Божественнаѧ лїтꙋргі́а свѧта́гѡ а҆по́стола і҆а́кѡва, бра́та бо́жїѧ
сохранена орфография оригинала
БОЖЕСТВЕННАѦ ЛІТꙊРГІ́А СВѦТА́ГѠ АПО́СТОЛА ІА́КѠВА, БРА́ТА БО́ЖІѦ
София, 1948
Входѧ́ Архїере́й во хра́мъ въ ма́нтїю не облачи́тсѧ, а прїи́мъ жезлъ то́кмѡ въ рꙋ́кꙋ безъ панꙋклі́и (сꙋлка́) ста́нетъ предъ свѧты́ми двє́рьми поклони́всѧ три́жды къ восто́кѡмъ глаго́лѧ въ себѣ́ «Бо́же, очи́сти мѧ, грѣ́шнаго»! цѣлꙋ́етъ о́бразъ Хрїсто́въ и Богоро́дицы; та́же и еще́ три́жды поклони́всѧ къ восто́кѡмъ, покланѧ́етсѧ сослꙋжа́щымъ и наро́дꙋ, и вхо́дитъ во олта́рь ю́жными две́рьми. По обы́чаю поклони́всѧ свѧтѣ́й трапе́зѣ и цѣлова́въ ю, облача́ютъ єго́ дїа́кони ничто́же глаго́люще въ стїха́рь, єпїтрахи́ль, по́ѧсъ, нарꙋка́вницы, па́лицꙋ, фело́нь и вели́кїй омофо̀рїй (єгѡ́же не снима̀ютъ до конца́ лїтꙋргі́и) безъ панагі̀и, ми́тры, орлецѡ́въ и архїере́йскихъ свѣ́щникѡвъ (дїки́рїѧ и трики́рїѧ). Облача́ютсѧ та̀кѡжде и вси сослꙋжа́щїи свѧще́нницы же и дїа́кони во своѧ́ си ихъ оде́жды. Еди́нъ отъ свѧще́нникѡвъ ꙋмы́въ рꙋ́ки и поклони́всѧ три́жды предъ жѐртвенникомъ, соверша́етъ проскоми́дїю ничто́же глаго́лѧ: изрѣ́зоваетъ свѧты́й А́гнецъ и полага́етъ на ді́скосъ; влива́етъ въ свѧтꙋ́ю ча́шꙋ отъ вина́ вкꙋ́пѣ и воды́; та́же по обы́чаю Іерꙋсали́мскомꙋ сосꙋ́дѡвъ не покрыва́етъ, по обы́чаю же о́строва Закѵ́нѳа покрыва́етъ ѧ, ꙗ̀коже обы́чнѡ, кадѧ̀ пе́рвѣе звезди́цꙋ и покро́вы. А́ще же изво́литъ предстоѧ́тель, мо́жетъ соверши́ти проскоми́дїю обы́чнꙋю по чи́нꙋ Златоꙋ́стагѡ, то́кмѡ зри части́цꙋ девѧ́тꙋю въ че́сть и па́мѧть свѧта́гѡ апо́стола Іа́кѡва, Бра́та Бо́жїѧ, изѧ́ти. По проскоми́дїи свѧты́хъ дарѡ́въ, стоѧ́ предъ свѧто́ю трапе́зою заключе́нымъ єще́ кра́снымъ две́ремъ глаго́летъ та́йнѡ моли́твꙋ сїю́ Архїере́й (а́ще ли же нѣсть Архїере́а, Іере́й):
Во мно́жествѣ грѣхѡ́въ осквернѐннагѡ да мѧ не ꙋничижи́ши, Влады́ко Го́споди Бо́же нашъ! Се бо пристꙋпи́хъ къ боже́ственномꙋ семꙋ́ и небе́сномꙋ та́инствꙋ Твоемꙋ́, не ꙗкѡ досто́инъ сый, но наТвою́ взира́ѧ благосты́ню испꙋща́юТи гласъ сей: Бо́же, ми́лостивъ бꙋ́ди мнѣ, грѣ́шномꙋ[[Лук. 18:13.]] Согрѣши́хъ на не́бо и предъ Тобо́ю и нѣсмь досто́инъ[[Сравни Лук. 15:18 и 21]] воззрѣ́ти на свѧще́ннꙋю Твою́ сїю́ и дꙋхо́внꙋю трапе́зꙋ, на не́йже единоро́дный Твой Сынъ и Госпо́дь нашъ Іисꙋ́съ Хрїсто́съ мнѣ, грѣ́шномꙋ и всѧ́кою скве́рною окалѧ́нномꙋ, та́йнѡ предла́гаетсѧ въ же́ртвꙋ! Сегѡ́ ра́ди Тебѣ́ молбꙋ́ и благодаре́нїе приношꙋ́ ниспосла́ти ми Дꙋ́ха Твоего́ Утѣ́шителѧ, ꙋкрѣплѧ́юща и ꙋтвержда́юща мѧ къ слꙋ́жбѣ сей и отъ Тебе́ возвѣще́нный ми гласъ неосꙋжде́ннѡ лю́демъ сей провѣща́ти сподо́би! Во Хрїстѣ́ Іисꙋ́сѣ, Го́сподѣ на́шемъ, съ Ни́мже благослове́нъ єси́ со пресвѧты́мъ, благи́мъ, животворѧ́щимъ и єдиносꙋ́щнымъ Твои́мъ Дꙋ́хомъ, ны́нѣ и при́снѡ и во вѣ́ки вѣкѡ́въ, Ами́нь.
По семъ дїа́кони отверза́ютъ ца́рскїѧ две́ри, исхо́дѧтъ на солею́ и ста́нꙋтъ одеснꙋ́ю и ошꙋ́юю ца́рскихъ вратъ съ лице́мъ къ наро́дꙋ. Егда́ же вре́мѧ, кі́йждо ихъ глаго́летъ дїа́конства своѧ́ ставъ на среди́нѣ солеи́ съ лице́мъ къ наро́дꙋ. Архїере́й (или Іере́й) стоѧ́ предъ свѧто́ю трапе́зою съ лице́мъ къ восто́кѡмъ, возглашаетъ:
Сла́ва Отцꙋ́ и Сы́нꙋ и Свѧто́мꙋ Дꙋ́хꙋ, тро́ичномꙋ и еди́нномꙋ свѣ́тꙋ Божества́, еди́ннѣ въ Тро́ицѣ сꙋ́щаго и раздѣлѧ́емаго нераздѣ́льнѣ! Тро́ица бо едѝнъ Богъ Вседержи́тель, Егѡ́же сла́вꙋ повѣ́даютъ небеса́, землѧ́ же влады́чество Егѡ́, мо́ре держа́вꙋ Егѡ́ и всѧ чꙋ́вственнаѧ же и ꙋ́мнаѧ тварь вели́чество Егѡ̀ проповѣ́дꙋетъ всегда́! Ꙗ́кѡ Томꙋ́ подоба́етъ всѧ́каѧ сла́ва, честь, держа́ва, вели́чїе и великолѣ́пїе, ны́нѣ и при́снѡ и во вѣки вѣкѡ́въ!
Лю́дїе: Ами́нь!
Архїере́й самъ глаго́летъ или́ благословлѧ́етъ Іере́ѧ сослꙋжа́щаго глаго́лати моли́твꙋ сїю́ въ слы́шанїе всѣмъ:
Благодѣ́телю и Царю́ вѣкѡ́въ и тва́ри всѧ́кїѧ Содѣ́телю, прїими́ приходѧ́щꙋю Ти Хрїсто́мъ Твои́мъ це́рковь Твою́! Коемꙋ́ждо поле́зное проше́нїе испо́лни! Приведи́ всѣхъ въ соверше́нїе и досто́йны насъ содѣлай благода́ти освѧще́нїѧ Твоегѡ́, собира́ѧ насъ во свѧтꙋ́ю Твою́ собо́рнꙋю и апо́стольскꙋю це́рковь, ю́же стѧжа́лъ єси́ честно́ю кро́вїю единоро́днагѡ Твоегѡ́ Сы́на, Го́спода же и Спа́са на́шегѡ Іисꙋ́са Хрїста́, съ Ни́мже благослове́нъ єси́ и препросла́вленъ съ пресвѧты́мъ и благи́мъ животворѧ́щимъ Твои́мъ Дꙋ́хомъ, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Дїа́конъ, всегда́ лице́мъ обраще́нный къ лю́демъ, возглаша́етъ:
Го́сподꙋ помо́лимсѧ!
Лю́демъ ничто́же отвѣщава́ющымъ, прїи́мъ Архїере́й (или́ Іере́й) кади́ло и кадѧ́ св. трапе́зꙋ возглаша́етъ зрѧ къ восто́кѡмъ моли́твꙋ сїю́:
Бо́же, прїе́мый А́велевы да́ры, Нѡ́евꙋ и Авраа́мовꙋ же́ртвꙋ, Аарѡ́ново и Заха̀рїино кади́ло, прїими́ и отъ рꙋкъ насъ грѣ́шныхъ кади́ло сїе́ в̾воню́ благоꙋха́нїѧ и оставле́нїе грѣхѡ́въ на́шихъ и всѣхъ люде́й Твои́хъ! Ꙗ́кѡ благословѐнъ єси́ и Тебѣ́ подоба́етъ сла́ва, Отцꙋ́ и Сы́нꙋ и Свѧто́мꙋ Дꙋ́хꙋ, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Та́же вхо́дѧтъ дїа́кони во свѧты́й олта́рь ма́лыми две́рьми. Архїере́й же (или́ Іере́й) отдае́тъ кади́льницꙋ. И а́бїе пѣвцы́ начина́ютъ со сладкопѣ́нїемъ пѣ́ти тропа́рь: Единоро́дный Сы́не… Прїи́мъ же Архїере́й (или́ Іере́й) отъ свѧты́ѧ трапе́зы Писа́нїѧ Свѧта́ѧ, Проро́ки и Апо́столъ, и врꙋчи́въ ѧ Іере́ємъ или дїа́конѡмъ, предидꙋ́щымъ свѣщено́сцемъ, исхо́дитъ изъ олтарѧ́ и твори́тъ входъ, держа́ самъ десно́ю рꙋко́ю жезлъ, шꙋ́йцею же свѧто́е Еѵа́ггелїе на пе́рсѣхъ. Обыше́дше свѧтꙋ́ю трапе́зꙋ съ ю́жныѧ страны́, ꙗкоже обы́чнѡ, исхо́дѧтъ се́верными две́рьми и и́дꙋтъ да́же до за́падныѧ стены́ хра́ма. Та́же возвра́щшесѧ сре́днею ча́стїю хра́ма ко олтарю́ и прише́дше къ анало́гїю, Архїере́й полага́етъ на него́ Еѵа́ггелїе, Апо́столъ и Проро́ки, ше́дше же ста́нꙋтъ у степене́й солеи́ до конца́ пѣ́нїѧ; а свѣщено́сцы ста́нꙋтъ со свѣща́ми съ обѣ́ихъ странъ анало́гїѧ лице́мъ дрꙋгъ проти́вꙋ дрꙋ́га до внесе́нїѧ свѧты́хъ Писа́нїй во олта́рь. Та́же Архїере́й (или́ Іере́й) возгла́снѡ мо́литсѧ зрѧ къ восто́кѡмъ:
Бо́же Вседержи́телю, великоимени́те Го́споди, да́вый намъ входъ во свѧта́ѧ свѧтыхъ прише́ствїемъ єдиноро́днагѡ Твоегѡ́ Сы́на, Го́спода же и Бо́га и Спа́са на́шегѡ Іисꙋ́са Хрїста́, мо́лимъ и про́симъ Твою́ благосты́ню, зане́ пристра́шни єсмы́ и тре́петни, хотѧ́ще предста́ти свѧто́мꙋ Твоемꙋ́ же́ртвенникꙋ: ниспосли́ на ны, Бо́же, благода́ть Твою́ благꙋ́ю и освѧти́ на́шѧ дꙋ́шы и тѣлеса́ и дꙋ́хи, и измѣни́ мꙋдрова́нїѧ на́ша ко благоче́стїю, ꙗкѡ да въ чи́стѣй со́вѣсти принесе́мъ Ти да́ры, даѧ́нїѧ, плоды́ во отверже́нїе на́шихъ согрѣше́нїй и во очище́нїе всѣхъ люде́й Твои́хъ! Благода́тїю и человѣколю́бїемъ єдиро́днагѡ Твоегѡ́ Сы́на, съ Ни́мже благослове́нъ єси́ во вѣ́ки вѣкѡ́въ!
Лю́дїе: Ами́нь!
По семъ входѧ́ въ свѧты́й олта́рь, глаго́летъ та́йнѡ моли́твꙋ Архїере́й (или́ Іере́й) прикло́нь главꙋ́:
Ще́дре и ми́лостиве, долготерпѣли́ве и многоми́лостиве и и́стинне Го́споди, при́зри отъ свѧта́гѡ жили́ща Твоегѡ́ и ꙋслы́ши насъ, Твои́хъ рабѡ́въ, и изба́ви ны отъ всѧ́кагѡ искꙋше́нїѧ дїа́волскагѡ же и человѣ́ческагѡ! И не отста́ви отъ насъ твоеѧ́ по́мощи, нижѐ тѧжча́йшагѡ па́че на́шеѧ си́лы наказа́нїѧ да не наведе́ши на ны[[Сравни 1 Корнит 10:13.]] Мы бо недово́льни єсмы́ побѣжда́ти сопроти́внаѧ приключе́нїѧ, Ты же си́ленъ єси́, Го́споди, спаса́ти отъ всѣхъ сопротивле́нїй! Спаси́ ны, Бо́же, отъ тѧ́жкихъ мі́ра сегѡ́ по бла́гости Твое́й, ꙗкѡ да вше́дше съ чи́стою совѣстїю во свѧты́й Твой же́ртвенникъ блаже́ннꙋю и трисвѧтꙋ́ю пѣснь съ небе́сными си́лами неосꙋжде́ннѡ возсле́мъ Ти и благоꙋго́днꙋю Тебѣ́ боже́ственнꙋю соверши́вше слꙋ́жбꙋ сподо́бимсѧ вѣ́чныѧ жи́зни! Ами́нь!
Вше́дшꙋ Архїере́ю со сослꙋжа́щими Іере́й во свѧты́й олта́рь, дїа̀конъ ставъ посредѣ́ солеи́ и зрѧ къ лю́демъ глаго́летъ єктенїю́:
Ми́ромъ Го́сподꙋ помо́лимсѧ!
Лю́дїе: Го́споди, поми́лꙋй!
Ѡ свы́шнѣмъ ми́рѣ и Бо́жїемъ человѣколю́бїи и спасе́нїи дꙋшъ на́шихъ Го́сподꙋ помо́лимсѧ!
По всѧ́комъ проше́нїи дїа́кона пою́тъ лю́дїе: Го́споди, поми́лꙋй!
