐ просвѣтѝ, и҆ пребыва́ти мѝ бжⷭ҇твенными законоположе́ньми ᲂу҆крѣпѝ.
Мч҃ническимъ пресвѣ́тлѡ благосла́вїемъ, бл҃же́нне, ѡ҆богати́лсѧ є҆сѝ, мꙋ́ченическими просїѧ́въ добро́тами, и҆ кра́сными ра́нами ᲂу҆краси́всѧ, парамо́не. тѣ́мже тѧ̀ вѣ́рнѡ ᲂу҆блажа́емъ.
Во́дъ животво́рныхъ дх҃а сы́й и҆спо́лненъ, безбо́жїѧ зно́емъ лю́тѣ и҆ста́ѧвшыѧ ѡ҆роси́лъ є҆сѝ, и҆ къ водѣ̀, сла́вне, воспокое́нїѧ пꙋтеводи́лъ є҆сѝ.
Бг҃оро́диченъ:
Въ лѣ́то безлѣ́тнаго родила̀ є҆сѝ, человѣ́ка бы́вша, є҆го́же прилѣ́жнѡ молѝ, чⷭ҇таѧ, ꙗ҆́кѡ сн҃а твоего̀ и҆ гдⷭ҇а, дꙋшѝ моеѧ̀ лѣ̑тныѧ стра̑сти ᲂу҆врачи́ти, всенепоро́чнаѧ.
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Возноше́нїе вра́жїе, смири́всѧ хрⷭ҇та̀ ра́ди, разрꙋши́лъ є҆сѝ, и҆ тогѡ̀ полкѝ мече́мъ терпѣ́нїѧ ссѣ́клъ є҆сѝ.
Разрꙋши́лъ є҆сѝ лꙋка́вый совѣ́тъ, и҆́же на вѣ́рꙋ на́шꙋ, и҆ крѣ́пкѡ пострада́лъ є҆сѝ, мч҃ниче страстоте́рпче парамо́не.
Оу҆крѣпи́лсѧ є҆сѝ бжⷭ҇твенною благода́тїю, ꙗ҆́кѡ во́инъ си́ленъ, и҆ лю̑тыѧ мꙋ̑ки, мꙋ́чениче, ꙗ҆́коже со́нъ вмѣни́лъ є҆сѝ.
Бг҃оро́диченъ:
Оу҆крѣпѝ мо́й ᲂу҆́мъ, совраща́емь мно́гими страстьмѝ, мт҃и бж҃їѧ пречⷭ҇таѧ: ꙗ҆́кѡ да по до́лгꙋ сла́влю тѧ̀.
Сѣда́ленъ, гла́съ д҃. Подо́бенъ: Вознесы́йсѧ:
Терпѣ́нїемъ бжⷭ҇твенныхъ повелѣ́нїй ѡ҆чи́стилъ є҆сѝ дꙋ́шꙋ ѿ скве́рны, и҆ къ страда́льческомꙋ пости́глъ є҆сѝ соверше́нїю: жре́ти бо кꙋмі́рѡмъ ѿре́клсѧ є҆сѝ прелє́стнымъ, подража́ѧ хрⷭ҇та̀, копїе́мъ закла́нъ бы́лъ є҆сѝ: но прилѣ́жнѡ молѝ є҆го̀ ѡ҆ мі́рѣ, всебл҃же́нне парамо́не.
Сла́ва, и҆ ны́нѣ, бг҃оро́диченъ:
По бз҃ѣ въ тво́й, бцⷣе, прибѣга́ю смире́нный, покро́въ бжⷭ҇твенный, припа́даѧ молю́сѧ: поми́лꙋй, пречⷭ҇таѧ, ꙗ҆́кѡ превзыдо́ша главꙋ̀ мою̀ грѣсѝ, и҆ бою́сѧ, влⷣчце, мꙋ́ки, и҆ трепе́щꙋ. моле́нїе сотворѝ, чⷭ҇таѧ, къ сн҃ꙋ твоемꙋ̀, ѿ си́хъ и҆зба́вити мѧ̀.
