Слꙋ́жба ст҃и́телю
<<н҃з ѡ҆б.: 114>>
[глⷡ҇а і҃] СЛꙊ́ЖБА Ѻ҆́БЩА
ст҃и́телю є҆ди́номꙋ,
Ве́черъ,
на Гдⷭ҇и воззва́хъ стїхи̑ры, гла́съ ѕ҃.
Подо́бенъ: Всю̀ ѿложи́вше:
Ве́сь ѡ҆сщ҃е́нъ бг҃оно́сецъ показа́сѧ, ꙳ пома́занїе бж҃їе ст҃о́е, ꙳ ст҃ы́мъ дх҃омъ ѡ҆бложе́нъ: ꙳ и҆ свѣ́тлѡ входѧ̀ вы́нꙋ ꙳ во ст҃а̑ѧ ст҃ы́хъ, ꙳ бг҃онача́льными свѣтлостьмѝ ѡ҆зарѧ́емь, ꙳ бл҃года́ти причаща́ѧсѧ ꙳ ст҃ы́хъ та̑инъ, ꙳ ꙗ҆́кѡ и҆́стинный ст҃и́тель пресла́венъ, ꙳ со дерзнове́нїемъ молѧ́сѧ ꙳ ѡ҆ дꙋша́хъ на́шихъ.
Просвѣти́сѧ житїѐ твоѐ ꙳ добродѣ́тельными свѣтлостьмѝ, ꙳ вѣ̑рныѧ просвѣти́лъ є҆сѝ, ꙳ и҆ ле́сти тьмꙋ̀ разгна́лъ є҆сѝ, ꙳ и҆́стинное бо ꙗ҆ви́лсѧ є҆сѝ свѣтоза́рное со́лнце, ꙳ ст҃и́телю пребл҃же́нне и҆́мⷬ҇къ, ꙳ и҆ ны́нѣ, всели́лсѧ є҆сѝ, ꙳ и҆дѣ́же сїѧ́етъ свѣ́тъ невече́рнїй, ꙳ и҆ сы́нъ днѐ бл҃года́тїю дх҃а ст҃а́гѡ бы́въ. ꙳ тѣ́мже твою̀ бж҃е́ственнꙋю па́мѧть и҆ свѣтоно́снꙋю ꙳ че́стнѡ соверша́юще приснопа́мѧтне, ꙳ любо́вїю почита́емъ.
Оу҆́мъ тво́й манове́нїемъ є҆́же къ бг҃ꙋ, ꙳ бг҃омꙋ́дре, вѣ́рою ᲂу҆добрѧ́емь, ꙳ свѣ́телъ ꙗ҆ви́сѧ всесла́вне, ꙳ въ ме́ртвеннѣмъ тѣ́лѣ и҆ тлѣ́ннѣмъ, ꙳ премꙋ́дре нетлѣ́нїю поꙋчи́всѧ, ꙳ притѧжа́лъ є҆сѝ безпло́тныхъ свѣ́тлѡсти, ꙳ и҆ страсте́й внѣ̀ бы́въ, ꙳ безстра́стїемъ ᲂу҆краша́ѧсѧ, ꙳ и҆́мⷬ҇къ, ѻ҆́тче ст҃и́телю премꙋ́дре, ꙳ свѣ́тлый свѣти́льниче, ꙳ и҆ мл҃твенниче ѡ҆ чтꙋ́щихъ ꙳ любо́вїю па́мѧть твою̀.
Сла́ва, и҆ ны́нѣ, бг҃оро́диченъ:
Ра́дꙋйсѧ, зако́на и҆сполне́нїе. ра́дꙋйсѧ, хра́ме ст҃ы́ѧ трⷪ҇цы, невѣ́сто нетлѣ́ннаѧ. ра́дꙋйсѧ, бж҃е́ственное носи́ло всѣ́хъ цр҃ѧ̀. <<н҃и: 115>> ра́дꙋйсѧ, ѻ҆гню̀ невеще́ственный, ꙗ҆́кѡ клеща̀ носѧ́щи на рꙋка́хъ твои́хъ ᲂу҆́глѧ: но́вый раю̀: вертогра́дъ затворе́нный: трапе́за бжⷭ҇твеннаѧ пресвѣ́тлаѧ: голꙋби́це нескве́рнаѧ: прⷭ҇то́ле вы́шнѧгѡ: ѻ҆́дръ бжⷭ҇твенный мы́сленный, ю҆́же дх҃ъ ст҃ы́й ѻ҆трокови́це ѡ҆сѣнѝ.
