Слꙋ́жба мч҃нцѣ
<<рв҃і ѡ҆б.: 224>>
[глⷡ҇а к҃] СЛꙊ́ЖБА Ѻ҆́БЩА
мч҃нцѣ є҆ди́ной.
Ве́чера,
на Гдⷭ҇и воззва́хъ, стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Двⷭ҇тва добро́тами ꙳ и҆ мꙋче́нїй кровьмѝ, ꙳ дꙋ́шꙋ твою̀ ᲂу҆краси́вши мч҃нце сла́внаѧ, и҆́мⷬ҇къ, ꙳ врꙋчи́ласѧ є҆сѝ созда́вшемꙋ, ꙳ сохранѧ́ющемꙋ тѧ̀ нетлѣ́ннꙋ во вѣ́къ и҆́стиннѡ, ꙳ ѡ҆ се́мъ ликовствꙋ́ющи съ во́инствы а҆рха̑гг҃лъ и҆ а҆́гг҃лъ, ꙳ а҆пⷭ҇лъ же и҆ прⷪ҇рѡ́къ, ꙳ и҆ мꙋ́чєникъ ликостоѧ̑нїи всехва́льнаѧ.
И҆ къ коле́самъ привѧза́ема, ꙳ и҆ ѕвѣрьмѝ растерза́ема, ꙳ и҆ ѻ҆гне́мъ и҆ водо́ю ѡ҆бостри́вши ꙳ тво́й по́мыслъ бжⷭ҇твеннымъ дх҃омъ, ꙳ тьмы̀ нача́льника, ꙳ течє́нїи кро́вными мꙋ́жески ᲂу҆дави́ла є҆сѝ, ꙳ и҆ востекла̀ є҆сѝ къ разꙋ́мнымъ черто́гѡмъ, ꙳ вѣ́но женихꙋ̀ твоемꙋ̀ дв҃о прине́сши страда́нїе.
Жениха̀ хрⷭ҇та̀ кро́вїю ꙳ ѡ҆ст҃и́вшисѧ прехва́льнаѧ, ꙳ твое́ю кро́вїю ᲂу҆краси́ла є҆сѝ плотскꙋ́ю ѻ҆де́ждꙋ. ꙳ тѣ́мже ѻ҆бою́дꙋ просвѣ́щшисѧ прехва́льнаѧ, и҆́мⷬ҇къ, ꙳ свѣ́тлагѡ сподо́биласѧ є҆сѝ черто́га є҆гѡ̀: ꙳ є҆го́же молѝ, ꙳ ѿ тлѝ и҆ бѣ́дъ и҆зба́витисѧ, ꙳ вѣ́рою творѧ́щымъ всечⷭ҇тнꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Ꙗ҆́кѡ мл҃твꙋ неꙋсыпа́ющꙋю, и҆ мольбꙋ̀ пребыва́ющꙋю, и҆мꙋ́щи пречⷭ҇таѧ ко гдⷭ҇ꙋ, напа̑сти ᲂу҆спѝ, и҆ во́лны ᲂу҆кротѝ ѻ҆каѧ́нныѧ моеѧ̀ дꙋшѝ, и҆ въ ско́рби сꙋ́щее се́рдце моѐ ᲂу҆тѣ́ши ѻ҆трокови́це, молю́ тѧ, и҆ ѡ҆бл҃годатѝ ᲂу҆́мъ мо́й, ꙗ҆́кѡ да досто́йнѡ тѧ̀ просла́влю.
<<рг҃і: 225>>
Крⷭ҇тобг҃оро́диченъ: А҆́гнца и҆ па́стырѧ тѧ̀ на дре́вѣ ꙗ҆́кѡ ви́дѣ а҆́гница, ро́ждшаѧ рыда́ше, и҆ мт҃рски тебѣ̀ вѣща́ше: сн҃е возжелѣ́нне, ка́кѡ на дре́вѣ крⷭ҇тнѣмъ повѣ́шенъ є҆сѝ долготерпѣли́ве; ка́кѡ рꙋ́цѣ и҆ но́зѣ твоѝ, сло́ве, пригвозди́шасѧ ѿ беззако́нныхъ, и҆ кро́вь твою̀ и҆злїѧ́лъ є҆сѝ влⷣко;
А҆́ще и҆́мать самогла́сенъ, Сла́ва, гла́съ ѕ҃.
