Слꙋ́жба ст҃ы̑мъ а҆́гг҃лѡмъ
<<к҃г: 45>>
[глⷡ҇а д҃] СЛꙊ́ЖБА Ѻ҆́БЩА
ст҃ы̑мъ а҆́гг҃лѡмъ и҆ про́чымъ безплѡ́тнымъ.
На Гдⷭ҇и воззва́хъ, стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Трисл҃нечнагѡ бжⷭ҇тва̀ ꙳ предста́телїе свѣтлѣ́йшїи, ꙳ а҆́гг҃ли ꙗ҆влѧ́ющесѧ а҆рхїстрати́зи, ꙳ со го́рними си́лами зове́те ра́дꙋющесѧ: ꙳ ст҃ъ є҆сѝ, ѻ҆́ч҃е, ꙳ ст҃ъ є҆сѝ, собезнача́льное сло́во, ꙳ ст҃ъ є҆сѝ, и҆ ст҃ы́й дш҃е, ꙳ є҆ди́на сла́ва, є҆ди́но ца́рство и҆ є҆стество̀, ꙳ є҆ди́но бж҃ество̀ и҆ си́ла.
И҆ ви́дъ ва́шъ ѻ҆́гненъ, ꙳ и҆ добро́та чꙋ́дна, мїхаи́ле и҆ гаврїи́ле первоа́гг҃ли: ꙳ невеще́ственнымъ бо є҆стество́мъ, прехо́дите концы̀, ꙳ и҆сполнѧ́юще повелѣ́нїе всѣ́хъ творца̀, ꙳ си́льни въ крѣ́пости ва́шей познава́еми, и҆ и҆сто́чницы и҆сцѣле́нїй ꙳ хра́мы ва́ши содѣ́ловающе, ꙳ зна́нїемъ ва́шимъ ст҃ы́мъ почита́ємыѧ.
Творѧ́й а҆́гг҃лы твоѧ̑, ꙳ ꙗ҆́коже писа́сѧ, дх҃и, ꙳ и҆ слꙋжа́щыѧ тебѣ̀ пла́мень ѻ҆́гненный, ꙳ посредѣ̀ чинѡ́въ пе́рвенствꙋюща, ꙳ показа́лъ є҆сѝ, гдⷭ҇и, твоего̀ а҆рха́гг҃ла мїхаи́ла, ꙳ со а҆рхїстрати́гомъ твои́мъ гаврїи́ломъ, ꙳ твои̑мъ манове́нїємъ повинꙋ́ющасѧ, сло́ве, ꙳ и҆ пѣ́снь трист҃ꙋ́ю, со стра́хомъ возглаша́юща сла́вѣ твое́й.
Сла́ва, гла́съ ѕ҃: Сра́дꙋйтесѧ на́мъ, всѧ̑ а҆́гг҃льскаѧ чинонача̑лїѧ: первостоѧ́тєли бо ва́ши, и҆ на́ши предста́тели, вели́цыи а҆рхїстрати́зи, въ дне́шнїй де́нь, въ чтⷭ҇нѣ́мъ и҆́хъ хра́мѣ, пресла́внѡ ꙗ҆влѧ́ющесѧ ѡ҆сщ҃а́ютъ. тѣ́мже по до́лгꙋ воспѣва́юще, къ ни̑мъ возопїи́мъ: покры́йте на́съ кро́вомъ кри́лъ ва́шихъ, велича́йшїи а҆рхїстрати́зи.
И҆ ны́нѣ, бг҃оро́диченъ: Сра́дꙋйтесѧ на́мъ, всѧ̑ двⷭ҇твенныхъ ликостоѧ̑нїѧ: предста́тельница бо на́ша, и҆ хода́таица, и҆ покро́въ, <<к҃г ѡ҆б.: 46>> и҆ вели́кое прибѣ́жище, въ дне́шнїй де́нь, въ чтⷭ҇нѣ́мъ є҆ѧ̀ и҆ бжⷭ҇твеннѣмъ хра́мѣ скорбѧ́щыѧ ᲂу҆тѣша́етъ, тѣ́мже по до́лгꙋ воспѣва́юще сїю̀, возопїи́мъ: покры́й ны̀ бж҃е́ственнымъ предста́тельствомъ твои́мъ, пречтⷭ҇аѧ бцⷣе влⷣчце.
Вхо́дъ. Прокі́менъ днѐ.
І҆исꙋ́са наѵи́на чте́нїе. [Глава̀ є҃.]
Бы́сть є҆гда̀ бѧ́ше і҆исꙋ́съ ᲂу҆ і҆ерїхѡ́на, и҆ воззрѣ́въ ѻ҆чи́ма свои́ма, ви́дѣ чл҃вѣ́ка стоѧ́ща пред̾ ни́мъ, и҆ ме́чь є҆гѡ̀ ѡ҆бнаже́нъ въ рꙋцѣ̀ є҆гѡ̀. И҆ прише́дъ і҆исꙋ́съ, речѐ є҆мꙋ̀: на́шъ ли є҆сѝ, и҆лѝ ѿ сопроти́вныхъ на́шихъ; Ѻ҆́нъ же речѐ є҆мꙋ̀: а҆́зъ а҆рхїстрати́гъ си́лы гдⷭ҇ни, ны́нѣ прїидо́хъ сѣ́мѡ. І҆исꙋ́съ падѐ лице́мъ свои́мъ на зе́млю, и҆ речѐ є҆мꙋ̀: влⷣко, что̀ повелѣва́еши твоемꙋ̀ рабꙋ̀, И҆ речѐ а҆рхїстрати́гъ гдⷭ҇ень ко і҆исꙋ́сꙋ: разрѣшѝ сапо́гъ тво́й ѿ но́гъ твои́хъ: мѣ́сто бо, на не́мже ты̀ стои́ши, ст҃о є҆́сть. и҆ сотворѝ і҆исꙋ́съ та́кѡ.
Сꙋде́й і҆и҃левыхъ чте́нїе. [Глава̀ ѕ҃.]
