Слꙋ́жба хрⷭта̀ ра́ди ю҆рѡ́дивымъ
<<р҃н ѡ҆б.: 300>>
[глⷡ҇а к҃з] СЛꙊ́ЖБА Ѻ҆́БЩА
хрⷭ҇та̀ ра́ди ю҆рѡ́дивымъ, а҆ндре́ю царегра́дскомꙋ, і҆сі́дѡрꙋ росто́вскомꙋ, маѯі́мꙋ и҆ васі́лїю москѡ́вскимъ, и҆ про́чымъ.
Ве́чера,
на Гдⷭ҇и воззва́хъ, стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ!
Бл҃же́нне, и҆́мⷬ҇къ, бг҃омꙋ́дре, ꙳ чи́стаѧ твоѧ̀ дꙋша̀, ꙳ правовѣ́рнымъ смы́сломъ сїѧ́ющи, ꙳ ѡ҆блиста́ющи добродѣ́телей свѣтлостьмѝ, ꙳ ѡ҆зарѧ́етъ вѣ́рныхъ и҆сполне́нїе, ꙳ бѣсо́вскꙋю тьмꙋ̀ ѿгонѧ́ющи: ꙳ тѣ́мже ꙗ҆́кѡ прича́стника тѧ̀ невече́рней бл҃года́ти, ꙳ ᲂу҆бл҃жа́емъ бл҃гоче́стнѡ всѝ, досточꙋ́дне.
И҆мѣ́ѧ дꙋ́шꙋ ми́лостивнꙋ, ꙳ и҆ чи́стъ по́мыслъ, и҆ се́рдце бо́дро, ꙳ вѣ́рꙋ небла́зненнꙋ, ꙳ и҆ любо́вь вои́стиннꙋ нелицемѣ́рнꙋ, ꙳ ѿ землѝ преста́вилсѧ є҆сѝ къ нбⷭ҇нымъ, ꙳ и҆ съ ли́ки првⷣныхъ водворѧ́ешисѧ: ꙳ тѣ́мже тѧ̀ почита́емъ сщ҃е́нными пѣ́сньми, ꙳ и҆ бл҃гоче́стнѡ всѝ сла́вимъ, ꙳ досточꙋ́дне, и҆́мⷬ҇къ.
Бж҃е́ственными ᲂу҆чє́нїи ᲂу҆крѣплѧ́ѧсѧ, ꙳ стра̑сти плотскі̑ѧ ѿ дꙋшѝ ѿгна́лъ є҆сѝ, ꙳ и҆ ст҃ѣ́й трⷪ҇цѣ селе́нїе преѡчище́нное бы́лъ є҆сѝ: ꙳ тѣ́мъ къ бж҃е́ственнѣй жи́зни преста́вилсѧ є҆сѝ, ꙳ бг҃ꙋ соблюда́ющꙋ и҆ ны́нѣ ꙳ невреди́мо твоѐ бл҃же́нное тѣ́ло, ꙳ бж҃е́ственнымъ сꙋдо́мъ, ꙳ и҆́мже са́мъ вѣ́сть, ꙳ прославлѧ́ѧй тѧ̀ ꙗ҆́вѣ, и҆́мⷬ҇къ.
Сла́ва, гла́съ а҃:
Ка́кѡ не диви́мсѧ житїю̀ твоемꙋ̀; и҆лѝ не похва́лимъ прпⷣбне, и҆́мⷬ҇къ, житїѐ твоѐ равноа́гг҃льное, по́мысла цѣломꙋ́дренное, и҆ кро́тости твоеѧ̀ смире́нное и҆ молчали́вое, ми́лостыни неѡскꙋ́дное, всѣ́ми добродѣ́тельми ᲂу҆краси́лсѧ є҆сѝ бл҃же́нне: <<рн҃а: 301>> тѣ́мже ѡ҆жида́етъ тебѐ неизглаго́ланнаѧ ра́дость, и҆ нбⷭ҇ное црⷭ҇твїе.
И҆ ны́нѣ, бг҃оро́диченъ:
Грѣ́шныхъ мл҃твы прїе́млющи, и҆ скорбѧ́щихъ воздыха̑нїѧ не презира́ющи, молѝ ѿ пречⷭ҇тагѡ чре́ва твоегѡ̀ сн҃а твоего̀, сп҃сти́сѧ на́мъ, прест҃а́ѧ дв҃о.
Крⷭ҇тобг҃оро́диченъ: Твоего̀ сн҃а и҆ влⷣкꙋ дре́вле, ꙗ҆́кѡ ви́дѣла є҆сѝ на крⷭ҇тѣ̀ рꙋ́цѣ распросте́рша, и҆ копїе́мъ рє́бра и҆скопова̑ема, мт҃и чⷭ҇таѧ рыда́ющи взыва́ла є҆сѝ: ᲂу҆вы̀ мнѣ̀, ка́кѡ стра́ждеши, стра̑сти человѣ̑къ ѿе́млѧй чл҃вѣколю́бче;
А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Всемі́рнꙋю сла́вꙋ:
Вхо́дъ Прокі́менъ днѐ.
