Парємїѝ ѻ҆́бщыѧ коемꙋ́ждо ст҃о́мꙋ

Парємїѝ ѻ҆́бщыѧ коемꙋ́ждо ст҃о́мꙋ

<<сл҃є: 469>>

[глⷡ҇а л҃ѳ] ПАРЕМІЍ

ѻ҆́бщыѧ коемꙋ́ждо ст҃о́мꙋ.

Прⷪ҇ро́кꙋ парємїѝ, а҃-ѧ: Првⷣныхъ дꙋ́шы въ рꙋцѣ̀ бж҃їей: в҃-ѧ: Првⷣницы во вѣ́ки живꙋ́тъ: г҃-ѧ: Првⷣникъ, а҆́ще пости́гнетъ сконча́тисѧ, въ поко́и бꙋ́детъ:

А҆пⷭ҇лꙋ є҆ди́номꙋ парємїѝ, а҃-ѧ: Возлю́бленнїи, а҆́ще се́рдце на́ше не за́зритъ на́мъ: в҃-ѧ: Возлю́бленнїи, а҆́ще си́це возлюби́лъ є҆́сть на́съ бг҃ъ: г҃-ѧ: Возлю́бленнїи, а҆́ще кто̀ рече́тъ: ꙗ҆́кѡ люблю̀ бг҃а:

А҆пⷭ҇лѡмъ парємїѝ, а҃-ѧ: Бра́тїе, бл҃гослове́нъ бг҃ъ и҆ ѻ҆ц҃ъ гдⷭ҇а на́шегѡ і҆и҃са хрⷭ҇та̀: в҃-ѧ: Возлю́бленнїи, препоѧ́савше чрє́сла помышле́нїѧ ва́шегѡ: г҃-ѧ: Возлю́бленнїи, молю̀ ꙗ҆́кѡ прише́льцы и҆ стра́нники:

Ст҃и́телю є҆ди́номꙋ парємїѝ, а҃-ѧ: Па́мѧть прпⷣбнагѡ съ похвала́ми: в҃-ѧ: Оу҆ста̀ првⷣнагѡ ка́плютъ премꙋ́дрость: г҃-ѧ: Похвалѧ́емꙋ првⷣникꙋ возвеселѧ́тсѧ лю́дїе:

Ст҃и́телємъ парємїѝ, а҃-ѧ: Па́мѧть прпⷣбнагѡ съ похвала́ми: в҃-ѧ: Оу҆ста̀ првⷣнагѡ ка́плютъ премꙋ́дрость: г҃-ѧ: Првⷣникъ, а҆́ще пости́гнетъ сконча́тисѧ, въ поко́и бꙋ́детъ:

Прпⷣбномꙋ є҆ди́номꙋ, и҆ прпⷣбнымъ парємїѝ, что̀ и҆ прⷪ҇ро́кꙋ, а҃-ѧ и҆ в҃-ѧ, а҆ г҃-ѧ паремїа̀: Првⷣникъ, а҆́ще пости́гнетъ сконча́тисѧ, въ поко́и бꙋ́детъ:

Мч҃нкꙋ є҆ди́номꙋ парємїѝ, а҃-ѧ: Та́кѡ глаго́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ: в҃- ѧ: Првⷣныхъ дꙋ́шы въ рꙋцѣ̀ бж҃їей: г҃-ѧ: Првⷣникъ, а҆́ще пости́гнетъ сконча́тисѧ, въ поко́и бꙋ́детъ:

Мч҃нкѡмъ парємїѝ, а҃-ѧ: Та́кѡ глаго́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ: в҃-ѧ: Првⷣныхъ дꙋ́шы въ рꙋцѣ̀ бж҃їей: г҃-ѧ: Првⷣницы во вѣ́ки живꙋ́тъ:

Сщ҃енномч҃нкꙋ є҆ди́номꙋ, и҆ сщ҃енномч҃нкѡмъ парємїѝ, что̀ и҆ мч҃нкѡмъ.

<<сл҃є ѡ҆б.: 470>>

Прпⷣбномч҃нкꙋ є҆ди́номꙋ, и҆ прпⷣбномч҃нкѡмъ, что̀ и҆ прпⷣбнымъ ѻ҆тцє́мъ парємїѝ тѣ́же.

Мч҃нцѣ є҆ди́ной, и҆ мч҃нцамъ, и҆ прпⷣбномч҃нцамъ парємїѝ, что̀ и҆ мч҃нкѡмъ тѣ́же.

И҆сповѣ́дникꙋ парємїѝ, что̀ и҆ прпⷣбномꙋ.

Хрⷭ҇та̀ ра́ди ю҆рѡ́дивымъ парємїѝ, что̀ и҆ прпⷣбнымъ.

Безме́здникѡмъ парємїѝ, что̀ и҆ мч҃нкѡмъ.

Прⷪ҇ро́кꙋ парємїѝ.

а҃] Премꙋ́дрости соломѡ́новы чте́нїе. [Глава̀ г҃.]

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша въ ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ. И҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь, разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

в҃] Премꙋ́дрости соломѡ́новы чте́нїе [главы̑ є҃ и҆ ѕ҃].

Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ: и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѡрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый преподо́бїе. Поѡстри́тъ же напра́сный <<сл҃ѕ: 471>> гнѣ́въ во ѡ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды. Вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆́бѡ ца́рїе, и҆ разꙋмѣ́йте, навы́кните сꙋдїи̑ концє́въ землѝ. Внꙋши́те держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ, ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

г҃) Премꙋ́дрости соломѡ́новы чте́нїе [главы̑ д҃ и҆ є҃].

Првⷣникъ а҆́ще пости́гнетъ сконча́тисѧ, въ поко́и бꙋ́детъ. ѡ҆сꙋ́дитъ же првⷣникъ, ᲂу҆мира́ѧй, живꙋ́щыѧ нечести̑выѧ: ᲂу҆́зрѧтъ бо кончи́нꙋ првⷣнагѡ, и҆ не разꙋмѣ́ютъ, что̀ совѣща́ша ѡ҆ не́мъ. ꙗ҆́кѡ пове́ржетъ гдⷭ҇ь нечести̑выѧ безгла̑сны ни́цъ, и҆ поколе́блетъ и҆̀хъ ѿ ѡ҆снова́нїй, и҆ до послѣ́днѧгѡ и҆сче́знꙋтъ въ болѣ́зни и҆ па́мѧть и҆́хъ поги́бнетъ. Прїи́дꙋтъ бо въ помышле́нїе согрѣше́нїй свои́хъ ᲂу҆жа́сни: и҆ ѡ҆бличи́тъ и҆̀хъ сопроти́въ беззако́нїѧ и҆́хъ. Тогда̀ ста́нетъ въ дерзнове́нїи мно́зѣ првⷣникъ пред̾ лице́мъ ѡ҆скорби́вшихъ є҆го̀, и҆ ѿмета́ющихъ трꙋды̀ є҆гѡ̀. Ви́дѣвше же є҆го̀ смѧтꙋ́тсѧ стра́хомъ мно́гимъ, и҆ ᲂу҆жа́снꙋтсѧ ѡ҆ пресла́вномъ сп҃се́нїи є҆гѡ̀. Рекꙋ́тъ бо въ себѣ̀ ка́ющесѧ, и҆ въ тѣснотѣ̀ дꙋ́ха воздохнꙋ́тъ, и҆ рекꙋ́тъ: се́й бѣ̀, є҆го́же и҆мѣ́хомъ нѣ́когда въ посмѣ́хъ, и҆ въ при́тчꙋ поноше́нїѧ безꙋ́мнїи, житїѐ є҆гѡ̀ вмѣни́хомъ неи́стово, и҆ кончи́нꙋ є҆гѡ̀ безче́стнꙋ. Ка́кѡ вмѣни́сѧ въ сынѣ́хъ бж҃їихъ, и҆ во ст҃ы́хъ жре́бїй є҆гѡ̀ є҆́сть; Оу҆́бѡ заблꙋди́хомъ ѿ пꙋтѝ и҆́стиннагѡ, и҆ пра́вды свѣ́тъ не ѡ҆блиста̀ на́мъ, и҆ со́лнце не возсїѧ̀ на́мъ. Беззако́нныхъ и҆спо́лнихомсѧ стє́зь и҆ поги́бели, и҆ ходи́хомъ стєзѝ непрохѡ́дны, пꙋти́ же гдⷭ҇нѧ не разꙋмѣ́хомъ.

<<сл҃ѕ ѡ҆б.: 472>>

А҆пⷭ҇лꙋ є҆ди́номꙋ парємїѝ.

а҃) Собо́рнагѡ посла́нїѧ і҆ѡа́ннова чте́нїе [зача́ло ѻ҃г].