Бы́сть во дни̑ ѻ҆́ны, ᲂу҆крѣпи́сѧ мадїа́мъ на сы́ны і҆и҃лєвы, и҆ ті́и возопи́ша ко гдⷭ҇ꙋ бг҃ꙋ: и҆ сѐ а҆́гг҃лъ гдⷭ҇ень прїи́де, и҆ сѣ́де под̾ дꙋ́бомъ, и҆́же въ є҆ѵфра́ѳѣ, въ землѝ і҆ѡа́са, ѻ҆тца̀ є҆зрі́мова, и҆ гедеѡ́нъ сы́нъ є҆гѡ̀ млатѧ́ше пшени́цꙋ на гꙋмнѣ̀, є҆́же бѣжа́ти съ не́ю ѿ лица̀ мадїа́млѧ. И҆ ꙗ҆ви́сѧ є҆мꙋ̀ а҆́гг҃лъ гдⷭ҇ень, и҆ речѐ къ немꙋ̀: гдⷭ҇ь съ тобо́ю, си́льный крѣ́постїю. И҆ речѐ къ немꙋ̀ гедеѡ́нъ: во мнѣ̀, гдⷭ҇и мо́й, и҆ а҆́ще є҆́сть гдⷭ҇ь съ на́ми, и҆ чесѡ̀ ра́ди ѡ҆брѣто́ша ны̀ всѧ̑ ѕла̑ѧ сїѧ̑; и҆ гдѣ̀ сꙋ́ть всѧ̑ чꙋдеса̀ є҆гѡ̀, є҆ли̑ка повѣ́даша на́мъ ѻ҆тцы̀ на́ши, глаго́люще: не и҆з̾ є҆гѵ́пта ли и҆зведѐ на́съ гдⷭ҇ь; и҆ ны́нѣ ѿве́рже ны̀ гдⷭ҇ь, и҆ предаде́ ны въ рꙋ́кꙋ мадїа́млю. И҆ воззрѣ̀ на него̀ а҆́гг҃лъ гдⷭ҇ень, и҆ речѐ є҆мꙋ̀: и҆дѝ въ крѣ́пости твое́й се́й, и҆ спасе́ши і҆и҃лѧ ѿ рꙋкѝ мадїа́мли, и҆ сѐ посла́хъ тѧ̀. И҆ речѐ къ немꙋ̀ гедеѡ́нъ: во мнѣ̀, гдⷭ҇и, въ чесо́мъ спасꙋ̀ і҆и҃лѧ; сѐ ты́сѧща моѧ̀ хꙋ́ждша въ манассі́и, и҆ а҆́зъ є҆́смь мні́й въ домꙋ̀ ѻ҆тца̀ моегѡ̀. И҆ речѐ къ немꙋ̀ гдⷭ҇ь: поне́же а҆́зъ бꙋ́дꙋ съ тобо́ю, и҆ и҆збїе́ши мадїа́ма ꙗ҆́кѡ мꙋ́жа є҆ди́наго. И҆ речѐ къ немꙋ̀ <<к҃: 39>> гедеѡ́нъ: и҆ а҆́ще ѡ҆брѣто́хъ бл҃года́ть пред̾ ѻ҆чи́ма твои́ма, и҆ да сотвори́ши мнѣ̀ дне́сь зна́менїе, ꙗ҆́кѡ ты̀ глаго́леши со мно́ю. Не ѿидѝ ѿсю́дꙋ, до́ндеже прїитѝ мнѣ̀ къ тебѣ̀, и҆ принесꙋ̀ же́ртвꙋ мою̀, и҆ пожрꙋ̀ пред̾ тобо́ю, и҆ речѐ къ немꙋ̀ а҆́гг҃лъ гдⷭ҇ень: а҆́зъ є҆́смь, и҆ преме́длю, до́ндеже ѡ҆брати́шисѧ ты̀. Гедеѡ́нъ же вни́де, и҆ сотворѝ ко́злище ѿ ко́зъ, и҆ че́тверть мꙋкѝ ѻ҆прѣсно́кѡвъ, и҆ вложѝ съ мѧ́сомъ въ ко́шницꙋ, и҆ ю҆хꙋ̀ влїѧ̀ въ горне́цъ, и҆ и҆знесѐ къ немꙋ̀ под̾ дꙋ́бъ, и҆ поклони́сѧ. И҆ речѐ къ немꙋ̀ а҆́гг҃лъ гдⷭ҇ень: возмѝ мѧса̀ и҆ хлѣ́бы прѣ̑сныѧ, и҆ положѝ ᲂу҆ ка́мене ѻ҆́нагѡ, и҆ ю҆хꙋ̀ и҆зле́й: и҆ сотворѝ та́кѡ. И҆ прострѐ а҆́гг҃лъ гдⷭ҇ень коне́цъ жезла̀, сꙋ́щагѡ въ рꙋцѣ̀ є҆гѡ̀: и҆ косне́сѧ мѧсѡ́мъ и҆ хлѣ́бѡмъ прѣ̑снымъ, и҆ возгорѣ́сѧ ѻ҆́гнь и҆з̾ ка́мене, и҆ поѧдѐ мѧса̀ и҆ ѻ҆прѣсно́ки. и҆ а҆́гг҃лъ гдⷭ҇ень ѿи́де ѿ ѻ҆че́й є҆гѡ̀. И҆ ви́дѣ гедеѡ́нъ, ꙗ҆́кѡ а҆́гг҃лъ є҆́сть гдⷭ҇ень, и҆ речѐ гедеѡ́нъ: ᲂу҆вы̀ мнѣ̀, гдⷭ҇и, гдⷭ҇и, ꙗ҆́кѡ ви́дѣхъ а҆́гг҃ла гдⷭ҇нѧ лице́мъ къ лицꙋ̀. И҆ речѐ є҆мꙋ̀ гдⷭ҇ь: ми́ръ тебѣ̀, не бо́йсѧ, не ᲂу҆́мреши. и҆ созда̀ та́мѡ гедеѡ́нъ же́ртвенникъ гдⷭ҇ꙋ, и҆ назва̀ то̀, ми́ръ гдⷭ҇ень, да́же до днѐ сегѡ̀.
Прⷪ҇ро́чества и҆са́їина чте́нїе. [Глава̀ д҃і.]