Ѡ ми́рѣ всегѡ́ мі́ра и соедине́нїи всѣхъ свѧты́хъ Бо́жїихъ церкве́й Го́сподꙋ помо́лимсѧ!
Ѡ спасе́нїи и застꙋпле́нїи господи́на на́шегѡ блаже́ннѣйшагѡ (имѧре́къ), Митрополі́та Софі́йскагѡ и Еѯа́рха Бо́лгарскагѡ (или Высокопреосвѧще́ннѣйшагѡ Митрополі́та на́шеѧ имѧре́къ), всегѡ́ при́чта и хрїстолюби́выхъ люде́й Го́сподꙋ помо́лимсѧ!
Пресвѧтꙋ́ю, пречи́стꙋю, пресла́внꙋю, благослове́ннꙋю влады́чицꙋ на́шꙋ Богоро́дицꙋ и при́снодѣвꙋ Марі́ю, свѧта́го Іѡа́нна сла́внаго проро́ка, предте́чꙋ и крести́телѧ, боже́ственныхъ и всехва́льныхъ апо́столѡвъ, сла́вныхъ проро́кѡвъ и побѣ́донсныхъ мꙋ́ченикѡвъ, и всѣхъ свѧты́хъ и пра́ведныхъ помѧ́немъ, ꙗкѡ да моли́твами и́хъ и предста́тельствы вси поми́ловани бꙋ́демъ!
Архїере́й (или́ Іере́й): Ꙗкѡ свѧтъ єси. Го́споди Бо́же нашъ, и во свѧты́хъ живе́ши и почива́еши и Тебѣ́ сла́вꙋ и трисвѧтꙋ́ю пѣснь возсыла́емъ, Отцꙋ и Сы́нꙋ и Свѧто́мꙋ Дꙋ́хꙋ, ны́нѣ и при́снѡ и во вѣ́ки вѣкѡ́въ.
Лю́дїе: Ами́нь! И а́бїе пою́тъ трисвѧтꙋю пѣснь три́жды по рѧ́дꙋ, та́же Сла́ва и Ны́нѣ, Свѧты́й Безсме́ртный, поми́лꙋй насъ! И возглаша́етъ дїа́конъ: Си́ла! Пѣвцы́ же пою́тъ послѣ́днее трисвѧто́е.
Тогда́ Архїере́й (или́ Іере́й) ставъ во свѧты́хъ две́рехъ и зрѧ къ лю́демъ, зна́менꙋетъ ихъ глаго́лѧ: Миръ всѣмъ:
Лю́дїе: И дꙋ́хови твоемꙋ́! И а́бїе начина́ютъ пѣвцы́ пѣ́ти ко́снѡ: Аллилꙋ́їа (три́жды)!
И исходитъ Архїере́й со сослꙋжа́щими изъ олтарѧ́ свѧты́ми две́рьми, въ шꙋ́йцѣ имы́й жезлъ, и и́детъ на среди́нꙋ хра́ма на амвѡ́нъ. И сѧ́детъ на ꙋгото́ванное ємꙋ́ мѣ́сто, повели́тъ же и пресвѵ́терѡмъ сѣ́сти, а дїа́кони ста́нꙋтъ задъ ни́ми съ лице́мъ къ за́падѡмъ. Чтецъ прїи́мъ благослове́нїе отъ Архїере́а ста́нетъ предъ анало́гїемъ и по сконча́нїи пѣ́нїѧ возглаша́етъ: Собо́рнагѡ посла́нїѧ Іа́кѡвлѧ чте́нїе (или́ ины́ѧ кни́ги). Дїа́конъ возглаша́етъ: Во́нмемъ! И прїи́мъ благослове́нїе отъ Архїере́а кади́тъ: Архїере́й же та́йнѡ глаго́летъ моли́твꙋ кажде́нїѧ:
Тебѣ́, испо́лненномꙋ всѧ́кагѡ благово̀нїѧ и ра́дости, Го́споди Бо́же нашъ, отъ ни́хже далъ єси́ намъ прино́симъ Ти кади́ло сїе́. Да вознесе́тсѧ ꙋ́бо, мо́лимсѧ, предъ Тобо́ю отъ ꙋбо̀гихъ на́шихъ рукъ во свѧты́й и пренебе́сный Твой же́ртвенникъ в̾воню́ благоꙋха́нїѧ, во оставле́нїе грѣхѡ́въ на́шихъ и во очище́нїе люде́й Твои́хъ! Благода́тїю и щедро́тами и человѣколю́бїемъ единоро́днагѡ Твоегѡ́ Сы́на, съ Ни́мже благослове́нъ єси́ со пресвѧты́мъ и благи́мъ и животворѧ́щимъ Твоѝмъ Дꙋ́хомъ, ны́нѣ и при́снѡ и во вѣ́ки вѣкѡ́въ! Ами́нь!
По исполне́нїи Апостола лю́дїе: Аллилꙋ́їа (три́жды)!
По сихъ же возглаша́етъ дїа́конъ єктенїю́:
Рцемъ вси: Го́споди, поми́лꙋй!
Лю́дїе: Го́споди, поми́лꙋй!
Го́споди, Вседержи́телю небе́сный, Бо́же оте́цъ на́шихъ, мо́лимъ Ти сѧ ꙋслы́ши!
Ѡ ми́рѣ всегѡ́ мі́ра и соедине́нїи всѣхъ свѧты́хъ Твои́хъ церкве́й помо́лимсѧ!
Ѡ спасе́нїи и застꙋпле́нїи господи́на на́шегѡ блаже́ннѣйшагѡ (имѧре́къ), Митрополі́та Софі́йскагѡ и Еѯа́рха Бо́лгарскагѡ (или́ Высокопреосвѧще́ннѣйшагѡ Митрополі̀та на́шегѡ имѧре́къ), всегѡ́ при́чта и хрїстолюби́выхъ люде́й помо́лимсѧ!
Ѡ изба́витисѧ намъ отъ всѧ́кїѧ ско́рби, гнѣ́ва, бѣды́ и нꙋ́жды, плѣне́нїѧ, го́рькїѧ сме́рти и беззако́нїй на́шихъ помо́лимсѧ!
И ѡ предстоѧ́щихъ лю́дехъ, ожида́ющихъ отъ Тебе́ вели́кїѧ и бога́тыѧ ми́лости, мо́лимъ Тѧ умилосѐрдисѧ и поми́луй! Здѣ Архїере́й (или́ Іере́й) обра́щьсѧ къ лю́демъ зна́менуетъ ихъ глаго́лѧ: Спа́си, Бо́же, люди Твоѧ́ и благослови́ достоѧ́нїе Твое́!
Тогда́ лю́дїе: Го́споди, поми́лꙋй!
Па́ки дїа́конъ: Посѣти́ мїръ Твой милостїю и щедро́тами! Возвы́си рогъ хрїстїа́нскїй си́лою честна́гѡ и животворѧ́щагѡ креста́. предста́тельствомъ пресвѧты́ѧ благослове́нныѧ влады́чицы на́шеѧ Богоро́дицы, Предте́чи и апо́столѡвъ Твои́хъ и всѣхъ свѧты́хъ Твои́хъ мо́лимъ Тѧ, многоми́лостиве Го́споди, услы́ши насъ, молѧ́щихсѧ Тебѣ́, и поми́луй!
Лю́дїе: Го́споди, поми́луй! (три́жды).
Архїере́й же (или́ Іере́й) глаго́летъ моли́тву сїю́ та́йнѡ:
Возсїѧ́й въ сердца́хъ на́шихъ, человѣколю́бче Го́споди, вѣ́денїѧ нетлѣ́нный свѣ́тъ и мы́сленныѧ на́ши отве́рзи о́чи во єѵа́ггельскихъ проповѣ́данїй Твои́хъ разуме́нїе! Вложѝ намъ и блаже́нныхъ Твои́хъ за́повѣдей страхъ, да плотскі́ѧ по́хоти попра́вше духо́вное жи́тельство про́йдемъ, всѧ ко благᲂугожде́нїю Твоемꙋ́ и мꙋ́дрствующе, и дѣ́юще!
Во́згласъ: Ты бо єси́ благовѣствува́нїе и просвѣще́нїе, Спасъ и храни́тель душъ и тѣле́съ на́шихъ, Бо́же, и єдиноро́дный Твой Сынъ и Духъ Твой пресвѧты́й, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Тогда́ дїа́конъ а́бїе возглаша́етъ: Про́сти услы́шимъ свѧта́гѡ Еѵа́ггелїа! И востаю́тъ вси́ Архїере́й же и пресвѵ́тери.
Хотѧ́й чести́ Еѵа́ггелїе пресвѵ̀теръ возглаша́етъ:
Отъ Іѡа́нна (или́ ина́гѡ) свѧта́гѡ Еѵа́ггелїа чте́нїе!
Дїа́конъ: Во́нмемъ свѧто́му чте́нїю!
По прочте́нїи па́ки пое́тсѧ Аллилꙋїа, по пропѣ́тїи же глаго́летъ Архїере́й (или́ Іере́й) пᲂуче́нїе наро́ду. По пᲂуче́нїи лю́дїе пою́тъ ко́снѡ: Сла́ва Тебѣ́, Го́споди, сла́ва Тебѣ́! Архїере́й же вземъ кни́гу Еѵа́ггелїа въ шꙋ́йцу, десни́цею держа́ жезлъ, а пресвѵ̀тери ины́ѧ книги Свѧще́нныхъ Писа́нїй отъ анало́гїѧ, вхо́дѧтъ вси во свѧты́й олта́рь свѧты́ми две́рьми. И ста́нутъ вси на свои́хъ си мѣ́стѣхъ. Архїере́й же (или́ Іере́й) мо́литсѧ та́йнѡ зрѧ къ восто́кѡмъ:
Возгласи́вый намъ, Бо́же, боже́ственнаѧ Твоѧ́ и спаси́тельнаѧ словеса́, просвѣти́ дꙋ́шы насъ, грѣ́шныхъ, къ воспрїѧ́тїю предпрочте́нныхъ, ꙗкѡ да не то́чїю слы́шателемъ ви́дѣтисѧ духо́вныхъ рече́нїй, но и творце́мъ бы́ти дѣѧ́нїй благи́хъ[[Иак. 1:22, Рим. 2:13.]], вѣ́ру проходѧ́ще неле́стну, житїе́ непоро́чно, жѝтельство непови́нно во Хрїстѣ́ Іисꙋ́сѣ, Го́сподѣ на́шемъ, съ Ни́мже благослове́нъ єси́ и препросла́вленъ со пресвѧты́мъ и благи́мъ и животворѧ́щимъ Твои́мъ Дꙋ́хомъ, ны́нѣ и при́снѡ и во вѣ́ки вѣкѡ́въ! Ами́нь!
Дїакони же ста́вше на солеи́ лицемъ къ наро́ду, єди́нъ отъ нихъ глаго́летъ єктенїю́ сїю́:
Вне́млемъ приле́жнѡ! Ми́ромъ Го́споду помо́лимсѧ!
Лю́дїе: Го́споди, поми́луй!
Ѡ свы́шнѣмъ ми́рѣ, Бо́жїи человѣколю́бїи и спасе́нїи душъ на́шихъ Го́споду помо́лимсѧ!
Ѡ ми́рѣ всегѡ́ мі́ра и соедине́нїи всѣхъ свѧты́хъ Бо́жїихъ церкве́й Го́споду помо́лимсѧ!
Ѡ спасе́нїи и заступле́нїи господи́на на́шегѡ блаженнѣйшагѡ (имѧре́къ), Митрополі́та Софі́йскагѡ и Еѯа́рха Бо́лгарскагѡ (или́ Высокопреосвѧще́ннѣйшагѡ Митрополі́та на́шегѡ имѧре́къ), всегѡ́ при́чта и хрїстолюби́выхъ люде́й Го́споду помо́лимсѧ!
Ѡ оставле́нїи грѣхѡ́въ и проще́нїи согрѣше́нїй на́шихъ и ѡ изба́витисѧ намъ отъ всѧ́кїѧ ско́рби, гнѣ́ва, бѣды́ и нꙋ́жды и воста́нїѧ врагѡ́въ Го́споду помо́лимсѧ!
День весь соверше́нъ, свѧтъ, ми́ренъ и безгрѣ́шенъ преити́ вси у Го́спода про́симъ!
Лю́дїе: Пода́й, Го́споди!
А́ггела ми́рна, вѣ́рна наста́вника, храни́телѧ душъ и тѣле́съ на́шихъ у Го̀спода про́симъ!
Проще́нїѧ и оставле́нїѧ грѣхѡ́въ и прегрѣше́нїй на́шихъ у Го́спода про́симъ!
До́брыхъ и поле́зныхъ душа́мъ на́шимъ и ми́ра мі́рови у Го́спода про́симъ!
Про́чее вре́мѧ живота́ на́шегѡ въ ми́рѣ и здра́вїи сконча́ти намъ у Го́спода про́симъ!
Хрїстїа́нскїѧ кончи́ны живота́ на́шегѡ, безболѣ́зненны и непосты́дны, и до́брагѡ отвѣ́та на стра́шнѣмъ и тре́петнѣмъ суди́щи Хрїсто́вѣ про́симъ!
Пресвѧтꙋ́ю, пречи́стую, пресла́вную, благослове́нную Влады́чицу на́шу Богоро́дицу и при́снодѣву Марі́ю, свѧта́го Іѡа́нна сла́внаго проро́ка предте́чу и крести́телѧ, боже́ственныхъ и всехва́льныхъ апо́столѡвъ, сла́вныхъ проро́кѡвъ, добропобѣ́дныхъ мꙋ́ченикѡвъ и всѣхъ свѧты́хъ и пра́ведныхъ помѧнꙋ́вше, са́ми себе́ и другъ дрꙋ́га и весь живо́тъ нашъ Хрїстꙋ́ Бо́гу предади́мъ!
Лю́дїе: Тебѣ́, Го́споди!
Архїере́й (или́ Іере́й) та́йнѡ:
Влады́ко животво́рче и благи́хъ пода́телѧ, да́вый человѣ́кѡмъ блаже́нную наде́жду вѣ́чныѧ жи́зни, Го́спода на́шего Іисꙋ́са Хрїста́, сподо́би насъ, Бла́же, во свѧты́ни и сїю́ Ти боже́ственную соверши́ти слꙋ́жбу въ наслажде́нїе бꙋ́дущагѡ блаже́нства!
Архїере́й со пресвѵ̀теры простира́етъ антїми́нсъ, возглаша́ѧ:
Ꙗ́кѡ да подъ держа́вою Твое́ю всегда́ храни́ми и во свѣтъ и́стины путеводи́ми, Тебѣ́ сла́ву и благодаре́нїе возсыла́емъ, Отцꙋ́ и Сы́ну и Свѧто́му Дꙋ́ху, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Дїа́конъ: Въ ми́рѣ Хрїсто́вѣ воспои́мъ! Да никто́ отъ оглаше́нныхъ! Да никто́ отъ непосвѧще́нныхъ! Да никто́ отъ немогꙋ́щихъ съ на́ми моли́тисѧ! Позна́йте другъ дрꙋ́га! Две́ри! Про́сти вси!