Возлю́бленнїи, а҆́ще се́рдце на́ше не за́зритъ на́мъ, дерзнове́нїе и҆́мамы къ бг҃ꙋ: И҆ є҆гѡ́же а҆́ще про́симъ, прїе́млемъ ѿ негѡ̀: ꙗ҆́кѡ за́пѡвѣди є҆гѡ̀ соблюда́емъ, и҆ ᲂу҆гѡ́днаѧ пред̾ ни́мъ твори́мъ. И҆ сїѧ̀ є҆́сть за́повѣдь є҆гѡ̀, да вѣ́рꙋемъ во и҆́мѧ сн҃а є҆гѡ̀ і҆и҃са хрⷭ҇та̀, и҆ лю́бимъ дрꙋ́гъ дрꙋ́га, ꙗ҆́коже да́лъ є҆́сть за́повѣдь на́мъ. И҆ соблюда́ѧй за́пѡвѣди є҆гѡ̀, въ не́мъ пребыва́етъ, и҆ то́й въ не́мъ: и҆ ѡ҆ се́мъ разꙋмѣ́емъ, ꙗ҆́кѡ пребыва́етъ въ на́съ, ѿ дх҃а, є҆го́же да́лъ є҆́сть на́мъ. Возлю́бленнїи, не всѧ́комꙋ дꙋ́хꙋ вѣ́рꙋйте, но и҆скꙋша́йте дꙋ́хи, а҆́ще ѿ бг҃а сꙋ́ть: ꙗ҆́кѡ мно́зи лжепроро́цы и҆зыдо́ша въ мі́ръ. Ѡ҆ се́мъ познава́йте дх҃а бж҃їѧ, и҆ дꙋ́ха ле́стча: всѧ́къ дх҃ъ, и҆́же и҆сповѣ́дꙋетъ і҆и҃са хрⷭ҇та̀ во пло́ти прише́дша, ѿ бг҃а є҆́сть. И҆ всѧ́къ дꙋ́хъ, и҆́же не и҆сповѣ́дꙋетъ і҆и҃са хрⷭ҇та̀ во пло́ти прише́дша, ѿ бг҃а нѣ́сть: и҆ се́й є҆́сть а҆нті́хрїстовъ, є҆го́же слы́шасте ꙗ҆́кѡ грѧде́тъ, и҆ ны́нѣ въ мі́рѣ є҆́сть ᲂу҆жѐ. Вы̀ ѿ бг҃а є҆стѐ ча̑дца, и҆ побѣди́сте тѣ́хъ: ꙗ҆́кѡ бо́лїй є҆́сть и҆́же въ ва́съ, не́жели и҆́же въ мі́рѣ. Ѻ҆нѝ ѿ мі́ра сꙋ́ть, сегѡ̀ ра́ди ѿ мі́ра глаго́лютъ, и҆ мі́ръ тѣ́хъ послꙋ́шаетъ. Мы̀ ѿ бг҃а є҆смы̀: и҆́же зна́етъ бг҃а, послꙋ́шаетъ на́съ: и҆ и҆́же нѣ́сть ѿ бг҃а, не послꙋ́шаетъ ва́съ.

в҃) Собо́рнагѡ посла́нїѧ і҆ѡа́ннова чте́нїе [зача́ло ѻ҃г, ѿ полꙋ̀].

Возлю́бленнїи, а҆́ще си́це возлюби́лъ є҆́сть на́съ бг҃ъ, и҆ мы̀ до́лжни є҆смы̀ дрꙋ́гъ дрꙋ́га люби́ти. Бг҃а никто́же нигдѣ́же ви́дѣ. а҆́ще дрꙋ́гъ дрꙋ́га лю́бимъ, бг҃ъ въ на́съ пребыва́етъ, и҆ любы̀ є҆гѡ̀ соверше́нна є҆́сть въ на́съ. Ѡ҆ се́мъ разꙋмѣ́емъ, ꙗ҆́кѡ въ не́мъ пребыва́емъ, и҆ то́й въ на́съ, ꙗ҆́кѡ ѿ дх҃а своегѡ̀ да́лъ є҆́сть на́мъ. И҆ мы̀ ви́дѣхомъ и҆ свидѣ́тельствꙋемъ, ꙗ҆́кѡ ѻ҆ц҃ъ посла̀ сн҃а сп҃си́телѧ мі́рꙋ: И҆́же а҆́ще и҆сповѣ́сть, ꙗ҆́кѡ і҆и҃съ є҆́сть сн҃ъ бж҃їй, бг҃ъ въ не́мъ пребыва́етъ, и҆ то́й въ бз҃ѣ. И҆ мы̀ позна́хомъ, и҆ вѣ́ровахомъ, любо́вь, ю҆́же и҆́мать бг҃ъ <<сл҃з: 473>> въ на́съ. бг҃ъ любы̀ є҆́сть, и҆ пребыва́ѧй въ любвѝ, въ бз҃ѣ пребыва́етъ, и҆ бг҃ъ въ не́мъ пребыва́етъ.

г҃) Собо́рнагѡ посла́нїѧ і҆ѡа́ннова чте́нїе [зача́ло ѻ҃д].

Возлю́бленнїи, а҆́ще кто̀ рече́тъ, ꙗ҆́кѡ люблю̀ бг҃а, а҆ бра́та своего̀ ненави́дитъ, ло́жъ є҆́сть: и҆́бо не любѧ́й бра́та своегѡ̀, є҆го́же ви́дѣ, бг҃а, є҆гѡ́же не ви́дѣ, ка́кѡ мо́жетъ люби́ти; И҆ сїю̀ за́повѣдь и҆́мамы ѿ негѡ̀, да любѧ́й бг҃а, лю́битъ и҆ бра́та своего̀. Всѧ́къ вѣ́рꙋѧй, ꙗ҆́кѡ і҆и҃съ є҆́сть хрⷭ҇то́съ, ѿ бг҃а рожде́нъ є҆́сть: и҆ всѧ́къ любѧ́й ро́ждшаго, лю́битъ и҆ рожде́ннаго ѿ негѡ̀. Ѡ҆ се́мъ вѣ́мы, ꙗ҆́кѡ лю́бимъ ча̑да бж҃їѧ, є҆гда̀ бг҃а лю́бимъ, и҆ за́пѡвѣди є҆гѡ̀ соблюда́емъ. Сїѧ́ бо є҆́сть любы̀ бж҃їѧ, да за́пѡвѣди є҆гѡ̀ соблюда́емъ, и҆ за́пѡвѣди є҆гѡ̀ тѧ̑жки не сꙋ́ть. ꙗ҆́кѡ всѧ́къ рожде́нный ѿ бг҃а, побѣжда́етъ мі́ръ: и҆ сїѧ̀ є҆́сть побѣ́да побѣ́ждшаѧ мі́ръ, вѣ́ра на́ша. Кто́ є҆сть побѣжда́ѧй мі́ръ, то́кмѡ вѣ́рꙋѧй, ꙗ҆́кѡ і҆и҃съ є҆́сть сн҃ъ бж҃їй;

А҆пⷭ҇лѡмъ парємїѝ.

а҃) Собо́рнагѡ посла́нїѧ петро́ва чте́нїе [зача́ло н҃и].

Бра́тїе, бл҃гослове́нъ бг҃ъ и҆ ѻ҆ц҃ъ гдⷭ҇а на́шегѡ і҆и҃съ хрⷭ҇та̀, и҆́же по мно́зѣй свое́й млⷭ҇ти порожде́й на́съ во ᲂу҆пова́нїе жи́во, воскрⷭ҇нїемъ і҆и҃съ хрⷭ҇то́вымъ ѿ ме́ртвыхъ, Въ наслѣ́дїе нетлѣ́нно, и҆ нескве́рно, и҆ неꙋвѧда́емо, соблюде́но на нб҃сѣ́хъ ва́съ ра́ди: И҆̀же си́лою бж҃їею соблюде́ни вѣ́рою, во сп҃се́нїе гото́вое ꙗ҆ви́тисѧ во вре́мѧ послѣ́днее. Ѡ҆ не́мже ра́дꙋйтесѧ, ма́лѡ ны́нѣ, а҆́ще лѣ́по є҆́сть, приско́рбни бы́вше въ разли́чныхъ напа́стехъ: Да и҆скꙋше́нїе ва́шеѧ вѣ́ры, многочестнѣ́йше зла́та ги́бнꙋща, ѻ҆гне́мъ же и҆скꙋше́на, ѡ҆брѧ́щетсѧ въ похвалꙋ̀ и҆ че́сть и҆ сла́вꙋ, во ѿкрове́нїи і҆и҃съ хрⷭ҇то́вѣ. Є҆го́же не ви́дѣвше лю́бите, и҆ на него́же ны́нѣ не зрѧ́ще, вѣ́рꙋюще же, ра́дꙋетесѧ ра́достїю неизглаго́ланною и҆ просла́вленною: Прїе́млюще кончи́нꙋ вѣ́рѣ ва́шей, сп҃се́нїе дꙋша́мъ.

<<сл҃з ѡ҆б.: 474>>

в҃) Собо́рнагѡ посла́нїѧ петро́ва чте́нїе [зача́ло н҃и, ѿ полꙋ̀].