Та́кѡ глаго́летъ гдⷭ҇ь: всѧ̀ землѧ̀ да вопїе́тъ съ весе́лїемъ, И҆ древа̀ лїва́нѡва да возвеселѧ́тсѧ ѡ҆ тебѣ̀, и҆ ке́дри лїва́нѡвы рекꙋ́тъ: ѿне́лѣже ты̀ ᲂу҆снꙋ́лъ є҆сѝ, не взы́де сѣкі́й на́съ. А҆́дъ до́лѣ ѡ҆горчи́сѧ, срѣ́тивъ тебѐ, грѧдꙋ́щꙋ тѝ воздви́же на тѧ̀ и҆споли́ны всѧ̑, нача́льствовавшыѧ землѐ, а҆́ще воста́ли бы́ша ѿ престѡ́лъ свои́хъ всѝ ца́рїе ꙗ҆зы́честїи, всѝ ѿвѣща́ютъ, и҆ рекꙋ́тъ тебѣ̀: и҆ ты̀ плѣне́нъ є҆сѝ ꙗ҆́коже и҆ мы̀, съ на́ми же причта́лсѧ є҆сѝ. Сни́де во а҆́дъ сла́ва твоѧ̀ и҆ мно́гое твоѐ весе́лїе: под̾ тобо́ю посте́лютъ гни́лость, и҆ покро́въ тво́й че́рви. Ка́кѡ спадѐ съ нб҃сѐ денни́ца, заꙋ́тра возсїѧва́ющаѧ; сокрꙋши́сѧ на зе́млю, посыла́ѧй ко всѣ̑мъ ꙗ҆зы́кѡмъ, Ты́ бо ре́клъ є҆сѝ въ помышле́нїи твое́мъ: на нб҃о взы́дꙋ, верхꙋ̀ ѕвѣ́зды нбⷭ҇ныхъ поста́влю престо́лъ мо́й, и҆ сѧ́дꙋ на горѣ̀ высо́цѣй, на гора́хъ высо́кихъ сꙋ́щихъ къ сѣ́верꙋ: И҆ взы́дꙋ <<к҃д ѡ҆б.: 48>> вы́шше ѡ҆блакѡ́въ, и҆ бꙋ́дꙋ подо́бенъ вы́шнемꙋ. Ны́нѣ же во а҆́дъ сни́деши, во ѡ҆снова̑нїѧ землѝ, И҆ ви́дѣвшїи тѧ̀ почꙋдѧ́тсѧ, и҆ рекꙋ́тъ ѡ҆ тебѣ̀: Се́й человѣ́къ, смꙋща́ѧй зе́млю, потрѧса́ѧй царѝ: положи́вый вселе́ннꙋю всю̀ пꙋ́стꙋ, и҆ гра́ды є҆ѧ̀ низложѝ, и҆ плѣне́нныхъ не разрѣшѝ въ до́мы и҆́хъ. Всѝ ца́рїе ꙗ҆зы́честїи ᲂу҆спо́ша въ че́сти, человѣ́къ въ домꙋ̀ свое́мъ. Ты́ же ѿве́рженъ бꙋ́деши въ гора́хъ, ꙗ҆́кѡ мертве́цъ возгнꙋше́нъ со мно́гими мертвецы̀, и҆збоде́ными мече́мъ, низходѧ́щими во а҆́дъ. И҆́мже ѡ҆́бразомъ ри́за кро́вїю намоче́на, не бꙋ́детъ чиста̀, си́це нижѐ ты̀ бꙋ́деши чи́стъ: занѐ зе́млю мою̀ погꙋби́лъ є҆сѝ, и҆ лю́ди моѧ̑ порази́лъ є҆сѝ, и҆ не пребꙋ́деши въ вѣ́чное вре́мѧ.
На стїхо́внѣ стїхи̑ры, гла́съ а҃:
Оу҆́мныхъ си́лъ а҆рхїстрати́зи, предстоѧ́ще непреста́ннѡ влⷣчнѧ прⷭ҇то́лꙋ, моли́тесѧ ко гдⷭ҇ꙋ, ми́ръ мі́рꙋ дарова́ти, и҆ дꙋша́мъ на́шымъ ве́лїю млⷭ҇ть.
Сті́хъ: Творѧ́й а҆́гг҃лы своѧ̑ дꙋ́хи, и҆ слꙋги̑ своѧ̑ пла́мень ѻ҆́гненный.
Чинонача́льникъ вы́шнихъ си́лъ, мїхаи́лъ первостоѧ́тель бж҃е́ственныхъ чинѡ́въ, дне́сь на́съ къ торжествꙋ̀ созва̀, и҆́же всегда̀ съ на́ми ходѧ́й, и҆ сохранѧ́ѧй всѧ̑ ѿ всѧ́кагѡ дїа́волѧ ѡ҆бстоѧ́нїѧ: прїиди́те ᲂу҆̀бо, празднолю́бцы и҆ хрⷭ҇толю́бцы, цвѣ́ты добродѣ́телей взе́мше, чи́стыми по́мыслы, и҆ со́вѣстїю бл҃гостоѧ́нною, а҆рха́гг҃лѡвъ собо́ръ почти́мъ: то́й бо непреста́ннѡ бг҃ꙋ предстоѧ̀, и҆ трист҃ꙋ́ю пѣ́снь воспѣва́ѧ, мо́литъ сп҃сти́сѧ дꙋша́мъ на́шымъ.
Гла́съ в҃:
Сті́хъ: Хвали́те є҆го̀, всѝ а҆́гг҃ли є҆гѡ̀, хвали́те є҆го̀, всѧ̑ си̑лы є҆гѡ̀.
Невеще́ственное сꙋщество̀ ᲂу҆́мныхъ си́лъ предста́тельствꙋюще, и҆ трисл҃нечныѧ сла́вы блиста́ньми, свѣтодаю́ще вселе́ннѣй а҆рхїстрати́зи, непреста́ннымъ гла́сомъ трист҃ꙋ́ю пѣ́снь воспѣва́ете: тѣ́мже моли́тесѧ сп҃сти́сѧ дꙋша́мъ на́шымъ.
Сла́ва, и҆ ны́нѣ, гла́съ и҃:
Ꙗ҆́кѡ чинонача́льникъ и҆ побо́рникъ, и҆ а҆́гг҃лѡвъ началово́ждь, а҆рхїстрати́же, всѧ́кїѧ нꙋ́жды и҆ ско́рби, недꙋ́гѡвъ и҆ лю́тыхъ <<к҃є: 49>> грѣхѡ́въ свободѝ, вѣ́рнѡ воспѣва́ющыѧ и҆ молѧ́щыѧ тѧ̀, сла́вне: ꙗ҆́вѣ ꙗ҆́кѡ невеще́ственъ, невеще́ственнаго зрѧ̀, и҆ не пристꙋ́пнымъ свѣ́томъ влⷣчнїѧ сла́вы ѡ҆сїѧ́емь: то́й бо чл҃вѣколю́бнѡ пло́ть на́съ ра́ди ѿ дв҃ы прїѧ́тъ, сп҃сти́ восхотѣ́въ человѣ́чество.
Тропа́рь, гла́съ д҃:
Нбⷭ҇ныхъ во́инствъ а҆рхїстрати́зи, мо́лимъ ва́съ при́снѡ мы̀ недосто́йнїи: да ва́шими мл҃твами ѡ҆гради́те на́съ кро́вомъ кри́лъ невеще́ственныѧ ва́шеѧ сла́вы, сохранѧ́юще ны̀ припа́дающыѧ приле́жнѡ, и҆ вопїю́щыѧ: ѿ бѣ́дъ и҆зба́вите ны̀, ꙗ҆́кѡ чинонача̑льницы вы́шнихъ си́лъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени,
на Бг҃ъ гдⷭ҇ь, тропа́рь то́йже, два́жды.
