Слꙋ́жба прпⷣбномч҃нкꙋ
<<р҃а ѡ҆б.: 202>>
[глⷡ҇а и҃і] СЛꙊ́ЖБА Ѻ҆́БЩА
прпⷣбномч҃нкꙋ є҆ди́номꙋ.
Ве́черъ,
на Гдⷭ҇и воззва́хъ, стїхи̑ры, гла́съ ѕ҃.
Подо́бенъ: Тридне́венъ:
По́двиги мꙋ́драгѡ по́стника, ꙳ и҆ бѡлѣ́зни во́ина хрⷭ҇то́ва ꙳ восхвалѧ́юще по до́лгꙋ вѣ́рнїи, ꙳ возопїе́мъ гдⷭ҇еви: ꙳ тогѡ̀ мл҃твами хрⷭ҇тѐ бж҃е, ꙳ ѿ всѧ́кїѧ бѣ́ды и҆зба́ви на́съ.
Да́стсѧ тѝ ѿ бг҃а мно́гъ ми́ръ предо́блїй, ꙳ бꙋ́рю преше́дшꙋ тѝ лю́тыхъ, ꙳ прпⷣбне ѻ҆́тче, и҆́мⷬ҇къ, ꙳ непобѣди́мый во́ине, ꙳ и҆ мл҃твенниче ѡ҆ хва́лѧщихъ тѧ̀.
Пострада́лъ є҆сѝ мꙋ́дре зако́ннѡ, ꙳ и҆ бы́лъ є҆сѝ премꙋ́дръ къ бг҃ꙋ, ꙳ ꙗ҆́кѡ дрꙋгі́й до́мъ ты̀ мч҃нче, ꙳ всѧ́ческихъ содѣ́телю, и҆ ꙗ҆ви́лсѧ є҆сѝ бг҃оно́се, ꙳ свѣти́ло цр҃ко́вное, ꙳ прпⷣбныхъ ᲂу҆добре́нїе.
Сла́ва, и҆ ны́нѣ, бг҃оро́диченъ:
Бцⷣе дв҃о чтⷭ҇аѧ, моли́сѧ гдⷭ҇ви, ꙳ ꙗ҆́кѡ да мл҃твами твои́ми ꙳ пода́стъ дꙋша́мъ на́шымъ грѣхѡ́въ ѡ҆ставле́нїе, ми́ръ и҆ ве́лїю млⷭ҇ть.
Крⷭ҇тобг҃оро́диченъ: На дре́вѣ живо́тъ на́шъ зрѧ́щи, всенепоро́чнаѧ бцⷣе ви́сѧщъ, мт҃рски рыда́ющи вопїѧ́ла є҆сѝ: сн҃е мо́й, и҆ бж҃е мо́й, сп҃сѝ любо́вїю пою́щыѧ тѧ̀.
А҆́ще и҆́мать, самогла́сенъ. Сла́ва, гла́съ є҃:
Прпⷣбне ѻ҆́тче, не да́лъ є҆сѝ сна̀ ѻ҆чи́ма твои́ма, ни вѣ́ждома твои́ма дрема́нїѧ, до́ндеже дꙋ́шꙋ и҆ тѣ́ло ѿ страсте́й свободи́лъ є҆сѝ, и҆ себѐ ᲂу҆гото́валъ є҆сѝ дх҃а жили́ще: прише́дъ бо хрⷭ҇то́съ со ѻ҆ц҃е́мъ, ѻ҆би́тель въ тебѣ̀ сотворѝ, є҆диносꙋ́щныѧ трⷪ҇цы бл҃года́ть прїи́мъ, великопроповѣ́дниче прпⷣбне, моли́сѧ ѡ҆ дꙋша́хъ на́шихъ.
<<р҃в: 203>>
И҆ ны́нѣ, бг҃оро́диченъ:
Бл҃жи́мъ тѧ̀ бцⷣе дв҃о, и҆ сла́вимъ тѧ̀ вѣ́рнїи по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ, и҆ прибѣ́жище дꙋ́шъ на́шихъ.
Крⷭ҇тобг҃оро́диченъ.
Подо́бенъ: Бл҃жи́мъ тѧ̀:
Зрѧ́щи дре́вле а҆́гнца своего̀, дв҃о мт҃и всебл҃же́ннаѧ ѻ҆трокови́ца, на крⷭ҇тъ воздви́жена, вопїѧ́ше слезѧ́щи: ᲂу҆вы̀ мнѣ̀, сн҃е мо́й, ка́кѡ ᲂу҆мира́еши, бг҃ъ є҆стество́мъ сы́й безсме́ртенъ;
А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Въ чермнѣ́мъ мо́ри:
Вхо́дъ. Прокі́менъ днѐ.