Ѡ҆деснꙋ́ю сп҃са предста̀ дв҃а, и҆ стрⷭ҇тоте́рпица и҆ мч҃нца, и҆́мⷬ҇къ, ѡ҆дѣ́ѧна добродѣ́тельми, непобѣжде́на, и҆ преꙋкра́шена є҆ле́емъ чистоты̀, и҆ кро́вїю страда́нїѧ, и҆ вопїю́щи къ немꙋ̀ ра́достнѡ, свѣщꙋ̀ держа́щи: въ воню̀ мѵ́ра твоегѡ̀ теко́хъ, хрⷭ҇тѐ бж҃е, ꙗ҆́кѡ ᲂу҆ѧзви́хсѧ твое́ю любо́вїю а҆́зъ, не ѿлꙋчѝ менѐ, женишѐ нбⷭ҇ный. тоѧ̀ мл҃твами низпослѝ на́мъ, всеси́льне сп҃се, млⷭ҇ти твоѧ̑.
И҆ ны́нѣ, бг҃оро́диченъ:
Никто́же притека́ѧй къ тебѣ̀, посра́мленъ ѿ тебѐ и҆схо́дитъ пречⷭ҇таѧ бцⷣе дв҃о: но про́ситъ бл҃года́ти, и҆ прїе́млетъ дарова́нїе къ поле́зномꙋ проше́нїю.
Крⷭ҇тобг҃оро́диченъ: Пречⷭ҇таѧ, ꙗ҆́кѡ ви́дѣ тѧ̀ на крⷭ҇тѣ̀ ви́сѧща, рыда́ющи вопїѧ́ше мт҃рски: сн҃е мо́й и҆ бж҃е мо́й, сла́дкое моѐ ча́до, ка́кѡ терпи́ши стрⷭ҇ть поно́снꙋю;
[зрѝ] А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Кто̀ тебѐ не ᲂу҆бл҃жи́тъ:
Вхо́дъ. Прокі́менъ днѐ.
Чтє́нїѧ мч҃нчєскаѧ. [Пи̑сана въ концѣ̀ кни́ги сеѧ̀].
На стїхо́внѣ стїхи̑ры, гла́съ д҃:
Подо́бенъ: Ꙗ҆́кѡ до́блѧ:
Мꙋчи́тельскомꙋ шата́нїю ꙳ и҆ на́гломꙋ сꙋровствꙋ̀, ꙳ по́мысломъ сꙋпроти́вльшисѧ мꙋжемꙋ́дреннѡ, ꙳ бꙋ́дꙋщихъ предви́дѧщи наслажде́нїе бг҃омꙋ́дреннаѧ, ꙳ пребыва́ющее при́снѡ во вѣ́ки неподви́жимѡ: ꙳ є҆́же и҆ полꙋчи́ла є҆сѝ, ꙳ ѿ землѝ преста́вльшисѧ къ черто́гѡмъ нбⷭ҇нымъ, ꙳ и҆ ли́кꙋ неразори́момꙋ, сла́внаѧ.
Сті́хъ: Ди́венъ бг҃ъ бо ст҃ы́хъ свои́хъ, бг҃ъ і҆и҃левъ.
Црⷭ҇твїѧ бл҃голѣ́пїе, ꙳ и҆ добро́тꙋ кра́снꙋю ви́дѣти сподо́биласѧ є҆сѝ ꙳ жениха̀ твоегѡ̀ хрⷭ҇та̀ ꙳ ᲂу҆кра́шена ра́нами тве́рдагѡ <<рг҃і ѡ҆б.: 226>> твоегѡ̀ страда́нїѧ, ꙳ и҆ и҆сто́чникꙋ бл҃ги́хъ, ꙳ досто́йнѡ прибли́жиласѧ є҆сѝ. ꙳ ѿѻнꙋ́дꙋ же бжⷭ҇твеннагѡ весе́лїѧ пло́дъ ꙳ бога́тнѡ прїѧ́ла є҆сѝ бл҃же́ннаѧ, ꙳ и҆ безсме́ртнꙋю сла́вꙋ.
Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.
Ни и҆́го рабо́тное, ꙳ ни сла́бость же́нскаѧ, ꙳ ни гла́дъ, ни ра̑ны запѧ́ша тѝ ꙳ мч҃нчестѣй тве́рдости ᲂу҆подо́битисѧ всесла́внаѧ, ꙳ ᲂу҆се́рдїемъ дꙋшѝ мꙋ̑ки претерпѣ́ла є҆сѝ. ꙳ ѿѻнꙋ́дꙋ же полꙋчи́ла є҆сѝ нбⷭ҇ный черто́гъ, ꙳ и҆ вѣнце́мъ бл҃года́ти ᲂу҆краси́ласѧ є҆сѝ, ꙳ предстоѧ́щи зижди́телю твоемꙋ̀.