Сла́ва, и҆ ны́нѣ, бг҃оро́диченъ.
По а҃-й каѳі́смѣ, сѣда́ленъ, гла́съ ѕ҃:
А҆́гг҃льскїѧ си̑лы, хрⷭ҇тѐ, предстоѧ́ще прⷭ҇то́лꙋ твоемꙋ̀, мо́лѧтсѧ ѡ҆ ро́дѣ человѣ́честѣмъ: тѣ́хъ ᲂу҆̀бо мл҃твами ми́ръ всѣ̑мъ подава́ѧй, ꙗ҆зы́кѡвъ де́рзость ᲂу҆кротѝ. [Два́жды.]
Сла́ва, и҆ ны́нѣ, бг҃оро́диченъ:
Сло́во собезнача́льное ѻ҆ц҃ꙋ̀ же и҆ дх҃ꙋ, а҆рха́гг҃льскимъ гла́сомъ, бцⷣе, во ᲂу҆тро́бѣ заче́нши, херꙋві̑мъ и҆ серафі̑мъ и҆ прⷭ҇то́лѡвъ ꙗ҆ви́ласѧ є҆сѝ превы́шши.
По в҃-й каѳі́смѣ сѣда́ленъ, гла́съ ѕ҃:
Ѡ҆́крестъ прⷭ҇то́ла всѣ́хъ цр҃ѧ̀ при́снѡ ликꙋ́юще, а҆́гг҃лѡвъ всѝ чи́нове, на́съ сохранѧ́йте вѣ́рою ва́съ призыва́ющихъ, и҆ мꙋче́нїй и҆збавлѧ́йте, [Два́жды.]
Сла́ва, и҆ ны́нѣ, бг҃оро́диченъ.
Ра́дꙋйсѧ, две́ре бг҃ꙋ ѿве́рстаѧ, неизглаго́ланнѡ въ тѧ̀ все́льшемꙋсѧ и҆ проше́дшемꙋ и҆з̾ тебє̀, приснодв҃о.
<<к҃є ѡ҆б.: 50>>
По Хвали́те и҆́мѧ гдⷭ҇не:
Припѣ́въ: Велича́емъ ва́съ, а҆рха́гг҃ли и҆ а҆́гг҃ли, и҆ всѧ̑ вѡ́инства, херꙋві́ми и҆ серафі́ми, сла́вѧщыѧ гдⷭ҇а.
Дрꙋгі́й: Велича́емъ ва́съ, а҆рха́гг҃ли, а҆́гг҃ли, нача̑ла, вла̑сти, прⷭ҇то́ли, гдⷭ҇ьствїѧ, си̑лы и҆ херꙋві́ми, стра̑шныѧ серафі́ми, прославлѧ́ющыѧ гдⷭ҇а.
Ѱало́мъ и҆збра́нный: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ:
По полѷеле́и сѣда́ленъ, гла́съ ѕ҃:
А҆́гг҃ли свѣ́тлїи бж҃їи, предстоѧ́щїи бл҃года́ти прⷭ҇то́лꙋ бж҃е́ственномꙋ, смире́нїе сꙋ́щее и҆ просвѣще́нїе и҆́стинное, ѿ свѣ́та бж҃е́ственнагѡ воспрїе́млюще, на́съ назира́йте съ нбⷭ҇ными чл҃вѣколю́бцы, въ бꙋ́ри лю́тѣй мїроде́ржца бѣ́дствꙋющыѧ и҆ во тмѣ̀ спѧ́щыѧ: прїиди́те ᲂу҆̀бо, а҆рха́гг҃ли, на́мъ на по́мощь, и҆ сѣ́тей и҆зба́вите на́съ ѕлонача́льнагѡ врага̀: къ ва́шемꙋ бо покро́вꙋ, прехва́льнїи, прибѣга́емъ всѝ. [Два́жды.]
Сла́ва, и҆ ны́нѣ, бг҃оро́диченъ:
Оу҆пова́нїе и҆ покро́въ, и҆ приста́нище на тѧ̀ надѣ́ющихсѧ, бг҃ороди́тельнице бл҃га́ѧ, предста́тельнице мі́ра, молѝ со безпло́тными приле́жнѡ, є҆го́же родила̀ є҆сѝ чл҃вѣколюби́ваго бг҃а, и҆зба́витисѧ дꙋша́мъ на́шымъ ѿ всѧ́кагѡ преще́нїѧ, є҆ди́на бл҃гослове́ннаѧ.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Творѧ́й а҆́гг҃лы своѧ̑ дх҃и, и҆ слꙋги̑ своѧ̑ пла́мень ѻ҆́гненный.
Сті́хъ: Благословѝ, дꙋшѐ моѧ̀, гдⷭ҇а: гдⷭ҇и бж҃е мо́й, возвели́чилсѧ є҆сѝ ѕѣлѡ̀.
Всѧ́кое дыха́нїе: Є҆ѵⷢ҇лїе пи́сано въ концѣ̀ кни́ги сеѧ̀.
Сла́ва: Мл҃твами а҆рха̑гг҃лъ: И҆ ны́нѣ: Мл҃твами бцⷣы:
По н҃-мъ ѱалмѣ̀ стїхи́ра, гла́съ ѕ҃:
А҆́гг҃ли твоѝ, хрⷭ҇тѐ, прⷭ҇то́лꙋ вели́чества во стра́сѣ предстоѧ́ще, и҆ твои́мъ свѣтоли́тїемъ при́снѡ ѡ҆сїѧва́еми, въ вы́шнихъ пѣснопѣ́вцы твоѝ, и҆ совѣ́та твоегѡ̀ слꙋжи́телїе, ѿ тебє̀ низпосыла́еми, даю́тъ просвѣщє́нїѧ дꙋша́мъ на́шымъ.
<<к҃ѕ: 51>>
Канѡ́нъ, гла́съ и҃.
Пѣ́снь а҃.
І҆рмо́съ: Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.
Всѝ воспои́мъ вѣ́рнїи, всѧ̑ ᲂу҆правлѧ́ющꙋю невеще́ствєнныѧ го́рнихъ ликѡ́въ чинонача̑лїѧ, трⷪ҇цꙋ несозда́ннꙋю, ст҃ъ, ст҃ъ, ст҃ъ є҆сѝ, вопїю́ще, бж҃е вседержи́телю.