И вхо́дѧтъ дїа́кони во свѧты́й олта́рь ма́лыми две́рьми, пѣвцы́ же начина́ютъ ко́снѡ пѣти и со сладкопѣ́нїемъ:
Да молчи́тъ всѧ́каѧ плоть человѣ́ча и да стои́тъ со стра́хомъ и тре́петомъ, и ничто́же земно́е въ себѣ́ да помышлѧ́етъ! Царь бо ца́рствующихъ и Госпо́дь госпо́дствующихъ прихо́дитъ закла́тисѧ и да́тисѧ въ снѣдь вѣрнымъ!
Семꙋ́ пѣва́ему, прїи́мъ Архїере́й жезлъ въ шꙋ́йцу и кади́ло въ десни́цу кади́тъ свѧтꙋ́ю трапе́зу о́крестъ, весь олта́рь, та́же свѧты́ѧ ико́ны, ли́ки и лю́ди по обы́чаю. По кажде́нїи же отложи́въ кади́ло и жезлъ, омыва́етъ рꙋки во свѧты́хъ две́рехъ предъ лице́мъ наро́да и кропи́тъ и́ма наро́дъ. Та́же цѣлꙋ́етъ со пресвѵ̀теры свѧтꙋ́ю трапе́зу, покланѧ́етсѧ ма́лѡ наро́ду и отхо́дѧтъ вси въ предложе́нїе. И дае́тъ ді́скосъ пе́рвомꙋ пресви́теру, ча́шу же второ́му ничто́же глаго́лѧ. И исхо́дѧтъ вси сослужа́щїи се́верными две́рьми со свѣща́ми и кади́лы безъ Архїере́а, и́же ихъ ожида́етъ во свѧтѣ́мъ олтари́. И́детъ же входъ чрезъ весь храмъ да́же до степене́й солеи́, дїа́конѡмъ непреста́ннѡ кадѧ́щымъ предъ свѧты́ми да́ры. И ста́нутъ вси предъ солее́ю в несы́й ді́скосъ одеснꙋ́ю, несы́й же поти́ръ ошꙋюю, а про̀чїи пресвѵ̀тери и дїа́кони по обою́ странꙋ свѧты́хъ двере́й. Тогда́ Архїере́й исхо́дитъ въ ца́рскїѧ дще́ри безъ жезла́ и кади́ла и глаго́летъ къ немꙋ пѐрвый пресвѵ̀теръ ти́химъ гла́сомъ: Архїере́йство твое́ да помѧне́тъ Госпо́дь Богъ во ца́рствїи Свое́мъ, всегда̀, ны́нѣ и при́снѡ и во вѣ́ки вѣкѡ́въ!
Архїере́й отвѣщава́етъ: Свѧще́нство и дїа́конство ва́ше да помѧне́тъ Госпо́дь Богъ во ца̀рствїи Свое́мъ, всегда́, сы́нѣ и прѝснѡ и во вѣ̀ки вѣкѡ́въ!
Таже глаго́летъ моли́тву предложе́нїѧ возгла́снѡ, зрѧ изъ ца́рскихъ двере́й къ за́падѡмъ:
Бо́же, Бо́же нашъ, небе́сный хлѣбъ, пи́щу всемꙋ мі́ру, Го́спода на́шего Іисꙋса Хрїста́, посла́вый Спа́са и изба́вителѧ и благодѣ́телѧ, благословѧ́ща и освѧща́юща насъ, самъ благослови́ предложе́нїе сїе́ (здѣ Архїере́й прїе́млетъ отъ пресвѵ́тера ді́скосъ и поставлѧ́етъ єго́ на свѧтꙋ́ю трапе́зу, та́же возвра́щьсѧ мо́литсѧ зрѧ къ за́падѡмъ) и прїими́ е въ пренебе́сный Твой же́ртвенникъ (здѣ же прїе́млетъ отъ втора́гѡ пресвѵ̀тера свѧтꙋ́ю ча́шу и поставлѧ́етъ ю на свѧтꙋ́ю трапе́зу. И вхо́дѧтъ сослужа́щїи пресвѵ́тери и дїа́кони во свѧты́й олта́рь свѧты́ми две́рьми и ста́нутъ вси на свои́хъ си мѣ́стѣхъ. И мо́литсѧ Архїере́й предъ свѧто́ю трапе́зою возгла́снѡ зрѧ къ восто́кѡмъ). Помѧни́ ꙗкѡ благъ и человѣколю́бецъ прине́сшихъ и и́хже ра́ди принесо́ша! И насъ неосужде́нны сохрани́ во свѧщеннодѣ́йствїи боже́ственныхъ твои́хъ та́инъ! Ꙗ́кѡ свѧти́сѧ и просла́висѧ всечестно́е и великолѣ́пое и́мѧ Твое́, Отца̀ и Сы́на и Свѧта́гѡ Дꙋ́ха, ны́нѣ и при́снѡ и во вѣ́ки вѣкѡ́въ! (Здѣ отлага́й покро́вы, аще суть).
Лю́дїе: Ами́нь!
(А́ще Іере́й литургисꙋ́етъ безъ Архїере́а, кажде́нїе твори́тъ предсто́ѧтель свѧщеннослуже́нїѧ, цѣлꙋ́етъ свѧтꙋ́ю трапе́зу со всѣ́ми сослужа́щыми, покланѧ́етсѧ наро́ду и отхо́дѧтъ вси предложе́нїе, идѣ́же омыва́ютъ рꙋ́ки свѧще́нницы же и дїа́кони. Та́же предстоѧ́тель прїе́млетъ ді́скосъ, вторы́й свѧще́нникъ свѧтꙋ́ю ча́шу, а дїа́конъ кади́льницею кади́тъ предъ свѧты́ми да́ры. Соверши́вше входъ, ꙗкоже предписа́сѧ, ста́нутъ вси предъ солее́ю, идѣ́же предстоѧ́тель глаго́летъ возгла́снѡ моли́тву предложе́нїѧ: «Бо́же, Бо́же нашъ». Сказа́въ же «и прїими́ е въ пренебе́сный Твой же́ртвенникъ», вхо́дѧтъ вси во свѧты́й олта́рь и полага́ютъ свѧта́ѧ на свѧтꙋ́ю трапе́зу, а предстоѧ́тель глаго́лютъ моли́тву до конца́).
Пѣвцы́ допѣва́ютъ херуви́мскую:
Предхо́дѧтъ же семꙋ ли́цы а́ггельстїи со всѧ́кимъ нача́ломъ и вла́стїю, многоочи́тїи херуві́ми и шестокрила́тїи серафі́ми, ли́ца закрыва́юще и пою́ще пѣснь: аллилꙋ́їа, аллилꙋїа аллилꙋ́їа!
Семꙋ́ пѣва́ему, кади́тъ Архїере́й (или́ Іере́й) предложе́ннаѧ, та́йнѡ глаго́лѧ моли́тву сїю́:
Влады́ко вседержи́телю, царю́ сла́вы, Бо́же, вѣ́дый всѧ пре́жде бытїѧ́ ихъ, Самъ прибꙋ́ди намъ во свѧты́й часъ сей, призыва́ющымъ Тѧ, и изба́ви насъ отъ студа́ прегрѣше́нїй! Очи́сти нашъ умъ и помышле́нїѧ отъ скве́рныхъ страсте́й и мїрскі́ѧ пре́лести и всѧ́кагѡ дїа́вольскагѡ дѣ́йства! И прїими́ отъ рукъ насъ грѣ́шныхъ же́ртву сїю́, ꙗкоже прїѧ́лъ єси приноше́нїе А́велево, Нѡ́ево, Аарѡ́ново, Самꙋ́илово и всѣхъ свѧты́хъ Твои́хъ, извавлѧ́ѧ насъ отъ всѧ́кїѧ лука́выѧ ве́щи и спаса́ѧ, во є́же всегда́ благᲂугожда́ти, покланѧ́тисѧ и сла́вити Тебе́ Отца́, и єдиноро́днаго Твоего̀ Сы́на и Дꙋ́ха Твоего́ пресвѧта́го, ны́нѣ и при́снѡ и во вѣ́ки вѣкѡ́въ!
Прїи́мшее благослове́нїе дїа́кони исходѧтъ ма́лыми две́рьми и ста́нутъ на солеи́ лице́мъ къ наро́ду. Сконча́вшусѧ пѣнїю, возглаша́етъ
Дїа́конъ: Премꙋ́дростїю Бо́жїею во́нмемъ!
Лю́дїе: Вѣ́рую во еди́наго Бо́га Отца́ и пр.
Глаго́лему сѵмво́лу вѣ́ры, Архїере́й (или́ Іере́й) та́йнѡ:
Всѣхъ Бо́же и Влады́ко, досто́йны насъ сотвори́ часа́ сегѡ́ недосто́йныхъ, Человѣколю́бче, ꙗкѡ да очи́стившесѧ отъ кова́рства и лицемѣ́рїѧ соедини́мсѧ другъ дрꙋ́гу сою́зомъ ми́ра и любве́, утвержда́еми Твоегѡ́ богоразꙋ́мїѧ освѧще́нїемъ единоро́днымъ Твои́мъ Сы́номъ Хрїсто́мъ, съ Ни́мже благословѐнъ єси со пресвѧты́мъ и благи́мъ и животворѧ́щимъ Твои́мъ Дꙋ́хомъ, ны́нѣ и во вѣ́ки!
По сконча́нїи сѵмво́ла вѣ́ры, дїа́конъ:
Ста́немъ до́брѣ! Ми́ромъ Го́споду помо́лимсѧ:
Архїере́й (или́ Іере́й) возглаша́етъ:
Ꙗ́кѡ Богъ ми́лости, любве́, щедро́тъ и человѣколю́бїѧ єси́, и єдиноро́дный Твой Сынъ и Духъ Твой пресвѧты́й, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
И зна́менуетъ Архїере́й (или́ Іере́й) лю́ди: Миръ всѣмъ!
Лю́дїе: И дꙋ́хови твоемꙋ́!
Дїа́конъ: Возлю́бимъ другъ дрꙋ́га лобза́нїемъ свѧты́мъ!
И пою́тъ пѣвцы́ со сладкопѣнїемъ:
Возлюблю́ Тѧ, Господи, крѣ́посте моѧ́! Госпо́дь утвержде́нїе мое́ и прибѣ́жище мое́ и изба́витель мой[[Псал. 17:2-3.]]
Архїере́й и сослужа́щїи пресвѵ́тери по чи́ну цѣлꙋ́ютъ край ді́скоса и ча́ши и свѧты́ѧ трапе́зы, та́же архїереовꙋ рꙋ́кꙋ и ра́внїи другъ дрꙋ́га во уста́ Та́кѡжде дїа́кони цѣлꙋ́ютсѧ на солеи́ междꙋ собо́ю. Та́же дїа́конъ:
Главы́ на́шѧ Го́сподеви прикло́нимъ!
Лю́дїе вельми́ ко́снѡ: Тебѣ́, Го́споди!
Архїере́й (или́ Іере́й) приклоне́нною главо́ю мо́литсѧ та́йнѡ:
Еди́не ми́лостиве Го́споди и Бо́же, прикланѧ́ющымъ своѧ́ вы́и предъ свѧты́мъ Твои́мъ же́ртвенникомъ и и́щущымъ у Тебе́ духо́вныхъ дарѡ́въ ниспосли́ благода́ть Твою́ и благослови́ всѣхъ насъ всѧ́кимъ благослове́нїемъ духо́внымъ и неоте́млемымъ, И́же в̾вы́шнихъ живы́й и на смире́нныѧ призира́ѧй! Ꙗ́кѡ хва́льно и покланѧ́емо и препросла́влено єсть всесвѧто́е и́мѧ Твое́, Отца́ и Сы́на и Свѧта́гѡ Дꙋ́ха! Ами́нь!
Дїа́конъ обра́щьсѧ ко свѧтѣ́й трапе́зѣ глаго́летъ къ Архїере́ю (или́ Іере́ю) возгла́снѡ: Го́споди, благослови́! Архїере́й (или́ Іере́й) возглаша́етъ:
Госпо́дь да благослови́тъ и сослꙋжитъ намъ и досто́йны да сотвори́тъ предстоѧ́нїѧ свѧта́гѡ Егѡ́ же́ртвенника и прише́ствїѧ (здѣ зна́менуетъ ді́скосъ) свѧта́гѡ Егѡ́ Дꙋ́ха (здѣ зна́менуетъ ча́шу) Свое́ю благода́тїю и человѣколю́бїемъ всегда́, Ны́нѣ и при́снѡ и во вѣ́ки вѣкѡ́въ!
Лю́дїе вельми́ ко́снѡ: Ами́нь!
Семꙋ́ пѣва́ему, покланѧ́етсѧ Архїере́й со сослужа́щими пресвѵ́теры, глаго́лѧ въ себѣ́: Сла́ва в̾вы́шнихъ Бо́гу и на земли́ миръ, въ человѣ́цѣхъ благоволе́нїе[[Лук. 2:14.]] (три́жды) Го́споди, устнѣ́ мои́ отве́рзеши и уста́ моѧ́ возвѣстѧ́тъ хвалꙋ́ Твою́[[Псал. 50:17]] (три́жды) Да испо́лнѧтсѧ уста́ моѧ́ хвале́нїѧ Твоегѡ́, Го́споди, ꙗкѡ да воспою́ сла́ву Твою́, весь день великолѣ́пїе Твое́[[Също 70:8.]] (три́жды).
Та́же покланѧ́ѧсѧ ма́лѡ сослужа́щымъ на о́бѣ страны́ и наро́ду, пое́тъ вкꙋ́пѣ со пресвѵ́теры и дїа́коны:
Возвели́чите Го́спода со мно́ю и вознесе́мъ и́мѧ Егѡ́ вкꙋ́пѣ[[Също 33:4.]]
Лю́дїе же отвѣщава́ютъ: Духъ Свѧты́й на́йдетъ на тѧ и си́ла Вы́шнѧгѡ осѣни́тъ тѧ[[Лук. 1:35.]]
Сослужа́щїи пресвѵ́тери глаго́лютъ ко Архїере́ови ти́химъ гла́сомъ: Помѧни́ и насъ, влады́ко свѧты́й! Архїере́й же отвѣщава́етъ: Да помѧне́тъ васъ Госпо́дь въ ца́рствїи небе́снѣмъ всегда́, ны́нѣ и при́снѡ и во вѣ́ки вѣкѡ́въ! Ами́нь!
По семъ дїа́конъ глаго́летъ ектенїю́ зрѧ къ лю́демъ:
Ми́ромъ Го́споду помо́лимсѧ!