Сла́ва, гла́съ є҃:
Двⷭ҇тва твоегѡ̀ красоты̀ восхотѣ̀ цр҃ь сла́вы хрⷭ҇то́съ, ꙗ҆́кѡ непоро́чнꙋ тѧ̀ невѣ́стꙋ себѣ̀ ѡ҆брꙋчѝ, совокꙋпле́нїемъ нетлѣ́ннымъ: и҆́бо во́лею свое́ю пода́въ добро́тѣ твое́й си́лꙋ, на враги́ же и҆ стра̑сти непобѣди́мꙋ показа̀, претерпѣ́вшꙋю ра̑ны гѡ́рькїѧ, и҆ мꙋ̑ки свирѣ̑пыѧ, сꙋгꙋ́бымъ вѣнце́мъ ᲂу҆вѧзе́ тѧ, и҆ поста́ви ѡ҆деснꙋ́ю себѐ ꙗ҆́кѡ цр҃и́цꙋ и҆спещре́нꙋ. того̀ молѝ мч҃нце чтⷭ҇на́ѧ и҆ многострада́льнаѧ, и҆́мⷬ҇къ, пѣвцє́мъ твои̑мъ сп҃се́нїе и҆ жи́знь пода́ти, и҆ ве́лїю млⷭ҇ть.
И҆ ны́нѣ, бг҃оро́диченъ:
Бл҃жи́мъ тѧ̀, бцⷣе дв҃о, и҆ сла́вимъ тѧ̀ вѣ́рнїи по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ, и҆ прибѣ́жище дꙋ́шъ на́шихъ.
Крⷭ҇тобг҃оро́диченъ: Зрѧ́щи дре́вле а҆́гнца своего̀, дв҃а и҆ всебл҃же́ннаѧ ѻ҆трокови́ца на крⷭ҇тъ воздви́жена, вопїѧ́ше слезѧ́щи: ᲂу҆вы̀ мнѣ̀, сн҃е мо́й, ка́кѡ ᲂу҆мира́еши, бг҃ъ сы́й є҆стество́мъ безсме́ртенъ;
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ д҃:
А҆́гница твоѧ̀ і҆и҃се, и҆́мⷬ҇къ, зове́тъ ве́лїимъ гла́сомъ: тебѐ женишѐ мо́й люблю̀, и҆ тебѐ и҆́щꙋщи страда́льчествꙋю и҆ сраспина́юсѧ, и҆ спогреба́юсѧ кр҃ще́нїю твоемꙋ̀, и҆ страждꙋ̀ тебѐ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ <<рд҃і: 227>> съ тобо́ю: по ꙗ҆́кѡ же́ртвꙋ непоро́чнꙋю прїими́ мѧ съ любо́вїю поже́ршꙋюсѧ тебѣ̀, тоѧ̀ мл҃твами, ꙗ҆́кѡ млⷭ҇тивъ, сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ сѣда́ленъ, гла́съ є҃.
Подо́бенъ: Собезнача́льное:
Бл҃гоче́стнѡ порабо́тившисѧ вседержи́телю, ѕлочести́вомꙋ же мꙋчи́телю не порабо́тиласѧ є҆сѝ чтⷭ҇на́ѧ, но претерпѣ́ла є҆сѝ тве́рдѡ те́мное заключе́нїе, и҆ ра́нъ разжже́нїе, и҆ преста́виласѧ є҆сѝ къ бг҃ꙋ, бг҃омꙋ́драѧ мч҃нце, и҆́мⷬ҇къ, моли́сѧ ѡ҆ на́съ соверша́ющихъ па́мѧть твою̀. [Два́жды.]
Сла́ва, и҆ ны́нѣ, бг҃оро́диченъ:
Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное и҆ непосты́дное, стѣно̀ и҆ покро́ве и҆ приста́нище прибѣга́ющихъ къ тебѣ̀ приснодв҃о чтⷭ҇аѧ, сн҃а твоего̀ и҆ бг҃а молѝ со а҆́гг҃лы ᲂу҆мире́нїе да́ти мі́рꙋ, и҆ сп҃се́нїе, и҆ ве́лїю млⷭ҇ть.
По в҃-й каѳі́смѣ сѣда́ленъ, гла́съ а҃.
Подо́бенъ: Гро́бъ тво́й:
Мꙋче́нїй ѻ҆́гнь, дꙋ́ха росо́ю погаси́ла є҆сѝ чтⷭ҇на́ѧ, и҆ къ свѣ́тꙋ преста́виласѧ є҆сѝ бжⷭ҇твенномꙋ и҆ невеще́ственномꙋ, и҆ по кончи́нѣ бл҃же́ннѣй и҆сточа́еши и҆сцѣле́нїй ка̑пли, и҆́мⷬ҇къ, ᲂу҆ставлѧ́ющи разжже́нїе страсте́й, си́лою дх҃о́вною. [Два́жды.]