Положи́лъ є҆сѝ твое́й нача́ло, сꙋщество̀ безпло́тное, тво́рче а҆́гг҃лѡвъ, пречтⷭ҇ый тво́й прⷭ҇то́лъ ѡ҆крꙋжа́ющее, зва́ти тебѣ̀: ст҃ъ, ст҃ъ, ст҃ъ є҆сѝ бж҃е вседержи́телю.
Ра́дꙋйсѧ, гаврїи́ле, тайнови́дче бж҃їѧ воплоще́нїѧ, мїхаи́ле же, чинѡ́въ невеще́ственныхъ первостоѧ́телю, непреста́ннѡ зовꙋ́ще: ст҃ъ, ст҃ъ, ст҃ъ є҆сѝ, бж҃е вседержи́телю.
Бг҃оро́диченъ: Трепе́щꙋ та́инства, хрⷭ҇тѐ, твоегѡ̀ снизхожде́нїѧ, ꙗ҆́кѡ и҆́же є҆стество́мъ бг҃ъ, прїѧ́лъ є҆сѝ ѿ дв҃ы роди́тисѧ ꙗ҆́кѡ человѣ́къ, да сп҃се́ши мі́ръ ѿ рабо́ты проти́внагѡ.
Пѣ́снь г҃.
І҆рмо́съ: Стра́хъ тво́й, гдⷭ҇и, всадѝ въ сердца̀ ра̑бъ твои́хъ и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.
Крѣ́постїю поста́вилъ є҆сѝ, безсме́ртне, си̑льныѧ, соверша́ющыѧ всест҃ꙋ́ю твою̀ во́лю, тебѣ̀ въ вы́шнихъ всегда̀ предстоѧ́щыѧ.
Таи́нники твоегѡ̀ вочл҃вѣ́ченїѧ, и҆ чтⷭ҇на́гѡ воста́нїѧ, а҆́гг҃льскїѧ чинонача́льники, хрⷭ҇тѐ, за ны̀ прїимѝ молѧ́щыѧсѧ.
А҆́гг҃лы приста́вилъ є҆сѝ храни́тєли человѣ́кѡмъ, ꙗ҆́кѡ бл҃гоꙋтро́бенъ, слꙋжи́тєли же показа́лъ є҆сѝ, хрⷭ҇тѐ, сп҃се́нїѧ твои́хъ ᲂу҆го́дникѡвъ.
Бг҃оро́диченъ: Неизрече́ннѡ зачала̀ є҆сѝ гдⷭ҇а и҆ сп҃са, бг҃оневѣ́сто, и҆збавлѧ́ющаго ны̀ лю́тыхъ, тѧ̀ во и҆́стинѣ призыва́ющыѧ.
Сѣда́ленъ, гла́съ и҃.
Подо́бенъ: Повелѣ́нное:
Нбⷭ҇ныхъ нача̑льницы, и҆ первостоѧ́телїе высокопрⷭ҇то́льныхъ и҆ стра́шныхъ бж҃е́ственныѧ сла́вы, мїхаи́ле и҆ гаврїи́ле а҆рхїстрати́зи, <<к҃ѕ ѡ҆б.: 52>> а҆́гг҃лѡвъ чинонача̑льницы со всѣ́ми безпло́тными, ѽ слꙋжи́телїе влⷣчни! ѡ҆ мі́рѣ непреста́ннѡ молѧ́щесѧ, и҆спроси́те ѡ҆ставле́нїе прегрѣше́нныхъ на́ми, и҆ млⷭ҇ть и҆ бл҃года́ть ѡ҆брѣстѝ въ де́нь сꙋ́дный. [Два́жды.]
Сла́ва, и҆ ны́нѣ, бг҃оро́диченъ:
Въ пꙋчи́нꙋ лю́тѣ впа́дъ ᲂу҆ны́нїѧ, ѿ мно́жества лꙋка́выхъ и҆ беззако́нныхъ мои́хъ дѣ́лъ, прїидо́хъ въ недоꙋмѣ́нїе, и҆ ѿча́ѧнїемъ ны́нѣ ѡ҆держꙋ́сѧ, влⷣчце бцⷣе: ты́ мѧ сп҃сѝ, ты́ ми помозѝ: грѣ̑шнымъ бо ты̀ є҆сѝ ѡ҆чище́нїе и҆ чистота̀ сп҃си́тельнаѧ.
Крⷭ҇тобг҃оро́диченъ: Ѿ чи́стыхъ крове́й твои́хъ вопло́щшагосѧ, и҆ па́че ᲂу҆ма̀ и҆з̾ тебє̀, чтⷭ҇аѧ, ро́ждшагосѧ, на дре́вѣ ви́сѧща посредѣ̀ ѕлодѣ́евъ зрѧ́щи, ᲂу҆тро́бою болѣ́зновала є҆сѝ, и҆ ма́терски пла́чꙋщи вопїѧ́ла є҆сѝ: ᲂу҆вы̀ мнѣ̀, ча́до моѐ! что̀ є҆́сть бж҃е́ственное и҆ неизрече́нное смотре́нїе твоѐ, и҆́мже ѡ҆животвори́лъ є҆сѝ созда́нїе твоѐ: пою̀ твоѐ млⷭ҇рдїе.
Пѣ́снь д҃.
І҆рмо́съ: Всѣ́лъ є҆сѝ на конѝ а҆пⷭ҇лы твоѧ̑, гдⷭ҇и, и҆ прїѧ́лъ є҆сѝ рꙋка́ма твои́ма ᲂу҆зды̑ и҆́хъ, и҆ сп҃се́нїе бы́сть ѣ҆жде́нїе твоѐ вѣ́рнѡ пою́щымъ: сла́ва си́лѣ твое́й, гдⷭ҇и.
Всѣ́лъ є҆сѝ на а҆́гг҃лы, ꙗ҆́коже на конѝ, чл҃вѣколю́бче: и҆ прїѧ́лъ є҆сѝ рꙋко́ю твое́ю брозды̑ и҆́хъ, и҆ сп҃се́нїе бы́сть ѣ҆жде́нїе твоѐ непреста́ннѡ вопїю́щымъ: сла́ва си́лѣ твое́й, гдⷭ҇и.
Покрыва́етъ а҆́гг҃лы добродѣ́тель твоѧ̀, чл҃вѣколю́бче, и҆ землѝ и҆сполнѧ́етъ концы̀ твоегѡ̀ сла́внагѡ, безнача́льне, бжⷭ҇твеннагѡ хвале́нїѧ, съ ни́ми тебѣ̀ вопїю́щи: сла́ва си́лѣ твое́й, гдⷭ҇и.