Чтє́нїѧ г҃ мч҃нчєскаѧ, [пи̑сана въ концѣ̀ кни́ги сеѧ̀].
На стїхо́внѣ стїхи̑ры, гла́съ а҃.
Подо́бенъ: Всехва́льнїи мч҃нцы:
Прехва́льне, и҆́мⷬ҇къ, ꙳ твоѐ житїѐ возложи́лъ є҆сѝ, ꙳ добродѣ́телей попече́нїе, ꙳ пѣсносло́вїемъ бо вѣ́рнїи, ꙳ вѣ́рою хрⷭ҇та̀ похвалѧ́ютъ, ꙳ твои́ми покарѧ́ющесѧ ᲂу҆чє́нїи: ꙳ и҆́мже ᲂу҆тверди́тисѧ въ ми́рѣ, ꙳ предстоѧ̀ ᲂу҆молѝ бж҃е́ственнаго дх҃а.
Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.
Бг҃одꙋхнове́нне мч҃нче, и҆́мⷬ҇къ, ꙳ твоѐ житїѐ ᲂу҆́бѡ ра́вно а҆́гг҃лѡмъ, ꙳ земны̑мъ ѡ҆б̾ѧви́сѧ: ꙳ нбⷭ҇нымъ же ꙗ҆́кѡ бл҃гово́ннаѧ же́ртва, ꙳ и҆ до́брое кади́ло, ꙳ твоѐ и҆сповѣ́данїе принесе́сѧ. ꙳ и҆ ны́нѣ моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Пребога́тый, и҆́мⷬ҇къ, страсте́й побѣди́тель бы́въ, ꙳ мꙋчи́телѧ побѣди́лъ є҆сѝ: ꙳ вѣнцено́сцємъ сликовствꙋ́ѧ бл҃же́нне, ꙳ ѡ҆ всѣ́хъ помина́й соверша́ющихъ твою̀ па́мѧть, ꙳ и҆ ны́нѣ хрⷭ҇тꙋ̀ моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.
Сла́ва, гла́съ д҃:
Посо́бїемъ дꙋхо́внымъ прпⷣбномч҃нче, и҆́мⷬ҇къ, побѣди́въ врага̀ проти́внаго, ꙗ҆́кѡ во́инъ непобѣди́мь, ѻ҆рꙋ́жїемъ вѣ́ры, тьмы̀ мы́сленныѧ є҆ѳїѡ́пы ссѣ́клъ є҆сѝ, и҆ соверши́въ зако́нъ пѡ́двигъ <<р҃в ѡ҆б.: 204>> твои́хъ, со всѣ́ми стрⷭ҇тоте́рпче вѣнча́лсѧ є҆сѝ ли́ки, прпⷣбне и҆ пребога́те.
И҆ ны́нѣ, бг҃оро́диченъ:
И҆зба́ви на́съ ѿ нꙋ́ждъ на́шихъ мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ зове́мъ тѝ: ра́дꙋйсѧ, є҆ди́но предста́тельство дꙋ́шъ на́шихъ.
Крⷭ҇тобг҃оро́диченъ.
Подо́бенъ: Ꙗ҆́кѡ до́блѧ:
Распина́ема ви́дѧщи, ꙳ и҆ въ ре́бра пробода́ема копїе́мъ, ꙳ пречⷭ҇таѧ, хрⷭ҇та̀ чл҃вѣколю́бца, ꙳ пла́чꙋщи вопїѧ́ше: ꙳ что̀ сїѐ сн҃е мо́й; ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆́же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀ вселюбе́знѣйше; ꙳ дивлю́сѧ бл҃гоꙋтро́бне ꙳ твоемꙋ̀ во́льномꙋ распѧ́тїю.
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ и҃:
Въ тебѣ̀ ѻ҆́тче и҆звѣ́стнѡ сп҃се́сѧ є҆́же по ѡ҆́бразꙋ: прїи́мъ бо крⷭ҇тъ, послѣ́довалъ є҆сѝ хрⷭ҇тꙋ̀ и҆ дѣ́ѧ ᲂу҆чи́лъ є҆сѝ презира́ти ᲂу҆́бѡ пло́ть, прехо́дитъ бо: прилѣжа́ти же ѡ҆ дꙋшѝ, ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбне и҆́мⷬ҇къ, дꙋ́хъ тво́й.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ, сѣда́ленъ, гла́съ д҃.
Подо́бенъ: Вознесы́йсѧ:
Земны́хъ и҆ тлѣ́ющихъ наслаждє́нїѧ небре́глъ є҆сѝ, и҆ въ пꙋсты́ни житїѐ возлюби́лъ є҆сѝ, мі́ра красоты̀ и҆ пи́щи вре́мєнныѧ возненави́дѣлъ є҆сѝ, и҆ ѿсю́дꙋ сподо́билсѧ є҆сѝ мч҃нческомꙋ и҆ по́стническомꙋ сочта́тисѧ ли́кꙋ: съ ни́миже молѝ сп҃стѝ рабы̑ твоѧ̑. [Два́жды.]