Лю́дїе: Го́споди, поми́луй!
Дїа́конъ обра́щьсѧ къ свѧтѣй трапе́зѣ:
Спаси́, поми́луй, уще́дри и сохрани́ насъ, Бо́же, Твое́ю благода́тїю!
Лю́дїе: Го́споди, поми́луй!
Ѡ свы́шнѣмъ ми́рѣ и Бо́жїи человѣколю́бїи и спасе́нїи душъ на́шихъ Го́споду помо́лимсѧ!
Ѡ ми́рѣ всегѡ́ мі́ра и соедине́нїи всѣхъ свѧты́хъ Бо́жїихъ церкве́й Го́споду помо́лимсѧ!
Ѡ свѧтѣ́й вселе́нстѣй и апо́столстѣй це́ркви, ꙗже отъ коне́цъ земли́ и до коне́цъ єѧ́, Го́споду помо́лимсѧ!
Ѡ спасе́нїи и заступле́нїи господи́на на́шегѡ блаже́ннѣйшагѡ (имѧре́къ), Митрополі́та Софі́йскагѡ и Еѯа́рха Бо́лгарскагѡ (или́ Высокопреосвѧще́ннѣйшагѡ Митрополі́та на́шегѡ имѧре́къ), всегѡ́ кли́ра и хрїстолюби́выхъ люде́й Го́споду помо́лимсѧ.
Ѡ правосла́внѣмъ бо́лгарстѣмъ наро́дѣ, прави́тельствующемъ сѵгкли́тѣ и хрїстолюби́вомъ во́инствѣ и ѡ ꙗже съ небесе́ по́мощи и побѣ́дѣ Го́споду помо́лимсѧ!
Ѡ свѧтѣ́мъ гра́дѣ Хрїста́ Бо́га на́шегѡ, ца́рствующемъ и всѧ́комъ гра́дѣ и странѣ́ и и́же правосла́вною вѣ́рою и Благоговѣ́нїемъ Бо́жїимъ живꙋ́щихъ въ нихъ, ѡ ми́рѣ и утвержде́нїи ихъ Го́споду помолимсѧ!
Ѡ плодоносѧ́щихъ и добродѣ́ющихъ во свѧты́хъ Бо́жїихъ церква́хъ и помина́ющихъ убо́гїѧ, вдови́цы и сироты́, стра́нныѧ и нужда́ющыѧсѧ, и ѡ заповѣ́давшихъ намъ помѧнꙋ́ти ихъ въ моли́твахъ Го́споду помо́лимсѧ!
Ѡ въ ста́рости и не́мощи сꙋ́щихъ, болѧ́щихъ, тружда́ющихсѧ и отъ духѡ́въ нечи́стыхъ стужа́емыхъ, ѡ ско́ромъ отъ Бо́га исцѣле́нїи и спасе́нїи ихъ Господу помо́лимсѧ!
Ѡ въ дѣвствѣ, чистотѣ́ и по́стничествѣ и въ честнѣ́мъ бра́цѣ пребыва́ющихъ и ѡ и́же въ гора́хъ, верте́пѣхъ и про́пастѣхъ земны́хъ подвиза́ющихсѧ преподо́бныхъ отцѣ́хъ же и бра́тїѧхъ Го́споду помо́лимсѧ!
Ѡ пла́вающихъ, путеше́ствующихъ, стра́нствующихъ хрїстїа́нѣхъ и ѡ и́же въ плѣне́нїихъ и изгна́нїихъ и въ темни́цахъ и въ тѧ́жкихъ рабо́тахъ сꙋ́щихъ бра́тїѧхъ на́шихъ, ѡ ми́рномъ возвраще́нїи коегѡ́ждо въ до́мы своѧ́ съ ра́достїю Го́споду помо́лимсѧ!
Ѡ предстоѧ́щихъ и молѧ́щихсѧ съ на́ми въ сей свѧты́й часъ и на всѧ́кое вре́мѧ отцѣ́хъ же и бра́тїѧхъ, ѡ тща́нїи, трудѣ́ и усе́рдїи ихъ Го́споду помо́лимсѧ!
И ѡ всѧ́кой души́ хрїстїа́нстѣй скорбѧ́щей и озло́бленнѣй, ми́лости Бо́жїѧ и по́мощи тре́бующей, и ѡ обраще́нїи заблꙋ́ждшихъ, здра́вїи болѧ́щихъ, свобожде́нїи плѣне́нныхъ, упокое́нїи преждепочи́вшихъ отє́цъ и братїй Го́споду помо́лимсѧ!
Ѡ оставле́нїи грѣхѡ́въ и проще́нїи согрѣше́нїй на́шихъ и ѡ изба́витисѧ намъ отъ всѧ́кїѧ ско́рби, гнѣ́ва, бѣды́ и нꙋ́жды, воста́нїѧ ѧзы́кѡвъ Го́споду помо́лимсѧ!
Приле́жнѣе ѡ благорастворе́нїи воздꙋ́хѡвъ, дождѣ́хъ ми́рныхъ, роса́хъ благи́хъ, плодѡ́въ изоби́лїи, соверше́ннѣмъ плодоро́дїи и ѡ вѣнцѣ́ лѣ́та Го́споду помо́лимсѧ!
Ѡ єже услы́шану и благопрїѧ́тну бы́ти моле́нїю на́шему предъ Богомъ и ниспосла́тисѧ намъ бога́тымъ ми́лостемъ и щедро́тамъ Егѡ́ Го́споду помо́лимсѧ!
Пресвѧтꙋ́ю, пречи́стую, пресла́вную, благослове́нную влады́чицу на́шу Богоро́дицу и приснодѣ́ву Марі́ю, свѧты́хъ и блаже́нныхъ Іѡа́нна, сла́внаго проро́ка предте́чу и крести́телѧ, Стефа́на перводїа́кона и первомꙋ́ченика, Мѡѵсе́а, Аарѡ́на, Илїю́, Елисе́а, Самꙋила, Даві́да, Данїи́ла проро́кѡвъ и всѣхъ свѧты́хъ и пра́ведныхъ помѧ́немъ, ꙗкѡ да моли́твами и предста́тельствы ихъ вси поми́ловани бꙋ́демъ!
Ѡ предлежа́щихъ честны́хъ и небе́сныхъ, неизрече́нныхъ, несказа́нныхъ, сла́вныхъ, стра́шныхъ, ужа́сныхъ, боже́ственныхъ дарѣ́хъ и ѡ спасе́нїи предстоѧ́щагѡ и приносѧ́щагѡ ѧ честна́гѡ отца́ на́шегѡ и Архїере́а (имѧре́къ) Го́спода Бо́га на́шего мо́лимъ!
Лю́дїе: Го́споди, поми́луй! (три́жды).
Глаго́лющу дїа́кону ектенїю́ сїю́, прекло́нь главꙋ́ Архїере́й (или́ Іере́й) мо́литсѧ та́йнѡ си́це:
Посѣти́вый насъ ми́лостїю и щедро́тами, Влады́ко Го́споди, и дарова́вый намъ дерзнове́нїе смире́ннымъ, грѣ́шнымъ и недосто́йнымъ рабѡ́мъ Твои́мъ предстоѧ́ти свѧто́му Твоемꙋ же́ртвеннику и приноси́ти Тебѣ́ стра́шную сїю̀ и бескро́вную же́ртву ѡ на́шихъ грѣсѣ́хъ и людски́хъ невѣ́денїихъ, при́зри на мѧ, непотре́бнаго раба́ Твоего́, и истреби́ моѧ́ согрѣше́нїѧ благᲂутро́бїемъ Твои́мъ! Очи́сти устнѣ́ мои́ и се́рдце отъ всѧ́кїѧ скве́рни пло́ти же и дꙋха! Отими́ отъ мене́ всѧ́кое помышле́нїе стꙋдное и неразꙋ́мное и удовли́ мѧ си́лою пресвѧта́гѡ Твоегѡ́ Дꙋ́ха въ слꙋ́жбу сїю́! И прїими́ мѧ Твое́ю бла́гостїю приближа́ющагосѧ свѧто́му же́ртвеннику и благоволи́, Го́споди, прїѧ́тнымъ бы́ти приноси́мымъ Тебѣ дарѡ́мъ симъ на́шими рука́ми, снисходѧ́ мои́мъ не́мощемъ! И не отве́ржи мене́ отъ лица́ Твоегѡ́[[Псал. 50:13.]], ниже́ возгнуша́йсѧ моегѡ́ недосто́инства, но поми́луй мѧ, Бо́же, по вели́цѣй ми́лости Твое́й[[В съвременния гръцки текст няма «по вели́цѣй ми́лости Твое́й»; няма го и у руския преводач, Игумена Филипа. Ние сме го допълнили според известния израз на 50 Давидоа псалом, който очевидно молитвата иска да цитира, и според старобългарския превод на св. патриарха Евтимия Търновски, както и според немския превод на Иакововата литургия в «Bibliothek der Kirchenvater» т. V на първата серия, стр. 101.]] и по мно́жеству щедрѡ́тъ Твои́хъ очи́сти, беззако́нїѧ моѧ́[[Псал. 50:3]], ꙗ́кѡ да неосужде́ннѡ прише́дъ предъ сла́ву Твою́[[Също 16:15.]] сподо́блюсѧ покро́ва єдиноро́днагѡ Твоегѡ́ Сы́на и озаре́нїѧ пресвѧта́гѡ Твоегѡ́ Дꙋ́ха и да не ꙗ́кѡ рабъ грѣха́ отве́рженъ бꙋ́ду, но ꙗ́кѡ рабъ Твой да обрѧ́щу благода́ть и ми́лость и оставле́нїе грѣхѡ́въ въ ны́нѣшнѣмъ и бꙋ́дущемъ вѣ́цѣ! Ей, Влады́ко Вседержи́телю, всеси́льне Го́споди, услы́ши моле́нїе мое́! Ты́ бо еси́ всѧ дѣ́йствуѧй во всѣхъ и у Тебе́ вси и́щемъ по́мощи во всѣхъ и заступле́нїѧ и єдиноро́днагѡ Твоегѡ́ Сы́на и животворѧ́щагѡ Дꙋ́ха, ны́нѣ и при́снѡ и во вѣ́ки вѣкѡ́въ!
Бо́же, Иже мно́гагѡ ра́ди и неизрече́ннагѡ человѣколю́бїѧ посла́вый єдиноро́днаго Твоего́ Сы́на въ мїръ, ꙗ́кѡ да заблꙋ́ждшее возврати́тъ овча́, не отврати́сѧ отъ насъ, грѣ́шныхъ, вруче́нныхъ приноси́ти Тебѣ́ стра́шную сїю́ и бескро́вную же́ртву! Не бо на пра́вды на́шѧ упова́юще есмы́, но на ми́лость Твою́ благꙋ́ю, є́юже родъ нашъ соблюда́еши. И ны́нѣ мо́лимъ и призыва́емъ Твою́ благосты́ню, ꙗ́кѡ да не бꙋдетъ во осужде́нїе лю́демъ Твои́мъ устро́енное намъ сїѐ ко спасе́нїю та́инство, но во очище́нїе грѣхѡ́въ, во обновле́нїе душъ и тѣле́съ, во благᲂугожде́нїе Тебѣ, Бо́гу и Отцꙋ́[[На това място съвременният гръцки текст и руският преводач на Иакововата литургия поставят още една дълга молитва която (с някои варианти) стои при първата просителна ектения на Василиевата литургия («Господи Боже нашъ, создавый насъ и введый въ жизнь сїю») Ние я изпущаме, понеже не я намираме в превода на св. патриарха Евтимия и в немския превод, направени несъмнено по древни ръкописи; понеже според признанието на Игумена Филипа в Иерусалимската Църква тая се молитва на това място не се чете; понеже в нея много мисли на останалите молитви се повтарят; и понеже служащия архиерей или иерей с нея трудно би успял да прочете положените молитви за времето на великата ектения!]].
Благодари́мъ Тѧ, Го́споди Бо́же нашъ, ꙗ́кѡ далъ єси́ намъ дерзнове́нїе во входъ свѧты́хъ, и́же обнови́лъ єси́ намъ въ путь но́вый и живы́й завѣсою пло́ти Хрїста́ Твоегѡ́! Сподо́бльшесѧ ꙋ́бѡ вни́ти въ мѣ́сто селе́нїѧ сла́вы Твоеѧ́, внутрь же бы́вше завѣ́сы, и свѧта́ѧ свѧты́хъ зрѣ́ти, припа́даемъ бла́гости Твое́й, Влады́ко: поми́луй насъ, зане́ пристра́шни и тре́петни есмы́ хотѧ́ще предста́ти свѧто́му Твоемꙋ́ же́ртвеннику и приноси́ти Тебѣ стра́шную сїю̀ и бескро́вную же́ртву ѡ на́шихъ грѣсѣ́хъ и людски́хъ невѣ́денїихъ! Ниспосли́ на ны, Бо́же, благода́ть Твою́ благꙋ́ю и освѧти́ на́шѧ дꙋшы, тѣлеса́ и дꙋ́хи и измѣни́ на́ша помышле́нїѧ ко благоче́стїю, да чи́стою со́вѣстїю принесе́мъ Тебѣ́ ми́лость, миръ, же́ртву хвале́нїѧ.
Сконча́вшымсѧ дїа́конствѡмъ, возглаша́етъ Архїере́й:
Ми́лостїю и щедро́тами и человѣколю́бїемъ единоро́днагѡ Твоегѡ́ Сы́на, съ Ни́мже благослове́нъ єси́ со пресвѧты́мъ и благи́мъ и животворѧ́щимъ Твои́мъ Дꙋ́хомъ, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Архїере́й зна́менуетъ люде́й глаго́лѧ: Миръ всѣмъ!
Лю́дїе: И дꙋ́хови твоемꙋ́!
Дїа́конъ: Ста́немъ до́брѣ! Ста́немъ благоговѣ́йнѣ! Ста́немъ со стра́хомъ Бо́жїимъ и умиле́нїемъ! Ми́ромъ во́нмемъ свѧто́му возноше́нїю Бо́гу!
Лю́дїе: Ми́лость ми́ра, же́ртву хвале́нїѧ!
Архїере́й та́йнѡ мо́литсѧ:
И изобрази́тельнѣ облежа́щаѧ свѧще́нному семꙋ́ та́инству покрыва́ла гада́нїй откры́въ, ꙗвле́ннѣ намъ покажи́ и мы́сленнаѧ на́ша очеса̀ необиме́ннагѡ Твоегѡ́ свѣ́та испо́лни и очи́стивъ нищетꙋ́ на́шу отъ всѧ́кїѧ скве́рны пло́ти и дꙋ́ха досто́йны насъ сотвори́ стра́шнагѡ сегѡ́ и ужа́снагѡ предстоѧ́нїѧ! Ꙗ́кѡ преблагᲂутро́бенъ и ми́лостивъ Богъ єси́ и Тебѣ́ сла́ву возсыла́емъ, Отцꙋ́ и Сы́ну и Свѧто́му Дꙋ́хꙋ, ны́нѣ и при́снѡ и во вѣ́ки вѣкѡ́въ!