Возлю́бленнїи, препоѧ́савше чрє́сла помышле́нїѧ ва́шегѡ, трезвѧ́щесѧ, соверше́ннѣ ᲂу҆пова́йте на приноси́мꙋю ва́мъ бл҃года́ть, ѿкрове́нїемъ і҆и҃съ хрⷭ҇то́вымъ: ꙗ҆́кѡ ча̑да послꙋша́нїѧ, не преѡбразꙋ́ющесѧ пе́рвыми невѣ́дѣнїѧ ва́шегѡ похотѣ́нїи: Но по зва́вшемꙋ вы̀ ст҃о́мꙋ, и҆ са́ми ст҃и во все́мъ житїѝ бꙋ́дите. Занѐ пи́сано є҆́сть: ст҃и бꙋ́дите, ꙗ҆́кѡ а҆́зъ ст҃ъ є҆́смь. И҆ а҆́ще ѻ҆ц҃а̀ называ́ете нелицемѣ́рнѡ сꙋдѧ́ща комꙋ́ждо по дѣ́лꙋ, со стра́хомъ житїѧ̀ ва́шегѡ вре́мѧ жи́тельствꙋйте: Вѣ́дѧще, ꙗ҆́кѡ не и҆стлѣ́ннымъ сребро́мъ, и҆лѝ зла́томъ и҆зба́вистесѧ ѿ сꙋ́етнагѡ ва́шегѡ житїѧ̀ ѻ҆тцы̀ пре́даннагѡ: Но честно́ю кро́вїю, ꙗ҆́кѡ а҆́гнца непоро́чна, и҆ пречтⷭ҇а хрⷭ҇та̀.

г҃) Собо́рнагѡ посла́нїѧ петро́ва чте́нїе [зача́ло н҃и, ѿ полꙋ̀].

Возлю́бленнїи, молю̀ ꙗ҆́кѡ прише́льцы и҆ стра́нники, ѡ҆греба́тисѧ ѿ плотски́хъ похоте́й, ꙗ҆̀же вою́ютъ на дꙋ́шꙋ: Житїѐ ва́ше и҆мꙋ́ще добро̀ во ꙗ҆зы́цѣхъ: да ѡ҆ не́мже клеве́щꙋтъ ва́съ а҆́ки ѕлодѣ́євъ, ѿ до́брыхъ дѣ́лъ ви́дѣвше, просла́вѧтъ бг҃а въ де́нь посѣще́нїѧ. Повини́тесѧ ᲂу҆́бѡ всѧ́комꙋ человѣ́чꙋ ꙾созда́нїю꙾[[꙾нача́льствꙋ꙾]], гдⷭ҇а ра́ди: а҆́ще царю̀, ꙗ҆́кѡ преѡблада́ющꙋ: А҆́ще ли же кнѧзє́мъ, ꙗ҆́кѡ ѿ негѡ̀ пѡ́сланнымъ, во ѿмще́нїе ᲂу҆́бѡ ѕлодѣ́ємъ, въ похвалꙋ̀ же бл҃готво́рцємъ. Ꙗ҆́кѡ та́кѡ є҆́сть во́лѧ бж҃їѧ, бл҃готворѧ́щымъ ѡ҆бꙋздова́ти безꙋ́мныхъ человѣ́къ невѣ́жство: ꙗ҆́кѡ свобо́дни, а҆ не ꙗ҆́кѡ прикрове́нїе и҆мꙋ́ще ѕло́бы свобо́дꙋ, но ꙗ҆́кѡ рабѝ бж҃їи. Всѣ́хъ почита́йте: бра́тство возлюби́те: бг҃а бо́йтесѧ: царѧ̀ чти́те. Рабѝ, повинꙋ́йтесѧ во всѧ́комъ стра́сѣ влады́камъ: не то́кмѡ бл҃ги̑мъ и҆ крѡ́ткимъ, но и҆ стропти̑вымъ. Се́ бо є҆́сть ᲂу҆го́дно пред̾ бг҃омъ, а҆́ще со́вѣсти ра́ди бж҃їѧ терпи́тъ кто̀ скѡ́рби, стражда̀ без̾ пра́вды. Ка́ѧ бо похвала̀, а҆́ще согрѣша́юще мꙋ́чими терпитѐ; но а҆́ще добро̀ творѧ́ще, и҆ стра́ждꙋще терпитѐ, сїѐ ᲂу҆го́дно пред̾ бг҃омъ: На сїе́ бо и҆ зва́ни бы́сте. Занѐ и҆ хрⷭ҇то́съ пострада̀ по на́съ, на́мъ ѡ҆ста́вль ѡ҆́бразъ, да послѣ́дꙋемъ стопа́мъ є҆гѡ̀. И҆́же грѣха̀ не сотворѝ, ни ѡ҆брѣ́тесѧ ле́сть во <<сл҃и: 475>> ᲂу҆стѣ́хъ є҆гѡ̀: И҆́же ᲂу҆корѧ́емь, проти́вꙋ не ᲂу҆корѧ́ше: стражда̀, не преща́ше: предаѧ́ше же сꙋдѧ́щемꙋ пра́веднѡ. И҆́же грѣхѝ на́шѧ са́мъ вознесѐ на тѣ́лѣ свое́мъ на дре́во: да ѿ грѣ̑хъ и҆збы́вше, пра́вдою поживе́мъ.

Ст҃и́телю парємїѝ.

а҃) При́тчей чте́нїе [главы̑ г҃ и҆ и҃].

Па́мѧть првⷣнагѡ съ похвала́ми, и҆ бл҃гослове́нїе гдⷭ҇не на главѣ̀ є҆гѡ̀. Бл҃же́нъ чл҃вѣ́къ, и҆́же ѡ҆брѣ́те премꙋ́дрость, и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ, все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́цѣ є҆ѧ̀: въ шꙋ́йцѣ же є҆ѧ̀ бога́тство и҆ сла́ва. ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ млⷭ҇ть на ѧ҆зы́цѣ но́ситъ. Послꙋ́шайте ᲂу҆̀бо менѐ, ѽ ча̑да, честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ, и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ неѕло́бивїи кова́рство, ненака́заннїи же прилага́йте сердца̀. Послꙋ́шайте менѐ и҆ па́ки, честна̑ѧ бо рекꙋ̀, и҆ ѿве́рзꙋ ѿ ᲂу҆сте́нъ пра̑ваѧ: ꙗ҆́кѡ и҆́стинѣ поꙋчи́тсѧ горта́нь мо́й, ме́рзки же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋчꙋ́ бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.

в҃) Премꙋ́дрости соломѡ́новы чте́нїе [главы̑ і҃, ѕ҃ и҆ ѳ҃].