<<р҃г: 205>>
Сла́ва, и҆ ны́нѣ, бг҃оро́диченъ:
На прⷭ҇то́лѣ херꙋві́мстѣмъ сѣдѧ́й, и҆ въ нѣ́дрѣхъ ѻ҆́ч҃ихъ водворѧ́ѧйсѧ, ꙗ҆́кѡ на прⷭ҇то́лѣ ст҃ѣ́мъ сѣди́тъ свое́мъ, влⷣчце, въ нѣ́дрѣхъ твои́хъ, вопло́щьсѧ бо бг҃ъ, и҆́стиннѡ воцр҃и́сѧ над̾ всѣ́ми ꙗ҆зы́ки, и҆ разꙋ́мнѡ ны́нѣ пое́мъ є҆мꙋ̀: є҆го́же ᲂу҆молѝ сп҃сти́сѧ рабѡ́мъ твои̑мъ.
По в҃-й каѳі́смѣ сѣда́ленъ, гла́съ и҃.
Подо́бенъ: Премꙋ́дрости:
І҆ѡа́нновы нра́вы крⷭ҇ти́телѧ и҆ и҆лїѝ ѳесві́тѧнина добродѣ́тєли посто́мъ подража́ѧ, безпло́тнѡ пожи́лъ є҆сѝ, со а҆́гг҃лы сла́вѧ ст҃ꙋ́ю трⷪ҇цꙋ бжⷭ҇твеннꙋю, и҆ бѣсѡ́вскаѧ нахождє́нїѧ побѣжда́ѧ мꙋ́жествомъ. тѣ́мъ и҆ страда́нїемъ крѣ́пкѡ подвиза́всѧ, хрⷭ҇то́вꙋ бжⷭ҇твенномꙋ воплоще́нїю кла́нѧѧсѧ съ бжⷭ҇тво́мъ, и҆́мⷬ҇къ, бл҃же́нне, є҆го́же молѝ, грѣхѡ́въ ѡ҆ставле́нїе дарова́ти, пра́зднꙋющымъ любо́вїю ст҃ꙋ́ю па́мѧть твою̀. [Два́жды.]
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ же́нахъ, тѧ̀ безсѣ́меннѡ ро́ждшꙋю бг҃а пло́тїю, всѝ ᲂу҆бл҃жа́емъ ро́ди человѣ́честїи: ѻ҆́гнь бо всели́сѧ въ тебѣ̀ бжⷭ҇тва̀, и҆ ꙗ҆́кѡ младе́нца дои́ши зижди́телѧ и҆ гдⷭ҇а. тѣ́мъ а҆́гг҃льскїй собо́ръ, и҆ человѣ́ческїй ро́дъ досто́йнѡ сла́вимъ всест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, досто́йнѡ пою́щымъ сла́вꙋ твою̀.
По Хвали́те и҆́мѧ гдⷭ҇не:
Припѣ́въ:
Оу҆бл҃жа́емъ тѧ̀ прпⷣбномч҃нче, и҆́мⷬ҇къ, и҆ чте́мъ ст҃ꙋ́ю па́мѧть твою̀, наста́вниче мона́хѡвъ, и҆ собесѣ́дниче а҆́гг҃лѡвъ.
Ѱало́мъ и҆збра́нный: Терпѧ̀ потерпѣ́хъ гдⷭ҇а:
По полѷеле́и сѣда́ленъ, гла́съ д҃.
Подо́бенъ: Ꙗ҆ви́лсѧ є҆сѝ:
Въ поще́нїи и҆скꙋ́сенъ бы́въ, во страда́нїи просїѧ́лъ є҆сѝ, и҆ просвѣти́лъ є҆сѝ вѣ̑рныѧ твои́ми пѡ́двиги бл҃же́нне, и҆́мⷬ҇къ: тѣ́мже тѧ̀ всѝ согла́снѡ велича́емъ. [Два́жды.]
<<р҃г ѡ҆б.: 206>>
Сла́ва, и҆ ны́нѣ, бг҃оро́диченъ.
Наде́ждо непосты́днаѧ надѣ́ющихсѧ на тѧ̀, є҆ди́на ро́ждшаѧ па́че є҆стества̀ пло́тїю хрⷭ҇та̀ бг҃а на́шего: того̀ со ст҃ы́ми прпⷣбномч҃нки молѝ, пода́ти вселе́ннѣй ѡ҆чище́нїе прегрѣше́нїй, и҆ всѣ̑мъ на́мъ пре́жде конца̀ житїѧ̀ и҆справле́нїе.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.
Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;
Всѧ́кое дыха́нїе:
Є҆ѵⷢ҇лїе прпⷣбномч҃нкꙋ, [пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ и҃:
И҆́же по ѡ҆́бразꙋ соблюды́й невреди́мѡ прпⷣбне ѻ҆́тче, и҆́мⷬ҇къ є҆́же по хрⷭ҇то́вѣ вѣ́рѣ, сопроти́вилсѧ є҆сѝ терпѣли́вѡ, не ᲂу҆страши́всѧ мꙋчи́тельскагѡ преще́нїѧ, но дꙋхо́внымъ мече́мъ того̀ ᲂу҆би́лъ є҆сѝ: тѣ́мъ дерзнове́нїе стѧжа́въ къ бг҃ꙋ, сп҃са́й чтꙋ́щыѧ тѧ̀ ѿ всѧ́кихъ бѣ́дъ, прпⷣбный страда́льче.
Канѡ́нъ, гла́съ ѕ҃.
Пѣ́снь а҃.
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ вопїѧ́ше.
Ѿ собла̑знъ жите́йскихъ и҆ ѿ страсте́й ѡ҆скорблѧ́ющихъ мѧ̀, ᲂу҆мирѝ ᲂу҆́мъ мо́й страда́льче прпⷣбне, и҆ въ твою̀ похвалꙋ̀ ти́хѡ па́мѧть твори́ти сподо́би мѧ̀.
Страда́льчєскїѧ вѣнцы̀ ꙗ҆́кѡ страда́лецъ прїе́мъ прпⷣбне, и҆́мⷬ҇къ, прело́женъ бы́лъ є҆сѝ ѿ землѝ къ мі́рꙋ нера́тномꙋ, и҆ къ свѣ́тꙋ и҆ животꙋ̀ и҆́стинномꙋ пребл҃же́нне.
Стрꙋѧ́ми крове́й пла́мень мꙋчи́тельскїй погаси́въ, бл҃гоче́стне мч҃нче, напои́лъ є҆сѝ дꙋ́шы вѣ́рныхъ, сотвори́въ прозѧба́ти жела́нїе живота̀ вѣ́чнагѡ прпⷣбне.
Бг҃оро́диченъ: И҆́же невмѣсти́мое сло́во во чре́вѣ твое́мъ вмѣще́но поро́ждши, бг҃овмѣсти́маѧ сѣ́нь, ᲂу҆тѣснѧ́ющїѧ мѧ̀ лю́тыѧ бꙋ́ри ѕлы́хъ свободѝ, чтⷭ҇аѧ.
<<р҃д: 207>>
Пѣ́снь г҃.
І҆рмо́съ: Нѣ́сть ст҃ъ, ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Оу҆крѣпле́нъ бы́лъ є҆сѝ си́лою бж҃їею, ѿлꙋчи́всѧ къ подвигѡ́мъ дерзнове́нїемъ пребл҃же́нне, терпѧ̀ болѣ̑зни и҆ мꙋ̑ки гони́тєльскїѧ стрⷭ҇тоте́рпче прпⷣбне ѻ҆́тче на́шъ.
Крѣ́пость даде́ ти хрⷭ҇то́съ подвигода́вецъ вели́кїй, сокрꙋши́ти пре́лесть, и҆ посрами́ти врага̀, хва́лѧщагосѧ безстꙋ́днѡ, и҆ тще́тнѡ всꙋ́е шата́ющагосѧ.
Твоѝ кра́снѣи но́зѣ ꙗ҆́вѣ прпⷣбне, ко стезѝ мꙋче́нїѧ входѧ́щыѧ свѣ́тлѡ, и҆ главы̑ ѕлочести́выхъ сламлѧ́ющыѧ, и҆́мⷬ҇къ, многострада́льне.
Бг҃оро́диченъ: Ю҆́же дре́вле ви́дѣ і҆а́кѡвъ ѿ землѝ просте́ртꙋ къ нбⷭ҇нѣй высотѣ̀, бжⷭ҇твеннꙋю лѣ́ствицꙋ ꙗ҆́вѣ, мр҃і́ю чтⷭ҇ꙋю влⷣки воспое́мъ пала́тꙋ.
Сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
Кр҃ще́нъ бы́сть трегꙋ́бѡ, тремѝ кр҃щє́нїи вѣ́рнѡ, водо́ю и҆ ѻ҆гне́мъ, и҆ бж҃їимъ дх҃омъ, пе́рвѣе слеза́ми, второ́е воздержа̑нїи мно́гими подвиза́всѧ крѣ́пкѡ, пожи́въ равноа́гг҃льскимъ житїе́мъ на землѝ бл҃же́нне, и҆́мⷬ҇къ: тре́тїе, ꙗ҆́кѡ а҆́гнецъ и҆зрѧ́денъ закла́нъ бы́лъ є҆сѝ хрⷭ҇тꙋ̀ бг҃ꙋ на́шемꙋ. того̀ молѝ непреста́ннѡ, сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ:
Оу҆диви́сѧ і҆ѡ́сифъ є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй. и҆ свидѣ́тельствꙋѧ ѡ҆брꙋ́чникъ тво́й и҆ храни́тель, сщ҃е́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃ою пребыва́етъ.