Архїере́й, ма́лѡ изше́дъ изъ олтарѧ́, зна́менуетъ люде́й глаго́лѧ:
Любы́ Бо́га и Отца́, и благода́ть Го́спода и Бо́га и Спа́са на́шегѡ Іисꙋ́са Хрїста́, и прича́стїе и даръ пресвѧта́гѡ Дꙋ́ха бꙋ́ди со всѣ́ми ва́ми[[Сравни 2 Коринт. 13:13.]].
Лю́дїе: И со дꙋ́хомъ твои́мъ!
И воздви́гъ о́чи свои́ горѣ́ и воздѣ́въ рꙋ́цѣ, зрѧ къ лю́демъ Архїере́й возглаша́етъ:
Горѣ́ имѣ́имъ умъ и сердца́!
Лю́дїе: И́мамы ко Го́споду!
Архїере́й: Благодари́мъ Го́спода!
И сложи́въ крестообра́знѡ рꙋ́цѣ на пе́рсѣхъ, ма́лѡ покланѧ́етсѧ лю́демъ и возвраща́етсѧ ко свѧтѣ́й трапе́зѣ.
Лю́дїе пою́тъ ко́снѡ и со сладкопѣ́нїемъ: Досто́йно и пра́ведно! (Зри, ꙗ́кѡ про́чихъ слѡвъ: покланѧ́тисѧ Отцꙋ́… на сей литургі́и нѣсть!)
Вшедъ во олта́рь, прекло́нь главꙋ́, ма́лѡ просте́ръ рꙋцѣ ко свѧтѣ́й трапе́зѣ и зрѧ къ восто́кѡмъ, Архїере́й та́йнѡ мо́литсѧ си́це, творѧ́ благодаре́нїе:
Ꙗ́кѡ вои́стину досто́йно есть и пра́ведно, лѣ́по же и до́лжно Тѧ хвали́ти, Тѧ пѣ́ти, Тебѣ́ кла́нѧтисѧ, Тѧ славосло́вити, Тѧ благодари́ти, всеѧ́ тва́ри ви́димыѧ же и неви́димыѧ Содѣ́телѧ, сокро́вище вѣ́чныхъ благъ, исто́чника жи́зни и безсме́ртїѧ, всѣхъ Бо́га и Влады́ку, Его́же пою́тъ небеса́ и небеса́ небе́съ и всѧ си́лы ихъ, со́лнце же и луна́ и весь звѣ́здный ликъ, землѧ́, мо́ре и всѧ, ꙗ́же въ нихъ, Іерусали́мъ небе́сный[[Евр. 12:22, Апок. 21:2.]], собо́ръ избра́нныхъ, це́рковь перворо́дныхъ, напѝсанныхъ на небесѣ́хъ[[Евр. 12:23, Апок. 21:27.]], дꙋ́си пра́ведныхъ и проро́кѡвъ, дꙋ́шы мꙋ́ченикѡвъ и апо́столѡвъ, а́ггели, арха́ггели, престо́ли, госпо́дствїѧ, нача́ла же и вла́сти и си́лы стра́шныѧ, херꙋві́ми многоочи́тїи и шестокрыла́тїи серафі́ми, и́же двѣма́ ꙋ́бѡ крылѡ́ма покрыва́ютъ ли́ца своѧ́, двѣма́ но́ги и двѣма́ лѣта́юще взыва́ютъ другъ ко дрꙋ́гу[[Исаия 6:2-3.]] непреста́нными усты́, немо́лчными славословле́ньми[[Апок. 4:8.]].
Возгласъ: Побѣ́дную пѣснь велелѣ́пныѧ Твоеѧ́ сла́вы свѣ́тлымъ гла́сомъ пою́ще, вопїю́ще, славосло́вѧще, взыва́ющи и глаго́люще:
Лю́дїе: Свѧтъ, свѧтъ, свѧтъ Госпо́дь Саваѡ́ѳъ, испо́лнь не́бо и землѧ́ сла́вы Твоеѧ́[[Исаия 6:3, Апок. 4:8.]] Ѡса́нна в̾вы́шнихъ! Благослове́нъ грѧды́й во и́мѧ Госпо́дне! Ѡса́нна в̾вы́шнихъ[[Мат. 21:9, Мар. 11:9-10, Лук. 19:38, Иоан 12:13, Пс. 117:25-26.]]
Архїерей та́йнѡ мо́литсѧ:
Свѧтъ єси́ (зна́менуетъ ді́скосъ), Царю́ вѣкѡ́въ и всѧ́кїѧ свѧты́ни Го́споди и пода́телю (зна́менуетъ ча́шу)! Свѧтъ и єдиноро́дный Твой Сынъ, Госпо́дь нашъ Іисꙋ́съ Хрїсто́съ, И́мже всѧ сотвори́лъ єси́ (зна́менуетъ обоѧ́)! Свѧтъ же и Дꙋ́хъ Твой пресвѧты́й, испытꙋ́ѧй всѧ́ческаѧ и глꙋбины́ Твоѧ́, Бо́же[[1 Коринт. 2:10.]] и О́тче! Свѧтъ єси́, всеси́льне, стра́шне, бла́же, благᲂутро́бне, состра́ждаѧй наипа́че созда́нїю Твоемꙋ! Сотвори́вый отъ земли́ человѣ́ка по о́бразу Твоемꙋ и подо́бїю и дарова́вый ємꙋ ра́йское наслажде́нїе, престꙋ́пльша же за́повѣдь Твою́ и отпа́вша тогѡ́ не презрѣлъ єси́, ниже́ оста́вилъ єси́, Бла́же, но наказа́лъ єси́ єго́ ꙗ́кѡ благᲂутро́бный оте́цъ, призва́лъ єси́ єго́ зако́номъ, наста́вилъ єси́ єго́ проро́ки! Послѣди́ же самаго́ єдиноро́днаго Твоего́ Сы́на, Господа на́шего Іисꙋса Хрїста́, посла́лъ єси́ въ мїръ да Самъ прише́дъ Свой обнови́тъ и воста́витъ о́бразъ! И́же соше́дъ съ небе́съ и воплоти́всѧ отъ Дꙋ́ха Свѧ́та и Марі́и, свѧты́ѧ Приснодѣ́вы и Богоро́дицы, спожи́въ же человѣ́кѡмъ, всѧ устро́и ко спасе́нїю ро́да на́шегѡ! Хотѧ́ же во́льную и животворѧщую кресто́мъ смерть безгрѣ́шный за насъ, грѣ́шныхъ, прїѧ́ти, въ нощь, въ ню́же предаѧ́шесѧ, па́че же Самъ Себе́ предаѧ́ше за мїрскі́й живо́тъ и спасе́нїе (здѣ взе́млетъ Архїере́й шꙋ́йцею свѧты́й хлѣбъ ма́лѡ поде́мь и глаго́летъ та́йнѡ), прїе́мь хлѣбъ во свѧты́ѧ и пречи́стыѧ и безсме́ртныѧ Своѧ́ рꙋ́ки, воззрѣ́въ на не́бо и показа́въ Тебѣ́, Бо́гу и Отцꙋ́, благодари́въ, благослови́въ, освѧти́въ (зна́менуетъ свѧты́й хлѣбъ, прелага́етъ єго́ въ деснꙋ́ю рꙋ́ку и держи́тъ єго́ ма́лѡ что возвы́шь), преломи́въ даде́ свѧты́мъ и блаже́ннымъ Свои́мъ ученикѡ́мъ и апо́столѡмъ, рекъ[[Мат. 26:26, Мар. 14:22, Лук. 22:19, 1 Коринт. 11:23- 24.]]:
Во́згласъ: Прїими́те, ꙗди́те, сїе́ єсть тѣ́ло Мое́, єже́ за вы ломи́мое и раздае́мое во оставле́нїе грѣхѡ́въ[[Също]]
Лю́дїе: Ами́нь!
Архїере́й полага́етъ свѧты́й хлѣбъ на ді́скосъ, взе́млетъ же шꙋ́йцею свѧтꙋ́ю ча́шу ма́лѡ что поде́мь, тайнѡ глаго́лѧ:
Та́кѡжде по ве́чери вземь ча́шу и раствори́въ отъ вина́ и воды́, воззрѣ́въ на небо и показа́въ Тебѣ́, Бо́гу и Отцꙋ́, благодари́въ, освѧти́въ (зна́менуетъ ча́шу), испо́лнивъ Дꙋ́ха Свѧ́та, даде́ свѧты́мъ и блаже́ннымъ Свои́хъ ученикѡ́мъ и апо́столѡмъ рекъ:
Возгла́съ: Пі́йте отъ неѧ́ вси, сїе́ єсть кровь Моѧ́ но́вагѡ завѣ́та, ꙗ́же за вы и за мно́гїѧ излива́емаѧ и раздае́маѧ во оставле́нїе грѣхѡ́въ[[Мат. 26:27-28, Мар. 14:23-24, Лук. 22:20, 1 Коринт. 11:25.]] (И поставлѧ́етъ ча́шу).
Лю́дїе: Ами́нь.
Архїере́й та́йнѡ:
Сїе́ твори́те въ Мое́ воспомина́нїе! Ели́жды во а́ще ꙗ́сте хлѣбъ сей и ча́шу сїю́ пїе́те, смерть Сы́на Человѣ́ческагѡ возвѣща́ете и воскресе́нїе Егѡ́ исповѣ́дуете, до́ндеже прїи́детъ[[1 Коринт. 11:25-26, Лук. 22-19.]].
Зрѧ ко свѧтѣ́й трапе́зѣ, дїа́конъ возглаша́етъ свѣтлѣ́йшимъ гла́сомъ: Вѣ́руемъ и исповѣ́дуемъ!
Лю́дїе же пою́тъ ко́снѡ со сладкопѣнїемъ: Смерть Твою́ Го́споди, возвѣща́емъ и воскресе́нїе Твое́ исповѣ́дуемъ!
Архїере́й зна́менуетъ свѧты́й ді́скосъ, та́же свѧтꙋ́ю ча́шу и прекло́нь главꙋ, та́йнѡ мо́литсѧ:
Помина́юще ꙋ́бѡ и мы, грѣ́шнїи, животворѧ́щаѧ Егѡ́ страда́нїѧ, спаси́тельный крестъ и смерть, и погребе́нїе, и тридне́вное изъ ме́ртвыхъ воскресе́нїе, и єже на небеса́ возше́ствїе, и одеснꙋ́ю Тебе́, Бо́га и Отца́, сѣде́нїе, и второ́е сла́вное стра́шное Егѡ́ прише́ствїе, єгда́ прїи́детъ со сла́вою суди́ти живы́мъ и ме́ртвымъ, єгда́ хо́щетъ коемꙋ́ждо отда́ти по дѣлѡ́мъ єгѡ́[[Рим. 2:6.]] (Пощади́ насъ, Го́споди Бо́же!) (три́жды) па́че же по благᲂутро́бїю Своемꙋ́, прино́симъ Ти, Влады́ко, стра́шную сїю́ и бескро́вную же́ртву, просѧ́ще да не по грѣхѡ́мъ на́шимъ, ниже́ по беззако́нїемъ на́шимъ возда́си намъ, но по Твое́й кро́тости и неизрече́нному Твоемꙋ́ человѣколюбїю презрѣ́въ и истреби́въ є́же на насъ рукописа́нїе[[Колос. 2:14.]], Твои́хъ рабѡ́въ, да́руеши намъ небе́снаѧ и вѣ́чнаѧ дарова́нїѧ, и́хже о́ко не ви́дѣ, и ꙋ́хо не слы́ша, и на се́рдце человѣ́ку не взыдо́ша, ꙗ́же угото́ва Богъ лю́бѧщымъ Егѡ́[[1 Коринт. 2:9.]], и да не мои́хъ ра́ди грѣхѡ́въ отри́неши люде́й Твои́хъ, человѣколю́бче Го́споди!
Та́же пое́тъ со сослужа́щими пресвѵ́теры, малѡ рꙋ́цѣ воздѣ́въ:
Лю́дїе во Твои́ и це́рковь Твоѧ́ мо́лѧтъ Тѧ!
Лю́дїе такѡ́жде пою́тъ въ отвѣ́тъ:
Поми́луй насъ, Го́споди Бо́же, Отче Вседержи́телю!
И па́ки пое́тъ Архїере́й со сослужа́щими: Лю́дїе бо Твои…
И па́ки наро́дъ: Поми́луй насъ…
Та́кожде и тре́тїе пое́тъ Архїере́й и отвѣщава́етъ наро́дъ вельми́ ко́снѡ, ꙗ́кѡ да возмо́жетъ Архїере́й изглаго́лати моли́тву сїю́ та́йнѡ:
Поми́лꙋй насъ, Бо́же Вседержи́телю! Поми́луй насъ, Бо́же Спа́се нашъ! Поми́луй насъ, Бо́же, по вели́цѣй ми́лости Твое́й и ниспосли́ на ны и на предлежа́щыѧ свѧты́ѧ да́ры сїѧ́ Дꙋ́ха Твоего́ пресвѧта́го, Го́спода животворѧ́щаго, сопресто́льнаго Тебѣ́, Бо́гу и Отцꙋ́, и єдиноро́дному Твоемꙋ́ Сы́ну, соца́рственнаго, єдиносꙋ́щнаго же и соприсносꙋ́щнаго. глаго́лавшаго въ зако́нѣ и проро́цѣхъ и но́вомъ Твое́мъ завѣ́тѣ[[Евр. 1:1-2.]] , соше́дшаго въ ви́дѣ голуби́нѣ на Го́спода на́шего Іисꙋса Хрїста́ во Іорда́нѣ рѣцѣ́ и пребы́вшаго на Немъ[[Мат. 3:16, Мар. 1:10, Лук. 3:22, Иоан. 1:32.]], соше́дшаго на свѧты́хъ Твои́хъ апо́столѡвъ въ ви́дѣ о́гненныхъ ѧзы́къ въ го́рницѣ свѧта́гѡ и сла́внагѡ Сїѡ́на въ день свѧты́ѧ Пѧтьдесѧ́тницы[[Деян. 2:1-4.]]: сего́ Дꙋ́ха Твоего́ пресвѧта́го ниспосли́, Влады́ко, на насъ и на предлежа́щыѧ да́ры сїѧ́, (та́же воздѣ́въ рꙋ́цѣ) ꙗ́кѡ да посѣти́въ свѧты́мъ и благи́мъ и сла́внымъ Свои́мъ прише́ствїемъ освѧти́тъ и сотвори́тъ хлѣбъ ꙋ́бѡ сей тѣ́ло свѧто́е Хрїста́ (зна́менуетъ свѧты́й хлѣ́бъ).