Оу҆ста̀ првⷣнагѡ ка́плютъ премꙋ́дрость: ᲂу҆стнѣ́ же мꙋже́й мꙋ́дрыхъ вѣ́дѧтъ бл҃года́ть. Оу҆ста̀ мꙋ́дрыхъ поꙋча́тсѧ <<сл҃и ѡ҆б.: 476>> премꙋ́дрости, пра́вда же и҆збавлѧ́етъ и҆̀хъ ѿ сме́рти. Сконча́вшꙋсѧ мꙋ́жꙋ првⷣнꙋ, не поги́бнетъ наде́жда. Сы́нъ бо пра́веденъ ражда́етсѧ въ живо́тъ, и҆ во бл҃ги́хъ свои́хъ пло́дъ пра́вды ѡ҆б̾и́метъ. Свѣ́тъ првⷣнымъ всегда̀, и҆ ѿ гдⷭ҇а ѡ҆брѧ́щꙋтъ бл҃года́ть и҆ сла́вꙋ. ѧ҆зы́къ мꙋ́дрыхъ дѡ́браѧ свѣ́сть, и҆ въ срⷣцѣ и҆́хъ почі́етъ мꙋ́дрость. Лю́битъ гдⷭ҇ь прпⷣбнаѧ сердца̀, прїѧ́тни же є҆мꙋ̀ всѝ непоро́чнїи въ пꙋтѝ. Мꙋ́дрость гдⷭ҇нѧ просвѣща́етъ лицѐ разꙋ́мнагѡ. Постига́етъ бо жела́ющыѧ ю҆̀, пре́жде да́же разꙋмѣ́ти ю҆̀: и҆ ᲂу҆до́бь ᲂу҆́зритсѧ ѿ лю́бѧщихъ ю҆̀. Оу҆́треневавый къ не́й не ᲂу҆трꙋди́тсѧ: и҆ бдѧ́й є҆ѧ̀ ра́ди, вско́рѣ без̾ печа́ли бꙋ́детъ. ꙗ҆́кѡ досто́йныхъ є҆ѧ̀ сама̀ ѡ҆бхо́дитъ и҆́щꙋщи: и҆ во стезѧ́хъ є҆ѧ̀ ꙗ҆влѧ́етсѧ и҆̀мъ бл҃гопрїе́мнѣ. Мꙋ́дрости никогда́же ѡ҆долѣ́етъ ѕло́ба. Си́хъ ра́ди и҆ рачи́тель бы́хъ добро́ты є҆ѧ̀: и҆ возлюби́хъ ю҆̀, и҆ поиска́хъ ѿ ю҆́ности моеѧ̀: И҆ взыска́хъ невѣ́стꙋ привестѝ себѣ̀, ꙗ҆́кѡ всѣ́хъ влⷣка возлюбѝ ю҆̀. Таи́бница бо є҆́сть бж҃їѧ хи́трости, и҆ ѡ҆брѣта́тельница дѣ́лъ є҆гѡ̀. Трꙋды̀ є҆ѧ̀, сꙋ́ть добродѣ́тєли: цѣломꙋ́дрїю же и҆ ра́зꙋмꙋ та̀ ᲂу҆́читъ, пра́вдѣ и҆ мꙋ́жествꙋ, и҆́хже потре́бнѣе ничто́же є҆́сть въ житїѝ человѣ́кѡмъ. А҆́ще же и҆ мно́гагѡ и҆скꙋ́сства жела́етъ кто̀, вѣ́сть дрє́внѧѧ, и҆ бы́ти хотѧ̑щаѧ разсмо́тритъ: Свѣ́сть и҆зви̑тїѧ слове́съ, и҆ разрѣшє́нїѧ гада́нїй: зна́мєнїѧ и҆ чꙋдеса̀ проразꙋмѣ́етъ, и҆ сбытїѧ̑ време́нъ и҆ лѣ́тъ: и҆ всѣ̑мъ совѣ́тникъ є҆́сть бл҃гъ, ꙗ҆́кѡ безсме́ртїе є҆́сть въ не́й, и҆ бл҃госла́вїе во ѻ҆бще́нїи слове́съ є҆ѧ̀. Сегѡ̀ ра́ди бесѣ́довахъ ко гдⷭ҇ꙋ и҆ помоли́хсѧ є҆мꙋ̀, и҆ рѣ́хъ ѿ всегѡ̀ се́рдца моегѡ̀: Бж҃е ѻ҆тцє́въ, и҆ гдⷭ҇и млⷭ҇ти, сотвори́вый всѧ̑ сло́вомъ твои́мъ, и҆ мꙋ́дростїю твое́ю ᲂу҆стро́ивый человѣ́ка, да владѣ́етъ бы́вшими ѿ тебѐ тварьмѝ, и҆ да ᲂу҆правлѧ́етъ мі́ръ въ преподо́бїи и҆ пра́вдѣ: да́ждь мѝ твои́хъ престо́лѡвъ присѣдѧ́щꙋю премꙋ́дрость, и҆ не ѿлꙋчѝ менѐ ѿ ѻ҆́трѡкъ твои́хъ, ꙗ҆́кѡ а҆́зъ ра́бъ тво́й, и҆ сы́нъ рабы́ни твоеѧ̀. Послѝ ю҆̀ съ нб҃съ ѿ ст҃а́гѡ жили́ща твоегѡ̀, и҆ ѿ прⷭ҇то́ла сла́вы твоеѧ̀, да сꙋ́щи со мно́ю наꙋчи́тъ мѧ̀, что̀ бл҃гоꙋго́дно є҆́сть пред̾ тобо́ю: и҆ наста́витъ <<сл҃ѳ: 477>> мѧ̀ въ ра́зꙋмъ, и҆ сохрани́тъ мѧ̀ въ сла́вѣ свое́й. Помышлє́нїѧ бо сме́ртныхъ всѧ̑ боѧзли̑ва, и҆ погрѣши́тєльна ᲂу҆мышлє́нїѧ и҆́хъ.

г҃) Премꙋ́дрости соломѡ́новы чте́нїе [главы̑ д҃, ѕ҃, з҃ и҆ в҃].

Похвалѧ́емꙋ првⷣникꙋ, возвеселѧ́тсѧ лю́дїе: Безсме́ртїе бо є҆́сть па́мѧть є҆гѡ̀, ꙗ҆́кѡ ѿ гдⷭ҇а познава́етсѧ, и҆ ѿ человѣ̑къ: и҆ ᲂу҆го́дна гдⷭ҇ви дꙋша̀ є҆гѡ̀. Возлюби́те ᲂу҆̀бо, ѽ мꙋ́жїе, мꙋ́дрость, и҆ поживетѐ: восхощи́те є҆ѧ̀, и҆ нака́зани бꙋ́дете: нача́ло бо є҆ѧ̀ любы̀, и҆ соблюде́нїе зако́на. Почти́те премꙋ́дрость, да во вѣ́ки ца́рствꙋете. Возвѣщꙋ̀ ва́мъ, и҆ не скры́ю ѿ ва́съ та̑инъ бж҃їихъ: Ꙗ҆́кѡ то́й мꙋ́дрости наста́вникъ є҆́сть, и҆ мꙋ́дрыхъ и҆спра́витель, и҆ всѧ́комꙋ смы́слꙋ и҆ дѣ́лꙋ хитре́цъ. И҆ всѣ̑мъ смы́слѡмъ наꙋчи́тъ мꙋ́дрость: є҆́сть бо въ не́й дх҃ъ разꙋ́менъ и҆ ст҃ъ, и҆ сїѧ́нїе свѣ́та присносꙋ́щнагѡ, и҆ ѡ҆́бразъ бл҃гости бж҃їѧ. Та̀ дрꙋ́ги бж҃їѧ и҆ прⷪ҇ро́ки ᲂу҆строѧ́етъ: Бл҃голѣ́пнѣйши же є҆́сть со́лнца, и҆ па́че всѧ́кагѡ сотворе́нїѧ ѕвѣ́здъ: свѣ́тꙋ сосꙋжда́ема ѡ҆брѣта́етсѧ пе́рвѣйши. Та̀ ᲂу҆гожда́ющихъ є҆́й ѿ болѣ́зней и҆зба́ви и҆ наста́ви на стєзѝ пра̑выѧ. Дадѐ и҆̀мъ ра́зꙋмъ и҆мѣ́ти ст҃ъ, и҆ сохранѝ ѧ҆̀ ѿ ловѧ́щихъ, и҆ по́двигъ крѣ́покъ подадѐ и҆̀мъ: Да разꙋмѣ́ютъ всѝ, ꙗ҆́кѡ си́льнѣе всегѡ̀ є҆́сть бл҃гоче́стїе. И҆ никогда́же премо́жетъ ѕло́ба мꙋ́дрости, нижѐ пре́йдетъ ѕлы̑ѧ ѡ҆блича́ющи сꙋ́дъ. Реко́ша же въ себѣ̀, помы́сливше непра́веднѡ: наси́льствꙋемъ првⷣномꙋ, и҆ не пощади́мъ преподо́бства є҆гѡ̀, ни ᲂу҆срами́мсѧ сѣди́нъ ста́рости многолѣ́тны. Бꙋ́детъ бо на́мъ крѣ́пость зако́нъ: и҆ ᲂу҆лови́мъ првⷣнаго, ꙗ҆́кѡ неꙋго́денъ на́мъ є҆́сть, и҆ проти́витсѧ дѣлѡ́мъ на́шымъ, и҆ поно́ситъ на́мъ ѿпаде́нїе зако́на, и҆ ѡ҆блича́етъ на́мъ согрѣшє́нїѧ наказа́нїѧ на́шегѡ. Возвѣща́етъ на́мъ ра́зꙋмъ и҆мѣ́ти бж҃їй, и҆ ѻ҆́трока гдⷭ҇нѧ себѐ и҆менꙋ́етъ. Бы́сть на́мъ на ѡ҆бличе́нїе помышле́нїємъ на́шымъ, и҆ тѧ́жекъ на́мъ є҆́сть, и҆ ви́димъ, ꙗ҆́кѡ неподо́бно и҆ны̑мъ житїѐ є҆гѡ̀, и҆ и҆змѣнє́ны стєзѝ є҆гѡ̀. Въ порꙋга́нїе вмѣни́хомсѧ є҆мꙋ̀, и҆ ᲂу҆далѧ́етсѧ ѿ пꙋте́й на́шихъ ꙗ҆́кѡ ѿ <<сл҃ѳ ѡ҆б.: 478>> нечистѡ́тъ, и҆ бл҃жи́тъ послѣ̑днѧѧ првⷣныхъ. Оу҆ви́димъ ᲂу҆́бѡ а҆́ще словеса̀ є҆гѡ̀ и҆́стинна сꙋ́ть, и҆скꙋ́симъ, ꙗ҆̀же сбыва́ютсѧ є҆мꙋ̀. Рꙋга́нїемъ и҆ мꙋ́кою и҆стѧ́жемъ є҆го̀: да разꙋмѣ́емъ кро́тость є҆гѡ̀, и҆ и҆скꙋ́симъ безѕло́бство є҆гѡ̀: сме́ртїю без̾ѡбра́зною ѡ҆сꙋ́димъ є҆го̀, бꙋ́детъ бо посѣще́нїе ѿ слове́съ є҆гѡ̀. Сїѧ̑ помы́слиша, и҆ прельсти́шасѧ: ѡ҆слѣпи́ бо ѧ҆̀ ѕло́ба и҆́хъ. и҆ не разꙋмѣ́ша та̑инъ бж҃їихъ, и҆ не разсꙋди́ша, ꙗ҆́кѡ ты̀ є҆сѝ бг҃ъ є҆ди́нъ, живота̀ и҆мѣ́ѧй и҆ сме́рти вла́сть, и҆ сп҃са́ѧй во вре́мѧ ско́рби, и҆ и҆збавлѧ́ѧй ѿ всѧ́кагѡ ѕла̀, Ще́дръ и҆ млⷭ҇тивъ, и҆ даѧ̀ прпⷣбнымъ свои̑мъ бл҃года́ть, и҆ свое́ю мы́шцею гѡ́рдымъ противлѧ́ѧсѧ.