Крⷭ҇тобг҃оро́диченъ: А҆́гнца своего̀, ꙳ а҆́гница нескве́рнаѧ дре́вле, и҆ непоро́чнаѧ влⷣчца, ꙳ на крⷭ҇тъ воздвиза́ема ꙗ҆́кѡ ви́дѣ, ꙳ ма́терски восклица́ше, ꙳ и҆ ᲂу҆дивлѧ́ющисѧ вопїѧ́ше: ꙳ ча́до сла́дкое, ꙳ что̀ видѣ́нїе сїѐ но́вое и҆ пресла́вное, ꙳ ка́кѡ лю́дїе небл҃года́тнїи ꙳ сꙋди́щꙋ пїла́товꙋ предаю́тъ тѧ̀, ꙳ и҆ ѡ҆сꙋжда́ютъ сме́ртїю живота̀ всѣ́хъ: ꙳ но пою̀ твоѐ неизрече́нное сло́ве, схожде́нїе.
А҆́ще и҆́мать самогла́сенъ.
Сла́ва, гла́съ и҃:
До́блестей твои́хъ, прпⷣбне ѻ҆́тче, пло́дъ просвѣти́лъ є҆́сть вѣ́рныхъ сердца̀: кто́ бо слы́ша безмѣ́рное твоѐ смире́нїе, терпѣ́нїю не ᲂу҆диви́сѧ, є҆́же къ ни́щымъ ти́хости, къ скорбѧ́щымъ ᲂу҆тѣше́нїю, всѧ̑ бг҃олѣ́пнѡ наꙋчи́лъ є҆сѝ ст҃и́телю, и҆́мⷬ҇къ, и҆ ны́нѣ неꙋвѧда́емымъ вѣнце́мъ ᲂу҆вѧ́злсѧ є҆сѝ: моли́сѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ:
Кро́въ тво́й бцⷣе дв҃о, врачевство̀ є҆́сть дꙋхо́вное: во́нь бо прибѣга́юще, ѿ дꙋше́вныхъ недꙋ̑гъ и҆збавлѧ́емсѧ.
Крⷭ҇тобг҃оро́диченъ:
Подо́бенъ: Ѽ пресла́внагѡ чꙋдесѐ:
Не терплю̀ ча́до, ви́дѧщи тѧ̀, ꙳ на дре́вѣ ᲂу҆снꙋ́вша, ꙳ бо́дрость всѣ̑мъ подаю́щаго: ꙳ ꙗ҆́кѡ да и҆́же дре́вле престꙋпле́нїѧ плодо́мъ, ꙳ сно́мъ поги́бельнымъ ᲂу҆снꙋ́вшымъ, ꙳ бжⷭ҇твеннꙋю и҆ сп҃си́тельнꙋю бо́дрость пода́си, ꙳ дв҃а глаго́лаше пла́чꙋщи: ꙳ ю҆́же велича́емъ.
А҆́ще ли пра́зднꙋеши съ полѷеле́емъ, глаго́ли бг҃оро́диченъ: воскрⷭ҇ный: Цр҃ь нбⷭ҇ный: [пи́санъ въ концѣ̀ кни́ги сеѧ̀.]
Вхо́дъ. Прокі́менъ днѐ.
<<н҃и ѡ҆б.: 116>>
Чтє́нїѧ г҃ ст҃и́тєльскаѧ, [пи̑сана въ концѣ̀ кни́ги сеѧ̀].
На стїхо́внѣ стїхи̑ры, гла́съ и҃:
Ст҃и́телю, и҆́мⷬ҇къ, разꙋ́мнагѡ свѣ́та зарѐ, цр҃ко́вное свѣти́ло, ст҃и́тельскаѧ красото̀, и҆́ноческагѡ по́стнагѡ житїѧ̀ и҆́стовое пра́вило: на́мъ же застꙋ́пникъ ꙗ҆ви́лсѧ є҆сѝ, свобожда́ѧ ѿ гꙋби́телѧ врага̀ дꙋ́шы на́шѧ.
Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.
Ст҃и́телю, и҆́мⷬ҇къ, вели́кꙋю вла́сть ѿ бг҃а прїѧ́лъ є҆сѝ, мно́жество лꙋка́выхъ бѣсѡ́въ мл҃твою твое́ю ѿгна́лъ є҆сѝ, и҆ си́хъ ѡ҆ѕлоблє́нїѧ ѿ всѣ́хъ вѣ́рою къ тебѣ̀ притека́ющихъ.
Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздадѐ мѝ.
Ст҃и́телѧ вели́каго, и҆́мⷬ҇къ, ка́кѡ досто́йнѡ воспое́мъ, честна́го ᲂу҆ма̀, бг҃оза́рнаго свѣ́та, ѡ҆свѣща́ющаго на́съ, и҆ бж҃е́ственный ра́зꙋмъ подаю́щаго, та̑инъ глꙋби́нныхъ и҆сповѣ́дателѧ; согла́снѡ всѝ рце́мъ: ра́дꙋйсѧ ѻ҆́тче ѻ҆тцє́въ, и҆́мⷬ҇къ.