Крⷭ҇тобг҃оро́диченъ: Помышлє́нїѧ ѿ серде́цъ мно́гихъ ѿкрыва́ютсѧ: копїе́мъ стрⷭ҇те́й твои́хъ ᲂу҆ѧзвлѧ́ющи мо́й ᲂу҆́мъ, въ распѧ́тїи твое́мъ во́льномъ: ча́до, кто̀ ᲂу҆́зритъ пла́ча моегѡ̀, <<р҃д ѡ҆б.: 208>> и҆ пло́ти терза̑нїѧ, разꙋмѣ́етъ вельмѝ бг҃а тѧ̀ сꙋ́ща всеи́стинна; воспѣва́ю сло́ве, млⷭ҇рдїе твоѐ, є҆гѡ́же ра́ди терпи́ши распѧ́тїе.
Пѣ́снь д҃.
І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чтⷭ҇на́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста, ѡ҆ гдⷭ҇ѣ пра́зднꙋющи.
Зако́ннѡ пости́лсѧ є҆сѝ, зако́ннѡ пострада́лъ є҆сѝ, и҆ зако́ннѡ вѣнча́нъ бы́лъ є҆сѝ, бж҃їимъ сло́вомъ ᲂу҆крѣплѧ́емь, и҆ невре́дна себѐ соблюда́ѧ пребл҃же́нне.
Не терпѧ̀ прпⷣбне ле́сти возслѣ́довати, къ бг҃оразꙋ́мїю ꙗ҆́кѡ разꙋ́менъ ра́дꙋѧсѧ пристꙋпи́лъ є҆сѝ: свѣ́тъ мы́сленный воспрїи́мъ, свѣти́льникъ показа́лсѧ є҆сѝ.
Сщ҃еннодѣ́йствꙋемь, ꙗ҆́коже заколе́нїе во́льное ст҃о́е приведе́нъ бы́лъ є҆сѝ, и҆́мⷬ҇къ, тебѐ ра́ди пожре́нномꙋ, и҆ въ хра́мѣ пе́рвенєцъ почи́лъ є҆сѝ веселѧ́сѧ.
Бг҃оро́диченъ: Дв҃ою пребыла̀ є҆сѝ по ржⷭ҇твѣ̀, ꙗ҆́коже бѣ̀ и҆ пре́жде ржⷭ҇тва̀: ꙗ҆́кѡ бг҃а сло́ва родила̀ є҆сѝ и҆зба́вльшаго на́съ ѿ тлѝ хода́тайствомъ твои́мъ, пренепоро́чнаѧ.
Пѣ́снь є҃.
І҆рмо́съ: Бж҃їимъ свѣ́томъ твои́мъ бл҃же, ᲂу҆́треннюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Ѻ҆рꙋ́жїемъ ᲂу҆ѧзви́сѧ вра́гъ, мно́гагѡ терпѣ́нїѧ доблемꙋ́драгѡ мч҃нка: и҆ сегѡ̀ нога́ми попра́нъ бы́сть, и҆ смѣ́хъ ꙗ҆ви́сѧ, посра́мленъ бы́въ.
Ты̀ ѕло́бꙋ мꙋчи́тельскꙋю ѿри́нꙋвъ, неѕло́бивъ и҆ кро́токъ ꙗ҆́вльсѧ мч҃нче всече́стне, сконча́нїемъ твои́мъ кро́внымъ вѣнце́мъ нетлѣ́ннымъ ᲂу҆вѧ́злсѧ є҆сѝ.
Мч҃нческими вѣнча́ тѧ честьмѝ вои́стиннꙋ, и҆ по́стническими трꙋды̀, прпⷣбне, и҆́мⷬ҇къ, трꙋдополо́жникъ є҆ди́нъ бг҃ъ на́шъ, на ᲂу҆бі́йцꙋ ᲂу҆крѣпи́вый тѧ̀.
Бг҃оро́диченъ: Разꙋмѣ́въ и҆здале́ча та́йнѡ проро́ческїй бг҃озра́чный ли́къ, дв҃о бг҃оневѣ́стнаѧ, бж҃їѧ рождества̀ твоегѡ̀ глꙋбинꙋ̀ неизрече́ннꙋю, ѡ҆́бразы сщ҃е́нными тѧ̀ прозна́мена.