Ст҃и́телємъ парємїѝ.

а҃) Па́мѧть првⷣнагѡ съ похвала́ми: [Пи́сана ст҃и́телю].

в҃) При́тчей чте́нїе [главы̑ і҃ и҆ а҃і].

Оу҆ста̀ првⷣнагѡ ка́плютъ премꙋ́дрость: ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ бл҃года̑ти, ᲂу҆ста́ же нечести́выхъ развраща́ютсѧ: Мѣ̑рила льсти̑ваѧ ме́рзость пред̾ гдⷭ҇емъ: вѣ́съ же пра́ведный прїѧ́тенъ є҆мꙋ̀. И҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. Не по́льзꙋютъ и҆мѣ̑нїѧ въ де́нь ꙗ҆́рости, пра́вда же и҆зба́витъ ѿ сме́рти. Оу҆́меръ првⷣный, ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. Пра́вда непоро́чнагѡ и҆справлѧ́етъ пꙋти̑, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ првⷣнꙋ, не поги́бнетъ наде́жда: похвала́ же нечести́выхъ поги́бнетъ. Првⷣникъ ѿ ло́ва ᲂу҆бѣ́гнетъ, вмѣ́стѡ же є҆гѡ̀ предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же првⷣныхъ бл҃госпѣ́шное. Во бл҃ги́хъ првⷣныхъ и҆спра́витсѧ гра́дъ, <<с҃м: 479>> и҆ въ поги́бели нечести́выхъ ра́дованїе: Во бл҃гослове́нїи пра́выхъ возвы́ситсѧ гра́дъ, ᲂу҆сты́ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ.

г҃) Премꙋ́дрости соломѡ́новы чте́нїе [глава̀ д҃].

Првⷣникъ а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: Оу҆го́дна бо бѣ̀ гдⷭ҇ви дꙋша̀ є҆гѡ̀. сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Мч҃нкѡмъ парємїѝ, и҆ мч҃нкꙋ.

а҃] Прⷪ҇ро́чества и҆са́їина чте́нїе [глава̀ м҃г].

Та́кѡ глаго́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ́зи ѿ ни́хъ. кто̀ возвѣсти́тъ сїѧ̑ въ ни́хъ, и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тєли своѧ̑, и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. бꙋ́дите мѝ свидѣ́тєли, и҆ а҆́зъ свидѣ́тель, глаго́летъ гдⷭ҇ь бг҃ъ, и҆ ѻ҆́трокъ є҆гѡ́же и҆збра́хъ, да позна́ете и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менѐ не бы́сть и҆́нъ бг҃ъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менѐ сп҃са́ѧй. а҆́зъ возвѣсти́хъ, и҆ сп҃со́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. Вы̀ мнѣ̀ свидѣ́тєли, и҆ а҆́зъ гдⷭ҇ь бг҃ъ, и҆ є҆щѐ ѿ нача́ла а҆́зъ є҆́смь: и҆ нѣ́сть ѿ <<с҃м ѡ҆б.: 480>> рꙋ́къ мои́хъ и҆збавлѧ́ѧй. сотворю̀, и҆ кто̀ ѿврати́тъ то̀; си́це глаго́летъ гдⷭ҇ь бг҃ъ, и҆збавлѧ́ѧй ва́съ ст҃ы́й і҆и҃левъ.

в҃] Премꙋ́дрости соломѡ́новы чте́нїе [глава̀ г҃].

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ. И҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ: и҆ ꙗ҆́кѡ и҆́скры по сте́блїю потекꙋ́тъ: Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: Ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

г҃] Премꙋ́дрости соломѡ́новы чте́нїе [главы̑ є҃ и҆ ѕ҃].

Пра́ведницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни, занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый преподо́бїе: Поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ́мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе, полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды, вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дх҃ъ си́лы и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе: и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо <<см҃а: 481>> ца́рїе, и҆ разꙋмѣ́йте, навы́кните сꙋдїи̑ концє́въ землѝ. Внꙋши́те держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ, ꙗ҆́кѡ дана̀ є҆́сть ѿ гдⷭ҇а держа́ва ва́мъ и҆ си́ла ѿ вы́шнѧгѡ.

А҆ мч҃нкꙋ г҃-ѧ паремїа̀:

Првⷣникъ а҆́ще пости́гнетъ сконча́тисѧ: [Пи́сана ст҃и́телємъ].

Парємїѝ прⷪ҇ро́кꙋ и҆лїѝ.

Ца́рствъ тре́тїихъ чте́нїе [глава̀ з҃і].