Сла́ва, гла́съ и҃:
Ты̀ є҆сѝ па́стырь до́брый и҆ ᲂу҆чи́тель те́плый, ст҃и́телю, и҆́мⷬ҇къ, тѧ̀ всегда̀ похвалѧ́юще вопїе́мъ: тобо́ю бг҃ъ ᲂу҆красѝ цр҃ковь свою̀, и҆ тѣ́ло твоѐ многолѣ́тнѡ покрове́нное въ землѝ, нетлѣ́нно ꙗ҆вѝ лю́демъ свои̑мъ. тѣ́мже не преста́й молѧ́сѧ ѡ҆ хва́лѧщихъ тѧ̀, и҆ чтꙋ́щихъ па́мѧть твою̀, просѝ ѡ҆ставле́нїе грѣхѡ́въ, и҆ сп҃се́нїѧ дꙋша́мъ на́шымъ.
И҆ ны́нѣ, бг҃оро́диченъ: воскрⷭ҇ный: Безневѣ́стнаѧ дв҃о:
А҆́ще ли не пра́зднꙋеши, глаго́ли се́й бг҃оро́диченъ:
Влⷣчце прїимѝ мл҃твꙋ ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Крⷭ҇тобг҃оро́диченъ: Тѧ̀ ви́дѧщи пригвожда́ема на крⷭ҇тѣ̀ і҆и҃се, и҆ стрⷭ҇ти прїе́млюща во́лею дв҃а и҆ мт҃и твоѧ̀, влⷣко, ᲂу҆вы̀ мнѣ̀, вопїѧ́ше, ча́до сла́дкое, ра̑ны непра́веднѡ ка́кѡ терпи́ши; врачꙋ̀, и҆сцѣли́вый человѣ́ческое неможе́нїе, и҆ ѿ тлѝ всѧ̑ и҆зба́вивый бл҃гоꙋтро́бїемъ твои́мъ.
<<н҃ѳ: 117>>
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ д҃:
Пра́вило вѣ́ры, и҆ ѡ҆́бразъ кро́тости, воздержа́нїѧ ᲂу҆чи́телѧ ꙗ҆вѝ тѧ̀ ста́дꙋ твоемꙋ̀, ꙗ҆́же веще́й и҆́стина: сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ. ѻ҆́тче сщ҃еннонача́льниче, и҆́мⷬ҇къ, молѝ хрⷭ҇та̀ бг҃а сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ.
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ, сѣда́ленъ, гла́съ а҃.
Подо́бенъ: Гро́бъ тво́й:
Слꙋжи́тель бы́въ хрⷭ҇тꙋ̀ всѧ́ческихъ влⷣцѣ, наꙋчи́лъ є҆сѝ лю́ди, и҆ просвѣти́лъ є҆сѝ бж҃е́ственнымъ кр҃ще́нїемъ, къ разꙋмѣ́нїю сегѡ̀ наста́вль ст҃и́телю: тѣ́мже проповѣ́дника тѧ̀ и҆́стины всѝ и҆менꙋ́емъ, ст҃и́телѧ и҆ ᲂу҆го́дника хрⷭ҇то́ва. [Два́жды.]
Сла́ва, и҆ ны́нѣ, бг҃оро́диченъ:
Безневѣ́стнаѧ чтⷭ҇аѧ бцⷣе дв҃о, є҆ди́на предста́тельнице вѣ́рныхъ и҆ покро́въ: бѣ́дъ и҆ скорбе́й, и҆ лю́тыхъ ѡ҆бстоѧ́нїй всѣ́хъ и҆зба́ви на тѧ̀ ᲂу҆пова́нїе и҆мꙋ́щихъ ѻ҆трокови́це, и҆ дꙋ́шы на́шѧ сп҃сѝ бж҃е́ственными мольба́ми твои́ми.
По в҃-й каѳі́смѣ сѣда́ленъ, гла́съ д҃:
Ѿ ю҆́ности взе́мъ крⷭ҇тъ тво́й, бл҃гочести́внѡ хрⷭ҇тꙋ̀ послѣ́довалъ є҆сѝ, ᲂу҆вѧди́въ плотско́е мꙋдрова́нїе воздержа́нїемъ: тѣ́мже на ст҃и́тельстѣмъ сѣда́лищи сѣ́дъ ст҃и́телю, возвели́чилъ є҆сѝ влⷣкꙋ, и҆ тогѡ̀ пречтⷭ҇ꙋю мт҃рь, разли́чными дарова̑нїи твою̀ ᲂу҆краси́вша ра́кꙋ, и҆́мⷬ҇къ, бг҃обл҃же́нне. [Два́жды.]
Сла́ва, и҆ ны́нѣ, бг҃оро́диченъ:
Дв҃о всенепоро́чнаѧ, пресꙋ́щнаго бг҃а ро́ждшаѧ, со ст҃и́телемъ того̀ непреста́ннѡ молѝ, ѡ҆ставле́нїе прегрѣше́нїй и҆ и҆справле́нїе <<н҃ѳ ѡ҆б.: 118>> житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.
По Хвали́те и҆́мѧ гдⷭ҇не:
Припѣ́въ: Велича́емъ тѧ̀ ст҃и́телю ѻ҆́тче, и҆́мⷬ҇къ, и҆ чте́мъ ст҃ꙋ́ю па́мѧть твою̀: ты́ бо мо́лиши за на́съ хрⷭ҇та̀ бг҃а на́шего.