<<р҃є: 209>>
Пѣ́снь ѕ҃.
І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ вопїю́ ти: возведѝ ѿ тлѝ живо́тъ мо́й многомлⷭ҇тиве.
Всѣ́лъ є҆сѝ на вода́хъ, ѡ҆кормлѧ́емь рꙋко́ю живонача́льною ѻ҆́тче на́шъ, и҆ сохране́нъ бы́лъ є҆сѝ, въ ни́хже погрꙋзи́шасѧ гони́тєльскаѧ велѣ̑нїѧ, мл҃твою прилѣ́жною сщ҃е́нне.
Ма́лыми и҆змѣнѧ́ѧ вели̑каѧ, себѐ мꙋ́камъ пре́далъ є҆сѝ прпⷣбне: прельсти́телѧ ѕмі́ѧ є҆́ѵина, дх҃омъ ᲂу҆мертви́лъ є҆сѝ бг҃оѧвле́нне.
Глагѡ́лъ твои́хъ си́лы, ѕло́бы ѡ҆брѣта́тель претерпѣ́ти не возмо́же: тѣ́мъ ᲂу҆́замъ тѧ̀, и҆́мⷬ҇къ, и҆ ра́намъ, сме́рти же лю́тѣй, сꙋро́вѡ льсте́цъ пре́далъ є҆́сть.
Бг҃оро́диченъ: Сѐ ны́нѣ и҆з̾ крове́й твои́хъ чтⷭ҇ыхъ дв҃о мт҃и, воплоти́сѧ гдⷭ҇ь, и҆ человѣ́кѡмъ приединѧ́етсѧ кромѣ̀ ѻ҆бы́чаѧ, за неизрече́ннꙋю млⷭ҇ть, на́ше сп҃се́нїе содѣва́ѧ.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃.
Подо́бенъ: Твє́рдыѧ:
Ꙗ҆́кѡ по́стника бл҃гоче́стна, и҆ и҆скꙋ́сна, и҆ страда́льца произволе́нїемъ че́стна, и҆ пꙋсты́ни жи́телѧ соѡбра́зна, въ пѣ́снехъ досто́йнѡ восхва́лимъ, и҆́мⷬ҇къ, приснохва́льнаго: то́й во ѕмі́ѧ попра́лъ є҆́сть.
І҆́косъ: Стрⷭ҇те́мъ гдⷭ҇нимъ поревнова́въ пребл҃же́нне, за того̀ ᲂу҆мре́ти возжелѣ́лъ є҆сѝ, ле́сть і҆́дѡльскагѡ сꙋ́етства разори́лъ є҆сѝ, мꙋ́жески подви́гсѧ проти́вꙋ врагѡ́въ, тѣ́хъ ѕлохи́трствєннаѧ ловлє́нїѧ и҆ кѡ́зни низложи́лъ є҆сѝ, и҆ вѣне́цъ по́чести прїѧ́лъ є҆сѝ, и҆́мⷬ҇къ, прпⷣбне страда́льче. тѣ́мъ вѣ́рою прибѣга́емъ въ тво́й кро́въ, и҆ зове́мъ тѝ: ѿ вра̑гъ ви́димыхъ и҆ неви́димыхъ и҆зба́ви на́съ, ты́ бо ѕмі́ѧ попра́лъ є҆сѝ.
Пѣ́снь з҃.
І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.
<<р҃є ѡ҆б.: 210>>
Ми́лованїѧ є҆́же къ пло́ти ѿлꙋчи́въ ᲂу҆́мъ тво́й бл҃же́нне, ѡ҆палѧ́емь ѻ҆гне́мъ и҆ сожига́емь мꙋ́дре, ѻ҆́троческꙋю воспѣва́ѧ пѣ́снь: бл҃гослове́нъ бг҃ъ ѻ҆тє́цъ на́шихъ.
Ѿгони́ми быва́ютъ є҆ди́нымъ призыва́нїемъ твои́мъ, лꙋка́вїи дꙋ́си, позна́вшїи тѧ̀ по́стника и҆ мч҃нка хрⷭ҇то́ва, прпⷣбне, пою́ща те́плѣ: бл҃гослове́нъ бг҃ъ ѻ҆тє́цъ на́шихъ.
Возвѣще́нъ тѝ бы́сть коне́цъ пребл҃же́нне, и҆́мⷬ҇къ, вседѣ́тельною во́лею: тѣ́мъ вда́лсѧ є҆сѝ бо́льшемꙋ поще́нїю, и҆ ѿ сла́вы въ сла́вꙋ прехо́диши, ᲂу҆бїе́нъ бы́лъ є҆сѝ хрⷭ҇та̀ ра́ди над̾ всѣ́ми бг҃а.