Дїа́конъ, зрѧ сїѧ́, глаго́летъ: Ами́нь!
Архїере́й: и ча́шу сїю́ кровь честнꙋ́ю Хрїста́ (зна́менуетъ свѧтꙋ́ю ча́шу).
Дїаконъ: Ами́нь!
Архїере́й та́йнѡ: Ꙗ́кѡ да бꙋ́дутъ всѣмъ отъ нихъ причаща́ющымсѧ во оставле́нїе грѣхѡ́въ и жизнь вѣ́чную!
Дїа́конъ: Ами́нь!
Архїере́й: Во освѧще́нїе душъ и тѣле́съ! Ами́нь! Въ плодоноше́нїе дѣлъ благи́хъ! Ами́нь! Во утвержде́нїе свѧты́ѧ Твоеѧ́ собо́рныѧ и апо́стольскїѧ це́ркви, ю́же основа́лъ єси́ на ка́мени вѣ́ры, ꙗ́кѡ да врата́ а́дова не одолѣ́ютъ єй[[Мат. 16:18.]], избавлѧ́ѧ ю отъ всѧ́кїѧ є́реси и отъ собла́зна дѣлающихъ беззако́нїе[[Псал. 140:9.]], сохранѧ́ѧ ю да́же до сконча́нїѧ вѣкѡ́въ! (Зна́менуетъ ді́скосъ и ча́шу раздѣ́льнѣ).
Дїа́конъ: Ами́нь!
Та́же мо́литсѧ Архїере́й (или́ Іере́й) ма́лѡ воздѣ́въ рꙋ́цѣ и прекло́нь главꙋ́ мѣ́рнымъ гла́сомъ, во є́же слы́шану бы́ти стоѧ́щымъ внѣ олтарѧ́, лю́дїе же подпѣва́ютъ мно́гажды: Помѧни́, Господи Бо́же нашъ!
Прино́симъ Ти, Влады́ко, и ѡ свѧты́хъ Твои́хъ мѣ́стѣхъ, ꙗ́же просла́вилъ єси́ богоѧвле́нїемъ Хрїста́ Твоегѡ́ и посѣще́нїемъ пресвѧта́гѡ Твоегѡ́ Дꙋ́ха! Наипа́че же ѡ свѧтѣ́мъ и сла́внѣмъ Сїѡ́нѣ, ма́тери всѣхъ церкве́й, и ѡ ꙗ́же по всей вселе́ннѣй свѧтѣ́й Твое́й собо́рнѣй и апо́стольстѣй це́ркви: бога́тыѧ и ны́нѣ да́ры пресвѧта́гѡ Твоегѡ́ Дꙋ́ха пода́ждь єй, Влады́ко! Помѧни́, Го́споди, и и́же въ ней свѧты́хъ отце́въ на́шихъ и єпі́скопѡвъ, и́же по всей вселе́ннѣй правосла́внѡ пра́вѧщихъ сло́во Твоеѧ́ и́стины! Въ пе́рвыхъ помѧни́, Го́споди Бо́же нашъ, преподо́бнаго отца̀ на́шего блаже́ннѣйшаго (имѧре́къ) Митрополі́та Софі́йскаго и Еѯа́рха Бо́лгарскаго (или́ Высокопреосвѧще́ннѣйшаго Митрополі́та на́шего имѧре́къ), ста́рость ємꙋ́ честнꙋ́ю да́руй, многолѣ́тна єго́ сохрани, пасꙋ́ща люде́й Твои́хъ во всѧ́комъ благоче́стїи и че́стности! Помѧни́, Го́споди, є́же здѣ честно́е пресвѵ́терство и повсю́ду, є́же во Хрїстѣ́ дїа́конство, про́чее все служе́нїе, весь церко́вный чинъ и во Хрїстѣ́ бра́тство на́ше и всѣхъ хрїстолюби́выхъ люде́й! Помѧни́, Го́споди, сопредстоѧ́щихъ намъ їере́евъ, слꙋжа́щихъ въ сей свѧты́й часъ предъ свѧты́мъ Твои́мъ же́ртвенникомъ въ приноше́нїи свѧты́ѧ и бескро́вныѧ Твоеѧ́ же́ртвы, и даждь имъ и намъ слово во отверзе́нїе устъ на́шихъ въ сла́ву и похвале́нїе всесвѧта́гѡ и́мене Твоегѡ́! Помѧни́, Го́споди, по мно́жеству ми́лости Твоеѧ́ и мене́, смире́ннаго и грѣ́шнаго и недосто́йнаго раба́ Твоего́, и посѣти мѧ ми́лостїю и щедро́тами, изба́ви же и свободи́ отъ гонѧ́щихъ мѧ, Го́споди, Го́споди силъ, и не вни́ди въ судъ съ рабо́мъ Твои́мъ, и поне́же умно́жисѧ во мнѣ грѣхъ, да преизбы́точествуетъ Твоѧ́ благода́ть! Помѧни́, Го́споди, и свѧты́й Твой же́ртвенникъ окружа́ющихъ дїа́конѡвъ, да́руй имъ житїе́ непоро́чное, чи́сто ихъ дїа́конство соблюди́ и степе́ны до́брыѧ имъ снищѝ[[1 Тимот. 3:13.]] Помѧни́, Го́споди, свѧты́й Бо́га на́шегѡ градъ, и ца́рствующїй и всѧ́кїй градъ и странꙋ́ и и́же правосла́вною вѣ́рою и благоговѣ́нїемъ живꙋ́щихъ въ нихъ, миръ и утвержде́нїе ихъ! Помѧни́, Го́споди, правосла́вный бо́лгарскїй наро́дъ, прави́тельствующїй сѵгкли́тъ и хрїстолюби́вое во́инство и ꙗ́же съ небесе́ по́мощь и побѣ́ду ихъ! Прїими́ орꙋжїе и щитъ и воста́ни въ по́мощь ихъ[[Псал. 34:2.]], покори́ имъ всѧ во́инственныѧ и ва́рварскїѧ ѧзы́ки, испо́лни ихъ совѣ́ты, да ти́хое и безмо́лвное житїе́ поживе́мъ во всѧ́комъ благоче́стїи и че́стности[[1 Тимот. 2:2.]] Помѧни́, Го́споди, пла́вающихъ, путеше́ствующихъ, стра́нствующихъ хрїстїа́нъ, и́же во ꙋ́захъ и темни́цахъ, Въ плѣне́нїихъ и изгна́нїихъ, въ руда́хъ и муче́нїихъ и го́рькихъ рабо́тахъ сꙋ́щихъ оте́цъ же и бра́тїй на́шихъ, ми́рное возвращѐнїе коегѡ́ждо ихъ въ до́мы своѧ́! Помѧни́, Го́споди, въ ста́рости и не́мощи сꙋ́щихъ, болѧ́щихъ, стра́ждущихъ и отъ духѡ́въ нечи́стыхъ стужа́емыхъ, є́же у Тебе́, Бо́га, ско́рое исцѣле́нїе и спасе́нїе ихъ! Помѧни́, Го́споди, всѧ́кую дꙋшу хрїстїа́нскꙋю, скорбѧ́щую и оби́димую, ми́лости и по́мощи Тебе́, Бо́га, тре́бующую, и обраще́нїе заблꙋ́ждшихъ! Помѧни́, Го́споди, въ дѣ́вствѣ, благоговѣ́нїи и по́стничествѣ пребыва́ющихъ и и́же въ гора́хъ, верте́пѣхъ и про́пастехъ земны́хъ подвиза́ющихсѧ преподо́бныхъ оте́цъ же и бра́тїй на́шихъ и и́же на всѧ́комъ мѣ́стѣ правосла́вныхъ собо́ры и здѣ во Хрїстѣ́ собо́ръ нашъ! Помѧни́, Го́споди, тружда́ющихсѧ и служа́щихъ намъ оте́цъ же и бра́тїй на́шихъ ра́ди и́мене Твоегѡ́ свѧта́гѡ! Помѧни́, Го́споди, всѣхъ во благо́е: всѣхъ поми́луй, Влады́ко, всѣмъ намъ примири́сѧ! Ꙋмири́ множества люде́й Твои́хъ: разсѣ́й собла́зны, упраздни́ бра́ни, утоли́ раздо́ры церкве́й, єрети́ческаѧ воста́нїѧ вско́рѣ разори́! Низложи́ горды́ню ѧзы́къ! Возвы́си рогъ хрїстїа́нъ правосла́вныхъ! Твой миръ и Твою́ любо́вь да́руй намъ, Бо́же Спа́се нашъ, упова́нїе всѣхъ конце́въ земли́! Помѧни́, Го́споди, благорастворе́нїе воздꙋ́хѡвъ, дожди ми́рны, росы́ благі́ѧ, плодѡ́въ гобзова́нїе, соверше́нное плодоро́дїе и вѣне́цъ лѣ́та бла́гости Твоеѧ́! О́чи бо всѣхъ на Тѧ упова́ютъ и Ты дае́ши пи́щу имъ во благовре́менїи, отверза̀еши Ты рꙋ́ку Твою́ и исполнѧ́еши всѧ́кое живо́тно благоволе́нїѧ[[Псал. 144:15-16.]] Помѧни́, Го́споди, плодоноси́вшихъ и плодоносѧ́щихъ во свѧты́хъ Бо́жїихъ церква́хъ и помина́ющихъ убо́гїѧ и заповѣ́давшихъ намъ помина́ти ихъ въ моли́твахъ! Еще́ помѧнꙋ́ти сподо́би, Го́споди, и и́же приноше́нїѧ сїѧ́ прине́сшихъ во дне́шнїй день на свѧты́й Твой же́ртвенникъ и ѡ ни́хже кі́йждо принесе́ или́ въ помышле́нїи и́мать и ны́нѣ Тебѣ́ прочи́товаемыхъ! Помѧни́, Го́споди, и на́шихъ роди́телей, сро́дникѡвъ и дрꙋ́ги (имѧре́къ, здѣ помина́етъ, и́хже хо́щетъ)! Сихъ всѣхъ помѧни́, Го́споди, и́хже помѧнꙋ́хомъ и и́хже не помѧнꙋ́хомъ правосла́вныхъ! Возда́ждь имъ вмѣ́стѡ земны́хъ небе́снаѧ, вмѣ́стѡ тлѣ́нныхъ нетлѣ́ннаѧ, вмѣ́стѡ вре́менныхъ вѣ́чнаѧ по обетова́нїю Хрїста́ Твоегѡ́, зане́ живо́та и сме́рти о́бласть и́маши! Еще́ помѧнꙋ́ти сподо́би, Влады́ко, и отъ вѣка Тебѣ́ благᲂугоди́вшихъ свѧты́хъ оте́цъ: патрїа́рхѡвъ, проро́кѡвъ, апо́столѡвъ, мꙋ́ченикѡвъ, учи́телей, преподо́бныхъ и всѧ́кїй духъ пра́ведный въ вѣрѣ соверши́вшїйсѧ! Помѧни́, Го́споди, арха́ггельскїй гласъ глаго́лющїй: Ра́дуйсѧ, благода́тнаѧ, Госпо́дь съ Тобо́ю! Благослове́нна ты въ жена́хъ[[Лук. 1:28.]] и благослове́нъ плодъ чре́ва твоегѡ́[[Също 1:42.]], ꙗ́кѡ Спа́са родила́ єси́ душъ на́шихъ!
Возгла́снѡ: Изрѧ́днѡ пресвѧтꙋ́ю и преблагослове́нную пречи́стую влады́чицу на́шу Богоро́дицу и приснодѣву Марі́ю!
И па́ки пою́тъ лю́дїе: Помѧни́, Го́споди Бо́же нашъ!
Архїере́й же (или́ Іере́й) мо́литсѧ, ꙗ́кѡже пре́жде:
Свѧта́го Іѡа́нна, сла́внаго проро́ка, предте́чу и крести́телѧ, свѧты́хъ апо́столѡвъ, свѧты́хъ проро́кѡвъ и патрїа́рхѡвъ и праве́дныхъ, свѧты́хъ мꙋ́ченикѡвъ и исповѣ́дникѡвъ! Помѧни́, Го́споди Бо́же, свѧты́хъ оте́цъ на́шихъ и архїепі́скопѡвъ и всѧкую плоть, и́хже помѧнꙋ́хомъ и и́хже не помѧнꙋхомъ! Та́мѡ ихъ упоко́й, во странѣ́ живы́хъ, въ ца́рствїи Твое́мъ, въ наслажде́нїи раѧ́, въ не́дрѣхъ Авраа́ма и Ісаа́ка и Іа́кѡва, свѧты́хъ оте́цъ на́шихъ, отню́дуже отбѣже́ болѣзнь, печа́ль и воздыха́нїе, идѣ́же присѣща́етъ свѣтъ лица́ Бо́жїѧ и просвѣща́етъ всегда́! На́шу же кончи́ну живота́ хрїстїа́нскую и благᲂуго́дную и безгрѣ́шную въ ми́рѣ испра́ви, Го́споди, собира́ѧ насъ подъ но́ги избра́нныхъ Твои́хъ, єгда́ хо́щеши и ꙗ́кѡже хощеши, то́чїю безъ постыжде́нїѧ и прегрѣше́нїй, ра́ди єдиноро́днагѡ Твоегѡ́ Сы́на, Го́спода же и Бо́га и Спа́са на́шегѡ Іисꙋ́са Хрїста́, Той бо єсть єди́нъ безгрѣ́шенъ ꙗви́выйсѧ на земли́!
А́ще Архїере́й литургисꙋ́етъ, глаго́лютъ вси сослужа́щїи Іере́и вкꙋ́пѣ, а́ще ли же ни, глаго́летъ сїѧ́ єди́нъ служа́й Іере́й:
Въ пе́рвыхъ помѧни́, Го́споди, отца и господи́на на́шего, блаже́ннѣйшаго (имѧре́къ) Митрополі́та Софі́йскаго Еѯа́рха Бо́лгарскаго (или Высокопреосвѧще́ннѣйшаго Митрополі́та на́шего имѧре́къ), єго́же да́руй свѧтѣ́й Твое́й це́ркви въ ми́рѣ, цѣ́ла, че́стна, здра́ва, долгоде́нствующа, пра́вѡ пра́вѧща сло́во Твоеѧ́ и́стины!
Дїа́конъ же зрѧ къ лю́демъ возглаша́етъ:
И ѡ ми́рѣ и благостоѧ́нїи всегѡ́ мі́ра и свѧты́хъ Бо́жїихъ церкве́й, и ѡ ни́хже кі́йждо принесе́ или́ въ помышле́нїи и́мать, и ѡ предстоѧ́щихъ лю́дехъ, и ѡ всѣхъ и за всѧ!