Ѱало́мъ и҆збра́нный: Оу҆слы́шите сїѧ̑ всѝ ꙗ҆зы́цы:
По полѷеле́и сѣда́ленъ, гла́съ и҃.
Подо́бенъ: Премꙋ́дрости:
Над̾ страстьмѝ ца́рствовавъ плотски́ми, ст҃и́тель ꙗ҆ви́лсѧ є҆сѝ бг҃оподо́бенъ, и҆ па́ствꙋ твою̀ пресла́внѡ ᲂу҆па́слъ є҆сѝ прпⷣбне: кр҃ще́нїемъ же просвѣти́лъ є҆сѝ, и҆ наказа́лъ є҆сѝ сла́вити є҆ди́наго бг҃а въ трїе́хъ ѵ҆поста́сехъ: тѣ́мже и҆сточа́еши и҆сцѣлє́нїѧ и҆ по кончи́нѣ, вѣ́рою приходѧ́щымъ ко ст҃ѣ́й бж҃їей цр҃кви, и҆ къ ра́цѣ моще́й твои́хъ, ст҃и́телю, и҆́мⷬ҇къ, молѝ хрⷭ҇та̀ бг҃а, согрѣше́нїй ѡ҆ставле́нїе пода́ти чтꙋ́щымъ любо́вїю ст҃ꙋ́ю па́мѧть твою̀. [Два́жды.]
Сла́ва, и҆ ны́нѣ, бг҃оро́диченъ:
Нбⷭ҇нꙋю две́рь и҆ ковче́гъ, всест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵино свобожде́нїе, вселе́нныѧ всеѧ̀ вели́кое сокро́вище, ꙗ҆́кѡ сп҃се́нїе въ не́мъ содѣ́ласѧ мі́рꙋ, и҆ ѡ҆ставле́нїе дре́внихъ согрѣше́нїй. тѣ́мже и҆ вопїе́мъ є҆́й: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти бл҃гоче́стнѡ покланѧ́ющымсѧ прест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.
Сті́хъ: Оу҆ста̀ првⷣнагѡ поꙋча́тсѧ премꙋ́дрости:
Всѧ́кое дыха́нїе:
Є҆ѵⷢ҇лїе, ст҃и́тельское, [пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ ѕ҃:
Наслѣ́дниче бж҃їй, соприча́стниче хрⷭ҇то́въ, слꙋжи́телю гдⷭ҇нь, ст҃е, и҆́мⷬ҇къ, по и҆́мени твоемꙋ̀ та́кѡ и҆ житїѐ твоѐ: просїѧ́ <<ѯ҃: 119>> бо сѣди́нѣ ра́зꙋмъ, свидѣ́тельствоваше свѣ́тлость лица̀ твоегѡ̀ дꙋше́вное неѕло́бїе, и҆звѣ́ствоваше кро́тость, сло́ва молчали́вое. жи́знь твоѧ̀ сла́вна, и҆ ᲂу҆спе́нїе со ст҃ы́ми: молѝ ѡ҆ дꙋша́хъ на́шихъ.
Канѡ́нъ, гла́съ ѕ҃.
Пѣ́снь а҃.
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми гони́телѧ фараѡ́на, ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Съ вы́шними ли́ки ꙗ҆́кѡ ст҃и́тель, ꙗ҆́кѡ бж҃їй слꙋжи́тель предстоѧ̀, ѡ҆ на́съ прилѣ́жнѡ моли́сѧ, полꙋчи́ти на́мъ вѣ̑чнаѧ бл҃га̑ѧ мл҃твами твои́ми.
И҆збра́нъ бы́въ гдⷭ҇ви слꙋжи́ти честно́мꙋ є҆ѵⷢ҇лїю, бл҃же́нне, и҆́мⷬ҇къ, во бл҃горазꙋ́мїи лю́ди, ᲂу҆чє́нїи премꙋ́дрыми ѻ҆́тче, возрасти́лъ є҆сѝ.
Ра́зꙋмомъ бж҃їимъ ѡ҆бога́щьсѧ, сло́во живо́тное ѿ се́рдца и҆сточи́лъ є҆сѝ, напоѧ́ѧ дꙋ́шы ѡ҆лѧдѣ́вшыѧ страстьмѝ, премꙋ́дре ст҃и́телю бж҃їй, и҆́мⷬ҇къ, бг҃обл҃же́нне.
Бг҃оро́диченъ: Сщ҃е́нный ли́къ прⷪ҇ро́ческїй проѧвлѧ́ше и҆здале́ча хотѧ́щꙋю тѧ̀ бы́ти бж҃їю и҆́стиннꙋю роди́тельницꙋ чтⷭ҇аѧ, вы́шшꙋю херꙋві̑мъ и҆ всеѧ̀ тва́ри.
Пѣ́снь г҃.