Бг҃оро́диченъ: Оу҆ны́нїемъ мѧ̀ ѡ҆держи́ма, воздви́гни пречⷭ҇таѧ, къ дѣ́ланїю бж҃їихъ дѣ́лъ, ᲂу҆крѣплѧ́ющи мѧ̀ на врагѝ, при́снѡ борю́щыѧ мѧ̀ лю́тѣ, и҆ проти́вными по́мыслы прельща́ема.
Пѣ́снь и҃.
І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.
По́стническими добро́тами ᲂу҆краша́емь, и҆ ра́нными болѣ́зньми ᲂу҆томлѧ́емь, побѣдотво́рцꙋ показа́лсѧ є҆сѝ пресла́вне, побѣ́дныѧ по́чєсти ѿ негѡ̀ прїи́мъ.
Воспали́всѧ любо́вїю вседержи́телевою, и҆́мⷬ҇къ, пресла́вне, вра́жїю возвы́шеннꙋю вы́ю низложи́лъ є҆сѝ: и҆ къ бг҃ꙋ жела́нїемъ твои́мъ, прїѧ́лъ є҆сѝ того̀ въ тебѣ̀ живꙋ́ща во вѣ́ки.
Млⷭ҇ти бж҃їѧ мч҃нче бг҃обл҃же́нне, сподо́би мѧ̀, и҆ и҆скꙋше́нїй и҆ бѣ́дъ и҆зба́ви, чтꙋ́щаго тѧ̀, и҆́мⷬ҇къ, прпⷣбне, и҆ под̾ кро́въ тво́й прибѣга́ющаго.
Бг҃оро́диченъ: Ра́дꙋйсѧ, ст҃а́ѧ горо̀, и҆ бг҃опрохо́днаѧ, ра́дꙋйсѧ, сщ҃е́нныхъ та̑инъ ꙗ҆вле́нїе, и҆ слы́шанїе стра́шное, и҆ неꙋдо́бь ви́димое зрѣ́нїе: ра́дꙋйсѧ дв҃о, па́дшихъ возведе́нїе.
Пѣ́снь ѳ҃.
І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.
<<р҃ѕ: 211>>
Ты̀ къ послѣ́дней красотѣ̀ и҆ сла́дости приспѣ́лъ є҆сѝ, бг҃омꙋ́дре ѻ҆́тче на́шъ, и҆́мⷬ҇къ, и҆ бли́зъ бг҃а бы́лъ є҆сѝ, поѧ̀ со безпло́тными: ст҃ъ, ст҃ъ, ст҃ъ є҆сѝ трⷪ҇це вседѣ́тельнаѧ, и҆ всеси́льнаѧ.
И҆збы́въ ѿ сѣте́й ловѧ́щихъ тѧ̀, въ добро́тѣ нбⷭ҇нѣй почи́лъ є҆сѝ прпⷣбне, и҆́мⷬ҇къ, и҆ съ мч҃нческими совокꙋпи́лсѧ є҆сѝ вѡ́и: со безпло́тными ны́нѣ моли́сѧ ѡ҆ всѣ́хъ на́съ, ꙗ҆́кѡ да тѧ̀ ᲂу҆бл҃жа́емъ.
Крѣ́пость и҆ держа́вꙋ хрⷭ҇та̀ положи́въ, ѕлꙋ́ю бѣсѡ́въ прогони́лъ є҆сѝ молвꙋ̀, и҆ въ вы̑шнѧѧ приста̑нища приста́лъ є҆сѝ, ᲂу҆кра́шенъ ве́сь, бжⷭ҇твенными свѣтоли̑тїи бога́тнѡ ѡ҆блиста́емь.
Бг҃оро́диченъ: Разꙋмѣ́ти чꙋ́до непостижи́мое ржⷭ҇тва̀ твоегѡ̀ мт҃и дв҃о, не могꙋ́ще, молча́нїемъ сїѐ па́че сла́вѧще, тебѐ славосло́вимъ пребл҃же́ннꙋю, и҆ є҆ди́нꙋ до́брꙋю въ жена́хъ, и҆ пренепоро́чнꙋю.
Свѣти́ленъ.
Подо́бенъ: Жєны̀ ᲂу҆слы́шите:
Страда́нїемъ пе́рвое до́брѣ и҆скꙋси́всѧ, второ́е же посто́мъ тече́нїе бжⷭ҇твенное соверши́въ, на нб҃са̀ возше́лъ є҆сѝ, хрⷭ҇тꙋ̀ предстои́ши, и҆́мⷬ҇къ, ѻ҆́тче прпⷣбне, за на́съ моли́сѧ те́плѣ пою́щихъ тѧ̀.