Крⷭ҇тобг҃оро́диченъ:
И҆зъ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Се́рдце твоѐ мꙋ́жествомъ ѡ҆гражда́емо, и҆ дерзнове́нїемъ, сла́вне, разжига́емо, мꙋ̑ки многоплетє́нныѧ, младе́нєцъ стрѣлѧ̑нїѧ, мꙋ́чениче доблемꙋ́дренне, вмѣни́лъ є҆сѝ.
Оу҆мерщвлѧ́еми повелѣ́нїемъ мꙋчи́телѧ страда́льцы ви́дѣвъ, ꙗ҆́коже ѻ҆нѝ, бжⷭ҇твеннꙋю ре́вность прїѧ́ше мч҃никъ парамо́нъ, къ страда́нїю прїи́де.
Крѣ́пкѡ тѧ̀ растѧга́ема, и҆ кѡ́пїи неми́лостивнѡ бодо́ма, и҆ кѡ́зни вра̑жїѧ побѣжда́юща, хрⷭ҇то́съ вѣнча́ тѧ подвигополо́жникъ, бл҃же́нне парамо́не.
Терпѣ́нїю ᲂу҆дивлѧ́ѧсѧ мꙋ́ченикѡвъ, и҆ тѣ́хъ соверше́нїю дивѧ́сѧ, сла́вне, тѣ́хъ приѡбщи́лсѧ є҆сѝ ре́вности вѣ́ры и҆ пречⷭ҇тно́мꙋ страда́нїю.
Бг҃оро́диченъ:
Оу҆мерщвлены̀ человѣ́ки престꙋпле́нїемъ живоно́снымъ твои́мъ рождество́мъ, дв҃о марі́е, всѣ́хъ ѡ҆живи́ла є҆сѝ. тѣ́мъ тѧ̀ сла́вимъ и҆ бг҃олѣ́пнѡ ᲂу҆блажа́емъ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
Да́ръ многоцѣ́нный тебѐ сама́го прине́слъ є҆сѝ творцꙋ̀ твоемꙋ̀, пострада́въ и҆ пре́лесть побѣди́въ, мꙋ́ченикѡвъ ᲂу҆добре́нїе.
Кꙋми́ры, мꙋ́дре, и҆ де́мѡнскаѧ ка̑пища сокрꙋши́лъ є҆сѝ, ᲂу҆твержде́но помышле́нїе стѧжа́въ, на ка́мени бжⷭ҇твенныѧ вѣ́ры, парамо́не.
Де́мѡнѡвъ мно́жество мꙋ́жественнѡ ѡ҆стрꙋпи́лъ є҆сѝ, ѡ҆стрꙋпле́нїемъ пло́ти твоеѧ̀, страда́льче доблемꙋ́дренный. тѣ́мже тѧ̀ ᲂу҆блажа́емъ.
Бг҃оро́диченъ:
Равноче́стенъ ѻ҆ц҃ꙋ̀ сы́й и҆ дх҃ꙋ гдⷭ҇и, ѿ чи́стыхъ твои́хъ крове́й воплоти́сѧ, чⷭ҇таѧ, чл҃вѣ́къ бы́въ.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Не бы́лъ є҆сѝ во вре́мѧ подвигѡ́въ лѣни́въ, встанли́въ же па́че, и҆ бжⷭ҇твенномꙋ страда́нїю до́блественъ. сегѡ̀ ра́ди вѣне́цъ сла́вы полꙋчи́лъ є҆сѝ.
Мꙋ́ченикѡвъ собо́рꙋ себѐ сочета́лъ є҆сѝ, сконча́вшихсѧ ᲂу҆се́рднѡ, пре́жде твоегѡ̀ страда́нїѧ, приснопа́мѧтне, и҆ съ ни́ми нбⷭ҇номꙋ черто́гꙋ сподо́билсѧ є҆сѝ.