І҆рмо́съ: Нѣ́сть ст҃ъ, ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
И҆ска́паѧ бж҃е́ственнꙋю сла́дость и҆з̾ ᲂу҆сте́нъ твои́хъ ѻ҆́тче, и҆ го́рькагѡ безбо́жїѧ и҆зсꙋши́лъ є҆сѝ ка̑пли, напои́въ бл҃гочести́выхъ питїе́мъ бж҃їѧгѡ ра́зꙋма бл҃же́нне.
Бж҃їимъ сꙋдо́мъ произбра́нъ бы́въ, ст҃и́тель показа́лсѧ є҆сѝ, безкрѡ́вны жє́ртвы бг҃ꙋ приносѧ̀, поже́ршемꙋсѧ на́съ ра́ди, ѻ҆́тче ст҃и́телю, и҆́мⷬ҇къ.
Гро́бъ, и҆дѣ́же лежи́тъ чтⷭ҇но́е тѣ́ло твоѐ, бл҃гово́нїе и҆сточа́етъ ꙗ҆́кѡ ра́й бж҃їй, ѡ҆бл҃гоꙋха́ѧ вѣ̑рныѧ, ст҃и́телю пресла́вне и҆ всече́стне, и҆́мⷬ҇къ.
<<ѯ҃ ѡ҆б.: 120>>
Бг҃оро́диченъ: Разꙋмѣ́ти ржⷭ҇тва̀ твоегѡ̀ чⷭ҇таѧ, неизрече́нныѧ глꙋбины̀ недоꙋмѣ́етъ ᲂу҆́мъ человѣ́чь: бг҃ъ бо себѐ смири́въ щедро́тъ ра́ди, во чре́вѣ твое́мъ всего́ мѧ ѡ҆бновѝ.
Сѣда́ленъ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
Правовѣ́рнѡ, прпⷣбне, цр҃ковь хрⷭ҇то́вꙋ ᲂу҆па́слъ є҆сѝ, и҆ є҆реті́чєскїѧ ѿгна́лъ є҆сѝ гѡ́рькїѧ пле́велы, въ вы́шнихъ водворѧ́ешисѧ бл҃же́нне.
Сла́ва, и҆ ны́нѣ, бг҃оро́диченъ:
Сло́во ѻ҆́ч҃ее хрⷭ҇та̀ бг҃а на́шегѡ, ѿ тебѐ воплоти́вшагосѧ позна́хомъ бцⷣе дв҃о, є҆ди́на чⷭ҇таѧ, є҆ди́на бл҃гослове́ннаѧ: тѣ́мъ непреста́ннѡ тѧ̀ воспѣва́юще велича́емъ.
Крⷭ҇тобг҃оро́диченъ: На дре́вѣ ви́дѧщи воздви́жена сн҃а твоего̀ пречтⷭ҇аѧ, ᲂу҆тро́бою ма́тернею растерза́ема, жа́лостнѡ вопїѧ́ла є҆сѝ: ᲂу҆вы̀ мнѣ̀! ка́кѡ заше́лъ є҆сѝ свѣ́те мо́й безлѣ́тный;
Пѣ́снь д҃.
І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чтⷭ҇на́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста, ѡ҆ гдⷭ҇ѣ пра́зднꙋющи.
Ты̀ и҆спо́лненъ ст҃а́гѡ дх҃а сщ҃е́нный ѻ҆́тче, и҆́мⷬ҇къ, лꙋка̑выѧ дꙋ́хи ѿ человѣ̑къ ѿгна́лъ є҆сѝ, вѣ́рны же дꙋхо́вными ᲂу҆чє́нїи твои́ми сотвори́лъ є҆сѝ.
Є҆ди́ницꙋ несозда́ннꙋю бл҃госло́вилъ є҆сѝ, тре́ми ли́цы раздѣлѧ́емꙋ, непресѣко́мꙋ и҆ несмѣ́снꙋ, просвѣща́ѧ бл҃гочєсти́выѧ сщ҃е́нными бг҃ослѡ́вїи твои́ми.
Оу҆мертви́въ пе́рвѣе плотска̑ѧ мꙋдрова̑нїѧ воздержа́нїемъ и҆ трꙋды̀, ст҃и́тель бж҃е́ственъ показа́лсѧ є҆сѝ, и҆ предста́тель трⷪ҇цѣ всесщ҃е́нъ.
Бг҃оро́диченъ: Клѧ́тва разори́сѧ пра́бабнѧѧ тобо́ю бг҃ома́ти: ты́ бо на́мъ пречⷭ҇таѧ, и҆сто́чника породила̀ є҆сѝ, ст҃ы́ни присносꙋ́щнаго живота̀.
<<ѯ҃а: 121>>
Пѣ́снь є҃.
І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Бж҃їѧ бжⷭ҇твеннѣ соверша́ѧ, и҆ чистѣ́йшимъ по́мысломъ чи̑стымъ прикаса́ѧсѧ, непоро́ченъ ꙗ҆ви́лсѧ є҆сѝ, слꙋжѧ̀ бг҃ꙋ, ꙗ҆́кѡ бж҃їй ст҃и́тель сщ҃е́ннѣйшїй.