Парємїѝ прпⷣбническїѧ, [пи̑саны въ концѣ̀ кни́ги сеѧ̀].
На стїхо́внѣ стїхи̑ры, гла́съ в҃:
Подо́бенъ: До́ме є҆ѵфра́ѳовъ:
До́мъ и҆ жили́ще ꙳ дх҃а прест҃а́гѡ, ꙳ премꙋ́дре, и҆́мⷬ҇къ, бы́лъ є҆сѝ: ꙳ тѣ́мже и҆ на́съ до́мы тогѡ̀ содѣ́лай, ꙳ ст҃ꙋ́ю твою̀ па́мѧть почита́ющихъ.
Сті́хъ: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀.
Житїѐ твоѐ ꙗ҆́кѡ со́лнце ꙳ въ сердца̀ вѣ́рныхъ возсїѧ̀, ꙳ чꙋдеса̀ и҆спꙋща́ѧ: ꙳ тѣ́мже и҆ на́съ свѣ́томъ невече́рнимъ ѡ҆зарѝ, ꙳ всечⷭ҇тнꙋ́ю твою̀ па́мѧть почита́ющихъ.
Сті́хъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ и҆́же въ лїва́нѣ ᲂу҆мно́житсѧ.
Не преста́й молѧ́сѧ, и҆́мⷬ҇къ, ꙳ ѡ҆ при́сныхъ твои́хъ рабѣ́хъ, ꙳ и҆̀хже дх҃о́внымъ твои́мъ житїе́мъ просвѣти́лъ є҆сѝ, ꙳ да всѝ чтⷭ҇но́е твоѐ пра́зднество, ꙳ веселѧ́щесѧ почита́емъ.
Сла́ва, гла́съ д҃:
Земны́й а҆́гг҃лъ, и҆ нбⷭ҇ный человѣ́къ ꙗ҆ви́лсѧ є҆сѝ пребл҃же́нне, и҆сто́чникъ ᲂу҆миле́нїѧ, млⷭ҇ти тече́нїе, пꙋчи́на чꙋде́съ, стрꙋѧ̀ и҆сцѣле́нїй, и҆́мⷬ҇къ, досточꙋ́дне, ма́слина бж҃їѧ вои́стиннꙋ плодови́та, є҆ле́емъ трꙋдѡ́въ твои́хъ просвѣща́ѧ вѣ́рнѡ хва́лѧщихъ <<рн҃а ѡ҆б.: 302>> тѧ̀, и҆ молѧ̀ чл҃вѣколю́бца, ѿ бѣ́дъ и҆зба́вити любо́вїю чтꙋ́щыѧ всечⷭ҇тнꙋ́ю па́мѧть твою̀.
И҆ ны́нѣ, бг҃оро́диченъ:
И҆зба́ви на́съ ѿ нꙋ́ждъ на́шихъ, мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ зове́мъ тѝ: ра́дꙋйсѧ, є҆ди́но предста́тельство дꙋ́шъ на́шихъ.
Крⷭ҇тобг҃оро́диченъ:
Подо́бенъ: Ꙗ҆́кѡ до́блѧ:
Распина́ема ви́дѧщи хрⷭ҇та̀, ꙳ пречⷭ҇таѧ влⷣчце, ꙳ ᲂу҆мерщвлѧ́юща льсти́ваго, ꙳ ꙗ҆́кѡ влⷣкꙋ пла́чꙋщи поѧ́ше бл҃гоꙋтро́бнаго, ꙳ и҆з̾ неѧ̀ проше́дша, ꙳ и҆ долготерпѣ́нїю є҆гѡ̀ дивѧ́щисѧ взыва́ше: ꙳ ча́до моѐ любе́знѣйшее, ꙳ не забꙋ́ди рабы̀ твоеѧ̀, не закоснѝ чл҃вѣколю́бче, моѐ ᲂу҆тѣше́нїе.
А҆́ще пра́зднꙋеши, глаго́ли догма́тїкъ: При́зри на молє́нїѧ:
Тропа́рь, гла́съ а҃.
Гла́съ а҆пⷭ҇ла твоегѡ̀ па́ѵла ᲂу҆слы́шавъ глаго́лющъ: мы̀ ю҆ро́ди хрⷭ҇та̀ ра́ди, ра́бъ тво́й хрⷭ҇тѐ бж҃е, и҆́мⷬ҇къ, ю҆ро́дъ бы́сть на землѝ тебѐ ра́ди: тѣ́мже па́мѧть є҆гѡ̀ почита́юще, тебѐ мо́лимъ: гдⷭ҇и, сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ, сѣда́ленъ, гла́съ є҃.