Ко́пїѧ подража́телѧ тѧ̀ хрⷭ҇то́ва содѣ́лаша, и҆́миже пробода́емь, мꙋ́чениче, къ немꙋ̀ восте́клъ є҆сѝ вѣнцено́сецъ, ᲂу҆мертви́въ терпѣ́нїѧ ѻ҆рꙋ́жїемъ несмы́слєнныѧ.
Бг҃оро́диченъ:
И҆зба́ви мѧ̀ собла́знѡвъ жите́йскихъ, пренепоро́чнаѧ, въ нощѝ невѣ́дѣнїѧ безмѣ́стными помышлє́нїи ѡ҆держи́маго и҆ ѕло́бою вра́жїею при́снѡ ѡ҆мрача́емаго.
По ѕ҃ пѣ́сни мꙋ́чениченъ ѻ҆ктѡ́иха.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Враче́вствъ и҆ чꙋде́съ благода́тїю, мꙋ́дре мꙋ́чениче, ѿ бг҃а ѡ҆бога́щсѧ свѣ́тлѡ, врачꙋ́еши зовꙋ́щыѧ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Простира́емыхъ мꙋ́къ небре́глъ є҆сѝ, всѐ попече́нїе и҆мѣ́ѧ на нб҃сѣ́хъ, и҆ зовы́й, достосла́вне: благослове́нъ є҆сѝ въ хра́мѣ сла́вы твоеѧ̀, гдⷭ҇и.
Ты̀ крове́й, страда́льче, ѻ҆гне́мъ всю̀ попали́лъ є҆сѝ ве́щь безбо́жїѧ, сла́вне, лꙋка́вꙋю: росо́ю же чꙋде́съ твои́хъ, сꙋ́щыѧ въ зно́и лю́тыхъ ѡ҆роша́еши, парамо́не, зовы́й: благослове́нъ є҆сѝ въ хра́мѣ сла́вы твоѧ̀, гдⷭ҇и.
Бг҃оро́диченъ:
Ра́дꙋйсѧ, є҆ди́на ра́дость ро́ждшаѧ человѣ́кѡмъ, ра́дꙋйсѧ, нб҃о и҆ прⷭ҇то́ле херꙋві́мскїй, и҆ пресла́внаѧ пала́то црⷭ҇твꙋющагѡ всѣ́хъ вѣкѡ́въ, всенепоро́чнаѧ влⷣчце.
Пѣ́снь и҃. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Бо́драго тѧ̀ храни́телѧ дꙋша́мъ стѧжа́вше, ѡ҆богати́хомсѧ, ᲂу҆сповꙋ́юща де́мѡнскаѧ мечта̑нїѧ всегда̀, и҆ пло́ти свирѣ̑пыѧ во́лны, и҆ бꙋ́рю помышле́нїй, мꙋ́чениче многострада́льне, вопїю́щихъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Стрꙋѧ́ми твои́хъ свѧще́нныхъ крове́й багрѧни́цꙋ ѡ҆червлени́лъ є҆сѝ себѣ̀, ѡ҆бветша́нїе весьма̀ прїѧ́ти не и҆мꙋ́щꙋ, и҆ свѣ́тлѡ ᲂу҆краша́емь на нб҃сѣ́хъ ѡ҆бита́еши, вопїѧ̀, блаже́нне: благослови́те, всѧ̑ дѣла̀ гдⷭ҇нѧ, гдⷭ҇а.