І҆́дѡльстїи ᲂу҆го́дницы бы́ша ᲂу҆го́дницы бг҃ꙋ, твои́ми ᲂу҆чє́нїи честны́ми, и҆̀хже ѿ недосто́йныхъ и҆з̾има́ѧ, досто́инъ ꙗ҆ви́лсѧ є҆сѝ ᲂу҆го́дникъ бг҃ꙋ вседержи́телю.
Бл҃года́тїю при́званъ бы́въ, разрꙋши́лъ є҆сѝ безбо́жїѧ і҆́дѡльскаѧ, ѡ҆дожде́нїемъ слове́съ твои́хъ прпⷣбне, ѡ҆лѧденѣ̑вшаѧ сердца̀ плодонѡ́сна содѣ́лалъ є҆сѝ бж҃їею бл҃года́тїю.
Бг҃оро́диченъ: По ржⷭ҇твѣ̀ твое́мъ страннѣ́мъ пребыла̀ є҆сѝ дв҃ою, ꙗ҆́коже пре́жде: бг҃ъ бо бѣ̀ рожде́йсѧ, и҆ претворѧ́ѧй всѧ̑ во́лею, безмꙋ́жнаѧ мр҃і́е бг҃оневѣ́стнаѧ.
Пѣ́снь ѕ҃.
І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.
Ѧ҆зы́къ тво́й дх҃омъ и҆з̾ѡщре́нъ разꙋ́мнѡ, ꙗ҆́кѡ тро́сть скоропи́сца, написа̀ въ сердца̀ бл҃гочести́выхъ сло́во бл҃года́тное, всесщ҃е́нне ѻ҆́тче, бж҃їимъ манове́нїемъ.
Бжⷭ҇твєннымъ поꙋча́ѧсѧ, ꙗ҆́кѡ входѧ̀ въ мы́слєннаѧ ст҃а̑ѧ ст҃ы́хъ, вѣ́рныхъ соверша́еши дх҃омъ, трⷪ҇ческою заре́ю сщ҃е́нный ѻ҆́тче всесоверше́ннѣйшїй, и҆́мⷬ҇къ.
Стрꙋѧ́ми велѣ́нїи твои́хъ загради́въ мꙋ̑тнаѧ нечести́выхъ велѣ̑нїѧ, ꙗ҆́кѡ рѣка̀ показа́лсѧ є҆сѝ ми́рнаѧ, бл҃гоче́стїѧ напоѧ́ѧ составлє́нїѧ вѣ́рныхъ, ст҃и́телю всечтⷭ҇не.
Бг҃оро́диченъ: Сло́во во чре́вѣ твое́мъ всели́сѧ без̾ сѣ́мене, и҆ чл҃вѣ́къ ꙗ҆ви́сѧ соверше́нъ, ѡ҆бновлѧ́ѧ є҆стество̀ бг҃олѣ́пнѡ, ꙗ҆́коже са́мъ вѣ́сть є҆ди́нъ, бг҃опрїѧ́тнаѧ ѻ҆трокови́це всенепоро́чнаѧ.
<<ѯ҃а ѡ҆б.: 122>>
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃.
Подо́бенъ: Вы́шнихъ:
Бж҃е́ственный гро́мъ, трꙋба̀ дх҃о́внаѧ, вѣ́ры насади́телю, и҆ ѿсѣка́телю є҆ресе́й, трⷪ҇цы ᲂу҆го́дниче, вели́кїй ст҃и́телю, и҆́мⷬ҇къ, со а҆́гг҃лы предстоѧ̀ при́снѡ, молѝ непреста́ннѡ ѡ҆ всѣ́хъ на́съ.
І҆́косъ: Лѣ́ностїю ѻ҆каѧ́нный а҆́зъ ѿпадо́хъ, и҆ въ сме́рть ᲂу҆снꙋ́хъ: но ꙗ҆́кѡ па́стырь до́бръ воздви́гни мѧ̀ ѻ҆́тче, и҆ стра̑сти моѧ̑ ᲂу҆спѝ, ѕлѣ̀ мꙋ́чащыѧ мѧ̀: ꙗ҆́кѡ да воста́въ чи́стѣ воспою̀ твоѐ свѣтоно́сное торжество̀, є҆́же влⷣка вселе́нныѧ просла́ви досто́йнѡ, ꙗ҆́кѡ раба̀ вѣ́рнѣйша, и҆ ꙗ҆́кѡ ᲂу҆чи́телѧ премꙋ́дра, ꙗ҆́кѡ дрꙋ́га и҆ таи́нника, и҆ ꙗ҆́кѡ строи́телѧ свои́хъ преда́нїй, ꙗ҆̀же до́брѣ сохрани́лъ є҆сѝ, пома́занїе нескве́рное, и҆́мⷬ҇къ, премꙋ́дре, при́снѡ молѝ непреста́ннѡ ѡ҆ всѣ́хъ на́съ.
Пѣ́снь з҃.