И҆зше́лъ є҆сѝ, ще́дре, на сп҃се́нїе люде́й твои́хъ, хрⷭ҇тѐ, созыва́еши же дрꙋ́ги си̑лы твоѧ̑, и҆ весе́лїе бы́сть прише́ствїе твоѐ вѣ́рнѡ тебѣ̀ вопїю́щымъ: сла́ва си́лѣ твое́й, гдⷭ҇и.
Бг҃оро́диченъ: Дв҃а и҆ мт҃и преесте́ственнѡ ꙗ҆ви́ласѧ є҆сѝ, всечтⷭ҇аѧ: ꙗ҆́кѡ бг҃а того́жде и҆ чл҃вѣ́ка хрⷭ҇та̀ ро́ждшаѧ, є҆мꙋ́же со стра́хомъ вопїю́тъ а҆́гг҃льскїѧ чи́ны: сла́ва си́лѣ твое́й, гдⷭ҇и.
<<к҃з: 53>>
Пѣ́снь є҃.
І҆рмо́съ: Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.
Невозра́тнымъ жела́нїемъ при́снѡ къ высотѣ̀, къ тебѣ̀, хрⷭ҇тѐ, носи́ми, кра́йнѣйшемꙋ всѣ́хъ жела́нїй, а҆́гг҃льскїѧ си̑лы непреста́ннѡ тѧ̀ сла́вѧтъ.
Ты̀ ᲂу҆́мныѧ по сꙋществꙋ̀, нетлѣ̑нныѧ бл҃года́тїю твое́ю, хрⷭ҇тѐ, ᲂу҆стро́илъ є҆сѝ пѣснопѣ́вцы твоегѡ̀ вели́чества, а҆́гг҃лы твоѧ̑ по ѡ҆́бразꙋ содѣ́лавъ непостижи́ме.
Ты̀ непреклѡ́нны на го́ршее, къ тебѣ̀ приближе́нїемъ, хрⷭ҇тѐ, сохрани́лъ є҆сѝ твоѧ̑ слꙋги̑: и҆сто́чникъ бо бл҃гости ты̀ є҆сѝ, бл҃готвори́ши досто́йнѡ тебѣ̀ слꙋжа́щыѧ.
Бг҃оро́диченъ: Оу҆мерщвле́ннꙋю мою̀ дꙋ́шꙋ страстьмѝ ме́рзкими, всенепоро́чнаѧ, ѡ҆живѝ, жи́зни храни́телѧ ро́ждшаѧ: и҆ къ стезѝ вѣ́чнѣй, и҆ бл҃же́ннѣй жи́зни ᲂу҆пра́ви.
Пѣ́снь ѕ҃.
І҆рмо́съ: І҆ѡ́нꙋ въ ки́тѣ, гдⷭ҇и, є҆ди́наго всели́лъ є҆сѝ, мене́ же свѧ́заннаго мре́жами вра́жїѧми, ꙗ҆́кѡ ѿ тлѝ ѻ҆́наго сп҃сѝ.
Бг҃олѣ́пнѣ ѿ не сꙋ́щихъ, гдⷭ҇и, сло́вомъ твои́мъ приве́лъ є҆сѝ сꙋщєства̀ нбⷭ҇ныхъ безсме́ртныхъ во́инствъ, свѣтови̑дны ты̑ѧ содѣ́ловаѧ.
Таи̑нницы чтⷭ҇ні́и бж҃їѧ хвале́нїѧ бы́сте, безпло́тнїи, гра́ждане нбⷭ҇ныѧ и҆ бж҃е́ственныѧ и҆́стиннѡ ски́нїи, творцꙋ̀ досто́йнѡ слꙋжа́ще.
Безпло́тныхъ чи́ни ᲂу҆́мнїи тѧ̀, сн҃е бж҃їй пребезнача́льный, хва́лѧтъ непреста́ннѡ и҆ славосло́вѧтъ, ꙗ҆́кѡ творца̀ и҆ созда́телѧ всѧ́чєскимъ.
Бг҃оро́диченъ: Со ѻ҆ц҃е́мъ въ вы́шнихъ, пречтⷭ҇аѧ, безнача́льнѣ сѣдѧ́щаго, на ѡ҆б̾ѧ́тїихъ твои́хъ восклони́ти сподо́биласѧ є҆сѝ: то́же на́мъ пода́ждь, чтⷭ҇аѧ, рабѡ́мъ твои̑мъ млⷭ҇тива.
Конда́къ, гла́съ в҃:
А҆рхїстрати́зи бж҃їи, слꙋжи́телїе бжⷭ҇твенныѧ сла́вы, а҆́гг҃лѡвъ нача̑льницы, и҆ человѣ́кѡвъ наста̑вницы, поле́зное на́мъ проси́те и҆ ве́лїю млⷭ҇ть, ꙗ҆́кѡ безпло́тныхъ а҆рхїстрати́зи.
<<к҃з ѡ҆б.: 54>>
І҆́косъ: Ре́клъ є҆сѝ, чл҃вѣколю́бче, въ писа́нїихъ твои́хъ, мно́жествꙋ ра́доватисѧ а҆́гг҃лѡвъ на нб҃сѝ ѡ҆ чл҃вѣ́цѣ є҆ди́номъ ка́ющемсѧ, безсме́ртне: тѣ́мже мы̀ и҆̀же въ беззако́нїихъ, безгрѣ́шне є҆ди́не сердцевѣ́дче, тѧ̀ моли́ти всегда̀ дерза́емъ ꙗ҆́кѡ бл҃гоꙋтро́бнаго, ᲂу҆ще́дрити, и҆ низпосла́ти недостѡ́йнымъ ᲂу҆миле́нїе, влⷣко, подаѧ́й на́мъ проще́нїе: ѡ҆ всѣ́хъ бо на́съ мо́лѧтсѧ тебѣ̀ безпло́тныхъ а҆рхїстрати́зи.
Пѣ́снь з҃.
І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е, во вѣ́ки.
Свѣ́ты ꙗ҆ви́лъ є҆сѝ, ще́дре, а҆́гг҃лѡвъ твои́хъ невеще́ственное сꙋщество̀, неизрече́ннагѡ свѣ́та и҆сполнѧ́еми непреста́ннѡ, бл҃гослове́нъ є҆сѝ, зовꙋ́щыѧ, бж҃е, во вѣ́ки.
Є҆мꙋ́же предстоѧ́тъ непреста́ннѡ, слꙋжа́ще, тмы̑ а҆́гг҃лѡвъ, лица́ же зрѣ́ти не терпѧ́тъ зрѣ́нїѧ, бл҃гослове́нъ є҆сѝ, зовꙋ́ще, гдⷭ҇и бж҃е, во вѣ́ки.