Сла́ва, и҆ ны́нѣ, бг҃оро́диченъ:
Мл҃твы твои́хъ ра̑бъ прїимѝ бцⷣе, и҆ и҆зба́ви на́съ ѿ всѧ́кїѧ бѣды̀, ꙗ҆́кѡ ро́ждшаѧ хрⷭ҇та̀ сп҃са, и҆зба́вителѧ дꙋ́шъ на́шихъ.
По Хвали́те и҆́мѧ гдⷭ҇не:
Припѣ́въ:
Велича́емъ тѧ̀ стрⷭ҇тоте́рпице хрⷭ҇то́ва, и҆́мⷬ҇къ, и҆ чте́мъ чтⷭ҇но́е страда́нїе твоѐ, є҆́же за хрⷭ҇та̀ претерпѣ́ла є҆сѝ.
<<рд҃і ѡ҆б.: 228>>
Ѱало́мъ и҆збра́нный: Бг҃ъ на́мъ прибѣ́жище и҆ си́ла:
По полѷеле́и, сѣда́ленъ, гла́съ д҃:
Подо́бенъ: Вознесы́йсѧ на крⷭ҇тъ:
Прише́дшꙋю хрⷭ҇тꙋ̀ во́лею, и҆ ᲂу҆краси́вшꙋю добродѣ́тельми се́рдце, бл҃голѣ́пнѡ воспои́мъ, и҆́мⷬ҇къ, вѣ́рныхъ мно́жество: та́ бо посрамѝ мꙋчи́тельскꙋю де́рзость, и҆ просїѧ́вши ꙗ҆́кѡ со́лнце посредѣ̀ беззакѡ́нникъ, по кончи́нѣ ꙗ҆ви́сѧ земны̑мъ подтвержде́нїе бж҃е́ственное, вкꙋ́пѣ и҆ держа́ва. [Два́жды.]
Сла́ва, и҆ ны́нѣ, бг҃оро́диченъ:
Ѿ а҆́гг҃ла сло́во прїи́мши во ᲂу҆тро́бѣ твое́й, и҆ ро́ждши воплоще́нна бг҃а є҆мманꙋ́ила, бцⷣе, молѝ ѡ҆ дꙋша́хъ на́шихъ.
Степє́нна, а҃-й а҆нтїфѡ́нъ, д҃-гѡ гла́са.
Прокі́менъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.
Всѧ́кое дыха́нїе:
Є҆ѵⷢ҇лїе мꙋ́ченицѣ, [пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ ѕ҃, на Гдⷭ҇и воззва́хъ, Сла́вникъ.
Канѡ́нъ, гла́съ и҃.
Пѣ́снь а҃.
І҆рмо́съ: Пои́мъ гдⷭ҇ви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѣ просла́висѧ.
Влече́тъ къ пѣснопѣ́нїю премі́рныхъ вѡ́инства, и҆ земны́хъ ли́ки, всехва́льнаѧ ѻ҆трокови́ца, чꙋдесы̀.
Добро́ты возжела́въ влⷣка всѣ́хъ, краснѣ́йшагѡ твоегѡ̀ се́рдца всехва́льнаѧ, нбⷭ҇ныхъ черто́гѡвъ сподо́би тѧ̀.
На ка̑зни и҆ бѡлѣ́зни, и҆ на ра̑ны многоѡбра̑зныѧ, не ᲂу҆страшена̀, мч҃нце, вмѣсти́ласѧ є҆сѝ: поспѣша́ющꙋю бо и҆́маши бл҃года́ть сп҃совꙋ, возмога́ющꙋю тѧ̀.
Бг҃оро́диченъ: Пречⷭ҇таѧ бцⷣе, воплоще́нно присносꙋ́щное и҆ пребж҃е́ственное сло́во па́че є҆стества̀ ро́ждшꙋю, пое́мъ тѧ̀.
Пѣ́снь г҃.
І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ и҆ пое́тъ тѧ̀ дꙋ́хъ мо́й.
<<рє҃і: 229>>
Ꙗ҆ви́ласѧ є҆сѝ на сꙋди́щи мꙋ́жественнꙋ дꙋ́шꙋ носѧ́щи, и҆ врага̀ ꙗ҆́коже немꙋ́жественна побѣди́ла є҆сѝ всехва́льнаѧ.
Поро́къ въ добро́тѣ твое́й, нижѐ вра́ска дꙋшѝ бы́сть: и҆ тѧ̀ хрⷭ҇то́съ невѣ́стꙋ въ нетлѣ̑нныѧ черто́ги прїѧ́тъ.