И а́бїе за симъ во́згласъ Архїере́а (или Іере́а): Даждь и намъ, и имъ ꙗ́кѡ благъ и человѣколю́бецъ Влады́ка!
Лю́дїе пою́тъ: Осла́би, оста́ви, прости́, Бо́же, прегрѣше́нїѧ на́ша во́льнаѧ же и нево́льнаѧ, ꙗ́же въ вѣ́денїи и не въ вѣ́денїи!
Архїере́й: Благода́тїю и щедро́тами и человѣколю́бїемъ Хрїста́ Твоегѡ, съ Ни́мже благослове́нъ єси́ и препросла́вленъ съ пресвѧты́мъ и благи́мъ и животворѧ́щимъ Твои́мъ Дꙋ́хомъ, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Архїере́й (или́ Іере́й) зна́менуетъ людей: Миръ всѣмъ!
Лю́дїе: И дꙋ́хови твоемꙋ!
Дїа́конъ же изше́дъ се́верными две́рьми и ставъ на обы́чнѣмъ мѣ́стѣ солеи́ съ лице́мъ къ наро́ду, глаго́летъ дїа́конства сїѧ́, ничто́же лю́демъ отвѣщава́ющымъ:
Па́ки и па́ки и вы́ну ми́ромъ Го́споду помо́лимсѧ!
Ѡ принесе́нныхъ и освѧще́нныхъ честны́хъ, небе́сныхъ, неизрече́нныхъ, пречи́стыхъ, сла́вныхъ, стра́шныхъ, ужа́сныхъ, боже́ственныхъ дарѣхъ Го́споду Бо́гу на́шему помо́лимсѧ!
Ꙗ́кѡ да Госпо́дь Богъ нашъ, прїе́мь ѧ во свѧты́й и пренебе́сный, мы́сленный и духовный Свой же́ртвенникъ в̾воню́ благᲂуханїѧ, возниспо́слетъ намъ боже́ственную благода́ть и даръ пресвѧта́гѡ Дꙋ́ха помо́лимсѧ!
Соедине́нїе вѣ́ры и прича́стїе пресвѧта́гѡ Егѡ́ и покланѧ́емагѡ Дꙋ́ха испроси́вше, са́ми себе́ и другъ дрꙋ́га и весь живо́тъ нашъ Хрїстꙋ Бо́гу на́шему предади́мъ!
Лю́дїе: Тебѣ́, Го́споди!
Симъ глаго́лемымъ, Архїере́й (или́ Іере́й) та́йнѡ мо́литсѧ:
Бо́же и Отче Го́спода и Бо́га и Спа́са на́шегѡ Іисꙋ́са Хрїста́, великоимени́те Го́споди, блаже́нное естество́, незави́стнаѧ бла́госте, всѧ́ческихъ Бо́же и влады́ко, сый благослове́нъ во вѣ́ки вѣкѡ́въ, сѣдѧ́й на херꙋві́мѣхъ и сла́вимый отъ серафі́мъ, Емꙋ́же предстоѧ́тъ ты́сѧщы ты́сѧщъ и тмы темъ[[Дан. 7:10.]] свѧты́хъ а́ггелъ и арха́ггелъ во́инствъ, принесе́нныѧ ꙋ́бѡ Тебѣ́ да́ры, даѧ́нїѧ, плоды́ в̾воню́ благᲂуханїѧ прїими́, ꙗ́же освѧти́ти и соверши́ти сподо́билъ єси́, Бла́же, Благода́тїю Хрїста́ Твоегѡ́ и пресвѧта́гѡ Твоегѡ́ Дꙋ́ха! Освѧти́, Влады́ко, на́шѧ дꙋ́шы и тѣлеса́ и дꙋ́хи и осѧжи́ помышле́нїѧ, и истѧжи́ со́вѣсти: и ижде́ни отъ насъ всѧ́кую мысль лука́вую, всѧ́кїй по́мыслъ стꙋ́дный, всѧ́кую по́хоть и помышле́нїе сра́мное, всѧ́кое сло́во неподо́бное, всѧ́кую за́висть и суемꙋдрїе и лицемѣ́рїе, всѧ́кую лжу, всѧ́кую лесть, всѧ́кое искуше́нїе жите́йское, всѧ́кое любостѧжа́нїе, всѧ́кое тщесла́вїе, всѧ́кую зло́бу, всѧ́кую ꙗ́рость, всѧ́кїй гнѣвъ, всѧ́кое злопомне́нїе, всѧ́кую хулꙋ́, всѧ́кое сребролю́бїе и нераде́нїе, всѧ́кое движе́нїе пло́ти же и дꙋ́ха, отчужде́нное во́ли свѧты́ни Твоеѧ́!
Во́згласъ: И сподо́би насъ. Влады́ко, человѣколю́бче Го́споди, со дерзнове́нїемъ неосужде́ннѡ чи́стымъ се́рдцемъ, душе́ю просвѣще́нною, непосты́днымъ лице́мъ, освѧще́нныма устна́ма смѣ́ти призыва́ти Тебе́, И́же въ небесѣ́хъ свѧта́го Бо́га Отца́, и глаго́лати:
Лю́дїе: О́тче нашъ, И́же єси́ на небесѣ́хъ, да свѧти́тсѧ и́мѧ Твое́, да прїи́детъ ца́рствїе Твое́, да бꙋ́детъ во́лѧ Твоѧ́, ꙗ́кѡ на небеси́, и на земли́! Хлѣбъ нашъ насꙋ́щный даждь намъ днесь! И оста́ви намъ до́лги на́шѧ, ꙗ́кѡже и мы оставлѧ́емъ должникѡ́мъ на́шымъ! И не введи́ насъ во искуше́нїе, но изба́ви насъ отъ лука́вагѡ[[Мат. 6:9-13, Лук. 11:2-4.]]
Архїере́й (или́ Іере́й) мо̀литсѧ въ себѣ́ глаго́лѧ:
И не введи́ насъ во искуше́нїе, Го́споди, Го́споди силъ, вѣ́дый не́мощь на́шу, но изба́ви насъ отъ лука́вагѡ и отъ дѣлъ єгѡ́, и отъ всѧ́кагѡ озлобле́нїѧ и ко́зней єгѡ́ и́мене ра́ди Твоегѡ́ свѧта́гѡ, нарече́ннагѡ на на́шемъ смире́нїи!
Во́згласъ: Ꙗ́кѡ Твое́ єсть ца́рство и си́ла и сла́ва, Отца́ и Сы́на и Свѧта́гѡ Дꙋ́ха, ны́нѣ и при́снѡ и во вѣ́ки вѣкѡ́въ!
Лю́дїе: Аминь!
Архїере́й (илѝ Іере́й): Миръ всѣмъ!
Лю́дїе: И дꙋ́хови твоемꙋ́!
Дїа́конъ: Главы́ на̀шѧ Го́сподеви прикло̀нимъ!
Лю́дїе: Тебѣ́, Го́споди!
Архїере́й (или́ Іере́й) та́йнѡ: Тебѣ́ приклонѝхомъ раби́ Твои́, Го́споди, вы́и на́шѧ предъ свѧты́мъ Твои́мъ же́ртвенникомъ, ча́юще отъ Тебе́ бога́тыѧ ми́лости! Бога́тую и ны́нѣ Благода́ть Твою́ и благослове́нїе Твое́ ниспосли́ намъ, Владыко, и освѧти́ на́шѧ дꙋ́шы и тѣлеса́ и дꙋ́хи, ꙗ́кѡ да досто́йни Бꙋ́демъ прича́стницы и о́бщницы свѧты́хъ Твои́хъ та́инъ во составле́нїе грѣхѡ́въ и жизнь вѣ́чную!
Во́згласъ: Ты бо покланѧ́емь и сла́вимь єси́, Бо́же нашъ, и єдиноро́дный Твой Сынъ и Духъ Твой пресвѧты́й, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Та́же зна́менуетъ Архїере́й (или́ Іере́й) свѧты́ѧ да́ры изше́дъ на солею́ глаго́летъ къ лю́демъ благослове́нїе сїе́ воздѣ́тыми рука́ми:
Да бꙋ́дутъ благода̀ть и ми́лости свѧты́ѧ и єдиносꙋ́щныѧ, несозда́нныѧ и нераздѣ́льныѧ и покланѧ́емыѧ Тро́ицы со всѣ́ми ва́ми!
Лю́дїе: И со дꙋ́хомъ твои́мъ!
Дїа́конъ зрѧ къ лю́демъ и воздѣ́въ дѣснꙋю рꙋ́ку глаго́летъ:
Со стра́хомъ Бо́жїимъ во́нмемъ!
Архїере́й (илѝ Іере́й) возвыша́етъ свѧты́й хлѣбъ и глаго́летъ въ себѣ́ моли́тву сїю́ (быва̀етъ же въ храмѣ молча́нїе ве́лїе, лю́демъ прикло́ншымъ главы́ своѧ́, до́ндеже Архїере́й мо́литсѧ):
Свѧты́й, И́же во свѧты́хъ почива́ѧй, Господи, освѧти́ насъ сло́вомъ Твоеѧ́ благода́ти и наи́тїемъ пресвѧта́гѡ Дꙋ́ха Твоегѡ́! Ты бо реклъ єси́, Влады́ко: Свѧ́ти сꙋ́дите, ꙗ́кѡ Азъ свѧтъ єсмь, Госпо́дь Богъ вашъ![[Лев. 19:2, Петр. 1:15-16; ср. Мат. 5:48.]]
И еще́ моли́тву сїю́: Непостижи́мый Бо́же Сло́ве, Отцꙋ́ и пресвѧто́му Дꙋ́хꙋ єдиносꙋ́щне, соприсносꙋ́щне и нераздѣ́льне, прїими́ чи́стую пѣснь во свѧты́хъ Твоѝхъ бескро́вныхъ же́ртвахъ съ херуві́мы и серафі́мы и отъ мене́, грѣ́шнагѡ, вопїю́ща и глаго́люща:
Во́згласъ: Свѧта́ѧ свѧты́мъ!
Лю́дїе: Еди́нъ свѧтъ єди́нъ Госпо́дь Іисꙋ́съ Хрїсто́съ во сла́ву Бо́га Отца́ со Свѧты́мъ Дꙋ́хомъ, Емꙋ́же сла́ва во вѣ́ки вѣкѡ́въ!
Дїа́конъ зрѧ къ лю́демъ: Ѡ спасе́нїи и заступле́нїи блаже́ннѣйшагѡ отца̀ на̀шегѡ (имѧре́къ) Митрополі́та Софі́йскагѡ и Еѯа́рха Бо́лгарскагѡ (или́ Высокопреосвѧще́ннѣйшагѡ Митрополі́та на́шегѡ имѧре́къ) и ѡ всѧ́кой души́ скорбѧ́щей и озло́бленнѣй, ми́лости и по́мощи Бо́жїѧ тре́бующей и ѡ обраще́нїи заблꙋждшихъ, исцѣле́нїи болѧ́щихъ, избавле́нїи плѣне́нныхъ, упокое́нїи преждепочи́вшихъ оте́цъ же и бра́тїй вси приле́жнѡ рцемъ: Го́споди, поми́луй!
Лю́дїе: Го́споди, поми́луй! (12)
Глаго́лющу дїа́кону сїѧ́, Архїере́й (или Іерѐй) преломлѧ́етъ свѧты́й хлѣбъ въ двѣ ча́сти, полага́ѧ па́ки на ді́скосъ держи́мую шꙋ́йцею часть, держи́мую же десни́цею єще́ преломлѧ́етъ въ двѣ ча́сти, отъ ни́хже часть съ печа́тїю КА полага́етъ на ді́скосъ, а другꙋ́ю съ печа́тїю ХС влага́етъ во свѧты́й потѝръ, глаго́лѧ та́йнѡ:
Соедине́нїе пресвѧта́гѡ тѣ́ла и честны́ѧ кро́ве Го́спода и Бо́га и Спа́са на́шегѡ Іисꙋ́са Христа́!
Присовокуплѧ́етъ же и єще́: Соедини́шасѧ и освѧти́шасѧ и соверши́шасѧ свѧты́ѧ да́ры сїѧ́ во и́мѧ Отца̀ и Сы́на и Свѧта́гѡ Дꙋ́ха, Емꙋ́же сла́ва и держа́ва во вѣ́ки!
Та́же преломлѧ́етъ и часть свѧта́гѡ хлѣ́ба, на не́йже печа́ти ІС и НІ, глаго́лѧ: Се а́гнецъ Бо́жїй, Сынъ Оте́чь, взе́млѧй грѣхъ мі́ра[[Иоан 1:29 и 36, Исаия 53:5 и 7.]], закла́нный за живо́тъ мі́ра и спасе́нїе[[Пасажът оттук до диаконски възглас «Въ мирѣ Хрїстовѣ воспоимъ» гоняма в гръцкия текст, който имаме под ръка (издание на Александрийската патриаршеска печатница от 1931 година); няма го и в превода на св. Евтимия Търновски. Обаче всее пак го даваме, защото го намираме не само у игумена Филипа, но и в немския превод (Bibliothek der Kirchenvter, т. V на първата серия, стр. 116-117, който безспорно сонаправен по най-древните ръкописи на Иаковата литургия.]]
Раздроблѧ́етъ же ча́сти ІС, НІ и КА, во єже дово́льну бы́ти всѣмъ хотѧ́щымъ причасти́тисѧ, глаго́лѧ: Свѧта́ѧ часть Хрїсто́ва, испо́лнь благода́ти и и́стины Отца́ и Свѧта́гѡ Дꙋ́ха, Емꙋ́же сла́ва и держа́ва во вѣ́ки вѣкѡ́въ!
Сконча́нну бы́вшу пѣ́нїю « Го́споди, поми́луй» (12), глаго́летъ дїа́конъ зрѧ къ восто́кѡмъ: Го́споди, благослови́!
Архїерѐй: Господь благослови́тъ ны и неосужде́нны сохрани́тъ причаще́нїемъ пречи́стыхъ дарѡ̀въ Егѡ́, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Дїа́конъ па̀ки: Го̀споди, благослови́!
Архїере́й: Госпо́дь благословѝтъ и сподо́битъ насъ непоро́чными пе́рсты взима́ти разжжѐнный угль и влага́ти во уста́ вѣ́рныхъ[[Исаия 6:6-7.]] во очище́нїе и обновле́нїе душъ же и тѣлѐсъ ихъ, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Архїере́й же (илѝ Іере́й) обра́щьсѧ къ лю́демъ возглаша́етъ:
Вкуси́те и ви́дите, ꙗкѡ Хрїсто́съ Госпо́дь, раздроблѧ́емый и нераздѣлѧ́емый, вѣ́рнымъ раздава́емый и неиждива́емый во оставле́нїе грѣхѡ́въ и жизнъ вѣ́чную, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Та́же дїа́конъ къ лю́демъ: Въ ми́рѣ Хрїсто́вѣ воспоѝмъ!