Подо́бенъ: Собезнача́льное сло́во:
Тве́рдаго а҆дама́нта, и҆ столпа̀ непоколеби́ма вра́жїими прило́ги, бг҃оно́снаго, и҆́мⷬ҇къ, пѣ́сньми почти́мъ: терпѣ́нїемъ бо вои́стиннꙋ посрами́вша сопроти́внаго врага̀, и҆ без̾ вѣ́сти є҆го̀ сотвори́вша, и҆ ны́нѣ молѧ́щасѧ ѡ҆ сп҃се́нїи дꙋ́шъ на́шихъ. [Два́жды.]
<<рн҃в: 303>>
Сла́ва, и҆ ны́нѣ, бг҃оро́диченъ:
Оу҆жа́сно чꙋ́до зача́тїѧ, и҆ несказа́ненъ ѡ҆́бразъ ржⷭ҇тва̀, въ тебѣ̀ позна́сѧ чⷭ҇таѧ приснодв҃о: ᲂу҆жаса́етъ мо́й ᲂу҆́мъ и҆ ᲂу҆дивлѧ́етъ по́мыслъ: сла́ва твоѧ̀ бцⷣе, всѣ̑мъ простре́сѧ, во сп҃се́нїе дꙋ́шъ на́шихъ.
По в҃-й каѳі́смѣ сѣда́ленъ, гла́съ д҃.
Подо́бенъ: Ско́рѡ предварѝ:
Посто́мъ и҆ воздержа́нїемъ, и҆ на землѝ лега́нїемъ, ᲂу҆вѧди́лъ є҆сѝ плотскі̑ѧ стра̑сти: дꙋ́шꙋ же просвѣти́лъ є҆сѝ, и҆ на нб҃сѣ́хъ ѿ хрⷭ҇та̀ вели́кое возме́здїе воспрїѧ́лъ є҆сѝ. тѣ́мъ бл҃гоꙋгоди́лъ є҆сѝ бг҃ꙋ, досто́инъ сосꙋ́дъ чꙋде́съ и҆ по кончи́нѣ ꙗ҆ви́лсѧ є҆сѝ притека́ющымъ къ ра́цѣ моще́й твои́хъ, и҆́мⷬ҇къ, пребл҃же́нне, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀. [Два́жды.]
Сла́ва, и҆ ны́нѣ, бг҃оро́диченъ:
Ѡ҆бнови́ла є҆сѝ чтⷭ҇аѧ бж҃е́ственнымъ ржⷭ҇тво́мъ твои́мъ, и҆стлѣ́вшее страстьмѝ земноро́дныхъ ме́ртвенное сꙋщество̀: и҆ воздви́гла є҆сѝ всѧ̑ ѿ сме́рти къ жи́зни нетлѣ́нїѧ. тѣ́мже тѧ̀ по до́лгꙋ бл҃жи́мъ всѝ дв҃о препросла́вленнаѧ, ꙗ҆́коже прорекла̀ є҆сѝ.
По Хвали́те и҆́мѧ гдⷭ҇не:
Припѣ́въ:
Оу҆бл҃жа́емъ тѧ̀ ст҃ы́й пра́ведный, и҆́мⷬ҇къ, и҆ чте́мъ ст҃ꙋ́ю па́мѧть твою̀: ты́ бо мо́лиши за на́съ хрⷭ҇та̀ бг҃а на́шего.
Ѱало́мъ и҆збра́нный: Бл҃же́нъ мꙋ́жъ боѧ́йсѧ гдⷭ҇а:
По полѷеле́и сѣда́ленъ, гла́съ д҃.
Подо́бенъ: Ско́рѡ предварѝ:
Ꙗ҆ви́лсѧ є҆сѝ чꙋ́денъ въ терпѣ́нїи твое́мъ, всѧ́чески хрⷭ҇тꙋ̀ ᲂу҆годи́лъ є҆сѝ, пребл҃же́нне, и҆́мⷬ҇къ, мꙋ́дрою мы́слїю ᲂу҆тверди́лъ є҆сѝ дꙋ́шꙋ твою̀, порабо́тивъ плѡтска́ѧ мꙋдрова̑нїѧ дх҃ꙋ, и҆ и҆збра́въ дѡ́браѧ, є҆́же бг҃а ра́ди трꙋжда́тисѧ, мꙋ́жески глаго́лалъ є҆сѝ: а҆́ще и҆ ꙗ҆́ра зима̀, но сла́докъ ра́й: болѣ́зненно є҆́же трꙋжда́тисѧ, но бл҃же́нно воспрїѧ́тїе. тѣ́мже пребл҃же́нне, молѝ хрⷭ҇та̀ бг҃а, сп҃стѝ дꙋ́шы на́шѧ. [Два́жды.]
<<рн҃в ѡ҆б.: 304>>
Сла́ва, и҆ ны́нѣ, бг҃оро́диченъ:
Тебѐ велича́емъ бцⷣе, вопїю́ще: ты̀ є҆ди́на бл҃гослове́ннаѧ, и҆з̾ тебе́ бо неизрече́ннѡ роди́сѧ хрⷭ҇то́съ бг҃ъ на́шъ.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀.