И҆сцѣлѝ всехва́льнаѧ дꙋшѝ моеѧ̀ стрꙋ́пы, мч҃нце хрⷭ҇то́ва, и҆́мⷬ҇къ, и҆ ᲂу҆ти́ши твои́ми мл҃твами жи́зни моеѧ̀ бꙋ́рю.
Бг҃оро́диченъ: Тѧ̀ всѝ стѧжа́хомъ прибѣ́жище, и҆ стѣ́нꙋ на́шꙋ хрⷭ҇тїа́не, и҆ тѧ̀ славосло́вимъ немо́лчнѡ безневѣ́стнаѧ.
Сѣда́ленъ, гла́съ и҃.
Подо́бенъ: Премꙋ́дрости:
Крове́й твои́хъ стрꙋѧ́ми мч҃нце хрⷭ҇то́ва, пото́пъ нечести̑вымъ при́снѡ дѣ́йствꙋеши, всехва́льнаѧ: тꙋ́чами же бл҃года́ти словє́сныѧ ни̑вы напаѧ́ющи всегда̀, въ ни́хже возраща́еши кла́съ вѣ́ры, тѣ́мъ пресла́внѡ и҆ по сме́рти ꙗ҆ви́ласѧ є҆сѝ ѻ҆́блакъ, и҆сточа́ющи жи́зни свидѣ́тельство, стрⷭ҇тоте́рпице всехва́льнаѧ, и҆́мⷬ҇къ, моли́сѧ хрⷭ҇тꙋ̀ бг҃ꙋ согрѣше́нїй ѡ҆ставле́нїе дарова́ти, чтꙋ́щымъ любо́вїю ст҃ꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безсѣ́меннѡ ро́ждшꙋю бг҃а пло́тїю, всѝ ᲂу҆бл҃жа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. тѣ́мъ а҆́гг҃льскїй собо́ръ, и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, досто́йнѡ пою́щымъ сла́вꙋ твою̀.
Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе: ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же те́рпиши за млⷭ҇рдїе млⷭ҇ти, долготерпѣли́ве гдⷭ҇и, млⷭ҇ти бе́здно, и҆ и҆сто́чниче неисчерпа́емый, ᲂу҆млⷭ҇рдисѧ, и҆ да́рꙋй прегрѣше́нїй ѡ҆ставле́нїе, вѣ́рою пою́щымъ бж҃е́ствєнныѧ стрⷭ҇ти твоѧ̑.
<<рє҃і ѡ҆б.: 230>>
Пѣ́снь д҃.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Нескве́рное зерца́ло бж҃е́ственныхъ разꙋмѣ́нїй тебѐ самꙋ́ю ᲂу҆стро́ивши, ꙗ҆́кѡ свѣти́льникъ златолѣ́потнѣйшїй страда́лицъ посредѣ̀, мч҃нце, возсїѧ́ла є҆сѝ.
Мра́чномꙋ не принесла̀ є҆сѝ де́мѡнꙋ же́ртвы, непобѣди́маѧ мꙋ́ченице, и҆́мⷬ҇къ: жизноно́снꙋю бо возлюби́ла є҆сѝ за бл҃гоче́стїе сме́рть прїѧ́ти.
Ꙗ҆́кѡ неболѣ́зненно носѧ́щи со стрⷭ҇тоно́сцы тѣ́ло непоро́чнаѧ, ра́нами нечꙋ́вственна пребыла̀ є҆сѝ, бж҃е́ственныѧ любвѐ раче́нїемъ.
Бг҃оро́диченъ: Ѡ҆чище́нїе на́мъ да́рꙋй невѣ́дѣнїй ꙗ҆́кѡ безгрѣ́шенъ, и҆ ᲂу҆мирѝ мі́ръ тво́й, бж҃е, мл҃твамъ ро́ждшїѧ тѧ̀.
Пѣ́снь є҃.
І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.
Днѐ и҆ мі́ра противополо́жное ᲂу҆вѣ́дѣвши ратолю́бнаго де́мѡна люби́ти не восхотѣ́ла є҆сѝ.
Мнѣ́въ твою̀ ѡ҆сла́бити бж҃е́ственнꙋю мч҃нце, и҆́мⷬ҇къ любо́вь, смѣ́хъ ꙗ҆ви́сѧ, козньмѝ вселꙋка́вый.
Пода́ждь мѝ просвѣще́нїе и҆ ми́ръ всехва́льнаѧ, рѣша́щи мл҃твами твои́ми многомѧте́жное смꙋще́нїе.