І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.
Просвѣща́емь дꙋхо́вною бл҃года́тїю, ꙗ҆́же къ бж҃е́ственномꙋ манове́нїю причаще́нїи, свѣтода́тельнаѧ бы́лъ є҆сѝ ѕвѣзда̀, просвѣща́ѧ мꙋ́дре пою́щыѧ: бл҃гослове́нъ бг҃ъ ѻ҆тє́цъ на́шихъ.
Ст҃ѣ́йшаѧ цр҃ковь бы́въ, ѡ҆зарѧ́ема добродѣ́тельными дѣѧ̑нїи, живꙋ́щꙋ и҆мѣ́лъ є҆сѝ въ тебѣ̀ сщ҃е́нне трⷪ҇цꙋ несозда́ннꙋю, вопїѧ̀: бл҃гослове́нъ бг҃ъ ѻ҆тє́цъ на́шихъ.
Дрема́нїе ѿ ѻ҆́чїю ѿри́нꙋвъ, бжⷭ҇твенными бодростьмѝ, бж҃їѧ сїѧ̑нїѧ прїѧ́лъ є҆сѝ ѿ а҆́гг҃ла свѣ́та, сто́лпъ и҆ подпо́ръ вѣ̑рнымъ, ст҃и́телѧ и҆́стинна соверша́юща тѧ̀.
Бг҃оро́диченъ: Сѣдѧ́й въ нѣ́дрѣхъ роди́телѧ неѡпи́санъ, въ нѣ́дрѣхъ твои́хъ, пречⷭ҇таѧ, ны́нѣ сѣди́тъ ѡ҆пи́санъ, твои́мъ ѡ҆бложе́нъ зра́комъ, за сп҃се́нїе а҆да́мле ѡ҆пи́санъ бы́въ.
<<ѯ҃в: 123>>
Пѣ́снь и҃.
І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Го́рдаго ѕмі́ѧ смире́нїемъ твои́мъ смири́лъ є҆сѝ бл҃же́нне, возвыша́емь къ бг҃ꙋ чи́стыми твои́ми ра́зꙋмы: тѣ́мже тѧ̀ чти́мъ, хрⷭ҇та̀ превозносѧ́ще во вѣ́ки.
Воплоще́нно сло́во бг҃осло́вилъ є҆сѝ, и҆ лю́ди ѿ рабо́тныѧ ле́сти спа́слъ є҆сѝ, ѿгонѧ́ѧ і҆́дѡльскаѧ нечє́стїѧ, ѻ҆́тче ст҃и́телю, и҆́мⷬ҇къ, премꙋ́дре, и҆ бг҃оно́се.
Житїѐ твоѐ влⷣцѣ твоемꙋ̀ и҆мѣ́ѧ подо́бно, и҆ сло́во житїю̀ и҆мѣ́ѧ подо́бѧщеесѧ, и҆спо́лненъ бы́въ дне́й дх҃о́вныхъ ѻ҆́тче, въ вы́шнѧѧ преше́лъ є҆сѝ покѡ́ища.
Бг҃оро́диченъ: И҆зба́вльшесѧ пе́рвыѧ клѧ́твы твои́мъ ржⷭ҇тво́мъ, пребл҃гослове́ннаѧ ѻ҆трокови́це бг҃ора́дованнаѧ, гла́съ гаврїи́ловъ возсыла́емъ тѝ: ра́дꙋйсѧ вина̀ всѣ́хъ сп҃се́нїѧ.
Пѣ́снь ѳ҃.
І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же, всечтⷭ҇аѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
Въ зе́млю кро́ткихъ ты̀ всели́лсѧ є҆сѝ ст҃и́телю, кро́токъ и҆ неѕло́бивъ бы́въ, съ вы́шними совокꙋплѧ́ѧсѧ во́инствы: ве́сь ᲂу҆кра́шенъ добродѣ́тельными свѣ́тлостьми, и҆ свѣ́томъ добродѣ́телей преѡдѣ́ѧнъ.
Зри́ши бж҃їѧ и҆ а҆́гг҃льскїѧ свѣ́тлѡсти, патрїа̑рхъ и҆ мꙋ́чєникъ, и҆ а҆пⷭ҇льскїѧ красоты̑, молѧ̀ съ ни́ми чл҃вѣколю́бца, ѡ҆ставле́нїе грѣхѡ́въ и҆ житїѧ̀ и҆справле́нїе дарова́ти на́мъ прпⷣбне, хва́лѧщымъ тѧ̀.
Ꙗ҆́вѣ прⷭ҇то́лъ пе́рвѣе ᲂу҆краси́лъ є҆сѝ свѣ́тлѡ, всѣ́хъ предсѣдѧ́щихъ градѡ́въ, въ не́мже пожи́въ ꙗ҆́кѡ а҆́гг҃лъ, и҆ ст҃и́тельствомъ се́й ᲂу҆краси́въ, пома́завъ ѡ҆ст҃и́лъ є҆сѝ, соверши́въ лю́ди бг҃омꙋ́дры.