По семъ дїа́кони вхо́дѧтъ во олта́ръ ма́лыми две́рьми, лю́дїе же пою́тъ прича́стный стїхъ: Вкуси́те и ви́дите, ꙗ́кѡ Хрїсто́съ Госпо́дь! Аллилꙋ́їа!
Здѣ затворѧ́ютъ ца́рскїѧ две́ри и завѣ́су ко причаще́нїю свѧщеннослужи́телей. Ста́нутъ же сослужа́щїи о́крестъ свѧты́ѧ трапе́зы благоговѣ́йнѡ и вне́млютъ моли́твѣ Архїере́а предъ причаще́нїемъ:
Влады́ко Хрїсте́ Бо́же нашъ, небе́сный хлѣ́бе, пи́ще всегѡ́ мі́ра, согрѣши́хъ на не́бо и предъ Тобо́ю и нѣсмь досто́инъ причасти́тисѧ свѧты́хъ и пречи́стыхъ Твои́хъ та́инствъ. Но Твое́ю бла́гостїю и неизречѐннымъ долготерпѣ́нїемъ досто́йна мѧ сотвори́ и неосꙋжде́нна и непосты́дна причасти́тисѧ пресвѧта́гѡ тѣ́ла и честны́ѧ кро́ве во оставле́нїе грѣхѡ́въ и жизнь вѣ́чную!
И причаща̀етсѧ Архїере́й (илѝ Іере́й) свѧта́гѡ тѣ́ла глаголѧ въ себѣ́: Тѣ́ло Хрїсто́во!
Причасти́всѧ самъ, Архїере́й преподае́тъ служа́щымъ Іере́емъ и дїа́конѡмъ свѧтое тѣ́ло, глаго́лѧ коемꙋ́ждо: Тѣ́ло Хрїсто́во! А прїе́млѧй по обы́чаю на дла́ни своѧ́ отвѣщава́етъ: Ами́нь!
Та́же пое́млетъ Архїере́й свѧтꙋ́ю ча́шу съ пла́томъ и приобща́етсѧ, глаго́лѧ въ себѣ́: Кровь Хрїсто́ва ча́ша жѝзни! Тожде глаго́летъ приобща́ѧ отъ ча́ши сослужа́щихъ Іере́евъ и дїа́конѡвъ, они́ же отвѣщава́ютъ: Ами́нь!
ЗРИ, да ча́сти свѧтагѡ тѣ́ла Хрїсто́ва, ꙗ́же на ді́скосѣ, ника́коже по причаще́нїи свѧщеннослужи́телей въ поти́ръ вложи́ши!
Сконча́вшусѧ пѣснопѣ́нїю прича́стнагѡ стїха́, открыва́ютъ завѣ́су и ца̀рскїѧ врата́, дїа́конъ же ставъ у десны́ѧ страны́ свѧты́ѧ трапе́зы глаго́летъ: Го́споди, благословѝ!
Архїре́й (или́ Іере́й) подае́тъ ча́шу дїа́кону глаго́лѧ:
Сла́ва Бо́гу освѧти́вшему и освѧща́ющему всѣхъ насъ!
Дїа́конъ же прїе́млѧ отъ Архїере́а (или́ Іере́а) свѧтꙋ́ю ча́шу, глаго́летъ: Вознеси́сѧ на небеса́, Бо́же, и по всей земли́ сла́ва Твоѧ́[[Псал. 56:6, 107:6.]], и ца́рство Твое́ пребыва́етъ во вѣ́ки вѣкѡ́въ!
Архїере́й (или́ Іере́й): Благослове́нно и́мѧ Го́спода Бо́га на́шегѡ во вѣ́ки вѣкѡ́въ[[Също, 71:17, 112:2.]]
Та́же взе́млетъ Архїере́й (или́ Іере́й) ді́скосъ со свѧты́мъ хлѣ́бомъ, дїа́конъ же исхо́дитъ съ ча́шею во свѧты́ѧ две́ри и показꙋ́ѧ ю лю́демъ возглаша́етъ: Со стра́хомъ Бо́жїимъ приступи́те!
Лю́дїе пою́тъ: Благослове́нъ грѧды́й во и́мѧ Госпо́дне[[Псал. 117:26, Мат. 21:9, Мар. 11:9, Лук. 19:38, Иоан. 12:13.]] Испо́лни уста́ моѧ́ хвале́нїѧ, Го́споди, и ра́дости испо́лни устнѣ мои́, ꙗ́кѡ да воспою́ сла́ву Твою́[[Псал. 70:8, 50:17.]]
И ста́нетъ Архїере́й съ ді́скосомъ во две́рехъ, дїа́конъ же съ ча́шею предъ ико́ною Бо́жїѧ Ма́тере. Прича́стницы изъ мїрѧ́нъ (а́ще суть) подхо́дѧтъ со смире́нїемъ и благоговѣ́нїемъ ко Архїере́ови пре́жде, и́же коемꙋ́ждо ихъ глаго́летъ: Тѣ́ло Христово! и влага́етъ десни́цею часть свѧта́гѡ тѣ́ла во уста́, хрїстїани́нъ же отвѣщава́етъ: Ами́нь! и потреблѧ́етъ воспрїѧтую части́цу; по семъ подхо́дѧтъ къ дїа́кону, и́же глаго́летъ коемꙋждо ихъ: Кровь Хрїсто́ва ча́ша жи́зни! и подае́тъ ча́шу имъ отпи́ти, хрїстїани́нъ же отвѣщава́етъ: Ами́нь! и причаща́етсѧ отъ ча́ши честны́ѧ кро́ве Хрїсто́вы. (Въ Закѵ́нѳѣ же по причаще́нїи свѧщеннослужи́телей влага́ютъ части́цы свѧта́гѡ тѣ́ла Хрїсто́ва въ поти́ръ и та́кѡ причаща́ютъ мїрѧ́нъ лжи́цею, ꙗ́кѡже єсть обы́чай на лїтургі́ахъ Васі́лїа Вели́кагѡ, Іѡа́нна Златоꙋ́стагѡ и преждеосвѧще́нныхъ дарѡ́въ).
Сконча́вшусѧ причаще́нїю, Архїере́й (или́ Іере́й) благословлѧ́етъ люде́й ді́скосомъ, глаго́лѧ: Спаси́, Бо́же, лю́ди Твоѧ́ и благослови́ достоѧ́нїе Твое́!
Лю́дїе пою́тъ: благодари́мъ Тѧ, Хрїсте́ Бо́же нашъ, ꙗ́кѡ сподо́билъ єси́ насъ причасти́тисѧ тѣ́ла и кро́ве Твоеѧ́ во оставле́нїе грѣхѡ́въ и въ жизнь вѣ́чную! Неосужде́нны насъ сохрани́, мо́лимсѧ, ꙗ́кѡ благъ и человѣколю́бецъ!
По причаще́нїи люде́й входѧтъ Архїере́й же и дїа́конъ во свѧты́й олта́рь и полага́ютъ свѧта́ѧ на свѧтꙋ́ю трапе́зу. Архїере́й влага́етъ части́цы свѧта́гѡ хлѣ́ба (а́ще суть) отъ ді́скоса въ поти́ръ со всѧ́кимъ опа́сствомъ и прїи́мъ кади́льницу кади́тъ свѧты́ѧ та́йны, глаго́лѧ та́йнѡ моли́тву сїю́:
Возвесели́лъ єси́ насъ, Бо́же, соедине́нїемъ Твои́мъ и Тебѣ́ прино́симъ пѣснь благодаре́нїѧ, плодъ усте́нъ, исповѣ́дающихъ благода́ть Твою́, съ кади́ломъ симъ! Да взы́детъ же предъ Тѧ, Бо́же, и да не возврати́тсѧ вотще́, но да́руй намъ єгѡ́ ра́ди благᲂуха́нїе пресвѧта́гѡ Твоегѡ́ Дꙋ́ха, мѵ́ро пречи́стое и неоте́млемое! Испо́лни уста́ на́ша хвале́нїѧ и устнѣ́ на́шѧ ра́дованїѧ и се́рдце ра́дости и весе́лїѧ во Хрїстѣ́ Іисꙋ́се Го́сподѣ на́шемъ, съ Ни́мже благослове́нъ єси́ со пресвѧты́мъ Твои́мъ Дꙋ́хомъ, ны́нѣ и при́снѡ и во вѣ́ки вѣкѡ́въ!
Еди́нъ отъ Іере́евъ взе́млетъ свѧтꙋ́ю ча́шу, дїа́конъ же ді́скосъ и отно́сѧтъ ѧ на свѧты́й же́ртвенникъ безъ кажденїѧ и ничто́же глаго́люще. Та́же свива́ютъ антїми́нсъ и дїа́конъ, изше́дъ се́верными две́рьми и ставъ на свое́мъ мѣ́стѣ на солеѝ съ лице́мъ къ наро́ду, глаго́летъ:
Па́ки и па́ки, вы́ну ми́ромъ Го́споду помо́лимсѧ! Ꙗ́кѡ да бꙋ́детъ на́мъ причаще́нїе свѧты́нь Егѡ́ во отгна́нїе всѧ́кїѧ лука́выѧ ве́щи, въ напꙋ́тїе живота́ вѣ́чнагѡ, во обще́нїе и даръ Свѧта́гѡ Дꙋ́ха помо́лимсѧ! Пресвѧтꙋ́ю, пречи́стую, пресла́вную, благослове́нную Влады́чицу нашу Богоро́дицу и приснодѣ́ву Марі́ю со всѣ́ми свѧты́ми и пра́ведными помѧнꙋ́вше, са́ми себе́ и другъ дрꙋ́га и весь живо́тъ нашъ Хрїстꙋ́ Богу предади́мъ!
Лю́дїе: Тебѣ́, Го́споди!
Сїѧ́ дїа́кону глаго́лющу, Архїере́й (или́ Іере́й) стоѧ́ предъ свѧто́ю трапе́зою та́йнѡ мо́литсѧ си́це:
Бо́же, мно́гагѡ ра́ди и неизрече́ннагѡ благᲂутро́бїѧ снише́дый къ не́мощи рабъ Твои́хъ и сподо́бивый насъ причасти́тисѧ сеѧ́ небе́сныѧ трапе́зы, да не осꙋ́диши насъ, Влады́ко, грѣ́шныхъ, ѡ причаще́нїи пречи́стыхъ Твои́хъ та́инъ, но сохрани́ насъ, Бла́же, во свѧты́ни, ꙗ́кѡ да Досто́йни бы́вше пресвѧта́гѡ Твоегѡ́ Дꙋ́ха обрѧ́щемъ часть и наслѣ́дїе со всѣ́ми свѧтыми отъ вѣ́ка Тебѣ́ благᲂугоди́вшими во свѣ́тѣ лица́ Твоегѡ́! Щедро́тами єдиноро́днагѡ Сы́на Твоегѡ́, Го́спода же и Спа́са на́шегѡ Іисꙋса Хрїста́, съ Ни́мже благослове́нъ єси́ со пресвѧты́мъ и благи́мъ и животворѧ́щимъ Твои́мъ Дꙋ́хомъ, ны́нѣ и при́снѡ и во вѣ́ки вѣкѡ́въ!
Возгласъ: Ꙗ́кѡ благослови́сѧ и свѧти́сѧ и просла́висѧ всечестно́е и великолѣ́пое свѧто́е и́мѧ Твое́, Отца́ и Сы́на и Свѧта́гѡ Дꙋ́ха, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Архїере́й (или́ Іере́й) зна́менуетъ люде́й: Миръ всѣмъ!
Дїа́конъ же а́бїе глаго́летъ: Главы́ на́шѧ Го́сподеви прикло́нимъ!
Лю́дїе: Тебѣ́ Го́споди! Архїере́й (или́ Іере́й) глаго́летъ та́йнѡ моли́тву:
Бо́же вели́кїй и ди́вный, при́зри на равы́ Твоѧ́, ꙗ́кѡ Тебѣ́ вы́и приклони́хомъ, и простри́ рꙋ́ку Твою́ держа́вную, испо́лненную благослове́нїи, и благослови́ лю́ди Твоѧ́ и сохрани́ достоѧ́нїе Твое́, ꙗ́кѡ да при́снѡ и всегда́ сла́вимъ Тѧ, єди́наго жива́го и и́стиннаго Бо́га на́шего, свѧтꙋ́ю и єдиносꙋ́щную Тро́ицу, Отца́ и Сы́на и Свѧта́го Дꙋ́ха!
Возгласъ: Тебѣ́ бо подоба́етъ и до́лженствуетъ отъ всѣхъ насъ всѧ́кое славосло́вїе, честь, поклоне́нїе и благодаре́нїѧ, Отцꙋ́ и Сы́ну и Свѧто́му Дꙋ́ху, ны́нѣ и при́снѡ и во вѣ́ки вѣкѡ́въ!
Лю́дїе: Ами́нь!
Дїа́конъ: Съ ми́ромъ Хрїсто́вымъ изы́демъ! Архїере́й (или́ Іере́й) изше́дъ изъ олтарѧ́ свѧты́ми две́рьми и ставъ среди́ наро́да, глаго́летъ моли́тву сїю́ зрѧ къ восто́кѡмъ:
Отъ си́лы въ си́лу ше́ствующе и всю въ хра́мѣ Твое́мъ испо́лнивше боже́ственную слꙋ́жбу и ны́нѣ мо́лимсѧ Тебѣ́, Го́споди Бо́же нашъ, соверше́ннагѡ человѣколю́бїѧ Твоегѡ́ сподо́би насъ! Испра́ви нашъ путь, укорени́ насъ въ стра́сѣ Твое́мъ, всѣхъ поми́луй и небе́снагѡ Твоегѡ́ ца́рствїѧ досто́йны покажи́ во Хрїстѣ́ Іисꙋ́сѣ Го́сподѣ на́шемъ, съ Нимже Тебѣ́ подоба́етъ сла́ва, честь, держа́ва, кꙋ́пнѡ со пресвѧты́мъ Дꙋ́хомъ, ны́нѣ и при́снѡ и во вѣки вѣкѡ́въ!
Лю́дїе: Ами́нь!
Дїа́конъ: Отпуща́етесѧ съ ми́ромъ!
Архїере́й (или́ Іере́й): Благослови́сѧ Богъ, благословлѧ́ѧй и освѧща́ѧй насъ причаще́нїемъ свѧты́хъ и пречи́стыхъ Свои́хъ та́инъ, ны́нѣ и при́снѡ и во вѣ́ки вѣкѡ́въ! Ами́нь!
И и́дутъ лю́дїе во своѧ́ си, Архїере́й же и сослужи́вшїи ємꙋ́ совлача́ютсѧ свѧты́хъ оде́ждъ; та́кѡжде и дїа́конъ по потребле́нїи свѧты́хъ та́инъ, и и́дутъ вси во своѧ́ си благодарѧ́ще Бо́га.
Конецъ и Богу слава!
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.