Бы́сть сло́во гдⷭ҇не ко и҆лїѝ прⷪ҇ро́кꙋ, и҆ речѐ ко а҆ха́вꙋ: жи́въ гдⷭ҇ь бг҃ъ си́лъ, бг҃ъ і҆и҃левъ, є҆мꙋ́же предстою̀ дне́сь пред̾ ни́мъ, а҆́ще бꙋ́детъ въ лѣ̑та сїѧ̑ роса̀, и҆лѝ до́ждь, а҆́ще не словесы̀ ᲂу҆́стъ мои́хъ. И҆ бы́сть глаго́лъ гдⷭ҇нь ко и҆лїѝ, глаго́лѧ: и҆дѝ ѿсю́дꙋ на восто́къ, и҆ скры́йсѧ въ пото́цѣ хора́ѳовѣ, при рѣцѣ̀ і҆ѻрда́новѣ, и҆ бꙋ́детъ вода̀ ѿ пото́ка, и҆ пїе́ши ю҆̀, и҆ вра́нѡмъ повелю̀ пита́ти тѧ̀ та́мѡ. И҆ и҆́де и҆лїа̀, и҆ сотворѝ по глаго́лꙋ гдⷭ҇ню, и҆ сѣ́де при пото́цѣ хора́ѳовѣ, пред̾ лице́мъ і҆ѻрда́новымъ: и҆ вра́нове приноша́хꙋ є҆мꙋ̀ хлѣ́бы заꙋ́тра, и҆ мѧса̀ къ ве́черꙋ, и҆ ѿ пото́ка пїѧ́ше во́дꙋ. И҆ бы́сть по дне́хъ, и҆́зсше пото́къ, ꙗ҆́кѡ не бѣ̀ дождѧ̀ на зе́млю. И҆ бы́сть глаго́лъ гдⷭ҇нь ко и҆лїѝ, глаго́лѧ: Воста́ни, и҆ и҆дѝ въ саре́фѳꙋ сїдѡ́нскꙋю, и҆ пребꙋ́ди та́мѡ: се́ бо заповѣ́дахъ женѣ̀ вдови́цѣ препита́ти тѧ̀. И҆ воста́въ, и҆ и҆́де въ саре́фѳꙋ сїдѡ́нскꙋю. и҆ прїи́де во врата̀ гра́да, и҆ сѐ та́мѡ жена̀ вдова̀ собира́ше дрова̀, и҆ возопѝ и҆лїа̀ вослѣ́дъ є҆ѧ̀, и҆ речѐ є҆́й: принеси́ ми ᲂу҆́бѡ ма́лѡ воды̀ въ сосꙋ́дѣ, да пїю̀. И҆ и҆́де взѧ́ти воды̀. и҆ возопѝ и҆лїа̀ въ слѣ́дъ є҆ѧ̀, и҆ речѐ є҆́й: прїимѝ ᲂу҆́бѡ мнѣ̀ и҆ ᲂу҆крꙋ́хъ хлѣ́ба въ рꙋцѣ̀ твое́й, и҆ да ꙗ҆́мъ. И҆ речѐ жена̀: жи́въ гдⷭ҇ь бг҃ъ мо́й, а҆́ще є҆́сть ᲂу҆ менѐ ѻ҆прѣсно́къ, но ра́звѣ є҆ли́кѡ го́рсть мꙋкѝ въ водоно́сѣ, и҆ ма́лѡ є҆ле́а во чва́нцѣ. и҆ сѐ а҆́зъ собира́ю два̀ полѣ̑нца, и҆ вни́дꙋ, и҆ сотворю̀ себѣ̀ и҆ ча́дѡмъ мои̑мъ, и҆ снѣ́мы, и҆ ᲂу҆́мремъ. И҆ речѐ къ не́й и҆лїа̀: дерза́й, <<см҃а ѡ҆б.: 482>> и҆ вни́ди, и҆ не сотворѝ по глаго́лꙋ твоемꙋ̀: но сотворѝ мнѣ̀ ѿтꙋ́дꙋ ѻ҆прѣсно́къ ма́лъ пре́жде, и҆ и҆знесе́ши мѝ: себѣ́ же и҆ ча́дѡмъ твои̑мъ сотвори́ши послѣдѝ. Ꙗ҆́кѡ та́кѡ глаго́летъ гдⷭ҇ь бг҃ъ і҆и҃левъ: водоно́съ мꙋкѝ не ѡ҆скꙋдѣ́етъ, и҆ чва́нецъ є҆ле́а не ᲂу҆ма́литсѧ, до днѐ, до́ндеже да́стъ гдⷭ҇ь до́ждь на зе́млю. И҆ и҆́де жена̀ и҆ сотворѝ по глаго́лꙋ и҆лїинꙋ̀: и҆ дадѐ є҆мꙋ̀, и҆ ꙗ҆дѧ́ше то́й и҆ та̀, и҆ ча̑да є҆ѧ̀. И҆ ѿ тогѡ̀ днѐ водоно́съ мꙋкѝ не ѡ҆скꙋдѣ̀: и҆ чва́нецъ є҆ле́а не ᲂу҆ма́лисѧ, по глаго́лꙋ гдⷭ҇ню, и҆́же глаго́ла рꙋко́ю и҆лїино́ю. И҆ бы́сть по глаго́лѣхъ си́хъ, и҆ разболѣ́сѧ сы́нъ жены̀, госпожѝ до́мꙋ, и҆ бѣ̀ болѣ́знь є҆гѡ̀ крѣ́пка ѕѣлѡ̀, до́ндеже не ѡ҆ста̀ въ не́мъ дꙋ́хъ. И҆ речѐ жена̀ ко и҆лїѝ: что̀ мнѣ̀ и҆ тебѣ̀ человѣ́че бж҃їй; вше́лъ є҆сѝ ко мнѣ̀ воспомѧнꙋ́ти грѣхѝ моѧ̑, и҆ ᲂу҆мори́ти сы́на моего̀; И҆ речѐ и҆лїа̀ къ женѣ̀: да́ждь мѝ сы́на твоего̀. и҆ взѧ́тъ є҆го̀ ѿ ло́на є҆ѧ̀, и҆ вознесѐ є҆го̀ въ го́рницꙋ, въ не́йже са́мъ почива́ше, и҆ положѝ є҆го̀ на ѻ҆дрѣ̀ свое́мъ. И҆ возопѝ и҆лїа̀ ко гдⷭ҇ꙋ, и҆ речѐ: ᲂу҆вы̀ мнѣ̀ гдⷭ҇и, свидѣ́телю вдовы̀, ᲂу҆ неѧ́же а҆́зъ пребыва́ю, ты̀ ѡ҆ѕло́билъ є҆сѝ, є҆́же ᲂу҆мори́ти сы́на є҆ѧ̀. И҆ дꙋ́нꙋ на ѻ҆́трочища трикра́ты, и҆ призва̀ гдⷭ҇а, и҆ речѐ: гдⷭ҇и бж҃е мо́й, да возврати́тсѧ ᲂу҆́бѡ дꙋша̀ ѻ҆́трочища сегѡ̀ во́нь. и҆ бы́сть та́кѡ. И҆ возопѝ и҆лїа̀, и҆ ᲂу҆слы́ша гдⷭ҇ь гла́съ и҆лїи́нъ: и҆ возврати́сѧ дꙋша̀ ѻ҆́трочища и҆ ѡ҆живѐ. И҆ поѧ́тъ и҆лїа̀ ѻ҆́трочища, и҆ сведѐ и҆ ѿ го́рницы въ до́мъ, и҆ дадѐ и҆ ма́тери є҆гѡ̀. И҆ речѐ и҆лїа̀ къ не́й: ви́ждь, ꙗ҆́кѡ жи́въ є҆́сть сы́нъ тво́й. И҆ речѐ жена̀ ко и҆лїѝ: сѐ разꙋмѣ́хъ, ꙗ҆́кѡ человѣ́къ бж҃їй є҆сѝ ты̀, и҆ глаго́лъ гдⷭ҇ь во ᲂу҆стѣ́хъ твои́хъ и҆́стиненъ.

в҃] Ца́рствъ тре́тїихъ чте́нїе [главы̑ и҃і и҆ ѳ҃і].