Бг҃оро́диченъ: Дв҃ꙋ по ржⷭ҇твѣ̀ пое́мъ тѧ̀, бцⷣе, ты́ бо бг҃а сло́ва пло́тїю мі́рꙋ породила̀ є҆сѝ.
Пѣ́снь ѕ҃.
І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве, хрⷭ҇тѐ бж҃е на́шъ.
Мꙋ́жественное въ же́нстѣй пло́ти дꙋшѝ мꙋдрова́нїе носѧ́щи сла́внаѧ, ѡ҆ ѕвѣ́рехъ сꙋ́щихъ въ вода́хъ неради́ла є҆сѝ.
Побѣди́ла є҆сѝ мꙋчи́телей горды́ню, неврежде́на пребыла̀ є҆сѝ мч҃нце непобѣди́маѧ, и҆ вѣне́цъ побѣ́ды прїѧ́ла є҆сѝ.
<<рѕ҃і: 231>>
Ꙗ҆́кѡ добрꙋ̀, и҆ ꙗ҆́кѡ краснꙋ̀, ꙗ҆́кѡ че́стнꙋ, и҆ ꙗ҆́кѡ дѣ́вства зарѧ́ми сїѧ́ющꙋю, тебѐ жени́хъ гдⷭ҇ь себѣ̀ приво́дитъ пресла́внаѧ.
Бг҃оро́диченъ: Є҆ди́на сло́вомъ пло́тїю сло́во поро́ждшаѧ, и҆зба́ви мо́лимсѧ, сѣ́тей вра́жїихъ дꙋ́шы на́шѧ.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃:
Подо́бенъ: Вы́шнихъ и҆щѧ̀:
Хра́мъ тво́й всечⷭ҇тны́й, ꙗ҆́кѡ цѣльбꙋ̀ дꙋше́внꙋю ѡ҆брѣ́тше всѝ вѣ́рнїи, велегла́снѡ вопїе́мъ тѝ дв҃о мч҃нце, и҆́мⷬ҇къ, великоимени́таѧ: хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.
І҆́косъ: Оу҆невѣ́стившꙋюсѧ хрⷭ҇тꙋ̀ мꙋче́нїемъ, и҆́мⷬ҇къ, соше́дшесѧ почти́мъ досто́йнѡ: ꙗ҆́кѡ да тоѧ̀ мл҃твами, дꙋшетлѣ́нныѧ па́гꙋбы и҆зба́вльшесѧ, гꙋби́тельства, трꙋ́са и҆ паде́жа, житїѐ во смире́нїе препрово́димъ, сподо́бльшесѧ со всѣ́ми ст҃ы́ми, ѿ вѣ́ка бг҃ꙋ бл҃гоꙋгоди́вшими, ходи́ти во свѣ́тѣ, и҆ пѣ́ти съ си́ми: ᲂу҆диви́лъ є҆сѝ, сп҃се, твоѧ̑ млⷭ҇ти всѣ̑мъ человѣ́кѡмъ, вѣ́рою хва́лѧщимъ ю҆̀. тѣ́мже зове́мъ є҆́й: молѝ непреста́ннѡ ѡ҆ всѣ́хъ на́съ.
Пѣ́снь з҃.
І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е бл҃гослове́нъ є҆сѝ.
Па́че ᲂу҆ма̀ ꙗ҆ви́шасѧ бжⷭ҇твенныхъ мч҃нкѡвъ бл҃гомꙋ́жества: зижди́тель бо всѣ́хъ, тва́рь покарѧ́етъ во страда́нїи зовꙋ́щымъ: ѻ҆тцє́въ на́шихъ бж҃е, бл҃гослове́нъ є҆сѝ.
Хꙋ̑лѧщаѧ заградѝ пресловꙋ́щаѧ ѻ҆трокови́ца ᲂу҆ста̀ мꙋчи́телей, и҆ горды́ню пребеззако́нныхъ дх҃омъ ст҃ы́мъ бж҃е́ственнѡ воспѣва́ющи: ѻ҆тцє́въ на́шихъ бж҃е, бл҃гослове́нъ є҆сѝ.
Тро́ица ѻ҆́трѡкъ прпⷣбныхъ, разже́гшыѧ пе́щь дре́вле попалѝ: ны́нѣ же бг҃омꙋ́драѧ трⷪ҇цꙋ пою́щи слꙋги̑ ᲂу҆ловѝ, ѻ҆тцє́въ бг҃а пою́щыѧ: бж҃е, бл҃гослове́нъ є҆сѝ.