Сті́хъ: Оу҆слы́ши бж҃е гла́съ мо́й, внегда̀ моли́ти ми сѧ къ тебѣ̀.
Всѧ́кое дыха́нїе:
Є҆ѵⷢ҇лїе, [пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ и҃.
Человѣ́че бж҃їй, и҆́мⷬ҇къ, чꙋ́дный, ты̀ ᲂу҆́бѡ возше́дъ на лѣ́ствицꙋ добродѣ́телей, по не́йже возше́лъ є҆сѝ къ го́рнемꙋ і҆ерⷭ҇ли́мꙋ и҆ та́мѡ ᲂу҆зрѣ́лъ є҆сѝ жела́емаго хрⷭ҇та̀: є҆го́же ра́ди пло́ть твою̀ и҆знꙋри́лъ є҆сѝ, и҆ тѣ́ло ме́ртвенное на безсме́ртнꙋю жи́знь и҆змѣни́лъ є҆сѝ. и҆ ѡ҆ на́съ непреста́ннѡ моли́сѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Канѡ́нъ, гла́съ д҃.
Пѣ́снь а҃.
І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Прича́стїемъ є҆́же къ бг҃ꙋ прпⷣбне, свѣ́тъ бы́лъ є҆сѝ, и҆ къ немꙋ̀ ѿлꙋчи́всѧ, и҆́мⷬ҇къ, бл҃же́нне, жела́нїемъ кра́йнимъ, бл҃ги̑мъ наде́ждамъ свои̑мъ ѻ҆́тче, и҆сполне́нїе прїѧ́лъ є҆сѝ.
Жела́нїемъ є҆́же къ бг҃ꙋ распала́емь, мі́ръ ѡ҆ста́вилъ є҆сѝ, спꙋ́тника ѡ҆брѣ́тъ хрⷭ҇та̀, ѻ҆́тче и҆́мⷬ҇къ, сла́вне: съ ни́мже стезю̀ проше́лъ є҆сѝ сп҃си́тельнꙋю ра́дꙋѧсѧ.
Ѡ҆богати́тисѧ ника́коже и҆стоща́емыми возжелѣ́въ, бога́тство и҆ сла́вꙋ вре́меннꙋю мꙋ́дре, и҆ пи́щꙋ мимотекꙋ́щꙋю, и҆ мїрско́е достоѧ́нїе доблемꙋ́дреннѡ ѿри́нꙋлъ є҆сѝ.
Бг҃оро́диченъ: Кра́снꙋю и҆ и҆збра́ннꙋю и҆ всечⷭ҇тнꙋ́ю разꙋмѣ́въ тѧ̀ сн҃ъ бж҃їй, пренепоро́чнаѧ, сн҃ъ тво́й бы́сть: сы́ны сотворѝ бл҃года́тїю бцⷣе, чтꙋ́щыѧ тѧ̀.
<<рн҃г: 305>>
Пѣ́снь г҃.
І҆рмо́съ: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе.
Оу҆се́рднѡ къ мы́слєннымъ совле́клсѧ є҆сѝ дѣѧ́нїємъ побѣжда́ѧ вра̑жїѧ полкѝ, посо́бїемъ бж҃е́ственнагѡ дх҃а.
Ра́нами и҆ мл҃твеннымъ воздержа́нїемъ, и҆ бїє́нїи прпⷣбне, стра̑сти мїрскі̑ѧ ѻ҆́тче, и҆́мⷬ҇къ, ᲂу҆ѧзви́лъ є҆сѝ.
Оу҆морѝ врага̀ бл҃же́нный тво́й і҆и҃се, и҆́мⷬ҇къ, ᲂу҆мерщвле́нїѧ твоегѡ̀ влⷣко, живоно́снагѡ ра́достнѡ возжелѣ́въ.
Бг҃оро́диченъ: И҆збавлѧ́ющаго человѣ́ки преслꙋша́нїѧ лю́тагѡ паде́нїѧ, всемꙋ̀ вино́внаго чтⷭ҇аѧ и҆ всенепоро́чнаѧ, родила̀ є҆сѝ.
Сѣда́ленъ, гла́съ є҃.
Подо́бенъ: Собезнача́льное:
Согла́сїемъ бж҃е́ственнымъ ѡ҆зарѧ́емь, въ пꙋти̑ ведꙋ́щыѧ къ бж҃е́ствєннымъ сїѧ́нїємъ ходи́лъ є҆сѝ вѣ́рнѡ, ѻ҆́тче прпⷣбне, и҆ врагѡ́въ ѿбѣ́гъ прило́гѡвъ, сы́нъ свѣ́та и҆ днѐ ꙗ҆ви́лсѧ є҆сѝ, и҆́мⷬ҇къ, бг҃обл҃же́нне.