Сло́вомъ твои́мъ ѵ҆поста́снымъ а҆́гг҃льское є҆стество̀ содѣ́лалъ є҆сѝ, ѡ҆ст҃и́въ же бж҃е́ственнымъ дх҃омъ, трⷪ҇цꙋ бг҃осло́вити наꙋчи́лъ є҆сѝ, бж҃е, во вѣ́ки.
Трⷪ҇ченъ: Трѝ ᲂу҆́бѡ ᲂу҆́мствꙋюще ѵ҆поста̑си, неѡпи́санное сла́вимъ сꙋщество̀, ѻ҆ц҃а̀, сло́ва со дх҃омъ, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Пѣ́снь и҃.
І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.
А҆́гг҃льскомꙋ поревнꙋ́емъ житїю̀, и҆ мы̑сли впери́мъ къ высотѣ̀, и҆ съ ни́ми невеще́ственнѡ воспои́мъ гдⷭ҇а, пою́ще и҆ превозносѧ́ще во всѧ̑ вѣ́ки.
Лико́вствєнницы ликова́нїѧ нбⷭ҇нїи, прⷭ҇то́лъ ѡ҆бстоѧ́ще сла́вы, ѡ҆́крестъ бг҃а же всегда̀ ѡ҆браща́ющесѧ, а҆́гг҃ли пою́тъ и҆ превозно́сѧтъ є҆го̀ во всѧ̑ вѣ́ки.
Невеще́ственнагѡ ѻ҆гнѧ̀ творѧ́щей пла́мень, на высотѣ̀ <<к҃и: 55>> непреста́ннѡ слꙋжа́щыѧ, и҆ а҆́гг҃лы дꙋ́хи ꙗ҆влѧ́ющей трⷪ҇цѣ покланѧ́емсѧ, и҆ славосло́вимъ во всѧ̑ вѣ́ки.
Бг҃оро́диченъ: Є҆мꙋ́же на нб҃сѝ предстоѧ́тъ съ тре́петомъ тмы̑ а҆́гг҃лъ и҆ а҆рха̑гг҃лъ, того̀ на ѡ҆б̾ѧ́тїихъ носи́ти сподо́биласѧ є҆сѝ, бцⷣе: молѝ сп҃сти́сѧ славосло́вѧщымъ є҆го̀ во всѧ̑ вѣ́ки.
Пѣ́снь ѳ҃.
І҆рмо́съ: Оу҆ста́вы прешла̀ є҆сѝ є҆стества̀, содѣ́телѧ заче́нши и҆ гдⷭ҇а, и҆ две́рь сп҃се́нїѧ мі́рови была̀ є҆сѝ: тѣ́мъ тѧ̀, бцⷣе, непреста́ннѡ велича́емъ.
Тѧ̀ неизрече́ннѡ соедини́вшаго нбⷭ҇нымъ, хрⷭ҇тѐ, земна̑ѧ, и҆ є҆ди́нꙋ цр҃ковь соверши́вша а҆́гг҃лѡвъ и҆ человѣ́кѡвъ, непреста́ннѡ велича́емъ.
А҆́гг҃ли же и҆ а҆рха́гг҃ли, прⷭ҇то́ли, вла̑сти и҆ гдⷭ҇ства, нача̑ла же и҆ си̑лы, херꙋві́ми и҆ серафі́ми, съ бцⷣею ѡ҆ мі́рѣ моли́тесѧ.
Всѣ́хъ предста́телїе показꙋ́ющїисѧ, мїхаи́лъ съ гаврїи́ломъ, посѣти́те ѿ любвѐ чтꙋ́щыѧ всепра́зднственнꙋю па́мѧть ва́шꙋ, и҆ вѣ́рнѡ воспѣва́ющыѧ сп҃са́йте ѿ всѧ́кагѡ ѡ҆бстоѧ́нїѧ.
Бг҃оро́диченъ: Ра́дꙋйсѧ, ст҃а́ѧ бг҃оневѣ́сто: ра́дꙋйсѧ, свѣ́тъ мі́рꙋ ро́ждшаѧ вѣ̑рнымъ: ра́дꙋйсѧ, стѣно̀ и҆ покро́ве всѣ́хъ на́съ, бг҃а ꙗ҆́кѡ благодѣ́телѧ за ны̀ непреста́ннѡ молѝ.
Свѣти́ленъ.
Подо́бенъ: Дх҃омъ во ст҃и́лищи:
Ѻ҆́гненныхъ а҆рхїстрати́же слꙋ́гъ, предста́тельство ѿ ѻ҆ц҃а̀ прїѧ́лъ є҆сѝ, мїхаи́ле, свѣ́тѡвъ: тѣ́мъ и҆ сїѧ́нїе тогѡ̀ сла́вы сїѧ́ющее и҆́маши, ѡ҆́крестъ пречтⷭ҇агѡ прⷭ҇то́ла ты̀ предстоѧ̀, ꙗ҆́кѡ пе́рвый невеще́ственныхъ чинѡ́въ.
Бг҃оро́диченъ: Почита́ютъ ржⷭ҇тво̀ твоѐ безпло́тныхъ чи́нове, ра́дости бо земнорѡ́дныѧ ты̀ напо́лнила є҆сѝ є҆ди́на. тѣ́мъ тѧ̀ всенепоро́чнꙋю вѣ́рнїи сла́вимъ, въ пѣ́нїихъ славосло́вѧще: свѣ́тъ бо сꙋ́щымъ во тмѣ̀ возсїѧ́ла є҆сѝ, ꙗ҆́кѡ ᲂу҆́треннїй возсїѧ́вшїй де́нь.
На хвали́техъ стїхи̑ры, гла́съ в҃:
Невеще́ственный прⷭ҇то́лъ ѡ҆крꙋжа́юще ᲂу҆́мнаѧ сꙋщєства̀, бж҃е́ственнїи безтѣле́снїи, трист҃ꙋ́ю пѣ́снь прави́телю бг҃ꙋ пла́менными <<к҃и ѡ҆б.: 56>> ᲂу҆стна́ми поетѐ: ст҃ы́й бж҃е, ѻ҆́ч҃е безнача́льный, ст҃ы́й крѣ́пкїй, сн҃е собезнача́льный, ст҃ы́й безсме́ртный, є҆диносꙋ́щный дш҃е, ѻ҆ц҃ꙋ̀ и҆ сн҃ꙋ спрославлѧ́емый. [Два́жды.]