Ꙗ҆́коже ѻ҆вча̀ чи́стое, и҆ же́ртва непоро́чнаѧ, и҆ приноше́нїе всесожега́емо ᲂу҆́гльми свѧще́ннагѡ, мꙋ́чениче, страда́нїѧ, страстополо́жникꙋ твоемꙋ̀ хрⷭ҇тꙋ̀ прине́слсѧ є҆сѝ, мꙋ́дре, поѧ̀: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Зако́на тѧ̀ сѣ̑ни и҆ прⷪ҇ро́кѡвъ проначерта́ша, чⷭ҇таѧ, проповѣ̑данїѧ, неизрече́ннѡ хотѧ́щꙋ бы́ти бг҃а на́шегѡ роди́тельницꙋ, бг҃облагода́тнаѧ чⷭ҇таѧ: є҆мꙋ́же всѝ пое́мъ: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ, веселѧ́щесѧ, тѧ̀, бцⷣе, велича́емъ.
Сѐ свѣтоза́рнагѡ страстоте́рпца свѣтоѧвле́ннаѧ ѡ҆сїѧ̀ па́мѧть, всѣ́хъ вѣ́рныхъ сердца̀ просвѣща́ющи бжⷭ҇твеннымъ дх҃омъ, ра́достнѡ ликовствꙋ́ющихъ и҆ вѣ́рою блажа́щихъ.
Ꙗ҆́кѡ седмокрꙋ́жною десѧти́цею и҆ трегꙋ́бною со́тницею непобѣди́мыхъ мꙋ́ченикѡвъ совокꙋплѧ́емь: съ ни́миже тѣ́ло твоѐ, мꙋ́чениче хрⷭ҇то́въ, лежи́тъ, и҆ съ ни́ми молѝ спасти́сѧ на́мъ.
По́прище проше́дше болѣ́зненное, многови́дныхъ мꙋ́къ и҆спо́лнено, и҆ со хрⷭ҇то́мъ мі́ръ побѣди́вшимъ, свѣ́тлѡ побѣди́вше, вѣнцено́сцы мч҃ницы на нб҃сѣ́хъ жи́тельствꙋете.
Взѧ́тъ бы́лъ є҆сѝ ѿ землѝ, и҆ по́чєсти твои́хъ пѡ́двигъ прїѧ́лъ є҆сѝ, ны́нѣ же рѣ́ки и҆сточа́еши на́мъ чꙋде́съ тебѐ чтꙋ́щымъ и҆ благоче́стнѡ па́мѧть твою̀ торжествꙋ́ющымъ, парамо́не.
Бг҃оро́диченъ:
Просвѣтѝ дꙋшѝ моеѧ̀ ѕѣ̑ницы ѡ҆мрачє́нныѧ невидѣ́нїемъ тлетво́рнагѡ грѣха̀, бг҃ороди́тельнице пречⷭ҇таѧ влⷣчце: ты́ бо вѣ́рныхъ є҆сѝ по́мощь и҆ просвѣще́нїе, чⷭ҇таѧ.
Свѣти́ленъ. Подо́бенъ: Жєны̀ ᲂу҆слы́шите:
Мно́жество непобѣди́мое во́инства, сосло́вїе бжⷭ҇твенно непобѣди́мое мꙋ́ченикѡвъ, благочестномꙋ́дреннѡ воспои́мъ, и҆мꙋ́ще чинонача́льника парамо́на чꙋ́днаго, ѡ҆бличи́вшаго мꙋчи́телѧ, и҆́же со всѣ́ми мꙋ́ченики вѣне́цъ полꙋчѝ сла́вы.
Сла́ва, и҆ ны́нѣ, Бг҃оро́диченъ:
Ра́дꙋйсѧ, бж҃їѧ пала́то: ра́дꙋйсѧ, горо̀ ѡ҆сѣне́ннаѧ: ра́дꙋйсѧ, кꙋпино̀ неѡпали́маѧ: ра́дꙋйсѧ, прⷭ҇то́ле сла́вы: ра́дꙋйсѧ, бжⷭ҇твеннаѧ трапе́зо: ра́дꙋйсѧ, ста́мно всезлата́ѧ: ра́дꙋйсѧ, свѣ́щниче всесвѣ́тлый: ра́дꙋйсѧ, ле́гкїй ѻ҆́блаче, дв҃о мт҃и марі́е.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.