Сла́ва, и҆ ны́нѣ, бг҃оро́диченъ:
Мт҃и бж҃їѧ пречⷭ҇таѧ, гра́де хрⷭ҇тїа́нскїй, и҆зба́ви лю́ди твоѧ̑ ѿ бѣ́дъ прилѣ́жнѡ зовꙋ́щыѧ, и҆ проти́висѧ врагѡ́мъ гѡ́рдымъ мы̑сленнымъ, да вопїе́мъ тѝ: ра́дꙋйсѧ бл҃гослове́ннаѧ.
Крⷭ҇тобг҃оро́диченъ: Крⷭ҇то́мъ сн҃а твоегѡ̀ бг҃обл҃года́тнаѧ, і҆́дѡльскаѧ пре́лесть всѧ̀ ᲂу҆праздни́сѧ, и҆ де́мѡнскаѧ крѣ́пость попра́сѧ: сегѡ̀ ра́ди вѣ́рнїи по до́лгꙋ тѧ̀ при́снѡ пое́мъ и҆ бл҃гослови́мъ, и҆ бцⷣꙋ вои́стиннꙋ и҆сповѣ́дающе тѧ̀ велича́емъ.
Пѣ́снь д҃.
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце првⷣное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Соедини́всѧ стезѣ̀ пра́вды, въ бг҃оспаса́емый бж҃е́ственный гра́дъ вше́лъ є҆сѝ прпⷣбне. и҆́мⷬ҇къ, сп҃си́тельнымъ сїѧ́нїемъ ѡ҆богати́всѧ.
Є҆диноѡбра́зный прпⷣбне, и҆́мⷬ҇къ, смы́слъ бг҃оно́сный ви́дѣвъ, бж҃е́ственными повѣстьмѝ, и҆ бж҃е́ственною ѻ҆де́ждею ѡ҆дѣ́ѧлсѧ є҆сѝ.
<<рн҃г ѡ҆б.: 306>>
Се́рдце твоѐ скрижа́ль ѡ҆чище́нꙋ, ст҃а́гѡ дх҃а бл҃года́ть ѡ҆брѣ́тши ѻ҆́тче, и҆́мⷬ҇къ, написа̀ соверше́нно безстра́стїе, вѣ́рꙋ и҆ любо́вь нелицемѣ́рнꙋю.
Бг҃оро́диченъ: Сѣдѧ́й на прⷭ҇то́лѣ превознесе́ннѣ херꙋві́мстѣмъ, ꙗ҆́кѡ прⷭ҇то́лъ тѧ̀ и҆мѣ́ѧ мр҃і́е бг҃оневѣ́сто, на рꙋка́хъ твои́хъ почѝ, препросла́вленный бг҃ъ на́шъ.
Пѣ́снь є҃.
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀.
Пресвѣ́тлꙋю зарю̀, и҆́мⷬ҇къ, прїи́мъ, ꙗ҆́кѡ со́лнце ꙗ҆ви́лсѧ є҆сѝ, и҆ де́мѡнскꙋю тьмꙋ̀ ѿгна́лъ є҆сѝ достосла́вне.
Твои́мъ жела́нїемъ хрⷭ҇тѐ, ѡ҆крили́всѧ всепрпⷣбный и҆́мⷬ҇къ, жела́нїе тѣле́сное, ꙗ҆́коже и҆згре́бїе мїрско́е ѿтрѧсѐ.
Си́лою бж҃е́ственною дꙋ́шꙋ ᲂу҆крѣпи́въ, въ мі́ръ всели́лсѧ є҆сѝ, ѡ҆пꙋстѣва́ѧ стра̑сти ѻ҆́тче бг҃омꙋ́дре, и҆́мⷬ҇къ.
Бг҃оро́диченъ: Рече́нїе преста̀ тлѣ́нное, дв҃а бо нетлѣ́ннѡ родѝ бг҃а сло́ва, па́че є҆стества̀ и҆ сло́ва дв҃а пребыва́етъ.
Пѣ́снь ѕ҃.
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Оу҆́мъ тво́й ве́сь къ бг҃ꙋ простира́ѧ, непреста́нными поꙋчє́нїи, плотскі́ѧ любвѐ не пощадѣ́лъ є҆сѝ, бл҃ги́хъ тебѣ̀ хода́тайствꙋ, и҆́мⷬ҇къ, присвое́нїе.
Ни скве́рны, ни вра́ски прїѧ́лъ є҆сѝ бл҃же́нне, посредѣ̀ тебѣ̀ мі́ра живꙋ́щꙋ, ча́стыми же па́че мольба́ми твои́ми ѡ҆чища́еши ѿ дꙋше́вныѧ скве́рны, притека́ющыѧ къ тебѣ̀.
Ты̀ плотски́хъ мꙋдрова́нїй вы́шше и҆мѣ́ѧ по́мыслъ, не ᲂу҆ѧзви́лсѧ є҆сѝ посредѣ̀ же́нъ ѡ҆бнажа́емь: безстра́стїѧ бо ѻ҆де́ждею, и҆́мⷬ҇къ, ѻ҆дѣ́ѧлсѧ є҆сѝ.