Бг҃оро́диченъ: На́ше сп҃се́нїе ꙗ҆́коже восхотѣ́лъ є҆сѝ, сп҃се, ᲂу҆стро́ити, во ᲂу҆тро́бꙋ дв҃ы всели́лсѧ є҆сѝ, ю҆́же мі́рꙋ предста́тельницꙋ показа́лъ є҆сѝ: ѻ҆тцє́въ на́шихъ бж҃е, бл҃гослове́нъ є҆сѝ.
<<рѕ҃і ѡ҆б.: 232>>
Пѣ́снь и҃.
І҆рмо́съ: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки.
Бл҃же́ннѣйшаѧ въ жена́хъ, вы́шнѧгѡ возме́зднꙋю и҆мꙋ́щи бл҃года́ть, поѧ́ше хва́лѧщи хрⷭ҇та̀ во вѣ́ки всѧ̑.
Оу҆крѣпле́на по́мысломъ невѣ́стника, невеще́ственнымъ раче́нїемъ, тѣ́ло предала̀ є҆сѝ на сме́рть, и҆ живе́ши во вѣ́ки всѧ̑.
Та́йнѡ жени́хъ ко пречⷭ҇тѣй невѣ́стѣ въ пе́щь прише́дъ дꙋхо́вною росо́ю ѻ҆́ч҃имъ бл҃говоле́нїемъ спа́слъ є҆́сть, пою́щꙋ хрⷭ҇та̀ во вѣ́ки.
Бг҃оро́диченъ: По́мощи ꙗ҆́же ѿ тебѐ тре́бꙋющыѧ не пре́зри дв҃о, пою́щыѧ и҆ превозносѧ́щыѧ тѧ̀ во вѣ́ки.
Пѣ́снь ѳ҃.
І҆рмо́съ: Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.
Тече́нїе живы́ѧ кро́ве зна́менїе нетлѣ́нныѧ свы́ше дарова́нныѧ тебѣ̀ жи́зни, мч҃нце всехва́льнаѧ: цѣле́нїй бо сокро́вище непреста́нное че́рплющымъ ꙗ҆ви́ласѧ є҆сѝ.
Косне́сѧ тебѣ̀ сме́рть є҆стества̀ зако́номъ бг҃омꙋ́драѧ: въ живоно́снꙋю же ме́ртвость нестра́стнѡ ѡ҆блекла́сѧ є҆сѝ, є҆́юже ꙗ҆́кѡ ѡ҆дꙋшевле́нное твоѐ тѣ́ло поло́жши всечⷭ҇тно́е, живе́ши нетлѣ́ннѡ, и҆ свидѣ́тельствꙋютъ твоѧ̑ кровотечє́нїѧ.
Ꙗ҆́кѡ со́лнечнꙋю лꙋчꙋ̀ ѡ҆зарѧ́ющꙋю всѧ̑, и҆ ꙗ҆́кѡ невѣ́стꙋ хрⷭ҇то́вꙋ предо́брꙋ, ꙗ҆́кѡ го́рлицꙋ чистолюби́вꙋю, и҆ ꙗ҆́кѡ ма́слинꙋ, ꙗ҆́кѡ ке́дръ, ꙗ҆́кѡ сꙋ́щꙋю и҆збра́ннꙋю голꙋби́цꙋ, хва́лимъ тѧ̀ всѝ, и҆́мⷬ҇къ, бг҃оимени́таѧ.
Бг҃оро́диченъ: Невѣ́сто неискꙋсобра́чнаѧ, сосꙋ́де бл҃гово́нїѧ, тѧ̀ ꙗ҆́кѡ и҆́стиннꙋю и҆ непоро́чнꙋю, и҆ бжⷭ҇твеннагѡ ѻ҆́блакъ свѣ́та, прїе́мшꙋю нбⷭ҇ный до́ждь во ᲂу҆тро́бѣ, дв҃о мт҃и, велича́емъ.
Свѣти́ленъ.
Ꙗ҆́кѡ невѣ́ста ᲂу҆краси́ласѧ є҆сѝ добро́тою, ѡ҆брꙋчи́вшисѧ жени́хъ стрⷭ҇тьмѝ добротво́рными: внꙋ́трь же черто́га свѣтови́дна, <<рз҃і: 233>> ꙗ҆́кѡ и҆збра́ннаѧ всели́ласѧ є҆сѝ, носѧ́щи свѣщꙋ̀ дв҃ческꙋю, и҆ ны́нѣ ца́рствꙋеши съ живꙋ́щимъ во вѣ́ки, и҆́мⷬ҇къ, сїѧ́ющи.