Безтѣле́сными ᲂу҆стна́ми и҆ ᲂу҆́мными ᲂу҆сты̀, а҆́гг҃льстїи чи́ни непреста́нное пѣ́нїе прино́сѧтъ твоемꙋ̀ непристꙋ́пномꙋ бжⷭ҇твꙋ̀, гдⷭ҇и: и҆ ᲂу҆́ми чи́стїи и҆ слꙋжи́телїе твоеѧ̀ сла́вы хва́лѧтъ тѧ̀, гдⷭ҇и, съ ни́миже мїхаи́лъ безтѣле́сный, и҆ гаврїи́лъ ѕѣлѡ̀ бл҃голѣ́пнѣйшїй, и҆ первостоѧ́телїе го́рнихъ си́лъ, а҆рхїстрати́зи а҆́гг҃льстїи, ᲂу҆чреди́телїе на́ши дне́сь бы́ша, пѣ̑сни пѣ́сней повелѣва́юще на́мъ пѣ́ти непристꙋ́пнѣй сла́вѣ твое́й, чл҃вѣколю́бче: є҆́йже мо́лѧтсѧ непреста́ннѡ за дꙋ́шы на́шѧ.
Гла́съ д҃: Ѻ҆́гненными ᲂу҆стна́ми пою́тъ тѧ̀ херꙋві́ми, хрⷭ҇тѐ бж҃е, безтѣле́сными же ᲂу҆сты̀ немо́лчнѡ славосло́витъ тѧ̀ а҆рха́гг҃льскїй ли́къ: мїхаи́лъ же а҆рхїстрати́гъ вы́шнихъ си́лъ, побѣ́днꙋю пѣ́снь непреста́ннѡ прино́ситъ сла́вѣ твое́й. то́й бо на́съ дне́сь ѡ҆зарѝ къ торжествꙋ̀ свѣ́тломꙋ возбрѧца́ти досто́йнѣ ѱало́мски, хвалꙋ̀ трист҃ꙋ́ю бре́нными ᲂу҆стна́ми: ꙗ҆́кѡ всѧ́чєскаѧ твоегѡ̀ хвале́нїѧ и҆спо́лнишасѧ, и҆ подае́ши мі́рꙋ тѣ́мъ ве́лїю млⷭ҇ть.
Сла́ва, гла́съ є҃. Самогла́сенъ:
И҆дѣ́же ѡ҆сѣнѧ́етъ бл҃года́ть твоѧ̀, а҆рха́гг҃ле, ѿтꙋ́дꙋ дїа́волѧ прого́нитсѧ си́ла: не терпи́тъ бо свѣ́та твоегѡ̀ ви́дѣти спады́й денни́ца. тѣ́мъ мо́лимъ тѧ̀, ѻ҆гненѡ́сныѧ є҆гѡ̀ стрѣ́лы, ꙗ҆̀же на ны̀ дви̑жимыѧ, ᲂу҆гасѝ хода́тайствомъ твои́мъ, и҆збавлѧ́ѧ на́съ ѿ собла̑знъ є҆гѡ̀, достохва́льный [и҆́мⷬ҇къ] а҆рхїстрати́же.
И҆ ны́нѣ, бг҃оро́диченъ:
Бл҃жи́мъ тѧ̀, бцⷣе дв҃о, и҆ сла́вимъ тѧ̀ вѣ́рнїи по до́лгꙋ: гра́дъ непоколеби́мый, стѣ́нꙋ неѡбори́мꙋ, тве́рдꙋю предста́тельницꙋ, и҆ прибѣ́жище дꙋ́шъ на́шихъ.
Крⷭ҇тобг҃оро́диченъ: А҆́гнца своего̀ а҆́гница и҆ногда̀ зрѧ́щи къ заколе́нїю тща́щагосѧ ᲂу҆се́рднѡ послѣ́доваше, сїѧ̑ вопїю́щи є҆мꙋ̀: ка́мѡ и҆́деши, ча́до моѐ сладча́йшее хрⷭ҇тѐ; чесѡ̀ ра́ди ско́рое тече́нїе сїѐ, долготерпѣли́ве, тече́ши нелѣ́ностнѡ; і҆и҃се возжелѣ́ннѣйшїй <<к҃ѳ: 57>> безгрѣ́шный, многомлⷭ҇тиве гдⷭ҇и, да́ждь мнѣ̀ сло́во рабѣ̀ твое́й, сн҃е мо́й вселюбе́знѣйшїи: не пре́зри, ще́дре, молча̀, тѧ̀ стра́ннѡ ро́ждшꙋю, бж҃е всеще́дрый, да́рꙋѧй мі́рꙋ ве́лїю млⷭ҇ть.
На стїхо́внѣ. Сла́ва, гла́съ д҃:
И҆̀же со́лнечными лꙋча́ми бж҃е́ственнагѡ свѣ́та просвѣща́еми, а҆рхїстрати́зи, невеще́ственныхъ ѡ҆зарѧ́ете чинонача̑лїѧ, ꙗ҆́кѡ свѣ́тъ бѣлоѡбразꙋ́юще въ вы́шнихъ, ѻ҆́гнь ѡ҆блиста́етъ въ мі́рѣ непристꙋ́пнагѡ бжⷭ҇тва̀: тѣ́мъ и҆ трист҃ꙋ́ю пѣ́снь пла́менными ᲂу҆стна́ми немо́лчнѡ поетѐ: ст҃ъ, ст҃ъ, ст҃ъ є҆сѝ, бж҃е на́шъ, сла́ва тебѣ̀.
И҆ ны́нѣ, бг҃оро́диченъ:
Бцⷣе всѣ́хъ цр҃и́це, правосла́вныхъ похвало̀, є҆реті́чествꙋющихъ шата̑нїѧ разорѝ, и҆ ли́ца и҆́хъ посрамѝ не кла́нѧющихсѧ, нижѐ чтꙋ́щихъ, пречтⷭ҇аѧ, чтⷭ҇ны́й тво́й ѡ҆́бразъ.
Крⷭ҇тобг҃оро́диченъ: Распина́ема ви́дѧщи, ꙳ и҆ въ ре́бра пробода́ема копїе́мъ, ꙳ пречтⷭ҇аѧ, хрⷭ҇та̀ чл҃вѣколю́бца, ꙳ пла́каше вопїю́щи: ꙳ что̀ сїѐ сн҃е мо́й; ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆̀же сотвори́лъ є҆сѝ дѡ́браѧ и҆̀мъ; и҆ тщи́шисѧ безча́дствовати мѧ̀ вселюбе́знѣйше: ꙳ дивлю́сѧ, бл҃гоꙋтро́бне, твоемꙋ̀ во́льномꙋ распѧ́тїю.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.