Бг҃оро́диченъ: Оу҆сты̀ и҆ по́мыслы и҆ се́рдцемъ, прест҃а́ѧ бцⷣе, тѧ̀ проповѣ́дꙋемъ: тобо́ю бг҃ꙋ примири́хомсѧ, ѿринове́ннїи престꙋпле́нїемъ пе́рвѣе пра́ѻтца.
<<рн҃д: 307>>
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ и҃.
Вы́шнїѧ красоты̀ жела́ѧ, ни̑жнїѧ сла̑сти тѣлє́сныѧ то́щнѡ ѡ҆ста́вилъ є҆сѝ, нестѧжа́нїемъ сꙋ́етнагѡ мі́ра, а҆́гг҃льское житїѐ проходѧ̀, сконча́всѧ, и҆́мⷬ҇къ, бл҃же́нне: съ ни́миже хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.
І҆́косъ: Ка́кѡ возмогꙋ̀ грѣ́шный а҆́зъ, и҆ скве́рный дꙋше́ю вкꙋ́пѣ и҆ тѣ́ломъ, и҆списа́ти є҆́же во пло́ти сы́й, равноа́гг҃льное житїѐ твоѐ, и҆ пресла̑внаѧ чꙋдеса̀; а҆́ще ᲂу҆́бѡ мно́зи премꙋ́дрїи не дости́гнꙋтъ и҆сповѣ́дати мно́гагѡ твоегѡ̀ терпѣ́нїѧ и҆ смире́нїѧ, и҆ те́плыѧ ко хрⷭ҇тꙋ̀ любвѐ, но ѻ҆ба́че надѣ́ѧсѧ на твоѐ безѕло́бїе, ѽ бл҃же́нне, си́це вопїю́ ти: ра́дꙋйсѧ, пресвѣ́тлаѧ ѕвѣздо̀, ѿ восто́ка добродѣ́телей возсїѧ́вшаѧ и҆ вселе́ннꙋю чꙋдесы̀ ѡ҆зари́вшаѧ. ра́дꙋйсѧ, возненави́дѣвый роди́тельскꙋю любо́вь, хрⷭ҇та́ же є҆ди́наго, над̾ всѣ́ми сꙋ́щаго бг҃а, всѣ́мъ се́рдцемъ возлюби́вый, и҆ томꙋ̀ невозвра́тнымъ жела́нїемъ послѣ́довалъ є҆сѝ. ра́дꙋйсѧ, ꙗ҆́кѡ бꙋ́йственное и҆ ю҆ро́дственное по а҆пⷭ҇лꙋ жи́тельство и҆збра́вый. ра́дꙋйсѧ, премѣни́вый тлѣ̑ннаѧ и҆ нестоѧ̑щаѧ, наде́ждею бꙋ́дꙋщихъ бл҃ги́хъ. ра́дꙋйсѧ, и҆́же дре́внемꙋ і҆́ѡвꙋ ᲂу҆подо́бивыйсѧ терпѣ́нїемъ. ра́дꙋйсѧ, стрⷭ҇тоте́рпче хрⷭ҇то́въ непобѣди́мый, но при́снѡ побѣжда́ѧй дїа́вола твои́мъ смире́нїемъ. ра́дꙋйсѧ, и҆́же ꙗ҆́кѡ дре́внїй ѻ҆́нъ ла́зарь ни́щїй, ны́нѣ почива́еши въ ло́нѣ а҆враа́мли. ра́дꙋйсѧ, и҆́же по ѿше́ствїи ѿ мі́ра сегѡ̀, сꙋ́щымъ въ бѣда́хъ и҆ и҆скꙋше́нїихъ гото́въ ѡ҆брѣта́ешисѧ предста́тель и҆ застꙋ́пникъ. ра́дꙋйсѧ, вездѣ̀ призыва́ющихъ тѧ̀ бы́стрѡ предварѧ́еши. ра́дꙋйсѧ бг҃омꙋ́дре, и҆́мⷬ҇къ.
Пѣ́снь з҃.
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Содержи́мь хрⷭ҇топодо́бною, ѻ҆́тче, и҆́мⷬ҇къ, бж҃е́ственною любо́вїю дрꙋги́хъ сп҃стѝ, ра́достнѡ ве́сь са́мъ вопїѧ̀ и҆зда́лсѧ є҆сѝ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
<<рн҃д ѡ҆б.: 308>>
Съ нб҃сѐ тебѣ̀ пода́ннꙋю ѻ҆́тче и҆́мⷬ҇къ, прїе́мъ пи́щꙋ, се́ю препита́лъ є҆сѝ бл҃гопоко́рнѡ прїе́млющыѧ твоѧ̑ повелѣ̑нїѧ, и҆ до́лꙋ влекꙋ́щїй грѣ́хъ ѡ҆ставлѧ́ющыѧ, бл҃же́нне.