Бы́сть глаго́лъ бж҃їй ко и҆лїѝ ѳесві́тѧнинꙋ, въ тре́тїе лѣ́то ца́рства а҆ха́влѧ глаго́лѧ: и҆дѝ и҆ ꙗ҆ви́сѧ а҆ха́вꙋ, да́мъ бо до́ждь на лицѐ землѝ. И҆ бы́сть ꙗ҆́кѡ ви́дѣ а҆ха́въ и҆лїю̀, и҆ речѐ къ немꙋ̀: а҆́ще ты̀ є҆сѝ развраща́ѧй і҆и҃лѧ; И҆ речѐ и҆лїа̀: не развраща́ю а҆́зъ і҆и҃лѧ, но ты̀, и҆ до́мъ ѻ҆тца̀ твоегѡ̀, <<см҃в: 483>> внегда̀ ѡ҆ста́висте вы̀ гдⷭ҇а бг҃а своего̀, и҆ и҆до́сте въ слѣ́дъ ваа́ла. И҆ ны́нѣ послѝ, и҆ соберѝ ко мнѣ̀ ве́сь і҆и҃ль на го́рꙋ карми́льскꙋю, и҆ проро́ки стꙋ̑дныѧ ваа̑ловы, и҆́хже три́ста и҆ пѧтьдесѧ́тъ, и҆ прорѡ́къ ме́рзкихъ четы́реста, ꙗ҆дꙋ́щихъ трапе́зꙋ і҆езаве́линꙋ. И҆ по глаго́лꙋ и҆лїинꙋ̀ посла̀ а҆ха́въ въ ве́сь і҆и҃ль, и҆ собра̀ всѧ̑ проро́ки на го́рꙋ карми́льскꙋю, и҆ приведѐ ко всѣ̑мъ и҆̀мъ и҆лїю̀. И҆ речѐ и҆̀мъ и҆лїа̀: доко́лѣ вы̀ хра́млете на ѻ҆́ба колѣ̑на ва̑ша; а҆́ще є҆́сть гдⷭ҇ь бг҃ъ, и҆ди́те въ слѣ́дъ є҆гѡ̀: а҆́ще ли ваа́лъ є҆́сть, то̀ и҆ди́те за ни́мъ, и҆ не ѿвѣща́ша є҆мꙋ̀ лю́дїе словесѐ. И҆ речѐ и҆лїа̀ къ лю́демъ: а҆́зъ є҆́смь ѡ҆ста́хъ прⷪ҇ро́къ гдⷭ҇нь є҆ди́нъ, и҆ проро́цы ваа̑ловы, и҆́хже три́ста и҆ пѧтьдесѧ́тъ мꙋже́й, и҆ проро́кѡвъ ме́рзкихъ четы́реста. И҆ речѐ и҆лїа̀: дади́те мѝ два̀ ю҆нца̑, да и҆зберетѐ себѣ̀ є҆ди́наго, и҆ растеши́те и҆̀ на ᲂу҆́ды, и҆ возложи́те и҆ на дрова̀, да не приложи́те ѻ҆гнѧ̀. и҆ а҆́зъ растешꙋ̀ ю҆нца̀ дрꙋга́го, и҆ возложꙋ̀ на дрова̀, и҆ ѻ҆гнѧ̀ не возгнѣщꙋ̀. И҆ да призоветѐ и҆мена̀ богѡ́въ ва́шихъ, и҆ а҆́зъ призовꙋ̀ и҆́мѧ гдⷭ҇а бг҃а моегѡ̀: и҆ бꙋ́детъ бг҃ъ, и҆́же а҆́ще послꙋ́шаетъ ѻ҆гне́мъ, то́й є҆́сть бг҃ъ. И҆ ѿвѣща́ша всѝ лю́дїе, и҆ рѣ́ша: до́бръ глаго́лъ и҆лїи́нъ, и҆́же глаго́ла, да бꙋ́детъ та́кѡ. И҆ речѐ и҆лїа̀ проро́кѡмъ стꙋ̑днымъ: и҆збери́те себѣ̀ ю҆нца̀ є҆ди́наго, и҆ сотвори́те вы̀ пре́жде, ꙗ҆́кѡ ва́съ є҆́сть мно́жество, и҆ призови́те и҆мена̀ богѡ́въ ва́шихъ, и҆ ѻ҆гнѧ̀ не пригнѣща́йте. И҆ поѧ́ша ю҆нца̀, и҆ сотвори́ша та́кѡ. и҆ призыва́хꙋ и҆́мѧ ваа́лово ѿ ᲂу҆́тра и҆ до полꙋ́дне, и҆ рѣ́ша: послꙋ́шай на́съ ваа́ле, послꙋ́шай на́съ. и҆ не бѣ̀ гла́са, ни послꙋша́нїѧ: и҆ рыска́хꙋ ѻ҆́колѡ же́ртвенника, и҆́же сотвори́ша сі́и. И҆ бы́сть полꙋ́дне, и҆ порꙋга́сѧ и҆̀мъ и҆лїа̀ ѳесві́тѧнинъ, и҆ речѐ: зови́те гла́сомъ вели́кимъ, ꙗ҆́кѡ бо́гꙋ ва́шемꙋ непра́зднство є҆́сть: да є҆да̀ что̀ и҆но́е стро́итъ, и҆лѝ ᲂу҆снꙋ́лъ є҆́сть, да ᲂу҆бꙋдитѐ є҆го̀. И҆ зовѧ́хꙋ гла́сомъ вели́кимъ, и҆ кроѧ́хꙋсѧ по ѻ҆бы́чаю своемꙋ̀ ножѝ, и҆ мно́зи би́ша себѐ бичьмѝ до проли́тїѧ кро́ве своеѧ̀, И҆ прорица́хꙋ: и҆ бы́сть до ве́чера, ꙗ҆́кѡ бы́ти вре́мѧ взы́ти же́ртвѣ, и҆ не бѣ̀ гла́са. <<см҃в ѡ҆б.: 484>> И҆ глаго́ла и҆лїа̀ къ проро́кѡмъ стꙋ̑днымъ, глаго́лѧ: ѿстꙋпи́те ны́нѣ, да и҆ а҆́зъ сотворю̀ же́ртвꙋ мою̀. и҆ ѿстꙋпи́ша ті́и, и҆ ᲂу҆мо́лкнꙋша. И҆ речѐ и҆лїа̀ къ лю́демъ: пристꙋпи́те ко мнѣ̀: и҆ пристꙋпи́ша къ немꙋ̀ всѝ лю́дїе. И҆ прїѧ́тъ и҆лїа̀ двана́десѧть ка́менїй, по числꙋ̀ колѣ́нъ сынѡ́въ і҆и҃левыхъ, ꙗ҆́коже глаго́ла є҆мꙋ̀ гдⷭ҇ь: і҆и҃ль бꙋ́детъ и҆́мѧ твоѐ. И҆ созда̀ ка́менїе во и҆́мѧ гдⷭ҇не, и҆ и҆сцѣлѝ ѻ҆лта́рь раско́панный. и҆ сотворѝ мо́ре вмѣща́ющее двѣ̀ мѣ̑рѣ сѣ́мене ѻ҆́крестъ ѻ҆лтарѧ̀: и҆ воскладѐ полѣ̑на на ѻ҆лта́рь, и҆́же сотворѝ, и҆ растеса̀ на ᲂу҆́ды всесожега́емое, и҆ возложѝ на полѣ̑на, и҆ ѡ҆бы́де ѻ҆лта́рь. И҆ речѐ и҆лїа̀: принеси́те мѝ четы́ре водоно́сы воды̀, и҆ возлива́йте на всесожже́нїе и҆ на полѣ̑на, и҆ сотвори́ша та́кѡ. И҆ речѐ: ᲂу҆дво́йте, и҆ ᲂу҆дво́иша. и҆ речѐ: ᲂу҆тро́йте, и҆ ᲂу҆тро́иша. и҆ прохожда́ше вода̀ ѻ҆́крестъ ѻ҆лтарѧ̀, и҆ мо́ре и҆спо́лнисѧ воды̀. И҆ возопѝ и҆лїа̀ на нб҃о, и҆ речѐ: гдⷭ҇и бж҃е а҆враа́мовъ и҆ і҆саа́ковъ и҆ і҆а́кѡвль. послꙋ́шай менѐ гдⷭ҇и, послꙋ́шай менѐ дне́сь ѻ҆гне́мъ: да разꙋмѣ́ютъ всѝ лю́дїе сі́и, ꙗ҆́кѡ ты̀ є҆сѝ є҆ди́нъ гдⷭ҇ь бг҃ъ і҆и҃левъ, и҆ а҆́зъ ра́бъ тво́й, и҆ тебѐ ра́ди сотвори́хъ дѣла̀ сїѧ̑ всѧ̑: и҆ ты̀ ѡ҆братѝ сердца̀ люде́й си́хъ въ слѣ́дъ тебѐ. И҆ падѐ ѻ҆́гнь ѿ гдⷭ҇а съ нб҃сѐ, и҆ поѧдѐ всесожжє́нїѧ и҆ полѣ̑на и҆ ка́менїе и҆ пе́рсть, и҆ во́дꙋ ꙗ҆́же бѣ̀ въ мо́ри, всѧ̑ полиза̀ ѻ҆́гнь. И҆ падо́ша всѝ лю́дїе на лицы̀ свое́мъ, и҆ рѣ́ша: вои́стиннꙋ гдⷭ҇ь бг҃ъ, то́й є҆́сть бг҃ъ. И҆ речѐ и҆лїа̀ къ лю́демъ: поима́йте проро́ки ваа́лѡвы, да ни є҆ди́нъ скры́етсѧ ѿ ни́хъ. и҆ ꙗ҆́ша и҆̀хъ, и҆ ведѐ ѧ҆̀ и҆лїа̀ на пото́къ кі́ссовъ, и҆ тꙋ̀ и҆̀хъ закла̀. И҆ речѐ и҆лїа̀ посе́мъ а҆ха́вови: сѐ гла́съ хожде́нїѧ дожде́внагѡ, впрѧзѝ колесни́цꙋ твою̀, и҆ сни́ди, да не пости́гнетъ тебѐ до́ждь. И҆ взы́де и҆лїа̀ на карми́льскꙋю го́рꙋ, и҆ преклони́сѧ на зе́млю, и҆ положѝ лицѐ своѐ междꙋ̀ колѣ́нома свои́ма, и҆ помоли́сѧ ко гдⷭ҇ꙋ. И҆ не́бо помрачи́сѧ ѻ҆́блаки и҆ дꙋ́хомъ, и҆ бы́сть до́ждь ве́лїй: и҆ пла́чѧсѧ а҆ха́въ, и҆́де до і҆езрае́лѧ. И҆ рꙋка̀ гдⷭ҇нѧ бы́сть на и҆лїѝ: и҆ стѧгнꙋ́въ чре́сла своѧ̑, и҆ течѐ пред̾ а҆ха́вомъ до і҆езрае́лѧ. И҆ возвѣстѝ а҆ха́въ женѣ̀ свое́й і҆езаве́ли всѧ̑, є҆ли̑ка сотворѝ <<см҃г: 485>> и҆лїа̀: и҆ ꙗ҆́кѡ закла̀ проро́ки ноже́мъ. И҆ посла̀ і҆езаве́ль ко и҆лїѝ, глаго́лѧ: ᲂу҆́трѡ въ се́й же ча́съ положꙋ̀ дꙋ́шꙋ твою̀, ꙗ҆́коже дꙋ́шꙋ є҆ди́нагѡ ѿ си́хъ. И҆ слы́ша и҆ ᲂу҆боѧ́сѧ и҆лїа̀, воста́въ и҆́де дꙋшѝ ра́ди своеѧ̀: и҆ прїи́де въ вирсаві́ю, зе́млю і҆ꙋ́довꙋ, и҆ ѡ҆ста́ви ѻ҆́трочища своего̀ та́мѡ, и҆ и҆́де въ пꙋсты́ню днѐ пꙋ́ть. И҆ прише́дъ сѣ́де под̾ сме́рчїемъ, и҆ просѝ дꙋшѝ свое́й сме́рти, и҆ речѐ: довлѣ́етъ мѝ гдⷭ҇и, прїимѝ ᲂу҆̀бо дꙋ́шꙋ мою̀ ѿ менѐ, ꙗ҆́кѡ нѣ́смь а҆́зъ па́че ѻ҆тє́цъ мои́хъ. и҆ лѧ́же и҆ ᲂу҆́спе под̾ са́домъ. И҆ сѐ а҆́гг҃лъ гдⷭ҇нь коснꙋ́сѧ є҆мꙋ̀, и҆ речѐ є҆мꙋ̀: воста́ни, ꙗ҆́ждь и҆ пі́й. И҆ воззрѣ́въ и҆лїа̀, и҆ сѐ при возгла́вїи є҆гѡ̀ ѻ҆прѣсно́къ ꙗ҆чме́нный, и҆ корча́гъ воды̀: и҆ воста̀, и҆ ꙗ҆дѐ и҆ пи́тъ, и҆ ѡ҆бра́щьсѧ ᲂу҆́спе. И҆ ѡ҆бра́щьсѧ а҆́гг҃лъ гдⷭ҇нь втори́цею, и҆ коснꙋ́сѧ є҆мꙋ̀, и҆ речѐ є҆мꙋ̀: воста́ни, ꙗ҆́ждь и҆ пі́й, ꙗ҆́кѡ мно́гъ ѿ тебѐ пꙋ́ть. И҆ воста̀, и҆ ꙗ҆дѐ и҆ пи́тъ: и҆ и҆́де въ крѣ́пости ꙗ҆́ди тоѧ̀ четы́редесѧть дне́й, и҆ четы́редесѧть ноще́й, до горы̀ хѡри́вскїѧ. И҆ вни́де та́мѡ въ пеще́рꙋ, и҆ всели́сѧ въ не́й. и҆ сѐ глаго́лъ гдⷭ҇нь къ немꙋ̀, и҆ речѐ є҆мꙋ̀ гдⷭ҇ь: что̀ ты̀ здѣ̀ и҆лїѐ; И҆ речѐ и҆лїа̀: ревнꙋ́ѧ поревнова́хъ по гдⷭ҇ѣ бз҃ѣ вседержи́тели, ꙗ҆́кѡ ѡ҆ста́виша тѧ̀ сы́нове і҆и҃левы, и҆ ѻ҆лтарѝ твоѧ̑ раскопа́ша, и҆ прⷪ҇ро́ки твоѧ̑ ѻ҆рꙋ́жїемъ и҆зби́ша. и҆ ѡ҆ста́хъ а҆́зъ є҆ди́нъ. и҆ и҆́щꙋтъ дꙋшѝ моеѧ̀ и҆з̾ѧ́ти ю҆̀. И҆ речѐ а҆́гг҃лъ: и҆зы́ди ᲂу҆́трѡ, и҆ ста́ни въ горѣ̀ пред̾ гдⷭ҇емъ, и҆ сѐ мимои́детъ гдⷭ҇ь, и҆ дꙋ́хъ ве́лїй и҆ крѣ́покъ, разорѧ́ѧ горы̀, и҆ сокрꙋша́ѧ ка́менїе пред̾ гдⷭ҇емъ: не въ дꙋ́сѣ гдⷭ҇ь. и҆ по дꙋ́сѣ ви́хръ, и҆ не въ ви́хрѣ гдⷭ҇ь. И҆ по ви́хрѣ ѻ҆́гнь, и҆ не во ѻ҆гнѝ гдⷭ҇ь: и҆ по ѻ҆гнѝ гла́съ хла́да то́нка, и҆ та́мѡ гдⷭ҇ь. И҆ бы́сть ꙗ҆́кѡ ᲂу҆слы́ша и҆лїа̀, покры̀ лицѐ своѐ ми́лѡтїю свое́ю, и҆ и҆зы́де, и҆ ста̀ при пеще́рѣ. И҆ сѐ къ немꙋ̀ бы́сть гла́съ, и҆ речѐ: что̀ здѣ̀ ты̀ и҆лїѐ; И҆ речѐ и҆лїа̀: ревнꙋ́ѧ поревнова́хъ по гдⷭ҇ѣ бз҃ѣ вседержи́тели, ꙗ҆́кѡ ѡ҆ста́виша завѣ́тъ тво́й сы́нове і҆и҃лєвы, и҆ ѻ҆лтарѝ твоѧ̑ раскопа́ша, и҆ прⷪ҇ро́ки твоѧ̑ и҆зби́ша ѻ҆рꙋ́жїемъ, и҆ ѡ҆ста́хъ а҆́зъ є҆ди́нъ, и҆ и҆́щꙋтъ дꙋшѝ моеѧ̀ и҆з̾ѧ́ти ю҆̀. И҆ речѐ гдⷭ҇ь къ немꙋ̀: и҆дѝ возврати́сѧ пꙋте́мъ твои́мъ, и҆ по́йдеши <<см҃г ѡ҆б.: 486>> въ пꙋ́ть пꙋсты́ни дама́сковы, и҆ пома́жеши а҆заи́ла на ца́рство во а҆ссѷрі́и: И҆ і҆иꙋ́а сы́на а҆мессі́ина пома́жеши въ царѧ̀ і҆и҃лю, и҆ є҆лїссе́а сы́на а҆сафа́това пома́жеши вмѣ́стѡ себѐ прⷪ҇ро́ка.