Бг҃оро́диченъ: Ра́дость неизрече́ннꙋю ро́ждши гдⷭ҇а, ра́дости на́съ нбⷭ҇ныѧ прича́стники сотворѝ, всѣ́хъ тебѐ почита́ющихъ пречⷭ҇таѧ, бл҃года́ть и҆́стиннꙋ, ѿ дꙋшѝ вопїю́щихъ тѝ: не забꙋ́ди твоѧ̑ рабы̑ бл҃гослове́ннаѧ мр҃і́е.
На хвали́техъ стїхи̑ры, гла́съ ѕ҃.
Мч҃нческими кровьмѝ сщ҃е́ннꙋю ри́зꙋ ѡ҆червлени́въ прпⷣбне, вше́лъ є҆сѝ во ст҃а̑ѧ ст҃ы́хъ досто́йнѡ сла́вне, и҆дѣ́же свѣ́тъ неизрече́нный, и҆дѣ́же бжⷭ҇твеннаѧ сла́ва, и҆дѣ́же гла́съ пра́зднꙋющихъ: ѿ негѡ́же трꙋдѡ́въ твои́хъ мч҃нчєскїѧ воспрїѧ́лъ є҆сѝ побѣ̑ды, и҆ вѣне́цъ неꙋвѧда́ющїй, и҆ вѣ́чнꙋющꙋю до́брꙋю сла́вꙋ, и҆ ра́йское житїѐ, и҆́мⷬ҇къ, премꙋ́дре. со дерзнове́нїемъ моли́сѧ ѡ҆ дꙋша́хъ на́шихъ. [Два́жды.]
<<р҃ѕ ѡ҆б.: 212>>
Мꙋче́нїй треволнє́нїѧ не поколеба́ша твоеѧ̀ дꙋшѝ, ни затворе́нїе долготы̀ во мра́чнѣй темни́цѣ, тѧ̀ сокрыва́ющее страда́льче сла́вне: но ꙗ҆́кѡ свѣ́тъ возсїѧ́лъ є҆сѝ во тьмѣ̀ бѣ́дствꙋющымъ сꙋ́етїѧ, и҆̀хже сы́ны днѐ показа́лъ є҆сѝ ба́нею кр҃ще́нїѧ, порожде́нїемъ бо́льшимъ и҆ сп҃си́тельнымъ, и҆ бж҃е́ственнымъ пребыва́нїемъ, ꙗ҆́кѡ страда́лецъ бг҃опрїѧ́тенъ премꙋ́дре, и҆́мⷬ҇къ.
Кто̀ досто́йнѡ добродѣ́телей твои́хъ и҆сповѣ́сть побѣ̑ды; ка̑ѧ ᲂу҆ста̀ мꙋчє́нїѧ и҆ терпѣ̑нїѧ и҆зрекꙋ́тъ; во ѻ҆бои́хъ бо бл҃гоꙋгоди́лъ є҆сѝ хрⷭ҇тꙋ̀, и҆́мⷬ҇къ: и҆ ны́нѣ не преста́й молѧ́сѧ ᲂу҆го́дниче, сп҃стѝ дꙋ́шы на́шѧ, ꙗ҆́кѡ и҆мѣ́ѧ прпⷣбномч҃нче, дерзнове́нїе мно́гое.
Сла́ва, гла́съ в҃.
Прїиди́те пѣ́сньми вѣнча́емъ страда́льца хрⷭ҇то́ва, ꙗ҆́кѡ крі́нъ се́льный, и҆ раѧ̀ бжⷭ҇твеннагѡ бл҃гора́сленный цвѣ́тъ: правосла́вныхъ ѻ҆вча̀, чистоты̀ добро́та, вѣ́ры ᲂу҆твержде́нїе, сла́ва воздержа́нїѧ, ꙗ҆ви́сѧ ꙗ҆́вственнѡ мі́рови: тѣ́мже вѣне́цъ прїѧ́тъ црⷭ҇твїѧ непремѣ́ненъ.
И҆ ны́нѣ, бг҃оро́диченъ:
Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.
Крⷭ҇тобг҃оро́диченъ: Гро́здъ всезрѣ́лый чтⷭ҇аѧ, є҆го́же невоздѣ́ланнѡ во ᲂу҆тро́бѣ младоноси́ла є҆сѝ, на дре́вѣ ꙗ҆́кѡ ᲂу҆зрѣ́ла є҆сѝ сего̀ ви́сѧща, рыда́ющи восклица́ла є҆сѝ, взыва́ющи: ча́до, сла́дость и҆ска́пай, є҆́юже пїѧ́нство всѧ́кое страсте́й ѿе́млетсѧ, бл҃годѣ́телю, менѐ ра́ди тебѐ ро́ждшїѧ, бж҃е́ственными ᲂу҆тѣше́ньми, ꙗ҆́кѡ бл҃гоꙋтро́бенъ.
А҆́ще и҆́мать Сла́вꙋ на стїхо́внѣ, глаго́ли,
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.