<<ѯ҃в ѡ҆б.: 124>>
Бг҃оро́диченъ: Ꙗ҆́коже ка́плѧ нбⷭ҇наѧ, во твоѐ чре́во дв҃о, до́ждь сни́де, и҆ и҆зсꙋшѝ пото́ки лє́стныѧ: ѡ҆дождѝ нетлѣ́нїе всѣ̑мъ человѣ́кѡмъ, и҆ и҆збавле́нїе тобо́ю бг҃ора́дованнаѧ дарова́сѧ.
Свѣти́ленъ.
Подо́бенъ: Посѣти́лъ ны̀:
Сла́внѡ краси́тсѧ дне́сь свѣтоза́рное торжество̀, во свѣ́тѣ сла́вы лица̀ бж҃їѧ предстоѧ̀ ст҃и́телю, и҆́мⷬ҇къ, помѧнѝ на́съ хва́лѧщихъ твою̀ па́мѧть.
Бг҃оро́диченъ: Съ бг҃омъ на тѧ̀ пречⷭ҇таѧ, ᲂу҆пова́нїе возлага́емъ, и҆́же и҆з̾ тебѐ проше́дшемꙋ сраспина́еми хрⷭ҇тꙋ̀: твои́ми же къ немꙋ̀ мольба́ми невреди́мы да́же до конца̀ на́съ сохранѝ.
На хвали́техъ стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ!
Прпⷣбне ѻ҆́тче, и҆́мⷬ҇къ, ꙳ ты̀ возше́дъ на лѣ́ствицꙋ бж҃е́ственнагѡ ра́зꙋма, ꙳ и҆ къ бг҃ꙋ приближа́ѧсѧ, ꙳ всыне́нїѧ да́ръ прїи́мъ, ꙳ и҆сцѣлѧ́еши недꙋ́ги неисцѣ̑льныѧ, ꙳ и҆ ѿго́ниши дꙋ́хи нечи̑стыѧ: ꙳ тѣ́мъ твою̀ па́мѧть пра́зднꙋемъ, ꙳ ра́достїю се́рдца, хрⷭ҇та̀ велича́юще, ꙳ возвели́чившаго своего̀ ᲂу҆го́дника. [Два́жды.]
Ѻ҆́тче чꙋ́дный, и҆́мⷬ҇къ, ꙳ свѣтовидѣ́нїемъ ᲂу҆ма̀ ꙳ чи́стѡ ѡ҆блиста́емь, ꙳ страсте́й ᲂу҆спи́лъ є҆сѝ ꙳ многово́лненное мо́ре. ꙳ и҆ безстра́стїемъ лета́ѧ, ꙳ чи́стыми кри́лы, дости́глъ є҆сѝ, ꙳ и҆дѣ́же добро́та неизрече́нна и҆ недомы́сленна, ꙳ ѡ҆ на́съ всегда̀ молѧ̀ хва́лѧщихъ тѧ̀.
Ѻ҆́тче ѻ҆тцє́въ, и҆́мⷬ҇къ, ꙳ сщ҃е́нства пра́вило, ꙳ цѣломꙋ́дрїѧ ѡ҆́бразъ, ꙳ мона́шествꙋющихъ крѣ́пость, ꙳ цр҃кве ᲂу҆твержде́нїе, ꙳ любвѐ свѣти́льникъ, прⷭ҇то́лъ чꙋ́вства, ꙳ и҆сто́чникъ чꙋде́съ, ꙳ и҆ ѧ҆зы́къ ѻ҆гнедохнове́нный: ᲂу҆ста̀ сладкоглагѡ́лива, ꙳ сосꙋ́дъ бж҃е́ственнагѡ дх҃а, и҆ разꙋ́мный бы́лъ є҆сѝ ра́й бг҃обл҃же́нне.
<<ѯ҃г: 125>>
Сла́ва, гла́съ ѕ҃:
Прпⷣбне и҆ требл҃же́нне, ст҃ѣ́йшїй ѻ҆́тче, па́стырю до́брый, и҆ началопа́стырѧ хрⷭ҇та̀ ᲂу҆ченичѐ, положи́вый дꙋ́шꙋ за ѻ҆́вцы, ты̀ и҆ ны́нѣ, всехва́льне, и҆́мⷬ҇къ, ст҃и́телю, просѝ мл҃твами твои́ми, дарова́ти на́мъ ве́лїю млⷭ҇ть.
И҆ ны́нѣ, бг҃оро́диченъ:
Бг҃а и҆з̾ тебѐ воплоти́вшагосѧ разꙋмѣ́хомъ бцⷣе дв҃о: того̀ молѝ ѡ҆ сп҃се́нїи дꙋ́шъ на́шихъ.
Крⷭ҇тобг҃оро́диченъ: Предстоѧ́щи ᲂу҆ крⷭ҇та̀ дв҃а мт҃и, зрѧ́щи сн҃а своего̀ во́лею стра́ждꙋща, того̀ велича́ше.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.