Послѣ́довавъ ѻ҆те́чєскимъ преда́нїємъ ѻ҆́тче, и҆́мⷬ҇къ, мꙋ́дре, па́гꙋбы ѻ҆рїге́новы бѣ́гати ѕлочести́выѧ, заповѣ́далъ є҆сѝ зовꙋ́щымъ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Бг҃оро́диченъ: Вы́шнѧгѡ ѡ҆сщ҃е́нное бж҃е́ственное селе́нїе. ра́дꙋйсѧ: тобо́ю бо даде́сѧ ра́дость, бцⷣе зовꙋ́щымъ: бл҃гослове́на ты̀ въ жена́хъ є҆сѝ всенепоро́чнаѧ влⷣчце.
Пѣ́снь и҃.
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тєли ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Всесвѣ́тлаѧ ты̀ бы́лъ є҆сѝ ѕвѣзда̀, сꙋ́щыѧ въ ти́нѣ страсте́й приводѧ̀ къ животꙋ̀: твори́ши бо жєны̀ нечи̑стыѧ цѣломꙋ́дреннѡ жи́ти, и҆ ѿго́ниши лю̑тыѧ недꙋ́ги, вопїѧ̀: бл҃гослови́те всѧ̑ дѣла̀ гдⷭ҇нѧ гдⷭ҇а.
Сы́й цѣ́лъ ᲂу҆мо́мъ въ скро́вѣ мꙋ́дрыхъ чꙋде́съ прпⷣбне, мнѡ́гїѧ ᲂу҆лови́лъ є҆сѝ ю҆ро́дствовати гдⷭ҇а ра́ди, вѣ́дый нарꙋга́емь бы́ти, вопїѧ̀ чистѣ́йшею дꙋше́ю и҆́мⷬ҇къ: бл҃гослови́те всѧ̑ дѣла̀ гдⷭ҇нѧ гдⷭ҇а.
Соверше́нъ є҆ди́нъ гдⷭ҇ь, и҆́же свои́хъ сла́вѧй по достоѧ́нїю, и҆зноси́ма тѧ̀ и҆ гро́бꙋ посыла́ема бл҃же́нне, а҆́гг҃льскими свѣтлослове́ньми почита́етъ зовꙋ́щаго: бл҃гослови́те всѧ̑ дѣла̀ гдⷭ҇нѧ гдⷭ҇а.
Бг҃оро́диченъ: И҆збавлѧ́ѧй на́съ возсїѧ̀ и҆з̾ тебѐ гдⷭ҇ь, дв҃о чⷭ҇таѧ, є҆го́же молѝ влⷣчце, просвѣти́ти пою́щыѧ тѧ̀, и҆ ѡ҆бстоѧ́нїѧ на́съ и҆зба́вити вопїю́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Пѣ́снь ѳ҃.
І҆рмо́съ: Ка́мень нерꙋкосѣ́чный, ѿ несѣко́мыѧ горы̀, тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.
<<рн҃є: 309>>
Всѣ́мъ се́рдцемъ и҆́мⷬ҇къ, трⷪ҇цѣ ᲂу҆се́рднѡ предложи́всѧ, и҆ ѿ неѧ̀ лꙋчѝ бл҃годѣ́тельнѡ прїе́мъ, свѣтови́денъ бы́лъ є҆сѝ, и҆ со а҆́гг҃лы ликꙋ́еши.
Жела́нїемъ бж҃е́ственнымъ прїедини́всѧ, и҆ воздержа́нїемъ просвѣща́емь, бꙋ́дꙋщихъ бла́гъ въ прича́стїи ᲂу҆жѐ бы́въ, и҆́мⷬ҇къ, бг҃обл҃же́нне, и҆ въ наслажде́нїи.
Твои́ми болѣ́зньми и҆ по́ты прїѧ́лъ є҆сѝ весе́лїе, ника́коже конца̀ и҆мꙋ́щее: въ не́мже пита́ѧйсѧ и҆́мⷬ҇къ, пребл҃же́нне, и҆ на́съ непреста́ннѡ помина́й.
Бг҃оро́диченъ: Сп҃си́ мѧ ро́ждшаѧ всѣ́хъ и҆зба́вителѧ и҆ бл҃годѣ́телѧ, разорѝ дꙋшѝ моеѧ̀ ѻ҆́блаки, свѣ́та ѻ҆́блаче ст҃а́ѧ влⷣчце, и҆ си́льна содѣ́лай на стра̑сти борю́щыѧ мѧ̀.
Свѣти́ленъ.