Бг҃оро́диченъ: Тѧ̀ застꙋпле́нїе всѝ и҆́мамы грѣ́шнїи, ѽ пречⷭ҇таѧ дв҃о! ты̀ бл҃гоꙋвѣ́тлива на́мъ сотворѝ сн҃а твоего̀ мт҃рними твои́ми мл҃твами.
На хвали́техъ стїхи̑ры самогла̑сны, гла́съ г҃:
Страда́льческое торжество̀ вѣ́рнїи, бг҃омꙋ́дреннѣ соверша́емо ви́дѧще, чꙋ́дномꙋ въ совѣ́тѣхъ бг҃ꙋ на́шемꙋ, бл҃года́рственное пѣснопѣ́нїе воспои́мъ: неви́димꙋю бо держа́вꙋ проти́вныѧ си́лы въ же́нстѣмъ є҆стествѣ̀ побѣдѝ, и҆ бж҃е́ственнꙋю свою̀ си́лꙋ въ не́мощи соверши́въ добромч҃нцы: тоѧ̀ мл҃твами сп҃са́етъ дꙋ́шы на́шѧ. [Два́жды.]
И҆́стины ча́шꙋ ѿ свои́хъ крове́й страда́льческихъ, всехва́льнаѧ мч҃нца хрⷭ҇то́ва, и҆́мⷬ҇къ, раствори́вши, и҆ сїю̀ всегда̀ предлага́ющи цр҃кви, въ не́йже цр҃кѡ́вныѧ пито́мцы мꙋ́дрости гла́сомъ созыва́етъ, глаго́лющи: почерпи́те пи́во, воскрⷭ҇нїѧ свидѣ́тельное, невѣ́рныхъ прогони́тельное и҆ страсте́й чисти́тельное, бл҃гочєсти́вымъ же дꙋша́мъ храни́тельно, сп҃сꙋ зовꙋ́ще: напои́вый на́съ пото́комъ сла́дости дх҃а, сп҃сѝ дꙋ́шы на́шѧ.
И҆̀же кро́вїю хрⷭ҇то́вою дꙋ́шы запеча́тавше въ де́нь и҆збавле́нїѧ, кро́вь ст҃ꙋ́ю ѿ мч҃нческагѡ и҆сто́чника востека́ющꙋю на́мъ, съ весе́лїемъ дꙋхо́внымъ прⷪ҇ро́чески почерпе́мъ, живото́чныхъ стрⷭ҇те́й сп҃совыхъ, и҆ присносꙋ́щныѧ сла́вы ѡ҆бразова́тельнꙋ. тѣ́мже є҆мꙋ̀ возопїи́мъ: прославлѧ́ѧйсѧ во ст҃ы́хъ твои́хъ, гдⷭ҇и, пресла́вныѧ твоеѧ̀ стрⷭ҇тоте́рпицы мл҃твами сп҃сѝ дꙋ́шы на́шѧ.
Сла́ва, гла́съ ѕ҃:
Страда́льческимъ ше́ствовавши пꙋте́мъ, мꙋчи́тельскагѡ и҆збѣжа́ла є҆сѝ совѣ́та, и҆́мⷬ҇къ, всечⷭ҇тна́ѧ: ꙗ҆́кѡ дѣ́ва, ᲂу҆́бѡ мꙋдра̀, свѣщꙋ̀ носѧ́щи вошла̀ є҆сѝ во дворы̀ гдⷭ҇а твоегѡ̀: ꙗ҆́кѡ мч҃нца мꙋ́жествомъ, бл҃года́ть прїѧ́ла є҆сѝ и҆сцѣли́ти плѡтскі́ѧ стра̑сти, но и҆ на́съ воспѣва́ющихъ тѧ̀, дꙋше́вныхъ болѣ́зней и҆зба́ви, ꙗ҆̀же къ бг҃ꙋ мольба́ми твои́ми.
<<рз҃і ѡ҆б.: 234>>
И҆ ны́нѣ, бг҃оро́диченъ:
Бг҃а и҆з̾ тебѐ воплоти́вшагосѧ разꙋмѣ́хомъ бцⷣе дв҃о: того̀ молѝ ѡ҆ сп҃се́нїи дꙋ́шъ на́шихъ.
Крⷭ҇тобг҃оро́диченъ: Всечⷭ҇таѧ, ꙗ҆́кѡ ви́дѣ тебѐ на крⷭ҇тѣ̀ повѣ́шена, пла́чꙋщи вопїѧ́ше мт҃рски: сн҃е мо́й и҆ бж҃е мо́й, сладча́йшее моѐ ча́до, ка́кѡ терпи́ши стрⷭ҇ть поно́снꙋю;
А҆́ще и҆́мать Сла́вꙋ на стїхо́внѣ, глаго́ли вече́рнїй:
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.