Ца́рствъ четве́ртыхъ чте́нїе [глава̀ в҃].

Бы́сть во дни̑ ѻ҆́ны, ѡ҆брѣ́те и҆лїа̀ є҆лїссе́а сы́на а҆сафа́това, и҆ то́й ѡ҆ра́ше вола́ми. И҆ и҆́де и҆лїа̀ къ немꙋ̀: и҆ пове́рже и҆лїа̀ ми́лѡть свою̀ на не́мъ. и҆ ѡ҆ста́ви є҆лїссе́й волы̀, и҆ течѐ созадѝ и҆лїѝ и҆ слꙋжа́ше є҆мꙋ̀. И҆ бы́сть є҆гда̀ взѧ́тꙋ бы́ти и҆лїѝ гдⷭ҇емъ въ ви́хрѣ ꙗ҆́кѡ на не́бо: и҆ и҆до́ста и҆лїа̀ и҆ є҆лїссе́й въ галга́лы. Речѐ и҆лїа̀ къ є҆лїссе́ю: сѣдѝ ᲂу҆́бѡ здѣ̀, ꙗ҆́кѡ гдⷭ҇ь посла́ мѧ до і҆ѻрда́на. И҆ речѐ є҆лїссе́й: жи́въ гдⷭ҇ь, и҆ жива̀ дꙋша̀ твоѧ̀, а҆́ще ѡ҆ста́влю тебѐ. И҆ поидо́ста ѻ҆́ба, и҆ пѧтьдесѧ́тъ мꙋже́й ѿ сынѡ́въ проро́ческихъ прїидо́ша, и҆ ста́ша прѧ́мѡ и҆здале́ча: ѻ҆́ба же ста́ста при і҆ѻрда́нѣ. И҆ прїѧ́тъ и҆лїа̀ ми́лѡть свою̀, и҆ сви́тъ ю҆̀, и҆ поразѝ є҆́ю во́ды, раздѣли́сѧ вода̀ сю́дꙋ и҆ сю́дꙋ. и҆ преидо́ста ѻ҆́ба по сꙋ́хꙋ. И҆ бы́сть ꙗ҆́кѡ преидо́ста, и҆ речѐ и҆лїа̀ є҆лїссе́ю: просѝ, что̀ сотворю̀ тебѣ̀, пре́жде да́же не взѧ́тъ бꙋ́дꙋ ѿ тебѐ; И҆ речѐ є҆лїссе́й: да бꙋ́детъ ᲂу҆́бѡ дх҃ъ и҆́же въ тебѣ̀, сꙋгꙋ́бъ во мнѣ̀. И҆ речѐ и҆лїа̀: ѡ҆жесточи́лъ є҆сѝ проси́ти: ѻ҆ба́че а҆́ще ᲂу҆ви́диши мѧ̀ взе́млема ѿ тебѐ, бꙋ́детъ тѝ та́кѡ, а҆́ще ли же не ᲂу҆ви́диши, не бꙋ́детъ. И҆ бы́сть и҆дꙋ́щымъ и҆̀мъ, и҆ глаго́лющымъ, и҆ сѐ колесни́ца ѻ҆́гненна, и҆ ко́ни ѻ҆́гненни, и҆ раздѣлѝ междꙋ̀ ѻ҆бѣ́ма, и҆ взѧ́тсѧ и҆лїа̀ трꙋ́сомъ, ꙗ҆́кѡ на не́бо. И҆ є҆лїссе́й зрѧ́ше, и҆ то́й вопїѧ́ше: ѻ҆́тче, ѻ҆́тче, колесни́ца і҆и҃лева и҆ ко́ни є҆гѡ̀, и҆ не ви́дѣ є҆гѡ̀ ктомꙋ̀. И҆ ꙗ҆́тсѧ є҆лїссе́й за ри̑зы своѧ̑, и҆ раздра̀ ѧ҆̀ на дво́е. и҆ взѧ́тъ ми́лѡть и҆лїинꙋ̀ є҆лїссе́й, па́дшꙋю верхꙋ̀ є҆гѡ̀. И҆ ѡ҆брати́сѧ є҆лїссе́й, и҆ ста̀ на бре́зѣ і҆ѻрда́на. И҆ прїѧ́тъ є҆лїссе́й ми́лѡть и҆лїинꙋ̀, па́дшꙋю верхꙋ̀ є҆гѡ̀: и҆ ᲂу҆да́ри во́ды, и҆ не раздѣли́шасѧ. И҆ речѐ є҆лїссе́й: гдѣ̀ ᲂу҆́бѡ є҆́сть бг҃ъ и҆лїи́нъ а҆пфѡ̀; и҆ ᲂу҆да́ри є҆лїссе́й во́ды второ́е, и҆ раздѣли́шасѧ во́ды, и҆ пре́йде по сꙋ́хꙋ.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.