Оу҆дали́всѧ бѣ́гаѧ мїрски́хъ сожи́тельства, хрⷭ҇тꙋ̀ над̾ всѣ́ми бг҃ꙋ на́шемꙋ непоро́чнымъ житїе́мъ бл҃гоꙋгоди́лъ є҆сѝ: є҆го́же ны́нѣ молѝ ѡ҆ на́съ рабѣ́хъ твои́хъ, вѣ́рою пра́зднꙋющихъ всечⷭ҇тнꙋ́ю па́мѧть твою̀, бг҃омꙋ́дре, и҆́мⷬ҇къ.
Бг҃оро́диченъ: Мꙋ́дрость ѵ҆поста́снꙋю и҆ сло́во пресꙋ́щное, и҆ врача̀ всѣ́хъ поро́ждшаѧ дв҃о, стрꙋ́пы и҆ ꙗ҆́звы дꙋшѝ моеѧ̀ и҆сцѣлѝ лю̑тыѧ и҆ многовре́мєнныѧ: и҆ страстна̑ѧ ᲂу҆толѝ се́рдца моегѡ̀ помышлє́нїѧ.
На хвали́техъ стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Да́лъ є҆сѝ при́тчꙋ ꙳ терпѣ́нїѧ и҆ мꙋ́жества, ꙳ пребл҃гі́й гдⷭ҇и, ꙳ пра́веднаго, и҆́мⷬ҇къ, и҆ многочꙋде́снаго, ꙳ добродѣ́тельми и҆ словесы̀ ꙳ и҆ дѣ̑лы сїѧ́юща, ꙳ цѣломꙋ́дрїемъ ᲂу҆краша́ема и҆ кро́тостїю. ꙳ тѣ́мъ твоѐ неизрече́нное строе́нїе сла́вимъ, ꙳ і҆и҃се всеси́льне, и҆ сп҃се дꙋ́шъ на́шихъ. [Два́жды.]
Пра́веденъ и҆ неѕло́бивъ, ꙳ и҆́стиненъ же и҆ непоро́ченъ и҆ вѣ́ренъ, ꙳ ᲂу҆клонѧ́ѧсѧ ѿ всѧ́кїѧ ѕло́бныѧ ве́щи, ꙳ показа́лсѧ є҆сѝ и҆́мⷬ҇къ, бл҃же́нне, ꙳ просвѣще́нъ добродѣ́тельми, ꙳ и҆ бл҃гоче́стїемъ сїѧ́ѧ. ꙳ тѣ́мъ тѧ̀ ᲂу҆бл҃жа́емъ, ꙳ и҆ ст҃о́е твоѐ и҆ честно́е дне́сь пра́зднꙋемъ ᲂу҆спе́нїе, ꙳ ра́дꙋющесѧ, бг҃омꙋ́дре.
<<рн҃є ѡ҆б.: 310>>
Цѣломꙋ́дрїемъ и҆ бл҃говѣ́рїемъ, ꙳ ꙗ҆́кѡ багрѧни́цею многоцѣ́нною ѡ҆дѣ́ѧвсѧ и҆́мⷬ҇къ, ꙳ пра́вдою же и҆ кро́тостїю, ꙳ ꙗ҆́кѡ бж҃е́ственнымъ вѣнце́мъ ᲂу҆вѧ́злсѧ є҆сѝ, ꙳ со стра́ждꙋщими хрⷭ҇та̀ ра́ди, ꙳ црⷭ҇твовати возжелѣ́лъ є҆сѝ. ꙳ и҆ ны́нѣ цр҃ю̀ си́лъ предстои́ши, ꙳ і҆и҃сꙋ всемлⷭ҇тивомꙋ, ꙳ и҆ сп҃сꙋ дꙋ́шъ на́шихъ.
Сла́ва, гла́съ и҃:
Добродѣ́телей твои́хъ бг҃омꙋ́дре, и҆́мⷬ҇къ, и҆справлє́нїѧ ᲂу҆ѧсни́ша вѣ́рныхъ сердца̀: кто́ бо слы́ша безмѣ́рное твоѐ смире́нїе и҆ терпѣ́нїе, не ᲂу҆диви́тсѧ; є҆́же ко всѣ̑мъ кро́тость и҆ безѕло́бїе, къ скорбѧ́щымъ ми́лованїе, и҆ сꙋ́щымъ въ бѣ́дахъ ско́рое поможе́нїе, пла́вающымъ немѧте́жное приста́нище, и҆ пꙋтеше́ствꙋющымъ бл҃го́е поспѣше́нїе, всѧ̑ бг҃олѣ́пнѡ предварѝ досточꙋ́дне. и҆ ны́нѣ неꙋвѧда́емымъ вѣнце́мъ вѣнча́лсѧ є҆сѝ ѿ рꙋкѝ вседержи́телѧ бг҃а: є҆го́же молѝ сп҃сти́сѧ дꙋша́мъ на́шымъ.
И҆ ны́нѣ, бг҃оро́диченъ:
Влⷣчце, прїимѝ мл҃твы рабѡ́въ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
И҆лѝ крⷭ҇тобг҃оро́диченъ.
На лїтꙋргі́и слꙋ́жба прпⷣбническаѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.